نـنسه رواحنة ونِغـفة
لـــ هذاك الــصوب
وياخذنه السعف الله
ويــرد بِينه
لا تنسون التصويت/متابعة الحساب/التعليقات بين الفقرات🛑
التنزيل بين يوم ويوم البارت الجاي يوم الأثنين الساعة 10 الوقت ثابت
قراءة ممتعة🤍
...........................................................
مَيان:وكفت بالباب انتظر جواب جدو وادعي ما يوافق على هالكلام سمعت صوت الشيخ مهيوب
مهيوب:بالنسبة الي ماعندي مانع شرف الي اناسبهم بس اهم شي يكون رجال ونعم من عندة
يجاوبة جدو
الشريان:شيخ مهيوب احنة زلمنة تربات شيوخ صغيرهم اسد وزلمة حوك
مهيوب:ونعم منكم بس هذا الكلام حتى نأمن على بنتنة اذا انتو وافقتو اكيد
حطيت ايدي على گلبي واحجي بهمس
:لا توافق جدو لا توافق
اجة صوت جدو يحچي بثقة
الشريان:وانه موافق اذا هالزواج يصلح حال العائلتين
غمضت عيوني وضربت ايد بأيد مچنت متوقعة جدو يوافق على هالطلب دخلت لجوة واحس الدخان يطلع من اذاناتي نار بگلبي شابة
ساعة وصاحو اسمي حتى نروح كمت رافعة راسي طلعت وشفت جدو واكف بصف شيخ مهيوب وشيخ سالم وشرار واخو موجودين بس طلعت عيونهم صارت علية مشيت للسيارة بخطوات ثابتة صعدت وسديت الباب انتظر جدو
دقايق وصعدو هو وبابا وشريان يسوق من صعد باس راسي وحچة بفخر
الشريان:ما غلطت من سميتچ شيخة لبوة انتِ ينشد بيچ الظهر
باوعت اجدو عيوني احسهم حارات
:جدو شسويت؟ شلون وافقت على طلبهم؟
عدل كعدتة يباوع للطريق وكال بجد
الشريان:سويت الصح
:شلووون تريد تضحي بينة جدوووو؟
الشريان:مو بيكم انطيهم وحدة من بنات عمج مو يردن الزواج؟
صفنت بوجهة ولا عبالك هذا جدو المثقف والي يحترم الأمرأة
:وبنات عمامي مو بشر؟ هذول مجانيييين
الشريان:كلت العندي وانتهى النقاش
فركت وجهي بحيرة وحچيت بتهجم
:لييييش عبالكم البنات مجرد صفقة يوم تردوها لصالحكم ويوم ضدكم حتدمرون حياة هواي اشخاص هذا مو حلو بل ظلم بحق البنات
سكت ما جاوب بس احسة يسمعني على اعصابة عدلت كعدتي ورفعت راسي وكلت
:برأيك عادي انه اتزوج واحد منهم؟
كلهم باوعولي وجدو وجهة صار احمر من الغضب
الشريان:كاااااافييييي لا انتِ ولا أختچ تزوجون منهم
:چااااا وبنات عمامي افهمووو عااااد ترا هم بنات حالهم حالنة جاي تدفنوهم بعملتكم هاي يعني هيچ حياتهم رخيصة عندكم؟
الشريان:كاااافييييي كلت العندي وبسسس ماريد صووووت
خليت راسي على الجامة ساكتة واحس نفسي صرت كتلة من النار بس لو اعرف جدو شلون وافق على هالشي
وصلنة للبيت نزلت من السيارة وسديت بابها بكل قوتي وصعدت لغرفتي مختنگة محد يسمعني ويفهمني
غيرت ملابسي ونزلت ردت ادخل للمضيف وسمعتهم يسولفون
نمر:يبا متأكد ننطيهم سدن بنت فاروق؟ بعدها صغيرة بگد ريتان
الشريان:مو تركت الدراسة حتى تتزوج؟ هاي اجاها عريس
فاروق:السموحة منك يبا بس شمعنى الا من بناتنة ليش مو من بنات نمر لو لأن نمر عزيزك وبناتة عزيزاتك؟
فزيت من سمعت جدو صاح
الشريان:انلصم ولككككك بنات نمر يدرسن مو مثل بناتكم ينتظرن يتزوجن اخر مرة تحچي بوجودي حيوان
نمر:اهدي يابة مو زين على صحتك
الشريان:كومو طلعوووو برا لا بارك الله بيكم كوموو
قبل ليطلعون دگيت الباب ودخلت من شافني جدو دار وجهة عني وكعد طلعو من المضيف وانه رحت على بالأرض وحطيت راسي بحضنة
:انتَ دوم تعلمنة وتكول احچو الحق ولو على قطع رگبتكم ودوم تكول اوكفو ويا الحق وانه حالياً واكفة ويا الحق بس هالمرة انتَ معارضني؟
رفعت راسي اباوعلة رافع راسة بثبات ونظراتة متشتتة لزمت ايدة
:بس فهمني شنو ذنبهم يتزوجون من اعدائك؟ وشنو ذنب البنية الي حتتزوج واحد من عائلتنة جدو البنات بشر ما يصير تقدموهم قربان وتصلحون عداوة ازلية على حساب سعادتهم
تنهد يهز براسة
الشريان:يعني انتِ عاجبچ هالشي؟ فهميني بوية عاجبچ هالوضع؟ كلة حقد وكره الكره صار متوارث بين احفادنة ورثو كره اجدادهم وهمَ ما يعرفون ليش هالعائلتين يكرهون بعض
