بسْمِ الله الرَحمٰنِ الرَحْيِم
#سَمرة
بقلم : زينب الاوسي
لا تنسون التصويت + التعليق بين المشاهد + متابعة لحسابي 🤍🤍
"لا أتذكر قلبي إلا إذا شقه الحب نصفين أو جف من عطش الحب."
- محمود درويش .
~~~~~~~~~~~~~~~~~~~~~
أسمعه ودموعي تنزل بدون صوت عادها 3 مرات بالمرة الثالثة گتله : نعم قبلت وانتَ وكيلي
الشيخ : اللهم صلِ على محمد وال محمد
بابا والرجال ردو عليه وصلوا على محمد عبير هلهلت طلعن ماما وام عزت وعمته ورتاج ام عزت وعمته وماما هلهلهن وصوتهن بأذني واني احس بيه رجفه گعدت عبير تمسح بدموعي ورتاج تهفي عليه والنسوان يضحكن عبالهن من التوتر طلعن جنطة جايبات نيشان بي ملابس واحذية وجابن حلقة لبسنياها واني بس اباوع بدون اي ردت فعل وساعة ذهب هم لبسنياها وتلفون انطن الجنطة للين صعدتها فوگ خلتها بالغرفة وفرحانات ويسولفن ورا شوي گامت أم عزت خابرت ورجعت
ام عزت : يمه ابو عزت يريد يحاچيچ
سَمرة : اني؟
ام عزت : اي
اجه محمد گال : يلا تعالي
عدلت شالي ورحت ما لگيت احد بالاستقبال الكل رايح بس هو وبابا ومحمد گتلهم : السلام عليكم
رد عليه وجهه بشوش ويبتسم ، ابو عزت : وعليكم السلام بنيتي
باوع على بابا ومحمد گللهم : بلا أمر عليكم احچي وياها وحدي
مخلد : اكيد اخذ راحتك
اخذ محمد وطلع باوعلي وگال : تعالي بابا
رحت گعدت مقابيله گال : سَمرة
باوعت عليه ، گال : شوفي بابا أنتِ من اليوم بنتي الي مو بنت مخلد واخليچ بعيوني
سَمرة : سالمة عيونك
عدل گعدته گالي : صدگيني عزت گلبه طيب كلش طيب فوگ متتخيلين راح يخليچ بعيونه
بقيت بس اباوع عليه ومحچيت شي رجع كمل :عزت بار بأهله الدرجه خلاني أني الاخطبله وافق عليج وهو حتى مشايفچ بس حتى لا يزعلنه أني وامه گلي أني الجمعتكم وكلشي يصير برگبتي أنتِ بس طولي بال ويا هو شوي صعب بس يتعود عليج وتتعودين عليه راح تعرفين هو شگد خوش انسان
سَمرة : الله كريم
ابو عزت : ونعم بالله أخذي راحتج بابا
گمت گتله : مع السلامة
عفته وطلعت أخذت نفس عميق قبل ما ادخل الصالة دخلت أمه گلتلي : تعالي يمه
رحت يمهن گلتلي : العرس بعد 3 ايام باچر ترحين تحفين وتختارين البدلة
بقيت اباوع عليهها سكته شلون اطلع ومخلد محرم عليه الطلعة من سنة كاملة ماما گلتلها : الله كريم
سلمن وطلعن ماما طلعت وياهن وصلتهن للباب ورجعت بس طلعن نزعت الشال وشمرته ونزعت الحلقة والساعة وخليتهن بأيد ماما گتلها : أنتِ الكتلتي نفسج على هالعرس لبسيهن بمكاني ما يشرفني البسهن
زينب : هالحچي احچي يم ابوچ مو يمي
عفتها وصعدت بقت تغلط عليه وعبير تسكت بيها رتاج اجت وراي شوي وعبير هم اجت گتلهن : اطلعن برا أريد انام رتاج ما قبلت
ضليت اصرخ عليهن أريدهن يطلعن رتاج أخذت جنطتها چانت بالغرفة وطلعت وعبير طلعت وياها قفلت الباب ودخلت بدلت وطفيت كل الاضوية بقيت بالظلمة ما اكلت شي والي يجي يدگ الباب ويروح ما افتحة واني باقية أعصر بأصابعي واردد دعاء : " اللهم استودعتك نفسي "
واكرر بيها حتى لا يجي أبالي افكار أنتحار أو أذي نفسي بشي بقيت اردد الدعاء لحد ما غمضت
نمت نومة عميقة من ال6 المغرب لل6 الصبح گعدت بدون اي حركة بس فاتحة عيوني أريد أعرف الي صار حلم لو حقيقة گمت توضيت وصليت قريت قرأن لحد ما ارتاحت نفسي بقيت مخليه راسي على السجادة ومغمضة عيوني وأردد بصوت ناصي : يارب اذا حلم خلي يخلص بسرعة
