အခန်း(၄၉) လင်းဖန်က ဘာလို့ အရမ်းချောရတာလဲ
လင်းဖန် : "ငါ အခုချက်ချင်း လာခေါ်မယ်နော်။ ခုနက အလုပ်များနေလို့ပါ။"
ရှားဝမ်ချွေ့ : "~~~"
စုရှောင်းယွီ : "ဆရာ မြန်မြန်လာပါတော့။ မလာရင် အစ်မဝမ်ချွေ့ အနိုင်ကျင့်ခံရလိမ့်မယ်။"
လင်းဖန် : "???"
စုရှောင်းယွီ : "ငါရှိရင် အစ်မဝမ်ချွေ့ကို တခြားသူတွေ အနိုင်ကျင့်လို့မရဘူး။ ဆရာ ငါဗိုက်ဆာတယ်။ အာဝူး အများကြီး စားချင်တယ်~"
စုရှောင်းယွီ၏ မက်ဆေ့ချ်ချ်ကို လင်းဖန်မြင်သောအခါ အနည်းငယ် ဒေါသထွက်သွား၏။
ကြောင်မလေးက အနိုင်ကျင့်ခံရမယ် ဟုတ်လား။
ဘယ်သူက သူ့ကြောင်မလေးကို အနိုင်ကျင့်ရဲတာလဲ။
ရှုယန်... ရှုယန်ဖြစ်မယ်။
အရင်တစ်ခေါက် ရှုယန်က လင်းဖန်ကို ယွဲ့ဟွာအင်တာတိန်းမန့်ကို ဖိတ်ကြားလိုက်တာက စစ်ကြေညာလိုက်ခြင်း ဖြစ်သည်။
လင််းဖန်က Rolls-Royce Cullinan ထဲသို့ ဝင်လိုက်၏။ လီဗာကိုနင်းပြီး ယွဲ့ဟွာအင်တာတိန်းမန့်သို့ လာခဲ့ပါသည်။
လမ်းတစ်လျှောက်တွင် အားလုံးက အံ့အားသင့်သွားခဲ့ကြသည်။ ရှန်ဟိုင်းမြို့ကြီးက အလွန်ကြီးမားသည်။ သို့သော် နေ့တိုင်း ပြိုင်ကားကို မြင်နိုင်သည့်လူက အလွန်နည်းပါသည်။
SUV ကားအင်ဂျင်ကြီး၏ ဟိန်းသံနှင့် ၎င်း၏ မိုက်မိုက်လန်းလန်း တန်ဖိုးကြီးသော ပုံသဏ္ဌာန်က ရှန်ဟိုင်းလမ်းမများပေါ်တွင် ပြိုင်ဘက်ကင်းသော မြင်ကွင်းတစ်ခု ဖြစ်လာစေခဲ့၏။
ယွဲ့ဟွာအင်တာတိန်းမန့်။
ထိပ်တန်း ဖျော်ဖြေရေး ကုမ္ပဏီကြီးတစ်ခု ဖြစ်သောကြောင့် ယွဲ့ဟွာလက်အောက်တွင် ထိပ်တန်း နာမည်ကျော်များစွာ ရှိပါသည်။
ရှုယန်၊ ရှားဝမ်ချွေ့၊ စုရှောင်းယွီနှင့် တခြား နာမည်ကျော်များစွာမှာ ယွဲ့ဟွာအင်တာတိန်းမန့်၏ လက်အောက်တွင် ရှိပါသည်။ မိန်းကလေးအိုင်ဒေါအုပ်စုအဖြစ် ပွဲဦးထွက်ရဖို့ မျှော်လင့်ချက်ဖြင့် ပါဝင်ကြသည့် ထရိန်နင်များကိုလည်း ပြုစုပျိုးထောင်ပေးကြသည်။
ကုမ္ပဏီကြီးထဲတွင် နာမည်ကျော်တိုင်းက အလောတကြီး ကြိုးစားနေကြရ၏။
ရှုယန်လည်း ထိုနည်းလည်းကောင်းဖြစ်ပါသည်။
ရှားဝမ်ချွေ့ကတော့ ခြွင်းချက်ဖြစ်၏။ သူမ တစ်နှစ်နီးပါးလောက် ဇာတ်ညွှန်းလက်မခံရသေးဘဲ မကြာသေးခင်က ရသစုံ အစီအစဉ်တစ်ခုကိုသာ လက်ခံရိုက်ကူးရပါသေးသည်။
စုရှောင်းယွီကလည်း အလုပ်အားနေပြီး ရှားဝမ်ချွေ့နှင့်အတူတူ နားနေသည်။
ရှုယန်က ဆွယ်တာ၊ ဂျင်းဘောင်းဘီ၊ အဖြူရောင် ရှူးဖိနပ်တို့ကို ဝတ်ဆင်ထားသည်။ သူက အရပ်ရှည်ပြီး ရုပ်ရည် ချောမော၏။ သူက ယွဲ့ဟွာအင်တာတိန်းမန့်၏ ထိပ်တန်း သရုပ်ဆောင်တစ်ယောက် ဖြစ်သည်။ ထို့အပြင် ရှားဝမ်ချွေ့ထက်ပင် ပို၍ နာမည်ကြီးပါသေးသည်။
သူ ကုမ္ပဏီထဲသို့ ဝင်လိုက်တာနဲ့ လူများစွာက သူ့ကို လေးစားသမှုဖြင့် ကြည့်လိုက်ကြသည်။
"မင်္ဂလာ နေ့လည်ခင်းပါ ဆရာရှု"
"ဆရာရှု အလုပ်က ပြန်လာပြီလား။ အလုပ်ကြိုးစားခဲ့မှာပဲ။ လက်ဖက်ရည် သောက်ဦးမလား။"
"ဆရာရှု ရုံးခန်းကို သန့်ရှင်းရေး လုပ်ပေးပြီးသွားပါပြီ။ ဆရာ့အတွက် ဖျော်ပေးထားတဲ့ လက်ဖက်ရည်လည်း ရှိပါတယ်။ နို့လက်ဖက်ရည်နှစ်ခွက် ကျွန်မ အထူးတလည် ယူလာပေးပါတယ်" လက်ထောက်က လမ်းလျှောက်လာပြီး ရှုယန်ကို ကြည့်လိုက်သည်။ သူမ၏ လက်ထဲတွင် နို့လက်ဖက်ရည်နှစ်ခွက် ရှိနေ၏။
"အင်း" ရှုယန်က နို့လက်ဖက်ရည်ကို ယူကာ သူ့ရုံးခန်းထဲတွင် ထိုင်လိုက်သည်။
ခဏလောက် အနားယူပြီးသောအခါ နို့လက်ဖက်ရည်ကို ကိုင်လျက် ရှားဝမ်ချွေ့၏ တံခါးကို ခေါက်လိုက်ပါသည်။
"ဝမ်ချွေ့ နို့လက်ဖက်ရည်သောက်ဦးမလား" ရှုယန်က နူးညံ့စွာ ပြုံးလိုက်ပါသည်။ သူ့အပြုံးက ကူးစက်တတ်သည်။ ရှားဝမ်ချွေ့ကို သူ့ဘက်က အရင် နို့လက်ဖက်ရည်လာပေးခြင်းဖြစ်သည်။
ကုမ္ပဏီထဲတွင် ရှုယန်က နွေးထွေးသော လူတစ်ယောက်ဖြစ်မှန်း လူတိုင်း သိပါသည်။ လူများစွာကို ကောင်းကောင်းမွန်မွန် ဆက်ဆံပြီး မကြာခဏ အားလုံးကို နို့လက်ဖက်ရည် ဝယ်တိုက်တတ်သည်။
အမှန်ပင်။ ရှားဝမ်ချွေ့ကိုတော့ ရှုယန်က အထူးသတ်မှတ်ထား၏။ လူများစွာအပေါ် ကောင်းထားသဖြင့် သူမကို နို့လက်ဖက်ရည်ပေးလို့ အဆင်ပြေပါသည်။
"ကျေးဇူးတင်ပါတယ်။ ဒါပေမယ့် ကျွန်မ ရေမဆာလို့ပါရှင့်။"
"ပြီးတော့ နို့လက်ဖက်ရည် သောက်လိုက်ရင် ကျွန်မ ဝလာလိမ့်မယ်" ရှားဝမ်ချွေ့က ပြုံးကာ ယဥ်ယဥ်ကျေးကျေး ပြန်ပြောလိုက်ပါသည်။
"ဟုတ်တယ် ဟုတ်တယ်။ ရှုယန် ရှင် အစ်မဝမ်ချွေ့ကို နို့လက်ဖက်ရည် လာတိုက်တယ်ပေါ့။ ကျွန်မတို့ကို ဝလာအောင် လုပ်နေတာလား။ ဟွန်း..."
