منقذي سبايا داعش ( الجزء الاول والثاني )

بارت ٥ الجزء الثاني

منقذي سبايا داعش

وردة الشيخ محمد

ركض نزلت تلكتني خالتي واني كوه اتنفس :- يايمه متت ولج خاله رمح كال وره ساعتين مدري شحيسوي يمكن يفوت فوج علينا ويدخل الهمر بنصنا

- فلشج كون خرعتيني وينهم هسه

- نازلين اني جيت ركض احجيلج

- اي احجي شكال يمعوووودة فتيتي كلبي

- بس هاي

شوي ونزل رمح والبيت خبصه كاعدين اني وفهدوي بالغرفه والبقيه كاعدين بالمطبخ كل اثنين لازمين ركن ودك سوالف وضحك وخالتي بالغرفة الثانية ..

حاضن حنين وفات للغرفه :- هاي بنيتي خلوها يمكم ولاتخلونها تحوس لان وكحه وخاف تتأذه ترا هاي عزيزة كلبي وادبتها ان شاءالله ماتعيدها .. ويحجي حسبالك حنين طفلة عمرها خمس سنوات

ريا:- يااااااااا انقهرت

باس راسها :- تنكسر ايدي المديتها عليج باباتي ..

حضنها وهي بجت وزاد بجيها بصوت وتناشغ واني شفت المنظر ورجعت بجيت وياها ع الواهس عفتهم ورحت الخالتي واني ابجي وكلبي محترك مااتحمل الحنيه والمواقف الي بيها حنيه بسرعه ابجي تلكتني

- يااا يمصكوعه شمالج تبجين خايبه

- ابجي على حنين خااااله لو سمعتيها شلون تبجي ومقهورة وضعيفه كدامو والله تبجين ويايه اوي حموت اني

- جا شلون غير ابوها ورباها من هي بكد جف الايد مايخليها تنام اله على صدره جا من جنتي ببيت اهلج بالاربعين غير طلع روحها تروح منا يجي منا تراسل تحجي ماكو قفل هالفرد قفلة

اجا رمح :- ماتعيدها بعد لو عادتها ذبح ع القبله

ريام:- عجل يول ماعندك غير تسلخ وتذبح طليان نحن لو هوايش

- ام لسان امددج وياها ترا شبيج تبجين هسه شكو ..رفعت راسي الو وعيوني مورمه من البجي كرصني بخدي ويقلد كلامي

- ول يابه شبيها الخنن تتطافر

- ههههههه عووع عوفني

- شبيج حبيبتي يعني انتن النسواان كارثة بالعباس هسه شبيج تبجين

هو كال هجي واني طكيتها بجيه اقوه خالتي ضلت تضحك وهو متخوصر ويدحك بيه واني ابجي مقهورة

- اني اني كلبي معصور

- صبيلنه فد كلاص

- عوووووووووفني ..

-  امهاتنا ..

خالتي غمتنا اني ورمح وكالت :- ياااا اسم الله الرحمن شجاج تخبلتي

رمح:- طبكن يمه تعاي بويه تعاي لحضين زوجج سر سعادتج فرحتج وامانج واستقرارج بعد ط***

سحبني من راسي وهو يحجي دفعتو

ريام:- اسكت رمح

رمح :- خطيه بجت بجت بجت

واني من كل عقلي ادحك بي وعيوني تصب جان يذبلو حجايه :- وشلون مات ابو الفجل يمكن اكل بصلايه

هو كال هيج واني خربت ضحك بسرعه طفر سد حلكي لان ضحكتي فضيحه بيها صريخ ...حط ايدو على حلكي واني اهتز واكمز من الضحك :- جا سمعي هاي

دحكتو واني اضحك كمت ابجي منتهيه

رمح :- راح انطيج دارمي يخبل

- شنو دارمي

- شعر

- اي سولف

- انه شكلج كولي بتلونه

- بتلونه

-ضاج الولد وصاح ؟

- بتلونه

- نزع قاطه وقميصه و ؟

- بتلونه عزا

- شفت شصار بلعبة

- بتلونه هههههههههههههههههههههه

- فازوا على ريال مدريد خطيه

- هي هاي

- اي والله قابل اغشج

- رمح يعني عود ليش نحن هجي تافهين وصار عدنا طفل ودارسين ومثقفيين بس احس نحن تافهين

