نوائب_شام
بقلم ايلول 💚
تصويت وتعليق بين الفقرات لطفًا 🦋
""""""""""""""""""""""
ياهو عِندي يسوه ضــلك
أنه ماشبعان منك حتى أمِلّـَـك..
"""""""""""""""""""
الجزء الاول
"""""""""""""""""""
شــام :: شهكته ورجفت ايده وفكت عينه بصدمة هزتني هز التفت عليَ بخوف فاتح عينه على وسعها. غمض حيل وجر ايده من ايدي يريد يروح لزمته ارجف
- هجــام هجــام
وهو مغمض وساد اسنانة بقوة يرجف
- هجــام هاي بنتك هاي قبر ملاك واجهه لا تتهرب لا تتهرب
وهو مختنك كوه يتنفس وماعنده طاقة يجر ايده من ايدي يهمس بخنك
- لا توجعين گـــلبي شــام لا توجعين گـــلبي .
بجيت احجي بحرگة
- وجع كلبك يوجع روحـــي ، بس اذا ما واجهت راح تظلم نفسك وتظلمنا تظلم ترف وتظلمني وياكم ، باوع باوع
دفعني منه يصيح
- سكتي سكتي ما اظلم احد سكتي سكتي .
رجعت خطوة ليورا ابجي وهو النفس كوه يسحبه ويباوعلي بعيونه المدمعه ميل راسه نزلن دموعة نظراتة تتوسل ما اضغط عليه
- باوع لصورتها .
ايده ترجف تنهد بوجع مخنوك كعد على أركبه مقابيل صورتها وبس رجع لمح الصورة انجن يحير شيسوي يريد يحضنه يريد يطلع الصورة من القبر صوته اليرجف
- ملاك ، ملاك بابا ملاك بابا
ويروح منا ويجي منا يحير بيا طريقة يوصللها ويحضنها ميل تراب الكبر منا ومنا بايديه وبسرعة يوخره ويضرب بايده على الحجر المبني
كعدت مقابيلة بس دموعي على خدي مد روحه ويا القبر حضنه وصاح بكل صوته
- يا بويه يا عزيزة گـــلبي بنيتي يا وجع روحـــي ملاك ملاكي بابا حاجيني حاجيني حاجيني بابا حاجيني ااااخ يا بويه يا روحـــي
بجه بصياح مفجوع گلبه يحضن القبر بكل حيله اباوع لصورتها سبحان من خلقها وجها عيونها ابتسامتها بالصورة تمرد الگلب
باوعت الهجام ملابسه السود انترسن تراب وده يشگ القبر ويلمها الحضنه ما يدري شنو اليسويه وهو متمدد على قبرها نگلب بالتراب على ظهره وباثنين ايده ضرب وجهه حيل ركضت اريد الزمه وهو يضرب روحه بقوة ويصيح
- انا الكتلتج بويه انا الكتلج انا الاخذت روحج
لزمت ايديه بقوة اصيح واحضن بيه
- لا لا هجــام ، عفيه
ضم روحه الحضني يبجي
- منين اخذ حكها منين انتقم انا الموتتها ، يوجعني گـــلبي شــام يوجعني گـــلبي ، انا كتال بنتي ، والله احبها والله احبها بروحي ضميتها بروحي ما ادري تالي انا الاموتها انا الاحرمها من الدنيا
بيا ذنب طفيت ضحكتها وسلبت روحها .
ريتني بالموت ريت عيني ماشافت ضوء عكب عيــونج ريت ريتي ما شمت هواء وانتِ بالتراب مدفونة.
سديت حلكه بايدي
- لا عفيه لا تحجي هيج. .
رجع على القبر حاضنه ويهمس
- كون اندفن بصفج بابا روحـــي حبيبتي
باس قبرها يمسح عليه ويحجي بحرگة كعد مقابيل صورتها ويحاجيها يرجف
- صرختج ما تروح من عقلي عيــونج ما يفارگن عيوني ولج ما مر يوم وما عضيت ايدي ندم ، تمنيت ابتر رجلي الماتت وما وصلتني الج .
شكلتي عليَ بابا بيا نظرة شفتيني من دعمتج شكلتي عليَ من صرختي وما نقذتج شحسيتي بابا ملاك بابا شكلتي كليلي ها كلتي ابوية مو زين كلتي متقصد كرهتيني ذيج الساعة.
شگلتي من لاحتج النار وما طفيتج بابا شفتيني كتالج ؟
حجاها وما تحمل باثنين ايديه يضرب وجهه بكل حيله ويحجي بحركة
- ميت كون ميت كون انا المحترك يابعد ابوج كون انا المحترك ولا واصلتج نار .
كمت من مكاني بسرعة الزم ايديه ضم وجهه لحضني يبجي ويشهك
- اااخ يا بويه ، انا كتال بنتي ، شام انا الموتتها انا السكتت ضحكتها الحلوه انا السلبت روحها يا روحــي ملاك بابا يا روحـــي
بس حاجيني بس كليلي مسامحتك بس كليلي ماكارهتني بابا ما كارهتني عيــونج الاحبهن شافني كتالج بابا ولج حاجيني حركتي گـــلبي وروحي حاجيني مره حاجيني بردي ناري .
لميته الصدري ميته بجي
- اششش اشش كافي هجــام كافي
لم رجليه الصدره ، وراسه بحضني بجه الحد ما تعب عيونه انتفخن وحاله يمرد الگلب يباوع الصورتها ودموعه على خده مديت ايدي سديت الصوره مسحت دموعه
- يا حبيب روحـــي ، يا نظر عيوني ، اني والله ما ودي اشوفك بهيج حال بس ما اريد تبقى طول عمرك متعذب ، لازم تقتنع الصار مو ذنبك ولا بأيدك هالشي قدر ومكتوب ما لازم تلوم نفسك .
كعد على حيله وكفت ومديتله أيدي رفع أيده الترجف خلاها بأيدي سحبته وكف واستند عليَ گـــلبي يوجعني تمنتيت ازور اهلي ، ابوي اكيد قريب اكيد
مشينا خطوات واني عيوني ليورا اتلفت اريد ازوره لو مره بعمري همس هجــام بصوته المخنوك
- ما زرتي ابوج ؟
رجفت شفتي اباوع لعيونه هزيت راسي لا ونزلن دموعي
- اني حتى ما اندله .
تحسر كوه فاتح عينه سحب أيده من كتفي لزم ايدي ومشه لمقبرة اهل رويــده افتر بين القبور يقرأ الأسماء شفت قبر كرار وبصفة عمو حسين التفتت على صوت هجــام يهمس بصوت مبحوح
- هذا شــام .
نعصر گـــلبي كوه مشيت كعدت كدامه لازمه دموعي اباوع الاسمه ولصورته وكلبي يتگطع بجيت مخنوگة
- بابا حبيبي ، شــام شــام اني بنتك ، حرموني منك الله يحرمهم من الدنيا ومن رحمته ، شبعت ذل بدونك والله شبعت ذل وتلوعت بأبا اخوتك الحرموني من وجودك هم الذلوني .
ابجي مفرفحة واحس بهجام سحبني الصدره حضن راسي بقوة
- اشش ما تنذلين وانا أشم الهواء.
بجيت مفرفح گـــلبي لو هو عايش ما عشت كل هالتعب ، باوعت الهجام تعبان حيل وعيونه تروح لجهة قبر ملاك ، مسحت دموعي وكمت لزمته من ايده ساندته
- يله خلي نروح .
رجعنا للسيارة صعدنا سند راسه على الستيرن متحسر خليت أيدي ورا ظهرة .
- هجــام .
التفت باوعلي زفر نفس مسح وجهه
- رجلي شوي جاي يخدرن ما اكدر اسوق هواي شــام اخاف عليج .
- زين نروح للأمام علي عليه السلام نزور وترتاح .
- وترف وافاطم وحدهم .
- اخابر غزوله من يكملون دوام هي وحيادر يجون يمهم ؟
هز راسه موافق طلعنا للأمام علي نزلنا من اباوع لوجهه گـــلبي ينمرد ، اذيته صح بس والله مو بأيدي اني هم مجبورة اعيشة هيج شعور
دخلنا للتفتيش ومن طلعت لكيته واكف منتظرني رحتله ، يمشي بضياع لازم ايدي وحاني ظهره نزل ردن العباية على اطراف أصابعي مد أيده الثانية عدل ردن العباية ورفع عينه باوعلي عيوني متروسه دموع
باوع للقبة بحيرة صوته يرجف همس
- اخر مره اجيت هي وياي جبتها شايلها على كتفي دخلت للحضرة بنتي وياي شــام ، ومن راحت بعد ما اجيت .
