"အစ်ကို ဒီမှာပဲ စောင့်မလို့လား။"
"ဒီမှာမစောင့်လို့ ဘယ်ကစောင့်ရမှာလဲ။"
"ဟို .. မဟုတ်ပါဘူး။ အဲဒါက ...."
မဝံ့မရဲပြောလာသည့် မန်နေဂျာလီ၏ အဆုံးမသတ်လိုက်သော စကားကို ထယ်ရယ် သဘောပေါက်၏။ ယခင်က စတူရီယိုသို့လာတိုင်း ထယ်ရယ်က သူတို့အတွက် စတူရီယိုဘက်မှ စီစဥ်ပေးထားသည့်အခန်း၌ ဘယ်တော့မှစောင့်မနေတတ်ဘဲ ရှန်ချွမ်ရွေ့ရှိသောနေရာအထိ အမြဲလိုက်သွားလေ့ရှိသည်။
ယခင်ဘဝကလည်း ယခုကဲ့သို့ ကွာရှင်းခံရပြီးနောက်တစ်ရက်တွင် စတူရီယိုသို့ အလုပ်ကိစ္စဖြင့်လာခဲ့၍ ထုံးစံအတိုင်း ရှန်ချွမ်ရွေ့ရှိသည့်နေရာသို့လိုက်သွားရင်း အိုမီဂါ အိုင်ဒေါလ်တစ်ဦးအား နှစ်ယောက်တွဲ ကကွက်တစ်ခု သင်ပေးနေသည့်အားတွေ့၍ စိတ်မထိန်းနိုင်ဘဲ ပထမဆုံးအကြိမ် လူကြားထဲ ပြဿနာရှာမိရာမှ ကိစ္စများက ပိုမိုဆိုးရွားလာခဲ့သည်မဟုတ်လား။
"မန်နေဂျာလီ"
"ဟုတ်ကဲ့"
"ငါ ကွာရှင်းလိုက်ပြီ။"
"ဗျာ"
မျှော်လင့်ထားသည့်အတိုင်း ဖြစ်သွားသည့် မန်နေဂျာလီ၏ တုံ့ပြန်မှုကြောင့် ထယ်ရယ် ခေါင်းငြိမ့်ပြလိုက်ရင်း ဆိုဖာပေါ်၌ သက်တောင့်သက်သာအနေအထားဖြစ်အောင် ပြောင်းထိုင်လိုက်သည်။
"ဟုတ်တယ်။ မနေ့ကပဲ ကွာရှင်းလိုက်တာ။ မီဒီယာတွေကိုတော့ တရားရုံးက အတည်ပြုချက်ရမှ ကြေညာမလို့။ မန်နေဂျာလီကို ကြိုပြောပြထားတာ။ ငါ့ရဲ့မန်နေဂျာဆိုတော့ အားလုံးကိုသိထားမှဖြစ်မယ်လေ။ သဘောပေါက်တယ်မလား။"
"ဟုတ်ကဲ့ သဘောပေါက်ပါပြီ။ အခု လုပ်လက်စတွေပြီးတာနဲ့ အစ်ကို့အတွက် နောက်ထပ် Dance Studio အသစ် ပြောင်းလိုက်ပါ့မယ်။"
ချက်ချင်းပြန်ဖြေလာသည့် မန်နေဂျာလီ၏ပါးနပ်မှုကြောင့် ထယ်ရယ် သဘောတကျပြုံး၍ ခေါင်းငြိမ့်ပြလိုက်ရာ မျက်နှာချင်းဆိုင်ရှိ မန်နေဂျာလေးမှာ ထိုအပြုံးအားမမြင်ဖူးသလို တောင့်တောင့်ကြီး စိုက်ကြည့်နေရာမှ နားရွက်ဖျားများရဲလာ၍ ချက်ချင်း ခေါင်းငုံ့သွားရှာ၏။ ထိုအခါကျမှ ဖြတ်သန်းခဲ့ရသည့် နှစ်ဘဝလုံးတွင် မန်နေဂျာလီအား စိတ်လိုလက်ရပြုံးပြဖူးသည်မှာ ယခုတစ်ကြိမ်က ပထမဆုံးဖြစ်ကြောင်း ထယ်ရယ် သတိထားမိလိုက်သည်။
အလုပ်လုပ်ရာ၌ တိကျကျွမ်းကျင်သည့်အပြင် အနေအေး၍ ရိုးသားသောမန်နေဂျာလေးသည် ထယ်ရယ့်ထံ၌ အလုပ်ဝင်သည်မှာမကြာသေး။ အေဂျင်စီနှင့်စာချုပ်မချုပ်ထားသည့် ဂင်မ်ထယ်ရယ်က အလုပ်ကလွဲလျှင် တခြားမည်သူ့ကိုမှဂရုမစိုက်သည့်အပြင် ကိုင်တွယ်ရခက်၍ အပြောအဆိုလည်းရင့်သည်။
