رحت والچنت احبهن راحَن وياك .
لاتنسون التصويت/متابعة الحساب/التعليق بين الفقرات🛑
البارت الجاي الجمعة✨
بسم الله الرحمن الرحيم
قراءة ممتعة 🤍
...........................................
مَيان:اباوعلة مبتسم بتصنع وهالشي واضح كام وكف يبلعم
شرار:ان شاء الله خير حددو موعد مشية الزلم ماريد اطول
قبل لا احد يحچي كلمة وحدة عافنة وصعد فوك باوعت لرماد هز راسة بعدم رضى اذا مايريدها ليش يظلم بنت الناس ويا ليش جاي يدمر حياتة وحياة البنية انه اشوفها كلش حبابة ما تستاهل تنجرح وتتأذة
كعدو يحچون بخصوص المشية خابرلة رماد حتى ينزل كعد يمهم يدخن وبس يسمع
مهيوب:نخليها الجمعة الجاية المشية حتى البنية تجهز نفسها نسويها مشية وحفلة بنفس الوقت
كال شرار بكل هدوء
شرار:ماريد حفلة عيب من السيد نحتفل وهوَ حزنان مجرد مشية وفضت
جهاد:وهوَ هيچ خلي نتفق على المهر نخابر ابوها ويصير خير
مهيوب:المهر مو فد مشكلة ومحلولة ان شاء الله خير
كملو كلامهم وهوَ صعد بدون ولا كلمة
كل واحد راح لغرفتة والبيت صار ظلمة انه رحت للمطبح اقطعلي فراولة وكيوي اريد اكلهم كملتهم وردت اصعد مريت بجانب الصالة توقفت من سمعت صوت تبسبس
عگدت حواجبي ما فاهمة كلهم بغرفهم خفت بس تشجعت ومديت راسي رفعت حواجبي بذهول من شفت جيهان كاعدة بالصالة تحت ضوة خفيف فاتحة شعرها وتحچي بالتلفون كام وصوتها ماينسمع بس ضحكاتها المكتومة اكدر اسمعها گوا سمعت شكم كلمة
جيهان:اهوو ماريد البس حجاب اختنگ هوَ منو هنا بس انه وانتَ
حطيت ايدي على حلگي مصدومة عرفت جاي تحچي ويا ولد
رجعت لمت شعرها وغطت شعرها بالبطانية
جيهان:ها هيچ زين؟
ماعرف شنو كاللها وهيَ ضحكت بدلع
تركتها وصعدت افكر بس بالنهاية كلت انه معلية حسوي نفسي لا شفت ولا سمعت افضل
دخلت لغرفتي اكل
:همزين جبت كيوي
كعدت بصفة وهوَ باسني بخدي
رماد:مرتي تطلب وتأمر عيوني
ذبيتلة بوسة بالهوى
:ابوس عيونك بيبي
رماد:ابوس الي يكول بيبي بحلگة
بيومها نمت بس ماكدرت اهود ابد كل شوي وكاعدة حتى هوَ تعلعلت نومتة بس هالشي مو بيدي
مرت شكم يوم على نفس الحال كلها تجهز لخطوبة شرار وفرحانين
يوم السبت رماد راد يروح لشريان اخوي يتفاهم ويا علمود باچر لأن جلستهم باچر وانه ومسك رحنة ويا
وصلنة للبيت وكلها تلگتني فرحانين بحملي
كعدو شريان ورماد يتفقون على باچر ومبينين ما ناوين خير
اجت ريتان كعدت بصفي تهز بحواجبها
ريتان:انقبلت بنفس جامعتچ عيني يعني انه رسميًا مهندسة
حضنتها ابوس بخدودها
:يلوگلچ والله عفية اهتمي بدراستچ ولا تهتمين بالخرابيط مال الحب ما حب ترا ماتفيدچ غير دراستچ
ريتان:هوَ انه ماريد هالسوالف بعد والأيام تثبتلچ
:عفية عليچ ريتو
سكتت تباوع لأصابعها
مسك گابلت لين وكعدت تحچي وياها عود تلعب ولين نايمة ما حاسة بشي لزمتها امي كعدتها بحضنها
