روح في بحر الظلام

الحلقة الرابعة والاربعون

روح في بحر الظلام

____ الكاتبة بحر _____

لتنسون التقييم والتعليق على الفقرات +++اضافة للحساب لطفا. pahrasoadاذكر المستخدماذكر المستخدم

رجاءا ممنووع سب الشخصيات , اترك اثر جميل يليق بك💕🌹
البارت اكثر من 5000 كلمة🌸
لا تعلقون سمايلات ونقاط تزعج القراء الاخرين، علقو اشياء تخص الرواية، لان احب اشوف كلامكم

_____________________

رانيا

طول ما امي تحجي قصتهة كانت ملامحة تتغير حسب المواقف
في بعضها تتلون خدودها خجلا
في بعضها تصفر  خوفا
في بعضها تنزل دموعها حزنا

واحنا الثلاثة كنا نصغيلها بانتباه اني وسرى بالغين بما يكفي لتفهمها لكن مشمش نضرة الاستغراب والصدمة مافارقت ملامحها

وماما تخجل مننضراتها كل شوية تلزم ايدهة او خدها تهدأ وترجع تصفن

من عرفت بعد ماكو رابط بيني وبين شهاب تخبلت ضليت اشيل تراب واحط على راسي  الطم بحركة وابجي بعبرة

ابوي من شاف حالي تفشل گدام اخو وابن اخو صار يضرب بية بجريدة سعف
وين ما تجي ايدة وجهي ادية رجلية بكل مكان يضرب واني وجع كلبي غالب وجع العصا

عماد راد يوخرة صاح بي ابو ولزمة دفع ابوو واجاالي يركض ووخرني من ابوي ورا ضهرة

:مااا لك غرررض وووخر لااا تتدخل لوو تمووت مااتصير شهاااب ولاا تلحك اضفرة ياا خااينين الامانة وولكم اماانة ششهاب عدكم انااا

قبل لا انعي كلامي ضربني عماد بكف ايدة على حلگي
وهاي اول مرة يمد ايدة علية
انمرد حلگي مررد صاار الدم ماا ادري منين يينزل
من شاف حالتي تصنم بمكانة عمي وابوي طلعو وهو ضل واكف متخصر وايدة على رأسة محتاار

:ششمالج انتي ما تگليلي ششمالج هههسة انا يمج گرباج
:يااخي اكرهكم تلعب رووحي منكم هم انت وهم ذاك محمد انتوو ووصخين ماا ارريد حتى سسيرتكم

دنك علية يحجي محذر وهو يباوع لشفايفي التحري دم
:ليلى تجفي شششري وعلي ماا ارررحمج انا

مارديت علي لان ما استفاد شي غير زيادة ضرب  رحمت نفسي وسكتت

محمد جان متزوج
رانيا:محمد ابو هشام زوج منى

:اي هو الله لا يذكرهم بخير

متزوج واكبر  مني بكومة سنين وكل يوم هارب ولاحكتة الحكومة بس هم من زمان عدهم فلوس منين ماندري بس فلوس يلعب بيهة لعب وخبيث عدا عن ضخامتة، شهاب ضخم لكن مرتب هذا ضخامتة همجية  وانا گصيرة ضليت ليل نهار ادعي بس الله يخلصني من محمد

جبت كتاب حلال المشاكل وبصراحة ماجنت ملتزمة لا بصلاة ولا بحجاب ولا بكلشي ، جنت نسخة انثوية من شهاب
بس طحت بهالشدة وكانت اصعب ايام عمري اشوف عزائيل ولا اشوف محمد
رحنة مرة لسيد جان معروف طبعا هواي مقامات بالناصرية سيد فلان وسيد فلان
والناس تدعي رب العالمين بجاه هالسادة كرامة للسادة ولصفاء نية بعض الناس كانت تقضى حوائجهم

بمرة اخذنا اكلنا ومتاعنا وفراش احنا وبيت عمي عبد الخالق وبعد كم عائلة من اقاربنة ورحنة ل احد السادة
ضليت گاعدة يم قبر السيد وادعي رب العالمين

جانت اكو مكتبة بيهة كم قران وبعد مجموعة كتب اغلفتها  رثة واوراقها مهترئة
لفت انتباهي كتاب صغير مكتوب علي حلال المشاكل
اخذت الكتاب وضليت اقرأ
اريد شي يلهيني ويخلصني من اسألتهم المتكررة المحرجة وهم مااحبيت رفقة اي منهم،
علما ان اهل محمد موجودين وزوجتة كانت تشمر حجي  وتعاركت وية امي كتلها زوجها عادي گدام الناس فرقوهم ورجعت تضحك ولا كأن صار شي

هم برا يجهزون الاكل واني جوة بالمقام هواي ناس موجودة
اقرا واقرا ونسيت همي وحسيت اكو امل من شفت كرامات الامام علي
بقصة عبد الله الحطاب، تفاعلت وي القصة بكل مشاعري مرة ابجي مرة ابتسم بفرح

صاحولي ع الغدا  رحت اكل واقرا
وامي كل ساع عايطة بي
:ووولج اكلي الفاااهية، اناا شلون بهالكتب حتى هناا لاحكتني

:ماا اشتهي والله خلييني اكووم

ابوي:اكلي بووية دررب ردتنا طويل ذبي البيدج خلصي وردي اقري..

