روح في بحر الظلام

الحلقة الثالثة والعشرون

روح في بحر الظلام

____ الكاتبة بحر _____

بنات كل اللي تمر من هنا ارجوكم لتنسون التقييم

بالنجمة والتعليق بين الفقرات لا ينزل تفاعلكم اكثر لان استمد قوتي منكم

+++لتنسون اضافة الحساب لطفا

⭐🌟⭐

،،،،،،،،،،،،،،،،،،،،،،،،،،،،،،،،،،،،،،،،،،

رانيا

من بعيد شفت سيارات الشرطة گبال بابنا والعساكر والشرطة محاوطين الباب من بعيد شفتهم شلوون كسرو باب البيت

شمرت كتبي وكلشي بأيدي وركضت وركض كلبي گدامي راح اخوووي ياا ربي لاا فدووة لااا المسافة جانت مو قريبة ركضت مثل الطفل اركض واتعثر

الى ان وصلت راكضة اريد ادخل للبيت ولزمني واحد منهم من حجابي انسحب بأيدة وبقى لازم بششعري

:بيييتتتنة بيييتنه هذاا عوووفني فدوة

:اعووفج موو ودم الضباط القتلتوهم يرووح هدرر اذااا ما خلييناكم تتمنووون الموت جان يحجي بغضب عارم وما ان انهى كلامه دفعني وگعت انضرب راسي بقوة بالحايط حسيت مخي انفجر والدم اخذ وجهي نهضت وكفت بصف الحايط واسمع الصرخات اخترقت عقلي بدون رحمة صرخات امي وزيااد ومشمش

كمت اريد ادخل واحد منهم وجه السلاح عليه

:باوع فدوة بس افهمك امي بيهه جلطة راااح تموت

:اششششش نفسسس مااا اسمعع

انشلع كلبي وي صوت زياد يصررخ بكل صووته واضح ديضربونة يصيح ماالي علاقة والله موو ويااهم بدون فائدة شفت

:مااالة علاااقة حرررام عليكم عووفو فدووة عووفو بين ما احجي طلعو زياد سحل من ادي لازمو ثنين، يجرو بلارض والدم مالي، خشمة وحلكة ينزفن سوة

لا خفت من تهديد ولا من سلاح ركضت علي اريد اسساعدة قبل ما اوصل انسحلت من راسي وانشمرت سمعتة يحجي بصوت خافت

:دخلي راانياا مابية شي دخلي جووة

واحدمنهم كالة مابيك شي صدك جذب حجاها وانطا دفرة على رجلة على اثرهه صرررخ زياد صووت ترك بكلبي وووجع ل اخر يوم بعمري

وي صررختة صحت لاااا لاااا. رجلة معوووقة لاااا فدوووة تقرب واحد بيهم حيل ضخم داس على رجلة وكال اكطعهه ررررجلك اذااا ما اعترفت منوو ورااك وابووك وووين احجججي كل هذا بالشارع الناس اختفت عبالك محد بالدنيا غيرناا

ساحك على رجلة وزياد فرفحت روووحة يبجي ويصييح لااااا فدووة لاااا راااح اموووت

تقرب واحد حاجة اللي داعس على رجل زيااد گالة

:كافي قيصر عووفو راح يفطس هنا ومانستفاد شي

اخذو زياد روحة رايحة

لحضة غباء مني ركضت وراهم مثل الطير المذبوح مثل قلب الام صحت بصوت عالي

:اااننيييي انيي اعرف منووو ورة هااي الششغلة والله انيي اعرفة ههو هددني

صااح زياد :لججج ررررانييييااااا طططبي جوووووة لججج شششتعرررفيين. طبييي جوووة الغبييييةة

خوف زياد علية كان اعتبرو دليل ثبتلهم ان اكو شي عدنا

كانو كلهم ضخام بشكل مو طبيعي ضاع اخوي ابين اديهم

من انتبهو لنضرات زياد التحذيرية وكلامي بسرعة خاطفة اقترب اللي اسمة قيصر لف ادية اثنينهم للوراء، ويسحب بية ل. لسيارة

مشمش تبجي من داخل البيت تباوع من شباك الصالة مالت بيتة وتبجي وماما ماكو خبر عنهه

:لك عووووفني اميي راح تمووت عووفنيي الله ياااخذكم والله مااا مسووين شي

وي ما كملت كلامي اجتني ضربة بمؤخرة راسي شهكت وفقدت الوعي

فتحت عيوني بسبب مي بارد ثلج فززيت مرعوبة اني بأيد نسوان اثنين بزي عسكري وحدة لازمتني من شعري والثانية اللي شمرت المي علية ملابسي صارت كلهه مي باوعتلهم بخوف

:خالة فدوة
بس كملت كلامي لطمتني على حلكي وحجت بصوت عالي صوتهه سمعتة من اقبح الاصوات

:خلالة تخل اعضامج المجررمين بسببكم استشهدو اثنين ضباط وشرطي اذا ما راويناكم الله حق

