آعله گد أسمك
رسمت الصَفنه مرجوحه
ولگيت أسمي
طفل فرحان
بيك ويدفع بروحه
لاتنسون التصويت/متابعة الحساب/التعليق بين الفقرات🛑
بسم الله الرحمن الرحيم
قراءة ممتعة 🤍
...........................................
ريتان:اباوع صافنة على شرار والصدمة محتلة وجهي ماكدرت ابقى حسيت نفسي خلص تخبلت طلعت من غرفتي اركض ولساني يلهج بأسم شرار
فتحت باب البيت وطلعت الطلق يعبر من فوكي ما خفت ولا تراجعت ركضت وكفت على راس شرار حطيت ايدي على حلگي وصرخت بصوت موجوع وخايف
:شرااااااااررر
بقيت اتلفت مثل المخبلة شفتهم يرمون من الجهتين مسوين المكان جبهات مال قتال
كعدت محتارة شنو اسوي سحبت راسة لحضني ملابسي انترست دم جوا أذنة ينزف وصدرة ينزف القميص السمائي متلون بدمة
حضنت راسة وصوتي اختلط ويا صوت الطلق الثائر
:شراررر لالا لااااا
احس عقلي بعد ما يتحمل جسمي يرجف وحرورة دمة لزگت بجسمي
سيارتة منخولة نخل من الطلق الجام كلة متكسر
توقف الطلق وصارت الناس تطلع من بيوتها كلها التمت فوك راسي وانه احاول اكعدة ماريدة يموت من كل عقلي صرت اضرب بي ماعرف شسوي
وكفت سيارة كدامنة نزل منها جدو والبقية انصدمو من منظر شرار وريمان كعدت كدامي تدگ على خدودها
ريمان:يما شراااااار ولچ ريتاننننن شصاااار
جدو صار يبعد الناس
اجت الشرطة والأسعاف وانه ما مستوعبة شي شالو شرار من حضني بقيت صافنة على ايدة الي طاحت تهتز اصواتهم اختفت عندي عيوني متركزة على شرار
غمضت عيوني ورجعت فتحتهم حسيتهم يهزون بية لحد ما طحت بوسط الشارع ما حاسة بشي...
****
مَيان:طلعو من بيتنة وانه اخذت تلفوني الجديد خليتة على الشحن دخل وراي رماد التفتت شفتة قفل الباب يباوعلي بتلاعب
رماد:مشتاقلچ
كعدت على الچرباية ونثرت شعري
:اي اي اضحك علية مشتاقلي هوَ وهذا الشهر كلة ناسيني
اجة كعد بصفي وحط ايدة على مكان الخصر
رماد:المكابرة صعبة گوا تحملت
ضحكت وهوَ داعب انفي بأصبعة يضحك ويا ضحكتي
ضربتة على ايدة
:مسك وين
طفر على حيلة
رماد:خرب نسيتها بعدين اجيچ
ضحكت علية طلعلها يركض حتى يقرالها قصة مثل ما متعودة
ترك تلفونة هنا اخذتة اتصفح بي دخلت للأنستا مالتة اغلب الصور الي ناشرها هوَ والسيد انه مرتة ما مصور وياي بگد السيد
دخلت على ستوري شرار ناشرة قبل ساعة حاط صورتة يضحك بيها مصورها ببيتنة وعيونة ما تباوع على الكاميرا ابتسمت عرفتة چان يباوع لريتان عيونة تلمع
مخلي عليها اغنية راح اسجل روحي بأسمك
لمعة عيونة تحچي وضحكتة توضح كل الحب الي شايلة بگلبة لريتان بقيت مبتسمة ونطقت فرحانة الهم
:الله يديمكم لبعض
ويا جملتي فزيت على اتصال بتلفون رماد
باوعت للشاشة چان مكتوب عضيد الگلب عرفتة السيد كمت امشي ومشيتي بطيئة بسبب ثگلي انسد الأتصال ورجع اتصل
فتحت باب غرفتة مسك لگيتة هستوا يريد يطلع باوعلي وابتسم طلع وسد الباب على كيف مديتلة التلفون
:عضيد گلبك يتصل عليك
اخذة من ايدي وجاوب مبتسم
رماد:هلا بچتفي
اباوع لرماد شوي شوي تلاشت ابتسامتة وتحولت ملامحة لصدمة
رماد:وينةةةة اخوووويييي وينة شرااااار مااااات
انخمش گلبي ما فهمت شي بعدة يخابر وركض حافي للشارع نزلت ورا اتراجف من الخوف اخذ سيارتة وراح قفلت الباب ورجعت صعدت
