نوائب_شام
بقلم ايلول 💚
تصويت وتعليق بين الفقرات لطفًا 🦋
""""""""""""""""""""""""""""
هواي أشتاگلها وما اعيش من دونها
و أكبر من مشاكل بيتنا عيونها.
""""""""""""""""""""""
هجــام :: شنووو ؟
شــام :: وكفنا ثنينا اني ورويده شهكنا مصدومين وهو عيونه طلعن بخزر ورويده بس تباوعله فاتحه عينها بصدمة ووجهه صار احمر خازرها وعاكد حاجبة
دخل للمخزن سد الباب ركع ، والباب لان خربان رجع عليه نفتح وهو تخبل يركع بالباب ويضرب بيه مثل المخبل يتعارك ويا الباب وكل هالضرب والباب رجع نفتح وهذا انجن ملخ الخشب يريد يشلع الباب
لزمته رويــده من كتفه دفع ايدها والتفت عليها سحبها بنتر كعدها وهو واكف كدامها التفت عليَ رأسًا كعدت بلعت ريك بخوف ورويده مدنكه راسها ساكته مد ايده على فكها رفع وجهه
- عيدي شنو حجيتي
- هجــام
- نعلعله روحه لصخام عيدددي عيددددي عيدددي الحجيتي
- صوتك لا تشمتهم بيه
غمض عينه وافتر بحيرة رجع كعد كدامها صار انصى منها خله ايديه على اركبها ورفع راسه يباوعلها هي كاعده على الاغراض گالها
- عيدي وفهميني
- بدون عصبية واني احجيلك
وهو بأثنين ايديه غطه وجهه بس بقوة متحركن ويفور رجع هز راسه الها اي باوعت بوجهه وحجت بهدوء
- طلبت من يُســر يجي يخطب أفاطم لان ابوي كلش ظلمها والبنيه حتى كامت ما تدافع على نفسها اريدها تخلص وتعيش مرتاحه واعرف يُســر ما يقصر
- لااا لاا ما عليَ بهالحجي انا ما عليَ احجي السالفة كامله
تحسرت رويــده تمسح بوجهه ونزلن دموعها تباوع لوجه وهو منتظر بس يريد تنطق كالتله بحسرة
- شنو التريده
- سمعتج كلتي احب يُســر ؟؟؟؟؟
هزت راسها اي ودموعها عشرة عشرة دار وجهه اعصاب ويرجف رجع باوعلها رفع نفسه مسح دموعها وحجه بسرعة
- بينكم شي ؟
باوعتله رويــده فاتحه عينها بصدمه وحجت بقهر
- اني رويــده هجــام رويــده الربيتها على ايدك لا تفكر اسوي شي ينزل راسك ، كل البگلبي مشاعر قديمة وبقت بگلبي وأنتهت ، طلبت من عنده يخطب أفاطم لا اكثر ولأ اقل
سكت يباوع لعيونها وهي من كد ما تركز بعيونه حتى ما ترمش لحظته حتى ويا رويــده كون من تحاجي عينها بعينه سحبها الصدره حضنها وهي نفجرت تبجي بصوت وتهمس بخنك
- لا تشك بيه اموت
وخرها من حضنه مسح دموعها وگالها
- غاثج بشي يُســر ؟
-لااا
- لا مبين صاير شي قاهرج ؟
- لا هجــام لا يُســر صاحبك وتعرف تربيته وشهامته والله نظرة ما يباوعلي ، ابن خالتك وانتَ أكثر واحد تعرفه .
- يدري بيج يعني يدري صخام
نتر بعصبيه :: يدري تحبينه ؟
هزت راسها اي صفن بحيرة كالها
- يدري وجاي يخطب أفاطم ؟
- اني طلبت من عنده
- وليش هيج تضحين ؟
- اختي أولى من گـــلبي .
- لااا لا هو مو هيج الموضوع اكو اكثر انتوا رايدين بعض وسوالفكم عشك بس ما تردين تتزوجين لان انا مريض مو ؟ البعمرج تزوجن بس انتِ باقيه علمودي ؟
مسحت دموعها ومدت ايديها حضنت وجهه
- انا روحـــي وعمري يرحن فدوه لسنينك بس صير زين وخلي اخلص عمــري مكابلتك كلشي ما اريد
- عوفيني تزوجي انتِ تحبين لا تضحين كافي
- لو على كص رگبتي يا هجــام ما عفتك يا زواج هذا يا حب ما رايده من الدنيا بس انتَ
حضنها حيل يريد يدخلها لضلوعه اباوع الايده ترجف ورويده بس دموعه تنزل رجعت منسه صعدت من لكت هجــام سكتت خايفة وهو بس يباوعلها باوعت لرويده كالتلها
- امي تگول انزلي الاخوالج
حجت وراحت ركض تنزل وكف هجــام يباوع لرويده بحيره گالها
- اذا خطب أفاطم اكتله
- هجاااام
- اششش لا طلبتي منه ولا صخام خلي يخطب افاطم وعاتبيني اذا ما ذبحته
حجه وطلع ورويده تخبلت تبجي وتضرب على خدها كعدت يمها الزم بأيدها
- رويــده غلطتي ترا اذا يُســر خطب أفاطم حتى ما يكسر بخاطرج راح يظلم نفسه ويظلم أفاطم اكثر من ما هي مظلومة وبعدين انتِ عاقلة ؟ أفاطم تدري بيج تحبين يُســر وتدري بيه يحبج شلون راح تقبل ؟
بقت تبجي واجت زهراء تنتر شلون تاخرت وما نزلت
رويــده :: مسحت دموعي وكمت اريد انزل طلع هجــام كدامي يباوعلي بزعل سبقني ونزل بخطوات سريعه باوعت الشام نزلت وياي وتلكتنه سجود
- ها شعدهم لافين علينا اليوم
- بيت ابن خالتهم يجون شوكت ما يعجبهم
اجت بحرگة گلب تريد تمد أيدها علي دفعتها اتلفتت تباوع للباب خاف يرجع هجــام كالت
- اسودنجن والله اسودنجن
عفتها ودكيت الباب على افاطم فتحته ورجعت للچرباية كالت شــام
- بدلي وروحي سلمي راح احضر الماي والچاي
هزيت راسي موافقة هي طلعت واني طلعتلي ملابس أباوع الافاطم ساكته بدلت ورجعت يمها باوعتلي وهمست