စုရှောင်းယွီက ရှားဝမ်ချွေ့၏ လက်မောင်းကို ကိုင်ကာ ရှုယန်၏ နို့လက်ဖက်ရည်ကို ငြင်းလိုက်ပါသည်။
"ဟုတ်သားပဲ" ရှုယန်က တောင်းပန်စွာ ပြုံးလိုက်ပြီး သူ့ နို့လက်ဖက်ရည်ကို ပြန်ယူလိုက်ပါသည်။
"ဝမ်ချွေ့နဲ့ ရှောင်းယွီတို့။ ကျွန်တော် ရက်နည်းနည်းလောက် အလုပ်များနေမှာမို့လို့ပါ။ Keep Runningက အရမ်းနာမည်ကြီးတဲ့ ရသစုံ အစီအစဉ်တစ်ခုနော်။ ကျွန်တော့် အကူအညီ လိုသေးလား" ရှုယန်က တွေးကာ မေးလိုက်ပါသည်။
ရှားဝမ်ချွေ့က ခေါင်းကို ညင်သာစွာ ခါလိုက်၏။ သို့သော် စုရှောင်းယွီက အရင်ပြောလိုက်ပါသည်။ "ရတယ် ရတယ်။ ကျွန်မ အစ်မဝမ်ချွေ့ကို ကောင်းကောင်း ဂရုစိုက်မှာပါ"
ရှားဝမ်ချွေ့က စုရှောင်းယွီကို သူမ၏ လှပသော မျက်လုံးများဖြင့် ကြည့်လိုက်သည်။ သူမကို စုရှောင်းယွီက နားလည်၏။
အမြဲလိုလို သူမ တစ်ခုခုကို ငြင်းချင်တိုင်း စုရှောင်းယွီက သူမအတွက် ငြင်းပေးလေ့ရှိသည်။
ရှုယန်ကလည်း သိပ်ပြီး ဂရုမစိုက်ပါ။ သူက အလွန် သဘောထားကြီးသည်။ ပြုံးသာပြုံးလိုက်ပြီး ပြောလိုက်၏။ "ဝမ်ချွေ့ မင်းဇာတ်ညွှန်းကောင်းကောင်း လက်မခံတာ တစ်နှစ်နီးပါးလောက်ရှိပြီနော်။ အကြင်နာပေးတဲ့အခန်းကို တကယ်မရိုက်ချင်လို့လား။"
"ဟုတ်တယ်။ ကျွန်မ မရိုက်ချင်ဘူး" ရှားဝမ်ချွေ့က ပြန်ဖြေလိုက်သည်။
ရှုယန်က ခေါင်းငြိမ့်လိုက်သည်။ "ရပါတယ်။ အလျင်မလိုပါဘူး။ ဇာတ်ညွှန်းကောင်းကောင်း ရှာဖို့ ကူညီပေးမယ်။"
ရှားဝမ်ချွေ့က ထိုနေရာတွင်သာ တိုးတိုး တိတ်တိတ် ထိုင်နေခဲ့ပါသည်။ သူမသည် လင်းဖန်နှင့် အတူရှိနေချိန်မှာ ရှိနေတတ်သည့် ပုံစံနှင့် အလွန် ခြားနားနေပါသည်။
အနည်းငယ်လည်း စိတ်တိုနေခဲ့၏။
အဲ့ဒီ အကျင့်မကောင်းတဲ့လင်းဖန်က သူမကို စောစောစီးစီး လာမခေါ်ဘူး။
"ဟုတ်ပြီ၊ ဘာပြောစရာရှိသေးလဲ။ အစ်မ ဝမ်ချွေ့နဲ့ ကျွန်မတို့ အလုပ်ဆင်းဖို့ ပြင်နေကြတာ" စုရှောင်းယွီက ရှုယန်ကို ကြည့်လိုက်ပါသည်။
"ကျွန်တော်လည်း အလုပ်ဆင်းတော့မှာလေ။ ဒီရက်ပိုင်းထဲ အလုပ်တွေ အရမ်းများနေတာ။ ဒီနေ့ည မင်းတို့တွေကို ညစာကျွေးမယ်လေ" ရှုယန်က ပြုံးလိုက်သည်။
ရှုယန်၏ အဓိက ရည်ရွယ်ချက်က သူတို့ကို ညစာခေါ်ကျွေးဖို့ ဖြစ်သည်။
စုရှောင်းယွီ၏ မျက်လုံးများ ဝိုင်းစက်သွားသည်။ အစားအသောက်အကြောင်းကြားလျှင် သူမ အနည်းငယ် မထိန်းသိမ်းနိုင်ပါ။
ရှားဝမ်ချွေ့က ချက်ချင်းပဲ စုရှောင်းယွီကို ပခုံးဖြင့် တို့လိုက်ပါသည်။
စုရှောင်းယွီက ရှားဝမ်ချွေ့ကို သနားစရာ ကောင်းစွာ ကြည့်လိုက်သည်။ ရှုယန် သူတို့ကို ကျွေးမွေးဖို့ ခေါ်သွားလည်း လင်းဖန်ရဲ့ စားတော်ပွဲလောက် အရသာရှိပါ့မလား။
ရှားဝမ်ချွေ့က နူးညံ့စွာ ပြုံးလိုက်ပြီး ပြောလိုက်၏။ "ကျွန်မ ဗိုက်မဆာသေးလို့ပါ။"
စုရှောင်းယွီကလည်း ချက်ချင်းလိုက်ပြော၏။ "အာဝူး ကျွန်မလည်း ဗိုက်မဆာသေးဘူး။"
ဘာလိုလိုနဲ့ သူတို့သုံးယောက်စလုံး ကုမ္ပဏီ၏ ဝင်ပေါက်နားသို့ပင် ရောက်လာခဲ့ကြသည်။
ရှားဝမ်ချွေ့နှင့် စုရှောင်းယွီတို့ နှစ်ယောက်စလုံး ရှုယန်ကို ငြင်းလိုက်ပါသည်။
ထိုအချိန်တွင် ကုမ္ပဏီ ဝင်ပေါက်၌ Rolls-Royce Cullinan ကားတစ်စီး ရပ်တန့်သွားခဲ့သည်။
အလုပ်ဆင်းသည့် အချိန်ဖြစ်သဖြင့် ယွဲ့ဟွာအင်တာတိန်းမန့်က ဝန်ထမ်းတချို့တောင် အံ့အားသင့်သွားခဲ့ရပါသည်။
ကုမ္ပဏီ၏ လုံခြုံရေးအစောင့်များလည်း ထိုနည်းလည်းကောင်းဖြစ်ကြ၏။ ဒီကားကို သူတို့သိသည်။
Rolls-Royce Cullinan SUV ကားကြီး ဖြစ်သည်။
"လခွမ်း... ဇိမ်ခံကားကြီးပဲကွ။"
"အဲ့တာ ယွမ် ၆ သန်း ၇ သန်းလောက်တန်တဲ့ Rolls-Royce Cullinan ကားကြီး မဟုတ်လား။ ဘုရားရေ သူ့ကို မတားနဲ့ဦး။ ဒရိုင်ဘာ ဘာလုပ်မလဲ ကြည့်ရအောင်"
"နင်တို့ မြင်လိုက်လား။ ကားပိုင်ရှင်က ခပ်ချောချော ကောင်လေးထင်တယ်။ အရမ်းချောတဲ့ပုံပဲ..."
