﷽
الكاتبة:
"سـارة الحـسن"
📌لا تنسون التصويت والتعليق بيـن الفقــــرات
📌+متابعة الحساب itsara_kh
Instagram: itsara.kh
Telegram: itsara105
•••••••••••••••••••••••••
مدري شصاب كلبي وفَقد لذة عتابة...
♡♡♡♡♡
دنگ راسة وبقى يسال ويستفسر
ويعاتب بس كنت قافلة على كلامي
حضنت كف أيدة بين كفوف ايدي وهمست بغصة
مُرجان: مو اني غفـار ما خايفة لو رايدة اسويها.
رجعت راسة لورة يكتم عصبيتة
غفـار: چـاا منو مُرجانة منو؟! ياهو يدخل غرفتج؟!
وهنـا كان المُبتغى نتلاعب بيهم.!!
سحبت أديه مبتعدة عنها وباوعتلة بغضب
مُرجان: يمكن هـي.!! حـوراء اللـي أنتَ دخلتها
غرفتنة.!! لو نسيت هـي بنت سلطان.!!!
عگد حاجبة مدايستوعب وهنا عـرفت
كدرت اشوش عقلة وأضيعة بين الحقيقة والكذب،
فرگ وجهة بقوة ودنگ راسة حاير
مُرجان: إذا عميمتك اللـي تثق بيها غدرتك.!!
تتوقـع حـوراء ملاك نازل من السماء وما تغدرك؟!
غفـار: مُرجان لا تضيعيني.
مُرجان: أنتَ مضيع نفسك مو اني.
نهضت مـن مكاني أريـد أطلع من يمة
مُرجان: غرفتك ومــاراح ادخلها بعد ،
تكـدر تاخـذ راحتك أنتَ وحويرة الراح تدمرك.
سحبني من أيدي بقوة مطيحني بحضنة
غفـار: كارهتني مُرجانة؟!
مُرجان: منقرفة منك ومن تصرفاتك ، عوفني.
غفـار: هدي حيلي بعتابج بس لا تسكتين تموتيني.
بقيت ساكتة وهو عصرني بحضنة متمسك بيه
بقوة بين اديه الترجف، سحب نفس عميق من شعري
غفـار: هذا انا القوي ورجفتي حيلي.
مُرجان: انطيني سبب حتى أعذرك وراح اعاتبك هواية.
بقى صامد لثـواني بعدها رخت قبضتة
غفـار: كملي نومتج انا اطلع من الغرفة.
رفعني مكومني من حضنة خلاني بصدمتي
وراد يطلع مـن الغرفة.!! ليش هيج دايسـوي؟!
عقلي يريد ينفجر أكيـد اكو موضوع وسبب
بـس ليش ساكت؟! ليش ما يحاول يقنعني؟!
كل ما اسوي شي يأذي يوجعني كلبي
وتوكف بعيني زيناتة بس دايجبرني
مُرجان: تلاحكني بحجاية غفـار راح اكرهك.
أندار عليه يباوعلي بقهر
أعرفة يحبني ومتأكدة منه بس دايكابر.!!
مُرجان: داتبعدني عنك خايف اوكف بطريق انتقامك مو؟!
غفـار: أبعدج حتى لا يلوحج طشارهم.
مُرجان: وطشارك ما لاح كلب مُرجان؟!
يقهرني ويخليني أحترك مـن يبقى ساكت ،
ليش ما يحاول يفهمني شدايصير؟!
وليش هلكد اني متأذية مـن تصرفاتة؟!
أول وتالي احنه مبتعدين شدايصير بيه؟!
فتـح الباب وطلع ما تلاحك مُرجان بحجاية.!!
كعـدت بالكاع حاضنة نفسي وأبجي موجوع كلبي
مُرجان: حتى أنتَ صرت منهم.!!
ليش واني متحامية بيك؟!
بقيت ابجـي لما أنهد حيلي من التعب،
مددت بمكاني وحقـدي زاد عليهم كلهم ،
ما قدرني ولا أحترمني ضحك الكل عليه.!!
كسر الظهر الجان مشدود بـي.!!
احسه حتـى منـي داينتقم بـس ليـش؟!
مُرجان: تأذي روحك بروحك يَـالغفـار.
مسحت دموعـي ونهضت على حيلي
افرگ براسي أريـد أفكر بتصرف صـح
تصرف يخليني اندمة بدون أأذيــة.!!
طلعت من الغرفة لـ غـــرفة البنات
ياقوت بعدها نايمة وغيـد كاعدة تدرس
مُرجان: غيـد اريدج توصلين حجاية لغفـار بطريقة
متخلي يشگ متعمدين نوصلها.
غيـد: أبشري.
مُرجان: حجاية الفضل سودة بوجهك سلمان.
غيـد: البارحة حجيت وياه يكول أبوه ميخلي
يرجع خايف عليه مـن نـوح.
مُرجان: تقرير الطب العدلي يكول ماتت خنگ،
شعليه بعـد الفضل ويأذي؟!
غيـد: وراهم عجاجة أكيد.