جبت الشريحة خليتها بتلفوني الجديد همزين چان شاحن شوي اتصلت على متعب ما يجاوب اتصلت على رماد مشغول اتصلت عليهم واحد واحد لا جدو يجاوب ولا اخواني ولا ابوي وتلفون ريتان مغلق
ردت اموت من الخوف وحدي وما اعرف شنو صاير خفت على شرار من گال مات احس روحي انسحبت مني
اخر امل عندي ريمان اتصلت عليها عسى ولعل تجاوب والحمدلله جاوبت وصوتها يرجف عرفت تعرف
ريمان:ها مَيان فدوا لا تكولين خبر مو زين
:ماعرف شي انه طلع رماد يركض شبي شرار
ريمان:ماندري اجينة منكم لگينة شرار متمدد بالگاع ودمة بطولة وريتان فوك راسة تصرخ مضروب طلق
ضربت على وجهي
:ياااا عزا العزانييييي وشلونة شرار
ريمان:ماعرف محد يجاوب انوب ريتان طاحت علينة واخذوها بنفس الأسعاف الي اخذت شرار
سدتة مني وانه بقيت الوب وحدي كعدت مسك تبچي تكول شايفة حلم يخوف كعدت ابچي وياها انوب بطني صارت تگطعني
اشوف مسك تمسح على بطني وتبچي
مسك:صير حباب لا تأذي امك
حضنتها دموعي عشرة عشرة
:اششش ماما حبيبتي مابية شي
بس كلت ماما ضلت تشهگ ضمت راسها بصدري احتاريت شسوي البنية خايفة وانه خايفة وجاي اتوجع
اندگ باب البيت نشفت دموعي بعيوني بقيت ارجف من الخوف
اخذت مسك الي لازمة ملابسي خايفة ونزلت الباب يندگ بقوة
وكفت ورا الباب وحچيت بصوت يرجف
:منو
جاوبني ومن صوتة عرفتة
السيد:انه خوية السيد
ارتاح گلبي ورجعت كلت
:ها السيد خوية رماد راح للمستشفى
السيد:ادري هوَ دزني عليكم اخذچ لأهلچ مايصير تبقين وحدچ ويا الطفلة هنا لبسي عبايتچ وتعاي انه مثل اخوچ
:زين خوية ثواني البس عبايتي
صعدت بصعوبة لبست مسك ملابس تدفيها وانه لبست حجابي وعبايتي ونزلت والوجع مستمر فتحت باب البيت شفتة كدامي ناطي الباب ظهرة
السيد:ها بوية كملتو؟
:اي تعاي مسك
طلعت مسك تبچي هوَ بس شافها دنگ عليها شالها
السيد:شبيچ تبچين بابا
مسك:شفت بابا ميت وطالع من عندة دم
سديت باب البيت ماكدر اسيطر اقفلة ايدي ترجف هوَ انتبه نزل مسك وكال
السيد:انطي المفتاح لمسك
بدون نقاش انطيتة لمسك اخذة من ايدها وقفل الباب فتحلي باب السيارة
السيد:بس على كيفچ صعدي السيارة عالية
هزيت راسي وصدك عالية گوا كدرت اصعد
حط مسك بالكرسي الأمامي وحرك السيارة كلت بخوفة
:شرار شلونة واختي هم بالمستشفى
السيد:والله ماندري بس ان شاء الله وضعهم مو صعب لا تخافون ادعولهم
سكتت الوب همزين راح الوجع بألف يا علي وصلنة لبيت اهلي وچان الشارع مگلوب گلب شرطة وشيوخ شفت دم شرار بالگاع
بس نزل السيد الموجودين ضربولة تحية وهوَ ما هان علية احد يشوفني صار كدامي من نزلت لحد ما دخلت للبيت
اخذت مسك ودخلت ابچي شفت امي وريمان يبچن گابلتهن وكعدت ابچي ماكو خبر عنهم والقلق اكلنة اكل ريمان موتت نفسها وامي گوا تلزمها لأن تضرب بخدودها لو رجليها
لين صافنة تباوعلنة احسها خايفة اخذتهن هيَ ومسك نومتهن بغرفة اليهان ومسك سودة علية بصعوبة كدرت تنام خايفة
رجعت طلعت يمهم امي تسبح بسبحتها وريمان دموعها ما نشفت مرت الساعات وماكو خبر ومحد اتصل ساعات هلكتنة
صار الفجر ومحد نام منو يجيلة النوم بهالوضع القلق ...
