အခန်း(၅၅) မစ်ရှင်အောင်ပြီ
သူတို့ ကျင်းကျိုးမြို့သို့ ပြန်လာသောအခါ ၂၀၁၀ ခုနှစ်က လျင်မြန်စွာ ချဥ်းကပ်လာခဲ့ပါပြီ။
ကုမ္ပဏီထဲတွင် အရာရာ အဆင်ပြေနေပြီး လစာနှင့် ငှားရမ်းခများကို စနစ်ရန်ပုံငွေသုံးကာ အချိန်မီပေးဆောင်နိုင်ပြီး အသုံးစရိတ်အားလုံးကို ကာမိခဲ့ပါသည်။ ဂိမ်းက မအောင်မြင်ဘဲ ပိုက်ဆံအားလုံးကို ဖြုန်းလိုက်နိုင်ပါက ဖေးချမ့် သူ့ ယွမ် ၅၀၀,၀၀၀ ကို အလွယ်လေး ရနိုင်ပါလိမ့်မည်။
ကျောင်းစာမေးပွဲ ဖြေဖို့ရက်သတ္တပတ်လည်း ဖြစ်သည်။ ဖေးချမ့်က ဘယ်ဘာသာမှ စာမေးပွဲ မကျချင်သဖြင့် ကုမ္ပဏီကို မသွားသလောက် ရှားပါသည်။
ဘာပဲဖြစ်ဖြစ် ဂိမ်း၏ ရလဒ်ကိုလည်း သူသိပ်ပြီး စိတ်ထဲမထားပေ။ ကျရှုံးလျှင် အကောင်းဆုံးဖြစ်ပါလိမ့်မည်။
ဇန်နဝါရီလ ၇ ရက်နေ့၊ ကြသပတေးနေ့
စနစ်၏ ငွေစာရင်းရှင်းချိန်က နီးလာပြီး ဖေးချမ့်၏ ပိုက်ဆံဆုံးရှုံးလိုသော ပန်းတိုင်က ပစ်မှတ်ကို ထိနေပါပြီ။ ထို့ကြောင့် နောက်ဆုံးတော့ သူစိတ်အေးခဲ့ရပြီ။
စနစ်ကို သူဆင့်ခေါ်လိုက်ပြီး စနစ်ရန်ပုံငွေကို စစ်ဆေးကြည့်လိုက်ပါသည်။
[ စည်းစိမ်အလဲအထပ်စနစ် ]
[ ပိုင်ရှင် : ဖေးချမ့် ]
[ အမြတ်ငွေ အလဲအထပ် အချိုး : ၁၀၀ : ၁၊ အရှုံးငွေ အလဲအထပ် အချိုး ၁ : ၁ ]
[ နောက်ထပ် ငွေစာရင်းရှင်းချိန် : ၂၅ ရက်အလို ]
[ စနစ်ရန်ပုံငွေ : ၁၃၈,၇၅၄.၅(⬇️၃၆၁,၂၄၅.၅) ]
[ ကိုယ်ပိုင် စည်းစိမ် : ၁,၂၅၅ ]
သူလုပ်နိုင်ခဲ့ပြီ။
သူ့ပိုက်ဆံတွေ နောက်ဆုံးတော့ အပြောင် သုံးနိုင်တော့မည်။
ဖေးချမ့်က ငိုချင်သွားလောက်သည့်အထိ ပျော်ရွှင်သွားပါသည်။ သူကြိုးစားပမ်းစား အလုပ်လုပ်ခဲ့ရပြီးနောက် အမြတ်ငွေ အများစုကို အရှုံးငွေအဖြစ် ပြောင်းလဲနိုင်ခဲ့လေပြီ။
လောလောဆယ် ထန်းတာ့ဘက်တွင် ကုန်ကျစရိတ် အကြီးစား တချို့ရှိ၏။ ရုံးနေရာ ငှားရမ်းခ၊ ဝန်ထမ်းလစာ၊ အချိန်ပို လစာ၊ မီတာခ၊ နေ့စဥ်အသုံးစရိတ်နှင့် ကုမ္ပဏီ ပစ္စည်းမျိုးစုံ ဝယ်ယူခြင်း စသည်တို့ ဖြစ်သည်။ မကြာခဏဆိုသလို ငွေဖြုန်းတီးဖို့အတွက် ကုမ္ပဏီ ညစာစားပွဲတချို့ပင် ကျင်းပတတ်ပါသေးသည်။
ဒီလိုတွေလုပ်ရင်း နောက်ဆုံးတော့ တစ္ဆေစစ်သူကြီးမှ ရလိုက်သည့် ပိုက်ဆံအများစုကို သုံးနိုင်ခဲ့ပြီး စနစ်ရန်ပုံငွေကလည်း အမြတ်ငွေ များများစားစား မကျန်တော့ပါ။
လက်ရှိ စနစ်ရန်ပုံငွေအခြေအနေမှာ စဦး ၅၀၀,၀၀၀ နှင့်ယှဥ်ကြည့်လျှင် အရှုံးပေါ်နေသည်ဟု သတ်မှတ်နိုင်သည်။
နောက်တစ်ခုက ဖေးချမ့်သည် အချက်နှစ်ချက်ကို သေချာအောင် လုပ်ရမည်။
ငွေစာရင်းမရှင်းမီ တစ်ပတ်လိုအလိုတွင် မကြေညာထားသည့် ဘာထုတ်ကုန်မှ မရှိရဘူး ဟူသော စနစ်၏ သတ်မှတ်ချက်ကို ပြည့်မီရန်အတွက် သူသမုဒ္ဒရာရဲတိုက်ကို အွန်လိုင်းပေါ်သို့ တင်ရမည်။
နောက်တစ်ခုက ကျန်ငွေပမာဏ လုံးဝ ပြောင်သွားအောင် ငွေများကို လျှောက်သုံးပစ်ရမည်။
ထို့နောက် ငွေစာရင်းရှင်းမည့်အချိန်ကိုသာ စောင့်နေဖို့ လိုပါတော့သည်။
သမုဒ္ဒရာရဲတိုက်ကို ဘယ်လို မားကတ်တင်း ဆင်းရမလဲဆိုတာကတော့...
