حَزِنك يچمل الشتا
و كاعد لوحِدك غاد
بزوية عُمر
والكَهوه چنها سنين نطرت ناس
مسحتهم صفنتك
وتغمض عيونكَ
وينَ راحو؟ .
لاتنسون التصويت/متابعة الحساب/التعليق بين الفقرات🛑
البارت الجاي الأربعاء✨
بسم الله الرحمن الرحيم
قراءة ممتعة 🤍
...........................................
مَيان:نامت مسك اخذها بحضنة وصعدها لغرفتنة يبوس بيها ولا قبل يعوفها نومها بحضنة مخلي راسها على صدرة
باوعلي وابتسم رفع ايدية
رماد:تعاي
تقربت عليهم فرحانة نمت على صدرة من الجهة الثانية
رماد:احبچ انتِ ومسك الوحيدات البگلبي معشعشات
خليت وجهي برگبتة وطبعت بوسة خفيفة عليها
:وانه وياها نحبك هواي انتَ الرجال الوحيد الي معشعش بگلوبنة
رماد:لا تتحرشين مسك نايمة
:شمسوية هسة هيَ بوسة المهم نعسانة اريد انام احرسنة واحنة نايمين
غمضت عيوني وهوَ كال
رماد:مو كدامچ چلب
فتحت عيوني وهزيت راسي
:لاااا شبيييك ياااا قصدي انتَ حارسنة الشخصي ليش تفهمني غلط
رماد:لالا بعد انتِ كلتيها انه چلب خلف الله عليچ
عضيتة بصدرة
:نعسانة تخليني انام لو شلون
رماد:نامي نامي الچلب يحرسكم
ضحكت انه ما چان قصدي هيچ مادري شبي
نمت وهوَ بعدة يحچي ويا مسك ومسك نايمة احسة كلش مشتاقلها
بين النايمة والكاعدة حسيت صارت كلش حارة رغم الجو هسة برد خلص الصيف بس ماعرف حسيت نفسي كاعدة بوسط نار
فتحت عيوني ورجعت سديتهم من حسيت البطانية انسحبت من عندي بس صارت حارة اكثر حتى صرت ماكدر اتنفس
حچيت بنعس
:رماد حارة
ماكو رد من رماد بس حسيتة حرك اصابعة الخشنة على كاحل رجلي
:رماد وخر كوم افتح السبلت
حتى صوت ماكو عصبت من رماد فتحت عيوني وجمد جسمي من المنظر الي جاي اشوفة
نايمة على الچرباية وداير مدايري نار والنار جاي تتقرب خليت ايدي حلگي والتفتت بخوف اريد اكول لرماد بس شفت شي وكف شعر راسي
رماد ماكو وكدامي نفس المرا نفس الهيئة ونفس الأبتسامة ونفس نظراتها الحاقدة صرخت بعلو صوتي وبكل قوتي صوت هز البيت هز حسيت احبالي الصوتية تگطعت
متت بمكاني وبادت روحي عيوني حسيتهن راح يطلعن من مكانهن وگلبي من قوة دگاتة كلت واح يوگف جسمي يرجف بشكل مو طبيعي تقربت علية وحطت ايدها على راسي وانه ماكدر حتى اتحرك نزلت ايدها على بطني وكالت بنفس صوتها المرعب
:راح اخذ عقلچ راح اهدچ راح اكتلهم الچ واحد واحد
ماكدرت اتحمل عيوني انگلبت وحسيت بطيحة قوية ماعرف شنو صار
چنت من الخوف حاسة بنفسي راح اموت لو اتخبل ماكدر اتحمل هيچ اشياء
بعد فترة طخ بأذني صوت بچي طفل وقطرات ماي تنزل على وجهي فتحت عيوني والصوت تقرب اكثر راسي ما احس بي من الوجع عيوني حارات بشكل ما احس بكل اطرافي
صار رماد بوجهي يرش على وجهي ماي خايف علية باوعت هيچ وشفت بصفة مسك تبچي
حطني بحضنة وعصرني عصر