:كافي عوفيهه راح تموت بيدج وديهه طالبينهه للتحقيق هناك تاخذ جزاهه
كملت كلامهه وضحكت

كومني خاوية من ضرب الكفوف على وجهي بملابس المدرسة بلا حجاب

المكان جدا واضح انه مركز شرطة من ملابسهم نمشي بأحذ الممرات ما اعرف وين موديني قابلنا بالممر اللي اسمه قيصير ماا نسييته ولا نسيت اسمة ولا الطريقة اللي بكا بيهه اخوي خلا يصرخ وبقى داعس على رجلة

حقد ووجع نساني نفسي ووضعي ما ان مر من يمي باوعت بوجهه خازرتة وابجي ضحك بأستفزاز ورد علية وهو يمشي

:هههههه تبجي ال....... بعد وكت للبجي صبرو عليه

:تفووو عليك وعلى وجهك يااا نذل ياا ماعندك شرف الله ياخذ حوبة اخوية منك

خنزر بووجهي لزمني من شعري، من قوة لزمتة حسسيت خصل مو شعرات تششلعوو

:مااشاااء الله عررامتج مال خبرررة يوولي

حجى هالكلام وضرب راسي بالباب الحديد القريب مني مايقارب الست او سبع ضربات صوت الباب الحديد والم راسي خلاني اگعد راكعة على ركبي

:اخذذوههه لغرفة التحقيق وعلگنهه علما اشوف ابووهه

هو گال ابووهة واني حسيت بسكررات الموت رووحي انسسسحبت مني ما اگدر اتخيل بابا يتأذى رجال كبير مو مال هيج اذية واهانة زحفت اقتربت لرجلي واني عيوني مابقى من بصرهم غير شوية غواش من كثر الضرب على راسي

تمسكت ببنطلونة من يم الركب واني ابجي بصراخ، فددوة عووفو ابويةة موو كلتلكم اعرف كلشي اني اسوولف كلشي بس عووفووهم فدووة اني السبب

:طلعتي مو هينة يصغيرة يلاا اخذنهه عيب من الولد اليوم يندفنون وكتالهم مرتاح خل ننعشهم ششوية

:والله موو اخوووية والله ماالنا علااقة والله

احجي وهن يسحلن بية دخلني لغرفة ماا اشووف غير الغوواش عافني وكعت بلارض شالتني حطتني على كرسي وشربتني كلاص مي مالح وغسلت وجهي بمي بارد كل حركاتهه بنتر وضرب

:اصصحي لج فتحي عييينج اذاا بيج خير احجي وخلصي نفسسج ترا والله ي........

لعبت نفسي من كلامهه اريد اتقيء بس معدتي فارغة بقيت بس اهوع

بالگوة صحيت وتوضحت الرؤية شوية صوت صراخ رجولي بعيد وسعت عيوني وارتعد قلبي خوفا وقلقا

:خليهه شوية علما يجي الضابط يلا تعلگينهه

:فدوة بس خل افهمج الله علييج بس گوليلي صدك ابوية هنا

تقربت مني فركت حلكي وفكي بأيدهه الكبيرة

:ولاااااا كلمةةة خووش

كملت كلامهه ونترت وجهي

ذيج واكفة بالباب اجت بسرعة كالت يلا يلا اجا

جرني بقوة ربطن برجلية ما اعرف شنو حاطي بكيس بس ثكيل بالگوة دفعتة وربطت ايدوة بحبال وعلگتهم بالجنگال اللي بالسقف گلبي لو عندة جناح جان طاار

ابجي واناشغ واصرخ مم يا الم مااا ادري من راسي لو من ادية اللي تملخن لوو رجلية اللي سااحبهم الثقل دخل مبتسم بخبث

:ايي يالعرمة سوولفي

:احجي والله احجي بس فلتني ادية تملخن

:هههههه لا والله عذرينا يابة ضوجناج التف وراي بعد ما اشووفة

هااي اللحضات ماا اتمناها حتى لعدوي حتى لو شخص يقتلني ماا اتمنالة يعيش اللي عشتة

كان وراي ما اشوفة صصررخت صررخة ههزت كل رووحي بسبب ضربة الصوندة اللي بأيدة ضربني على سيقاني من ورة على منطقة العضلة ضليت ابجي وارجف من الالم ماا اكدر المس رجلي واخفف وضاعف الالم الثقل اللعين اللي برجلية

مشنووطة شنط، يسألني وما اكدر احجي حتى لو اريد احجي ماا اكدر احجي

دخل واحد بضخامة اللي اسمة قيصر بس مبين اكبر منة بالعمر اخذ منة توقيع التفتلي معلگة ولا كانما بشر گدامهم طلع ثواني ورجع گالة

:كافي نزلهه

:لاا بعد وكت

:قيصر

:عدنان توكل على شغلك لا تدخل

راح بصيص الامل

اقترب يحجي بهدوء اتفلين بووجهي موو هههههه يلا احجي

:باوع هذاا ورطة دريد ابن (.......) اللي ابووهم تابع لل......