ဖေးချမ့်က မားကတ်တင်းဆင်းဖို့ အစီအစဥ်လုံးဝ မရှိပါ။ တရားဝင်ဂိမ်းပလက်ဖောင်းတွင် ဂိမ်းကို တင်ပြီးခါမှ လုပ်ဖို့ စီစဥ်ထားသည်။ တကယ်တော့ ဘယ်သူမှ မတွေ့ရင် အကောင်းဆုံးဖြစ်သည်။
သူတို့က ပိုက်ဆံအရှုံးပေါ်ချင်တာဆိုတော့ ဂိမ်မာတွေ ဂိမ်းကိုမတွေ့အောင် တာားဆီးရပါမည်။
"စိတ်ချရအောင် ဂိမ်းလုပ်ပြီးတဲ့အခါ ဝန်ထမ်း ပေါင်းစည်းပွဲတစ်ခုလောက် ကျင်းပသင့်တယ်။ ဒါမှ ကျန်တဲ့ပိုက်ဆံတွေ ဖြုန်းလို့ရမှာ။ နည်းနည်းလေး ကျန်လေလေ ကောင်းလေလေပဲ"
"အားလုံးက ဂိမ်းအတွက် ကြိုးစားပမ်းစား လုပ်ပေးခဲ့ကြတာဆိုတော့ ကုမ္ပဏီတစ်ခုလုံး ရုပ်ရှင်သွားကြည့်ဖို့၊ ညစာအတူတူစားကြဖို့၊ ကာရာအိုကေ ဆိုကြဖို့ စီစဥ်ပေးရင် မလွန်လောက်ဘူး ထင်တာပဲ"
ထိုသို့ စဥ်းစားပြီး ဖေးချမ့်က လက်ထောက်ရှင်းကို ဖုန်းဆက်လိုက်ပါသည်။
"လက်ထောက်ရှင်း ကျေးဇူးပြုပြီး သောကြာနေ့မှာ ဝန်ထမ်းပေါင်းစည်းပွဲ လုပ်ဖို့ လိုအပ်တဲ့စီစဥ်မှုတွေ လုပ်လိုက်ပါ။ သမုဒ္ဒရာရဲတိုက်ဂိမ်း ပြီးမြောက်မှုကို အောင်ပွဲခံဖို့လေ။ ကျွန်တော်တို့ ရုပ်ရှင်အရင်ကြည့်ကြမယ်။ ပြီးရင် စားသောက်ကြပြီး ကာရာအိုကေ ဆိုကြမယ်။ ကျွန်တော်တို့ ဘိုကင်တင်လို့ရတဲ့ နေရာတွေမှာ တင်လိုက်တော့"
"ဟုတ်ကဲ့ ရက်စွဲက ပြဿနာမရှိပါဘူး။ သောကြာနေ့ ညနေ"
"စနေနေ့နဲ့ တနင်္ဂနွေနေ့တွေက အနားယူတဲ့ နေ့တွေဆိုတော့ အနားယူတဲ့နေ့တွေကို သုံးပြီး ဝန်ထမ်းပေါင်းစည်းပွဲ လုပ်လို့ ဘယ်ဖြစ်မလဲ။ ညစ်ပတ်ရာကျသွားမှာပေါ့"
"ဟုတ်တယ် သောကြာနေ့ ညနေပဲ သတ်မှတ်လိုက်ပါ"
"ဟုတ်ပြီ ခင်ဗျား စီစဥ်ပြီးရင် အချိန်ဇယားကို ပို့ပေးလိုက်ပါ။ လိုအပ်ချက်ကတော့ အတူတူပဲ။ အားလုံး အဆင့်မြင့်မြင့်တွေပဲ ဖြစ်ရမယ်နော် နားလည်ပြီလား"
ဖေးချမ့်က ရိုးရှင်းသည့် ညွှန်ကြားမှုတချို့ ပေးပြီး ဖုန်းချဖို့ ပြင်လိုက်ပါသည်။ သို့သော် လက်ထောက်ရှင်းက ဆက်ပြော၏။
"ကျေးဇူးပြုပြီး ကိုင်ထားပါဦး ဘော့စ်ဖေး တစ်ခုခု ပြောစရာရှိသေးလို့ပါ"
"ကျွန်မတို့ ကွမ်ကျိုးက ဆန်းစထရိုက်ခ် စတူဒီယိုကို သွားတုန်းက ဘော့စ်ဖေးကို စကားပြောခဲ့တဲ့ ကောင်မလေးကို မှတ်မိလား။ သူ့နာမည်က လင်းဝမ်လေ"
လင်းဝမ် ဟုတ်လား။
ဖေးချမ့်သည် မသဲမကွဲတော့ မှတ်မိနေသည်။
"သူက ဘာဖြစ်လို့လဲ"
"သူက အခုကျင်းကျိုးမြို့မှာ ရောက်နေပြီ။ ကျွန်မတို့ ကုမ္ပဏီထဲ ဝင်ချင်တယ်လို့ ပြောနေတယ်။ သူက တော်တော်လေးကို ပြတ်သားပြီး လစာမပေးရင်တောင် ရတယ်လို့ ပြောနေပါတယ်"
