لبوة على شفا الثار

بارت هديه

بارت اضافي //هديه  //

                                   بقلمي :leo Alfatlawi

                                            الانستا Le_m3r

لا تنسون التصويت
والتعليقات بين الاسطر ❤️

…ليس كل شيء في القلب يقال
لذلك خلق الله التنهيده ؛
والدموع والنوم الطويل؛ والابتسامه البارده
ورجفة اليدين

الأيام والأشهر تعدي  من عمرنا بدون لانحس او يمكن احنا مانريد نذكر اي شي يرجعنا للماضي لان عوض رب العالمين جبر كل كسر جوانا

بيت دافي  اطفالنا  يلعبون بيناتنا

؛ بدل حنان الاهل عين مساهره ماتغمض  اذا تأمن  غمضت عيونه والضحكه تارسه وجهنا

- اخوه مايحسون براحه اذا مايشوفون السعاده ماليه حياتنا

خوات بروح وحده  ماينحسب يوم اذا ماننجمع وناكل فد طبق واحنه نشارك الضحكه بينه

وهاي مرة سنه ونص على دخولنا لتركيا  بعد  ماجنت وحيده اسعه وره حلم ضايع صرت بين عائله يمدوني بحلام مالها نهايه عكس غيث الي دوم اشوف بعيونه نظرة شوگ وحسره واعرفه بسبب بعده عن اهله جنت احاول بأي وسيله اعوضه بس يضل  بداخله يحن الهم

الجهال دخلناهم مدارس جود جان مسؤل عن دراستهم وكرم عن توصليهم

رويده ملتزمه بالاطفال الزغار واني وغسق باقي الاعمال

ايد وحده وبيت واحد رغم ركضنا وتعبنا بس من ننجمع على سفره وحده يزيل كلشي وحنه نباوع  نتيجه تعبنا تكبر كدامنا …

اليوم جمعه  الجو بارد وصوت العصافير  ويه ريحه الجاي الصبح  تارسه المكان

حاضنه مخدتي دفيانه جوه اللحاف نايمه بعمق    واحس اصابيع على خدي دگدگ عالكيف  وصوت غيث يغني بهمس

…نازلي من الجنه وياها اعيش اتمنى عمري اخلصه بحضنه ميت علي 

يامحله ذيج الصدفه خلتني اني اعرفه روحي عليه متلهفه وبس احجي بي…

ضحكت وخرت ايده درت وجهي حضني و دنگ خله راسه بركبتي باسني واخذ نفس طويل گال اووف ياريحه هلي

:-وفر كلامك حبيبي  نعسانه مااگوم

:-يانبض گلبو لحبيبج اتأخر الوقت

:-بس ساعه وحده غيث فدوه

:-يندار غيث واهلو فدوه لهل غمازه الخذت گلبي ولج وعمه الساده مشتاگلج گومي

:-غيث صار اسبوع منتظره هاليوم دخيلك صوتك  لاالجهال تگعد

:-مااريد اصدمج ياعيون الغيث بس الجهال فجروا عبوه بالشقه والحكومه راح اتزتنا عالحدود

:-كرررم الله يلعنك

:-ههههه اخذهم وراح لجود يكملون الخراب غادي

:-كوم اقفل الباب وتعال بسرعه قبل لايرجعون

:-ومنتظرج يولي غير لعبتها هيه

كالها وانگلب عليه كمش وجهي بين اديه دنگ باسني من شفتي دمعت عيوني عرفت ضاع حلم نومه الجمعه

:-عش يولي تبجين

:-والله تعبانه غيث حرام عليك ربي راح يحاسبك

:-اكثر من هالحساب مااتصور اكو
بعد ذاك التمندل على اجمل ماخلق الله وگعت بيد وحده تك غمازه اتماطل للصبح واشبع دفرات لخاطر بوسه

برطمت

:-اشتعل كرم تنعل ابو ابوي وتگول تعبانه

بجيت ضحك ورد انگلب على ضهره اخذني لحضنه عصرني حيل وباسني
:- نامي يولي الج ساعه وبعدها وعمه الساده اهفج من البالكون اذا اتنفستي

مسحت ادموعي  الشهگه بگلبي استوني اغمض و
واسمع باب الشقه اندگت حيل ضميت وجهي بصدره يائسه ضحك بصوت عالي ودخلني زايد بحضنه عصرني خله راسه برگبتي همس لو عاطيتني حگي موش احسن

:-بطلت اريد ارجع لامي

:-اشلون اتخليني اهف امها بتصال اجيبها بحضن ابوها عدل

:-غيث

:-عيونو

:-اريد انام

:-اخليج بوحده من عيوني واسدها وافتح الثاني اتضل مساهره طول العمر بس  لخاطر ترتاحين يروح العايش بيها غيث

حضني حيل دنگ باسني كام  ديغطيني وصرخت عاشق كمزتنا اثنينه طلعنه نركض فتحنا الباب

لكينه كرم متربع بالگاع لازم عاشق يتوسل بي حتى يسكت وعلي واگف ورا كامشه من بلوزته وهيا لامه روحها  بركن الدرج كلهم على فد بجيه حتى كرم وياهم صاح غيث  يول شصاير

علي.:-بابا حباب كله لايسافر

:-يول منهو يسافر

:-كروم بابا راح يعوفنه  الله يخليك لاتخلي يروح

:-كافي يروح ابوك  مااخلي ينگلع  وانت يول شبلاك چنك جاهل تبجي  گم الله يطيح حظك

كرم.:- اگلهم والله مااتأخر اسبوع وارجع

عاشق.:- لااا لاماتروح والله اطر راسك بس تعبر الباب غيث  لاتخلي يروح واني وداعت جدتي  ماراح اضوجك  بعد

علي.:- اخلي ماما كل يوم اتسويلك دولمه واني انطيك جواريب بابا والله

اندار باوع لهيا همست بعد ماحبك وشهكت لمت روحها تبجي يقهر

هز ايده غيث ودخل طلعت شلت هيا وكرم شال علي وكمش عاشق دخلنه للشقه گعد عالتخم  خلاهم گدامه يمسح بدموعه مايعرف شيحجي وهمه مستمرين يتوسلون

دخل جود بيده جنو يضحك گال ها ولكم راح يعوفكم ويروح منو بعد يطلعكم منو يشتريلكم والله خطيه انتم اشلون راح تعيشون بدونه

علي :- مايروح مو كروم ماتروح كول اي حباب

:-ولكم ياميروح غير حجز حتى لابنه  عرنوص وانوب دائمي بدون رجعه اني منكم انتحر

عاشق.:- غيييث سكت ارفيجك لااطر راسو

جود :- ولك انت اشوكت تتأدب اطر راسي مو خوش ماطول هيج حتي  اني اروح

:-وحگ كتاب الله اذبحكم ولك غيث لاتخليهم يرحووون ولج ناااي گوميييي كالها وكام يطفر من الحرگه

جر كرم لحضنه  گله :-يضحك عليك مايروح واني والله ماتأخر بس يومين وارجع

:-عجل اخذني وياك  كرم لاتعوفني هينه

:-مايصير بدون  اهلك والله لوما امي مريضه فلا اروح

:-غيث يجيبها الك  اتشوفها 

علي:-. اي بابا  جيب امه يشوفها لاتخلي ياخذ عرنوص ويروح بابا يضل يبجي اذا ماشافنه لو ياخذنا ويا

عاشق:- اي مشتاگ لجدتي وناخذ عرنوص تااتشوفه غيث گول اي لاوعلي افلش العماره

اباوع لغيث ابتسم ودنگ على رجلي اعرفه حزت بنفسه لايگدر  يمنع كرم ولايگدر يروح

نزلت هيا من حضني ركضتله كمشت ادي گالت بابا حباب لاتكول لااا انت وعدتنا ترجعنا لجدتي

اشر اي جر راسها باسه وگام دنگ اخذ فونه والجكاير طلع سد الباب ورا  باوعلي جود گال راح يروح غيث

:-لافدوه لحگه لاتخلي والله يروح بيها بس يوصل العراق

كرم.:- بطلت مااروح خابري ناي گليله راح يحوللها افلوس منا واضل على اتصال وياهم

جود.:- اني اروح ورا ه‍اج  لزمي جنو وانتم سهله اذا مارجعت شلعت اذاناتكم

عاشق:- عش يابه

:-انعل ابو ابوك كم مره گنالكم لاتگلوله رجعنا  ابوكم ميصير يدخل للعراق

:-عجل انخلكم وحدكم ترحون انفجرت عبوه تموتون منهو يدفنكم

:-اشتعل ابوك حيوان وعمرك ماتصير بشر انتظر دقايق وراجعلك   هذا لسانك اذا ماشلعته اطلع ماافتهم وانت كرم  عينك بيهم  لاتخليهم ينزلون للشارع بالاخص هذا السكط

عاشق. راح اعبرها الك لان اني متربي

:-انعل ابو تربيتك شفتها  البارحه من كاتل الابو وابنه  وعلي جنت ناويلك نيه اله اتوبك بيها بس اخ بيك بخت بكرم ضمك عني

:-يجذب يول ماطگيتو  انتو عش ماتصدكوني

:-ابن الكلب مسبحه بدمه ويكول يجذب لك عاشق وعلي بعد حتى ابوك مايلزمك  عني انوب احبسك بغرفه حالك حال الجلب حتى اكل ماانطيك

:-لابعد ماطگ احد يكفي  هذا ربيتو هو وابنو وعطيت درس بي للمنطقه لخاطر  يعرفون منهو احنه ومايكربون صوبنا

:-  يادرس يامامنطقه كم مره سمعت هالجمله منك وماتمر  ساعه اذا ماتسوي الانكس منها  ولك ابوك راح يتخبل ساكن المراكز والمستشفيات من وره طياح حظك

:-عجل يشتمني واسكتلو عيب واني ابن غيث الانباري

:-لاانت مغسول حضك ماتصيرلك جاره كرم اذا اتحرك من الباب اتصل عليه حتى ارد  واعلمه الحجي اشلون يصير

عاشق  باوعله بتك عين وكرم رد :-لا مااخلي ينزل بعد وهسه اخذهم كلهم للساحل جيب غيث وتعال هناك نتغده

:-تمام يله اني اترخص

عاشق.:- ارخص من هيج شتصير اثنين بربع

هو گالها وجود شمر جنو عليه بعده مامتحرك وعاشق فتح باب الشقه طلع يركض ويصيح غسسق لحكينييي ؛ هز ايده جود وطلع ورا يضحك

اندار كرم يباوعلي مبتسم يرمش بعيونه براءة اشرت شكو

:- شنو مسويه اليوم غده

:-كرم طيرت النومه وطيرت رجلي اطلع قبل لاابتلي بيك

:-والدولمه منو يسويها

:-يااخي شنوو ابتليت بيك موعندك مره فوت حالي

:-لعد مادريتي موطردتني 

:-اكيد اصلا متفاجأه اشلون لسه متحملتك بالشقه وياها

:-لايا بذات والبلوز الجبته قبل سبع سنوات هيج نسيتي

:-اطلع كرم ولاتجي هنا بعد احنه راح نشيل

:-ماتصيرلج چاره محزوزه وملبوسه

:- اي عفيه اني موخوش ادميه ازعل وياي فد شهر واذا سنه اكون ممنونه منك

:-يعني ماتسويلي دولمه

:-لااا

:-يله اصلا ماحبها منو ياكل دولمه بعد بس ردت اختبرج

:-عفيه واني خسرت الاختبار يله كوم اخذ الجهال وروح لشقتك لاترد بعد

:-زين اذا جبتلج بعد ابلوزه اتسويلي

:-لااااا كرم لاااا

:-ضلي مجروده بملابس  الغثيث مو وجه خير

جر هيا وعلي وطلع رافع راسه عالاساس زعل ضحكت رفعت  جنو عضيتها من خدها برطمت كزكزت عليها جنها تفاحه نفس جمال امها وهدوء ابوها

حضنتها  حيل واخذت نفس منها امنيتي اكلها
شلتها وگمت غسلت وجهي صبيت استكان جاي خليته عالميز رحت طلعت الخبز والجبن  دا اخلي ودخلت غسق صاحت ااااي والله ميته جوع

:-حلفي

:-انجبي وجيبي كوب الج وگلي بيضه بعد دااكلج ميته جوع

:-غسق بتج والنهار كله على كلبي ورجلج غداه وعشاه هم بيتي شقتج اكثر الوكت رويده ترتبها انتي شنو منفعج بالحياه

:-طاقه ايجابيه بس معرفتي وجودي بينكم كافي وين محصلين وجه مثل وجهي الجميل اتصبحون بي

:-اني اشلون تعرفت عليكم

:-البركه بالغثيث خلص خالج منج وشمرج علينه حمدي ربج  حامليج انتي وخلفتج وضالين وياج لسه

:- هم صدگ عاشق بشقتج؟؟

:-لا دخل يركض  وگال لحگي رجلج گضبته يخابر وحده حتى مالحگت اسأل وينه لان طلع طلقه على شقه رويده

:-دخيل الله هالطفل مزروع بالجذب وين الولد يخابر طلع محتار وره غيث لان حضرت جهاله  سووله عزه ولطم من الصبح حتى يردون ويه كرم

:-اشكد گله جود بسكوت روح وتعال لان الجهال متعلقين  بيك مايخلوك  تتحرك لاتحجي كدامهم

:-حتى يتخبلون اذا اختفى فجأه والنبي ياعلي بعد ماشوفه يضل يفتر مثل المخبل بالشارع يدوره وهيا يصير بيها توحد وعاشق هذا قضيه وحده يصبح ماخذ جوازه وطافر تهريب يدوره بالدول

:-وانتي ماشتاقيتي لهلج؟؟

:-ليش اجذب عليج والله گلبي لهفان عليهم بالاخص لحن اشكد مشتاقه احضنها واسمع فهاوتها من تحجي

:-اني هم والله كلش مشتاقه لماما

:-لعد ماتولين

:-عزه واتركج هنا وحدج واگعد الصبح ماشوفج يمه غير اموت

:-استغفر الله ربي العقل ولج خطيه امج هو اسبوع بس خلي اتشوف بنتج

:-اولا هاي موبنتي جنتج لاتفرين السالفه وتلبسيها براسي وثانيا جود مايگدر يترك المطعم ولاعاشق يگول هذا حرك اذا غفلت عنه يسوي مكسوره اشلون اتركه اسبوع واهله مخابيل يكتلوا ميتحملون مذاوته