بقت بلساني يارب يخلص هالحلم يارب يخلص يارب يخلص بقيت نايمه على السجادة وحاضنه القرأن ومغمضة عيوني ما اريد أفتحهن ما اريد ارجع للواقع تقريبا بقيت لل9 وأجت ماما ضربت الباب قوي فززتني هي تضرب الباب بقوه واني اتحرك بكل برود حتى اگوم افتح الباب فتحته گتلها : خير؟
زينب : التلفون ابوج يريده الي جابه الچ خطيبچ ينطي الچ بيوم العرس وام الصالون حتجيج هنا للبيت
رحت فتحت الجنطة الي جابوها وطلعت التلفون نطيته الها گتلها : ام الصالون ختحف الچ دام انتِ الفرحانة أني ماريدها
زينب : نشوف
عافتني وطلعت رحت سبحت احس بكسل طلعت من الحمام وأمشط بشعري أجتي ام الصالون جايبتها لين للغرفة گلتلي : صباح الخير يا عروسة
وابتسامتها شاگه حلگها ، گتلها : صباح النور
ام الصالون : يلا تعالي خلسويلج ترتيبات وهيچ
سَمرة : لا شكرا حبيبتي وجهي عاجبني
ام الصالون : حتلو عاجبج بس ينراد ترتيب
باوعت بروحي على المرايا گلتلي : تخبلين والله بس اقصد لبشرتج فد ترتيبات وهيچ
سَمرة : اوكِ
أجت على ميز الغرفة گعدتني وطلعت اغراضها حفتلي وسوتلي تنظيف بشرة تشتغل وتسولف حتى ما حسيت بالوقت گلتلي : عن حب حتزوجين ؟
سَمرة : لا
ام الصالون : شگد عمرج ؟
سَمرة : 19 سنة
ام الصالون : حلو صغيرة بس تبينين اصغر
بقت تجامل وتحچي على ما كملت باوعت بالمرايا هوااااي تغيرت وصرت احلى حسيت چنت هاملة بشرتي كملت مني راحت تحف ماما ولين هم ما اعرف شنو رادت منها ورا شوي أجن رتاج وبيبي وعبير رايحات سويه يحجزلي بدلة اجت عبير اول مشافني انصدمن تغيرت هواي بشكلي بقن يتغزلن عبير گلتلي : خل اشوفچ البدلة
سَمرة : ماريد
بقت تلح بس ما شفتها راحن هي ورتاج كل وحده لبيتها بيبي بقت يمنه ورا شوي جدو هم اجه باركلي اجه مخلد گللهم : سَمرة باجر ما تسوي حنه فألي يريد يباركلها لا يجي لهنا خيروح لبيت رجلها
عفته وصعدت ولا اهتميت لكلامة تغديت ونمت بالليل بيبي وعبير ولين وماما سطرن الاغراض بيبي گلت لماما : عيب من اهلج محد عزمهم
زينب : گنالهم ماكو حفلة وكورونا نخاف على الحجي الي يريد يبارك لسَمرة يروحلها ورا عرسها لبيت رجلها لان بالعرس ما نعزم كورونا ناس تخاف على صحتها
عبير : خوش حچي
بقن يرتبن أني صعدت للغرفة عبير اجت وراي ضلت ترتب بيه وتحچي وياي وتخفف عني واني ما اعرف شنو هاي قوة الكتمان الي اجتني احس دموعي نشفن بعد ماگدر ابچي كملت مني وراحت لبيتها اجه رجلها اخذها أما بيبي بابا ما خلاها تبقى يمي هم شوي وجدو اخذها وراحوا نمت وگعدت الصبح عادي چان يصادف يوم الحنة بسس ما سويت حنة مر اليوم كلش عادي
بالليل أجتي رتاج بقينه أني وياها وحدنه بالغرفة قفلت الباب وگعدنه نسولف گلتلي : هاي اخر مره اجيج لبيت اهلج بعد حأجي لبيتچ
دمعت وحضنتها : أنتِ مرحب بيچ وين ما أكون
رتاج : اگلج
سَمرة : ها ؟
رتاج : عزت شلون قبل يتزوجچ وهو اصلا ما شايفج ابدا يعني شنو هالتفكير
هزيتلها براسي بمعنى ماعرف
رتاج : زين سَمرة خل اسئلچ سؤال بس بدون ما تعصبين ؟
سَمرة : شنو ؟؟؟
قربت عليه گلتلي : الكدمات الي بجسمچ شلون؟
سَمرة : شنو ؟
رتاج : يعني اذا شافهن شلون ؟