هزيت راسي ما عندي شك وراهم شي،
وما كنت بحال يسمحلي أفكر بوضعهم حالياً،
حجيت لـ غيـد كلشي ببالي وهي ضحكت
غيـد: يعجبني هيج لعب.
مُرجان: بـس بحذر غيـدو.
غيـد: حـذر ووياه مغثة ترد روحج.
هزيت راسي بقبول ما أعترضت
شتسوي بيهم خليها تسـوي ،
مـر اليـوم طبيعي بدون اي حدث غير
نظرات الشماتة اللـي اشوفها بعيون الكل،
صح حزت بخاطري وانقهرت بـس
القادم صادم وراح اباوعلهم بـنفس النظرات،
كاعدين المغرب بـ الصالة اني واخواتـي
وبنات سلمان وحـوراء كاعدات كدامنة
دخـل لـواء مـن برة وملابسة مدمرة بالدهن
والصخام الأسـود ، عيونة أفترت على الكل
وأستقرت علـى غيـد تقرب منها يحجي
بهـدوء مزيف لأن واضح شكد عصبي
لـواء: غيـد تعالـي وياية عندي حجاية وياج.
غيـد
باوعت لـ مُرجان هزت راسها بمعنى روحـي
نهضت مـن مكاني وهو مشى كدامي
بخطوات سريعة طلع مـن البيت بأتجاه
البستان وكف وأنـدار عليه
لـواء: غيـد أنتِ رايدة حارث؟!
غيـد: ليش تدخل بخصوصياتي سيـدي؟!
لـواء: عوفي السوالف التعبانة واحجي الصدك.
غيـد: ما مجبورة انطيك جواب.
لـواء: غيـد جاي احجي وياج مثل البشر.
غيـد: تفرق عنـدك إذا سمعت جوابي؟!
لـواء: أنتِ بنت عمي يعني عرضي
وانا ما أقبل على السوالف التعبانة الجاي تصير،
ضايفتلي حارث بكل برنامج وتنزلين صورج
ستوريات ، انا ابن عمج ما ضايفتني هو منو؟!
غيـد: هسـه أنتَ مـقهور لأن مـا ضايفتك لو لأن ماتقبلها على عرضك؟!
لـواء: لا تخليني أتصرف تصرفات ما تعجبج.
غيـد: أنتَ ما مسؤول عنـي لـواء.
لـواء: بـس غفـار مسؤول مـو؟!
غثني بحجايتة مثل مدايكول هو وغفـار
واحـد إذا ما أنفذ كلامة مجبـورة أنفـذ كلام
أبـو الحـسن حتى لا أرجـع تحت رحمة الرماح،
ولأن هو أيد غفـار اليمنى يعني حتى كلامة يتنفذ ،
مـن هـدوئي كدرت أشعل نار بداخلة
غيـد: يمكن ما وصلك الخبـر انـي قبلت أتـزوج
حارث يعني راح اكون بمسؤوليتة هو وبـس.
فتـح عيونة على وسعها ونتر بيه
لـواء: موضوع حارث أنسد موافقتيش؟!
رفعت أكتافي بعدم مبالاة
غيـد: البنية ما يلمها غير بيت زوجها سيـدي.
درت وجهـي راجعة للبيت وهو خطى خطواتة
سريعة وراية سحبني مـن ايدي مستوقفني
لـواء: سيطري على هرموناتج غيـد مبارك.
نترت ايدي منه بقوة اكرهه نفسي مـن جنس
آدم يلمسني لمسة محرمة
غيـد: إذا لمستني مرة ثانية ما تلوم إلا نفسك.
لـواء: عـرب وين طنبورة وين.!!
زفرت أنفاسي بهدوء ووكفت كدامة
رجعت شعري عـن عيني وركزت نظراتي عليه
غيـد: شتريد مـن غيـد؟!
لـواء: رايدج ولِـيف للروح ، عاشگج أنا غيـد.
حجاها منفعل وبدون تردد وكأنو راح يخسرني
ويريد ينقذ الموضوع بأعترافة.!!
تغير كل حالة ونظرات عيونة شرحت كلشي.!!
كيف ومتى عشگ غيـد ما أعـرف.!!
وليش بقى ساكت لحد هذهِ اللحظة؟!
ردت احجي بـس ما سمحلي رفع ايدة مسكتني
لـواء: لا تحجين شي هسه مارايد شي منج ،
بـس لو قبلتي بحارث حتى يحميج انا هم
أفديج بروحـي ، ولو قبلتي لأن حسيتي يحبج
تأكـدي مو بس تحسي انا عاشگج.
غيـد: وإذا قبلت لأن حبيتة؟!
لـواء: شديتيلهن شرايط حُمـر ما كافي؟!
ابتسمت ورفعت أكتافي بعدم مبالاة
درت وجهـي وأبتعدت عنه وهو صاح متنرفز
لـواء: طاح حظ شواربك سيـدي.!!!!
أعترافة ما كان من ضمن خطط عقلي
بـس راح نضيفة للقائمة ونستفاد منه،
ما كان عنـدي مشاعر أتجاهه ما تأثرت بأعترافة،
دخلت البيت مـن باب المطبخ كانت
مُرجان واكفة تحوس تروح وتجـي متوترة
غيـد: بيج شي؟!