****
ريتان:فتحت عيوني وبسرعة اجة كلشي صار كدام عيوني ما اهتميت بنفسي وبحالتي احس روحي تلوب على شرار چانت بيدي كانونة شلعتها من ايدي خليت الدم يتطافر اختلط دم شرار الي بأيدي ويا دمي
كمت اركض بالمستشفى شفتهم موجودين بالممر اهلي واهلة ركضتلهم ارجف باوعولي مصدومين حچيت برهبة
:شرار وينة عايش
تقرب علية جدو صفنت على ملامح وجههم الحزينة رجعت خطوتين وضحكت بجنون ودموعي تنزل
:لا لا شرار مات انه شفت شفت ايدة طاحت تهتز ما يحركها يعني مات
ركض جدو حضني حيل وذب علية البشت مالتة
الشريان:اششش ابوي انتِ مابي شي يرجعلچ والله شرير سبع
سحبني كعدني وانه اتراجف وفاتحة عيوني بخوف ما ارمش بس دموعي تطيح على وجناتي
كعد جدو بالكاع كدامي وصار يدخل شعري لداخل الحجاب
الشريان:بس اهدي لا يصيرلچ شي
باوعتلة وأشرت بأيدي الي بيها دم
:ثلاثة جدو ثلاثة انكتلو كدامي شرار الثالث اذا مات انتهي
غصيت بدموعي شهگت وحچيت
:اذا مات دفنونة سوا دفنونة بنفس الگبر
حضني جدو واجة مهيوب يمسح على راسي وحچة بتعب
مهيوب:اسم الله جدو ما يموت شرار مايموت جاي يجهز لعرسة شلون يموت وهوَ ما متزوج حبيبة روحة
باوعتلة ومديت ايدي اله
:شوف هذا دمه شوف ملابسي متروسة بدمة
دنگ على ايدي يبوس بالدم الي يابس بيها ويبچي
مهيوب:يرجع السبع يرجعلچ
بهالأثناء اجة شرطي يريد يفهم مني شنو صار بس السيد رفض لأن وضعي ما يسمح
راح جابلي ممرضة نظفت دمي الي بظهر ايدي بس ما خليتها تمسح دم شرار عمقتها وخلت عليها قطن
خليت ايدي على خدي وصفنت على ايدي الثانية ودمة ودموعي تنزل
ساعات مرت اشبه بالموت البطيئ روحي رادت تطلع وزاد خوف الجميع لأن كلش تأخرو ومحد طلع يطمنة بفد كلمة وحدة
متغطاية بالبشت مال جدو وبعدني اتراجف برد وخوف
فزينة على حيلنة من طلعت الممرضة وبعدها طلع الدكتور
احس نفسي ما مستعدة اسمع شي مو زين راد يغمى علية راحلة رماد لزمة من ايدة احسة فاقد يضرب على صدرة ويحچي بخوف
رماد:ها دكتور اخوي اخوي شلونة
دخل شفايفة لداخل حلگة وحچة
الدكتور:صار عندة نزيف داخلي وكدرتة نوقفة اخوك عايش
رجعت گعدت گلبي يدگ سريع ما مرتاحة
رماد:وينة شلونة طمني دكتور گوا واكف على رجلية
الدكتور:حاليًا فاقد الوعي تمامًا وحبيت انطيكم خبر هاي الساعات خطرة على ابنكم خلال 24 ساعة اذا ما كعد يموت سريريًا لأن الضربة قريبة على گلبة والثانية جاية بأيدة وهم وحدة شاخطة جوا اذنة الله لطف بحالة لو جاية برگبتة چان مات بوقتها بس حاليًا اكو امل يعيش ادعولة
راح الدكتور وانه اختنگت ماكدرت اكتم دموعي وصوتي صرت ابچي بصوت عالي اباوع للعلگ الي لبسنيا وگلبي ينعصر عصر چنت فرحانة ويا وهوَ فرحان ضحكنة وسولفنة وفجأه تحول كلشي لكابوس مرعب
رجعت كمت رجلية ما يحملني طلعو من العمليات واخذو للعناية المركزة صدرة ملفوف وايدة هم وبأيدة كانونة حطيت ايدي على حلگي ابچي بقهر ما خلونة نتقرب حتى
الشرطة ماكدر يتحملون بعد صارو ياخذون اقوالي اجو اهلي واهل شرار وكفو وراي ويسمعون كلامي حچيتلهم كلشي من نزلت من السيارة لحد ما اجينة للمستشفى
الشرطي:زين حضرتچ شفتيهم
:يمكن ماعرف ما اتذكر بس اتذكر چانو يرمون من الجهتين وحتى الطلق يعبر علينة من فوك وسيارة شرار تدمرت يمكن هوَ المقصود
السيد:شنو چانو لابسين؟
عصرت راسي
:ما اتذكر والله
السيد:لا تهتمون كلشي بعدين يبين دزيت ناس تشوف كل الكاميرات بالمنطقة وان شاء الله خير
راحو الشرطة وجدو كعد كدامي يحچي بحنية
الشريان:تروحين للبيت ترتاحين؟
انتفضت اباوعلة
:لا لا ابقى هنا ما اعوفة
حط ايدة على خدي
