لتنسون التصويت و التعليق بين الفقرات🤍
#وَتيرة_وَد
#الكاتبة روح الدليمي
********************
واكفه دا اسوي بالغده فزيت لما اجه عليه
حضني من وره و طبع بوسه على رگبتي
درت وجهي عليه و بسته من خده و گلت
جوري:حَبيبي راجع من وكت
فيصل:اشتاقيتلج ماتحملت اطول اكثر
جوري:امممم، غيابي مأثر عليك استاذ فيصل؟
فيصل:تعودت على وجودج يمي بالشركه، رجعي عاد
جوري:حَبيبي فهد كبر و مسؤوليته كبرت وياه، اذا اني النهار كله بالشغل منو يهتم ب اكله و دروسه لما يرجع من المدرسه؟ بعدين كل فتره دا اجي و كل شغلي دا اسوي من البيت
سحبني من يم الطباخ و فرني عليه
باس خشمي و گال و هوَ يبعد خصلات شعري
عن وجهي ...
فيصل:جهزي كلشي من الليل، المهم تكونين يمي بكل لحظه و كل دقيقه
جوري:الله كريم، هسه روح غسل و بدل ملابسك و تعال
الاكل شوي و يجهز
باسني و راح يبدل و اني رجعت اكمل الاكل
باوعت للساعه باقي ربع ساعه و يرجع فهد
كملت الاكل و رحت لغرفته طلعتله ملابسه حتى يبدل
حطيتهم على الجربايه، و طلعت لما اندك الجرس
يومي راحت فتحت الباب، و دخل فهد معصب
شمر جنطته بالگاع و كعد على القنفه وجهه
محتقن و واضح عليه العصبيه
رحت وكفت يمه و گلت بزعل...
جوري:فهود ماما وين بوستي؟
رفع عيونه باوعلي و رجع
دار وجهه للجهه الثانيه.. و گال
فهد:عوفيني بحالي
اجه فيصل مبدل ملابسه باوعلي و رفع
حاجبه بمعنى "شكو" گلت
جوري:من اجه كالب وجهه ماعرف شبي، يكلي عوفيني بحالي
راح كعد يمه و سحبه لحضنه يريد يبوسه
بس فاجئنه لما دفع فيصل و كام من مكانه
يريد يروح للغرفه، عاط بي فيصل بصوت عالي
تصنم بمكانه ما تحرك..
فيصل:فههههددددد
جوري:لتصيح عليه فيصل!
فيصل:حَبيبتي لتدخلين أنتِ، تعال هنا اوكف كدامي
رجع راح يم فيصل وكف كدامه منزل راسه
گال
فهد:نعم بابا
فيصل:اعتذر يلا، مني و من امك بسرعهههه
لزم ايده باسها و گال بهدوء
فهد:اسف
فيصل:يلا اعتذر من امك
اجه ب اتجاهي باسني من ايدي و گال
فهد:اسف ماما مو قصدي
نزلت روحي لمتسواه و كتله
جوري:شبيك حَبيبي منو وياك؟
فهد:متريدني
جوري:منو هاي الي متريد ابني
رفع عيونه عليه متجمعه الدموع بيها
گال و هوَ يخفي دموعه
فهد:شهد متحبني متريدني، شهد تحب عزيز
كام فيصل اجه يمنه لزمه من ايده و گال بعصبيه
فيصل:وينك وين الحب و أنتَ بكد القندره بعدك؟
فهد:بس ماما گالت شهد راح تصير مرتي لازم احبها
فتحت عيوني مصدومه و گلت و اني ااشر على روحي
جوري:اني كلتت؟
فهد:ايي سمعتج أنتِ و خاله يقين تحجون كلتي بس نكبر نتزوج اني وياها
باوعت لفيصل نظراته تحولت للعصبيه
و يباوعلي بغضب، رجع وجه نظراته لفهد
و گال ب امر
فيصل:لغرفتك بسرعه ممنوع تطلع منها اليوم
جوري:فيصل هاي شبيك، خلي يتغده اول
فيصل:فهددد سمعتني؟؟؟
هز راسه و راح لغرفته زعلان
كمت من الكاع باوعت لفيصل و گلت
جوري:ليش هيج تصرفت وياه؟ ترا طفل بعده ميفهم
فيصل:شفتييي كلامج شنو زرع بباله؟؟
جوري:جنه نتشاقه اني و يقين شدراني راح يسمعنه!
دك تلفونه عافني و رجع كعد بمكانه و جاوب
من خلال كلامه عرفته يحجي ويه واحد من اخوانه
رجعت للمطبخ صبيت الاكل و حطيته
على الميز و صحت على فيصل يجي حتى ناكل
دخل للمطبخ و گال
فيصل:روحي جيبي خلي يتغده ويانه
جوري:يعني برأيك راح يجي بعد ما رزلته؟ ع اساس متعرف ابنك
فيصل:كتلة عناد أنتِ وياه ماعنده صفه من صفاتي
جوري:لا عنده، عصبيته منك
فيصل:ديلا روحي جيبي و تعالي بسرعه ترا جوعان
رحت لغرفه فهد دكيت الباب و دخلت
لكيته متمدد بفراشه بدون ميبدل ملابسه
رحت يمه رفعته لحضني و طبعت بوسه على
راسه، و گلت..
جوري:ابني الحلو معقوله تزعل من بابا؟
فهد:بابا ميحبني
رجعت بسته و حضنته بقوه اكثر و گلت
جوري:لا فهد ابوك يحبك اكثر من كل شي بالدنيا
بس حَبيبي بعدك كلش صغير على هل سوالف
ميصير تفكر بهيج شغلات ابد
ابتعد عن حضني و گال
فهد:اريد انام ممكن تطلعين؟
جوري:سويتلك باميه تحبها أنتَ مو البارحه كتلي
مشتهي عليها؟ يلا بدل ملابسك و غسل و تعال حتى ناكل سوه
فهد:بابا ميقبل اطلع من غرفتي
جوري:لا هوَ گال ما اكل اذا فهد ميكعد ياكل ويايه
فهد:بابا ميكول هيج حرام تكذبين ماما
ضحكت و كتله
جوري:هوَ صح مكال هيج بس كلي روحي جيبي ياكل ويانه، يعني يريدك يمه يلا حَبيبي راح اروح اني انتظرك تجي تمام؟
فهد:خلي يجي هوَ يكلي يلا اطلع و يعتذر مني لان صيح عليه
جوري:وتالي فهد يلا امي كوم
انفتح الباب و دخل فيصل اشرلي
اطلع عفتهم سوه و رجعت للمطبخ و كعدت
انتظرهم يجون..
دقايق و اجو ثنينهم كعدوا
اكلنا بهدوء تام محد بينه نطق حرف
دك تلفوني ردت اجاوب فهد گال
فهد:ماما هسه بابا هم يعصب عليج ميقبل نحجي على الاكل
جوري:هاي اسو خاف تريد شي
فيصل:بعدين خابريها كملي اكلج
رجعت تلفوني على الميز ما اكدر اعانده
كدام فهد حتى ليتعلم و يصير يعاند هوَ هم
كملنا اكل كمنه نغسل و يومي دخلت للمطبخ
حتى تكمل شغلها
عفتها تسوي المطبخ و اني خدرت جاي
و صبيت الي و لفيصل و كعدنا بالحديقه
نشرب..
الجو كلش حلو ربيع، و الورود مفتحه
و ريحتهم ترد الروح
دكيت على اسو طولت لحتى جاوبتني
جوري:حَبيبي دكيتي عليه جنه نتغده
اسماء:الف عافيه عليكم، احد يمج؟
جوري:كاعدين اني و فيصل نشرب جاي
تعالو
اسماء:جوري يمان من البارحه ما رجع للبيت ادك عليه
تلفونه مغلق، سئلي فيصل يعرف وينه؟
جوري:شلون ما رجع للبيت؟؟
فيصل:شكو؟؟
جوري:اسو تكول يمان من البارحه مراجع للبيت و تلفونه مغلق
كام من مكانه و تلفونه بيده رجعت احجي ويه
اسو
جوري:تعالي يمنه فيصل حيشوفه وين
اسماء:خايفه عليه جوري يمان مو من عوايده يتأخر ابد و لا يعوف تلفونه بدون شحن
جوري:ماكو شي ان شاء الله، جيبي افونه و تعالي يمنه ننتظرج
اسماء:خاف يرجع للبيت و ميلگاني
جوري:أنتِ دزيله رساله بلغي جايتنه من يفتح تلفونه راح يشوفها تعالي يلا المفروض من تشوفي تأخر تخابرين تحجين و تجين يمنه
اسماء:يلا هسه نبدل و نجي
سديته منها و كمت اشوف فيصل
لكيته بعده يحجي بالتلفون كعدت يمه انتظره
يخلص حتى افهم منه
شوي و سده باوعلي و گال
فيصل:ديري بالج تكولين لاسو شي
جوري:شكو حَبيبي كلشي ما فهمت
فيصل:يمان مسوي حادث و حالته كلش خطره
شهگت و ضربت على صدري
جوري:عزااا شلووون
فيصل:ما اعرف بشار متخبل رايح اني، اذا اجت ديري بالج تحسسيها بشي
جوري:طمني فدوه
فيصل:اذا ردتي شي خابريني، ديري بالج على نفسج
طلع فيصل من البيت و عافني بحيرتي
و خوفي و قلقي
كعدت و صرت ادعي الله يحفظه
و يكومه بالسلامه لخاطر مرته و بنته
اجاني فهد باوعلي مستغرب من حالتي
و گال
فهد:امي شبيج؟ بابا زعلج
اشرتله يجي يمي حضنته و گلت
جوري:لا حَبيبي بس بابا صارتله شغله و طلع من البيت مستعجل
فهد:عمو يمان شبي؟
جوري:فهد كم مره گتلك ممنوع تتسمع على احد!
باوعلي فتح عيونه على وسعها و گال
فهد:والله ما متقصد ردت ادخل عليكم و سمعت
مو بقصدي
جوري:دير بالك تحجي شي فهد!
فهد:من شوكت اني احجي اسرار؟
حضنته و بسته من راسه
و گلت
جوري:عفيه عليك حَبيبي أنتَ، هسه روح لغرفتك سوي واجباتك اني شوي و اجيك
باسني من خدودي و گال
فهد:ميحتاج تجين اني اكمل كلشي وحدي هسه تجي عمه اسماء ابقي وياها و اني اخذ ايفين عنكم
جوري:فدوه اروحلك امي أنتَ يلا روح حَبيبي
و لتنسى اخذ مي يمك و اشرب شكد متكدر
فهد:حاضر امي
راح للمطبخ و اني كمت طلعت للحديقه
شلت الاستكانات و دخلتهن جوه
لكيت يومي گاعده تاكل
تذكرت عدنه ببسي بالثلاجه
صبيت الي و الها خليته يمها تشكرتني
اخذت كلاصي و رجعت للحديقه انتظر اسو تجي
شوي و اندك الجرس كمت فتحت الباب
دخلت و ايفين لازمه ايدها
باوعتلها و گالت
اسماء:افوني ماما روحي يم فهد لعبي
هزت راسها و دخلت للبيت تركض
تقربت عليه اسو و حضنتني صارت تبجي
من كل گلبها تبجي و كأنو حاسه صاير شي ...
