﷽
-الكاتبة: سـارة الحـسن
-Part 48
-"لا تنسون التصويت +
-" متابعة الحساب its_105
-"وتعليقاتكم ع الفقرات فيـروزاتـي"🤍
▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫
ْ
ْ
-لليــل كاعدين بـ الصالة عمـي أكثـم وجـدي
واحنه البنات ويمنه يُـسر وبقيه الولد برة
دخــل رســول وويا عاتـگة بقينه مستغربين
مـن فتـرة طويلة راحت شرجعها هسه
كال عمــي أكثـم
::-خيــر بابا صايــر شـي؟! شجابها عاتـگة؟!
-حضنها مـن اكتافها وجاوبة بـهدوء
::-انـي احبها يابة وماريـد اطلكها
-ابتســــم جـــدي وتقـــرب عليه ربـــت علـى كتفه بفخـر وكال بصوت مسموع
::-كفـــووو هــو هــذا الصــح ابنــي السبـع
وهـذا الشهر راح يصير الكم احلـى عرس بـ بغداد...
-أنتفــض عمــي أكثـم ما قبـل علـى الدايصير
وصاح بـي بعصبيــة
::-وأنتَ تتصــرف مـن راسك؟!
شنـو تحبها شنـو ما تريـد تطلكهاااا رسـول
-بقـى رسـول محافظ علـى هدوئه وجاوبه
::-أنتـو تصرفتـو وقررتـو تزوجونه بدون ذنب
وصعبة عليها تعيـش اذا تحت مسمى مُغتصبة او مطلقه
وكلنا نعـرف مجتمعنا ما يتقبل التسميتين
زواجنـه جان لـ سبب بس هسه احنه رايدين نكمل بي
واهلها عدهـم خبـر وقابليـن بـهذا الشـي
جساس: أذا گلبـه رايدها ويـن المشكله أكثـم؟!
أكثـم: المشكله الكدامك جاااااهل يابة جااااهل
شلون راح تعيـش حيـاة زوجيـــة بـهذا العمــر؟!
80 بـ المية مـن قراراتها هسه راح تتنــدم عليها مـن تكبر
راح تظلم نفسهااا وتظلم رسـول وياها
-باوعت علـى عاتـگة دنگـت راسها وتمسح بـ دموعها
رجعـت عينــي علـى رسـول لسانه يحجــي شــي
وعيـونه الـي ما فاركت يُـسر تحجي شـي ثاني
دنگ راســه لـ ثوانـي ورفع عينه يباوع لأبو وكال
::-احنــه نتحمــل نتيجة قراراتنـه
لا تشـــغل بالك بينـه يابــة
-دفعـة عمـي مـن كدامه يريد يطلع مـن البيت وعاط بي
::-استهتاااااار هـذاااا استهتااااار
-دخلــو الولـد وجاسـر وية طلعه عمـي أكثـم
جـدي ما اهتـم لـ كلامه وكال لـ رسـول
::-اول وتالــي راح يتقبـل الموضوع ما عليك منـه
-هـز ايـده عمـي جاسـر وكال
::-فنـدق صايـر مو بيــت
العالم تطلع عزابيـة ترجـع متزوجة
هناء: عمـي جساس گـدرته بـس علينه
-انـدار عليها خازرها ونتــر بيها
::-اكـدر لليهـوووود وما اكــدر لـ واحـد منكم
الصغيــر منيييين يتعلم غير مـن البعران الكباااار
جاسـر: محـد طيح حظ تربيتهم غيرك حجـي
شاااخو وتشمخو علينه ومانكـدر نحجي كلمه وياهم
وحتـى احتـرام ما عدهم، بسببك ما خلولنه أي اعتبــار
-صـارو امالــخ جـدي وعمـي جاسـر
ماسكتــو إلا مـن هـود صاح بعصبية
::-ولـ يرحم موتاااااكم كاااافي
رجال رجع مرته شصار؟! انكلبت الدنيا؟!
جاسـر: موضوعنه مو رسـول مـ....
-قاطعه يحجـي بعصبية
::-تروحون تروحون وترجعون علـى تربيتنه واحترامنه
زين ما سألتـو نفسكم ليـش يا يابة؟!!
اذا احنـه كل يوم نشوفكم متعاركين
وماكو اي احترام بيناتكم شنطلع احنـه؟!
رسـول: شيـوخ كاوليــة
-هو حجاها وعمـي جاسـر عاط مـن گراعه راسه
::-اسمــع اسمــع هووو هذا حجيييي
الله محمــد يرضاهاااا بعمره يردني هذا الرد
الميــرزا: بـ الهداوة ابن جـدي بـ الهداوة
هـو رد علـى هـود ياهو گربك أنتَ؟!
جساس: كلامكم كله مابـي داعـي
المحترم نفسه محـد يمسه بــ حجاية
الميــرزا: رحـم الله والديك حجـــي
ومـــثل مـــا كـــال أميـــرنا علـــي ( ؏ )
"إن النفس لجوهرة ثمينة ، مــن صانها رفعها ،
ومـــــن ابتــــذلها وضـــــعها"
هارون: يـلا يابة صلـو علـى محمـد وكلمن الغرفتة
-راد يحجي عمـي جاسـر وعاط هارون بصـوت عالي
::-اللهم صلِ علـى محمـد وآل محمـد
-جان شايل إيــلاف وهـي صفكت تعــززلة
دار وجهه وراد يصعـد علـى درج ويبـوس بيها ويضحك
وعمـي جاسـر زعل وراح لـ غرفتــة، هـز ايـده جـدي وكال
::-مـن ارخيلكم الحبــل لا تزاگطــووون
-محـد جاوبة وهـو انـدار علـى رسـول وكمل كلامه
::-كــل تكاليـف العـرس علـيه ماعليك بـ ابوك
رسـول: ماتقصـر جـدي بـس مانريـد عـرس
جساس: ليـش وشناقصكم حتـى ما يصيرلكم عـرس؟!
رسـول: هاي رغبتنـة جـدي
-هـز راسـه جـدي وجاوبه
::-بـراحتــك ابنـي
-عافنــة وراح لـ غرفتـة انـدار الميـرزا علـى عاتـگة
ابتسـم مـن شافها تبجـي وكال
::-لا تبجيـن يبـعد اخــوج هاي مقبـلات
-صاح هارون مـن بداية الدرج
::-مقبـلات بصراوية، مقبـلاتهم تمـن ومرگة
الميــرزا: مـو اصعـد اطيح حظك ابو حلك الـ يلزگ
-باس إيــلاف بـوسه قوية وصلنه صوتها وجاوبه
::-شابع بـوس هـذا الحلك الما عاجبك
-صعـد الميــرزا عليه يدردم يـريد ياخـذ إيــلاف مـنه
ورسـول هـم اخـذ عاتـگة وصعـدو لـ غرفتهم
تقـربت مـن هـود خايفة عليه لأن جان معصب
::-لا تضوج نفسك هـدهد صحتك اهم مـن اي شـي
-ابتـسم وجاوبنـي بهدوء
::-لا تخافيـن يعيـون هـود مابيه شـي
آفـروز: تحتاج شـي؟! اسويلك شـي؟!
-قبـل لا يجاوبنـي سحبتنـي هناء مـن كدامه وكالت
::-عنـده ام واخوات شايلاته بـ الصلاوات
الله لا يعـوزه علـى احـد عينــي
-بقيت ساكتة لـ خاطـر هـود بـس هو ما سكت وجاوبها بهدوء هـو ويمـشي بـ اتجاه الدرج
::-هـي هم أختـي يمه لا تنسين هـذا الشـي
-عافنـه وصعـد وهـي اندارت عليه خازرتنـي ونترت بيه
::-عوفــي هـود بـ حالة لا تسوين نفسج فقيرة يمه
آفـروز: چــاا اعـوفـچ تمثلـين وحـدج؟!
هناء: أحتـرمي نفسج آفـروز
آفـروز: محترمة نفسـي بـس ما....
-سكتت مـن قاطعتنـه عمتـي جـوري وكالت
::-عوفـي السوالف عمه واخـذي اخواتـج ينامن
-ابتسمت بـوجهه هناء ودرت وجهـي عنها
اشرت لـ هـزراف ويُـسر يجـن ويايه نصعـد
هنـه مشن بـدون كلام بـس هناء ما سكتت أبـد
-سمعت هوسه هارون والميــرزا بـ غرفه هارون
والـي فهمته مـن كلامهم متعاركين علـى إيــلاف يشاقون
دخلت ويه البنات لـ غرفتهن هـزراف كعـدت بمكانها
ويُـسر كعـدت بـ مكانـي وكالت
::-ياااااا عزاااا شوكت يجيني هـيج شخص
آفـروز: حددي مثل منـو؟!
يُـسر: مثـل رسـول ويجيبني يحطنـي بين اهله
ويكول كدام الكل "انــي احبهاااااا ومـا اعوفهااا"
-صفكت بـ حماس وكملت كلامها تضحك
::-يمكـن لو انـي بـ مكان زوجتة اعيط واجمـع العالم
-تحجــي وتضحك وتأشـر بـ ايدها منفعله
بسـرعة حضنت وجها بـ كفوف اديها مـن نزلت
دمعتــها وكملت كلامها بغصــة
::-زيــن انـي ليـش تأثـرت بيهم؟!
-تقـدمت حضنت راسها وهـي انفجرت تبجـي
::-اششش هـو شكو حبيبتـي ليش تبجين؟!