الشريان:سمعيني بابا روحي للبيت سبحي واخذي علاجچ ونامي شكم ساعة حتى من يكعد شرار ما يشوفچ تعبانة ويزعل لازم تاخذين علاجچ وتنامين لخاطري حبيبتي
نزلت راسي وتنهدت ماعرف شجاوب چان يباوعلي بتوسل ماكدرت ارفض هزيت راسي
:اروح بس اوعدني ترجعوني لشرار
الشريان:وعد بابا من تكعدين بس خابري ويجيبچ اخوچ
كومني يعدل بالبشت ويغطيني بي زين
الشريان:الدنيا باردة مو تنزعينة تدفي بي ومو ما تنامين
اجة اخوي شريان اخذني للسيارة ورجعني للبيت وانه طول الطريق صافنة الشمس هستوها جاي تطلع
وصلنة للبيت نزلت وصارت عيوني على دم شرار الي بالگاع نزلت دموعي بقهر دخلني شريان للبيت وتلگوني امي وريمان ومَيان شريان طمنهم
انه صعدت فوك اخذت ملابسي ورحت للحمام وكالعادة خليت جزء من الباب مفتوح ماحب ينسد علية باب الحمام
نزعت ملابسي ودموعي تنزل بحرگة دمة لازگ بجسمي ما يهون علية اغسلة بقيت شكد بالحمام يلا طلعت اخذت علاجي ومشطت شعري شوي شوي بدأ مفعول الدوا مالتي ونمت متناسية كلشي
وانه ونايمة چان صوت شرار وهوَ يتغزل بية يجيني
فزيت على كلمة احبچ ريتي بصوتة بقيت ادور بالغرفة انوب استوعبت جاي احلم تنهدت بضيق كمت غسلت رجهي وطلعتلي ملابس
اتصلت بجدو كال اكلي ويجيچ لبست ملابسي ونزلت اخذت اي شي كدامي واكلتة بس حتى يجوني
ساعة ودخل اليهان مبتسم
اليهان:ها ريتا يلا نروح
هزيت راسي وكمت ويا بس طلعت شفت اُزير بالسيارة سلمت بهدوء وكعدت ورا
اُزير:الحمدلله على سلامتة ان شاء الله ما يشوف شر
ابتسمت بخفة
:تسلم الله يسلمك
سكت واليهان چان جايب كيك يفتحلي ويعطيني ماعرف شلون اقنعة اكلت احچي وما يقتنع ومن ارفض اكل يهددني يرجعني للبيت وانجبر اكل چانت نفسي مسدودة
وصلنة للمستشفى نزلت قبلهم ملهوفة امشي سريع شوي وما حسيت غير وانه ملزوگة بشخص ابتعدت خطوتين شفتة رجال متوسط العمر ضل يدردم علية تخوصرت ردت ارد بس اليهان تلاحگ للوضع
اليهان:لا تركضين ترا اكو ناس هنا تمشي
اُزير:غير الناس ينتبهون ما تشوفة يحچي بالتلفون ويكهكه
اليهان:كلامك درر زيزو
باوعلة رافع حاجبة واليهان يضحك تركتهم ورجعت امشي كدامهم وصلت للمكان الي موجودين بي شفتهم على حالهم كاعدين ينتظرون سلمت عليهم وكعدت انتظر نفسهم
يمر الوقت مثل السم
شوي ودخل يرهان جايب خواتة مودة وجيهان يبچن على اخوهن بس هوَ واكف ببرود نزلت راسي عنة مالي خلگة السفيه
مودة تبچي وجدها يحضن بيها
مودة:هسة يلا عرفت ليش ما كلتولي ها خاف صدك لاگيني بالجامع
كال جدها يسايرها
مهيوب:لا جوا السيارات مال ضباط
مسحت دموعها وحچت بغرور
مودة:لا خيولون عندهم كرش اريد مهندس نفس اخوي شرار
جيهان كعدت يمي هادئة ومودة ما سكتت ابد جدها حاضنها وتحچي
مودة:عود ليش ما كلتولي جدو والله گلبي احترگ من سمعت
مهيوب:عبالنة تدرون عبالنة هذا اخوچ الغبي كايللكم
برهان فرك وجهة ما عاجبة
برهان:چنت بكربلاء مادري شفت واحد من صحبانة ناشرين واخابر عليكم ماكو بعدين تذكرت انتم ناسين واحد اسمة برهان
جدة ما جاوبة ومودة كالت
مودة:هوَ انتَ مخلصها تسخت وين نعرفك أصلًا اليوم تفاجأت عندي اخو اسمة برهان
خزرها ورجعت حچت
مودة:لا تخزر ما تخوفني اصبرلي الا اتزوج ضابط واخلي يسجنك
السيد غطة وجهة يضحك وانوب باوع لرماد
السيد:هاي اختك بعدها كلشي ماكو خوثة
باوعتلة رافعة اصبعها
مودة:ما اسمحلك مو لأن انتَ هيبة يعني تحچي علية واسكت انه لحمي مر
عض اصبعة ما يريد يضحك بهالموقف وهيَ مستمرة تدردم ما سكتت ابد تصرفاتها تشبهني انوب باوعتلي وكالت بتفاجئ
مودة:يا خطيبة اخوي
اجت كعدت يمي عود تواسيني