مُرجان: عوفج منـي ، شيريد لـواء؟!
غيـد: أول هـدف بمرماهم ، لـواء طايح بعشگ غيـد.
صفنت بوجهي وهزت راسها رافضة
مُرجان: لا غيـد لا تكسرين كلب لـواء هيج.
غيـد: أنتِ منو محسب حساب لكلبج وتفكرين بيهم؟!
حتى غفـار اللـي كان واكف بوجه لكل لخاطرج
هم طلع على حقيقتة وضحك أمة محمد عليج.
مُرجان: بس لـواء ما مأذيج بشي.
غيـد: وانـي ما سويتلة شـي.
مُرجان: وماراح تسوين؟!
غيـد: العلم عنـد الله مُرجان.
تجمعت الدموع بعينها وسندت نفسها
على طرف الكاونتر ، تقربت منها قلقة عليها
غيـد: شبيج مُرجان؟!
مُرجان: راح أمـوت مـن قهري غيـد ،
هسه دخلت يمة واني هنا مثل بلاع الموس.
غيـد: حوراء يم غفـار؟!
مُرجان: اي يمة ، واهلها شاديهن وكاعدين بالصالة.
غيـد: وليش ما مفعلة وضع التوكسك؟!
مُرجان: راح يحسبها غيرة.
غيـد: اني أفعلة ما يفرق.
طلعت مـن يمها وهي صاحت عليه رادت
تفهم منـي شراح اسوي بـس ما وكفت ،
دكيت الباب بقوة وفتحتها بدون استأذان
فزو ورفعو راسهم عليه اثنينهم
غيـد: العفو بـس هذهِ غرفة أختي توقعت راح الاكيها هنا.
صارت عيني على حـوراء تمسح بدموعها
يعني كانت تبجي ، وغفـار ملامحة جامدة
غفـار: مُرجانة مو هنا.
غيـد: اي شفت بس ممكن سؤال.!!
غفـار: جواب.
غيـد: مـن تتزوج حـوراء راح تعيشها بنفس الغرفة؟!
ضيگ عيونة عليه
غفـار: سؤالج مو منطقي.
غيـد: ودخــول حـوراء لغرفة أختـي قبـل لا تتزوجها هـم مـو منطقي يَـالنسيب.
نهضت من مكانها حـوراء تريد تطلع
حـوراء: أحتاجيت منه شغلة وأجيت ، راح اطلع.
دفعتها بخفة مرجعتها للداخل
غيـد: لا أخذي راحتج ، مـن رخصتكم.
طلعت وسديت الباب عليهم وهـي صارت
دردم بهمس بس ما فهمت شنو حجت،
أخـذت نفس عميق وحمدت ربي اني مو بمكان
مُرجان لأن كان هسه مرتكبة جريمة بسببهم،
تمشيت للصالة كعـدت كدام سلطان أستفزة
غيـد: عمو ليش جبرت حـوراء تتزوج غفـار؟!
رفع عيونة عليه مستنكر سؤالي
سلطان: محـد جبرها بأرادتها راح تتزوج.
غيـد: يا لعـد شبيها تبجي يم غفـار وتكله أرفض الزواج أنتَ لأن اني ماكدر ابوية يذبحني.
بحلق عيونة وباوع على مديحة بغضب
غيـد: خطية والله لأن هسه داتبجي يم غفـار.
نهض من مكانة بسرعة متوجهه لغرفة
غفـار ومديحة ركضت وراه خايفة
مديحة: يمكن البنت فاهمة غلط استهدي بالرحمن.
ما عبرها ودرعم على غرفة غفـار فتح الباب
بقوة ودخــل عليهم ، أشرت لـ مُرجان اللـي
واكفة بباب المطبخ وتباوع تمشي ويانة نشوف
المسرحية اللـي ولعناها ، دخـل سلطان
عيونة متشخصة علـى حـوراء
سلطان: شكو؟! ليش البجي ها؟!
حـوراء: ماكو شي بابا بـس هيج أمور بيناتنة.
عاط بيها فززها
سلطان: أموريش هاي قبل العقد هاا.!!!!
غفـار: تحجي وكأنو أنتَ تعرف مالات الأوادم.!!
عجيب أمرك ، روح تفاهم وياها وحـدكم فارگ.
سلطان: أكسر راسك إذا تحجي وياية بهذا الأسلوب بعد.
غفـار: ليش ترَفع مقامك مثلاً؟! هذا هو أنتَ نفسك سلطان.
أنـدارت حـوراء على غفـار متنرفزة
حـوراء: ياريت تحترم بابا على الأقل بوجودي.
غفـار: وبغيابج اهينه تدللين وهسه فاركي أنتِ وابوج.
صار ملاطش بيناتهم وغفـار سكت ما
جاوبهم بعـد ، ميلت نفسي علـى مُرجان متعجبة
غيـد: اسفة الكم بس غفـارج بي خيط خبال.
مُرجان: وراح يخبلني وياه.
غيـد: لا صدك يعني سحل كرامتهم ولا عبالك راح يتزوجها.