- شنو صاير رويــده
بلعت ريك محتارة هزيت راسي ماكو شي وتقربت كعدت يمها جانت جنها شمس وهسه انطفت خليت أيدي على خدها
- أفاطم اني ما اعوفج ابد
- ادري بيج
- ارجعيلي مثل اول ما اجيتي ، هاي شام مثلج اول ما اجت قوية وراها تعبـــت وضعفت وراها رجعت قوية ما استسلمت
- اني اندفنت ويا اخويه روحـــي ماتت ويا رسول تستوعبين المر عليَ احترك بأيدي ماكدرت اطفية
حجت ودموعي ودموعها نزلن نفس الوكت شهكت تهمس
- كل يوم اشوفه كل ما اغمض عيني يعاتبني ليش ما طفيته ليش ما احتركت ويا ليش ما حميته ، احلم بأمي تگلي انتِ مو گد الأمانة
متحمله اشوف سجود تفتر كدامي واني ادري بيها هي الحركته كل يوم اشوف القتلت اخوي كدامي تفتر رويــده كدامي
سحبتها الحضني ابجي
- رب العالمين راح ياخذ حق الكل منها
-ههههه شوكت صار سنين ظالمتكم ويوم عن يوم تزيد
- قال تعالى::(( اللَّهُ يَسْتَهْزِئُ بِهِمْ وَيَمُدُّهُمْ فِي طُغْيَانِهِمْ يَعْمَهُونَ ))
رجعت تضحك وخرتها من حضني مسحت دموعها وطلعت للديوان الخارجي گـــلبي يدك حيل ومرتبكة اول ما فتحت الباب صار بوجهي هجــام مبتسم باستهزاء يباوع الابوي باوعت الخالتي
-السلام عليكم
حجيتها ودخلت سلمت على خالتي باوستها وكمت التفتت خايفه اخلي عيني بعين يُســر رفعت راسي على صوت موسى وضحكته
موسى:: لك لك هاي منو الصاير يطك بالگاع
ابتسمت وهو بسرعة تقدم ماد أيده ويضحك واني اباوعله واباوع الهجام الخازره وموسى ما مهتم من ما مديتله ايدي جراني غصب عبر أيده فوك راسي وعصر وجهي يحجي بضحك
- بنت الأوادم مشتاقتلج وعلي
يُســر :: موسى
- حجه الشيخ
وخر موسى هجــام ويسر يردون ياكلونه وهو يضحك باستفزاز يدري بيهم ما يقبلون بس هو هيج يشاقي ويختلف عن يُســر وعن اخوهم الأكبر
- هلا بيج رويــده
رفعت عيني باوعتله ودنكت بسرعة رجعت كعدت يم خالتي ، ابوي يسولف ويا يُســر ويسأل
كالت خالتي :: شلون صارت غــزل
- زينه الحمدلله
- سوده عليه مالحكت اروح أشوفها بعد ، موسى ودراسته ماكدر اعوفه
باوعتلها ساكته وكلبي تفتت من ابوي كالهم بضحك مكيف
- تتغدون يمنا لو ترحون حتى نحضر
يُســر :: لا عمي جزاك الله خير نروح ان شاءالله
سكتت اباوع الهجام متحركن خاله كالتله
- يمه هجــام تعال يمي
باوعلها وكف أعصاب كعد يمها مضيك عينه يباوع لعيونها مدت ايدها الوجه نزلها هستوها تريد تحجي وكالها
- ليش ما تروح للطبيب ما كافي ليش يمه
خله خاله فاتحه حلكها لا هي حاجيه ولا هي ساكته عاف ايدها بحضنها وكالها
- حفظتها ماكو داعي تعيدينها
- غير علمودك يا خاله
- اشكرج
يُســر :: يمه
باوعتله خاله وسكتت ضايجه وهجام كام وكف فتح الباب وبقى واكف يمه الحد ما بدأ يُســر يحجي واني عركت وكلبي حسيته راح يوكف ويا كل كلمة يحجيها اباوع الهجام وهو يباوعلي متحلف ويسر ما خله حديث وايه عن اليتيم والظلم ما حجاها وابوي يكله اي والله صدقت
يُســر :: المهم عمي احنا داكين بابكم وأتمنى ما تردونه ما الكه الموسى أحسن من نسبكم وعرفت عندك بنيه صغيرة
حجاها وباوعلي واني احس اذني تصفر ودكات گـــلبي تضاعفت وموسى يباوعلي ويهز براسه مضيك عينه ويسر كمل كلامه يباوع الهجام
- وأتشرف اناسب هجــام برويده
فتحت عيني جامده وهجام ضحك يهز بأيده يبس الدم بجسمي احس رجلي انتهت بعد ما اكدر اكوم وابوي گاله
- لا لا اني منطيكم رويــده الك وغزل الموسى
هو حجه وهجام تخبل يريد يطكه ويسر كوه لازمه وهجام يصيح
- هو انتَ منو وتنطيهن ؟ تلعب بكيفك؟ حلكك وحلك الخلفك اشكه
وابوي يصيح على يُســر
- ترا هاي كلهم هيج ثلاثتهم مسودنين هاي اخواته هم مثله لا عبالكم ، اي انا اكلكم من هسه مو بعدين تكولون غشيتنه
وهو فرفح بس يريد يلزمه دفع يُســر حيل يصيح بوجه
- وخرررر
- كااافي شبيك تخبلت شوية احترم خالتك كاعده
باوع الخاله وكالها
- خاله كومي اوكفي
موسى :: هجــام ما يصير هيج خلي نتفاهم هسه شبيك معصب
- غــزل حتى ببالك لا تخطر
موسى:: يابه هسه ياهو الجاي على غــزل صدك جذب مكرود يا موسى
يُســر :: بالله العظيم فلا تنطي مجال وتخلي الواحد يحجي هجــام هيج هيه شنو فلمك ؟
رجع هجــام ليورا يفتر بعصبية كعدوا يُســر وموسى كال يُســر
- عمي احنا جايين على رويــده وافاطم ، تنطي خير على خير ما تنطي كول كوموا روحوا الاهلكم
- انطي انطي بس انا بناتي عزيزات مهرهن غالي
- سهله يابه سهله ، ها هجــام شتكول انتَ ؟
رفعت عيوني الهجام اشوفة يباوعلي ساكت فرك وجهه باوع اليسر گاله
- بكيفها .