:شترد تقرا خلعا تعاون البنات شمالها عازلة روحها شنهي بيهة جرب

اكلت شوية وگمت
تكلم عماد بصوت ناصي
:انهجم بيتج يالمثقفة

باوعتلة مضيقة عيوني بأنزعاج ورجعت اقرأ  بصف الحايط، من خلصو صاحتلي امي بزجر وعصبية

عاط بيهة ابوي
:انتتتي لييش تششتررين المهانة لررروحج موو كتللج عووفيهة

طبعا زمان قبل،  عادي وطبيعي ان الزوج يضرب او ينهر زوجتة گدام الغرباء

اللي بزمان هسة يگولون قبل زمان طيبة وحب، هذول ماعاشو مجرد سمعو كذا موقف
البشر بكل الازمنة مثل بعض مايتغيرون، اللي يتغير  اوقات التواريخ فقط
كان بزمان قبل مووجودة الفئة الحقيرة والفئة الخبيثة والحسودة وموجود سحر وموجود قتل وكذب وخيانة وزواج متعدد بكثرة وحروب الضراير وحروب الكنة والعمة والقسوة كانو اغلبهم قساة قلوب  و و و و

هوواي  البيوت من كثر العوائل كانت تصرخ من الضجيج  نادرا واحيانا الا بمشكلة مالها حل تطلع الكنة بيت وحدها

واكيد زمن مايخلو من الطيبين والشرفاء المتدينين، لكن ابد ماله داعي التمجيد بزمن قبل الانسان نفسه بكل الازمان اكو خير واكو شر

خلصت قراءة الكتاب، بس گلبي تعلق بي  بشكل اريد اقراه بعد مرة ومرة والف مرة

رحت ل احد الاشخاص المسؤلين عن المكان  بلكي يسمحلي اخذة وياي

:عمي فدوة اريد هذا الكتاب خليني اخذة وياي

:بوية جا هو حلالي واطي الج مال المجان لو كتلج اخذي يضل بذمتي عبن هذا لكل الوادم مو بس الج

:زين اذا اريد اشتري منين اجيبة
:والله بوية ذني جابوهن من النجف، هنا ما اندل وين يبيعونة، هو شنهي شمكتوب بي ليش دوم ينشدون عنة

:عمي هاي سالفة عن الامام علي
:هااه، شو بلا سولفيهة

هو گعد على كرسي يم الباب وانا گعدت بلارض متحمسة اعيدلة السالفة  حبيت القصة كلش حبيته
ماحس الا عماد اجاني يهف بدشداشتة

:شنهي شعدج هناا

الرجال:هاا بوية گول يا الله

مد ايدة تسالم وي الحجي والحجي بأبتسامتة اللطيفة گدر يمتص غضبه، طلب منة اسولفله القصة  ووافق
گعد بصفي واني اسولف

والحجي تفاعل وي القصة بشكل حلو، وكلساع وصاح
:سلام عليك ياعلي يابو الحسن

وعماد اني احجي، وهو صافن بوجهي حتى تقيدت راحتي

كملت القصة وبست الكتاب وانطيتة

گال هااه يعني كل خميس اغرة الدعاء واوزع حلاوة
:اي حجي هيج مكتوب

:الله هيج ويردون وليداتي
:ليش وين هم
:سودة بويهي، اسرى راحو من سنتين وماكو لاخبر ولا ذجر منهم

دنكت ابجي هو عبالي ابجي على ولده بس انا گلبي مورم على فراك شهاب

اجا محمد يمشي وكأنه مالك الارض
عماد حجة بهمس
:اهووو ايت لعبان النفس

وصل يمنة انا دنگت گال

:هاااه شعدكم شني هاي اللمة
عماد: گاعدين شردنة من اللغوة

:بس عيب مااراهمة هاي جاعدة بنصكم جدام الوادم
:انا وياها والحجي يشرفك ويشرف اهلك لا تضل تجفص

:اييه ادريك انت مثل اخوها بس الناس تنگد وهي بدون هاي وهاي الوادم تحجي بيهة

طفر عماد من مكانه
ابوج من شبابة عصبي بارود مايتحمل ولو طبگن مايعرف امة من ابوه
وكف وياه طول بطول گبل لا تحمى السالفة تدخلوو وفاككوهم

صاح بي عماد من بعيد :وووياااك وحدة ي محمد

كانت رحلتنا بسيارة احد المزارعين سيارة لوري
والهوا عالي والنسوان دك سوالف وضحك والاطفال مسوين ضجيج والزلم بلاطراف وعلى القمارة

بالرجعة عماد گعد بصفي
وجهة احمر غضب على تردد على انفعال

:شبيك تنافخ، انوب مالگيت غير يمي تگعد

:ليلى كفيلج علي اكسر وجهج بحديد السيارة
خفت يفشلني گدامهم وهم شلون يحبوني، نزلت عيوني حتى لحد يشوف الدمعة المتحجرة بيهة

:وتالي وياج.. ولج معقولة تفضلين محمد ابو النسوان علية

:اذا احجي انكتل واذا اسكت تفسرون بكيفكم شنو الحل وياكم ما ادري

:ارضي بية گليلهم اخذ عماد
:شبيه تخبلت ارضى بالموت ولا اكسر گلب شهاب واخذ اخوه
هسة ما اگدر احجي اليوم بالليل اطلعي يم السدرة  واحاجيج

سكتت عنه وبگلبي النار ومتقززة من حركات محمد عود يسوي اغراءات، استغفر الله ربي

ردينا وانهرجنا باللغوة
خوالج الصغار وعزيز وخالتتج نضال وامي وابوي محصورين بغرفة وحدة
وجدج وجدتج امالخ على الصغيرة والكبيرة
بنص الليل
تذكرت عماد.. يبووه هذا بطران خليت ونمت

ثاني يوم اول ماطلع ابوي اجا عماد گال ل امي

:عمة راح اخذ ليلى امي تريدهة تعاونه
:تخذهة شنهي هالفاهية هاي  كب حض مابيهة غير الونين

بدشداشتي حطيت شيلة على راسي وطلعت وياه بيتهم يم بيتنة اشرلي نمشي من ورا البيوت بس صرنة وحدنة نمشي
جرني من شعري لزم فكي بأيده
:يأ عماد ششمالك

:تتعمدين تكسرين جلمتي، لفجر الله انا ناطرج ليش ما اجيتي مو كتلج تعاي
:ووخر خاايب وخر عني مااتستحي ماتخاف الله موو مرت اخووك انا

ضربني كف على وجهي وصااح
:لااا موو مرت اخووي بييش اتأملين انفصخ العقد

:ماا انفصخ اناا شعلية منكم اما علية بروحي اريد اضل ناطرتة كاافي عووفوني

:ولج الليلة راح يعقدونج ولو رفضتي يطونجياه مگبعة بعباتج يگولون عليج مكسسورة

:لاا عليك العباس.
:جاا هسة شسووي اششرد سااعدني اششرد

:ووين تشرردين شاايفة الذيابة والجلاب كفيلج العباس جلاب تاكل  بششر متعودة على لحم الجثث دير بالج تفكرين بيهة ولو عبرتي الجلاب دمج مهدور ياهو يلزمج يذبحج