ဖေးချမ့် ကြက်သေသေသွား၏။ "ဟင် သူအခု ဘယ်မှာလဲ"
"ရုံးခန်းထဲမှာပါ။ သိပ်မကြာသေးခင်က ရောက်လာပြီး ကျွန်မနဲ့ စကားပြောနေပါတယ်"
'သူက ဆန်းစထရိုက်ခ် စတူဒီယိုမှာ အဆင်ပြေနေတာပဲ မဟုတ်ဘူးလား။ ဘာလို့ ကျင်းကျိုးကို ရောက်လာတာလဲ'
'ငါတို့ ကုမ္ပဏီကို လစာမပေးရင်တောင် ဝင်ချင်တယ် ဟုတ်လား'
'ဘယ်လိုလုပ် ဖြစ်နိုင်မှာလဲ'
ဖေးချမ့်က ခေတ္တစဥ်းစားချင့်ချိန်ကြည့်လိုက်ပြီး မေးလိုက်ပါသည်။ "လက်ထောက်ရှင်း သူ့ကို ဘယ်လိုသဘောရလဲ"
ရှင်းဟိုက်လူက ခေတ္တ တိတ်ဆိတ်သွားပြီး အတည်ပေါက် ပြန်ဖြေလိုက်ပါသည်။
"ဘော့စ်ဖေး သူက အားကောင်းတဲ့ နောက်ခံက လာတာဖြစ်မယ်ထင်တယ်။ သူက သူဌေးမိသားစု တစ်စုရဲ့ ကလေးဖြစ်နိုင်တယ်။ သူ့ရဲ့ အဝတ်အစားတွေနဲ့ အိတ်တွေက အကုန်လုံး နာမည်ကြီး ဒီဇိုင်နာ ဘရန်းတွေချည်းပဲဆိုတာ ကျွန်မ သတိထားမိပါတယ်။ သူ့ရဲ့ဝတ်စုံကလည်း အနည်းဆုံ ယွမ် သောင်းချီပြီး တန်တယ်"
"ဒါပေမဲ့ ဝံ့ကြွားမှုမရှိဘဲ စရိုက်လက္ခဏာလည်း ကောင်းမွန်တယ်။ ရိုးအပြီးတုံးလွန်းလို့ သူ့ကို ဝန်ထမ်းကောင်း တစ်ယောက် ဖြစ်စေတဲ့အချက်တွေကို နားမလည်နိုင်မှာကိုပဲ စိတ်ပူမိပါတယ်။ ဒါပေမဲ့ ဟုတ်ပါတယ်။ သူ့ကို လက်ခံသင့် မခံသင့်က ဘော့စ်ဖေးပဲ ဆုံးဖြတ်ရမှာပါ"
'ရိုးအပြီး တုံးတယ်ဟုတ်လား'
'အဲဒါဆို အလုပ်အစွမ်းအစ မရှိဘူးဆိုတဲ့ သဘောလား'
'ကောင်းတာပေါ့ ငါလည်း အဲ့လိုဝန်ထမ်းမျိုးမှ သဘောကျတာ'
ဖေးချမ့်က သူ့ဝန်ထမ်းခေါ်ယူစံနှုန်းတိုင်းကို လင်းဝမ် ပြည့်မီသည်ဟု ခံစားမိပါသည်။
ပြည့်စုံတဲ့မိသားစု တစ်ခုမှ ဘာအပူအပင်မှ မရှိသည့် ကလေးတစ်ယောက်က အလုပ်လုပ်ရာမှာ သိပ်မတော်နိုင်ဘူး။ အဲဒါဆို မကောင်းဘူးလား။
"ဟုတ်ပြီ ဒါဆို သူ့ကို ခန့်မယ်လေ လစာကတော့... တစ်လ ၄,၀၀၀ နဲ့စပြီး နောက်ပိုင်းမှ ထပ်တိုးပေးမယ်။ သူနဲ့ ဝန်ထမ်းစာချုပ်ချုပ်ပေးပါ။ အလုပ်ကတော့... အင်း လောလောဆယ်တော့ ဘာအလုပ်မှ သိပ်မရှိသေးတာမို့လို့ သူ့ကို ဘာတာဝန်မှ မပေးသေးနဲ့ဦး။ သူလုပ်ချင်တာသာ လုပ်ခိုင်းလိုက်။ သြော် ဟုတ်သားပဲ။ သူ့ကိုလည်း သောကြာနေ့ ဝန်ထမ်းပေါင်းစည်းပွဲမှာ ထည့်လိုက်နော်"
ဖေးချမ့်က အသေးစိတ်ညွှန်ကြားလိုက်ပြီး ကျန်တာ ဘာမှ စိတ်မပူတော့ပါ။ ထို့နောက် သူ့ ၅၀၀,၀၀၀ အတွက် စိတ်ကူး ဆက်ယဥ်လေတော့သည်။
...