- حبيبتي انه عايش حياتي ضحك وتحشيش ماحب ضيجة الخلك حتى الناس السلبيه اتعامل وياهم بالحظر وفنه اليفك حلكة

- يااا هاي شبيك يعني واحد مرات ضايج وهجي يعني خما كلو ضحك وسخافه

- ضايج على روحه شكو جاي عندي

- شلون بله بله اني ضجت وين اولي

- انت عود هم تضوجين ؟ اباوعلج وزعلانه عود مدخنه بس اكلج ميوو تضحكين

- هههههههههههههههههههههههههههاي .... ماحسو غير طفر وسد حلكي

- نعلعله يومج

- اااخ يمه بطني حموت من الضحك , زين يولو انت هجي ويا الكل

- بس وي الارتاحلهم يكلج الروح تميل لليفهمها والي يمارس هواياته المفضلة وياه ويتعامل بطريقته العفوية مثل الشجرة المتعوده تنمو ع الجرف

- كلامك بي حكمة بس مادري وينها
- الله يطيح حظج ...

جت خالتي فهد يبجي انطتنياه جوعان .. وكف هو كبال المراية اني اخذتو تااريد ارضعو .. هو اجه وحشك حالو بنصنا فتحت الحجاب وهو موتني :- ريحتج حلوه عوفي هسه

:- يول شكو

- شتسوين
- ارضع الطفل بعد شسوي

- عوفي يولي

- شنو يولي ولك ابنا ابناااا هذا هم عود نحن اباء

- عوفي عوفي

ادحك بي يغار من فهد خبلني :- عزااا رووح العالم برا ..فضحتناا

باسني بخدي وكال :-اليوم اريد عينج على حنين وراح يجن الرايدهن يجن , ادري بيهن عظامات يخربن ع الاكل

- منو همه

- تعرفيهن يابه الحيه تبين حتى لو تلدغ وتضم راسها واذا حجو وياج حجايه همسا بس كليلي حلكهن اشكه

- دتخوفني والله هي عزيمه لو عركة

- هاي عزيمة اخذ حكـ مو شلون ماجان

- والناس ؟

- هو انه اريد الناس بس اخوتي ماردتهم يجون كلتلهم الكل يروح البيته الشغله تخص الخوال وماريدها تكبر للعمام واذا فكينا العگدة اخابرهم يجون ماعدهم مشكلة .. امشي اصعدي وياي اريد ابدل واكعد يم الشباب ... صعدنا طلع الدشداشة وشد الغترة واني ادحك بي ذايبه

- اخذني فصلية

- باجر

- والبسلك برموده وتضيع علومك

مااحسو غير سحبني ويكز ع سنونو يدحك وجهي ودو ياكلني دفعتو :- العالم تنتظر عوف السوالف هاي

رمح :- ول يابه انه 24 ساعه ضايعه علومي بهالعيون الوسيعة اموت ع السوالف البربوكيه ويااااك , .. بستو بخدو كرصني بخصري :- لاحكة على حقوقج الا تتحرشين

- اني؟؟؟؟؟؟

- ميخالف شابه ومن حقج حقوقج موجوده ب اي وقت ترديها موجوده بس غمزي تلكيني  بس بالل**

- ولككك شني جا عجل منو شاكيلك يولوووو

- ههههههههه كامت تسكر وتخبط كتلج لاتكثرين شرب

- ههههههههههههه يلا ننزل فشلة ادبسزز...

بدلت ملابسي ولبست صايه وهو نزل قفلت الباب ونزلت ...كاعدة واجت اخت خالتي وجهه مبي رحمه ونور محمد , ضخمه وصوتها عالي خشن .. دحكت بيا وزكحت :- دصبي جاي شنو هالفهاوة

اني كل شي ولا واحد يحاجيني بـ اسلوب موحلو واني معندي ميانه وياه انجن اتخبل :- خاله عجل شدااسوي اني

خزرتني ومشت وتكول :- هيج بنات عرمات وصلفات اني مشايفه ..وحجت ويه بنتها :- اكعدو وحدكم يمه ..