صار كدامي عينة بعيني وجهي كلة دم ومتعرق ودموع ومشنوطة من ايدة ورجليه لدرجة اعصر نفسي يلا اكدر انطق الكلمة

:امممم كملي

:هوو هددني قبل كم يوم وحتى گال راح اضيعكم كال دا العب بيكم مثل الشطرنج

مد ايدة لمقدمة رأسي وجر شعري بقوة :انتي ششنو تضحكين علية احححججيي اصدقاء اخوج شنوو اسمائهم واللي فجر الرماانة منوو

:ماااا اعررف والله مااا اعرف بسس احنا متووورطيين والله مالنا علاقة زياااد بريء فدووة عوفوو ابوس رجلك

:لااا هيج اموورنا ماراح تمشي ردتج تحجي بالطيب بس الضاهر انتي.......

كمل كلامة فشاار، وراح جاب الصوندة كانت خضراء وطولهه متر او كثر بقى يضررب بية

ماشفعتلي صراخاتي ولا دموعي توقف عن الضرب صار كدامي جان حيل طويل ورغم هذا صايرة بطولة هالكد مارافعيني عن الارض

:لاا تصرخين اتنرفزز من حس العايقات كلما تصرخين اضرب اقوة

:يلا سولفي
:والله حجيت كلشي والله

راح مني وكف يم الميز حط ادي يمين ويساار ودنك كمزني من ضرب الميز بثنين ادي ورجع صار كدامي

:ايي واااحد الة ايد بقتل حسيين راااح يتجاازة ومن ضمنهم ابوج ال...... ِ واخوج..........

بقت بس دموعي تجري وكل حركة من ايدة تفززني بأيدة سكين تلمع تقرب من عندي كلش صرخت عبالي راح يذبحني مد ايدة قطع الحبل من فوك وكعت بلارض بكل قوتي ساعات طويلة اني مشنوطة

الالم اللي حسيتة يعادل ميت ضربة سكين عضلاتي جانت متشنجة والدم محصور بأدية ورجلية من الضغط ف بوگعتي صرخت لحد ما اجا لزمني من وجهي وضرب رااسي

اخرر شي سمعتة جان صووتة وهو يكلي صصوووتج

انتهيت ما اعرف شكد نمت او بلاحرى فقد الوعي اجت وحدة منهم كعدتني

:گعدي گعدي ولج اخوج رااح يموت اعترفي وخلصي علاقل يحكمو ويخلص راح يموتونة

كلامهه مثل شرار النار وكع على جروحي، بس ماعندي قوة ارفع حتى اصبعي بقت بس دموعي تجري واني مغمضة عيوني ضربتي على راسي وكالت

:عفية عرامة فوك ماكاتلين الوادم يتسترون عليهم دضلوو

راحت قبل لا يسرقني النوم دخل واحد على كتفة نجمة جلسني على الكرسي غصب عني.واني صوت الصراخ راح مني ماعندي قوة حتى للصراخ جسمي كلة متورم شغل الة مسجل وكام رتب الكاميرات حجيت بصوت ضعيف

:لا تضربني

ما اهتم ولا رد جان يغني ما اعرف شنوو يدندن ، كال شغلتج مو يمي بس احجيلي عن دريد من التقيتو لحد اخر لقاء

:اني احجي وهو يأشر كملي

:امممم ابوج بالمستشفى تدرين

:ش ش شسويتولة شش شبي بابا

:................. فشر علية وعلى بابا بعدين ضحك وگعد

كال بس والله خسارة ابوج بالمستشفى ونزار وحسين بالگبر

مدلي كلاص ماي جان بلاستك ووصخ كال اشربي فرحت شربتة

مد ايدة وخر الشعر ورة اذني جمدت و قشعر بدني بقرف لزم الترچية اللي بأذني وشلعهه بلما يفتح القفل الترچية مزقت روحي قبل ما اللحم وطلعت وكعت بلارض مفرفرة من الالم تقرب ارتعبت اتووسل مد ايدة الاذني الثانية فركة وكال

:حرامات الثانية ماكو، دخل اللي اسمة قيصر شفت هذا خبأ الترچية بجيبة

قيصر: هاا حساام شبيهه العايقة.

حسام : ماكو شي جاي نتشاقة

قيصر:گعدهه جايبلهه مفاجأة....... دريد

گعدني واني ابجي بحرقة من الخوف والاهانة والذل صارت عينة على اذني عفس وجهه بقرف

گعدني على الكرسي وربطني بحبالي من كل مكان واني رقبتي تتمايل ماعندي قوة اسندهه

:شغل الحاسبة ودارهه علية جان زياد عاكسين ادي للوراء ومقيديهم ومعلگي وهذا اللي اسمة حسام وواحد ثاني يضربون بي بالدونكيات على كل جسمة ومركزين على منطقة رجلة عيني المصابة تنزف وجسمة كلة ينزف ويصرخ