يُـسر: مادري احـس تأثرت بـ موقفهم
آفـروز: هو كُـله علـى بعضه ابـو سرحان
شنـو البي او سوا وخـلاج تتأثرين ياعينـــي
-رفعت راسها امسح بدموعها واحجي وياها
::-خلـي هــدف وحلمـج بـهل دنيا شهادتـج
لا تتمنيــن هيـج مـواقف او تتمنين تتزوجين
بـس لأن عينـج شافت مشهد حلو وتردين مثلـه
يـوم تكبرين وتكملين دراسه وترفعين راس اهلــج
ويكون الج اسم وسمعه طيبه بين الناس راح يجيـج
شخص يسويلج كُـل الأشياء الي يتمناها گلبـج حتـى
قبل لا تحجين، بـس حتـى يرضيج ويفرحــج
يُـسر: اسفـة بـس تحمست شوية
آفـروز: هينه يـ ابو سرحان انـي اعلمه
يُـسر: ليـش؟!
آفـروز: لو ما هو والدراما مالته جان ما نزلت دموع اختـي حبيبتـي وانـي كلشـي ولا يُـسر وهـزراف
يُـسر: يعنـي أذا احـد زعلنـي راح توكفين ويايه؟!
آفـروز: شتحجيـن أنتِ؟! الـي يمسج بـ ورده اهبــدة بـ صااااروخ، امحـي اثرة واثر عشيرته
-ابتعـدت عنـي تضحك وتمسح بدموعها
::-هههههه خلي الميــرزا يجيبلج مانع حماوة
راد يجيب منه مـرة لـ رسـول
آفـروز: بـ كلاص مـي طفينـي
-بقيت اشاقيها وهي تضحك ودارت دارت ورجعت سألت
::-زيـن هـو ليـش رجعها؟!
آفـروز: هـو يكول يحبها وانـي اكول مسحـور
يُـسر: ياااا وليـش يسحرونه هو شعنـده؟!
آفـروز: مـن نعرف الجهة المعنية راح نعرف السبب
يُـسر: اخـذو علـى السيـد العالج هـزراف
-هـزيت راسـي وجاوبتها بضحكه
::-ندلينه الدرب بعـد حتـى السحر مايفيد بينه
-ضحكت وسكتت وهـزراف بـس مبتسمه وعينها علينه
وطول هاي الأيام هـي هيـج بس ساكتة وكلامها قليل
مستمرة علـى قراءة القرآن والبخـور الي انطاهيا السيـد
ونتـأمــل ترجعلنــه مثــل قبــل
-بقيـت كاعـدة يمهن فتـرة احاول احجي ويه هـزراف
واخليها تشاركنه الحـديث ومـن جهه يُـسر
الي ما تعرف مشاعرها شـنو وليش ضاجت وتأثرت
رغـم جانت تحاول تخفـي ملامح الضوجه بس ماكدرت
-طلعت مـن يمهن للحمام غسلت ورجعت للغرفه
الميــرزا جان كاعـد علـى طرف الجرباية
والخاولي علـى رگبته وهاي عادته
مـن يريد يسبح يخلي هيـج
وكفـت كدامه وحضنت راسه
وطبعت بوسـه علـى شعرة
سحبـني بـهدوء مكعـدني بحضنه وكال
::-مشتاگة طرگاعتـي
آفـروز: اممم اليـوم ما شفتك زين
الميــرزا: واذا ما شفتينــي؟!
-رفعت ايـد امسـد علـى تفاصيل وجهه بهدوء
::-چــاا بيش اكحــل عيــوني؟!
-غمض عيـونه مـن حركتـي وتوسعت ابتسامتة
ميل راسـه علـى ايـدي بـهدوء وكال
::-چــاا كحليها هسه
-ابتسمت وگمت مـن حضنه، وحجيت ويا بضحكه
::-صيـر نضيف وتعال
-ضحك وكام مـن مكانه يريد يطلع وكال
::-إيــلاف راح تبقــى يـم هارون
آفـروز: ليـش؟!
الميــرزا: تعاركنه عليها تالي اختارت هارون وباعتنـي
آفـروز: بـس آفـروز ما باعتك
-حضـن وجهـي بين كفوف اديه طبع بوسه
علــى جبيـني، نزل راسـه لـ مستوايه وهمـس
::-وانــه مـن بعـدج يا تالـي هلـي ما اريـدن احــد
-اكتفيت بـ ابتسامة هادئه وهـو عافنـي وطلع
استغليت غيابة وغيرت ملابـسي بـ راحتـي
وكفت كدام المرايا مشطت شعـري وخليت عطر هادئ
ونـمت بـ مكانـي، سحبت تلفونـي لگيت مسج مـن رسـول
📥: يُـسر راح تبقـى يمنه؟!
📤آفـروز: ليـش؟!
📥رسـول: هيـج مجـرد سؤال
📤آفـروز: اتـرك الفـون واهتـم بـ زوجتك
📥رسـول: هسه غيـر تحجي
-ماضجت مـن رسـول لأن رجـع مرته
بـس ضجت مـنه لأن قوة علاقتة بـ يُـسر
وصارت متعلقه بـي حتـى لو ما جانت تعرف
حقيقة مشاعرها شنـو بـس راح تضوج اكثـــر
مــن رسـول يبتعــد عنـها بســبب رجوع زوجتـــة
📤آفـروز: ماعـرف السبب الي خلاك ترَجع عاتـگة
والله يوفقكم بـ حياتكم وان شاء الله تعوضها وتعوضك
بـس منـا وهيج تخلي مسافه بينك وبين يُـسر الف متـــر
📥رسـول: ليـش آفـروز؟! بشنـو أذيتها انـي؟!
📤آفـروز: ماترهم بعـد صح جنتو اصدقاء
بس هسه زوجتك رجعت وراح تصير حزازيات
واحتمال مشاكل وكرهه وغيرة مـن ناحيه زوجتك
وهـذا الشـي راح يأثر علـى نفسية يُـسر وهـي سادس
ماريـد اي شـي يأثـر عليها اريدها تلتهي بدراستها وبس
📥رسـول: انـي هم ماريد أثـر عليها وهم اتمنالها الخيـر
📤آفـروز: التهـــي بـحياتك سـوسـو
وخلي علاقتكم سطحية اذا صدك تتمنالها الخير
يُـسر صغيرة واقل فـعل يأثـر بــنفسيتها مو مثــلنه
📥رسـول: تمام تدللين
📤آفـروز: فدوة لطولج سوستي الوكحة
📥:رسـول: سكرين لـ رجلج هينه
📤آفـروز: أستر علينه رحمه لـ خالك سرحان
📥رسـول: جاوبينـي لعد راح تبقـى يمنه؟!
📤آفـروز: اي موجــوده هنا
📥رسـول: تمام تصبحين علـى خير
-جاوبته وغلقت تلفونـي وخليته علـى جهه
وانـي افكـر شنو ممكن يــكون السبب
الــي جُـبر رسـول يــرجعها ومـــا يطلكها
وجنت اتوقع جـدي أله ايـد بـ الموضــوع
-قطع حبـل أفكاري الميــرزا مـن دخــل للغرفة
بـدون لا يحجــي شـي وكف كدام المرايا ينشف شعره
ومـن بعـدها مشــط شـعرة وتعطــر بعطـر هادئ
وهـم انـي وهم هـو نحب هاي العطور قبل النوم
-طفــى الأضوية واجه يمــي وانـي مـــا
شلت عيونـي عنه گرصنــي مـن خـدي بخفه وكال
::-نظــراتك شــرسة حبيبـي
-ضربته علـى ايده بـهدوء لأن كرصنـي وجاوبته
::-لا تـكول حبيبي
الميــرزا: چــاا شكول طرگاعتـي
آفـروز: ولا طرگاعة
الميــرزا: السحارة؟!
آفـروز: ولا السحارة
-سحبنـي عليه مطوقنـي بين ادية وهمس بهـدوء
::-چــاا شتـردين اكــولً؟!
-انـداريت عليه ضامه وجهـي بصدرة وجاوبنه بنفس النبرة
::-چمـرة أفادك
-شدد حضنته عليه وصار يبـوس بوجهـي
ختمها ببوسه قوية جوة اذنـي وهمس
::-امـوتن عليــچ يچـمرة أفادي
-احـس گلبـه يريد ينفجـر ينبض بهمجــية
وگلبــي مو اهـدأ مـنه يرجـف بقـوة
رفعت راسـي عليه هو مغمض عيـونه
::-أصـفاد
الميــرزا: ها يبعـد عينه وعينه
آفـروز: شصار علمود إيــلاف؟! رافـد راح يجي لو لا؟!
الميــرزا: كال خلال هـذا الشهـر يجـي
-هـزيت راسـي وسكتت، فتح عيونه يباوعلي
وصار يحرك اطراف اصابعه بـ شعري ويحجي ويايه
::-ليـش؟! ضجتـي منها؟!