:بس مو حل هذا
ابتسم وحط ايدة على راسي
الشريان:هذا احسن حل بوية انه فكرت بكلشي وانطيهم شروط عبالچ انه ماحب بنات ولدي؟ لا والله نسماتي هذن والتتزوج راح اأمن عليها
سكتت اباوعلة اعرفة مستحيل يوافق على كلامي شريان وعاند
ترخصت من عندة وكمت لغرفتي ضايجة الي جاي يصير كلة غلط
ثاني يوم داومت گوة لعبانة نفسي من كلشي والتفكير اكل راسي اكل
دخلت لقسمي شفت ريمان كاعدة وشرار صافن ويدخن گلبت عيوني ودخلت كعدت بعيد عنهم هو من انتبهلي صفن علية ونسى الجگارة بأيدة
رادت تحترگ ايدة اريدة ينتبه ماكو بس صافن عليها وياكل يشفايفة
اخر شي ضربة صديقة يلا انتبه عليها بسرعة ذبها ويخطف نظرات علية
كملت اليوم بصعوبة اريد بس ارجع للبيت لعبانة نفسي كلش
طلعت انتظر شريان يجي ولفت انتباهي وجود الأخوة بس حالتهم مو طبيعية ريمان تتلفت خجلانة والأخوة يردون يضربون بعض اخر شي اخو شرار دفعة دفعة قوية وسمعتة عاط
:امشيييي ولي للبيت امشيييي اخذذذذ ريمان وياك وبطل تسختتتت
باوعلي شرار ورجع باوع لأخو مبتسم بشر
شرار:يصير خير
اخذ ريمان صعد سيارتة وراح وانه كل هذا استرق النظر منهم
بس راحو فتح باب سيارتة بعدت انظاري عنة شوي وصار يدردم باوعتلة شفتة يحاول يفتح باب السيارة ويضرب بيها
:الله ياخذككك شراااار اخذ السويج وهااااي مبنچرة
صار يخوف عروگة نطت
طلعت تلفوني اتصلت بشريان كال ازدحام سديتة من عندة وفززني صوت ضرب باوعت شفتة ديكسر بجام السيارة
بدون ما احس حچيت
:ليش دتكسر حتى لو مقفولة مبنچرة ما تكدر تمشي بيها
باوعلي ورفع شعرة الطايح على وجهة وكال وهو يحاول يتحكم بأعصابة
:اريد اخذ تلفوني وفلوسي كلهم ضلو بالسيارة
:تريد تتصل بأحد؟
هز راسة ورجع يضرب بالسيارة طلعت تلفوني ومديتة اله
:اتصل بتلفوني؟
حط ايدة على صدرة ورجع يكمل يكسر بيها السيارة تشخطت وهو ولا هامة چان جامها قوي ضد الرصاص لهذا ماتنكسر
رجعت گلت ونيتي اساعدة
:تريد انطيك فلوس ترجع بيهم؟
بس كلت هيچ باوعلي بحدة تقرب علية ايدة حمرة وكف كدامي
:مگدي منچ انه؟
تكتفت اباوعلة بنفس نظرتة
:جدو علمني اذا شفت احد طايح بمشكلة اساعدة ما اسأل عن طبقتة بس اساعدة وهاي چانت نيتي عرضت عليك انطيك تلفوني ورفضت وعرضت عليك فلوس حتى اساعدك
ظهر طيف ابتسامة على ثغرة وباوع للمكان
:ليش بعدچ هنا المكان فارغ بس انه وياج هنا ما تخافين؟
رديت واني ارفع راسي
:لا بلي اخاف بس من الله
طلعت خنجر من جنطتي من شافها توسعت ابتسامتة
:شنو هاي بنت شريان عبالي بزونة طلعتي لبوة
رجعتها لجنطتي
:محد يكدر يتقربلي انه ما اخاف واخوك يعرف شخطات خنجري وهاي الشخطات بمثابة تهديد فقط
ابتسم بأتساع ودار وجهة يتمتم بشي ما سمعتة
رجع باوعلي بوجه بارد
:راسچ قوي انتبهي تخلين احد يكسرة
رديت مبتسمة تك خد
:ما جابتة امة الي يكسر راسي
هز راسة مبتسم وراح رجع يكسر بالجامة طلعت فلوس ورحتلة مادة ايدي باوعلي وباوع لأيدي
:اخذ اعتبرها دين؟
چانت نفسة عزيزة حط ايدة على صدرة وكال
:رجعي يبا انتظري اخوچ هسة اكسرها واخذ فلوسي
ابتسمت وحچيت بستهزاء
:اخذ ياخي بعتبار حنصير اقارب مو بيناتنة هالأمور
باوعلي بنظرة غريبة تصاحبها ابتسامة اغرب اخذ الفلوس من ايدي
:اعتبرة دين قريبتي باچر يرجعلچ
هزيت راسي اضحك ورجعت وكفت بعيد عنة انتظر شريان مرت 5دقايق واجة شريان وانتبهت من صعدت للسيارة يلا راح
وصلت للبيت بس نزلت من السيارة صار بوجهي مازن گلبت عيوني منزعجة ورحت لفوك غيرت ملابسي ونزلت
چانت ريتان بالمطبخ تصب غدة ساعدتها وكعدت اكل ميتة جوع
ريتان:دريتي يكولون سدن حتتزوج شرار
هزيت راسي بعدم رضى
:وهي موافقة؟
ريتان:لا رافضة تكول حيعذبوني واحس من صدك هالعائلة غريبة وحتتعذب وياهم
جاوبتها بدون نفس
:اغرب من الغرابة شلون جدو يوافق بهالشي وهاي سدن خوافة