:-اها طلعنه احنه السبب موانتم تتعاجزون من السفر اتسممي بين ماانيم جنتي على گولتج حتى انلحگ انسوي دلمه

:-هم دولمه ناي تره العماره راح تشتكي علينه  هلكد ماتشتم ريحتها

:-ولج خطيه كرم مشتهيها

:-هو اشوكت مااشتهاهه   وبعدين مو عنده مره ليش متسويله وين البرياني الي گلج عليه جود

:-بطلي غيره والبرياني من الليل سويته بس احمي ورويده هم يالله عليها عرنوص اتكول  زيبك بس اذانات ومايگعد فوگ رعصته حامله هم الجهال النهار كله اتلبس وتغسل

:-صدگ شنو سوت ويه اهلها

:-اهلها طمعين ميستاهلون عدهم هيج بنيه لاهامهم بتهم بعيده ولااشلون عايشه اهم شي الراتب يوصل بوقته

:-غيث بعده يدزلهم

:-والله راد يبطل  كال كرم اوله بيهن بس اني گلتله لخاطرها ماصدكنه ابوها يرضه عليها ويسامحها استوها ردت ضحكتها واعتبره راتبها مال المطعم نفسه الجانت تاخذه

:-تره غيث ماابتله بأهلها وابوها طماع وكلب

:-اعرف حتى هيه تشكي منه بس ميخالف يضلون الاهل عزوه ودنحصل رحمه من المطعم  مكفينه وديزود

:- هاي نامت الثوله

:-ماكو ثوله غيرج وخلي يجي عاشق يسمعج اتكولين ثوله حتى يعرف اشلون يكتمج

:-والله حظ عدها بت الصخله اشلون راح تاخذ واحد

:-اي ملاك مصور عفيه ولد اتريدلك صفه زينه مابي والله غيث كال اذا ماانعدل ماانطي جنو لو ينط

:- وانتم شكوو غصبآ عنها تاخذه غير عاشق ماازوجها لو تموت بنتي واني حره لاتدخلون

:-ولي لج عود حملت بيها صدگت هيه ام ومنو هذا عاشق الكاتله روحج عليه واحد صايع حتى دينه مايعرفه وين شايفتلج بشر لابس صليب ويحلف بعلي ويصلي امجتف

:-ههههه حتى جود يكول نتيجه صداقتنا التمت  بعاشق جامع بين الطوئف عدها حظ التاخذه سبع وعقليته متوسعه

:-مثل حظ امها من خذت اصك واحد بعشيرته

:-ثگيل ثكيييل شگ گلبي

:-والله حتار وياج ضحك واتغزل بيج گلتي اتعلم من غيث شاركج يومه وشكالج  گلتي يتخيلني صاحبه عاملج بهدوء وحنيه گلتي حاسبني  طفله وماافتهم

:-حقج ماتحسين بيه غير ماخذه الانباري

:-بنتي هذا الانباري  صاحب خبره  بين قوسين ابو بنات هلگد مامار بعلاقات وسخه صار استاذ بالشغله گام يعرف شتريد المره قبل لاتحجي  ويتقلب ويه مزاجها  وهذا النوع شيطان ماتگدرين اتلزمين عليه لزمه عكس جود نضيف خام اتكدرين اتشكلي على ايدج

:-يااختي ممل ممل شايفه من وحده تگعد الصبح  بدل  مايحضنها يشبعها عضات يخلي ورده يم راسها تگول شهيده  وانوب يشغل اغنيه هلكد ما هادئه اتخيل روحي دا احتضر

:-تركي انتي موجه نعمه

:-حرمات اعوفه حلو  وبعدين ليش دتحيليني ماطولج هيج تركي غيث

:-مشكله محد يتحملني غيره

:-اي والله صدك ناي محد يتحمل مزاجنه وخلاقنه المزفته غيرهم كومي ودي جنو بين مااطلع المخضر

گمت خليتها بقريوله هيا ورجعت للمطبخ اتريكنه على عالسريع  وطلعنه المخضر  كل وحده لزمت شغله اقل الساعتين كملنا كلشي  خلينها عالنار
جهزنه غراض الطلعه

راحت غسق لشقتها واني لغرفتي فتحت الكنتور طلعت تيشيرت صارن كدامي ملابس غيث الجديده  زغرت عيوني شيصير اذا اخذ واحد

شنو يصير راح يحيط اكيد

واذا عيط قابل اول مره كلتها وسحبت تيشيرت لبسته وكفت يم المرايه ابتسمت خرب بغيرته ابن الاطعه اذنها والله ذوق عنده

رفعت شعري كبايه  خليت ميكب خفيف باوعت لروحي حلوه لعد ليش هذا يعيب عليه 

دخلت اصبعي بخدي الثاني   والله اذا صارن غمازتين اصير احلى بس شيقنعه اسوي وحده لخ ؛لعد على منو يضحك بعد غير مسويج محتوه للتنمر

قطع تفكيري صوت رويده عالدرج اتصيح هيا لاتوگعين ولك علي تعال اخذ يوسف خلي انزل الجنطه

تركت وجهي ورحت شلت جنو والجنطه طلعت سديت الباب واشوفها كامشه هيا وعلي بيده ابنها  راسه يتلولح ضال بس اذانات وعيون تزرزر شافني كشر فاتح حلگه من الاذن للاذن جنه ابو

طلعت غسق انطيتها بتها ورحت شلته كام يصفك فرحان عضيته من خده ضحك الفطير
:-اشلون ولك  اكلك

رويده. :-تركي وشوفي شنو ناسين بعد 

:-ماناسين  شي بس ليش ملبسه هيا هلگد

:-بارده الدنيا واستوني مسبحتها اخاف تتمرض وذاك الهيلگ شلع گلبي مايرضه يلبس غير البلوزه عكس علاوي بعد عمري لبس وهو ساكت

:-يله هسه اجيبله قمصله

:-ليش حبيبتي عندج بعد  ملابس الهم بشقتج

:-هاا

:-ووجعا نزلي جبت قمصله وياي وملابس لهيا اخاف اتوسخ وانتي غسق بتج شنو لبستيها

غسق :-مواني ناي غيرتلها وملاحفها كلهن يمج ماعندي

:-انتن هم حاسبات روحجن امهات امداجن شاطرات بس بالخبث والعركات

غسق :-تره بطلنا بعد مانتعارك

:-لعد على شنو  البارحه راح غيث للجامعه

:-هاا سوء تفاهم ويه طالب ناي اتشاقت ماتحمل شقه وصاح بوجهه اشلون قابل اعوفه

:-لاكملي الشقه وهفي اطراگ بس اريد افتهم غيث اشلون سكتلجن

ماردت حكت ضهرها واني فركت خدي ضحكنا رويده هزت ايدها شالت الجنط  نزلت كدامنا داانزل وانتبهت لعلي بدون مشمر صحتله اوكف انت وين مشمرك

علي:-. ماما بس لاتعصبين على كيفج واني اكلج

:-شنو ماعصب وين وديته موكلتلك ممنوع تطلع بدونه

:-مو هيا تبرد خطيه وهيه ماتحب مشمرها ينغز لبستها مالتي دحگي اشلون خدودها حمر

:-لاحول الله انت راح تجلطني بالمفهيه مرض روحك لخاطر  الثوله لاتنزعج

:- لاتكولين ثوله وهي طفله متتحمل اني صگر  ماعليه

:- لاوالنعم اني اشوف تاليتك مثل خالك ضال بطرك الاسم  تسحل بيك المفهيه انزل يله ابو كلب الارهيف 

نزل گدامنا كامشها نزلت وراهم  لكيناهم صاعدين كلهم  وكرم واكف باب السياره

لفيت يوسف عن البرد صاح كرم اذاناته نانو

:-لفيته عدل لاتخاف  صعد علي وهيا لايوكعون

:- شو يوسف بس جاروبه وحده لابس وين جاروبته الثانيه

:-عزه كرم وخر عني راح تسوون بيه عقده انت وابنك ولك شنو تاكلوهن خرب بيومكم

:-غلي غلي شيسوي بعد ربي بيج اكثر من عرنوص

:-بس للتوضيح عرنوص ابنك موابني وتعال صدگ ليش  محترگ منو عدكم بالعائله هيج لونه

باوعله وصفن عاگد حاجبه اخذله اشويه گال تذكرين الافريقيه الي صعدت ويانه بالدلمش

:-كرم وخر عن طريقي  خلي اصعد

دفعته وصعدت موطبيعي هالولد گعدت بصف غسق  ؛الجهال صاروا  ورنا يهوسون وعرنوص بحضني يصفگ  ويضحك وحده  وگفته على رجليه وهو ماصدگ كام يهوس وياهم عوزه يطير

وصعد كرم حرك السياره  طلعنه للساحل الحمد الله الشمس طالعه والجو دفه اشويه

وصلنه ننزلنه و عاشق وعلي نزلوا الغراض والكراسي مال الجهال شمروهن وانطلقوا للالعاب كرم شال  هيا وراح وراهم

خلينه الجهال بالكراسي وفرشنه استونه نگعد  وندستني غسق شلت راسي اشرت شكو

:-باوعي وراج

انداريت واشوف غيث واكف اديه بجيوبه  ويمه ثنين شباب شكلهم موقانوني ضخمين ولابسين اسود يسولفون ويا  كالت غسق شنو رد رجلج للشغل

:-ماعرف صارله كم يوم دااشوفه يلتقي بهيج عالم بس لامااتصور يخاف على جهاله مايرجع

:-شكلهم مافيا يخوف

:-يلا عالاساس هو شكله ملائكي دباوعي الوشم الجديد وين امسوي اخاف عايزه رگبته تصخم

:-لاوالله حلو كلش عجبني حسيته صدگ قاتل مأجور حرمات ماخذه وحده مثلج

:-امداج عالاساس انتي ماكو هيج واخذج جود همزين جنج ضفدع اجرب

:-اي والله دوم احس حضنه من السما والله عاقب سوء نيتهم بينه

:-هههههه  دصبي الاكل  قبل لاتروح الشمس وين هذا كرم فدوه رويده خابري خلي يجيب الجهال بس تبرد بعد ماياكلون

اشرت اي وطلعت فونها دتخابر اجه جود گعد مسافه عنه  شال يوسف يلعب  بي دقايق واجه غيث گله زت الجاهل وگوم  ناخذ فره غادي بين مايزهبون الزاد

جود:-. وين يمعود متشوفها صايره لحم

:-ول يابه عجل عش جاين

شلت راسي باوعتله بسرعه بدل الحجي گال  غير لخاطر نشم هوا البحر

:-اكعد غيث دااصب الغده وديربالك على روحك لخاطر لااحرمك حتى من شوفت  وجهك موبس البحر

:-شبلاج يولي نفسيه اليسمعج يكول مخلصها بنوات وملاهي وانتتتت متگوم

:-غيييث

:-حبيبتي سويلي مجال اشويه  اريد اگعد

ادنيت گعد شال ايدي اتمدد وخله راسه بحضني   طبگ رجل والثانيه مدها  بالكاع طلع فونه يگلب  خليت ايدي بشعره  گالتله منو ذوله الجانوا وياك

:-منهو يولي

:-رجعت لشغلك غيث

:-لاوعيونج بس اكو شغله كلفتهم بيها قبل كم يوم اجوا  ياخذون كم معلومه لخاطر يكملوها

:-بالعراق لوهنا

:-تركج من هالسالفه اشلونج بالدراسه

:-ماضل كم شهر واخذ الماجستير

:-حلو وبعدو شناويه

:-اكمل

:-لحدمن

:-حلمي ادرس قضاة

:-بس بالعراق مامعترف بيها

:-واني شعندي بالعراق اتجنست هنا وهنا مسموح للمرأه تدرس اي مجال تريده

رفع راسه باوعلي وضحك

:-ليش دتضحك

:-بنتي المشاغبه كلما تكبر يكبر حلمها وياها

:-عاشق گال راح يجي يوم وتصيرين شي مهم وشكو واحد جنتي خايفه منه راح  يحسب حساب لاسمج قبل لايكوله مويوكف بوجهج

:- من اول يوم شفتج عرفت بيج گدها بت ابوج ماتهابين ولاتحنين راسج گلمتج حتى لو غلط تمشيها على اكبر راس

:-خايفه بعد هالتعب مايقبلوني هنا

:- ادخلج  احسن جامعه بأي دوله ترديها

:-ماراح تضوج لان انشغل عنك

:-راح اكون وياج بكل لحظه بضهرج سند وجدامج درع اخليج بين ضلوعي احمل كل تعب عنج

همست احبك

:-اووف دخيل رب هالجلمه ادفع نص عمري فدا لخاطر اسمعها

:-وليش نص حبيبي ؟؟

:-لخاطر النص الثاني احمل خبالج الماراضيه ترحميني منو ياعيون حبيبج شعندج بالتقسيم قبل يومين

:-منو گلك شنو مراقبني

:-شتكولين انتي وجهج ورعونتج تسوه الواحد يترك شغله ويضل يلتح وراها

:-ويگلك ليش تتجاوزين وطولين لسانج من زين شكلك وتعيب شايف روحك انت لو اوصفلك

:-ميعتاز من اشويه وحده وصفتلي واشلونها  غير اطگ بالكاع

:-جان رحت وياها للشقه حتى اتشوفك عدل وتكمل باقي اوصافك

:-والله لو على قبل عش اجذب جان رحت بس الله لايبلج ربي زتني بوحده نعلت ابو اصلي كرهتني بصنف الحريم بأجمعها توبتني بالقسم

:-وهاي الوحده شنو الجابرك عليها

:-گلبي كلب ابن كلب دخلها وقفل بابه وسوه منشن  لعيوني ثبت الصوره وانطه تاگ لبقية  الحواس تسوي مشاركه وتغلق التعليقات

:-يعني اتحبها

:-لااا

:-كوم غييث من حضني

:-ههههه وعمه الساده اعشگج

:-بس لاتحلف

:-وانتي لاتضيعين السالفه شكو رايحه هناك

:-دزيت ناس تسأل على الرجال الطلعني من المافيا وين صار وعرفت مريض  تارك الشغل حالته تعبانه بيته هناك رحتله

:-ماخفتي ترحين وحدج

:-قبل جان ماعندي احد ورحت مو هسه اعرف وراي سبع  يفديني بروحه

:-ويروح السبع ماگالولج السبع اشتعل ابو وهو يلتح وره اللبوه مالته مامحصل غير المشاكل منها

