﷽
-الكاتبة: سـارة الحـسن
-Part 56
-"لا تنسون التصويت +
-" متابعة الحساب its_105
-"وتعليقاتكم ع الفقرات فيـروزاتـي" ♡
▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫
اجـة رسـول كعـد يمنة وساكت ، ندسة الميــرزا مـن كتفة وحجة ويا
::-احـسٍ وراك مصيبة
رسـول: اي والرسول الأعظم بـس خاف احجي هسه ويصير ذبحنة جماعـي
الميــرزا: بروح أعزازك احجيها هسه حتى هوسة يا هوسة مو مـن يصفـى الجو ترجع تفجرها
-ضحك ورجع لملامحة الجامدة بسرعة وكال
::-اخـذو نفس وكولو يا الله واستغفرو ربكم واسمعوني
الميــرزا: يا الله فجرها يبعـد اخوك
-باوعلي ورجع باوع للميــرزا، نقر بـ ابهامة علـى كصتة متوتر وكال
::-طلكت عاتكة
-ضحك الميــرزا بصوت رج البيت وصاح
::-احترك جدك تركااااااااااااان
-بقـى الميــرزا يضحك وانـي ورسـول صافنين عليه، فرك خشمة ويحاول يكتم ضحكتة وسأل
::-السبب؟!
رسـول: هسه عوفك مـن السبب وكلي شسوي؟! جدك يطلكنـي مـن العشيرة اذا سمع هسه
الميــرزا: غيـر نفتهم السبب حتـى اكلك شتسوي
آفـروز: وأنتَ مـن هيـج خايف مـن جدك شلون طلكتها سكتاوي؟!
رسـول: اهلها هم ماعدهم خبـر بس اخوها زيـد
-صفنت علية والميــرزا رافع حواجبة مصدوم ويباوع علـى رسـول، رفع تشيرته ضم وجهه وكال
::-اغتصبتوني بـنظراتكم ترا
الميــرزا: يعنـي هسه ابـو قيصـر ما يدري حفيدتة تطلكت؟!
رسـول: اي
-رجـع الميــرزا انفجـر مـن الضحك وانـي ماخذة وضعية الممستوعبة، اتنرفز رسـول ونتر بـ الميــرزا
::-هسه وكت ضحك ترا اخوك طايح بمصيبة
مثل ما اطمطم للبقية شوفلي حل وطمطملي السالفة
الميــرزا: شطمطم منها رحمة للمهمود بكبـرهَ
رسـول: مادري
-سألة الميــرزا عـن السبب وحجالة رسـول
مختصر علـى موضوع ، رغم الميــرزا يعرف الحقيقة
مـن عندي بس ماحب يحرج رسـول وسمعها مـن عنـدة،
الميــرزا: خلـي اخوها يوكف وياها
رسـول: شلون؟!
الميــرزا: هسه انــه اختـي تطلكت انتظرت هارون يبرر؟!
اكيد لا ، انــه وكفت ويه اختـي لأن فضلت راحتها
واذا زيـد هيج ويفضل راحة اختة راح يوكف وياها
ويواجهه اهله ويكول مايريد اختة تكمل بهيج زواج فاشل
رسـول: قصـدك انـي زوج فاشل؟!
الميــرزا: مـع احترامـي الك بـس أنتَ أفشل مـن الفاشل
رسـول: رحم الله والديك ، مو موضوعنه هسه وبعد؟!
الميــرزا: دام يريد ياخذها ويا للخارج خلي يكول يريد يطلكها منك وهواية اسباب عدكم اولها لأن بعدها طفلة
ولأن البنية حالتها النفسية متأزمة يفضل تروح ويا اخوها
رسـول: وبعـد؟!
الميــرزا: اي واكيـد هي راح تكون رايدة هـذا الطلاك
وهيج جدك مايكدر يحجي بعد لأن همه اللـي يردون
رسـول: خوش يعني هسه الحجي حيصير ويا زيـد بـ الأول وبعدين اصارح اهلي
الميــرزا: باقة ورد وياك مـن تصارحهم
رسـول: اخوية اكبر مني ماكدر ارد عليك
الميــرزا: ههههههههههه جـدكم ايامة معدودة مـن وراكم
رسـول: هسه يطردنـي مـن الشغل بس يعرف لأن انـي اشتغل ويا بـ المكتب
الميــرزا: چــاا بـ حالة أنتَ؟!
رسـول: ليش الجذب اي بـ حالة
الميــرزا: واذا شفتلك شغلة احسـن مـن شغل جدك؟!
رسـول: اصيـر بـ حالك
-ضحك الميــرزا وهـز راسـة بـ أيجابية
::-سهلة سهلة
رسـول: زين شوكت احجيلهم؟!
الميــرزا: شوفلنة زيـد وخلينـي احجـي ويا انــه ويصير خيـر
رسـول: العصـر يناسبك؟!
الميــرزا: اتفرغلك بوية حتـى لو ما يناسبنـي
-كام رسـول مـن مكانة وباس الميــرزا مـن خدة بوسـة قوية وبـ الاصح شفطة شفط ويحجي كاز علـى سنونة
::-لك أنتَ من يااااااا طينة مخلووووق رحمة لـ جدك
الميــرزا: نفـس طينتك بس ضافولي ابهارات بريانـي
آفـروز: عاجنين طينتة بـ ماي زمزم
رسـول: اخوية يستاهل الصبغ اصبغـي بي شكد ما تكدرين
آفـروز: جيبلي بـويةَ وياك
-رجـع يبوس بـي والميــرزا يضحك بعدها عافنه وطلع، باوعلي الميــرزا مبتسم وكال
::-بـ ماي زمزم مـو؟!
-قبـل لا اجاوبة دخلت كوثـر وهو دنك راسـة ياكل، وانـي سكتت ، مشـى اليـوم طبيعـي للعصـر الميــرزا طلع ويا رسـول علمود يحجـي ويه زيـد ويحلون الموضوع
-رجعـو المغرب وحسب كلام الميــرزا "كل الأمور تمام"
هارون مـن طلع الصبـح وبعـد ما رجـع اتصلت عليه أكثـر مـن مرة بـس ما جاوبنـي وكلـش قلقنـي عليه
-بقيت كاعدة علـى طـرف الجرباية واهز بـ رجلي متوترة، حسيت ايد الميــرزا علـى ظهري وسألنـي
::-شبيها جمـرة أفادي؟!
آفـروز: هارون مـن الصبـح ماكو ومدايرد عليه
الميــرزا: العصـر جان موجود بـ الصيدلية
آفـروز: لعد ليـش مايرد؟! وليـش لهسه مارجع؟!
الميــرزا: خلـي مبتعد عـن البيت هاي الفتـرة
آفـروز: خلـي يبتعد عـن البيت بس مو عنـي
-دار وجهـي عليه وكال
::-لا تسـوين هيـج روزي قابل وين مبتعد؟!