:يبووووي فلك طررج ي ليلى جاا شلون شور علية عماد اناا اخاف والله اخاف
وارريد شهاب والله ادري بي عدل انا دووم احلم بي يرد، وحالفتلة بالعباس هواي ما اخونة

:اعقد عليج انا ولو اجا شهاب انا افهمة السالفة ولو بعدة يريدج اطلكج

:لا فدوة كول غيرهة شلون اخذ اخوو

:ماعندج غير هالحل
:حاجيهم انت حاجي عمي وابوي بلكي يسمعون منك

:والله لوو تمووتين مابذنهم ماي، اليوم لو ما گلتيلهم اخذ عماد الليلة محمد ماخذج

عقلي ما گدر يتقبل فكرة اخذ اخو شهاب ماا ترهم لوو اجاا ولگاني مرت اخو شلون أحط عيني بعينة وانا مو بس خاينتة لا وماخذة اخو بعد
گلت هاي هي وين ماتصير خل تصير شبيدي على امر الله

بالليل اجا ابوي صحت ردت لطمت ماكو هذا هو مقررين  وياهم عماد منتضرني أگول اخذ عماد بس ما گلتهة

سأله ابوه بعصبية

:شنهي يعمااد تأخذها لوو  ياخذها محمد

احساسي وهم بس يردون يبيعوني ل اي احد ما توصفة كلمات ولا صراخ، وصفته ملامح وجهي بكامل الدقة لدرجة ابوي اشفق علية

:گال لاا تعاينين علية هيج، اناا مابايعج ارريد اسسترج
:بوية خليني اتاني شهاب شمأثرة عليك انا

:مأثرة على روحج لا عبالج الجم كلمة الحفضتيهن عود صرتي مثقفة وتخلصين لا يبا انتي بوسط ناس المرة صايرة لهوتها

تعبت من المدافع وسكتت
ردو سألو عماد
رد عليهم بعصبية وصيحة غضب
:ماااا تريييدنييي ششلوون اخذذهاا غصب، كرامتي اكبر منها ومن عنادها  خلها تولي يطبهاا طووب
عاف المكان وطلع
وابوه يحجي ويتذمر ورا

:الاثول الفاهي ماتريدني هوو ماتريدني هي خلك مررة اخذهاا واحط عليها اربع

:بنيتي هااي  عبد موو خلك مررة وما تريدة وحگهة

:والله يلو تلگين اذانج(تلعقين اذنك) مااتاخذين شهااب لا عدل ولا ميت

فهيت بوجهة هذا شبي مو جان موافق هسة شبي نشب وياي

راحو طلعو وردو طلبو من امي فراش مدو بالطرمة وعلگو فوانيس وجهزو الكرمة راح يعقدني محمد

اجو  بالليل وهم يسولفون ويمهدون
وانا جوة حال الضيم حالي
ونضرات امي اللي تحسسني اني انسانة بطرانة ورافضة زين الشباب
اختي حاولت تصبر علية وتهديني لان صوت نحيبي  طلع احس شهاب درة بية راح اتزوج گلبي عصرني حيل

اجت ام شهاب كانت بعدهة مو هيج تعبانة ضهرهة منتصب كبيرة لكن حلوة وحمرة بيضة
تكلمت بعصبية
:لييش ماارضيتي بعماد شمالة
:خاالة غيير انتي گلتي لا ترضين وكلتي شهاب عدل وانا گلبي يحس

:وانا عد كلمتي وعميد لازم ياخضج يجي شهاب ويطلگج اررضي واسسكتي لا تعلين كلووبنة جاازة الكشرة وساعة السودة العرفتج بيهة
:اناا شعلية شلي غررض
:انتي الفگرتي الولد وروحتي من ادية كلة منج

طلعت تبجي ومقهورة وتصيح غدتهم وطلعت اني ماگلت اريد هذا ولا هذا لان مالي كلمة 

قبل العقد بفترة والرجال باللبس العربي يتجهزون وأمي شعلت البخور والجاي المهيل
دخل بينهم عماد وگال مالكم مرة عدنا بت عمي اللي وانا ناهي عليهة

صااارت اصوات نقااش وجدال حااد انا اسمعه مثل نباح كلاب كانو يتزاودون علية وكان خلصت النسوان  او كأني جايبتلهم عار

طلع محمد هو واهله يتهدد ويتوعد
شوية ودخل عماد قبل العقد بمنضر غاضب متهستر

:مااراايدتني يطبج الف مرض وانا بعد اكرهج راح اخذج وبعدها تضلين يمي لحدما يجي شهاب وبعدها اجا ما اجا انا مطلگج
هسة توافقين مثل الكرتة، لو ماوافقتي معناته حجي الوادم صدك وانتي عاار وضامة روحج وان رضيتي وان لا انا ماخذج

اباوعلة بصدمة هذا شمالهة ليش هيج يحجي
بعدهة وافقت وتم العقد
وبنفس الليلة امي جهزت كلشي يخصني، وهي تعلمني هذا رجلج بعد وذاك راح وانسي ولا تجيبيلنة احجاية عندج اخيوان لا تضيعينهم بالرجلين

اقل من اسبوع ودخلن خالدة وساجدة وسمية سمية جبيرة بس خالدة وساجدة جانن صغار توهن شابات وخديجة وياهن

جايبين ثوب ابيض مخيط واكليل عرايس ووردة
گالو عگب باجر العرس
ذبلت روحي عاجزة مالي كلمة ولا اگدر لرد شنو ذنبهم اخواني وابوي زلمة شايب، معناته اكتب عليهم الموت لو يشيلون ويتهجرون

:سمية خية عرسيش فدوة لعينج احنا بحال عرس مو شهاب ماتدرون اخبارة مو عيب من العالم

:لاا موو عرس بس هيج تلتم الوادم ابوي جايب ذبيحتين لوجه الله الوادم تشوف بياضج وتروح