:-لعد مايتركها

:-غبيي مدحگه واحد تارك ماخلق الله من جمال وضال يتزنح وره وحده بتك غمازه

:-شوف ذيج وراك اشلون حلوه

:-ماكو احلى من الهتره مالتي

:-موتكول شالعه كلبك

:-بس احبها

:-مم صدكتك المهم الرجال عرضت عليه مساعده مارضه كال بس دبريلي شغل عاد انطيته العنوان مال المطعم وكلت لجود عليه

:-تمام شسويتي بشغله الولد الدزيته الج

:-كملت بس مااسلمها اذا ماتسلمني اتعابي كامله

:-مو انطيتج الطلبتي

:-لاحبيبي قليلات طلعت الشغله متعبه

:-بت ال---استغفر الله ولج فاتحه مكتب بفلوسي وتقفصين عليه حالي حال الزمايل الباقيه شهالرعونه الي انتي بيها

:-غيث لامجامله بالعمل وبعدين وراي عائله اني لازم ادزلهم افلوس

:-يولي بيج شي انتي امج وكلنه حكها عليج بتعبج اختج شكو دزيلها تره زلمتها مايرضه

:-موبكيفه دااز واضمهن الها يم ماما حتى اتحس عدها ضهر وتضل شايله راسها كدام زوجها حتى قبل لايفكر يضوجها بالمستقبل يتذكر بيت ابوها مفتوح وراتبها ينتظرها بي 

:-حلو حولتي افلوس الامي

:-اي حولت الاركان من زمان ووصله الها  شنو سويت بشغله العماره شومارديتلي الجواب

:-شغلتها تعبانه وراها مصايب

:-ولايهمك كملها واني وياك اذا لزموك اني اطلعك

:-والله اني اشوف تاليتي اني وياج بنفس الزنزانه

ضحكت ورفعت راسي صار كدامي على كاعد على المرجوحه وعاشق كدامه متخصر يباوع للجهال بس يريد واحد يگله انزل حتى يسويها اطلابه   ندست غيث رفع راسه

:-ههههه هذا شاهين وهذا اني

:-هيج جنت توكف وتحمي

:-گضيت عمري اتكاون لخاطره تالي عطاني عمرو وتركني لحالي

:-يمه اسم الله على اوليدي

:-وبالنسبه لعاشق عادي

:-يكدر ياخذ حقه  مومثل هذا بعد عمري كلبه الطيب واكع بين جهالك مستغلي هاي شالعه كلبه وذاك يخلص دروسه براسه كل كتابه شمرها عليه انوب يجبره يكتبله حضرته ملتهي بالعراكات

:- مشكله ماعرف عليمن طالع هالولد  اشگد يتعاقب من كثر الطگ حتى الخوف بعد مايحس بي احتاريت شعمل ويا

:-منو اتحب اكثر علي لوعاشق

:-والخلق الكون نفس المعزه والاعز منهم امهم الي خذت روحي بغمازتها صدگ ولج وين غمازتج الثانيه

:-عزه رجعنه

:-ضحكي

:-غيث كلش مو وقتها

:-ضحكي لج

ضحكت شلت راسي راحت ضحكتي واني اشوف    كرم جاي  يسحل بعاشق من اذاناته وصل يمه شمره على غيث گله هذا بعد مااخذه وياي

غيث:-. شكو يول شعامل

عاشق.:- كلشي ماكو الله وكيلك بت اعرفها من عمارتنا اشرتلي  رحت الها شفت شنهو تعتاز عجل تندهلي واردها موش عيب

كرم. :- جذب والحمزه ماصاحتله مرتين منعته بس درت وجهي انزل هيا لگيته واكف يمها يتوسل  مثل الزمال  تجي تلعب ويا وامها تباوعله وتضحك خزاني

باوعتله  حك گصته دنگ كلتله  وين اكو بنات بعمارتنا شو ماشايفتهن

عاشق.:- اكو بالطابق السادس گاعده ويه جدتها  موش بت بعلي گمريه

:-حلو جود خويه من باجر تفرغ الشقه كلهم عدنه صيانه بالعماره

:-عششش هاا عشش يابه اطرديهم ماتخافين الله

:-ابن الثوله اشجابك على مخافه الله انت واحد صايع زايعته الگاع متگلي اشوكت تنعدل

:-انعدل  وماگرب يمهم  بس لااطرديها من العماره بروح هلج 

:-خوش حجي مااطردهن بس باجر  اروح لمدرستك اكلها عالصار لنشوف شنو ردها

:-لاااا لا راح تزعل وبعد ماتحجي وياي گلتلج ماراح اكرب يم شقتهم

:-ولي لك وانت جود سمعت هاي گدامك مصاحب اثنين بعد لاتنطي بنتك موخوش ادمي

جود :-. منو منطي جنو اشولفها واحد معدل مومهتلف مخلصها يركض وره البنات

عاشق. :-وراس جدتي احرگم حرگ هاي مالتي والزلمه بيكم يوصلها  وعلي اذبحكم

:-ابن الطرگه شنو ماتشبع كل التشوفها اتريدها متگلي عليمن طالع

دنگت  باوعت لغيث رفع حاجبه باوعلنه  ورد عينه الفون سوه روحه مايسمع 

دفعته وخر گعد يضحك جر عاشق لحضنه يبوس بي ويگله يول جايبلي العين والاثر ماترگد

:-يول امها صاكه

:-اشتعل ابوك اليوم ناوي تنيمنا بالشارع

تركته يدغدغ بي وعاشق ميت ضحك صبيت الاكل خليته وصلت للدولمه كلها باوعت لغيث هز ايده نزل عاشق من حضنه وطبگ اردانه شال الگدر گلبه

غمض عيونه كرم گال الله واخيرا راح اكل دولمه

غسق. :- والله متستاهل اليسمع يگول حارميك

:-انتي انجبي وايدج شيليها جود اكمش مرتك لاادفرها

جود.:- وعلي اللبس الصينيه براسك ارجع ليورا واكمش خلفتك المحترگه لايوكع بالصنيه

:-غييييث طرده من العماره سمعت عيب على ابني

غيث. :-كملتوا انكتموا وگربو الزاد خلي نتزقنب

كرم.:- يعني مافارقه وياك عيب على ابني

:-يابه انطي هيا يعدل النسل بيها

علي.:- هياا مالتي اليگرب منها اوره ور

:-قصدي جنو

عاشق.:- لخاطر احرگ العماره بيكم

:-اشتعل ابوكم ازوجه امي بس انكتموا رحمه للاسلام

عاشق.:- اي وعلي احسن من ابوك

:-عاشق تعال بابا

:-وعلي طگني كرم سويلي لفه من يمك

:-ماطگك  كرب وفهمني اشوكت تبطل تهتر وتحجي كلام اكبر من راسك

:-بعد مااحجي اخر مره

:-سمعتها جثير منك ومن امك اعرف ربي جاي يطلع مصايب اعمالي السوده بيكم تعال رد اتسمم ماطگك هالمره بس انوب قبل لاسمعك تتنفس افلع راسك 

:- مااهتر بعد بس ليكدام تره باجر مانروح للمدرسه

:-عش يابه ماتروح

:-عاملين اضراب لان المدير عيط عالمس مالتنه

:-المدير عاط بالمدرسه انت شكو مسوي اضرب ابن السطل

:-عجل نخلها مكسورة الخاطر هيج

:-عاشق بوجهك عالبحر الگف اللاين  بسرعه لاوعمه الساده اهفك دفره اطلع شكو سوادين ربي بلاني بي من جهامتك

اباوع لعاشق عفس وجهه راح زعلان لان هانه كدمنا ضحك جود كام ورا راح وصل يمه دنگ شاله  گله اتركني مارد

:-هذا ابوك ومحد يزعل من ابو

:-عجل گلو بعد لايهيني لخاطر لاگول شگاضب عليه

باوعت لغيث گلتله شمسوي غيث

دنگ كمش راسه كال اني جبتها لروحي بس ومحمد ماعملت شي عش ربي جازاني هيج

:-بس لاتحلف لاربي يگلبها بينه

:-كملتي عطيني المي ونگلعي يم رفيجتج

:-بعد خو كول انتي طالق

:-خلي احصل شيخ وانعل ابو الميطلكج ويزتج بالشارع انتي وجهالج

:-هاي اسطنبول بكبرها مابيها شيخ

:-على قسمتي كلها بطلت بس هينه نرد للعراق ويصير خير

:-ماكو لحن اتگول اركان فر العراق بكبره هم ماحصل

:-عجل خليجن نخفض اذنوبنا بيجن وانت خويه عش رجعتو روح  زتو بالبحر

جود :-يضل يركض وره الحوريات البحر ويخزينه  اخذه اشمره  من برج العماره افضل

:-يگضب شباج الطابق السادس ويسولينه بلوه

:-انرده لجدتك اتشلع اذانه

:-هههههاي يحب حفيده ام حاتم

:-هاك الزم ابنك ولاتشيل هم تجي التنسي عشيرته وتمشي على الطريق المستقيم

:-اي ومحمد كالها اخذه منه عاشق  وباوعلي شفت بعيونه نظره خلت گلبي ينبض ابتسم وحضنه  بوسه من خدوده  

دنگت اكل كل واحد اتكفل يوكل طفل خلصنا اجوا اثنين غير ذولاك بس نفس الضخامه هم لابسين اسود اشروا لغيث راح الهم وكفوا يم البحر يسولفون راح يمهم جود

كرم اتمدد خله عاشق على بطنه وعلي بصفه  يسولف وياهم  ورويده جرت هيا لبستها قمصلتها انطتها الفون گعدتها يمها شالت جنو خلتها بحضنها اتنيم بيها

اليشوف خوفهم وحنيتهم عليهم يگول ذوله جهالهم موجهال اصدقائهم

لمينه اني وغسق السفره ورجعنا الغراض مددت رجليه وغسق خلت راسها على متني فتحت الفون انراجع  وعيني بعاشق اشلون يباوع لابو وجماعته اتحسه يدرس تصرفاته اشرتله بأيدي گطع صفنته كام اجه يمي كعد نص گعده كال يولي منهو ذوله

:-جماعة ابوك مالك شغل بيهم لاتتقرب عليهم

:-بس ذوله يحموني

:-شنو يحموك مافهمت

:-ذاك الاسبوع جنت دااعبر واجت سياره سريعه دحگي ذاك الاسود اجه يركض شالني گال  ابن الانباري لماذا انت متهور

:-گلت الابوك هالحجي

:-اي گال لاتخاف ذوله رفجاني

غسق. موكلتلج خال عين وراهم بكل مكان

:-جود يعرف هالشي

:-اي مره كلتله يكول هو يعرف شنو يشتغل لاتدخلين

:-بعد خايف من ابو ساره علينه

:-هم كلتله يكول ابو ساره مايتجرء يوصل لا لناي ولالجهالها  يعرف غيث يمحي بس هو هلكد ماشاف حوادث هنا يخاف على عائلته لهيج منبه جماعة عليهم

عاشق. :-اني من اكبر اصير مثل غيث حلو اسوي وشم وعضلات والبس اسود اخلي البنوات كلها تلتح وراي

:-اهم شي ركز على البنوات عفيه ابن السبع كوم عاشق من يمي لادفرك

:-اشبلاج يولي تعيطين خليني اكمل

:-ماريد اسمع صوتك كومم

كام عافس وجهه كعد يم كرم وعلي اجه يمي عرفته نعس  لفيته بالغطه وحضنته خله راسه على صدري رجعت  اقره وهو يلعب بالعلامه مال التشيرت 

ضلينه لتالي وقت  ناموا الجهال والجو برد رجعنا للشقه  ؛الولد دخلوهم  للغرفه اني رحت للمطبخ انظف  الهوسه التاركتها

رتبت المطبخ  استوني اطلع دخل جود شمر الكوب وطلع اخذته غسلته داارده دخل كرم فتح الثلاجه طلع ماعون بي حلاوه  اخذها منه وشمر الماعون

استغفرت  واخذت غسلته  واسمع غيث دخل فتح الفرن غمضت صاح تعالوا اكو اكل ضال

شلت السجينه انداريت لكيتهم يردون يدخلون اشرت طلعوا

:-شبلاج يولي جوعانين

:-سد الفرن غييث بسرعه

جود. :-يابه شبيج احنه انظف المكان

:-خليكم مكانكم خلي اخلص  البشريه منكم وبعدين نظفوا

بعدني مامتحركه سد غيث باب الفرن برجله وجود رجع ليورا كرم گال والحمزه فكره غيث هاي

:-طلعوا كلمن لشقته ماريد اشوف وجهكم اسبوع كامل

كرم-:- غيث سمعت خو ماحجيت هاي كدامك هم طردتنا

جود.:- ماتحجي اشبيك ساكت

صحت اخذوا وياكم وطلعووووا

غيث. :-اشتعلت  ابهاتكم ارتاحيتوا هاي انطردت وياكم

دفع جود وجر كرم من ياخته فتح الباب شمرهم وسده باوعتله رفعت السجينه گال لاشوفيلج غيرها

:-لاتستهان بيها

:-هاي حدها تزرفين بيها خدج الثاني وتزتيها

:-غيث تعبانه والله

:-اي وانتي اشوكت كلتي غير هالحجي

:-غيث

:-عيونو النبض العايش بي گربي يول

:-باجر

:-اعرفو عيد ملادج

:-لالا باجر

مالحكت اكمل لان شفته اجه شمرت السجينه وركضت جان اسرع مني لگفني من شعري ودنگ شالني دارني لحضنه گال كملي

:-والله تعرفني اني اشكد احبك

:-رحمه الله والديج

:-شنو رحمه الله والديج

:-عجل هالتجدي شرد عليه

:-غيث اسمع خلي نتقف اليوم اتخليني انام وباجر اعوضك

:-لاحبيبي اليوم نسهر وباجر نحتفل وبعدها نصبح بتعوض مال الخساره ووبعدها

:-انتحررر

:-عش يولي اكو واحد موضوجج

:-اي الانباري

:-يندارلج الانباري وهلو فدوه ونذر

:-عفيه اهل اشكد تفدي بيهم

:-غير يغزر يولي ماخذلي وحده تكول ازلمه يابه حتى لوكان ازلمه هم جان رف كلبو واجه للطريج گد مااصرف غزل