مودة:مايموت لا تخافين والله راد يموت هواي وما مات 3 مرات مسوي حادث بالسيارة ومرتين بالدراجة وما مات ومرا طاح من فوك وما مات بس ايدة انكسرت مسوي تعاقد ويا عزرائيل
بقيت حاطة ايدي على خدي صافنة بوجهة
:يعني شنو تردينة يموت
مودة:لاااااا اخويييي هذا حبيبي حبيبي شنو يموت بس يعني متفاجئة ليش ما يموت
السيد:ولك رماد اخذها راح تموت الرجال
حطت ايدها على حلگها
مودة:سكتت ما احچي بعد
هزيت راسي مبتسمة مبينة كلشي ماكو فاهية كلش انوب موتتني كعدت تمسح بصبغ اظافرها تكول خاف يموت شيكولون ميت واختة مصبغة شنو متشمتة حصرتني الضحكة وانه بهالوضع
چانو اُزير والسيد يحچون ورماد واكف يمهم وبرهان راح
تقربت علية مودة وحچت
مودة:اكلچ خلي نروح للحمام علية الدورة واحتاج حمام
فتحت عيوني على وسعهن چان صوتها شبه مسموع باوعتلهم همزين لگيتهم ملتهين كمت وياها جيهان بقت كاعدة اخذتها للحمامات كملت ورجعنة
رماد:وين برهان خلي يرجعكم للبيت
مودة:مادري بس لا راح
رماد:بلا جدي خابر علية بلا زحمة
هز راسة وجدو خابر طلع رايح كال اُزير وهوَ يضم تلفونة بجيبة
اُزير:انه رايح اوصلهن؟
رماد:والله ياريت ماكدر اخليهن هنا يتعبن
اُزير:زين يلا
راح رماد وياهم صعدهم بالسيارة ورجع
تنهدت بضيق فتحت تلفوني وكعدت اباوع بالستوري مالتة ناشر صورتة چان يباوعلي بيها وضاحك سويتلها سكرين
مرت الساعات واحنة كل ما تمر ساعة گلوبنة تنقبض صار العصر وماكو اي استجابة مهيوب كعد مهدود حيلة اخذو شكلولة مغذي ورجع ورماد ما كعد ابد يفتر والسيد ما راح ولا تحرك من مكانة خطية كل شوي وجايب شي لو اكل لو چاي
اجو عمام شرار وصارت هوسة همزين ما طولو وراحو لأن أمن المستشفى ما يقبلون
صار الليل اهلة بدو يفقدون الأمل كل ما يطلع الدكتور من غرفتة ويكول بعدة يصيبنة احباط بس ماكدرت افقد أملي چان عندي أمل شرار يرجع
دخل الدكتور يركض وهالمرا ويا ممرضة طفرنة على حيلنة ما فاهمين شكو ردت اموت ماكدر اتنفس لحد هسة مستغربة من نفسي شلون ما فقدت عقلي بعدين حمدت ربي لأن لطف بحالي
طلع الدكتور ركضو علية وانه رجلية ما تحملني رجعت كعدت ارجف
رماد:ها دكتوووور شبيييي اخوي
غمضت عيوني اسمع
الدكتور:الحمدلله المريض رجع لوعيه
تنفست براحة ونزلت دموعي اشوف رماد حضن السيد فرحان اجاني مهيوب يبوس راسي
مهيوب:شوفي مو كتلچ شرير سبع يرجعلچ مابي شي
:الحمدلله ياربي الحمدلله
صارو يستفسرون عن حالتة كاللهم راح ينقلونة لغرفة ويمحتاج شوية وقت حتى يرجع لكامل وعيه
الكل صار يحمد ربة اتصلو على الكل وطمنوهم
شوي ودخلت الماس تبچي راحلها رماد وهيَ حضنتة
الماس:ولك يماااا رماد شلونة شرار انگطع نفسي من كلتلولي
رماد:زين يما زين هسة يلا كعد راح ينقلونة لغرفة
ابتعدت عن حضنة جاية ويا اخوها اجت حضنتني تبچي
الماس:ما لحگ يفرح بيچ وليدي چان طاير من الفرح سودة علية
صرت ابچي وياها انوب راحت لمهيوب وهوَ يهديها
الماس:من المطار اجيتكم للمستشفى اركض
مهيوب:مابي شي بنيتي لا تخافين
سلمت على الكل بس جهاد حتى ما حچت ويا وهوَ خاف من هاي جيتها لأن تأكد راح ترفع قضية طلاق
كعدت يمي تبچي على ابنها
شوي وطلعو شرار من الغرفة بس عيونة فاتحهن بعدة ما راجع لوعيه بشكل كامل ما خلونة نتقرب من عندة اخذو لغرفة وكالو كل شخصين يشوفونة سوا دخلو اول رماد وامة شافو وما طولو عشر دقايق انوب رادو انه ادخل بس رفضت دخلو ابو وجدة وهم طلعو ودخلت انه
بس فتحت الباب دموعي نزلت عشرة عشرة
:شرار
دار وجهة علية بس شافني ابتسم وهمس
شرار:اخخ الله
ركضت حضنتة بخفة اخاف تتأذة جروحة وهوَ ساكت