حاولت اهديها اخذتها و كعدنا
هيَ بس ساكته و دموعها تنزل قاطعت سكوتنا
و حجيت
جوري:اسو حَبيبتي متغديه احطلج اكل؟
اسماء:ما اشتهي شي، گلبي يأذيني خايفه جوري خايفه
جوري:ان شاء الله ماكو غير العافيه اهدي أنتِ و لتقهرين بروحج بنتج تخاف بعدين من تشوف حالتج
اسماء:خابري فيصل شوفي ماكو خبر ؟ بشار ميجاوب على اتصالاتي
اخذت تلفوني و دكيت على فيصل
شوي و جاوبني
جوري:حَبيبي طمني ماكو خبر؟ اسو دتسئل
فيصل:طالع من العمليه و مدخلينه للعنايه
جوري:من يصير شي انطيني خبر فدوه
فيصل:اني شوي و اجي ميقبلون نبقى
جوري:ننتظرك گلبي
سديته اسو رأساً گالت متسائله
اسماء:بشريي؟
جوري:بعد ماكو خبر هسه يجي و نفتهم من عنده
اسماء:گلبي راح يوكف اذا يصير بي شي اموت روحي وراه والله
جوري:اسم الله لتحجين هيج ان شاء الله ماكو الا كل خير
دخلنا للبيت و بقينه كاعدين ننتظر
خبر عن يمان
انفتح الباب و دخل فيصل ركضت عليه اسو
حضنته و صارت تبجي بحضنه
مد ايده على راسها مسح عليه باسها و گال
فيصل:اسو حَبيبتي تعالي كعدي احجي وياج
اسماء:والله عرفت صاير شي احجي بسرعه
فيصل:تعالي كعدي و احجيلج يلا بويه
سحبها كعدها على القنفه كعد
يمها و لزم ايدها و گال ب اسف
فيصل:اسو أنتِ قويه و تعرفين كلشي يصير بالدنيا
قضاء و قدر
نزلت دموعها و گالت بخوف
اسماء:ماات؟ جاوبنييي فيصل يمان مااات؟؟؟
صارت تضرب بروحها و تصيح و تبجي
حضنها فيصل يهديها، و اني رحت جبتلها مي
و رجعت كلتلها
جوري:اسو حَبيبتي مابي شي والله عايش هوَ، هاج شربي مي و اهدي
ابتعدت عن حضن فيصل و عاطت بيه
اسماء:جنتييي تعرفييين و بقيتييي ساكتهههه؟؟؟؟
فيصل:اني طلبت منها متحجي شي لحد ما نتأكد من وضعه شنو
اسماء:احجي فيصل والله راح اموت من خوفي عليه احجي شنو وضعه
فيصل:حالياً بالعنايه سووله عمليه عنده كسر برجله
و نزيف بالدماغ
زادت باللطم و الصياح اخذتها بحضني
تلوب بين ايدي متعرف شتسوي
جوري:فيصل اخذها خلي تشوفه و تطمن
فيصل:مراح يخلوها تشوفه
جوري:متشوفها شلون حالتها اخذها حتى لو بس خلي تروح و يبرد گلبها
كام و كومها وياه و هيَ بغير عالم
فصلت عنا كلنا و بس تبجي و تصيح
فيصل يحاول يسكتها حتى يحجي وياها
بس ماكو فقدت فد مره
ضربها على وجهها سكتت وبقت تباوع بعيونه
ثبتها من كتافها و گال
فيصل:اسف ضربتج بس متسكتين خبلتيني، امشي اخذج يلا
اخذت تلفونها و طلعت قبله تمشي بسرعه
اندار عليه فيصل و گال
فيصل:عينج على الجهال
جوري:بدون متوصيني حَبيبي طمني عود
راح هوَ و اني خابرت يقين
حالتهم حاله، منين اجتنه هل مصيبه ماعرف
حجيت وياها و طلبت منها تجي
و فعلاً اجتني هيَ و شهد
دخلت هيَ كعدت وبعدها دخلت شهد
بس شفت شهد لا ارادي ضحكت و تذكرت
موقف فهد، خرب بيومج جوري وكته هسه يعني
شهد:خاله وين فهود
جوري:ويه ايفين بالغرفه مالته روحي يمهم
حطت اصبعها بين شفايفها و گالت بخجل
شهد:بس هوَ زعلان مني ميريد يشوفني
لزمت ايدها و رحنه كعدنه يم يقين
اخذتها بحضني و گلت
جوري:شمسويه وياه حتى زعل منج؟
يقين:شكو؟
ضحكت و كلتلها
جوري:عاشكين و احنه يا غافلين لكم الله
شهد:خاله احجي وياه خلي يراضيني اريد العب وياه مو بس ايفين
جوري:مو تدلل يا حلو
صحت بصوت عالي على فهد
اجاني لما شاف شهد بقه واكف بمكانه و يباوع عليها
طبك حواجبه و صار يخزر بيها
ندست يقين حتى تنتبه اله جانت اصلاً صافنه عليه
و تضحك و تحاول تخفي ضحكتها
وكف مقابيلي و گال بعصبيه
فهد:نعم ماما
جوري:شهوده تريد تلعب وياك اخذها و روحوا
فهد:تعالي شوي احجي وياج
جوري:احجي هنا ماكو احد غريب
فهد:يلا ماما تعالي بس شوي
ضحكت على تصرفاته و كمت وياه
طلعنا من الصاله گال
فهد:ليش جبتيها مو تعرفيني ضايج منها؟
جوري:عيب ماما، هسه خاله يقين تزعل منك
فهد:ما اريدها خلي تروح لعزيز تلعب وياه اني شكو
جايه يمي
جوري:دتحجي حجي اكبر منك ترا، روح اخذها و العب وياها يلا حَبيبي
فهد:اووف امي اوووف
عطت بي و مثلت العصبيه
جوري:فههددد!!
فهد:اسف والله اعتذر منج
جوري:بلا كلام زايد صيح شهد و فوتوا جوه مو وكت عركاتكم انتو هم
بدون ميحجي شي دخل للصاله و اخذ شهد
و دخلوا للغرفه
رجعت كعدت يم يقين جانت تحجي بالتلفون
سدته و گالت
يقين:جوري وضع يمان مو زين ابد
جوري:سوده عليه ميستاهل ابد، ماعرفتوا شلون صار الحادث؟
يقين:تعرفين يمان سياقته متهوره كلش و على غفله صارت اشاره كدامه دايس بريك و مكلوبه بي السياره
جوري:الله يكومه بالسلامه
مر كم يوم يوم و يمان بعده بالمستشفى
بالعنايه داخل غيبوبه اسو حالتها يرثى لها
كطعت الاكل و مكابله المستشفى و گاعده
تنتظره يصحى
ايفين بقت يمي تلتهي ويه فهد
كل يوم تسأل على امها و ابوها ما اعرف شنو اجاوبها
اختصرها عليه و عليها اكلها "عدهم شغل"
بعد عشر ايام صحى يمان و وضعه الصحي
زين بس جان ميكدر يمشي بسبب الحادث عاموده الفقري متأذي
تحسنت حالته شوي طلعوا للبيت
**********
"اسماء"
طول الفتره الفاتت و اني متدمره نفسياً
بسبب وضع يمان، مجرد شوفته بهاي الحاله
تخليني انهار الاف المرات
صار يومين مطلعينه للبيت و ميقبل
ينطق حرف ويايه، سويتله شوربه و اخذتها
دخلت عليه للغرفه لازم تلفونه بيده
مجرد ما شافني سد تلفونه و غمض عيونه
متجاهلني..
نار و شبت بداخلي اني شنو ذنبي
بالي صار وياه متدمره دمار شامل
حطيت الصينيه على الكومدي و كعدت
يمه اخذت ايده بيدي و حجيت بهدوء
اسماء:حَبيبي سويتلك شوربه دجاج تحبها أنتَ
حتى تاخذ علاجك
سحب ايدي منه بدون ميحجي شي
نزلت دموعي و حجيت بغصه
اسماء:يمان ليش هيج دتعاملني اني شنو ذنبي؟؟
شنو سويتلك؟
يمان:طلعي اسو ما اريد اشوف احد و لا احجي ويه اي شخص
اسماء:بس اني مو احد، اني مرتك و حبيبتك
يمان:مو ذنبج تبقين ويايه و اني بعد ما اكدر اوكف على رجلي
اخذت ايدها بستها و نزلن دموعي على ايده
گلت
اسماء:اذا بهذا وضعك ما اكون وياك و اوكف وياك شكو متزوجني لعد؟
يمان:طلعي اسو بغلاتي عندج طلعي ما اتحمل تشوفيني هيج
اسماء:ما اطلع لتحاول، لو شما تسوي ابقى وياك و اكون سند الك، أنتَ مو بس زوجي يمان أنتَ كلشي بحياتي
مستحيل اعوفك و أنتَ ب امس الحاجه الي
يمان:لتسوين هيج ابوس ايدج، تعذبيني اكثر من ما تساعديني اخجل من وضعي و حالتي هاي كدامج
صفن بعيوني لثواني و اردف
يمان:اريد نتطلك، اسماء أنتِ ط..
حطيت ايدي على حلكه امنعه يحجي
و بجيت
اسماء:دير بالك يمان لتنطقها لتفكر بيها ابد
يمان:مو ذنبج تبقين وياي عيشي حياتج
حطيت ايدي على راسه و قربته عليه
طبعت بوسه عليه و حجيت و اني امسح بدموعي
اسماء:صدكني يمان لو شمتسوي و تتصرف ويايه
اني راح ابقى يمك و اصير الك عكازه تنتجي عليها
بعدين الدكتور گال فتره بس و ترجع تمشي
يمان:و اذا ما مشيت و بقيت مشلول طول عُمري اصير
هم على گلبج
طبعت بوسه على شفته ابتعدت عنه و گلت
اسماء:اذا أنتَ هم گلبي، يا حلاتهن الهموم لعد
خليك قوي و اني وياك ايد ب ايد نتخطى كلشي و يصير سوالف وداعت عيونك
يمان:اسف
اسماء:على شنو عُمري أنتَ
يمان:اسف لان تعاملت وياج هيج بالايام الفاتت
اسماء:عاذرتك اني، و مقدره وضعك الصحي و النفسي
يمان:تعالي يمي
رحت من الجهه الثانيه للجربايه
سحبني عليه و اخذني بين احضانه
باسني من راسي و اردف
يمان:الله لا يحرمني من وجودج، مُمتن للصدفه الي عرفتني عليج
اسماء:ولا منك حَبيبي احلى صدفه جمعتني بيك
ردت اغير نفسيته و اطلعه من المود
و احجيله الخبر الي ما كدرت احجي اله بسبب الحادث
عدلت كعدتي و گلت
اسماء:اكو خبر راح يفرحك
يمان:شنو هوَ
اسماء:اني حامل
يمان:گولي والله
ضحكت و گلت..
اسماء:والله
صار يضحك فرحان و حار ميعرف
شنو يكول و يعبر، بس فرحته واضحه على وجهه
تذكرت لما عرفت بحملي ب ايفين شنو گال
ضحكت و گلت
اسماء:راح تصير ام
ضحك و گال
يمان:مانسيتيها
اسماء:كلشي تحجي ينحفر حفر بعقلي و گلبي و ميطلع منه
يمان:احبج
اسماء:لو تحبني صدك متفكر حتى تطلكني
يمان:صدكيني ما اريد اظلمج ويايه، بس وعد متتكرر ابد مستحيل
بسته و گلت مبتسمه
اسماء:و اني اموت بيك
.....
"جوري"
من بعد ما يمان تحسن و صار وضعه زين
يلا كدرنا نرجع لحياتنه طبيعي
و خاصه لما چان بالغيبوبه كلنا جنه خايفين
ليصير بي شي بس الحمدلله عدت..
صحت على يومي حتى تجيب عده التنظيف
اريد انظف البيت صار فتره ممنظفين تنظيف عميق
بلشنا ننظف اني وياها ايدي بيدها حتى نخلص
اسرع..
دخل فيصل بيده اكياس جايب مسواك
شافني صاعده على الدرج و دا المع الثريات
عاط بيه و اجه يمشي ب اتجاهي
فيصل:ولججج نزلي لتوكعييين
جوري:بس هاي بقت خلي اكملها و انزل لحظه
سحبني من الدرج شالني نزلني
و گال و هوَ يسحب الوصله من ايدي
فيصل:بويه ليش تتعبين نفسج هيج نسيتي الدكتوره شنو كالتلج؟ مو زين عليج جهد حملج يروح
جوري:بس البيت صار هواي
قاطعني و گال
فيصل:يومي موجوده و اذا متكدر وحدها اجيب وحده ثانيه وياها، ليش متسمعين كلام أنتِ؟
جوري:خلص راح اكعد
فيصل:امشي تمددي بالفراش ممنوع تكومين يلا كدامي
سحبني من ايدي اخذني للغرفه اردف
فيصل:تمددي و ريحي نفسج، جوري هذا ثالث حمل الج
اذا يصير بي شي بعد متكدرين تحملين فكري بروحج و وضعج شويه
جوري:راح من بالي والله
فيصل:صارلج ٣ شهور حامل شلون يروح من بالج
لو واكعه او صاير بيج شي شسوي اني ؟؟
جوري:مصار شي حَبيبي خلص خليك ريلاكس
فيصل:دمشي ام الريلاكس، امشي تمددي يلا
جوري:اريد اسبح عركت كلش
فيصل:بعدين سبحي بس تمددي حتى لو نص ساعه ريحي نفسج و بعدين شتردين تسوين سوي
ما عاندته اكثر و رحت تمددت لان
خفت لا هم يصير شي بالطفل و اخسره
خلال الفتره الفاتت حملت مرتين و هم نزل
بدون سبب
شكد راجعنه و اخذنه علاجات بس
جانت بدون فائده
و اخر شي جربنه نزرع و عسى و لعل يثبت
و طبعاً ما حملت الا بعد ما دكتور القلب سمحلي بهل شي
حتى لا يأثر على گلبي
بقيت متمدده و من التعب نمت بدون ما احس
على روحي، حسيت على شخص يبوس بيه
فتحت عيوني لكيت فهد گاعد يمي
يبوس بيه، ابتسملته و گلت
جوري:حَبيبي شوكت رجعت
فهد:من زمان بس بابا ما قبل اجي اكعدج
گال خليها نايمه تعبانه
جوري:فدوه الك و لبابا
فهد:من شنو تعبانه؟
جوري:و لا شي حَبيبي بس نظفنا البيت و تعبت
فهد:ماما اني خايف عليج
عدلت روحي كعدت و سحبته لحضني
اردف
فهد:اخاف يصير بيج شي و ميصير عندي ام
جوري:ليش تخاف عُمري مابيه شي اني
فهد:گلبج مريض بابا هيج گال
جوري:ابوك گال لمنو ؟
فهد:ويه عمو بشار كله تعبانه كلش بس ما اريد احسسها
جوري:و احنه شنو كلنه على التسمع؟
فهد:لا ما تسمعت عليهم بس هوَ حجه كدامي بالتلفون
جوري:اممم، لتخاف عليه حَبيبي كلشي مابيه اني
مو هياتني كدامك؟
فهد:اي
جوري:بعد شكو حَبيبي أنتَ يلا روح اني بس اسبح و اجيكم
فهد:راح اگول ليومي تحطلج اكل لان احنه اكلنا
جوري:لا خطيه تعبت اليوم اني بس اجي احط لروحي
باسني و نزل من الجربايه
قبل ليطلع كتله
جوري:فهود صيح بابا حَبيبي خلي يجي
فهد:تمام
طلع من الغرفه و اني كمت من مكاني
طلعتلي ملابس حتى اسبح بس بالي بحجي فهد
معقوله صدك وضعي تعبان؟
بس چان حسيت لو صدك
حسيت على فيصل يحضني من وره
و طبع بوسه على كتفي گال
فيصل:صح النوم بويه خوش نمتي نومه
بدون اي مقدمات حجيت متسائله
جوري:فيصل شنو وضعي اني؟
فيصل:يا وضع؟
جوري:الصحي
ضحك و گال
فيصل:مابيج الا العافيه هياتج كدامي
جوري:لعد كلامك ويه بشار شنو؟ لدرجه الولد مخترع عباله اريد اموت و اعوفه؟
فيصل:اويلي منك فهد
جوري:جاوبني فيصل
فيصل:لتشغلين بالج هسه فوتي سبحي و اكلي و نحجي بعدين
عطت بي بصوت عالي
جوري:فيصللل جاوبنيييي، راح اموت اني؟
باسني من راسي و حضني گال بهدوء
فيصل:لا اسم الله عليج بويه أنتِ بس
جوري:احجي فهمني من حقي اعرف تراا
نتائج الفحوصات السويتهن هذاك اليوم طلعن مو؟
بعدني عن حضنه و كعدنا على الجربايه
باوعلي بنضرات ما لكيت الهن تفسير
و گال
فيصل:اي اليوم طلعن
جوري:احجي الله يخليك ابقى اجر منك الحجي جر
فيصل:اهدي و لتنفعلين كلشي و اله حل
جوري:طككك گلبي احجييي فيصل خلصنييي
فيصل:لازم تنزلين الطفل
ضحكت مستهزئه و كلت
جوري:تضحك عليه أنتَ مو؟ اي اي دتتشاقه ويايه
فيصل:هيج مواضيع مابيها شقه جوري، جنت حاير شلون احجيلج لان اعرف رده فعلج شنو راح تكون
جوري:ما انزله مستحيل و لتفكر ابد
فيصل:أنتِ اهم من الطفل!