ويسر هز راسه موافق وخالتي بس تتحسر واضح وضوح الشمس ما قابلة يُســر گاله
- عمي أخذ رأيهم وشوف شنو ردهم
وكف ابوي وهو يأكد على موافقتنا بس التفت يُســر الي خزرته كل عقلك أقبل كل عقلك ؟ اني بيا حال ، كمت ويا ابوي طلعنا وهجام وراي يمشي ويسر وموسى وخاله طلعوا للبستان
دخل ابوي يصيح على افاطم وسجود تكله
- ارفض شني تطي أفاطم ؟
- سدي حلكج خلي أفتك
سكتت من دخل هجــام تربع وكعد على الدرج مخنزر وشام تباوع بخوف دكيت الباب على أفاطم وطلعت مجلبه بيه كالها ابوي
- ابن خالة رويــده اجه عليج وانطيتج
باوعتلي وباوعتله ساكته رجع باوعلي كال
- وانتِ كون عندج اعتراض ؟
بلعت ريك باوعت الشام والهجام مسحت وجهي وكتله
- اي عندي ما قابلة
- شني ما قابلة انتِ متعافيه
هجــام :: اشششششش من تحجي وياها نصي صوتك ، بكيفها تقبل ترفض بكيفها
وابوي تخبل من ماكدر يحاجيني يريد يطلع حركته بافاطم البقت ترجف وتصيح
- ما اتزوج اني ما اريد ما اريد ما اتززوج
صرخت حيل وهو يريد يضربها دخلتها للغرفة سدت الباب تبجي باوعت الهجام متحركنه ابوي أعصاب ويصيح على افاطم
هجــام :: تنصي صوتك لو شلووون ، ما يردن هاي هيه
- مو ولد خالتك ما تستحي يرجعون فارغين ؟
- لا ما استحي ، أستحي اذا اجبر وحده منهن على شخص ماتريده
سكت ابوي بحيره يفتر يريد يدخل الافاطم بس خايف من هجــام دكيت الباب عليها واجت شــام وراي دخلت يمها ترجف كلها حضنتها وكعدت
- ليش ما تقبلين أفاطم ؟
- ما اريد رويــده أنتحر والله
-بس كليلي ليش
- ما اريد إطلع من هالبيت
- ليشش ليش هو اني بس اريد اطلعج منا
- والله وروح رسول اذا حاول ابوي يجبرني أنتحر واخلص
لميتها بحضني ارجف
- لا هاي هي هاي هي ما بلازم
راح ابوي حتى يكلهم رفضنا خجلت اطلع واباوع بوجهه يُســر هسه شيحجي وشيگول عليَ رجع ابوي ينتر كال
- تعالي وياي هم اخوالج لو اخوالي
مسحت وجهي وطلعت وياه للديوان دخلنا مدنكه كالهم ابوي
- بنات متعافيه شنسويلهم
يُســر :: كلهن خير وبركه
- لا والله متعافيات ما يردن وهذا المسودن واكف وياهن حسره افك حلكي واحاجي وحده ولنه جار ساطوره وجايني يبوي واني مالي حيله وداعتك وداعت شيباتي لو علي اكبعهن واطيكم
مدنكه ساكته وفزيت على صوت موسى وهو يگول ويجر الكلمة جر
- ايا ادبسززز
موسى:: نصدمت بالرفض وانا نافخ روحـــي على يُســر صارله شكد يتوسل ويقنع الحد ما كال بنيه يتيمه وتنضرب وبس تعقد عليها تنازلت وعبالي راح تجلب بيه باوعت اليسر خازرني بس بعد الضحكة ما تنلزم طلعنا من يمهم بس صعدت بالسياره ضحكت
-ارتاحيت أستاذ يُســر وعلي والله فشله اجينا على أثنين ورجعنا ولا وحده
- سد حلكك وحك هو الكفل زينب انزلك بالشارع واروح
-اجي عبرية وعلي
كالت امي
- يُســر كون من هاي وترد ارتاحيت هسه مو كتلك عوف هالسالفة عوفها
"""
رويــده :: سالفة وصارت بحلك ابوي شيخلصها طول اليوم يحجي ويغلط حد الليل دك تليفوني ورجفت من عرفته يُســر باوعت الافاطم نايمه جاوبته اهمس بصوت ناصي وهو ساكت
- راح اروح
- شنو هالتصرف ؟
-شنو ؟
- رويــده ليشش رفضتي ، واختج هم رفضت
- ما حسبالي راح ترفض توقعت تفرح لان تخلص بس ما قبلت
- وانتِ
-جوابي تعرفة من الاول
- اجيت الباب بيتكم وطلبتج بالحلال شلون انطاج كلبج ترجعيني ؟
سكتت اعض بشفتي گـــلبي متملخ وهو أعصاب وينتر ومن بقيت ساكته سكت وحجه بهدوء
- حرام عليج
-شمسوية ؟
-موتيني
-يُســر
سكت مختنك ويكح مبتعد شوية ورجع للتليفون يحجي بتعب
- ها وياج
-شكرًا لان حاولت تساعدني وتخلص أفاطم واسفه لان هي رفضت ما توقعت ترفض
- وانتِ وانتِ ؟
- مو الك
-رويــده ، استغفر الله يا اللهي ، مو أعتذرت شنو تردين اكثر كتلج تسرعت وغلطت
- ما يفيد شي بعد اني باقيه ويا هجــام
- اذا رحت ما راح ارجع بعد حتى لو نفسي بيج
- ما منتظرتك ترجع ، مع السلامة
حجيتها وسديت التليفون حضرت رقمه مختنكه بس لازم أتصرف هيج .