:-تعبانه والله

:-اقلها حگ التشيرت الي لابستوا

:-تره هذه تشيرتي

:-كولي والله

:-اني مااحلف متريد  اتصدگ بكيفك يله نزلني

:-ويجيك كلب ابن كلب يكلك لاتخونها

دمعت ضحك واخذني لحضنه عصرني وهمس يولي وعمه الساده اشهگج ويه النفس

رفعت راسي اباوع لعيونه بهن لمعه حضنه من ركبته همست احبك

ابتسم ودنگ على شفتي ٠٠٠٠

…مر  كم يوم  وغيث يطلع من الصبح مايرد غير بليل دائما اسمعه يخابر برموز اكثر الحجي ماافتهمه

بس الي افتهمه يوصي ناس وناس يدليها مكانت مرتين سمعت اسم عامر وابو حمزه بالسالفه  خفت رد لشغله القديم بس من اذكر حبه الاطفاله وكل مايحضن علي ينعل ذاك اليوم أمن

كرم قرر يرجع يشوف اهله وجود ويا اتفاجأت   بقرارهم بس ماحجيت همي الوحيد جان الجهال اعرفهم يتخبلون بالاخص عاشق كلش متعلق بيهم

گعدت  العصر على صوت المنبه شلت الفون وقت جيه الجهال من المدرسه گمت غسلت وجهي وغيرت ملابسي طلعت دگيت الباب على غسق فتحته گالت بس اغير لجنو ماتاخر دخلي

:- راسي مصدع مسويه جاي

:-اي اكو بس احمي رويده وين

:-ماسمعت صوتها يمكن ماخذه عرنوص ورايحه للمطعم يله فضينه

راحت واني دخلت للمطبخ حميت الجاي صبيت بالكوب اخذته وكفت يم الباب اشرب وعيني تتنقل بين الغراض  كلشي مثل ماهو مامتغير شي  ابتسمت ونتجيت  اباوع اشكد الي ذكريات هنا

صار الباب گدامي مرشريط دخولي اول مره هنا غمضت اتخيلت غيث من فات يركض  وشالني للغرفه
شعور اول حضن واول مره نفس يختلط بينه

فتحت عيوني انداريت هنا اول مره وگفت اطبخ وكرم يمه  يسألني على جواريبه

باوعت للقنفه وضحكت واني گاعده وجود يقنعني البس هواي قبل لااطلع لان الجو بارد

اخذت نفس ؛ ساره وهيه داخله لازمه غيث من ضهره وتضحك على ضحكته

بين كل هذا اني ذيج الطفله المكسوره الحامله حلمها بين اديها  وعينها بالوكت اخاف يغافلها ويسرقه منها
منين اجيت ؛ شنو جان حلمي ؛ وين وصلت؛
فززتني غسق اتكول يله

مسحت عيوني رجعت الكوب  وطلعت  وراها قفلنه الشقه نزلت فتحت باب العماره صاروا كدامي كلهم واكفين يسولفون انتبهي عاشق اجاني يرگض  وصل يمي كعد على ركبته وقدملي ورده گال كل عام وانتي احلى ام بالدنيا

ضحكت ونزلت دموعي دنگت كومته وحضنته  اجه علي فتحت اديه دخل حضني گال احبج اكثر من الدنيا هاي

:-واني احبك اكثر من روحي

:-دحگي ماما شنو جبتلج

وخرت فتح جف ايده الزغيره  بيها صليب ناعمه اخذتها ورجعت حضنته

كمت باوعلي غيث وفتح اديه ضحكت ورحت حضني وگال:- لواجمع امنيات العمر واقدمها بين اديج اكون مگصر حرت شنهو اجيبلج مالگيت غير أسر نبضات گلبي يمج

:- انت وجهالي احلى هديه  ربي عوضني بيها

كرم.:-كل عام وانتي بخير حاتتنا

:-هههه وانت بالف  بخير كروم

جود.:- ربي يجعل كل أيامج سعاده يااجمل اخت ربي رزقنا بيها

:-شنو هاي عود مسويلي مفاجاه اتعايدوني باب العماره وانوب بدون هدايه

جود:-. شنو تتمنين ناي؟؟

باوعت لغيث ابتسم گال تم

:-شنو هو التم شعرفت شنو اريد

:-اعرف بت روحي شنهو تريد قبل لاتفكر بي

:-غيث

:-عيونو امشي يولي وانتم طلعوا جدامنا نتلاكه غادي

اشرلهم جود على سيارته الكل راح صعد رفعت راسي لغيث عصر ايدي وگال يله 

سحبني راحت ويا فتح الباب صعدت واني كلشي مامفتهمه 

اندار صعد من جهته سد الباب ودنگ شغل اغنيه عدل ضهره  حرك طلعنه وهو يدندن وياها عينه بالطريق  اخذله ثواني ودار وجهه الي عله نبره صوته وهو يگول

اني عايش عمري لجلك لا تظن بيوم ازعلك

المهم عني انت ترضى وماتفارگ عيني لحظه 

ومره ابوسك مره اشمك

انت طيري وصعبه غيري الي يفهمك

من احضنك تنسى حزنك تنسى  همك

مره ابوسك مره اشمك …

ابتسمت گرص خدي ورد عينه بالشارع  يسوق ويدندن وغمضت عيوني اجذب روحي واندعي  هالمره غلط  ماعرف شنو امنيتي   لحد ماوصلنه للمطار  گلتله بكسره  لاغييث

:-نزلي يولي

:-راح يأذونه

:-حتى امرع ابهاتهم

:-مايخلوك عايش والله

:-لاتخافين صفيت كلشي وصار الوكت نرد ديرتنا

:-اشوكت ؟؟؟

:-من اشهر اشتغل بيها اني واركان وفضينه كلشي رديت حتى جوازي القديم بس جنت مناطر هديتج تكمل من بلغوني تمت حجزت

:-ياهديه ؟؟

:-الي ترد الضحكه الماشفتها بعيونج من ذاك اليوم

:-شنو بعد غيث ؟؟؟

:-يعيون غيث ماضل جثير  وتعرفيها يله نزلي

:-يعني هاي هيه راح انرد مره لخ بين اهلنا ماكو غربه

:-لخاطر ارميج واشعل ابو الفكر بيها  هو اسبوع مالج غيرو انعل ابو ابوي بين ماحصلتكم اجازه

ضحكت ونزلت دموعي سحبني لحضنه  عصرني حيل وهمس ماريد ادحگ ادموعج مره ثانيه لابحزن ولابفرح لخاطر ماگول  ماتستاهلها لان موش زلمه عطيت جلمه ماتنزل دمعتها ونزلت 

وخر راسي مسح دموعي  اشر هااا 

:-هاي  اخر دمعه تنزل مني

:- باسني وگال يله نزلي

فتحت باب السياره نزلنا لكيت الولد ينزلون بالجنط شافني عاشق اجه يركض ويصيح بصوت عالي ناااي  راح ارد لجدتيييي

ضحكت على فرحته وصل يمي دنگت شلت حضني گال احبج هوااي

:-اووف واخيرا اعترفت

:-لايعني موش هواي بس على گد السفره

غيث.:- واني يول

:-انت لاااا بس احب امك

:- لاياناقص ماتصيرلك جاري اضل بذات وضايعه  بوجهك حتى لگمه الخبز انزل وانتم يله فضونه جود عالجوازات وكرم عالجنط استعجلوا ماضل وقت

دخلنا احس روحي طايره مامصدگه اتمنى اغمض افتح عيوني واني بحضنهن

غسق ورويده مواقل مني فرحه اعرفهن مشتاقات لهلهن بس علمود لايحسسني ويكسرن بخاطري مايرحن حمدت ربي عليهن لان بالفعل حسيتهن خواتي

صار الوقت صعدنا الطياره الجهال حجزهم جان مزدوج علي  بينه ؛عاشق يم جود ؛وهيا يم كرم؛

گعدنه دااربط  الحزام واجت المضيفه اباوعلها حلوه كلش  تفتر تتأكد من مكانات المسافرين انتبهت لعيونها تروح وتجي على غيث ضربته بصدره حيل صاح اااخ ولزم ايدي

:-عيونك غيث والله افكسهن

:-شعامل يولي

:-دنگ على فونك اذا لكيتك شايل راسك اهفك كله  وهيه الزمها امرعطها بنص الطياره يعني اخزيكم

:-واحد  ربي عاطي جمال وگلب واسع عش اتحرمين باگي خلقوا من هالنعمه 

:-غيييث

:-ههههه  عيونو ونبض گلبو الغيث ولج گلبي مثل  گلب يعقوب عندو اشكد ولد ومجلب بيوسف

:-بس لاتحلف

:-يولي عش ماتصدكين من احلف

:-اصدگك من اتكون شنو جنت ضام بفونك وحلفتني مااشوفه

:-اتأكدي لومايوجع كلبج ماامنعج عنو

:-صوره ساره مو

:-العشره الغلط ماتنذكر

:-حلفتني بروح عاشق يعني فيديوا اله وهو يذبحوا

:-خذتي حگو بداعتي يمج لاتبجين

اشرت اي ودنكت

كمش وجهي رفعه ديحجي وعگد حاجبه
:- شبي وجهج

:-شنو؟؟

:-شو ضحكي

كمشت ايده لان ادري راح يخليها على بطني حتى اضحك عصرتها واني اسمع عاشق يگول للمضيفه  عش تفترين يولي

المضيفه. :-ماعندي كرسي

:-افاا گوم جود خليها تگعد

غيث دنگ گوه كاتم ضحكته وجود گله  لاياكلب  وانوب يريدني انطي  بنتي

ضحكت المضيفه وكملت طريقها دقايق  وبدت تتحرك الطياره اخذت نفس براحه سحبني غيث لحضنه اخذ نفس طويل وباسني

خليت راسي على صدره وغمضت اتخيل فرحتهن من يشوفني راجعه بينهم مره ثانيه  بالاخص عمتي

مر اكثر من ساعتين بس صارن علينه سنه بسبب الجهال كل دقيقه  وتنعوصت  هيا ساعه اريد مي وكومت كرم ساعه للحمام اخر شي نعست وخرت ابنه من حضنه ونامت مكانه

عاشق استلم جود اشكد يحب يتلاشه بي  وذاك يحب رده يشمرله حجي  وعاشق ينتفض خبصبوا الطياره قريب منوصل صار هدوء انداريت لكيت
عاشق بحضن جوده لافه بقمصلته غافي  اشكد يتجاكرون بس واحد يموت عالثاني

غسق بتها بكرسي عاشق وهيه خاله راسها على متن جود مغمضه مااسمع شنو يهمس الها بس ضربته بطنه ضحك وباسها من راسها

شكلهم حلو اتكول طيور حب وبحضنهم غراب  

علي بعد عمري بدون صوت ضل يباوع بالفون لمن تعب خله راسه على متني  كمش ايدي وغفه

وصلنه كعدنا الجهال ونزلنا وقعنا الجوازات وخذنه الجنط طلعنا بره المطار لكينه ابو غسق واكف دنروح انسلم واجانه صوت واحد صاح حي الله بالسببع

انداريت وكفت واني اشوف مسلحين…

***لحن****

صلاتي جانت بمثابه حياة جديده الي احس سعادتي مرتبطه بيها من يوم الي نصحني عمي التزم لحد هاي اللحظه كل ثانيه تتغير حياتي للاحسن

من كثر شعوري بالراحه والاطمئنان  العايشه بيها خايفه يكون حلم  اخذلي دقايق اغمض وارجع افتح عيوني حتى اتأكد؛ مثل كل يوم ماشوف غير اركان متمدد صافن عليه  وخال شاهين على گلبه ينيم بي

غلقت القران خليته عالسجاده ودنگت سجدت سجدة الشكر همست بگلبي اترجه الي عوضني بيهم يحفظهم الي فززني اركان وهو يگول يولي موش جنج طولتي بالسجده

:-دااندعي اركان لاتقاطعني

:-بس لاتدعين عليه يادگات گلبو الاركان

:-لازم تعرف روحك اليوم مضوجني

:-دخيل ربج يولي الفجر توه طر والملائكه ترفر لاواحد منهم على حضي يگضبله دعوه من دعواتج الحلوه ولنه مطير هامتي

:-لعد اسكت خلي اندعي ربي يرزقني بعد طفل

:-افاا جنج على طفل تعالي يولي انعل ابو وامه الي يخلي بنفسج

شلت راسي مامصدگه باوعتله گلتله الله عليك تكدر

:-شنهو يولي؟؟؟

:- هاا دااقصد يعني تكدر اتسوي

:-  شهالسمعه المزفته يولي شنهو  الي مااگدرلو

:-انت مدا تفتهم عليه

:- خليتي بيها فهم سحگتي بأم الرجوله لحن گومي يبه

:- لا الله عليك يعني رضيت نسوي طفل

:-منهو گلج اني ماراضي  گومي بنيتي عدلي فرشت هالرعن  نعل ابو اصلي خلي اردو مجانو وبعد لاتخلي  ينام بالنهار 

:-مواني هاي بيبي تكول خلي يشبع نوم حتى يضل مساهر يدحگ ظلام اليل ويقوي گلبه بصوت الذيابه

:-اشتعلت جدتج

:-عز اركان موبيبيتي ها بيبي بدعه بيبيتي اتكول نيمي من الغروب وخلي جوه راسه افلوس حتى الصبح لايخترع من صوت الديج

:-حي الله النشامه  يبه فضيها خلي الحگ انطمر ساعه

كمت لميت السجاده خليتها على جهه رحت عدلت فراشه كام شاله خلا بي رجعت لفراشي دخلت بي اجه يمي خله ايده على بطني كمشتها رفع حاجبه اشر شنو

:-شنو شنو اركان استوني طالعه من الحمام

:-موش تردين جاهل لواني غلطان

:-متجذب عليه

:-يولي مجذب عليج من گبل

:-اي هواي ودوم اضل ابجي لان سعاد وشهد يضلن يضحكن عليه

:-حلفي

:-والنبي

:-لاه لاه عجل عش ساكته ماتگليلي

:-موذاك اليوم گلتلك  كمشت اديه ورجعت شبعتني راجديات

:-هاي اشوكت

:-من عضيتني بخدي

:-ياخد منهن ؟؟

:-هذا شوف بعده الاثر بي والله استحي حتى اطلع كل اليشوفيني يضحك

:-لاااه موخوش سالفه كربي تاعدلج الخد الثاني لخاطر بعد محد يضحك عليج 

:- اااركان

:-كولي يولي

:-تعبانه والله

:-افهه افهه بعد شعلي ابوي وگولي تعبانه اثبتي لج

ردت ادفعه كمش اديه درت وجهي كمشه ثبته برطمت گز على سنونه گال والملائكه اكرطج لاتعملين هيج