ردتها خالتي :- ام حسن خير ان شاءالله

- منو وياج كريمة

- جنتي عوفيها

- هسه شحجينه كلنالها دصبي جاي الولد تنتظر بره وهي فاهيه وحايره بس تحمر من مساع البنات يشتغلن وهي متخته ونايمه

خالتي:- خليها تنام الابنيه الليل كله سهرانه وي الجاهل شعليج بيها

خالتي عزت ايدها وهي طلعت جكارة وكعدت تدخن بالمطبخ ..وخالتي كاعده تطلع كاسات مي وتخليهم بالصينية , رحت اني داارفع الجدريه , جت اختها الثانيه بعدتني واخذت الجفجير من ايدي :- دجيبي وروحي كملي نومتج عوفي الطبخ لصحابه

خلتني اشتعل :- هاي عزيمة ابني

خالتي جرتني من ايدي واشرت بيدها بمعى سكتي معليج ...اني احتراما الها بقيت ساكته وهن كل شويه ويبسمرن ويذبن حجاية تسمم وتبز الكلب وبكل صلافة يحجنها بدون خجل , اني كملت من الجاي كل شويه وصاحو جاي بحيث رجليه معاد احس بيهم ... كملت وكعدت

فتحت الشال وكعدت اهفي بي المطبخ صار حار يخنك واني بيضة وبشرتي حساسة كبيت نار وجهي من احتر ينكلب كلو احمر دم خالتي عافتنا وطلعت تجيك وضع اللحم برا , واني بقيت كاعدة بالمطبخ كمت اريد اغسل وخرت الشال غسلت ودرت وجهي مااحسهم غير يدحكون بيه ويتهامزون اخر شي طفرت ام حسن :- ركبتج مزوركة شنو ماتستحين شنو هالتصرفات هاي ويمج بنات مامتزوجات امج ماعلمتج العيب لو بس عرفت تنطيج رجل

- شعليج بيها خالة متزوجة اني ما بالحرام ... وصارت عيني تلقائيا على زينب ...

هم شافوا حركتي مااحس غير رادت تكوملي تضربني خزرتها وبناتها كضبوها وضلو هذا الي يكول عوفيها

زينب :- يوم هو الميستحي شلون يصير

ريام :- مثلج غير ..., واني عناد فليت شعري ورفعتو

وكفت تريد تضربني واني تخصرت ورفعت تلفوني :- اتصل بي واشوف شلون تتجاوزين حدودج ..

- ديلااااااا اتصلي خايفه منج لو منه ماجنها اخته شبعت كتل وكلنا نعرف بس ساكتين , كدرته على بنات غيره وميربي اخته العار

و على صوتها جت خالتي :- شكو شكو شبيكم شصاير

زينب :- ياااا خاله ههههههه غير طشت سالفة حنون بين الخوال وانت نايمه ورجليج بالشمس وبنت تكو* وي واحد بالتلفون

راحتلها خالتي وجرتها من شالها وضربتها راشدي :- طايحة الحظ لو جبتي اسم حنين على لسانج اموتج

طفرت ام حسن وجرت زينب وتصيح بصوت عالي :- وووخررررري عن بتي لا اكسر ايدج دروحي روحي شوفي بتج وينها وربيها ام الزلم تك*** ليل نهار وتدز صور للرايح والجاي

خالتي دكت على وجهها وفقدت :- طلعييييي برااااا

وام حسن هجمت عليها وهدت :- مااطلع اذا ماشهرج شهيره كدرتكم على بنااااتيييي ملفية ببيتج كحا*** وساقطات وتحجين بالشرف والدين ياصايمه ومصليه

صارت تحجي بصوت عالي وخلت المايسمع سمع وخالتي تعاركت وياها صارت دم من كد مااحترك دمها وتطردها وهي ماكو بس تحجي وتغلط وتفشر .. اخذت خالتي اريد اوخرها عنها مااحس غير ام حسن جرتني جر من زندي تملخ بيدها عيطت :- ايييييدججج

دفعت ايدها قوي واني ارجف صاحت بيه :- وخري عني بنت القندرا ....

