_ الكاتبة : Duha_al amer 🦋
_ صوتو للبارت بنجمة
_ صلو على الحبيب محمد
_ بسم الله الرحمن الرحيم .
يا ربيع الحياة أين ربيعي أين أحلامُ يقظتي وهجوعي أين يا مرتعَ الشبيبة آمالُ شبابي وأمنياتُ يفوعي أين يا شاعرَ الطبيعة لحنٌ صاغه القلب من هواهُ الرفيعِ رددته مشاعري وأمانيّ ورفّتْ به حنايا ضلوعي يا ربيعَ الحياة ما لحياتي لونها واحدٌ بلا تنويعِ؟!
____________________________________
وأتى الصباح وافترشت الشمس قلب السـماء وأدلت بجدائلها الذهبية خيوط أمل تثنت على زجاج نوافذنا بغـرور تغـمز للأحلام بطرفها وتنقش حـروفاً يتلألأ نورها هـنا وهناك، جـعل الله لكم يومكم نوراً وبركة صباحكم أسعـد من سعـيد وصباحنا أسعـد بكم
نرمان : كاعدة اكل بالكافتريا الجو حلو ومغيم صديقاتي مندمجات وكل ثنين طامسات بسالفة
نسرين : شتكولين نونو
نرمان : شنو !
نسرين : يمعودة صار ساعة شنسولف
نرمان : خل اشبع واشد فيشة وياجن
زينب : عن نفسي ورا المحاضرة اروح للبيت
نسرين : اهوو انتي بكل طلعة هيج .
وتر : نونو بلة حموينج ميزوجون شمنتظرين هم تخدميهم وهم وحدج
نرمان : اني متعلمة عليهم وتعبانة من الدوام مو من البيت بالعكس بالبيت كلهم يساعدوني
وتر : شعلية علمودج
نسرين : هاي تريدج تخطبيها والعباس
وتر : شو انجبي بلا هل حجي
نرمان : رجعت اكل واحجي بكلبي .. حقها مشايفة فاروق من تجي الحالة
نسرين : اليوم منو يجي عليج
نرمان : نزار
نسرين : هاذة المغرور
نرمان : ضحكت وغصيت بالاكل .. خل يسمعج
وتر : بالعكس كلهم حبابين
نسرين : انتِ شجابج هنا متولين القسمج
وتر : لا باقية يمكم اليوم راح اضرب الدوام
نرمان : كمت دفعت الحساب واخذت جنطتي ورجعت للقسم خلصنة محاظرات وطلعت برا اتصلت على نزار .. قبل لتخلص المكالمة شفت سيارتة
نزار : يابة شلونهم
نرمان : زينة انت شلون يومك
نزار : على الله
نرمان : صعدت بالسيارة بصفة شفت وتر اجت تركض من بعيد وتأشر ..
وتر : اخذيني وياج
نرمان : طريقج مو نفس طريقي
نزار : لا نفسة
نرمان : باوعت علية مبتسم صعدت بالسيارة ليورا وسلمت ..