"အဲ့ဒီလူကို မြင်ဖူးသလိုပဲ... ဟုတ်သားပဲ၊ သူက လင်းဖန်ပဲ။"
အားလုံး အံ့အားတသင့်ဖြစ်နေချိန်တွင် လင်းဖန်က ကားထဲမှ ဖြည်းညင်းစွာ ထွက်လာခဲ့ပါသည်။
ဘေးပတ်လည် သစ်ပင်များပေါ်မှ သစ်ရွက်များ ကြွေကျလာသည်။ ရုပ်ရှင်ထဲက ဇာတ်ဝင်ခန်းတစ်ခန်းလိုပင်။ ပတ်ဝန်းကျင် လောကကြီးတစ်ခုလုံး ရပ်တန့်သွားရ၏။
လင်းဖန်တစ်ယောက် ကားထဲက ထွက်လိုက်ပါသည်။ သူက ရိုးရိုးရှင်းရှင်း မီးခိုးရောင် ဟူဒီတစ်ထည်သာ ဝတ်ထား၏။ သို့သော် သူက သာမန်ထက် ထူးကဲသော ရုပ်ဆင်းသွင်ပြင်နှင့် ပြိုင်ဘက်ကင်းသော အရှိန်အဝါမျိုးကို ပိုင်ဆိုင်ထားပါသည်။
ကောင်မလေးများစွာ၏ ညှို့အားပြင်းသော မင်းသားလေးတစ်ယောက်လို တစ်လှမ်းချင်း လျှောက်လာခဲ့သည်။ သူပ ဖြည်းဖြည်းချင်း လျှောက်လာစဥ် ကမ္ဘာကြီးထဲက အရာအားလုံး အရောင်အဆင်း ကင်းမဲ့သွားသလိုပင်။ ဘေးပတ်လည်က ကောင်မလေးများနှင့် လုံခြုံရေး ဝန်ထမ်းများက အစစ အရာရာကို တိတ်ဆိတ်စွာ စောင့်ကြည့်နေခဲ့ပါသည်။
သူတို့က လင်းဖန်၏ ဓာတ်ပုံကို အရင်က မြင်ဖူးသည်။ သို့သော် လူကိုယ်တိုင် တွေ့လိုက်ရသောအခါမှ သူတို့ နားလည်သွားကြရ၏။
လင်းဖန်၏ အရှိန်အဝါမှာ ထူးကဲလှသည်။ စကားလုံးများဖြင့် ဖော်ပြလို့မရသည့် အရှိန်အဝါမျိုး ဖြစ်၏။ သူ့အသွင်အပြင်က နွေလယ်ညတစ်ညကို အလှများ ထပ်မံဖြည့်ဆည်းနေသလိုမျိုး ဖြစ်ပါသည်။
ကောင်မလေးများစွာက အရာရာကို ရီဝေစွာ ကြည့်နေကြသည်။ ရုပ်ရှင်တွေထဲက အမျိုးသား ဇာတ်လိုက်များကတောင် ဒီလို အရှိန်အဝါမျိုးနဲ့ လင်းဖန်လို ရုပ်ချောချော မျက်နှာမျိုး မရှိကြပါ။ လုံခြုံရေးအစောင့်များက လင်းဖန်ကို မတားကြပါ။ လုံခြုံရေး အစောင့်အားလုံးက လင်းဖန်ကို တိတ်ဆိတ်စွာသာ ကြည့်နေကြပါသည်။
ဘယ်သူမှ စကားမပြောခဲ့ကြပါ။
လင်းဖန်၏ အကြည့်က ကုမ္ပဏီဝင်ပေါက်ရှိ ရှားဝမ်ချွေ့ထံသို့ ရောက်ရှိသွား၏။ သူတို့၏ မျက်လုံးတွေက အကြည့်ချင်း ဆုံသွားခဲ့ကြပါသည်။
တစ်ချက်လောက် ကြည့်လိုက်ရုံနဲ့ ရှားဝမ်ချွေ့ ရှက်သွေးဖြာသွားပါသည်။
လင်းဖန်က ... ဘာလို့ ဒီလောက်တောင် ကြည့်ကောင်းရတာလဲ။
သူမ ယောက်ျားလေး နာမည်ကြီးများစွာကို မြင်ဖူးသည်။ ဖျော်ဖြေရေး လောကထဲက ယောက်ျားလေး နာမည်ကျော်အများစုမှာ အလွန် ရုပ်ချောပါသည်။ သို့သော် လင်းဖန်လိုလူမျိုးကတော့ ရှားပါး၏။
လင်းဖန်က လှေကားပေါ်သို့ တစ်လှမ်းချင်း တက်လာခဲ့သည်။ အားလုံး၏ မျက်လုံးများက သူ့ကို အာရုံစိုက်နေခဲ့ကြ၏။
လင်းဖန် ရှားဝမ်ချွေ့ ရှေ့သို့ ရောက်လာသောအခါ ရှုယန်တစ်ယောက် လုံးဝ အရောင်အဆင်း မှေးမှိန်သွားရ၏။
အားလုံးတွင် အတွေးတစ်ခုသာရှိသည်။
ဒါက... လုံးဝ အလဲထိုးပစ်လိုက်တာပဲ။
အခန်း(၅၀) အတူတူနေထိုင်ခြင်း
"မြောင် မြောင်" ရှားဝမ်ချွေ့က လင်းဖန်ကို ချစ်ဖို့ကောင်းသော အမူအယာလေး လုပ်ပြလိုက်သည်။ တခစ်ခစ်ရယ်မောရင်း သူမ မျက်နှာလေးကလည်း အနည်းငယ် နီရဲနေ၏။
"နို့လက်ဖက်ရည်သောက်ဦးမလား" လင်းဖန်က ပြုံးကာ နို့လက်ဖက်ရည်တစ်ခွက် ပေးလိုက်ပါသည်။
"အင်း~" ရှားဝမ်ချွေ့က ခေါင်းငြိမ့်လိုက်ပြီး နို့လက်ဖက်ရည်ကို ယူလိုက်ပါသည်။
"အာဝူး လင်းဖန် ငါ့နို့လက်ဖက်ရည်ကော ဘယ်မှာလဲ" စုရှောင်းယွီက နှုတ်ခမ်းစူကာ လင်းဖန်ကို ကြည့်လိုက်ပါသည်။
"မပါဘူး" လင်းဖန်က ပြုံးကာ ပြောလိုက်၏။
"ဘက်လိုက်တယ်၊ ဘက်လိုက်တယ်" စုရှောင်းယွီက စိတ်ဆိုးပြီး ဝမ်းနည်းသွားပါသည်။ လင်းဖန်ရဲ့ အရသာရှိသော ဟင်းလျာများကိုသာ မစားချင်လျှင် သူမ ဒေါသထွက်သွားနိုင်သည်။
ရှုယန်တစ်ယောက် သူ့ဘဝကြီးတစ်ခုလုံး မှောင်မိုက်သွားသလို ခံစားလိုက်ရပါသည်။
လင်းဖန်က သူ့ထက်ပိုချောလျှင်တောင် လက်ခံနိုင်သေးသည်။
ရေမဆာဘူးဆိုတာ ဘယ်ရောက်သွားလဲ။ နို့လက်ဖက်ရည်သောက်ရင် ဝလိမ့်မယ်လို့ ပြောခဲ့တာ မဟုတ်ဘူးလား။ နှစ်ယောက်စလုံး နို့လက်ဖက်ရည်ပေးထားတာချင်း အတူတူ ဘာလို့ ခြားနားချက်က ဒီလောက်ကြီးမားရတာလဲ။
အဓိကအချက်က ရှားဝမ်ချွေ့မှာ လင်းဖန်ရှေ့တွင် ချစ်ဖို့ကောင်းသော အမူအယာလေးလုပ်ပြသည်။ သူ့ရှေ့မှာဆိုရင်တော့ အလွန် တည်ငြိမ်ပြီး ခပ်ခွာခွာ နေတတ်၏။
ရှုယန်တစ်ယောက် အနည်းငယ် ဝမ်းနည်းသွားကာ လင်းဖန်ကို မနာလိုဖြစ်မိပါသည်။
"နင်တို့ စားကြမလား။ ငါ ဒကာခံမှာပါ" လင်းဖန်က ပြုံးကာ ပြောလိုက်သည်။
"ဟုတ်ပြီ ဟုတ်ပြီ အခုမှ ရောက်လာတယ်။ ငါက ဗိုက်ဆာနေပြီ" စုရှောင်းယွီ ပျော်ရွှင်နေသည့်ပုံပင်။ နောက်ဆုံးတော့ လင်းဖန်ရဲ့ အရသာရှိတဲ့ အစားအစာတွေကို သူမ စားနိုင်ပါပြီ။ "အမ်း ငါးပေါင်းလေး" ရှားဝမ်ချွေ့က လင်းဖန်ကို ကြည့်ကာ ချိုမြိန်စွာ ပြုံးလိုက်ပါသည်။ "သွားကြမယ်လေ ကားထဲဝင်" လင်းဖန်က ပြောလိုက်သည်။
ရှုယန်ကို တစ်ယောက်တည်းထားခဲ့ကာ ရှားဝမ်ချွေ့နှင့် စုရှောင်းယွီတို့ကို ကားပေါ် ခေါ်သွားခဲ့ပါသည်။