ကုမ္ပဏီတွင် သမုဒ္ဒရာရဲတိုက်၏ ဖန်တီးမှုမှာ နောက်ဆုံးအဆင့်ကို ရောက်နေပါပြီ။
ပေါင်ရှုက ကွမ်ကျိုးသို့ မလိုက်သွားခဲ့သဖြင့် သမုဒ္ဒရာရဲတိုက်၏ ဇာတ်လမ်းကို ပြန်ကြည့်ရှုရင်း နေ့ရက်များကို ကုန်ဆုံးခဲ့သည်။ အပိုင်းတိုင်းကို မှတ်တမ်းတင်ပြီး ကစားရခက်သည့် အပိုင်းများကို ဟွမ်းစစ်ပေါ် ပြုပြင်နိုင်ရန် မှတ်တမ်းတင်ခဲ့သည်။
သူက ဂိမ်းဒီဇိုင်းအကြောင်း နက်နက်ရှိုင်းရှိုင်း နားလည်သူမဟုတ်ပေ။ သူ့ကံကိုသာ သူယုံကြည်ရင်း လုပ်ခဲ့ခြင်းဖြစ်သည်။
သူ့ကံက ညွှန်ပြသည့် အရာတိုင်းကို ဟွမ်းစစ်ပေါ်အတွက် မှတ်တမ်းတင်ထားသည်။
ဟွမ်းစစ်ပေါ်က ပြဿနာက ဘယ်မှာလဲဆိုတာကို နားလည်ဖို့ ဦးနှောက်စားရသူဖြစ်ပြီး တစ်နည်းနည်းနဲ့ တကယ်ပဲ ပြုပြင်နိုင်ခဲ့ပါသည်။
သူ့ရင်ထဲမှာတော့ ဇာတ်လမ်းက သမုဒ္ဒရာရဲတိုက်အတွက် အလွန်အရေပါသော ကဏ္ဍဖြစ်ပြီး ထူးခြားသော ဂိမ်းတစ်ခုဖြစ်လာစေဖို့ အချက်အချာကျတာကို ဟွမ်းစစ်ပေါ်သိပါသည်။ ထို့ကြောင့်လည်း ကြိုးစားပြီး ပြီးပြည့်စုံအောင် ဖန်တီးနေခြင်းဖြစ်သည်။
သို့သော်လည်း လက်တိကျမှု၊ ဂိမ်းမော်ဒယ်၊ လှုပ်ရှားမှုနှင့် တခြား Mode များကလည်း ဂိမ်မာများကို ရသပေးစွမ်းနိုင်မှုကို အဆုံးအဖြတ် ပေးသဖြင့် ထိုနည်းလည်းကောင်း အရေးပါပါသည်။
ထို content အားလုံးကို ပေါင်ရှုကပဲ စစ်ဆေးပေး၏။ သူ အစကတည်းက ဂိမ်မာ အကြီးစားတစ်ယောက်ဖြစ်ပြီး ပြောင်းလဲ သွားသည့် တစ်ခုတည်းသောအရာက သူများဂိမ်းများထက် သူတို့၏ ကိုယ်ပိုင်ဂိမ်းကို ကစားရခြင်းကြောင့် ဖြစ်သည်။
ဒီအလုပ်ကို ပင်ပန်းသည်ဟု မခံစားမိပေ။ ထိုအစား သူသဘောကျမိသည်။
တခြားဂိမ်းတွေကို ကစားသောအခါ သူသဘောမကျသည့် အပိုင်းရောက်လာလျှင် ပေါင်ရှုက စိတ်ပျက်ခဲ့ရသည်။
အဘယ့်ကြောင့်ဆိုသော် သူဝေဖန်ချက်တစ်ခု ပေးပို့လိုက်လျှင်တောင် ဂိမ်းဖန်တီးအဖွဲ့ဆီ မရောက်နိုင်လောက်သဖြင့် အချိန်ဖြုန်းရာ ကျပါလိမ့်မည်။ ရောက်ခဲ့လျှင်တောင် အများစုက မပြောင်းလဲနိုင်ချေ။
သို့သော်လည်း သမုဒ္ဒရာရဲတိုက်ကတော့ ခြားနား၏။ သူပြဿနာတစ်ခုခုတွေ့ခဲ့လျှင် ဟွမ်းစစ်ပေါ်ကို ပြောပြလိုက်ပြီး အလျင်အမြန် ပြောင်းလဲနိုင်သည်။
ပြောင်းလဲမှု ကြီးကြီးမားမား အများစုက ပရောဂျက်၏ အစတွင် လုပ်ရသည်။ ကျန်နေတာတွေက သေနတ်လမ်းကြောင်းနှင့် ဇာတ်ကောင် ပစ်မှတ် စသဖြင့် သေးငယ်သော အသေးစိတ်များသာ ဖြစ်သည်။ ၎င်းတို့က ဂိမ်းရသအတွက် အရေးပါသော်လည်း တန်ဖိုးများကို အနည်းငယ် ပြောင်းလဲလိုက်ရုံနှင့် အလွယ်လေး ပြောင်းလဲနိုင်သည်။
Deadline နီးကပ်လာသောအခါ ဟွမ်းစစ်ပေါ် စိတ်အေးစွာ သက်ပြင်းချမိသည်။
သူ့မစ်ရှင်ကို အောင်မြင်ခဲ့ပါပြီ။
သမုဒ္ဒရာရဲတိုက်၏ ဖန်တီးမှုက အရည်အသွေး ပြည့်မီစွာ အချိန်မီ ပြီးမြောက်နိုင်သည်။ ဘော့စ်ဖေး၏ ယုံကြည်မှုကို သူစိတ်မပျက်စေခဲ့ပေ။
သို့သော်လည်း သူတို့ ဂိမ်းကို ဘယ်လို မားကတ်တင်း ဆင်းပြီး ဘယ်လို သတင်းဖြန့်ရမလဲ ဟွမ်းစစ်ပေါ် ဘာမှမသိပေ။
ထိုဆုံးဖြတ်ချက်များက ဘော့စ်ဖေး၏ တာဝန်သာ ဖြစ်သဖြင့် သိပ်ပြီးလည်း စိတ်ထဲမထားမိချေ။
ဘော့စ်ဖေးရဲ့ အစီအစဥ်မှာ အမှားအယွင်း ရှိနိုင်ပါ့မလား။
တစ္ဆေစစ်သူကြီးကို ဝေ့ပေါ်ကနေတောင် ကြော်ငြာဖို့ စဥ်းစားခဲ့သည့်လူက သေချာပေါက် ထူးခြားသည့် မားကတ်တင်းနည်းလမ်းကို စဥ်းစားမိပါလိမ့်မည်။
အခန်း(၅၆) ဘော့စ်ဖေးရဲ့ကြိုးစားမှု အသီးအပွင့်များ
လင်းဝမ်က ဧည့်သည်အခန်းထဲတွင် ထိုင်နေပြီး လက်ထောက်ရှင်း ဧည့်ခံသည့် လက်ဖက်ရည်ကို သောက်နေသည်။
သြော် လွမ်းဆွေးစရာပဲ...
အိမ်အရသာလိုမျိုးပဲ...