سكتت واني سكتت بس احس نفسي كلش معصبة
كملت اكلي ورحت لجدو دگيت باب المضيف ودخلت شفت اخوي شريان ومازن كاعدين استغربت اشوفهم حيطگون من العصبية
رحت سلمت على جدو وكعدت بصفة وهو كال
الشريان:اتركوني ويا مَيان دقايق
هزو روسهم وكامو طلعو اشوف جدو خجلان مني مفهمت ليش لحد ملزم ايدي وباسها
الشريان:انتِ حفيدتي الحلوة مَياني الشرسة تدرين بعدني اتذكر كلشي يخصچ ويخص طفولتچ؟
ابتسمت اباوعلة
:صدك؟
الشريان:اي اتذكر اول ما دخلتي لهالبيت شايلتچ بيبيتچ واتذكر من شلتچ وجريتي لحيتي اتذكر اول خطوة الچ چانت هنا
كال اخر جملة وهو يأشر على المضيف ورجع كمل كلامة
الشريان:اتذكر اول كلمة الچ هيَ (ددو) عود جدو اتذكر كل مشاغباتچ وقوتچ من وانتِ طفلة چانت اجمل ايام
:ليش تذكرت هالأشياء هسة؟
ترك ايدي بهدوء وفرك وجهة واشوف ايدة ترجف استغربت اول مرة اشوف جدو بهيچ حالة مكسور ومتضايق
خليت ايدي على كتفة وحچيت بهدوء
:شبيك جدو انتَ مريض؟
هز راسة بلا ورجع لزم ايدي يبوس بيها وكال بكسرة
الشريان:اذا اكو شي لمصلحة عائلتچ تكدرين تسوي مَيان؟
حچيت بدون تردد
:اكيد جدو افا عليك ادخل للموت وانه مغمضة
ابتسم يطبطب على ايدي
الشريان:كفووو هذا عشمي بيچ
:جدي شصاير؟
رفع راسة وكال وهو يباوعلي
الشريان:بوية بيت مهيوب يردونچ چنة الهم
بقيت اباوع لجدو ومتصنمة بمكاني رجع كمل كلامة
الشريان:كلتلهم على سدن بنت عمچ بس يكولون صغيرة وطلبوچ بالأسم
كمت اعصابي ترجف
:جدوووو شجاي تحچييي انه اتزوج من بيت مهيوب
الشريان:وافقي بوية حتى تنتهي العداوة اذا رفضتي راح يصير بحور دم لأن انه انطيت كلمة ومو حلوة بحقي اخلف بيها
:جدو أذنك تسمع شنو تكول!!!! انه اول الرافضين بهالصلحة الغريبة تريد اتزوج منهم؟ شنو انه سلعة وطلبوني بالأسم
غمض عيونة وضرب على راسة
الشريان:ماريد انطيچ بس يا فشلتي اذا خلفت بچلمتي
:هذا الأتفاق الفاشل من الأول المفروض ما يصييييير ماكو ضحاية غيرنة احنة النسوان عبالك سلعة وجاي يختارون بينة
الشريان:يعني ما موافقة؟
صفنت اباوع لجدو بحيرة ماريد تنكسر هيبتة كدام الشيوخ وهم ماريد اتزوج من بيت مهيوب ليش مصرين الا انه
فززني من صفنتي صوت جدو
الشريان:كافي راح اردلهم خبر انه سحبت نفسي من الأتفاق وخلي يطگون روسهم بالحايط الأنذال عرفو يلوون ذراعي
رفع تلفونة يريد يتصل بسرعة سحبت تلفونة باوعي ببهوت سحبت تفس عمييييييق وزفرتة منزلة راسي
:ما عاش الي يلوي ذراعك وما عاش الي ينزل راسك انه موافقة ومن ايدك هاي لأيدك هاي
اعصابي ترجف وجسمي يرجف ماعرف شنو اسوي نار ومشتعلة بية كام جدو حضني يبوس براسي
الشريان:ما هاين علية تتزوجين منهم والله العظيم اذا ما تردين اتراجع وما يهمني شنو يصير
ابتعدت رافعة راسي
:لا جدو موافقة بس بشروطي 1- دراستي اكملها 2-مايمنعني ازوركم 3-يحترموني واحترمهم هناك لازم هالكلام يوصلهم حتى من يصير غير هالشي يطلعون بالخيبة والفشلة
الشريان:متأكدة موافقة؟
غمضت عيوني لثواني اراجع قراري ورجعت كلت
:موافقة جدو
تركت جدو وطلعت حاطة ايدي على گلبي
صارو بوجهي شريان ومازن رفعت راسي ومازن تقدم علية يرجف وجهة احمر
مازن:شني؟ وافقتي
هزيت راسي ببرود وردت اروح بسرعة جرني من ايدي
مازن:ليشششش وانه هااااا
باوعت لأيدة رافعة تك حاجب اجة شريان دفعة عني بقوة
شريان:ايدك لا اكسرها شلون تلزمها
صار يفتر بالمكان يضرب على راسة ما استغربت لأن هوَ مازن من يوم يومة تصرفاتة غريبة تحسو مجنون
مازن:راح تزوج وانه چا وانه تروح لبيت مهيوب وانه
شريان:انطم ولي عن وجهي محسسني هيَ عشيقتك مو بنت عمك الماتشتهيك بعيشة الله اذا لزمتها بعد اطشر راسك
سحبني شريان اخوي لداخل البيت وانه هادئة دخلني لغرفتي ودخل وياية انه كعدت على الچرباية وهوَ صار يفتر بالغرفة يفكر
شريان:ما مستوعب جدي شلون يسوي هيچ!