ရှုယန် သက်ပြင်းချလိုက်၏။ "နင်တို့ ဗိုက်မဆာဘူးလို့ ပြောခဲ့တာမဟုတ်ဘူးလား"
အစကတော့ လင်းဖန်က ဆင်းရဲသည်ဟု ရှုယန် ထင်ခဲ့မိသော်လည်း လင်းဖန်၏ ကားက Rolls-Royce Cullinan ကားကြီး ဖြစ်သဖြင့် ဒါက ဘယ်လိုလုပ်ပြီး ဆင်းရဲနိုင်မည်နည်း။
လင်းဖန်က အရပ်ရှည်သည်။ ချမ်းသာပြီး ရုပ်ရည်လည်း ချောမော၏။
ရှုယန်တစ်ယောက် သူ ရှုံးနိမ့်သွားပြီဟု ခံစားလိုက်ရပါသည်။
သူ လုံးဝ ရှုံးနိမ့်သွားပါပြီ။
သူ့ကို ခွေးစာကျွေးခံလိုက်ရသလို ခံစားလိုက်ရသည်။ ဘဝက သူ့အတွက် ခက်ခဲလွန်းသည်ဟု ထင်မိသွားပါသည်။
"ဝိုး ဆရာဆရာ နင်က Rolls- Royce Cullian ကားကြီး မောင်းလာတာပဲ။ ဒီကားက သန်းချီပြီး ပေးရမှာပဲနော်၊ ဟုတ်တယ်မလား" စုရှောင်းယွီက လင်းဖန်၏ ကားထဲတွင် ဝင်ထိုင်ကာ အံ့အားသင့်နေသည့်ပုံ ပေါက်နေပါသည်။
"ထိုင်ခုံလေးက ပျော့ပြောင်းနေတာပဲ။ ဒီလောက်ကောင်းတဲ့ ကားမျိုး တစ်ခါမှ မစီးဖူးဘူး" စုရှောင်းယွီက တခစ်ခစ် ရယ်မောရင်း ရှားဝမ်ချွေ့နဲ့ အတူအနောက်ခုံတွင် ထိုင်လိုက်ပါသည်။
"အေး၊ ယွမ် ၆.၄ သန်းလေ" လင်းဖန်က ပြောလိုက်သည်။
"ဝိုးဝိုးဝိုး ဆရာ။ ငါ့ရဲ့ ရှူးဂါးဒယ်ဒီ လုပ်ပေးပါ" စုရှောင်းယွီ ပို၍ပင် အံ့အားသင့်သွားခဲ့သည်။
လင်းဖန်မှာ Bugatti ကားကြီး ရှိပြီးသားဆိုတာ သူမသိပါသည်။ သူမနဲ့ ရှားဝမ်ချွေ့တို့ကို လာခေါ်ဖို့အတွက် ကားသစ်တစ်စီး ဝယ်ခဲ့၏။ Rolls-Royce Cullinan SUV ကားကြီးတစ်စီး ဖြစ်ပါသည်။ ယွမ် ၆.၄ သန်းတန် ဇိမ်ခံကားကြီး ဖြစ်၏။
"နင်တို့ကို ငါ့ရှူးဂါးမာမီလုပ်ခိုင်းရမယ်။ ရှောင်းယွီ ရုပ်သံစီးရီးတစ်ခု ရိုက်ကူးကြေး နင် ယွမ် သန်းဆယ်ချီပြီး ရမှာပဲ။ နောက်ထပ် ရုပ်ရှင်တွေနဲ့ ရသစုံရုပ်သံအစီအစဉ်တွေ ထပ်ရိုက်ရင် ပိုပြီးတောင် ရဦးမယ်" လင်းဖန်က ပြုံးကာ ပြောလိုက်ပါသည်။
ယွမ် ၆.၄ သန်းဆိုတာ သာမန်လူတွေ တစ်သက်လုံး မရနိုင်မည့် ပမာဏ ဖြစ်ပါသည်။
သို့သော်လည်း ရှားဝမ်ချွေ့နဲ့ စုရှောင်းယွီတို့ အတွက်တော့ ရုပ်ရှင် တစ်ကား နှစ်ကားလောက် ရိုက်ကူးလိုက်လျှင် ရနိုင်ပါသည်။
၎င်းတို့၏ ကြော်ငြာခများကလည်း အလွန် များပြားလှပါသည်။
"အာဝူး အေးပါ။ ဒါဆို ငါနင့် ရှူးဂါးမာမီ လုပ်ပေးမယ်" စုရှောင်းယွီက သူမ၏ ရင်ဘတ်ကို ပုတ်လိုက်ပါသည်။
ရှားဝမ်ချွေ့၏ စိတ်ဆိုးနေသော မျက်နှာကို မြင်သောအခါ စုရှောင်းယွီ လည်ပင်းလေးကျုံ့သွားပါသည်။
ကြောင်မလေးတော့ စိတ်ဆိုးတော့မည်။ "ငါက ကုန်းဆင်းတတ်တဲ့လူနဲ့ တူလို့လား" လင်းဖန်က ပြုံးလိုက်ပါသည်။
"ဘယ်သိမလဲ" ရှားဝမ်ချွေ့က နို့လက်ဖက်ရည်ဘူးကို ကိုင်ကာ အနည်းငယ် ပျော်ရွှင်သွားပါသည်။
"အစ်မ ဝမ်ချွေ့ နင် နို့လက်ဖက်ရည် မသောက်ဘူးလို့ ထင်နေတာ။ ခုနက ရှုယန် နင့်ကို နို့လက်ဖက်ရည် ပေးတယ်လေ" စုရှောင်းယွီက တခစ်ခစ် ရယ်မောရင်း ရှားဝမ်ချွေ့ကို ကြည့်လိုက်သည်။ "အရူးမ" ရှားဝမ်ချွေ့ ဒေါသထွက်သွားပြီး စုရှောင်းယွီကို စိတ်ဆိုးစွာ ကြည့်လိုက်ပါသည်။
"အာဝူး~~~"
"ငါ အမှန်တိုင်း ပြောနေတာ ဆရာ။ အစ်မဝမ်ချွေ့က နင်ပေးတဲ့ နို့လက်ဖက်ရည်ပဲသောက်တာ။ ရှုယန်ရဲ့ နို့လက်ဖက်ရည်ကို မသောက်ဘူး။ သူက ဝလာမှာစိုးလို့ဆိုပြီးတောင် ပြောခဲ့သေးတယ်။ ရှုယန်ကို ငါထိန်းပေးထားတာကို ငါ့ကို နို့လက်ဖက်ရည်တောင် မတိုက်ဘူး။ ဘက်လိုက်လိုက်တာ"
စုရှောင်းယွီက လျှာထုတ်ပြလိုက်ပါသည်။
"မပြောစမ်းပါနဲ့" ရှားဝမ်ချွေ့ ရှက်သွေးဖြာသွားပါသည်။
လင်းဖန်သာ ဒီအကြောင်းတွေ အကုန်သိသွားပါက နောက်ကို လင်းဖန်ရှေ့မှာ ဘယ်လိုလုပ်ပြီး ခေါင်းမော့နိုင်တော့မည်နည်း၊။
သူတို့ မီးပွိုင့်လမ်းဆုံတွင် ကားရပ်လိုက်ကြသည်။ လင်းဖန်က အနောက်သို့လှည့်ကာ လက်ကို ဆန့်တန်းလိုက်၏။ သူက ပြုံးကာ ပြောလိုက်ပါသည်။ "နို့လက်ဖက်ရည်သောက်ရင် နင်ဝလိမ့်မယ်။ ငါ့ကိုပေး။ လွှင့်ပစ်လိုက်မယ်။"
ရှားဝမ်ချွေ့က နို့လက်ဖက်ရည်ကို ကာကွယ်လိုက်သည်။ "မပေးဘူး"
ရှားဝမ်ချွေ့က နို့လက်ဖက်ရည်ကို သူမလက်ထဲတွင် ဆုပ်ကိုင်ထားသည်။ "ဒါက တက္ကသိုလ်က ဘွဲ့ရပြီးကတည်းက နင်ငါ့ကို ဝယ်တိုက်ဖူးတဲ့ ပထမဆုံး နို့လက်ဖက်ရည်ပဲ။ ငါ ဝလည်း ဘာမှမဖြစ်ဘူး။ ညဘက် လေ့ကျင့်ခန်းနည်းနည်းလောက် ပိုလုပ်လိုက်မှာပေါ့။"
လင်းဖန်က ပြုံးကာ ပြောလိုက်၏။ "ငါလည်း အတူတူ လုပ်ပေးမယ်လေ။"
စုရှောင်းယွီ : "အာဝူး ကလေးများနေ့က ပြီးသွားပြီနော်။ နင်တို့နှစ်ယောက်က ခွေးလေးတွေကို ဘယ်လိုအနိုင်ကျင့်ရမလဲဆိုတာပဲ သိတယ်။ ငါလည်း လေ့ကျင့်ခန်းလုပ်မယ်။ အဲ့တာဆို လေ့ကျင့်ခန်း အတူတူလုပ်လို့ရတယ်။"
လင်းဖန်၏ အိမ်တွင် ဂျင်မ်ပစ္စည်းကိရိယာ မျိုးစံရှိသည်။ သူ့ခန္ဓာကိုယ်ကို လေ့ကျင့်ဖို့ အတော်လေး ကောင်းမွန်သည်။
နယ်မြေဝင်ပေါက်သို့ ရောက်လာကြသောအခါ လုံခြုံရေးအစောင့်တချို့က လင်းဖန်၏ ကားထဲသို့ ကြည့်လိုက်ကြသည်။