:بييااضيش ششبيكم

:والله گلبي حسسني جني ادري بيج مكسوورة اليوم يوومج
يااااه وانا اگول اشماله شهاب عزللهة وكورلهة ثاااري شاايف منج حلاااوة مووو بس بسسيطة اليووم ذباحج اخوو شهاب ي ليااالي 

:لا يا ما تخافون من الله لا ياا ضلاام حسبي الله ونعم الوكيل الله لاا يوفقكم ولا يرضى عليكم مسلمتكم بيد ابو الحسن

هجمت علية امي اني اصيح واغلط وهي تضرب بية كسرتني تكسر بعصا
بعدين دخلتني بغرفة تتكلم بتحذير

:شششفتي حجي الووادم، والله لوو طلع صدك وطلع شهاب كاسرج  اددفنج وانتي عدلة والله شاهد علية

مقابل بيتنا كانت اكو مساحة ملتف عليهة سور خوص حاطين بيهة حيوانات
دجاجات وبقرة وبطوط
شفت الخروفين اللي جايبيهم للعرس
احترك كلبي اخذت السكين ارريد اقتلهن بلكي يتعطل العرس
بس ما گدرت خفت الله يعاقبني وتزيد الامي 

ضليت گاعدة بالتراب وصوت بكائي يزين ضلام الليل
حسيت خطوات وراي
وصل يمي عماد گعد وسند ضهره على عمود سقيفة البقرة
فترة طويلة انا ابجي وهي يتحسر ابد ما تكلمنا لحد ما گمت اريد ادخل تكلم بصوت خافت

:تحمليني باجر ولا تخليني أذيج بس باچر
:عماد بس فهمني اذا اجا اخوك شتگولة شلون تواجهة

:هو لوو اجاا على گولتج يعرف اهلة شنو ويعرف الضروف راح يفهمه وحدة، هااي لو اجاا

:ماگدر والله ماگدر
:ولا انا اگدر، هذا الصار ولازم نتحمل هي ليلة تنحل السالفة ويرتاح راسج، بعدهة ما اگرب صووبج

رحت للبيت  اتذكر عبارات حلال المشاكل واردد ورغم ماكان يوم جمعة بس وزعت حلاوة من غبائي وانفهمت غلط واهلي ضنو ان هالشي موافقة وقبول مني

صار العرس ولبست الابيض
صرت عروس مو لشهاب، ل اخو شهاب، لعبت بية الدنيا لعب، ولا انا وين وعماد وين ماجنت حتى اسلم علي لان ما احبهة دارت ولفت الدنيا وخلتني الة عروس

دگ وركص وجوبي وهوسات  وذبح ودبك النساء والاطفال بلبسهم والليرات المعدنية اللي مزيتة جباهّن وخصورهن ودگ الحجول والحنا مزينة اطراف اصابعهن ونضرات الشماتة والحقد مقبحة ملامح اغلبهن

خلصت المسرحية ودخلوني للغرفة  كانو بانيها جديدة من طين لان هذا مو مكانة ومنتضرين تنتهي الحرب ونرجع ل بيوتنا ماكان عندهم امكانية لبناء شي افخم طين وصخر وطابوك وملبوخ من الداخر والسقف كان يسموه بارية

اعمدة خشبية يغطوهة بحصران السعف وفوكاتهم طبقة ترابية

دخلوني كعدت على السرير الحديدي شمرت الوردة من ايدي  ارتاحيت منهة تشنجت ايدي لازمتهة من عصر الله حتى ايدي تعرقت

السرير كان خشبي على الطراز الريفي مصنوع يدويا وكان بالغرفة بوفية صغيرة عليهة مراية الانارة كانت فانوس نفطي لان الغرفة ماموصولة بالكهرباء كانو مستعجلين على العرس وما اعرف ليش

كلشي بالغرفة يبجي وي گلبي كلشي حزين  كلشي بالغرفة يحسسني اني خائنة
گعدت على الحصيرة اللي بلارض ابجي واعتذر من شهاب
صارت الزفة من سمعتهم هوساتهم نهضت من الارض، دواخلي ومشاعري وهواجسي، استعدت لوضعية الدفاع والتهجم

دخل وغلق الباب وكان حديدي سد السرگي

گمت انا وگفت على حيلي
تكلم بتحذير،
:صوووتج لاا يطلع والله ان احد عرف انج ماريدتني لو رفضتيني وطلعتي صووت تكتبين على روحج العذاب لحد ما يكرفج الموت انا انطيتج كلمة خلي هالليلة تعدي على خير

:عماد والله ما اگدر بداعة كل غالي على گلبك لا تأذيني  والله ما أكدر

:ماايصير افتهمي ونصي صوتج، لا تعلين گلبي  ذولة ان ماشافو بياضج يذبحونج، غسسل عاار

:اجرح اييدي اخذذ من دمي وراويهم

:اي مو هم زوواج الجدة برا وتعرف الدم الصدك من الجذب انا گلبي معوورني وارريد اخلص

طفا الفانوس وصار اللي صار
وانا عيني مابطل دمعهة
بس ذيج الليلة حال عماد مو حال مجبور  لا كان مليان احساس صوته وحركاته وهمساتة وهو يحاول يخليني ارخى وياه

هالشي خلاني اتقزز واتنرفز حتى وصلت وياي لعبت نفسي وهو لا كان مندمج
لحد ما انتهى كلشي  اخذ النيشان وشغل الضوء بالكبريت

وطلع اناوهو يحاول يخفي ضحكته بس فرحتة كانت غالبتة
رغم كان يشوفني شلون منهارة واخمش بوجهي والطم وداخلي يصرخ اعتذار ل شهاب على اللي صار

طلع  ماعي الا دقائق حتى تعالت الهلاهل واقتحمت النساء الغرفة تهني وتبارك وصار اطلاق نار

دخلت سمية باستني وتكلمت بخبث
:بعد مااكو شهااب هسسة فكري بعماد رجلج واللي راح يشكمج بعد راح وكت الدلال

سمية ما اساامحها لو تملكني العالم
حجت هالكلمة ودنكت تبجي
:ماما اذا تعبتي لتكملين، خليها لبعدين