သူမ ဒီလိုလက်ဖက်ရည် ကောင်းကောင်း မသောက်ခဲ့ရတာ ဘယ်လောက်တောင်ကြာပြီလဲ။ အနည်းဆုံး နှစ်ဝက်ခန့် ရှိပြီထင်သည်။
လင်းဝမ်က တက္ကသိုလ်နောက်ဆုံးနှစ် ရောက်နေပြီဖြစ်ပြီး ဘွဲ့ရဖို့ နှစ်ဝက်ခန့်သာ လိုတော့သည်။ သို့သော် ဆန်းစထရိုက်ခ် စတူဒီယိုမှာလည်း အလုပ်သင်အနေဖြင့် လဝက်လောက် လုပ်ခဲ့ပြီးပြီဖြစ်သည်။
လင်းဝမ် ကျောင်းတက်နေရင်း ဂိမ်းလောကထဲ ဝင်ဖို့ ဆုံးဖြတ်ချက် ချလိုက်တော့ သူမ၏ အဖေနှင့် အများကြီးစကားများခဲ့ရပြီး သူမ၏ တတိယနှစ် နွေရာသီတွင် အရာရာ ပြင်းထန်ခဲ့ရသည်။
ထို့ကြောင့် သူမ အိမ်ပေါ်မှ ဆင်းလာခဲ့ပြီး ဆန်းစထရိုက်ခ် စတူဒီယိုတွင် အလုပ်သင် ဝင်လုပ်ခဲ့ပါသည်။
ထို့နောက် လင်းဝမ် ချွေတာရသော ဘဝမျိုးနှင့် နေခဲ့ရသည်။ အရင်တုန်းက သူမ ဝယ်နိုင်သည့် အဝတ်အစားများနှင့် ဘရန်းဒတ်အိတ်များကို ယခု ပိုက်ဆံစုပြီးမှ ဝယ်နိုင်တော့သည်။
အိမ်က လက်ဖက်ရည်အရသာကိုလည်း အပြင်ဘက်တွင် မခံစားခဲ့ရပေ။
ဒါက အချိန်အတော်ကြာမှ အိမ်၏ ခံစားချက်ကို ပြန်ရခဲ့သော ပထမဆုံးအကြိမ်ဖြစ်သည်။
ချက်ချင်းဆိုသလိုပဲ ထန်းတာ့ကို သူမ သဘောကျမှု ထပ်မံ မြင့်တက်သွားတော့သည်။
ဒါက ကျင်းကျိုးမြို့တော်သို့ လင်းဝမ် ပထမဆုံး လာဖူးခြင်းဖြစ်ပြီး လေယာဥ်ပေါ်က ဆင်းလိုက်သောအခါ သူမ အနည်းငယ် စိတ်ပျက်သွားခဲ့သည်။
ဘာပဲဖြစ်ဖြစ် ဒါက ဒုတိယအဆင့်သာ ရှိသည့် မြို့တစ်မြို့ဖြစ်ပြီး ကွမ်ကျိုးလို ပထမအဆင့်ရှိ မြို့ကြီး၏ ခမ်းနားမှုနှင့် မယှဥ်နိုင်ပါ။
သို့သော်လည်း ရှန်းဟွာဗျူးသို့ ဝင်ရောက်လိုက်ချိန်တွင် သူမ၏ စိတ်ပျက်မှုများကို လေးစားမှုနှင့် ပီတိတို့က အစားထိုးဝင်လာသည်။
သူမ အလုပ်နေရာကို မြင်ပြီး ဝန်ထမ်းအားလုံး၏ ပြုမူဆက်ဆံပုံများကို မြင်လိုက်ရသောအခါ ဒါ သူမ လိုချင်နေသော ခံစားချက်မျိုးဟု ဆုံးဖြတ်လိုက်မိသည်။
ယခင်တုန်းက ဖေးချမ့်ဆီမှ ဖြာထွက်နေသော အမြော်အမြင် အလင်းရောင် တစ်စိုးတစ်စင်းကို မြင်ခဲ့ရပါက ဒီနေရာကြီးမှာ ထိုအလင်းရောင်တို့ဖြင့် ပြည့်နှက်နေသည်ဟု ဆိုနိုင်သည်။
လက်ထောက်ရှင်းက တံခါးခေါက်ပြီး ဝင်လာခဲ့သည်။ စာချုပ်တစ်ခုကိုလည်း ကိုင်လာ၏။
"ဂုဏ်ယူပါတယ် ဘော့စ်ဖေးက သဘောတူလိုက်ပါပြီ။ ရှင် ဒီစာချုပ်ကို ချုပ်လိုက်တာနဲ့ ထန်းတာ့ကုမ္ပဏီရဲ့ တရားဝင်ဝန်ထမ်းတစ်ယောက် ဖြစ်သွားပြီ။ အခြေခံလစာက ၄,၀၀၀ ကစပါမယ်။ အဆင်ပြေရဲ့လား"
လင်းဝမ်က အမြန် မတ်တတ်ရပ်လိုက်သည်။ "ပြေတာပေါ့"
သူမ စာချုပ်ကို ယူလိုက်ပြီး သေသေချာချာ ဖတ်ကြည့်ပြီးမှ သူမနာမည်ကိုလက်မှတ် ထိုးလိုက်ပါသည်။
"ဒါဆို ကျွန်မ အလုပ်က ဘာလဲဟင်" လင်းဝမ်က မျှော်လင့်တကြီး မေးလိုက်ပါသည်။
လက်ထောက်ရှင်းက စဥ်းစားနေ၏။
"ရှင့်ရဲ့အလုပ်က... အင်း မနက်ဖြန် နေ့လယ် ၂ နာရီကျရင် ကျွန်မတို့ရဲ့ ဝန်ထမ်းပေါင်းစည်းပွဲကို လိုက်ခဲ့ပါ။ ကျွန်မတို့ ရုပ်ရှင်ကြည့်မယ်။ စားသောက်ကြမယ်။ ပြီးရင် ကာရာအိုကေသွားဆိုကြမယ်"
