روح في بحر الظلام

الحلقة السادسة والعشرون

روح في بحر الظلام

____ الكاتبة بحر _____

بنات كل اللي تمر من هنا ارجوكم لتنسون التقييم

بالنجمة والتعليق  بين الفقرات لا ينزل تفاعلكم اكثر لان استمد قوتي منكم

+++لتنسون اضافة الحساب لطفا

بحضووركم اشد ازري واستمر يرويحاتي🫂💞

⭐🌟⭐

__________________

رانيا

دخلت للحمام وراي وسدتهه للباب نضراتهه الخائفة وابتسامتهه المجنونة دليل على خطورة موقفي نصرة ماكانت ضخمة جدا لكن اطول مني ولا كانت سمينة جدا لكن تبقى اقوى مني واذا اريد اقارن بالقوة راح اخسر اني، لان كنت مريضة معنفة فماكان اللي حل غير طلب النجدة

بفمي الممزق من الداخل ماكنت اكدر اصرخ بكل صوتي لان داخل الفم كان اشبه بأشواك عالقة بكل مكان بسبب الجروح المفتوحة

بس شافتني بجيت وبديت احاول اصرخ طلعت من جيبهه موس حلاقة الموس الرفيع الحاد من طرفيه الاثنين، هذا الموس بالذات انا اكرهه ما اخاف من السكين بقدر خوفي منه بلحضتهه بقيت بس اباوعلهه بعيني السليمة وارتجف واصيح لكن اصيح عليهه مو طلبا للنجدة لان هددتني  من حجت

نصرة:اسمعي ولج ما اخاف من اكبر واحد بس يكضوني يكتلوني هو انا مكتولة مكتولة، اذبلي لحمة من وجهج يلا اخليهم ياخذوني سسدي حلكج واسكتي تقربت مني كملت كلامهه.. جنت اريدج ورة ما تطيبن بس ما اصبر بعد

مادة الموس لوجهي من خوفي ضليت بس ابچي مدت ايدة تضحك بجنون لمست مناطق محرمة جسمي، باللحضة رب العالمين ربط على قلبي وكان خوفي من الله اكبر من خوفي من الموس اللي بأيده 

ملت برأسي للناحية الاخرى ودفعت ايدهه  تحركت ثلاث خطوات وهذه كانت مساحة الحمام صرخت صووت عاالي صوت انسان مرعوب يارب محد يعيش لحضات الهروب المرعب. لانه تاخذ من عمرك سنين،... صرخت هالصوت وحطيت ايدي على قفل الباب الحديدي بس قبل ما اسحبه  ذراعها التف على رقبتي

وگعت بلارض وهي گعدت بضهري مطوقة رقبتي مادة رجلية ارفس بالباب واباوع من تحت الباب اشوف رجلين  ليش ما ينجدوني ليش ماينقذوني  شددت ضغطة ذراعها على رقبتي اختنگت لدرجة عيوني نطت صار يخرج مني صوت فحيح مو صراخ  قبل لا افقد الوعي سمعت ضرب على الباب

هي عافتني وضربت راسي بالحايط انتهيت ما احرك لا ايد ولا رجل لكن عقلي واعي اسمع يصيحون،،، تعالو ششيلوهاا ودنهااا هناااك

وصوت صراخ نصرة يرج كانت تنضرب حسيت انرفعت من الارض. ودومي للغرفة الخامسة، ماعندي تفسير لبقاء عقلي وموت جسدي لكن هذا اللي صار. اسمع كلشي وعيني مفتوحة بس عاجزة عن الحركة

غسلولي وجهي وحطن تحت راسي وسائد هواي  وادين سعاد على راسي وگلبي وتقرأ قران السور القصيرة، غمضت عيني نمت هادئة

من گعدت كان واضح انه وقت المساء، كلوحدة بأيدهه  كاسة شوربة وخبزة عددهم كثير بيهن گاعدات يوة وبيهن لا وحدة ووجههم مغبرة منزعجة

كمزت من لمسة ايد سعاد:هاا بيبي گعدتي... هزيتلهه راسي وحركت نفسي نزلت من سريرهه اريد اكوللهه شكرا.. ولزمتني گحة قوية بلعومي بي الم فضيع