مُرجان: هذا داهية وراه مصيبة.
غيـد: اني لو بمكان حـوراء على هذهِ الأهانة لو تنـزل بـي آية هم ما أباوع بوجهة بعـد.
مُرجان: لو عدها كرامة متاخذ رجال متزوج.
غيـد: أحـس فعلاً اكـو لعبة واكـو مصايب بعد هذا الزواج.
مُرجان: لعبهم وسخ.
غيـد: نصير اوسخ منهم.
أبتسمت مُرجان وعينها عليهم تباوعلهم
بشماتة ، تنهدت مرتاحة ورجعت للصالة تمشي
وتتمايل ، كعـدت على الكرويتة وخلت رجل على رجل
مُرجان: سهلو عليه الجاي.
غيـد: عجاجة جديدة؟!
مُرجان: عاصفة تسونامي مو عجاجة عادية.
ضحكت وكعـدت يمها ، وهمه مهوسين ،
والبقية كلها إلتمت على هوسة سلطان
اللـي خبص روحة يريد يعرف ليش حوراء تبجي،
اثنينه باوعنة لـ غرفة الرماح مـن طلعت ياقوت
تتسحب بهـدوء سدت الباب وأجت كعدت
يمنة وعيونها تكول وراها مصيبة
غيـد: شجنتي تسوين بغرفة الرماح؟!
مدت راسها بيني وبين مُرجان تهمس متعجبة
ياقوت: جنطة كاملة بـس فلوس بغرفة جدج.
مُرجان: جنتِ تفتشين الغرفة؟!
ياقوت: لا لا بـس اني شفته من جابها وكال لـ سلمان أمانة مدري منو واحد نسيت اسمة.
غيـد: ما أفتهمنة شعندج جوة؟!
ياقوت: مو اني كلت معقولة بالواقع هم أكو جنط فلوس توقعت بس بالافلام بس طلع صدك اكو.
غيـد: اي وشسويتي من شفتيهن؟!
ياقوت: سبحتهن بشامبو طرفة ”دابـر امـلا“.
مُرجان: دام محد يعرف بيهن غيـر سلمان معناها هو المشتبه بـي الأول.
ضحكنا ثلاثتنة بصوت عالـي وأخيراً
طلع فعـل مُفيـد مـن ياقوت غيـر التجفص،
فضت هوستهم بعـد فترة بحجاية من غفـار
غفـار: طولتها سلطان.!! تخصمها لو أصير كـ***.
حجاها بتحذير ، وسلطان عيونه صارت بكصتة
سحب حـوراء مـن أيدها طلعها وياه يدردم
ضحكت مُرجان على وضعهم
مُرجان: ترجمة لحجاية غفـار: سلطان تطلع لو اصير مثلك.
حسيتها برد كلبها من حجه وياهم نفس
المُعتاد وما أحترمهم لخاطر حـوراء مثل ماتريد،
بقيت متحمسة لـ ردة فعل الرماح من يعرف
شصار بفلوسة وهم متحمسة لخطوة مُرجان الجاية،
مـرت يومين والوضع مشحون بين سلطان وغفـار،
ومُرجان ما تواجدت بمكان موجود بي غفـار
بعد حتى وقت النوم تنام يمنة ،
وباليوم الثالث كنت كاعدة أدرس بالحديقة
وهـي أجتني واضح من عيونها وراها مصيبة
مُرجان: يحلو أريد ملف من غرفة سلطان.
غيـد: ادخلي أخذي.
مُرجان: وضعي مشكوك بي لو دخلت ،
بـس أنتِ عادي وهم حـذرة ما ينخاف عليج.
غيـد: داتدفعيني ها.!!
مُرجان: لج عيني غير داهية أنتِ.
ضحكت بحماس شلون تدفعني وتحمس بيه
احرك بيت الرماح مو بـس اجيبلها ملف،
نهضت مـن مكاني وبقيت أستفسر على الموجودين
بالبيت حتى أخذ حذري أكثر وما خلي أحـد يحس
عليه، مُرجان لهت مديحة بالمطبخ واخذتها
بالسوالف واني تسحبت لغرفة سلطان،
سحبت واحد منهن خليته بملابسي وطلعت
رحت لـ غرفتنة وهـي من شافتني أجت وراية
طلعتة مـن ملابسي وقدمتلهيا
غيـد: شراح تسوين بي؟!
مُرجان: ارجعة لـ سلطان.
مُرجان
بقت صافنة عليه تستوعب كلامي
غيـد: شكو خليتيني أجيبة؟!!
مُرجان: بعدين أفهمج.
بستها من خدها بقوة وضميتة بالغرفة
وطلعت ، حاولت أشغل نفسـي بقية النهار
لـما صار الليل كلنا بالمطبخ ، بلقيس والبنات
يسون أكل لنفسهن واني وغيـد نسوي النه،
دخـل ميثم من برة كاشخ كشخة فول
بقـى واكف يحجي ويا بلقيس وقطع
حديثهم تدخل غيـد اللـي فاجئنة كلنا
غيـد: ميثم أنتَ خوش ولد ، شعجب يكولون عنك مو خوش؟!