لزمت أيده باثنين ايدي باوعت لعيونه
- هجــام
- تعبان وحك عيــونج انا تعب الدنيا كلها بكلبي
فتحت كف ايده ولزمت اصابعه اعد
- ادخل زور وصلي وعد اليوجعنج والمتعباتك وحده وحده اشكي وانتَ على السجادة أقسم على الله بأبا الحسن.
زفر نفس هز راسه اي
-اني هم راح ادخل ازور واطلع انتظرك هنا باوع حتى تنام شويه ترتاح ونرجع البيتنا .
- يله روحـــي ادخلي
عفته ودخل أزور يابه من وصلت للضريح دموعي بلا وعي ينزلن والساني يلهج أقسم عليك بأمير المؤمنين يا الله أقسم عليك بعلي واولاده يا الله . ساعدني يا رب ساعدني .
صليت براحة ، هم شكده نزاح من گـــلبي ، ما طولت بسرعة طلعت خاف هجــام يطلع وما يلكاني كعدت لافة نفسي بالعباية مره اباوع للباب والقبة ومره اباوع للناس الكاعده ، من بينهم اكو حجي التعب مبين بملامحه على رأسه چفية خضرة لحيته وشعره ابيض عيونه بلون الماي يباوع للقبة وايده جوه خده عتب بعيونه ورغم كل التعب المبين عليه وجهه مريح بشكل فضيع .
طلع هجــام يدور يتلفت لمح الحجي وركز نظرتة عليه وبعدين رجع يدورني الحد ما لمحني وتأكد من وجودي ما اجه راح بخطوات هادئة كعد يم الحجي حجه وياه شوية وكام اجه يمي .
- تقبل الله.
هز راسه ساكت كعد
- تمدد شوية ترتاح حتى نروح .
- ما يقبلون .
- لا ما يحجون شوف ذاك الرجال وذاك صار شكد نايمين محد حاجاهم .
تمدد وهو يهمس
- لا تباوعيلهم .
سكتت متمدد كدامي ظهرة عليَ
درت عيوني اباوع للحضرة وفززني من كال
- شومة
- ها عمــري يمك .
- انا وياج ما اعوفج محد يذلج وانا عايش وحتى لو متت محد يذلج شامي .
- بس لا تجيب طاري الموت واني بخير .
سكت مغمض عينه أيده جوا راسه لزمت اصابعه فتح عينه .
- هجــام مو تضوج مني لان غشيتك وجبتك اني والله علمودك سويت هيج .
عصر أصابعي قوي بأيده همس وهو مغمض
- لا .
عفته ينام ساعة وفز واني احجي ويا رويــده سديت التليفون منه
- كومي نروح .
- رجليك زينات ؟
هز راسه اي كمت وياه طلعنا بس صعد بالسيارة قبل ما يحرك ربط تليفونه ويدور بالقصائد شغل نفس المقطع اليحبه حرك السيارة وهو يردد بصوت هادئ وياه
- جرح شوكي
غميج وما وكف نزفة
ليالي الظيم باكن بسمة الشفة.
وسنيني الگضت بالحسرة واللهفة .
لچن بعده الأمل بالروح ما يخفه
خلصت وانعادت من وحدها وعلى طول الطريق نفس المقطع ، نمت بالسيارة وفززني. يلف بالعبايه عليَ فتحت عيني اباوعله ابتسمت متذكرة اول مره لزمني بيها بهالطريقة ، جنت مضروبه ومتكسرة والطريق مطر .
عدل حجابي يباوع الابتسامتي ساكت رجع المكانة وكمل طريقه وكفنا يم السيطرة سألوه.
- ليش وكفت هناك ؟
عصر ايده قوي لزمتها بسرعة يباوعلهم بخزر كاله
- أمور عائلية .
جندي ثاني دك على بنيد السيارة وهو يكله
- توكل حبيبي.
داس بانزين بقوة وطلع من يمهم يسب
- اعصابك.
خفف وكمل بهدوء وصلنا البيتنا دخل السيارة للكراج ونزلت غسل ايديه ووجهه يله دخل للبيت افاطم بالمطبخ تلف كبه باوعلها مسح وجهه
هجــام :: ترف وين .
- بالصالة كدامك .
راح للصالة بسرعة باوعتلي افاطم تسأل
-شبيه .
- مابيه شي ، شنو غزولة اجت ؟
- اي هذيج نايمه خطيه اليوم شصاير بيها ؟
- شبيها ؟
- طردت حيــادر تكله ريحتك مال مستشفى وخر مني وهو الولد والله دخل للكراج اني بالمطبخ شميت عطره .بس هي متنرفزة ومدري شبيها روحها بخشمها .
- هرمونات الحمل
فتت ورا هجــام للصالة مخلي ترف على صدره مغمض عينه حاضنها ايده على راسها ويحركها على صدره بهدوء باوعت الغزل نايمه على القنفة فاكه حلكها
تنحست ترف على صدر ابوها خلاها على ايديه يهمس بصوت ناصي
- ها بابا ها حبيبتي .
ويبوس بيها بخدودها ضم وجهه يم ركبتها شماها بشوغة عدل شعرها الي لا هو اسود ولا هو اشگر صغير هستوه ينزل على كصتها
رجعها لفراشها وباوع الغزل تقرب بهدوء كدام القنفة رفع أيده وخر كذلتها من وجها تلمس خدها حركت وجها همس
- غزولة بابا.
فتحت عينها بفزه وبس لمحته رأسًا حضنته حضنها يهمس
- شبيج غزوله ، ليش وجهج أصفر.
ابتعدت منه لزمت وجهه بين ايديها
- انتَ زين ؟
هز راسه اي اتلفت يباوع ورجع كالها
- حيــادر وين .
- راح عنده شغل .
- شو ضايجة ووجهج اصفر شنو محاجيج؟
- لا والله ، بس تعبانه لان حامل ، ودوام وبيت .
- وحيادر شنو ما يساعدج شنو شغله ها شنو شغله هو؟
- لا لا والله يساعدني يكنس ويخبز لا مايخبز
- ها ومنو اليخبز ؟ انتِ تخبزين شنو انتِ تخبزين فوك ما حامل؟
- لا مو اني لا ، ابو المخبز ، يعني نجيب من المخبز .
مسح وجهه متنرفز رجع باوعلها
- رحتي للدكتورة ؟
- لا بعد مو هسه .
سكت هادئ تحمحم وكالها
- لا تتعبين روحج اذا تردين أبقي هنا يم البنات واجيب رويــده بين ما تولدين .
سكتت غــزل تباوعلي محتارة
- هجــام عمــري روح اسبح حتى ترتاح .
هز راسه موافق وصعد دك تليفوني نعلعله عليج رويــده بس اوكفي خلي ابوس بنتي واشوفها ، نطيت التليفون الغزل جاوبتها اخذت ترف ابوسها يمه اشتاقيت يعيون امج .
مدتلي التليفون غــزل كالت
- تريدج .
- ها رويــده .
- وحمس ما تجاوبين شليتي گـــلبي .
- شبيج ولج؟
- بشريني ؟
- ما ادري ما ينحزر الحد الان هو زين صعد يسبح وينام
- شــام لا تعوفينه وحده راح يرجعهن حدث حدث بعقلة .
بعدها تحجي وفزيت على صوت التكسير سديت التليفون وصعدت أركض فتحت الباب رفع أيده بوجهي يتنفس بقوة ويهمس
- مابيه شي مابيه ما أكسر.
حجه وضرب الميز ركضت لزمت ايده وحضنته احجي بسرعة
- هجــام عبرت هالمرحله لا تضعف وترجع لا تضعف. .
سند راسه على كتفي يهمس
- لا تعوفيني .
ابتعدت ولزمت وجها بين ايدي
- ما اعوفك تعال ، تنام ؟
هز راسه لا وباوعلي مسح عيونه
- أريد أسبح .
هزيت راسي موافقة اخذت ملابس ومنشفة طلعت للحمام علكتهم والتفتت عليه فازه من دخل للحمام وسد الباب ميل راسه على جهه
- احم راح أنتظرك بالغرفة .