هي حجت هجي وجان اني اتجتف :- لاااا عيني تتجاوزين صارلج ساعه وتغلطين لو مو بكد امي هيييين ادوس ببطنج تفهمين لووو لااا ويلا برااا اخذي بناتج الساقطات وبرااااااااااا

مااحسها غير جرتني من شعري واني اعيط وخالتي تجر بيه كوه فكتني من ايدها ووكفت كدامي واني فقدت انهاريت عضتني وبناتها وياها وبس اني وخالتي هالصوت كلو ومحد جا تخبلت اريد اعيط بعلو صوتي وخالتي متقبل موتتني

ام حسن :- تذبون بلاكم على ابنيييي لو تصير بنت ملوك مالفي كح*** ببيتي

وزينب وخواتها وخوات خالتي كلهم بصفها يتشمتون ويغلطون وياها وصار صياح بين خالتي وبينهم خالتي انتهت بس اني وياها وكلهم وي ام حسن تخبلت اني شفتها كعدت بالكاع وايدها على خدها ركضت بسرعه للغرفة الثاني واتصلت برمح بسرعه جاوبني ببرود

- جاي حبيبي اهدأي

نزلت ركض واني رجلي مدتعيني من الرجف متت انهاريت وحنين ماكو فات رمح اثناء نزلتي رفع راسو دحك بيه وضرغام وراه واني ميته بجي .. وهو يمشي ويذب بالغترة ويشدها بيدو ...

وبعدها تغلط وصوتها يلعلعل هي وخواتها وبناتها وخالتي ساكته بس تسمع كلبي تملخ عليها صاح صيحة هزت البيت هز :- وينهااااا التحجييي وينهاااااا ام حسسسسسسن ..........

ركضت بسرعه وصرت وراه وضرغام يبتسم حجه :- شوفي مرت العم شوفي الذيب شيسوي ...

فات هو وهن تراجعن.. ام حسن :- لبسن نطلع .. تحجي ووجهه احمر دم وكلبها محترك صوتها رايح

رمح جر زينب من حجابها وام حسن تخبلت شلون تلزم بتي ويعت بيها عت دفع ايدها وزينب تصرخ ضربها راشدي حسيت جلدها انسلخ وصحام بيهم :- حرام بالحرااااام والي خلق السبع سموات اذا ماربيتكم وححده وحده فلا يبقالي شارب

...وشمرها بالكاع ورجع شالها واخذها سحل سحلها من شعرها وهي تصرخ ويردون يفكونها من بين ايدو ميكدرون وكفت ام حسن كدامو ورفعت حجابها وتشيل بشعرها وتصيح :- بتتتااااااااااي (بنتي ) وتعيط الله ياخذك ويفكنا منك ...

حط ايدو على وجهه ودفعها :- موالله لحرك عرجكم واطم عاركم منا****** ... دفع زينب بالاستقبال وصاح بضرغام :- نعلاااان ويننننننننه ....

ضرغام :- ميقبل يجي

صاح بصوت اعلى ومحترك كلبو ولازم زينب وواكفين كلنا بالاستقبال محد يكدر يتدخل وهي تتوسل بي بس يفكها انخرست و ام حسن صارت صفرة ومحديعرف رمح على شنو ناوي يتوسلون بي بس اهدأ وهو ماكن يسمع ولا كن احد يمو محتقن وجهو دم خابر :- تعال انت وابوك لا العن والديك ابن القندرا

صاح بي :- اغلط واكسر راسك تعاااااال دقايق اذا ماتجي اسويها عشاير ومحمد اخلي فضيحتكم ماينلبس عليها ثوووب ...

وسد الخط ويدحك بالكل وهن يتوسلن صاح بالكل :- حرف ماريد وفنها التلبس عبايتها وتطلع بالنعال وعلى راسها .. والتفك حلكها وي امي احط رجلي بحكلها نعالها تاج على راسجن كلجن , كح*****ب

محتقن دمو ورمح من يعصب عندو عرق بكصتو بس يتنرفز لو يعصب يبرز معناه واصل مرحلة فاقد من الاعصاب ...