سَمرة : ما اعرف وإذا اضطريت أبرر فحكمل بچذبة مخلد ومرته واگوله حادث
رتاج : اي زين خلي اروح
اني دمعت بس گالت هيچ گتلها : تجين ؟
رتاج : اجي وراچ باچر للصالون واروح وياچ للعرس ما اعوفچ لتخافين
حضنتها وبچيت گلتلي : كافي لتبچيين
سَمرة : هنت عليهم رتاج أهلي هنت عليهم
رتاج : وعيونچ يتندمون وين يرحون من رب العالمين
مسحت دموعي وگتلها : يلا روحي لتتأخرين اهلچ يرزلوج
رتاج : تمام
ما نزلت وياها نزلت وحدها بقيت گاعده لل4 الفجر بس افكر ومتوترة ساعة ابجي ساعة أسكت صليت الفجر وحتى ما چان عندي طاقة أدعي بيها خليت كلشي على رب العالمين ونمت
گعدت على صوت ماما ب9 الصبح گلتلي : يلا ولچ گعدي ب11 احنه بالصالون كون
أجني رتاج وعبير هماتين أخذن لين والجنط الي بيها اغراضي اخذوهن لبيت عزت يرتبنهن وأني وبيبي وماما نروح للصالون ولمن يكملن رتاج تجي ورانه ولين وعبير يبقن عدهم ببيت أهل العريس ينتظرون نجي سبحت ولبست صاية وقبل ما اطلع ابوية دزلي التلفون بيد ماما أخذته وخليته بالجنطة
سَمرة : اطلعي هسه اجي وراج
زينب : حأنتظرج بالصالة
بقيت اباوع على الغرفة وابچي هاي اخر مره أجي لهنا واحتمال ما حتجيني فرصة ادخلها مره ثانية باوعت على مخدتي ضليت أبجي بحرگة أتمنيت ابقى عايشة بهالغرفة عمر كامل على انه أتزوج واعيش ويا شخص ماعرف عنه بس اسمه سمعت ماما تصرخ تصيحني قفلت الباب مال الغرفة ونزلت لگيت ابوية واگف اباب الصالث بس شافني باوعتله نزل عينه ما يريد يخلي عينه بعيني رحت باتجاهه وبيبي لزمت ايدي وخرت ايدها ورحت يمه گتله : توقعتك أشجع من انه تنزل راسك لمن تشوفني ارفع عينك هاي اخر مره تشوف وجهي بيها
أريد اكمل كلام ودخل ابو عزت گالي : عمو الزفة من البيت لو من الصالون
مخلد : من الصالون
سَمرة : لا عمو من البيت
ابو عزت : هاهي عمي التردي يصير
ابتسمتله وطلعت فتحت باب الشارع ولاول مره من سنة وشهرين اوصل لهالباب لا وأشوف الشارع طلعت يم باب الشارع وأخذت نفس عميق مسحت دموعي وصعدت بالسيارة أجن وراي بيبي وماما محمد الي يسوق وأبو عزت گاعد يمه واحنه ورا ، حچه ابو عزت : بابا سَمرة أعذريني والله ادري حالچ حال البنات تردين جلسة تصوير للعرس بس عزت ما قبل لان كورونا
سَمرة : عمو حتى لو ما چان اكو كورونا أني ما حاسوي جلسه تصوير لان اساسا ماحبها ولا مفكرة بيها
ابو عزت : متأكدة ؟؟
سَمرة : اي
ضل يهز براسه : الله كريم
وصلت للصالون نزلنه أني وبيبي وماما ومحمد وأبو عزت راحوا بقى ابو عزت يحجي ويا ماما وحدهم شوي وأجت ورانه دخلت للصالون چان أكو 4 عرايس غيري نزعت صايتي وحجابي بقيت بتراك البيت گعدت وبلشت وحده من البنات الي تشتغل بالصالون ترتب بيه أول شي بلشت بشعري كوته وگصت من الأطراف شوي المهم كملت من شعري اجت تسويلي مكياج گتلها : ماريد مكياج بارز ابدا خلي كلش خفيف
ام الصالون : صار
بقت تمكيج واني حابسة دموعي بالگوة حتى لا يخرب المكياج بقيت كل هالفترة ساكته لحد ما اجت رتاج تقريبا ب11 اني وصلت للصالون ورتاج اجت ب2 الضهر چانت البنيث الي تسويلي مكياج تمكيجني شوي وتخليني ارتاح وترجع تكمل كملت مكياج وأجت على شعري گتلها : ابد لتبالغين بالتسريحة هو حتى ما صابغته فسوي تسريحة عادية
ام الصالون : تمام