:-لعد وخر

:-عش لاتأمرين گالها ودنگ عض شفتي …

مواتكول صار كم سنه ويا نفس اللهفه مال اول ليله اشكد يحاول يلزم روحه  ويضغط على نفسه حتى لاياذيني  مايگدر اعرفه يحبني بس المضوجني منه مايمل ولايعرف شنو التعب يريدني بكل وقت ومايتركني اذا مايشوف الدمعه بعيوني

باس شفتي حيل ونگلب على ضهره سحب باكيت الجكايره من الميز اخذ وحده ورثها  لميت الجرجف على جسمي باوعتله بحقد عض شفته گال عش يولي لازم مارضيتج عدل

:-من اگلك جذاب ماترضه

:-اهاا عش جذاب شعملت

:-موكلت انسوي طفل

:-لاااا عجل غير اتذكريني شوف نسيت يالله بعدها بأولها كربي

:-اركاااان طلگننني

اشر على عيونه وسحب نفس من جكارته نفخه بوجهي بجيت لان اعرفه ناصب عليه ضحك كمت للحمام رجعت سبحت واحلف اطلعها من عيونه

لفيت المنشفه طلعت لكيته واكف يخابر يم الشباج اسمعه يگله
يخوي كمل كلشي دزيت الازلام اليوم لوباجر بالاكثر يسحلوا من جهامته -- باجر بحيل الله ناخذ المشيه لعشيرت ال__ اي علاء الدين گضب القضيه ---لايضل بالك يالسبع ماطول جدتي خلت ايدها اعتبرها كملت-- خلي نگضب الزلمه وكلشي هين --تمام عينك بناي لاتلگف الخبر وراس ابوي اتضيع كلشي هالخبله --ههههه ابليسسس خرب يومها هو هيج ماخالصين منها انوب قضاة تريد غير اتلعبنه عالحبل ----مودع بالله يخوي

سد الفون اندار كلته شنو ناي شبيها

:-ابليس متنكر بلبس الملائكه تركيها وتعالي كليلي شدعوه هلگد تضوين

:-اي همزين ذكرتني تعال دااخذ صوره لادينه حتى انشرها ستوري

:-عش لادينه يولي هنه كرون كرون زتي هالمنشفه ونگف عالمرايه نشري اليعجبج خليتي بيها ستر

:-ارركان بس بناتنا مصادقه فدوه اريد اراويهن لون سمارك يعني اگشخ بيك

:-احدر اجيبلج فرده ثانيه وياي لو يكفيج  اتنشرين تك واحد الي بعتباره اني

:-ارركان فدوه

:-اشعلج روح اركان كل ماتهل وتغيب يبه اذا انجاب طاري  اسمج انجن موش ترديني اخليج تنشرين صوره لايدج

:-انت ضمها بأيدك ماتبين بس اضافيري

اجه حضني من وراي خله راسه برگبتي باسني عالكيف وهمس :-  اعرف هالسوالف بنفسج وتضوجين من امنعج بس وراس ابوي الدم يصعد براسي امنيتي اضمج بضلوعي ماخلي الهواء يمر بيج موش بيدي مسودن بيج دخيل نبيج اذا تعزيني تركي هالشي   لاتگربين حده

:-بس اني ماحبك

:-ولااني اطيگ شوفة وجهج يله روحي نشفي شعرج  لاتتمرضين

:-ابسببك اتبلل يعني شنو

:-شنهو؟؟

:-يعني انت اتنشفه وتمشطه

:-حلفي

:-والنبي

:-اشتعلت ناي بس اني ابن سطعش حذاء   جبتها الروحي   من تعرفها ابليس مسخوط حضو اشلون اقتنعت اتعطيك شي يريح گلبك

:-اررركان

:- انعلج ابو اركان لابو راحتو كربي يولي عطيني المنشفه عرفتها مابيها نومه من دحگت ابنج يلتح وره الجلب

رحت يمه اخذ المنشفه لفها على شعري
نشفه جر المشط اخذني للجربايه كعد وگعدني كدامه يمشط على كيفه

يعاملني كأنما يعامل طفله وهذا الشي الي يزيد حبه بگلبي اشكد اشلع كلبه واشكد اغلط ابد مايحاسبني بلعكس ياخذني لحضنه ويحجي وياي بطريقه يحسيني بيها بحنيه وخوف بابا عليه

ضفر شعري بخربطه سحب ضفيرتي باسها وجرني لحضنه لفني بالغطه خلاني على صدره عصرني همست اركان

:-يالهفه اول نفس بالدنيا 

:-انت موعندك اسلاح ليش اخذت بعد واحد من بيبي شتسوي بي

:-مناطر ابليس تجي لخاطر افرغ باردوه بيها وازتو بالنهر لامن شاف ولامن دره بت الشاذي تگول ورث ابوها  تنكط علينه تنگيط بالفلوس تنعل ابو اصلي يالله توقع على ورقه متسوه دينارين

:-غير ورث اطفالها وحق علي اتخاف عليه

:-ماتخاف عليه تعرفنا مانگربلو  بس هيج صلافه وطياح حظ اتحب اتذلنه  تعجبج امكانية ومحمد فول مواصفات

:-لو ماهيه مجان شفتني ولا اتزوجنه

:-الحسنه الوحيده التشفعلها يمي ولوماتعرف روحه مادبرها مانختني ولاخلتني ادحگ ضلج

:-تره والله  حبابه  واتحبني اكثر من نفسها

:-بس لاتحلفين لخاطر الله لايبلينه بمصيبه ومحد 
يحبج بگدي لاهيه ولاالخلوج دحگين نور ربج 

:-اشلون عرفت اتحبني اكثر منهم

:-لو موجود بذاك الوكت التعبانه  بي  جان وحگ  راعي الخيمه الزگه  عطيتج گلبي بدون لافكر وماخليج دگيگه وحده تعانين  بيها

رفعت راسي باوعتله همس احبك

:-يولي ستري على نفسج ماضل بيج مجان صاحي تاعضج منو

:-بس خفف ضغط تره انت جاعصني بحضنك

:-وين حتى موش يمج دحگي اشكد مسافه تفرگ بينه

:-عز اركان حتى مااكدر اتنفس حختنگ 

:-كافي يولي اريد انام يله غمضي

عفست وجهي  ورجع راسي على صدره ودنگ اخذ نفس طويل باسني وضغط عليه اكثر حسيت اضلوعي طكطگه بحضنه غمضت يائسه مابيها مجال لو مريض لو مريض

گعدت الصبح على صوت سعاد  تضرب على ضهري بعدت ايدها وجريت اللحاف غطيت راسي گالت كومي ولج صار الضهر جدتي نشدت عليج

:-گليلها احفادج نعلوا عشيرتها ماخلوها للصبح تنام كامشيها مناوبه

:-هههه كومي دحگي شاهين شعمل بريحانه شبعها عضات

:-يمه بس لا شهد كتلت ابني

:-لخاطر جدتي تعلكها بالسكف لارادت تحجي كالتها گضبي بتج الفاهيه لاتخليها تكرب صوب الفرخ مره ثانيه

:-يلا حتى لوسگطها هو بعدين ياخذها غصبا على ابو

:-وابني منهو تاخذه تره ابنج گاضب البيت بكبرو كل الي يلگفو ينهش لحمو حتى خطار بعد مايجونه بسبتو 

:-ولاراح يجونه بعد وحتى ابني ماراح يعقل خالته لسه بهذا عمرها اذا لزمت واحد تعضه

:-گرت عيني بيج گومي ييمه يله سويتلج ريوك لخاطر نطلع للوهاد  انتي تشوين السمج واني اسوي خبز طابگ عمج مشتهي خطيه

:-هذا عمي مايگعد راحه مديشوفج تعلب روحج من  السمج خلي ينتظر تولدين ويشتهي على راحته

:-ياع وترديني من هذا واكطع

:-عزه هم ناويه اتخلفين بعد لافدوه سعاد كافي اثنين بعدج زغيره ارتاحي اشويه

:-راحتي بشوفه ضحكته وهو يراگب ولده يكبرون جدام عينه ولج گومي صدگ خلي اسألج

گمت فركت وجهي عرفت بعد مابيها نومه  كعدت يمي گالت شكو بين اركان وشهد

:-ماعرف ليش شنو الصاير؟؟

:- صار اسبوع كل يوم  يدزها لبيت ابوها الصبح ياخذله كم ساعه ويدز حسام يجيبها

:-الله اعلم بس داحس يدبرون مصيبه صار كم يوم اتصال ليل ونهار ويه غيث ودوم يدخل يم بيبي يسدون الباب

:-سمعت طراطيش كلام بس مامتاكده بينه الحجي مايطلع

:-شكو احجي؟؟

:-كاضبين الولد الي داز واحد يجتل غيث من راح بيها شاهين بذاك اليوم

:-ليش همه موكتلوا

:-اي جتلوا الي جتلو  بس  الراس الجبير الي زتو ماعارفي جانوا ساكتين هالمده مناطرين يسقط حق الدعوه وبالاخص من خذوا مشيه لهل المجتول وتنازلوا عن غيث

:- اي اعرف سمعت اركان يسولف بهيج شي حتى المحامي الي ناي جانت تدرب عنده كامش القضيه وفتحها مره لخ  بس ليش

:- عالاكثر عارفين منهو الراس الجبير الي جان ناوي يجتل غيث وگعت بشاهين اذا انگضب معناتها غيث يرد لحضن جدتي بعد ماعليه خطر

:-يمه يشخلصه من عمامي والنبي يكتلوا مايخلوا عايش بالاخص هسه عايشين بالفكر حسره عليهم الدينار وهو هناك متنغنغ بفلوسهم

:-وهو موش غشيم هذا السبع خال كلشي باسم ناي حتى لوصكوا  مايلوحهم ولادينار وهيه مايكدرون يتحارشون بيها لان انتن الوريثات من بعدها  امسوي تنازل حتى عن اطفاله تالايتاذون لاعبها صح

:-ماعرف والله بس ان شاء الله ماعليهم صدگ ام اركان البارحه سمعت صوتها بليل شتريد جايه

:-لاياناقصه يعني جنتي كاعده ومانزلتي المهم اجت اتريد ترد لان متكاونه ويه ام عامر وجدتي طردتها كالتها ردي وعود اركان يشريلج بيت زغير تعيشين بي

:-شنو شعورها من شافت بطنج عاليه

:-سكتي اول مادخلت شلت ابني ولتحت يم ابو اركان هو ماجان منتبه الها  اخذو مني يلاعبو  واني خشيت بحضنو بحجت الاعبو ويا
هيه دخلت شافتنا هيج وهي شالت روحها ودگتها بالگاع

:-حيل والله كلما مااريد اتشمت بس من اذكر اشلون جانت تعيرني ماعندي اهل و تصلخني بالعصه وتشمرني بيت الحيوان  احقد

:-عجل لبالج  ربج يزت الظالم بحجار فدوه لاسمو اخذ حيف كل واحد منها والبارحه اجت شهد اتگول ابوي گاضب سهيله طاگها طگ لمن منهيها لان معيرته بهناء كالتله همزين خلصت اقلها حصلت زلمه ترس حضنها ولد وافلوس موش حرمه خاتل بالبيت بس يفتر مثل المسودن مايگدر يرد حگو

:-ابشرح اركان رضه اروح لزواج رنو

:-هاي البشاره الحلوه اي خطيه انروح نوگف وياها لان امها زعلانه عليها ماعدها احد حتى شهد كالت اروح مهما يكون بت عمتي

:-كل عقلها امها بعدها زعلانه عليها يعني لومامتنازله عن الحاضر جان لسه مامطلكها حسام وضاله معلگه

:-بينه الحجي اركان عطاها حگ ابوها  كامل بالبسكوت وگاللها خليج يم اهل ابوج ونكري محصله منه شي لمن ياخذج زلمتج  تره امج طمعه وماتخلين تعرسين لخاطر الفلوس

:-تتهنه خطيه هم انظلمت بسبب هالعادات يله گومي بيبي هسه تلكيها مخبلها شاهين

:-مثل العسل على كلبها خالتو ومگضبتو چريده اتعلمو اشلون يطگ الجلاب بيها

:-عزه راح اتخبل ابني اكثر ماهو امخبل خلي الحگ

:-هههه لاخافين ابو يمو واكف ميت ضحك وهو يدحگ ابنو اشلون يلتح وراهن مايخاف

:-هوالابو مخبل اكيد يفرح

:-مبين الاخبال من هذه رگبتج

:-ههه عالاساس عمي عاقل شو زيحي دشداشتج اشويه خلي اصدگ

:-ولج سكتي گال عالثوب الخذيتو منج يموت عليج جيبي منو جثير وعطاني افلوس

:-خوش قبل العرس اروح لماما بغداد مااخلي ثوب نوم مااجيبه الج خطيه خلي يعوض الحرمان الجان عايش بي

:-فدوه لتراب رجلي ربي يهني ويعطي الصحه والله من فرحني بالغرفه الجان نفسي بيها حسيتو صدگ يحبني وعاملي مگدار

:-عمي حباب ماكو منه ربي يحفظه النه يله داده كومي نزلي قبلي بين ماغير ملابسي

عصرت خدودي وكامت طلعت فركت وجهي عفيه ماضلن بنفس واحد كل اليجي ياخذ امراد بيهن

كمت لبسته وغسلت وجهي رتبت شعري اشلون مجان لان طويل صاير كلش ممل

نزلت رحت لغرفه بيبي لكيتها كاعده وبحضنها شاهين وشهد واركان يمها يحجون عالكيف وفاتحين كام عرفته ويه غيث  اني هم مادخلت تركتهم رحت للمطبخ اتريكت وطلعت ويه سعاد اساعدها

مر شهر والاوضاع اتخربطت بعد ماجانت هادئه كلش اركان مخبوص اتصالات ومشيات هو وابو

بيبي حتى شاهين هملته ساكنه المضيف والزلم داخله طالعه عليها

عمي ابو حمزه كل يوم الصبح يجيبوا بس شكله متغير مثل الخايف بس يتسنط يضل متكتر بعربانته يتسنط لمن يصير اليل ويرده عمي ابوغيث