بقت عيون ميثم على غيـد تحسة
ما مصدك سمع هيج كلام منها،
تقـدم عليها أبتسم مستغرب
ميثم: أول مرة واحـد يمدحني.
نورهان: أنتَ مخرب سمعتك بالبنات ياعيني.
غيـد: ماكو واحـد ما يحب النسوان بس اكو بالعلن واكو بالسر ، وميثم من النوع الأول.
ميثم: أنتن حلوات شسوي لكلبي.
غيـد: راح تجي وحـدة تدخل كلبك وتقفلة وراها.
توسعت أبتسامتة وهز راسة بأيجابية
ميثم: الله يسمع منج ونتوب على أيدها.
غيـد: ماعنـدي شك وأن شاء الله تغير رأيي الناس بيك.
تحجي بدون تعابير حديث طبيعي
عيوني على البقية كلهم صافنين عليها
يمكن أول مرة واحـد يمدح ميثم وحتـى هو
الفرحة وضحت بعيونة ، طلع مـن يمنة يوزع
ابتسامات واحنه رجعنة نكمل أكل والبقية
بدأت البسبسة بيناتهم ، ضحكت وهمستلها
مُرجان: أسلوب توكسك؟!
غيـد: لا ميمي حباب.
وضحت النية مـن كالت ميمي ضحكت وسكتت ،
أنجمعو كلهم ياكلون سوة واني واخواتي كعدنة
وحـدنة بالمطبـخ ، دخلو لـواء وروكان للمطبخ
تربعو يمنة بدون مقدمات ياكلون ويانة
لـواء: وجوهجن مشهي وحگ دين محمد.
روكان: هذا وجه ووجه سلطان وجه والله زحمة.
حجاها وأشر على وجوهنه واحنه صافنين عليهم
لـواء: ندري ما حاسبات حسابنة بس احنه ما ناكل هواية على كـد مــا نشبع.
مُرجان: عافيات.
ياقوت: اللـي ياكل ويا عمامك لازم قبل نص ساعة ياخذ حباية لعبان نفس.
بقـو يصنفون ويضحكون همه وياقوت
وغيـد ساكتة ، لـواء يباوگ بنظراتة عليها
ياقوت: غفـار ويا نسابتة؟!
باوعلي لـواء بنظرات سريعة وجاوبها
لـواء: لا غفـار مو بالبيت.
ياقوت: لعـد؟!
لـواء: عنـده شغل يمكن ما يرجع.
بقيت ساكتة وفكرة وحـدة ببالي
إذا لـواء وروكان اثنينهم هنا ويامن طالع؟!
حسيت غيـد قرأت أفكاري وسألت
غيـد: ويامن؟! بالعادة ما تعوفونة بروحة؟!
لـواء: ويا حارث.
أبتسمت غيـد وهزت راسها بأيجابية
باوعت على لـواء تنرفز وماكدر يسكت
عاف الأكل مـن أيدة ورفع حاجبة لـ غيـد
لـواء: اشوفج توزعين أبتسامات غيـد مبارك؟!
غيـد: أبتسامتي عافية سيـدي شوف وأنتعش.
ياقوت: لو اله كان انتعش بس...
كرصتها بسرعة ما خليتها تكمل لان راح تجفص،
نهض مـن مكانة يحاول يكون طبيعي
لـواء: عاشت ايدج مُرجان الأكل طيب.
مُرجان: عافيات سيـدي.
أبتسم مجاملة وطلع وروكان بقى كاعد
ياكل بهـدوء واحنه وحده تباوع للثانية
روكان: مـن الصبح ما ماكل جان خليتي يشبع بطنة.
غيـد: أخذت اللگمة مـن حلكة؟!
روكان: لو ماخذتها أهـون.
عائلة مفضوحة ماكو حجاية تنضم بيناتهم،
او حُـب لـواء وغيرتة هي المفضوحة بحيث
حتى روكان لاحظ هـذا الشي ،
كلنا سكتنة لما كمل أكـل وتشكر منه وطلع،
احنـه هم عزلنة مواعينة وطلعنا رجعنه
لـ غرفتنة والبقية مهوسين بـ الصالة
مـرت فتـرة وسمعنة صوت الرماح يرعد
ضحكت ياقوت ورجعت راسها على المخدة
تناثر بشعرها منا ومنا فرحانة
ياقوت: أحـس بأنتعاش واني حارگة كلبة.
غيـد: تتوقعين ينجلط لو لا؟!
ياقوت: لا شيجلطة.
مُرجان: بسبع أرواح الرماح حتى لو ينجلط مايموت.
ضحكنة وطلعنا نشوف شصاير وياه،
ومثل ما توقعنة علمود الفلوس وفعلاً ياقوت
مسبحتهن سبحة العيـد بحيث يشيلهن منتهيات
ماكو فلس صاحي كله متفتت وهو مفرفح
الرماح: طلعولي السوة هيج لا احرك البيت بيكم حواوين.!!
سلطان: بوية شنو مصلحتنة نسوي هيج؟!
الرماح: ولكم ببيتي وما أأمن على فلوسي.!!
وين اوديهن بعد عنـد الكـ*****.!!!