رماد:شبيچ يا صبَي عيني احچيلي
لساني معگود اريد احچي بس احس لساني ثگيل مايعيني شالني بحضنة ماعرف وين خلاني وراح لمسك الي كاعدة بالأرض تبچي بخوف رجع نومها ورجعلي
رماد:احچي بوية شبيچ تصرخين ومنو يركض وراچ
اباوع لرماد هذا مو رماد عگدت حواجبي انتفض وجهة اسود وعيونة بس بياض اي لون اسود ماكو حتى صوتة اختلف وانه حسيت نفسي راح افقد عقلي صرخت بعلو صوتة وصرت ادفع بي ماعرف منين اجتني القوة بس الي اعرفة ماريد اباوع لوجهة المخيف
دفعتة عني وكمت بالزاوية اباوعلة وابچي حسيت روحي جاي تأذيني ماعرف شجاي يصيرلي
:وخرررر عنيييي وييين رمااااد وينةةةة
تقدم علية رافع ايديناتة بأستسلام مصدوم
رماد:انه رماد مَياني اهدي
غمضت عيوني وحصرت نفسي بالحايط
:لاااا مو انتَ مو انتَ ابتعددددد
ما سمع مني حسيتة حاوط وجهي ادفع بي مغمضة عيوني تقرب لأذني وصار يهمس بهدوء
رماد:اعوذ بالله من الشيطان الرجيم اعوذ بالله من كل خبث اعوذ بالله من كل شر بسم الله الرحمن الرحيم بسم الله الرحمن الرحيم
ضل يردد بهالكلام لحد ما حسيت نفسي هدئت وأمنت فتحت عيوني اشوف العرگ ينزل من جبينة وعيونة ذبلانة دخلت بحضنة ابچي
:رماد انتَ هنا حبوبي خايفة
حضني قوي
رماد:انه يمچ حبيبتي يمچ لا ترجفين كافي
خليت وجهي بصدرة خايفة ماعرف شنو جاي يصير
مسك تبچي ابتعد عني وراحلها يسكتها مبين خايفة كعدت بالزاوية مابية حتى اتحرك انفاسي بصعوبة اجرهن
نوم مسك على الچرباية ورجعلي رفعني من الكاع وصار يمشيني للچرباية ويمسح بدموعي
رماد:ماكو شي انه هنا حتى بچي لا تبچين
نومني على الچرباية يرفع شعري عن وجهي
رماد:نامي ولا تخافين تذكري رمادچ يمچ
فتحت ايدية اناشغ
:ا احضني حيل خايفة
هز راسة واجة حضني انه ثنيت رجلية وخليتهم بداخل رجليناتة
:لا تخليها تجيني حباب
باس راسي
رماد:محد يجي وانه يمچ لا تخافين
:تجي تريد تكتلني انه اشوفها وجهة مو حلو وصوتها يخوف
رماد:شسوتلچ؟
:نايمة وصارت حارة كلش حارة ومن فتحت عيوني شفت نفسي محاوطني النار ويريد يوصلني وها من نمت لزمت رجلي والله لزمتها ومن كعدت شفتها كدامي تخوف تخووووف
حچيتلة كلشي وحچيتلة شنو كالت ضل ساكت رجع يهدي بية وخلاني ارجع انام نمت بخوف
ثاني يوم كعدت جسمي متكسر رماد ماخذ اجازة يريد يروح يقدم دعوة ثانية حتى العصر ياخذني لأهلي نروح نشوف اخوي واختة وبنتهم
راح وانه اخذت مسك ونزلت احس مالي حيل لكلشي سويتلها ريوگ بدون ولا كلمة وكعدت تاكل بقيت صافنة بالفراغ
ليش هيچ جاي يصير وياي منو هالمرا شنو قصدتها من كالت اخذ عقلچ واكتلهم الچ واحد واحد راسي صار يأذيني من التفكير
مر الوقت بطيئ رجع رماد وانه باهتة تعبانة من كلشي وضايجة
هوَ احتار شنو يسوي وياي يضحكني وانه اضحك مجاملة