نزار : وين اروح هسة
نرمان : بيتكم بالعسكري مو ؟ ردت بهدوء
وتر : لا ما اندل بالضبط اروح وياج واخوية يجي علية العصر
نرمان : حسيت بيها تريد تروح وياي للبيت غصب سكتت .. جلبت بالكرسي ودنكت كالت
وتر : انت وين تشتغل
نزار : ابيع طماطة
وتر : دمك خفيف
نرمان : لا هوة محامي عندة مكتب
وتر : وشغلك زين اني احب الحقوق بس بابا ما قبل يكول كلة مشاكل
نرمان : اغلبية القضاية تنحل عشائرياً
نزار : ان شاءلله من باجر اعرض المكتب للبيع واجر مضيف والبس دشداشة وعكال واحط بجيبي جيسين حلال مشاكل يقوة الشغل
وتر : هههههه وحماج الثاني هم محامي
نرمان : مهندس نفط
وتر : هاا حلوو
نرمان : ضلت طول الطريق تسأل وصلنة للبيت نزلنا شفت الباب كلها احذية عرفت جاية رحاب هية مواعدة عمتي تريد تجي تشوفها اول ما دخلت تلكتني رحاب بوستني وحضنتني
رحاب : هلا هلا خية شلونج
نرمان : ابتسمت بخير الحمدلله .. وكفت رحاب تباوع الوتر من فوك ليجوة كصتها كص جانت تنورتها كلش قصيرة وقميصها ضاب على جسمها وهية صاحبة ضخامة .. لزمت ضحكتي من رحاب رفعت ثوبها وعدلت شعرها واصافحت ويا وتر
وتر : هلو خالة
رحاب : خلخالة تخلخل حلكج شني شفتيني بدشداشت البيت عبالج جبيرة
وتر : لا مو قصدي بالعكس احتراماً الج
نرمان : اخذت وتر وصعدنة فوك فتحت الباب البيت جان هادء ومرتب لان متعودة انضف واطبخ للغدة باليل قبل لا انام كعدت وتر على القنفة بالهول استأذنت منها ورحت للغرفة شفت كنان وعلي نايمين بغرفتي بدلت ملابسي لبست ثوب سمائي وشال رصاصي صار صوت بالكنتور قوي فز كنان
كنان : ماما
نرمان : عيون ماما .. اجة حضني وباسني بخدي
كنان : شوكت بعد متلوحين للدوام
نرمان : تريدني ما اروح بعد
كنان : اي
نرمان : يروحي حضنتة وعلي فز اجة يركض علية شمر نفسة حسيت اختنكت دفعتهم كعدو على السرير .. عدنة خطار بدلو ملابسكم ولبسو الجابهن الكم بابا ودخلو سلمو .. هزو راسهم وراحو الغرفة نزار لان كنتورهم هناك .. لملمت الغرفة وطلعت شفت وتر كاعدة وفاروق ونزار مكابليها وكاعدين
_ اصبلكم غدة
فاروق : شلونج ام علي
نرمان : استغربت لطافتة وابتسامتة .. زينة الله يخليك
نزار : ابوية اشتعل من الجوع
نرمان : اشرت الوتر تجي وياي للمطبخ اجت وراية تمشي وتحجي بحماس
وتر : حموينج ممزوجين ثنينهم موو ؟؟
نرمان : فاروق مطلك وكنان ابنة ونزار ممزوج
وتر : اي حجتلي نسرين
كنان ، علي : شلونج خالة
وتر : اوووي حبيبي شلونكم اني زينة بشوفتكم
نرمان : هاذة كنان وهاذة علي .. جرت كنان الحضنها وضلت تبوس بي وتحضن اجة علي حضني من بطني
علي : ماما
نرمان : ها
علي : هاي المرة تخطف كنان
نرمان : لا ماما هاي صديقتي ..
وتر : اوووي حبيبي اعتبرني مثل ماما ماشي
نرمان : كلب وجهه عليها ونتر ايدها وطلع من المطبخ ويا علي هوة كلش يكره اي وحدة تكلة اني مثل ماما ..
_ طلعت تشريب من الثلاجة وبرياني حطيتهن على النار طلعت عندي اكلة اني مخترعتها حميتها بالفرن وهية راحت للممر تخابر اني طبعي ما اسنط بس صدفة اخذت سفرة جاي اطلع سمعتها تحجي والصوت صدى
وتر : ماما قنعي حبابة اني بالسوك ويا صديقاتي لتخلي يجي .. فد ساعة واني اخابرة .. كليلة راحت تستنسخ اي شي .. حبابة
نرمان : افتهمت هية جذبت على اهلها وعلية حتى تجي تشوف فاروق .. دخلت للصالة ونقلت الاكل ما قبلت تاكل مسوية رجيم
_ التمينة كلنا على الاكل وفاروق فاتح جهازة وياكل ..