آفـروز: ما متعـودة يمر يوم اذا ما اشوفة لو احجـي ويا
الميــرزا: هسه يرجع واشبعـي منه
-هـزيت راسـي وسكتت وهو ضمنـي بحضنة وبقـى يمسد علـى شعـري بحنية ويحاول يهدينـي، بـس انـي الخـوف ماكل كلبـي علـى هارون خاصة هاي الفتـرة لأن تأذة بـ فراك إيــلاف وسـدرة بنفس الوقت
-بعـد فتـرة أتصل عليه هارون وكال
::-انـي بغرفتـي
-بدون لا اجاوبة غلقتة وكمت اريد اطلع عليه،
بسـرعة لزمنـي الميــرزا مـن ايدي وكال
::-البسـي شـي حبيبي وين طالعة هيج؟!
-ما جاوبتة ولبست فوك ملابسـي وطلعت مـن يمة لـ غرفة هارون، جان كاعد ومستند ظهره علـى طرف الجرباية والخاولي علـى راسـة ، سويتلة مثـل ما اسوي للميــرزا نشفت شعرة ومشطتلة وهو ساكت مـن كملت ابتسم وكال
::-زواجج طلع منـه فايدة
آفـروز: خوفتنـي اليوم ليـش ما طمنتني عليك
هارون: التهيت بين دوام وشغل وحتـى تلفوني بقى بـ السيارة مادري بـيج متصلة
آفـروز: رحت لـ مكان بعد الشغل؟!
-ضم راسة بـحضني وجاوبني
::-رحت يم امـي
-حضنتة بقوة وكلبـي يوجعنـي عليه
::-اعـرفك متأذي وبعده وجـع كلبك جديد
راح تتأذة اكثـر بـ الأيام الجاية، وكل خطوة تخطيها
راح تذكرك بيها، عقلك وكلبك راح يذكرنك بـ كل لحظه
حلوة ومـرة وبـ كل ضحكة ودمعة بيناتكم
بـس ماكو وجـع يدوم للأبـد حتـى لو حسيت هـيج هسه،
تكدر تنعزل وتحـزن واذا تريد حتـى تبجـي بـس تذكر
"راح يجـي يوم وترجـــع لـ حياتك الطبيعية"
وربـك راح يعوضك "بـ حُـب حقيقـي" ضماد لكل جروحك
حُـب حقيقـي ما يأذيك ولا يوجـع كلبك ولا ينتهي بـيوم
هارون: كلبـي ورطنـي آفـروز
آفـروز: كُـل ورطـة والها حـل هارونـي
-لزم ايـدي اللـي تمسد علـى خــدة وغطـى بيها عيونة وكال بغصة
::-الدنيا كلها بجهة وفكرة ماكدر اصيـر اب بجهة ثانية
آفـروز: ليـش تحجي هيج هرهور
اذا راحـت سـدرة تجــي الف غيرها
وتترس بيتك اطفال وراح تكون اب عظيم
هارون: المشكلة مو بـ الزواج المشكلة بيـة آفـروز
-حاولت ارفـع راسه مـن حسيت ايدي تحسست دموعة الدافية، ماقبـل يباوعلي ضم وجهة أكثـر ويحجي بصوت مخنوك
::-كل مكان اروحـلة يكلولي نفس الحجي
ونسبة 80% ماكدر اصير اب وهواية الـ 80
الحادث أثـر بيه حيل وهسه يلا عرفت المعنـى
الحقيقي لـ كلمة "انكــسر ظهــري" .
-هـد حيلي بـ حجايتة ، المـر بحياتـي كله ما اثـر بيه
بكد ما أثـر بيه موقف هارون، وانـي اكثر شخص اعرفه
شكد يحب الأطفال ومـن صغرة جان يكول
::-انـي اقل شي اجيب فـد 9 بنات
-مـن نسألة ليـش تسعة بـ التحديد يضحك ويكول
::-حتـى امهن وياهن ويصيرن عنـدي عشرة واغني
"يمة البناااات عشرة واكول گليلات"
-بقيت ادية تحتضن كل جزء بـي واريد هيج ادخلة بكلبي شاغت روحـي عليه، ما لكيت كلمات اكدر اواسـي بيها وبـ الأصح يا كلمة هاي اللـي تبرد كلبة؟!
::-تذكر قبـل مـن نضوج دائماً عـون يكول
"ماصعُبت إلا فُرجت و ما تعسّرت إلا تيسّرت "
راح تفرج هارونـي والله ما يبقـى شـي علـى حالة
هارون: راح تبقـى غصة بكلبـي
آفـروز: اقدار ربنا دائماً خير النـه حتـى لو ما ترضينا
-رفـع راسـة يباوعلي راد يحجي وسكت وانـي امسح بـ وجهة ودموعة الـي انصبت تيزاب علـى كلبـي
::-احجيلي هارونـي لا تسكت لا تضم بكلبك
-هـز راسة رافـض ويحجي بصوت مبحوح
::-خلي يموت بحنجرتي الحجي واتلوع مـن الكتمان
آفـروز: تلوعني انـي وكلبـي وياك
هارون: شحجي آفـروز؟! شراح يتغير؟!
آفـروز: ماراح تكتم وماراح يتراكمن عليك
صـح الحجي ما يغـير النتيجة بس يغير نفسيتك
-رجع ضم وجهة بحضني وكال
::-ابقـي يمي آفـروز
آفـروز: يمك ياروحها وراحتها لـ آفـروز
-بقـى ساكن ما تحرك بعـد وانـي امسـد علـى شعرة ودموعي ما وكفت، احاول اقوي نفسـي كدامة بـس هيهات لو كدرت هاي المـرة ، مـرت أكثـر مـن ساعة وحجة وياية بدون لا يرفع راسـة
::-انطيني واحـد مـن جهالج
آفـروز: اخذني انـي وجهالي
هارون: شسوي بيج أنتِ اريد بس بنية وياريت تشبهج
آفـروز: والله انطيك بنية وانطيك عيوني وياها
هارون: لا ما اريد اتجاوز علـى ممتلكات الميــرزا
-ضحكت وسحبتة مـن شعرة بخفة
::-لعـد بنتـي مو هم مـن ممتلكات الميــرزا
هارون: اكو ممتلكات عامة واكو خاصة فـ أنتِ خاصة
وبعـدين هو عنـدة علم بموضوعي ووعدنـي ينطيني بنية
آفـروز: شوكت هاي؟!
هارون: مـن ردت منه إيــلاف تكون بـ مسؤوليتـي
بعدين سألتة اذا اجو اهلها شلون؟! وهو كال انطيك بنتـي بـ مكانها
آفـروز: شو بكيفكم تقررون؟!