شــام :: فرشت فراشي ورا الباب كلش ما اريده يرجع يجي واستسلم من كد ما مشتاقتله باوعت الاصابعي بعد أسبوع وافتحهن كثرن اثار هجــام بجسمي الوشم الجرح الكسر ابتسمت متحسرة
سحبت الايباد بقى يمي درست عليه شوية وعفته تغطيت بجرجف لان الجو بدأ يحتر والمخزن مابيه لا سبلت ولا مبرده غمضت هستوني غفيت واحس الباب ندفع بهدوء فزيت وما تحركت من مكاني وهو من حس اكو شي ساد الباب بعد ما دفعه بقوة بهدوء يدفع الباب بس يحاول يفتحه واني ارجع بجسمي على الباب مانعته ينفتح
گـــلبي متگطع مشتاقتله حيل وزعلانه منه حيل حسيت بيه كعد ساند ظهره على الباب لان بعدني احس بالباب بس اوخر منه يندفع وينفتح
-بس ردت اشمج الهواء ضاك بصدري
اسمعه يهمس واني خانسه وكلبي يرجف مديت ايدي على الباب لزمته وكعدت سندت ظهري عليه مغمضة عيني بلعت ريك ارجف ويا كلماته
- لا تجيني وتتعبين انا الاجيج
لا تحبيني وتتعذبين انا الاعشگج
يابه شسوا بيه كوه لازمه نفسي وما افتح الباب رجع همس
- حتى وانتِ نايمه نحرمت منج
حجاها وحسيت الباب رخه وصوت باب غرفتة انسد راح سحبت فراشي مبتعده من الباب ضميت وجهي بالمخده ابجي متگطعه ردت بس ارجع انام ما كدرت سمعت باب غرفتة رجع نفتح بسرعة كعدت اباوعله من الكسر الي بالباب راح الغرفة ملاك گـــلبي وجعني عليه
انتظرت انتظرت ردت بس يرجع الغرفتة واطمئن أكثر من ساعة مرت يله سمعت باب غرفة ملاك نفتح خنست اباوع بخوف مشه بهدوء الغرفتة تنفست براحه رجعت لفراشي يمكن عشر دقايق ونفتح باب المخزن فتحت عيني على وسعها كاتمه نفسي بأيدي نسد الباب
وحسيت بيه تمدد ورا ظهري سحب الجرجف بهدوء تغطة وياي لاول مره البس اتراك من الانطتهم الي رويــده جلبت بالجرجف ما اريد يرفعه ويشوف شي رغم المخزن أظلم وهو يحاول ما يفززني غمضت عاصره عيوني بقوة من حسيت زندي طخ بصدرة هدئ على غفلة مستغرب
ومد ايده برخاوة اصابعه يرجفن مشاهن على زندي يتحسس بشرتي بهدوء رجف كل جسمي وخفت يقشعر جسمي ويحس بيه كاعده وخر ايده وحسيت بثگل راسه بصف راسي يشم شعري ويهمس
- ما كادر على بعدج بس تعز عليَ اذيتج
صوته همس يريد يقترب وما يريد احس بيه حسيت بيه عبر ايده يحضن بدون ما يطخني ورجع وخرها محتار شلون يقربني اله بلا ما يفززني واعرف بوجوده حسيت خصلات شعري بأيده يقرب وجهه منهن يشمهن وحسرته تهد الحيل
- يا ريت ما تفزين واحضنج شلون ما اريد .
حجاها وطبع شفافية على زندي ونفسه الحار يطخ ببشرتي كعد على حيله ودنك الايدي بهدوء باس اصابعي المكسورات
ورجع تمدد ورا ظهري ما مرتاح حاير شلون يلمني بحضنه نفسه عالي احسه يحارب روحه وما كدر ، ورا إذني باسني حيل ما مهتم اذا افز او لا حجه بغصة
- لميني الحضنج تعبـــت ببعدج
واني ساكته بس دموعي تنزل خانسه خله وجهه بركبتي
ابتعدت ونگلبت الجهته رجع راسه على المخده نايم على ظهره
- ليش اجيت هنا ؟
بقى ساكت مديت ايدي على صدره اسحب الجرجف من عنده لزم أيدي واخذها بهدوء الرگبته على النبض غمضت عيني مقشعر بدني من دفوا جسمه همس صوته رايح
- شومه
بلعت ريك متوتره حركت أصابعي على رگبته زفر نفس براحه واني باطراف اصابعي اتحسس بشرته همس
- صار يومين ما كادر أنام واذا ما نمت اتعب حيل أتعب
- ليش ما تنام ؟
- اريدج شــام حيل اريدج
- انت العفتني
- اي انا ، كل ما تجين يمي يصير بيج شي اخاف عليج حيل أخاف
نگلب على جهه مقابيلي صار ورفع ايدي من رگبته الاذنه وشعره
- شومه
- همم
- لا تكرهيني .