فاروق : تفضلي يابة ويانة ميصير
وتر : بالعافية مسوية رجيم ما اريد اكسرة
فاروق : بس اليوم ولو انتِ ممحتاجة
نرمان : اجت كعدت صارت بصف فاروق كامت تاكل
نزار : بهمس .. هاي مخيلة علية
نرمان : شنو يعني
نزار : موضوع اكبر من عمرج
نرمان : عود اسأل حكيم
نزار : هاي شنو الاكلة !!
نرمان : شوف هية تشبه الشوربة والمركة يعني بيها كلشي بس طيبة .. شال الكاسة وشربها صاح
نزار : مرت اخي طعميني ولعند الله وديني
نرمان : ضحكت لان نزار ميسكت .. كملت وشلت السفرة شوية وكالت راح يجي اخوية
فاروق : اوصلج
وتر : لا دزيتلة لوكيشن
فاروق : انزل وياج
وتر : والله ما اله داعي طاهر متعصب شوية اخاف اصيرلي مشكلة
نزار : هاذة ما مطهر
نرمان : لزمت نفسي ما اضحك سلمت عليها ونزلت رحت للمطبخ اشتغل حسيت احد اجة
فاروق : احم
نرمان : تريد شي
فاروق : هاي وياج
نرمان : اي هية قسم واني قسم اصلاً صديقة وحدة اعرفهه مو صديقتي
فاروق : عجبتني خوش بنية
نرمان : غسلت ايدي وانداريت .. ماصار هواي من شفتهه شوكت عرفت خوش بنية
فاروق : مو صديقتج .. يعني زينه
نرمان : اكلك مو صديقتي اعرفهه
فاروق : انتو مو تريدوني ازوج
نرمان : اي
فاروق : اخطبها
نرمان : وتر!!! متناسبك ابد
فاروق : ليش اذا على لبسها سهلة
نرمان : كعدت على ميز الطعام .. لبسها تغيرة بس كلشي بيها ميناسبك لا تصرفاتها ولا شخصيتها ولتنسى انت عندك ولد يعني تحتاج بنية فاهمة وعاقلة
فاروق : انتِ معليج
نرمان : عافني وراح رجعت اكمل بالمواعين .. وجنت رافضة رفض نهائي قررت من يرجع حكيم افتح الموضوع ويا واحجيلة واطلع من السالفة بين قوسين اسوي العلية
_ خلصت المطبخ واخذت الجهال ونزلت يم عمتي ورحاب ونجاة هم جوة
رحاب : منو هاي الفرخة الجانت وياج
نرمان : هاي وتر صديقتي
اصيلة : شسمها !
رحاب : يمة تكلج عنتر
نرمان : وتر وتر
نجاة : اني ما ادري شبية اليوم راسي يوجعني ومعدتي تكلب
نرمان : خاف حامل
رحاب : لا استبراد
نجاة : لا يجوز حامل شمدريج استبررراد
نرمان : علكت بينهن .. صارت وحدة تكبس وحدة ترفع
نجاة : ليش حبيبتي شفتيني عاكر !
رحاب : لا بس لتنسين عندج اسقاطات وبالموت شفتي البنات
نجاة : ليش انتِ لو امج ماعدكم اسقاطات شو انتِ وكعتي ثنين وامج موكعة واحد ومخلفتكم درزن
اصيلة : شعلية وتحسديني سابتج يعمة
نجاة : لا عمة مو عليج على بتج الواكفتلي على الكلمة
نرمان : اندارت علية
نجاة : وانتي متحبلين يحضي دسمعين هسة يومين ويسمنج عاكر
نرمان : لا هية كلتلي عاكر ذيج الجية
نجاة : غميتها .. مبارك
باقر : السلام عليكم
نرمان : وعليكم السلام .. دخل بنص الهوسة وكح
باقر : عمة شبيكم صلو على النبي
رحاب : يابعد كلبي ماشفتك
نرمان : حضنها وسلم على بيبتة وعلى نجاة وابتسم بوجهي ..