العصر بدلنة ورحنة لبيت اهلي كلت احچي لأمي
وصلنة جبرت نفسي على الأبتسامة وشوي ارتاحيت هنا
مسك گابلت لين وكعدت تباوعلها فرحانة بيها جابتها امي حطتها بحضن رماد وهوَ يباوعلها بفرح
طلع تراچي ذهب وتميمة ذهب
ريمان:المن حتى بعدنة ما ثقبنة أذنها
رماد:عادي هدية مني الها عود من تجيني بنية اريد كيلو ذهب وغير الكيلو ماريد سمعت شريان
ضحكو وشريان رفع ايدة يضحك
شريان:يارب يجيك بس ولد
رماد:اي عادي الولد سجلو قطعة ارض بأسمة
ضحك وكال
شربان:رفعت الدعوة مو
رماد:اي دعوتين صارت عليها اريدك تطشرهم الي
شريان:عند عيناك خياي
اتفقو شريان ورماد وشرار يعني مروة راح تصير هالفترة بحياتها جحيم عرفت رماد ما راح يسكت عن ضرب بنتة
دگ تلفونة ابتسم ورفعة
رماد:هلا بشرير هلا
بشرني؟
كفو من شاربك حبيبي المطي
سدة وباوع لمسك
رماد:انكسرت ايد الي انمدت عليچ من عمچ وانه راح اكسر الثانية
:شسويت؟
ضحك بخبث
رماد:كل خير كل خير
عرفتة مسوي شي تركنة انه ومسك عند اهلي وراحو هوَ وشريان مادري وين مسك اخذها اليهان يشتريلها
اخذت امي على صفحة وريتان تبعتنة ماردت اخوف ريمان كعدت احچي لأمي كلشي وريتان تاكل بالنوتيلا مالتها وصافنة علينة
:انه ماعرف شنو هاي والله تكول اكتلهم واحد واحد ماعرف شنو يعني
امي دگت على رجلها وكالت
زمرد:صخام ولچ هاي عندچ تابعة
حچيت بعدم فهم
:شنو تابعة
زمرد:اول شي انتِ متأكدة بنفسچ حامل لولا؟
:مو حامل حللت وماكو
زمرد:بيچ تابعة نفسي لازم اسويلچ حرز
:يما خوفتيني شنو تابعة
زمرد:التابعة انگس من الجن يما تأذيچ وتأذي اطفالچ ورجلچ وحتى نومچ راح تكرهينة تضل تجيچ بالأحلام ومرات تتخيلينها بالواقع راح تخليچ حتى رجلچ تكرهينة والمشاكل بينكم تزيد من يجي يرجلچ احچي ويا حتى اسويلچ حرز خاف تنگطع خلفتچ
خفت من كلام امي ماعرف اذا هذا الخرز يفيد لولا
رجعو رماد وشريان وبعد العشة اخذنة رماد افترينة شوي ورجعنة للبيت بس دخلنة لغرفتنة فتح قرأن اباوعلة مستغربة
:مو القرأن يأذيك؟
ابتسم وهز راسة
رماد:بس المغرب يأذيني بس باقي الاوقات هوَ علاج لروحي
:احس نفسي مخنوگة ليش هيچ
سحبني كعدني على الچرباية وكعد كدامي
رماد:امچ حچتلي كلشي والصراحة انه ما اصدك بهيچ اشياء بس اذا ترتاحين بهالحرز خلي تسوي ماعندي مانع
حچيت بغباء وانه لازمة ايدة
:خلي تسويلك انتَ هم حتى ما تجيك النوبات بعد؟
احتقن وجهة وخزرني نتر ايدي وكام معصب
رماد:حتى انتِ مَياااااان حتى انتِ عبالچ انه مخبل شبييييكم انتم شبيكمممم كدامكم رجال صاحي مابية شييييييي
خفت من ردة فعلة كمت احاول الزمة اهدي بس هوَ فهمني غلط انه چنت بس اريد اساعدة دفعني عنة رافع ابهامة بوجهي
رماد:وخري مني لا تتأذين وخري
:ما چان قصدي مو زين رم...