فاتحة عييوني المتورمة واهمس لاا لااا ززياااد لاا خطية مريض زيياد لاا ااااا صوتي مختفي واللي يخرج مني كان اصوات انين بعدين اقترب منة قيصر صار يضربة على بطنة بوكسات

بهالحالة اسناني اصطكت صارت شي يضرب بشي بقوة اللي اسمه حسام يضحك بس من انتبهو للدم ينزل گام جاب قطعة قماش كبيرة دحسهه بحلكي

شغل فيديو ثاني لبابا وكانت مجموعة يضربو دفراات بالبساطيل وهو يبجي واحد يصور علكو وصارو يضربو بوكسات على بطنة ويغلطون اهانات وذل لكن النصيب الاكبر من التعذيب كان لزياد

قيصر:بدووون اعترافات ماااتطلعوون غردي يلا

مد ايدة نتر القماشة اللي بحلكي وشمرهه

:اذا اعترفت تعوفهم

:اييي هسة بدينة بالعدل يلا احجي بسرعة

كلامي صار صعب لان عضيت لساني اكثر من مرة بسبب اصطكاك الاسنان

:بس كولي شنوو اكول واني اكولك والله حتى اي شي تكولة اذا تريد اذبحني بس عوف اخوية

خزرني بغضب وگام يمشي وساحب راسي وصلنة لبرميل مي

:گال وحدة مثلج تلعبني وتضحك علية، كفر وغط راسي بالبرميل لحد مابيني وبين الموت شعرة يلا رفعة وعاد الكرة مرة ومرتين وثلاثة وبعدين شمرني بلارض

طبعا ما ادري شكد صار ولا ادري الليل من النهار بعدهه بفترة رجع دخل گال يول تضحكوون علينة برييئين مووو

لعد هذا اللي ابيتوونتكم شنووو طحييين صصصفر

_____________

مشمش

كعدت من النوم عطلة ورغم التوتر والهموم كنت عايشة طفولتي مدللة محبوبة حتى زياد لما يتعارك وياي احس بي يحبني يلاشيني ويداهرني بس حتى نتعارك،

رانيا رب العالمين زرع حب لرانيا بكلبي لدرجة يفيض من داخلي ما اسيطر علي هي تدرس لو تطبخ لو تشتغل كلبي ياخذني احضنهه و ابوسهه احفظ سوالفهه احفظ حركاتهه اتمنى رضاها احبهه احب رانيا لان هي اللي ربتني

مو نكران لفضل امي لا بالعكس ماما ابد ما قصرت بس كانت الخياطة ماخذة وقتهه الاكبر مالهه خلك ابوسهه او احضنهه او تسولف همهه الاكبر انو شغلهه يعجب الزبائن واذا خربت بيدهه قطعة او فصال معناهه ضروري واحد ينضرب

وترجع تندم صح ما تراضي لكن تلين بتصرفهه وياه، ماما اللي حتى بطفولتي تصرفاتهه محيرتني

اكثر من مرة اشوفهه مختليه بنفسه تبجي وتحجي وي نفسهه على اخوي منتضر او على شي ثاني مماكنت اعرف ف اثناء انشغالهه انخلقتلي ام اخرى

رانيا تبدل وتغسل وتوكل وتدرس وتسمع تفاهاتي وسوالفي وانام بحضنهه بالليل ومن مصروفهه القليل تعزل شي اللي اتدمر اذا زعلت واكون طايرة بضحكاتهه

بهاليوم المشؤم گعدت قبل ماما وزياد اللي كان نايم بعمق حول عيونه اسود واضافرة مجرحة من الشغل وامي اللي ضغطهه مديستقر ابد

عود نادرة قررت اجهز الاكل واصحيهم، رحت للمطبخ امشي فخورة بنفسي راح اصير نادرة طبيت ادور على القوري مااكوو

اخر شي شفتة صاير جوة الگدور مديت ايدي سحبتة غير الكدورة فضحني فضيحة طربك مااطربك سديت اذاني لحد ما هدأت الضوضاء اخذت القوري وعفت الگدورة متطشرة

وحدي جنت ادندن واركص ولو بدون حمرة بس يلا مدبرة نفسي بيدي القوري واركص واركص على المراية مالت الطباخ وي ماسويت وحدة من الحركات جان ينضرب اصبع رجلي الصغير برجل الطاولة

ضليت اطفر كعدت ورفت رجلي انفخ على اصبعي هزأت نفسي بغضب على تضييع الوقت بالركص

طفرت دا احط مي بالقوري جااان طب اعثر واوكع بنص المواعين المطشرة

وي وكعتي صاار صوت عالي غير طرگعة المواعين بين مارفعت راسي صار كدامي العسكري وموجه سلاحة علي

نزلت عيني لمحتهم تقرييا اربعة او خمسة فاتو للبيت وهذا بقى واكف يم الباب تجمدت بمكاني حتى دمع ماكو ولا صوت بس كلبي وكع ابنص بطني من الخوف اصواتهم حيل عالية وخشنة مرعب الصوت من تعالى صوت زياد المتألم وصوت صراخ ماما المفزع وهي تتوسل