رحاب : ياعمة ياصف صرت
باقر : ان شاءلله هل سنة قدمت على معهد اكاديمية بحرية
نجاة : يا فدوة ماشاءلله
نرمان : باقر رزن وكلش اخلاقة عالية ومؤدب دائماً يجي يشوف عمامة وبيبتة ويسأل عليهم عكس ابو الي من طلع بيت وحدة نسى عندة ام واخوان .. للمغرب نجاة راحت البيتها لان بناتها صغار نمنم متكدر تعوفهن ورحاب راحت ويا ابنها للسوك واني صعدت فوك اريد انضف وانام
فاروق : ابوك ميندلنة !
باقر : لا عمي ابوية مريض
فاروق : شبي شو مندري
باقر : تخربط قبل اسبوع واخذتة للمستشفى كلبة خفقان
نزار : كلة ضارب ثنين زرك وامك خابطة وطابتلة
فاروق : وامك متكعد راحة من وعيت على الدنيا هية بكد امي
نزار : منذ نعومة اظافري امك وابوك يخبطون
نرمان : الولد خجل كمت طبيت للغرفة ما ادري اضحك ما ادري انقهر ..
صباحاً ..
_ كعدت على صوت دك الباب قوي شوية ويكسرها صاح
فاروق : فضيها اني متأخر
نرمان : ركضت للكنتور لبست بنطروني وقميصي لبست سترة طويلة وجنطتي اخذت الاحتاجة وطلعت غسلت وحطيت مرطب كلشي ما لحكت نزلت لكيتة بالسيارة كاعد وميتحاجة
_ صباح الخير
فاروق : صباح النور
نرمان : ابد ما حجة الطريق كلة يدكون علية ويرفضة ازدحام شارع الجامعة نزلت قريب الكلية وكملت مشي طبيت نسرين منتظرتني
نسرين : شبيج اليوم وجهج اصفر
نرمان : انخبصت منورا فاروق الحقنة
نسيرين : تعاي راح تبدي المحاضرة
نرمان : من تمر محاضرتين جرة وحدة احس راسي ينفجر من التركيز .. طلعت عيوني مغوشة رحت للنادي ناكل
وتر : تاكلون بدوني
نرمان : سلمت وكعدت انغثيت من تصرفها البارحة ومياعتها ومن حجيت النسرين انصدمت
نسرين : بعدج ويا علي
وتر : يا علي !
نسرين : هسة كمتي متعرفي
وتر : علي زميلي ماعندي شي ويا
نسرين : يعني اني اكول خاف جاي ترسمين البعيد .. اذا سألو عنج بالكلية يكولون للحبيب بكل مرحلة 5 بعين الحاسود
وتر : شنو قصدج تعايريني ! ليش منو بيكم ماعندة ماضي الحياة تجارب اني ممسوية شي غلط وسمعتي مثل الورد محد كلج علية رايحة البيت واحد لو خاتلة بحديقة لو لاكفيني جوة الجرباية كل الاعرفهم زملائي
نرمان : متقصد نسرين بالعكس هية تحبج وتنصحج
نسرين : شدعوة ارعصتي
نرمان : سكتو واني كمت جبت ببسي رغم الجو بارد بس احبة ويا الاكل سمعت واحد صاح
_ اوكفي عمو
نرمان : جان اكو هواي ناس التفتت شفت ابو فاطمة رجال جبير وموضف بالجامعة جان واكف ويأشر علية .. استغربت
_ تعاي عمو
نرمان : تقدمت قريب علية واكفة .. تفضل عمو
_ انتِ نرمان عماد
نرمان : اي