سعاد:تعاي تعاي جدة اكعدي هنا سودة علية خصمهه محمد خصمهه علي واولادة...عسا الله يطلع حوبتج بيهه بالدنيا گبل الاخرة

حجت وحدة بأستهزاء

امل: لعد خو ادعي يخلصهه

:يخلصها وينصرهه حشا لله يترك عبادة، هاي دنيا احنا بأختبار اليختبرة بصبرة على السجن واليختبرة بصبرة على المرض واليختبرة بصبرة على والديه واذيتهم وهوواي، وان شاء الله تعدي اختبارهه بسلام صابرة محتسبة

بس انتن شلون بيجن الله راح يحشرجن وي قوم لوط عبنجن لا عفة ولا دين ولا مخافة الله مخاويات الشيطان عسى الله ينجينا من عذابه وغضبه

جانت تطك بعلجهه وتستهزء، سيماهم في وجوههم تحس رب العالمين من سوئهم مخلي عليهم علامات، تباوعين عليهه تحسين هلانسان مسوي شي غلط اغلاطهن كانت بيهه غضب لله وعبادهه

في ما بعد اكتشفت ان مو بس نصرة اكو ثلاثة مثلهه نصرة وامل ورسن

رسن بلاصل اسمهه رسمية، لكن مانعه اي شخص يصيحلهه بهلاسم ، صرت مو بس اتجنبهم لا اذا صارو باليمين اصير بالشمال والعكس،

بالنهار نطلع نشتغل تنضيف غسل غسل ملابس، كلشي، مريضة صاحية بيج حيل مابيج حيل تشتغلين

من نرجع للغرفة هن ينامن واني اضل اعاني من وجع عيني ما انطوني اي علاج الهه والوجع ياكل بيه اكل مرات حسنة تقرة عليهه اكثر من مرة طلبتلي علاج ماكو باقي النساء يجي علاجهم الا انا مايقبلون

الى ان الوجع صار مايحتمل ضليت اصرخ، اخذتني وسن لمكان جان بي دكتور... وكفتني برة كالت لحد مايطلع الضابط عمر،.. صرت مو بس اخاف من اسم ضابط لا صرت احسه موت ويمشي بلارض من دا يطلع شافني

حاجة وسن شبيهه

:سيدي هاي رانيا عماد اللي الضابط قيصر منع التحقيق وياها  وحتى منع دخولهه للطبابة بس السجينات خبصن الدنيا ضاجن من بجيهه وخاف يكتلنهه

رفع حواجبه مستهزأ وكال فوتيهه وروحي، دخلتني مترددة.. واني ضليت ابجي عبالي همات راح يضربني لو يسوي شي

باوعلي خزني كال نفس ماا اسمع

حطيت ادية اثنينهم على حلگي امنع صدور اي صوت

اجا الدكتور سأل عن علتي.. شهالغباء يعني اكيد مو رجلي توجعني، متشوف شادة عيني

اشرتلة على عيني  نزع القماشة وكانت قذرة متيبس عليهه الماء والدمع والدم شمرهه بالزبل

وأمرني افتح، تعال شيفتح عيني كلبت الغرفة بالصراخ من الوجع سأل عن السبب

حجيتلة بصعوبة من شدة البكاء، الضابط واكف يمه بعدين ضربني ابرة بالوريد

طلع الدكتور كعدالضابط مقابل الكرسي مالتي حجيت متوسلة

:باوع والله والنبي وروح اخوي اني مالي علاقة بشي فدوة لتضربوني، حتى حتى اهلي واخوي والله ورطونة لويش متصدكون

:هنا محد يضربج اطمأني بس خليج حذرة من السجينات اللي وياج.. ثانيا اسمائكم معترف عليهه من قبل جميع المتهمين الاخرين لتكولين مالنا علاقة

:شلون لعد شسوي.. حجيتهه ودنكت حسيت بدوخة فضيعة سندت راسي على الميز بعدين اجت الممرضة والدكتور مشوني واني مسيرة مثل الالة