بقت ناس تكبس وناس ترفع والرماح
يشيل روحة ويركعها بالكاع ، تدخلت بلقيس بالموضوع
بلقيس: من يعرف أنتَ جايب الفلوس لهنا؟!
هدأ الرماح فجأة مثل اللـي استوعب
أفترت عيونة على الموجودين وجاوبها
الرماح: بس سلمان ولـؤي.
بلقيس: چـاا وضحت المن مهوس بعـد.!!
سلمان ما كان موجود بس لـؤي أنتفض
وصاح على بلقيس بعصبية
لـؤي: شقصدج عمة؟!! انا اغـدر جدي؟!!
بلقيس: عندك سوابق ليـش مستغرب.
بقى الرماح يباوع لـ لؤي بشگ وسلطان ومديحة
حارو شلون يبررون موقفة ، بـس الرماح الشك
ماكل كلبه ما يثق بيهم منا لهنا
الرماح: عنـدك يومين ترجع الفلوس كاملة ** مليون.
بحلقت عيوني مصدومة الرقم كبير
مُرجان: عزة بعينك يَـالرماح منين جبتهن هلكد؟!
غيـد: فلوس الحرام يجن برمشة عين.
ياقوت: تاجر الممنوعات مو زنگين بكدة.
بقينة نتصفن ولؤي وابو تخبلو منين يجيبوهن.!!
وبعـد هوسه وصياح ونياح فجرها لـؤي
لـؤي: أنتَ كلت انا وسلمان نعرف بيهن يمكن سلمان ليش كبل شمرتها براسي؟!
سلطان: ويمكن طرف ثالث مجهول.
هز راسة الرماح أماشيهم
الرماح: چـاا زين دبر الفلوس أنتَ وعمك.
دار وجهة وراد يرجع لغرفتة ، ضرب
الجنطة أم الفلوس التالفة برجلة وتعداها،
كعـدت مديحة تدك وتلطم وسلطان يفرگ
براسة حاير ولـؤي وجهه صار أصفـر ،
يعرفون الرماح ما يرحم وراح يطلعها من عيونهم،
تقربت طرفة تباوع للفلوس متعجبة
طرفة: چـاا عمي شلون ما انجلط؟!
سلطان: وكتج هي وكتج؟!!!
صار يصيح وطلع يرعد مـن البيت
ولحگة لـؤي واحنه تركناهم بحيرتهم
ورجعنة لـ غرفتنة ياقوت شمرت نفسها
بفراشها ولازمــة كلبها
ياقوت: عزة بعينج ياقوت شلون تلفتي هذا المبلغ.!!
غيـد: الرماح لو يعرف بيج يبيعج تفصيخ.
ياقوت: ويشمر عظامي للچلاب والله.
مُرجان: خوب هو ياكلهن.
ضحكت بصوت عالي وغيـد تسد بحلكها
تريدها تسكت حتى لا ننفضح ،
بـس فعلاً كان موقف صعب وخاصةً الفلوس
أمانة عنـد الرماح مو فلوسة الخاصة
غيـد: إذا اللـي سمعتة ياقوت صحيح وهذهِ
الفلوس أمانة يمه معناها هذه نهاية الرماح.
ياقوت: إذا ما انجلط هم اهل الفلوس يذبحونة.
بقـن يتناقشن بالموضوع ومتحمسات شلون
راح يخلصن مـن الرماح وانـي أضحك على
سوالفهن ، بقينة سهرانين لـ وقت متأخر
بعـد طفينة الأضوية وكلمن نامت بفراشها،
دانحجي بصوت هادئ وندگت الباب،
غطيت راسي بسرعة وهمست
مُرجان: إذا غفـار كليلة نايمة.
فتحت الباب ومثـل ما توقعت كان غفـار
وانطتة خبـر غيـد انو نايمة
غفـار: كعديها إذا مابيها زحمه عليج.
غيـد: ماكدر والله اخاف منها.
غفـار: چـاا خليني افوت عليها وأنتن نامن بغرفتنة.
غيـد: تنحرنة ما نكدر.
ما أعرف شصار بعد صمت ثواني
وغيـد طلبت مـن ياقوت يطلعن من الغرفة،
بقيت جامدة بمكاني واحس بحركتة دخل
وسد الباب صار قريب مني ونزل مـن الكرسي
مالتة نايم وراية ، فزيت من أيدة صارت على
خصري محتضني وطبگ ظهري على صدرة
مُرجان: وخـر عني غفـار شداتسوي؟!!
شدد لزمتة عليه وهمس
غفـار: اشش بـس احجي وياج وأروح.
مُرجان: ما بيناتنة حجي غفـار وخر عنـي.
حسيت أستنشق عطر شعري بهدوء
غفـار: مـنو فارس؟!
أرتعبت لمجرد ما ذكر أسمة فزيت وردت
انهض مـن مكاني بـس ما سمحلي مقيدني
غفـار: لا تخافين مُرجانة بس احجيلي.
مُرجان: منين تعرفة؟!
غفـار: ليش هيج مرعوبة منه؟!