وكفت على حيلي مشيت بخوف وتردد اريد اطلع وهذا واكف بالباب وداير وجهه على الغرفة بس حس بية التفتلي وجه سلاحة علية وخزرني واشر بعيونة على مكان بين الثلاجة والحايط وتكلم بأمر

:أكُعدي هناك وسدي اذانج بأديج لا ارميج... صفنت بوجهه گمزني بصوتة من صاح ييييلااا

ركضت نفذت بدون ولا حرف غمضت وسديت اذاني لكن صوت ماما تخطى الحاجز وترس اذني

:ولكم خااالة فددوة عوووفووو يمة وليدددي ولك لااااا هيج وياااا
ييييييبوووووو ولك عوووفوووو عليك يااا ابو الحسسسن يمة زياااااد عساااااكم بالكسر عوووفوو

كمت وكفت خازرني يأشر بعيونة ارجع بجيت وصحت لماما على امل تنقذني

:مااااااامااااااا اني بالمططبخ تعااالي

ماكانت تسمع صوته كانت بمستوى صوتهم تريد احد ينجدهه وصوت زياد يفتت الحجر وهو يعيط رجليي لاااا ممسسسووي شي يياابة الحكلي رررجلي

ركضت للباب ابالي ادفعة واروح يمهم لكن ما ان وصلت حتى اتخطة الباب جرني من شعري وشمرني انرعبت

كعدت وضليت اصرخ صراخ متوواصل اشرلي بعصبية اسكت بس ما اسيطر على نفسي من شدة الخوف عيني بعينة، ابجي بحرقة

صااح يمعووودويين فضووهاااا التفت علية ورجع دار وجهه لجهه الغرفة اللي بيهه زياد وماما صااح

يمعووووووددددين بس الصوت رج البيت بقائهم ما تخطى العشر دقائق اسمع صوت تكسير الابواب وصوت وصعوودهم للسطح اكثر سؤال كان يسألوو عماد عبد الخالق ووينن

ماماا تكلههم مريضة مااندري والله مااندررري

غلطو وفشرو عليهه صرخت ل اخر مرة واختفى صوتهه شوية وطلعو زياد مدمة ساحلينة من ادي، رأسة يتمايل ماواعي يرفعة صرخت بكل قوتي ونهضت له راكضة

:ززززيييااااد

رجع هذا اعترض طريقي من حركة كلبي صرت اضربة بس ادية اللي تتأذى مو هو لان كان يرتدي درع بس كنت اتصرف بدون وعي

رجع دفعني

واشر علية بالبندقية وتكلم بغضب

:لاااا تطلعين اقتلة بسس تطلعين

:لاااا لااا ما اطلع مااا اطلع...

طلع بقيت اباوعلهم من شباك الصالة وهم يتعاركون وي رانيا شفت هالنذل شلوون رفس زيياد من اخذوهم وضربو رانيا واخذوهه

طلعت ارركض ووورااهم جاانو ديصعدون راايحين نزل العسكري اللي كان حابسني بالمطبخ من السيااارة سحبني من ايدي

من الرعب الحسيتة كأنه انتزع قلبي، ساحبني يمشي بية جيرانة كانو بيت صديقتي دگ الباب بقوة

انفتح الباب جانت امهه حجت وهية تبجي خايفة:خالة والله ماعدنة احد بس ابو عبد وبالدوام قدمني ودفعني عليهه وتكلم بتحذير

:اذااا صار عليهه شي اهجم البيت عليكم

دار وجهه وراح، تخبلت امي جوا واخواني حركت سياراتهم بقت بس سيارة هذا وكم واحد اباب بيتنه

ركضت متوجهه ل امي تخطيتة ركض قطع الركض لزمتة الية حاوط خصري من الوراء بأثنين ادي ، شالني انرفعت عن الارض ورجعني وصلني لباب ام عبد اللي كانت واكفة تبكي خوفا منهم، كانو ضخام ولبسهم واسلحتهم وحركاتهم كلهه مرعبة بالنسبة للناس المدنيين

شمرني عليهه وگعت الارض بقوة صااح بيهه فززهه

:شششككلتت

سحب الباب بقوة سدهه اني تركت الباب ورحت للجدار الفاصل بين بيتنه وبينهم صعدت مثل طريقة نادية رجل على الحايط ورجل على السدرة غطتني السدرة شفت اثنين شايلين ماما وهي فاتحة عيونهه بس متحس ولا تبجي بس شفت عيونهه مفتوحة

نزلتني ام عبد تعت بية وتصيح

:انزززلي انزززلي جورة السودة عليكم متملون من المشاكل انهضمت من كلامهه ونادية واكفة بعيد وتبجي صاحت بيهه

:فوووتي جوووة لج

فاتت وعافتني بطرمة مالتهم، دقايق ورجعت گالت، عندج رقم اهلج خوال عماام ماا تضلين هنااا ما عووزني مصايب اني