:خفت عليك انه شصار بية ردت اموت والله
همس بتعب
شرار:اشششش رئتاي اششش
بست صدرة الملفوف وهوَ رفع ايدة على ظهري ما يكدر يحچي شي من التعب كال بتلكؤ
شرار:ريتي ر روحي للبيت
رفعت راسي اباوعلة مبرطمة
:شلون اعوفك
شرار:ما تعوفيني اموتچ ا اذا ع عفتيني روحي لبيتكم ماريد احد يشوفچ هنا
هزيت راسي بستة بخدة
:صير زين بسرعة
أشرلي ادنگ ما فهمت شكو دنگت وهوَ خطف بوسة من شفايفي بوسة سريعة
شرار:راح اصير زين ريتاني
دخلت الممرضة طلعتني من الغرفة باوعتلهم وحچيت ببچي
:يكول روحي للبيت بس اريد ابقى
لزمني جدو
الشريان:هاي تطمنتي علية خلي ياخذچ اخوچ للبيت لا تبقين هنا هسة يجون اصدقائة واهلة وهوَ مايريد احد يشوفچ
هزيت راسي وصدك اخذني شريان للبيت ورجع هوَ للمستشفى طمنتهم حچيت ويا وصحتة تمام
بقيت طول الوقت اهز برجلي ومگابلة صورتة لو اشوف صورنة سوية الي يصورها ويدزها الي
دخلت مَيان حاطة ايدة ورا ظهرها
مَيان:كومي يلا اكلي لگمة بيها خير لا تتعبين
:ما اشتهي مَيان
مَيان:افااااا تردين عزيمة ابني؟ كومي يلا ولچ تعبانة ظهري احسة مكسور يلا امشي لا تخليني واكفة
كمت وياها كعدنة ناكل بدون نفس بس حتى نستد طولنة مسك كعدت بصفي وانه متعودة احط عكسي على رجل جدو من يكعد يمي هسة حاطتها على رجلي
مسك:شفتي عمو مو زين
ابتسمت
:اي زين لا تخافين
مسك:هسة انتِ حاملة
غصيت بلگمتي وباعت للكل بصدمة
:شنو
مسك:مَيان هم هيچ ابوي تمرض وصارت حاملة يعني انتِ حاملة
مَيان:عيب حبيبتي شهالكلام كملي اكلچ
رجعت تاكل شككتني بروحي شوكت حبلت
كملنة اكل واسينا خطية غسلت المواعين ورتبت البيت
صار ثاني يوم رفضو اروح لأن اكو زلم بالمستشفى وهم التحقيقات مستمرة كلش ضجت اريد اشوفة مرت يومين ونفس الشي هوَ رافض اجي حتى خاف احد يشوفني
صارلة 5 ايام بالمستشفى وطول هالأيام اتوسل بيهم اروحلة وكلهم رافضين ابقى ابچي لحد ما امل
بالليل دگ تلفوني اخذتة ودگ گلبي منك شفت اسم شرار بسرعة فتحت خط
:شرار شلونك ما يخلوني اجيك ابچي وما يقبلون
جاوبني بصوت راهي
شرار:حبيبتي انتِ گلبي انه ماريد تجين صح مشتاقلچ بس المستشفى متروسة ترس زلم جايين علمودي
:بس اريد اشوفك
شرار:باچر راح اطلع للبيت تعاي لبيت اهلي
حچيت بلهفة
:صدكككك يعني صرت زيننن
شرار:زين انه حبيبتي من بستچ هذاك اليوم صرت زين
خليت اصابعي بحلگي خجلانة وهوَ ضحك بتعب
شرار:والعباس تحبيني
:لا ما احبك ليش احبك
ضل يضحك انوب سدة مني بقيت اطفر فرحانة بتحسن شرار نزلت بشرتهم باچر يطلع جهزت نفسي لباچر من الفرح حفيت وجهي وسويت سكن كير چانن طالعاتلي هالات كلت عادي اخفيها بالمكياج
اريد الوقت يمشي بسرعة ويصير باچر
نزلت جوا حاطة ماسك شافتني مَيان وضحكت
مَيان:تكول ما احبة
:ها اي ما احبة اريد اهتم بنفسي
عوجت حلگها
مَيان:ابصملچ بالعشرة مال ايدي وبالعشرة مال رجلي انتِ تموتين على شرار تتنفسينة تتخربطين بس على ذكر اسمة تعشقينة
حركت كتفي
:دوخري ماحبة
عفتها وصعدت فوك اضحك
ثاني يوم كعدت قبل الكل سبحت عبالك عروس شسورت شعري خليت مكياج يخفي تعب وجهي ولبست بنطرون وقميص وكوت اسود واصل لجوا ركبتي غرگت نفسي بالعطر
نزلت الهم لكيتهم جاهزين مَيان وريمان يهزن حواجبهن
رحنة انه والبنات بسيارة شريان وجدو وابوي وامي واليهان راحو ويا السايق طول الطريق اهز برجلي اريد اوصل قبل لا يجون
وصلنة ونزلت متلهفة چانو اكو هواي زلم بالباب دخلنة جوا وصرنة نسلم على الموجودين اغلبهم ما اعرفهم وريمان تعرفني بيهم