نيموني على السرير.. الممرضة تفتح بعيني اني اريد اوخرهه بس ايدي ثكيلة

الدكتور:هاي عدهه جرح ب بياض العين مو خطر بس ينزف اذا ما تعالج عينهه راح تروح

عمر:سجل علاجهه اني اجيبة اوصي علي اركان

وصى على عصارات وقطرات وابر التهابات

حسبت عدن خمسة ايام هدوء لا يخلو من كلام نصرة المقرف بعد ما رجعوهه لنفس الغرفة غابت يومين ورجعت، الضابط عمر كل يوم يستدعيني كان يطلب التفاصيل الدقيقة جدا للعائلة  عيني تحسنت شوية وبقعة الدم اللي بيهه صغرت وصارت بقعة صغيرة حول البؤبؤ والالم خف

اروح للضابط احجيلة عن زياد وكلشي صار وهو يسمع بملامح باردة خالية من الشفقة والاتهام ما اعرف افسر تعابير وجهة بس يباوع ويسمع ويكتب مرات ، يسمع مني ويسجل اسماء اثناء ما جاي اشرح شفته حط دائرة حول اسم شهاب.

بوقتها ما عرفت ليش، بوقتها من سألت وسن عن ابوية  وزياد كالت مو هنا يم الضابط رائد

تذكرت تهديد قيصر اللي، كل فكر ماباقي براسي  كال روحي اطلعي اذا مضلومين بالفعل حقكم ميضيع راح اسعى بقضيتكم اجتهاد من يمي كان شاب وعلى كتفة ثلاث نجمات نزلت اريد ابوس ايدة

سحبة وحجة بجدية :لا تتأملين هواي اذا فعلا اخوج الة علاقة ولو ذرة ومحاجيتلي راح انهيج والله

:سيدي والله والله مالة علاقة اخوي اعرفة اكثر من نفسي مو حجيت كلشي سواه

هز راسه وگال روحي بلكي ادبرهه. اجت وسن ووياها وحدة رجعتني، رجعت شافتني سعاد  شلون خايفة من نصرة وانهزمت لان جرت حجابي من دخلت طبطبت على المكان اليمهه گالت اگعدي

:لا تخافين انا وياج، وعلي ابو الحسن ينصرة لو اعرف اكتلج واروح بيج اعدام اسويهه جوزي من الفرخة وخلي وصاختج على گدج

:شتسووين تكتليني يالمجرمة مثل ما كتلتي عمج وابنة

:لااا شسسوي بكتلج وحدة نجسة كتلج مايفيدني بس تدرين شسوي بيج، وتعرفيني انا سعاد گول وفعل  وباوعي ل اصبع رجلج ويذكرج شسوي

اني صارت عيني مباشرة على رجل سعاد فعلا اصبع رجلهه الكبير مقطوع، رفعت عيني فازة على ضربة بجانبي شمرت علي دولكة استيل لكن خطتني  باوعتلهه كانت خازرتني بعينه ذات الجفون المترهلة بشدة وابتسمت بحقارة وراحت ماردت على سعاد

بقيت حاطة ايدي على صدري من الفزة، سعاد تمددت تحاول تخفي حزنهه بصوتهه العالي

لكن انا بالليل اشوف لمعة دموعهه قبل ما تنام، او بعد الصلاة، رغم ما مأذيتني وتساعدني لكن اخاف منهه، كلامهه كلة نتر وعياط

ليلة من الليالي گعدت تصلي  وشافتني ابجي ليلتهه شفت اهلي يحترگون بحلم او الاصح قولا كان كابوس،  تجاهلتني وراحت صلت من خلصت گالت كومي صلي،
كنت انتضرهه تطلب مني لان اخاف اتقرب ل اشيائها، صليت وكعدت اسبح بأدية

نزلت من سريرهه گعدت يمي بلارض، طبعا اني ماعندي سرير انام يم سعاد بلارض

اللي مخبلني بسعاد ساعة تكولي يمة ساعة جدة ساعة خالة واني مثلهه مرة اكوللهه بيبي مرة خالة هي

تكلمت بصوت حزين: انا صارلي عشر اسنين مسجونة كبرت گبل البحلي، بجيت ودكيت وونيت مثل حالج هسة، ابجي على وليدي مريض ضل خلافي، وبنيتي ياهو اليداريهه شابة صغيرونة، هسة كبرو اضنهم