يحجي وصوته رايح حركت ايدي على شعره وتلمست إذنه تحسر
- ما اكرهك هجــام اني روحـــي بيك
- حضنيني عفيه
حجاها يتوسل مسحت دموعي ورجعت نمت على ظهري تقرب خله راسه على صدري حضنته باثنين ايدي بسته بشعره
- احبنج شومه
- آمم الصبح تروح وتنسه كلشي حجيته
- اممم انتِ هم إنسي
- خوش ،
سكت حاضني بقوة ونفسه من يزفره احس بيه على رگبتي شوية وحجيت بهدوء
- هجــام
غافي وفز همس
- همم
- هيج ، نام
ثگل نفسه واني رغم ما مرتاحه بنومتي غفيت وفزيت من أنفتح الباب مالكيته يمي باوعتلي رويــده كالت
- خفت عليج لان ما نزلتي
كعدت على حيلي اعصر براسي
- بيش الساعة
- بالتسعه
- هجــام وين ؟
- بغرفتة
تحسرت ساكته نزلت ويا رويــده لعبانه روحـــي من سجود وهي بس تحجي وافاطم تباوعلها بابتسامه وهذيج تتخبل شلون هيج تباوعلها شوية واجه عمو حيدر صاحوا على چاي سويتلهم نطيته اله گال
- رجلج وين ؟
باوعتله متوتره همست :: بغرفتة
ضحكت سجود تهز بأيدها وهم ثنينهم باوعولها كالتلهم
- هي كبل لا يتزوجها عاشت بغرفته ومن تزوجها شمرها بالمخزن
باوعلي عمو حيدر بعصبية گال
- صدك ولج بعدج تنامين بالمخزن
التفتت اباوع لرويده نظراتها الي بقهر رجعت اباوع العمو حيدر هزيت راسي اي
- عمو عندي دراسة لازم اكعد وحدي
- نجبي ملطلطه يضحك علينا لا خلانه نزوجها ولا هو متزوجها
سجود :: هههههه جا هوه دوم يضحك عليكم
يحجون وينترون باوعت الرويده صعدت فوك شوية ونزلت وهم بعدهم يحجون بنتر نزل وراها هجــام بس بالبنطلون كعد على بايات الدرج يباوعلهم مضيك عينه كاله عمو حيدر
- طلكها انا اريدها الولدي شكو شامرها بالمخزن
- اي وبعد شتريد ؟
- هجــام لو تحجي عدل لو ترجع منين ما اجيت ، اذا ما تريدها ليش تزوجتها المن عايفها بالمخزن تكش ذبان
- اي كثران ببيتي لازم واحد يكشه
وعلكت بينهم ورويده ترجف خايفه على هجــام الي اول مره يحجي ببرود باوعلهم يضحك كالهم
- البيت بيتها تكعد بالغرفة التريدها
سكتوا خازرينه شوية وراحوا وهو رجع الغرفتة كالت رويــده
- تعالي نخابر غــزل نحاجيها شوية وروحي ادرسي
هزيت راسي موافقة دخلنا يم افاطم تتصل على غــزل ما ترد تنطيها رفض ورويده تخبلت
غــزل :: مسحت دموعي ميته قهر مخلصتها بجي صار يومين بس انتظر تروح مال البجي من صوتي واجاوب رويــده رفضتها مرتين وراسلتني معصبة كتبتلها
- اوكفي هسه ارد
- شلعتي گـــلبي
- جاي ادرس
- مو خلصتي ؟
- اي بس هيج زياده هاي
- غــزل ردي احاجيج
رجعت إتصلت جاوبتها مالي خلك شي وهي ما مرتاحتلي كوه عافتني وسدته قفلت التليفون وكمت على العكازات طلعت من الغرفة حيــادر عنده دوام وبس اني بالبيت دخلت للمطبخ مخليلي ريوك ومغطيه كعدت اكل ودموعي تنزل مقهورة ومفرفح گـــلبي فززني صوت التليفون
كمت بهدوء وعلى ما وصلته المكالمه مخلصه بس لزمته رجعت اتصلت ايه كعدت على الجرباية وجاوبتها تنتر بصياح
- اني شكتلج ؟ ولج شلون ما تردين صار يومين اتصل حيوانة
- انجبي انتِ الحيوانه
- غزززل هاي وياي ؟ اذا ما طيحت حظج اني مو ايه
- انتِ شتردين من عندي ؟ والقرآن احجي الحيادر كلشي واكله حامل وتريد تخلي الطفل براسك أسوي مثلج انتِ مو صرتي حقيرة اني هم اصير حقيرة
سكتت واني امسح بدموعي واحجي مختنكة سدت التليفون بوجهي ووصلني رسائل وحده ورا الثانية دخلت عليهم وفتحت عيني على وسعها گـــلبي حسيته يدك براسي مصدومه ، اگلب بالصور وارجف اول ما نكسرت رجلي واني نايمه بالسدية حيــادر نايم بصفي ووجهه يم رگبتي وصورة ثانية نايم على الكرسي وراسه على السديه وايدي يم شفته
كاتبة
- خوش حجي هاي الصور راح يوصلن الهجام
بجيت ارجف اكتب وما اسيطر على ايدي
- اوكفي اوكفي ايه شنو تردين
- ما اريد شي هاي هيه
- اذا تحبين الإمام العباس لا تدزينهن حرام عليج والله حرام
- نجبي لج دروحي صرتي شريفة هسه قبل شوية تغلطين
- جا حركتي گـــلبي .
