لا شَيءَ يمرُّ عبثاً
حتى تعثراتكَ الصَّغيرة
كانتْ لأجلِ أن تعرفَ شيئاً ما..
لتنسون التصويت و التعليق بين الفقرات🤍
#وَتيرة_وَد
الكاتبة روح الدليمي
********************
ركضوا خاله و فيصل عليها شالها فيصل حطها على القنفه انطيت فهد لخاله و رحت جبت جهاز الضغط
قستلها ضغطها چان نازل
فيصل راح جاب عطر و صار يشمم بيها حتى تصحى
رفعت رجلها و بقيت لازمتها شوي شوي كامت تصحى
حطيت كوشات جوه رجلها و رحت للمطبخ حطيتلها لبن و ملح و جبته الها تشربه
شربتها بالگوه متقبل تشرب
جوري:هسه تصيرين احسن شجاج
هيام:صارلها يومين متاكل كلشي و منا تعب السفر
فيصل:هسه تكوم تكمل اكلها و تنام ترتاح
اسماء:اريد انام جوري تعالي ويايه
جوري:كملوا اكلكم انتو اني اخذها للغرفه
كومتها و سندتها اخذتها لغرفتها الي خصصناها الها
نومتها بالفراش ردت اطلع گالت
اسماء:جوري تعالي يمي
كعدت يمها لزمت ايدي و صارت تبجي
جوري:شبيج حَبيبتي شنو صاير وياج؟
اسماء:حامد كسرني جوري
شهگت و لطمت على صدري و گلت
جوري:شسوه؟
اسماء:اغتصبني لان رفضته و يمكن هسه حامل اني
اندارينه ثنيناتنه على صوت فيصل
شفته واكف بالباب و معصب سمع حجينه
اجه سحبني من ايدي كومني و گال
فيصل:طلعي برا اريد احجي وياها
جوري:تعال نحجي اني وياك قبل كلشي
طلع ويايه سديت الباب و كتله
جوري:لتأذيها بغلاتي عندك الغلط مو منها اسمعها و احتويها
فيصل:بس اتفاهم وياها ما اسويلها شي
عافني و دخل للغرفه و قفل الباب
عفتهم و رحت يم خاله سئلتني على اسماء
جوري:فيصل يمها ليظل بالج
هيام:اني اعرف شبيها بس ما حسستها اعرف
ماعرف شنو اسوي من فيصل گال نجي لهنا جبتها ويايه لان اذا تبقى يم اخوانها يزوجوها اله
جوري:ليش خليتوا يتجرأ و يسوي هيج شي
هيام:مو بالبيت احنه جنه بالنجف و هيَ ما راحت ويانه بقت بالبيت و ال*** داخل عليها مغتصبها
جوري:كله بسببي
هيام:أنتِ شعليج بنتي
جوري:لان فيصل تزوجني حامد راد يكسر فيصل ب اخته
هيام:حسبي الله ونعم الوكيل بي
اجه فيصل كعد بس وجهه ميتفسر بقه ساكت كلشي ميحجي اخر شي ما تحمل گال
فيصل:وينكككمم عنهااا؟؟؟ ليش عايفيها وحدهاا ليششش
جوري:فيصل صوتك شبييكك
عاط بيه گال
فيصل:لتدخلييين أنتِ خليج بعيده
عفتهم و كمت ماتحملت ابقى گاعده فشلني كدام امه
رحت يم اسماء لكيتها دتبجي حاضنه المخده و تشهگ بالبجي
كعدت يمها رفعت راسها شافتني شمرت روحها بحضني
و زادت بالبجي اكثر و اكثر
حضنتها وصرت امسح على شعرها و اهدي بيها
جوري:لتبجين صدكيني كلشي اله حل و ربج راح ياخذ حقج منه
اسماء:ماشفتي فيصل شلون چان يباوعلي مجان يريد يحسسني بس اني حسيت
جوري:ميلومج ابد صدكيني راح ياخذ حقج منه و من اهله
اسماء:هوَ ميريدني حباً بيه هوَ يريد املاكنه كلها لهل سبب سوه هيج حتى يضمني اله
جوري:الي عدكم عدهم شنو هالطمع هذا؟