دنكت تمسح الدموع الهاربة من محجر عينيها

:تالي  انا جدتج سلمت امري ل الله وودعت فريخاتي عند الماتنام عينة  بيد الله امنتهم وانا كلي ثقة بربي هيج اريدنج تصيرين النوح مايجيب نتيجة يبنيتي

الهنا ذيابة وشياطين مو نسوان لابسهن شيطان مالهم مجال للهداية الا معجزة من الله، خالتج انا اجيت للسجن جنت فاهية ماعرف الحال شنهي، وهاي نصيرة هذا حالهه من اسنين محكومة مؤبد عبن لزموهه تخطف بنات وتفعل ما تفعل وتبيعهن لهل العصابات..

شافتني فويهية كالت هاي صيدة سهلة،  حبتني بخدي مرة ولو جنت ما مرتاحة منهه بس سكتت، دورة الثانية ولنهه تريد تبوس براطمي

فززيت گمت على حيلي يييييع انا امك يجاسم انا الطاهرة العفيفة تكرب صوبي هالبلا اصل وانا ماجنت هيج سمينة جنت متربنة وقوية وانا جدتج واسحلهه من كفشتهه وافرغ حركة عمي ناصر وابنة بيهه وعلي ابو الحسن سطرتهه سطر

اجو بيومهه الشرطة وكتلوني بالصوندة بسببهه وماتابت ال.......... ردت انوب تريد تجيسني واكلبهه الج اشلع اصبع رجلهه بعضهه

قهقهت بضحكات حلوة تفتخر بنفسهه وكملت كلامهه وانا مبتسمة وقرفانة من نصرة  ومن العضة وموقها

:وعلي حسيت اسنوني طكن بعضمهه ضلت هنا محد بحالهه يعالجهه لومن تجرثم واكطعو من يومها وانا نصرة ما گربت صوبي ولا اي وحدة عبن يدرن بيه كارهه الدنيا

سألته مترددة وخايفة من ردة فعلها
3
تحسرت واخذت نفس وكالت :انا مضلومة بت ناس اجاويد ابوي جان صاحب بستان وخير وعندة هوش وحلال عندة اخو من امة بس يجدة مثل اخوة يوسف اذة ابوي هواي يشوه سمعته بين الزلم عندي خوان ثلاثة اخوي الجبير دمه حامي ماينجرع خبل مايفيد هينوب لو صار اعصاب يكض ناصر ويحمسة حمس ويطرده  وانا ابوي لا عندة زايدة ولا ناگصة لا بحياة امي ولا بمماتهه ساعة يكول للوادم هذا حلالي وهو بايكني

ساعة يكللهم معرس بالسر ،جم مرة بمرة اخوي يجتلة ويجتل ابنة ومايفيد يرد ردود على سوالفة يكل للوادم حلال جواد من فلوسي يمن راح فدوة ل اسم ابوي

هو الفكر منيلة حلال من قسم ورث جدتي ابوي اشترة الكاع وهو سافر البغداد صرف افليساته ومن رد وشاف خير ابوي تسودن، ساعة يصاحبة وساعة يتسودن علي

تاليهه بيوم من الايام اجا هو عمي ناصر كال انا اريد سعاد ذاك الوكت انا جنت عاقديني كال ماكو تفكون العقد وانا ابني رايده، طردة ابوي والعالم الخيرة صاحت علي اخوي سمع سبگلهم بالدرب بخيزرانة ووين اليوجعك جسرهم تجسر

غط عمي ناصر شهر ماكو خبر عنة

لومن اجا اليوم الميشوم انا جنت اتمشى وي ابوي ونلكط نبك من السدرة صاحلة كالة الحك يخوي  وليدي عالو علي ابوي مايقصر ابو كلب الحنين ركض وياه ولحكة اخيي

كلبي يعلم لو راد يصير شي يكرصني، جنت محزمة بعباتي فكيت حزامي ولحكتهم واشوف اخوي وابوي بذيج الضهرية مسبحين بدمهم بخرابة ال عاتي

ال عاتي عشيرة جانلهم بستان متخاربين علي خوان وضال مهجور بذيج الضهرية

ماگدرت تكمل حطت شيلتهه على وجهه وضلت تبجي ، ماتحملت كمت حضنتهه وبست راسهه طبطبت على ايدي وكملت