ضرغام :- عمي حسن جاي بالطريق

دحك بـ ام حسن :- هلا ومرحبا ....

ام حسن :- شتريد تسوي رمح

رمح:- موشغلج , يجيج الصافي ..

صار هدوء ورمح ينتظر وهرجنا يرعد كل شوي شوفه وين وصل... لحد ما اجه ضرغام كال :- حسن وابو اجو وفاتو للديوانية

جر زينب من شعرها ..ودفرها بالديوان ...وكفو كلهم رادو يحجون وحسن هجم على رمح دفعه من صدرة :- حرف ماريد منك

يحجون يردون يفهمون شبي صاح بيهم وصوتو صار فوك صوت الكل

- انه محشم كل شارب بيكم وكل رجال بيكم اخو خيته وعمي ابو حسن انت على عيني وعلى راسي رايكم هنا بجم جلمة ومن بعد اذنكم

صاحت ام حسن :- كتلنا ومد ايده علينا ترضوهااااااا شاربكم يرضاهااا اني بكد امه يكتلنييييي ... وكعدت بالكاع تجر بشعرها ورمح ممهتم وحسن من شاف امه واخته فقد هجم على رمح

ورمح لزمو دفعو وصاح بي:- ماباقية غير ذرة من الخوة حسسسسسسسسسسسن .....

صاح بي وابو حاسن كاضبو :- خليت بيها خوة انننننتتت رممممح .....

- اسمع وتالي احكم غير هالحجي ماعندي وبعد ماعندي شي وياك ولاتخلي رجلك تعتب باب بيتي ... ابوك رجال فقير مايستاهل

حجه ابو حسن بصوت تعبان :- احجي بويه ..احجي واني بظهرك

زينب :- ممسويه شي ... اني مظلومة حرام عليكم .. حوبتي متتعداكم ..الله لينطيكم العافية ..

وام حسن تباوع عليها وتبجي واني انقهرت عليهم ...صاح بيهن رمح

- حلكج لاتفكينه ...

فتح اللابتوب :- هاك عمي هذا ابسط دليل يمي , اذا ماتقتنع وراك الف دليل ... ام حسن وزينب وحده تدحك بالثانية وعيونهم نطت وام حسن شفايفها تتراجف ...فتح الصوت وطلعت مكالمة صوتية ....

وجان يطلع صوت زينب وتحجي ويه ولد وتضحك ضحك فضيحه , وتحاجي كلام يهز البدن نحن المتزوجين منحجيه , ابو حسن كعد بالكاع وحسن اتجمدت بمكانو , وزينب تريد تشرد وتتوسل برمح :- اتركني ..

اخر شي سد الصوت من سوت حركة بصوتها كزبرت جلدي حجه رمح:- زحمة ... ومحمد زحمة من ابوچ ...

رجع شغل مكالمة ثانية تكول بيها :- دزيتلك صور بس اريد تركبهن على هذا الوجه اني اعرفك هكر درجة اولى وهاي مو اول مرة نشتغل سوه ...

الولد :- ابسط شي عندي واذا عندج صور حفلة وعرس جيبيهن عندي قناة ع اليوتيوب انشر بيهن اعراس وحفلات خاصة هههههههه

- اي عندي عندي اخوها تزوج بس هذا ضابط خاف يلزمك بس معندي صور زوجته بس اخته تركص بالكوة صورتها بالحنه مال اخوها

- لاتخافين ماانصاد اووو اني حتى حفلة ضباط ناشرهن وهمه بس يهددون محد فك حلكة لحد مااسحب فلوس منهم يالله امسح واني المستفاد

- بيها تفاعل قوي

- الفيديو الواحد يصعد مليون اقل شي

- حلووووووو

غير صوتو واني حسيت الرجفه نهتني :- بس هذا بي مقابل ومقابل قوي , اني انسان ماانطي ببلاش وشكد متونسيني ازيد تفاعل الفيديو واسويله ترويج برصيد