اني ماادخل بمشاكلهم  ملتهيه ويه سعاد وشهد يانشتغل ياندور بالبيجات ملابس للعرس

كاعدين بالمزرعه انسولف والجهال تلعب گدامنا لاوالله شاهين يعض بأزهرو وريحانه  وعمي يحامي  منه  مانشوف غير دخلت سماهر تركض وتعثر وتصيح دخليكم لحكووونااا

كام عمي كال شكو يبه

:- عامر جتل سهيله وانهزم

-:-شنهوو جتلهااا شتلغثين انتيي

:-جتلها يعمي راحت  اخيتيي

:-عش جتلهااا وابوج وينووو

:-ابوي تسودن يعمي تركتوا مجابلها ويصارخ

:-لاه ولك اررركان الحگ يبووووي

كام اركان اخذ سلاحه وركض وعمي ورا حتى بدون نعال طلع يركض من شدهته اجت كعدت كدام بيبي تلطم اتكلها جتلها يجده جتلها ماتت اخيتيي

:-انجعل نار جهنم جزاتها

:-عش يجده عشش موش هاي حفيدتج عش هيج گلبج محجر وكارهتا

:-هذا حگ دم ريحانه الريحتها بدم بارد لبالها الدنيا ادوملها نفسو الدزها لخاطر تجتلها جتلها بيدو

:-لاعامر مايعملها اخيي وعرفو بس هاي ابليس الخذت كلشي ونهزمت لبلاد الغرب شعلت النار بينهم

:-مداسها بروسكم فداها الحلال والسلف بكبرو گمي لاتبجين بيتي ردي لبيت النجس ابوج ابجي غادي

رادت تحجي زمخت بصوت كمزتنه كلنا گامت مكسوره ضمت وجهه بالشيله تبجي وتمشي كوه گالت شهد ابوي راح يروح بيها

بدعه :-يطبوا اطويحيل لاتبجين يجده صح عزيز عليج بس مايستحگ دمعه لانو ناگص غيره وعرض لحمو نجس 

:-يمه اخيتي هناك هسه تتخبل

:-لاتخافين وانتي سعاد عمه لتحي ندهيلي جسار خلو يجيني بسرعه

راحت سعاد تركض واحنه شلنه الجهال باست شاهين واخذت نفس منه وكالت اخذي يجده عينج بي لاتغفلين عنو

:-اي بيبي

:-وخبريلي الهتره شوفيلي الشبل والصگر اشلونهم اليوم السبع ماخبرني اخاف صايرلهم شي

هزيت راسي اخذته بيدي الثانيه لان ازهر  بيدي دخلنه جوه صافنه على بيبي مانهزت شعره منها ولاتكول احفادها همها الوحيد ذوله الثلاثه

كعدت بغرفه شهد تبجي على ابوها وتباوعلي گالت هسه حسام يكرهني لان كتل امه

:-لاحسام زلمه ماياخذج بذنب احد

:-ولج بسببي اني الطشيت الخبر بس عمي غيث گلي مايصير شي بس احجي لخاطر نگضب الجاتل

:-شنو حجتي ولج

:-ماحجيت بس گلت عمي غيث عرف جتال ريحانه وراح يرد ياخذ حگها

:-عزه بعينه شيطان مناك ويحرك العالم هنا بيده بس مااستبعد هاي فكرت ناي لان محد يدري سهيله الها ايد بالسالفه غيرها

:-اصخام الصخم وجهي راح ينخرب بيتي

:-ولج اشبيج حسام يموت عليج صح يحب امه بس كاره اهله لوتعرفين اشلون جان شابع كتل وظلم من جان عايش بيدها هيه وامها

:-مالي ذنب والله ردنه بس تطلع السالفه تانعرف منهو الجاتل

ضلينه گاعدين للعصر حتى غده ماسوينه محد اله نفس ياكل بيبي دزت جسار اخذ بت عامر  وداها يم خواتها عد هناء

صار الغروب وماكو اي خبر  گاعدين  واحد صافن بوجه الثاني لمن دخل حسام يرعد بصوته يصيح شهددد

كامت ركضت انضمت وراي  دخل وجهه احمر عيونه طالعه گاللها شعملتي

گلتله بس اهدء حسام  تره مالها ذنب كل السوته گالت لابوها غيث راح يرجع لان عرف كتال ريحانه شعرفها امك الكاتلتها وابوها راح يسوي هيج حتى لاينكشف

:-ولج امي ماااتت ماااااتتت امييي

كالها وكعد عالجربايه كامش راسه يبجي بصوت عالي مثل الطفل رحت يمه خليت ايدي على راسه كلتله الله يصبرك

:-على شنو يصبرني  ولج واگف ماعرف ابجي لو اضم وجهي من الفشله ولجن لحن امي وخالي جتالين عمتي

:-لعد شنو ذنبك انت ياعيني

:-مدحگه من فجار دمك من دمك نفسو وكلام الله  گاعد صافن بالمشتسفى گال الطبيب البقاء بحياتك ماعرف ابجي لواضحك ضال ادحگ بوجهه مثل الفاقد عقلو  ويريد يميز اهلو منهم

دخلت بيبي كعدت يمه اخذت راسه لحضنها عصرته گالت ابجي يجده لاتكتم بگلبك هاي اميمتك حتى لو جانت نجسه تضل الها حگ عليك

هيه حجت وهو ماصدگ بجه من من كلبه اشرت طلعن طلعنه رحنه للمطبخ يم سعاد كعدنه

نصبوا الفاتحه وتكتموا عالخبر بين العالم ماگالوا غير عامر تعارك وياها وهو شارب كتلها بدون لايحس

عامر انهزم الكل يدور عليه ماكو بس اسمه صار بالدوله والمحامي علاء الدين لزم القضيه

مرت الايام اجواء حزن مهما يكون وشماصار اتضل الها ذكره بينه غصبا عنه حزنه 

اركان اخذ بيت زغير الامه لان صارت من الروس بينها وبين ام عامر بالاخص من اكتشفت جهال اختها الكتلوا بتها  اخذت توته وراحت عاشت بي
واركان وحسام ماتركوها يتناوبون عليهن ماخاليهن يعتازن شي لامصرف ولاكل

صار اربع اشهر  على وفاة سهيله رنو اتزوجت سكتاوي  محد راح لعرسها ؛عمي ابو غيث اتمرض نهار وليل نايم محد يعرف علته شنو  وختمها بزعل بعد  حتى مايحجي لان سمع بيبي تگول لعمي ابو اركان طهر ازهر كافي حزن متستاهل نحزن عليها اكثر من هيج…

… اليوم كاعدين من الصبح  نستعد للطهور الكل اجه حتى سماهر  وام وام اركان  بس مالهن صوت متكترات يخافن من بيبي بس نظرت الحقد واضحه عليهن بالاخص من دخلت ام غيث وماما وكامت بيبي استقبلتهن ودخلتهن يمها كعدن

ماما صحتها رجعت مثل اول كلها نشاط والضحكه مامفارقه وجهه وام غيث كل اشويه عاصره ايدها تهمسلها سدي بوزج لاهفج اطراك

كوه الزم ضحكتي هيه سايگه عليها وماما مامصدكه عدها صديقه اطلعها وتعلمها

ام غيث كلها شيطنه جنها ابنها كاعده منتجيه  تضحك ويه بيبي وتسولفلها على ناي اشلون صايره صاحبت مشاريع  وترد تتخازر ويه سماهر مخازر وذيج  تطحن

وترجع تندار  تسأل سعاد اشلونه الحجي وياج  وسعاد تكلها طاير بيه وبجهاله وتخلي ام اركان اتشيل روحها وترگعها بالكاع

شلت شاهين من الگاع خليته بحضن ماما لان ماخله واحد كل اليمر يضربه باسته گالت يمه وكاحه ناي

ام غيث.:- غدي  شجابه للغاليه

:-ياا ام غيث والله نفس الصلافه ذيج هيج جانت مجلوبه بزغرها

:-اشلون راح اتخليني اهفها على حلكها ولج كم مره گلتلج لاتحجين على جنتي

:-يله من زين جنتج جنها جني مسودن

:-ولج لحن  گضبيني لااجتل المفهيه واخش السجن بيها

دااحجي وقاطعتني ام شاهين واسماء بدخولهن  كعدت يم عمتي وهنه راحن لبيبي سلمن ؛اسماء  دنكت على ايدها باستها كالت اشلونج يجده

:-يبعد جدتج بخير ابوج وين

:- مااجه تعبان ضل بالبيت

:-اها تعبان لاعجل خلو يرتاح زين بس جان اجه بين اهلو يشبع عينو منهم

:-شقصدج جده

:-ماقصدي يجده وسلامته لاتخافين راح يشبع راحه بكد الجان ناويها  لحفادي

:-جسار بالباب گال اتصل بالجده ماترد گليلها خلها ترد

:-جيبي الجهاز خالتو غادي بسرعه

كامت راحت يم الكنتور شالته انطته لبيبي وهيه گعدت يم امها تباوعلي  بكره

بيبي طلعت بره اتخابر وام غيث ضربتني على ضهري صحت اااي

ام غيث :-هيه هاي الجمله الجابت روس احفاد بدعه

:-صدگ  على طاري احفاد بدعه  نانو فتحت مكتب وصارت صاحبة اسم وكذا

:-اعرفها عرمه والي براسها تعملو هذا الاغم مايكدرلها بس ينبح

:-ههههه اي والله خابر اركان يگله امكانيه اتعجبج فتحت المكتب بفلوسي وماتعملي معامله اذا ماتاخذ مني مقدمه حتى خصم ماكو انوب اعرفها تقفص بس اذا انت سبع احجي ومحمد تخش بعينك

:-مال ابليس للشيطان

:-لاابشرج ابنهم طلع اضرب منهم اثنينهم

:-بعد جدتو يخبرني يشكيلي منهم يكول مايعطوني اگل و يطلعوني اجدي بالبرد واذا اعترضت يزتوني بالبالكون

:-تره يجذب لاتصدگي

:-عجل منين يطلبها  من الهتره ام نص متر لومن ابو الي تفكيرو يخلي حتى ابليس يخجل من نفسو

ضلينه انسولف اشويه ودخلت بيبي  باوعت لام شاهين واشرتلها اي ذيج دنكت مهضومه ابتسمت  بيبي وكعدت اخذت نفس براحه لزمت عصتها وانتجت بهيبه حسيت اكو شي صاير

فززتني ام غيث وهي اتكول لاتفكرين جثير موزين عليج تركيهن وبشريني ماحبلتي 

:-والله عمه كل يوم يضحك عليه وبعدين مايسويلي طفل

:- لا هذا حيال بعد لاتخلي لمن يكضبج شاربو ويحلف بي

:-اي هو هم هيج حسوي

:-واذا عطاج جلمه ورد بيها تركي خلي يولي

:-امم اگله يطلكني حتى يخاف بعد يعيدها

:-اي يعمه صيري وكحه هذا مستغلج لان هتر ومالاگي واحد يضبو

هزيت راسي اي

:-الله يشعلج ياام عاشق اشلون جبتيهن بطن وحده

ضحكت ماما وردت تبوس بوجه شاهين

ضلينه لليل انسولف ونضحك ولمن دخل اركان گال گوموا  استگبلو خطاركم ياااابه …

**ناي**

انداريت لكيت ولد  مسلحه انداريت للمطار صار بعيد علينه مانلحگ حتى نرجعله  جريت جهالي خليتهم وراي وجود وكرم  صاروا  بوجهي 

راح غيث وكف كدامهم گله عرفناك بذات وتعمل اطهور بغياب خويك بس مال تستگبل استگبال نواقيص  لاهاي جبيره

طلع اركان من بينهم گله شعدك رديت لك

:-مشتاگ لخويه وريحه ديرتي

ضحك وغيث فتح اديه اجه يمشي بسرعه حضنه وغيث عصره همس اركان  توه مانور السلف يخوي

:-مشتاگلك بگد رحمه ربك

:-عجل جذبت مشتاگ للي خذوا بغدر من بينا

:- موجر نار محتام گلبي يخوي

:-عينو بالدرب مناطر جيتك لخاطر تاخذلو ابنو

:-مااگدر يخوي كالها و حضنه حيل وبجه بصوت وهاي اول مره اشوفه يبجي هيج عرفته مشتاقله بس يخجل يوصل كبره لان بعده ماراد دمه

دكدگ على ضهره گله اليوم قبل طر الفجر نزور كبروا

وخر مسح دموعه وضحك بس ضحكته بيها كسره

هز راسه واندارلنا كال يابه حي الله من جانه

راح جود وكرم  سلموا  عليه باوعلي
:- اشلونها الذيبه

:-ههه بخير ماطولكم بخير اشلونهم الاهل

:-مناطريج بالسعف يرحبون بطلت جهرتج الرحمانيه

:-حلو يعني الطريق بعده خطر والاختيالات منتشره

:-حلفي عمي وكتاب الله ماشايف هيج لچاعه اتهير العبوه بيدها وتسأل عن مجان الانفجار

:-اسبق عدوك بخطوه

:-لكي تعتم الرؤيا وتوهمه بالانسحاب؛ هههه نورتي ديرتج يااخت عاشق

:- منوره بارجالها

:-يالله يابه اليوم الكل يمنا يتفضل

جود:-. بيت العامر والله تعبانين

:-ماكو عذر ترحون وياي ترتاحون ونگوم بواجبكم وباجر تگفون معزبين بمضيف خويكم تستكبلون خطارنا

:-لااليوم نرد لهنا انشوفهم ونرتاح وباجر والله من الصبح احنه والاهل يمكم

:- هلا تسبگ هلا اخذوا راحتكم الحمد الله على سلامتكم

كالها واندار للشباب كالهم يبه جيبوا السيارات واخذا الجنط

اجوا الشباب اخذوا جنطهم سلمت عالبنات وجود للمره الالف يوصيني على عاشق وكرم كعد يحجي وياهم عالكيف وهمه يأشرون اي بوسهم وكام سلموا وراحوا واحنه صعدنا ويه اركان شغل سيارته حركها طفر عاشق كله اني اسوق

اركان. :-اهاا ولك اخاف اتزتنا حدر تريله

:-لااعرف عجل مادريت غير كمت اشتغل تكسي   اسأل غيث منهو يوصل رفجانو لشغلهم كل يوم

:-اهاا عش تشتغل تگسي النهبتو امك ماكافيكم

:-عجل مادريت غير سلبونا ناي صابها شرجي وغيث صار بواب وكتلنه الجوع تالي گضبت السياره اني گمت اشتغل