_ بعد عمج اكو وليد شاب البارحة اجة يسأل عليج وانه ما انطيتة نجدة واليوم رجع وطلع جنسيتة يكول اكربلها ورايدها بحجاية
نرمان : انصدمت منو هاذا !!! .. لا عمو فدوة ما اكدر كولة مموجودة اني ماعندي اقارب هنا بالبصرة
_ والله ياعمي الوليد بالباب تريدين تجين تشوفي ما تريدين بكيفج
نرمان : بلحظة فكرت هواي ما اجة ابالي غير حكيم يجوز صايرلة شي وهاذة من طرفة بدون تردد مشيت ورا ابو فاطمة للباب
_ عمو ذاك الوليد الابس اصفر
نرمان : بس شافني التفت مبتسم .. ولد ضعيف واسمر يطلع شوية اطول مني لابس بنطرون اسود وقميص اصفر وشايل جنطة سفر صغيرة
العمارة .. قلعة صالح
————————————————————
روح : كاعدة بصف الثلاجة عندي طلبية كيك مهر من الفجر كاعدة اشتغل حتى يوصلهم بالوقت المحدد الفلاونزة شاكة صدري وامي اطب وتطلع تذمر مراضية على شغلي
سلوى : ليش شالعة كلبج كله صوجي خليتج تشتغلين
روح : والله اني من زمان كلت احب اعتمد على نفسي .. دنكت عليه
سلوى : بهمس .. روحي لبيت سيف كنكي وطلعي قبولج قبل ليجي جدج
روح : شهكت وكمزت من الفرحة .. طلعت القبولات !!!!!
سلوى : اي روحي وتعالي بشريني
روح : يمة فدوة خلي الكيك القطع بكارتون والمربعة بكارتون وحدها ما الحك .. ركضت للغرفة لبست عباية وطلعت دكيت الباب فتحتلي رسل
رسل : سمعتي طلعت القبولات
روح : لعد ليش اجيت .. كعدت بالحديقة متربعة فتحت جهازي وخليت رقمي الامتحاني
رسل : اقري الفاتحة الام البنين
روح : ماكدر ارجف اقريها انتي .. لا باعي هاج انتي شوفيلي القبول خاف اتخربط
رسل : جيبي .. تم قبولك في جامعة بغداد كلية الخوف
روح : امداج وكفتي كلبي يابغداد
رسل : لا لا طلع .. تم قبولك في جامعة البصرة كلية العلوم
روح : صوجي اني اجيت يمج مابية حيل اجذبين علية فدوة
رسل : والقران
روح : والقران شنو !
رسل : قبلوج بجامعة البصرة كلية العلوم
روح : جريتة من ايدها .. هاي صدك !
رسل : شو مافرحتي
روح : ابتسمت بقهر .. بالعمارة ميقبلون اداوم انوب بالبصرة يعني اقسام داخلية ودفع ايجار احنه يادوب مكفين العيشة
رسل : وليش مصعبتها مو بيبتج بالبصرة روحي كعدي يمها وكملي دراسة ورجعي
روح : هيج سهلة بحلكج عبالج يرضون انتِ متدرين جدي بالشافعات خلاني اكمل للسادس
رسل : دكومي خل اجيبلج مي وارتاحي ونحجي
روح : لا شكراً راجعة للبيت خاف يجون وميلكوني .. رجعت للبيت اول ما طبيت تلكتني امي
سلوى : بشري يمة كلبي بالنار عليج
روح : جامعة البصرة كلية العلوم ونزلت دمعتي ..