اسماء:لا جوري الي عدنه اكثر منهم احنه ابويه ما بقه معتمد على الفلوس الي تجي مثل عمامي لا اشتغل و كون نفسه و كل اخواني يشتغلون و كلنه عدنا املاك ب اسمنه ف هذا الشي خلاه يطمع بينه و بعده يجي ابوج هم اشتغل و زاد فلوسه و املاكه لهل سبب چان رايدج قبلي
جوري:كارثه هل عائله والله
اسماء:اريدج تجيبيلي اختبار مال حمل اشوف روحي بسلا حامل
جوري:ما اتوقع بس خلي اخذج للدكتوره مالتي و اذا طلعتي حامل شتسوين؟
اسماء:انزله ما ابقي ابن حرام ببطني مستحيل انوب انجبر اتزوجه
جوري:يارب متكونين حامل و تعيشين الشعور العشته
اسماء:يا شعور شقصدج؟
جوري:ولا شي انسي خلي اروح اخابر اخذلج موعد
طلعت من غرفتها و رحت للصاله لميت كلشي على الميز
و نظفت الصاله و فتت للمطبخ
هم نظفته و طلعت اخذت تلفوني و راسلت السكرتيره طلبت منها موعد
و رحت يم الجهال شفتهم نايمين
تمددت على القنفه الموجوده بغرفتهم و غفيت من التعب
حسيت على ايد تلاعب خدي فتحت عيوني
شفته گاعد بالگاع و يمسح على خدي و يبتسم
كمت من مكاني بدون ما احجي وياه سحبني من ايدي
انضربت بصدره حاولت افلت ايدي بس شاد قبضته عليها
جوري:فيصل عوفني دتأذيني
فيصل:من شنو زعلانه
جوري:مزعلانه عوفني اروح خاف خاله تحتاج شي مني
فيصل:تعشوا و ناموا بقيت بس اني
دفعته ب ايدي الثانيه لزمها و سحبني عليه اكثر طبع بوسه طويله على شفتي
ابتعد عني جر نفس و گال
فيصل:مو قصدي اصيح عليج بس الموضوع يدك بگلبي و راسي حاير شنو اسوي
جوري:اختك مغلطانه و اني متأكده هيَ مو حامل باجر عدها موعد يم دكتورتي و نتأكد
فيصل:يارب تكون مو حامل ما اريد اجبرها تتزوجه
جوري:اختك ماسوت غلط هوَ الي غلط وياها ابد لتسوي شي و تندم عليه بعدين
فيصل:نار بگلبي مشتعله صعب اشوف اختي بهل حاله
جوري:كله يعدي و يصير سوالف بس أنتَ لتحسسها ب اي شي و خليك مثل ما أنتَ وياها و تقرب منها اكثر محتاجتك توگف وياها هيَ
فيصل:من ردت اتزوجج كلهم صاروا ضدي خلوني اراجع قراري اكثر من مره
جوري:متندم لان تزوجتني؟؟
فيصل:اي متندم بس متندم على كل لحظه بقيت بعيد عنج بيها أنتِ هديه ربي الي
حضنته و بسته من رگبته و گلت
جوري:و أنتَ عوض ربي الي ربي ليحرمني منك
فيصل:لبسي صايتج و تعالي عندي الج مفاجئه
جوري:شنوو؟
فيصل:دلبسي و تعاي انتظرج يلا
رحت لبست صايه و شال و رحت لكيته واكف يم باب البيت فتح الباب و خلاني كدامه سد عيوني بيده و گال
فيصل:لتفتحين الا اگلج خوش؟
جوري:تمام
لزم ايدي و مشاني طلعني برا وگفني بقيت واگفه و مغمضه عيوني
لزم ايدي و گال
فيصل:فتحي يلا
فتحت عيوني صارت كدامي سياره نوع ميني كوبر حمره و عليها شريط لونه ابيض مثل الفيونكه مسوينه بقيت فاتحه عيوني مصدومه باوعت لفيصل و گلت
جوري:هاييي لمنو؟؟
فيصل:الج
جوري:كووول والله !!
