هلو هلو يا حلوين شلونكم؟ البارت اليوم المفروض بعد العيد بس لكثره طلبكم قررت انزله اليوم عيديه الكم بمناسبه العيد
بخصوص النشر ذكرت قبل انو حسب تفاعلكم
تتفاعلون هوايه و ترضوني؟ اني انزللكم بارت و ارضيكم
ماذا قيل عن الحُب؟
الحب لا يقتل أحدًا ولكن يعلقه بين الموت والحياة"
"أنت الذي تختار بداية الحب ولكن لست أنت الذي تنهيه"
لتنسون التصويت و التعليق بين الفقرات🤍
#وَتيرة_وَد
الكاتبة روح الدليمي
************
صباح جديد و يوم جديد و عركه جديده بين
امي و ابويه كالعاده
طلعت من غرفتي متجاهله اصواتهم و رحت للمطبخ
فتحت الثلاجه طلعتلي شي اكله
و رجعت للغرفه
دك تلفوني رفعته شفت رقم غريب يتصل
طلعت دفتري و كتبت الرقم حتى اقارنه ويه الرقم الثاني
الي يتصل عليه كل يوم بدون ملل
و طلع نفس الرقم
جاوبته و كالعاده بقه ساكت ما نطق و لا حرف
زادت عصبيتي و حجيت بصياح
_يااا سالفه متخلص گول منو أنتَ و فضني
لشوكت تبقى ماخذ دور المتصل المجهول !
و اخيراً نطق بس كلامه سخيف و ماله اي معنى
_احبج
ضحكت بصوت عالي لدرجه غصيت و صرت اگح
بقوه شربت مي و اخذت نفس و حجيت
_تحبني ؟ اني متأكد أنتَ تحب جوري ؟
_اي احبج
جوري:منو أنتَ؟ و منين جبت رقمي !
_خلينه نلتقي وجهاً لوجه و نحجي بكل شي شنو رأيج؟
جوري:أنتَ صاحي لو سكران؟ بس احجي گول
_صاحي ماكو اصحى مني
جوري:صار شهور أنتَ تتصل عليه منين تعرفني احجي
_اعرفج و اعرف كل تحركاتج حتى اوقات عركات امج و ابوج اعرفهن
صفنت احاول استوعب معقوله هوَ احد من كرايبي؟
بس لا مستحيل لان گرايبي كلهم نفس العقليه
مستحيل يتقبلون فكره واحد يحب وحده او العكس
ميهمهم ان جنت بنيه او ولد بس الي يحب مصيره الموت...
جوري:منين تعرفني گول؟
_من اشوفج احجيلج
جوري:بطران أنتَ حيل
_اريد فرصه.. خلي نتشاوف تشوفيني و احجيلج كلشي
جوري:لتعب نفسك و رجاءً بعد لتتصل عليه!
سديته بوجهه و شمرت التلفون على الجربايه
كل مره اسويله حظر بس ماعرف شلون يگدر يتصل بعد!
و منا اهلي ميقبلون اغير رقمي و مجبوره اتتحمل هالوضع
كمت من مكاني وطلعتلي ملابس وبدلت وطلعت للدوام يوم متعب وطويل متت لحد ما خلصنا الدوام وطلعت، انتبهت اكو سيارة تمشي بصفي انداريت شفته شاب كاعد يسوق وفاتح الجامة
قرب عليه و گال..
_جوري تعالي صعدي
جوري:منو أنتَ ؟ منين تعرفني ؟!