:من زمان اريد اسولفلجن ماريد سالفتي تنضم بگبري وتندفن وياي

كملت كلامهة وضهرت عليهة علامات التعب كان تحجي وتاخذ نفس وترجع تكمل اخذت علاجاتهة وصارت تكمل

:عادي عماد يجي للغرفة ينام على السرير وانا على الارض، عماد كان هادئ وياي وهالشي مايصرف عدهم  ماكو صياح ماكو مشاكل اصلا مايامرني على شي ومامخليتة يحتاج گبل لا يطلب حاجتة يمة كل هذا بس حتى لا اتصادم وياه
شغل وكراب وحش وارض جديدة اخواتة شالن اديهن من الشغل ابد

خدامة وافتر ملامحي تغيرت من التعب والهم ماعاد بية اي شي من ليالي شهاب صرت بشر ثاني

تأخرت علية الدورة عدت الشهر وماكو
وانا ما ماخذة بالي مو بحالهة اصلا ميت شغلة تشغلني عن نفسي مرات انسى نفسي بلا اكل اصلا
عماد يشوفني بالليل يسألني شلونج احد حجا وياج اگولة لاء

ما اريد افتح ويا اي موضوع وهو اصلا يدي بكلشي يعرف امة وابوه وقرايبنا وخباثة معضمهم
بس منتضر اشكتي له، وهالشي كان اصعب علية من معاناتي

حالتي مع الأيام صارت أصعب تمرضت لعبان نفس حسرة علية اكل شي اضل اتقيء..

والله يا يمه شغل البيت كلة جان براسي طبخ خبز امواعين اهدوم
واذا حجيت يفوتون علية عمي وعماتج.. ماتضل حجاية ولا كلمة شينة مايذبونهة علية

اهلي مو على گلبي، وابوج الگلب ماكان يهوا حتى شوفتة خصوصا نضراته ابد ماعاجبتني

بيوم جان ضهر طبخت وحطيتلهم الاكل جهزت كلشي خليتهم يگعدون حاجيت عمي

:عمي انا راح انام شوية تعبانة بعد ماعندي شي

نترت سمية:اكلج انتي مو شفتينة هايدين ضليتي ادورين سوالف، نخلص سويلنة استكين جاي وغسلي المواعين وخمدي

عمتج سمية
جانت كلمتهة ماشية حتى كلمة امهة
بس هالمرة عمي رحمني من شاف حالي..بس تمددت فاتت عمتي وراي تتكلم بصوت غاضب بي بحة غضب
:وولج بس لا حبلتي ي لويلة

:شحبلت عمة بس انا حبالتي من اول ليلة

:ديري بالج يگرب عليج انووب لو تحبلين وعلي اكلج بسنوني انا عماد رايدج انا اشوفة شلون يتنوع عليج بس انتي مردج لشهاب  شهر شهرين ويصير طلاكج لا تعلگين عميد بيج وتخلين الخوان اتجاتل

طلعت مني تركتني بخيرة بس الله يعلم بيهة
بس طلعت دخل عماد وجان يتلفت لبرة دخل وسد الباب اجا وكف

:شصابج ليش مالج خلك
:مابية شي راسي دايخ شوية انام واگعد مابية شي..

:اذا ما مشتهية اكلج اجيبلج شي من برا
:لا اريد انام
:ماتردين تنامين، تردين تديرين وجهج مني ماتردين تحاجيني جني عدوج
:بروح اهلك عوفني لا بية عركة ولا طكة
:وانا يمتة طاكج
سكتت مارديت صاح بية
:لااا تحكريني حطي عينج بعيني وردي علية

:بس گلي شتريد فدوة رحتلك
گعد يمي لزم ايدي، سحبتهة بقوة ووگفت على حيلي
:شمالك عماد
:شنهي تستنجسين مني

:لا والله مو هيج، بس احنا متفقين
:وانا ما گلت لا، بس بطلي تبينين للوادم جنج عدوتي، ترة احنا اولاد عم وبينل دم، خلي بينا السلام والچلمة الطيبة حتى نتفارك بطيب مو بعداوة

:عداوتيش شعدي وياك
:اطيني مجال، خلي بينا سالفة وضحجة اعتبريني سند مو لاشي ليش ماتطلبين مني مصرف ليش ما تشكيلي منهم
:عليمن اشكي محد مأذيني ومصررف ماريد اكل واشرب شريد بعد

كام عني وفرك رأسه بحيرة
گال
:تردين ترحين لهلج تتونسين يم اخوانج
:لا شعدي رايحة هم جاي يجون لهنا واشوفهم

:اووف اووف اسمعي العصر انا رايح للولاية اجيب غراض حسبي حسابج اخذج وياي

:ان شاء الله

طلع هو العصر صدك اخذني وياه سوق متواضع بساطي وهوسة وانا ضايگ خلكي، عبالة اتونس واضل اضحك واسولف انوب زدت
:شنهي تعبتي
:اي فدوة حيلي بايد اضني مصخنة

ماكمل المحتاجة ورجعنة للبيت عدة شهر  ثاني على عرسنا وعمتي خبلتني ما ايت ماكو ششوفي روحج زين
تحجي بسكتة بيني وبينهة
بعد شهرين صارت تنطيني شغلات ثكليلة كامت

بنتلهة  حمام گالت شنهي حمام تفوت بي اربع عوايل منا نفتح الحمام على بيتنا ونگعد وخلتني انكل الطابوك والصخر وادور بالاراضي القريبة على صخور واسوي بالطين وياها

هذا كلة عمي مايدري بي جان غاصبلة وحدة على الزواج ومشيبهة على عمرهة
وعماد وفؤاد يطلعون للشغل فؤاد جان شاب مراهق

هو فعلا وضعنا بالناصرية جان مزري يعني طلعنا من بيوتنة شيخ يعرفهم اطاهم الارض گاللهم ابنو بيها علما تردون شبعنة ضيم علما استقرينا

توقيت الحمام جان مقصود من عمتي
اشتغل وهي تضرب بية بس تشوفني اوكف ارتاح
صعدت الحياطين انا وياها وعمتج الصغيرة