زمرد:راح يجيچ اخو حلو حتى تحمينة انتِ اختة الچبيرة
ابتسمت بفرحة
مسك:اي كال بابي مينان حاملة اكو بطنها عنون
زمرد:اي اكو عنون انتبهي على مَيان وعلى العنون ماشي
هزت راسها بحماس امي خايفة تضل مسك تغار من الجنين اذا انولد كالتلي اتفاهم وياها بهدوء وما نحسسها بفرق
صار وقت نروح كام رماد يطگطگ برگبتة
رماد:يا الله تأخرنة خلي نروح باچر ورانة تعب
كال جدي
الشريان:بعد وكت
رماد:يا وكت الساعة 11 ان شاء الله غير مرا نجي وانتم تجون هم ولا تنسون نريدكم بمشية شرار تواجدكم ضروري
بسرعة باوعت لريتان تباوعلهم بتفاجئ وترمش بعيونها باوعتلي وهمست
ريتان:خطب؟
هزيت راسي اباوعلها بحيرة
:الجمعة المشية وعقد القرأن مالتة
ابتسمت ابتسامة باهتة
ريتان:اكون احسن من عندة وادعيلة بالتوفيق الله يوفقة بحياتة القادمة
همست بأذنها
:ريتان تحبينة؟
نزلت راسها وتنهدت
ريتان:ردت احاول بس محاولة فاشلة ماكدرت انسى الي صار بيناتنة وكلامة الجارح بحقي الله يوفقة بهالزواج
سكتت بانت الضوجة على وجهة بس هاي هيَ انتهت بينهم ماكو نصيب أثنيناتهم مختلفين عن بعض وبعدهم افضل من قربهم
امي انطتني الحرز كالت اعلگة بملابسي
رجعنة للبيت انه ومسك نزلنة بس رماد اخذ السيارة وراح للسيد
ماكدرت انام خليت الضوة مفتوح وكعدت اهز برجلي انوب مسك راحت يم خالة بقيت وحدي هنا خفت انام وتجيني وانه وحدي بالغرفة
ماتحملت اكعد وحدي اخذت تلفوني وطلعت من الغرفة خايفة ويا طلعتي صار بوجهي شرار يريد ينزل باوعلي وعگد حواجبة
شرار:ها خيرچ شبي وجهچ اصفر؟
ضحكت بتصنع
:ها لا مابية شي بس رماد ماكو كلت انزل جوا انتظرة
شرار:هااا زين يلا نزلي انه چنت اريد انزل اسويلي عصير
:انه اسوي
شرار:تسوين فضل
نزلت جوا وهوَ وراي كعد بالمطبخ سويتلة عصير برتقال وليمون وانه قطعتلي كيوي وكعدت اكل اباوعلة يشرب بالعصير ويباوع بتلفونة ويتحسر حسيتة كلش مهموم
ماكدرت اسكت
:اكدر احچي وياك بموضوع؟
سد تلفونة وباوعلي
شرار:كولي
:انتَ چنت تحب ريتان؟
ابتسم ونزل عيونة يلعب بالجداحة ونطق بحسرة
شرار:چنت
بلع ريگ وهز راسة
شرار:چنت احبها غلطة وحدة وحبي كلة تبعثر
:ليش ما حاولت وياها شرار ليش تريد تظلم بنت الناس شوف انه صح رافضة علاقتكم بس افضل من ماتدمرون انفسكم
شرار:منو كال ما حاولت؟ ركضت وراها لبغداد تخيلي افتر وراها من مكان لمكان توسلت بيها ورجعت خطبتها وحچيت وياها وچان ردها شنو؟ الرفض وكلام مو حلو بحقي انه مو عديم كرامة حتى بعد كل هذا وارجع اركض وراها
:فهمت بس الي ما فهمتة ليش تريد تخطب تريد تقهرها؟
باوعلي رافع حاجبة
شرار:انه مو اختچ حتى ادمر نفسي بس علمود انتقم
:چا ليش ترا سليدا بنية حبابة مبينة
ابتسم
:اعرف سليدا بنية كلش حبابة وقريبة علية وخطبتها لأن تحبني ومستعدة تضحي بنفسها علمودي انه طبقت مقولة اخذ الي يحبك لا تاخذ الي تحبة
:تحبك!!