خالة موبايل بابا بي ارقام عمامي اهلي بالبصرة

:تعزيتوو انتي واهلج منين طلعتلي هااي السالفة بالله

راحت بقتني بالطرمة للضهر اجت دخلتني شافتني ماسكتت من البجي

كسرت خاطرهه ما اعرف شنوو اجت كالت شوو كومي فوتي جوة انتي شذنبج اذا اخوج عار

كسرت كلبي وخاطري بس مادافعت كنت مكسورة الجناح بلا اهلي جبنت وسكتت

دخلتني بغرفة نادية صار الضهر حطت اكل ما اكلت ولا شربت مي حتى توسلت نادية ماكنت اشتهي ولا حتى العسل

للضهر اجا ابو عبد انسان لطيف ومسالم سمين صاحب كرش وصلعة لكن مجرد ماتشوفة تحبة بسبب ابتسامتة الدائمة وكلامة الطيب

من دخل للغرفة باس راسي وحاول يهدأني من شاف ماكو نتيجة كال اروح اجيب رقم اهلهه راح تموت الطفلة

راح الهم.. ام عبد انجنت... الله لينطيج شسووويتي رجال كبير ويين وديتي والله اذا صار علي شي متلومين إلا نفسج
مارديت ولا حرف.. نادية حاضنتني وگاعدة

شوية ورجع گاييليه مستدعينهم بالليل يوصلون بقيت كاعدة لليل واندكت الباب

كان شرطي بس گانه ملك الموت وطلبني أيست من روحي

_________________

سرى

بعد حالة الرعب اللي صابتني مرتضى ابد ماسمحلي ابقى وحدي حتى ممنوع انام وحدي اذا شافني صافنة يخلق موضوع واذا ماكو موضوع يداهرني ويضوجني بس حتى اتفاعل، وياه

خالو جميل دائما تعبان من بعد وفاة ماما وكل فترة نروح للمقبرة مرات بطلب مني واذا رأفت بمشاعره وافكر انه مايستحمل الحزن ياخذنا بأرادتة وبطلب منة

اذا رحنة للمقبرة ما ابجي گدامة واقهره نزور القبر ومن يرحون اطلب اودعهه وحدي ابجي واحضن صخرة القبر واعتذر لسكوتي واسوولف واضحك واعاتب الى ان يجي مرتضى ياخذني غصب

مرت الايام وحزنو يزيد ماينقص بسبب تأنيب الضمير والحيرة وممنوع ابجي صارو يسكتوني مرات احس ملو مني لذالك اكتم قهري

بخيالي اعاتب بابا وينة ماسأل عني شنو نساني اخااف سافر احجي بداخلي ودموعي تنزل بلا صوت، الصوت موجود بفكري بذهني ما ينطلق من فمي خوفا على صحة خالو من الانهيار وخجلا منهم مليت من نضرات الشفقة

هالفترة قليل جدا يسمحولي انام ابيتنا اكثر الاحيان انام ابيتهم، عمامي يترددون يطردهم مرتضى مايسمح لهم ابد يتجاوزون ولا يتخطون عتبة البيت

الى ان في احد الضهاري اجو اخواني ووياهم رجال كبير بالعمر هذا كان جدي اخر مرة شفتة بيهه لما اخذتني امي الهم كان انسان وقح مغرور متعجرف كنت صغيرة ومارحم خوفي

سب على امي وفضحهة وتهمهه بشرفهه هو وزوجة ابوي رباب وباقي الناس اللي حتى اسمهم بابا ماكان يحب يذكرة

مرتضى ماكان يعرفهم اهلي بس من گعدو تفاجأ وهم جانو جايين بأسلوب مهذب ف كتم انفعالة وگعد يمهم شوية لمل ماعجبة الكلام طلع منهم بقى خالو جان موجود يمهم

بقو يحجون عن صلة الرحم وعن عقاب اللي اله ايد بقطع صلة الارحام وشلون لازم التقي بأهلي وأنو تصرف خالو غلط وهو ضالمهم وضالمني ولو ابوي موجود ماكان قبل بهالبعد يحجي باللهجة الجنوبية البحتة كلام متواصل ومقنع لدرجة حتى اني للحظة قنعني انو ضالمتهم

الى ان گالة خالو

:من بعد اذنك ابو حميد بس اسمحلي
جدو:ايي تفضل تفضل

:عمي انت ليش محسسني انو اني قاطع عليكم الطريق بوجود امهه وابوهه البنية محد فكر يعرف اخبارهه شمعنى لما صارت وحيدة نزل عليكم الحنان وحس المسؤلية انت حجي تتذكر لما اجوك انت اصلا ممعترف بيهه وطردتهه وشككت بشرف اختي هاي عليهه حشم بس انا سلمت امري ل الله لان ماعندي غير هالولد وخفت علي بس هسة البنية صارت مرتة يعني عرضة انا ما امنعة يدافع عنهه لو اعرف اخسرة