بقيت ساكتة دخلت ريتان واجت كعدت يمي ضايجة
ريتان:عود صدك وافقتي؟
فركت وجهي بحيرة وكلت
:شسوي چا ما تگلولي؟ ارفض وتنكسر كلمة جدو؟ لكم هذا الشيخ الشريان الي الكل تهابة انه منو وانزل راسة بالطين واخلي بيت مهيوب يگولون الشريان ما اله كلمة؟
شريان:بس مو هيچ موووو هيچ مَيان هذا زواج مصلحة لفض عداوة من زمن اجدادنة يريد يزوج ريمان لمازن تخيليييييي
كمت منتفضة
:شنووووو ريمان ومااااازن؟؟؟ حتى بالأحلام متصييييير لك هاي وردة تتزوج هذا الهمجييييي لاااا زودوها كلش زودوهااا
ريتان:يس اهدئو كلشي ينحل
:لااا ريتا ما ينحل ما ينحل لكم البنية عكس اخوانها لطيفة وهادئة ما تتوالم ويا مازن مازن ابو بنات ملعب تنظلم هيچ
ريتان:زين شعجب مگال جدو خلي شريان يتزوجها؟
باوعت لشريان چان منزل راسة تقربت لزمت ايدة
:شريان تزوجها انتَ طيب نفسها وحنون تزوجها اذا تتزوج مازن راح تدمر صدگني مو بس من مازن من ام وابو واخوان مازن هم هذول عائلة شرانية ومختلة عقليًا
بدون تفكير باس ايدي وطلع ماعرف اذا موافق او رافض نسيت نفسي والتهيت بريمان متستاهل تاخذ واحد نفس مازن
طلعت ريتان وانه بقيت بغرفتي افكر بالمستقبل بس بعدين تذكرت الي الله يريدة هوَ الي يصير
تمددت على الچرباية احاول انام هستوني ردت اغفى وسمعت صوت تلفوني يرن فتحت عيوني بملل اخذتة شفتة رقم غريب فصلتة
كمت غسلت ونزلت جوة ماكو احد ريتان اكيد نايمة هسة وامي هم والبقية يم جدي
رجعت صعدت فوك ادرس اضيع تفكيري بموضوع الزواج
ادرس شوي وشوي ثانية افكر
شلون حتزوج شرار وانه ويا بس نتعارك
ضربت على راسي مزعوجة من هالتفكير كلة كمت طفيت الضوة وغطيت راسي ونمت
كعدت ثاني يوم تعب گلبي صاير بوجهي كلة بس مسمحت لنفسي اضعف واكتفيت بجملة
:الي كاتبة الله يصير ونعم بالله
كمت تجهزت لدوامي لبست عبايتي الي احسها زايدتني جمال وقوة
برغم عادي ما يفرضون علينة لبس معين بس انه حبيت العباية هواية حبيت البسها عكس اختي ريتان ما تحبها ماتعرف تلبسها بس لبسها مستور اكيد
نزلت صبحت على الكل ورحت لجدو لغرفتة دگيت الباب واجاني صوتة
الشريان:تعالي مينا
ابتسمت حتى دگة الباب حافظها فتحت الباب ودخلت
:صباح الخير جدو
كام احتضن اكتافي يباوعلي
الشريان:صباح الخيرات بابا
:تعال نتريگ سوية حتى اروح لدوامي؟
هز راسة وكال بهدوء
الشريان:دقايق وجاي وراح
تركتة وطلعت رحت للمطبخ جانو مجهزين الريوگ بس انه اعرف جدو مايحب يتريگ بالمطبخ لو بالبيت كلة بالحديقة اخذت ريوگنة وطلعت انتظرة ثواني واجة يمسح بأيدة
الشريان:عاشت ايدج جدو
ابتسمت ساكتة وصرنة ناكل واحنة ساكتين اخر شي كسر الصمت وكال
الشريان:طلبت ريمان لأخوچ شريان شنو رأيج؟
احس ماي بارد ونزل على گلبي بانت الفرحة على وجهي
:هسة يلا ارتاحيت جدو شريان يستاهل وحدة نفس ريمان هالبنية درة مال الله
اتنهد وهمس يهز براسة
الشريان:ريمان عن ريمان سابيات گلوب بيت شريان
صفنت احاول افهم معنى كلامة هوَ من انتبه على صفنتي كال الحمدلله وكام وانه اخذت المواعين وخليتهم بالمطبخ ردت اغسلهم بس ما لحگت نزل شريان وتوجهنة لجامعتي
بالطريق اباوعلة خطف مادري اذا فرحان لولا
انتبه علية ابتسم ورجع باوع للطريق
شريان:شبيچ مَيانو
عدلت كعدتي وكلت
:فرحان؟
توسعت ابتسامتة وحك طرف حاجبة
شريان:چنت شايل فكرة الزواج بس مادري شبية شو رجعت اراهق
لزمت ايدة اضحك
:حقك شوشي الله يسعدكم سوية والله فد حلوين انتو
شريان:شوشي؟ وخري لا الزگچ
ضحكت بصوت عالي وبعدها سكتت
وصلني لجامعتي وراح لشغلة بس دخلت صار بوجهي شرار ابتعدت خطوتين وهوَ خزرني ومر من يمي هزيت ايدي مستغربة
:شبي هذا
ما اهتميت رحت كعدت
شگد چنت متحمسة اتخرج واتوظف واصير المُهندسة مَيان نمر الشريان حلمي من الطفولة الهندسة المعمارية
مرت المحاضرات وحدة ورا الثانية وشرار اليوم بس يخوزر ردت اكوم افگس عيونة
انتهى الدوام كمت اريد اطلع من المكان بس وكفت بمكاني من شرار طلع يركض ومتنرفز كلش وطلعت اختة وراه هم تركض وضعهم چان غريب الى أبعد حد
طلعت وراهم انتظر احد يجيني
شفت شرار دفع اخو وراح صعد سيارتة وشخطها طار بيها مو ساقها
باوعت لريمان واخوها مستغربة لگيتهم يسولفون بهمس والعصبية واضحة على وجه اخوها
انوب انه مادري شبيه بقيت صافنة على ملامح وجهة بكل صلافة