ထို့ကြောင့် မန်နေဂျာအများစုမှာ ထယ်ရယ့်ဒဏ်ကိုမခံနိုင်၍ ခြောက်လလောက်နှင့် အလုပ်ထွက်သွားတတ်ပြီး မန်နေဂျာလီကမူ ယခင်ဘဝက ထယ်ရယ်သေဆုံးချိန်အထိ တစ်နှစ်ကျော်နီးပါးကြာအောင်ရှိနေခဲ့၍ ထယ်ရယ့်အပေါ်၌ အတော်သည်းခံနိုင်ရှာသည့် ကလေးလည်းဖြစ်၏။ ထယ်ရယ်ကမူ ထုံးစံအတိုင်း ရှန်ချွမ်ရွေ့နှင့်အဆင်မပြေသမျှကို တွေ့ရာလူအပေါ်၌ ပုံချတတ်ရာ မန်နေဂျာလီသည်လည်း ခြွင်းချက်မဟုတ်ခဲ့။
လူတစ်ယောက်အပေါ် ရူးသွပ်မှုကြောင့် တန်ဖိုးရှိသည့်အရာများကို ဆုံးရှုံးခဲ့ရသည်မှာ တစ်ဘဝနှင့်ပင်လုံလောက်ပြီဖြစ်ရာ မန်နေဂျာလီကဲ့သို့ သူ့အပေါ်သစ္စာရှိသည့် လူကောင်းတစ်ယောက်အား ယခုအချိန်မှစ၍ ကောင်းကောင်းမွန်မွန် ဆက်ဆံပေးရန် ဆုံးဖြတ်မိသည်။
______ 🚬 ______
"ဝမ်း တူး သရီး ... ဝမ်း တူး သရီး .."
"အဲဒီအတိုင်းပြီးရင် ခြေဖျားမှာပဲ အားထည့်ပြီး ဘယ်ဘက်ကိုနည်းနည်းရွေ့။"
ယမန်နေ့ကမှ ကွာရှင်းစာချုပ်တွင် လက်မှတ်ထိုးပြီး ကွာရှင်းပြတ်ဆဲခဲ့သော ခင်ပွန်းဟောင်းနှင့် နောက်တစ်နေ့မနက်တွင် အတူအလုပ်တွဲလုပ်နေရသည်မှာ အူကြောင်ကြောင်နိုင်သော်လည်း သူတို့အနုပညာလောက၌ အရေးအကြီးဆုံးမှာ အလုပ်နှင့်ကိုယ်ရေးကိုယ်တာ ခွဲခြားထားရန်ဖြစ်သည်။
ထို့ကြောင့် မကွာရှင်းမီကလည်း သူနှင့်ရှန်ချွမ်ရွေ့က အခြားနေရာများ၌ လုံးဝအဆင်မပြေလျှင်တောင် အလုပ်လုပ်သည့်အချိန်တွင်တော့ အဆင်ပြေသည်၊ နှစ်ယောက်စလုံးက အလုပ်ကိုသာအာရုံစိုက်ထား၍ စကားအပိုလည်း မပြောဖြစ်။ မကျေနပ်စရာရှိလျှင်လည်း အိမ်ရောက်မှ ဝုန်းဒိုင်းကြဲ ဖြေရှင်းသည်။
ယခင်ဘဝက ဤအချိန်၌ လူရှေ့သူရှေ့တွင် ပထမဆုံးအကြိမ် ပြဿနာဖြစ်ပြီး အကမကျင့်ဖြစ်လိုက်သော်လည်း ယခုတွင်တော့ ထယ်ရယ်က practice roomတွင်သာ ထိုင်စောင့်နေ၍ ဘာပြဿနာမှမရှာထားရာ ပုံမှန်အတိုင်း အေးအေးဆေးဆေး။
"အိုခေ ... အဆင်ပြေတယ်။ ခဏနားပြီးရင် ထပ်လုပ်ကြည့်။"
______ 🚬 ______
ခဏနားသည့်အချိန်၌ ထောင့်နားတွင်ထိုင်ကာ အမောဖြေရင်း မန်နေဂျာနှင့် စကားပြောနေသူအား ချွမ်ရွေ့ မသိမသာလှမ်းကြည့်မိ၍ စိတ်ထဲ၌ တစ်ခုခုထူးဆန်းနေသလို ခံစားရသည်။ ပုံမှန်ဆိုလျှင် ဂင်မ်ထယ်ရယ်လို အခြေကြီးသည့်လူစားမျိုးက မန်နေဂျာများနှင့် ရင်းရင်းနှီးနှီး မနေတတ်သည့်အပြင် ပရိတ်သတ်များနှင့်တွေ့သည့်အချိန်မှလွဲလျှင် စိတ်လိုလက်ရပြုံးတတ်သည်က အလွန်ရှား၏။ ထို့ကြောင့် ယခုကဲ့သို့ ပါးချိုင့်များပေါ်သည်အထိ ပြုံးနေသည်ကိုမြင်ရသည်မှာ မျက်စိထဲတစ်မျိုးဖြစ်နေ၏။