غمضت عيوني بقوة وجاوبتة بغصة
مُرجان: خالـي.
غفـار: أعرف حقيقتة بـس أريد اسمعها منج.
رجـف فگي واني أسترجع ذكرياتي الصعبة
مُرجان: مـن مات بابا تركنة بيتنا وعشنة يم
ببيت جدي أهل امي، أكـذب إذا اكول عشنه يوم
واحـد مرتاحيـن ، كانو مـن النـوع اللـي كُـل
المحرمات مُباحة عدهم ، لدرجة فارس كان
يتحرش بيه وبـ امي ، كان يهددني إذا حجيت
راح يتحرش بأخواتي خوفني وسكتت،
وأستخدم نفس الأسلوب ويا امي
يعني هددها يعتدي علينا ،
كان حيـوان ونذل لدرجة حاول أكثـر مـن مرة
يسويها فعـلاً ، وأخر مرة كانت من دخل للبيت
سكران واني كنت بالمطبخ بـس حسيت عليه
ركضت ضميت نفسـي ورة الباب وهو حس
فارس: وين خاتلة حبيبة خالها ها؟!
بقيت جامدة بمكاني كطعت حتى النفس ،
ادعـي ربـي يكمل طريقة وما يشوفني بـس
شافني انسحبت الباب مـن كدامـي وصار بوجهي
مبتسم أبتسامتة الشيطانية وصاح
فارس: لكيتهاااا لـ مُرجان.!!!
حاولت ادفعة وركضت اريد ارجع
لغرفتنة يم امي وصرخت بصوت عالي
أريـد تخلصني منه بـس كتم صوتي رفعني
عـن الأرض ساد حلكي بأيدة وطلعني لبرة
كان الجو مخيف مطر قوي واصوات رعـد
بقيت ارافس بين أديه واصرخ بصوت مكتوم
وهو يشدني عليه إكثـر ويهمس بحقارة
فارس: اشش محد راح يسمعج لا تحاولين.
شمرنـي بالكراج وصار يمارس أفعالة القذرة
يتجرأ بلمساتة يحاول ينتهگ جسـدي
اضرب وادفع بـي بكل طاقتـي بـس تحسه
جبل وطاح فوكايه ما يتزحزح ،
صرت أصرخ بصوت عالـي مـن سحب أيده
عـن حلكي بس ما أهتم ولا خاف من صراخي،
دقايق وحسيت صوت امي تركض مفرفحة
دفعتة عنـي وسحبتني لامتني بحضنها
جُمان: ولك أنتَ تخبلت الله لا يوفقك يااا حيوان...
ضحك وحاول يسحبني منها
فارس: هذهِ عقوبة الماتسمع الكلام.
نهضت امي مكومتني وياها ودفعتني أتجاه البيت
جُمان: روحـي يم اخواتج ركض.
بقيت اباوعلها وهي عاطت بيه حتى
اروح بسرعة، طلعت مـن الكراج أركـض
بـس صوتها يرن بأذني ما اعرف شبيها،
وأدركت إذا هو خالي وعادي يعتدي عليه
هل من المعقول ما يسويها ويا أختة؟!
وفوك كل هذا هو شارب مو بوعية.!!
رجعت للمطبخ سحبت سكين كبيرة ورجعتلها
كل ظني نهددة بيها حتى يعوفنة
بـس المنظر الصار كدام عيني أرعبني
امي بين ادين وحش لا حول ولا قوة
ماعدها حيلة غيـر صوتها ومحد بحالها
بقيت اصيح عليه يعوفها بس ما عافها
ما ترددت وغرست السكين بقوة بخاصرتة
شوغتي وروحي المفرفحة على امي جبرتني
انشلت حركتة وامي دفعتة بقوة طاح على
الأرض جثة مشلولة بس عيونه مفتوحة،
أحـس عقلي طار مـن راسـي كعدت يمة
أريـد أطلع السجيـن بس خايفة يـموت،
صرت أبجي وأرجف ، اتوسل بي ما يموت
مُرجان: لا تموت لا تموووت كوووم لا تموت.
صارت تصرخ لصراخي متخبلة مو على أخوها
وأنما خايفة على بنتها وشلون تلطخت بدمه.!!
رفعتني عـن الأرض واني تيبست من الصدمة
دفعتنـي للبيت وتحجي بهسترية
جُمان: ترجعين للغرفة ماتطلعين ولا تحجين شي
مُرجان بنيتي فهمتيني مو حبيبتي؟!.
ماكدرت اجاوبها ولا كدرت أفكر بشي وقتها،
غسلت ادية من الدم ورجعتني للغرفة
يم اخواتي اللـي كامو نايمين ماحسو على شي،
ولا البقية سمعو صراخنة بسبب المسافة البعيدة
وبسبب صوت المطر والرعـد القوي،
قفلت الباب وبقيت كاعدة أرجف ما أعرف
شسوي، فكرة اني مجرمة تعبتني وهدت حيلي
رغـم لهذا يومنة محد يعرف بالحقيقة
لأن امي شالت التهمة عنـي وكالت هي اللـي
ضربتة ، رغم الاذية وفقدت أحـد كلياتة
بـس ما مات ، وانتشلنا مـن ذيج الحفرة
عمو ظافر يـوم تزوج امي حتى يحميها منهم.