وجه رجولي عيون لون غريب اصفر عسلي شيب يزين نص من لحيتة وشاربة ونص من حاجبة اليمين ونص من شعرة اليمين جرح عميق بوجنتة اليمين طولة الفارع جسمة المتناسق
اكثر شي لفت انتباهي بهالأخوة هوَ الشيب شرار عندة نص حاجبة اليسار بي شيب وريمان مرات انتبه رموشها بيض من الشيب واخوهم مليان شيب واضح هالشي وراثي عندهم
وانه اباوعلة وهوَ يحچي بعصبية وايدة تتحرك ويا كلامة طاحت عينة بعيني بسرعة عدلت وكفتي وشتت نظراتي متفشلة من هالموقف الزفت هسة شيگول
انخمش گلبي من صار كدامي متكتف
:اهلاً؟
تحمحمت وباوعت لريمان واكفة بصفة مبتسمة
مَيان:اهلاً بيكم
چان مبتسم وعينة علية مد ايدة لجيبة وطلع فلوس قدمهم الي
:هاي فلوسچ قريبتي وشكراً على المساعدة
نزلت راسي بكل هدوء
مَيان:مو بيناتنة بعد ما احتاجهم انه
بدون لا يحجي شي حط الفلوس بيدي وكال
:فلوسچ هذن بعد المهم ليش تبقين اخر وحدة عود؟
باوعتلة رافعة حاجبي
مَيان:يمكن لأن انتظر اخوي يجي
ريمان:بس لا تبقين وحدچ ما يصير حتى الحرس مو أمان ترا
حجيت بلطافة
:صح بس شسوي اخوي لازم يطلع من شغلة ويجيني ماحب اروح ويا غيرة
رادت تحچي وحچة اخوها رافع حاجبة
:عود ليش اسلوبج ويا ريمان يختلف؟ تحچين وعيونچ تلمع خجل ومن تحجين ويانة تتحولين وحشة جبار وجعفر
تكتفت اباوع لسيارة شريان جاية بتجاهنة وكلت
مَيان:اعامل كل شخص بالي يستاهلة
رجعت باوعتلة شفت طيف ابتسامة على ثغرة
وصل شريان نزل من السيارة من شافهم يمي عاگد حواجبة
شريان:السلام عليكم
ردينة السلام وأشرلي يعني شكو طمنتة ماكو شي لزمتة من ايدة ورحنة للسيارة بكل برود صعدنة وبسرعة باوعت لشريان
گوة كتمت ضحكتي من شفتة يباوع لريمان بنظرات خاطفة
باوعلي وتذكر وجودي تحمحم وساق السيارة
مر يومين والبيت هادئ نوعاً ما حتى موضوع الزواج ما انذكر صرت اتمنى هالموضوع ينسونة وينسد
بيوم كاعدة بغرفتي الساعة 11 بالليل ادرس
اندگ الباب ثلاث دگات متتالية عگدت حواجبي مستغربة
كمت فتحت الباب وانصدمت من شفتة مازن نايم بالأرض ويبچي ركضت لبست حجابي ورجعتلة مصدومة مغمض عيونة ويبچي بحرگة
مازن:احبها احب مَيان ماريدج اريدها اريد مَيان
طلعت من الغرفة اباوعلة لابس ملابسة العسكرية وكسلة مخربط والسلاح بأيدة والأيد الثانية بيها بطل مال شرب
ماكدر الزمة لأن محرم علية لبست نعال شريان الي بطولي وصرت احرك بمازن برجلي عسى ولعل يصحى
:كوم مازن روح لبيتكم شجابك هنا
من سمع صوتي فز والشهگة شگت صدرة يباوعلي عيونة حمر أثر البچي والشرب وريحتة تگطع
مازن بفرحة:مَياني
گولبت عيوني بأنزعاج وكمت متوجهة لغرفة شريان هذا رايح بيها من ورا هالسم
دگيت باب الغرفة ودخلت شفتة يشتغل على اللابتوب بس دخلت رفع راسة
حچيت بتورط
:شريان كوم وياي هذا مازن نايم كدام باب غرفتي سكران ومطفي كلش مسلم حتى عقلة
هز راسة بعدم رضى وكام شاف مازن نزع حزامة واستلمة ضرب انه انصدمت ما عبالي يضربة لو شي عبالي بس ياخذة لبيتة
على أثر صياحة طلعت ريتان من غرفتها والنوم واضح بوجهه بس وكفت مصدومة من المناظر الخلابة الي تشوفها
سمعت صوت جدو صرت اسب بمازن وشريان
صعدو اهلي وجدو هم ابوي وخر شريان عن مازن ومازن بعدة بالأرض بيدة سلاحة رافعة ويهز بي ويحچي بالسان ثگيل
مازن:راح احرر فلسطين و واحرر اسرائيل راح اتزوج سدن
دفرة جدو ببطنة من يمي توجعت وريتان الفطيرة متمددة تضحك
الشريان:ابن الكلب مابطلت من هذا السممممم ابن المطي ابوك الحمار وينة
كال مازن وهوَ يحاول يفتح عيونة
مازن:لا تغلط انه مازن ابن الشريان ما اسمحلك
رجع دفرة وباوع لأبوي واخوي
الشريان:تاخذونة للسطح تربطونة وتخلونة هناك ما مسموح لأحد يفتحة وعلي أبن أبي طالب الي يحاول يفتح ايدين مازن اربطة ابدالة
بدون اي جدال ربطو واخذو فوك السطح جاي تمطر وترعد والجو بارد بشكل للحظة كسر خاطري
دخلت لغرفتي اهز براسي ما قابلة بهالوضع بعدني اريد اتمدد وانام ودخلت ريتان مخلية مخدتها جوا باطها وبطانيتها على كتفها
ريتان:كلت مينا تخاف تنام وخدها اجيت انام عندچ
ضحكت وهيَ اجت رفعت المخدة الثانية وخلت مخدتها ونامت بصفي
ريتان:لازم دوم تشكريني لأن انقذچ من الخوف
گرصتها اضحك
:اي اي انه اخاف اصلاً الخوف مو يمچ
شفتها ابتسمت وهمستلي بصوتها الناعم
ريتان:تصبحين على خير امي