شرار:تحبني ماحچيت لأحد غيرچ سليدا تعشقني عشق بريئ وحب فطري من الطفولة وانه اختاريتها بناء على هذا لأن راح اكو سعيد وياها وراح تكون سعيدة وياي
هزيت راسي بتفهم
:الله يوفقك وهم ريتان كالت الله يوفقة ان شاء الله انتو الأثنين يكون طريقكم صح ومابي عقبات واتمنى الأستقرار الكم
كام واخذ العصير ويا
شرار:وهم الله يوفقها هاي القسمة والنصيب ردنة نصير كلشي وكلشي ماصرنة
كال اخر كلامة ورجع لغرفتة
نهاية شرار وريتان صح أذتهم بس بعدين راح ينسعدون وكل واحد اختار طريقة الي يعرف سعادتة بي
فززني صوت سيارة بقيت كاعدة بمكاني دخل رماد وتفاجئ من شافني
رماد:ها بعدچ كاعدة؟
برطمت شفايفي
:ماكدرت انام وحدي تأخرت
كعد بصفي واكل كيوي من صحني
رماد:احتاجيت السيد بشغلة تخص باچر وهوَ ماقصر يلا امشي ننام وباچر توصلچ الأخبار
:اوكف اوكف
وجع كعد مستغرب مديت راسي لصدرة اشتميت ريحة ابد مو حلوة دفعتة وسديت خشمي
:ريحتكككك مو حلوااااا
رفع حاجبة وصار يشمشم بنفسة
رماد:تخبل ريحتي شبيچ
:كوم اسبح رماد حتقيئ
هز ايدة وكام صعد للحمام وانه طلعتلة ملابس بالغرفة
دخل بعد فترة ضايج
رماد:ريحتي مو حلوا تهي بهي تخبل ريحتي
رحت اشم بي راحت الريحة
:اي هسة صارت حلوا
خزرني وراح مشط ورش عطر وتقرب علية بس طخ عطرة بخشمي ركضت للحمام ذبيت كلشي اكلتة اجة وراي
رماد:هااا ها شبيييچ
حچيت لعبانة نفسي
:اطلع اطلعععع ريحتك مو حلوا اطلع
بقيت ادفع بي لحد ما طلعتة ورجعت اتقيئ
طلعت سادة خشمي چان برا منتظرني
رماد:مو هسة سبحت كدامچ
:ادخل اسبح بعد حباب ولا ترش عطر تلعب نفسي
استغفر ودخل يسبح خبلتة بس ماكدر اشم عطرة ابد بقيت انتظرة ربع ساعة وطلع ريحتة صابون رحتلة نعسانة حطيت راسي بصدرة
:هسة حلوا ريحتك تعال ننام
رماد:متبربرة كلش مريتي
دخلت للغرفة غيرت ملابسي وحطيت الحرز بيهم وأول مرا اكدر انام براحة ذبيت نفسي ما حاسة بشي صار ايام نومتي متعلعلة ومن الخوف ماكدر حتى انام صح تجيني احلام بس احلام مو كلش تخوف بس اشوف. چلب يركض وراي
ثاني يوم ماكعدت من وكت
ومن كعدت لكيت مسك كاعدة تحچي ويا بطني سويت نفسي نايمة اسمعلها
مسك:من تجين اصير اختچ الچبيرة مانريد ولد لا ايييع حتى ازوجچ اخو بليلة اسكندر
فرحت لأن ماضل ببالها شي وحسيت حتحب اخوها او اختها ارتاحيت من هالناحية سحبتها لحضني
:راح نحبكم وندلعكم مسك وانتِ اختهم الچبيرة تنتبهين عليهم وتعلميهم الصح والغلط
مسك:انه احبهم هواااي
بستها بخدها وكمت
:شنو رأيچ العصر نسوي كيكة فراولة انه وياچ
مسك:اييييي احبها نسويها وننطي عمو السيد منها يحبها
:من عيوني حبيبتي
طلعت غسلت وجهي واخذتها ونزلت
الماس طالعة تشتري ملابس واسعاد تطبخ والبيت نظيف
ماكدرت اتصل برماد اعرف شصار خفت بعدهم بالجلسة بقيت انتظرة
الساعة 1 ونص كاعدة بالمطبخ انتظر رماد لعبانة نفسي فزيت على طولي من اندگ الباب بشكل مخيف يندگ قووي عبالك هجوم
طلعن مودة وجيهان خايفات
مودة:شنو هاي منو هيچ يدگ الباب
رفعت كتفي بخوف وركضت فتحت الباب وتفاچئت بوجود مروة ام مسك حالتها حالة تبچي ومعصبة دفعتني من كتفي ودخلت تلعلع
مروة:وييينةةةة وينة رماد سجن اخوي تعال حقيييير
دخلت وراها اختها تباوع للكل بطريقة مو حلوة رفعت حاجب ووكفت كدامهن متكتفة
