نوائب_شام
بقلم ايلول 💚
تصويت وتعليق بين الفقرات لطفًا 🦋
""""""""""""""""""""""
انتَ خليك بمكاني
نهر وتعوفه الجروف
انتَ الحنين قسيت
شلون ترحمني الظروف
"""""""""""""""""
رويــده :: جريتها من أيدها جسمي يرجف مادري وين انطي وجهي وهي ما واعيه على نفسها صعدتها بالسياره وخليت الطفلة بحضنها
اريد اركض الهجام وعباتي لان تبللت بالمطر صارت تسح وراي
سحكتها وعثرت طحت على وجهي روحـــي شاطت ورجعت بسرعة كمت ارجف
- هجــام كوم هجــام البنيه راح تموت.
وهو بس فاتح عينه ويحاول ينطق همس
- رجليَ.
بجيت عاجزه وهو مايكدر يتحرك وصريخ شــام يفلش الگلب
صرت بصفه ساندته وكف ورجلي يرجفن. رجع طاح على اركبه واني الطم كعدت كدامه امسح بوجهه واحجي ميته خوف
- البنيه راح تموت راح تموت لا تعيد نفس الوجع تكدر تكدر هجــام تكدر تعال .
جلب بايدي ومشه يرجف كله صعد بالسيارة واني صعدت يم شــام حاضنه الطفلة الصدرها مفرفحة روحها جريتها من أيدها اهتز كلي وهجام ساق السيارة حرف ما نطق كل مسافة يعبرها نتفادى بيها حادث الحد ما وكف كدام مستشفى عفتهم ونزلت اركض البنيه بأيدي وصوت شــام وراي تكمز روحها شايطة
اخذوها من أيدي يركضون ويسألون واني ما اعرف شي وشام ما واعيه تجاوبهم بس تردد وترجف
- بنتي ماتت بنتي ماتت ،هجــام ما شاف بنتنا ماتت ماتت ، درت بالي كلش درت بالي حتى من يرجع اكله هاي بنتنا هاي ماتت ماتت
جريتها الصدري حضنتها بكل قوتي ابجي بحرگة
- اشش شــام شــام .
احجي وحاضنتها ثگلت بايدي وماكدرت الزمها طحنا ثنينا بالكاع
يابه شصار بحالي وين اروح ومنو يعيني فرفحت أصرخ جابو سدية ودنك ممرض يريد يشيلها نجرت من أيدي رفعها هجــام بحضنه خلاها على السدية واخذوها وهو يباوع وراها بعيون حمر رجع باوعلي مسحت دموعي ووكفت كدامه رفع ايده ترجف أشر وحجة بصوت مخنوگ
- بالرسالة بالرسالة كاتبة عندي شي عزيز تقصدها ها تقصدها .
تقربت الزم ايده واخفف رجفتها تحز بگلبي اخوي السبع هيج يرجف وتصرفاته بضعف ، من جانت شــام وياي شكيت بيها وسكتت ومن قريت رسالتها وكتبت شي عزيز شبهه تأكدت ، جر ايده من عندي بنتر طلع من المستشفى مشيت وراه روحـــي منتهيه شفته كعد بباب المستشفى بنص المطر
رجعت دخلت الشام بس شفت الدكتور يمها عفتها ورحت ادور على الطفلة اريد احد يطمن گلبي احد يدليني وين امشي اسند منو منهم وانا المحتاجة احد يسندني افتر على الدكاتره واحد واحد بس كلولي عايشة وحده من الممرضات لزمتني
- اي اي حبيبتي عايشة .
حجتها وراحت تركض كعدت بالكاع لامه رجليه الصدري ربي ارحم بحالنا لا تفجعنا اضيع والله أضيع اخوي هالمره يموت وشام شــام شيصير بحالها .
نص ساعة مرت واني بين شــام وبين بنتها وهجام كل شوي اروح اباوعله من باب الطوارئ الكاه بالباب على نفس الكعده ، كالوا افتحي فايل للطفلة
- شنو حالتها تگدرين تطمنيني ؟
دارت وجها وراحت ساكته واني مدري شصار بيه كمت احس گـــلبي يدك براسي وعيوني شاطن سندت روحـــي على الحايط لا اكدر اروح للطفلة جوا ولا اكدر أبقى يم شــام بالطوارئ .
دقايق وأشوف هوسه صارت بباب الطوارئ وواحد يصيح على واحد جيبوا سديه هستوني اكول الله يعيني ويعين كل شخص عنده مريض على بالي واحد من اهل مريض طاح ، هستوني اكول اليشوف هم غيره يهون عليه همه والمحه هجــام اثاري الهم ناوي على گـــلبي ينلم
جمدت بمكاني بس فاتحة عيني وهو بالسدية وايديه طايحات منا ومنا ثگل نفسي لا يا رب هو الوحيد المقويني وجابرني اتحمل كل مر واصبر بس هو بس هو ،. كمت بلا ما احجي امشي وراهم وعيوني مغوشة هاليوم اختبرني باصعب طريقة .
يحاجوني واني فاصلة دخلت يمه اباوع لوجهه وهم يقيسون بالضغط والسكر واسمع ممرضة تصيح منو ويا شــام .
رفعت راسي الها بين شــام وهجام حاجز عفتها وعيوني عليه طلعت كوه احجي
- اني اني ويا شــام .
خلت ورقة بأيدي
- جيبي هاي الابره من برا .
لزمتها أيدي ترجف ماشايله ولا فلس رجعت الهجام علكوله مغذي وابره اباوع الايده الثانية تنزف مشگوگة وهم يعقمون بيها وواحد ثاني يحضر بالخيط اخوي الما اعرف شنو حاله تقربت يمه ادور مفاتيح السيارة ما لكيتهن .
رجعت طلعت كوه امشي الكاع احسها توديني هيج وترجعني هيج طلعت للباب اباوع لمكانة الجان كاعد بيه لمحت سويج السيارة اخذته وطلعت للشارع اخذت تليفونه إتصلت على حيــادر ارجف يطلعلي مغلق ، اتصلت على غــزل جاوبتني افاطم خايفة
- افاطم حيــادر اجاكم ؟
- اتصلنا عليه مغلق ، لكيتوا شــام ؟
- اسمعي اقفلن الباب زين ولا تفتحنه بدون ما تباوعن للكاميرا .
سديت التليفون منها روحـــي رايحه ادور بالارقام بأسماء الولد نسيت هو مسجلهم بالقاب. دكيت رقم يُســر. مختنگة ودموعي تچوي خدي رأسًا جاوب
- الو ، يُســر .
- رويــده ؟ شكو ليش تبجين .
- عفيه اني وحدي ظهري انكسر تعالوا .
واسمعه يصيح على موسى ويركض يسأل ويحجي بسرعة حجيتله باختصار وسديت التليفون اخذت فلوس من محفظة هجــام وطلعت ما اندل منين اشتري ليل ومطر وانا وحدي حايرة افتر بالشارع
دلوني على صيدلية امشي وادعي بتعب بس كون هاليوم يعدي بلا مايفجعني قابلة قابلة أبقى اشهر بالمستشفى وأركض بينهم قابلة بكل التعب بس لا ينفجع گـــلبي وگلبهم .
رجعت للمستشفى كوه اتنفس وملابسي مبللات ، البرودهً كمت أحسها بعضامي تدك عفت شــام وهجام ورحت بس اريد اشوف الطفلة بس يقتنعون يدخلوني أشوفها وكوه اقتنعوا دخلت ويا ممرضة
- والله ما لازم احد يجي يمها كلشي يأثر على صحتها .
هزيت راسي موافقة
- بس دقيقتين بس اشوفها .
شهكت گـــلبي نچوة واني اشوفها الصونده بحلكها ولازكينها منا ومنا ايدها الصغيره مزرفة اثار الابر وهم يدورولها وريد ، والاجهزة اليمها توجع الگلب ، كعدت على اركبي كدامها اخاف اتلمس حتى ايدها
- يا روح عمتج من صحتي الصحتج ومن عمــري العمرج اللهي طلعها سالمه الي اللهي ارحم بحال اخوي وامها ولا تكسرهم بيها .
مسحت دموعي گـــلبي متفلش شوفتها بهيج حال ذبحتني طفلة طفلة وين تتحمل وجع المغذيات والابر صدرها يصعد وينزل بوضوح ، حاجتني الممرضة كمت كوه على روحـــي المتعوبة طلعت من يمها احس الدنيا صارت هلكدوتها بعيني رجعت رحت للطوارئ لكيت هجــام يفتر بعصبية وولد يحجي وياه وهو جار المغذي من أيده والدم على الكاع
- هجــام .
حجيتها والتفت بلا وعي اجه عليَ
- وين وينهن .
- تعال اكعد بس على كيفك .
- البنيه وين رويــده ؟
- خلوها تحت المراقبة ، وشام هاي يمك .
سحبته للغرفة الممرض سكت من شاف حالته بس يأشرلي سوي هيج وسوي هيج خليت لاصق على أيده
- نام خلي المغذي يكمل .
هز راسه لا وطلع يمشي بسرعة وآني وراه محد قبل يدخله يشوفها كعد بالكاع عاصر عيونه قوي كعدت كدامه ميته خوف يردد بهمس
- لا تموت لا تموت .
- اششش هجــام زينه بنتك زينه اششش تعال نشوف شــام .
نتر أيده من عندي وبقى كاعد بمكانة ، عفته ورجعت الشام على نفس وضعها حولوها منً الطوارئ للمستشفى واني من كد ما گـــلبي تعب ، كمت اسمع وما انطي اي ردة فعل
ساعتين ودك تليفون هجام بأيدي
- ها حيــادر
- وين انتوا شنو اسم المستشفى ؟
- حيــادر روح للبنات وحدهم اخاف عليهم
- يُســر كال موسى راحلهم احجي يمعوده وصلت انا اسم المستشفى شنو ؟
انطيته اسم المستشفى ويسر هم رجع اتصل كال
- حيــادر راح يوصل قبلي
- اي
- لا تخافين .