"လခွမ်း မင်းတို့မြင်လိုက်လား။ ညီလေးဖန်ရဲ့ ကားထဲမှာ ကောင်မလေး နှစ်ယောက်တောင် ပါသွားတယ်။"
"ဒါက ဒုတိယမျိုးဆက် သူဌေးသား တစ်ယောက်ရဲ့ ဘဝမျိုးလား။"
"ဘယ်သိမလဲ။ မမြင်ချင်ယောင် ဆောင်လိုက်ပါ့မယ်။ ဒါပေမယ့် ညီလေးဖန်ရဲ့ ကားက တကယ်မိုက်တာပဲ။"
ညနေခင်းအချိန်ဖြစ်သည်။
ရေကန်ကြီးက တလက်လက် တောက်ပနေပြီး နေလည်း ဝင်နေပါပြီ။
နှလုံးသား ရေကန် ဗီလာပေါ်မှ ခပ်လှမ်းလှမ်းက ပင်လယ်ကြီးကို သူမြင်နိုင်သည်။ ကောင်မလေး များစွာက ဘစ်ကနီလေးများ ဝတ်ထားကြပြီး ကလေးတချို့ကလည်း ဆော့ကစားနေကြသည်။ အလွန်လှပပါသည်။
"ဝိုးဆရာ နင့်အိမ်က အကြီးကြီးပဲ~"
"တော်တော်ကြီးတဲ့ ဗီလာကြီးပါလား။ စုစုပေါင်း အထပ် ၃ ထပ်နဲ့ ရေကူးကန်လည်း ပါတယ်" စုရှောင်းယွီက လင်းဖန်၏ အိမ်ထဲ ဝင်လာပြီးနောက် အဘွားအိုလေး တစ်ယောက်လို လျှောက်ကြည့်နေပါသည်။
နာမည်ကျော် သရုပ်ဆောင်များက ပတ်ဝန်းကျင်ကောင်းများတွင် နေထိုင်ကြသော်လည်း သူတို့အများစုက အလွန်အလုပ်များကြ၏။ လင်းဖန်၏ အိမ်ထဲတွင် စုရှောင်းယွီနှင့် ရှားဝမ်ချွေ့တို့ အလွန်အမင်း သက်တောင့်သက်သာ ရှိနေကြပါသည်။
ဒီမှာ သူတို့ စိတ်အေးလက်အေး နေနိုင်သည်။
"မြောင်~"
ကြောင်ကလေးက စုရှောင်းယွီနှင့် ရှားဝမ်ချွေ့တို့ကို မြင်သောအခါ ရှားဝမ်ချွေ့၏ လက်ပေါ် ခုန်တက်လိုက်ပြီး သူမ၏ ရင်ဘတ်ကို လက်ဖြင့် ပွတ်သပ်နေပါသည်။
"လင်းဖန် ငါဗိုက်ဆာတယ်" ရှားဝမ်ချွေ့က လင်းဖန်ကိုကြည့်ရင်း ကြောင်ကလေး၏ ပြုမူပုံကို ဂရုမစိုက်ဘဲ ပွတ်ပေးနေပါသည်။
"ဆရာ ငါလည်း ဗိုက်ဆာတယ်။ ဒီကိုလာဖို့က ရှားပါးတော့ ဒီနေ့ အများကြီး စားချင်တယ်~" စုရှောင်းယွီက ဆိုဖာပေါ်တွင် ထိုင်လိုက်သည်။ သူမ၏ နှင်းလို ဖြူဖွေးပြီး နူးညံ့လှပသည့် ခြေထောက်လေးများက ဆိုဖာပေါ်တွင် ရောက်နေကြပါပြီ။ သူမအိမ်ကို သူမ ပြန်လာသလို ဘာမှ ထိန်းထိန်းသိမ်းသိမ်း မနေခဲ့ပါ။
လင်းဖန်က ခေါင်းငြိမ့်လိုက်၏။ ရှားဝမ်ချွေ့ လက်ထဲက ကြောင်လေးကို သူကြည့်လိုက်ပြီး အနည်းငယ် ဒေါသထွက်နေ၏။ သူတောင် တစ်ခါမှ မထိဖူးသေးဘဲ ဒီကြောင်က ပထမဆုံး ထိရတဲ့ကောင် ဖြစ်သွားပြီလားး။ ဒီကြောင်ကို ဝှေးသင်းဖို့ အမြန်စီစဥ်ပြီး လူသားသဘာဝ၏ အကျင့်ယုတ်မှုကို ပြသဖို့ အချိန်တန်ပြီ ထင်သည်။
ဗီလာထဲတွင် စုရှောင်းယွီက ကြောင်လေးကို ပွတ်သပ်ပေးနေပြီး ရှားဝမ်ချွေ့က ရေချိုးနေ၏။ ထိုအချိန်တွင် လင်းဖန်က စားကောင်းသောက်ဖွယ်များ ချက်ပြုတ်နေါပသည်။
ငါးပေါင်း၊ ငါးစွပ်ပြုတ်၊ ကျောက်ပုစွန်၊ ဘဲကင်၊ တို့ဟူး၊ သခွားသီးထောင်းနဲ့ ကြက်ဥပြုတ်များကို ပြင်ဆင်ပြီးပါပြီ။ နောက်ဆုံး ဟင်းလျာက စုရှောင်းယွီ၏ အကြိုက်ဆုံးဟင်း ယုရှန်းဝက်သားမွှေကြော်ဖြစ်သည်။
လင်းဖန်က ဝက်သားများကို အချောင်းလေးများ ဖြစ်သွားအောင် လှီးဖြတ်လိုက်ပြီး ဝိုင်နည်းနည်း ထည့်လိုက်၏။ ကြက်ဥအကာ၊ ကော်ရည်နှင့် ဆားတို့ကို ထည့်လိုက်သည်။ အသားကို အညီအမျှ နယ်လိုက်ပြီး မိနစ် ၂၀ လောက် အရသာစိမ်ထားပြီး ဖြစ်သည်။
မီးဖိုဖွင့်ပြီး အိုးထဲကို ဆီထည့်လိုက်သည်။ ဆီကို ၅၀ ရာခိုင်နှုန်းလောက် အပူပေးပြီးသွားသောအခါ အပူကို လျှော့လိုက်ပြီး ငါးအရသာ ဟင်းခတ်အမှုန့်များ၊ မှို၊ မျှစ်တို့ကို ထည့်လိုက်ပါသည်။ ထို့နောက် ငါးအနှစ်ကို လောင်းထည့်ကာ ဟင်းခတ်အမှုန့်များ ထည့်လိုက်၏။
မွေးပျံ့သည့် ရနံ့တစ်ခုက ထွက်လာခဲ့သည်။ လင်းဖန််က အသားမျှကြော်ကို ကြော်လိုက်ပြီး ဆက်တိုက်ဆိုသလို ဟင်းအနှစ်များကို လောင်းထည့်နေသည်။ အညီအမျှ မွှေကြော် ပြီးနောက် အသင့်ဖြစ်နေပါပြီ။
အသားက ပျော့ပြောင်းသည်။ လတ်ဆတ်ပြီး နူးညံ့၏။ အရသာရှိသည့်ပုံ ပေါက်နေပါသည်။ လင်းဖန်က ယုရှန်းဝက်သားမွှကြော်ကို ယူလာခဲ့၏။
ဘာမှန်းမသိလိုက်ဘဲ ၈နာရီတောင် ကျော်သွားပါပြီ။ လင်းဖန်က စားပွဲအပြည့် ဟင်းလျာများ ချက်ပြုတ်ခဲ့ပြီး ထိပ်တန်းအဆင့် ဟင်းလျာများဖြစ်ကြသည်။
"ဝိုး... ဆရာ နင့်အစားအသောက်တွေက ဘာလို့ ဒီလောက်ထိ အရသာရှိရတာလဲ" စုရှောင်းယွီက လုံးဝ လင်းဖန်ကို သဘောကျသွားပါပြီ။
လင်းဖန်က ချောရုံတင်မကသေးဘဲ သူ့ ဟင်းချက် စွမ်းရည်ကလည်း အံ့သြဖို့ ကောင်းမွန်ပါသည်။ "ဟုတ်တယ် အရသာရှိလိုက်တာ" ရှားဝမ်ချွေ့က ရေချိုးပြီးပြီ ဖြစ်ပြီး ဘောင်းဘီရှည်ကို ဝတ်ဆင်ထားကာ သူမ၏ ကိုယ်လုံးကိုယ်ပေါက်ကို ပေါ်လွင်နေစေပါသည်။
ကောင်မလေးနှစ်ယောက်တွင် နှင်းလိုဖြူဖွေးသော ခြေတံသွယ်သွယ်များရှိကြသည်။ လင်းဖန်က စိတ်ဓာတ်ခိုင်မာသည်။ မဟုတ်ပါက သည်းခံနိုင်မည်မဟုတ်ပါ။
"လင်းဖန် အရှက်မရှိတဲ့ကောင်" ရှားဝမ်ချွေ့က လင်းဖန်၏ အကြည့်ကို မြင်ကာ မျက်နှာ နီရဲသွားပါသည်။ စောင်တစ်ထည်ကို ယူလိုက်ပြီး သူမ ခြေထောက်ကို ဖုံးကွယ်ထားလိုက်ပါသည်။