آفـروز: لا بـس احـس لازم تستعجلون بـهذا الموضوع
لـو ياخـذها لـو تبقـى يمنه، لأن راح تتعلق بينـه هاي الفترة
واذا طولت يمنه وزاد تعلقها راح تتأذة مـن ياخذوها
الميــرزا: بعـدها طفلة
آفـروز: الطفـل يتعلق أكثـر مـن الكبيـر
وراح تتأزم نفسيتها هم فوك فراك امها نوبه تفاركنه
تـدري انـي لحـد هسه اخاف اتصـرف وياها تصرف حلو
اكـول يمكن تحب معاملتي وياها ومـن ياخذها رافـد راح تتأذة وراح تبجـي وتــريد ترجـع يمنه
الميــرزا: حقــج بـس ما بيـدي شي
انــه هم حالي حالـج أنتظـر خبـر منهم
وخالـي مايرضى يحجيلة إلا مـن يرجع للعراق
آفـروز: مالها داعي هــو اذا يريـد يرفض
اذا اجه واذا حجيتوله علـى التلفون راح يرفض
أفضـل تحجوله هسه حتـى نعرف شنتصـرف
-رجـع حضنـي وجاوبنـي بهـدوء
::-يجــرالـچ يچـمرة أفادي راح احجي ويا
بـس أنتِ لا تهلگيـن عقلك بـ التفكـير والقلق
مايصيــر غيــر الـي كاتبة ربـج
آفـروز: والنعـم بـ الله
الميــرزا: عنـدج اسئلة بعـد لو ننام؟!
-ضيگت عيوني عليه وسألته بنبرة مستفزة
::-مـن هـوو ربـگ؟!
الميــرزا: هههههه الله هـو ربـي
آفـروز: خـوش چــاا كول الراح اكوله ونام
الميــرزا: شلون أكـدر أبـوس الـ چــاا الـي تنطقينها
آفـروز: أستغفـر الله انـي وين احجي وأنتَ وين تحجي
-بقـى يضحك علـى صامت وسألنـي
::-ويـن جنتـي تحجين ضيعت السالفة؟!
-رفعت نفسـي اباوع لـ عيونه سبقنـي بـ الكلام وكال بنبرة دافية تحسها ضماد للگلب
::-هسه مو بس ضيعت السالفة حتـى انــه ضـعت
-نزلت عيـوني مـن عجـزت عـن الرد
حسيت شفايفه الدافيـة لامست جبينـي
طبـع بوسات متتالية بهـدوء وهمس
::-احچـيلي يبـعد كـل الحَچـي
-هـزيت راسـي بـ معنـى ماكو شـي ورجعت ضميت وجهـي بـصدرة واحـس وجهـي اشتعل نار مـن الخجل
صـدرة صار يهتـز يضحك بهدوء وكال
::-ذابت ذابت قشطتنا
آفـروز: اششش اريد انام صفصف
الميــرزا: چــاا مافهمت الردتـي تحجينه؟!
آفـروز: وين صايرة هاي تخجلنـي وتريد احجي
الميــرزا: هههههه زين انتظرج يروح خجلج واحجيلي
آفـروز: خوش انتظرني
-بقـى أكثـر مـن نص ساعه يضـحك وانـي كُـل ما
يضحك اضــربه بوكس علـى بطنه وهو يزيد ما يقل
أخـر بـوكس حتـى انـي حسيت بـي قوي ضحك بقوة وكال
::-متـزوج جـون سينا مو مرة
آفـروز: ماعـرف اعبـر عـن مشاعري غير هيج
-سكت عنـي فتـرة وبدون ما يضحك
رفعـت راسـي اريد احجي وانـي مقررة اذا يضحك
يجــي البوكس علـى وجهه هل مرة بـس ما ضــحك
وبقـى يحجي ويايه ويعاملنـي بجدية وانـي رجعت انطلقت ويا بـ الكلام
::-شـوف دائماً هـود يكول خلي يومكم ينتهـي بـ ذكر الله
خلينه نعتمدها ونعتبرها روتين يوميه قبل لا ننام شرأيك
الميــرزا: واكــو أجمـل مـن ذكر الله؟!
-ابتسمت وكملت كلامي
::-انـي قبل لا انام دائماً اردد
"سُـبحان الله وبحمـده، سُـبحان الله العظيـم"
"لا إله إلا الله" ، "الحمــدلله" ، "أستغفر الله"
الميــرزا: "أذا أويت الـى فراشك فأقرأ آيه الكرسي،
لن يزال عليك مـن الله حافظ ولا يقربك شيطان حتى تصبح" ، خلينــه نقرا آيـه الكرسـي هم
-ابتسمت وهـزيت راسـي بـ أيجابية وهو رددها بصوت مسموع، بصـوت هادئ يبعث الطمأنينة للگلب
﷽
َ
﴿اللَّـهُ لَا إِلَـٰهَ إِلَّا هُوَ الْحَيُّ الْقَيُّومُ ۚ لَا تَأْخُذُهُ سِنَةٌ وَلَا نَوْمٌ ۚ لَّهُ مَا فِي السَّمَاوَاتِ وَمَا فِي الْأَرْضِ ۗ مَن ذَا الَّذِي يَشْفَعُ عِندَهُ إِلَّا بِإِذْنِهِ ۚ يَعْلَمُ مَا بَيْنَ أَيْدِيهِمْ وَمَا خَلْفَهُمْ ۖ وَلَا يُحِيطُونَ بِشَيْءٍ مِّنْ عِلْمِهِ إِلَّا بِمَا شَاءَ ۚ وَسِعَ كُرْسِيُّهُ السَّمَاوَاتِ وَالْأَرْضَ ۖ وَلَا يَئُودُهُ حِفْظُهُمَا ۚ وَهُوَ الْعَلِيُّ الْعَظِيمُ﴾
-ومـن بعـد حديث لطيف ومريح للگلب منه غفينه
ومـثل كل يوم كعـدني ويا علـى صلاة الصبح
وانـي ارجـع انام بـس هو يبقـى كاعـد ميكدر بعـد
كم ساعه ورجـع كعـدني لأن عـدنه دوام
-جنت واكفة البـس حجابـي وهو كاعد ينتظرني
سألتـه بدون ما اندار عليه
::-هم تعرف رسـول ليـش رجـع عاتـگة؟!
الميــرزا: انطانـي خبـر قبـل لا يرجعها ومـن سألته شني السبب كال "البنية انظلمت تستاهل تعيش مرتاحه"
آفـروز: وما مرتاحه يم اهلها؟! لو شنو؟!
الميــرزا: يكول ما مرتاحه مـن الناس وخاصة بمدرستها
لان صغيرة ومغتصبة ومطلقه بنفس الوقت وداتسمع كلام
آفـروز: واهلها ليـش ساكتين؟! يكدرون يغيرون مدرستها ويخلصون مـن كلام الناس الفارغ
الميــرزا: مـن تمرض جدها عائلتهم تشتت
بـ الأخص عمامها مو علـى توافق ودائماً مشاكل بيناتهم
آفـروز: الله يساعدها بعدها صغيرة علـى هيج عذاب
الميــرزا: تصفـى ان شاء الله
-هـزيت راسـي وانداريت عليه بعد ما جهزت نفسي
::-ان شاء الله، يلا نطلع
-كلنا طلعنه لـ دواماتنه حتـى عاتـگة
هـم عدها مدرسه، ويُـسر اجه يـوشع
مـن الصبح اخذها حتـى يوصلها لمدرستها
إيــلاف بقت يم عمتـي جـوري والف مرة وصيناها عليها
-جنت كاعـدة بـ الحديقة انـي وأمنيـه قبـل المحاضرة الأخيـرة، ونتناقش بـ أمـور عادية قطع حديثنه وحـدة مـن صديقاتها سابقاً الي جانت وياهن بـ بداية المرحله الأولى
::-السلام عليكم
-ردينه السلام وهو باوعت لـ أمنيـه وكالت
::-أمنيـه اريـد احجي وياج بـ موضوع مهم
-انـدارت عليه أمنيـه
::-مـن رخصتج آفـروز
آفـروز: علـى راحتـج انـي راح ارجـع للقاعة
-گمت مـن يمهن رجعت للقاعة بقيت أگلب بـ الفون
مـرت فتـرة واجانـي أتصال مـن الميــرزا ابتسمت وجاوبته
::-هـلا گلاس گلاس
الميــرزا: هـاا يچـمرة أفادي شجاي تسوين؟!
آفـروز: كاعـدة أنتظـر دكتـور يـوشع يجـي
الميــرزا: عفية بنتـي الشطورة
آفـروز: عايزنـي بـس گرون الچبـش وارجع أول ابتـدائي
-ضحك وكال
::-يـلا رايح انــه
آفـروز: ليـش اتصلت لعـد؟! محتاج شـي؟!
الميــرزا: انــه هم راح اخـذ الطلاب محاضرة هسه
بـس ردت اسمـع صوتج جرعــة طاقة
آفـروز: امممم
الميــرزا: ههههههه خجلت الصلفة
آفـروز: شنوووو؟!
الميــرزا: يلا يطرگاعتـي روحـي ماكو شي
آفـروز: نتحاسب عليها بـ البيت هاي
الميــرزا: وعليها فصـل مرتب هـم
آفـروز: هينه أصـفاد
الميــرزا: تهـون لـ خاطرج يبـعد أصـفاد
وانــه اخـذج مـن الجامعه لا ترجعيـن ويه يـوشع
آفـروز: بـس مو تتأخـر
الميــرزا: تآمــرين
-غلقتة مـنه بعد ما ودعتـه، بعـد فتـرة دخلت أمنيـه
بـس واضح عليها باجيـة عيـونها حُـمر
كعدت يمـي ومسح بـ وجها تحاول تخفـي ملامحها
::-شبيـج أمنيـه؟!
أمنيـه: مابيه شـي
آفـروز: لعـد ليـش تبجين عيناي؟!