"ဟင်" လင်းဝမ် ကြောင်သွား၏။ ... သောကြာနေ့ နေ့လယ်...။
ဖိုင်နယ်စာမေးပွဲများအတွက် ပျောက်သွားသည့် ဖေးချမ့်မှာ နောက်ဆုံးတော့ ရုံးတွင် မျက်နှာ ပြန်လာပြခဲ့ပြီဖြစ်သည်။ အဘယ့်ကြောင့်ဆိုသော် မူလအချိန်ဇယားအရ သမုဒ္ဒရာရဲတိုက်ဂိမ်းကို ဒီအပတ်ထဲ တရားဝင်ဂိမ်း ပလက်ဖောင်းပေါ်သို့ တင်ဖို့ စီစဥ်ထားသောကြောင့် ဖြစ်သည်။
ငွေစာရင်းရှင်းချိန်က နောက်နှစ်ပတ်မှ ဖြစ်သော်လည်း ဖေးချမ့်က လိုလိုပိုပို အမှားပြင်နိုင်ရန် သတ်မှတ်ထားခြင်းဖြစ်သည်။
ပရောဂျက်ကို စတင်ဆုံးဖြတ်လိုက်စဥ်တုန်းက သူ့ငတုံးဝန်ထမ်းများက နှေးလွန်းပြီး ဂိမ်းတစ်ခုလုံး နောက်ကျသွားမည်ကို စိုးရိမ်မိခဲ့သည်။ ထို့ကြောင့်လည်း စိတ်သက်သာမှုရစေရင် deadline ကို တစ်ပတ်လောက် ထပ်တိုးပေးခဲ့ခြင်းဖြစ်၏။
ဒီနေ့က သူ့ကြိုးစားအားထုတ်မှုများ၏ အသီးအပွင့်များကို ခူးဆွတ်ရမည့် နေ့ဖြစ်သည်။
ရုံးထဲရောက်သောအခါ သူဟွမ်းစစ်ပေါ်ထံသို့ တန်းသွားလိုက်သည်။
"ဘော့စ်ဖေး" ဟွမ်းစစ်ပေါ်က စိတ်အားထက်သန်နေပုံရပြီး ပို၍ပင် ချောလာသလို ခံစားရသည်။
ထန်းတာ့တွင် ကုန်ဆုံးခဲ့သည့် ၂ လတာအတွင်း ဟွမ်းစစ်ပေါ်၏ လစာကော အနားယူချိန်တို့ပါ တိုးမြင့်ခဲ့သည်။ ထို့ကြောင့် သူ့စိတ်အခြေအနေလည်း သိသိသာသာ တိုးတက်လာခဲ့ပါသည်။
ထို့ကြောင့် အရင်တုန်းကလိုမျိုး လေးပင် မနေတော့ဘဲ အားအင်များဖြင့် ပြည့်ဝနေသည်။
ဆောင်းရာသီကို ရောက်ရှိလာပြီး တစ်ပတ်အလိုတုန်းက ဟွမ်းစစ်ပေါ်သည် ကုတ်အင်္ကျီတချို့ကို ဝယ်ခဲ့သည်။
ယခုအခါ ငွေပိုငွေလျှံများ ပိုရှိနေပြီး ရှန်းဟွာဗျူးလို နေရာမျိုးမှာလည်း အလုပ်လုပ်နေရတာ ဖြစ်သောကြောင့် ဟွမ်းစစ်ပေါ်က ဝတ်ကောင်းစားလှ ဝတ်ဆင်ဖို့ ဆုံးဖြတ်ခဲ့သည်။ ထို့ကြောင့် သပ်ရပ်လှပသည့် ဝတ်စုံ တစ်စုံဝယ်ဖို့ ယွမ် ၁,၀၀၀ ကျော် သုံးခဲ့သည်။ ယခုတော့ အောင်မြင်သည့် လုပ်ငန်းရှင်တစ်ယောက်နှင့် အနည်းငယ် တူလာလေပြီ။
"သမုဒ္ဒရာရဲတိုက်ရဲ့ အခြေအနေ ဘယ်လိုရှိလဲ။ နောက်တစ်ပတ် တိုးမြှင့်ဖို့ လိုသေးလား" ဖေးချမ့်က မေးလိုက်ပါသည်။
ဟွမ်းစစ်ပေါ်က ခေါင်းကို အားတက်သရော ခါလိုက်သည်။
"မလိုဘူး စိတ်မပူပါနဲ့ ဘော့စ်ဖေး ကျွန်တော်တို့ ထပ်ခါထပ်ခါ စမ်းသပ်ထားပြီး တွေ့တဲ့ Bug တွေ အကုန်လုံးကိုလည်း ပြင်ပြီးသွားပါပြီ။ ဂိမ်းကို အချိန်မရွေး တင်လို့ရပါပြီ"
"အင်း မဆိုးပါဘူး" ဖေးချမ့်က ခေါင်းညိတ်လိုက်သည်။ သို့သော် မျက်နှာပေါ်မှာတော့ ပျော်ရွှင်သည့် အရိပ်အယောင် မတွေ့ရချေ။
ဟွမ်းစစ်ပေါ်၏ စိတ်အားထက်သန်မှုက ဖေးချမ့်ကို စိတ်ပူပန်စေသည်။
မဟုတ်မှလွဲရော ဂိမ်းက အရည်အသွေး ကောင်းကောင်းနဲ့ ပြီးသွားတာလား။
သို့သော်လည်း ဟွမ်းစစ်ပေါ်နှင့် ပေါင်ရှုတို့၏ ယခင် အလုပ်အတွေ့အကြုံများအကြောင်းနှင့် သူသတ်မှတ်ထားသည့် လိုအပ်ချက် သုံးချက်အကြောင်း ပြန်စဥ်းစားကြည့်သောအခါ...