:موو هيج الحجي ابو مرتضى انا ماياي اعارجك انا ياي جايب اخيوانهه حتى يشوفونهه وانجان على الصار گبل ف الفات مات انا اهل اليوم وترة بنيتكم الله يرحمهه ويغفرلهه ماگصرت غلطتهه جبيرة، احلفك براس وليدك تراضاها على ابنك ياخذ وحدة ماتعرفهه ويدششهه دارك بالغصب ووياها بت

:اختي مالهه ذنب ولا حتى علي ما ارتكبو اي جريمة الرجال ماكان مرتاح بزواجه بنفسه اجا وخطب وشهور يلا وافقت

فرحة:جدي ترضاها يحجي على امي ماتردة

التفت عليهه بخزرهه مباشرة دنگت

:لاا عمو حشاهاا وحشا الحضور اني مستحيل اذم انسان اللي اقصده انه ماكان توافق بينهم و بعد اصرار يلا وافقت على هالزواج ضنيت راح يسعدهه ويصونه لكن للأسف عاشت العكس تماما

فرحة مافهمت كلامة او الاصح ماعجبهه حركت شفايفهه بسرعة بشكل دائري وهزت ايدهه

:نعوف هالسوالف انا كاطع درب وجايك وحدي لا شيوخ ولا عمام ولا طلايب عبني ريال جبير ومو حمل مشاكل انريد نشوف بنيتنه وبعد انت وغيرتك احنا طوعك تفصل واحنا نلبس

:لا حجي حشاك انتو الخير والبركة مايصير خاطرك الا طيب وماتلطلع الا وانت راضي

:طوول عمررك اصيل انا شرايد منهه بس اسلم عليهه وخيوانهه يشوفونهه

مرتضى طلع من يمهم من اول الگعدة طلع برا، اني والبنات من شفت زوجة خالة تطلعة من للاستقبال عفت الشباك وركضت وهم وراي عبالك كتاكيت ابو الربع وحدة تردم بالثانية
لان خالو ميقبل نتنصت يزعل

گعدت بغرفة البنات فحطانة وهم يمي دقيقة ودخل خالو واحنا ماخذين وضع البرائة

مدنك راسة ورافع حواجبة وعيونة علينة عود ترة كاشفكم

وخرت الشعر عن وجهي متوترة وهو حجى
:شرايج بابا

:بشنو

تأفأف وحجا:باباتي اعرفج سمعتي كلشي عطوبج جانت مبينة من الجام ياعيني هو هيج اليختبأ عبالك نعامة مغطية راسج وجسمج طالع

:ءاااا لا اي هاي هم خالو اني كنت دا انضف وجبروني وكفوني معلية

:اعرف بابا اعرف تعلميني بس هذا مو موضوعنا جدج واخوانج هنا أريد منج تشوفيهم وتسلمين عليهم رجال كبير بالعمر ماگدرت ارد طلبة، بس هم ما اجبرج اذا ماعاجبج الموضوع او خايفة ما اجبرج

:خالو اخاف ياخذني اني ما اريد اروح بابا محذرني من يمهم

:لا يابة وين ياخذج شلون ياخذ جنتنة ميصير بس يكول نسلم عليهه ونطمئن لا اكثر وياهم اختج جاية

باوعتلة بعصبية بعد ان استذكرت الانهيار اللي اتسببو بي لما:شفتها شفتها

:يلا حبيبي عيب الرجال منتضرنا

طلع وتركني ركضت لمرتضى كاعد برا على بلوكة ماد كمزتة من سرعتي

:اسم الله حبيبي شكو صار شسوولج

:لا لا مسوو شي بس تعال يمي اخاف ادخل وحدي

باوعلي مستهزأ ايباااه باع منو تستحي، وانوب من منوو من جدهه المعمر، روحي بابا روحي ما اكدر افوت ما ارتاحيتله وخاف اجفص ويا

:وحق الله يا مرتضى ازعل اني رايحة وراح امشي بسرعتي اذا ما اجيت وياي ازاعلك وهاا ءهاا

مشيت بهمة عبالي مراح يجي بس قبل ما افوت للاستقبال بثلاث خطوات ايدة حاوطت ايدي وصار قبلي سحبني من ايدي ودخلنا

ملامح جدو تشنجت واختفت ابتسامته المصطنعة، صفن علينة معاجبة لزمة مرتضى ل ايدي گام وكف على العصا اللي بأيدة

:واشر تعالي يبوية تعالي يريحة الغالي

رغم واضح علي التقدم الشديد بالسن لكن ضهرة كان ما محني بقوة يعني كان اطول مني تقربت منة بوستة بخدة بدون احضان بس هو ماد ايدة يمكن كان بضنة راح ابوس ايدة

صراحتا ماعندي مشكلة لكن ما اخذت بالي عاد هو قبض ايدة ورجع گعد بلا احضان ولا اي شي من كعد اشرلي على اخواني كانو صغار بعمر 13 واصغر بأستثناء فرحة اللي كانت بعمري او اكبر بعدة شهور