فيصل:اكذب عليج شنو؟
جوري:عزاا فيصل شكراً شكراً
گمزت عليه حضنته شالني و صار يفتر بيه
و اني اضحك فرحانه
نزلني من حضنه باس گصتي و گال
فيصل:يلا صعدي فرينه بيها
جوري:بس ماعرف اسوق شلون
فيصل:اي صعدي اني اعلمج يلا
جوري:و الجهال؟
طلع تلفونه من جيبه اتصل على اسو (اسماء)
فيصل:اسو اني و جوري راح نطلع شوي و نرجع بس عينج على الجهال، ميخالف دزيلي على الواتس شتريدين نجيبلج ويانه تدللين
سده منها و گال
فيصل:يلا صعدي
شال الشريط من السياره و صعدنا علمني شلون اشغلها
و شلون ابدل الگير و صرت اسوق على كيفي
ضحك و گال
فيصل:اذا تبقين هيج تسوقين منا لباجر منرجع دوسي بانزين شوي
جوري:يمهه فيصل اخاف خاف ادعمها انوب ماعندي رخصه
فيصل:لتخافين خليج سبعه يلا بويه بس لتتعدين ال ٧٠
دست بانزين و صرنه نفتر بالمنطقه شعور كلش حلو
اول مره بحياتي اسوق سياره و بدون ما اطلب
اخويه جنت كل مااكله يكلي ماعدنه نسوان تسوق و يرزلني
ربط تلفونه على المسجل و شغل اغاني
و صرنه نفتر بشوارع المدينه
فوك الساعه تقريباً احنه بس نفتر
صرنه قريبين من ماركت گال
فيصل:طبكي هنا خلي ننزل اسو تريد حلويات
طبكت السياره و قفلتها و نزلنا اخذ ايدي ب ايده
و دخلنا للماركت اخذ سله و صار يباوع بالتلفون و يدور بعيونه بين الحلويات
جوري:شوفني شنو تريد اني اعرفهن
انطاني التلفون مشيت كدامه و صرت اشيل و احط بالسله
و اخذت كم شغله ناقصتنه بالبيت حاسب و رجعنا
طبكت السياره بالكراج بصف سياره فيصل
و دخلنا للبيت لكيت اسو شايله شهد و تفتر بيها تبجي تريدها تسكت
من شافتنه اجت انطتني شهد و كعدت على القنفه گالت
اسماء:لجج جوري شنو هاي بنتج الله يعينج متقبل تسكت
جوري:رضعتيها؟
اسماء:لا ليش لازم ارضعها؟
فيصل:ديلا استلم و فوكاها تكول متسكت
ضحكنه اني و فيصل انطاها الاغراض و راح لغرفه الجهال سوالها ممه و جابها اخذتها منه رضعتها نامت
اخذها حطها بمكانها و رجع كعد يمنه
فيصل:تشوفون فلم؟
جوري:مو باجر عدنا موعد لازم نگعد من وكت
فيصل:جوري ترا بعدها ساعه ١٠ بعد وكت
جوري:تمام طلعلنه فلم اني و اسو نحضر للسهره
كمنا اني و اسماء سوينه شاميه و طلعنا ببسي
و رتبنه الحلويات بالمواعين و اخذناهن للصاله
گعدنه نتفرج فلم رعب و فلم فيصل و اسماء المفضل
و اني اخاف منه
الفلم كله حاضنه فيصل و مغمضه عيوني
و هوَ يعرف بيه اخاف متعمد يحط هل فلم
فيصل:جوري فتحي عيونج باوعيلي
جوري:فيصل عوفني عود ردنه نتونس خلتني بس مغمضه عيوني وخررر عني وخررر
فيصل:عوفيني حتى اوخر مو حاضنتني و ترديني اوخر عنج
وخرت ايدي عنه حسيت على شي انرش على وجهي
عطت بصوت عالي و رجعت حضنته
صاروا يضحكون عليه هوَ و اسماء
شلت الكوشه الي بصفي و صرت اضرب بيهم
و ابجي و همَّ ميتين من الضحك بحيث ميكدرون يحجون و يكولولي و عوفينه
جوري:شوكت تبطلووون سوالفكم هاييي تعرفوني اخاف
أنتِ اسو الادبسز اني اعلمج بسيطه
شمرت الكوشه عليها و كعدت تعبت من كد ماضربتهم
و همَّ ولا يمهم
فيصل:يلا كافي خلي نطفي و نكوم ننام
جوري:نام يم اسو متجي يمي اذا تقرب على الغرفه حسابك عسييير
فيصل:عسير تفاح لو برتقال؟
جوري:بلا سوالفك فيصل ترا اطنگر عليك و تعرف طنگورتي شلونها
فيصل:لا يمعوده امشي اني اسف روحي نامي ما اجي يمج
اسماء:هاي شنو فيصل تؤتؤ ما توقعت هيج من كلمه وحده سحبت روحك
جوري:انچعمي أنتِ
اسماء:تراا اخويه مضطهد ميصير هيج ماتوقعتها منج جوري افااا عليج
جوري:امشي نامي لا اهفج بالگلاص على صماخج
فيصل:يجي من گلبج تخليني انام بعيد عنج؟
جوري:اي يجي حَبيبي يلا بيتك بيتك روح نام يم اسو لو يم الجهال
باوعت لاسماء و كلتلها
جوري:و أنتِ لمي الهوسه و غسلي المواعين مو تعوفيهن!