ဂိမ်းကို အောင်အောင်မြင်မြင်နဲ့ ဖန်တီးနိုင်ခဲ့ရင်တောင် ပိုက်ဆံရနိုင်စရာ အကြောင်းမရှိဘူးဟု ခံစားမိပါသည်။
"စမ်းကစားကြည့်ဦးမလား" ဟွမ်းစစ်ပေါ်က မေးလိုက်ပါသည်။
"မလိုပါဘူး" ဖေးချမ့်က ခေတ္တ စဥ်းစားလိုက်သည်။ "ဂိမ်းရဲ့ ဂိမ်းဇာတ်ကြောင်းနဲ့ အံ့ဖွယ်လက်နက် တွေကို ပြကြည့်"
သမုဒ္ဒရာရဲတိုက်ဂိမ်း၏ တစ်ဝက်လောက်က အမှိုက်သာသာဖြစ်ပြီး ဘာမှ ပျော်စရာမကောင်းမှန်း ဖေးချမ့် သေချာသိသည်။
ကိုယ်ပါတဲ့ မစင်ကိုယ်ပြန်စားတာ အဓိပ္ပာယ်မရှိပေ။
သို့သော်လည်း ဂိမ်းငွေအရှုံးပေါ်နိုင်တာကို သေချာအောင်လို့ သူ့အကြံပေးချက်များကို တင်းတင်းကြပ်ကြပ်လိုက်နာသလား ဖေးချမ့် အသေးစိပ် စစ်ဆေးဖို့ ဆုံးဖြတ်လိုက်ပါသည်။
သူတိ့ ဂိမ်းဇာတ်ကြောင်းဖန်တီးဖို့ အားထုတ်ခဲ့ကြလား။
ဂိမ်းအတွက် ၈၈၈ ယွမ်တန် အနီရောင်ချီလင် ဂိမ်းလက်နက်တွေကော ရှိလား။
ဒါတွေသာ ဖေးချမ့်အတွက် အရေးကြီးပါသည်။
ဟွမ်းစစ်ပေါ်က ခေါင်းညိတ်လိုက်၏။ "ရပါတယ်။ ဘော့စ်ဖေး ကျွန်တော်ပြမယ်နော်"
သူ့ကွန်ပျူတာပေါ်က သမုဒ္ဒရာရဲတိုက်ကို ဖွင့်လိုက်ပြီး ဖေးချမ့်ကို ဂိမ်းအကြောင်း စတင် မိတ်ဆက်ပေးလေသည်။
"ဒါက ကျွန်တော်တို့ရဲ့ ဂိမ်းဇာတ်ကြောင်းပေါ့။ ဂိမ်မာတွေက ရဲတိုက်ကို အနိမ့်ဆုံး အထပ်ကနေ တက်ရမယ်။ ဇာတ်လမ်းသွား တစ်ပုဒ်လုံးက ၆ နာရီဝန်းကျင်လောက်ကြာပြီး မတူညီတဲ့ ရှုခင်းသုံးမျိုးခွဲထားတယ်။ ဒီဂိမ်းရဲ့ အဓိက ရည်ရွယ်ချက်ကတော့ ဇွန်ဘီတွေကို သတ်ဖို့၊ ကြေးစားတွေကိုသတ်ဖို့နဲ့ တချို့ ရိုးရှင်းတဲ့ ပဟေဠိလေးတွေ ဖြေရှင်းဖို့ပဲ"
"ဒါက စျေးကွက်စနစ်ပါ"
"ဒါက အံ့ဖွယ်လက်နက်ဖြစ်တဲ့ သက်တံ့ရောင်စုံချီလင်လက်နက်ပါ။ ဂိမ်းကို ဖြန့်ချီမဲ့ လမှာ မိတ်ဆက်ပေးသွားမှာပါ။ ဘော့စ်ဖေးပြောတဲ့အတိုင်းပဲ ရာသက်ပန် အသုံးပြုခွင့်ကတ်ကို ၈၈၈ ယွမ် နဲ့ ရောင်းချသွားမယ်။ ကျွန်တော်တို့ အံ့ဖွယ်လက်နက်တွေ ထပ်လုပ်နေပြီး နှစ်လ သုံးလတိုင်း အသစ်တွေ ထပ်ထုတ်သွားမှာပါ။"
ဖေးချမ့်က ဟွမ်းစစ်ပေါ်၏ ရှင်းလင်းချက်ကို နားထောင်ကာ မျက်မှောင်ကြုတ်လျက် ခေါင်းညိတ်နေသည်။
သမုဒ္ဒရာရဲတိုက်၏ ကစားပုံအစစ်ကို မြင်လိုက်ရသဖြင့် မျက်မှောင်ကြုတ်သွားရခြင်း ဖြစ်သည်။
သူထင်ထားတာနှင့် နည်းနည်းလေး ကွဲပြားနေ၏။
အစကတော့ Crossfire လို ရုပ်ထွက်မျိုးရှိလိမ့်မည်ဟု ထင်ထားခဲ့သည်။ သို့သော်လည်း ပိုအသေးစိတ်ကျနေပြီး ရုပ်ထွက်က ပိုကောင်းနေသည်။
ဇာတ်ကောင်တွေဖြစ်ဖြစ်၊ သေနတ်တွေဖြစ်ဖြစ်၊ ဆက်တင်ဖြစ်ဖြစ် ဂိမ်း UI ဖြစ်ဖြစ် အားလုံးက အသစ်စက်စက်ဖြစ်နေသည်။ အဆင့်မြင့် နိုင်ငံခြားက AAA ဂိမ်းများနှင့် မယှဥ်နိုင်သော်လည်း သိပ်ပြီး အကွာကြီးလည်း မဟုတ်ပါ။