إبتعد على جهه طلعت للغرفة لميت المكسرة خلصت خلصت ما بقى بيها شي ، عدلت الفراش ونزلت بسرعة دخلت للمطبخ
- فطوم الكبه كملت ؟
- سويتها مرگة صفرة بعدلها شويه
- شنو تغديتوا ما باقي شي اسوي الهجام ؟
- حيــادر جاب معلاك الغزل بوكي منه .
- اي والله خوش فكرة
، كصصت من الكبده سويت شيش. ورتبتله صينية صعدت لكيته بالغرفة متمدد سد خشمه
- ما اريد. شــام
- مو انتَ ما متغدي .
- ما اريد وديها وتعالي .
نزلت رجعت الصينية وصعدت يمه نايم ولام رجليه الصدره تقربت غطيته عدل سحبت الكرسي كعدت قريب عليه رفعت ايدي الوجهه عدلت حواجبة
- هجــام ، اني اسفة اذا اذيتك.
لزم أيدي وسحبها لشفته
- لا آنا الأسف جاي اخليج بمواقف صعبة وبكل جهدج تحاولين تعالجيني .
باس ايدي وفتح عينه يباوعلي
- اعشگج شومه .
- مو گدي .
تحسر خله ايدي جوه خده ويحرك ابهامه عليها شوي شوي دموعه ينزلن على ايدي
- ما اكدر انسه شــام .
- لا تنسه اتقبل
- اتقبل انا الكاتل بنتي ؟
- اتقبل انُ انتَ مو مذنب هذا قدر
سكت فترة ورجع كال
- ما اريد اظلم ترف وانتَ شــام انا حيل ظالمج بس احبنج باوعي لا تملين مني انا وروح الطفت روحـــي بغيابها اعشگج بس انتِ بس انتِ .
تقربت ابوس شعره
- ما امل منك وما ظالمني هجــام هُجــاامِ حبيبي روحـــي انتَ
سحبني من ايدي يريد اتمدد يمه صعدت تمددت حضني ضام وجهه بصدري الحد ماغفى سحبت نفسي بالكوه عفته ونزلت .
رويــده :: ولا اكدر انسه وما افكر بهجام لحظة ، حسيت تعبـــت نفسيا من القلق والتوتر العايشته التفتت على تليفوني ابتسمت من شفته يُســر
- الو
- احبج .
- هههه ، ها شيخ .
- روح الشيخ .
- شلونك حبيبي.
- الحمدلله يا بعد روحـــي ، رودي عمــري لا تسوين شي نطلع نتعشى برا .
- ها ،جا موسى راح للجم ، جاي اتبله صدر دجاج .
- اي عوفي هو من يجي يكمله يعرف .
- يله خلي اشوف هذا اجه .
سديت التليفون ودخل موسى اعصاب وعركان شمر الجنطة بالكاع بعصبية وصيح بوجهي
- من باجر اطلكها من باجر وانعل ابو اليريدها خرب اذا باوعتلها بعد خرب روحـــي
- شكو شكو شبيك موسى.
دفر الباب صاير نار صعد الغرفتة واني مصدومة شبيه جريت التليفون إتصلت على افاطم ردت بصوت مخنوك
- افاطم شصاير ؟
- ماكو شي ؟
- شحاجيه ويا موسى صاير نار .
سكتت سدت التليفون بوجهي ودزتلي سكرينات فتحتهن أقرأ كاتبلها
- شعجب شلتي الحضر ، افاطم احترمي شوية ولا تحضرين .
- اخذت قرار موسى
- شنو هالقرار ، من هسه اذا يغث لا تحجينه أساسًا انا متعارك ومغثوث ها وراسب بالامتحان هم يعني لا تزيدينها .
- موسى ، طلكني .
متصل عليها ما مجاوبته كاتبلها
- جاوبي
- نحجي رسائل احسن .
- شبيج شنو هالكلام احنا مو اتفقنا ؟
- لا اني ما اريد لا احجي وياك ولا يربطني شي بيك ، اريد ابقى اربي ترف .
- انعل ابو ترف خوش ؟ لا تخليني اكل نعل متفقين نبقى شهرين قريبين وبعدها كلمن يولي بدربه لا تضلين تمسلتين .
- انتَ انسان مو محترم وتطلب من المقابل يحترمك .
- افاطم وربج والخلقج حلكج افركه فرك حجي زايد لا تحجين .
- طلكني وولي يله .
- أتمنى من الله بيني وبينج عقد محكمه جان سحلتج سحل لبيت الطاعة .
ما راده عليه ورا دقايق راجع كاتبلها
- افاطم لا تستفزيني ، تأمليني بشي وتاخذينه مني جاي تدمريني ترا ، نطيتي كلمة خليج كدها .
- ما استفزك ، اخذت قرار واجيت باحترام نطيتك قراري انتَ تتجاوز ، احمد ربك ساكتتلك الهسه
- تمام انتِ محترمة وانا ساقط ومهتلف ، ومكسر وابو بنات وكل الخايسات بيه خوش؟ هيج ترضين مو ؟ تحمليني شهرين وراها عود اطلكج .
- ما اريد أصلًا راح اكول الهجام اويد اتطلك .
راجع متصل عليها وهي ما مجاوبت مره ومرتين وعشرة رجع كتبلها
- أفاطم حظج اطيحة لا تلعبين وياي لو مو هجــام ما اطلك .
- تطلك .
- لا تجربين ، السجينه على ركبتي وما طلكت شتردين يسوي هسه ؟
- هو يعرف شلون يخليك تطلك وعوفني. شوف حياتك .
ساكت راجعه ورا دقايق دازتله .
- احب ولد صاحب هجــام راح اتزوجة .
وهو متصل كم مره وما راده عليه ترفضه راجع كاتبلها .
- اذا ما ***** ما اتسمى موسى.
وهي غالطة وسابته صعدت فوك دكيت باب غرفته صاح بعصبية
- ادخلي .
باوعلي اعصاب وميت قهر .
- ليش هيج تحجي وياها ؟ هذا اسلوب موسى ؟
- انا حيوان ساقط هذا اسلوبي خوش ؟ خلي تنلصم لمدة شهرين كتلها شهرين اذا ما رادت اعوفها واسافر اهج بس هي حيوانة .
- افاطم مو حيوانة ، بس تحبك وخايفه من مشاعرها خايفة تحس بيها خايفة حتى من نفسها انُ تكتشف نفسها تحبك هذا مو اسلوب تكسبها بيه بالعكس بهذا اسلوبك تبعدها عنك .
راح للكنتور يحجي
- اريد ابدل رويــده .
طلعت وعفته نزلت جوا ، شوي ونزل مبدل اخذ سويج السيارة وطلع ، احتاريت بينهم ما اريد الح على افاطم عزلت ورتبت الحد ما اجه يُســر كاعده بالصالة مشغله قرآن ويا صلاة المغرب ودخل هو مبتسم وفتحلي ايدهً مشيت الحضنة بخطوات هادئة حضني حيل
- خوما ضجتي وحدج ؟
نزلت من حضنه عبرت ايدي احضن ركبته
- لا ما ضجت التهيت بالبيت .
غمض عيونه ويا حركت ايدي على ركبته سحبت أيدي بتعدت جنه شومة بس يلزمها هجــام تتسرسح ، يُســر بس الزم ركبته يطيح بأيدي.
- يله روح اسبح وصلي .
- شنو اخبار هجــام هم خابرتيهم .
- اي كل شوي احاجيهم نايم هسه ، وصيت ام ترف بس يكعد تنطيني خبر حتى اتصل احاجيه .
هز راسه موافق باس خدي وصعد فوك ، اتصلت على موسى بس ردت يجاوب ويكلي هو وين حتى من يُســر يسأل اكله بكذا مكان ، لان يتخبل اذا يطلع بلا ما يكول وين رايح .
ما رد حيرني صعدت بدلت وعيني على التليفون بلكي يتصل ماكو
، طلع يُســر من الحمام وكف كدامي بس بالمنشفة
- اريد اعترفلج بشي رويــده .
- ها
وكفت كدامه
- لا تكول جنت احب ومن شفتج نسيت كل البنات .
- هههه لا انت شفتج وبعد ما شفت غيرج ، ماكو لا قبلج ولا بعدج ، عيوني ماشافن بنيه غيرج .
- اعترف الله يستر من اعترافاتك ما مرتاحتلك .
- احم .
- دخيلك يا علي .
- انطي صبر .
- انطق شكيت گـــلبي .
- احم احم .
- دخيلك يا محمد .
- اسكتي شويه
- احجي يابه صار نص الليل وانتَ بعدك .