:خير شجابچ؟
مروة:والله جابني المخبل ابو بنتي سجن اخوي وصرت ماكدر اشوف مسك غير ساعة وحدة بالأسبوع
سحبت نفس احاول اهدئ نفسي
:كلمتچ هالمرا كلتيها المرا الثانية تقرين على روحچ السلام انتِ ما تستاهلين تشوفين مسك ثانية وحدة اصلاً لچ انتِ شنو من ام بنتچ تنضرب وتجوع وتتعذب كدامچ وانتِ ساكتة
تقربت علية ودفعتني تبچي
مروة:معليچ سمعتييييي بنتي وبكيفي كولي لرجلچ المخبل مروة راح تاخذ بنتها هوَ مخبل وراح يخبلها علية
ضحكت بشر طفح الكيل عندي سحبتها من حجابها وهيَ صرخت هجمت عليها ادفر بيها واضرب مايحق لأي احد يحچي على رماد
اختها ركضت تريد تضربني وهجمن عليها مودة وجيهان زوعنها العافية وانه اريد اشفي غليلي من مروة مددتها بالكاع صعدت فوكها واستلمتها ضرب متحلفة بيها من سوت هيچ بمسك
على اصواتنة طلعو مهيوب وجهاد وشرار يردون يفكونهن عني بس شرار يدفعهم فرحان ويصفگ
شرار:عوفوها الله عليكم عوفوها عفية بخواتي عفية برفعة راسي ولچ مودة بالنعال بالنعال
تحمسنة بتشجيعة وصرنة نزيد بالضرب وهوَ لازم ابو وجدة مايخليهم يتقربون متونس
:حقييييرة عايقة والله اذاااا نطقتي اسم رماد بالسانچ الزفر ادفنچ وانتِ عايشة
مهيوب:ولچ جدو عوفيها تولي مو زين عليچ
شرار:مايصيرلها شي خليها تضربها الله عليك ولچ مَيان اقوة عضيها
عضيتها بأيدها وصرخت صوت متأذية صح حصلتلي شكم ضربة بس المهم شفيت غليلي واخذت حيفي منها
دخل رماد وفتح حلگة بصدمة ركض علية شالني عنها
:وخرررر هدني عليهاااااا
رماد:ولچ مَياااااان انتِ حامل
اريد ابعدة عني وارجعلها بس لازمني بقوة
:مايصيرلي شي خلي اكتلهاااا
كامت تلملم بنفسها وتبچي
مروة:راح اشتكي عليكم واشتكي على هذا صاحبك اصبرولي
:اشتكي يلا اشتكي خايفة منچ حقيرة
راح ابو رماد سحب بناتة من اختها خوش فادني هالمرا
شرار:يلا يلا برا اذا مو كد الحچي لا تحچن
مروة:راح اندمكم أول واحد راح اشتكي علية صاحبك السيد رافعلي خشمة ويمشي كلة منة انسجن اخوي
شرار:ديلا هسة شلون اخو اخوچ سرسري عرگچي وشابعچ دمغ انقلعي يلا
طلعت هيَ واختها يبچن شفتهم كلهم يباوعولي عدلت نفسي وسويت نفسي بريئة ومامسوية شي
:احم رماد تريد غدة؟
عض شفتة كاتم ضحكتة
رماد:اخاف اكلچ اي وتكتليني
ضحكت وجدو يهز ايدة كال ابو رماد
جهاد:بابا مايصير هاي راح تسويلچ مشكلة عويصة وانتِ حامل بلا طگتچ ببطنچ وتأذيتي بلا صارلچ شي
:لا كلشي مابية شوفو انه احب اكتل أي شخص يزعجكم دزو علية
كل واحد راح لغرفتة ورماد حضن خواتة
رماد:بلا خلشوف عضلاتچن اول مرا اشوفچن تعاركن عاشو
مودة:احنة صح مو صحبة ويا مرتك بس فار دمنة وشاركنة بالعركة بس والله تونس العركات حبيت
ضل يضحك وياهن وانه رحت حميت الأكل
شوي ودخلو البنات راحو لغرفهن وهوَ كعد يباوعلي ويضحك
رماد:تخوفين انتِ
حطيت المرگة واحچي برقة
:يعني يحچون عليك قابل اسكت
رماد:لا لاتسكتين خيل وابو الزايد عفية عليچ انطيني ايدچ ابوسها
مديتلة ايدي باسها وكال
رماد:انطيني حلگچ ابوسة
دنگت بستة ورجعت اصب بالغدة كعدنة ناكل ونسولف
:والله حقيرة شلون تزوجتها هاي
رماد:چنت زعطوط ابوها انطاها هدية لمتعب ومتعب متزوج خذيتها انه
:ايع حتى اختها ايع
ابتسم وتقرب يحچي بهمس
رماد:هاي اختها اكبر بربور
:ليش؟