- انعل ابوج لا ابو كلبج حيوانه تسوين الاكوله لو شلون
بجيت محتارة وميته قهر كتبتلها اي وابجي بصوت عالي كالت
- كليله احب اريد اتزوج طلكني وخابري اهلج يجون ياخذونج واسلام راح يجي يخطبج
- ما ارررريد اسلام
- لو تموتين ما تلكين واحد يحبج مثله شنو تردين عيني ؟ شخصية وفلوس ودارس ويحبج شو تتمضيكين انتِ
- مو حيــادر هم هيج وانتِ ما ردتيه اني هم ما اريد اسلام شنو بكيفج هيه انتي شعليج اني ما اريد أتزوج هسه يفك العقد واخذيه وفكيني منج
- لا حبيبتي لا ، تكليله أريد أسلام بالحرف الواحد وإسلام يجي يخطب حجي زايد ما اريد والا والخله هالحمل ببطني أوصل كلشي الهجام والعب بيكم لعب خاف عبالج ما ادري باخوج صاحب سوابق ، كلشي ادري واعرف بمجرد يدري بحيادر عاقد عليج يقتله ويرجع للسجن
نكتم نفسي اشهك ايدي على حلكي سدت التليفون بوجهي بجيت روحـــي رايحه اني حماره اني ما اعرف أتصرف شجابني هنا شورطني وينج رويــده تعالي وانتِ حلي الطحت بيه
تعبـــت
مسحت دموعي وكمت غسلت كعدت بالصاله صافنه بالفراغ
اذا احاجي هجــام راح يسمعني احجيله كلشي وهو يفهم ليش هيج سويت ، لااا ما احجي هو شاف أسلام لازم الكرسي مالتي كسره اذا يعرف حيــادر متزوجني يذبحه
ضميت وجهي بأيدي ورجعت ابجي مفرفحه الحد ما سمعت باب الكراج نفتح مسحت دموعي بسرعة اباوعله دخل سلم بهدوء باوع الرجلي رافعتها على الطبله باوع الوجهي يسأل
-شنو توجعج ؟
هزيت راسي لا سكت فات الغرفتة بدل وصلى واجه يمي للصاله شال التليفون ويحجي بدون ما يباوعلي اتملخ من يعاملني هيج كال
- شنو تردين غدا ؟
بقيت ساكته عيوني مليانه دموع رفع رأسه باوعلي تحسر عينه بعيني عاف التليفون واجه كعد يمي سحب راسي الصدره بجيت مغطيه وجهي بايدي
- ليش يا روحـــي ليش هالبجي والله تعبتيني
- طلكني عفيه طلكني
وخرني من حضنه لزم وجهي باديه مسح دموعي بابهامه
- بس كليلي ليش دتموتيني بهالكلمه
شهكت مختنكه
- ما اريد
رجعني الحضنه حيل حاضني باس شعري يحجي مختنك
- كل هالبجي علمود العقد
هزيت راسي اي وخرني من حضنه وحجه باصرار
- ما اكدر اذا طلكتج ما يصير نبقى نفس البيت
بلعت ريك مسحت دموعي اباوع لوجهه وهو لام شفته الداخل حلكه حجيت كلمة كلمة واحس نار تطلع من گـــلبي
- انت كلت من تردين تتزوجين اطلكج ، أسلام راح يروح الهجام حتى نتزوج بعد طلكني انتَ
فتح عيونه بصدمة وكف مبتعد عني افتر بالصالة ورجع كعد لزمني من اكتافي بقوة شهكت ابجي كال
- شعندج وياه ؟
هزيت راسي لاا
- ماعندي شي والعباس
- غــزل احجي سولفي
- هو يحبني وانا اريد اتزوجه
رفع ايده غمضت عيني خايفة يضربني لماها وعضها حيل شايطة روحه كال
- هجــام مستحيل يقبل ينطيج الإسلام
- معليك انتَ
وهذا ثاني كلام من عندي يصدمة عاف البيت وطلع بجيت الحد ما ورمن عيوني ونمت واني على القنفة فزيت على ايده يتلمس بشرتي فتحت عيوني اباوعله كاعد بالكاع مقابيل القنفة النايمه عليها وايده على خدي نزلها الحنكي
- كعدي اكلي
كعدت على حيلي كمت غسلت وهو يباوعلي رجعت للصالة قرب الطاولة الي همست
- ما اريد
شمر الخاشوكة محتار تنفس بغضب
- شتردين ؟
- فك العقد
- اطلك بس عوفي أسلام
- حيــادر حباب ما عليك بيه بعد بس عوفني
لم شفته الداخل حلكه بقهر رفعت ايدي امسح دموعي حجه بخنگه
- هاي هي بس لا تبجين والتردينه يصير
حجاها وطلع من الصالة غطيت الاكل وعفته بمكانه كمت اريد اشوفة وين لكيته بالكراج كاعد يدخن ويصفن بحيرة رجعت للغرفة ايه تتصل رفضتها وكتبتلها رسالة
- ارتاحي قبل
- هههه غصباً عليج وعليه ، بس لا تخافين تتزوجين أسلام وترجعين البغداد نرجع صديقات
- والله اصادق احماره من الشارع وانتِ ما اصادقج
- ايا حماره سهله اني اعرف شلون تتأدبين
- نجبي يله بعد ما اغلط عليج
- سهله غــزل سهله
اوووه شمرت التليفون ابجي شكد حقيرة مسحت دموعي من حيــادر صاح
- غــزل تعالي اكلي مردتي گـــلبي ترا
طلعت من الغرفة احجي بدون ما اباوعله
- ما اريد شبعانه
هز رسه موافق وشال الاكل مثل ما هو رجعه مشيت ورا للمطبخ
- حيــادر شوكت تفك العقد ؟
سكت منطيني ظهره تحمحم وحجه بقهر
- باجر أجيب السيد يفكه على كولتج
رجعت للغرفة گـــلبي متگطع أتمنى اكدر اكله والله اني احبك ما اريد تفك العقد بس ايه خبيثة تهددني بس مجرد امنيه ما اكدر اسويها واحجي اخاف حيل اخاف تحجي كلشي الهجام ويكتل حيــادر ويرجع ينسجن لو يروح للمصحه ما طلعت من الغرفة بعد ثاني يوم هو راح للدوام وايه رجعت تتصل سويته صامت واشوف رسائلها من برا دزت صوره دخلت عليها