- مو تتدلل شعندي غيرك حياتي

سد الصوت ورجع فتح بالصور :- حسن هذا جهازك

وحسن ميجاوب وابو حسن يون ..منسمع غير ونات يون بيها وايدو على راسو ...طلع الصور ومحادثات مصورة وصوتيات كال :- هاي المحادثات الصحيحه وهاي البصمات الصحيحه وهاي المفبركات تكدرون تتأكدون

فتح البصمات وكال :- هذا تلفون حنين وهاي البصمات ويه سحر بنتك عمي ابو حسن وبنتي الغبية صدكت بيهن ومسويات كروبات وبنات بيناتهن يسولفن كلشي ويحجن حالهن حال البقية

سحر :- هاي ..هاي مو اني اني وحنين صديقات روح اسألها اني وياها نحجي بس مكالمات وهنا دتقلد فيديو ع اليوتيوب والله

رمح:- جيبي تلفونج

انطتو التلفون والكل ساكت يدحك شديصير ... فتح الجهاز وشاف المحادثات :- منو يستخدم تلفونج ؟

- اني وخواتي كلنا نفس الجهاز ..

دحك ع زينب :- عاشت ايدج خوش تفكرين جا شكد كح*** ؟؟؟

فتح البصمات الي بجهاز سحر نفسهن .. رمح :- بصمات الواتساب من يتحولن للتلي ينزلت كصوتيه , والمحادثات الرسلوها الي والصور والفيديوهات والبصمات هن من الواتساب والواتساب هاي كدامكم صورة الشاشة نفسها الموجودة بجهاز سحر , جر اذن زينب قوي وهي تكضب ايدو متوجعه وصاح بيها :- نفسها ...مرة الثانيه غيريها حتى لاتنكشفين بسرعه

زينب :- لو صدك اني جان مطالعه بالفيديو ع اليوتيوب انت مفبرك حتى الصوت حرام عليك تتبلى عليه

رمح:- هههههههه وشدراج الفيديو منشور ع اليوتيوب

زينب :- انت كلت

رمح:- بعدني كلشي ماحجيت ههههههههه تابعي مك**تج ام الاهات ....

الكل سكت كل ميحجون رمح يسكتهم ... رجع ضغط ع فيديو فتح فيديو حنين تركص بس الفيديو مدتو خمس دقايق ومطالع هواي من وجهه بس المشاهدات 50 ..
رمح :- بالمكالمة كايلج انشر فيديو وره فيديو ..تحبون نكمل لو مليتو من الفلم ؟ عدنا بعد هواي سوالف ..كلش هواي

رفعت عيني على حسن وادحكو حينفجر منحس غير بعد رمح وجر زينب من شعرها وشالها و وركعها بالحايط بكل قوتو حسيت الحايط اهتز ركضو عليه وهو نام عليها وكل راشدي يضربها بي تشهك شهك موتها تموت ويحجي ويصيح ويفشر فقد يردون يفكونها من بين ايدو ميكدرون وابو حسن دنك راسو وضل يبجي موتني قهر ..وضرغام يريد يلزم حسن ميكدر

اخر شي فقد فرفح ضل يدك على راسو ويصيح :- ررررررررربيييييييييي ...

سمعت ورايه صوت شهكة حنين وهي عيونها على رمح ورمح واكف بكل ثقة يشد الغترة ويمسح بشواربو يدحك بينه ..واني كن روحي ترف رف عليه مفتخرة...

شد الغترة اخر شي وصاح بيهم :- ماعاش ولا راح يعيش الي يجيب معدلنه بالباطل , وينكص لسانه الي يجيب اسم حرم ابو ذيبه على لسانه ومحمد تصير شك حلووك ...وكلمة ابو ذيبة ماتنثني معلوووووم

وكل وحده بيجن تسمع الحجاية وتوصلها حنين اشرف من الشرف والي تجيب سيرتها بالموزين كص ركبتها على ايدي يصير ارتكب بيها القاضية واجرم بيها خووووووش

كام حسن وكف وهو يدحك بحنين تفل على زينب صايرة جنازة مدممه دماية جرها من شعرها بالنص وراح جر حنين وحطها كبال زينب وصاح بزينب :- بوسي رجلهاااااااا

ام حسن صاحت بي:- لا والله تاكل نعل اغضب عليك اليوم الدين ياحسن ...جرت زينب وشكت زيجها :- تهينونااااا

هو سحب زينب من شعرها يعت بيها ويصيح :- بوسيييي رجلهااااااااااااا ...