اهلي جانو ينزفون من كل مجان داير مدايرهم سبع ازلام بسجاجينهم  عمي من شافني ذب روحة على بوي

وضل يصرخ جذب ليش ولكم جتلتو حزام ضهري واحد من الازلام ركض على ابن عمي وطكة بسجينة والثاني صوب عمي بزرة هاي كلهه صارت من لچحوني

انا خالتج عرفت الخطة ركضت اصيح واصرخ بس محد شكاني عبن اخوي الحوك مات وابوي مات ضلولي اخيوان صغار

ماطولو بثلث اسنين واحد غرك بالشط والاخر طكته سيارة دكيت ونحت لومن عيزت(عجزت) على اخيواني

بالحيلة والمكر مال وحلال ابوي كلة صفة لعمي ناصر  انا مرة ورجلي مو على كلبي اخذ مرة فوكي صار عندي وليد وبنية وحرمتة علية

كتلة بعد هاي هية جزت روحي منك روح لمرتك الكسرتني بيهه من ورة ضهري

جدتج انا نادرة، رفعت اديهه وكالت بذني ادية بنيتلي غرفة وحمام وحوطتهن وكعدت ولميت بزري، انشلع كلبي بعيشتهم بس شسوي مالي حل ثاني لومن كبرتهم وليدي صخن بسنة من السنين وانصرع كبر وعود يفكه بس ضل وياه للكبر وابنيتي هسة اضنهه من عمرج هيج وعلي تشبهج شلون شعرج حلو وادياتج وركبتج اشوفهه بيج يا جدة.. حجتها وبجت وانا مابطلت بجي طول سوالفهه

ذيج السنة ويطب علية ابن عمي صرنة شياب بعد ولنه سكران

ابني سودة علية تلاوة وياه بس كضتة نوبة الصرع طاح بالكاع  وليدي لو طاح لزمن احطن وصلة بحلكة على يعض لسانة،، وهذا هجم على بنيتي ساعة خالتج حيرتي بس الله اليعلم بيهه اركض منا وارد منا واصرخ بكل صوتي

ركضت علي سحلتة من البت وشمرتة عاف الفرخة واركض لوليدي اللازمة الصرع واخنكة سحلت ردت ماوخر مايمي غير  يدة الهاون والوحة بيهه بكل حيلي ماي مخة صار بيهه ما اشوف الا عمي فوك راسي

جان عجوز وداكة المرض مد سلاحة علينة وانا روحي فرت على فريخاتي ركضت علي ثور طلقة صارت بزري وانا قريبة علي تكودت فوكه گبل لا يثور انوب والف العكال على ركبتهه  واجتله خلاص

وتالي ماتالي هاي انا هنا  هاي عشر سنين محد نشد عني اريد بس ريحة خبر عن بنيتي  وليدي ماااكو.. جانت تحجي وتمسح بدموعهه

طلع الصبح ودخلو جايبين الاكل دا اريد اسألهه شكد انحكمتي ودخلت وشرطية بيدهه كارتون

:راانيا عماااد عبد الخالق

وكفت اهتز من الخوف كالت تعاي شبيج مدتلي الكارتون اخذتة ورجعت

فتحت الكارتون وشفت اللي بي صرخت بكل صووتي لااااااا لااااااا

_________________________________

سرى

طلعت من الغرفة البنات مستغربة الصوت ونضرات البنات ونضرات ام مرتضى المنزعجة

تقربت من مروة وتكلمت بصوت ناصي

:شكو منو هنا
:عمامج وجايبين ناس انترست الديوانية
:شكو شبيهم بعد
:ديكولون عل اساس تروحين وياهم وترجعين بعد مايصير عرس صار ساعتين الدنيا مگلوبة
:ترة احنا عاقدين يعني بقت ع البدلة والطربگة ما اريدهم اني
:والله ما ادري، عمام الغفلة منين طلعولج هذول بالله

بقيت صافنة فشلانة منهم، احتد الصياح من حميد طلب يحجي وياي على انفراد كان يصيح بصوت عالي

حميد:انتم جابرينهه على الضلة هنا، ولا وين اكو بت ماتريد اهلهه تحشون براسهه علينه ترة مصير البزر يرد ل اهلة