سكتت مختنگة يا ما اخاف كال
- جايينج احنا انتِ مو وحدج لا تخافين ما ينكسر ظهرج واحنا موجودين .
- منتظرتكم .
سديت التليفون ورحت الهجام كعدت بالكاع يمه
- هجــام .
غمض عينه سحبت راسه اسنده على كتفي وايديه بايدي
- يا روح اختك
- اذا تموت اموت
- هسه تصير زينه وتدخل تشوفها .
غمض عيونه يتنفس بتعب هيج بقيت ساندته الحد ما رجع حيــادر إتصل واجه مرعوب احس اخذ من حمل كتفي من وصل رأسًا حاسب وجر هجــام اخذه يغسل ، رجعت يم شــام بدت تصحى وتهمس
- ماما حبيبتي.
- شــام
فتحت عيونها بثگل وجها احمر وحالها يفلش الگلب باوعتلي. ونزلن دموعها
- بنتي .
- زينه زينه منتظرتج .
كعدتها عدل وهي روحها رايحه
- عفيه رويــده بنتي بنتي .
- بس تستقر حالتها يطلعونها
بجت ضامه وجها بين أيديها سحبتها الصدري وهي تحجي بقهر شلون ولدت بالسابع وتعاتب ليش سافرنا وعفناها وخرتها من حضني مصدومة هستوي أسألها والتفتت على دخول هجــام فزت تباوعله مفرفحة وهو عيونه حمر وميت قهر تقرب بهدوء كدامها . يحجي من بين اسنانه
- ليش شردتي ؟ احاجيج ؟
سديت حلكه اتلفت
- اشش هجــام احنا بالمستشفى .
دفعني ما مهتم فقد وشام تباوعله بحرگة كالتله
- تحاسبني بهالوضع تحسابني ؟
- اشش جواب واحد ليش شردتي ليش اخذتيها من عندي ليش ؟
رويــده :: اشش هجــام شبيك كتلك ليش شردت وفهمتك .
نتر عيونه دم
- لا، جانت تگدر تسأل اذا انا طلعت لو لا تكدر تدز احد يستفسر بس هي
شــام :: ومنو كال ما دورت منو مو عفتني وسافرت مو حرت بس بروحك انتظرتك تطلع وتلكاني جنت كل يوم اكول بس يطلع هجــام راح يلكاني يدور الدنيا ويلكاني اثاري هجــام ما صدك اني ما موجوده رأسًا سافر .
رويــده :: التفت هجــام يضحك باستهزاء يباوعلي
- هاي شتحجي ؟
رجع باوعلها بعصبية
- شتليصين انتِ شــام شــام ؟
رويــده:: جايه جايه البيت خاله وخاله كايلتلها سافروا
التفتت الشام امسح بوجهي
- ما مسافرين احنا هجــام من يوم طلع يدور عليج الليل ما ينامه ما خله مكان ما دور بيه .
بجت وهي تحلف
- والله كالتلي سافروا ورجعت ست زينب دزت ابن عمها لكت البيت فارغ .
هجــام :: وشلون صدكتي انا أسافر واعوفج ؟ شلون ؟
وشام ما تعرف شتحجي بس تبجي ، اجه يُســر وهجام متحلف بخالة رأسًا كاله
- أمك الا الوع گلبها مثل ما لوعت گـــلبي
ويسر ساكت ما فاهم طلع هجــام من المستشفى ، حيــادر يفهم بيسر وجهه نحمس فشلان ومقهور ، بقينا بالغرفة يم شــام الما بطلت بجي
يُســر يحاجيها وحيادر يحاجيها وهي تضم روحها بحضني وتبجي ميته قهر رجع هجــام دخل يرجف ، كاموله الولد بخوف يردون يلزمونه وهو يدفعهم ويصيح
- ما بيه شي
ويرجع يميل يريد يطيح ويسند نفسه ومايخليهم يلزمونه الحد ما طاح بدون ما يفقد وعيه جلب بيه حيــادر
يُســر :: هسه من تكعد ويخلولك مغذي يطير نصك ؟ شبيك شبيك ؟
- مابيه شي
حيــادر :: كوم كوم يابه ترا مرمرتنا أسمع الكلمة مره مره
- مابيه شي .
حجاها وطاح على وجهه بحضن حيــادر فاقد كمت من يم شــام وهي نزلت من السدية ترجف وتبجي خلوه حيــادر ويسر على السدية وطلع يُســر ركض صاح للممرضة. دخلت للغرفة بسرعة تشوف هجــام فحصته رجعت خلتله مغذي دارت وجها تباوعلنا عاكده حاجبها كالت الشام
- مو جنتِ انتِ المريضة ؟
هزت راسها اي تبجي رجعت الممرضة تباوع الهجام عافتنا وطلعت كعدت شــام بالكاع تنزل بالدشداشة على رجليها يُســر طلع وحيادر راح للدكاترة يريد يشوف وضع الطفلة اذا يسمح ينقلها البغداد ، بجت شــام ضامه روحها بحضني
- شكد احتاجيتج رويــده شكد ردتج .
- مرمرتيني شلون انطاج كلبج تعوفيني وترحين ؟
وخرتها من صدري امسح بدموعها كالت
- اريد اتصل على ست زينب تجيبلي ملابس
شــام :: اخذت التليفون من رويــده دكيت رقم ست زينب اكتبه غلط بجيت عاجزه
- نسيت رقمها .
اخذت التليفون من ايدي
رويــده :: إهدائي غمضي عيــونج ورددي الرقم اني اكتبه .
غمضت عيوني روحـــي رايحه واتخيل الرقم كدامي مرسوم ارد رقم رقم اتصلت رويــده وانطتني التليفون انتظر ردها بخوف لان ما متأكدة اجالي صوتها تبجي
- الو زينب .
- شــام
- اني بالمستشفى
بجت تصيح
- شــام ، عمو هاي هاي شــام اتصلت ، وينج ولج وينج متت من الخوف متت .
- بالمستشفى اني ، بنتي تخربطت وابوها اجه ، زينب اني بدون عبايه جيبيلي عباية وملابس هم .
- جايتج ، من اوصل اتصل على هذا الرقم ؟
-اي .
سديت التليفون منها
-رويــده أريد أشوفها.
-والله ما يقبلون صدرها كلش تعبان وعدها التهابات خلي تتعدى هالمرحلة وتشوفينها .
شوية ورجع يُســر بأيده علاكه مدنك ويحجي
- هاج رويــده .
وكفت اخذتها من أيده بيها ماي وعصاير تحسر كال
- ما لكيت احد يبيع ملابس هنا حتى اجيبلكم ، الوقت متأخر كلها معزله .
عفتهن على جهه حيــادر رجع كال للصبح اذا صارت زينه نكدر ننقلها البغداد وحتى للبيت احتمال يطلعونها ، وكل ما يجي واحد يريد يطلعهم حيــادر ينطي فلوس ويسر يدور وجهه يستغفر ومن يجي يمه حيــادر يكله
- الرشوه حرام عليك وعليهم .
حيــادر:: المستفاد انتَ هم تستغفر تحصل اجر وهم ما يطلعونك
سكت يُســر كاعدين كلنا يم هجــام الحد ما فز يفز بخرعة يكعد على حيله ويباوع برعب ركضت يمه
- اسم الله اسم الله
مسح وجهه تعبان
- البنيه ؟
حيــادر :: رادت تجي تشوفك ما خليناها ، صدك جذب شبيك كول يا الله
زفر نفس واني كاعده كدامه خايفه سند راسه على كتفي يحجي بصوت ناصي مايريدهم يسمعونه
- اسأليها شنو أسمها ؟ بنتي شنو أسمها.
التفتت اباوع الشام
- شــام شنو اسمها ؟
سكتت تباوع الهجام ، حيــادر ويسر طلعوا من الغرفة كام من السرير كعد مقابيل شــام مسحت دموعها
- انتظرتك انتَ تسميها لليوم هي بلا أسم.
دنك ساكت رجع باوعلها
- شكد عمرها ؟
- ثلاثة أشهر ، لان ولدتها وهي بالسابع ، عملية .
- ليش ما سميتيها ؟
- انتظرتك .
شــام :: حجيتها وبجيت گـــلبي يوجعني نظرات هجــام الي عبالك غريبة كدامه رجعت اباوعله كام طلع من الغرفة بجيت ميته قهر
رويــده :: شــام كافي بجي ترا هجــام مو زين ما تدرين شنو الصار بيه ، رجع للمصح خمسة أشهر هو بالمصح ومن طلع ما راجع اي دكتور الا يلكاج رجع النقطة الصفر ابد لا تنقهرين من تصرفاته تعبان والقرآن تعبان لو تشوفينه من ينام شلون يصيح بوجع شلون يفز ويباوع على باله بعده بالمصح .
هزت راسها لا ما الومه رجعت زينب إتصلت ما يقبلون يدخلونها طلعلهم حيــادر وهي اجت ميته خوف حضنت شــام وتبجي وياها
جايبة ملابس الي والشام بدلت بقت ويانا للصبح هجــام يباوعلها بحقد وهي كل شوية تكول الشام
- تاخذين شومه وترحين غير اموت .