كعدت على اعصابي الماس جاية وكل شوي حطت ايدها على رجلي تهديني بس سمعت صوت السيارات طفرت وكفت بباب المطبخ والبقية وراي
فتحو الباب كلة ودخل شرار ساندة رماد يمشي طبيعي بس حاط ايدة على صدرة بس شفتة ما كدرت ما ابچي روحي صارت تلوب
رفع راسة باوعلي وابتسم گلبي رجع يرگص ذبحو جوا رجلة خروف
تقدم علينة وامة ما تحملت راحت حضنتة وهوَ اشرلي ابقى بمكاني
باس ايد امة اول مرا اشوفها هيچ متأذية الضنا غالي
رجع يمشي ناحيتنة وصل وانه ذبيت نفسي بحضنة حط ايدة السليمة على ظهري يبوس براسي
شرار:مابية شي مو هاي رجعت ليش البچي
ردت ابتعد عن حضنة ما خلاني تقرب لأذني وهمس
شرار:بوسيني حتى اطيب
ضحكت بوسط دموعي وكفت على اصابعي وبستة بخدة يلا عافني وكفت بصفة اجن خواتة تحمدلة السلامة ولين كلش تحبة تريدة يشيلها وما يكدر انه اخذتها ومسك راحت لأبوها
مسك:بابا عادي ابوسة
ابوها ضحك وهز راسة رفعها رماد حتى تبوسة بخدة بس شرار دوم يخبث وياها باسها على حلگها
مسك:انه اعرف انتَ ما تنعدل بعد ما ابوسك
ضحك عليها
شرار:شسوي احب الحلوگ
فتحت عيوني على وسعهن ونزلت راسي الكل ضحك على كلامة وهوَ مامهتم دخلو بغرفة امة چانو مجهزينها اله حتى يرتاح بيها والعصر يستقبل الناس امة مسويتلة اكل جابتلة وغمزتلي
الماس:يلا احنة طالعين وانتِ ماما وكلي خطيبچ
هزيت راسي حطت الأكل على الميز وطلعت بقينة وحدنة باوعتلة ابتسم وأشرلي اجي رحت كعدت على الچرباية كدامة
شرار:نزعيني القميص اختنگت من الشاش ومن القميص هم
مديت ايدي افتح بأزرار القميص هوَ زفر نفس قوي
شرار:بعرسنة هم نزعيني
تركت القميص اباوعلة
:تأدب
ضحك ولزم ايدي باسها
نزعتة القميص وكعدت اوكلة بأيدي نظراتة توترني رفع ايدة فتح حجابي وانه چانت بس رافعة شعري فتحة ونثرة
شرار:شبعت تعاي نامي على ايدي
باوعتلة بحيرة كمت نزعت حذائي والكوت خليتهم على صفحة تمددت على ايدة متوترة اباوعلة واكل بشفايفي لزم حنچي بخفة وابهامة يتحرك على شفتي بنعومة چانت مجرد افعال بسيطة بس افقدتني صوابي
باسني بشفتي وانه خليت ايدي على خدة فتح دگمتين من قميصي لزمت ايدة وابتعدت
:لااا
شرار:ماريد شي
تركت ايدة هوَ نزل نفسة ودفن وجهة بين رگبتي وصدري وايدة متغلغلة بشعري
شرار:خفت اموت وانه ما شبعان منچ
:اسم الله عليك
طبع بوسة على رگبتي رجفتني وهمس
شرار:حلمت عدنة بنية صغيرة وانتِ حامل چنت كاعد اخلي بشعرچ ورد اتذكر بستچ چان كلش حلو
ابتسمت اكل بشفايفي
:تريد تصير عندك بنية؟
شرار:ماكو احلى من البنات اتمنى يصير عندي عشرة مو وحدة هاي مسك ولين وبنت متعب ميت عليهن
:واذا ولد؟
شرار:عادي المهم من عندچ
خليت ايدي على راسة امسد بشعرة لحد ما ثگلت انفاسة عرفتة نام كمت على كيف بدون ما يفز هوَ علاجة قوي مايكدر يكعد قبل الساعتين
لبست حجابي وحذائي والكوت رتبت حمرتي وتأكدت ماكو بحلگة حمرا يلا طلعت لگيتهم كاعدين كعدت بصف ام رماد اباوع رماد لازم بطن مَيان فرحان لأن الطفل يتحرك وريمان وشريان ملتهين بلين
الماس:ان شاء الله انتِ هم يصير عندچ بسرعة وبدون ما تتعبين
باوعتلها مبتسمة بخجل شوي وكامت
الماس:يلا انه اروح كل يوم اجي اطمن على ابني
كام رماد لزم ايدها
رماد:ابقي؟ اخذچ لبيتنة
طبطبت على ايدة
الماس:اخواني منتظريني ان شاء غير مرا
رماد:مو ترجعين لدبي اريدچ متواجدة بولادة مَيان
الماس:لا ما ارجع بعد ورا عرس شرار اروح
هز راسة وصلها للباب لأن اخوها جاي عليها ورجع ابوهم ما يبقى من هيَ موجودة ما يكدر يتحمل ويضعف كدامها بس لو اعرف شلون هان عليه يتزوج عليها الماس ما ناقصها شي
بقيت كاعدة اهز برجلي واباوع للساعة حتى من يكعد شرار نعرف وكل شوي اروح افتح الباب والگا نايم