اسماء:بعد اوامر ثانيه ؟
جوري:اممم.. لا بس عزلي الصاله و طفي الاضويه
اسماء:ترا جايين من طريق سفر المفروض متخليني امشي بالگاع تشيليني على ظهرج و تفترين بيه
جوري:فيصل اختك تريد تنكتل و متعرف شلون
فيصل:لتدخلوني نسوان بيناتكم يلا تصبحون على خير
اسماء:وسفه عليك يا خويه بدال ما تضربها على حلگها تعوفني وياها و تروح
جوري:اسووو العوبه لتخليني اصير الجنه التسس و اشد وياج
فيصل:لا لا عيب عليج هسه الحيه تزعل لان تشبهين روحج بيها
اخذت الكوشه و شمرتها عليه و فلتت للغرفه
و قفلت الباب..صار يدك بالباب يريدني افتحه
فيصل:فتحييي الباب لجج
جوري:ممنوع دخول الرجال اعتذر
فيصل:دفتحي احسن من ما اكسره
فتحتله الباب اعرفه يسويها صدك و يكسره
سحبني من ايدي و عصرني عصر بحضنه
باسني بقوه من خدودي و گال
فيصل:شلون تسس عندي تخبل
جوري:ديربالك منها للتسس ترا سمها قوي و تموت
فيصل:صايره قويه مدام جوري
جوري:قويه و اكسر كل واحد يفكر يأذيني
فيصل:قوتج هاي مو تطلعيها عليه
جوري:اذا تأذيني بيوم مو بس قوتي اطلعها عليك
فيصل:كلام قوي متأكده؟
جوري:و غلاتك عندي
باسني و اخذني للفراش نومني بحضنه و صار يلعب بخصلات شعري، لحد ما نمت
گعدت ثاني يوم على صوت المنبه
فتحت عيوني بالگوه، اخذت التلفون طفيته و كمت من مكاني باوعت فيصل نايم عفته و رحت لاسو اكعدها لكيتها گاعده
جوري:صباح الخير يا حلو
اسماء:صباح النور
جوري:يلا بدلي حتى نروح
اسماء:تمام دقايق و اكون جاهزه بس منو ياخذنه؟
جوري:فيصل راح يروح ويانه
اسماء:لا جوري لتخلي يجي استحي منه
جوري:اخوج خايف عليج يريد يتطمن خلي يجي احسن من ما يخبصنه بالتلفونات
اسماء:والله احسها مو راهمه
جوري:بدلي و لتفكرين زايد يلا اني راح ابدل
رحت للمطبخ شفت خاله گاعده صبحت عليها
و اخذتلي كلاص مي اشرب گالت
هيام:جوري
جوري:نعم خاله
هيام:تتوقعين صدك ماخذها؟
جوري:خاله لتشغلين بالج ان شاء الله ماكو الا الخير
و حتى لو انو طلع صدك ماخذها لتسمحون لهل شي يدمرها ويدمركم
عفتها و رحت بدلت ملابسي لكيت فيصل جاهز و دينتظرنه.. طلعنا سوه و رحنا يم عياده الدكتوره
چان كدامنه بس وحده كعدنه انتظرناها تخلص و دخلنا اني و اسو فيصل بقه ينتظر بره
شرحتلها حالتها و شنو صار وياها طلبت
منها تنام على سرير الفحص
فحصتها و طلعت مبتسمه
جوري:شنو الوضع؟
الدكتوره:مابيها اي شي بعدها بنيه
اني و اسو وحده تباوع بوجه اللخ مستغربات
جوري:شلون؟ بس هوَ اغتصبها!