أمنيـه: كله بسببهن بـس يدورلهن الزلة عليه
أبتعـدت عنهن بسبب سوالفهن وهسه تكلي عفتينه علمود
آفـروز، وعلـى اساس مصادقتج علـى مصلحة لان اخوج
دكتورنه، وانـي والله مو هيج ولا فكرت بهذا الموضوع
آفـروز: دام تعرفين نفسج مو هيج ليـش مهتمه لكلامهن؟!
أمنيـه: يظلمونـي بـ الكلام وتحـز بـ خاطري كلش
-مسـدت علـى ذراعها وحجيت وياها بهدوء
::-مرة قريت كلام كلش حلو
"كلام النــاس أشبـه بـ التُـراب
إذ لـم يتطايـر في الهواء فـ هو يـداس بـ الأقـدام
عــش عفــويتك فـ الألسنـه لـن تصمت
وأعلم أن الحياة ليست طويلة لـ نجرب كُـل شـيء
ولا قصيــرة لـ نتـذكر كُـل شـيء
ولكنها جميلة إذا عرفنـا أنها لا تساوي شـيء
وقــل لمـن يحمـل هماً أن الهم لا يـدوم
مثلما تفنــى السعادة هكــذا تفنــى الهمــوم"
-أبتسمت وقـبل لا تحجي شـي دخل يـوشع للقاعة
حتـى ياخذنه محاضرة، سلم ووكـف بـ مكانه وقـبل لا يبـدأ
ميلت نفسها عليه وهمست
::-كلامج يجنن شكراً
آفـروز: عفـواً وما عليج بـ كلامهن لا هنه ولا غيرهن
﴿رَّبُّكُمْ أَعْلَمُ بِمَا فِى نُفُوسِكُمْ﴾ دام گلبـچ نضيف لا تهتمين
-سكتنه مـن نبهنه يـوشع، وبلش بـ محاضرتة
بـ المرحلة الأولـى جنت اضوج مـن محاضرته ممله احسها
بـس هسه لا دائماً اكو تفاعل بـ محاضرتة ويخلص الوقت بسرعه بـدون ما نحس
-خلصت ساعتين وخلصت المحاضرة بس الطلاب بقو يناقشونه ويسألونه علـى هوايه أشياء وهو يجاوب
بدون ملل، جنت مخليه تلفوني صامت ومندمجة وياهم
قاطعنه تلفون يـوشع مـن شاف المتصل منـو رفع عينه عليه وكال
::-الـي يريـد يطلع يكدر ياخـذ راحتـه
-عرفته الميــرزا گمت دا اطلع وهو هم اترخص وطلع وانـي طلعت امـشي ويا
::-أنتَ شنو كيك لو كيك؟!
يـوشع: شلون طالبة ما تستحي تتحرش بـ أستاذها
آفـروز: حقها أذا أستاذها يشل شلون ما تتحرش
يـوشع: هههههه امشـي امشـي ام لسان
الميــرزا خبصنه بـس يتصل عبالك مدخلين مرته حرب
آفـروز: مو أنتَ تأخرت عيناي
وين صايرة محاضرة ساعتين وربع
-بقينه واحـد يرفع وواحد يكبس لـما وصل سيارتة
وانـي طلعت علـى الميــرزا جان واكف ومنتچـي علـى سيارة
باوعتله نظرة سريعه مـن فوك ليچوة وحجيت ويا
::-شـو مـن طلعت الصبح ما جنت حلو هيج؟!
الميــرزا: انــه حلو بـس بعيونــچ
آفـروز: وبعيون جميـع البنات
-ضحك وانـي كملت كلامي
::-لا تصـدك كلامـي بـس داعزز مـن ثقتك بنفسك
-بقـى يضحك وفتحلــي الباب وكال
::-تفضلــي طرگاعتــي
آفـروز: شـوقراً عيناي
-صعـدت وهو انـدار للجهه الثانية صعـد وانـي حجيت
::-سلامن عليكم
الميــرزا: وعليكم السلام والرحمه
بـس لا تتلاعـبين حتـى بـ ســلام الله
-غلست عليه وشمرت جنطتـي ضايجة منها
::-مفخخه مو جنطه كسرت ظهــري
الميــرزا: شكبرها هي؟!
آفـروز: وزنها الــف ملــغ
-باوعلي بنظره سريعة وسألنـي مستغرب
::-شنـو ملــغ؟!
آفـروز: ملي غرام يعني
الميــرزا: ومـن شوكت صار اسمه ملغ؟!
آفـروز: اختصرته غير
-ضحك وهز ايده وبقـى يسالنـي علـى يومي
ودائماً احجيله مختصـر عـن الي يصير رغم هو يتعمق
بـ التفاصيل ويحب يسمع منـي
-سألته مستغربه مـن اختلف طريقنه
::-وين رايحين؟!
الميــرزا: اخطفـج
آفـروز: بستـر اخواتك رجعنـي
الميــرزا: شبيج ماتحبين الأكشن؟!
آفـروز: خايفة عليك منـي ما خايفة منك
-ضحك بصـوت عالي وبقينه الطريق كله علـى نفس الموضوع لـما وصلنه المطعم الـي يريدنه نتغدة بي
تغدينة وطلعنه رحنه للسوك واخـذ أله هوايه شغلات
وجان ياخـذ رأيي بـ اي شي ياخـذة
-بعـد ماخلص شغلاته باوعلي وكال
::-شرايج اخذلج اشياء علـى ذوقي؟!
آفـروز: لا
الميــرزا: ليـش ولِـج؟!
آفـروز: راح تاخذلي أشياء طاغية الأنوثة
الميــرزا: لا شبيـج خلـي اخذلج وشوفي
آفـروز: زين انطيك فرصتين واذا ما عجبنـي
تعوفنــي اخـذ براحتــي، تمام؟!
الميــرزا: تمام
-افتـرينة بـ المجمع واخـذلي ملابـس علـى ذوقة
وجانت تختلف عـن نمط ملابسـي، واختار أشياء
أكثـر حشمة، بـس جان ذوقه حلـو
-بعدها رجعنه للبيت لگينـه هارون وإيــلاف يلعبون
طوبة بـ الحديقة، صاح بيهم الميــرزا
::-اكو واحـد يلعب بـهذااا الحــر
هارون: كسرنه تحفيه مرت ابوك وطردتنه
الميــرزا: فوت جوة يابة فوت هسه ليــلافي تتمرض
-عافو الطوبة وشالها واجـو يمشـون بـ إتجاهنه
مـن شافو العلاليـگ بـ ادينه كال هارون
::-شجبتولنه وياكم؟!
-تقرب مـنه الميــرزا مدري شهمس بـ اذنه
وانفجر مـن الضحك وهارون بقـى يباوع عليه وخازره
مشـى كدامنه يضحك، وانـي سألت هارون
::-شكال؟!
-ما جاوبني وسحب وجهي وصار يبوس بقوة
انـدار علينه الميــرزا ونتـر بـ هارون
::-جدك احرگه هاااارون
هارون: اعلى ما بخيلك ارگبه
-ما جاوبة واجه سحبني ويا وهارون يسحب مـن جهه
زهكونـي وابتعدت عنهم ضايجة وعطت بيهم
::-شكووو هووو شكوووو مو خلعتو اديه
-بقـو ساكتين عبالك اطفال، واحد يقهر بـ الثاني
عفتهم ودخلت للبيت بعـدني بداية الدرج وطلعت هـزراف مـن غرفة هناء، بقيت اباوع عليه وهـي انصدمت مـن شافتني كدامها
::-شعنـدج يم هناء؟!
-صفنت بوجهـي، كررت سؤالي عليها جاوبتنـي مرتبكه
::-ماكو شـي هي صاحتنـي
آفـروز: شتريد منج؟!
-سكتنه مـن دخلو الولد للبيت، عفتها وكملت طريقي
دخلت لـ غرفتنه والميــرزا وراية، اخذت ملابس وردت
اطلع للحمام، لزمنـي الميــرزا مـن ايدي وسأل مستغرب
::-شــمالج؟! ليـش ضجتـي؟!
آفـروز: مابيه شـي بس اريد اغير ملابـسي
الميــرزا: جاي نشاقة انــه وهارون
-ابتسمت بوجهه وجاوبتة
::-مو منكم بس تعبت
-هز راسـه وسكت واني عفتة وطلعت، دخلت للحمام سبحت ورجعت لـ غرفة هـزراف، فتحت الباب ودخلت جانت كاعدة مـن شافتني وكفت علـى حيلها
::-هـا آفـروز
آفـروز: هـا هـزراف شدايصير؟!
هـزراف: ما صاير شـي
آفـروز: ما كلتــي شتريد منـج هناء؟!