سلوى : يابعد كلبي يايمة لتبجين
روح : يمة لازم اداوم تعبي وكسرة ضهري كلة يروح ترضيها
سلوى : خل يجي ابوج وان شاءلله ميضيعلج تعب
روح : صعدت فوك كعدت يم باب السطح حتى اكنك على بيت رسل لان جدي ميقبل عدنة نت .. هاذة حال كل بنات عائلتي لا نت ولا دراسة ولا طلعة ولا طبة تقريباً الكل تحمل ذنب عمتي الي انهزمت من البيت بسنة 2006 وجدي من ذاك الوكت خلا الكل يدفع الثمن بنات عماتي يدرسون لان متزوجين غربة وعمامي بناتهم الي تزوجو صغار والي بلا دراسة بس اني كسرت القاعدة وخلتني امي اداوم برغم ماكو شي ما سوا جدي حتى يمنعني وجان الي يتحمل كلشي بمكاني امي ..
_ للمغرب سمعت اجة بابا وجنت منتظرة ردت فعلة على نار ..
يعقوب : تريددددين اكول الابوية ندز روح للاقسام الداخلية اداوم بالبصررررة انتِ مخبلة وتدرين بية اركض والعشة خباز الكلية متريد مصرف
سلوى : اسكت ليسمع فدوة اروحلك
يعقوب : سدي الموضوع البنية تقرة وتكتب ومثقفة كافي بعد
روح : عرفت ابوية ميقبل كمت توضيت وفرشت سجادتي كعدت اقرأ قران وادعي ربي كون يسخر القلوب ويقتنعون اداوم
_ مرت الايام وصار اسبوعين على القبول وكالو لازم اروح للكلية واكمل تسجيلي امي لحت مرتين وبعد ما فتحت السالفة واني دخلت بحالة اكتئاب وفرحتي صارت حزن
سلوى : اليوم ام علي تريد كيكة العيد ميلاد حفيدتها
روح : ما اسوي كليلها بطلت
سلوى : دكومي سوي شوية غيري من نفسيتج وهم شكم فلس تفيدج
روح : شسوي بيهن جنت الم اريد اخذ هدوم للجامعة هسة ماريد كلشي اخذيهن انتِ
سلوى : يمة بيدي شي وما سويتة اصبري بلكت ربج يلين الكلوب
روح : واني اضل كلشي بحياتي بالشافعات اتوسل حتى على دراستي الوصلتلها بتعبي وكسران ضهري .. طلعت من الصالة اخذت موبايلي واتصلت بيبي الهام وحجيتلها كلشي
الهام : هاذة جدج المصكوع ابو راس الاحدب مايعتكج
روح : بيبي شلون انهزم !
الهام : اكلي نعل ام وجه الابلك تنهزم انعل ابوج لابو الجامعة تريدين تسوينة علج
روح : يو بيبي اشاقة وياج شبيج لا ما انهزم بس اجي يمج اداوم
الهام : ساعة الهنية التجين بيها احطج بعيني
روح : وبابا وجدو !
الهام: هسة روحي كملي كيكتج ويحلها ربج
روح : سديتة وكمت سويت الكيكة للمغرب جهزت ودزيتها بيد حمد اخوية بالليل كمت احوص اريد ماما تحاجي جدو بس هية قافلة متحاجي شوية وسمعت جهاز جدو دك قريت الاسم بيبي الهام وديتلهيا
عقيل : الوو شلونج حجية هلا بيج
روح : وكفت ارجف عرفت راح تكلة ماخليت دعاء اعرفة ما قريتة شوية وسمعت صوتة صدى بالحوش
عقيل : حجية ماعدنة بت تكمل وتدخل كليات وبت ابني ماتطلع من دارها وماتكعد عند النسابة انه اعزج وانتِ من ريحة المرحوم اتمنى ماتخلين نفسج بهيج موقف .. رحم الله والديج مع السلامة
روح : انسد الخط وفجأة زمخ بصوت عااالي
عقيل : سلوووووى
سلوى : ها عمييي بيك شي