"အာဝူး အရှက်မရှိဘူး အရှက်မရှိဘူး~~" စုရှောင်းယွီကတော့ ဂရုမစိုက်ပါ။ အစားသောင်းကျန်းသူလေး တစ်ယောက်လို ယုရှန်းဝက်သားမွှေကြော်ကိုသာ ဆက်စားသောက်နေပါသည်။ သူမ၏ ပါးစပ်က ဆီများ တဝင်းဝင်း ဖြစ်နေ၏။
"ဟွန်း အကျင့်မကောင်းတဲ့ လင်းဖန် နင်ထပ်ခိုးကြည့်ရင် ငါကိုက်မှာနော်" ရှားဝမ်ချွေ့က နူးညံ့စွာ ငေါက်လိုက်ပါသည်။ သို့သော် ရင်ထဲမှာတော့ အနည်းငယ် ပျော်ရွှင်နေမိပါသည်။
"ကြီးတာလည်း မဟုတ်ဘဲနဲ့ ဘာကြည့်စရာ ရှိလို့လဲ" လင်းဖန်က ပြောလိုက်၏။
"အရူးကောင်" ရှားဝမ်ချွေ့က လင်းဖန်ကို ကြည့်လိုက်ပါသည်။ သူမ၏ မျက်နှာက နီရဲသွားပြီး ဒေါသထွက်သွားသည်။ သူမ ရင်ကော့လိုက်၏။ သူမရင်ဘတ်က မသေးပါဘူး။
"အစ်မဝမ်ချွေ့ သူ့ကိုကိုက်လိုက်စမ်း" စုရှောင်းယွီလည်း အလွန်ဒေါသထွက်သွားသည်။ သူမကတော့ အစကတည်းက ရင်ဘတ်သေးသူဖြစ်တာကို လင်းဖန်က ဒီလိုပြောရဲသည်။
တစ်ဖက်တွင် ရှားဝမ်ချွေ့၏ မန်နေဂျာဖြစ်သူ ယန်ချင်းက လှိုင်းပြာပင်လယ်အော်အိမ်ရာ၏ ဝင်ပေါက်တွင် ရှိနေပါသည်။
တံခါးအပြင်ဘက်မှာ အတားခံထားရပြီး လှိုင်းပြာပင်လယ်အော်အိမ်ရာထဲ မဝင်နိုင်ပါ။
ယန်ချင်းတစ်ယောက် အသက်ရှင်စရာ ဘာအကြောင်းမှ မရှိတော့ဘူးဟု ခံစားနေရပါသည်။ သူမ၏ ဘော့စ် အော်ငေါက်တာကို ခံရဖို့ မျှော်လင့်ထားပြီးသားဖြစ်သည်။
ရှားဝမ်ချွေ့ကို သေချာ မစောင့်ကြည့်ခဲ့ရုံတင် မကဘဲ စုရှောင်းယွီကိုလည်း သေချာ မစောင့်ကြည့်ခဲ့မိပါ။
ရှားဝမ်ချွေ့နှင့် စုရှောင်းယွီတို့ နှစ်ယောက်စလုံးက နတ်သမီးလေးများဖြစ်သည်။ သူတို့၏ ပုံရိပ်နှင့် ဂုဏ်သိက္ခာကို ထိခိုက်စေနိုင်သော အရာများကို သတိထားသင့်သည်။
နောက်ဆုံးတော့ နတ်သမီးလေး နှစ်ယောက်စလုံးက လင်းဖန်နဲ့ ဒီလို အတူတူနေနေကြတာလား။
အခန်း(၅၁) ဇာတ်ညွှန်းလိုတယ်
ဒင်... ဂုယ်ယူပါတယ် သခင်လေး။ အောင်မြင်စွာ Sign-in လုပ်နိုင်ခဲ့ပြီး [အဆိုတော်နတ်ဘုရား : မာစတာ အဆင့်] ကိုရရှိခဲ့ပါပြီ။
သက်ဆိုင်ရာ အချက်အလက်များ သခင်လေး၏ စိတ်အာရုံထဲ ဝင်ရောက်သွားပြီဖြစ်ပြီး မှတ်ဉာဏ်ထဲ ပုံသေရှိနေပါပြီ။
စနစ်အသံထွက်လာခဲ့သည်။
နေ့သစ်တစ်နေ့တွင် လင်းဖန်နိုးလာပြီး စကေးအသစ်တစ်ခုကို ရခဲ့သည်။
အဆိုတော်နတ်ဘုရား မာစတာအဆင့်တဲ့။
သို့သော်လည်း လင်းဖန်က သီချင်းဆိုရတာနဲ့ ရင်းနှီးပြီး တူရိယာအားလုံးကိုလည်း ကောင်းကောင်း သိသဖြင့် အလကား ဖြစ်သွားပါသည်။
သူက အလွန်ချောမောသည်။ ဂစ်တာနှင့် စန္ဒရားများကို တီးခတ်နိုင်ခြင်းနှင့် ပေါင်းစည်းလိုက်ပါက တက္ကသိုလ်တွင် မရေမတွက်နိုင်အောင် များပြားသော ကောင်မလေးများ၏ အာရုံစိုက်မှုကို ခံခဲ့ရနိုင်သည်။
ကျောင်းတွင်း အနုပညာ ဖျော်ဖြေပွဲတွင် မိန်းကလေးများစွာက လင်းဖန်ကို သဘောကျခဲ့ကြသည်။
ယခု မာစတာအဆင့် သီချင်းဆိုစကေးကို ရလိုက်ပြီဖြစ်သောကြောင့် သူ့သီချင်းဆို စကေးများလည်း အများကြီး တိုးတက်သွားလောက်ပါပြီ။ ဂီတသီအိုရီမျိုးစုံနှင့် ဒီကမ္ဘာကြီးထဲမှာ တစ်ခါမှ ပေါ်မလာတတ်သည့် သီချင်းမျိုးစုံတို့က လင်းဖန်၏ စိတ်ထဲ ဝင်ရောက်လာပါသည်။ "ဒီမာစတာအဆင့် သီချင်းဆိုစကေးကိုရလည်း ငါ့အတွက် ဘာမှ အသုံးမဝင်ဘူး။ ငါ စူပါစတား မလုပ်ချင်ဘူး" လင်းဖန်က ပြုံးကာ ပျင်းကြော ဆန့်လိုက်ပါသည်။ လင်းဖန်သည် အဝတ်အစားများကို ဝတ်ဆင်လိုက်ပြီး မျက်နှာသစ်လိုက်သည်။ ထို့နောက် ဂျင်မ်ဆီ သွားခဲ့ပါသည်။
လင်းဖန်၏ နှလုံးသား ရေကန်ဗီလာထဲတွင် ဂျင်မ်တစ်ခုရှိ၏။ ဂျင်မ်ကိရိယာမျိုးစုံ ရှိပါသည်။
ဒီလိုကြည့်ကောင်းသည့် ပုံစံမျိုးကို ထိန်းသိမ်းနိုင်ဖို့အတွက် အိပ်စက်ခြင်းနှင့် စောစောထခြင်းတို့အပြင် အရေးအကြီးဆုံးက လေ့ကျင့်ခန်း ပြုလုပ်ဖို့ပင် ဖြစ်သည်။
လင်းဖန်တွင် ဝမ်းဗိုက်ကြွက်သား လေးခုရှိနေပြီ ဖြစ်ပြီး ကိုယ်လုံးကိုယ်ပေါက်ကလည်း ကြည့်ကောင်းသည်။ တောက်ပသည့် သူ့ပုံစံနှင့် ချောမောမှုတို့ဖြင့် ပေါင်းလိုက်လျှင် ရိုးရှင်းသည့် ဝတ်စုံတစ်ခုတည်းနဲ့ လူများစွာကို ကြွေဆင်းသွားအောင် ပြုလုပ်နိုင်စွမ်းရှိပါသည်။
ရှားဝမ်ချွေ့နှင့် စုရှောင်းယွီတို့ လင်းဖန်၏ အိမ်တွင် ညအိပ်ခဲ့ကြပါသည်၊။ လင်းဖန်၏ အိမ်က ကြီးမားလွန်းပြီး အခန်းတွေ အများကြီးရှိတာ နှမြောဖို့ကောင်းပါသည်။ သူ့အငှားတိုက်ခန်းလေးမှာသာဆိုရင် သူတို့နဲ့ တစ်အိပ်ယာတည်း အတူတူ အိပ်နိုင်မှာ မဟုတ်လောက်ပါ။ လင်းဖန်တစ်ယောက် ကြမ်းပြင်ပေါ်မှာ အိပ်ရလောက်ပါသည်။
အပြေးစက်ပေါ်တွင် ၂ မိနစ်လောက် လေ့ကျင့်ခန်း လုပ်ပြီးသွားသောအခါ အနောက်ဘက်မှ ချစ်ဖို့ကောင်းသော အသံတစ်သံ ထွက်လာခဲ့ပါသည်။
"မြောင် မြောင်~" ရှားဝမ်ချွေ့က အဝတ်အစားများ ဝတ်ထားပြီးပါပြီ။ လင်းဖန်၏ အနောက်တွင် ချစ်ဖို့ကောင်းသော အမူအယာလေး လုပ်ပြလိုက်ပြီး ချိုမြိန်စွာ ပြုံးလိုက်သည်။
"ဟင်" လင်းဖန် အပြေးရပ်လိုက်ပြီး နောက်လှည့်ကြည့်လိုက်၏။