خالو رد علي بهدوء:اخوية ترى البنية مو طفلة، من باجر نسويهه سكتة ويجون اهلكم نعقد محكمة ويتزوجون

:ماااااااكوووو مااااترهم  بعد انفضحناا لزوم ترد وتطلع من بيت ابوووهااا بلابيض بتنااا ما معيوبة حتى تسترونهه بسكتة،

مرتضى بصوت عالي:يعني والدهه هارب ووالدتهه توهه متوفية تروح تسوي عرس هسة

خالو عاط بي صوووتك دنتفاااهم لتصير همجي.. عرفتة يوجه الكلام لمرتضى لكن قصدة عليهم لان اصواتهم حيل عالية

:ومنگال هسة تعدي فترة وتطلع من اهلهه مرفوعة راس

كلام كلاام صياح صوت عالي قررو ان حميد يحجي وياي

دخل مرتضى ينتر حطي على راسج وامشي لعمج من عسى بالعما الشلع عينة

ماكان بي مجال للنقاش لبست ورحت للحديقة لكيتة كاعد على الرازونة مالت الشباك

تقرب مني بدون سلام ولا كلام وبنبرة تهديد بصوت خافت تكلم

:بسرعة تطبين جوة وتكلليهم اريد اهلي تلمين خلاجينج وتجين ويانا، غير هالحجي يابنت البغدادية خطيبج هذا النافش رويحتة علينة املص راسة

باوعتلة خازرتة بغضب ورديت بصوت عالي: لووو تموووت، خصووصا انت لوو تموت خطوة ما اخطي وياك فكو عني ياااخة انتو ماا تستحوون يومية طاردينكم ورادين علينة ما اريدكم ماا اتشرف بيكم اصلا تلعب نفسي منكم وروح ماماا

:وعلي الا اكسرة الا افجع امة بي، وخلي ابالج انتي السبب عندج مهلة ثلت ايام تخابريني اجي اخذج غير هلكلام يا قليلة الحيا والتربية اعيبة حبيب كلبج

بقيت خازرتة بغضب اتضاهر بالقوة عكس الرهبة اللي بداخلي، طلع من يمي يمشي سريع  بقو بعدهه مدة قصيرة وغادرو زعلانين

اني بقيت خاتلة بالحديقة شوية واجتني رقية كالت بابا يصيحلج

دخلت واني وراها اسقبلني خالو بأبتسامة ومرتضى يمة يباوع بتلفونة حجة وياي بنبرة مطمئنة،

: ماعليج منهم خالو شيردون يسوون خل يسوون

دنكت خجلانة رفعت عيني لمرتضى سوالي بوسةبالهوا بالخفاء صاحت مروة

:هاااا هااا شكوووو

:تف على هالجهرة مراقبتني عبالك رادار
نضرات ام مرتضى ماعرفت افسرهه بس ماكنت نرتاحة ابد

بعد الغدا دا نغسل مواعين اني ورقية دخلت خالة كالت رقية روحي اكوي قميص مرتضى خاف يطلع العصر

طلعت رقية كالت عوفي البيدج وتعالي  دا اريد احجي وياج غسلت ادية ومسحتهم وكعدت مدنگة راسي مترقبة لللي راح تگولة على كرسي الطاولة اللي بالمطبخ هية بصفي

ام مرتضى:انتي تدرين بمعزتج بكلبي واني احبج على حبي ل خالج وامج ف اللي احجي لتفهمي غلط

سمعت كلام عمج وياج، اني اضحي بعمري وحياتي  لكن مرتضى خط احمر، وهم اشوف كلام عمج صحيح لان فعلا سمعتهم انضرت بمنطقتهم وبين ناسهم وهم ناس عشاير

ف من وجهة نضري اشوف تروحين وتعدي فترة ويرجعج بأحلا زفة ونفرح بيكم

دخل مرتضى متعصب سحبني من يمهه بنتر دخلني لغرفة البنات وتكلم بتحذير ممنوع تطلعين مناا طلع وطبك الباب

وكبت العيطة ابينة وبين امه وحتى خالو عرف بالموضوع سمعت صوت خالة ام مرتضى تبجي وتبرر