اندارت على اسماء سئلتها
الدكتوره:بعد الاغتصاب نزفتي؟
اسماء:اي و حتى بقيت اسبوع كامل
الدكتوره:الشهريه عندج كم يوم تبقى؟
اسماء:اسبوع
الدكتوره:اذاً؟
جوري:يعني قصدج النزيف الي صار عدها مال الشهريه؟ و هوَ ماكدر ياخذها صح؟
الدكتوره:بالضبط هيَ من خوفها و رهبتها نزلت عليها الشهريه و هوَ عافها لان عباله اخذها
جوري:الف الحمدلله يارب
كامت عليه اسو حضنتني و صارت تبجي
تشكرت من الدكتوره و طلعنا
شافنه فيصل اجه يمنه و يباوع لاسماء و نضراته كلهن قلق
حضنته و گالت و هيَ تبجي
اسماء:بعدني بنيه فيصل بعدننييي
غمض عيونه بأرتياح و حضنها بقوه
و گال
فيصل:الحمدلله بويه الحمدلله
طلعنا من العياده و رجعنا للبيت تلكتنا خاله و هيَ تسأل
و تستفسر.. كلتلها اسماء حجي الدكتوره
خالتي كامت تهلهل و تبجي
دخلنا للصاله كعدوا همَّ و اني بدلت ملابسي و رحت احظرلهم ريوك كلنا على لحم بطنه
انتظر اليوم يخلص و يجي باجر
باجر اول يوم لتنفيذ الخطه
تريگنا و بدلنا كلنه و طلعنا للسوك مارجعنا لليل
من التعب نومت الجهال و رأساً نمت
كعدت ثاني يوم ب ٨ كمت حظرت ريوك الي ولفيصل و حظرت لخاله و اسو و خليته من يكعدون يتريكون
تركينا و كمنه بدلنا و طلعنا
لن انسى تلك الليالي التي بكيت فيها حتى كاد داخلي يذوب لن انسى يوم شعرت بالتخلي
و انني بلا اي اهميه
و انني لا استحق الحب والله لن انسى...
ايام و شهور اني انتظر هذا اليوم و هاي اللحظه
راح تشوف شي مني بعمرك و حياتك متنساه
نزلت من السيارة و دخلت للشركه
امشي و صوت كعبي لفت انتباه الموجودين
و انظارهم توجهت عليه
وكفت يم الاستعلامات و سئلت على مكتب المدير
جوري:عندي مقابله ويه المدير وين مكتبه بلا زحمه؟
_اسم حضرتج؟
جوري:حور عدنان
_الطابق الفوك اخر مكتب مقابيلج يصير
صعدت فوك و وگفت گدام باب المكتب
اخذت نفس قوي و زفرته بهدوء
و كررت هالشي كذا مره حتى اهدء و فعلاً هديت شوي
دگيت الباب و دخلت بعد ما سمحلي بالدخول
سديت الباب و مشيت كعدت على الكرسي و حطيت الملف مالتي على الطاوله اخذه و صار يدقق بي
بعد شوي رفع عيونه عليه باوعلي و گال
_السي ڤي مالتج مُمتاز وجودج حيفيد الشركه
ابتسمت ابتسامه النصر و حجيت بهدوء
جوري:ان شاء الله اكون عند حسن ضنك
_اذا تحبين من اليوم تكدرين تباشرين بالعمل
جوري:ليش لا
شال سماعه التلفون اتصل على رقم و گال
_اسامه تعال بسرعه
سد التلفون و گال
_هسه حيجي اسامه يدليج على مكتبج و يشرحلج كلشي
اجه الشخص المدعو اسامه طلعت وياه و اخذني على مكتبي و كعد يشرحلي عن الشغل و كلشي
ميعرف اني حافظه كل شبر بهاي الشركه بسبب بحثي المتواصل عنها
بعد ما انتهى من شرحه طلع من المكتب و سد الباب
طلعت تلفوني و اتصلت على صديقتي و حجيت
منتصره..