هارون: يدري بيج ما تعزينها عليه
آفـروز: حتـى روحـي ما اعزها عليك هاروني
-رفع راسة باسنـي مـن خـدي بقوة وكال
::-احجيلج سـر بيناتنة؟!
آفـروز: احجيلي
هارون: تدرين فرحان لأن تزوجتـي الميــرزا
آفـروز: ليـش؟!
هارون: ما احـس احد يستاهلج غيرة وهم فرحان لأن اعـرف عظمة حـبه الـج
-خجلت مـن كلامة بس حاولت ما ابين، ابتسمت وسألتة
::-وشلون عرفت؟!
هارون: لو تشوفين شكد يسألنـي علـى أشياء تخصج
شنـو تحب شنو تكرهه مـن شنو تضوج وتخيلي قبل ايام بشنو صدمنـي؟!
آفـروز: اصدمنـي وياك
-عـدل كعدتة يضحك وصار يحجيلي
::-شوفي بـ الصيدلية كاعد كدامي ومدري شبي كل شويه يريد يحجي ويسكت، طلع تلفونه ومدري شطلع وبقى يباوع بتركيز اخر شي حگ خشمة وتأفأف ضايج وبقى يباوعلي متردد هزيت راسي وحجيت ويا
::-شبيك اليوم؟!
-كام من مكانه كعد يمي وكال خجلان
::-راح احجيلك بس تساعدني
هارون: اذا تورق اساعدك
الميــرزا: راح اورق ميخالف
هارون: احجي لعد اسمعك
الميــرزا: شوف آفروز من تصبغ اظافرها ما تسيطر ع ايدها اليسرة ويتخربط وتضوج
-ضيكت عيوني عليه وسألتة
::-اي والمطلوب؟!
الميــرزا: انــه هم ماعرف واريد اتعلم حتى اصبغلها
هارون: وبشنو اكدر اساعدك اني
-زفـر انفاسة ضايج لأن هيج استغبيت ويا وجاوبنـي
::-اتعلم بيك اصبغلك اظافرك وهي هم اختك واكيد ماتريدها تضوج مو؟!
-بقيت صافن عليه ثواني وطكيتها بـضحكه من كل كلبي ع سالفتة بقى ساكت فشلان ويهـز برجله بـتوتر، دام هو كدامي ماكدرت اسكت كام من مكانه ضربني بقوة ونتر بيه
::-مـن احترمك لا تصير حيوان
-عافني وكام يريد يطلع مـن الصيدلية ،ركضت ورا حضنته من اكتافه وحجيت ويا
::-شكد تورق؟!
-دفع ايدي من ع كتفه ونتر بيه
::-خايب وخر من يمي لا افلش وجهك
هارون: شبيك صَـفد مو دانحجي هسه، واذا ع ضحكتي عادي يعني طلبك جان غريب ويضحك بس هسه موافق متبرعلك بـ ايدي بس لازم تورق وتهز جيبك شوية
-وكف يباوعلي ما عاجبه الوضع وكال
::-شكد تريد؟!
هارون: شكد اكثر شي تنطي انت
صَــفد: 5 الآف
هارون: هههههههههااااي قويةةةةة هاي
الميــرزا: چــاا شكد تريد ابن الفگـر؟!
هارون: ع كولت زوجتك فگووووور المهم اريد ورقة ام الشايب يصرفلك يصرفلك ما يصرفلك شوفلك غيري
الميــرزا: أكبـر استغلاليـة شفـتهم بـ تاريخ البـشرية هــو بيـت العايـش
هارون: هسه شرايدين منك هي ورقة
الميــرزا: خوش وشوكت؟!
هارون: مـن نرجع للبيت نخمط منهن صبغ اظافر ونتعلم
-هـز راسـة بـ أيجابية وانـي رجعت انفجرت مـن الضحك وهو عيونة صارت بكصتة ماردت افشلة بـس هو طلبة غريب ويضحك بنفس الوقت
-بـ الليل راح للمضيف وكال
::-جيب شسمة وتعال وراية
هارون: شسمة؟!
الميــرزا: مو اتفقنة اتعلم بيك
هارون: شتتعلم؟!
الميــرزا: هارون ورب الحق راح أجرم بيك
هارون: ههههههههههه اعصابك اعصابك ، حضرت شايب كلبـي
الميــرزا: موجودة ام الشايب
-طلع كدامـي وانـي اخذت صبغ اظافر مـن هـزراف ورحت ورا، اول ما دخلت شمرتة عليه وهو لزمة ابتسم وكال
::-اختـك رجعتنـي مراهـق
هارون: شحلاتها المراهقة الثلاثينة
-ضحك وسكت وكعد يتعلم بية، يصبغ اظفر ويباوعلة مخربط يرجع يمسحة ويصبغة مـن جديد
::-عنـدك 5 اصابـع ليش لطشت علـى هذا
الميــرزا: خاف يخلص هذا لـ جاي نمسح بي وبيش تمسحهن
هارون: بنـفط يمعود
-رجـع صبغهن كلهن واخذلة نظره عليهن وضحك بصوت عالي ورجع يباوع عليهن وكال
::-مثل اللـي يخلي حمرة وهو عنـدة شوارب
هارون: شو طلع حلو عليه هذا اللون
الميــرزا: لا تفشلنة وياخذك الواهس
هارون: هاهي لو بعد؟!
الميــرزا: هاهي والصبغ هم خلص كل اظفر بكد راسك
هارون: شو أنتَ اللـي مان عليه؟!
الميــرزا: بـ فلوسـي
هارون: وينهن فلوسك هو انـي شفتهن؟!
-طلع محفظتة مـن جيبة وطلع فلوس منها نطانياهن وكال
::-يجي يوم وترجعلي هينة
-شمرت فلوسة عليه وجاوبتة
::-اتفقنة ام الشايب هاي شنو؟!
الميــرزا: هاي ام الشايب بس مسوية رجيم
هارون: وحق لا اله الا الله افضحك
الميــرزا: اذا كدها سويها وشوف شيصير
هارون: تهـددنــي؟!
الميــرزا: واطيح حظك هم هـنة هذن بكد ام الشايب
هارون: خوب انطيني ام الشايب ماريد خردة
الميــرزا: چــاا مـن اصعد للغرفة تعال ذكرنـي
-حجاها ونهض طلع مـن يمي، وصار كل شغلة يريد يسويها الج وما يعرف يجي يتعلم بية لو يطلب اعلمة وجان دائماً يكول
::-اريـد أتعلم كلشـي لـ خاطرها
-ضميت وجهـي بـ ايدي خجلانة وهارون ضحك وكمل كلامة
::-كلبـي مطمـن عليج وأنتِ زوجة الميــرزا
-بقيت ساكتة ماعرف شجاوبة مـن جهة خجلانة مـن هارون ويمكن هاي اول مرة ومـن جهة احس فراشات بـ كلبـي مـن تصرف الميــرزا وشلون مهتم لكل تفاصيلي
-حسيت هارون كفخنـي علـى راسـي وكال
::-اول تالـي السحارة تخجل
آفـروز: والنبـي خجلت شنو هاي
هارون: منين مشترية مشاعرج؟!