جوري:ما انزله حتى لو اموت هذا الطفل مينزل
فيصل:جوري لازم تسوين عمليه ب اسرع وقت
جوري:الدكتور كلي وضعي زين و مابيه شي
فيصل:هذا قبل لتحملين مو هسه
جوري:شنو وضعي بالضبط احجي
فيصل:رجع عندج نفس الخلل بصمامات القلب و لازم عمليه، العمليه الفاتت مجابت نتيجه بسبب حملج
جوري:ما اسويها ما اريد حتى لو اموت
رفعت عيني ب اتجاه الباب
شفت فهد واكف و دموعه تنزل
جوري:فهود امي تعال ليش واكف بالباب و تبجي
فيصل:تعال بابا تعال
اجه علينه فتحتله ايدي حتى يجي
بحضني، بس تجاهلني و حضن فيصل
و زاد بالبجي
بعده عن حضنه و گال
فيصل:ليش تبجي بويه
فهد:امي راح تموت
فيصل:منو گال هل حجي عيوني أنتَ ماكو هيج شي
جوري:تعال يمي
فهد:أنتِ متريديني تريدين بس الطفل الي ببطنج
ما اريده اني ما احبه، بابا خلي يطلع منها ليبقى ببطنها و يتعبها
نزلت دموعي سحبته من حضن
فيصل بقه يصارع بيه يريدني اعوفه
بس قويت حضنتي اله و بسته من راسه و حجيت
جوري:أنتَ روحي من الدنيا شلون ما احبك
ابيع الدنيا كلها علمودك، و لا اي شخص يكدر ياخذ مكانك بگلبي
فهد:ما احبج اني عوفيني
جوري:بس اني احبك
فيصل:جوري عوفي براحته، و فوتي اسبحي بعدين نتفاهم
جوري:فهود امي مابيه شي اني بابا چان ديسوي مقلب بعمو بشار
ابتعد عن حضني و باوعلي و عيونه مليانه دموع
و گال ...
فهد:الكذب حرام اني اعرف كلشي
فيصل:فهد بابا يلا روح أنتَ شوي و نجي وراك احنه
طلع من الغرفه بدون ميحجي اي حرف زايد
اندار فيصل عليه اخذ ايدي بيده و اردف
فيصل:و أنتِ فوتي سبحي يلا و تعالي حتى تاكلين
جوري:فيصل خلي ببالك الطفل مستحيل انزله ماصدكت يثبت و يبقى هلكد ببطني
فيصل:ما نتناقش هسه سدي الموضوع و يلا كدامي على الحمام
كمت من مكاني و فتت حتى اسبح
مجرد ما نزل المي على جسمي دموعي اختلطت
بقطرات المي و ضاعت بيناتهن
صرت ابجي مهمومه، شوكت راح ارتاح اني؟
اريد امي يمي محتاجتها اكثر من اي بشر
بس امي معتبرتني عدوتها و متريدني ابد
خلصت و طلعت من الحمام لكيت فيصل
بعده بالغرفه
لبست ملابسي و رجعت تمددت على الفراش
سحبني لحضنه و طبع بوسه على راسي و گال
فيصل:يلا كومي حَبيبي
جوري:اريد انام
فيصل:جوري كومي حَبيبتي يلا اكلي و بعدها نامي شكد متردين، ترا يومي فتنت عليج و گالت بدون اكل من الصبح أنتِ
جوري:ما اشتهي اكل
بدون ميحجي اي شي كام من مكانه و اجه
من جهتي شالني و طلعني من الغرفه
جوري:عوفني عُمري الله يخليك عوفني
فيصل:جوريتي بويه كافي عيوني أنتِ
اخذني للمطبخ و كعدني على الكرسي
حمه الاكل و صبلي بماعون و جابه الي
رفضت اكل اني، كعد يمي و صار يوكل بيه هوَ
ما عافني لحد ما كملت الماعون كله
باوعلي و گال
فيصل:اصبلج بعد؟
جوري:لا كافي ما اريد
فيصل:عافيه على گلبج يا بعد گلبي أنتِ
ركزت بعيونه يباوعلي بنظرات حب
و مليانه خوف و قلق
جوري:ما تعبت مني؟
فيصل:شحلات التعب الي يجي منج
باسني من خدودي و اردف
فيصل:أنتِ تعب عُمري تستاهلين اتعبلج و اتعب وياج
جوري:شنو راح يصير عليه؟ خايفه اموت و اعوفكم
فيصل:من عُمري على عمرج، ارتاحي هسه و بعدين نكعد و نحجي و نتخذ القرار الصح
جوري:ما اريد انزل الطفل ماكو غير حل ؟
فيصل:ماكو للاسف، و العمليه لازم تسويها ب اسرع وقت
حطيت راسي على كتفه و گلت
جوري:زين اذا نزلت الطفل و سويت العمليه و متت بالعم
قاطع كلامي و گال
فيصل:لتحجين هيج جوري لتجيبين طاري الموت على لسانج، ميصيرلج شي ان شاء الله
جوري:بس هذا احتمال وراد
فيصل:جوريتي بداعتي لتحجين هيج، و فهد اذا يسمع كلامج يتدمر
كمت من مكاني و كتله
جوري:هيَ موته وحده اخذت قراري و مستحيل انزل الطفل و لا اسوي العمليه
عفته مصدوم من كلامي و رحت لفهد
دكيت باب غرفته و دخلت شفته گاعد يحل بواجباته
رفع عيونه باوعلي و نزلها على الكتب و گال
فهد:نعم امي
جوري:اجيت اكعد يمك عادي؟
فهد:متشوفيني ادرس؟ يعني مشغول
جوري:يعني متكدر تعوف دراستك خمس دقايق و تكعد ويه امك؟
فهد:عندج طفل ببطنج عود هوَ يكعد وياج
جوري:مو جنت متحمس يصير عندك اخ او اخت؟ و گلت راح تحبه و تداري شنو غيرك؟
فهد:قبل لا اعرف هوَ يريد يموتج و ياخذج مني بس هسه ما اريده و لا اريدج لان تريدي
جوري:لتعوفني حايره بيناتكم ابوس ايدك فهد
فهد:عوفيني اريد اكمل واجبي و انام
جوري:باجر عطله خليك نتفرج فلم سوه شنو رأيك؟
فهد:لا ما اريد
عجزت وياه اغلب كلامي يغلس و ميجاوبني عليه
و هالشي چان يزيد دماري اكثر بسببه
عفته و طلعت بعد ما مليت منه و من بروده ويايه
حتى هوَ صار مثل ابوه ميريدون الطفل
طلعت للحديقه كعدت على المرجوحه
و تغطيت بالغطوه لان الجو بي كرصه برد بليل
رفعت راسي للسماء و صرت اتفرج
على النجوم شلون معبيه السماء و زايدتها جماليه
نزلت دموعي و گلت
جوري:يارب ساعدني لتحطني بهيج موقف صعب
مر كم يوم و فهد ميحجي ويايه و لا ينطق
حرف زعلان مني
فيصل يحاول يقنعني انزل الطفل و اسوي
العمليه، بس اني ما اريد و رافضه رفض قاطع
رحت للشركه بعد غياب طويل
دخلت من الباب الموظفين كلهم فرحوا بشوفتي
و اجو يسلمون عليه و يستائلون عن سبب غيابي
جوري:عندي انشغالات اهم من وجودي بالشركه
ابني و بيتي اهم من كلشي بالدنيا
وحده من الموظفات گالت
_مدام جوري تعودنه كلش على وجودج و هواي تغيرات صارت بالشركه بغيابج
جوري:و اني تعودت عليكم بس شي اهم من شي
و كلشي يصير بالشركه عندي علم بي
وحده ثانيه گالت
_سمعنه أنتِ حامل الف مبروك و ربي يتمملج على خير
ضحكت و حجيت بكسره
جوري:ادعولي محتاجه دعاء من الكل
_صاير وياج شي؟
جوري:يارب ميصير الا كل خير، اني اروح و انتو رجعوا كل واحد على شغله يلا
عفتهم و رحت ب اتجاه مكتب فيصل
دكيت الباب و دخلت تفاجئ من وجودي مجان يعرف
بيه راح اجي اليوم
كام عليه باسني و گال
فيصل:بيج شي عُمري ؟؟
جوري:لا اجيت اشوف الشغل
فيصل:بس الشغل؟
جوري:و اشوفك قبل كلشي، فيصل تعبانه اني
فيصل:بشنو تحسين امشي نروح للدكتور
جوري:من الصبح داانزف و وجع گطعني تگطع، خايفه
سحبني من ايدي و طلعنه من المكتب گال
فيصل:ليش تسكتين على روحج جوري خبلتينيي أنتِ والله خبلتيني
جوري:خساراتي كثرن
فيصل:المهم أنتِ ميصير بيج شي
دنريد نطلع من الشركه و صار بوجهنه بشار
شاف توتر فيصل گال
بشار:خير، صاير شي؟
فيصل:اخذها للمستشفى
بشار:جوري بيج شي ؟؟
حسيت على لحظه گلبي راح يوكف
بسبب دكاته صارت كلش بطيئه
حطيت ايدي على گلبي و حجيت بصوت خافت
جوري:گلبي
جانت اخر كلمه تطلع مني، بعدها ما اعرف شنو
صار بيه...
"فيصل"
گالت اخر كلمه و وكعت بالكاع
تخبلت ماعرف شصار بيها شلتها و ركضت
بيها للسياره و بشار اجه ورايه
حطيتها وره وكعدت يمها راسها بحضني
و بشار حرك السياره و اتجه بينه للمستشفى
شلت تلفوني و اتصلت على اسماء
متجاوب، دكيت اكثر من مره ماكو رد
رفعت عيني على بشار و حجيت ب استعجال
فيصل:خابر يقين خلي تروح لبيتنه بسرعه علمود فهد
رأساً شال تلفونه و اتصل عليها
بشار:حَبيبي اخذي شهد و بسرعه روحي لبيت فيصل، جوري تخربطت ماخذيها للمستشفى، ماعرف ماعرف اهدي أنتِ ان شاء الله ماكو شي، ولج يا عيني لتبجين بس سوي الكتلج عليه هسه فهد يرجع و ميلكاها حتى ميظل باله
سده من عدها و گال
بشار:ماكو شي ان شاء الله، خليك قوي
فيصل:اذا يصير بيها شي اموت وراها
بشار:دكافي يمعود ماكو شي هاي وصلنا يلا
وكف السياره بباب الطوارئ
نزلت و شلتها بحضني و ركضت بيها
للداخل
اخذوها مني بعد ما شرحتلهم وضعها شنو
كعدت حيلي راح بعد ما بيه اوكف على رجلي
اجه بشار بعد ما طبك السياره و صار يهدي بيه
بس بالي مو وياه و لا ويه كلامه
كل بالي و تفكيري يم جوري
طلع الدكتور كمت عليه و حجيت بقلق
فيصل:طمني عليها دكتور
_الطفل مابي نبض لازم ننزله و
فيصل:و شنو؟ احجي دكتور
_زوجتك تحتاج عمليه قلب ب اسرع وقت ممكن اذا بقت هيج گلبها يوكف و تموت
فيصل:متسوولها عمليه منتظريييين تموتتت يعني؟؟
_اذا متوافق على العمليه منكدر نسويلها اي شي
فيصل:اكدر اشوفها؟
_راح يجهزوها لعمليه الكورداج بعد العمليه تكدر تحجي وياها
فيصل:ميصير عمليه لا ميصير، مراح تتحمل البنج
_دكتور القلب راح يكون موجود اذا لا سمح الله صار اي شي يتدخل فوراً
رأساً ضربني صداع براسي و نغزات بگلبي
عرفت ضغطي صعد، انداريت على بشار الي چان واكف مصدوم ميعرف شنو يحجي و نظرات القلق واضحه بعيونه
فيصل:سمعته شنو گال ؟؟ لككك جوري راح تروح من ايدي شسوي بشار شسوي ؟؟
بشار:فيصل خشمك، احد يجي هنااا وينكمممم
صارت الاصوات بعيده و حسيت الدنيا افترت
بيه، وكعت من طولي مغمي عليه بالگاع
فتحت عيوني بعد مده، شفت روحي متمدد
على سرير المستشفى و مغذي معلك يمي
مديت ايدي سحبت الكانونه و كمت من مكاني
اول ما طلعت من الغرفه صار بوجهي بشار
عاط بيه
بشار:شكووومكككك ارجعععع بسرعههه
فيصل:جوري وينها؟
بشار:بالعمليه بعدها ما طلعت
دفعته عني اريد اطلع جرني من ايدي و گال
بشار:فيصل ضغطك معلكك اكعدد بمكانك راح تنجلط شبييك
فيصل:اريد اروحلها اخذني عليها
بشار:دا اگلك بعدها بالعمليه بس خلص المغذي
و بعدها وين متروح روح
تجاهلت كلامه و نترت ايدي من عنده
و مشيت ب اتجاه غرفه العمليات
لكيت ممرضه واكفه يم الباب تريد تدخل
استوقفتها و گلت
فيصل:مرتي بالعمليه بس كوليلي شنو وضعها؟
_جوري؟
فيصل:اي شكد صارلها جوه؟
_صار ساعتين تقريباً وضعها تعبان
فيصل:شنو وضعها بالضبط احجي
_اثناء عمليه الكورداج قلبها توقف و هسه بالعمليه الثانيه هيَ
دفعتها عن طريقي ردت ادخل لغرفه العمليات
اريد اشوفها و اتطمن عليها، بس انسحبت من ايدي
و بشار عاط بيه
بشار:شبييككك تخبلتتت وين فاييييت؟؟
فيصل:لككك جوري جوه بين الموت و الحياة تريدني
ابقى واكف هنااا بدون ما اسوي شي
سحبني من ايدي بعيد عن الغرفه و گال
للممرضه
بشار:نعتذر عن الصار بس خايف على زوجته
_ما انطاني مجال اكمل كلامي، زوجته حالياً بالعمليه
مال قلب و وضعها مستقر لحد هسه ليظل بالكم
تشكر من عدها و دخلت هيَ، بقيت واكف بمكاني
ما اعرف شنو اسوي..