وسمية گاعدة رادت تكوم ساجدة طاحت بيهة وكتلتها
للعصر گدرنا انصعد الحياطين، بس احسس ضهري صار نصين من التعب
المغرب اجا عماد شافني مطينة والحمام صاعدة حياطينة صفن
لا يگدر يحاجيهم يخاف امة تگلة خفت على مرتك وما همك امك واختهة

بالليل ضليت اصرخ من وجع ضهري
تكلمت سمية بصوتهة المستفز
:خافنهة حبلة وطيحت الفرخ، اناا اگولن هالندارة منين اجت

التفت علية موسع عيونة خفت منه

:شدراني، ليش تباوع علية هيج انا شلي غرض غير امكم الرادت تبني حمام

سمية :شدراج، ايه اسم الله على طولج غير بت البارحة وماتعرفين لو طولت عليج يعني حبلة بهاي اذاني سمعتج گلتي لمي  صار شهرين ماكو

دخلت للغرفة الوجع عامي حتى عيوني
اجا هو وراي، سحبني من ايدي بقوة صرخت
:عمااد الحكلي فدووة والله ورااح امووت ضهري انكسسر والله مالي غرض امك الرادت تبني

گوومي وياااي للجدة
:مااا اگدر ووولك مااا اگدر شووف حاالي
:اذااا صاار فرخ وجتلتي اخلييج تلحگييينة ليلى

طلع من البيت يركض وجهة مخطووف
بنص وجعي انصدمت هذا شبي معقولة يريد فرخ، لا لا يجوز خايف من الحرام

اجت الجدة
فحصتني گالت هاي للفجر تسگط
:لاا خالة فدوة، شللون شصكط
:تذبين الفرخ يمه لا تخافين انا تالي الليل اييج اششوفج

انا روحي طالعة وطبت عمتي
:حببلتي عررفتج يبر.......، انااا شووصييتج موو وصيتج لاا تحبلين

:وااانااا ششبيدي اناا شعلية ذذاك ابنج وروحي حااجي، علوواه علوواه لا يدناالي ولاا يحااجيني موو شوفة عينج اناا حتى ماا احاجي ششسوي بعد

دخل عماد مخننزر 
اخاف منة كلش اخاف منه اكثر من ابوي وعمي واخواني
حجة وي امه بصدمة غاضبة
:تدرين بيهة يعني تدررين بيهة حبلة وخليتيهة تصگط

:ولك ييمة هااي موو الك لاا تگرب صووبهة هااي منفووسة مااتنسعد وويااها خلهة توولي

طلع امه من الغرفة ساحبهة من زندهة

اقترب مني
جرني من شعري، وصار يضرب بأيدة الثانية على وجهي ججنتي تددريين حببلة وكتلتي لييش ولج لييش ششمسوويلج

انووب تصصيحيين گدام الوواد ماا ارييدة ولاا يدناالي اناا بالششارع وسمعتج الززلم سسسمعتج
سحلني وشمرني بالگاع وتولاني على راسي على رجلية على ضهري
دماني لحد ما كسر الباب عززيز وابووي
طلعووني منه منتهية

صاارت عركة وهدت امي عليهم واخووي تجالب ووياهم وخوالج الصغار طاحو لبيتهم بالطابوك والطين

من رااد يطلعني ابووي عمااد جااب الخنجر ووكف عاارض بالبااب
:مااتطلع انا اخذتهة صارت اللي تعيش وتموت بحجرتهة

:تسسحب خنير علية، افا وانا ابوو عزيز اليووم الا انبتة ب.......

العم وابن اخو شاخطين وعمي صف وي اخوو وياهم اخوي  دارو على  عماد كسسرو تكسر

:ابوي گاب ماا اطلع الا يطيني الخنجر
:عيبة بحق الرجال ياخذون خنجرة جان مثل كسرة لعينة وكرامتة بطلاع الروح عاف الخنجر وطلعناا

ضليت عد اهلي سست شهوور
عماد يودي ناس وابوي يرفض، امي خبلتني تگلي ردي لرجلج حتى لو ابوج ماراضي رووحي وهو يرضى بعدين

:يمة ششمسوويتلج هسسة محاربتني على اللگمة  هسة انا لا بلبسة ولا طالبة شي مو هل حاالي حاال ليلى

:ووولجن الششماتة كتلتني والنااس ذبحووني ششمالهن اثنينهن مششمرات عليج

شبعنة ضيم هم انا وهم اختي نضال البقية جانو اطفال مايدرون 
نكرب كراب بالبيت گمنا نخبز ونطبخ لبيتنا لبيوت الشيوخ الگعدونا بگاعهم ويطون امي فلوس تساعد ابوي لان بهالوكت جان كلشي غالي ف من نشتغل نساعد امي وحتى خياط اخيط لهم
وعماد يودي اخوواته يتوسلن ويرحن بس عمتي وسمية ما اجن وهو رغم جيران بس ابد ما وصل
مو خوف لا والله هو ما يخاف بس ابوي گال لعمي ولدك ممنوع يطبون على بيتي

ساجدة:اكلج انتي شتردين بس گولي شني التردينة وتردين، هو يگول انا ماطگهة بس انهضمت بين الزلم وهي حسهة جان يلعلع يگول خل تحاجي ابوهة

مرت عمي الصغير :ولج يمة ردي لبيتج كافي شمتن الوادم بأمجن وابيجن گليلة اريد رجلي

:ماا اريد ارجع ومادام ابووي ماا يرضى ولا اعارضة ولا اگلة بروح علي ابو الحسن تعوفني بحالي

مرة ومرتين وانا طول هالست شهور باب البيت ما طلعتة حتى للساحة المسيجة ماا اطلع 

لحدما بيوم الشيخ دز على ابوي وطلب منة يرجعني، انحرج منه ابوي وماگدر يرفض طلبه
أمرني ارجع،

توسلت ردت بست ايدة بس ماكو گال ماگدر الزلمة متفضل علية هواي ما اگدر ارده

رجعني ابوي
عماد حتى ما اعتذر مني
وصار هو اللي شايل خشمة علية، جا عليمن جنت ذابح روحك وانا هناك
ثلاث شهور بعدهة انا وعماد مادار بينا ولا كلمة
بس حسيت اني محتقرة منبوذة شعور وحدة قاتل لاكلام بيني وبين اي احد منهم
امي وابوي مايجون زعلانين
واختي ممنوعة من الطلعة اصلا
اخواني اطفال بس يجون يتعاكون وياهم ويطردوهم