آفـروز: جان بيهن ضمور وتعالجن ما اشتريت شي
هارون: هههههه دكومي ام الضمور اريد انام
آفـروز: اي ابقى يمك
هارون: شنـو مخبل لو ما رايد روحـي
آفـروز: شبيك وياية تعنف بيه نفسياً؟!
هارون: اذا اخليج يمي الميــرزا يعنفني نفسياً وجسدياً ومادياً وكلشياً
آفـروز: شدعوة شدعوة شدعوة
هارون: ترا أنتِ مخدوعة بـ الجانب اللطيف ما شايفة الجانب الثاني
-كمت مـن يمة اضحك علـى سوالفه، حضنت راسة وبستة بقوة من شعرة وحجيت ويا
::-لا تضـوج نفسك وابقـى دائماً متفائل تمام
هارون: ان شاء الله سحارة كلبـي
آفـروز: كلشي يأذيك يأذينـي اذا ما مهتم لنفسك فكر بيه
هارون: دام حتنطيني بنتج ما اضوج بعد
-ابتعدت عنـه اضحك وجاوبتة
::-كلشـي ما انطيك لا تحاول
هارون: اخطفها والله
-تمشيت بـ اتجاه الباب اريد اطلع وجاوبتة
::-تروحلك فدوة هي وامها
هارون: اموت عليها هي وامها
آفـروز: تصبح علـى عافية هارونـي
هارون: العافية بوجهج يبعد هارون
-طلعت مـن يمة وبوجهـي للحمام ، اول ما دخلت رجعت انهاريت ابجـي روحـي توجعنـي علية شحال روحة وكلبه هو، مرت دقايق وحسيت علـى الباب تندك بخفة
::-آفـروزتـي
-حاولت اكتم صوت شهگاتـي ومسحت وجهـي بسرعة وجاوبة
::-هـاا أصـفاد
الميــرزا: افتحيلي الباب
آفـروز: عوفنـي بوحدي شوية فدوة
الميــرزا: ما يهون عليه يجـمرة أفادي والله ما يهون
-بدون لا اجاوبة غسلت وجهـي وفتحت الباب
::-خلينة نرجع لـ غرفتنة
-بدون لا يحجي احتضنـي مـن اكتافي ورجعنة لغرفتنة اول ما دخلنة لمنـي بحضنة يبوس براسـي وكال
::-لا تبجــين يبعـد عيــونة وعيــونة لأصـفاد
اكو امل بـ حالة هارون بـس هو مأيس لان النسبة عالية
آفـروز: متأذي حيل
الميــرزا: ادري بـي ويتعالج بس علاجة يحتاج صبـر
-سكتت وهو عصرني بحضنه وهمس
::-ادعيلة بدل البجـي
-هـزيت راسـي وتشبثت بـ ملابسة مـن كمية الأمان اللـي حسيتة بحضنة، بقـى فتـرة طويلة يلا ابعدنـي عنـة نزع حجابي وكال
::-جوعانة حبيبتـي اسويلج شـي تاكلينة لو تنامين؟!
آفـروز: اريد لفة طماطة
الميــرزا: لفة أدرينالين بـ النسبة الـج
-رفعت نفسـي وبكل مرة اسوي هاي الحركة هو ينزلي راسة ، طبعت بوسة علـى خدة وطولت يلا ابتعدت
::-أنتَ أدرينالينـي ، وجـودك بـ حياتي ،
حُـبك ، اهتمامك ، سوالفك ، صـوت ضحكتك ،
كلها صـارت أدرينالين لـ كلبـي
-عيـونة اللـي يلمعن بـ الحُـب ما فاركت عيـوني ،
نظـراتة شرحت فرحتة بـ كلامـي اللـي سمعة ،
توسعت ابتسامتة وسند گصتة علـى كصتـي وسألني
::-لـيا مرحلة واصلة يطرگاعة؟!
آفـروز: تعديت كُـل المراحل ووصلت حـد الأدمان
الميــرزا: هوى الغرفة ما جاي يروي ريتـي
-حجاها ودفـن راسة بـ رگبتـي سحب نفس قـوي مـن يمي ارتويت شلون بـي هو، شدنـي عليه ضيعنـي بحضنه وهمس
::-اريـد أروفـچ بـروحي
آفـروز: ضمنـي بـ روحك أصـفاد ، قيدنــي بيـك حــرية آفـروز بـ قيــد حضـنك
-رفـع راسـة يباوعلي ويحجي بـ فرحة
::-تروحيـن وياية؟!
آفـروز: وين؟!
الميــرزا: علية نـذر اطـش چكليت بحضرة العباس (؏)
-ضحكت وهزيت راسـي بـ أيجابية وهـو يحيـر شيسوي مرة يحضنـي مرة يبوس بوجهي مرة يضحك، دفعنـي عنه بخفة وضحك بصوت عالـي، عينـي علـى تفاحة ادم وسألتة
::-شبيك أصـفادي
-حـط ايدة علـى كلبة يحجي ويا
::-خيـعونك يكلبـي جمرتك صارت الك
-بقينة اثنينة مستحين هو يضحك ويحاول ما
يخلي عينة بعيوني وانـي حاضنة ايدي علـى كلبـي
واباوع لـ تصرفاتة، نزع تشيرتة نفضة ورجع لبسة
وانـي انفجرت مـن الضحك ، عـض علـى شفتة
مبتسم ويحجي ويايه بهيام
::-اضحكـي يـ الضحكتـج مواويل لـ گلبـي
-دنكت راسـي خجلانة وارجع بشعري ورة اذنـي
رجع سحبنـي لـ حضنة وصار يرجع شعـري هـو ويحجي
::-نروح لبيتنة؟!
آفـروز: هسه؟!