زادت دكات گلبي بسبب الخوف و التوتر
باوعت لبشار و گلت بقهر
فيصل:جوريتي تصارع الموت وحدها و اني واكف هنا
بشار:كلنا خايفين عليها والله كلنا خايفين، بس لازم نقوي روحنه حتى نكدر نسندها بس تطلع
كعدت بالكاع و رجعت ظهري على الحايط
ايدي كلها دم، بسبب شيلتي للكانونه
رجعت راسي وره و غمضت عيوني
استرجعت بذاكرتي من رحنا للدكتور
"قبل ٥ شهور"
اليوم جوري عدها موعد يم الدكتور
و بسبب اصرارها على الحمل للمره الثالثه
بكل مره تحمل ينزل بسببي اني
جنت بكل مره احطلها حبوب حتى ينزل
الطفل بدون متعرف
و هالشي سويته ب اتفاق ويه دكتور القلب و دكتورتها النسائيه
لان مو زين عليها الحمل و هيَ متسمع من احد
بكل مره توهمني هيَ تاخذ حبوب منع الحمل
و بعد فتره تكلي اني حامل
اتعصب و اصيح بس ميهون عليه زعلها
و اسايرها، لحد ما يبلش مفعول الحبوب و ينزل
الطفل
صار موعدنا و دخلنا يم الدكتور
و سوالها كل الفحوصات و التحاليل المطلوبه
و بعد كم يوم رجعنا رحنا حتى نعرف
النتيجه شنو!
_وضعج زين و هالمره تكدرين تحملين
و بدون اي مشاكل ان شاء الله
الفرحه مبينه على وجهها و دموعها نزلت
و گالت بفرح..
جوري:يعني مراح يأثر عليه؟؟
_ان شاء الله لا بس كل شهرين تجين تسوين الفحوصات كامله حتى نتفاده اي شي خطر ممكن يصير و يأثر على حياتج
فيصل:يعني ماكو اي خطر عليها اذا حملت؟
_ان شاء الله ماكو شي
فرحت على فرحتها اول ما طلعنا
خابرت على السكرتيرة مال دكتورتها النسائيه
و طلبت منها موعد ضروري اليوم
فيصل:خليها غير يوم؟
جوري:لا حَبيبي اليوم فدوه
فيصل:صايرين بويه
اتجهنا لعيادة الدكتورة، چان نهاية دوام
و ماعدها مراجعين هوايه كم وحده بس
كعدنا ننتظر وطول الوقت جوري
تفكر و تخطط شنو تسوي اذا
حملت هالمره و ثبت الطفل
انقهرت عليها و كرهت روحي
و حقدت عليها، بس كل الي سويته من خوفي
و قلقي عليها و على صحتها
محد يعرف بهل شي و اذا عرفوا شنو راح
تكون ردة فعلهم؟ و الاهم جوري شنو راح تسوي؟
قاطع تفكيري صوت السكرتيرة و هيَ
تصيح ب اسم جوري..
دخلنا يم الدكتوره و نومتها على سرير
الفحص و صارت تفحص بيها
ابتسمت الها و گالت
_وضعج كلش زين و ماكو اي مشاكل
جوري:دكتوره يعني نكدر نزرع طفل؟
_بس جوري أنتِ قلبج تعبان؟
فيصل:الدكتور طمنه على وضعها و گال تكدر تحمل ميأثر عليها بس لازم مراجعات كل شهرين
_اذا هيج ماكو اي مشكله، بس جوري خلي ببالج هذا اخر حمل الج اذا هم خسرتي مو زين عليج تحملين بعد ابد
رفعت عيونها باوعتلي بنتظرات توسل
كلتلها
فيصل:اذا توعديني و تحلفيلي انو هذا اخر حمل، حتى لو نخسره بعد ماكو غيره!
جوري:لتسوي هيج حباب
فيصل:لعد ماكو
جوري:خلص والله وداعت فهد و غلاتك عندي هاي اخر مره
باوعت للدكتوره و گلت
فيصل:تمام شوكت نكدر نسويها؟ و شنو مطلوب من عدنه؟
_هسه انطيكم كل التفاصيل
اخذت كلنكس و انطته لجوري
حتى تمسح بطنها بي و طلعنه من غرفه الفحص
كعدت وره مكتبها و كعدنا اني و جوري كدامها
صارت تشرحلنه شنو المطلوب و شوكت
نسوي العمليه و الموعد و كلشي
خلصنا من يمها و طلعنا
و فرحت جوري واضحه على وجهها
مرت فتره و سوينه الزرع
و بقت فتره بعدها رجعت راحت للدكتوره و كالتها
انو ثبت و صار حمل
وصتها تنتبه على صحتها و مترهق نفسها
بشغل البيت و لا ب اي شي ثاني
رجعت لواقعي على صوت بشار
يحجي ويايه
بشار:وينككك صار ساعه احجي
فيصل:افكر
بشار:دكوووم يلا جوري نقلوها للعنايه
فزيت من مكاني و كمت بسرعه
شفت الدكتور واكف يحجي ويه الممرضه
بس شافني اجه ب اتجاهي و گال
_الحمدلله على سلامتها
فيصل:شنو وضعها؟
_قبل شوي خلصت العمليه و هسه راح ينقلوها
للعنايه تبقى كم يوم
فيصل:نجحت عمليتها؟
_اي مابيها شي ليظل بالك، الحمدلله على سلامتها مره ثانيه
فيصل:اريد اشوفها
_بس تصحى اخليك تشوفها
تشكرت من عنده راح هوَ و اني
رديت على تلفوني
فيصل:هاا اسو؟
اسماء:شبيهاااا جوري هسه يقين كلتلي
فيصل:تكدرين تجين؟ محتاجج
اسماء:اي مستشفى انتو؟؟؟ هسه جايه
فيصل:بنفس المستشفى الي بيها دكتورها
اسماء:يلا هسه راح اجي
سديته من عدها و كعدت على المقاعد الموجوده
اجه بشار يمي يحجي ويايه بالي مو وياه ابد
اخر شي ضربني على رجلي و گال
بشار:صار ساعه احجي وين صفنت
فيصل:خايف عليها
بشار:دكول يا الله جوري قويه مثل ما طلعت من القبلها تطلع من هاي
فيصل:الله لا يحطك بمكاني، تعب سنيني كلها تعبانه و بين الحياة و الموت و اني مربط ما اكدر اسوي اي شي
بشار:بيوم من الايام بنتي جانت داخل هاي الغرفه، ماكو شي عندي اعز من بنتي
فيصل:جوريتي اعز من كل شي بالدنيا عندي، اذا هيَ راحت و عافتني اضيع بدونها، اموووت والله اموووت
بشار:صير قوي و اوكف على رجلك، ابنك بالبيت خايف على امه الي ميعرف شنو وضعهااا
راد يحجي بس قاطعه صوت تلفونه يدك
جاوب و كام من يمي، شوي و رجع مدلي التلفون و گال
بشار:فهد يريدك
اخذت التلفون من ايده حطيته على اذني و حجيت
بهدوء عكس البراكين المنفجره بداخلي..
فيصل:هاا فهود بابا
فهد:وينكم ليش مو بالبيت؟
فيصل:حَبيبي امك تعبانه و اخذتها سفره ترتاح شوي
و خالتك يقين راح تاخذك يمها هالفتره
فهد:امي شبيها ليش تكذبون عليه اني اعرف ماما بالمستشفى اريد اجي يمها تعال اخذني
غمضت عيوني و حجيت بنفاذ صبر
فيصل:فهد حَبيبي وداعتك تعبان و ما بيه احجي ابد، اسمع كلامي و روح ويه خالتك يلا حَبيبي
فهد:اذا متجي تاخذني على ماما اني اجيها بوحدي
من غير وعي عطت بي بصوت خله
العالم كلها تتفرج علينه
فيصل:فههدددد لتخلييينيي اجيكك اطيححح حظكككك، گتلك روح ويه خالتك بلااا عناااد
صار يبجي و عاف التلفون مفتوح
اجاني صوت يقين جاوبتها
فيصل:ام شهد اخذي و روحوا لبيتكم
يقين:فيصل خطيه طفل خايف على امه
فيصل:اني محترككك گلبيييي عليهاااا! ماكو بيدي شي اكدر اسوي غير انتظر رحمه الله
يقين:ليظل بالك فهد ب امانتي نتساعد عليه اني و اسو
فيصل:لا خلي يمكم اسماء عدها يمان و حامل متكدر على شي ما عدا ايفين
يقين:هاهيه تمام يبقى يمي، اذا بشار يمك انطي التلفون
انطيت التلفون لبشار و اخذه و راح يحجي وياها
بعيد عني.. رحت ب اتجاه العنايه وكفت اباوع عليها
من الشباك
كل جسمها مغطينه، و وايرات الاجهزه نازله من جوه الغطه، حاطيلها جهاز الاكسجين بخشمها
نايمه و متدري بلي يصير حواليها
هاي ثالث عمليه قلب تسويها و بكل مره
حالتي تسوء اكثر من القبلها خوفاً عليها
جنت اعرف الحمل هذا مراح تكون نهايته خير
و اذا عرفت اني السبب بخسارتها لحملها السابق
ما اعرف شنو راح تكون ردة فعلها
خايف عليها لا ترجع تنتكس حالتها
مر كم يوم بين الانتظار و الخوف و القلق
واكف انتظر الدكتور يطلع من يمها و يطمني على وضعها
بعد ربع ساعه انتظار طلع و اجه ب اتجاهي
فيصل:بشرر دكتور!
_وضعها كلش زين راح نطلعها لغرفه خاصه، الحمدلله على سلامتها
سجدت بالكاع سجدة شكر لله، لان حفظها الي و لابنها و كومها بالسلامه..
خابرت اسو و بشار طمنتهم على جوري
و كعدت انتظر يطلعوها
طلعوها من العنايه و نلقوها لغرفه خاصه
نقلوها من سرير السرير و هيَ متدري فاقده بعدها
بسبب الادويه
كعدت يمها و اخذت ايدها بين ايدي
طبعت بوسات متتاليه عليها، و حطيت راسي على كف ايدها و غفيت بدون ما احس
صار كم يوم بدون نوم، مكابل غرفه العنايه و گاعد
......
"جوري"
الم فضيع، انفاسي مو منتظمه.. صداع و عدم وضوح الرؤيا.. رجعت غمضت عيوني بقوه و فتحتهن
باوعت لفيصل نايم على ايدي
بالكوه رفعت ايدي الثانيه و مديتها على راسه العب
بخصلات شعره، متروسات شيب
فز من مكانه و صار يباوعلي ممصدك
حجيت بصوت خافت، صوتي ميطلع
جوري:حَبيبي
فيصل:خوفتيني عليج جوريتي، الحمدلله على سلامتج بويه
جوري:اسفه لان دا اعيشك هذا الشعور، خليتك تعيش نفس الشعور اكثر من مره
مد ايده حط اصابعه على شفايفي يمنعني من الكلام
و گال..