قاطعني وهوَ يصرخ بوجهي
رماد:سكتييييييي ما اسمع منچ حرف لا تبررين شلون بلا اهج وين اولي
كال هالكلام وطلع وطبگ الباب حيل كعدت على الچرباية گوا لازمة دمعتي هالفترة دموعي كلش رخيصة وبسرعة ابچي
بقيت كاعدة ما نمت مسك نايمة يم خالة مادري شبية خفت من المراية كمت غطيت شكو مراية بالغرفة ورجعت كعدت منزلة راسي
صار الفجر وماكو ما اجة صرت اغم بنفسي
:هسة انه شكو حچيت هيچ امداني
للصبح وانه عيني ما ضاگت النوم اخاف انام
دخل وجهة مغيم بسرعة كمت تجاهلني وراح للكنتور طلعلة ملابس لبسهم بدون ولا كلمة راح يمشط شعرة تقربت علية
:شنو هسة انتَ زعلان مني
رش عطر وتجاهل كلامي وطلع من الغرفة عصبت ضربت رجلي بالكاع وصرت ادردم فتحت الضوة مال الغرفة كلة ورحت نمت لأن طفيت
ماعرف شكد مر وقت وحسيت بأيدين على رگبتي واختنگت فتحت عيوني اكح صار بوجهي رماد يباوعلي بقلق دفعتة عني وعطت
:ليش تخنگنيييي
حچة مستغرب
رماد:ما خنگتچ
خزرتة
:چا هاي ايدين منو ايدين جدي الي تخنگ بية تريد تموتني هااا
كز على اسنانة وغمض عيونة بغضب
رماد:عادي المخبل كلشي يسوي وخري من وجهي
كام عني ينزع بملابسة كمت دفعتة من ظهرة حيل
:اموتك بعد اذا خنگتني اموتك سمعتتتتتت
باوعلي معصب
رماد:مَيان وخري عن وجهي ترا راسي راح ينفجر هسة جاي من الشغل وعيوني ما اشوف بيها وخري
تنهدت احك برگبتي
:انزل اصبلك غدة
صرخ بوجهي
رماد:ماريد زقنبوت وخري خلي انخمد
راد يروح وكفت كدامة
:احسك صاير ما تطيقني تترييييييد اروح لأهليييي
زأر بوجهي وجرني من شعري
رماد:مَيان لا تطلعيني من طوري
حسيت شعري تگطع بأيدة دفرتة برجلة عيوني مدمعة
:عوف شعري والله اروح لأهلي ما ابقى ثواني هنا همزين ما حبلت منك ولا اريد احبل بعد ما تستاهل تصير ابو اطفالي
فر وجهي براشدي كعدت بالكاع من قوتة وصار صمت باوعتلة بصدمة چان يباوعلي بعيونة الحمر وايديناتة ترجف ثنى ركبتة وكعد كدامي
رماد:ما استاهل اصير ابو اطفالچ؟
نزلت راسي كام عني وكال
رماد:ابقي هنا انه طالع ومثل ما تردين بعد ما اگربلچ
طلع وانه ذبيت كلشي بمعدتي حسيت صارت سچاچين تنغرس بجسمي خصوصًا بمعدتي وبطني ردت اموت
طحت بايدة روحي اشوفها كدامي تضحك وبعدها ما حسيت بغير مثل الضربات بكل جسمي
فتحت عيوني على ضربات ناعمة بوجهي شفت مسك
مسك:مينان ليش نايمة هنا؟
بلعت ريگ وحچيت بصعوبة
:ابوچ وين
رفعت كتفها يعني مادري وكالت
مسك:شبيچ خدچ احمر ومستفرغة
تنهدت
:مابية شي بس شوي تعبانة
كمت بصعوبة احس جسمي موتني اخذتلي ملابس ورحت للحمام فتحت الماي الدافي ودخلت جوا احس نفسي اريد اموت من ولادة ريمان لهذا اليوم هاي المرا ما جاي تتركني ادري كلشي جاي يصير بسببها
غمضت عيوني حتى الشامبو لا يحرگهن وماحسيت بغير ضربة قوية صارت بوجهي من قوتها انلزگت بالحايط