_المتصل المجهول ماعرفتيني؟
تجاهلته و مشيت بس بقى مصر ويمشي ورايه و يصيح ب اسمي وگفت عطت بي العالم كلها صارت تباوع
جوري:شنو أنتَ متستحي؟!!! عوفني بحالي لا الم العالم عليك
_ أنتِ اصلاً خليتينه فرجه دمشي نكعد بهذا الكافيه بس احجي وياج
جوري:شكد بلا اخلاق مو عيب عليك؟ ماعندك خوات ادبسز
شلت حجاره و شمرتها على سيارته اجت بالجامه الوره و انكسرت.. عفته و مشيت ب اتجاه البيت
بيتنه چان قريب رأساً وصلت دخلت للبيت حيلي كله يرجف خايفه لا احد من اهلي شافنه ليسوولي مشكله
و چان خوفي بمكانه تلگاني ابن عمي حامد من الباب
حامد:هاا خاتون شعندج ويه ابو السياره السوده
جوري:واحد ناقص چان ديريد اصعد وياه بس ماقصرت كسرتله جامه السياره مالته
باوعلي بنظره شك و هز راسه و گال
حامد:يلا كدامي على البيت و خلي اشوفج لابسه هل لبس بعد اشكه عليج و النبي
هزيتله راسي و دخلت سلمت على اهلي و صعدت ابدل
و گلبي يرعد رعد خايفه من حامد لان هوَ يحبني و اعترفلي و حذرني اجيب طاريها يم اي احد لان يعرف مصيرنه شنو حيكون
بس اني مااطيقه كلش متشدد و عصبي و عنده المره بس بالبيت ميصير تطب و تطلع حتى هوَ راد يكعدني من الدوام بس ابويه ماقبل گال تخلص جامعه بس متشتغل
بدلت و نزلت جوه لكيته گاعد هوَ و ابويه و عمي و مرت عمي امي صاحتني على المطبخ رحت وياها
باوعتلي ابتسمت و گالت
رنا:حامد خطبج من ابوج
فتحت عيوني على وسعها و گلت
جوري:شنوو؟
رنا:شبيج انصدمتي ؟ كبرتي و صار لازم تتزوجين
جوري:ماما وين كبرت و بعدين اريد اكمل دراستي بعدني مرحله ثالثه ويني وين الزواج
رنا:ابوج موافق
جوري:بس اني مموافقه ماريد حامد مااطيقه
باوعتلي و رفعت حاجبه و گالت
رنا:ليكون تحبين ولج؟؟
جوري:اي مو ماعندي عقل و احب و اني بنتكم حتى رأساً تذبحوني !
رنا:عبالي حتى اگول لابوج هوَ يتصرف وياج هوَ و عمامج
جوري:اني ماريد اتزوج أنتِ بلغي ابويه برفضي
رنا:مو بكيفج توافقين يعني توافقين اذا مو حامد ف فيصل لان ثنينهم خطبوج
جوري:مااريد يا امي لتظلموني الله عليكم
رنا:ولد عمامج ثنينهم و ثنينهم رايديج و اعرف ابوج مينطيج لغريب ف احسن الج تفكرين عدل و توافقين على واحد بيهم
تجمعت الدموع بعيني و حجيت بغصه
جوري:بس اني اريد اكمل جامعتي
رنا:اول وتالي متتزوجين هسه و عود حطي شرط انو تكملين جامعه يلا تتزوجين
جوري:احجي أنتِ ويه ابويه قنعي بلكي يقتنع و يرفضهم
قاطعنه صوت ابويه ينادي عليه رحت عليه گال
كرار:لحگيني على الغرفه
رحت وراه للغرفه دخلت و سديت الباب كعد على الجربايه و اشرلي اكعد
جوري:نعم بابا
كرار:بنتي اليوم خطوبج مني ولد عمامج حامد و فيصل
وثنينهم ولد اخوتي بعد أنتِ بكيفج على منو توافقين
جوري:بس بابا
كرار:بلا بس و ولا شي يا حامد يا فيصل
جوري:اني اريد اكمل دراستي
كرار:اي بنتي تكملين اني گلتلهم تكملين يلا تتزوجين و همَّ موافقين بس لازم اردلهم خبر حتى نقره الفاتحه و نعقدلكم بس يرجع اخوج من السفر
جوري:انطوني وقتي افكر
كرار:راح انطيج اسبوع و تنطيني جوابج
جوري:لا بابا علما اكمل امتحاناتي