فيصل:المهم أنتِ بخير و يمي كلشي ما رايد من هاي الدنيا غيرج أنتِ و عافيتج
جوري:فيصل
فيصل:جوريته، گولي بويه اكو شي يأذيج؟
جوري:الطفل راح مو؟
فيصل:مو اهم منج والله عدنه فهد يسوى الدنيا و الي بيها
نزلت دموعي مد ايده على خدودي بكل هدوء
و مسحهن و اردف
فيصل:لا جوريتي لا، دموعج ما اريدهن ينزلن بعد
جوري:بعد ما اكدر اخلف فيصل، فهد راح يبقى وحيد طول عمره
فيصل:احنه نملي دنيته بحبنه اله، و هوَ ماليها علينه
جوري:تعبت والله
فيصل:هونيها تهون و غلات عيونج
اندكت الباب و دخلن اسو و يقين
و اخر شي دخل حبيب روحي و گلبي فهد
اجن البنات يمي بوسوني و تحمدولي بالسلامه
بس اني عيني على فهد، بقى واكف يم الباب ما تحرك من مكانه ابد و لا رفع عيونه و نظرلي نظره وحده
رفعت ايدي و اشرتله يجي و گلت
جوري:فهد ماما متريد تشوفني؟
هز راسه ب "لا" و طلع من الغرفه
جوري:يمه فهد مو أنتَ و الدنيا عليه
يقين:خايف عليج والله و خبصني خبص بس يريد يجي
جوري:ميريد يشوفني، كارهني ابني كارهني
كام فيصل من مكانه و طلع بَره الغرفه
كعدت اسو يمي و يقين كعدت على طرف الجربايه
اسماء:جوري بشنو تحسين اكو شي يأذيج؟
جوري:روحي تأذيني من اشوف معاملته هيج وياي، صارله هواي حتى ميحجي ويايه و كل باله اني ما اريده و اريد اعوفه
يقين:والله من خوفه عليج، ما شفتني من چان يمي شكد خايف و كل شوي يتصل على فيصل يسأل عنج
اسماء:أنتِ امه و يحبج من خوفه عليج هيج يتصرف وياج
جوري:والله تعبت اني شوكت ارتاح، كل ما اگول الدنيا ضحكتلي و راح اعيش مرتاحه تطلعلي سالفه صفح و تخرب كلشي عليه
دخل فيصل لازم ايد فهد و يسحب بي
هوَ يحاول يمنعه ميريد يدخل للغرفه، باوعت لفهد و حجيت بغصه و الم
جوري:عوفه فيصل لتجبره على شي ميريده، و هوَ ميريد شوفتي عوفه براحته
رفع عيونه باوعلي و صار يبجي ركض
و اجه يمي حضني بكل قوته برغم اذاني
بس ما بعدته عني ابد..
نزلت دموعي ويه دموعه، رفعه فيصل و كعده
يمي حط راسه على بطني و صار يشهك بالبجي
فهد:خفت عليج جوريتي، لتعوفيني مره ثانيه
جوري:ما اعوفك حَبيبي اني يمك على طول
مسحت بيدي على راسه بكل هدوء، و هوَ مستمر بالبجي
يقين:فهود حَبيبي كوم من يم امك خليها ترتاح
جوري:خلي راحتي بوجوده
حط ايده على بطني و گال
فهد:الي ببطنج ما اريده طلعي منها، اريد ابقى وحيد المهم أنتِ و بابا يمي ما اريد اخوان
اسماء:فهد شنو هل حجي هذا حَبيبي
فهد:اي ما اريده خلي تطلعه من بطنها
سحبه فيصل يمي بهدوء و گال
فيصل:ماكو طفل ببطنها راح
ابتسم ابتسامه واسعه و گال
فهد:يعني ما راح يموت امي و ياخذها مني ؟
فيصل:لا حَبيبي امك محد ياخذها من عدنه غير رب العالمين
رجع نام على بطني و يبوس بيدي
و اني بس دموعي تنزل بدون صوت...
كل دمعه تنزل من عيني تعبر عن جرح
من الجروح الي بداخلي، و اولها الفقدان ...
بقيت عشر ايام تقريباً بالمستشفى و بعدها طلعت
للبيت، اول ما دخلت البيت لكيت الكل موجودين
اسو و يمان، يقين و بشار، حتى ماهر و زوجته نور
تفاجئت بيهم و بوجودهم عدنا لان جانو مسافرين
صارلهم كلش هواي
كلهم سلموا عليه و تحمدولي بالسلامه
راد ياخذني فيصل للغرفه، حجيت بتعب
جوري:اريد اكعد هنا يمهم
فيصل:تعبانه أنتِ لازم ترتاحين
جوري:خليك يمي و اني ارتاح
سندني و مشاني للقنفه كعدت، و شال كوشات
و اجه عدلهن وره ظهري و گال
فيصل:مرتاحه عُمري ؟
جوري:اي گلبي
كعد يمي و اخذ ماعون من الطلبه
حط بي من الفواكه الموجوده، صار يكشرلي بالفواكه و ينطيني اكل ما عافني الا كملت كلشي حاطه الي
بقينه كاعدين نسولف و نضحك و فرحانين بلمتنه
الحلوه، الله يديمها علينه يارب
كامت يقين من مكانها و گالت
يقين:اسو تعالي ويايه خلي ننقل الاكل
اسماء:يلا ثواني و جايتج
راحت يقين للمطبخ و اسو اندارت على يمان
و گالت
اسماء:تحتاج شي حَبيبي قبل ما اروح؟
يمان:لا عيوني اذا احاجيت شي بشار موجود
كامت من مكانها و راحت وره يقين
باوعت على يمان مزعوج كلش من وضعه وكعدته
على الكرسي المتحرك و اكثر الوقت منزل عيونه بالكاع
حتى ميشوفنه نباوع عليه
او مثل ميكول هوَ "تنظرولي بنظرات شفقه"
و احنه عكس هالشي
كومني فيصل من مكاني بعد ما صاحونه
البنات حتى نتغده... حسيت بدوخه
و رجعت كعدت بمكاني
فيصل:كعدي بويه كعدي لتكومين أنتِ
جوري:لا اريد ناكل كلنا سوه
فيصل:اجيبلج الاكل لحد يمج و اني اوكلج بيدي، خليج بمكانج ليصير بيج شي
ما عاندته و بقيت گاعده بمكاني
راح هوَ حطلي اكل بالماعون و جابه
تارس الماعون ترس ليكول صارلي سنين مو ماكله
جوري:هااييي شنو فيصل
فيصل:اكل !
جوري:لا والله مجنت اعرف زين كتلي
فيصل:غير أنتِ تسئلين
جوري:ترا من هسه اگلك ما اكدر اكمله كله، حاط لعشيره أنتَ
فيصل:هسه اكلي و من تشبعين كوليلي
كعد يمي و الكل انتقلوا لميز الطعام
ياكلون كدامنه و احنه كاعدين على القنفه
صار يوكل بيه و ياكل ويايه
و اكيد ما عافني و جبرني جبر اكمل كلشي
كام طلع كيس الادويه من الجنطه مالتي
صبلي كلاص مي و انطاني الحبوب
شربتهن و رجعت ظهري على ظهر القنفه
حسيت عمليتي تأذيني بسبب الكعده الطويله
بس ما حسست احد ب اي شي
مرت الايام و الاسابيع و تحسنت حالتي
و رجعت لروتيني الطبيعي بس بدون جهد
فيصل من بعد الي صارلي، صار هوَ
ياخذ احتياطه من كلشي و ميخليني اسوي اي شي
و اتعب
دك تلفوني عفت فهد يدرس عنده امتحان
و هذا اخر امتحان لهاي السنه
ابني حَبيبي كبر و حيصير خامس
جاوبت على يقين خبصتني
جوري:هاا كبد
جاوبتني بنفاذ صبر..
يقين:راااح اطككك راح انفجررر
جوري:يا ستار شبيج
يقين:لججج ميريد عليه هاي عاشر مره اتصل عليه
ميريد خبلنيييي
جوري:اي مو تعرفين مسافر عدهم شغل
يقين:وين اكو شغل بهاي الساعه، اكيد ديخوني
جوري:يجوز نايم شبيج
دخل فيصل للبيت اشرتله يجي يمي
اجه عليه باسني و گال
فيصل:شبيج؟
جوري:تعرف بشار وينه؟
فيصل:اي راح لاجتماع ويه الشركه الي راح نشتغل وياهم ليش؟
جوري:يقين عبالها يخونها
ضحك و گال
فيصل:خلي ايدج و رجلج بمي بارده ام شهد، بشار ميسويها
يقين:شو انطيني ياه احجي وياه
وخرت التلفون عن اذني و انطيته لفيصل
اخذه مني و گال
فيصل:هلا ام شهد شلونج، عساج دوم يارب، والله بالاجتماع قبل ساعه خابرني گال راح يطلعلهم
ضحك و اردف..
فيصل:والله لو ما جوري چان اني رحت بداله بس ما اكدر اعوف جوري وحدها، لا لتشغلين بالج ميسويها ابو شهد اني اعرفه، اخذي راحتج عيني هاي جوري وياج
اخذت التلفون من عنده و حجيت وياها
گالت
يقين:تعالو يمي والله طكت روحي صار اسبوع مطالعه و لا شايفتج
جوري:فهد ديدرس باجر عنده امتحان
يقين:اي خلي يجيب كتبه و يدرس هنا ويه شهد، راح اخابر اسو و يمان هم يجون
جوري:والله ما اعرف خلي اشوف فيصل و ادزلج عود
يقين:اذا تجون جيبي گهوه وياج ما عندي
جوري:تمام انطيج خبر اني
سديته من عدها و رحت على فيصل
چان گاعد و يگلب بتلفونه، رحت كعدت يمه
بسته و گلت
جوري:الله يساعدك حَبيبي
فيصل:ويساعدج بويه، شلونج اليوم خوما تعبتي نفسج؟
جوري:لا حَبيبي كلشي مدااسوي يومي هيَ تنظف و تسوي كلشي اني بس اطبخ
فيصل:اذا متكدرين تطبخين لتجبرين روحج ابد
جوري:شنو قابل ليش الطبخ يتعب و اني ما اعرف
فيصل:فهد خوما يضوجج؟
جوري:لا يمه فدوه لعينه، اگول حَبيبي
فيصل:احجي گلبي
جوري:يقين تريدنه نروحلهم شنو رأيك نروحلنه ساعه و نرجع
فيصل:اي يلا اذبكم يمها و اطلع اني
جوري:وينن!
فيصل:افتر بالسياره لحد ما تخلصون و نرجع
جوري:لا تبقى ويانه متروح لمكان
فيصل:شعندي باقي وياكم نسوان وحدكم
جوري:لا اسو و يمان هم راح يجون
فيصل:كومي بدلي لعد خلي نروح
بسته من رگبته و كمت دخلت على فهد
و كتله يبدل هدومه حتى نروح
و اني رحت بدلت و طلعنا
مرينه اخذنا گهوه و رحنا لبيت بشار
دخلنا لكينه اسو و يمان موجودين
يمان الحمدلله رجع يمشي بس الا عكازه تسنده
و مستمر على العلاج الطبيعي هم
سلمنا عليهم و كعدنا و فهد دخل ويه ايفين و شهد
بالغرفه..
كامت يقين تسوي گهوه و جابتها و اجت
توها گاعده و طلعت شهد تبجي من الغرفه و ترجف
ركضت عليها يقين متسائله عن حالها و سبب بجيتها
گالت
شهد:ماما ما اريد فهد خلي يروح مناااا
يقين:شبيج حَبيبتي شسوالج
شهد:باسني منااا
اشرت على شفايفها كلنا انصدمنا من تصرف
فهد، محد بينه متوقع من عنده هيج تصرف
عاط فيصل بصوت عالي هرجنا هرج
فيصل:لكككك فهددددد يااا حيواااان تعاااال
طلع من الغرفه طبيعي و لا كأن عامل عملته
الطايح حظها، تقدم على فيصل و گال بهدوء
فهد:نعم بابا
جره من ايده و عته منها عت
حطيت ايدي على حلكي مصدومه لما
فيصل رفع ايده و ضربه بقوه على وجهه
و هاي جانت اول مره يسويها و يمد
ايده عليه و يضربه
يقين:لا فيصل ليش ضربته
فيصل:لعد اصفكله على طياح حظه، كداااامي امشي و لا حرف يلااا
باوعلي و عاط بيه..
فيصل:كوممممي أنتِ هممم فيضينييي
كمت من مكاني باوعت ليقين و گلت
جوري:عذريني يقين، اني اتصرف وياه كلش اعتذر منج على التصرف الي طلع من عنده
يقين:شهوده ماما فوتي جوه حَبيبتي هسه اجيج
اندارت عليه و اردفت.
يقين:لتكبرون الموضوع جهال شمفهمهم
يمان:فيصل لتضربه بعد دير بالك
فيصل:اكسر راسه اليوم، امشي جوري يلا
طلعت من البيت محتركه حرك، شمعرفه
بهل سوالف هاي
طول الطريق فيصل بس يصيح
هرجنا هرج بصوته العالي، و فهد ساكت ما نطق ولا حرف زايد
وصلنا البيت نزل فهد قبلنا و دخل يركض
راح وراه فيصل يريد يلحكه
دخلت وراهم اركض اريد الحك عليه
لان فيصل تخبل و بعد ميشوف كدامه
كلشي عنده و لا الغلط ميقبل عليه ابد
دخلت لغرفه فهد لكيته واكف بالزاويه مال غرفه
و فيصل كدامه شايل حزامه بيده يريد يضربه
ركضت على فيصل و لزمت ايده لما رفعها
و رايد يجلده بالحزام، گلت
جوري:لاااا فيصل دير بالكككك تضربههه
نتر بيه و كال بعصبيه..
فيصل:روحي جوري و لتدخليييين، هذااا كله من دلالج الزايييد طلعتي عينهههه
فهد:متتكرر بعد والله بس لتضربني الله يخليك
فيصل:انتظرك تكررها يعني اليوم اكطععع الحزااام على ظهرك
جوري:الله يخليك لتضربه، عاقبه بس لتضربه
مو بالحزاااام فيصل يأذي حراام عليك
دفعني بقوه و وكعت بالكاع
ضربه اول ضربه
صرت ابجي بصوت عالي و اشهك بالنفس
صار عندي وجع بگلبي و عيوني انگلبت
سمعت صوت فهد يصيح..