بعدهة صار يلين بتصرفاتة اني بعد انطيتة مجال مو ك زوجين بس من يجي يسلم يسأل اجاوبة
لحدما انست السالفة وصار للوضع طبيعي بس انا ما انسى
انا اسامح ممكن بس ما انسى..
وهالشي تعبني اني اتنازلت عن حقي من قلة الحيلة
صارت بينا سوالف وضحك عادي مثل الصحبة مثل لگينة حل وسط

بس انا ماطافي الامل بية گلبي منتضر شهاب
كل مغربية من اسمع الاذان ينعصر گلبي وانا افكر هسة شحاله هسة شلونة
والاخبار اللي تجينة عن الاسرى تمرد الگلب

اللي يگول يقطعون اشلائهم واللي يگول يخبلونهم واللي يگول يمزقون جلدهم بالموس

واسوء واسوء بكثير
كانت حرب مدمرة عدمت اجيال وأنسال جان من يجي من الجيش يسلم علية
ويجيبلي وياه كليجة كن جماعتة لو من الجبن اليطونة الهم احبه كلش
من يشوفهم يتعبوني يسوي روحة مريض
ويضل يصيح ويتصنع العصبية حتى مايامروني وندخل للغرفة
أكعد الساعة بالستة الصبح ف الضهر لازم انام حتى لو ساعة
مرات سمية ماتخليني اذا هو هنا تنقذني

:ووولج وووينج ررراااسي ررراح

هي راحت تركض الة :هاا خوية عماد شخيرك شتريد

:وووينهة موو صار ساعة اصصيح لييش حااكرتني الا اكووم اكتلهة
:ختولي خوية تروحلك فدوة كلي شتريد انا يمك

اني جانت حاكمتني طلعت الجدورة المصخمة  كالت تفركينهن بالرمل
صاح بكل صوووتة :ووولج لييييلى ووولج بر....... تحگرررريني
اجاني يرركض بس غسلت ادية سحلني،. حتى اني صدكته سسسحبني گلت هالمرة صدك رراح انكتل
وهي جانت فرحانة

دخلني للغرفة وغلق الباب والسركي

ههههههه صار يضرب عل افخاذة  ويصفك يصدر اصوات ضرب يعني انه جاي يضربني

:بر...........،...... مخليتني اصصصيح اددري بيج ترديين تحركين گلبي.. اليووم ووين تررحين مني تعاااي تعاااي اليووم الاا ارربطج هنااا لليل

يضحك وي ضحكتي ويأشرلي عوود ابجي صيحي

حاولت امثل البكاء بس ماگدرت ضحكت من شفت افخاذة احمرت من كثر الضرب..
ضحكت وحجيت بهمس :ياا فلك طرك عمااد هسسة لو صايرة بية هااي الحمسات انا ووين اولي

ضلينة نضحك اجا گعد يمي بلأرض على الفراش اللي انام علي

:دووم اضحكي ليلى
سكتت وهزيت راسي متحسفة:هو بيدي ماتشوف الدنيا شلون مايلة وياي

:لو الله يهديج وتصيرين اللي والله ل اشرد بيج

:شمالك عماد

ضربني على راسة بخفة
:اتكششمر ويااج مااتعرفيين كشمرة انتي
:تيلا كوم عني خلني انام طيحن حضي اليوم

:هسة انا لو نمت يمج عود تنگلب الدنيا
:ياا عمااد
:امدداج وامدا عمااد وحظ عمااد ووياج

اكو عوائل قبل اذا الزوج مايضرب زوجته يعني مسحور او يعني هذا مشيته على رايهة وهي محضوضة حتى اذا ماعندة شخصية لازم يضربهة
مايرتاحون اذا شافو اثنين عايشين بسلام
هم اكو ناس خيرة بس المرو علية هيج ناس

الوضع ماعجبهم ان احنا صحبة وعماد بطل تمثيل عمتي شدت وياي بالزايد
وسمية حسيتهة هادية وهي التقربني من عماد ودوم اشوفهة صافة وياه من امر من يمهم يسكتون

بعد فترة عماد تغير اسلوبه، صار عبالك شيطان انگلب علية، 
من يتكلمون بموضوع وانطي رأيي يفشلني بنبرة كأنه منقرف مني

من اسوي شي غلك ابتلي على عمري يملخني تملخ
وصلت بي حتى يكتلني ويشمرني ابست اهلي، وترجعني امي ذليلة قبل لا يعرف ابوي، واخاف منهة وارجع، بطريقة ما رجعت اختي لعيالة بعد اكثر من سنتين زعلانة

گاعدة يمهم
كنت اني اقطع البامية وخالدة كانت تهرس الثوم
تكلمت بتململ

:والله ملييت شني كلة الثووم علية هسسة شيروح الريحة مني

عماد:جاا ماخليتي تسسوي المن جاايبينج كوون هي تسوي الثوم

:هسة انا حاطة مخدة ومرتجية ماا تشوفني ما اعرف الگعدة شلونهة واكرب ليل نهار

مجرد ما كملت كلامي شال الطاسة الاستيل الثقيلة اللي كانت خالدة تهرس بيهة الثوم وضربني بيهة صارت الضربة بطرف شفتي

تقربت علينة تراوينة الاثر
:هااجن ششووفن هذذا اثر الطااسة
رانيا:عزا ماما لعد لويش ماتدافعين عن نفسج
:ما اللي سند مبيوعة جنت
وانتي لا تضنين روحج مبيوعة ي رانيا انا لو بي ذرة حيل وعافية لوو اخووج برا السجن جاا اخذتج وشردت بيج، بس شسوي وابو المثل يگول شما كتب لمي كتبلي
كلما تكبرين اشوف ماضيي بيج ي رانيا