وشام عيونها ما بطلن بچي رجعت زينب باوعت الهجام وكالتله
- شنو راح تسمونها . ؟
دنك هجــام ساكت وكفت يمه احجي بهدوء
- هجــام نسميها ملاك ؟
رفع عيونه الي بفزة بلع ريك وهز راسه لا التفتت الشام تباوع ساكته وهو نفسه تخربط تندمت من نطقت أسمها حجة بوجع
- امها تسميها .
شــام :: منتظرتك منتظرتك صار اشهر حتى انتَ تسميها.
حجت بحرگة تبجي رجع باوعلي
هجــام :: ما أدري
رفع عينه يباوعلي ويحجي بقهر
- من أشوفها أسميها
هزيت راسي موافقة هو وشام نظراتهم عتب وحزن ثنينهم يقهرون
طلعنا من الغرفة حيــادر كالهم تعالوا شوفوا بنتكم سندت شــام وعيني على هجــام الخطوة اليتقدمها ترجف دخلنا للردهه الممرضات يباوعلهم باستغراب ، شهكت شــام فاتحه عينها بصدمة من شافتها. كعدت كدام السرير تبجي. بخنك وتهمس
- ماما يا روحـــي
دنكت باست ايدها الصايرة زركة وهجام الحد هالحظة ما. داخل للغرفة بقى بالباب رجعتله سحبته من ايده سحبها مبتعد ويأشر مختنك
- تعال شوفها والله كلبك يطمن وترتاح .
باوعلي بتردد سحبته من أيده دخل للغرفة من بعيد باوعلها ونزلن دموعه اسحبه يمها اريده يتقرب وهو ما يقبل من بعيد يباوعلها ويبجي روحـــي راحت عليهم .
- هجــام ، روح حاجي شــام باوعلها حاسه روحها وحدها .
تقدم بخطوات متردده كعد بصف شــام وفع ايده حاضنها وهي ضمت وجها بصدرة تبجي مفرفحه دنك يبوس ايد بنته يا روحـــي انتم
هجــام :: ترف بابا .
مسحت دموعي اباوعلهم من بعيد والطفلة فتحت عيونها وهو حاير ساعة يبوس أيدها ساعة رجلها ويرجع يبوس براس شــام ويهمسلها
- ترف اسميها ترف .
على غفلة راحت ابتسامته وكف مبتعد شــام تباوعله باستغراب بس اني گـــلبي نغزني عبالك فهمت نظرتة وخوفة باوعلها نظرة اخيرة وطلع
ساعتين كملوا الاجراءات وحولنا البغداد زينب ماتت بجي على شــام ونوب اجت ام صديقتها وثنينهم يبجن وراها وهي مفرفحة
، طلعنا البغداد ، بمجرد دخلنا مستشفى واستقر الوضع التفتت ادور هجــام ماكو باوعت الحيادر اسأل
- هجــام وين ؟
التفتت يدور صاح يُســر
- خرب .
وطلع بسرعة وحيادر لحكة عافوني بحيرة إتصل على حيــادر وما يجاوب شلع گـــلبي يله رد
- شكو حيــادر.
- اخوج يمكن راح الكربلاء الخالتج ، نوب هي وحدها موسى ويا البنات هنا .
صفرت اذني خايفة سد التليفون واني روحـــي رايحة من الخوف وادعي تعدي على خير رجعت يم شــام القلق ماكل گـــلبي وهي مكابلة بنتها وكاعده بس دموعها ينزلن تهمسلها بهدوء
- ترف ماما ، يا روحـــي .
خابرت حيــادر القلق اكل گـــلبي كال
- بعدنا ما واصلين أبويه
- عفيه گـــلبي نار لا يسوي شي الخاله وابتلي
- يُســر خابر اعمامه كالهم اخذوها يمكم هددونا الشيخ جذب وتستر على هجــام ، المهم لا تخافين رايحيله وخالتج اخذوها اعمام يُســر .
- فدوه طمني .
سديت التليفون من عنده والله گـــلبي خلص هاليومين اخذن حيلي
موسى:: من جنت صغير شكد اكرهه اذا صارت مشكلة وكالوا أبقى بالبيت خاف يحتاجون شي اتخبل بس هسه اتقبل عادي أبقى اذا بهالشي شوفتها
دكيت الجرس منتظرهن فتحن ألباب اثنينهن غــزل مچلبة بيها دخلت
- السلام عليكم.
تجاهلتها كوه على عيوني ما باوعتلها فتنا للبيت غزوله تسأل
- ترا كلشي ما أدري رويــده إتصلت كالت تعالوا ومن حصلنا حيــادر كال انتَ روح للبنات يخافن .
افاطم :: ما نخاف
غــزل :: نخاف نخاف اني اخاف .
باوعتلها مضيك عيوني وهي خازرتني سكتت حتى لو اريد اضوجها ما اريد كدام غــزل راحن للغرفة وغزل جابتلي فراش للاستقبال
تمددت بالي مره يم عائلة هجــام ومره يم المضيعتني
ما ارتاح گـــلبي ولا كدرت انام إتصلت على يُســر بلكي يطمني وهو ما يرد غثني مغثة لمن رد طالعه روحـــي
- الو يمعود هسه انتَ منو وما ترد ما تكلي ؟
- موسى مو بحالك ترا شتريد ؟
- فد رقاصة تدزها تونسي ، شريد مثلًا اطمن يعني شريد .
- عدل الفاظك واستغفر ربك لا حظك اطيحه .
- اختصر ، هجــام وعائلة شلونهم ؟
- بنته تعبانة والله الوضع ما يطمن .
- بنته ؟ شنو منو ملاك ؟
- اي ملاك نزلت من الجنه ، ابني انتَ صاحي ؟.
- يُســر انتَ صاير جنك انا بس تهوبز دحجي عدل خلي نفهم
وخرت التليفون من اذني ما اريد اسمع رزالته من خلص رجعت كتله
- اي صح ، ديله فهمني .
- بنته من زوجته شــام من طلعت من يمنا جانت حامل والبنيه لان مولوده بشهر السابع صدرها دائمًا ملتهب وما تتحمل اي شي ، بلكي تصير زينه ورب العالمين يتلطف بحالهم .
- أمين ، راح اصلي وادعيلهم .
- مو الكاك ناشر ستوري وانتَ على السجادة .
- لا صدك جذب عيب شنو هالسوالف يله روح اريد انام .
- ها والصلاة والدعاء؟
- من اكعد غير ؟
سد التليفون بوجهي ، عفته من صارت صلاة الصبح كمت توضيت وكفت هستوني اصلي وسمعت باب الغرفة نفتح تيهت مدري شلون كمت أصلي وبنص الصلاة اكول أستغفر الله اريد ارجع اركز وأكمل صلاتي بالي كله صار يم الباب
كملت جاي اقرأ التسبيح وسمعت صوتها وراي تحجي بهدوء
افاطم:: صلاة الصبح ركعتين مو ثلاثة.
ما التفتت عليها وما ادري بروح كم ركعه ، كملت لميت السجادة وباوعتلها مبتسم
- وحده صليتها شكر ، لان عرفت حقيقتج .
ضحكت عبالك كاشفتني احجي هالكلام حتى اضوجها
- لا تحاول تأذيني بكلامك ، هي كلمه انطقها وهيج لا تغثني ولا اغثك .
- ما اطلك.
- ليش ؟
سكتت اباوعلها شجابرني اتحمل كل هالتعب والأذية منها شجابرني غير گـــلبي العاشگها
- عود من أتزوج اطلكج .
زفرت نفس مالها خلك ما داهرتني اركز بملامحها عيونها مبينات باجيات ، دارت تغسل وجها رجعت لفراشي اباوعلها سحبت باكيت الجكاير أدخن وادور سبب يخليها كاعده يمي مديت أيدي على جيوبي والجكارة بحكلي رفعت راسي من حجت تباوعلي بالمراية
- على شنو تدور ؟
- ناسي البخاح ما جايبة .
- بالسيارة ؟
هزيت راسي ما ادري رغم هو فعلًا بالسيارة ، جريت نفس من الجكارة وزفرته نعست وتعبت وهي تتعبني اكثر رجعت باوعتلها
- افاطم اذا ما عندج شي اكعدي احجي وياج شوية احس لازم نوصل الحل .
بعدت الجكارة من وجهي اكح وهي عينها ويا أيدي تقربت كعدت على القنفة واني بالكاع بفراشي عاكده حاجبها باستغراب
- ليش تدخن.
- ارتاح .
- من تختنك ترتاح ؟
- كل ممنوع مرغوب ، لان ممنوعة عني ما اكدر اعوفهن .
- لازم تعوفهن .
- حبيني واعوفهن.
- انتَ مو بالكلية ؟ ترا وياك أجمل البنات ليش مچلبلي ؟
- ما اريدهن اريدج .
زفرت نفس بحيرة عاجزة تقنعني نزلت من القنفة كعدت كدامي عبالك تقنع طفل تشرح وتحاول وآني عيوني حسبن رمشها كم شعره .
- اني مو الانسانة المناسبة للزواج انا كارهه روحـــي شلون احب ؟ عوفني ورب العالمين يعوضك بانسانة تستحقها .
هزيت راسي موافق نغثيت جريت باكيت الجكاير بحرگة شعلت الجكارة
- إي كملي.
سحبت نفس من الجكارة اباوعلها
- على شنو شايفة نفسج انتِ ؟ ترا لو تموتين ما تلكين مثلي .
كامت تريد تروح لزمتها من ايدها دفعتها النفس المكان فتحت عينها بصدمة خازرتني
- اكعدي من أكمل كلامي يله تمشين .
- شو صدكت نفسك انتَ شفتني احترمتك شوية ؟
- وشحدج ما تحترمين ؟
درت وجهي اكح بعد ما اكدر أسحب نفس كالت
- لو تموت ما يرفلي جفن .