فهد:ماما، امي شوفهاااا شبيهااا
غمضت عيوني بقوه و بعدها ما حسيت على شي
بعد فتره مو قليلة حسيت على طبطبات على خدي
و صوت فيصل يصحي بيه
فتحت عيوني شفت روحي بحضنه
حاولت انهض نفسي من عنده بس ماعندي قوه، حقدت عليه كلش
فيصل:حَبيبي تسميني ؟
جوري:وينه فهد، ضربته اذيته أنتَ
فيصل:بالغرفه مالته، أنتِ بشنو تحسين كومي اخذج للمستشفى
جوري:وديني لابني ما اريدك
ما حجه ويايه حرف زايد
كومني من من مكاني و رجع دخلني لغرفة فهد
فتحت الباب لكيته نايم بفراشه و صوت البجي
بس ينسمع
تركت ايد فيصل دفعته بَره الغرفه و سديت الباب، مشيت ب اتجاه فهد رفع راسه شافني
كمز من مكانه و حضني بقوه و صار يبجي بحضني
مديت ايدي على راسه و صرت امسح عليه بهدوء
و حجيت بنبرة هادئه
جوري:لتبجي حَبيبي
فهد:اول مره يضربني و يقسي عليه هيج، شنو سويت اني
جوري:فهد امي مو عيب عليك تبوس شهد ؟؟
فهد:بابا مو يبوسج عادي
جوري:فهود حَبيبي اني و ابوك متزوجين عادي يبوسني و يحضني، بعدين أنتَ بعدك كلش صغير على هاي السوالف
فهد:احبها
جوري:ما اگلك لتحبها، اني هم ابوك چان يحبني بس انتظرني اكبر و بعدها خطبني و تزوجنا ابد ما سوه ويايه شي غلط و لا باسني مثل ما سويت أنتَ !
فهد:يعني ميصير ابوسها؟
جوري:اكيد ميصير حَبيبي، شهد بعدها طفله متفهم شي اذا أنتَ تفهم شغلات بسيطه هيَ بعدها عقلها ميستوعب هيج سوالف
فهد:اني اسف
جوري:مو مني لازم تعتذر منها هيَ و امها، تعرف خالتك يقين كلش زعلت منك و گالت بعد ممنوع فهد يجي يمنه؟
فهد:والله مو قصدي ما جنت اعرف ميصير، اني اشوفج أنتِ و بابا حبيت اسوي مثلكم حتى تعرف احبها
بعدته عن حضني و صرنه وجه بوجه
لزمت ايده و حجيت بتعب
جوري:تعبت اني فهد، گلبي بعد ميتحمل والله لتسوي اي شي غلط حتى ابوك ليضربك
فهد:اني زعلان من عنده
جوري:و اني زعلانه منك و منه
باس راسي و رجع حضني و گال
فهد:لتزعلين مني بعد ما اسوي هيج شي ابد
جوري:اتمنى فهد اتمنى متتكرر
انفتح باب الغرفه و دخل فيصل
فهد رأساً تمدد بفراشه و سحب الغطه على راسه
كمت من مكاني تعديته حتى اطلع من الغرفه
لزم ايدي يمنعني و گال
فيصل:اني اخذج لتوكعين
نترت ايدي منه و تجاهلته و طلعت من الغرفه
سمعت تلفوني يدك رحت طلعته من الجنطه
شفت يقين دتتصل جاوبتها
جوري:هلا حبي
يقين:بالي يم فهد خوما اذاه فيصل؟
جوري:ضربه بالحزام
يقين:سوده عليه، طفل بعده شفهمه انو هذا غلط
جوري:تعالي فهمي فيصل مو فهد
يقين:شهد كلش خافت و ما اتوقع السالفه تخص فهد هم
خايفه لا احد متحارش بيها
جوري:عزاا منو يعني
يقين:ما اعرف جوري ما اعرف من طلعتو لحد هسه هيَ بس تبجي حرت بيها، و تريد بشار بس ما اكدر احجيله شي
جوري:لا احجيله و شوفي اصل الموضوع شنو احجي ويه بنتج و افهمي منها، و كلش اعتذر منج على الي صار
يقين:صدكيني مو ببالي والله، حالياً الي شغل بالي شهد و حالتها الي تهسترت هيج
جوري:خاف احد بالمدرسه؟
يقين:ما اعرف ادعي ميكون اكو هيج شي لان بنتي راح تتدمر نفسياً
جوري:يارب ماكو الا كل خير طمنيني اي شي يصير وياج
سديته من عدها و كل بالي صار
يم شهد، و الخوف احتلني اذا صدك احد متحارش
بيها الطفله تتدمر نفسياً
اجه فيصل يمي حضني من وره
و گال
فيصل:جوريتي، شبيج بويه
حاولت اخلص روحي من حضنته
بس چان يشد بحضنته اكثر و يسحبني عليه
بقوه اكثر، اردف
فيصل:زعلانه مني؟
سحبت نفس بقوه و زفرته بهدوء
و حجيت بنتر..
جوري:عوفننييي فيصل، گلبك ما وجعك لما ضربته؟؟؟
ما حسيت بنغزات و الم بگلبك لما جلدته بالحزااام بدون رحمه؟؟؟؟
فيصل:غلط و لازم يتعاقب
جوري:يتعاقب و نفهمه الغلط مو نضربه، عوفني بحالي لا اتخبل عليك هسه
بالكوه سحبت روحي من عنده و رحت للمطبخ
جهزت العشه و هوَ يفتر حواليه يريد يصالحني
و اني قافله.. اريد اخلي يتوب بعد يمد ايده على فهد
جهزت كلشي على الميز و حطيت بس ماعونين
الي و لفهد، طلعت ببسي و صبيت بالگلاصات
و طلعت من المطبخ رحت لغرفه فهد
جوري:فهود حَبيبي كوم نتعشه يلا
فهد:ما اريد
جوري:كوم سويت معكرونه الي و الك يلا حَبيبي نتعشه سوه و بعدها اكعد اراجعلك للامتحان مال باجر
فهد:و بابا؟
جوري:لتحجي وياه، اني وياك نعاقبه بالصمت ميفيد وياه الا هيج
هز راسه مأيدني و كام من مكانه
رجعنه للمطبخ لكيت فيصل گاعد ينتظرنه
فهد بقى واكف بالباب ما دخل للمطبخ
رحت طلعت صينيه حطيت الاكل مالتي
اني وفهد بيها و الببسي و طلعت من المطبخ
و گلت
جوري:فهود امي امشي ناكل بالحديقه الجو حلو
طلع كدامي راح فتحلي الباب
حطيت الصينيه على الميز البرا
و كعدنا ناكل و نسولف و نضحك متجاهلين فيصل
تجاهل تام
يومي دزيتها يم اسو صار كم يوم علمود
تساعدها متلحك على البيت و تريد تسافر
رفعت راسي شفت فيصل جايب ماعونه
و اجه كعد يمنه، باوعت لفهد و گلت
جوري:فهود حَبيبي اذا خلصت اكل روح لغرفتك هسه اجيك بس اغسل المواعين، يلا امي
فهد:حاضر، و عاشت ايدج المعكرونه مثل ما احبها اني
جوري:بالعافيه عليك يروحي
اخذ ماعونه و كلاصه و دخل جوه
ردت اكوم عاط بيه فيصل
فيصل:يعنييي شنووو تبقييين تتجاهليني هيج؟؟؟
عفته بدون ما انطق اي حرف وياه و دخلت
للمطبخ غسلت المواعين و رحت على فهد
مر اسبوع كامل و اني وفهد على نفس وضعنه ويه
فيصل، حار شيسوي حتى بس نحجي وياه
حتى نوم صرت انام يم فهد و اخلي يحترك حرك
لما يشوف تجاهلي اله، اهتم ب ادق تفاصيله بس بدون كلام
عباله يأذي ابني و ابقى ساكتتله و اتصرف وياه
طبيعي..
بيوم كاعدين اني و فهد دنتفرج فلم بليل
فيصل چان طالع ويه بشار و يمان
انفتح باب البيت و دخل فيصل، بس حالته مو طبيعيه
شمر اغراضه على الميز و دخل للغرفه بدون ميحجي شي... بقيت اباوع على الممر و انتظره يطلع من الغرفه
بس طول مو من عوايده ابد
كمت من مكاني و گلت لفهد
جوري:حَبيبي كمل أنتَ اني اشوف بابا و اجي
فهد:تمام
عفته و رحت للغرفه، نازع هدومه و شامرهن
بالگاع و صوت المي مفتوح جاي من الحمام
كعدت على الجربايه انتظره يطلع
بس تأخر ...
كمت دكيت باب الحمام و گلت
جوري:فيصل بيك شي؟
انتظرت يرد بس ماكو صوت، فتحت باب
الحمام و دخلت لكيته واكع بالكاع
ركضت عليه بخوف سديت المي و رفعت راسه بحضني
صرت اطبطب على وجهه اريده يصحى ماكو
جوري:حَبيبي تسمعنيييي افتح عيونك، فيصل عُمري كوووم
ميرد عليه تخبلت صرت اصيح بصوت عالي
على فهد، اجاني يركض بقى واكف بباب
الحمام و دار وجهه عني و گال بخوف
فهد:شبييي بابا
جوري:جيبلي تلفوني بسرعههه
ركض جاب التلفون و رجع انطاني ياه بدون
ميرفع عيونه اخذته منه و گلت
جوري:جيبلي ملابس لابوك
هز راسه و طلع من الحمام، فتحت تلفوني و اتصلت
على بشار بقه يدك شوي و جاوبني صوته مال واحد نايم
اول ما رد عليه گلت بخوف
جوري:بشار فدوه تعال فيصل ما اعرف شبي
بشار:جايج اني بس ابدل، شصار وياه؟
جوري:ما اعرف لما رجع من يمكم دخل يسبح و لكيته واكع بالحمام
بشار:اليوم ما شفت فيصل ابد!
جوري:شلون ما شفته هوَ كلي راح يطلع وياكم!
بشار:جاي جاي اني يلا
سده من عندي و عافني بخوفي و حيرتي
وين چان فيصل لعد؟ اخذت الملابس من فهد و بالكوه رفعته و لبسته هدومه
سحبته سحب و طلعته للغرفه كمت لبست صايه
و شال خاف يجي بشار و صحت على يومي
تجيبلي مي
اجت شايله الكلاص بيدها رفعت راسه
نهضته و قربت الكلاص من حلكه حتى يشرب
بس ماكو لا يصد و لا يرد
نزلت دموعي مقهوره، و خايفه عليه
اندك جرس الباب راحت يومي تفتح الباب
و فهد كعد يم فيصل صار يبجي و يبوس بي
و يعتذر من عنده
سمعت صوت بشار ينادي عليه
جاوبته
جوري:بالغرفه تعاااال بسرعه
دخل للغرفه و ركض على فيصل
تقرب من عنده و شم ريحته باوعلي و گال
بشار:فيصل وين چان؟
جوري:ما اعرف ما اعرف، فدوه سوي شي
بشار:مابي شي ان شاء الله
شال تلفونه و اتصل على الاسعاف
اجتني لحظه ادراك، اني شلون نسيت اخابر الاسعاف
بقه يحجي وياهم و كام ع الميز اخذ عطر و صار يرش بيده
حط ايده على خشم فيصل، وبقه حاطها لحد ما
صار يفتح بعيونه شوي شوي
لزمت ايده و گلت
جوري:فيصل، حَبيبي تسمعني ؟؟
فتح عيونه باوعلي و رجع غمضها
بشار باوعلي و گال
بشار:ساعديني نحطه على الجربايه ما اكدر وحدي
تساعدنه ثنيناتنه على فيصل و كومناه حطيناه على الجربايه شوي و اندك الجرس راح بشار
و رجع و وياه ممرضين ثنين من الاسعاف
قاسوله الصغظ و السكر ثنينهن مصفرات عنده
سئلوا بشار كم سؤال واحد من الاسئله صدمني جوابه
بشار:رجع للبيت شارب و لكيناه واكع بالكاع
جوري:شنووو شارب بشار شدتحجي؟!
بشار:متشمين الريحه الي بي
جوري:فيصل ميسويها ابد ميسويها
بشار:سواها و خلص
كمت من يم فيصل و عفت بشار يحجي وياهم
انطوه ابره و كالو شوي و يصحى عليها ماكو داعي للمستشفى
دخلت للحمام غسلت وجهي و طلعت
لكيته واكف يم راس فيصل يحجي وياه بصوت خافت
بس واضح عليه معصب
رحت للمطبخ سويت گهوه و بقيت صافنه
فارت الگهوه و عبت الدنيا
حطيت ايدي على وجهي و صرت اشهك بالبجي
على صوت البجي مالتي دخلت يومي للمطبخ
اجت عليه حضنتني تهدي بيه عبالها دا ابجي علمود
فيصل متعرف بجيتي على حالي
بقت تهدي بيه و گالت
يومي:روه اكعد أنتَ اني سوي گهوه
هزيتلها راسي و رحت للصاله كعدت
شوي و طلع بشار من الغرفه كمت عليه و گلت
جوري:شنو حجيتو؟
بشار:رزلته مثل ما رزلني من شربت
جوري:ليش هيج سوه؟
بشار:كعدي و افهمي منه لان ما طلعت من عنده لا حق و لا باطل
جوري:تعال اكعد يومي حتسويلنه گهوه
كعد على القنفه شوي و طلع فيصل من
الغرفه، فهد بس شاف كام من مكانه و ركض عليه
حضنه و گال
فهد:اني اسف بابا كل هذا صار بيك بسببي اني، بعد ما اسوي اي شي يزعجك والله
فيصل:مو أنتَ حَبيبي مو أنتَ، مابيه شي هياتني واكف يمك
فهد:جنت اخاف امي تموت، و هسه صرت اخاف تموتون ثنينكم و تعوفوني
دنك عليه باسه و گال
فيصل:لتخاف حَبيبي ماكو شي
جابت يومي الگهوه حظتها على الطبله وراحت
كعد يمنه بقيت اباوعله مستغربه تصرفه
رفع حاجبه و گال متسائل
فيصل:مضيعه شي بوجهي؟
جوري:أنتَ كلك ضايع و مو عارفه وينك
بشار:من تنصح شخص علمود شغله طبق النصيحه على روحك بالاول، لككككك **** شنو رايح تسهر و ترجع لبيتك سكران
باوعت لفهد و كتله
جوري:فهود روح نام يلا تأخر الوقت
فهد:اريد اكعد يم بابا
جوري:روح حَبيبي بعدين تكعد وياه يلا امي
كام من مكانه باس فيصل و اجه عليه باسني
و راح لغرفته وجهت نظراتي لفيصل و نترت بي
جوري:ليششش هيججج سويييت!!