جوري:كتلج مراح يعرفني و خطتي راح تمشي مثل ما خططتلها و احسن
يقين:معقوله ماعرفج؟
جوري:ابد و لا حتى شك
يقين:الله يسهلج مهمتج
جوري:ان شاء الله خلي اخابر فيصل احجيله
سديته منها و اتصلت على فيصل جاوبني
جوري:انقبلت بالشغل
فيصل:گتلج مستحيل يرفضوج، شوكت تبلشين؟
جوري:من اليوم بلشت وياهم
فيصل:جيد لحد اي ساعه دوامج؟
جوري:لل ٢ ونص
فيصل:تمام اني اجيج اخذج و نرجع سوه
جوري:اوكي گلبي
سديته منه و اخذت الملفات الي على الطاوله
فتحتهن و صرت ادقق بيهن حرت شسوي بيهن
كمت من مكاني و رحت للاسامه
شرحلي شنو لازم اسوي بالضبط تشكرته و رجعت
كعدت ادخل كلشي بالفايلات بالحاسبه سويتهن على شكل ملفات و دزيتهن لعمران بالايميل مثل ما كلي اسامه
ربع ساعه و اتصل على تلفون المكتب جاوبته
عمران:انسه حور تعالي شوي
جوري:حاضر استاذ
كمت دكيت الباب و دخلت طلب مني اكعد و گال
عمران:منو علمج ترتبين الملفات بهل طريقه؟
جوري:اسامه فهمني و اني رتبت كلشي
عمران:اول مره اشوف هيج شغل دقيق و بدون اي اغلاط عاشت ايدج
جوري:شكراً، اذا متحتاج مني شي اروح اكمل شغلي؟
عمران:عدنا اجتماع لازم تجين وياي
جوري:تمام
شال اغراضه و طلعنا اني فتت لمكتبي اخذت الملفات الي طلبهن و تلفوني و طلعت وياه
نزلنا للطابق الجوه و دخلنا لغرفه الاجتماعات
كعدوا و اني هم كعدت و صرت اراقب كل حركاته و صرت احفظ بيهن و استمع الهم بكل تركيز و اسجل بالدفتر مالتي
رفعت عيوني من الدفتر شفته يباوعلي مبتسم رديتله الابتسامه و اني داخلي منقرف منه
كملنا الاجتماع و كلمن رجع لمكتبه الا اني رحت يمه
دكيت الباب و دخلت بعد ما سمحلي بالدخول
جوري:استاذ عندي كم ملاحظه حابه احجيهن اذا تسمحلي
عمران:تفضلي
جوري:الطرف الثاني لاحظت عدهم تردد و يحاولون يرفعون السعر حتى يستفادون بس همَّ و لاحظت من خلال كلامهم انو اكو مشكله بالمعمل الي تريد تشتري
ف برأيي تروح بنفسك و تراجع و تفحص كلشي قبل لا يتم البيع
عمران:عجبتيني بتدقيقج، احجي وياهم و وصليلهم طلبنا انو نروح نشوف المعمل قبل توقيع العقد
جوري:خليها عليه
طلعت من مكتبه و اني ببالي فقط شلون راح اخسره كلشي لازم اخلي يثق بيه
لدرجه يأمني على كل شي بس يا ترى راح انجح؟
رحت لمكتبي اتصلت عليهم و حجيت وياهم
و اتفقنا باجر نروح عليهم نشوف المعمل
انطيت خبر لعمران و طلب مني اني هم اروح و وافقت
مر الوقت ماعرف شلون باوعت للساعه انتهى الدوام
شلت تلفوني دا اتصل على فيصل
هوَ اتصل عليه جاوبته و الابتسامه على وجهي
جوري:حَبيبي اني خلصت
فيصل:و اني دا انتظرج برا
جوري:يلا ثواني و اطلعلك بس اعدل حجابي
سديته منه و كمت سديت باب المكتب و فتحت شعري
دا الم بي و انفتح الباب بسرعه سحبت شالي و خليته على راسي
عمران:اعتذر اسف ما جنت اعرف
طلع من المكتب لميت شعري على السريع و لبست حجابي و طلعت لكيته واكف برا
عمران:اعتذر انسه حور ما متقصد