- من اختنك ترجفين .
- تشرب جكاير يمي حتى اهتملك ؟ اختنك وموت بمكانك ما راح تشوف من عندي اي مساعدة الأفضل الك تعوفها
حجت وبسرعة مدت ايدها على الجكارة جرتها من عندي طفتها درت للباكيت شعلت غيرها
- خوش عوفيني اختنك معليج بيه .
بعصبية هزت راسها موافقة وانا مدري شبيه هيَ تنرفزني أتصرف واتندم ، كعدت على القنفة مربعه ايديها وتباوعلي شوي شوي اختنك وهي تبتسم ضحكتلها عيوني غوشن كمت كوه اجر النفس جرت الجكارة من أيدي طفتها تمددت اجر نفس كوه لمحتها كامت من يمي دخلت للغرفة رجعت غمضت خرب اهلج سوتها صدك هو انتِ شكول اختبار ديله بله منو يوصلني للسيارة .
تشاهدت للاحتياط كل مره يُســر يلكاني ويلحكني للمستشفى هالمره يمي اثنين وحده فهاوه ووحده تتمنالي الموت ، هاي هي كملت هسه لو مصلي صلاة الصبح زين عاد صله ومات حتى صلاة الصبح مخربط بيها بسببها
ضاك صدري بعد ما اكدر واذا أغمى عليَ هاي سالفة أوصل للبرزخ وهن بعدهن ما موصلاتني للمستشفى
ديله خلي تعدي على خير التوبة اذا دخنت بعد .
كلشي بعقلي يتردد وحسيت البخاخ يم حلكي وصوت صدى بأذني جريت نفس من البخاخ مبتسم رجعت ما كدرت تعوفني ، لمن فكيت شوي وركزت لكيتها غــزل وميته بجي ترجف كلها خايفة كعدت صدري يوجعني
- لا تخافين مابيه شي .
- ردت تموت .
ضمت وجها بايديها تبجي ابتسمت
- ما متت لا تخافين .
كامت للمطبخ انطتني ماي نقهرت وتندمت لان خوفت هالفطيرة وهي لابيها ولا عليها .
- روحـــي نامي مابيه شي هسه انام اكعد صاحي .
تباوعلي بشك خايفة راحت للغرفة اباوعلها من فتحة الباب لمحت افاطم نايمه بفراشها ، شنو من گلب عندج هم لو صخر يتفتت
رويــده :: عقل ما بقى براسي كد ما خايفة وأتصل عليهم ما يجاوبون ، شــام بس تطمنت على بنتها نامت بتعب تكسر الگلب ،
حد العصر يله جاوبني حيــادر
- ترا حرام عليك صار شكد أتصل متت من الخوف .
- رويــده والله ما ملحك الزم التليفون .
- شصار ها وينه هجــام .
- هذا بسيارتة كدامي جايين ، تعارك ويا يُســر ، انا لو من يُســر ما اباوع لوجهه بعد
- ويا يُســر ! ليش يُســر شعليه ؟
- هسه اجي رويــده هاي راح نوصل ، بنت هجــام شلونها .
- زينه يمكن باجر بالليل تطلع .
سد التليفون ساعتين ودخلوا ثلاثتهم للمستشفى وجوهم ما يكصها السيف ، هجــام حيل تعبان اني الاعرف شنو حالته وشنو الجاي يعيشة ، راح حيــادر يسأل عن وضع ترف طمنا كتبلنا خروج بس بتحذيرات
واكفين اني وشام كدام الدكتور كال
- اي دخان يمها ممنوع ، ممنوع تتواجد بأي مكان بارد ، الطفل من يناغي مرات ينكع ملابسه من يم صدرة تحديدًا هالنقطة انتبهيلها رأسًا تغيرين ملابسه ،ممنوع اي ملابس بيهن رطوبة .
كتبلنا علاج طلع حيــادر اشتراهن ، هجــام يباوع الشام من بعيد وهي ميته قهر اخذت ترف بحضني بستها وشميتها
- يا روح عمتج يا رب يرجع ابوج بأحسن حال ويعيشج الدلال التستاهلينه انتِ وامج .
يباوعلها من بعيد بحضني مشيت اريد اراويها اله عافني وراح التفتت الشام رأسًا بجت وحجت بخنك
- ما يريدنا .
- لا شــام لا ، مو هيج والله تعبان وانتِ تعرفين شنو وضعه .
سكتت ودموعها على خدها صعدنا ويا هجــام ، يُســر وحيادر كدامنا كلمن سيارته عيوني على سيارة يُســر دخل بغير طريق ما بقى ويانا التفتت ، شنو معقولة رجع الكربلاء درت اباوع ليكدام هجــام خازرني بالمراية دنكت عيني اناغي ترف
- ترف حبيبي عمه ، هجــام شوكت تسويلها جنسيه .
رفعت راسي اباوعله وهو يسوق ساكت شوية وكال
- بيانها وين ؟
- ما جبته يم زينب ، بس يولي البيان لان سميناها بيه باسم عم زينب .
بمجرد شــام حجت هيج شخط السيارة بنص الشارع والهورنات مشتعله ورانا دار علينا عيونه راح يطلعن من مكانهن متخبل
نتر بصياح
- شسويتي ؟
وشام خنست تبجي من ردة فعله
- هجــام كطعت الشارع تحرك راح نسوي حادث .
بجت ترف بحضني. باوعلها ودار وجهه ساق ، أعصابه ترجف وصلنا للبيت طلعت غــزل تمشي بسرعة مفرفحة عافت شام واجت تركض بلا ما تسلم فاتحة أيديها الي تريد الطفلة خليتها بأيدها بجت تبوس. بيها وتشهك
- عمــري عمــري
تحجي وتشم بيها مفرفحة
موسى:: اخذيها منها لا تزلك الطفلة من أيدها.
أخذتها من غــزل خطوة تقدمت كال موسى
- نطيني خلي اشوفها .
نطيتها اله ودرت اباوع الشام وغزل حاضنتها وثنينهن يبجن باوعت الافاطم واكفه بباب المطبخ تباوع من بعيد اخذت ترف من موسى ودخلت للاستقبال لكيتهم محضريلها كريكوت ونفاخ ضحكت درت الافاطم
- هاي منو جابهن . ؟
- موسى .
خليتها بالكريكوت وكلهم دخلوا يباوعولها صاح حيــادر
- شــام بنتج تراجيها عليَ وشرط زوجين .
غــزل :: اني اجيبلها اسوار بيه ازرك حتى ما نحسدها.
حيــادر:: حبيبتي أحنا واحد يعني انا وياج بالتراجي اسكتي .
وغزل فتحت عينها كلها تباوع الهجام الواكف بباب الاستقبال بعيد عنا كلنا ضحك حيــادر يحاجي شــام ويضيع السالفة كالهم موسى
- عليمن طالعة هيج حلوه شو هجــام جنه جعب جدر .
هجــام :: جعب جدر ولا أملس ،
- انتَ هنا ما ادري بيك ، اتشاقة يابه غير جنك هلال العيد ، شوف هو هلال العيد شبيهي بس تنازلت عنه الخاطرك من هاي وقيس شكد احبك .
حيــادر :: ههههههه عندك مصلحة يمه اعترف .
رويــده :: يضحكون ويتشاقون نرسمت الضحكة على وجهه الكل ندك جرس البيت التفتوا واني طلعت للمطبخ اباوع بالكاميرا واشوف يُســر واكف بالباب ولازم خروف فتحله الباب هجــام وهم واحد ما يحجي ويا الثاني يُســر دفع هجــام من صدره داير وجهه ودخل للبيت يسحل بالخرف يصيح على موسى
يُســر :: تعال جبت شبيهك .
فتحت باب المطبخ اباوعلهم طلع موسى شاف الخروف وراحله كعد كدامه يكول الهجام
موسى:: راح تذبحون اخوية ؟ لا حبيبي لا .
يُســر صفن حك شعره استوعب ودفر موسى يرزل
- كوم خايس كوم .
وهجام عبالك لكه سعادته رأسًا حضر السجينه والساطور رادوا الطفلة أخذها حيــادر بحضنه وطلعوها يمهم من هجــام ذبح الخروف رجعوها النا بكصتها قطرة دم وشام تصيح
- هاي سوالف يُســر .
ابتسمتلها وكل ساعة إطلع اباوعلهم كصبوا وكصصوا وخلوه بأكياس كالوا ما يدخل للبيت شي من عنده الصبح يوزعونه.
وحيــادر وموسى غسلوا الكراج وعزلوا كلشي ، وكف هجــام يطكطك برگبته متشفي اجه للمطبخ يغسل وكفت على جهه كال
- صعديهن الغرفتهن واخذي اغراضي للغرفة الثانية .
- شبيك هجــام ؟
التفت باوعلي ساكت
- شنو زعلان من شــام ؟
ابتسم باستهزاء
- افرشي للولد .
حجاها والتفت على صوت يُســر من كال يله احنا نروح
- باتوا والصبح روحوا .
- عدنا دوام ، ان شاءالله غير يوم نجي نشوف ترف يعني تطمن ما نجي علمودك .
سلم يُســر وطلع وراه بشوية موسى هم راح ، حيــادر يباوع الغزوله ويتحسر وهي بوجود هجــام تسوي نفسها حتى ما تعرف حيــادر
هم ما قبل يبقى راح ، صعد هجــام ورأسًا راح للغرفة الخله بيها اغراض ملاك ، سكتت متحسرة اخذت شــام الغرفتها فوك رتبنه الكريكوت
- تنامين يمي رويــده خاف يصير بيها شي .
- اي اي انام يمج. عندي هواي حجي وياج .
- لا تعاتبيني عفيه .