ဂိမ်းကို ဘာကြောင့် ဒီလောက်လှအောင် လုပ်လိုက်ရတာလဲဟု ဖေးချမ့်ဒေါသထွက်ပြီး ဟွမ်းစစ်ပေါ်ကို မေးချင်နေသည်။
'ဒီလိုလှတဲ့ ဂိမ်းမျိုးက ငါတို့ကို သတ်မှာ မသိဘူးလားကွ'
သို့သော်လည်း ဒီလိုဖြစ်လာစေသည့် တရားခံက သူဖြစ်မှန်း ပြန်သတိရသွားသည်။
'အေးပါလေ ထားလိုက်ပါတော့'
ယခင်တုန်းက ဟွမ်းစစ်ပေါ် ဖေးချမ့်ကို ဘတ်ဂျက် ယွမ် ၆၀,၀၀၀ နှင့် ဝယ်ယူစာရင်း လာပြဖူးသည်။ သို့သော် ဖေးချမ့်က ကြည့်တောင်မကြည့်ဘဲ နှစ်ဆတိုးခိုင်းခဲ့ပါသည်။
သုံးလိုက်ရသည့်ငွေက တကယ်ပဲ တန်ပေသည်။
သို့သော်လည်း ဝယ်ယူသည့် ပန်းချီရင်းမြစ်များ၏ အရည်အသွေးကလည်း မြင့်သွားမည် ဟူသည့် သဘောဖြစ်သည်။
ဂိမ်းဘယ်လောက်တောင် လှလိုက်သလဲ မြင်သွားသောအခါ သူနောက်တစ်ကြိမ် စိတ်ဖိစီးလာရပြန်သည်။
အရေးအကြီးဆုံးက လှပသည့် ရင်းမြစ်များကို ဝယ်ယူခိုင်းခဲ့တာ သူဖြစ်သဖြင့် ဟွမ်းစစ်ပေါ်ကိုလည်း စိတ်ဆိုး၍မရတော့ပေ။
သို့သော် ဟွမ်းစစ်ပေါ်၏ နောက်ပိုင်း ရှင်းလင်းချက်ကို ကြားလိုက်ရသောအခါ ဖေးချမ့်က အနည်းငယ် စိတ်အေးသွားသည်။
ကံကောင်းစွာဖြင့် သူတို့သည် အသုံးမဝင်သည့် ဂိမ်းဇာတ်ကြောင်းကို အချိန်ဖြုန်းကာ ဖန်တီးနိုင်ခဲ့ကြသည်။ ဇွန်ဘီနဲ့ ကြေးစားတွေကို သတ်ရမယ်ဟုတ်လား။ ကြားလိုက်ရုံနဲ့ ပျင်းဖို့ ကောင်းနေပါပြီ။
၈၈၈ ယွမ်တန် အနီရောင်ချီလင်ကလည်း စျေးကွက်တွင် ရှိသည့် တစ်ခုတည်းသော လက်နက်ဖြစ်ပြီး ပိုနိမ့်သည့် စျေးလည်း တစ်ခုမှမရှိပါ။
ဂိမ်မာများ၏ ဝေဖန်မှုကို ခံလာရနိုင်သော်လည်း ပိုက်ဆံအရှုံးပေါ်နိုင်သရွေ့ ဖေးချမ့် စိတ်ပိုင်းဆိုင်ရာ ပြင်ဆင်ထားပြီးပါပြီ။
မာကြီးကို ဂိမ်မာများက နေ့တိုင်း ဝေဖန်ပေမဲ့ ဘတ်စ်ကား မစီးရဲလောက်တဲ့အထိတော့ မဟုတ်ဘူး မလား။
ထို့အပြင် ဖေးချမ့် စစ်ဆေးထားပြီးပြီဖြစ်ပြီး ဆန်းစထရိုက်ခ် စတူဒီယို၏ Bullet Hole ဂိမ်းကလည်း တူညီသည့် ရက်စွဲမှာပဲ ဖြန့်ချီမည်ဖြစ်ကြောင်း သိထားပါသည်။ ထို့ကြောင့် သမုဒ္ဒရာရဲတိုက်နဲ့ ထိုဂိမ်းကို တိုက်ခိုက်စေချင်ပြီး ရှုံးနိမ့်သွားစေချင်ပါသည်။
ဒီလိုအားကောင်းတဲ့ ပြိုင်ဘက်နဲ့သာဆိုရင် သမုဒ္ဒရာရဲတိုက်ကို ဂိမ်းကောင်းတစ်ခုလုပ်လည်း ဘာအသုံးဝင်တော့မှာလဲ။
သေချာပေါက် တစ်ဖက်အဖွဲ့ကြောင့် ပိုးစိုးပက်စက် ရှုံးနိမ့်သွားပါလိမ့်မည်။
"ဘော့စ်ဖေး ဂိမ်းအတွက် တခြား Mode တွေလည်း ရှိပါသေးတယ်။ အဲဒါတွေကိုကော ကျွန်တော် မိတ်ဆက်ပေးရဦးမလား" ဟွမ်းစစ်ပေါ်က မေးလိုက်သည်။
ဖေးချမ့်က ခေါင်းခါလိုက်သည်။
"နေပါစေ။ စမ်းသပ်စစ်ဆေးမှုအတွက် တရားဝင်ဂိမ်း ပလက်ဖောင်းကိုပဲ ပို့လိုက်တော့။ ဒီလောက်ထိ အကြာကြီး ဖန်တီးခဲ့ကြရတော့ မင်းတို့တွေ ခက်ခဲခဲ့မှာပဲ။ ဒီနေ့နေ့လယ်ခင်း ပျော်ဖို့ ပြင်ထားကြ။ ငါတို့ ရုပ်ရှင်သွားကြည့်ပြီး စားကြ သောက်ကြမယ်"