- احم احم احم .
- صارن ثلاثة ما بقى شي ونوصل للعشرة .
- مو تخجلين اذا احجي .
- ها يُســر ها شعندك ؟
- شوفي انا هسه مو بس بالمنشفة .
- اي شنو يعني .
- انا مره مسبحج .
- شنو .
ضحك ودنك. عاض شفته واني وجهي صار نار
- شنو شوفيني بالمنشفة شنو مسبحج شبيك يُســر شارب ؟
راحت ابتسامته وبينت بوجهه ملامح الزعل ، راح للكنتور طلعله ملابس وحجة بهدوء
- بدلي يله خلي نروح .
- شنو زعلت ؟ ترا ما قصدي شي هو الشخص الما افهمه اكله شارب هيج تطلع بلا قصد .
وهو ساكت درت وجهي منه لبس ووكف يمشط ويخلي عطر طلعتلي ملابس هي مال زعل هسه ، عفته براحته رحت لورا البرده البس هستوني نزلت القميص ونرفعت من عندي البرده رفعت راسي بفزة تقرب
- شبيك ؟
- بوسيني حتى انسه الزعل .
- وخر يُســر وخر والقرآن انتَ تدور زعل وهيج بلا سبب شنو تدير وجهك ووتزعل شنو هالدلال هذا .
- حقج هسه زعلتي انتِ؟
- اي وخر
دفعته من صدرة لزم ايدي وسحبني عليه بسرعة لزم وجهي يبوسني
ويسحل بيه للفراش افلت نفسي احجي ويرجعني
- العشاء يُســر العشاء
وهو ما مهتم يرجع يجرني عليه ويبوسني واني افلت نفسي
- جا والعشاء
دفعته حيل
- شبيك يُســر ماشايف .
- غيرج ما شايف .
بقى متمدد يباوعلي كملت ولبست حجابي
- ياما وياما تمنيت تضمين راسي برگبتج جوا حجابج .
- هاي عود ما تدوس الحرام وما مباوعلي .
- وياما وياما تمنيت اتوسد حضنج من اتعب .
- احااا.
- احااات .
- هسه انزل اسوي عشاء لو نروح .
كام من الفراش وهو يضحك رجع رتب شعره لبست العباية ووكفت مبتسمه عيونه تضحك من يباوع كال
- موسى وين ؟
- يمكن ويا اصدقائة
- يمكن ؟
سكتت وهو سحب التليفون اتصل عليه وعافه كدامه على الميز فاتح السماعة الخارجية رد موسى
- ها يُســر ؟
- وين انتَ حبيبي ؟
- طالع ويا الولد
- اها ؟ مو عندك امتحانات .
- اي هسه نص ساعة وارجع .
- تمام .
سد التليفون مد أيده الي لزمتها ونزلنا سوا راح يطلع السيارة اتصلت على شــام
-بشري شــام ؟
- زين لا يضل بالج
- كعد بعده؟
- لا بعده نايم ، هسه راح اكعده .
- باوعي اني يُســر عازمني على عشاء ما اكدر اكله لا ما اروح واضوجه ، بس عفيه بالي يم هجــام حتى لو تطمنيني برسالة راح افتح نت .
- اي اي روحـــي معليج والله .
سديت التليفون وطلعت اليسر حتى هو باله يم هجــام لان حجيتله الصار رأسًا سألني
- ها حاجيتي هجــام ؟
- لا بعده نايم .
- الخميس العصر ارجع من الدوام ونروحلهم نبات يمهم .
- اي عفيه حتى لو انتَ ترجع وتجي تاخذني السبت .
- ليش ارجع شو ما ترديني .
- ههههههه اخاف عليك من هجــام ، ما يشوفك يمي .
- هو انا اريد اروح احرك كلبه شكد شلع گـــلبي قبل ااخ ما انساهن يخلي الساطور على رگبتي ويكلي كلها اختي ، لوهاي مره لزمني بالسيارة قفلها ورفع الساطور گال
- راح اسألك ثلاثة اسئلة اذا تجذب اوديلك ليفوك اخليك تقابلة باقل الساعة
كتله
- اقابل منو ؟
كال
- تصلي ومسوي روحك متدين وما تعرف تقابل منو ، المهم خليني اكمل واذا انتَ بيك خير جذب
كتله
-نزل الساطور وسولف احنه اخوة
- اول سؤال اختي الچبيرة شسمها ؟ اذا انتَ زلمه كول أسمها.
وانا لزمتني السكته لا هو صاحي واناقشة لا هو ينغش واكله ما اعرفه دخنتلي جكارة اخذتلي صفنة وهو منتظرني رجعت باوعتله كتله
- ياهي منهن قصدك ؟
- الجبيرة الجبيرة اختي .
مديت أيدي على الباب ردت افتحه وافلت بريشي كضني من ايدي ومد الساطور كال
- جاوب .
- رويــده أسمها اعرفه من الطفولة .
- شعندك ويا رويــده ؟
- حتى ما مباوعلها .
وجيب اليحلها لزمني نص ساعة تهديد وتحقيق الله يحبني ودزلنا المرور حسبالهم جاي نتعارك ، طلعنا من يمهم كال هذا سوالف بسيطة مرة الثانية امشي الساطور على زردومك لو لحتك مباوعلها .
- يمه عمــري فدوه ارح لغيرته سوده عليَ.
- انا اشرحلها معاناتي والحرب الجنت ادخللها بكل مره التقي بهجام وهي تتغزل بيه وانا رويــده وانا ؟
- ههههه
لزمت ايده بين ايدي
- انتَ حبيبي وروحي البطل الجنت احتمي بيه واطلب من عنده اي شي أريده الينضرب من ابوه والسبب اني .
- والمسبحج .
- شجلبت شنو مسبحني
- والله مسبحج
حجاها وضحك دفعت ايده من عندي
- يُســر شقصدك شوكت ؟
- انا ناسي الموضوع والله بس من شفت الصور تذكرته ، مره بمكن عمرج خمسة سنوات واجيتوا يمنا امي وامج راحن للسوك وكالن ديربالك عليها مو تخليها تطلع بالشارع ، انا طلعت بالباب يم اصدقائي وانتِ وياي تلعبين بالباب ، مدري شلون غفلت عنج وطحتي بماي المجاري
-ياااا
- والله وانا اجيت أركض اخذتج للبيت كلت هسه تجي امي وتلكاني ماداير بالي عليها شيخلصني من السانها ونوب نقهرت عليج انتِ تبجين دخلتج للحمام سبحتج جلفتج جلف ليفتج وغسلت شعرج بشامبو
- عزا يُســر اسكت .
- شبيج جاي احجيلج ذكرياتنه .
- ذكريات بماي المجاري اسكت يمعود .
- اسمعي اسمعي ولفيتج بالمنشفة وطلعتج ردت اكتلج وقتها لان تعبـــت بس تدرين والله اتذكر من لزمت ملابسج بقيتي تصيحين عب عب نطيتج لبستي ونوب انا لبستج فالينه جان عندج كرش
- جذب يُســر جذب هذا مشهد مصور مو ذكريات .
- والله العظيم ما مجذب بحرف اسمعي ، ومشطت شعرج ورشيتلج من عطري عود ردت اضم الجريمه نسيت ملابسج بالحمام من اجن وشافنج امشط شعرج مسويلج كرن صاعد وكرن نازل
- كرن يُســر كرن ؟؟ شوف الرومانسية خرب حضي خرب .
- ولج هسه فهمت طلعت الكرون وراثة بينج وبين هجــام ، اسمعي رأسًا كالن منو مسبح رويــده كتلهن انا شميت بيها ريحة مو حلوه وسبحتها ، يمكن كتلهن هيج ما اتذكر بالضبط بس المغزى هيج جان ، هنه ضحكن امي جانت تصور تموت على الذكريات شلتج وصورتنا سوا نوب دخلن للحمام. وتذكرت الملابس عفتج وطفرت ، يمكن وقتها نكتلتي وحدج .
- يُســر اطم روحـــي على ذكرياك اطم روحـــي .
- ههههههههه شبيج أحلى ذكره غير فرحت من تذكرتها نوب شكد عدنا صور سوا .وانتِ كله مسويه شعرج كرون كرن منا وكرن منا .