داخله على رقم هجــام مختارة الصورة البيها اني وحيادر بس ما دازتها ماخذه سكرين ودازته الي كاتبه
- غلسي على اتصالاتي وشوفي شيصير
رجعت اتصلت احس گـــلبي خلص وكوه احجي
- شتردين ايه
- خلصيني تطلكتوا
- من يرجع من الدوام يروح يجيب السيد
- صلوات ، شوكت ترحين الاهلج ؟
- باجر
- هو ياخذج ؟
- اي
- عكب باجر اسلام يجي الاهلج يخطب
- تف عليج الحقيرة الحيوانيه الحماره الجلبه كل الحيوانات انتِ امداج امداج الف مره امداج شكد اغلط عليج احس بعد اريد اغلط
ان شاءالله يا رب يجي واحد يهددج مثلي
احجي بحركه وابجي وهي تضحك كالت
- والله ربي شاهد احبج بس انتِ تجبريني هيج اسوي
حجت وسدته بوجهي كمت مختنگه دخلت الغرفة حيــادر ودموعي على خدي فراشة مخربط عدلته واباوع الاغراضة شي شي طلعت من الغرفة للمكتب كعدت بمكانه المحبس مالته عايفه بصف الابتوب قلم ودفتر ملاحظات مفتوح باوعت بيه عباره عن جداول امتحانات وخطط دراسة
خليت المحبس بايدي يطيح عفته سحبت دفتر الملاحظات رحت للصفحات الاخيرة الفارغة اخذت القلم گـــلبي يدك حيل وكل حرف تخطه ايدي طالع من نص گـــلبي كتبت بايد ترجف
- احبك بس انتَ والعباس اني ما احب اسلام احبك انتَ حيــادر
باوعتلها ودموعي تنزل سمعت صوته وكفت بخوف ضغطت على رجلي حيل بلغلط شاطت روحي كتمت صوتي. وشكيت الورقة خايفه عصرتها حيل بايدي وافتر اريد اعرف وين اوديها شمرتها ورا رفوف الكتب المرتبهن هو. ونفتح باب المكتب
التفتت عليه عركانه ومتوتره عكد حاجبه يباوع الحالي ويباوع للعكازات واحد بأيدي وأحد بالگاع دنك شاله من الگاع خلاها بايدي ستندت عليها هز راسه شكو
- ماكو شي
- شتسوين هنا ؟
- هيج ضجت واجيت اباوع بكتبك
هز راسه موافق ذب نفس بحسرة باوع بعيوني مركز بدون ما يرمش واني احس ما اريد اشيل عيوني اريد احفظ لون عيونه زين بلع ريك حجه بصوت ناصي والكلمه كوه تطلع منه
- البسي شي وتعالي وياي
رمشت بثگل دك گـــلبي بخوف
- وين
دنك متحسر فرك وجهه ورجع باوعلي ابتسم
- تخلصين من عندي حتى بعد ما تبجين جبت السيد يفك العقد مثل ما تكولينها انتِ
شهكت شهكه احسها زرفت گـــلبي ورجفت شفتي باوعلي باستغراب دنكت دموعي يطيحن وحده ورا وحده صاح بقهر
- موتيني غــزل موتيني شنو التردينه
هزيت راسي ماريد شي وفتت من يمه دخلت للغرفة مختنكه گـــلبي راح يوكف النفس كمت كوه اسحبه لبست بشت وايدي ترجف من التوتر والعصبية سحبت الشال ورجعت ليورا نضربت رجلي المكسورة بحافة الجرباية متت صيحت ابجي وكعدت على الجرباية
دخل خايف واني بدون ما يسأل شكيت
- رجلي طكت بالجرباية
مسح عليها باثنين ايديه يحجي بتعب
- غير تنتهين شبيج ليش توجعين روحـــي عليج ليشش
هو يحجي واني ازيد بالبحي كال
- هالكد توجعج كومي اخذج للمستشفى
مسحت دموعي بظهر ايديه
- لا ما توجعني صارت زينه
دنك رفع شالي من الگاع واجه يمي هو واكف واني كاعده على الجرباية وماده رجلي خلاه على شعري ضم الشعر الطالع يحاول يلفه عدل مسح عيوني ورفع وجهي ليفوك باوعتله اشهك بلع ريك ايديه الحاضنات وجهي وحده منهن نزلت لشفتي تحسسها باصابعة حسيت ببطني تشنجت رفع عيونه لعيوني همس بصوت ناصي
- راح اطلكج بعد ما اكدر الزمج هيج .
هزيت راسي اي وهو بين ايديه رجع عينه الشفتي تحسسها بين اصابعه من جديد وجهه صار أحمر وعرك
- غــزل أسف بس اذا عفتج بهالحظه أبقى متندم طول عمــري
حجاها ودنك بسرعة شهكت فاكه عيني على وسعها من خله شفته على شفتي يبوسني واني بس فاتحه عيني بصدمة وكلبي يدك بقوة جسمي كله حسيته تقلص وهو لازم وجهي قوي ويحركني مثل ما يريد نگطع نفسي أبتعد وكعد بصفي بعده حاضن وجهي وساند كصته على كصتي اتنفس بقوة ارجف كل جسمي يرجف وهو صوت نفسه عالي مغمض عيونه ويحرك كصته على كصتي
اريد طاقة وقوة احجي ما اكدر رجع رفع راسي وهو مغمض وعاد السواه من جديد شهكت ايدي على صدره ادفعه أريد اتنفس صيحت بوجع ابتعد مديت ايدي على شفتي امسحها وابجي بس شفت بايدي دم من شفتي تخبلت بجيت اصيح
- دم
باوعلي متوتر مد ايده سحب كلينكس وكعد كدامي يمسحها
- اشش لا تبجين
- ما ، ابجي والله ابجي
حجيتها واشهك بصوت وخر الكلينكس من شفتي باوعت لوجهه
- مو عيب عليك
هز راسه اي
- والله عيب عليك والعباس عيب عليك
- ادري ادري
- ما تستحي معلم عود انتَ ، أستاذ، دكتور اقصد .
وكف منطيني ظهره وندك باب الغرفة دخلت زوجة عمه كالتله
- يله عمه فضها
هز راسه اي وطلع من الغرفة اجت يمي كالت
- شجاج تعوفينه هو المثل حيــادر هم ينعاف غزوله ؟
سكتت بس دموعي تنزل اخذتني وطلعنا عمه والسيد وزوجة عمه باوع بعيوني نطق اسمي والطلاق وعيونه حمر دم .