- اعاتب واطيح حظج ، ما كلتي هاي شنو راح يصير بحالها شلون راح تتحمل ما تعرف شي عني ، انتِ شايفه شصار بيه والله متت
اللگمة من اكلها اغص ها شــام اكلت ها شــام شربت اني اكل ويجوز شــام جوعانه اني ببيت يحميني ويجوز شــام بالشارع دمرتيني والقرآن دمرتيني .
بجيت مخنوگة كامت اجت يمي تبجي تحضني تبوس وتعتذر
شــام :: اسفة اسفة رويــده بس والله ما كدرت اتحمل الكلام والله تعبـــت من الحجي ورحت آسفة.
- وخري .
دفعتها بزعل رافعه ايدي بوجها
- والله لو ما ترف شفعتلج ولا احجي وياج .
كعدنا نسولف وكل وحده تحجي شنو العاشته وشنو الشافته الحد ما رجعنا الهجام
- سوا شــام سوا نعالجة ونرجعه زين يحتاج صبر ، رجعنا لنقطة الصفر حارب نفسة وعقله علمود يلكاج ، بس هسه راح يطيح متأكدة وكلبي يوجعني من كد ما جاي افكر بحاله .
شــام :: مسحت دموعي متحسرة اني ميته كد ما مشتاقتله هزيت راسي لرويده اي تمام وادعي ربي يقويني ويصبرني غمضت عيني مأمنة لان رويــده يم ترف
غفيت وفزيت على صوتها تبجي شفت رويــده كاملتها خلتها بحضنها وتحاجيها بهدوء
- ها عمه ها ،
سوتلها ممه وتهز بيها بحضنها تلوليلها الحد ما رجعت ترف نامت رجعتها للكريكوت وكعدت يمها بالكاع تباوعلها وتبجي تحجي وياها بخنك على بالها اني نايمه .
- اجيتي ومعزتج سابقتج ، ترف يا روح عمتج ، اللهي الخاطر هالطفلة ساعدني ارجع هجــام بصحة وعافية الخاطر عائلتة يا رب .
رويــده :: مسحت دموعي غطيت ترف وكمت بهدوء طلعت من الغرفة رحت للغرفة البيها هجــام خايفة عليه حييل ، اشم ريحة النركيله من الباب تقربت فتحت ألباب التفت يباوعلي غمضت عيني شهكت گـــلبي يوجعني ، نفس الرسوم نفس ترتيب هذيج الغرفة والزيادة صور ملاك تارسات الغرفة عاف النرگيلة ووكف مسح وجهه
- ليش هيج تسوي ؟
باوعت على القلم بالگاع وتليفونه وجهاز الوشم سحبني من أيدي للغرفة غمضت ميته قهر ما اريد اشوف عيونه بهالنظرة المتروسة شر لزم وجهي بين ايديه
- رويــده ، هسه احجيلي ، مجتبى ضاربج ، ومنو بعد .
بجيت اهز راسي لا سد حلكي بايده
- اششش لا تكولين لا ،شنو توقعتي انساهن الهم ؟ انا لو ما التهيت ادور على شــام ذابحهم من زمان ، احجي بله مجتبى ضربج ، ومنو بعد حيدر هم ؟
- مو اخذت منهم فصل عوفهم خلي نرتاح .
باوعلي خازرني سحب ايديه من عندي بنتر يصيح بعصبية
- وشنو حقج فلوس؟ مقابل كرامتج فلوس؟ كل عقلج كل عقلج انتِ
ضرب ايده بالحايط وهي أساسًا مخيطة نفتح الخياط والدم سال من جفة للگاع رفع أيده يهدد
- أوصلهم للموت كل واحد تطاول على شخص يخصني اخليه يشوف الموت بعيونه يتمناه وما يحصله خاف عبالهم يموتون ويخلصون من عندي.
مسحت دموعي محتركة حرك گـــلبي تملخ احير شنو احاجية حاولت أغير الموضوع
- ليش ما تجي يم بنتك وزوجتك شنو ما تريدهم ، المن خبصت الدنيا وحيلك راح لمن لكيتهم .
يفتر بعصبية واني احجي رغم گـــلبي اليرجف شال الكلاص وشمره بقوة على الحايط بصفي شهكت مغمضة عيني حجة من بين اسنانة
- روحـــي رويــده .
- عائلتك محتاجتك ، محد رايد من عندك أنتقام ، احنا نحتاج وجودك ويانا .
- ما اريدها اطلعي اطلعي رويــده .
اجه بعصبية يدفعني يريد يطلعني من الغرفة. دفعت ايده ابجي
- ليش ليش فهمني ليش .
وهو كوه يتنفس طاح بالكاع على اركبه ركضت خايفة
- هجــام .
وهو روحه رايحه من الوجع يعصر برجليه شايط كعدت مقابيله متخبله
- هجــام هجــام حاجيني .
سند راسه على كتفي زفر نفس بحسرة تشل الگلب يحجي والكلمة كوه تطلع من عنده
- ما اريد اشوفها ولا اجي يمها ولا اشاقيها ما أريد ينعاد ينعاد ما اريد ينعاد نفس
- اششش ، ماكو شي ينعاد الصار حادث مو ذنبك افهم هالشي مو ذنبك .
- عوفيهم بعيدين عني انا بس افقد اسببلهم أذية اذا ترف تنخدش خدش صغير من وراي اموت رويــده اموت بعد ما اكدر .
- تتعالج ها هجــام تتعالج الخاطرها
فز مبتعد من سمع صوت ترف تبجي وكف خايف يحجي مرتبك
- روحـــي رويــده روحـــي شوفيها ليش تبجي .
- روح انتَ شوفها .
افتر بعصبية ما يدري شيسوي ايديه ينقبضن وينفكن بقوة
- رويد روحـــي .
طلعت من يمه امسح بدموعي لكيت شــام لازمه ترف سكتناها سوا
، للصبح بقيت كاعده وايدي على خدي شسوي اذا مايقبل يراجع واذا قبل شلون راح اكدر أتحمل بداية العلاج لان تأثر عليه هواي شي تهدي وشي تزيده عصبية ويفقد الى درجة ما يشوف كدامه
دخلت أسبح ومن طلعت لكيت غزوله بوجهي تاكل باظافرها
- شبيج ؟
- حيــادر يكول لا تداومين اليوم ، راح اجيب بيت عمي واجي ، يكول اخطبج ، رويــده غير متزوجين . ؟
- هجــام يكول الا تطلع منا ببدلة عرس .
رخت ملامحها جانت خايفة كالت
- يعني ما يخليني اعوف حيــادر.
- ههه لا بس يريدج تطلعين من بيتنا عروس .
- خفت والله
رحت للمطبخ وهي وراي اسألها وتجاوب
- غــزل اذا هجــام رفض حيــادر وكالج الا يطلكج شتسوين ؟
درت اباوعلها صفنت ابتسمت غزالي الهلكدوتها راح تصير ام بيت
رفعت راسها تباوعلي
- صح انقهر وابجي بس اسوي اليگوله هجــام .
نطيتها قوري الچاي راحت جابت ماي كالت
- احجيلج شي على افاطم ؟ بس لا تكولين غــزل كالتلي .
افاطم :: شتحجيلها ؟
رويــده :: التفتنا ثنينا للباب غــزل ماتت من الفشلة واني اياوعلها عاكده حاجبي
- ها فطوم شمسوية من وراي .
غــزل :: ما سوت شي .
عافتنا افاطم فاتت للحمام باوعت الغزل
- احجي شكو .
- ماكو شي .
- غــزل احجي .
- من اجه موسى يمنا ، اختنك وهي عافته يختنك نوب راحت للسيارة جابت البخاخ نطتنياه رحت خليتله البخاخ وهي كالت من يسألج لا تكولين أفاطم جابته من السيارة.
سكتت غــزل من طلعت أفاطم ، رحتت جبت صمون وصعدنا يم شــام اكلنا ونضحك غــزل تكسر گـــلبي من تباوع الترف يدمعن عيونها وتهمس
- ما اغار منها .
وشام حتى علاج ما تشربها تخاف اني وافاطم نشربها خبرة اثنينا ، عفتهن بالغرفة وطلعت اتصل على هجــام ما يجاوب مرتين ثلاثة بالرابعه ود بعصبية
- هاااا
- وين انتَ ؟
- بالسيارة .
- والسيارة وين ؟
- بالشارع .
- يا شارع هجــام ؟
- شارع عام .
- اجلطني ما اوصيك .
- هذا حيــادر شيمسلت ؟
- شبيه ؟
- يكول جايينكم خطار عود على غــزل .
- هجــام انتَ الكلت خلي يجي يخطب ما انطيها هيج
- مو هسه .
- شوكت ناوي .
- بعدلها سنتين وتخلص جامعة .
- هجــام والقرآن ترا تجي ما تلكاها اخلي ياخذها لا عرس ولا مدري شنو ، شنو سنتين ؟
سد التليفون بوجهي واني ميته قهر لا اكدر اضغط عليه اكثر ولا اكدر اسكت على تصرفاته ساعتين ورجعت إتصلت عليه رد ويحجي ويا غيري سكتت اسمعله صوت زياد هذا شوية وكال
- ها أبوية
- هجــام شوكت تجي .
- نص ساعة .
-منتظرينك على الغدا.
سد التليفون كعدنا منتظرينه .