الميــرزا: اي ، نخلص ليلنة وحـدنة
-هـزيت راسـي بـ أيجابية وهو ابتعد عنـي وكال
::-البسـي شي وخلينة نطلع
-بـدون لا اجاوبة لبست صاية فوك ملابسـي ولفيت شالي شلون ما جان وطلعنه ، وما نحتاج ناخذ شـي ويانه لأن اغراضنة مقسمينها بين البيت وبين شقتنة
-طول الطريق واحنـه ساكتين كل ما اباوع عليه هو مبتسم ومـن يحس عليه اباوعله يدير وجهه عنـي ، يجبرني اضحك ومـن يسمعنـي اضحك يبقى يكول
::-بـ الهداوة يطرگاعة
-صعـدنة لـ شقتنة وبطريقـي للغرفة انزع بـ الحجاب والصاية وحجيت ويا
::-الشقة باردة
الميــرزا: هسه اشغل تدفئة
-شمرت الـي بـ ايدي علـى طرف الجرباية وانداريت اريد اطلع ، جمدت بـ مكانـي مـن شفت الميــرزا واكف بـ الباب وساند كتفة علـى حايط ويباوعلـي
-حاولت اكون طبيعية وانـي كلبـي يرجف
تمشيت بـ اتجاهه اريد اطلع صارت ايدة كدامي
سحبني عليه بهدوء وميل راسـة طبع بوسة جوة اذنـي
غمضت عيـوني مـن تذكرت نفس الموقف صار ويانه بـ
يوم العرس، بـس اختلاف مـن السماء للكاع بـ مشاعـري
-تمشـى خطوتيـن داخل الغرفة مرجعنـي ويا وسد الباب ، حسيتة سد الباب علـى كلبـي مـن التوتر والارتباك
احتضن وجهـي بين كفوف اديه غمضت عيـوني مـن شفايفة لامست شفايفي وصابتنـي قشعريرة مـن اختلطت انفاسنة
-ابتعـد عنـي وعينة علـى شفايفي ويمسد عليهن بطرف ابهامة وهمـس
::-روحـي صحـراء يمـج شـكد تمطريلي أحـتاجج أكثـر
آفـروز: أنت الشخص الوحيـد اللـي كدرت انطـي
كُـل مشاعر الحُـب والصداقة بنفس الوقت
أنتَ أمانـي وضماد أيامـي وجبـر خاطـري
الميــرزا: احبنــج حييييييل يبعـد الحيـل
-رفعنـي عـن الكاع وهو يهمس
::-اريـدن طرگاعتـي الشرسة الليلة
-نـزلنــي مـن بين اديه وبدأ يسحبنـي لـ عالمة
جان يزرع قبلاتة علـى بشـرتي مثل اللـي يزرع ورد
بـ كُــل حُـب وحنيـة ، يتمادى بـحذر ويهمـس بـ كلمات
تبث الطمأنينة لـ روحـي ، وتجبر گلبـي يخشع اله
اوقد نار حُـب جـديدة بيـننا ، كسـر كُـل الحواجـز
أتصلت أرواحُنا لنطبق مقولة "جسدين بروح وحـدة"
انهــى الليلة بـ قبلات ختامية لـ شفايفي وهمـس
::-كـدرت أروف روحـج بـ روحـي
-غمضت عيـوني ودفنت وجهـي بـ صدرة العاري
كلبـي يخفق بـقوة وبعـدني عايشة بـ عالم أصـفاد
احـس بـ لمساتة الحنونة علـى شعـري واسـمع سؤاله
بـ النبـرة اللـي يحبها كلبـي
::-متأذية حبيبي؟!
-هزيت راسـي بـ لا والتزمت الصمت ، عصـرني بحضنة وكال
::-راح اسويلج شـي دافـي تشربينة
آفـروز: خلينـي بـ موضع راحتـي
-ضحك بهدوء وجاوبني
::-احـب شراستج
آفـروز: وانـي احبــك
-صابتنة لحظة صمت وايدة رخت ، رفعت راسـي اباوعلة ملامحة جامدة ابتسمت وطبعت بوسة علـى حنجة
::-احبــك أصـفادي
-عض علـى شفتة مبتسم وغمض عيونة
::-شلون تخليني اشمرها مـن السطح هسه
آفـروز: هـاا نعديت؟! تعوقت مشاعرك؟!
الميــرزا: هيـج هواية علـى كلبـي يطرگاعة
انــه مو اكلج بـ الهداوة يبنت الناااااااس بـ الهداااوة
-جانت ضحكاتنة مـن كُـل كلبنة ، وبنفس الوقت الضحكة
ما فاركت وجهنة ، طلع الصبـح علينه واحنـه ما كدرنة ننام
فرحتـي جانت تكبر اكثر مـن اشوف فرحتة وراحتـة بـ قربي
-عـگد حاجبة مـن صار ضوة الشمس بعينة وكال
::-شبسرعة طلعت الشمس
آفـروز: واحنه لهسه ما نايمين
الميــرزا: استحستف اغمض عينـي وانتِ يمي
آفـروز: چــاا انـي راح انام وأنتَ ابقـى
الميــرزا: عيـوني ترتاح لـ تفاصيلج
-غمضت عيوني وضميت وجهـي عنه خجلانه
::-كافـي تخجلنـي
الميــرزا: چــاا كتلج قبل الـج بـ كلبـي جرايد حجي
آفـروز: قسمهن علـى الأيام الجاية
-ضحك ورفعنـي معدل نومتـي بحضنة، باس كصتـي وكال
::-نامـي يـ مُـهجة گلبـي
آفـروز: نسيتنة لفة الطماطة
الميــرزا: چــاا شني مو صرت انــه أدرينالينج؟!
آفـروز: زيادة الخيـر خيـرين أنتَ والطماطة
-ضحك ونهض مـن مكانة ومكومنـي ويا
::-جنـج علـى طمااااطة
-رحنـه للمطبـخ دورنه طماطة ما لكينة باوعلي وكال
::-تنتظـرين اطلع اجيبلج؟!
آفـروز: حتـى الفلاح ما يطلع يحوي طماطة هسه
الميــرزا: چــاا شلون؟!
آفـروز: خلينه ننام نعست ومـن نكعد نروح نجيب
-لف ايدة علـى اكتافـي مشاني ويا وجاوبنـي
::-تآمــرين
-رجـعنة للغرفة وما طولنة وغفيتة، ما كعـدنة ألا ورة الظهر علـى صـوت تلفونـي ، ما اهتميت ولا تحركت مـن مكاني ، رجع يرن مرة ثانية اسمـع الميــرزا يدردم
::-انــه اغلق جهازي حتـى نرتاح وهـي مخلية نغمة مالت اسعاف تفزز المهمود بـكبرة
-رفعت راسـي اباوعله خازرتة ضحك وسحب تلفوني
::-هـذا "هدهد سليمان"
-اخـذته مـن ايدة وجاوبتة
::-هـلا هـدهدي
-طفـرت مـن مكانـي من شــوغ روحـي الميــرزا بگرصة مـن ظهري ، يباوعلي بنظرات تحذير وانـي خازرتة واحجـي ويا هـود
::-هـاا هـود
هـود: شلونها سحارتنة
آفـروز: الحمـدلله شلونك أنتَ؟!
هـود: الحمـدلله ، الميــرزا يمج لأن محتاجة
آفـروز: اي موجود
-قدمت التلفون للميــرزا وحجيت وياه
::-يريد يحجي وياك
-اخـذه مـن ايدي وانـي كمت طلعت للحمام غسلت ورجعت نمت بـ مكانـي وهو بعـده يحجي ويا، بعـد فتـرة غلقة منـه ورجع تلفونـي بـ مكانه
::-شيريد منـك؟!