هذا اخيج حسن اخوج العود مديت ايدي صافحني بس احس نضراته كأنة يطلبني بثأر

:حبي يدي هذا ااخيج شيال همج

مرتضى :هسة شكو تحبة ويحبهه يا حجي

:اخووها ولازم تحبة وتحترمه شعدهه غيرهه

قبل ما اشوف ردة فعل مرتضى هجمت علية فرحة بلاحضان و البوس خبلتني تبوس بية واني بس عاقجة وجهي وارمش اريد اخلص روحي ماكو

من خلصت بوس بسرعة گعدت وحجت... هذا مصيول سلمي علي

باوعت لمصيول وجهه لطيف بس احممر احسة راح يذوب من الخجل حجأ يتأتأ بشدة

:ءاا ااس س ممم يييي ام ام امةة محاررررب

كسر خاطري خجلان من اسمة ومن التأتأة

دنكت بوستة وگلت.. هلا بيك حبيبي... رفع عينة يباوعلي يضحك ويدنك يفرك بأدي

بقو گاعدين وهم ساعة يمثلون انهم لطفاء وساعة ينسون ادوارهم ويرجعون لنضرات الكره وجدي من ضمنهم الا محارب گعد يمي احسه الوحيد بيهم حسيتة قريب لقلبي

جدو:اكلج بوية ابوج وين غاط لا ينشد علية لا يگول ابوي ولا عنيت علي

سرى: ما اعرف مشايفتة ابد حتى بالي ضل يمة محتاجتة هواي

جدو:هاي شلون حجي گولي يدي لا تخافين دلينة مچانة حتى نحمي ترانة اهلهه

:والله ما اعرف قابل ضامتة عنكم واصلا هو حتى عزاء ماما ما حضرة

فرحة:يمة يمة العيارة هااي وين لگيتيهه

صفنت على اسلوبهه وملامحهه الهجومية، ضحكت وگالت.... هههههه شمالج خية تخوزرين اتكشمر وياج موش احنة اخوات

استغربنة ما اكلو من الضيافة وجدو بس شرب الشاي اما الاولاد ابد ما شربو حتى الماي

بعدهه غادرو وگالو انشاء الله نردلج واحنة مانتيهج وشعدنة غيرج جدو يم الباب يسلم على خالو ومرتضى وهم تقدمو

اسمع فرحة تحاجيهم.... خو ماشرربتوو شي ترا وصيتكم انا ذني سحارات جانن ساحرات ابوي

ضحكت بصوت عالي موقف تافه جدا بس ضحكني ما اعرف ليش التفتو علية وهي خزرتي

:شنهي تضحكين علينة عود جيف انتي بت بغداد

لزمتني الضحكة ما اكدر احجي بس اشرتلهه بأيدي لا

تقرب مرتضى مني

وجهه متروس فرح احلوت ملامحة ويضحك على ضحكتي حتى ما سأل عن السبب

:جعل محد يضحك غيرج يا ضوة عيوني

سلمو وراح، واني كل ساعة اصفن ترجعلي الضحكة هم دخلو واني بقيت برا افكر كل عقلهه هاي سحورتيش هو احنا انشوفة اصلا حتى نلحك نسحرة

بالليل مرتضى اصر ان انام ابيتنا، خالو عارض گال

:مستحيل سرى تبقى اهنا اتروح مجرد تجيب اللي تحتاجة اهلهه ممرتاحلهم الهدوء، الاسلوب السياسي مو من عوايدهم لازم اكو شي اگعدو، استقرو

:يابة شعليهه بس هية خطية گالتلي مشتاثة لغرفة امهه وتريد تبات بيهه بء تستحي تحجي، مو هيج حبي

باوعلي ورفع حاجبة بمعنى سايريني، هزيت راسي بالقبول ودنگت هو اني فعلا اريد بيتنه بس ساكتة ما احب اعكر جوهم شبي مرتضى اليوم

رحنا البيتنا خالو گال المرتضى انت تبقى يمي امك ورقية يرحون يمهه

عدلتة ورتبت ومسحت الغبار وكنست دمعتي مانشفت ابجي بيني وبين نفسي والقهر مالي روحي على بيتنه الخالي رقية تساعدني

خلصت سبحت ودخلت لغرفة مامل طلعت الحافهه وشالهه بحضني ادور ريحتهه

بالليل حسيت الباب انفتحت بس تعبانة ومالي خلك انهض بلاول عبالي رقية بكن فزيت بقوة فاتحة عيني بقوة قبل لاا اصرخ تكمم، جهي بأيد ضخمة بقوة

___________________ يتبع

✨انتظر تقييمكم وتعليقكم وتشجيعكم حتى نستمر سوى انتو قراء واني كاتبة خلو تكافؤ اني اتعب بالكتابة وانتو شجعوني🫂💕

والباقيات الصالحات
بسم الله الرحمن الرحيم
لا حول ولا قوة الا بالله
سبحان الله وبحمده سبحان الله العظيم

تفاعلكم سبب استمرارية الرواية🌹

حسابي الانستغرام

احبكم بگد العراق 🥺💕