:-ناي شرجي؟ وغيث بواب؟ لاعجل صدگت اتلگط عليه يول

اندار فرحان كعده اركان بحضنه سلمه الاستيرن وهو طاير غيث سحب علي خلاه بحضنه لان بعده يغفي ضم وجهه بصدره ثواني ورد نام

ضلت هيا كل دقيقه تسأل اشوكت نوصل وارد هسه لمن سمعت غيث گال گضبتوا

سديت حلكها حتى اعرف على شنو يحجون رد اركان من البارحه بالمركز

:-اعترف

:-اي مثل ماگلت عمي الشريف زاتو بس هو زمال دازلو واحد  اخوث بأول هدف خطاه واجه بشاهين

:-شاهين يدري بس مالحگ يحجي لان دخلته عليه جانت سريعه موش مال دفاع

:-اكيد سمعهم وهمه يتفگون بساعة الوصلنه لان مرتين اتصل عليه مارديت لبالي يريد يندل مجانه بيومها وصيت الربع يغلقون اجهزتهم

:-مرتين نواها ومرتين شاهين يعطيني روحو بيها ويصدها عني

:-لخاطر تحمي ابنو من بعدو

:- هذا ابني اركان ابروح اخيك لاتحجي جدام الجاهل هيج كبر وكام يحس ويفرق خلو ناسي

:-لحدمن غيث لازم اتخلي يزور اهلو

:-خلي يكبر اشويه لخاطر  ماينجسر گلبو بكل مره يسمع  عاشق يندهلي بيها يبه

:- الينوجع  يكف بصلابه والينكسر يقوه

:-ماطول راس يشتم الهوا غير الضحكه ماتمر على ابن شاهين وحگ الخلق السماوات السبع  اليفكر يكرب صوبو امحي من الوجود

:-عجل اتوكل

:-افاا قبل لااصعدو السياره عطيت اشاره للشباب

:- حي الله ابن العم

:-تحي ودوم بزلامها هيرتوا السلاح

:-كلوا جاهز مناطرين ردتك

اخذت نفس  شي بداخلي ارتاح من سمعت غيث  هيج يحجي يعني محد راح يتجرء يقرب منه ولا يكدرون حتى يداعون  بعلي  اتذكرت المداليه الجابلياها  طلعتها من جيبي اباوعلها صليب ناعم ضحكت  بستها ولبستها

وصلنه للبيت  نزلنا صارت عيني بعين غيث جذب اذا اكول ماخايفه بس من ابتسم  ومد ايه راحت كمشتها باوعلي اخذ نفس  وگال يله

**"لحن***

بيبي تركت عصتها وگامت  والكل گام متفاجأه انداريت لكيت غيث لازم ايد ناي على اخر كشخه واكفين بهيبه وبثقه اتحسم صدگ واحد ساند الثاني

گالت بيبي هلا بأحفادي وراعين المجان هلا بجسارين هامات العدو هلا بلي مايهابون الموت

ضحگوا اثنينهم فتحت اديها  راح غيث حضنها 

باوعت لناي نزلت دموعي   ابتسمت ركضت حضنتها عصرتني حيل شهكت اخذت نفس طويل مني  گالت  اووف ياريحه الراحوا

:-لبالي بعد ماتريدن ولاراح احضنج هنا

:-تذكرين شنو گلتلج بيوم دفنت اهلي

:-مااتركج لويضل اخر يوم بعمري

:-وهاي رجعت

اجت ماما وخرتني وسحبتها لحضنها  حضنتها وبجت باستها وخرت مسحت ادموعها كالتها لاتبجين ياام عاشق رجعت

:-من دون اخوتج دوم شالعه كلبي

:-هههه حتى تكثر معزتي يمج

بجت ماما ردت حضنتها صارت عينها بأام غيث باست ماما وخرت وگفت اتحس هواي حجي بينهن ابتسمت بكسر وام غيث اشرتلها تعالي ركضت حضنتها خلت راسها بحضنها وبجت وام غيث بجت على بجيتها

ثواني  واجه غيث جرها گاللها تراج فاهمه غلط يولي ذيج امج

ام غيث:-. انگلع لك لااطر راسك يالمعفن

:-استلم وانوب اتگلك عش محد يحترمك

:-غويثون بعد لغاد رد لحضن جدتك

:-راد بس هيج جدام الغربه اسلم لخاطر اكتم نفسهم ماعطيهم مجال للشماته

:-اهاا اذا هيج اتلكط عليه

ضحك وهيه ضحكت سحبته لحضنها اليسمع حجيهم ولايگول هيج واحد مشتاق للثاني راحت ناي يم بيبي وكفت خجلانه اخذت نفس باوعتلها وبيبي رافعه حاجبها

ضحكت وگالتلها بدعه كلتلج لاتتحديني

:-هتره ولجعه ومايصيرلج جاره

:-اليسمعج يكول ناهبه هلالج

:-ههههههه كربي يجده فداج الحلال وصاحبتو

دنكت شبكتها همست تتهنين بي يبعد جدتج

:-اشلونج بيبي

:-ماغمضت عيني مناطره ردتكم لحضني نذرت روحي فدا لتراب رجعتكم

:-وهاي رجعنا

:-نورتي ديرتج ومجانج يجده

اسوتها اتوخر عنها ودخل عمي ابو اركان يركض كال ولك يالسبع رديت يعمي

راح غيث حضنه گله شعمل دحكت العشيره سابت من بعدي كلت خليني ارد اضبهم

:-احط رجلي بنص السلف الي انت تضبو

:-جان خليت رجلك بغير شي وگضبت روحك  ياابو ازهر

:-لاياسايب ياابن السايب عمرك ماتنعدل

:-هههههه ترباتك عمي

:-يعيون عمك الحمد الله على سلامتك يبويه

:-الله يسلمك بالمبارك عليك الخلفه الجديده

:-انكتم لاكتمك نهائيا وانت بويه ناي اشلونج

ناي- الحمد الله عمو بخير

دخلت سعاد تهلهل وطش جكليت وشهد ركضت لعمها شبكها گاللها طگج الحرمه

:-لاعمي بس بعدو زعلان ومايحجي وياي

:-اسحگ جهامتو وانعل ابو ابو

تركتهم يحجون رحت كمشت ايد ناي ضحكت وسحبتني لحضنها  همست:-راح نرجع من جديد نعيش سوه

:-مافترقنا حتى نرجع

:-بعد ماكو تعب ولاهم

:-خلصت قصتنا ويا ما ضلت بس الايام الحلوه

:- بشرج غيث البارحه نفذوا الحكم بالكتلوا اهلنا

وخرت باوعتلي عيونها مليانه دموع 

:-جبتيها بتعب اخذتي كل حق النه خليتينه بمكان جنه نحلم انعيش بي تستحقين من يگولون بت ابوج

:-هسه اكول عاشق  غمضت عينه براحه

:-باجر العصر نروح نزور گبره 

:-ووگف گدام بابا اكله ذوله عائلتك الي امنتهم عندي

:-اگله فتحت بيتك ردت هيبتنه بين العالم  خلتنه نمشي واحنه رافعين راسنا رفعت اسمك على صدرها وخلت الكل يسولف بي

:-اخذوا عاشق منك حتى ينهون اسمك ردينا بثلاثه صگور مكانه

دارد وقاطعتني سماهر بصوتها وهيه اتگول هيج يخويه سلمت عالكل وصلت اليه حتى اشلونج ماهونتها بيه

اباوع لغيث كاعد يم بيبي وبالجهه الثانيه اركان اندار لبيبي يسولف وياها مامهتم للگالته

:-ولك اني اخيتك ماكفاك العملتوا حرمتك بينه عش هيج يبن امي حتى لوغلط مااستحگ كل هذا منك

جرتني ناي كعدنا  يم ام غيث وغيث طلع باكيت الجكاير سحب وحده واشر لاركان شمرله جداحه دنگ ورثها اخذ نفس نفخه

:-هاي هيج ماموجوده جدامك حتى ماترد وين غيث الجان ماتغمض عينو اذا مايامن انام

غيث :-. الله يرحمو جان خوش ازلمه صح الخبر جان مفاجأه وحگمم تنصدمون بس جان عملتو فاتحه تليگ بمگامي وتعبي  موش يومين وتشيلون الجوادر والله زحمه

:-غصبا عني يخوي

مارد اندار لام شاهين الي خاله علي بحضنها تبوس بي  گاللها اشلونج يعمه

:-عايشه يبعد عمتك بخير ماطول ابن ابني مرتاح

:-حگج اليوم يصلج صح طولت جثير بس جنت مناطر علي يكبر لخاطر ما ينسى هاليوم
بدل ماتنزل دمعته بذكره ابو يضحك مفتخر

:-مافهمت يعمه شتحجي

:- سلامتج عمه اي عمي شعملت ويه عشرية ال___

ابو اركان :-گالوا مالنا حگ يم غيث فجار دمنه معروف

:-يعني تنازلوا

:-اي وخذت عطوه كم يوم بين ماانفض  الشغله

اسماء.:- شنهو ياسالفه بس لاتودون ابوي للموت عش عمي ماكفاكم العملتوا بينه

بيبي.:- انكتمي واذا سمعت نفس اسحگ راسج

:-عش جده موش هذا ولدج واني شنو وين اروح بعد ماگعدتيني هالسنين كلها

:- اي سهله واحنه بعدنا على جلمتنا ياخذون ابوج من هينه وانتي تصيرين بأسم غيث من هينه مو يالسبع

كالتها وباوعت لغيث دنگ يحك بخشمه همس جده راح تدخل قضاة دخيل ربج ستري علينه

ابو اركان. :- اهاا صدگ يعمي

ناي. :- ان شاء الله عمي كملت ماضل شهرين واخذ الماجستير بعدها بعون الله  هدفي  القضاة بس منتظره العمر اشويه يتقدم حتى يقبلوني

اركان.:- اها يعني العمر گاضبج

:- شتكول انت اكو شي يگدر  يمعني؟؟

:- لاافا  مشهودتلج وانت يالسبع اتعلمت تغسل اماعين

غيث. :-اي بنفس الوقت الي تعلمت بي تغسل ملابس انكتم انوب يحجي بزود وهو وجهو طاير نصه من الطراگات

گالها وندارلي غازرني گال كم مره نبهتج ماطگي

:-والله مااضربه

:-حلفي

:-والنبي

بيبي.:-  انجعلكم بالجدر غربلتونا بين الغرب الله يخزيكم  اي يغيث اشوكت ناوي تولي 

:-ويه طر الفجر

:-ماخايف يجده

:- افااا وانه اولدج  گبل حرمتي جانت تلميذه  واحجي بزود موش هسه صارت استاذه

شالت راسها ناي باوعتله  غمزلها وهيه ضحكت

اباوع لسماهر واسماء من كثر الغل ماتحملن نزلت دموعهن وعمي ابو اركان ضحك گال والنعم منها ومن اهلها بت ابوها لبوة من ضلع سبع

رن فونه طلعه من جيبه باوعله عاكد حاجبه اباوعله مسح وجهه كوه يتصنع الجديه
حمحم و رد- كول يبه  --لااشوكت--يله جايين خلك بالمركز --مودع بالله --

بيبي. خيرك يمه

:-ابو حمزه ماخذي الشرطه

:-عملتها يالسبع ؟؟؟

غيث. :-الله واكبر تواني واصل حتى جكارتي مالحگت اكملها ااوف اشگد ظالميني

:-اهاا گلت مظلوم امم خوش عجل  گوموا اگفوا لعمكم 

:-اني تعبان جاي من السفر

:- اهاا وانت اركان

اركان. :-اني جگايري خالصه مااگدر اطلع بدونها

.:- ولج سعاد عطيني التفگه  الوراج

هيه تحجي وثنينهم طفروا طلعوا بسرعه طلع وراهم عمي ابو اركان بجت اسماء گالت راح ابوي

بيبي :- ندهولي جسار

ام شاهين :-. لادخيلج عمه ما ضلت عندي غيرها

:-عجل كتميها  لاوحگ دم الراح غدر اخلها حدر الدرج مجان عمها  تخلص باكي عمرها لمن تعفن 

ام اركان. :-يضل ابوها وعزيز عليها

:-ام اركان الج دقيقتين ان لميتي العگارب ونگلعتي بيها الخير وان اتأخرتي ثانيه هذا حد يومج

بعدها تحجي وطفرت ام اركان وسماهر جرت اسماء الي تبجي كامن طلعن بسرعه انتجت ماخذه راحتها

سعاد :-.لخاطر احباب گلبج يجده بسج دم   هذا كضبوا خلي اهل المكتول ياخذون حگهم بالسجن منه خلينه نعيش كم يوم مرتاحين بدون ثارات

ام غيث.:-  شيريحها بدعه اذا ماتغط لجهامتها بالدم

بيبي. انتي موش جنتي منهزمه يالمصگوعه شرجعج

:-حضي رجعني عجل هو اليدحگ مصايبكم هم الو   نفس يعاشركم اكوم اخذ جنتي واحفادي واروح

:-كمي انعل خيرج

:-عجل ماكوم وهاي على افادج

كالتها وتربعت عدلت گعدت عاشق بحضنها الي جان يباوع لبيبي بطرف عينه ضحكت ناي

بيبي.:- اي يالهتره ضحگينه وياج

:-تردين الصدگ جنت احب شخصيتج واتمنى اصير مثلج بس بعد هالحجي اتراجعت

:-عجل خلج مثبته على كلامج

:-هااا لاتكليلهم ندهولي جساره للعلم جساره يستلم راتبه مني يعني هسه انتي المفروض اتخافين مني

انتجت باوعتلها بصلابه اخذتلها اشويه  وضحكت كامت ناي كعدت يمها  سحبتها بيبي لحضنها  باست راسها گالتها اتراهنت عليج من اول ساعه حجالي عنج السبع وهاي كسبت الرهان

:-كلتلج ماراح اصير مثلج

:-وكلتلج راح يترحمون على ايامي بوجودج

:- مااذيت واحد

:-بدل العز  العايشين بي صاروا يترجون الفلس مثل العبيد والجان  اليغلط يرتاح بالموت صار يكملها بذل بالسجون

:- متصافين بس كلمن بطريقه الترضي ضميره

:-حرمة السبع ماتگون غيره لبوة مثلو

گمت گعدت يمها كلتلها واني

:-انتي الملاك الي ربي عوضني بي بدل بنات ابليس وعشرتهن الماوراها بس الخراب

:-الله يحفظج النه بيبي

خليت راسي على صدرها اشكد اشوفها قويه وكلمتها صارمه بس  ويانه تختلف اعرفها اتحبنه على محبه احفادها وتعلقهم بينه