هـزراف: رادت مـني احرك الاثاث وياها لأن تكول كامل وما تكدر وحـدها
-بقيت اباوعلها بشگ وهي ارتبكت وكالت
::-ماكو شـي آفـروز
آفـروز: هـزراف حبيبتي خليج بعيـدة عـن هناء
ما وراها غيـر الأذية، وأنتِ شفتـي بنفسج شسوت بيج
-هـزت راسها بـ أيجابية وسكتت بس وضعها ما جان طبيعي
عفتها وطلعت ما لحيت وياها بـس اكيد راح اراقبها
رجعت لـ غرفتـي ونمت لأن جنت تعبانه
-مـر أسبـوع ونفـس الروتيـن بين البيت والدوام
هـود ورسـول صحتهم يوم عن يوم تتحسن اكثر
إيــلاف باقية يمنـه ومانعرف شنـو مصيرها وهاي الفترة
كلش اتعلقت بـ هارون، بـ النهار تبقـى يم عمتـي جوري
ومـن نرجع مـن الدوام تبقـى يم هارون حتـى بـ الليل
-هـزراف دائماً اشوفها تحجــي ويه هناء ومـن اسألها
شعنـدج يمها او اكللها ابتعـدي عنها تجاوبنـي نفس الجواب
::-ماكــدر ابقـى معاديتها أخاف منها
آفـروز: ماكو شـي اسمه اخاف منها هـزراف
بـ شنـو تكـدر تأذيج غيـر السحر؟! واذا اخذتي حذرج
منها وما تغابيتـي وصدكتـي تمثيلها واخذتي شي مـن
ايدها حتى سحر ما يأثر بـيج
هـزراف: خليني هيج آفـروز
آفـروز: مـن هيج خايفة منها عجلي بـ زواجج مـن يـوشع
واطلعــي مـن هـذا البيت واخلصـي وارتاحــي
هـزراف: ماكـدر اتزوج هسه
آفـروز: وليـش؟! شنـو الي تغير؟!
هـزراف: كلشـي تغيـر، واخــوج مايريد بنية ضعيفة مثلي
آفـروز: حجـي لسان هذا لو صدك جان ما اخـذج يمة
هـزراف: يمكن فعل أنسـاني
آفـروز: فعـل أنسـاني؟! لـو يحبـج؟!
-دنگت راسها وسكتت، ندستها مـن كتفها بخفه
::-احجــي؟!
هـزراف: ماكــو شـي ينحجي آفـروز
ماريـد اتزوج هسه خليني هيـج مدبرة وضعي
آفـروز: أسفـة علـى الحجاية الراح تسمعينها منـي
بـس ترا أنتِ صايرة عبدة عنـد هناء ما ملاحظه نفسج؟!
هـزراف: يلا اكــدر أعيـش
آفـروز: هـزراف والنبـي راح اتخبل بسببج
بيـا لغة احجي وياج وتفهميني بعـد؟!
لـچ مو بحالهاااا أنتِ ولا تكـدر تأذيج بعد
ليـش تسوين هيــج؟! وين ترديــن توصـلين؟!
هـزراف: أنتِ هم تعبتيني آفـروز
الـف مرة كتلج يلا اكـدر اعيش هيج
الـى متـى ابقـى متحامية بيــج؟!
آفـروز: هـزراف أنتِ أختـي وروح عـون لو اضطر الأمر
حتـى الميــرزا اتركه وابقـى كاعده بـهذا البيت علمودج
ليـش تكسرين ظهــري هيج؟! ترا داتأذينـي حسي بيه
هـزراف: شـوفي شكد مأذيتـج؟!
وانـي ماريد أذيـج اريدج ترتاحيـن
-انـي وين احجـي وهـي شلون فهمت
حيـل انقهرت واتنرفزت مـن وضعها وعلاقتها بـ هناء
گمــت مـن مكاني ضايجة ونترت بيها
::-وروح عـون أذا شفتج مرة ثانية متقربة مـن هناء
حظــج اطيحه أفتهمتــي لوووو لاااا؟!
كاااافي أنتِ مووو طفلة كبـري عقلج شوية
وفكــر تفكير منطقــي مناسب لـ عمــرج
-عفتها وطلعت وأول مـرة هيـج اتنرفز
تعبتنــي مادري بـشنو تفكــر مـن ما اجيها تعاكسنـي
اعـرف حقها واعـرف تعبت بـس تعبتنـي أكثــر
جنت مستعدة اهـدم حياتـي لـ خاطرها وهي مداتتساهل ويايه ولا دا تشاركنـي افكارها حيل متغيرة
-بقيت واكفه بـ الصالة الفوك واتصلت علـى هـود
ما تأخــر وجاوبنـــي
::-هلو آفـروز
آفـروز: هـلو هـود، ويـن أنت؟!
هـود: كاعـد بـ الحديقة
آفـروز: وحـدك؟!
هـود: اي تعالـي اذا تردين
آفـروز: اي جايتك
-غلقتة مـنه ونزلت عليه، جان كاعـد علـى كرسي
ومدد رجلية علـى كرسـي الثاني، عدل كعدته مبتسم
::-هـلا بروح اخوها
-كعـدت كدامه ومجـرد ماشفت ابتسامتة احـس هدئت
::-هـو كُـل الأخوان مثلك حنينين؟!
لـــو انـي محظوظه بيــك؟!
هـود: شتكوليـن أنتِ؟!
آفـروز: اكيـد محظوظه بيـك والف هنيالي عليك
-توسعت ابتسامتة وسألنـي
::-ضايجة مـو؟!
آفـروز: وهواية واحـس عقلي تضـخم
ما عادي يستوعب شـي
اعـرف أنتَ مريـض وتعبان اكثر مـني بـس..
-قاطعني وحجه بحنيه
::-اتعب انــي ولا واحـد منكم
أنتـو وصية روحـي كلشي يهون لأجلكم
آفـروز: ربـي لا يحرمنه منك
هـود: راح تحجيلي الي مضوجج شنـو؟!
-هـزيت راسي وحجيتله أشياء سطحيه
عـن حالة هـزراف بس ما ذكرت هناء بـ الموضوع،
وهم ذكرت هي انسحرت بـس كتله ما نعرف منين،
هـز راسه متفهم كلامي وكال
::-مـرات الأنسان يمـر بـ ضروف صعبة
وتكون قادرة علـى تغيـر حالتة النفسية للأسوء
شلون لو كان سحر ووسوسات شيطانية قوية لفترة؟!
اكيـد راح تتأثر وماكو سحـر ينتهي أثـرة بيـن يوم وليلة
آفـروز: والحل شنـو؟!
هـود: هاي الفتـرة كونـي وياها بـكلشي تريده
احجي وياها بـ أشياء أيجابية بـس، وطلعيها مـن
حلقة افكارها السلبية الي داتدور بيها حالياً
وأهـم شـي ما تبتعد عـن صلاتها وقرائه القرآن
-اخـذت نفس عميق وحيرتي جبيرة هل مرة
احـس هـزراف داتضيع واني ماكدر اسوي شـي
::-ان شاء الله راح احاول وياها
هـود: ان شاء الله وانـي هم راح احجي وياها
آفـروز: بـس لا تكللها انـي حجيتلك شـي
هـود: راح احجي وياها مثـل كل مرة حديث يجمعنه
وراح اطرق لـهذا الموضوع يمـكن تاخذ بـ كلامي
-ابتسمت وجاوبتة
::-الله يديمك النـه
-مرت فتـرة واحـنه كاعدين سوة، بعـدها دخلو رسـول وعاتـگة جانـو طالعين، عاتـگة سلمت ودخلت للبيت ورسـول كعـد يمنه ساكت
هـود: سمعنه صوتك العذب
رسـول: عوفنـي
هـود: شبيك؟! منو مزعلك؟!
رسـول: الدنيا
هـود: وتســوة؟!
رسـول: لا
هـود: بعـد شكو؟!
-بقـى ساكت ما حجة شـي واحنه هم ما لحينه عليه بـ السؤال، التمو الولد هارون والميــرزا واجت هـزراف وسـدرة ورؤيا هم كعدو يمنه، وعمتـي جوري مسويتلنه لفات كباب عروگ واجت كعدت يمنه وكلش نحب سوالفها لأن سبورتيه
-كمت مـن مكاني كعـدت يم هارون وحجيت ويا بـ ابتسامة
::-مشتاقتلك هرهور
هارون: وين رايح عنج؟!
آفـروز: مـن تعينت رفعت خشمك علينه
وفوكاها لگيت إيــلاف وبعت آفـروز بـ الف وربع
-حضن راسـي بس مرده مو حضن طبيعي وكال
::-أنتِ الأصـل سحارة گلبـي
آفـروز: اليوم الصبح شفتك بـ ملابس الدوام
هارون: شلوني؟!
آفـروز: طالع هوووت ابن الهوووت
-عصر راسـي بقوة وصاح
::-لـچ يبووو يروحن فدوة لـ زراگــج
آفـروز: ياهــن ولك؟!
هارون: بنات الخارج الصفر
رسـول: صــار بيــه ابــو صـفار مـن وراهــن تريـدلك وحـــده زركــة تــرد روحــك ماكــو
هارون: حتـى المتزوجين طلعـو مو أمان
رسـول: انـي رجال مريض محتاج اغـذي بصري
هـود: غذيهن غذيهن تاليتهن للدود
رسـول: شمسوين؟!
-كال هارون بشقة
::-صَـفد سـد حلكه بحديث او آيه قرأنيه
-الميــرزا حسيت الكلام علـى طارف لسانه
::-الأمام السجاد (ع) يكول:
"وأمَّا حقُّ بصرك فغضُّه عمَّا لا يحلُّ لك
وترك ابتذاله إلَّا لموضع عبرة،
تستقبل بها بصراً أو تستفيد بها علماً،
فإنَّ البصر باب الاعتبار"
رسـول: لعـد شلون نحجي ويه الدكتورة والمعلمه والموظفه وغيرها وغيرها؟! معقوله كلها ذنوب؟!