جاوبتها بهدوء اباوعلها مبتسمة
:وانتِ بخير بنتي
راحت بسابع نومة وانه ماكدرت انام احس اكو شي واگف على صدري
من أيست من النوم كمت فتحت الشباك وطلعت وجهي مغمضة و اتنفس بعمق
فتحت عيوني فازة على صوت هورن سيارة
باوعت لجوة وشفتها نفس السيارة السودة مشت سريع بسرعة سديت الشباك اضرب على خدي
:الله ياخذچ مَيان الغبية شافچ بدون حجاب
صرت اكل بنفسي اكره احد يشوفني بدون حجاب او ملابس صارت عندي عقدة من ورا مازن
كعدت على الچرباية وحطيت ايدي على عيوني اتذكر
(الرجوع ألى الماضي)
مازن:مَيانوووو شوتي الطوبة يلا حبيبتي
رفعت رجلي وشتتها بعصبية اجت بوجهة
كل هذا ما همني رفعت سبابتي بتهديد وعطت
:انه مووووو حبيبتك لا تكول حبيبتي مازن الخنيييييث
باوعلي بحقد وخشمة يجري دم وانه شمرت شعري ورا ظهري ومشيت لجدو ما هامني شي
وانه كاعدة بحضن جدو اضحك دخل مازن لازم خشمة نزلني جدو وطفر خايف
الشريان:هااااي شنييييي طايح ولك؟
جاوبة مازن وبچة
مازن:جدي مَيان طگتني بالطوبة
باوعلي جدو رافع حاجبة وكال
الشريان:ليش مينا؟
كعدت متكتفة وحچيت بعصبية
:جدو يگلي حبيبتي انه مو حبيبتة انه من اكبر اتزوج واحد اجنبي نفس جاك وروز هذا ماريدة خنيث بس طگة بطوبة ضل يبچي
خزرني جدو وانه نزلت راسي انهديت بالحچي ونسيت الواكف كدامي جدو
الشريان:كومي طلعي 5 دقايق وتعاليلي
هزيت راسي وكمت اخزر بمازن بدون لا ينتبه جدو طلعت وكفت بباب المضيف واسمع جدو يحچي
الشريان:انه شكم مرا كلت عوف مَيان؟ مَيان ماتريدك بعدها صغيرة وانتَ هم صغير يمتة تفهم؟
مازن:جدو احبها هوااااي امي تكول مَيان محد ياخذها غيرك وعلمتني اكللها حبيبتي وابوسها
الشريان:اشتعلت صفحة امك
لا تهتم بكلامها جدو بعدك صغير عود من تكبرون اذا رادتك ازوجها الك بس عيب تضل تركض وراها وتكول حبيبتي وعيب على كلشي تبچي شوف مَيان ولا مرا بچت كدام احد
سكتو ثواني ورجع كال جدو
الشريان:هسة روح وكول لمينا جدو يريدچ
بسرعة عدلت وكفتي وطلع مازن يباوعلي ويمسح بدموعة
مازن:بعد ما اكلچ حبيبتي بس من اكبر اتزوجچ
كال هيچ وصعد الدم لراسي صرت ما اشوف كدامي طفرت على مازن واستلمتة طگ وهوَ يحاول يدافع على نفسة بس ما يگدرلي رغم چانت بُنية جسمة اقوة مني لأن هوَ اكبر واضخم بس المهم ما اسكت عن حقي
خرمشت وجهة ودفعتة على بطنة وصعدت على ظهرة اجر بشعرة واصيح
:بعد تكول هييييچ؟؟
مازن:اكوووول انتِ مرتي من اكبر اتزوجچ
زدت علية بالضرب اكثر واكثر
طلع جدو على اصواتنة وكف على راسي مصدوم وانه مكملة اضرب بي رفعني عنة محتار يضحك لو يعصب
الشريان:ولچ ميييييناااا
وكفت انتفس سريع واباوع لمازن بكره
:خلي يولي هذا الوزغة
كام مازن معصب وصاح
مازن:جدييييي انه ناهي على مَيان
ردت ارجع اضربة بس وگفت من جدو دمغة على راسة
الشريان:انطم ولك بعدك بطول زري وتنهي؟ چا مساع شحچينة انه وياك؟ انتَ ليمتة تضل هيچ واحد فاهي روح لبيتكم وصيحلي امك وابوك بسرعةةةة
راح يمشي ولازم ظهرة وجدو لزمني من أذني معصب واخذني للمضيف كعد وانه وكفت كدامة منزلة راسي
الشريان:ترا فاهمة القوة غلط علمتچ على القوة حتى شخصيتچ تصير قوية مووو تصيرين مسترجلة شلون تطگينة؟
رفعت راسي وصرت ادافع عن نفسي
:جدو يكول من اكبر اتزوجچ ماريدة هذا فاهي ويعاندني ويحچي هيچ كدامي ماكدر اسكت
فرك وجهة يهدي بنفسة
الشريان:لچ بابا مايصييييير من يحچي هيچ تعاليلي انه احل الموضوع
رحت بست ايدة
:اسفة بعد ما اعيدها بس هوَ هم لا يعيدها انه والله ما اكرهة بس يضوجني
الشريان:عفية ماريد واحد يكره الثاني وان شاء الله كلشي ينحل هسة راح يجون عمچ ومرتة روحي للبيت
هزيت راسي وطلعت شفت عمي ومرتة متوجهين للمضيف مرتة خزرتني وانه اباوعلها ببرود ما هامتني
دخلو للمضيف وانه شفت مازن كاعد يبچي وجهة بي دم بكل صلافة كسر خاطري رحت للبيت جبت قطن ممن مخدتي وديتول مال ارضيات ورحتلة
بس شافني مسح دموعة وعدل كعدتة رحت كعدت بصفة حطيت ديتول بالقطن وكلت بثگل
:راح احطها على الخراميش الي بوجهك
هز راسة وانه حطيت القطن على الجروح وهوَ عض ايدة
مازن:اخخخخخ مَياااان
:تحمل شبيك رهيف
باوعلي ما عاجبة كملت ورضيت ضميري كمت من عندة اريد اروح بس لزم ايدي وگام باوعتلة مستغربة
:عوف ايدي
ضل صافن بوجهي ردت اسحب ايدي بس....