باوعتله أضحك هسه هم سالفة هاي ، هستونا دخلنا للمطعم وطلبنا اكل دك تليفون يُســر ضحك من شافة موسى كال خلي اكله يجي
فتح السماعة ونصاها مقرب التليفون عليَ ومبتسم كاله
- الو
- الو السلام عليكم ، انا علي صديق موسى
باوعت اليسر فك عينه بصدمه سحب التليفون وحجة ويا الولد فتح عينه كلها وكف دفع الحساب وطلع بسرعة واني وياه صعد بالسياره
- شكو يُســر شكو
- اذا ما موته اذا ما كطعت الحزام عليه
- شبيك حاجيني گـــلبي . وكف شبيه موسى.
- بالمستشفى مختنك بالمستشفى.
اباوعله طاير بين السيارات فرفح بين ما وصلنا للمستشفى هو ماباقي بيه حيل ، فتنا للردهه اباوع الموسسى مخليلة اوكسجين واصدقائة يمه من دخلنا طلعوا ، يُســر تقرب كعد يمه جر نفس بحسرة رفع شعر موسى من كصته ويحجي بخنك
- ليش توجع گـــلبي عليك .
باسه براسه وكام من يمه راح للدكتور وطلع جاب علاج واجه بين ما صحى موسى حاجاه يُســر بثگل خازرة
- حيوان اذا ما طيحت حظك .
وموسى ساكت اخذ اغراضة وكومه متحلف بيه جر سويج السيارة من ايده واخذ المحفظة طلعنا من المستشفى اصدقاء موسى منتظرين بالباب شمرلهم السويج يُســر كالهم
- وصلولي السيارة للبيت بلا امر عليكم .
واخذ موسى لازمه من زنده صعده بالسيارة صعدت ليورا وحرك اعصاب وروحه طالعة موسى سند راسه على الجامه ساكت ويسر يرزل بيه متحلف .
الحد ما وصلنا للبيت موسى نزل بسرعة راد يصعد الغرفته ويسر قفل السيارة ولحكه صحت وراه
- يُســر عوفه
وهو ما اهتم راح بسرعة موسى هستوه يصعد الدرج جره من ايده وضربه راشدي بقوة صحت فازه
- لا يُســر
وهذا تخبل
- كم مره توبتك من الجكاير ولك حيوان مو مريض مريض تريد تموت
وموسى يباوعله ساكت ويسر يزيد ما ينقص لان موسى ساكت وما يرد عليه دفعته من صدره بس اريد اكدر الزمه
يُســر :: حاجيني حاجيني انتَ ما تفهم من تطيح بمكان محد يمك محد يمك ويجيبونك جنازه شسوي ها شسوي شعندي انا شعندي العشرة هو بس هالواحد بس انتَ يا حيوان بس انتَ
رويــده :: كافي يُســر .
كعد على القنفة يرجف وموسى صعد الغرفتة بهدوء وبلا ما يحجي
- ليش تضربه شنو طفل كدامك ؟
- عوفيني بروح امج عوفيني
جرباكيت الجكاير من الميز جريته من ايده متنرفزه
- حلال عليك وحرام عليه ؟
مسح وجهه بعصبية ورفع ايده عود يشرحلي
- افهموني افهموا مريض يختنك يوصل الموت رويــده ممكن جكارة تخسره حياته .
- بدل ما تضربه وتكسر بنفسيته اكعد وياه واسأل شبيك خويه شنو المتعبك ومخليك تطفي حزنك بجكارة وتضر صحتك ، مو تجي تضربه وفوكاها كدامي كسرت نفسيته آثرت عليه ترا بهاي التصرفات تدمره
دنك ساكت ويهز رجله يرجف
- يُســر موسى هواي يحترمك ما يرفع عينه بعينك ومن تضربه كلمة ما يحجي بس هالشي ما يعني هو ما متأذي وعادي عنده بالعكس طول عمره ما راح ينساهن ويبقن كاسرات بخاطرة.
وكف بعصبية طلع من البيت راح للحديقة صعدت بدلت ورحت الموسى متمدد ومتغطي مسح عيونه بس دخلت تقربت كعدت على طرف الجرباية
- شلون صرت .
زفر نفس متحسر
- زين .
- لا تنقهر ، والله من خوفة عليك لو تشوف شصار بحاله من خابروه حار شلون يوصل
هز راسه اي
- اسويلك عشاء
- لا شكرًا.
- موسى شبيك شنو القاهرك .
باوعلي بقهر مختنك متنرفز وحجة بغصة
- كل مره يمد أيده عليَ افهم يخاف عليَ افهم يحبني وعنده انا بالدنيا كلها بس يوجع روحـــي من يضربني مو صغير انا رويــده مو صغير
- اعرف وحقك شنو تحجي حقك بس والله يا موسى والقران هسه يتندم ويموت من القهر ساعة عصبية وحركت گلب
سكت ينافخ الغصة تصعد وتنزل ببلعومه
- موسى ، حاجيني شنو القاهرك سولفلي .
باوع الوجهي يرجف نزلت دمعه من عينه ومسحها بسرعة متنرفز يحجي مخنوك
- شبيه انا رويــده شبيه وما اعجبها .
دار وجهه صوته يرجف
- مابيك شي وهي متأكدة منها تحبك بس والله تخاف تخاف من التعلق تخاف تتعلق بيك اكثر وتخسرك .
- تخاف ؟ وين مولي انا وتخسرني . لج ذلتني ذلتني ا اجيتها بكل الطرق وياها شنو التريده بس انطي مجال ماكو قافلة ، هاي هي والله وروح امي لو تصير نفس من جكارة ما اخابرها بعد .
التفتت على فتحة الباب باوعله يُســر وكفت فتت من يمه
- ادخل احجي وياه بهدوء
عفتهم وطلعت إتصلت على شــام
- هلو شومه ها طمنيني شلونه هجــام
- احم احم زين زين .
- يمه والقرآن جذابة يمه شبيه ها شــام ها حاجيني .
- رويــده مصخن هسه انطيته علاج هسه تنزل حرارته
شــام :: اخذت الكمادات وصعدت والتليفون على اذني شيقنعها بعد سديته منها ودخلت يمه سويتله كمادات فتح عينه باوعلي لزم أيدي سحبها الركبته .
- شومه .
- ها حبيبي ها عمــري
- اموتن عليج .
ورجع غمض ، دفع ايدي من راسه وحجه بصوت تعبان يجر الكلمة جر
- وخريها بارده
- ميخالف لازم تنزل حرارتك .
- بوسيني وأصير زين انتِ ايدج خليها على وجهي أطيب.
رفع أيدي يخليها على كصته وخدوده وشفايفه وركبته وصدرة ويهمس
- شفتي راحت ما مصخن بعد .
سحبت ايدي من عنده رجعت اسوي كمادات كوه ساكت ورويده تتصل كل شوي سويته صامت كل ما تتصل يفز. دزيتلها رسالة صار زين .
شوي وفز باوعلي. جر الكمادات من ايدي شمرهن على الميز .
- روحـــي ارتاحي تعبتي
تلمست وجهه
- راحتي يمك .
رفع عينه العيني بلع ريك وهمس بصوت مخنوك
- تمنيت ما مصخن حتى المج بحضني .
رفعت الغطاء منه وتمددت وياه
- شــام تتمرضين .
رفع راسه خلاه على صدري وحضني بقوة
- شومة
- هممم
- روحـــي احسها باطراف اصابعج .
زفرت نفس وحضنته احرك حنكي على راسه
- أحبك هواي .
- جنت دائمًا اكول جنها طيرة اشافت بيه وحبتني هم مجنــون هم قاتل شنو العجبها بيه .
- جنونك العاقل .
- مجنــون انا
- يمي عاقل
- قاتل
- بنظري بريئ .
- مؤذي
- اشوفك امان .
- اااخ ، خل اشمج من .
رفع راسه الركبتي باسني وشمها نوب تلمسها كال
- شــام مره كلت ركبتها مال كصب .
- ها هجــام ارجع اسوي كمادات آثرت الصخونة .
حضني حيل فد طولت خلك وياه مدري يضحك عليَ مدري صدك يهلوس ينام ينام ويفز مره يكلي
- يُســر ساقط حط عيونه على رويــده وتزوجها الا اشلعهن .
- اي يله نام .
- شــام ترا صاحي انا صاحي مابيه شي بس جاي اسولفلج .
- ادري حبيبي.
- اي وحيادر البكده شبعوا ماي ورد انا ليش نطيته غزوله شبيه نطيتها اله .
- من تكعد روح جيبها .