موسى:: أصعب شي بالحياة من اهلك على خطأ وما تگدر تسوي شي ، كمت أتعب من اشوف يُســر مفرفح وامي تبجي اكو سبب قوي لرفضها وكرها لبنات خالتي
بالليوم الرجعنه بيه من بغداد اخذناها من بيت عمي ويسر ما تحمل بالسيارة وحاجاها ليش هيج سويتي ليش من البنيه أجت كلتيها مسافرين وهي بس تبجي وتتحسب وما قبلت نكمل للبيت الا رجعت البيت عمي
ورجعنا وحدنا للبيت يُســر روحه طالعه عفته وصعدت فوك نمت تعبان وثاني يوم ما داومت هو داوم والظهر إتصل
- ها شتريد ؟
- تريكت ؟
- اي شبيك ما شايف جبن شمخليلي؟
- موسى مالي خلكك
- المن تتصل اذا ما الك خلگي .
- تسوي غدا لو اجيب وياي .
- والله يُســر روحـــي ما الي خلكها انتظرك تجي توكلني وتداريني ترا مريض انا .
سد التليفون بوجهي دروحوا انتم والقانون
شــام :: بُعد هجــام يحسسني بغربة بس رويد بكل لحظة تصبرني باوعتلها اسأل
- شلون عرفتوا مكاني ؟
- من اجوا ياخذون تأييد من المدرسة بلغوا هجــام ومادري شلون وصل هجــام للعنون
- اي علمود التقديم
- قدمتي ؟
هزيت راسي اي بنتي بحضني ابتمست اباوع لوجها
- بس هم ما راح اكدر اداوم هالسنه.
- ليش ؟ داومي ترف عندي .
- لو عليها سهله بس وهجام ؟ خلي يصير زين وراها الله كريم
سكتت نزلنا يمها بالصالة كعدنا وهي تطبخ دقايق ودخل هجــام بلا ما يباوع هستوه يصعد الدرج وبجت ترف بحضني وكف بلا ما يلتفف سكتتها اباوعله كمل خطواتة وراح للغرفة طلعت رويــده من المطبخ تباوعلي
- عوفي ترف عند افاطم واصعدي شــام .
هزيت راسي موافقة خليت ترف بحضن افاطم وهي بهتت بس فاتحه عينها
صعدت فوك گـــلبي يدك حيل فتحت باب الغرفة التفتلي بسرعة شمر القميص من ايده وبلا كلام اجه بسرعة وقوة سحبني من أيدي الداخل الغرفة جراتي الصدرة حاضني بكل حيله جلبت برگبته ابجي واشهك
-اشتاقيتلك والله اشتاقيتلك .
سكتني وهو يحتضن شفايفي بين شفايفة ويرفعني من خصري الطولة لحظات عتب واشتياق تتخلل بينهن قسوة وعقاب لمساتة أنتقام آكثر من كونها حب وشوق كل ما حاولت أحتضن وجهه يلم اصابع ايدي بين ايدية مانعني
دكات گـــلبي تتسارع ونفسي يضيق جسدي يرتجف بين ايديه
فتحت عيني اتنفس بقوة شهكت بخوف وهو شــامرني على الجرباية وجهه برگبتي وخانگني برخاوة ايده يهمس بأذني
- لو الدنيا تحترك ممنوع تبتعدين من يم رويــده اذا انا ما موجود لو تروح الجهنم ترحين وياها فهمتي ؟
جريت ايده من رگبتي خايفه ودموعي على خدي
- هجــام
رفع راسه يتنفس بقوة يباوع الوجهي نتر ايده مبتعد كعد على حيله مسح وجهه بين ايديه متحسر كعدت عدل ساكته خليت أيدي على ظهرة التفت باوعلي
- ما أروح ، صارت عدنا عائلة هجــام .
- ههه عائلة ممكن بلحظة بلا ما احس اضيعهم .
كام من يمي باوعت للغرفة وكفت
- ترا عندك حياة جديده بس انتَ عاجبك تبقى حابس نفسك هنا بين الرسوم شنو استفاديت من رسمت هذن ها شنو ؟
رفع أيده يسويلي اششش
- أبقى أبقى الا اخذ بنتي واروح ولا اخليك تلكاني .
دار علي بخزر نزلت بسرعة شاردة حجيت الرويده ما قبلت على كلامي
رويــده :: اثنينا جاي نضغط عليه بهالحجي بس ما ندري اذا يفيد او لا لازم يراجع دكتور بالأول وامشي بخطواتة .
سكتت شــام محتارة صبينا غدا ونزل يخاف يرفع عينه ويشوف بنته ياكل ساكت ومن يسمعها تناغي اباوعله يفز ، غسل وصعد فوك نظفنا وعزلنا شويه واجه حيــادر وياه زوجة عمه وعمه وولد أثنين نزل هجــام يمهم وغزل ميته خوف وهو سواها بسرعة بسرعة كال
حيــادر:: انا ما عندي احد ولا اريد هوسه وخبصة عرسنا سفرة الها بالعطلة بس انتَ ردت الا تطلع من يمك لابسه بدله هاي هي باجر تروح للصالون حجزتلها كلشي .
خله هجــام بصدمة لا بيه يرفض ولا بيه يقبل بقى ساكت وهم ما طولوا شوية وراحوا طلع باوع الغزل اشرلها اكعدي وهي راحت روحها كعدت كعد على الميز كدامها
- قابلة ؟
وهي عيونها تتنقل بيني وبين البنات ما تدري شتجاوب تقرب لزم وجها بين ايديه حاجاها بهدوء
- غــزل بابا ، انتِ اختاريتي حيــادر وهاي هي قبلت بس اريدج تطلعين من يمي ببدلة بيضة حالج حال اي بنيه
- يعني هسه انتَ ما معصب
- لا ليش اعصب ، انتِ قابلة باجر ياخذج للصالون وماكو عرس بس مسوي عشا اعمامه واحنا وهيج شي بسيط هيج تقبلين ؟
- أقبل وبراء وعبد علي هم نعزمهم .
- لا تخليني اسبهم ، انا وين احجي وانتِ وين
خنست غــزل ساكته رجع كعد يمها سحبها الصدرة مغمض عينه وساكت يشم شعره بحسرة وخرها من حضنه يباوع لوجها
- الله يسعدج بكل خطوة .
- هجــام اسأل شي بس ما تعصب .
- اسألي .
- يصير نعيش اني وحيادر هنا ؟
- خيولي حيــادر ابقي ويانا
- لا شنو يولي
تحجي واني لازمه گـــلبي بأيدي خاف تحجي شي غلط منا لو منا كام هجــام صعد ساكت وهي مكيفة التهن بيها شــام وافاطم رحت اني اخابر حيــادر
- الو حيــادر اكلك .
- وعليكم السلام. كولي .
- عفيه اريد اشتريلها شي اغراض سوالف لو تأجل الموضوع فد أسبوع.
- ساعة ما اقبل يتأجل ، يابه اخوج ما يتأمن باجر يجرني ويلزم الساطور على رگبتي تعال تطلك لو اذبحك شسوي ؟
- ههههه شقصدك .
- قصدي واضح خوية واضح الذيب شكد غدار أأمن من هجــام .
- ما اسمحلك ، هم ماخذ من عندي اختي وهم تحجي على اخوي .
- نسيت بعد واحد ، الشيخ الله أكبر صدك رويــده وبعيد عن الشقة ، راح يتزوج .
سكتت گـــلبي نعصر عصر واذني وشت
- منو كالك ؟
- هو خابرني كال أريد امشي على مره تجي وياي
- من منو هاي .
- من اعمامه ، رويــده اخذي راحتج جاي اسوق انا .
سديت التليفون من حيــادر گـــلبي يوجعني. وارجف مسحت دموعي بسرعة ها رويــده ها مو هذا الردتيه مو كلتي روح اتزوج واني اخطبلك على شنو هسه تبجين .
طلعت يم البنات ملتهيات بغزل اخذت ترف من يمهن وصعدت فوك سمعت ماي الحمام مفتوح ، خليت ترف بالغرفة فتحت الباب ورجعت بين الكنتور والبرده ضامه روحـــي لو اني لو انتَ يا هجــام
وهي تناغي وتريد احد يحاجيها شوية وبجت بهدوء على بالي اكدر اسمعها تبجي وما اروحلها يمه گـــلبي نوجع هستوني اريد اطلع ولمحت هجــام يتلفت رجعت بسرعة خاتله واشوفث بانعكاس المراية ، هستوه طالع من الحمام المنشفة بأيده وكف بباب الغرفة يياوع منا ومنا ويحجي بهمس من بعيد
- اشش ها بابا ترف روحـــي بابا ها ها ليش تبجين .
نزلن دموعي كتمت صوتي واباوع للمراية بطرف عيني تقدم عاف المنشفة على جهه ومد ايدية ثنينهن شالها من الكريكوت الضحكة تارسة وجهه ودموعه نزلن وحده ورا الثانية. شماها من ركبتها بشهگة
- ترف بابا روح هجــام انتِ .
يحاجيها ويبوسها هنا وهنا يناغيها ويلعبها شوية ورجعها المكانها مبتعد وملامحة تغيرت عافها وطلع يا رب ساعدني يا رب جاي يحرم روحه من بنته كد ما خايف يأذيها بلا ما يدري يا رب تعب اخويه تعب تلطف بحاله .
نومتها ورحتله للغرفة هستوه نايم سحبت الغطاء اريد اغطي وفز لازمني من أيدي فززني الي ، بمجرد لمحني كدامه كعد عدل يسمح بوجهه
- بس ردت اغطيك .
سكت مدنك خليت أيدي فوك ايده
- هجــام يا روحـــي خفف هالهم العلى كلبك احجيلي اي شي ببالك بلكي ترتاح .
ابتسم ساكت. .
- ليش تفز هيج ها ؟
تحسر
- بالشماعية ، اكو ممرضين إثنين ، ماجانوا مجرد ممرضين ، كل يوم يفوت هم يحاولون يكتلوني ،
شهكت فاتحة عيني على وسعها وهو ما مهتم يحجي بابتسامه
- بالبداية توقعت سوالف ابوج هو منطيهم افلوس ، بعدين عرفت عمج حيدر .