رماد:تحب السيد ومن تزوج انتحرت وانه تلاحگتلها چانت مثل ظلة من يجي للبيت هنا اختها تنطيها خبر وتخليها تجي
:اييييع والسيد شلون متحمل
رماد:بالدفرات شكم مرا يرزلها ومايفيد صلفة وعود هسة انخطبت من أيست من عندة بس مو ماتت زوجتة الله يرحمها عافت خطيبها حتى بلكت يصير عندها امل بي ماتدري حتى مايعرف بوجودها بهالدنيا
انصدمت بالي سمعتة فضلت السكوت
العصر سوينة انه ومسك كيكتين وحدة اخذوها هيَ وابوها للسيد والثانية بقن للبيت ورحنة بالليل نشتري ملابس انه ومسك للعقد مال شرار اشتريت فستان ازرق فاتح مخصر على الجسم يجنن
بعد شكم يوم صار يوم عقد شرار اجت هواي ناس بالبيت بيوت عمامهم وخوال شرار وشيوخ هواي تجهزنة انه والبنات ريمان ما اجت لأن يكولون مو زين على شرار ينلزم لأن ما طلعت من الأربعين
خليت مكياج وبدلت وحتى مسك خليتلها مكياج فد فرحت
نزلت جوا كعدت يم النسوان امي موجودة وريمان موصيتها تفتحلها كام حتى تشوف كلشي بالعقد
اباوع لجيهان تعدل بنفسها ومتوترة عبالك هي العروس وكل شوي وطگت صورة وتكوم تشوفهم شوكت نروح وترجع تباوع للساعة
صار وقت روحتنة صعدنة انه ورماد بسيارتة ومسك بحضنة واخواتة كعدن ورا وطول الطريق نغني وهوَ يخزر بينة لأن جماعتهم كلهم هنا
وصلنة لبيت العروس ودخلنة بسرعة ورماد ورانة
كعدت اباوع لسليدا طالعة كلش حلوة وبس ترجف لابسة فستان ابيض مستور ومكياج بارز ملامح وجهة الجميل
چانت كلش فرحانة مبينة صدك تحب شرار من كل گلبها
دخلو شرار والشيخ حتى يعقدون كعد يمها بالكوشة والشيخ كدامهم اباوع شرار يمسح بجبينة ويبلعم
صار الشيخ يعقدلهم دقايق وصارو زوج وزوجة بشكل رسمي وشرعي
طلع الشيخ ورفعو البرنص من عن سليدا چانت منزلة راسها خجلانة باوعلها شرار وابتسم باسها براسها ومادري شنو همس بأذنها وهيَ خجلت
لبسو بعض الحلقات وخليناهم يرگصون شوي
چانت كلش رقيقة ترجف متوترة لازمها من خصرها وهيَ تنتفض باسها بخدها وساحت همزين ما طاحت
خلص هاليوم على خير الحمدلله
اباوع يمي ماكو جيهان استغربت وين راحت كلت يمكن راحت تجيب ماي ما دققت
مسك احتاجت الحمام اخذتها لبرا دخلتها للحمام وانه وكفت انتظرها تطلع شوي وما اشوف غير جيهان طلعت من الترك وطلع وراها روديم اخو سليدا من شافوني تجمدو بمكانهم
انه خزرتها وباوعت لروديم
:اخت صديقك هيچ تسوي وياها؟ بلا ما استحيتو خاتلين هنا وحدكم
جيهان خافت تقربت لزمت ايدي
جيهان:والله راح يجي يخطبني بس عرض علية الزواج لا تحچين شي مَيان
باوعتلة ماعاجبني تصرفهم
:اتمنى تجي بسرعة وتخطبها لأن بنات الناس مو لعبة تلعب بيها وتتركها ماسمحلك ترا تجي تدخل للبيت من بابه استاذ
حچة بدون مايباوعلي
روديم:وانه رايدها على سنة الله ورسوله بهالأسبوع جاي اخطبها انه چنت انتظر بس اتوظف والحمدلله توظفت انه مو قليل أصل بنظرة حرام ما اباوعلها والله شاهد علية
طلعت مسك وهوَ طلع من البيت تركت جيهان واكفة ودخلنة انه ومسك انه ما دخلني بس ماريدها تنخدع بشي يجي يخطبها احسن
رجعنة للبيت وانه اطمنها ما راح احچي شي وراح اتستر على الموضوع لأن الولد مبين رايدها
بعد شكم يوم مقابلة العمل مالتي وكلش متوترة ورماد يدرسني شنو اجاوب وشنو اسوي كلت ما اداوم هالسنة بس كال حرامات تضيع عليچ وظيفة وافقت واذا حامل عادي ...