سوتلي تسريحة كملت ب3 العصر أجه أبو عزت وجايب ويا عصاير وحلويات بس ما دخل جوا ماما طلعتله راحت البنية الي تسويلي مكياج تمكيج عروس ثانية گلتلي : ابقي ارتاحي شوي وأرجع عليج
بقييت لازمه أيد رتاج وافكر گلتلي : لتفكرين خليها على الله
سَمرة : ماريد ابچي واخرب المكياج
رتاج : ابد لتبچين
سَمرة : تندمت
رتاج : على شنو؟؟
سَمرة : لان گتلهم الزفة من البيت ماعرف ليش حچيت هيج
رتاج : عادي نفس الشي
بقت تهدي بيه واني حتى بصوتي صارت رجفة البنيه أم الصالون گلتلي : يلا حبيبتي گومي خل اكملچ قبل ما تلبسين البدلة أخليلچ كريم
دخلت وياي للغرفة الي أريد ابدل بيها شافت ظهري گلتلي : هاي شبيج ؟
سَمرة : كدمات قديمة
بقت تخفي بيهن گتلها : امانة شگد متگدرين لتبقين أثر
ام الصالون : احاول
كملت ظهري گلتلي : هذا الكريم يمچ اذا تحتاجي قبل ما تلبسين البدلة
علگتلي البدلة وطلعت رتاج واگفة بالباب كل شوي وتگلي : ها سَمرة
سَمرة : ما محتاجة شي
لبست البدلة واجتي رتاج سحبتلي السحاب گعدت ورتاج لبستني حذاء چانت كعب عادي بس كلشش متعبة كملت گلتلي : گومي بربچ خلشوفچ
كملت وباوعت بالمرايا وباوعت عليها گلتلي : اموتچ اذا تبچين
حضنتها وبچيت بقت تهفي على عيوني وتمسح بدموعي على كيف حتى لا يخرب المكياج
رتاج : يلا طلعي خل ابدل أني قبل مايجون
دخلت لبست فستان ازرگ وحجاب واني منتظرتها بيبي گاعده يمي تقرالي قرأن وانطتني قرأن صغير كملت رتاج وماما خابرت عليهم بقيت المسكة بيد رتاج ما لزمتها أني ب4 ونص هيج شي او 5 إلا ثلث أجه محمد أخذنه أجن سيارتين سيارة بيها محمد وأبو عزت واني ورتاج وسيارة بيها ماما وبابا وبيبي وصلنه لبيتنا نزلت من السيارة ورتاج ساعدتني ابو عزت گال : نص ساعه وتجي الزفة
دخلت للبيت جوا كلههم التموا بالصالة بيبي وجدو وابويه ورتاج وماما عفتهم كلهم وصعدت للغرفة محد اجه وراي ولا حتى رتاج بقيت أبچي ورا عشر دقايق رتاج دگت باب الغرفة واجتي مسحت عيوني وترتبت مكياجي گلتلي : خلص گلبي طلعي منا وبلشي حياة جديدة ولتلتفتين وراچ ابد
اخذت نفس باوعت بروحي بالمرايا گتلها : يلا امشي طلعت گدامي
قفلت باب الغرفة ونزلت ورتاج تساعدني حتى لتخرب البدلة نزلت ايد لازمه بيها المفتاح والأيد الثانيه رافعه بيهر البدلة فتحت ايد ماما ونطيتها مفتاح الغرفة گتلها : مابريكم الذمة اليوم القيامة
باوعت على ابويه وأجت اصوات السيارات والزفة گتله : ما اسامحك دنيا واخرة خطيتي برگبتك
ركض محمد فتح باب الشارع اجن نسوان من أهل عزت وأمه يهلهلن ويطشن چكلييت أني لبست البرنص وغطيت راسي بقيت شوي من عيني طالع حتى اشوف بيبي خلت القرأن بيدي اصوات هلاهل وهوسات مو طبيعية الكل وگف گالو حيجي عزت ياخذها دخل لابس قاط رصاصي بس ما باوعت بوجهة مدنگة راسي أجه يمي والچكليت من كل جهه يضرب بينا رتاج نطته المسكة لزمها بايده اليمنى ولزم أيدي بالأيد اليسرى حتى نطلع الكل اطرف على جهه من الزلم الي برا رفعت البرنص اطلع عيوني حتى اشوف اصعد بالسيارة ولگيت امير گبالي…
~~~~~~~~~~~~~~~~~
رأيكمم ؟؟؟!!
رغم دور ثالث وغالقة اجهزتي بس ما انطاني گلبي ما انزللكم بارت 🥺🥺
خاف اتأخر عليكم فأسفة من هسه بسبب مراجعتي ادعولي اخلص من السادس فدوه 🥺🙏
احبكم ❤️❤️
حسابي الانستا للتواصل ♣️♣️