"ငါ... ဗိုက်ဆာလို့" ရှားဝမ်ချွေ့က ရှက်သွေးဖြာသွားပြီး မျက်တောင်ခတ်လိုက်ပါသည်။
"ဘာစားချင်လဲ" လင်းဖန်က ရှားဝမ်ချွေ့၏ ချစ်ဖို့ကောင်းသော ကြောင်နားရွက်လေးကို ကိုင်လိုက်ရင်း မေးလိုက်ပါသည်။
"အကုန်စားချင်တယ်" ရှားဝမ်ချွေ့က မနေ့ညက စားပွဲတော်ကြီးကို ပြန်သတိရနေဆဲဖြစ်ပြီး နှုတ်ခမ်း စူပြလိုက်ပါသည်။
"ဒါပေမယ့် ထပ်စားရင် ငါဝသွားလိမ့်မယ်။ အသီးအရွက်သုပ်ပဲ စားပါတော့မယ်~" ရှားဝမ်ချွေ့က သူမ၏ ပါးလှပ်နေသော ဗိုက်ကို ကိုင်လိုက်ပါသည်။
"ဒါကို ဝတယ်လို့ ခေါ်တယ်ပေါ့" လင်းဖန်က ရှားဝမ်ချွေ့၏ ဗိုက်ကို ကိုင်လိုက်ပါသည်။ မဝပါ။
"အရူးကောင် လင်းဖန် ငါ့ကို အနိုင်ကျင့်ပြန်ပြီ" ရှားဝမ်ချွေ့က ရှက်သွေးဖြာသွားပြီး လင်းဖန်ကို မောင်းထုတ်လိုက်သည်။
"ဝါး မနက်အစောကြီး သာယာနေကြပါလား။ နင်တို့နှစ်ယောက်က ခွေးလေးတွေကို ဘယ်လိုအနိုင်ကျင့်ရမလဲဆိုတာပဲသိတယ်" စုရှောင်းယွီက တံခါးမှ ခေါင်းပြူကြည့်လိုက်ပြီး သခွားသီးတစ်ကိုက် ကိုက်လိုက်သည်။ အရသာရှိလှပါသည်။
ရှားဝမ်ချွေ့ ရှက်သွေးဖြာသွားပြီး လင်းဖန်ကို ကြည့်လိုက်၏။ "ဟွန်း ရှောင်းယွီနဲ့ ငါ အသီးအရွက်သုပ် စားမယ်။ မစားရရင် ရှောင်းယွီကို ကိုက်ခိုင်းလိုက်မှာ၊ ခွေးတွေက အရမ်းအကိုက်ကြမ်းတာနော်။"
"ဟီးဟီး ငါတို့ ထပ်စားရဦးမယ်ကွ" စုရှောင်းယွီက မျှော်လင့်တကြီးနှင့် သခွားသီးကို လျက်လိုက်ပါသည်။
ကောင်မလေးနှစ်ယောက် မနက်စာ စားပြီးသွားသောအခါ စုရှောင်းယွီက လင်းဖန်ကို လေးစားစွာ ကြည့်လိုက်ပါသည်။
ငါးပေါင်း၊ ငါးစွပ်ပြုတ်၊ ငါးအရသာ ဝက်သားမွှကြော်၊ ကျောက်ပုစွန်၊ အကင်၊ ဟော့ပေါ့ စသဖြင့် လင်းဖန် ချက်ပြုတ်သမျှ ဟင်းလျာတိုင်းက အရသာရှိလှပါသည်။
သို့သော်လည်း အသီးအရွက်သုပ်ကို ဒီလောက်အရသာရှိအောင် သုပ်နိုင်သည့်လူမျိုး သူမ တွေ့ဖူးတာ ပထမဆုံးအကြိမ်ဖြစ်သည်။
"ဆရာ တကယ်တော့လေ နင်နိုင်ငံတော်အဆင့် ဘွဲ့လက်မှတ်ကို ရနိုင်မယ်ထင်တယ်။ နိုင်ငံတော်အဆင့် စားဖိုမှူးဆိုတာ အရမ်းမိုက်တယ်နော်" စုရှောင်းယွီက ပြုံးကာ ပြောလိုက်ပါသည်။
"ဒီလို တော်တဲ့ ဆရာမျိုး ရထားတာ တကယ်ကောင်းတာပဲ။ အစားအသောက်တွေကလည်း အရမ်း အရသာရှိတယ်။ ငါသာ ဒီမှာ တကယ်နေချင်ရင် မပြန်တော့ဘူး" စုရှောင်းယွီက သက်ပြင်းချလိုက်သည်။
ရှားဝမ်ချွေ့၏ စိတ်ဆိုးသော အကြည့်ကို မြင်လိုက်ရသောအခါ ချက်ချင်း စကားပြောင်းသွားပါသည်။ "မဟုတ်ပါဘူး၊ ဒီမှာ တစ်သက်လုံးနေလို့မဖြစ်ပါဘူး။ အလုပ်က အရေးကြီးတယ်လေ။"
မနက်စာ စားပြီးနောက် သူတို့သုံးယောက် ဂျင်မ်တွင် လေ့ကျင့်ခန်း ခဏလုပ်ခဲ့ကြသည်။
ထိုအချိန်တွင် ယန်ချင်းက ဖုန်းဆက်လာ၏။
ယန်ချင်းက စိတ်ဖိစီးမှုများဖြင့် တောက်လောင်နေပါပြီ။ နတ်သမီးလေးနှစ်ယောက်စလုံးကို လင်းဖန်က ခေါ်သွားသည်။ တစ်ယောက်ယောက်သာ ဒါကိုဖော်လိုက်လျှင် သူတို့နာမည်ပျက်သွားနိုင်ပါသည်။
လူအများကြီးဖြင့် ပလူးခြင်းက တားမြစ်ကိစ္စဖြစ်ပြီး အထူးသဖြင့် ရှားဝမ်ချွေ့နှင့် စုရှောင်းယွီတို့က နာမည်ကြီးနှစ်ယောက် ဖြစ်နေသည်။
ဒီကိစ္စ၏ အရေးပါမှုကို ယန်ချင်း နားလည်ရင်တောင် သူတို့ကို ဖျောင်းဖျရုံသာ တတ်နိုင်ပါသည်။
ဖုန်းဆက်ပြီးနောက် ရှားဝမ်ချွေ့နှင့် စုရှောင်းယွီတို့ အလုပ်သွားခဲ့ကြသည်။
ယန်ချင်း ကောင်မလေးနှစ်ယောက်ကို ကြိုပြီးသွားသောအခါ ကားထဲတွင် သက်ပြင်းချလိုက်မိပါသည်။
"ဝမ်ချွေ့နဲ့ ရှောင်းယွီတို့ နင်တို့ကို မဝေဖန်ချင်ပါဘူး။ ဒါပေမယ့် နင်တို့တွေလုပ်နေတဲ့ ပုံစံကြောင့် ငါတကယ်လန့်နေရတယ်။"
"ကံကောင်းလို့ အဲ့ဒီနေ့က ကုမ္ပဏီအပေါက်ဝမှာ လူအများကြီး ရှိမနေတာ။ မဟုတ်ရင် နင်တို့ လင်းဖန်နဲ့ အတူတူနေနေကြတာကိုသာ သိသွားရင်... ပြီးတော့ နင်တို့နှစ်ယောက် လင်းဖန်ရဲ့ စရိုက်ကိုကော သိကြရဲ့လား" ယန်ချင်းက ပြောလိုက်သည်။
"သူ့စရိုက်က အရမ်းကောင်းပါတယ်" ရှားဝမ်ချွေ့က ကားပြတင်းပေါက် အပြင်ဘက်ကို ကြည့်ရင်း ပြောလိုက်ပါသည်။
"ဟုတ်တယ် လင်းဖန်ရဲ့ စရိုက်က အရမ်းကောင်းတယ်။ သူလုပ်တဲ့ အစားအသောက်တွေကလည်း အရမ်း အရသာရှိတယ်။ သူက နိုင်ငံတော်အဆင့် စားဖိုမှူးတစ်ယောက်နဲ့တောင် ညီမျှတယ်" စုရှောင်းယွီကလည်း ခေါင်းငြိမ့်လိုက်သည်။
ကောင်မလေးနှစ်ယောက် လင်းဖန်ကို အလွန် ကာကွယ်ပေးနေတာကို မြင်သောအခါ ယန်ချင်း ခေါင်းခါလိုက်ရပါသည်။
လင်းဖန်ရဲ့ စရိုက်က ကောင်းနေရင်တောင် ရှားဝမ်ချွေ့နှင့် စုရှောင်းယွီတို့က အသက် ၂၀ အစောပိုင်းသာ ရှိကြသေးသည်။ ၎င်းတို့၏ အလုပ်အကိုင်က အခုမှ မြင့်တက်နေရုံသာရှိသေး၏။
ဒီတစ်ခေါက် တခြား သတင်းဆိုးများ ထွက်လာခဲ့ပါက သေချာပေါက် ရှားဝမ်ချွေ့၏ အလုပ်အကိုင်ကို ထိခိုက်စေပါလိမ့်မည်။ မိန်းကလေး နာမည်ကျော်တစ်ယောက်အဖို့ ထိုသတင်းဆိုးများမှာ ကြောက်ဖို့အလွန်ကောင်းပါသည်။