رجعت لواقعي على صوت الأذان مسحت دموعي وكمت اتوضيت وفرشت سجادتي وصرت اصلي صلاة الصبح
حاسة نفسي تعبانة التفكير حيقتلني ما مرتاحة
من كملت صلاة انطيت خبر للكل ماريد اداوم ورحت نمتها نومة طوييييلة ماعرف شنو صار وشنو الي ما صار
للظهر يلا كعدت وهم بعدني نعسانة
كمت غسلت وتوضيت وصليت ونزلت ميتة جوع سويتلي اكل على السريع وكعدت اكل واشوف كروب القسم خاف اكو شي شيات
كملت ورحت كعدت بالصالة شفت شريان كاعد يشرب چاي
:ها شوشي
باوعلي وضربني على راسي
شريان:صح النوم
كعدت بصفة
:نزلتو مازن لو لا
ضحك وعض اصبعة
شريان:جدچ قافل باب السطح وماخذ المفتاح يريدة يبات الليلة على السطح هم
هزيت ايدي اضحك
دخل جدو كمنة انه وشريان سلمنة علية وهوَ بس رد السلام وكعد بصفنة مهموم كلش
:شبيك جدو؟
باوعلي محتار
الشريان:بيت مهيوب يردون عقدكم باچر الخميس حتى الجمعة يصير عقد شريان وريمان
تجمدت بمكاني بقيت بس صافنة كلشي ما حچيت
كال اخوي
شريان:بس لو منطين خبر قبل شكم يوم مو احسن؟
جاوبة جدو
الشريان:الي عرفتة واحد من ولدهم چان عندة طلابة والبارحة يلا فضت وانطوني الخبر البارحة بس صارت سالفة مازن ودوهنتني المهم امك مجهزة كلشي لمَيان حتى الضيافة طالبتها يعني كلشي جاهز
كلت بدون نفس
:بس جدو مو لازم اشوفة ويشوفني؟
الشريان:شايفتة بابا وشايفچ هم
هزيت راسي وكمت
:بيها الخير توكلو على الله
تركتهم وصعدت لغرفتي افرك بصدري احس اكو شي غلط لا مو شي الي يصير كلة غلط
حاولت اتقبل الموضوع واقنع بنفسي
الله لو يعرف هالشي مابي خير الي اكيد راح يبعدة
كمت رحت لريتان لگيتها تدرس سادس وتريد تنتحر
:ريتانو كومي لا ادفرچ
باوعتلي تريد تبچي
ريتان:شبيچ انتِ بعد توخرين لا ارگعچ بالسادس
غميتها وكعدت
:باجر عقد قرأني وانه اخر من يعلم هسة يلا عرفت ومحتارة شسوي
ريتان:عود صدگ؟؟؟ وخريييي خلگوم اجهز نفسيييي
حطيت ايدي على خدي وانه اشوفها فتحت كنتورها وصارت تطلع ملابس وتشوفني
ريتان:هذا لو هذا لا احس هذا يليق بأخت العروس اكثر
:ترا انه العروس وما طفرت طفرتچ هاي وخري وخري خلطلع احسن
تركتها تبحوش على ملابس ورجعت لغرفتي صرت اباوع لنفسي بالمراية احب شكلي العادي الي مابي شي مميز غير الشامة الي بصف حاجبي كلش اقدس نفسي
حفيت وجهي وسويتلة عناية هوَ مجرد عقد قرأن نعقد ويروح لبيتة هالمصخم بس لازم اهتم بنفسي
ثاني يوم كعدت والبيت مخبوص خبص بس انه الوضع طبيعي عندي تريگت وتشكلنة انه وريتان وامي نظفنة البيت كلة واهم شي المضيف
ورا الغدة صعدنة انه وريتان لغرفتي ريتان سوتلي شعري ويفي وانه سويت مكياج خفيف يبرز ملامحي فقط واجت امي انطتني فستان ابيض وقفطان الفستان ما عجبني لأن چان مكشوف اختاريت القفطان لبستة ورشيت عطر وگلبي يدگ سريع
-اول مرة گلبي يجيسة خوف
ريتان تجهزت وبقت واكفة بصف الشباك تباوع تنتظرهم يجون
وانه اباوع لنفسي بدون نفس
راح اتسجل بأسم شرار المكروه شلون حنتحمل بعض
بنص صفنتي فززتني اختي تصيح
ريتان:اجوووو اجووو والله اجو
اجت سحبتني للشباك شفت سيارات هواااااي كلش هواي وكفت بالفرع بحيث الطريق انسد كلياً
الكل نزل النسوان دخلو للبيت والزلم يسلمون ويدخلون للمضيف
شفت شرار مرتب نفسة على اخر طرز ولابس قميص ابيض وبنطرون اسود وساعتة مزينة معصم ايدة رغم خبثة وشيطنتة بس الكل يعترف بجمالة واناقتة
رفع راسة صارت عينة على الشباك بسرعة سحبت ريتان ونزلت الستارة واحس نفسي مخنوگة