كرار:تمام اني احجي ويه عمامج
جوري:تريد مني شي لو اروح ادرس؟
كرار:امشي كعدي ويانه من يروحون عود درسي
كمنه ثنينه وطلعنا يمهم على الصاله تغدينا و كملنا ابويه كعد و گال
كرار:ابو حامد انطونه مهله علما تكمل امتحاناتها و يصير خير
ابو حامد:اذا گالت اي ما يأثر على امتحاناتها
كرار:خليها حتى تفكر زين ولو اول و تالي لازم توافق على واحد بيهم
حامد:منو خاطبها ليش؟
كرار:والله يا ابني اني حجيت لساهر من خابرني ابن عمك سرمد فيصل هم خطبها اليوم الصبح و هيَ بعد بكيفها
رفعت عيوني باوعت لحامد وجهه احتقن صار احمر
و باوعلي بنظره فسرتها "اذا توافقين اموتج"
بقوا كاعدين فد ساعه و شوي وبعدها كاموا
اني كملت عزلت الصاله و غسلت المواعين و رحت بغرفتي ادرس
اول مادخلت الغرفه اجتني رساله من حامد كاتب
"صدكيني اذا وافقتي على فيصل اذبحج أنتِ وياه"
كتبتله "ثنينكم ما اريدكم"
اجاني اتصال من رقم ركضت للدفتر طلع نفس الرقم
جاوبت دااشوف شيريد اجاني صوته
_انتظر فلوس التصليح مال جامه انسه جوري
جوري:أنتَ متمل؟ كل شوي متصل عليه؟
_لا امل و لا حنان اريد نتفاهم
جوري:شرايد؟
_اريد نكعد و نحجي جوري صدكيني كلش احبج يومي ميكمل اذا مااشوف عيونج الحلوه و مااسمع صوتج
جوري:باجر تعال للجامعه و نكعد نحجي اريد اعرف فلمك شنو
_اني يوميه كبالج
جوري:أنتَ هم تدرس وياي؟؟
_اني مرحله رابعه و اسمي عمران رياض
جوري:باجر بالسنتر تعال حتى نحجي و اخلص منك
عمران:متفقين يلا روحي درسي باجر امتحان عندج
سديته منه و كعدت اتذكر شكله هذا الصاك مال كليتنه عزااا شلون ماعرفته امداني نفس الشخص الي معجبه بي اني شلون ما انتبهت عليه اليوم؟
حسيت گلبي يريد يطلع من مكانه يعني هوَ يحبني ؟
بس اهلي مستحيل ينطوني اله شلون شسوي
هزيت راسي طارده الافكار وطلعت كتبي و كعدت ادرس للامتحان
مارفعت عيني من الكتاب لحد الليل كمت سويتلي شي اكله اكلت عسريع و فتت نمت انتظر الصبح يطلع بسرعه ... بقيت سارحه ب افكاري لحد ما نمت
گعدت الصبح نشيطه و كلي حماس و بنفس الوقت خايفه
خايفه من امي و ابويه و عمامي و اكثر شي من حامد
لان ابد ميسكت عن السالفه لو يعرف
كمت بدلت ملابسي و طلعت للجامعه اول ماوصلت بوجهي للسنتر لكيته گاعد دينتظرني
وجهي حسيته راح ينفجر من كثر الخجل دااسوي شي بعمري و حياتي ممسويته
امشي و افكر بحجي الطلاب و العالم شنو راح يكولون و اهلي اذا عرفوا شنو حيسوون؟
وصلت يمه كام و الابتسامه مرسومه على ثغره
گال
عمران:يا هلا بجوري تفضلي
سحبلي الكرسي كعدت عليه و هوَ كعد مقابيلي
بقيت منزله راسي و العب باظافيري
بقينه تقريب العشر دقايق ساكتين لحد ما كسر السكوت و گال
عمران:شنو تحبين تشربين؟
جوري:شكراً ما اريد، احجي شنو رايد
عمران:اكلها احبج تكلي شنو رايد
جوري:عمران اني ابد ما ارهملك ولد عمامي خاطبيني من ابويه و ينتظرون موافقتي على واحد منهم
عمران:و اذا اخطبج اني ؟ مينطوج
جوري:من سابع المستحيلات، اهلي ماعدهم بنيه تروح لغريب
عمران:انطيني فرصه حتى لو الم بغداد كلها و اجي اخطبج هم ما اخليج تصيرين لغيري
سكت شوي و اردف..