****
ريتان:كاعدة اباوع لصورة قبولي بالهندسة مبتسمة احاول اتناسى خطوبة شرار ماعرف ليش ضايجة مو هذا الي ردتة مو رفضتة بعد ليش اضوج غمضت عيوني اتذكر البارحة
چنت اراسل نورس نسولف طبيعي
بهالأثناء وصلتلي رسالة من رقم شرار دگ گلبي حيل وتخربطت اوضاعي فتحتها چانت عبارة عن اغنية لعمرو دياب
مش ناسي كلامك في وداعنة ولا قسوة قلبك وعنيك
كنت بقولك خليك جنبي ما تهزتش وهنت عليك
بقى مش عارف ايه غيرني يابريئ ياحنين ياملاك
هبعد علشان بتفكرني بالجرح الي انا عشتو معاك
ردي عليك مبقاش بيفيدك ضعت وضيعتني من ايدك
طول ما انه اسمع دموعي تنزل مو رايح يخطب ليش جاي يسوي هيچ وياي ليش مايتركني بحالي ويعيش حياتة بشكل طبيعي ينساني ويهتم ببنت الناس حتى لا تتأذة
دزيتلة رسالة محتواها
:كافي شرار شوف حياتك خطية البنية
دزلي
شرار:باچر راح ينتهي كلشي
:الله يوفقكم ماكدر اوكف بوجه سعادتكم اتمنى من كل گلبي تتهنون وتضل تحبها وتحبك احنة مانرهم لا قبل ولا هسة ولا حتى بالمستقبل
شرار:من گلبچ تدعيلي بالتوفيق؟
:اي من گلبي انه جربت احد يدعي علية بگلب محروگ وتأذيت وبرغم كلشي سويتة وياي وكل كلامك الي جرحني ما دعيت عليك
شرار:مشكورة
:اتمنى تحذف رقمي وتضل عينك على بنت الناس ماكدر اتحمل تخرب حياتها بسببي وهسة لازم اروح مع السلامة
دزلي قلب احمر وانحظر رقمي وانه هم حظرتة تنهدت ومسحت دموعي فكرت اغير رقمي افضل حل
طردت كل التفكير من راسي ونمت
ثاني يوم چان عقد شرار ريمان ما راحت نزلت يمها اشوف لين كلهم راحو بس انه وياها بقينة
دخلت للغرفة اشوفها مفللتها
:اويييييي ريماااااان بنتچ تنگرط
باوعتلي تضحك
ريمان:صايرة كلش تشبهچ شوفي خدودها
:هنيالها چا
دگ تلفونها وانه العب بلين جمدت بمكاني من سمعت الشيخ يعقد لشرار وهوَ ينطي موافقتة حسيت بشعور مو حلو باوعت لريمان چانت عيونها بالتلفون وتضحك فرحانة لأخوها
كمت من يمها غسلت وجهي وصرت افتر بالحديقة ماعرف شنو اريد بعد ما رفضتة ليش هسة زعلانة
كعدت على الكرسي اباوع بالفراغ خليت اصابعي على شفايفي وغمضت عيوني واجة مشهد يوم باسني كدامي
ماعرف شجاي احس حرام الي اسوي طفرت استغفر ربي ورحت توضيت وصعدت لغرفتي اصلي واتمنيت من كل گلبي ينسعد وياها وانه يرتاح گلبي
بعد ما خلصت صلاتي فتحت تلفوني وصار بوجهي ستوري ريمان دخلت علية وابتسمت من شفت شرار كاعد على الكوشة ما انكر گلبي انعصر عصر بس هذا الي انه ردتة
حسيت بأحساس شرار من انه انخطبت گلبي صار يأذيني ودموعي تتجمع بعيوني وما اخليها تنزل مو من حقي انزلها هسة هوَ رجال متزوج
سديت تلفوني وقررت امحي كلشي ردت امحي وارجع ريتان قبل لا شرار يدخل لحياتها قررت اهتم بدراستي وبس ما اهتم لغير شي ممكن يتعبني سحبت نفس قوي وزفرتة رفعت رأسي لفوك
:ربي ساعدني ودلني على الطريق الصح
صدقت وكمت رجعت افتر بالبيت اسوي نفسي طبيعية واضحك عادي اشوف ريمان تباوعلي وتبتسم بحزن چانت اكثر وحدة تريد علاقتنة انه وشرار تتم
بالأيام الي بعدها صرت اجهز للدوام ما ضل هواي وشرار تناسيت موضوعة وعلى حسب كلام ريمان هوَ سعيد وياها وهذا الشي فرحني لأن البنية ما الها ذنب
****
مَيان:واكفة كدام المراية اباوع لبطني شلون كبرانة صح بعدها صغيرة بس كلش فرحانة بيها
دخل رماد للغرفة چان يسبح باوعلي وابتسم اجة حضني من ورا
رماد:الحمل زايدچ جمال
:احس فرحانة هواي
باسني برگبتي
رماد:وانه هم جاي انتظر ولادتچ يوم عن يوم
التفتت علية وحاوطت رگبتة
:اخاف من الولادة تدري؟
رماد:حقچ الولادة شي صعب بس احس من تجيبين بولادة طبيعية راح تحسين بالطفل وحهوَ يطلع من بين احشائچ عكس العملية وهم تتأذين وراها
:لا ماريد عملية اريد ولادة طبيعية وانتَ تدخل وياي
فتح حلگة وعيونة
رماد:شنيييي!!