فتحت عيوني بخوف ما هامني الشامبو وانعگد لساني وجمد جسمي من شفت نفس المرا وياها اقزام اثنين اشكالهم مرعبة الحمام صار مظلم بس اشوفهم عيونهم علية ويبتسمون بشكل مرعب
كعدت بالگاع وحسيت نفسي جاي انزف بس ماكدر اباوع جامدة بمكاني حتى ملامحي جمدت بس اسناني صكن حيل
كدرت اغمض عيوني اخيراً ورجعت فتحتهم اباوع بصدمة كلشي اختفى الضوة رجع نفسة ورماد يمي يضرب بوجهي عيوني تتنقل بكل المكان
رماد:مَيان تسمعيني؟
باوعتلة بخوف ونزلت راسي لبين رجلية ماكو دم ماعرف منين اجاني احساس انه نزفت
:ش شفتها رماد و وين عفتني
حضني حيل
رماد:ماعفتچ هسة رجعت من الشغل شبيچ
دفعتة عني صافنة
:شنو هسة رجعت؟
باوعلي مستغرب
رماد:اي هسة رجعت عفتچ نايمة الصبح ومن رجعت دورت عليچ ولگيتچ بالحمام ومن دخلت شفتچ بهالحالة
هزيت راسي برفض مجنون
:لا انتَ انتَ اجيت من زمان والصبح انه كعدت وانتَ تركتني ورحت ومن اجيت لگيتك تخنگني وتعاركنة وانتَ ضربتني وانوب صرت اتقيئ وفقدت الوعي واجت مسك كعدتني وانه اجيت للحمام
صفن بعيوني وكال
رماد:مسك من الصبح راحت للمزرعة
لزمت راسي احسة راح ينفجر ما فاهمة كلشي جاي يصير
كومني يلبسني ملابسي يحركني مثل اللعبة مابية حيل حتى ارفع ايدي والصدمة محتلتني
طلعني من الحمام واخذني للغرفة اباوع للمكان نظيف مابي أثر استفراغ وحتى مرتب
:بس بس شلون
حط ايدة على حلگي
رماد:اششش لا تهتمين تعاي امشطلچ وننزل ناكل تردين نروح للمزرعة؟
ما جاوبتة عيوني تتنقل بالغرفة محتارة اصدگ الي شفتة لو اتخيل
كعدني كدامة ينشف شعري ويمشطة الي من كمل احتضن اكتافي ونززلنة جوا ما چان اكو احد كلها بغرفتها
كعدنة ناكل وهوَ يحاول ينسيني يضحك وياي ويسولف
رماد:يا بوية نمت بالدوام ماكدرت اتحمل
ابتسمت اهز براسي
رماد:هسة شنو تردين نروح؟
:ها اي نروح بس احس بطني ببها ألم
تنهد بضيق وحط ايدة على بطني
رماد:اخذچ للطبيب
:لا بس يمكن نزفت انه لأن المرا حسيتها تضرب بية ماعرف
رماد:يتراوالچ حبيبتي امي انتِ مابيچ شي مثل الوردة يلا يلا كملي اكلچ
رجعت اكل عادي ومن كملنة اخذني للمزرعة حسيت نفسي ارتاحيت شوي ورجعت اضحك عادي
راح رماد يصعب بالحصان هوَ ومسك وصارو يفترون تذكرت من شفتة صاعد بالخيل فبل لا نتزوج
بوقت العداوة والكره الي بيناتنة وهسة احنة متزوجين واختفى جزء من هالعداوة وضل جزء بسيط بين جدهم وجدي
رجعنة بالليل للبيت مسك اكلت بالطريق ونامت خلاها بغرفة امة وردت اصعد بس انغمت گلبي وبطني انلوت لوي
باوعت لرماد وانه لازمة بطني بدوخة
:ر رماد بطني راح اموت
ركض علية لزم ايدي
رماد:امشي أمشي للمستشفى ولا ترفضين
ماكدرت حتى احچي شالني للسيارة وشخطها يسوق بسرعة ولازم ايدي حيل حسيتة كلش خايف علية صرت احس برجفة جسمة تختلط ويا رجفة جسمي طول الطريق يردد
رماد:اللهم اعوذ بك من الخبث والخبائث استودعتك روحي وزوجتي لا تدع أي شر يمسها انني ارجوك واتوسل بكَ يا الله
خف وجع بطني بس انه خايفة ماعرف من شنو بس خايفة من كلشي