هـود: الحديث واضح دايكول غض بصرك عـن المحرمات
واستشنـى مـن كال "إلا" يعنـي اذا كان
لخاطر شغل او خاطر علم او أشياء ضرورية هاي عادي،
بـس أذا كان لـ خاطر تغذي بصرك مثل ما تكول هاي حرام
جـوري: يحفظكم ربـي يابعد گلبـي أنتـو
افـرح من اشوفكم تنصحون وتعلمون بـ اخوتكم
هـود: هـذا واجبنه عمه نسوي الي علينه والباقي عليهم
هارون: يبوووو شكد مستفاد من الميــرزا انـي
-ضحك بدون سبب وكال
::-شوفو هاي مره صاحبت واحـد بس مو عراقي
وصرت براسه سيـد معمم يوميه اجي علـى الميــرزا
"اريـد معلومة دينية" وهو ما يقصــر يحجيلي اليعرفه
واروح انـي اتفلسف براس صاحبـي ذاك
هـود: شـي مو عيب ولا غلط اذا تعلمت وعلمت غيـرك
جـوري: اي والله هنيـاله الــي يتعلمله شــي بهل دنيـا يفيـده لـ اخــرته
رسـول: والله انـي رجال فقيـر صايم ومصلي ولا بايگ ولا زاني ولا مسوي الكبائر بـس هي عيوني تروح علـى الحلوات
الميــرزا: عايــن يخوية انــه لا سيـد ولا شيـخ ولا اريـد اصـير بـ راسك متدين بـس مرات لازم واحـد يحجي، النبـي محمد ﷺ انذكرلة حديث يكول
«كتب على ابن آدم نصيبه من الزنا
مدرك ذلك لا محالة،
العينان زناهما النظر،
والأذنان زناهما الاستماع،
واللسان زناه الكلام،
واليد زناها البطش،
والرجل زناها الخطا،
والقلب يهوى ويتمنى،
ويصدق ذلك الفرج أو يكذبه»
اي شـي غلط تريد تسوي اسال نفسج بـ الأول وكول
"هـذا الشـي يسوه يتسجلي ذنب بسببه لو لا"
هـود: حـب دينك وسوي هاي الأشياء بـ دافع الحُـب لله
وراح اسالك سؤال وجاوب بـ ضميرك
رسـول: اسأل
هـود: هسه أنتَ رجال متزوج وتحب مرتك
وتعرف بيها تضـوج مـن أشياء معينه،
راح تسويها لهاي الأشياء؟! ولـيش؟!
رسـول: لا ماسويها لأن ماريد اقهرها او اضوجها مـني
هـود: خلي علاقتــك ويـــه ربـــك هم مبنية علـى الحُـب مـــو مبنية علـى الخــوف والأجبار وصدكنـي محـد راح يحبك بكد ربك
رؤيا: زين شلون اعرف ربـي يحبنـي؟!
هـود: كُـل يوم تكعـد الصبـح هاي تعتبر فرصة مـن
رب العالميــن الك!! حتـى تستغفـر ربـگ وتصحح اغلاطك وتتجه لـ طريق الهدايه،
كُـل مره يُـلهمك الـى الصلاة والعبادة والتقرب مـنه تعتبر فرصة لان يحبـك ويريدلك الخيــر
مـن يستجيب دعائك ويحقق أمنياتك واحلامك ومِـنعم عليكم بـ نعم غيرك يتمناها اعـرف وكتها ربگ يحبك
مـحــد يوكف وياك بـ حـزنك وخـوفك وقـلقك مثـل ربگ
محــد يكــدر يتحــملك بـ كُــل حالاتك المزاجيـــة طــول عمـرك غير ربگ
جـوري: الـف الحمـدلله والشُـكر
-كلنه رددنه بصوت واحـد حامدين شاكرين ربنه علـى كُـل نعمه منعم علينه بيها، ابتسم هارون وكال
::-بـروح الأعزاز كل اسبـوع اكعدولنه هيـج كعدة
-كالت عمتـي جـوري بنبرة لطيفه والضحكه مرسومه علـى ملامح وجها
::-يمة شلون وليـدات عدنه
آفـروز: اي والنبـي، رب العالمين هداكم للطريق الصح حتـى تكونون سبب لـ هدايتنه
سـدرة: الحمـدلله ما طلعتـو مثل شباب الكلية
طلع منهم 20 بـ المية زينين والبقية كلش اييععع
رؤيا: اي والله حتـى ملابسهم اييععع ماعرف شيحسون
آفـروز: انـي جنت ما راضية علـى هليل وبدير بس للأمانه مـن شفت الناس شلون وصخه حمدت ربـي وشكرته عليهم
رسـول: ابـو المثـل يكول "ماتعـرف خيـري إلا تجرب غيري"
آفـروز: بـ الهداوة لا تشيخ علينه
-راد يحجـي رسـول بـس قاطعة الميــرزا وكال
::-اسكت يخوي لا تسويك تبليط هسه
هـود: رسـول ذهب وين اكو منه
رسـول: اخخخخ والرسـول الأعظم أنتَ الذهب
وابد مو حرامات بيـك چبــدي يابعـد چبــدي
هـود: يا طلابة الچبـد الماتخلص
جـوري: ههههه يحفظكم الرحمـن ويديمكم سنـد لأخوتكم يبـعد روحـي
-كام رسـول مـن مكانه باسها مـن راسها وكال
::-ويحفظج النـه ياروح رسـول وسـدرة
سـدرة: أنت ليش تحجـي عـني؟!
رسـول: غيـر امـچ ولـج
-قبـل لا تجاوبة كال هارون
::-بـوسة ثانية بداعت خالك سرحان
وكللها يــاروح هارون والسحارة وهـزراف
-هـو هم ما كال لا ورجع باسها وردد كلام هارون
ضحك هـود وحجه ويا
::-بـوسة ثالثة وكللها يــاروح هـود وصَـفد ورؤيا
رسـول: مـو تدللون اشبعها بوس اليـوم
-وكعـد يمها ويبوس براسها ووجها ويكرص بـ خدودها وهي تضحك وتضرب بـي بخفه لمـا زهكها وعاطت بـي
::-شبيييگ لزگت يمةةة؟! هو هيج كالو؟!
رسـول: غيـر أنتِ حلوة وانـي أبن الحلوة
جـوري: كوم يمه كوم اصعـد لـ مرتك وخل تسويلك كمادات
-انفجرنه مـن الضحك وهو كام مـن يمها عـود ضايج وكال
::-سهمج صَـوب گلبـي
-ضحكو عليه الولـد وبعدها كلنا تطشرنه لـ غرفنة
جان يصادف ثانـي يـوم جمعة لهل سبب بقينه سهرانين
-طلعت التشيريت الـي يحبه گلبـي لبسته ونمت بـ مكاني
حضنت نفســي وغمضت عيـوني، حسيت بعـد دقايق
لمسات حنينه علـى وجهـي وأجانـي صـوته
::-شبيها چمـرة أفادي
-ميلت راسـي علـى ايده الي احتضنت خـدي وجاوبته
::-مشتاقة
-حسيته طبـع بوسه علـى راسـي وهمس
::-هــذا التشيرت مالته؟!
آفـروز: امممم ما بقالي مـنه غيـر هـذا التشيرت والذكريات
الميــرزا: الله يرحمه ويجمعنه بـي بـ الأخـرة
آفـروز: آميـــن
-بقـى يمسد علـى راسـي فتـرة، فتحت عيوني وطلبت مـنه
::-عادي تقرالي قصيدة "روحـي"
مشتاقـة اسمعها بـ صوتگ
-استمـر بحركتة وصار يرددها بصوت حنين
::-روحـــي مشتاگـة وبعيــد الــدرب
روحـــي والينتظــر ليلـة صَــعب
روحـــي وأحبــابـي بـ ديار الغُـرب
-وختمنـه يومنه بـ ذكر الله وآيـه الكرسـي
مثل ما تعودنه هاي الأيام وبعدها نمنه
-ثانـي يوم المفروض جُـمعه والناس ترتاح
بـس احنه كعـدنه علـى هوسـه بين جـدي وعمامي
والـي فهمنا منهم جـدي ضايعلة ملف مهم يخص املاكـه
وهـو يحلف ويتكفـر يكول
::-البارحة بـ الليل انـي خليته بـ الغرفة وين راح؟!
أكثـم: قصـدك واحـد مـن هذا البيت اخذه؟!
جساس: لا دخل بيتنه ابو قيصر واخذه
ولك ملف بغرفتـي واختفـى اكييييد واحـد من البيت
جاسـر: واحنـه شنسوي بـ ملفاتك حجي
جساس: أذا ما طلع الملف البيت اهدمه علـى روسكم
وأنتـو بـ الذات أكثـم وجاسـر تعرفون شبـي الملف كلش زين
-دار وجهه وطلع مـن البيت، بقـى عمـي أكثـم يستغفر وعمـي جاسر يدردم ما عاجبة الوضع
::-يتهمنه عينك عينك
هـود: ما اتهمك يابة بس كلك انتَ تعرف أهمية هذا الملف
-صارو ملاطش عمـي جاسـر كل سالفة تصير ببيت العايش يرجع علـى تربيتنه ويكوم يحجي علينه ماعرف شبي ويانه بـ الضبط
-جنت واكفة علـى الدرج واباوع عليهم،
رفعت راسـي علـى الميــرزا مـن حسيت عليه واكف ويباوعلي، صعـدت لـ يمة ابتسم وكال
::-ليـش تلوثين مسامعج بـ هاي اللغوة مـن الصبـح
آفـروز: غيـر نعرف أخـر الأخبار
الميــرزا: وعرفتـي؟!