ضلينه كاعدين ناي مدنگه على فونها خاله رجل على رجل  تراسل وتبتسم ما هامها اكبر واحد

وبيبي تباوعلها بفخر اتحسها هيه هاي الراح تكمل مسيرتها وتنتشل تعب عمرها من الضياع

صار الفجر وحنه مستمرين انسولف  ولاكأنما اكو عدهم ابن بالسجن بالعكس فرحانين حتى ام شاهين تحضن بعلي وتسولف ويا عالكيف وهو يرد تضحك اتحضنه وتباوع لناي عرفته تسأله عنها واشلونها ويا

عاشق مراقب بيبي يباوعلها بتك عين اتحسه يدرسها وهيه منتجه تباوعله بمكر شكلهم يضحك

استوها الشمس تطلع ودخل غيث يرمي واركان يضحك بصوت عالي  طلعنه كلنه صاح عمي ابو اركان بسكممم

غيث :-. وارب العباد  لو اتنخلني باردو هم احتفل تعااال بابا علييي

راح علي يركض اتلكاه اركان شاله اجه غيث سحب اقسام كمش اديه خلاهن عالسلاح گله ارمي

علي :-عش بابا

:- زرنا ابوك  وگال خلي علي يرمي ويسمع السلف بكبره رد حگ دمي

ضحك ورمه  وام شاهين هلهلت صح  بيها كسره لان الي انسجن ابو  بس شاهين اعز جان

ركض عاشق كمش بيبي بدعه گاللها خليني ارمي جده

:-وعش تجيني ماتروح تطلب من ابوك

:-غيث يخاف من ناي وناي ماترضه تخاف عليه بس اتخاف منج اذا انتي گلتي هيه تسكت

:-اهاا منهو گلك هالحجي

:-اني اسمع غيث كلما يتكاون ويه ناي يكلها وعمه الساده رنه وحده لبدعه تفلع اذاناتج

:-وهيه شترد

:-اتكله خابرها تااكلها شتصخم من وراها وبدل اذاناتي تفلع راسك

:-اغراب يگل لغراب وجهك اسود تعال يجده اني اعطيك سلاح وارمي للصبح

طفر فرحان راحت طلعت مسدس  خذته بره اتلكاها غيث كالها هااجده

:-هذا السلاح هديه لشبل يرمي بي هسه وتظمو  من يكبر تعطي الو

:- خوماكو شي جده هذا سلاحي

:-انكتم لك سلاحه اكضب يجده ودحگ عدل لابوك لخاطر تتعلم بسرعه

علي:-. واني جده

:- ولج سعاد جيبي سلاح شاهين عطي للصگر

راحت سعاد تضحك جابت مسدس انطته لاركان سحب اقسام وكعد يم علي خله اصبعه ورفعه ليفوك رمه وضحك

عاشق بحضن  غيث يسحب اقسام ويكمش ايده عدل يرمي ويضحك بصوت عالي  اتريد واحد منهم ينز لو يبين عليه اثر الخوف ماكو

همست ناي موبديهم  الطبع غلاب والدم يحن

دخل حسام كال اجه المطهرجي جدي

ابو اركان. :-اخذ ازهر يبعد جدك وانتم كلكم عالمضيف الي يسأل شنهو هالضرب ردوا لخاطر الطهور

طلعوا واحنه رحنه للمزرعه فرشنا الكل التم  طلعت بيبي بره مااسمع شنو حجت ويه جسار بس هو كاللها اليكرب صوب البيت انخله

:-عينك بازلام ابو غيث وبنته تراهم انجاس

:-السبع والذيب طشوا الشباب يحمون المجان

:-ماينغلبون تربات ايدي وانت يجده هم خلك نبه لاتغفل

:- اشر على عيونه

ردت طلعت ويانه كعدت خلينه داير مدايرها مخاد انتجت اتباوع لعائلتها فرحانه بلمة احفادها كلها ازغار تركض كدامها وتلعب

سعاد حضرت الغراض الطبخ  وام شاهين وياها

عمتي ام غيث يم ماما يمهن ناي يسولفن وكل اشويه عمتي ضاربه ناي على راسها تكمشه تباوعلها بغضب وترد تحجي وهم تنكفخ لمن  كامت كالت كافي عمه ابنج سگط شسويله

:-ولكم كضبوها جيبوها لجاي

:-هاي اشبيج غير اتشاقه ليش ماتتحملين شقه

ضحكت انداريت لكيت غسق ورويده استوهن يدخلن ركضت سلمت عليهن احضنهن ويردن هنه يحضنني مامصدكين هلكد ماوحده مشتاقه للثانيه  

اجن سعاد وشهد سلمن عليهن دخلتهن يم الاهل  شافتهن ناي الي بعدها واكفه اتبرر  صاحت  اي همزين اجيتن تعالن حلفن ابنها صايع

اندارت عمتي خازرتهن اشرت احجن

غسق.:- يمته غيث وين اكو منه

رويده. :- غير اتخلي عالجرح يطيب الولد عينه بالكاع ويساعد المعتاز ذاك الشاب الينحلف براسه

غسق. :- غير يصيحوله سيد غيث هلكد مامتدين

سعاد.:-  ههههه حميتي زايد سيد سني هاي قويه

:- لاموهو يحلف بالائمه فعادي ترهم

ام غيث. :- تعالي غسق عمه

:-شنوو عمه تره خطار ميصير تكتليني عيب گدام الباقين

:- ماطگج گربي

:- والله ماسويت شي وجود مدللته وجنو اغيرلها اربع مرات باليوم حتى سألي رويده

رويده.:- اي

ام غيث.:- اي مو تعالي انتي هم

رويده :-. لاجذب عمه والله اني مبتليه بجهالهن وناي يوميه تطرد غيث بليل بس لان يتاخر دقيقتين وغسق ضربت جود بالمخده ونيمته بالصاله لان باسها بدون لايكلها حبيبتي

:-بعد شمصخمات احجي

:-ذاك اليوم ناي …

بعدها مامكمله وناي ركضت وغسق شمرت بيتها على سعاد ولحكتها  ضحكت واخذت جنو رحت يم بيبي كعدت ورويده اجت سلمت على بيبي وكعدت خانسه يم عمتي جرتها باستها  وكالتلها لاتتعلمين منهن يمي الجذب

:-لاعمه ابد والله

:-بعد امج وعطيني هالگطف ابو اذان عش هيج ضعفان غادي بس عيون مگنبصه

:-من الوكاحه وعاشق ميخلي يثبت نهار وليل يلعب بي

ابتسمت وخذته من ايدها اتبوس بي وهو يهوس ويصفك
دقايق ونسمع صعدت اصواتهم بالصلاة على محمد وصوت ضرب بالجو صار عرفناهم طهروا صح بيناتنا بس حتى يردون الفرحه لكلب عمي هواي حزن

طلع المضمد دخل عمي شايل ابنه طشت جكليت سعاد على راسهم واركان وغيث ميتين ضحك عليه

عدلت حجابي دخل جود وكرم سلموا  وراحوا  كعدوا  يم عمتي يسولفون وياها

ردت ناي وغسق بس واكفات بعاد كال غيث خير شعاملات

ناي.:- غيث صدك اني مضوجتك

:-لا افاا انتي

:-شوفي عمه هاي كدامج

غسق.:- واني جود كللها اشلون مداريتك

ضحك جود وحك خشمه مدنگ

:-شوفي عمه حتى من كثر الدلال يستحي شيكلج

ام غيث:-. تعالن يعمه اني هذا الشهر يمكم وعلمج اشلون تمشن عدل  يمه غيث حضرلي الشقه الجوه

:-اعتبريها جهزت

:-وانت اركان عمه ماتذبح شمناطر الجهال جتلها الجوع

اركان. :- شذبح بعد  ضل بس ابنج ماذبحته

غيث.:-  لايابن الطرگه

ابو اركان.:- انجعلك بالثول ولك منهو الطرگه

:-اوو عمي دحگت هالجاهل  بيدك  نسيت انت نفسك ابو هالثور

:-الله يخزيك غيث انكتم لاكوم اسحگ راسك وروح لابوك زعلان راضي

:-عمي  ياابوي اني زلمه ميت صارلي سنه ونص

:-وانت اركان عش مارحت تعزم عمك

:-فوتو حالي  بعدني حزنان على اخوي هذا السبع السبع موش  گليل

:-ومحمد مغسول حضكم  فلا تنعدلون

:- شد حيلك بزرتك الجديده ان شاء الله يعوضك بيهم

غيث:-. ولك بعد  شيشد ؛ بسنه وحده زت اثنين  جدي بمراهقتو مادبرها

نزرع العكال عمي وكام وهمه ركضوه لزمو من ايدي يضحكون

**"ناي ***

كملوا شطف اللحم جابوا مارضه اركان سعاد تطبخ لان حامل خطيه او جذب خاف عالمفهيه مالته  تتقرب للنار اخاف تموع اكثر ماهيه مايعه

رفع دشداشته شدها على خصره وغيث نصب الگدور ؛كاموا جود وكرم وياهم  كعدوا يقطعون اللحم
ركان  وكف على گدر التمن  وغيث على گدر المرگ

الجهال يم بدعه خالتهم داير مدايرها وتحجي وياهم بهيبه وهمه يتسنطون بتركيز

واكفه  يم لحن شايله شاهين ابوس بخدوده  وغسق يمي اتصور بيهم تضحك كالت الله نانو شكلهم حلو وهمه يطبخون

:-شكلج اول مره اتشوفين زلم تطبخ

:-اي والله واركان مبين متمرس شوفي اشلون گلب التمن بسرعه

:-لان دوم يطبخون بالاخص المناسبات والاعراس

لحن.:- نانو باوعي ماما اشلون فرحانه تسولف ويه عمتي

:-الحمد الله ردت ضحكتها ونجبر خاطرها

:-ماعرف اشلون اشكرج ناي

:-على شنو ؟؟

باوعتلي ودمعت عيونها لازمتها العبر همست على كلشي ؛ضحكت وحضنتها

جرتني غسق كالت تره اغاااار

:-ههههه والله نفس المعزه

رويده :-. شنوو لعد واني

:-الي اسلمها جهالي واني مغمضه هاي موبس اختي لا ماشوف نفسي بدونها

:-ربي يخليج النه ماحسيت بطعم الحياة غير بوجودكم يمي كل مااگعد الصبح واشوف جهالكم  يلعبون كدامي اشكر ربي هيأ ذاك اليوم الي تعرفت بي عليكم

لحن. :-نانو اركان گال من تروح ماما الكم احنه هم نجي وياها عود يعوضني مكان عرس رنو وكذا

:-راح انتظركم

رويده :-. عالاساس مبتعدات وحده عن الثانيه وراح اتصير لهفه شحال لوماربعه وعشرين ساعه فاتحات كام وكل كم شهر مچيتين علينه

لحن.:- غيوره راح اجي وهالمره اضل شهر كامل

غسق:-. اااي ونطلع نفتر ونشمر زلمنا ونسهر بليل بشقه ناي

باوعتلها كلتلها وشكووو شقه استغفرالله

:-موانتي ام الكل والگلب الحنوان

:-لاكلبي مزفت والي توصل يمي ادچچها

:-بره منج ولي يله كل يوم يم وحده نسهر

هيه تحجي وصاح كرم نانووو سكته اركان بكفخه على راسه حكها وكال خويه ناي عرنوص بجه شيلي

ضحكت انداريت لكيت عمتي اتسكت بي؛  وحسام وشهد خالين هيا وريحانه يسولفون ياهن

علي كامش ايد بدعه وعاشق واگف كدامها يحجي بجديه عالاساس شخصيه وكذا وهيه كوه كاتمه ضحكتها واتأشر اي حتى تزيد ثقته

وقريب منها ابو اركان منيم  ابنه بحضنه يضحك ويا وسعاد تضحك على ضحكتهم

انداريت لغيث خال ايده على متن جود يباوعون للطبخ يحجي عالكيف وجود  يضحك مبين مخربي

كرم كامش المصفي واكف يم اركان يباوعله  منتظر الاوامر؛ واركان متيه روحه عيونه تروح وتجهي عالمفهيه  اتگول راح اطير بالعچه ويه اعلاليگ الوسخه اجيت اروح اهفه كله حرگ گلبي يحبها اكثر ماغيث يحبني

انداريت اباوع لغيث بضوجه لكيته عينه بيه رفع  ايده خلاها على گلبه غمزلي وهمس
وعمه الساده احبج …

ضحكت؛

اني ناي الالجي  ذيج الطفله الجانت تمتلك احلام بسيطه مثل اي فتاة بعمرها تگدر تحققهن  بدون سعي فجأة تلاشت وضاع كل امل

بعد ماكنت احتمي بضل  صار ينطلب مني  الحمايه واني اضعف من انو احمي نفسي؛

حاولوا يكسرون اجنحتي  بشتى الطرق
وگعت؛ تألمت ؛ بجيت؛ عالجت جروحي بنفسي اكثر من مره؛ وكل مره جنت احس بالضعف بس ماسمحت الشخص يشاهد انكساري؛

دست على وجعي  سندت نفسي بنفسي
اتقدمت اول خطوه الي بطريق الظلام رغم عتمة المكان وألم الاشواك ماتوقفت استمريت لمن شفت النور الي حققلي اكبر من حلمي

…وهاي اني اليوم واكفه بين عائلتي الي كل شخص احسه بمثابه حياة جديده اليه

اباوعلهم السعاده ماليه روحهم وصوت الضحگه تنبهني انو رب العالمين عوضني اكثر من ماجنت اتمناه منه وان القوه عمرها ماكان الها علاقه بالاجناس …

وهنا نختم للمره الثانيه  وراح تكون النهائية ان شاء الله 

اتمنى نالت اعجابكم ❤️

الكاتبه :leo Alfatlawi

ملاحظه //

  :-القصه صارت كتاب مثل ماطلبتوا راح يتوفر يم دار الدراويش اليوم نزل اعلان للغلاف

:-اكثر أسئلتكم جانت الكتاب بي اضافات : اي بي شكو حدث ماكدرت اضيفه بسبب سياسه النقد

اما أسئلتكم الباقيه  بخصوص الابطال و القصه راح اجاوبكم عليها  بالانستا
le_m3r