شــام :: رجعت من المدرسة رأسًا نمت كعدتني رويــده باوعتلها كوه فاتحه عيني وهي مقهوره
- شكو شبيج رويــده ؟
- ماكو شي انتِ صايرة بس نوم ما تكعدين تدرسين
- اكلج يردون من عدنا صور للبطاقة مال الامتحان واني ماعندي ولا صورة
- سهله شوكت يردونهن
- هذا الأسبوع
- شــام والله خجلانه من عندج بس حبابه ساعديني هجــام من امس لا ماكل ولا شارب علاج ويخوف وضعه تكدرين تاخذليه اكل
دنكت هزيت راسي لا وادري بروحي جذابة هسه اروحله ركض لان بمجرد ذكرت اسمه گـــلبي دك حيل سكتت رويــده تباوعلي بقهر كالت
- الخاطري
- هم يدفعني لو يضربني بلا ما يحس
- شــام هجــام مستحيل يسوي هيج اذا ما انتِ ضاغطة عليه او سأله على شي محذرتج منه اني
- شفتي شنو كاتب على الحايط ؟
- يا حايط
- بغرفتة
- لا كلشي ما شفت قبل شوي نظفتها
- هو قبل لا يدفعني وينكسرن أصابعي قبلها بليلة اجه للمخزن وحجينا سألني انتِ تعرفين كلشي وكتله اي
- اي ؟
- المهم من رحت الغرفتة لكيته كاتب يظنون بأنهم عرفوا الحقيقة بينما هي غطاء لجريمه .
بلعت ريك ودارت عيونها من عيوني لزمت أيدها
- اكو شي والله من تسوين هيج اكو شي
- ماكو شي سألتي وجاوبتج
- بعد ، جذب ملاك وامها ما ماتوا بهالطريقة ؟ جذبتي عليَ
- والقرآن وروح امي وغلاة هجــام هذا الماعندي اعز منه ما جذبت عليج بحرف يا شــام والله ما توقعتج تجذبيني .
حجتها وكامت بزعل صحت وراها وما رجعت نزلت ، كمت نزلت وراها لكيتها تشتغل بالمطبخ جلبتلها
- رودي اسفه
وهي مطنشة
- اوووي شدعوه عليج هي جفيصه هلكدوتها
وبقت مغلسه تفتر بالمطبخ ساكته واني وراها اطخ بيها واحجي
- اختنكت راح اموت احجي وياي يمه اختنكت اختنكت بعد ما اتنفس
احجي واباوع الوجها كوه لامه حلكها كملت الصينية خلتها بأيدي
كالت
- اذا اكل هجــام انسه جفصتج الهلكدوتها
- يابه خاف يخلي الصينيه براسي
- نمونه واذا خلاها هيه صينيه هلكدوتها
ضحكت اخذتها وصعدت گـــلبي يدك حيل وكفت بباب غرفتة متوتره واحاجي روحـــي مو حلفتي بعد ما تدخلينها الخنيثة البلا كرامه امداج المضحكة القشمر رجعتي رجعتي ، رزلت روحـــي زفرت نفس ودخلت
كاعد يم الشباك النركيله بأيده والغرفة صايرة تخنك ما التفت الحد ما تقدمت كم خطوه ، القامجي بحلكه يريد يسحب نفس منطيني ظهره وجمد التفت فاز رأسًا ابتسم واختفت ابتسامته بسرعة مركز بوجهي دنكت عيني متوتره والصينية بأيدي رجعت رفعت راسي بعده يباوعلي
خليت الصينية بالگاع حجيت بدون ما اباوعله
- اكل حتى تشرب علاج مو زين عليك
وهو ساكت باوعتله متوتره تقرب خطوة خطوة رجفت بخوف طخ ظهري بالميز وهو يتقدم الحد ما وصلني وما يفصلنا اي شي
- هجــام
- بعد
باوعت بعيونه خله ايديه وره ظهره ويباوع الوجهي غمض وقرب وجهه الي
واني كاتمه حتى نفسي اباوعله وارجف ميته من التوتر فتح عيونه ورفع أيده بهدوء غمضت حيل رخت روحـــي من سحب الشال من شعري عافه على الميز وركز عيونه على ركبتي همست صوتي رايح
- هجــام
رفع عيونه لعيوني وحجه بهدوء
- هاه
- اكلك برد
- خلي يبرد
ابتعدت من كدامه رجلي ما شايلتني كعد كدام الصينية كال
- اكلي وياي
- شبعانه
دفع الصينية الي
- اخذيها ما اريد
- لا يله جوعانه
دنك مبتسم اكلت وياه كام غسل ورجع كعد مقابلي باوع الصدري ومد ايده الي
- وين علاجي ؟
يحجي وعيونه على صدري عباله هم ضامته هنا
- هسه رويــده تجيبه يمها
باوع بوجهي مقهور كال
- لو ادري ولا ماكل
- هههههههه
التفت علي بفزة مبتسم
- شحلوج وشحلو ضحكتج
دنكت خجلانه واجت ببالي الزوج القشمر هم ضحك عليج بكلمتين
خفيت ابتسامتي وكمت اخذت الصينية ونزلت ورويده صعدتله العلاج رجعت للمخزن بس طلعت من غرفته اشرتلها تعاالي
اجت للمخزن كعدت عاكده حاجبها
- شكو
- رويــده اني ما اجذبج واسفه اذا تفكرين هيج بس يعني انتِ صيري بمكاني ترا اني عقلي راح يوكف
مسحت وجهه محتاره وباوعتلي
- اسألي راح تموتيني
- لا تخبليني ملاك عيونها يشبهن عيوني
- عيوني هم يشبهن عيــونج ترا !
باوعت بعيونها
- بس ملاك هواي هوواي تشبهني
- مو هي أصلًا تعودلج .
يتبع .. 🦋