- هي مو هنا ؟
- لا اجه اخذها
سكت شوية وكال
- ترف وين .
- يم افاطم ، اني عايفتها اليوم ملتهيه بابوها
زفر نفس بحسرة وحجه بصوت مخنوك
- تتوقعين يجي يوم واكدر اخذها واطلعها بلا ما اخاف شــام يجي يوم واحضن بنتي الگلبي بلا خوف ، يجي يوم وما ابتعد عنج وعنها لان خايف يصيرلكم شي بسببي انا والله جاي اتعذب شــام اتعذب ببعدي عنكم
- اشش يا روحـــي ، يجي هاليوم وقريب كلش قريب هسه تستمر ويا الدكتور وانتَ تساعد نفسك بالتغلب على خوفك تتذكر من صار الحادث شلون بسرعة دفعتنا حتى تحمينا ورأسًا كمت النا تركض ما نشلن رجليك ، لان جازفت ما فكرت برجليك نشلن ، تدري لو مباوع لرجليك وبس خاطرات ببالك تلقائيًا ما راح تكدر تمشي عليهن. هجــام لازم ما تفكر بمخاوفك عيش اللحظة بلحظتها لا تفكر بسلبية.
- ما اكدر انتِ ما اجي يمج لسبب ، وترف اتگطع عليها اتگطع
وبس الزمها اتخيل تطيح من أيدي اتخيل
- اشش هجــام ما يصير شي خلي نتفق بعد ما تفكر هيج ومن تحس هالموضوع يخطر على بالك تحدى نفسك تجاهل شعور الخوف وحاربه احضن ترف اكثر اضحك شاقيها .
- بس ابقي وياي انتِ انتِ تعالجيني على أيدج. انا مو كتلج متهدم وانتِ تبنيني .
- وياك وياك الاخر نفس .
رجع نام الصخونة ما فكته ، ابتعدت عنه رجعت اسويله كمادات الحد نص الليل نزلت بس شفت ترف ورجعت صعدت يمه غفيت بلا ما احس فزيت على فتحة الباب واشوف رويــده كدامي عيونها حمر ودموعها على خدها بس شافتني حجت بصوت مخنوك
- ليش ما تردون شــام ليش وكفتي گـــلبي ما بقى حيل بيه
وكفت فازة وهي تقربت كعدت يم هجــام وتتلمس بوجهه
- عززا والله سويته صامت ونسيت
- موتوني والقران گـــلبي وكف اتصل عليج ما تردين وافاطم ما ترد وهجام مغلق إتصل على غــزل ما ترد أتصل على حيــادر كال انا بالمستشفى غزولة هابط ضغطها .
تحجي ودموعها على خدها وايدها ترجف فز هجــام شهك بفزه ابتسم وحضنها حيل
- رويــده .
- يا عيون رويــده .
- شجابج .
- موسى جابني بعد تخبلت من ماجاوبتوني ، شبيك ؟
- مابيه شي انا وشام نسبح هواي وصخنت .
- هجــام مو وكت شقاك ليش ما رحت للمستشفى ؟
- عندي شومه ما احتاج مستشفى.
- شــام يحضي تعلمي اضربي ابر براسه دام ما يقبل يروح مستشفى .
شــام :: ولج كمادات شلع گـــلبي عليهن اني اخليهن وهو يشمرهن .
هجــام :: ما يفيدن بس نامت بحضني طبت .
رويــده :: كوم أسبح بعدك متأثر .
كعد على حيله كالها
- روميو ليش ما جابج هوا؟
- ماقبلوا ينطونه اجازه عود كال الخميس نجي سوا ونبات .
- خيولي المن يبات خيولي اكلج انتِ ليش ما تسوينها سبوع هناك وسبوع هنا شنو ؟ ماخذج فلاحة ملاچة بكيفه هو؟
ابتسمت رويــده ورفعت ايدها تمسح خدوده وكصته كالتله
- هسه انتَ تنطي شــام أسبوع ؟
- دقيقة ما انطيها.
- أسكت بعد
- ها رويــده شو متغيرة ؟
- يا ياا
- والله ، كومي روحـــي روحـــي بس تردين ترحين .
- وين اروح .
- لروميو ، بعد هجــام بيش الكيلو .
- هجــام صدك تحجي؟
- والله قهرتيني ترا !!
- اني اعوف الدنيا الخاطرك ، شنو التريده اتطلك ؟ هسه اخابره اكله طلكني وما اعوفك ولا دقيقة ، اكص گـــلبي واذبة اذا يفضل مخلوق عليك.
ابتسم هجــام كالها
- لا هاي هي حسبالي متغيرة .
جرته من ايده
- كوم كوم اسبح وانزل اريد تسويلي بيض عيون ابو الجبن
- مرتي ما تقبل .
شــام :: أقبل حبيبي أقبل.
اخذ ملابسه وراح جرتني رويــده من أيدي الحضنها .
- هههه شبيج ؟
ابتعدت مبتسمه نزلنا اني وياها جوه موسى نايم بالصالة وفاك حلكه غطته رويــده ودخلت الافاطم كعدتها ترزل بيها وهذيج بس ساكته
طلعنا للمطبخ سوتلنا سياح ونزل هجــام طكلنا بيض وراح كعد موسى بس لمح وجهه تعبان كعد كدامه يحاجي بجدية
- شبيك ؟
- مابيه شي
-يُســر محاجيك ، شو ضايج ؟
- لا يابه ماكو شي .
- محتاج شي ؟
- تسلم
جراه من ايده كاله
هجــام :: غــسل يله وتعال تريك .
راحت افاطم الترف من كعدت بدلتلها وجابتها كعدنا بالصالة نتريك هجــام عيونه لرويده مبتسم يتأملها ويباوعلي يغمز ، باوعت الافاطم تبوك نظرات وتباوع الموسى وهو ابد ما انطاها اهمية ولا التفت ولا باوعلها .
لورا الريوك ، بقت شوية رويــده وراحت الغزل مناك ورجعوا الكربلاء . هجــام طلع وافاطم ضايجة حتى ترف مالها خلكها اخذتها منها وصعدت فوك عفتها بالكريكوت ودخلت الغرفة هجــام
اخذت ملابسه وفرغتله خانة بغرفتي رتبتهن ونقلت كلشي يخصه
نامت ترف واني بقيت وحدي إتصلت على زينب كالت
- كملنا كلشي الأسبوع اليجي نسافر
- ما تسوين عرس هنا .
- لا طليقي مهدد زياد
- يا يا شيريد .
- يكله عوفها اريد ارجعها وزياد منخبل ضاربة وصايرة ملاطم ، عاد كتله اني ما اريد عرس اكلج شو هذا عصبي والله يخوف يمكن ابطل
- كعدي كعدي تبطل لعب هو
- عصبي عيني عصبي .
- شأكثر من هجــام خو شفتيه .
- لج شفته كاتب على رقم هجــام " ساطور الشر .
- خلي زوجج يحترم نفسه ويكتب على اسم زوجي ابو ترف
- ههههههه كتله والله يكلي حتى اسم بنته اخاف اذكرة هذا ما يتفاهم .
- ههههههههههه
- يكول مره كتله اختك بس نطقت كلمة اختك ما كملت شنو اريد اكول ربطني على السيارة بلا تفاهم يصيح شعندك ويا اختي وانا احلف يابه بس ردت اكلك اختك ، وهو يتخبل عاد كتله ، اقصد طليقتي تعتبر اختك تريد ارجعها ، وفشل وأعتذر
- يا والله فشلة شعجب زوجج ما يزعل من هجــام والله عندي فضول .
- سألته نفس السؤال كال لو افر الكون ما الكه صاحب مثله ، وهجام مخلص زياد من الموت .
- عزا شلون ؟
- ما حجالي تفاصيل بس زياد متورط بسالفة مره وهجام مخلصه ، لا مو مره مرات لان زياد كال انا اسوي مشاكل وهجام يحلها بساطورة
- اكلج اني راح اسمي زوجج فاطمه يعني من احاجيج بشي يخصه اكلج فاطمه لان هجــام ما يقبل الفظ اسمه .
- يخنك يا محمد يخنك .
- احب هيج خنكه معليج .
ضحكنا شوي وسديت المكالمة منها نزلت يم افاطم ما عجبتني بس صافنه والدمعة تلمع بعيونها كعدت يمها
- شبيج فطوم ؟
مسحت عيونها وباوعتلي ، بصوت يرجف همست
- انا والله مو قصدي اقهره شــام والله مو قصدي
سكتت وهي مسحت دموعها بعصبية تحجي بحرگة
- هو غبي يختنك ويدخن شنو ذنبي اني .