عمران:اعرف أنتِ هم تبادليني نفس الشعور خلي نصير سوه و منا لوقتها الله كريم
بقيت حايره و متردده كتله
جوري:انطيني وقت افكر
عمران:انطيتج هوايه وقت اريد يوميه اسمع صوتج و احجي وياج اريد اگلج حَبيبتي و عُمري و حياتي
اريد تصيرين الي
جوري:بس خايفه
عمران:خليها على الله لتخافين من شي اني حبيتج من اول يوم دخلتي بي من باب الجامعه
و شفتج و عرفتج و عرفت تحركاتج كلها
يوميه اوكف قريب عليج حتى اسمع سوالفج
لتخلين گلبي ينشلع اكثر
جوري:ما اعرف والله
عمران:تعرفين جوري تعرفين بس أنتِ خايفه و حقج بس ماكو داعي تخافين اني وياج و صدكيني ما اعوفج و بس نتخرج اخطبج
بعد صراع بين عقلي و گلبي گلت
جوري:موافقه
حط ايده على وجهه و كام يضحك فرحان
كعد و گال
عمران:الله عليج ؟ صدك موافقه يعني مو يوم يومين و تكوليلي اني ماكدر اكمل؟
ضحكت بخجل و كتله
جوري:لا ابد بس اوعدني متعوفني و تبقى وياي؟
عمران:وعد وداعت عيونج الموتتني و سحلتني سحل صار سنتين
ابتسمتله بخجل و نزلت راسي
عمران:اكدر اگلج حَبيبتي لو ميصير؟
جوري:مو بعد وكت ؟
عمران:اذا ثنيناتنه واحد يحب اللاخ ليش بعد وكت
جوري:مو شسمه استحي
عمران:لتستحين أنتِ هم گولي حَبيبي اريد اسمعها منج
جوري:تأخرت اني راح اروح
عمران:اي فلتي فلتي اليوم اخابرج
جوري:تمام
كمت من يمه لكيت يقين واكفه و صافنه علينه
لزمتني من ايدي و گالت بحماس
يقين:بسرعه احجيلي شنو جنتو تحجون صار ساعه
بحيث الكل يباوعلكم و انتو و لا يمكم اصلاً منسجمين
صرت اهفي على وجهي و حجيت بحماس و خجل
جوري:ولججج طلع يحبني ولج تعرفين منو الشخص الي چان بس يتصل عليه؟
يقين:منو؟
جوري:طلع هوَ ولج هوَ يمااااييي طلع يحبني والله
ارتبطنه سوه من اليوم
حضنتني بقوه فرحانه يمكن اكثر مني و گالت
يقين:جنت اعرف والله جنت اعرف مبين عليه
جوري:شلون مبين
يقين:غير أنتِ غبره متباوعين حواليج جنت كل ماارفع عيني الكاه يباوعلج و دائماً يوكف يمنه بس جنت اجذب احساسي و اگول خاف على غير وحده
جوري:ولج فرحانه و خايفه بنفس الوقت
يقين:من اهلج مو؟
جوري:اهلي وآخخ من اهلي ولج البارحه ولد عمامي ثنين خطبوني و ينتظرون ردي بعد الامتحانات
يقين:صخاام و شحتسوين
جوري:اوووف والله ماعرف عمران كتله يكول لتخافين و خليها على الله و بس نتخرج اني اخطبج
يقين:حاولي تقنعين اهلج متتزوجين هسه لحد ما تتخرجين
جوري:اول و تالي مااتزوج هسه بس ينتظرون اخويه يجي من السفر حتى اعقد على واحد منهم