شهگت بقوة وماتت الأحرف على حنجرتي
عصرت كف أيدة بقوة وأريـد احجي بـس الغصة
هدت حيلي ، دارني عليه يمسد على وجهي
يحاول يخليني اهدأ ويهمس بصوت مبحوح
غفـار: اشش يَـابعد غفـار لا تخافين.
مرت دقايق واني ابجي وأشهگ احـس
روحـي تريد تطلع ، وهو ضامني بحضنة
لما هدأت وصار يناثر بوساتة على وجهي
غفـار: تأذيتي منه بعد؟! احجيلي لا ترحمينة.
مُرجان: بعد ما تزوجت امي وعشنة ببيت ظافر
بقيت فترة طويلة أتخيل الموقف ومرات
أتخيـل عمو ظافر يسوي بيه نفس الحركات
أتخبل واتهستر ويطير عقلي اصرخ بنص
الليل واحلف لأمي ظافر دايسوي بيه هيج ،
التخيلات سلبت راحتـي ودمرتني بذيج
الفتـرة صرت أطلع مـن البيت واكعد برة
وابقى ابجي خايفة لما تجيني امي واكعد
اشكيلها من تخيلاتي ، وصلو لمرحلة الأنفصال
لأن امي ما كذبت كلامي وكانت خايفة
من عمو ظافر يطلع فعلاً دايتحرش بيه ،
بـس هو ماقبل وانطاها حـل
انو يخلي كاميرات بالبيت بـدون علمـي
وراح تشوف وتعرف الحقيقة بنفسها،
وهـذا الصار خلو كامرات وعرفو مُرجان
عايشة بوهم وكل اللـي تحجي مجرد تخيلات،
وبعدها أخـذوني لطبيب نفسي حتى يعالجني
وأرجـع احسن مـن قبـل ورجعت بس مو تماماً،
وهـذا السبب اللـي خلاني قبل زواجنا
اكلك ممكن ماكدر اتقبلك.
طبع بوسات قوية على عيوني وهمس
غفـار: تنتظرين غفـار 20 سنة؟!
رفعت عيني عليه ما فاهمة قصدة ،
وهو صاير نار احـسة على ثانية ينفجـر
مُرجان: ليش؟! وين تريد؟!
غفـار: معتدي على حُـرمة أبـو الحـسن تخَسين لو خليتة يشم الهوى.
هزيت راسـي بهسترية رافضة قرارة
مُرجان: لا غفـار لا تلوث أيدك بي ما يتساهل.
غفـار: خالـج صارلة إيام يمي واليوم ليلتة الأخيرة.
راد ينهض مـن مكانة وتمسكت بـي بقوة
مُرجان: لا بداعتي لا بروح الخليل لا تسويها.
غفـار: ول يَـابا شتحجين أنتِ؟!
وروح الخليل وغلاتج لشوفة النبي عربي.
كان عصبي لدرجة لو يصير كدامة فارس
يذبحة بدون لا يحس على نفسه،
ما كان يعرف هذهِ الحقيقة وأنفجع مـن
سمعها مني ، حضنتة بقوة ما أريدة يروحله
مُرجان: كلها عافتنة لا أنتَ هم ، ابقى يمي غفـار.
لمني بين أديه ورجعني منومني بمكاني
صار يمسد على شعري بحنية
ويحجي وياية بهدوء عكس النار بكلبة
غفـار: لو شمايصير ابقي تذكري أنتِ ”حبيبة عيون الغفـار“.
مُرجان: لا تعوفني لعد ، اني وأنتَ ننسى كلشي
صار ونبدأ مـن جديد ، لا تعوفني غفـار.
احجي وابجي احس روحي فرفحت
مـن رجعة فارس ومـن الراح يصير بفارس
ومـن مصير غفـار المجهول ، دايضيع نفسه
بسبب الأنتقامات والثارات،
حضني يبوس براسـي ويهمس
غفـار: يمج انا لا تخافين ما أروح.
بقيت الليل كله مقاومة النوم خايفة
انام ويغافلني ويطلع ، احجي وياه احاول
أقنعة ينسى كلشي ، أريد نار كلبه تبرد وهو
كان يمثل الهـدوء وكل حجاية منه وكل
فعـل يحسسني هذهِ ليلة وداع ،
غفيت بعد ساعات بحضنة ، وايدي متمسكة
بملابسة بقوة بـس ما حسيت بعـد إلا على
صـوت غيـد تصرخ بأسمي مفزوعة ،
فتحت عيوني وأحـس الدنيا تكومت على راسي
مـن ما لكيت غفـار بجانبي، نهضت على حيلي
ويا فتحت الباب وصارت غيـد بوجهي،
عيونها مغرغرة بالدموع مرعوبة
غيـد: تلاحكـي غفـار....
•يتبع……
•••••••••••••••••••••••••••••••••
📌توقعاتكم طرگاعاتي 🍊.
📌لا تنسون التصويت والتعليق بين الفقرات
+متابعة حسابي انستا itsara.kh