وصلنة للمستشفى نزلني دخلوني على الدكتورة وهوَ ضل برا
ضلت تفحص بعيوني وتفحص بالساني
الدكتورة:عيونچ لونهم احمر هواي احمر وجهج اصفر هم
:اي دكتورة انه صار ايام تعبانة بشكل
هزت راسها وصاحت للممرضة سحبتي مني دم وكالتلي انتظرو يطلع التحليل طلعت برا تعبانة
فز رماد واجة علية
رماد:ها شنو كالتلچ
:ما كالت شي بس سحبت مني دم وكالت انتظرو
خلاني اكعد وبقينة ننتظر راح جابلي عصير وكعد بصفي
رماد:ان شاء الله ماكو شي باچر نروح لأمچ تسويلچ حرز
:محتارة هسة من ارجع شلون انام كرهت النوم كلة والله
غمزلي
رماد:انومچ بحضني بطريقتي ما عليچ
ضحكت اهز براسي يريد بس يضحكني
مرت نص ساعة ورجعت دخلتني الدكتورة ويمها الممرضة بيدها التحليل
الدكتورة:تفضلي كعدي خلي احچي وياچ
خفت كعدت اباوعلها اترقب كلامها انطتني الأوراق وكالت
الدكتورة:ماما انتِ حامل
فتحت حلگي ما مستوعبة الي سمعتة ضحكت وكالت
الدكتورة:شنو ما حاسة بنفسچ صارلها شكد فايتتلچ؟
توسعت ابتسامتي بفرح
:لا مادري صارلها 7 ايام فايتة وانه ما شميت لأن قبل فترة هم حللنة وماكو حمل
الدكتورة:شي طبيعي ماما يمكن يكون الحمل ببدايتة اول بداية مايبين يمر اسبوع لو اسبوعين يلا شكد مر على زواجكم؟
:شهر ونص
الدكتورة:الجنين عمرة 3 اسابيع يعني بعد الأسبوعين من زواجكم صار الحمل الف مبروك
طرت من الفرح نسيت كلشي وطلعت لرماد بس شافني كام على حيلة مشيت سريع ابچي وهوَ انجن
رماد:شبيييچ شنو كالت الدكتورة ليش تبچين
حطيت ايدي على حلگي وحچيت من بين دموعي
:انه حامل رماد الدكتورة كالت حامل
صدمتة نفص صدمتي فتح حلگة وعيونة ومن استوعب سحبني بحضنة فرحان عصرني عصر
رماد:حامل مَياني صدك حامل
بادلتة الحضن ناسين احنة وين
:اي حامل والله هاي التحاليل بأيدي
ما اهتم للتحاليل ابتعد عني واخذ ايدية يبوس بيهن
رماد:فرحتي كلش چبيرة حبيبتي حامل وراح تجيب ثمرة لحبي الها
باوعت الي رايح وجاي يباوع علينة
:رماد خلي نروح للبيت ننطيهم خبر
لزم ايدي وسحبني يمشي سريع اخذني للبيت وطول الطريق يبوس بأيدي طاير من الفرح فرحتة ما تقل عن فرحتي نسيت كل التعب وكل الي صارلي بهالأيام
وصلنة للبيت چانو كلهم كاعدين بالصالة بس مسك نايمة دخلنة ورماد بدون سلام ولا كلام رفع ايدي وحچة بحماس
رماد:راح اصير أب للمرا الثانية
كلهم فرحو جدهم كام سحبني لحضنة يبوس براسي وابو رماد يباركلي فرحان وام رماد راحت لغرفتها شوي وطلعت بيدها علبة چكليت طشتها على راسنة ورماد وشرار يلمون وياكلون
باركولنة فرحانين على فرحتنة بس أسعاد كالت مبروك وراحت لغرفتها ما اهتمينة كعدنة يمهم رماد يبوگ من شرار چكليت وينطيني
شرار:خلصت ملاتي عوفهنننن
اخذ بعد وكال
وماد:مو زين عليك انه ومرتي جاي نساعدك ترا
شرار:مساعدة ومنكم ماريدها المهم جدي اريد احچي ممكن تنطوني شوية اهتمام اذا امكن يعني