فيصل:ميخصج
بشار:فيصل ترااا اكوملك والله، بحياتكك محاط الشرب بحلكك شلووون هيج تسوي
حك لحيته و رجع ظهره على القنفه و گال
فيصل:ضايج و رحت اتونس بيها شي؟
كمت من مكاني و عطت بي
جوري:اليوم تشرببب باجر تجيني محششش
فيصل:ارجع و اگول ميخصج، صارلج اسبوع متجاهلتني و استمري هيج
كام عليه بشار جره من التيشيرت مالته و رگعه براسه
عطت بفزع و گلت
جوري:مووو هيججج بشاار
بشار:طايح حظ احجيلها ويه منووو جنت؟
درت عيوني على فيصل حاط ايده
على راسه و يتنفس بسرعه، صارت علامات استفاهم
براسي اريد جواب فيصل ويه منو چان
جوري:تعرف وين چان؟
بشار:خلي هوَ يحجي اني رايح، اي شي تريدي بس خابريني تلكيني يمج
جوري:متطلععع منااا اذا متحجي كلشي تعرفه
بشار:انطيتج طرف الخيط يلا سلام
اخذ اغراضه و طلع من البيت بدون مينطيني
جواب لسؤالي..
كعدت على القنفه و حطيت ايدي على راسي
ضربني صداع بسبب التفكير و الخوفه الاكلتها على فيصل، نزلت دموعي مسحتهن و حجيت بصوت مهزوز
جوري:بس انطيني جواب واحد، أنتَ خنتني؟
فيصل:لا مستحيل لتفكرين بهذا الشي
عطت بي..
جوري:لعد شنو كلام بشار احجي ويه منو جنت؟
فيصل:عمران
جوري:شنووووو!!!
فيصل:رايح انام تعبان اني
كام من مكانه لزمته من ايده و عطت بي
جوري:تخبلتتتتت أننننتَ
فيصل:لا
جوري:اكعد مكانك متروح لاي مكان
فيصل:تعباااااان
جوري:اااايييي حقككك، من الشرب و السكر
كعد يمي سحبني لحضنه، بعدت روحي قرفانه
من ريحته برغم سبح بس الريحه مراحت من عنده
باوعتله بنفس نظرات القرف و حجيت
جوري:شعندككك ويه الخايس
فيصل:شغل
جوري:لتجاااوبنييي ببرود، احجي كلشي هسه
فيصل:اذا ما حجيت شتسوين
جوري:اخذ ابني و اعوف البيت و اطلع ارجع يم اهلي
و لا ابقى يمك دقيقه
فيصل:تندلين الباب
جوري:ماشي فيصل أنتَ ردت هذا الشي
كمت من مكاني بس سحبني و وكعت بحضنه
طبع بوسه على شافيفي و گال
فيصل:مشتاقلج
جوري:تشتاقلك نار جهنم
فيصل:السالفه الي تورطت بيها قبل كم سنه، سببها عمران و اخذت حقي منه
جوري:شسويت؟؟؟
فيصل:مثل ما ورطني ورطته
جوري:كووووم ريحتككك لعبت نفسييي، شلووون هيج تسويييي فيصل
فيصل:بسببج
كمت من مكاني رجع سحبني عطت
بي..
جوري:كاااافي عوفني اوليييي و لتجيني ابد، مدام حطيت الشرب بحلكك
گلبني و صار فوكايه صار يبوس
بيه، ريحة الشرب تعط منه يحجي ويايه لسانه
ثكيل عرفته بعده سكران ما صحصح
فيصل:مشتاقلج جوريتي..
جوري:ممكن تكوم عني، و تروح تسويلك شي تشربه حتى تصحصح
فيصل:اريد انام بحضنج صار اسبوع حارمتني منه
جوري:من تروح منك ريحة الشرب و تصحى على حالك
عود تعال
ذب كل ثكله عليه و نام بدون ميحجي اي شي
حاولت اوخره عني حتى اكوم و بالگوه سحبت روحي من
جواه
كمت جبتله غطوه و غطيته، كعدت على
القنفه و سرحت بالتفكير
طلع الصبح و اني على نفس كعدتي بقيت گاعده
و افكر، التفكير اكلني اكل
شنو عنده ويه عمران، و ليش رجع سكران للبيت
و كومه اسئله اجت ببالي مالكيت الها جواب
بقيت على نفس كعدتي و دوامة التفكير ما فاركتني
دك تلفوني بسرعه جاوبت يقين دتتصل
يقين:جوري شنو وضعكم؟
جوري:ما اعرف
يقين:حجيتوا سوه؟
جوري:انتظره يكعد بعده نايم، أنتِ شصار وياج علمود شهوده
يقين:الحمدلله الي ببالي طلع مو صح بس خافت من تصرف فهد، لان مشايفه هيج شي ابد
جوري:الحمدلله گلبي والله بالي يمها
يقين:تعالو اليوم تغدوا يمنه
جوري:لا حبي تعذريني ما اكدر
يقين:ليش شعندج
جوري:بعد الي صار ترديني اجيب فهد يمكم؟؟
يقين:يمعوووده جهال شمعرفهم الغلط من الصح تعالي و لتكبرين الموضوع
جوري:ما اوعدج اريد اشوف فيصل شنو سالفته
يقين:تجون انتظركم
جوري:بس
يقين:بلا بسبسه تجين يعني تجين
جوري:تمام
سديته من عدها باوعت لفيصل فاتح عيونه
و يباوعلي مستغرب، گال
فيصل:شكو ليش گاعده هنا و لابسه حجابج
انتبهت على روحي فعلاً الحجاب بعده مانزعته
جريته من راسي و شمرته على القنفه كمت من مكاني
و گلت
جوري:كوووم اسبح و تعال يلا اريد نحجي
فيصل:شبيج
جوري:لمى شعدها وياك؟؟
باوعلي مصدوم، حجيت هيج اريد اعرفه
يتذكر الي صار البارحه لو لا.. اردفت
جوري:جاوبنييي فيصل!!
فيصل:والله ما اعرف شي عنها من اخر مره اتصلت بيه و حظرتها بعد ما عرفت اخبارها
جوري:يعني متتذكر الي صار البارحه؟
فيصل:سويت شي اني؟؟
حجيت بعصبيه و بصوت خافت
حتى محد يكعد على صوتي
جوري:البارحهههه اجيت و بحضنكككك لممى استااااذ فيصل، جبتتتت حبيبتك لبيتي و فوكاها سكررررااااانن شنو ممكن تسوي اكثر من هيج!!! هاا ؟
صفن بيه مستغرب عدل كعدته و گال
فيصل:اني هيج سويت؟؟ مستحيييل جوري تضحكين عليه أنتِ؟؟؟
جوري:خابر بشار و اسئله
كام من مكانه صار يدور على تلفونه راح للغرفه، اني شلت تلفوني
كتبت رساله لبشار
جوري:اذا فيصل سئلك عن لمى جاوبه ب اي
رأساً شافها و كتبلي
بشار:شعليها لمى؟
جوري:كتله جابها وياه للبيت اريد اخلي يندم على الساعه الشرب بيها
بشار:حلوووو ماشي
سديت تلفوني لما اجه فيصل ميعرف شيسوي
دك اكثر من مره على بشار، يروح و يجي بمكانه متوتر
حاولت اخفي ضحكتي حتى ما انفضح
تذكرت سالفه تضوجني و گلبت وجهي عليه
و اخيراً جاوبه بشار رأساً گال
فيصل:بشاااار صدك اني البارحه جايب لمى للبيت؟؟؟
الله يااخذنييييي، صدك تحجي الله عليك! لاااا يربييي لاااا
اني شصخمتتتتت، هيَ مره وحده شربت بيها، دروووح خلي اشوف حل لمصيبتيييي روححح
سده من عنده و صار يضرب على راسه
بالتلفون، اجه كعد يم رجلي اخذ ايدي بيده
باسها و گال
فيصل:والله ما اعرف شسويت، اسف اني اسف
جوري:كسرتنيييي فيصل يا اسف هذا
فيصل:والله ما اعرف شلون سويت هيج
كمت من مكاني صار كدامي يمنعني اروح
و گال بخوف
فيصل:وين رايحه
جوري:مستحييل ابقى يمك بعد
فيصل:لتسوين هيج جوري والله ما ادري بروحي
جوري:بدل الغلطه عندك ثنين، هم سكررااان و هم خنتني
دفعته عن طريقي و ضحكت اني اعلمك
فيصل
دخلت للغرف طلعت ملابسي حتى ابدل
من شافني طلعت ملابسي تخبل صار ميعرف شيسوي
يفتر ورايه يريد بس اجاوبه
فيصل:جوري بويه بس افهميييي والله ماكو هيج شي اكيد غلطانه أنتِ
انداريت عليه و عطت بي
جوري:اكذبببب عيوني و اصدكككك
تجاهلته و بدلت ملابسي اريد اخذ فهد
و نروح نتريك سوه، اخذت جنطتي و اغراضي
و رحت على فهد حتى اكعده
اول ما دخلت الغرفه شفته كاعد رحت عليه
بسته و گلت
جوري:صباح الخير حَبيبي، يلا كوم نروح عازمتك بَره
فهد:دلال جوري غير والله غير
ضحكت و كتله
جوري:اذا بابا سئلك عن البارحه كله جنت نايم ما اعرف شي
فهد:ليش؟ ميصير اكذب ماما
جوري:متكذب بس گول الي گتلك عليه
فهد:حاضر
جوري:يلا بدل بسرعه انتظرك بالسياره
كمت من مكاني دا اطلع انضربت بفيصل
سحبني من ايدي و گال
فيصل:وين رايحه؟ جوري لتعوفيني والله ما اكدر بدونج
نترت ايدي من عنده و گلت
جوري:مثل ما كدرت تخوني و ببيتي ف تكدر بدوني هم، يلا فهد بدل بسرعه اني بالسياره
عفته بصدمته و طلعت للسياره، صعدت بيها
و اتصلت على بشار.. شوي و جاوبني يضحك
بشار:ولج شسويتي بي خبلتييي والله
جوري:يستاهل
بشار:شلون اجت ببالج هيج شغله
جوري:من شفته ميتذكر لعبتها عليه، اريد يبطل المشروب
بشار:ترا اول مره يشرب و الظاهر مثگل
جوري:و اخر مره ما اريده يتعود على هل سمم هذا
بشار:بس والله صدمتيني يعني، و اني زدت من عندي هم
جوري:شحجيتله
بشار:كتله جابها و اجه للبيت و ثنينهم سكرانين و دخلها لغرفتج
جوري:زين تسوي
بشار:تجين على الغده مو؟
جوري:اي
سديته من عنده و دكيت هورن علمود
فهد يطلعلي.. بقيت انتظر تأخر، نزلت من السياره
و دخلت للبيت شفت فيصل واكف يمنعه من الطلعه
جوري:شكووو؟
فهد:ميخليني اجي وياج
جوري:عوف الولد بحاله
فيصل:ابني يبقى هناااا جوري
جوري:ميخالف ارجعه عود هسه اريد اخذه نتريك سوه
فيصل:ترجعين أنتِ هم مو؟
جوري:مستحيل تحلمم فيصل
جرني من ايدي و حضني بقوه
و گال..
فيصل:غلطتتت اسف و الله اسف بس لتروحين
جوري:اسفك ميفيدني بشي، يلا فهد ماما
ابتعدت عن حضنه و اخذت فهد و طلعنا
رحنا لمطعم على البحر، طلبت وجبه ريوك
و كعدنا ننتظر..