يقين:ماعرف شكولج بس خليها على الله مثل مكال عمران، ياربي كلش فرحتلكم لازم ابشر الكل
جوري:كعدي و سكتي ماريد احد يعرف خاف يوصل الحجي الاهلي
يقين:اي هم صح يلا ما احجي
التهيت بالمحاظرات لحد ما كملنا دوام طلعت امشي
انتبهت عمران يمشي بصفي
جوري:فدوه روح البارحه ابن عمي شافك ماريد تصير مشكله
عمران:من اخابرج جاوبيني عود
جوري:تمام بس روح
فعلاً راح هوَ و اني طلعت تلفوني حفظت رقمه عندي ب اسم احد من الاساتذه
وصلت البيت و سلمت على اهلي و صعدت بدلت و نزلت حظرت الغده ويه امي
رنا:جوري امي عمامج يردون موافقتج بسرعه
جوري:مو كلنا بس اخلص امتحانات
رنا:شكد باقيلج؟
جوري:بسم الله اليوم بلشنا ترا امي
رنا:يلا على خير ان شاء الله
كملنا تحضير و كعدنا نتغده سوه
خلصنا و كمت غسلت المواعين و صعدت لغرفتي ادرس
درستلي ساعتين بعدين دك عليه عمران
كعدنه نحجي ساعات و بقينه الاتصال مفتوح
للصبح
گعدت الصبح على صوته يگعد بيه
عمران:جوري كومي يلا راح تتأخرين
جوري:صباح الخير
عمران:صباحي صوتج الحلو
جوري:راح اكوم اسبح و ابدل و احط تلفوني على الشحن مابي شحن نتشاوف بالسنتر تمام؟
عمران:ماشي عُمري
سديته منه و حذفت المكالمه حطيت تلفوني على الشحن
وفتت اسبح طلعت بدلت و جهزت روحي
و طلعت امشي للجامعه
وصلت تلگتني يقين و رحنا نمشي اني وياها للسنتر
لكيت عمران و بشار حبيب يقين كاعدين سوه كل فتره يجي للجامعه حتى يشوفها ليقين رحنا سلمنا و كعدنا وياهم
مر شهر بين حب و غزل عمران الي چان مدللني و ممقصر عليه ب اي شي اهلي جانو يضغطون عليه حتى اوافق على واحد من ولد عمامي
حب عمران چان يزيد بگلبي و تعلقت بي لدرجه مو طبيعيه
بيوم طلب مني نطلع سوه نضرب الدوام و نطلع
و اني من حبي اله وافقت بدون اي تفكير بالعواقب
طلعنا من الجامعه سوه و صعدنا بالسياره گال
عمران:حَبيبي نروح للبيت؟ حتى ناخذ راحتنه اكثر
جوري:لا فدوه خلي نروح نكعد بمطعم او اي مكان عام
عمران:شنو متثقين بيه؟
جوري:مو قصه ما اثق بس كلشي يصير
عمران:لعد نزلي ميحتاج نروح
جوري:شنو زعلت؟
عمران:اي اكيد شنو ماعندج ثقه بيه
استسلمت و كتله
جوري:يلا تمام
حرك السياره و مشه مسافه مو كلش بعيده
وكف السياره يم عماره و گال
عمران:يلا حَبيبي نزلي
نزلت و اني كلي ارجف خايفه گلبي چان معصور
حاسه اكو شي مو زين حيصير
دخلنا للشقه و قفل الباب، اجه حضني من وره و طبع بوسات على كتفي