مهيوب:تفضل مسلت
عدل كعدتة وحچة بجدية
شرار:جدي انه اريد اتزوج
كلها باوعتلة وامة طفرت كعدت بصفة فرحانة
الماس:ياااا فرحتييييي باچر اروح اخطبلك ريتان البنية ذابت بگلبي
گلب عيونة وكور ايدة
شرار:يما افهمني البنية رفضتني وكدامچ هم رفضتني تردين ارجع اخطبها؟ ماريدها الله يوفقها لا تفتحيلي سيرتها بعد رحمة لمحمد وجدي خطبها لأبن عمي
مهيوب:وهيَ رفضت ابن عمك يمكن نجرب نخطبها شخسرانين
مسح على وجهة حيل ورجع باوعلهم يحاول يفهمهم
شرار:اختها كاعدة هنا وراح احچي كدامها ريتان بعد لو تصير النفس الأتنفسة ماراح أگرب عليها البنية طلعت من نفسي
عگدت حواجبي وحچيب بأستغراب
:هيَ ماتريد تتزوج هم يفضل تنسون موضوع ريتان وشرار لأن الأثنين رافضين بعض
شرار:بالضبط اتمنى تفهمون انه وهالبنية مستحيل نصير اي شي
جدهم هز راسة وكال بتفهم
مهيوب:خوش الموضوع ينسي ومحد يجيبلة سيرة من باچر امك تدورلك مرا
رادت تحچي امة وهوَ قاطعها
شرار:لا تدورون ولا تتعبون تروحون لبيت روديم صديقي عندهم بنية عمرها 22 سنة تخطبونها الي
الماس:بيت كرار؟ ولك بناتهم يخبلن طرگاعة انتَ ما تطيحلك بغير الحلوات تم من باچر اروح اشوفها واخذ مَيان وياي
:اي عادي ماعندي شي اروح
هز راسة وكام فرحت لأن سد موضوع ريتان وراح يتزوج حسيتة فرحان بهالخطوبة وهذا أفضل لأن ريتان وشرار ماراح يصيرون غير اقارب من بعيد
خابرت امي كلتلها عن حملي وكلش فرحو
كل واحد راح لغرفتة وانه ورماد صعدنة بس دخلت للغرفة هجم علية يحضني ويبوس بوجهي
رماد:فرحاااااان
:والله انه هم ميتة فرح راح يصير عندنة عنون جديد
باوعلي ونظراتة كلها حب لزمني من زنودي وطبگتي بالحايط دنگ علية وطوق شفايفي بشفايفة رفعت نفسي متأثرة ترك شفايفي عيونة ذبلانة ونزل لرگبتي يطبع بوسات على كل طولها ويصعد لأذني رفعني ورجلية حاوطت خصرة ورجع طبگني بالحايط كورت ايديناتي وخليتهم على رگبتة ورجع يبوس بشفايفي بدون ملل
حسيت بشعور حلو وهوَ يمي بدون خوف بدون قيود
حط انفة يحركة على خدي ويتنفس سريع
رماد:معشعشة بنص افادي
:متربع بوسط هالگلب
اخذني للچرباية نام على صدري
رماد:احوي ريتني اموت هنا واصير مچتولچ
ضربتة على ايدة
:ماتموت بدوني
رماد:محد يبقى عايش الكل يموت المهم تكون خاتمتنة حسنة
:لا تحچي هيچ باوعلي بلا
باوعلي ورفع ايدة حرك ابهامة على شفايفي حچيت بهدوء
:گلبي يدگ على بس نظرة من عينك
رماد:اتعب هيچ
حضنتة حيل وهوَ هم حضني
ثاني يوم راح لشغلة والطهر من اجة نام واحنة تجهزنة واخذنة شرار لبيت صديقة وصلنة واستقبلونة احسن استقبال
كعدنة ومبين امها وام رماد يعرفن بعض
الماس:هاي مرت ابني الچبير رماد
باوعتلي وابتسمت
شاهندا:فدوة لهالوجه فدوة تلوگين تصيرين مرت هالشهم رماد سمنانة عن العرس مو الماس
الماس:يا عيني غير حامل اكيد تسمن
شاهندا:ماشاء الله تبارك الله الله يتممها على خير ويسهلچ