ان هي متكرهني بس خايفة على ابنهه، اشوف حقهه اصلا كل الحق وياهه دموعي تنزل بخيبة من الزمان

وشلون الدنيا تلعب بية وتشمرني من بيت البيت، لعد وينة بابا مو گال مثل ضلج اشو وحدي هسة عاد لو ياخذني انهزم وياه ولا هالشعور الحقير

بقيت بالغرفة للعصر، صار حدث مفرح مروة اجوي عليهه خطابة تغير المزاج شوية وهي تحاول تستحي بس متكدر
جانو بس نسوان ودخولهم جان مفاجئ، طلع الولد شايفهه ومعجب بيهه

بالمطبخ نضحك اني ورقية ومرتضى وهي طبت علينة كانت يم النسوان، منزلة اطراف شفايفة  ورافعة حواجبهه بتعجب

:ولكم يكولون شايفني وحابني

ماكانت تدري بمرتضى وراها باوعتلة وكالت.. يااااا انت هناا يلا روح ما تستحي صدك اللي اختشو ماتو

مرتضى دمع من الضحك على طريقة كلامهه واحنا مثلة رد عليهه:اني شكو  واستحي غير انتي الخاطبينج

دنكت تتضاهر بالخجل: وازيدك من الشعر بيت حابني ومعجب بيه بعد

:طايحة الحظ احترمي نفسج شلون هيج كدامي

:لعد متطلع
هز ايدة وطلع يضحك... بين ما دنسولف استأذنو وراحو ينتضرون موافقة خالو والبنية

جنت دا انضف بلاستقبال ودخل مرتضى شايل كتبة

:انتي هيو احاجيج
درت علي مستغربة من النبرة الهجومية كمل كلامهه متعصب
:بعد ما اريد اشوفج كدامي بأي مكان منا لعشر ايام ونتفاهم

دمعت عيوني مستغربة.. شبيك مرتضى

حجة بملامح متوسلة ونبرة باكية:حرام عليج ادرس ساعات متواصلة وبس تمرين من يمي يطير تفكيري ومعلوماتي وكياني وروحي وخري مني حرام عليج لازم اكرهج هالفترة

صافنة بوجهه هزيت ايدي.. الحمدلله والشكر خبال اي والله... دنكت شلت الكلاصات والصحون وطلعت هاربة وهو يصيح بغضب مصطنع

:لج مرررتي لججج مرتي احتررميني مررتي

دخلت للمطبخ اضحك.. لاكتني خالة ام مرتضى ماعاجبهه الوضع غسلتهم وصرت اتجنبهه  وهي بعد ما غثتني

حتى مرتضى صرت ما اتواجه، كل يوم يمر افكر اتصل بيهم ياخذوني تجين افكار بأن انهزم من البيت افكار ان اقتل نفسي واستعيذ بالله واهدء نفسي

اجا اليوم الثالث وكان گلبي مختنك وروحي لايبة  منتضرة مرتضى يرجع يدخل  من الدوام علما صلر الضهر واجا احس روحي راحت

عدا اليوم بالليل شفتة كاشخ ويريد يطلع

:ووين رايح مرتضى

تقرب مني رافع حاجبة مبتسم.... اروح فدوة للتحاسب رجلهه
:مرتضى هواي لحيت ترة افتهمنة والله افتهمنة
:بعدني ما مستوعب... يحجي ويغلق ازرار ردن القميص
:شنو
:انتي مرتي
:استغفر الله.. وين رايح احجي مو كلت عندك دراسة
:هو رايح يم الاستاذ عود عزمنا على عشة بس لا راح نحلبة حلب وندزة ل اهله

:شنوو
:شبيج حبي رايح ندرس اني والشباب والله.. تجين وياي
:يؤ
:بس اگللهم هاي مرتي وارجعج وارجع ادرس

ضحكت وضربتة على كتفة باسني براسي وراح واني اصيح وراه ولا مهتم

صارت الساعة اثنعش وماكو صارت بالوحدة وماكو دخلنة انذار من الخوف ندگ علي مغلق

يتصل خالو على اصدقائه يكولولة اجاكم للبيت انخرطت ارواحنة.. ام مرتضى ما تحملت عاكت بية گدام خالو