سحب الشال من راسي و نومني على القنفه
حاولت امنعه بس ما سمع مني
وصار الي صار
وخر عني و اني اشهك بالبجي تقرب عليه مسح على شعري و گال
عمران:لتبجين عُمري باجر ادز اهلي يخطبوج من اهلج
ما اخليج تروحين لغيري
جوري:و اذا ما وافقوا اهلي ؟ شنو حيصير بيه اهلي يردون يزوجوني لابن عمي
عمران:أنتِ مرتي اني متصيرين لغيري
كعد يقنع بيه و يحاول يخليني اسكت و فعلاً اقتنعت بحجيه و سكتت كمت للحمام غسلت و لبست ملابسي و طلبت ومن منه يوديني للبيت
طلعنا من الشقه و اني داخلي مو مرتاح ابد حاسه راح
يصير شي اني شسويت بروحي ماعرف
وصلت قريب من البيت و نزلت من السياره بدون مااحجي اي شي و مشيت للبيت
دخلت سلمت على اهلي و صعدت فوك طلعتلي ملابس و فتت سبحت... خلصت لكيت يقين داكه عليه اكثر من مره
اتصلت عليها جاوبتني و هيَ تصيح
يقين:وينججج أنتِ وينج
جوري:ولج اني سويت مصيبه لعنه الله على الشيطان شلون طاوعته ياربي سامحني يا الله ولج راح امووت
يقين:شصخمتي يا غبيه
جوري:عمران اخذني..
حجيلتها كلشي صار... صارت تدك و تلطم ويايه
بهل اثناء اندك باب غرفتي بقوه فزيت من مكاني
سمعت صوت حامد... عزااا العزااج جوري عزاا العزاج
بسلا سمع الحجي
جوري:داابدل شكو
حامد:افتحي الباب بسرعه
جوري:بس لحظه داابدل
لبست على السريع و شمرت شال على راسي و فتحتله الباب
دفعني ودخل على الغرفه اخذ تلفوني و عاط بيه
حامد:افتحي الرمز
جوري:شبييك تلفوني شتسوي بي!
حامد:گتلج افتحي بسرعه اشوف ويه منو جنتي تحجين
فتحتله تلفوني دخل على سجل المكالمات و اتصل على رقم يقين شوي و گال
حامد:منو أنتَ ؟
فتح سبيكر سمعتها تكول
يقين:اني يقين صديقه جوري منو حضرتك؟ اخوها
حامد:اعتذر على الازعاج هاج جوري وياج
انطاني التلفون و طلع من الغرفه گبر شكد غثيث فوك ضيمي ناقصني أنتَ
يقين:منو هذا ولج
جوري:هذا حامد الغثيث جلطنيييي اريد اموت و ارتاح فوك مصيبتي اجاني هوَ
يقين:شنو حتسوين؟
جوري:ماعرف ماعرف بس على الاكثر اوافق على فيصل و احجيله كلشي
يقين:صبريي لتسوين اي شي هسه خلي عمران يخطبج بلكي ينطوج
جوري:روحي خلي اخابر عمران و اشوف شنو نسوي شخصمت اني الله يسامحني شلون طاوعت الشيطان مدااعرف
سديته منها و اتصلت على عمران يدك و ميجاوب اخر شي صار يطلعلي مغلق
اتخبلت و تهسترت شراح اصخم بمصيبتي شسوي
سمعت صوت ابويه يصيحني
مسحت دموعي و نزلتله كعدن يمه گال ...