الميــرزا: اخـوج قرر يتزوج فجأة ويريدنه ويا
-نهضت بحركة سريعة فاتحة عيونـي وسألتة
::-ياهووو؟! زواجيش؟!
الميــرزا: يـوشع ، شنـي ماعنـدج خبـر؟!
آفـروز: دقيقة دقيقة يتزوجمن؟!
الميــرزا: ماعنـدي علم ، اليـوم نعرف
-سحبت تلفونـي بسرعة واتصلت عليه بس ما جاوبنـي ، رجعت اتصلت علـى امي هم ما جاوبتنـي ، احـس تخبلت والميــرزا مصـدوم مـن ردة فعلي وكال
::-شمالج آفـروز؟!
آفـروز: مابيه شـي بـس ترا المفروض انـي اعرف لو نسو انـي بنتهم؟!
-حتـى ما ركزت عليه شحجة واتصلت علـى يُـسر بسرعة جاوبتنـي وصاحت
::-هاااااي أنتِ وينج؟!
آفـروز: شدايصير يُـسر؟!
يُـسر: يـوشع فجأة كال راح يعقد اليـوم وحتـى احنـه ما عدنة خبـر وطلعنا للسوك انـي وماما ركض ركض حضرنة كم شغلة واخذتلج فستان للحفلة وهسه انـي يمكم عبالي أنتِ بـ البيت
آفـروز: ويـوشع ويـن؟!
يُـسر: والله ما اعـرف وصلنـي وراح
آفـروز: تمام ابقـي لا تروحين هسه راح اجيج
يُـسر: يلا منتظرتج
-غلقتة منها وروحـي مفرفحة عليهم اثنينم هم يـوشع وهم هـزراف ورفعت عينـي علـى الميــرزا
::-رجعنـي للبيت
-سحبني لحضنة وكال
::-شمالج؟! واذا تزوج؟! ليش هيج ضجتـي؟!
آفـروز: بـس تفاجئت ما ضجت
الميــرزا: افرحيلة ولا تروحيلة بهل وجه
-هزيت راسـي بـ أيجابية وابتعدت عنه جهزت نفسـي وطلعنه راجعين لـ بيت العايش ، بعـد فتـرة وصلنة ودخلت للبيت ادور علـى يُـسر ، كالت عمتـي جـوري
::-صعـدت فوك يم هـزراف
-صعدت عليهن تلكتنـي يُـسر ادردم
::-شوفـي ساعة وانـي اختار فستان لـ هـزراف وهسه تكلي ما اكدر اروح شحجي وياها بـ الله؟!
-باوعت لـ هـزراف ونخمش كلبـي مـن شفت الدموع تلالي بعيونها ، تحاول تخفـي اللـي بيها وكالت
::-شعنـدي رايحة
يُـسر: هاي شبيج هـزراف غير اختنة وحاسبين حسابج
هـزراف: والله تعبانة ماكدر يُـسر
-سحبت يُـسر حضنتها وحجيت وياها
::-حبيبتـي اختـي حيل مشتاقتلج
يُـسر: هههه نسيت اسلم عليج والله انـي هم مشتاقتلج
آفـروز: انزلـي قنعـي عمتـي جـوري تروح ويانة
يُـسر: كولي والله؟!
-ابتعدت عنها اضحك وجاوبتها
::-اي خل تجي ويانه راح تفرح
يُـسر: تمام
-عافتنـي وطلعت وانـي كعدت يم هـزراف وسألتها
::-شبيـج؟!
هـزراف: مابية شـي بـس ماكدر اروح تعرفين بيه...
-قاطعتها ورجعت سألتها
::-تحبنية؟!
-سكتت ودنكت راسها ، اخذت نفس وحجيت وياها
::-لو تكولين اي وينلغي زواج يـوشع لو تكوليـن لا وتكوميـن تروحيـن ويانة
هـزراف: ماحبة
آفـروز: چــاا كومـي روحـي ويانة
هـزراف: ماكدر فدوة
آفـروز: معناها تحبينة وماتكدرين تشوفينة يـروح لـ غيـرج
هـزراف: بـس تعبانة وماكدر اروح
آفـروز: اذا ما رحتـي راح افهم مثل ما يحب عقلي وتعرفين عقلي شيحب وراح يخرب عقـد يـوشع بسببج
هـزراف: لا تسوين هيج آفـروز
آفـروز: القرار الـج بعـد
-بقت تباوعلي بعيون مدمعة ، ميلت راسها بـ توسل وانـي كمت مـن يمها وية دخـول يُـسر تگمـز فرحانة وتحجي
::-كالت اي اروح وياكم
آفـروز: شوكت نروح؟!
يُـسر: بعـد نص ساعة
آفـروز: ويـن فستاني اللـي جايبتة الـي؟!
-انطتنـي واحـد مـن اللـي جايبتهن وكالت
::-ذوق ماما راح يعجبج
آفـروز: عاشت ايدج وايدها راح اجهز نفسي بغرفتـي لمـا تكملن انتن
يُـسر: تمام
-طلعت مـن يمهن وانـي فكرة وحـدة ببالي "لازم يـوشع يتراجع عـن قرارة" اول مـرة ما افكـر بـ الراح يصيـر ولا احسب حساب للأثار الجانبية ، لأن 3 اشخاص راح يدمرون مـن هـذا الزواج
-غيرت ملابسـي وخليت مكياج ، شمرت شال علـى راسـي بشكل فوضوي، وويا الفستان كعب ، اخذت صايتـي بـ ايدي وطلعت عليهن صارن بوجهـي طالعات مـن الغرفة
-هـزراف تحسها "ملاك ونازل مـن الجنة" بـفستانها الأبيض ومكياج لايگ وية لون بشرتها الحنطاوي، شعـرها المتناثر علـى اكتفاها ، ابتسمت بوجهـي وتحاول تثبتلي هـي قوية وكد كلمتها مـن كالت "ماتحب يـوشع"
-ركضت يُـسر بـ اتجاه الشباك مـن صار صوت ضجة برا ، باوعت علينه وكالت
::-اجة يـوشع
-اختفت ابتسامة هـزراف وباوعت عليها بصدمة وصدمتـي مو اقل منها وسألتها
::-يـوشع ياخذنه؟!
-ضحكت بصوت عالي وهي تصفك ايد بـ ايد وكالت
::-ما راح ياخذنة لـ مكان اخوية جايب مشية لـ غزالتة
-رفعت حواجبـي مصدومة
::-شنـو احنه مضحكة عدكم؟!