عقيل : مرة ثانية ماتشكيني للغربة عندج چلمة تكوليها الي هل مرة احترمت الحجية بس مو الخاطرج مرة ثانية تشوفين الوجه الاسود
روح : هزت راسها وراحت التفت علية
عقيل : جدي لتخلين امج تحجي براسج انتِ مثقفة وفاهمة البنية تاليتها تزوج وتخلف الدراسة متكبر بختج
روح : باوعتلة بقهر ومارديت علية بابا جان واكف يلوب يخاف تصير مشكلة .. تقريباً ابوية شخصيتة ضعيفة بالبيت ودائماً الكل يمشي كلمتة علية حتى ولد عمي
يعقوب : بوية مثل متكول وروح ماتعاند جدها
روح : عفتهم وطلعت ماشوف دربي صعدت فوك اجتي امي وراية
سلوى : لتبجين
روح : ما ابجي بس ماضل هنا
سلوى : يمة سودة بوجهي تريدين اشمتين بية الوادم تريديهم ياكلون وجهي ربيتج وكبرتج تنزلين راسي وراس ابوج راح تنهزمين ررررروح
روح : لا يمة مو اني الانزل راسكم بس ترضيها
سلوى : يمة بعد كدامج شهر باجر اخابر عمج محسن يحاجي جدج
روح : يمة عمي محسن بناتة ميعرفن يقرن ويكتبن وعادي عندة بطلهن بالخامس ابتدائي تريدين يقنع جدي اداوم كلية !!
سلوى : ابوج جاي يصيح خل اروح وباجر يحلها الحلال
روح : طلعت من الغرفة حضنت فراشي وكتمت نفسي ونزلت دمعتي .. سمعت صوت الباب
حمد : شني متي ولج روح ! اذا تموتين موبايلج الي مو تاخذة امي وتنطيني مالتها ..
روح : شلت راسي .. اسم الله علية
فاروق ..
_اسمع .. حينما يفقد الحب معنى الطهارة والصفاء يصبح سلعة رخيصة متداولة تتقاذفها ألالسن بدوافع دنيوية وغرائز شهوانية ..
رحيم : الله عليك فاروق درويش تعشق الغرائز
فاروق : رفعت الخوذة على راسي ولبست اليلك نزلت نضارتي على عيني ابتسمت جريت نفس اقوى من الجكارة وحبست الدخان بصدري دخلت بنية شكرة خرب شيطانهه على هل حسن
رحيم : تفضلي اختي
_ عندي بريد من الوزارة اريد اسلمة للمدير
فاروق : المدير طالع .. شنو اسمج
_ سارية
فاروق : زين سارية هسة شلون بله .. تجين وياي للمكتب نحلهه
_ ابتسمت بدلع .. وين المكتب بعد مابية حيل امشي الحذاء ضيق
فاروق : سيارتي قريبة .. نزلت بالدرج الحديدي تمشيت مسافة وهية سبقتني مثل الغزال تمشي وتتمايل بمفاتن جسمها
_ وكفت بالكراج انحنت للكاع نزعت حذائهه رابطتة بخيوط رفعت شعرهه وصعدت بالسيارة بدون اذن
سندس : فارررروق استااااااااااذ فارررروق
فاروق : التفتت .. نعم !
سندس : هاي منو ليش صاعدة وياك تدري من شفتك تخبلت كلبي وكف احجي منو هاي
فاروق : بريد من الوزارة واتوقع مكان عمل يله تفضلي
سندس : وشعندة البريد صاعد وياك
فاروق : نترت ايدها ليورا .. صيري عاقلة تدرين بية اذا ازعل متلومين الا نفسج
سندس : بهاي تصرفاتك تحاول تخسرني مو!!
فاروق : روحي هسه واخابرج
سندس : اني ليش مو من حقي اعرف وين رايح ومنين جاي ليش تعذبني لان اغار عليك
فاروق : انتِ مصدكة نفسج حيل سبق وحجيت هاي الوكفة متوكفيها كباالي امشي روحي وحسابج بعدين
انتظروني .... ❤️
سويتلكم انتظروني بمكان يتبع لان تكرهوها 🤣🤣🤣🤣🫶🏻