تخوصرت وهزيت راسي
:اي عيني تدخل وياي واذا مادخلت ازعل وابچي وما اجيب
رماد:مو هيَ بكيفچ
:چا بكيفمن والله معلية تدخل وياي يعني تدخل وياي
حضني يضحك
رماد:هسة الله كريم شبيچ بعد وكت
ضربتة بصدرة وصرنة نضحك
مر على حملي 3 اشهر وصارت هواي اشياء اول شي هوَ انه الحمدلله توظفت وصرت اروح واجي ويا رماد وخطية خبلتة بنساوتي
التابعة صارت تجيني بمجرد احلام وما تتقرب علية لأن الحرز ما انزعة ابد وتقربت لربي اكثر صلاتي بوقتها وقبل لا انام اقرة المعوذات
چان المفروض قبل شهر يصير عرس شرار بس توفى جد سليدا وتأجل زواجهم وخطوبة جيهان وروديم اجة خطبها وماكدرو يعقدون
طبعًا سليدا بنية كلش لطيفة وتنحب حتى احس شرار صار يميل الها بس احسة معتبرها صديقة اكثر من حبيبة وزوجة
بهالفترة صرنة نأثث ببيتنة حتى ننتقل جاب عمال نظف البيت وكل ما نشتري شي يخليهم يرتبونة بمكانة يعني من اروح بس ارتب ملابسنة حتى المواعين مرتبيهم بالكاونتر
أسعاد من عرفت بية اريد اشيل شدت وياي وانه ما اسكتلها ونتعارك تريد كلشي بس انه اشتغلة ورغم جدهم وظف عاملتين علمودنة وهم ما قابلة
كعدت الصبح من وكت سويت ريوگ وصعدت كعدتة وكعدت مسك بدلتلها لبستها ملابس المدرسة لبستها شي يدفيها انه اسبحها بالليل حتى تنام والصبح ماتاخذ برد
طلعت خالة الماس تتثاوب
الماس:صباح الخير عيني
:صباح النور
صارت تبوس مسك بخدودها اجة رماد باس امة وكعد وهيَ كالت
الماس:رماد اني حسافر لدبي
باوعلها ماعاجبة
رماد:شسوين هناك؟
الماس:اتونس انه وصديقاتي تعبت من البيت
رماد:يما كافي شغلچ هملتي كلة اهتمي بشغلچ هم
الماس:يا حبيبي يا امي بس اسبوعين وارجع وشغلي سلمتة لصديقتي
رماد:هوَ انتِ مقررة بعد المن جاية تسأليني
كعدت بصفة مبتسمة
الماس:هاي هيَ ماروح المهم لاتزعلون حتى شرار كال لا تروحين انه كلت اتونس لأن ابوك جاي يضوجني
رماد:ماكدر امنعچ من شي بس انه علمودچ
سكتت واحس اكو كلام هواي بحلگها باوعلها وگرص خدها
رماد:احچي يما
تنهدت ونزلت راسها
الماس:اذا اكول شي راح تدعموني؟
رماد:احچي انه وياچ بكلشي
باوعتلة عيونها مدمعة
الماس:رماد انه تعبت اريد انفصل عن ابوك
صفن رماد بعيونها وانه ما انصدمت لأن هالشي چان متوقع
الماس:انتو كبرتو بعد اكدر اطمئن عليكم اكدر اشوفكم وتشوفوني
رماد:خليني اخمن تطلگين وتروحين للخارج تعيشين ويا اخوچ مو؟
الماس:اي وهذا افضل قرار اذا ابقى هنا ابوكم ماراح يسكت
صار صمت بس اسمعة يدگ بأصابعة على الطاولة بشكل خفيف وصافن بعد دقايق لزم ايدها وباسها
رماد:هاي حياتچ وانتِ حرة ماكدر افرض رأيي عليچ بس يفضل نكعد انه وياچ وشرار وريمان نتفاهم لأن هذول هم اولادچ
الماس:انه هم فكرت اجمعكم حتى تعرفون بقراري خفت من ردة فعلكم
رماد:لا تخافين امي انه وياچ هاي هيَ خلي نحچي ونتفاهم بعدين اجمعهم
راحت لشغلها ورماد تنهد ضايج
رماد:تطلگ احسن خليها تروح لأخوها
:وابوك؟