يُـسر: انـي شعلية والله هو اخوية يحب الدراما وكل الموضوع جان خطة منه حتـى فستان هـزراف ذوقة
-مـن جهه احـس اريد اطيـر مـن الفرحة ومـن جهه تنرفزت لأن هيـج خوفونة، تقدمت سحبت هـزراف مـن ايدها اريد ادخلها وياية لـ غرفتـي ونترت بـ يُـسر
::-اخـذي اخوج وارجعـي منين ما اجيتو ماعدكم مرة يمنة
يُـسر: ههههههه نرفع عليكم دعوة والله
آفـروز: خلي اخـوج يواجهنـي بـ المحكمة عـود
-مشيت وانـي اسحب بـ هزراف وهـي تضحك وتبجي بنفس الوقت، استوقفنة صوت عمتـي جـوري اللـي صعدت علينه تضحك وكالت
::-يمة شلون عرايـس حلوات
آفـروز: أنتِ تدرين؟!
جـوري: مـن الصبح ادري بـس يُـسر مارادت نحجـي
-انداريت علـى يُـسر رافعة حاجبـي ، ضحكت ضحكتها الشريرة وكالت
::-ما علية انـي احجي ويا اخوج
آفـروز: عيناي لا احجي ويا ولا يحجي ويايه بس ماعدكم مرة يمنة
جـوري: ههههه ولج يمة شجاج
آفـروز: شنو شجانـي والله حركو كلبـي
جـوري: لـ حركة لـ كلب عدوج ان شاء الله
-ضحكت وانطتنة خبـر امي ليلى جوة وتريدنه ننزل يمها ، انداريت علـى هـزراف وحجيت وياها
::-ممنـوع توافقين
هـزراف: تمام
آفـروز: احتـرمي نفسج هـزراف
هـزراف: أنتِ فصلي وانـي البس
آفـروز: چــاا وافقـي
-فززتنة ضحكة يُـسر مثـل المبردة المكسرة وتكركع، وتحجي ويانة
::-عزة عزة تضحكن هههههههههههه
هـزراف: هههههه فشلتينة كدام الاوادم آفـروز
آفـروز: وينها الاوادم هي؟!
يُـسر: حقج معتبرتنـي بزونة مطلگة
-هــزراف
-صـرت اضحك علـى كل حجاية اسمعها منهن
شلون هيـج مـن حجاية طفت النار الشبت بگلبـي
مـن رفضتة بجيت ومـن راد يخطب بجيت وهسه هم
بـس هل مرة بجيت دموع الفـرح ، مافكرت بـكل الكلام
اللـي حجيتة لـ يـوشع بـ ذاك اليوم كل اللـي فكرت بـي اليوم "ما اريد اخسـر يـوشع ، ما اريـد اضيعة مـن ايدي"
-سحبتنـي آفـروز وياها لـ يم الشباك نباوع عليهم
يـوشع لابـس قاط نيلي وقميص أبيض واحس الأناقة تفوح منه ، ندستنـي آفـروز وهمست بضحكه
::-دشوفي هو هذا ينرفـض؟!
-ضحكت ودنكت راسـي وكالت يُـسر
::-هاي منين جاب هذولة العالم؟!
آفـروز: قابل معارفة شوية
يُـسر: شو ما جايب مشية عگل
آفـروز: عود مـن نمشي عليج نجيبلج مشية عگل
-صفنت علينة ثوانـي تستوعب حجاية آفـروز ونترت بينه
::-اولـي يم ماما احسـن منجن
-نزلت كدامنة واحنه وراها ، آفـروز لازمتنـي مـن ايدي تمشيني وياها ، ابتسمت خالة ليلى مـن شافتنة وكامت مـن مكانها ، وفتحت اديها النـه تهلي بينه
::-هـلا ببنياتي الحلوات
-حضنت آفـروز ورجعت حضنتنـي وتبوس بيه ، كعدت يمها وانـي طامسة بـ خجلـي وهنه فرحانات واللـي لاحظته كل البيت عدهم خبـر حتـى البنات ومتجهزين بـس انـي وآفـروز لعبو علينه يُـسر ويـوشع
-مـرت فتـرة ودخـل جـدي مبتسم اشرلي اروحلة، طبع بوسة علـى راسـي وكال
::-ابن الأصول دك باب اهلج بنيتي شرايج أنتِ؟!
-دنكت راسـي واحـس راح اتخربط مـن الخجل وجاوبتة
::-الرأيي الك جـدو
جساس: نتوكل علـى الله لعـد
-هزيت راسـي بـ أيجابية وهو عافنـي وطلع وبعد دقايق اجو للاستقبال وصاحو علينه حتـى اوكف ورة الباب، بلعت ريگـي متوترة ورفعت عيني علـى آفـروز ، ابتسمت تطمنـي وكالت
::-فكـري بـ أشياء حلوة وبس لا تخافين
-حسيت ايد خالة ليلى علـى كتفـي وكالت
::-ركزي ويه الشيخ حبيبتي
-هـزيت راسـي وبقيت اسمع كلام الشيـخ لـما سألنـي السؤال المعتاد "اذا قبلتـي قولي نعم أنت وكيلي"
صارت طبـول بـ كلبـي وحتـى نسيت شلون احجي
كرر السؤال مرة ثانية غمضت عيـوني ونطقتها بـ كامل ارادتـي ورغبتـي وحـبي المتجاهلتة لـ يـوشع
::-"نعم أنتَ وكيلي"
-فزيت مـن صوت الهلاهل والورد اللـي صار ينطش عليه
رفعت راسـي وجانت يُـسر شايلة سلة ورد وتطش علية وسـدرة وآفـروز يهلهلن ووياهن عمتـي كوثـر
-باركولي كلهم واخيـر وحـدة آفـروز، حضنتنـي بقوة وتحجـي بـ فرحة
::-الـف مبروك ياروح آفـروز
هـزراف: الله يبارك بيج
-بقت حاضنتني وتبوس بخدودي وفرحتها الدنيا ما سايعتها
مـر الوقت بين هوسات البنات وركصهن وهلاهلهن ومـن جهه هوسات الولد برا بـس ما جانو ولدنه
-واكفة بـ مكاني خجلانة وبس اوزع ابتسامات
اجت عليه آفـروز وكالت
::-تعالـي وياية
-مشينة انـي وياها بـ اتجاهه الأستقبال وعرفت يـوشع هنا لزمتها مـن ايدها بسرعة وحجيت وياها بتوسل
::-عليج الله ما اريد اشوفه هسه
آفـروز: حتـى يـوشع يضرب نفسه طلقة
هـزراف: حبابة والله راح ابجـي
آفـروز: ابجي اكو مـن يمسح دموعج هسه
-حرت مدري صدك ابجـي مـدري اضحك علـى سوالفها
فتحت الباب ودفعتنـي بخفة وسدت الباب ، بقت عيني علـى الباب ردت ابجي مـن ما دخلت ويايه ، غمضت عيوني مـن سمعت حجاية يـوشع
::-غزالتـــي
-رفعت راسـي عليه فتـح ادية واشرلـي بـ راسة اروحله، تمشيت بـ خطـوات بطيئة اتجاهه ، ابتسم وحجة بـ حُـب
::-هــلا يـل بيك افك عيني واسدها
-ابتسمت وابعدت نظـراتـي عنـه، حضن وجهـي بين اديه وطبع بوسة عميقة علـى كصتـي وهمـس
::-الـف مبـروك يـدعوة أمـي
هـزراف: الله يبارك بيك أستاذ
يـوشع: ههههه يلا نمشيها
-ردت اضرب راسـي بـ الحايط مـن كمية الثول اللـي داحـس بـي، ليـش هيـج اتخنث وما اعرف احجي بعد مـن اصير يمة ، رفع راسـي خلانـي اباوعله وكال
::-تذكرين مـن دعيتيلي ببنت الحلال اللـي تسد وحشة ايامـي ، جانت لحظة استجابة وربـج استجاب لـ دعواتج
هـزراف: اسـفة يـوشع
يـوشع: عـذرتج قبل لا تعتذرين غزالة گلبـي
-سحبنـي لحضنه متـردد مـن شافنـي ما اعترضت حضنـي بقـوة وهمـس يم اذني
::-خليتهم يطشولج ورد خايف الچكليت يأذيـج
-نزلت دموعـي مـن حنيتة مـن حُـبه مـن اهتمامة ، رفـع راسـي يمسح بـ دموعي ويحجي
::-ليش الدموع ليش؟!