حنين تحك الرمح وترجف ورمح اندار عليه واني موتت روحي من البجي طبك حواجو ابتسملي واشرلي :- اششش ...
ابتسمت لا اراديا ...

صاح حسن بصوت اعلى :- بوسييييييي رجلهاااااااا لا بالقران اليوم انكع ايدي بدمج زينببببب ....

زينب ضلت تبجي صوتها رايح منتهيه ..حسن دفع راسها ع رجل حنين بالكاع وحنين ركضت الحضن رمح وهو عيونو راحت عليها ونزلت دمعتو يدحك بأسف منهار ...

رمح حضن حنين وباس راسها ..
حسن :- حقك علي ابو الفهد ... وحك حنين بهالركبة ...

سحبها من شعرها وطلعو وام حسن تصرخ وتدعي :- الله ياخذك والله ينتقم منك وعساك بالموت وكون تطلع من هالبيت جنازة الله يحرك كلبك بعزيز كلبك ... وماخلت حجاية تعتب عليها لحد مارمح صاح بيها

- طلعييييي براااااااااااا وحسج ماسمعه لاتخليني اكلب الدنيا على راسج براااااااا

دفعها ابو حسن ويتعذر من رمح ويبوس راسه وراس حنين ورجال شكبره حتى بجي ضل يبجي من وراهن موتني قهر ... طلعو كلهم اهل حسن وبقن البقية بنات خالاته سون نفسهن لامن سمع ولا من درى ومعليهن بشي ...

رحت الرمح وحضنتو وخالتي كاعده وماده رجلها دحكت بينا وهزت راسها ورمح حضني وحضن حنين وباس راسنا

- كتلج اخذ حكج مربع بس لاتعيديها تأدبي ...

حنين :- كفيت ووفيت الله ليحرمني منك ..

دحك بيا وعض شفتو وعيونو على شفايفي مغندبه ودموعي تجري :- ولا منج ... ونزل ايدو على خصري ويحرك بـ اطراف اصابع ايدو بظهري همست :- مو وكتو ... بعدت ايدو وضحكت ...

رجع جرني الو وباسني بخدي كدام الكل :- اموت عليج انه ...

نشف دمي من الخجل وطلعو كلهم رجعو للمطبخ واني متت بدمي ...:- رمحح

حنين باست صدرو وراحت .. حسيت مي بارد ونزل على كلبي كلش اذونا لا حشمو خالتي ولا احترموها ببيتنا ويفشرون علينا ...ارتاحيت كولش .. فات ضرغام واني كاعده ولازمة ايد خالتي خايفة عليها :- ها عمي اخابرهم

- خابر واعزمهم كلهم حتى جماعتكم عزموهم وروح اخذ سيارتي هم اذا تريد يلا بساع ...وهسه ابو زينب يجي يطهر فهد

ضرغام :- صار عمي ..

والله للوحدة امتلا البيت ناس خالات رمح معليهم بس يشتغلون والتمو البنات نسوان حمويني وضحك وسوالف انكلب الجو الف بالمية ورمح حذرهم اليحجي مصيرة مصير زينب , مقبل اخوانو يعرفون وتكبر السالفه .لان اخوان رمح ايدهم بيد العشاير ..ورمح مراد توصل للعشاير ..

صعدت فوك للمخزن , خالتي رادت سلات نخلي بيهن الخضرة وجياسة ملح , واني صعدت ركض , مااحس غير ايد انمدت وسحبتني اعرفو
اعرف عطرو ، باسني بوسه عميقة ذوبت كل جزء بيه وهمس بـ ..

- اشهكج ياعرج عيني

- رم..

- اششششششششششششششششششش..........

للحكاية بقية ...