رماد:امي مستحيل ترجع لأبوي مات كل هالحب بگلبها بسبب زواجة
سكتت
رحنة لدوامنة بعد ما وصلنة مسك لمدرستها مثل العادة كل شوي يجي يطمئن علية ماريد اتعب
تشاركنة بمشروع نرسمة ونشتغلة
كاعد كدامي يباوع للخريطة وينطي اقتراحتة
رماد:لا مَيان المطبخ لازم يكون اوسع من هيچ والحمامات نخليها بالترك الي هنا حتى يصير البيت مرتب
:مو اذا كبرنة المطبخ اكثر من هيچ حتكون الصالة صغيرة وصاحب البيت طالب الصالة تكون اكبر من الديوان
بقينة نتناقش وسوينة اكثر من تصميم حتى باچر رماد يروح لموقع البناء
رجعنة للبيت بعد ما انتهى دوامنة مسك مرجعها ابو رماد للبيت ونايمة واحنة هم اكلنة ونمنة
چانت سليدا معزومة عندنة ثاني يوم على العشة راح جابها شرار العصر
نزل رماد ظهرة يأذي بأن واكع بالموقع مال البناء
:مَيان
كمت ورا بدون لا يكول شنو صعد كدامي وانه صعدت ورا من دخلت للغرفة چان متمدد على الكاع
رماد:تعاي بس عصري ظهري كتلني كتل
رحت كعدت وصرت اعصر بي وهوَ يتأوه بألم ظهرة من الوكعة كلة مشخط
رماد:اليوم شفت مازن
توقفت عن الحركة گلب نفسة نام على ظهرة
رماد:ردت اكتلة بعلي بس كضيت روحي
:رماد شعلينة بي خيولي
ابتسم وحضن بطني
رماد:حبيب البابا
ضربتة على كتفة
:كوم لعبانة نفسي
رماد:من حبلتي لحد هسة بس لعبانة نفسچ مني حتى حلگ ماتنطيني
ضحكت ورجعت حچيت
:خلي ننزل يلا سليدا هنا
لبس تيشيرتة ونزلنة جوا سليدا كاعدة هادئة وبس تضحك
شفت شرار يحچي وياها بس مايباوع بعيونها عكسها من تحچي تخلي عيونها بعيونة وعيونها تلمع
سليدا:شرار كال نسافر مو
شرار:نروح لدبي مثل ما اتفقنة
ضحكت ببراءة وهوَ باوعلها وابتسم
بوقت العشة كعدنة ناكل وهوَ يفلسلها ويخلي كدامها عصير لو ماي ويعدل بحجابها لأن هيَ ماتتنبه ويطلع شعرها
تقرب علية رماد وهمس بأذني
رماد:اكلچ شنو رأيچ بالسيد وريتان؟
باوعتلة مستغربة
:شنوو؟
حرك كتفة ورجع كال
رماد:يعني انه فكرت وكلت بلكت الله يوافق وهيَ توافق
:يااا رماد الرجال ما صار هواي ميتة مرتة وانتَ تريدة يتزوج ويتزوج منو ريتان
رماد:ماعرف هوَ حتى مايعرفها ولا هيَ تعرفة بس انه اقترحت اقتراح
:انسى رماد اصلاً ريتان ماتريد تتزوج
فززنة صوت مسك لأن كاعدة بحضن ابوها
مسك:ريتان حتتزوج وتصير عروس؟
عضيت شفتي وباوعتلهم كال جدهم
مهيوب:صدك راح تتزوج
:لالا بس اكو واحد خاطبها ورفضت ماتريد
هز راسة وسكت باوعت لشرار چان ياكل مامهتم ويحچي ويا سليدا
:رماد سد هالموضوع هسة
سكت رماد وسدينة الموضوع هوَ صدك اكو واحد خاطبها بس رفضت واحسن خلي ترفض دراستها اهم هسة
ورا العشة شرار اخذ خطيبتة وطلعو وانه والبنات تساعدنة ورتبنة البيت
من كملت صعدت تعبانة ونعسانة فتحت باب غرفتي وحچيت
:رماد شفت ال....
شهگت متصنمة بمكاني ورجف كل جسمي وراسي افتر من شفت منظر رماد وهوَ يذبح بنفسة!!...
.
يتبعع
توقعاتكم؟
.
.
.
ضيفو حساب الانستا
وقناة التلي
اللهم صلِ على محمد والِ محمد 🦋
مها ال عبدالله