هـزراف: داحـس نفسـي حقيرة وثولة
-حجيتها وانفجرت ابجي وهو بقـى يضحك ويسكتنـي ومـن هدأت رجع سألنـي
::-ليـش هيـج تحجين هـزراف؟!
هـزراف: انتَ تحبنـي ومهتم بيه وانـي أذيتك وجفصت وياك بـ الحجي وهسه هم ما اعـرف شحجي وياك
-احجي واشهك مـن كل عقلي وهو ميت ضحك
::-ما زعلان منـج لا تبجـين
هـزراف: ولا شايل بكلبك عليه
يـوشع: شايل بكلبي واجي اخطبج؟!
هـزراف: حتـى تنتقم منـي
يـوشع: هههههههههههه لعـد ليش قبلتـي؟!
هـزراف: حتـى ما ارجع أذيك
-باس عيونـي وبقـى يمسـد علـى خـدي بحنية وكال
::-الأذية التجـي منج تسوة ابو الراحة مـن غيرج
رايـدج أنتِ واذيتـج وجفـصاتج وتقلـبات مـزاجج
وعهـد عليه منـا للموت راح اتحملج بكل حالاتـج
هـزراف: ماراح تعوفنـي؟!
يـوشع: الا اذا تسودنت
هـزراف: راح تصيرلي كلهم
يـوشع: راح تكونين أنتِ فريضتـي والدنيا كلها نوافل
-كلامة يجبر كلبـي وخاطـري بقيت اتأمل عيـونه وانـي اردد بـ داخلي "الحمـدللة يوم دخل حياتـي"
-ابتسم وكال
::-ودعينـي حتـى اروح
هـزراف: ويـن؟!
يـوشع: راح اسافر باجـر بـ شغل كم يوم وارجـع
هـزراف: تروح وترجـع بـ السلامة
-تقدم خطوة عليه وهو محتضن وجهـي ، دنك راسة وانـي بسرعة غمضت عيوني ، حسيت شفايفة الدافية طبعت بوسة بزاوية فمـي، وطبع بوسة ثانية علـى خـدي وكال
::-انتبـهي لـ نفسـج هواية وتذكري يـوشع يحبـج هواية
-مـن التوتر والخجل حتـى النفس كطعتة ، رفع راسة وسألنـي
::-ماراح تحجيـن شـي؟!
-هزيت راسـي بـ لا ، ضحك وابتعد عنـي يعدل بنفسة وكال
::-استودعناكم
-عافنـي وطلع وماكدرت انطق ولا حرف احس كل خلايا جسمي صار بيها شلل، كعدت علـى الكرويتة اتنفـس بصعوبة وامسـد علـى جهه گلبـي اللـي راح يطلع مـن مكانه
-مـر اليوم مثـل الحلم احس ممصدكة انـي صرت لـ يـوشع
ثانـي يوم هو سافـر وجان يتواصل وياية علـى طول اليوم
مرة يحجي ويايه عادي مرة يضحكني مرة يضيعني بغزلة ويخليني اترافس بـ فراشـي مـن الخجل
-رسـول انطى خبـر لـ جدي واهلة بـ قرارهم هو وعاتِـكة ووضح الهم هي تريد تنفصل واخوها وياها بـ قرارها ، وهـذا جان الاتفاق بيناتهم وانفصلو بدون اي مشاكل وخاصة جدي وعمـي أكثـم اتقبلو الموضوع لان هي رايدة
-شمرت نفسها آفـروز علـى الجرباية وصاحت
::-عجييييييب اول تالي ينحل موضوع بدون مشاكل
هـزراف: كولي الحمـدلله والله انـي كلت جدو راح يسويها حرب مـن جهه هارون ومـن جهه رسـول
آفـروز: الف الحمـدلله والنبـي تعبنه مـن الهوسات
هـزراف: جدو لهسه ما يحجي ويه هارون
آفـروز: هسه واذا ما حجه ويا انكطع عنه الماي والهوى
هـزراف: ههههه يلا اول وتالي يتصالحون
-ابتسمت وانطتنـي خبـر يردون يرحون للبصرة هل يومين جان بنفسـي اروح وياهم بـس مادرت احشر روحي واخليهم ياخذون راحتهم
-مـر يومين والوضع هادئ ، بـ اليـوم الثالث كعـدت علـى صـوت سـدرة تبجـي وتشهك يمي بـ الغرفة ، نهضت مفزوعة وخايفة كعدت يمها بـ الكاع وسألتها
::-شبيـج سـدرة
-دنكت راسها وانفجرت بـ البجـي حالتها تبجي الصخر وتخوف بنفس الوقت بجيها وشهكاتة مو مال شـي عادي
بقيت اهز بيها اريدها تحجـي وهي عجزت تنطق غير اسم هارون
::-هاااارون
هـزراف: شبـي هاااارون سـدرة
-رفـعت ورقة بـ ايدها الترجف وتحجـي بوجع كلب
::-راح هاارون رااااح بسببي...
يتبـــــع.......
▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫
َ
َ
◄التصويت يا عباد الله 💔
وتعليق حلو مثل عيونكم
◄تابعــو حسـابـي ع الأنستــا [ itsara.kh ]
قناة التلي itsara105