هي تحجي واحنا نبجي، رادت تفصل بس توسلنا بيهة تكمل

:ولجن صار الليل مااا تتعشن
مشمش:نجييب فلافل ماما كملي عااد

اييه
بيوومهة النزف فيض هدوومي وحلگي كلة ورم وهو لا گانه مسوي شي مستمر بتجبره علية
صار يعلق علية وعلى شكلي
وفلانة احسن منج وفلانة تسوة راسج، وانا سترتج وانا سسويت كذا
مووتني ششلع كلبي ششهور اخذت من حييلي
متووليني دك
يكضني بصووندة لوو بوكسيات
جدتج بسيخ الشووي الحامي لزكتة على رجلي وهذا الاثر
هو وامه وياه
بري الذمة والله يسامحة ويرحمه ويغفرله
لليوم لا تريدني ولا اريدهة لان تعرف ذنبهة طاردهة مني وصفحتهة سودة وياي

لحدما نقذتني اختي اللي التقيت بيهة بعد فراق طويل رجلهة حابسهة شهور الله رحمهة وخلاها تجي ل اهلي ودت علية ورحت

سلمت علية وهي حتى سلامهة قطعتة

امي:يع يمة اسم الله الرحمن تتصببري خن انسلم عليج

:يييمااا اسسمعي فددوة لويهج عمااد مسسحوور، اناا بعييني ششفت بت ايناس عمي كاضم  دفنت السسحر  اباابهم الضضهرية ششفتهة من الصررايف

تلگنة ييم العتبة
دفنت جيفة وشموع وعلاگة، رووحي شووفي

بجست وحجيت:جااا وووين جنننتي ووينج عننني ووولج يكطع بيية تكطع رراحت متووني من اللشط مال الصووندات

نضال:ووالعباس محد ييخليني وهذا ريلي حنى رجلة بسسستهة وماا رضى ششبيدي ششسوي لا اگدر اوديلج طارش خاف تطش السالفة ولا اكدر اططلع

امي ضلت تبجي وتتحسب، ردت ارروح قبل لا يجي عمي اليوم غدا عدنا واذا الخدامة ماكو شيفكها

امي كالت روحي بعد ماعليج اناا اتصرف
وصدك بمساعدة ناس گدرت تخلصني من السحر، عماد ماكان مشرب ف مجرد ما انشال وتفكك الله خلصنا منا

امي بوقتها اخذتة وراحت للنجف
بعد فترة رجعنا للبصرة كالو امان وارجعوو وما اعرف شنو
رجعنا اهلي بمنطقة واحنا بمنطقة ثانية
رجل اختي نضال
اهلة رادو يضلون بالناصرية ابو سوا شراكة بينة وبين الشيخ
وهي مارضت تضل كالتلة لو فركتني عن اخلي اششرد
جاابهة وعززلهة ابيت يم بيت اهلي

عماد رجع ل اسلوبة رجع يحاول يخليني اسامحة.
انا مارجعت صابنيي جمود صرت مثل الصخرة بدون اي شعور
لا يصير شي يقهر وانقهر ولا يصير شي يفرح وافرح

دوم يجي يگلي انا ادريج ما مسامحتني وكارهتني وادري بكلبج شكو
مرات يتوسل مرات يعصب ويكسر بس نادرا يمد ايدة علية لان اهلة يجلطوون
لا والله سمية النجلط جانت شيطان على هيئة مرة فتنة موو طبيعية

:عماد انت تدري زعلي ورضاي ما يأثر عليك
:ليش هيج ليلى والله مادري شصابني والله من اتذكر مدري شيصير بية وحتى روحي كارهة كفيلج علي

:عماد ليمتة تطلكني
:كطنة وشليها من اذانج
:زين اعزلني وحدي اناا هلكت بس علما يجي الفرج ونتخلص

تعصب وگلب صينية الاكل وصار يصييح
:ييياااا فررررج ولج ك...... يااا فررج وحدة صلفة مااال دك وعلي لوو ما احترمتي نفسج واحتررمتيني اذذبحج والله

طلع من البيت وهيج صارت تمشي الايام
بعد فترة
صااارت عرركة ودخل عمااد يركض للبيت جر القامة وركض بييهة
صارت عركة ومشكلة كبيرة عشائرية بدون تدخل الحكومة من  تدخلت الشيوخ والتمت الناس
انصدمت من عرفت ان السبب كان عماد وكان لازمينة وي وحدة مرت شهيد
وان علاقتهم صايرة بالتراضي وهسة اهلهة يردونه يااخذهة

بنفس اليووم  بالليل واجتنا الصدمة الثانية
عمتتي بنص الطرمة شاگة زيجها وتدعي على سمية وعلى عمي

:الله لا يووفقكم الله لاا يررضى علييكم.. سسسمية يااا بت بطني رووحي جعلج مااعرفتي  الراحة

سمية جانت واكفة وتبجي
وعمي عاف البيت وطلع لمرتة ذيج

اقتربو منهة عماااد وفؤاد يسألونها

:يمااا رااح تموووتين على كيفج ووي رووحج

فؤاد:وولج ششمالها امي ششسوويتيلهة

عمااد :يماا بسس حااجيييني

:ووولك عمااد يييما هااي ال........ تدددري بشهااب عاايش تددري وووابوووك يييدري ومخليييني بناااري محد ينطيييني خبببر وولكم لييش وووالدة انااا وماا اعررف جبيرري عااايش لووو ميييت وولج شني من گلب عدددج تششوفيني محترركة بناار وما تكلييلي عاايش، الله يلعن ببطني عسسساج متي قبل لاا اششوفج

هي جانت واكفو وتبجي..

وعماد ماا انطا ردة فعل وكانه كان يعرف مثلهم وساكت

التفت علية لگاني موسعة عييني مصصدووومة
عااف امه واجاااني سسحبني للغرفة

___________________ يتبع

والباقيات الصالحات
بسم الله الرحمن الرحيم
لا حول ولا قوة الا بالله
سبحان الله وبحمده سبحان الله العظيم

اكتبو توقعاتكم واشياء تخص الرواية ك دعم وتحفيز
و أحبكم بگد العراق😍🦋  pahrasoadاذكر المستخدماذكر المستخدم

حسابي الانستغرام

اعتذر عن الاخطاء الاملائية، ايدي هلكت وما گدرت اصحح