- هسه عليمن تبجين شبيج .
- غير هوا .
ودموعها عشرة عشرة وتمسحهن بسرعة كامت للمغسلة غسلت وجها ودخلت للغرفة افتريت بالبيت شوية بالي يمها بس هي من النوع الما تحجي حتى لو حاولت وياها رجعت صعدت فوك هجــام أتأخر حيل .
افاطم :: حجي رويــده حيل اذاني هيج اقنع نفسي متأذية من حجي رويــده مو من تجاهله الي ، شلت الحضر منه وين ورطت روحـــي وين ، كتبت
- شلون صرت ؟
ما رد عفت التليفون وتمددت عيوني يحركني ، انا گـــلبي تلوع مره تلوع والحد هسه ملچوم ما ناسية سالفة من سوالف رسول ،ما ناسية ضحكتة صوته شقاه ، لليوم گـــلبي ينزف ، شلون مر موسى على گـــلبي .
اختنكت نار صارت بصدري كمت طلعت للكراج كعدت ودموعي يلهبن على خدي
- رسول يا حبيبي يا روح اختك ، لو تدري شكد مشتاقتلك يا تعب عمــري وصبري .تعبـــت وياك تعبـــت وعفتني بلا ما تجازي تعبي مو كلت انا اكبر واحميج اكبر واشتريلج كلشي تحبينه وينك ها وينك .
مسحت دموعي بسرعة من نفتح باب الكراج دخل هجــام ما منتبهلي سد الباب وتقدم لمحني بقى واكف بمكانة ساكت درت وجهي ، كمل طريقة للمطبخ عاف العلاليك البأيده ورجع كعد ببعد مسافة عني
- افاطم .
درت عيني اله لو رسول عايش ما صارلي اخو مثل ما هجــام .
كال
- شبيج خوية ليش كاعده هنا ؟
- ما بيه شي شوي مختنكه .
- احد محاجيج ؟ موسى مضوجج؟
دنكت هزيت راسي لا كال
- شوفي ، انا كتلج كبل وارجع اكلج انتِ هنا البيت بيتج انا اخوج حالج حال رويــده وغزل ، اليمسج بورده امسه بدم ، ومن تردين شي كليلي خوش ؟
ساكته اباوعله كال
- تردين موسى ؟ رويــده كالت تريده ، بس ترا موسى ساقط
هزيت راسي اي على كلمة ساقط كال
- وابو بنات .
- اي
- بس هو احسن من روميو ابو الحلقات ، المهم اذا يضوجج كليلي واذا تردينه هم كليلي واذا تردين تتطلكين كولي ، وهسه كومي ادخلي للبيت لا تطلعين هيج وكت .
عافني ودخل دخلت اني هم قفلت الباب ورحت لفراشي لكيت رسالة من موسى كاتب
- بخير الله يخليج .
- موسى ليش تأذي نفسك ؟
- بالغلط صارت ، شكرًا على السؤال تصبحين على خير.
قريتها وسكتت ما رديت عليه بشي لحظات ونشر ستوري جنطة سفر على الجرباية مالته وبأيده جواز ، حسيت گـــلبي . نعصر عصر كتبت
-وين رايح ؟
ما رد مسحت دموعي وعضيت ايدي
- ليش تبجين ليش شعليج مو ما تردينه شعليج .
نار احس كل جسمي اراسله وما يرد اتصلت ارجف ودموعي على خدي
- الو
- وين رايح وين رايح ؟
- أفاطم ، شبيج ليش تبجين .
- وين رايح موسى وين رايح .
- مسافر .
- مو بكيفك .
- بس امسحي دموعج شبيج ليش تبجين .
- مو بكيفك تسافر مو بكيفك .
تحسر ساكت واني الوب ما أعرف شبيه وشسوي
- ما تروح موسى عفيه .
- اريد ارتاح .
شهكت مفرفح گـــلبي .
- هسه ليش البجي افاطم ليش شبيج .
- لا تروح عفيه .
- لازم اروح انا وياج أضداد افاطمي.
- اخوك خطيه ليش تعوفه .
- ما اعوفه يجون يزوروني .
- والكلية ؟
- اقدم هناك بالخارج .
ضميت وجهي بالمخده نار روحـــي نار
- أفاطم
- موسى گـــلبي يوجعني لا تروح .
- ليش كلبج يوجعج حاجيني ؟
- ما ادري والله ما ادري ما ادري ليش ، لا تروح عفيه .
- الله يريح كلبج تمنيت اشوفج قبل لا أسافر والحمد شفتج .
يله مع السلامة.
- لا موسى موسى خلي اكلك اوكف
- اسمعج .
موسى :: گـــلبي تفتت عليها بس ما عندي غير هالطريقة ، صوت بجيها مرد گـــلبي شهكتها وخنكتها بحروف الكلمة توجع روحـــي تهمس بصوت يرجف وتخنكها الغصة
- لا تعوفني انتَ هم .
حجتها وبجت تشهك
- مو انتِ ما ترديني افاطم انتِ كلتي عوفني
وهي بلا جواب تبجي
- شنو التردينه هسه حاجيني ؟
- لا تسافر .
- ما اكدر اشوفج .
- ليش كرهتني ليش ؟
- لا لا يا كرهتج هنيالي لو كارهج ، بس ما اكدر بعد ، اخذي راحتج افاطم .
حجت بصوت يرجف واشبهه بالهمس
- أحبك لا تروح .
غمضت عيني شسوت بگلبي كمت ما اسمع غير صوتها وكلمتها
- ما أروح يا روحـــي .
- احلف .
- وداعت عيــونج ، كومي غسلي ما اريد تبجين .
عافت التليفون وراحت طولت يله رجعت صوتها رايح من البجي
- ها افاطم .
- ها .
- نامي مبين تعبانه انتِ تصبحين على خير.
شــام :: انتظرت هجــام هواي ومن أتأخر نمت حسيت الباب نفتح بس نايمه مابيه حيل افتح عيني رجعت غفيت شوي وأحس بدفو على شفتي فزيت وما فتحت عيني يحاول يبوسني بلا ما يحسسني
تحركت وفتحت عيني أبتعد يباوعلي وعيونه على شفايفي كام وكف وطلع من الغرفة خرب خرب شكد عنودي ، كمت غسلت وجهي حتى اصحصح ودخلت ورا للغرفه فاتح الكنتور ويباوع
- شــام وين اغراضي
- بغرفتنا .
سكت حك شعره كال
- اريد ابدل .
-هاي ملابس محضرتلك .
أخذهن من الجرباية وراح للحمام تمددت على جربايته منتظرتة لبين ما طلع باوعلي وابتسم
- ردت اكعد ترف ومانطاني گـــلبي .
- لو مكعدها ابليك بيها والله انام واخليك محتار .
- هههه احلى حيرة .
شر المنشفه واجه للفراش حضني الصدرة
- هجــام .
- همم
- شنو جنت تسوي يمي بالغرفة .
سكت رفعت راسي من صدرة اباوعله مبتسمه كال
- شــام كولي أريدك تزين شاربك وفضيها .
ضحكت وتقربت اني الابوسه وهو ما صدك يبوسني بلهفة وحب إبتعد باوعتله بحيرة ما ادري وين يريد يوصل اني هم كمت من يمه رجعت يم ترف نمت ، والصبح اخذتها ونزلت افاطم مزاجها عدل اليوم اخذتها من ايدي تحير شتسوي بيها نظفت وتريكنا هستوني اريد اسوي غدا ونزل هجــام بأيده عبايتي وحجابي
- شكو هجــام
- روحـــي يم بيت حيــادر .
- شنو شكو؟
- البسي خلي اوديج .
- وين وين شبيك
احجي وهو يخلي بالحجاب على راسي دفعته من صدره
- شبيك .
- البسي جاي اكول .
- هسه غير اعرف شكو شكو ليش تحرك گـــلبي .
- ماكو شي اريد تروحين هناك
رجعت دفعته بقوة شايطة روحـــي وارجف
- وين اروح وين.
غمض عينه ساكت ترف بجت بايد افاطم فزت من صوتي العالي. شال العباية من الكاع
- اريد ترحين من يمي .
فكيت عيني بصدمة وهو يدور عيونه منا ومنا
- تتشاقة هجــام ؟
- البسي يله البسي ما عندي وقت .