:ارررتاااحييتي هسسسة ارررتاحيتتي كتلج ووولي لبيت اههههلججج ابتليت انييي بيج

خالو عاط بيهه وشمر الطاولة اللي يمة كانت صغسرة وعليهه فازة ورد ودولكة كزاز وبعد اشياء  شالهه بأيدة وشمرهم

:ككلتلللج ببنتي هاااي اتطررردين بببنتي انتيي، بييييتيي هذاا بييتي موو بيييتج حتى تطرردين بنتييي منه ماااعاجبج تووكلي بالله الباب يووسع جمل

:تطردني هيج صارت سسنين وانا مداريتك وحاطتم بنص عييني تطردني من بييتك يلاا يجرالك يجي ابني وييوودييني بعد مالي ضلة يمك اشووف خلي تدااريك هااي وتأشر علية

:تعيييررريني بمداااراتج مسسوية منييية علية كل كلمة والثانية وكلتي مداارييتك... الرحتي والضليتي بعد ماااتتقربين مني اعررف اداري نفسي مااا احتاج احد

دخلت هي لغرفة البنات وخالو طلع بالكرسي بالطرمة ونضرة البنات صار بيهه ملامة مغلفة بالقلق

صارت الثنتين ومرتضى ماكوو.. ياربي لا تفشلني خل يرجع فدووة

وجه الصبح ودخل مرتضى كان راسة مضمد ورجلة بيهه جبس الابيض مالت الكسور.. امة بس شافتة وكعت بلارض

كان متعرض لحادث بسيارتة وفاقد الوعي ناقلي للمستشفى ماكان لاكي لا محفضتة ولا الموبايل مسروق

بس واعي على نفسة متصل بصديقه ومغادر على مسؤليتة

جانو ديحجون ما كدر يصعد تمدد على سرير خالو دز علية رقية مرتين ومارحت

اخر شي اني مغطية راسي وابجي حسيت احد دخل من ونته عرفته هو  انرفع الغطاء من وجهي

مرحبا غ67

جان هو بالكوة فاتح عينة ::اكو وحده يكولولهه رجلهه يصيحج متجي هاي معناها متحبة.. بس لا متحبيني كولي احرك اهلج

:ضحكت وكمت حضنته وبسته براسة مكان الجرح

:وثول هو هنا اليبوس

:مرتضى اريد اروح وية عمامي اشوف صح كلامهم ميصير ابقى هنا اكثر

:حجي جديد هذا سرى منو محاجيج بالبيت

:محد بس هاي الحقيقة بقائي هنا غلط

:لا تأذييني سرى شوفيني مكسر اريد انام ووراي دراسة لا تقلقيني

:هو دا احجي حتى لا اقلقك مرتضى لازم توافق وتقنع خالو اللي صار مو حادث اللي صار كان من تهديد عمو

:اهوووو لا تضلين تربطين من يمج سررى شوو ادني ادني وخرت عنة تمدد نزلت صعدت رجلة

:مابيهه شي عمري ممكسورة بس فطر ترة

عفته وطلعت
لاگتني ام مرتضى كالت:خالة لتهجمين بيتي اني معندي شي وياج بس شبيدي اذا اهلج همج

:والله دا احاول حتى گلتلة اريد ارووح

:مالي علاقة اقنعي روحي ونرجعج بزفة

عدت يومين مرتضى بضماداتة يداوم

العصر بالمطبخ كنا كاعدين اني والبنات وخالو وزوجتة جوة زعلانة منه بعدهه وهو كذالك

مگعدني يمة يحاول يحسسني ان مالي ذنب بس اني جنت  خجلانة حيل

فزززينة وانهزمناا بسسبب الصصووت اللي رج البيت وكسر جامات شباك المطبخ

___________________ يتبع

✨انتظر تقييمكم وتعليقكم وتشجيعكم  حتى نستمر سوى انتو قراء واني كاتبة خلو تكافؤ اني اتعب بالكتابة وانتو شجعوني🫂💕

والباقيات الصالحات
بسم الله الرحمن الرحيم
لا حول ولا قوة الا بالله
سبحان الله وبحمده سبحان الله العظيم

تفاعلكم سبب استمرارية الرواية🌹

حسابي الانستغرام

هواية احبكم🫂💞