ထို့အပြင် ယခင်က စတူရီယိုကိုရောက်သည်နှင့် သူရှိရာနေရာသို့ တန်းလာတတ်သော်လည်း ယနေ့တွင်တော့ ရောက်မလာခဲ့။ လက်ထောက်တစ်ယောက်က လာပြောမှသာ ထိုသူရောက်နေကြောင်း သိခဲ့ရခြင်း။ ကြည့်ရသည်မှာ ဂင်ထယ်ရယ်က ကွာရှင်းပြီးသည်နှင့် သူစိမ်းအဖြစ် ချက်ချင်း သတ်မှတ်လိုက်ပုံရ၏။
သူ့ဘက်က ဒီလိုဆိုတော့ ပိုတောင်ကောင်းသေးတာပဲ။ စိတ်ရှုပ်စရာမရှိတော့ဘူးပေါ့။ ရှေ့လျှောက်လည်း ဒီလို ဘာဇယားမှလာမရှုပ်ဘဲ နေသွားရင်ကောင်းမယ်။
"ဆရာ နားချိန်ကျော်နေပါပြီ။ ပြန်စကြတော့မလား။"
လက်ထောက်ဖြစ်သူက အနားကပ်လာ၍ ခပ်တိုးတိုး သတိပေးမှသာ ချွမ်ရွေ့ အတွေးလွန်နေရာမှ သတိပြန်ဝင်လာ၍ နာရီကိုကြည့်လိုက်ရာ ပုံမှန်နားချိန်ထက် ခုနစ်မိနစ်နီးပါး စွန်းနေပြီဖြစ်သည်။
"ပြန်စရအောင်။"
ယနေ့လေ့ကျင့်ရသည့်ကကွက်မှာ အတော်လေး အဆင့်များသည့် footwork တစ်ခုဖြစ်၍ သေချာ အာရုံစိုက်ထားရ၏။ အထူးသဖြင့် အိုင်ဒေါလ်များလို ကကွက်များအား အမြဲလေ့ကျင့်နေစရာမလိုဘဲ တခါတလေ လိုအပ်မှသာကျင့်ရသည့် အဆိုတော်တစ်ဦးအတွက် ယနေ့သင်သည့်ကကွက်များက မှတ်ရသိပ်မလွယ်။
"ခန္ဓာကိုယ်အလေးချိန်ကို မျှခြေထား၊ ညာဘက်ခြေထောက်တစ်ဖက်တည်းကိုပဲ အားထည့်ပြီး ...... "
သင်ပေးသမျှကို အာရုံစိုက်၍ လိုက်ကျင့်နေသူ၏ မျက်နှာထက်ပင် ချွေးစများသီးနေ၍ အသက်ရှုသံများလည်း မြန်နေပြီဖြစ်ရာ ချွမ်ရွေ့ သင်လက်စအား ခဏရပ်၍ ငါးမိနစ်လောက် ထပ်မံအနားယူခိုင်းရန် စဥ်းစားလိုက်သည်။
"ဒီမှာ ခင်ဗျား ..."
ဘေးချင်းယှဥ်ရပ်၍ မျက်နှာချင်းဆိုင်ရှိ မှန်ကိုသာအာရုံစိုက်ကြည့်ကာ လှုပ်ရှားနေသူအား ခဏနားရန်ပြောဖို့အတွက် ဘေးသို့လှည့်လိုက်စဥ်မှာပင် မထင်မှတ်ဘဲ တစ်ဖက်ကလည်း ကကွက်အတိုင်း ဘေးသို့ ခြေထောက်ဆန့်ထုတ်လိုက်သည်နှင့်ဆုံ၍ ခြေထောက်ချင်း ချိတ်မိပြီး အရှိန်မထိန်းနိုင်ဘဲ နှစ်ယောက်စလုံး လဲကျသွားတော့သည်။
ဝုန်း!
"အ့"
" .... "
အာရုံစိုက်၍ ကနေရင်းက ရုတ်တရက်ဖြစ်သွားသည့် အဖြစ်အပျက်များကို ထယ်ရယ် လိုက်မမှီ။ သို့သော် နီးကပ်လွန်းသည့် စီးကရက်နံ့ပြင်းပြင်းကြောင့် သတိဝင်လာသည့်အချိန်တွင်တော့ ခန္ဓာကိုယ်တစ်ခုလုံးက ရှန်ချွမ်ရွေ့အပေါ်၌ ထပ်လျက်သားဖြစ်နေ၍ သူ၏နှုတ်ခမ်းများကလည်း တစ်ဖက်လူ၏မေးရိုးချွန်ချွန်ပေါ်၌ ထိကပ်နေလျက်သား။
သောက်ကျိုးနည်း! ငါ အခု မနေ့ကမှ လတ်လတ်ဆတ်ဆတ် ကွာရှင်းထားတဲ့ ယောက်ျားဟောင်းကို အာဘွားပေးမိသွားတာလား။
________________________
2.12.2023