****
مَيان:كاعدين نتتظر شرار يمعد حتى بعد نروح لبيتنة وثاني يوم نجي رماد تعبان صارلة 5 ايام بالمستشفى خطية بس يسبح ويرجع طول هالأيام ما شايفتة بس اتصل علية كل يوم
كعد شرار الحمدلله زين بقو اهلي عندهم واحنة رجعنة لبيتنة
همزين البيت نظيف مابية انظف بس غرفتنة من ورا رماد مگلوبة گلب الملابس بكل مكان الميز مخربط
راح تمدد على الچرباية
رماد:تعاي بحضني من اكعد انه انظفها
:دشوف هوسة ما ارتاح
رماد:من نكعد حتى نكون نشيطين
كال اخر كلمة وغمزلي ضحكت علية رحتلة مسك بقت بغرفتها هيَ وايبادها اذا لزمتة تنسى العالم كلة
حضنت رماد صار هواي بعيدين عن بعض
ثاني يوم من الصبح رحنة لبيت اهلة والكل موجود عمامة ونسوان عمامة والبقية واهلي هم جايين شرار مكعدينة بالصالة وريتان جاي توكلة هوَ يكدر ياكل بس يتدلع عليها وهيَ حابة هالدلع
سلمت من بعيد لأن مابية افتر عليهم انه همزين شايلة نفسي وابني
كعدت بصف امي اتنفس سريع باوعتلي اسعاد
أسعاد:شنو بيچ توم
ابتسمت
:لا واحد بس انه سمنانة
أسعاد:عبالي توم بطنچ چبيرة
امي كعدت تسمي علية وتحصن بية محد قابل على كلامها لأن حتى ما صلت على النبي يماااا خفت على ابني
دخل رماد لازم السيف
رماد:لقد ارسلني اليكم الحمزة وقال اهلك كلهم گوا**يد
كلهم صفنو علية هوَ اشر على وحدة من نسوان عمامة
رماد:انتِ ارسلني اليكِ عزرائيل حتى اخذچ
لطمت على صدرها
مرت عمة:ياااا يما شمسويتلك
رماد:عادي احب اچتل بيكم
باوع لشرار وحط السيف ببطنة
رماد:بلا خلي ازرف بطنك اشوفك تموت
شرار:لا ما اموت بس اضل انزف عسل
رماد:زيچ زيچ واحد منكم يتلاحگلنة بزيچ
ضم السيف وكعد
رماد:ياريت انه بعهد النبي چان هسة انه احد المحاربين العظماء
امة طگت ايد بأيد وكالت
الماس:بالفعل اعظم محارب بالبوس والأنحراف
ضحكو على كلامها وهوَ هز ايدة
رماد:تغارون مني لأن حلو
ضل يتداهر وياهم وكل شوي ورفع السيف على بطني ويصيح
رماد:انتَ تطلع لو شلون شيبت راسي صارلها سنة حامل بيك حتى الفيل مو هيچ
باوعتلة مسك وكالت
مسك:انتَ أصلًا راسك مشيب حتى وجهك شنو بيبي منگعتك بحليب
انفجرو بالضحك وهوَ يباوعلها من فوك لجوا
رماد:فوصة شسويلچ
كعدت بصفة تحچي ويا كلش احب علاقتها بأبوها امها تزوجت وبس الأحد تشوفها ساعة وحدة ومرات ما تجي همزين خلصت منها بس والله فوخت گلبي من كتلتها
صارت عزيمة وناس هواي اجت
مرت الأيام وكل يوم يجون لشرار ناس يترسون المضيف ونسوان هم
****
ريتان:مرت يومين وانه كل يوم اجيهم اخذت اجازة من جامعتي ماكدر اعوفة وحدة
باليوم الثالث رحت وصلني شريان بعد ما سلمت على الكل رحت لغرفتة فتحت الباب وهوَ دار وجهة زعلان ابتسمت دخلت وسديت الباب
:شرار
ما جاوبني كعدت بصفة لازمة ايدة
:اخوي چان يسبح وتأخرت
باوعلي ما عاجبة
شرار:چا بوسيني
ردت ابوسة بخدة ابتعد
شرار:لا مو هنا هنا
أشر على شفايفي باوعتلة بتورط تقربت علية وبستة بقلة خبرة بوسة سطحية ردت اوخر بس حط ايدة على ظهري وجذبني ناحيتة واخذ شفتي ببوسة قوية رجفتني صرت احرك شفايفي كردة فعل وهوَ انجن
ابتعد عيونة ذبلانة
شرار:هيچ تصير المصالحة
:احم تريگت؟
شرار:اي بس لأن مو من ايدچ مو حلو
بقيت ارمش وهوَ يضحك علية باوعت لجرح صدرة ابلعم ورجعت اباوع بعيونة عضيت شفتي نزلت عيونة الذايبة عليهن
تقربت عليه اكثر وهمست بصوت يرجف
ريتان:شرار...
.
يتبعع
توقعاتكم 🫣🫣
شنو رأيكم بالبارت🙂🙈
ريتان ما اعضها براسها
.
.
.
ضيفو حساب الانستا
وقناة التلي
اللهم صلِ على محمد والِ محمد 🦋
مها ال عبدالله