نزلن دموعي ساكته وهو يحجي بابتسامه تفرفح گـــلبي
- ما اعوفهم رويــده مستحيل اعوفهم.
- لا تعوفهم تمام ، بس خلي نروح للدكتور والله حتى حجز حاجزة خلي گـــلبي يرتاح تعبـــت والقرآن تعبـــت .
زفر نفس بنفاذ صبر هز رأسه موافق يريد يرجع ينام جريته من ايده الا هسه بعدها العياده مفتحه وهو كوه على روحه كام ويايه رحنا للدكتور ، يضحك عليه ولا مهتم اني افرفح وهو يگل للدكتور
- دكتور هاي المحلات الجوا العيادة للبيع ؟
- لا ابني مأجرينهن.
- ما يفيدين مكانهن مو تجاري ليش ما تاخذ بغير مكان .
باوعلي الدكتور ساكت هو يعرفه من بداية المراجعات مره هم اجيت يمه خله هجــام يطلع كتبلي علاج ونفس ما توقعت بالبداية يزيد عصبية يتنرفز وبعيد عن العلاج لازم نراعي حالته نفسيًا
طلعت وياه كال
- ها هسه ارتاحيتي
- اي هسه ترجع على العلاج تصير مثل المسك .
- اكلج روميو صدك راح يتزوج ؟
باوعتله باهته اذا هجــام هم يعرف يعني صدك بلعت ريك ودرت وجهي منه كال
- لا تنقهرين
- لا على شنو انقهر .
- اذا تردينه اجيبه ؟
سكتت وهو كل شوية يباوعلي الظاهر ما كدرت اخفي الحزن البوجهي زفر نفس بحسرة وحجة بجدية
- رويــده انتِ ما تردينه علمودي لو شنو. الفلم احجيلي .
- ماكو شي هجــام هو نصيب .
- الزواج اختيار
- نصيب
- اختيار معليه النصيب .
درت وجهي للشارع ساكته كل شوية تطلع حسرة من نص گـــلبي وهجام ما يدري شنو يسوي. كال
- خيولي رويــده مو خوش يُســر
- اممم.
- ما يصلي بس كدامنا .
- اممم
- يشرب السكير
- موسى هو الغلطان هو ما يمشي بهيج طريق .
- ثنينهم سرسريه .
- ليش تكرهم هجــام ؟
التفت يباوعلي فاتح عينه كلها
- انا اكرهم ؟
-اشوفك حيل تضوج منهم بالاخص يُســر ليش ؟
-خيولي
-اريد اعرف السبب
- مره من جنا اصغار كتله لو عندك اخت اتزوجها كالي انطيها الصيني عطلان ولا انطيها الك .
- هههههههه صدك تحجي ؟
- والله ، وهسه اجه يريد اختي ولا انطي .
-هجــام خالة تكرهنا بشكل غريب بعني تخاف علينا وتكرهنا ما اعرف شنو افسر حالتها .
- تكرهني وتكرهج لان اقرب شخص الي .
- زين تعرف شنو السبب هي وامي صاير بينهم شي ؟
- ااممم امنا الغلط
-شلون احجيلي راح اموت كد ما فكرت بهالموضوع.
- امج وخالتج غلط
سكتت ما فاهمه وكف بباب البيت وما نزل التفتلي يكمل كلامه .
- من وانا طفل قبل لا يموت ابويه وامي تتزوج الخيسة حسين ، جنت احس بكرهه خالتي الي. سألت امي مره بجت وحجتلي الموضوع
-ابويه جان شاب يعني قبل لا يتلتقي بامي. ويتزوج هذا الحجي ، جان على علاقة ببنية يعرفها من يابيت بس ما يعرف أسمها يلكه رسالة مشمورتله كل فترة جانوا جيران ، وما تقبل تكول هيه منو حتى خاف يفضحها ، امي جانت تدري باختها مصاحبة هذا وتتعارك وياها ما تقبل ، وخالة ما تهتم ، الى ان بيوم من الايام ام ابوية عرفت بيه مصاحب وندلت بيتهم اجت الابوهن وكالتله وحده من بناتك تتسامر ويا ابني بمكانيب وهيج وهيج الموضوع
هو داخل يريد يكتلهن خالتي كايلتله على امي هي التصعد للسطح وتشمر رسالة لابن الجوارين وابوها صدكها كتل امي بالصونده ومچويها تتذكرين الاثر البرگبة امي ؟
مسحت دموعي اهز راسي اي وهو اختنك كوه يحجي كال
- ابوها جواها والسبب خالتي لان كالتلهم هي مصاحبه وامي لا بيها ولا عليها شبعت كتل ، ابوي جاب اهله واجه يخطب وهو لا يعرف اسمها ولا يعرف شكلها خطب امي الي على أساس هي الجانت تحجي وياه وقتها خالتي متوسله بأمي ترفض وامي كايلتلها لا ما ارفض خليتيهم يكتلوني وحركتي گـــلبي بلا سبب اقبل بيه واحرك كلبج .
تزوجوا امي وابوية وخالتي هم تزوجت وهن محد يحجي ويا الثاني الحد ما صار عد خالتي محمود امي اجت صالحتها وعلى اساس رجعت علاقتهن مثل قبل بس بقى الحقد بگلب خالتي لليوم .
مسحت دموعي اشهك واحجي بخنك
- ابوك هم ما يكعد شكو يصاحب.
- يصاحب بشرف ولا مثل ابوج يفتر وين الماعدها آحد ويتيمه يتزوجها ، انزلي افتحي الباب رويــده لا ادفرج .
نزلت فتحت باب الكراج دخل السيارة البنات بالمطبخ يسون عشا ومخليات ترف بالصالة كل شوية وحده تروحلها ، بمجرد تعشينا اخذت العلاج وصعدت الهجام كبل صاح اهووو بقيت واكفه كدامه اخذه من ايدي شربه وراح ينام . نزلت ما نمت يم شــام هاليوم اريد يم غــزل حضنتها الگلبي. أوصي واشرح وهي بس تهز راسها اي
غــزل :: مو جنت سباعية وعايشة ويا حيــادر على حب الله والوطن ليش من صارت بيها بدلة خفت ومن أرجع اتذكر كلامه اطمئن ضميت روحـــي بحضن رويــده وغفيت كعدتني هي الصبح
- كومي اسبحي وبدلي حيــادر راح يجي ياخذج للصالون .
- عززززا من هسه ؟
- اي كومي بسرعة بسرعة يله ، افاطم أفاطم اكعدي ترحين ويا غــزل .
افاطم :: واني شعرف واروح وياها وخري .
- تعرفين كلشي كومي ولج .
سحلتها رويــده واني دخلت سبحت طلعت وهي تركض تركض تسوي ريوك وتحضر الحد ما اجه حيــادر طلعنا آني وافاطم نازل من السيارة يباوعلي مبتسم وفعت اكتافي اضحك خجلانة وكفت كدامه .
حيــادر:: ها حبيبي
- ههههه . هلو
ضحك كرصني من خدي وافاطم من ورا تعيب عليَ صعدنا وياه البدلة أصلًا اني ماقايستها ولا شايفتها كال
- اعرف قياسج نطيته الهم وجابوها .
نزلنا بالصالون وراح ولا اني اعرف ولا أفاطم واكفين وساكتين الحد ما هي حاجتهن كلش متحمسة رغم الخوف بس من اتذكر شلون جنت اشوف هالشي مستحيل وبعدين تغير كلشي وتحقق ببساطة. احمد ربي واشكره هواي ، كملنا المكياج وكملنا التسريحة أشياء بسيطة أفاطم على اساس ما تعرف طلعت جذابة تعرف من يخلللي شي تعترض وتطلب شي أحلى كل ما اغمزلها تعيب عليَ دخلت وياي للتبديل ساعدتني بالبدلة جان بيها عرض هزت ايدها تحجي
- مسوي روحه فهيم اعرف قياسج واعرف قياسج عريضة
نقهرت اباوع للبدلة اريد ابجي. هي ناعمه مابيها نفشة قوية. بس عريضة هواي وصارت مو حلوه اختنكت. دنكت افاطم للگاع ضحكت دارتني تباوع الظهري غمت كصتها
افاطم :: ولج هذا الشريط مالتها ، كله من رويــده كتلها ما اعرف ما اعرف ورطتني .
سوتها الي بالشريط رهمت وصارت مرتبة افتريت كدامها
- ها افاطم ؟
ابتسمت وتقربت كدامي باستني
- الله يسعدج .
إتصلت على رويــده من تليفوني كالت جايين شوية واجت هي وهجام وكفت متحمسه رويــده تشوفني وهي بمجرد لمحتني بالابيض بجت مختنكه وافاطم تغلط عليها
افاطم :: لا تبجينها رويــده .
وخرتني من حضنها تباوع الوجهي مبتسمه وعيونها حمر
رويــده :: يله هجــام منتظر .
غطتني بالكبوس الابيض وطلعت وياها صعدت يم هجــام ليكدام. وخرت الكبوس باوعتله وهو يباوع للشارع ويسوق
- هجــام شوفني ، حلوه ؟
رويــده :: باوعلها هجــام بسرعة ودار وجهه مختنك كل ساعةً اكول الروحي شبيج هي من البداية متزوجة من البداية عايشة ويا حيــادر شكو هسه تبجين. ، بس شيقنع گـــلبي ، وصلنا للبيت نزلناها وهي قفلت
- رويــده وكليني خاف بعدين بطني تقرقر .