:ريتان ماريد عفية
بهت وجهة
ريتان:مَيان شنو ما تردين چا ما كلتي من قبل ليش هسة بالوقت الضايع
بقيت افرك بصدري ودمعتي مچلبة بعيني ماريدها تنزل
دخلت امي شافتني وصلت على محمد وال محمد
زمرد:يلا تعالي الكل وصل
غمضت عيوني اخذت نفس عميق ورجعت زفرتة
اجت امي لزمتني من ايدي ونزلنة وريتان ورانة
دخلت وشفت نسوان شي اعرفها وشي ما اعرفها بقيت رافعة راسي ولا نزلتة اجت ريمان بوستني فرحانة الفرح واضح بوجهة وبعدها اجت مرا عيونها خضر تخبل وجسمها يجنن انه صفنتني
ريمان:مَيان هاي امي ألماس
بقيت اباوعلها وبگلبي اكول صدك ألماس جميلة بشكل بوستني واجو بعدها نسوان اثنين هم حلوات سلمن علية وانصدمت صدمة عمري من عرفت هذن شرايچها اسعاد ومرام كل هالجمال وعليها شرايچ
ما بينت نفسي مصدومة رديت السلام عليهم ورحت كعدت بالمكان المخصص الي وريتان اكيد يمي
اسمع اصواتهم يحچون بس ما اميز شنو يحچون لأن هواي
نص ساعة واجت امي تمسح بدموعها
زمرد:يلا امي راح يعقدون
رجف جسمي وگلبي احس اطرافي متجمدة مادري شبية
اخذتني كعدتني بصف الباب واشوف امة وامي واختة واختي واكفين وراي وريمان تصور
اجاني صوت الشيخ يسأل
الشيخ:مَيان بنت نمر؟
جاوبتة بخفوت
:نعم
الشيخ:هل تقبلين الزواج بموكلي رماد ابن جهاد على سنة الله ورسوله؟ اذا قبلتي قولي نعم وانتَ وكيلي
بقيت صافنة وانفاسي مكتومة رماد؟ رماد منو؟
رجع كرر السؤال وانه بغير عالم ندستني امي وهمس
زمرد:جاوبي الشيخ امي
رجع سألني اخر مرا جاوبتة بصوت گوة ينسمع
:ن نعم وانتَ وكيلي
الشيخ:على بركة الله
صوت الهلاهل طرش اذني واسم رماد طرش گلبي
فصلت عن الكل كومتني امي وكعدتني بمكاني شالت البرنص عني باوعت للباب من دخل رماد وعيونة علية نظراتة عجزت افسرها ما فهمتها
معقولة اخو ريمان المغرور والخبيث اسمة رماد ويصير زوجي؟
عرفت بنفس تورطت ورطة كلش چبيرة
دنگ باسني براسي وانه احس بنفسي بحلم
كعد بصفي وسمعتة همس وصوتة كزبر جلدي
رماد:الف مبروك عيني
باوعتلة واتمنيت اطفر اضربة بس تمالكت اعصابي
ضحك بخفة وكال
رماد:نظراتچ لا افگسلچ عينچ
:جرب وشوف شيصير بيك
عض شفتة يباوع لشفتي
رماد:احوووي
صار وقت تلبيس الذهب كمت وانه ما طايقة كلشي
لبسني الحلقة وانه لبستة وبعدها لبسني گلادة ومحبس وخمس اساور وتراجي من كمل تلبس التراجي تقرب باسني بخدي وهمس
رماد:اسمي محفور بالحلقة وراح ينحفر بگلبچ
ابتعد وانه رافعة حاجبي مستهزئة بي
طلع من المكان بسرعة بسرعة مستعجل
وانه كعدت بمكاني صافنة على الحلقة ماكو فرحة بگلبي تورطت بهالعائلة أشد ورطة
كفت الناس من البيت وانة ردت اصعد بس بقيت من شفت ريمان اجت تفرك بيدها
ريمان:اخوي رماد يكول اريد اشوفها وحدنة
تنهدت وهزيت راسي هيَ راحت وانه انطيت خبر لأمي وبقيت بمكاني
كاعدة بصعوبة احس اريد انفجر
دخل وانه بقيت منزلة راسي ماريد اشوف شي
كعد بصفي هادئ وانه ساكتة ما نطقت بشي
كسر الصمت صوت طفل يبچي رفعت راسي مستغربة باوعتلة طفر على حيلة فتح الباب وشفت ريمان لازمة طفلة
ريمان:اسفة بس ما قبلت تروح وياي تبچي تريدك
اخذها من ايد اختة ودخلها وسد الباب وانه مثل الأطرش بالزفة اباوعلهم ما فاهمة شي اشوف الطفلة تباوعلي مبرطمة شفايفها
باوعت لرماد بأستغراب اجة كعد بصفي وكعدها بحضنة
حچة بأبتسامة شاگة حلگة
رماد:هاي مسك بنتي....
.
..يتبعع..
توقعاتكم؟
.
.
.
ضيفو حساب الانستا
وقناة التلي
اللهم صلِ على محمد والِ محمد 🦋
مها ال عبدالله