جوري:مصار شي اني الغلط مني ماقفلت الباب
عمران:عندج سياره لو اوصلج؟
جوري:لا شكراً ينتظروني برا
عمران:اهاا براحتج
جوري:اترخص ماريد اخليهم ينتظرون اكثر
عفته و مشيت حسيت روحي اختنكت من قربه يمي
صعدت بالسياره و طبكت الباب بقوه
باوعلي فيصل مستغرب و گال
فيصل:صار شي؟
جوري:لا بس شوفته غثتني كلش
فيصل:اذا متريدين انسحبي مدام بعدج بالبدايه
جوري:لا مستحيل انتقم منه يعني انتقم لو يبقى اخر يوم بعمري
فيصل:مثل ما اني راح اتحمل وجودج وياه بنفس المكان و اعرف يحجي وياج و يكون قريب منج أنتِ هم تتحملين لحد ما تنتقمين
جوري:اسفه فيصل كلش اسفه لان دا اعيشك هذا الشعور
بس اريد اخلي يحس بالي حسيته و يجرب شعور الخساره
صح خسارته متتقارن بخسارتي
بس هوَ كلشي و لا فلوسه و شركته تروح منه
فيصل:اريد تعوضيني، تهتمين بيه اكثر تحبيني اكثر و اكثر، تحجيلي كلشي يصير وياج حتى اذا تغلطين تحجيلي اريد اعرف منج كلشي مو من غيرج
جوري:ان شاء الله حَبيبي
وصلنا للبيت و دخلنا سوه خاله و اسو كاعدات كل
وحده شايله طفل و يغنولهم
سلمنا عليهم و كعدنا اسو گالت
اسماء:كوموا بدلوا و غسلوا و تعالو الغده جاهز
جوري:دا اتعبكم ويايه
هيام:يمه شمسوين قابل
جوري:جهالي برگبتكم صارو
هيام:هذول اغلى من ابني و منج احفادي هذول و نور عيوني اذا ما اداريهم اداري منو لعد
جوري:الله ينطيج الصحه و العافيه و يحفظج النه
كمنا اني وفيصل بدلنا و رحنا حتى نتغده لكينه كلشي جاهز على الميز
اخذت الجهال نومتهم بغرفتهم و رجعت كعدت وياهم
"بعد مرور كم شهر"
مر شهور على شغلي بالشركه و كسبت ثقه عمران بيه
و صار يأمني على كل شي مرن الشهور بروتين معتاد
الشي الجديد الي صار انو اخذت الرخصه و صرت اسوق بسيارتي براحتي و يقين اجت يمي و بشار يشتغل ويه فيصل
كمت من مكتبي و اخذت الاوراق الي المفروض يوقعهن
و حطيت بيناتهن اوراق نقل ملكيه كلشي ب اسمه
يتحول لفيصل
دكيت باب مكتبه سمحلي ادخل
دخلت عليه يحجي بالتلفون حطيت الملف على المكتب
و وكفت يمه فتحتله الملف و انطيته القلم
فهمني انو لازم يوقع صار يوقع بالاوراق بدون ميراجعهن لان يعرفني ما اغلط ب اي شي
كمل كل الاوراق ابتسمت ابتسامه نصر
اخذت الملف و طلعت
بسرعه طلعت الاوراق مال نقل ضميتهم بجنطتي
و رتبت الملف و خليته على الميز
دك تلفون المكتب جاوبت گال
عمران:حور جيبي الاوراق بس اراجعهم قبل التسليم
اتأكد من الشروط
جوري:حاضر استاذ ثواني
تأكدت ما باقيه اي ورقه من مالاتي بينهن
شلت الملف و رحت لمكتبه
انطيته الاوراق راجعهن و گال
عمران:هاهيه تكدرين تسلمي
جوري:تمام تحتاج بعد شي لو اطلع؟
عمران:لا، او اي اريد
جوري:تفضل شنو ؟
عمران:عندج شي هسه؟
جوري:لا ماعندي راح ارجع للبيت
عمران:تقبلين عزيمتي نروح نتغده سوه؟
انصدمت من طلبه و ماعرفت اجاوبه
نقذني تلفوني جاوبت اجاني صوت فيصل مبين عليه صاير شي
جوري:شكوو شصاير ؟
فيصل:شهد وكعت هسه بالمستشفى احنه
....