- والله جذاب جاي تستفزني حتى اغلط عليك، عفيه بلا هالسالفة ترا مو شقة هذا .
باوع بعيوني وحجة بجدية واصرار
- فضيها كلت فضيها امشي تبقين يم بيت حيــادر
- ليش ليش حاجيني ليش .
- حتى ما تلعبين باغراضي بكيفج .
سكتت امسح بدموعي گـــلبي نار هزيت راسي موافقة وبايدي الترجف ثبتت حجابي ولبست عبايتي مديت ايدي اريد اخذ ترف وكف بوجهي
- لا ما تاخذينها .
فكيت عيني يصدمة ما مصدكة هذا هجــام بلعت ريك اهز راسي لا
- ما اطلع بدون بنتي .
سحبني من أيدي تخبلت ورأسًا عافني
- بنتي ما اعوفها ما اعوفها .
- بالليل اجيبها الج .
لطمت على وجهي روحـــي رايحه لزم ايدي وافاطم من وراه تهمس روحـــي يمي ترف يمي واني اشيط وافرفح
جراني للسيارة واحس باطرافي بردت مشيت بهدوء بس دموعي على خدي مصدومة وما مصدكة معقول هذا هجــام شنو يم بيت حيــادر شنو ما انطيج ترف شبيه ليش هيج .
طلعت افاطم بباب المطبخ وترف بأيدها عبالك حلم مو حقيقة اني عايفة بنتي وما ادري شنو الصاير شنو ، وصلني البيت حيــادر وغزل رأسًا فتحتلي الباب واني واكفه بمكاني اباوعله
هسه يستوعب ويكلي تعالي شنو جايبج هنا هسه يحس على نفسه بس كلشي تحطم من حرك السيارة وراح بجيت مفرفحة
دخلتني غــزل للبيت ما مصدكه احجيلهم واشكي گـــلبي يوجعني وهي وحيادر ساكتين أخذت تليفون غــزل إتصل على رويــده احجي وروحي رايحه وهي تجاوبني ببرود
- لا تبجين هسه ينحل كلشي عليمن تبجين
- ولج رويــده ولج شنو الينحل شمرني ببيت حيــادر واخذ ترف انتوا مستوعبين شسوا .
- اي هسه هسه احاجي واشوف بس لا تبجين .
سديته بوجها. ميته قهر برودهم حركني حرك كمت من يم حيــادر وغزل اريد ادخل للغرفة ركضت غــزل سابقتني لزمت الباب كالت
- هوسه هاي الغرفه تعالي نكعد هناك
مشيت وراها للاستقبال كعدت احجيلها وهي نزلن دموعها كالت
- خابرني كال شويه واجي اجيب ترف الامها ، لا تبجين شــام عفيه هالشي من صالحج .
- من صالحي يشمرني يمكم من صالحي غــزل ليش تخبلوني .
صاح عليها حيــادر وطلعت من يمي بجيت الحد ما تعبـــت. وغفيت بلا ما احس فزيت على غــزل
- تعالي شوفي منو اجه ؟
- ترف ؟؟؟
كعدت على حيلي بسرعة هزت راسها لا وسحبتني من ايدي للصالة مخلين الشاشة بالصالة والمح هجــام بالباب لابس قاط ونظارات وبوكيه ورد بأيده وراه افاطم شايلة ترف ، ورويده ويسر وموسى
باوعت الغزل
- شنو ؟
- اليوم عرسج .
- شنو ؟
- عرسج عرسج اليوم ؟
- شقصدج.
سكتت تضحك واني فاصلة بس اباوعلهم فتحلهم الباب حيــادر سلموا ودخلوا حالي مبهذل عيوني مورمه وملابسي مال بيت اباوعلهم ما مستوعبه تقدمت افاطم انطتني ترف وهو يياوعلي مبتسم
اخذت ترف ابوسها واشمها ودموعي على خدي تقرب خطوة رجعت ليورا انتر خازرته
- وخر .
حيــادر :: وخر يله ما الك مره يمنا .
عفتهم ورحت ترف حاضنتها على گـــلبي دخلت للغرفة الماقبلت غــزل ادخللها ، فستان عروس معلك وحذاء بصفة باوعت للميز المكياج وكلشي تحتاجة العروس كعدت وترف بحضني ابوسها واشمها
رفعت عيني للباب دخل مبتسم كعد مقابيلنا درت عيوني منه
- زعلتج ؟
- روح والقران روح ما اهتم بس عوفلي بنتي .
- وين اروح بلياكم غير اموت .
- عيشتني اصعب شعور .
- نيتي افرحج حرت شلون اطلعج من البيت وافاجئج .
- ما اريد ما أريد مفاجاة توجع الكلب بجيتني هجــام حركت گـــلبي
- أعتذر ، ردتلج مثل ما ردت الاخواتي مثل ما طالبت يكون الهن عرس ويلبسن فستان ، ردتلج هالشي انتِ هم .
درت وجهي شفتي ترجف حضن وجهي بين ايديه مسح دموعي
- سامحيني اخر مره ابجيج .
هزيت راسي اي ساكته والرهبة والخوف بعده بكلبي صاح حيــادر
- تعال اطلع ما تشوفها قبل ما توافق عليك .
هجــام باوعلي كال
- انذل يم هاي السرسرية علمودج راح ينتقمون مني بيج .
- تستاهل اتعب مثل ما تعبتني .
- اتعب اتعب لخاطرج .
كام طلع يمهم ودخلن البنات كطعت رويــده تكطع وهي بس تضحك غــزل كالتلهن
- راح تجي البنيه شــام نوب عيــونج مورمه هسه شلون تمكيجج .
صاح حيــادر
- تعالي ام ترف خوية .
طلعت يمهم ناصبين على هجــام وميتين ضحك كال
حيــادر :: موافقة تتزوجين هذا هذا شوفي الشايف روحه
هجــام :: شــام كليليهم....
قاطعه يُســر وهو يكله
يُســر :: اششش لا تلفظ اسمها لا اكوم انحرك ،
موسى:: شــام ترا ابو بنات وهتلي شتسوين بيه ؟
حيــادر :: محد يجبرج شــام اذا ما تردينه هسه اطرده شايب ترا البكده شبعوا ماي ورد
وهو عايفهم ويباوعلي بابتسامه متحديهم بيها هزيت راسي اي صاح حيــادر
- لا حرامات .
يُســر : اريد مهرها عشرة بعشرة
موسى:: لا انا اريد مهرها عشرة بعشرين .
حيــادر:: عشرين بعشرين بالعدله ، ها ابويه موافق ؟نقرأ الفاتحة .
هز رأسه موافق يضحك موسى يباوعلي رافع حاجبه كال
- بالنص انا وياج .
هجــام :: ليش بالنص انتَ وياها ؟
- طلعتلها عشرة .
-اي مهر عروس هذا تريد منه عندي شروط اذا تريد من مهرها .
حك شعره وكاله
- لا لا اتشاقة
ضحكوا كلهم اجت البنيه وغزل طايرة طايرة مشتريه كلشي ونفس فستاني فستان صغير الترف ، هي تلبسني واني اغلط عليها لان ضمن عليَ ، المكياج جان بسيط مو شي فخم وحتى شعري مجرد برم وتاج بسيط وكفت اباوع لنفسي اضحك
- شنو هذا الخبال البس فستان العرس ورا ما صارت عندي بنيه .
التفتت على فتحة الباب مد راسه مبتسم لمحني وكف عدل راحت ابتسامته نظراتة تتنقل على كل مظهري مسح وجهه وركبته كالتله رويــده
- مبروك حبيبي.
هز راسه بلا ما يرد عليها تقدم كدامي واني عبالك صدك هسه يله راح اتزوج لزمتني الرجفة والخوفة مد ايديه لزم اطراف اصابعي وحضنهن بين اصابعه باس راسي يهمس
- شومة مدامي العاشگها .
عافني وراح الترف شالها يضحك
- شنو هالجمال بابا شنو هاي .
هلهلت غــزل واجت رويــده اخذنا صور بالتليفون سوا لان راح نطلع للمصور بس اني وياه وترف ، لفتني بالكبوس وطلعنا منظرنا يضحك عرسان وبتنا بأيدنا المصورة شبعت ضحك كملنا الصور وطلعنا بالسيارة اباوعله مبتسم سحب ايدي باسها
- افرحي يا اول من زرع بكلبي فرحة بعد سنين من الحزن والخراب .
يتبع 🦋