လင်းဖန်သာ မရေမတွက်နိုင်အောင် များပြားသော ပရိတ်သတ်များ၏ ထောက်ခံမှုကို ရလောက်သည့် အဆင့်အတန်းရှိလျှင် လင်းဖန်နဲ့ ရှားဝမ်ချွေ့တို့ သတင်းဆိုးထွက်လာလည်း ကြီးကြီးမားမား ပြဿနာမရှိပါ။
သို့သော် ယန်ချင်း၏ မျက်လုံးထဲမှာတော့ လင်းဖန်က ထင်သလောက် မထက်မြက်ပါဘူး။
လင်းဖန်က ဘယ်လောက်ပဲ ရုပ်ချောချော၊ ဘယ်လောက်ပဲ ချမ်းသာချမ်းသာ ပရိတ်သတ်များ၏ မျက်လုံးထဲမှာတော့ ရုပ်ချောချော စားသောက်ဆိုင်ပိုင်ရှင်လေးတစ်ယောက်သာ ဖြစ်ပါသည်။ ရှားဝမ်ချွေ့၏ အဆင့်အတန်းနှင့် မကိုက်ညီပါ။
ထို့အပြင် ဒီလို အမှားအယွင်းမခံသည့် ကာလတွင် ရှားဝမ်ချွေ့ ဇာတ်ညွှန်း လက်မခံတာ တစ်နှစ်နီးပါး ရှိနေပါပြီ။ ကောလဟာလများသာ ပျံ့နှံ့သွားခဲ့ရင် သူမ၏ ပြိုင်ဘက်များက ဒီအခွင့်အရေးကို ယူပြီး သူမ၏ အလုပ်အကိုင်ကို တိုက်ရိုက်တိုက်ခိုက်လာနိုင်သည်။
ရှားဝမ်ချွေ့ကို ပြောလို့မရလျှင် လင်းဖန်ကို သူမ သွားပြောမည်။
လင်းဖန် ဘယ်လောက်ပဲ ချောပါစေ၊ သူ့မိသားစု ဘယ်လောက်ပဲ ချမ်းသာပါစေ ယန်ချင်း ဂရုမစိုက်ပါ။ သူမက ရှားဝမ်ချွေ့၏ မန်နေဂျာဖြစ်ပြီး သူမကိုသာ ဂရုစိုက်ပါသည်။
တစ်ချိန်တည်းမှာပင် ဝေ့ပေါ် ပေါ်တွင် သတင်းတစ်ပုဒ် တရားဝင်ကြေညာခဲ့သည်။
ရှားဝမ်ချွေ့က ဒီတစ်ခေါက် Keep Running ရိုက်ကူးရေးတွင် ပါဝင်မည်။ စုရှောင်းယွီလည်း ပါဝင်မည့် တခြား ကြယ်ပွင့်များထဲ အပါအဝင်ဖြစ်ပါသည်။
Keep Running က နာမည်ကျော် ရသစုံရုပ်သံအစီအစဉ်တစ်ခုဖြစ်ပြီး ရှားဝမ်ချွေ့နှင့် စုရှောင်းယွီတို့က တစ်ပြိုင်တည်း ပါဝင်ကြမည်ဖြစ်သဖြင့် အွန်လိုင်းပေါ်တွင် ဗြောင်းဆန်သွားခဲ့ကြပါသည်။
ရှားဝမ်ချွေ့ ဖန်သားပြင်ပေါ်မှာ ပေါ်မလာတာ တစ်နှစ်လောက် ရှိနေပါပြီ။ ဒါက ရသစုံရုပ်သံအစီအစဉ်တစ်ခုတွင် သူမ ပထမဆုံး ပါဝင်ဖူးခြင်းဖြစ်ပြီး ရှားဝမ်ချွေ့၏ မရေမတွက်နိုင်သော ပရိတ်သတ်များစွာကို အံ့အားသင့်သွားစေခဲ့ပါသည်။
သူတို့ ကုမ္ပဏီထဲ ဝင်ရောက်လာခဲ့ကြ၏။
ယန်ချင်းက ရှုယန်နှင့် တွေ့ခဲ့သည်။
ရှုယန်က ထိုင်နေပြီး လက်ဖက်ရည်တစ်ငုံ သောက်လိုက်၏။ ရှားဝမ်ချွေ့နှင့် လင်းဖန်တို့က သူ့ကို မျက်နှာပျက်အောင် လုပ်ခဲ့သော်လည်း တည်ငြိမ်နေဆဲ ဖြစ်ပါသည်။
"ဆရာရှု" ယန်ချင်းက ယဥ်ကျေးစွာ ပြုံးလိုက်ပါသည်။
"အင်း ရှားဝမ်ချွေ့အတွက် ဇာတ်ညွှန်းကောင်းရထားပြီလား" ရှုယန်က မေးလိုက်သည်။
"မရသေးပါဘူး" ယန်ချင်းက သက်ပြင်းချကာ ခေါင်းခါလိုက်ပါသည်။
"ငါတို့ ဒီအတိုင်းဆက်သွားလို့ မဖြစ်ဘူးလေ။"
"ဒီနေ့ ကုမ္ပဏီတစ်ခုက ရှားဝမ်ချွေ့နဲ့ ကြော်ငြာရိုက်ကူးဖို့ ရပ်တန့်လိုက်ပြီး ကျားရှင်း ဖျော်ဖြေရေးက နာမည်ကျော်တစ်ယောက်ကို သူတို့ရဲ့ ပြောရေးဆိုခွင့်ရှိသူအဖြစ် ရွေးချယ်သွားတယ်။ အနုပညာလောကထဲမှာ ဝမ်ချွေ့ရဲ့ နာမည်က တဖြည်းဖြည်း ကျလာပြီ" ရှုယန်၏ အကြည့်များက နက်ရှိုင်းနေသည်။
ကုမ္ပဏီတစ်ခုက ရှားဝမ်ချွေ့နှင့် ကြော်ငြာကဏ္ဍကို ရပ်တန့်ခဲ့သည်။
ဘာကြောင့်လဲ။ ရှားဝမ်ချွေ့တွင် တစ်နှစ်လောက်အထိ မည်သည့် အလုပ်အသစ်မှ မရှိခဲ့သဖြင့် သူမ၏ နာမည် ကျလာသောကြောင့်ဖြစ်ပါသည်။
ကျားရှင်း ဖျော်ဖြေရေးကလည်း ဖျော်ဖြေရေးလောကထဲတွင် အလွန်စွမ်းဆောင်ရည်ရှိသော ကုမ္ပဏီတစ်ခုဖြစ်သည်။ သူတို့လက်အောက်တွင် အနုပညာရှင်များစွာ ရှိသဖြင့် ပြိုင်ဆိုင်မှုများစွာ ရှိပါသည်။
၎င်းတို့၏ ကြော်ငြာထုတ်ကုန်က ဦးတည်ချက် ပြောင်းလဲသွားခဲ့ပြီ။ ရှားဝမ်ချွေ့ကို သဘောမကျတော့သည့် ကြော်ငြာ ကုမ္ပဏီများ ရှိနေပြီဟု ဆိုလိုခြင်းဖြစ်သည်။ ဒီလိုအချိန် နောက်ထပ် မကောင်းသတင်းများပါ ထွက်လာပါက ရှားဝမ်ချွေ့ထက် အခွင့်အလမ်းများ ပိုနည်းပါးသွားနိုင်ပါသည်။
"စီအီးအိုလီက ရှားဝမ်ချွေ့ကို တခြား ဇာတ်ညွှန်းတွေ လက်ခံစေချင်နေတယ်။ အခုလက်ရှိ ပရိတ်သတ်တွေရဲ့ အကြိုက်နဲ့ ကိုက်ညီတဲ့ ဇာတ်ညွှန်းမျိုးတွေပေါ့။ ပြီးတော့ စီအီးအိုလီက ရှားဝမ်ချွေ့ကို ဘာမကောင်းသတင်းမှ ထပ်မထွက်စေချင်ဘူးနော်။"
"မဟုတ်ရင် အခုကြော်ငြာ ကုမ္ပဏီတစ်ခု ရပ်စဲသွားတာက အစပဲဖြစ်သွားမယ်။ နောက်ထပ် ၆လအတွင်း ရှားဝမ်ချွေ့သာ ဇာတ်ညွှန်းကောင်းကောင်းတစ်ခုမရနိုင်ရင် နောက်ထပ် ကြော််ငြာတွေပါ ရပ်စဲကုန်မှာ စိုးမိတယ်။ အဲ့အချိန်ကျရင် နင်မပြောနဲ့၊ ငါတောင် သူ့ကိုမကူညီနိုင်ဘူး" ရှုယန်က ပြောလိုက်သည်။
"ဆရာရှု ကျွန်မ နားလည်ပါတယ်" ယန်ချင်းက ခေါင်းငြိမ့်လိုက်သည်။
တကယ်ပဲ ဇာတ်ညွှန်းက ပြဿနာရှိနေပါသည်။
ရသစုံရုပ်သံအစီအစဉ်များတွင် ပါဝင်ခြင်းက မဆိုးသော်လည်း အလုပ်လုပ်မှသာ နာမည်ကျော်တစ်ယောက်ကို ဖျော်ဖြေရေးလောကတွင် ခိုင်ခိုင်မာမာ ရပ်တည်စေနိုင်မည်ဖြစ်ပါသည်။
သူ အခု အလိုအပ်ဆုံးက အလွန်ကောင်းမွန်သော ဇာတ်ညွှန်းတစ်ခုဖြစ်သည်။