واحنا كلنا واكفين هاي لازمه كلينكس وهاي ماي واني اوكل بيها. كامت غسلت وخربت الحمره كوه رجعناها شكد ما حزنانه فرحانتلها ضعف اجت شــام جايبة ترف ميته ضحك خلتها بحضن غــزل تكلها
- بعمري ما عرفت ليش يخلن طفل بحضن العروس بس نقلدهن
افاطم:: عود حتى يصير عدها طفل بسرعة.
رويــده :: ضحكنا ملتفتين على هجــام دخل وكفت غــزل كدامه رفع راسه ليفوك بقهر رجع باوعلها باس راسها بحسرة
- مهناية يا روح اخوج .
نزلن دموعها وهو تخبل كبل كالها .
- ها تبطلين ؟
تبجي وتهز راسها لا ما أبطل افاطم ميته ضحك . مد ايده الها علبة طلع منها اسوارين كالها
- هدية زوجج اسوارات ومحل باسمج ايجارة كل شهر يوصل الج .
رجعت تبجي خربت ام المكياج بقينا. نرتب ونعدل نوب كلنا ماعدنا مكياج هي الوحيده شخصية عدها مكياج وكله ماركة .
شوية واجه حيــادر طلعت للمطبخ اباوع للكاميرا ، حيــادر وعمه بسيارة وراهم موسى ويسر ووراهم عبد علي وزوجته يدكون هورنات بالباب
رجعت للبنات بسرعة يلبسن لان نروح ببيت حيــادر لورا العشا نرجع . دخلوا كلهم الفرحة البعيون حيــادر توضح شكد راح يسعد غــزل رجفة ايده من هجــام سلمها اله عيونه تحجي سعادتة أخذها هم بسيارة واحنا ويا هجــام بسيارة لاف حيــادر مدري وين راح بغير طريق مو البيته وهجام يسب ويغلط اتصل عليه
- وين ماخذها ؟ ، يا تصوير ؟ خوش يله فضها .
سد المكالمة سألته بهدوء
- ها
- رايحين للتصوير مدري شنو
- اي همزين كلت خاف تبقى بدون صور.
سكت وصلنا البيت حيــادر بيت عمه موجودين وجوهم بيها قبول عجيب يهلهن البنات أربعة ويباوعن منتظرات العروس ماتنً ضحك من مالكن العروس دخلنا يمهم ، ساعة واجوا حيــادر وغزولة واستقبلوهم بالهلاهل وزوجة عمه تهوس كدامه اباوع الغزولة ترجف هاي بالبداية كعدوها ولان عائلة فقط تقريبًا ١٥ نفر او أقل كلنا ، خف التوتر ورا نص ساعة وغزولة كامت تفتر يمنا
ومن صبينا العشاء هي وحيادر متربعين على السفرة ويانا وافاطم يمي تهمس
- من تجيبين عروسين من باب الشرجي ، دباوعي يضحكون علينا متحسفين العشاء خاف ناكله وحدنا .
- اسكتي لا تضحكيني مقهورة ترا
شــام :: مقهوره ؟؟ شكد جذابة مساع تكول بعد بس افاطم واخلص منهن .
رويــده :: رفعت عيني الشام ما قابلة وهي سكتت مستغربة افاطم مدنكة تاكل بلا ما ترد اعرف هالموضوع شكد تتحسس منه ، شلنا السفرة وكفت اغسل المواعين وزوجة عمه تسوي چاي وغزل هي وبدلتها واكفه يمنا على راسها الكبوس وتسولف ويا زوجة عمه لان متعوده عليها
كملت المواعين كعدنا بالصالة وهم بالاستقبال اجه موسى اخذ الچاي يباوعلي ويغمز اجيت يمه
- شبيك ولك ؟
- هاي الصخرة البصفج ما تقنعينها تباوعلي خاب احجي حضج وبختج ما جني هلال العيد .
- لو انتَ هلال العيد جا محد عيد وخر موسى امشي الچاي راح يبرد .
- اذا ما زوجت يُســر معتب وخري .
عافني وراح رجعت يمهن ساعتين يُســر وموسى راحوا وراهم بشوية اعمام حيــادر راحوا بقينا بس احنا مديت راسي للاستقبال لكيت هجــام لازمه تهديدات وتحذيرات وكفت اتنصت وهو يكله
هجــام :: اذا خابرتني بيوم وكالت حيــادر ضوجني هذا النكتب عليك .
حيــادر :: كملت ؟
- لا ، اذا رسبت
- ها هم انا السبب ؟
- طبعًا اذا ترسب أخذها منك .
- يله رحمة الاهلك خلص مسلته وكوموا روحوا دوختوني .
وهجام خازرة. ما قابل التفتت الغزل تلعب بترف اجه هجــام
- يله نروح .
غــزل :: رفعت راسي گـــلبي نغزني لو نبقى سوا حلوه ، لبسن البنات واني وراهن امشي واحجي
- باتوا هنا رويــده .
افاطم:: عود صار عدها بيت وتريدنا نبات يمها ، غــزل باجر تعالي باتي يمنا .
باوعتلها بزعل جلبت بايد رويــده وهي تضحك باستني
- لا تخافين ومثل ما وصيتج ابعدي الخوف وعيشي حياتج لا تضيعين جمال ايامج بسبب الماضي
هزيت راسي موافقة امسح بدموعي طلعوا واني واكفه بالباب اباوعلهم وهجام أساسًا ما سلم عليَ من بعيد باوعلي دك هورن وراحوا ، حيــادر سد باب الكراج واجه مبتسم مسحت دموعي ووكفت عدل بباب المطبخ
ضحك ولماني بحضنه حيل
- ليش البجي ليش حبيبي ، قابل راح احرمج منهم انا ؟
وخرني من حضنه يمسح بدموعي
- تعالي
قفل الباب وسحبني من ايدي للبيت دخلنا للغرفة ابتسمت
- الله منو سواها .
- انا .
- شكد حلو .
اتلفتت للغرفة مرتبة مثل اعراس المسلسلات ، اخذت ملابس ودخلت للحمام سبحت طلعت ما لكيته بالغرفة بس لكيت سجادتين مادهن نشفت شعري ودخل هو هم ينشف بشعرة سابح بالحمام الثاني.
وكفت على السجادة صلينا سوا بقيت كاعده ادعي انسه انسه كلشي اذاني وكلشي قهرني وسلب النوم من عيوني
وبمجرد تذكرت الموضوع الوجع العشته البجي صريخي المكتوم اختنكت لميت السجادة خليتهم على الميز وبقت واكفه بمكاني خايفه شهكت گـــلبي يدك حيل من حضن ظهري الصدرة
- غزالي ، تعالي .
سحبني من ايدي للچرباية كمت احس أيدي البأيده عركت وجسمي يرجف كعدت اعصر باصابع رجلي متوتره وهو مبتسم يحرك ابهامه على أيدي
- غزوله
رفعت عيني اباوع لعيونه
- تدرين من شوكت حبيتج ؟ عمرج ١٥ تمنيتج من وقتها بس منعت نفسي خفت حتى افكر بيج وين انا وين هي حاولت اشيلج من تفكيري بس دارت الدنيا ورجعتي كدام عيني رغم عقدنا الأول من نفصلنا انتهيت هاي هي ضيعتها من أيدي بعد ، بس رب العالمين جازاني على تعبي وصبري عوضني باجمل شي ، عهد علي ليوم الدين ما اباوع لغيرج ما اقصر وياج ، ولو ادفع عمــري ثمن حتى اشتري سعادتج ما اتردد .
اباوعله مبتسمه وعيوني مدمعه رفع أيده الخدي متحسر غمضت عيني وخليت ايدي فوك ايده
- كد ما متمنيج بحضني هالليلة بس مستحيل اضغط عليج تردين تنامين ؟
سكتت حجي رويــده يتردد باذني اذا تبقين تاجلين تبقين خايفة باوعتله بتردد هزيت راسي لا ، ابتسم تقرب بهدوء غمضت عيوني مستسلمه وهو يطبع بوسات هادئة على وجهي الحد شفتي باسني يهمس
- من ودعتج ببوسة قبل لا نفك العقد اول مره لو تدرين شكد تندمت لان اموت اموت كل يوم وانتِ بعيده .
هو يحجي واني ما اكدر ارد مغمضة عيوني واحس بنار تطلع من وجهي أيديه ترسم ملامح وجهي بهدوء الكتفي وهو بكل مره يهمس
- انا حيــادر غزاله حبيبي.
ويعيد الي بدأه كل ما اختنك افتح عيني المح وجهه ما ترددت ما خفت جنت متأكدة من خوفة عليَ لمساته الي كلها حنية بوساته وهمسة بأذني يجبرني اكون اله روح وجسد ، ومن هالليلة بديت مرحلة جديدة بحياتي
لماني بحضنه يبوس براسي ويحجيلي على طفولتي ضحك كال
- تذكرت من صار بيج كمل صح انا مره اجيت علمود هجــام ولكيت رويــده مكعدتج ورا البيت وتحطلج نفط وتمشط بشعرج وقتها ما فهمت ليش بس ذاك اليوم تذكرت .
- لا هاي مره الثانية هم صار بيه وحظت بشعري نفط ههههه .
ضحكنا نسولف حد صلاة الصبح صلينا ونمنا فزيت على صوت التليفون اباوع الحيادر نايم على بطنه دغيته بظهره
- تليفونك.
فز باوعلي كوه فاتح عينه كال
- صباح الخير حبيبتي.
- صباح النور ، تليوفنك .
جر التليفون كال
- هاي اختج شتريد ؟
فتح السماعه وعاف التليفون على المخده بس كالها
- الو
اجه صوتها تبجي وتصيح
- الحكلي حيــادر
يتبع 🦋