:شكرًا حبيبتي خالة
ويا كلامي دخلت بنية جميلة طويلة ورشيقة حنطاوية كمت اسلم عليها وباوعت لملامحها الحلوا
كعدت بصف خالة مبتسمة خالة مشت ايدي على شعرها وكالت
الماس:شلونها الحلوا سليدا
جاوبتها بصوت ناعم وابتسامة بشوشة
سليدا:بخير خالة نورتونة
بدت امها تعرفنة عليها
شاهندا:طبعًا انتو تعرفون سليدا چانت تلعب ويا شرار بالشارع وهسة شرار جاي يخطبها چانت بس تشتكي من عندة لأن يضربها
ضحكت خالة وانه باوعت لسليدا نزلت راسها مبتسمة
شاهندا:المهم بنيتنة عمرها 22 سنة خريجة أداب وهاي هيَ كدامكم وتعرفون اخلاقها
الماس:ونعم منكم اكيد نتشرف نناسبكم احنة هوَ ابني كال الا سليدا ومدام اجة ويانة خلي يجي يشوفها وتشوفة
شاهندا:اكيد كومي ماما لبسي حجابچ وتعالي اني حكول لروديم يدخل شرار هنا
كامت تلبس حجابها وشرار دقيقة ودخل سلم على امها وكعد
شوي ودخلت سليدا منزلة راسها كعدت بصف امها واشوف شرار يباوعلها وهيَ ترفع عينها تباوعلة وتنزلها
حچة شرار بضحكة
شرار:خو ما بعدچ زعلانة على العضة
باوعتلة كاتمة ضحكتها
:بعدة اثرها بكتفي
شرار:چنة جهال وانتِ تجين تلعبين ويا الولد طوبة وبطيتي طوبتي وعضيتج عادي انسي
الماس:من تزوجون احچيها لجهالچ
ضحكنة كلنة وشرار مانزل عيونة ابد فضحنة يباوعلها ويلعب بشواربة شرار كلش صلف وما يستحي نريدة بس يفصل وينزل عيونة وماكو
شرار:احممم اي ان شاء الله ما تطولون علينة بالرد مستعجل انه
عضيت شفتي بفشلة وخالة خزرتة
الماس:يعني قصدة مايحب الأنتظار بهاليومين نريد الرد حتى يجون الزلم ونتفاهم على كلشي
شاهندا:ان شاء الله خير
طلعنة من يمهم وشرار مكيف وخالة ترزل بي
الماس:فضحتنة انتَ اندس بي اكلة نزل عيونك وماكو ابني صلف مادري عليمن
غمزلها وكال
شرار:ثلثين الولد على الخال ماميييي
الماس:لا عيني طالع على ابوك المهم موافق ماموافق
شرار:موافق من زمان انه اريدها
رفعت ايدي اضحك
:اييي أخيرًا حخلص منك
شرار:لا ماتخلصون مني راح ابقى الزم بيكم وين ما تختلون اطلعلكم
:خالة ولدچ فاسدين
الماس:ابوهم منو جهاد تحملي
ضحكنة انه وياها وهوَ يباوعلنة ماعاجبة
رجعنة للبيت لگيت رماد ينتظرني خالة خابرت ريمان وانطتها الموجز كلة
مرت يومين عاديات ننتظر رد سليدا وشرار كلش مستعجل واصلًا بدأ يجهز لخطوبتة وهوَ أصلًا مايعرف ردهم شنو
رماد طول الوقت خايف علية والأحلام ماتفارقني صرت انام بالنهار ونفس الشي وامي راحت تسويلي هذا الحرز تكول شكم يوم ويكمل
كعدنة بعد العشة يسولفون دگ تلفون خالة الماس باوعت لشرار وكالت
الماس:ام روديم تتصل
شرار طفر من يم جدة وكعد بصفها حاط اذنة بالتلفون جاوبت وهوَ يسمع بعد السلام والكلام سدتة وباوعتلنة مبتسمة
الماس:سليدا موافقة وامها تكول خلي الزلم يشرفونة....
.
يتبعع
توقعاتكم؟
.
.
.
ضيفو حساب الانستا
وقناة التلي
اللهم صلِ على محمد والِ محمد 🦋
مها ال عبدالله