كرار:بنتي عمامج ينتظرون موافقتج صار هوايه ينتظرون
جوري:ماريد حامد
كرار:افهم منج موافقه على فيصل
جوري:اي بس حامد ماريده ما اطيقه
كرار:هاهيه بابا الله يسعدكم و يهنيكم انطيني تلفوني ابلغ عمج
كمت اخذت تلفونه من الشحن و انطيته اله رأساً خابر عمي ابو حامد بلغه برفضي و خابر عمي ابو فيصل و بلغه بموافقتي و امي اعتلت اصوات هلاهلها و الفرحه مبينه على وجهها لان فيصل ابن اختها
كرار:عكب باجر راح يجي اخوج من السفر حتى خلال الاسبوع الجاي نسوي المهر مالتج
جوري:مو بعد وكت
رنا:لا بنتي احسن حتى براحتكم محد يحجي عليكم
جوري:اذا تقبلون اريد نكعد اني وفيصل نحجي قبل كلشي
كرار:اليوم راح يجون حتى نقره الفاتحه
رنا:كومي بنتي نحضر اني وياج يلا حَبيبتي
گمت ويه امي من لا جاره اشتغل و احضر ويه امي و بالي بحالتي و الموقف الي خلاني بي عمران
حقدت عليه گلبي چان حاس حيصير شي بس ماتوقعت عمران يتركني بعد ما اخذني و استغل حبي اله
اني جنت ضحيه مثل هوايه بنات
انضحك عليه و صدكت شخص و همني بالحب
و تالي خسرت اغلى شي عندي
خسرت شرفي
اجو بيت عمامي و قروا الفاتحه و مر اسبوعين اني لا ليلي ليل و لا نهاري نهار
و اجه يوم العقد و حفله المهر الكل يمنه و مخبوصين
قرب موعد جيتهم كل العائله اجتمعت بنات عمامي و خوالي يمي بغرفتي الي تسويلي شعري و الي تحطلي مكياج
ما قبلت اروح صالون شكد حاولوا ويايه رفضت
و اني جسد بلا روح يحركوني مثل اللعابه
بدون ما يصدر مني اي رد فعل
اندكت باب غرفتي و دخلت اخت فيصل نرجس
هوَ عنده اخوات ثنين نرجس متزوجه و اسماء بعدها الصغيره
نرجس:يا هلا بمرت اخويه طالعه كيكه تخبلين عين النبي تحرسج
ابتسمتلها مجامله اجت بوستني و كعدت تهوس و تهلهل هيَ و البنات فرحانات الي يشوفهن يكول احنه عن حب راح نتزوج
صار الوقت نزلت جوه و بلش يعقدلنا الشيخ
انطيتهم موافقتي بعد ما سألني ٣ مرات
اعتلت اصوات الاهازيج و الهلاهل
و بلش الدگ و الرگص اني گاعده و نفسي تلعب و دايخه كلش ماعرف شبيه صار يومين
شوي و اجت ام فيصل گالت راح يدخل العريس
يلبس عروسته الذهب
دخل فيصل هوَ كلش وسيم و شكله رجولي ملامحه مرسومه رسم بس گلبي ابد مايريده و خايفه من الجاي
تقرب عليه باسني من راسي و همس ب اذني
فيصل:مبروك علينه حَبيبتي
ابتسمتله بخجل.. بلش يلبسني بالذهب و اني بالي يم عمران
اختفه حتى من الجامعه ابد ماشفته بعد و اتصل عليه مغلق و ياهو الي اسئله عليه يكلي منعرف عنه شي
بس انتقل منا و ميعرفون وين
كمل تلبيس اخذولنه صور و بعدها راح هوَ
وره شوي صعدت بدلت غير فستان لبست فستان بسيط و نازك اخذتني امه للصاله گالت تكعدون وحدكم
دخلت يمه چان گاعد من شافني وكف على حيله
تقرب عليه و حاوطني من خصري
بعد شعري عن وجهي و گال
فيصل:و اخيراً صرتي حلالي سنين و اني انتظر هاي اللحظه احبج جوري، احبج من جنتي صغيره گلت ما اخذ غيرها و جنت خايف لا ترفضيني
يحجي و اني منزله راسي و بالي و تفكيري بغير مكان
ماعرف شصارلي عيوني بلشت تغوش و احس رجلي بعد متحملني
اخر شي سمعته گال
فيصل:جوري شبيج باوعي عليه
بعدها ماحسيت على اي شي
...
الغلاف الجميل من ايد مليكا♥️
malak_ij68k