آفـروز: اي ملف مــن ملفات جـدك الــي تخـص امـلاكه مختفي وحسب الي فهمته هذا ورا بلاوي وتفلــس جـدك
-ابتسم وهز راسه، ضيگت عيـوني عليه وسألته
::-عنـدك مـو؟!
الميــرزا: "أنَ بَـعض الظِن أَثِـم"
آفـروز: لا صـدك؟!
الميــرزا: لا وعيـونچ مو عنـدي، بـس أعـرف وين
آفـروز: ويـن يعني غير عنـد ام عباس؟!
الميــرزا: اي بس الطرگاعة مـو هنا
آفـروز: چــاا ويـن؟!
-دنگ لـ مستواية وهمس
::-هـزراف هـي الـي اخـذت الملف مـن مكتب جدج
وانطته لـ هناء، بـس ليش عملت هيج هاي ماعندي علم بيها
-بقيت اباوعله مصـدومة واحـس مداتدخـل عقلـي
شلون هـزراف تسوي هيـج شـي؟! وليش خاضعه لـ هناء؟!
حسيته يلوح كدام وجهـي وكال
::-ويـن صفنتـي يطرگاعة
آفـروز: مصيبة اذا صدك ، أنتَ متأكد مـن كلامك؟!
الميــرزا: شفت بـ عيـونــي وحگ عيونــچ
-فرگت وجهــي بقوة واحـس راح اتخبـل
تصرفات هـزراف صعبت عليه افسـرها هل مرة
لزم ايـدي الميــرزا وكال
::-انــه شاگ بـ موضوع بـس اتأكد منه اكلج بـي
آفـروز: وضحلي لأن عقلي عَـلك
الميــرزا: شاگ بـ السبب الي يخلي هـزراف تتعاون ويه هناء
آفـروز: وشنـو هـو؟!
الميــرزا: بـ الليل اكلج بـي وارجـع اعيدلج كلامي لا تهلگين عقلج بـ التفگيـر يـ مُـهجة گليبـي
-هـزيت راسـي بـ أيجابية وحجيت ويا
::-راح اتعبك بـس تكدر تكعـد إيــلاف وتنزلون لـ بين ما اسوي ريوگ النـه؟!
الميــرزا: ياريت لـو كـل التعب منـج
-ابتسمت وهـو عافنـي وراح بـ اتجاه غرفة هارون لأن إيــلاف تبـقى يمة وانـي صحت ورا بضحكه
::-يمةةةة فدووووة لـ طولك
-ضحك بصـوت عالي وصاح
::-احتـرگت صفحتك جـدي
-نزلت للمطبـخ جان رسـول وعاتـگة كاعدين يتريكون وسـدرة تفتـر بـ المطبخ مدري شتسوي
::-صبـاح الخيـر
رسـول: صباح المشاكل واللعبان نفس
آفـروز: استقبلها بـ روح رياضية شسالفة سـوسـو
عاتـگة: رسـول مـو سـوسـو
-انداريت عليها مستغربة، ورسـول فاتح حلكه ويباوعلها
ابتسمت مجاملة بـ وجهـي وكالت
::-ياريت يعنـي ما تكلوله سـوسـو
-بقيت ساكتة وعيني عليها، هزيت راسـي بـ أيجابية
ودرت وجهـي اريد اكمل شغلــي وهـي كملت كلامها
::-لا تضوجين بـس احـس مخربين اسمه
ليـش اللقب الي ما اله داعـي وهو اسمه كلش حلو؟!
رسـول: هاي الأسماء بيناتنه وكلشـي عادي بين الحبايب
-انداريت عليهم مـن صارت تحجي بنعوصه
::-اضـوج مـن يكلولك هيـج رسـول
-تقرب ماعـرف شهمس بـ اذنها وهي ابتسمت وسكتت
رفعت عينها عليه وانـي ابتسمت لابتسامتها وحجت وياها
::-تدللين زوجة سوستـي الوگحــة
-سـدرة ضحكت وعاتـگة بقت فاتحه عيونها وحلكها عليها
صاح رسـول بضحكه
::-لاااا هناااا نتخاااارب
-ما جاوبتة وكملت الـي بـ ايدي لـما نزل الميــرزا وإيــلاف
كعـد يمهم وكال الميــرزا لـ رسـول
::-هــاا ابو سرحان
-بس حجاها انفجرنه مـن الضحك انـي وسـدرة ورسـول وهو بقـى صافن علينه وعاتـگة عيونها صارن بـ كصتها
::-شنـوو ابــو سرحاااان عفية؟!
الميــرزا: وسفة عليج ماتعرفين ابو سرحان؟!
عاتـگة: اعـرف خالكم اسمه سرحان بـس ليش تكولون لـ رسـول ابو سرحان مو حلو
الميــرزا: إذا الله رزقكم بـ ولد راح يصير اسمه سرحان
عاتـگة: اييييععع لاااا مستحيل
الميــرزا: القاضي راضي يبـعد اخـوج
عاتـگة: بـس هو هم ابنـي وانـي احق بـ تسميته
الميــرزا: بيت العايش همـج ماعدهم هاي السوالف
-بقت ساكتة ماتعرف شتجاوبة وتباوع لـ رسـول
غمزلها بضحكه وكال
::-ماعليج عود نجيب بنيه
سـدرة: ويصير اسمها فوزية
عاتـگة: ليـش؟!
سـدرة: علـى اسم بيبي الله يرحمها
عاتـگة: وليـش إلا اطفالنه تردون تسموهم هيـج؟!
أذا عاجبج الأسم روحي تزوجي وسمي بنتج
-اتنرفزت وصارت تنتر بـ الحجي، حجه ويا رسـول بحدة
::-عاااااتـگة؟!
-اندارت عليه كازة علـى اسنانها بـس تريد تنفجـر، ورسـول كمل كلامه بـهدوء
::-فرقــي بـين الشقة والصـدگ
-هـزت راسها وسكتت ضايجة، مـن طلع رسـول هـي هم كامت طلعت مـن المطبخ وصعدت لـ غرفتها، تركينه انـي والميــرزا وهارون هم اجه ويانه وسـدرة
-طلعـو الولـد وانـي بقيت اعزل المطبـخ وية سـدرة، شالت مواعين الريوك وكالت
::-احـس لو احـد يحجي ويه عاتـگة يكون أفضل
آفـروز: بـ خصوص؟!
سـدرة: هاي صار أسبـوع هـي هنا واتوقع مو غريبة
عاشت ويانه سنه قبل يعنـي تعودت علينه
بـس هي ماخذه دور لـ عروس لـ هسه تاكل وترجع لورة
انـي ما متعاجـزة مـن غسل هل ماعونين بـس راح تتعـود
آفـروز: كولـي لـ عمتـي جـوري هي تحجي وياها
سـدرة: حجيت وكالت عوفيها هسه
آفـروز: چــاا عوفيها
-هزت راسها وسكتت، انـي وسـدرة صـح نحجي وصـح تحاول تتقرب منـي بـس انـي ماكدر انـدمج وياها، احـس نفسـي بعـدني مقهـورة منها
-مـر اليـوم طبيعي ماكو شـي جديد
خلصته بين أهتمامي بـ الميــرزا وإيــلاف وشغل ودراسه
وكلها بجهه وهـزراف وحدها بجهه، طلع شعر علـى لساني ومدافـهم شبيها
-بـ الليل بعـد العشة صارت هوسـه ثانية بين جدي وعمامي
وهم تطشرو كلمـن لـ مكان، الولـد طلعو كلهم وانـي اخـذت إيـلاف وصعدت يم هـزراف واتصلنه علـى يُـسر بـس جانت مو علـى بعضها احـس بيها شـي غريب
-هـزراف جانت طبيعية وتضحك وتلعب وية إيــلاف
بـس مـن يوصل الموضوع لـ هناء تتنرفز وما تجاوب اي شي
وسويت مثـل ما كال هـود ماشيتها بكلشـي تريدة
-مرت فتـرة وانـدگت الباب وصاح هارون
::-إلياااااف گلبــي
-راحت إيــلاف تركض فتحت الباب وطلعت علـى هارون
كمت مكنبـص كدامها وهي حاضنه راسه وتبوس بي
::-مـن إيــلاف صارت إلياااف؟!
هارون: ماعليج بينه
آفـروز: جيب بنتنه جيبها
-ردت اسحبها مـنه بـسرعه شالها بـ حضنها وطفـر لـ غرفته
::-تخسيييييين تفرقينه
-ضحكت مـن شفت تعلقه بيها وهي هم، حتـى مرة مـن المرات سمعتها تبجـي ومـن رحت لـ غرفته اسمها تريد امها وهو مخلي منشفه علـى راسه متحجب ويحجي وياها
::-شوفـي ليــلافي انـي ماما بس عنـدي شوارب
-بوقتها مادري اضحك عليه لو انقهر عليها
بـس كدر يقنعها ويسكتها وهيـج مرت الأيام
بين مشاكل وبين هدوء وبين دوامات ومشاغيل
-بـ الليل سبحت ورجعت لـ غرفتـي،
جنت كاعدة اشسور شعـري وافتحت الباب
دخـل الميــرزا بـس واضح عليه تعبان، سد الباب
وسنــد ظهـره عليها ويباوعلي، عگدت حاجبـي وسألته
::-شبيـك؟!