فهد:ليش هيج سويتي ويه بابا؟؟
جوري:حتى ميعيد غلطته
فهد:عقاب يعني؟
جوري:اي حَبيبي
فهد:بابا يحبج هوايه لتزعلي
جوري:لتدخل أنتَ امي مشاكلي اني و ابوك نحلها بيناتنه ابد لتدخل روحك
بقه ساكت ما حجه شي، جابوا الاكل
حطوا كدامنه كعدنا ناكل و هوَ يحجي عن شهد
اسم شهد ما غاب ع لسانه لحظه
ابتسمت و اني استمعله بكل حب و هوَ يحجيلي عن الشغلات الي يحبها بيها، و شنو الي يزعجه منها
اخر شي ختمها و گال
فهد:اتمنى بس اكبر اتزوجها و احبها و اداريها مثل بابا
جوري:ان شاء الله حَبيبي، بس احنه نترك كل هاي السوالف و نركز على الدراسه و بس
فهد:مو بيدي كل تفكيري بيها
جوري:اني صديقه الك مو بس امك، و انصحك بصفتي صديقتك تسمع نصيحتي؟
هز راسه ب "اي" ابتسملته و اردفت
جوري:ارجع و اكولك بعدكم صغار، و بوستك الها هذاك اليوم خلتها تخاف منك حَبيبي.. لتسوي هيج سوالف و ابتعد عنها لان كلها حرام، كلشي بالحلال حلو
و بس تكبرون اني و ابوك نخطبها الك، بس بعدك صغير أنتَ و هاي السوالف كلها اكبر منك ركز بدراستك و اخذ شهادتك و كون نفسك و بعدها فكر بالحب و الزواج
فهد:احجيلي قصتكم أنتِ و بابا شلون حبيتوا بعض و تزوجتوا
ابتسمت بكسره و حجيت
جوري:بس تكبر و تصير تفهم اكثر وعد احجيلك كلشي
بس اكولك شي واحد، صير مثل ابوك و حب بگلبك لحد ما تكبرون و بعدها اعلن حبك الها و اخطبها و تزوجها
و لتسمح تروح لغيرك... دائماً اهتم بيها بس بحدود و خاف عليها هيج راح تخليها حتى لو متحبك راح تحبك
فهد:يعني شلون؟
جوري:يعني خليها تحسك مصدر امان الها، احميها من الكل مو تأذيها.. احتويها و ساعدها من تحتاج مساعدتك
بس كلشي بحدوده فهد
فهد:اوووف جوريتي الله لا يحرمني منج
جوري:و لا منك حَبيبي أنتَ، يلا كمل اگلك و اكو شي لازم نسوي بعدها
فهد:شنو؟
جوري:تعتذر عن الصار مثلاً ؟
هز راسه و بقه ياكل بصمت، كملنا اكلنه
دفعت الحساب و طلعنا متوجهين لبيت بشار
نزلنا من السياره و صعدنا لشقتهم
دكيت الجرس باوعت لفهد يفرك بيده متوتر
انفتح الباب و صارت بوجهي يقين
سلمنا عليها و دخلنا جوه، جانت شهد تعلب بالصاله
و بشار يتفرج بالتلفزيون بس شافت فهد ركضت لغرفتها وسدت الباب
باوعت لفهد و اشرتله يحجي
وكف كدام بشار و يقين و گال و هوَ منزل راسه
فهد:اعتذر منكم على الي سويته مجنت اعرف انو شي غلط
يقين:مصار شي حَبيبي بس لتعيدها متفقين؟؟
فهد:وعد متتكرر بعد
يقين:يلا روح يم شهد زعلانه منك كلش
هز راسه و راح باوعت لبشار شلون يخزر
بفهد، وجه نظراته ليقين و گال
بشار:ليش خليتي يروح يمها؟؟
يقين:شبيك بشار اطفال هذول
بشار:عذريني جوري بس ما اريد ابنج يبقى ويه بنتي وحدهم
كام من مكانه بدون ميسمع مني ودخل لغرفه شهد
و سد الباب، حرت شنو احجي حقهم ابني طايح حظ
و حقهم يخافون على بنتهم من عنده
كعدت على القنفه يقين گالت
يقين:لتزعلين بس يخاف عليها
جوري:ما زعلت والله، اني خايفه عليها اكثر
يقين ابني يحبها قبل شوي ما سكت و هوَ يحجي بيها خبلني يحجي عبالك رجال كدامي مو طفل
يقين:حب الطفوله بريئ و مينخاف منه، بس هوَ سوه حركه شايفها بيكم و عباله عادي
جوري:كم مره اگول لفيصل حركاتك و رومانسيتك لتطلعها كدام الولد بس ميسمع مني، بقه بس كدامكم ما باسني
ضحكت و گالت
يقين:على طاري فيصل شمسويه بي ولج؟؟
جوري:يستاهل والله
يقين:قبل شوي خابر على بشار متخبل لان طلعتي من البيت يريد يعرف وينج
جوري:خلي يتخبل شوي، قابل بس اني يخبلني
طلع بشار من الغرفه عاف الباب مفتوح و اجه كعد يمنه
و كل شوي يرفع عينه على الباب يشوفهم
باوعتله و گلت
جوري:ميسوي شي بعد لتخاف
بشار:كلههه منكم انتوو
جوري:اعرف والله صوج فيصل كم مره حجيت وياه و كتله ميصير تسوي كدام الولد اي شي ميسمع
بشار:شوكت يكبرون و نزوجهم و نخلص
يقين:ليش تريد تخلص من بنتي
بشار:مو احسن ما يكضوها بالختلات، بنتج هم ادبسز تحبه
جوري:جهااال والله ميفهمون
يقين:قبل شوي گلت لجوري و ارجع اگلك، حبي الطفوله مليان براءه خليهم مدام ممسوين شي غلط كلنا حبينه و تزوجنه الي نحبه، شنو فرقهم عنه همَّ؟
بشار:فرقهم انو همَّ جهال بعدهم مو مال حب و سوالف طايح حظها
دك تلفوني باوعت فيصل ديتصل رفضته
و عفت التلفون باوعلي بشار و گال
بشار:جاوبي قبل ليقتحم البيت
جوري:خلي يحترك شوي متونسين شورانه
كمت ويه يقين ساعدتها بالاكل خلصنا كلشي
و صرنه ننقل الاكل على ميز الطعام
دك الجرس كام بشار فتحه و دخل فيصل
يقين راحت للغرفه تبدل ملابسها و اني تجاهلته
و كملت نقل الاكل..
كعدنا ناكل سوه، كل ما ارفع عيني على فيصل
اشوفه يباوعلي بنظرات توسل
اخر شي گال
فيصل:جوري كافي لتكبرين الموضوع
نزلت الخاشوكه من ايدي و حجيت ببرود
جوري:اي هيَ خيانه قابل شنو و اكبر الموضوع
فيصل:والله ما اتذكر اي شي، مستحيل اخونج والله مستحيل
جوري:بس المستحيل صار و خنتني
يقين:خلونا نكمل اكل براحه و بعدين تعاركوا ممكن؟
سكتت و كملت اكلي، كلنا كملنا و نقلنا كلشي
اني ويقين و نظفنا المطبخ هيَ خدرت جاي
و اخذته و رحنه كعدنه يمهم
فيصل:جوريتي والله متأكد ممسوي هيج شي اني، اكيد اكو غلط
ما تحملت ابقى ساكته اكثر صرت اضحك
و بشار انفجر ويايه بالضحك، فيصل صار يباوعلنه
ميعرف شديصير گال
فيصل:شكووو تضحكووون
بشار:والله خطيه كافي
جوري:حرامات فضحت روحي بسرعه، ما برد گلبي منه بعد
فيصل:شبيكممم احجوااا
بشار:سلامتك يالسكييير سلامتك
عاط بينه ثنيناتنه و كفنا عن الضحك
فيصل:تحجووون شكووو لو اطيح حظكمممم
بشار:مثل ما ماكو لمى و لا اكو خيانه، ماكو شي
فيصل:شلون يعني؟
جوري:يعني استاذ فيصل شعندك البارحه ويه عمران حتى خلاك تشرب و ترجع للبيت سكران؟؟؟
فيصل:يااا **** انوب شعندي وياه؟؟
جوري:ليش كذبت عليه و كتلي طالع ويه يمان و بشار؟؟
فيصل:هاا!
بشار:وجعااا احجي لا ادفرك هسه
فيصل:شجيت اني ليش؟
جوري:ليش حتى تضم السالفه و تغيرها؟ حجيت كلشي صار وياك ف هسه اريدك تحجيلي و أنتَ صاحي
شنو علاقتك بعمران الخايس
فيصل:اخذت حقي منه
بشار:يااا حق هذاااا؟
فيصل:ورطته مثل ما ورطني، ورطته بورطه مستحيل يطلع منها سلامات
جوري:شصخمتتتت فيصل تريد تفتح علينه باب مشاكل جديد؟ مكفاك الي صار بينه قبل؟؟
فيصل:لتخافين دارس الموضوع درس و اني بعيد كل البعد عنه، ميعرفني و لا يعرف اني الي وره الموضوع
بشار:أنتَ خبل؟ جاوبني الله عليك شارب شي؟؟؟
جوري:اي شارب لحد السكر
فيصل:هيَ مره وحده
جوري:تعرف شكد قرفت منك البارحه لو متعرف؟؟؟؟
يقين:جوري على كيفج لتنفعلين زايد انوب تتخربطين علينه
جوري:مابيه شي، و اذا يصير بيه ف بسبب فيصل
فيصل:اكو شي يأذيج؟ احجي اخذج مستشفى؟؟؟
جوري:أنتَ تريد تموتني و متعرف شلون!
فيصل:شسوي حتى تسامحيني
جوري:والله ما اعرف صرت اخاف منك فيصل، اذا البارحه شربت احتمال باجر ترجعلي للبييت محشش
فيصل:اول و اخر مره وداعتج، جنت ضايج منج والله
بشار:من شربت اني شحجيت أنتَ؟؟ تحب اطيح حظك مثل ما طيحت حظي؟
جوري:ياريت كوم اضربه بردلي گلبي كوووم
بشار:الف طلب مثل هل طلب ولا يهمج
كام وكف عليه حيله و لزم فيصل من راسه
ضربه بقوه و رجع جر راسه ضربه مره ثانيه
و كعد مكانه و گال
بشار:اضربه بعد؟؟
جوري:عاشت ايدك ارتاحيت هسه
فيصل:اني اعلمج بس نرجع البيت صبريلي
كام فيصل من مكانه و على غفله اندار على بشار
انطاه بوكس و تعداه وراه للحمام
يقين:مخاببيييل والله
كامت من مكانها سحبت كلينكس و كعدت
يم بشار تمسح بالدم الي طلع من خشمه
خفت على روحي خاف يسويها صدك و يسويلي شي
طلع فيصل من الحمام وكف بباب غرفه شهد
و گال
فيصل:فهد يلا راح نروح
طلع فهد يمشي قبل فيصل وكف بالباب ينتظرنه نكوم
باوعت لبشار و گلت
جوري:تروح للمستشفى خاف خشمك انكسر، ما شاء الله مو ايد حديده
بشار:لا ميحتاج وكف الدم
تقدم فيصل على بشار سحبه من ايده
كومه و حضنه و گال
فيصل:مو اسف مستاهلها
بشار:درووح *** رووح احسن ما اطيح حظك
باوعلي و گال
فيصل:يلا امشي، حسابج بالبيت تلعبين عليه مووو؟
جوري:هااا! لا شسمه اني ابقى هنا روحوا انتو
فيصل:كوممي حَبيبتي كومي كدامي يلا
جوري:يقين تريدني، مو يقين
رفعت حواجبها و گال و هيَ تضحك
يقين:لا ما اريدج روحي ويه رجلج يلا
جوري:اسو خابرتني گالت تعالي راح اروح يمها
فيصل:من تكذبين كذبي عدل حَبيبتي، اسو مسافره ويه يمان
صارت عندي لحظه ادراك باوعتله و رفعت حاجبي
جوري:اني شلون ما عرفت تكذب عليه لما گلت طالع ويه يمان و بشار؟؟؟؟؟
فيصل:كومي جوري، اليوم كتلتج عمل شعبي
جوري:فوكاااها ترااا أنتَ كذبت عليه
بشار:عوفها فيصل اذبحك اذا تسويلها شي
فيصل:متكومين مو؟؟؟
جوري:عوفني ما اجي وياك
تقدم عليه و باوع ليقين و بشار گال
فيصل:غمضوا عيونكم لتباوعون
شالني من مكاني و طلع يمشي بيه
و همَّ يضحكون علينه، اضرب بي اريده ينزلني
ماكو قفل و لا كأن يسمعني
طلعنا من يمهم و نزلنا للسياره انطه جنطتي
لفهد و گال
فيصل:طلع المفتاح مال سياره
طلع المفتاح و انطاه لفيصل فتح السياره
و صعدني بيها و فهد صعد وره
و هوَ اندار على جهة السايق و صعد
فتح المسجل و حط اغاني و ساق بينه للبيت
اول ما وصلنا نزلت قبلهم اركض
دخلت للغرفه و قفلت الباب عليه، اعرف ناويلي على نيه گشرههه
شوي و صار يدك بباب الغرفه حتى افتحه
فيصل:جورييي فتحييي الباب احسن ما اكسره
جوري:ما افتح حتى تضربنيييييي!!
فيصل:راح اكسره والله
جوري:ماااا روح فيصل روووح
صار يدفر بالباب خفت لا يسويها صحيح
و يكسره فتحت القفل و ختلت وره الباب
فتحه و دخل حصرني بالزاويه و گال
فيصل:اني تلعببييين عليه ولججج؟
جوري:خلص اسفه اسفه متنعاد والله، گلبي راح يوكف لتضربني
صفن بيه لثواني و سحبني لحضنه گال
فيصل:خايفه مني جوريتي ؟؟
جوري:أنتَ تريد تضربني
فيصل:تنكسر ايدي قبل لا تنمد عليج! شتحجين بويه أنتِ شتحجين
جوري:لتضربني فدوه
فيصل:اكسر راسج هم بس بطريقتي اني
شالني و ذبني على الجربايه، شمر روحه فوكايه
و صار يوزع قبلاته على وجهي
و يتغزل بيه ب احلى انواع الغزل
سحبني لحضنه و باسني بقوه من رگبتي
و گال ..
فيصل:جوريتي ميت عليج اني
جوري:اوعدني متشرب بعد!
فيصل:اول و اخر مره والله جنت مخنوك و ضايج من تصرفاتج أنتِ و ابنج، ردت انسى كلشي ما حسيت روحي غير بالبار و المشروب بيدي
جوري:اذا تشرب بعد تنساني فيصل
فيصل:وعد من فيصل لجوريته، كلشي اترك لخاطر عيونج الحلوه
النهايه🫶🏻
.....
لهنا و نكول انتهت احلى قصه.. "حب فيصل لجوريته"
و نسد بابهم للابد..
لتنسون التصويت و التعليق بين الفقرات🤍
شنو رأيكم بالبارت الاضافي؟؟
شنو تحبون تكولون لفيصل و جوريته♥️