بنت مختلفة

دانيا

احب قبل ما ابدا احكيلكم قصتي اعرفكم بنفسي .. انا دانيا عمري ١٩ سنة عايشة انا و جدتي ع جزيرة صغيرة معزولة عن كل البشر .. ايه اللي جابنا هنا ؟؟ دي حدوتة قديمة قوي ...
وانا صغيرة كان عمري ٤ سنين كنت فرحلة في المركب انا و بابايا و مامتي و اخويا و جدتي .. كانت رحلة عائلية جميلة جدا بمناسبة ان بابا كان لسة شاري المركب ده جديد .. و بدون اي مقدمات المركب خبطت في صخرة كبيرة في البحر خرمتها .. ياعيني بابا ملحقش يفرح بالمركب الجديد .. شوية شوية المركب بتغرق بينا واحنا مش عارفين نتصرف لغاية اما المركب غرقت خالص ومسكت انا وجدتي في لوح خشب و بابا و ماما فلوح تاني وحطوا اخويا فوقيه .. اصله كان لسة صغير عمره شهور
قعدنا في البحر يومين و لحسن حظنا ان جدتي لحقت شنطتها الجلد و كانت مليانة اكل .. كنا حاطينها فوق اللوح بتاعنا و كل يوم نطلع منها حاجة صغيرة ناكلها .. مكناش بناكل كتير عشان الاكل ميخلصش عشان مكناش عارفين هنقعد كام يوم في البحر و كمان عشان منتقلش عشان نقدر نعوم ع اد ما نقدر .. وفي اليوم التالت كان في عاصفة شديدة قوي فرقتنا انا و جدتي عن بابا و ماما و جابتنا ع الجزيرة دي .. معرفش بابا و ماما ايه حصلهم .. ممكن يكونوا ماتوا .. او العاصفة حدفتهم في جزيرة تانية .. الله اعلم ..
جيت انا و جدتي الجزيرة دي .. هي صغيرة فلفيناها كلها و حفظنا كل مكان فيها .. عرفنا نتعايش فيها و بنينا لنفسنا بيت صغير من دور واحد جواه اوضتين و صالة .. و بنينا العفش كمان بنفسنا من الخشب و الحصير و مواد تانية كتير قوي ..
جدتي علمتني الكتابة و القراية وانا صغيرة ع امل اننا فيوم من الايام كنا نرجع تاني بلدنا لكن مع مرور الوقت انا و هي فقدنا الرغبة في اننا نرجع و اتعلقنا بالجزيرة قوي لدرجة اننا بقينا مش عايزين نسيبها ابدا
اتعلمت حرف كتير قوي و اتعلمت اتعامل مع حيوانات كتير جدا و بقيت شجاعة و جريئة جدا !!
دي كانت البداية .. اه صحيح احنا كمان سمينا الجزيرة تشرانيا ..
تشرانيا جزيرة صغيرة قوي فيها جبل واحد بس .. هو مش عالي قوي و نازل منه شلال بيصب في بحيرة جميلة فوسط الجزيرة بالظبط ميتها عذبة و صالحة للشرب .. و في كمان شط الرمل فيه دهبي قوي .. و ارض فاضية جنب بيتنا عملناها مزرعة .. و منطقة شبه الغابات فيها اشجار عالية قوي و قرود من كل الانواع و نمور و فهود و طيور بالوان جميلة و تخطف العقل .
الحياة في تشرانيا جميلة و مليانة مغامرات يعني مثلا مرة صارعت نمر !! كل يوم بتعلم حاجة جديدة و جدتي مالية عليا دنيتي .. لكن رغم كل ده انا بخاف .. بخاف لو فيوم جدتي توفت . .هي دلوقتي كبرت و مش هتقعدلي كتير مهما قلت ربنا يديها طولت العمر .. و بخاف لو مت قبلها هي هتعيش ازاي بعدي لوحدها من غير ما حد يساعدها .. و بخاف حد يجي الجزيرة و ياخدها مننا و يفسد فيها .. وانا عمري ما اتعاملت مع بشر غير جدتي اكيد الناس شخصياتهم مختلفة عن بعضهم و مش كل الناس زي جدتي .. مش كل البشر هقدر اتعامل معاهم ..
المخاوف دي كلها بدايات ظهروها جوايا اما كبرت و بقيت حوالي ١٦ سنة .. اما بقيت واعية و فاهمة بسبب كلام جدتي و نصايحها ليا .. بس دايما اللي فبال الواحد مهما كان نسبة حدوثه ١٠٠% قدرة ربنا في انه يغير موازين اي حاجة فوق كل شئ .. فكنت دايما زي ما جدتي علمتني بقول " لا اله الا انت سبحانك اني كنت من الظالمين " ..