الميــرزا: شنـو المابيـه انــه؟!
-گمت مـن مكانـي تقربت منه وسألته بـ قلق
::-ليـش تحجي هيج شصاير؟!
-سحبنـي عليه بـهدوء وكفنـي بـين رجليه وبقـى يمسد علـى خـدي بـهدوء ردت ابتعـد بـس ما سمحلــي وهمـس
::-لا تسويـن هيـج
آفـروز: شتريد أصـفاد؟!
الميــرزا: حـضن مـنج يعـوف بـ هدومـي عطـر
-ابتسمت وابعـدت نظراتـي عنه،
رفـع ادية خلانـي احاوط رگبتـه وشالنـي بـ حضنه
حاضنــي بقـوة لـ درجة انوجعت وهمست بـ أذنه
::-بـ الهداوة أصـفادي
-حسيته شدد حضنته اكثـر وجاوبني بـهمس
::-مشتاگلــج يـا تالــي هلــي
-بقـى حاضنـي لـ فتـرة طويلة كـل ما اكول راح يتعب وينزلني تزيد حضنته اقوى، نزلنـي بـعد فتـرة وبقـى يمسـد علـى وجهـي بـ كفوف ادية ويرجع بـ شعري
::-احـب طولــي ويه طولــج
آفـروز: وانـي احـب لهفتك عليه
-ابتسم وكال
::-چــاا تعالي نتعارك مشتاگ لـ عركاتنه
-ضحكت بصوت عالي وهـو دفعني بخفه وكال بضحكه
::-اششش ولِــج احنه بـ بيت العايش
آفـروز: عادي متعودين علـى صوتـي
-مشاني وياه كعـدنه علـى جرباية وكال
::-قبـل ويه اخوتـج او اخواتج عادي محـد يحجي
بس هسه لأن ويايه راح يستشرفون براسنه
آفـروز: هسـه عـوف بيت العايش والعرگة شنو رأيك اركصلك؟!
الميــرزا: هههههه شعلتـي شيب اهلي بـ الركص
آفـروز: شبيك غير واجبـي اعدل نفسيتك
الميــرزا: چــاا هي بـ الركص؟!
آفـروز: اكو احلـى منه؟!
-هـز راسـه رافض وانـي بقيت الح والح والح لـما طفرت روحه، كومنـي مـن ايدي وكفنـي علـى حيـلي وكال
::-يـلا اركصــي
آفـروز: تحجي صـدك؟!
الميــرزا: مشاقي وياج قبل؟! مو تردين تركصين يلا
-دفعته ورجعت كعدت بـ مكانـي
::-كشفتك علـى حقيقتك لأن جنت اختبـر ايمانك
الميــرزا: انــه صرت ملحد من هاي اللحظه، كومي اركصي يلا
-رجـع كومنـي وينتر بيه مـن ملابسـي
دفعت ايدة بـقوة ونترت بـي
::-شبيييك انت؟! ليش هيج تفنفن بيه؟!
الميــرزا: يلا طرگاعتـي هـزي خلي اشوف
-سويت حركه السلطانه هيام مـن تركص للسلطان
ترفع الايد الاولى وترفع الثانية وتميـل بخصرها
هـو مـن شافنـي هيـج كعـد بـ الكاع منفجر مـن الضحك
كعـدت كدامه مبتسمه وعيني علـى تفاحه آدم الي برزت
بشكل كلش حلو وتجذب النظـر، دفعته بخفه
::-بـ الهداوة احنـه بـ بيت العايش
-بقـى يضحك ويمسح بوجهه ويهمس
::-أستغفر الله ربـي
آفـروز: بـ حركه وحـده غيرت نفسيتك
-سنـد ادية علـى رجلية ورفع راسـه يباوعلي وكال
::-طـرگاعة أنتِ
آفـروز: مو كلنه احلـى طـرگاعة گلاس گلاس
-سحب ادية بين كفوف ادية وشمهن بقوة
بعدها طبع بـوسه علـى كُـل جهه وكال
::-هـــاي الســاعات الــي اگضيها ويــاج
والهيلكة وسوالفج وضحكتج تسوة الدنيا عنـدي
آفـروز: وركصـي ما يسوة الدنيا؟!
الميــرزا: هههههه وسفة عليج
-ضحكت ودفعت وجهه بـ ايــدي
وبقينه سهرانين بيـن ضحك وشقة ومناكر ومعارك
بعـدها دالعب بـ شعـرة وشفت شيباية
::-يااااا طلعت مشيب
الميــرزا: وينه؟!
آفـروز: هاي عنـدك وحـده
الميــرزا: هـذا شيب شباب
آفـروز: انـي هم عنـدي 3 بـمقدمة شعـري
-ابتسم وسحب خلصه مـن مقدمه شعري وكال
::-هـذا ورد مو شيب
آفـروز: راح اشمرك مـن السطح أصـفاااااد
الميــرزا: هههههه وانــه هم وحـق رب الحـق
آفـروز: تريد تخلص منـي؟!
-دفعنـي بخفه منومنـي علـى مخدة وكال
::-نامـي ما يلوكلج النـكد
آفـروز: ما يلوكلي لـو ما تتحملنـي؟!
الميــرزا: ما يلوك لـ غيرج برغوثتـي
-ابتسمت وسكتت وهو كام طفى الأضوية واجه لـ مكانه
اشرلي اروحله فاتحلي اديه وكال
::-تعالـي لـ بيتج يبـعد بيتـي
-كزكزت عليه وعلـى كلامه، تقربت نمت علـى ايده
وعضيتة مـن ذراعه بقوة وها صاح متوجع
::-اخخخ ولِـج هو هيج؟!
آفـروز: هـذا مصير الناس الي تتلاطف ويايه
الميــرزا: هسه ندري مشاعرج معوقة بـس مو هـيج
آفـروز: اششش يلا نام
-غمضت عيوني مغلسه عليه وهو يتحرش ويحجي
يريدنــي احجي بس ما تجاوبت ويا لأن عنـده أستعداد يبقـى للصبـح مناكــر ويايه
-ثانـي يوم الصبـح الميــرزا طلع بـ شغل
وانــي نزلت جوة لكيت الاغلبية متجمعين علـى الريوك
تقربت بست راس جدي وكعدت يمه ابتسم وكال
::-شلونها خيـزرانه جدها
آفروز: دام صبحت عليك اكيد بـ خير
-ابتسم وسكت، رفعت راسـي علـى عمتـي هناء وسألتها
::-عمة هناء ويـن هـود؟!
هناء: بعـدة نايم ليييش؟!
آفـروز: سلامتج ماكو شـي
-عوجت حلكها ودارت وجها عنـي، ابتسمت وانـي ادنك راسـي اباوع للاكل ورجعت احجي وياها
::-عمة هناء البارحة حلمت بيج
-الجو هدوء بس صوت طكطكه الملاعق والمواعين ينسمع رفعت راسي كلها جانت تباوعلي، سألتنـي مـن ورة خشمها
::-بـ خيــر لو شـــر
آفروز: شـفتج بـ غرفة جدو جساس
-جـمدت ملامحها ودارت عيونها ع جدي ورجعت باوعتلي ضحكت مرتبكة وسألتني
::-شنـو مـن حلم هـذا؟!
آفروز: مادري شنـو جنتي ادورين ومن دخلت وراج وسألتج عمة هناء شدا دورين؟! كلتي دادور حـقي!!
-وجها صار ينطي الوان، بقيت اباوعلها واني مبتسمه كال جدي
::-اي هناء يا حـق هذا؟!
-جاوبتة بـمتمتة وخوف
::-حقيش عمي هو حلم
آفروز: وكلتي لو اعرف اقتل جساس هم راح اخذ حقي ومن سألتج عمة يا حق صحتي بيه بـ عصبية
"حـقنة الي راح ببطن جدج"
-تـحمحمت عمتـي جـوري وكالت
::-عمه آفروز يمكن جنتي مصخنه البارحه وهيج حلمتي
-توسعت ابتسامتي ع شكل هناء رفعت اكتافي ورجعت اكل وجاوبتها بـ هدوء
::-مادري يـمكن
-اخذ نفس عميق جدي وحجة بنبرة هادئه بس مبطنه بـ تهديد وغضب
::-كل شخص بـ هل بيت ماخذ حقة وزايد محد عنده شي يمي واذا اكو غير هل حجي كولو حتى اتصرف غير تصرف
هناء: لا لا عمي مامقصر ولا اكو هيج حجي
جـوري: حشاك مـن التقصير عمي
-هـز راسه وكمل اكل وهناء اترخصت وكامت من يمنه
وخلصت الصبحية نفـس الروتين ماكو شـي جديد
-كاعديـن انـي وهـزراف نـدرس وشتت انتباهي تلفوني
جان اتصال مـن امي ليلى، ابتسمت وجاوبتها بسرعه
::-هـلا أميمتـي حبيبتي
-اختفت ابتسامتـي وجمـد الـدم بـ عروگـي مـن سمعت
صوت بكائها العالــي وتحجي مفرفحة
::-ولِـج يمة فدوة اروحلج الحكينــي
أخيتـج راح تـــروح مــن ايــدي
َ◄يتبـــــع.......
▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫
َ
َ
◄التصويت يا عباد الله 💔
وتعليق حلو مثل عيونكم
◄التنزيل بين يوم ويوم 💚
◄تابعــو حسـابـي ع الأنستــا [ itsara.kh ]
قناة التلي itsara105