﷽
-الكاتبة: سـارة الحـسن
-Part 43
-"لا تنسون التصويت +
-" متابعة الحساب its_105
-"وتعليقاتكم ع الفقرات فيـروزاتـي"🤍
▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫
َ
َ
َ
-هـــزراف
-رُوح متعــبه منهلكة مـن التفگيــر والقلق والخـوف
تِـدعي القــوة بـس هي متحطمــة مـن الداخـــل
الحيـــرة تنشـــاف بـ عيــونها الصاير چَمـــر
-كاعــدة بـ الكاع وسانـده ظهـرها على الجرباية
اديها متخلخله شعــرها وضاغطة بـقوة ع راسها
احـــس اصابعها راح تختــرق جمجمتها مـن قوة الضغط
لـزمت ايـدها وفـزت مـن صفنتها وكال بـصوت تعبان
::-ما اتـــصل يـوشع بـعد؟!
هـزراف: لا ما اتــصل
-اخـذت نفــس عميــق ورفعت راسها علينا
كاعــدات كدامها سـدرة ورؤيا ويقيـن
مسحت ع وجها وحجت ويانه بـهدوء
::-عوفنـــي وحــدي
سـدرة: بـس...
-قاطعتها وكالت بنبـرة توسـل
::-رجـــــاءاً
-محـد حجه شـي وكمنه نريـد نطلع، صاحت عليه
::-أنتِ ابقــي هـزراف
-بقيت منحرجه لأن طلعتهن وبقتنـي وفكرت راح يضوجن بـس ماكــدرت احجي، وكفت بـ مكاني وهنه طلعن، كامت مـن مكانها وصارت ادور بـ اغراض الميــرزا ماخلت لا كنتـور لا مجرات لا مكتب وبيـن اوراقه وملفاته اخـر شـي لگت دفتـر ملاحظات حجمة متوسط
-تربعت ع الجرباية وصارت تگلــب بــي وكفت عنـد صفحه مـن الصفحات، وبقت صافنـه عليها، سحبت تلفونها ومـدري شطلعت بـي وصارت مرة تباوع لـ تلفون مره لـ دفتـر رفعت راسها عليه وكالت بـحده
::-اتصلي ع يـوشع خلـي يجــــي
-هـزيت راسـي واتصلت عليه، مرتيـن يلا جاوبنـي
::-هــاا هـزراف
هـزراف: بـس آفـروز محتاجتك تريدك تجـــي
-حسيتــه تنهــد وكال
::-ماكــدر هسه بس كليلها بـ الليل اجيها
-باوعت لـ آفـروز مدنگه راسها ع الدفتـر واديها يرجفن وعيونها مشتعله نار، احـس دموعها محاربتها ومانزلت
رجــف فگـي مـن خـوفـي عليها وحجيت ويا يـوشع
::-فـدوة تعال هسه
يـوشع: بيها شي؟! لا تخوفينــي هـزراف
هـزراف: تعال شوفها محتاجتك
يـوشع: تمام تمام بس مسافة الطريق
-غلقت الخط مـنه وحجيت وياها
::-راح يجـــي
-طبكت الدفتـر وشمرته ع صفحه وبقت تفرگ بـوجها بقـوة بحيث انصبغ أحمــر ، لزمت راسها تضغط عليه بـقوة، خفت عليها وكعــدت يمها حضنتها وگمت ابجــي ادري بيها داتتعذب بس تفضل السكوت وتكتم بـ داخلها
::-لا تبقين ساكتة آفـروز والله داتخوفيني عليج
-اتنفــست بـحسرة وكالت
::-شســـوي يعنـــي فهمينـــي؟!
لا دموعـــي ولا هوستــي ولا عصبيتــي راح ترجعه
شــنو الــي يفيدة ويرجـــعه هســه؟!
-رفعت عينها عليه وكملت كلامها بصوت مبحوح
::-يا ادعيـــله يا افكــر بـ حل يـرجعه
هـزراف: ادعيـــله يرجــع، ادعيـــله يكون بخيــر
-هــزت راسها وكالت
::-راح يجــي يـوشع؟!
هـزراف: اي
-سكتت وانـي بقيت كاعده يمها وساكتة، ماعرف شلون اواسيها او اخفف عنها، مرت فتـرة وسمعت تلفونها رن، بسرعه لزمته تشوف مـنو، صفنت ع الأسم ثوانـي ونطتنـي الفون وكالت
::-جاوبـــي أنتِ ولا تكليله بـ الميــرزا
-اخـذته مـن ايدها جان هارون متصل عليها كاميرا، مسحت وجهي وابتسمت وجاوبتة
::-هــلو هارون
هارون: هــااا غزالة شلونج؟!
هـرزاف: الحمـدلله شلونكم أنتـو؟!
هارون: زينين، ويـن السحارة؟!
هـزراف: بـ الحمام بـس تطلع اخليها تتصل عليك
هارون: تمام تمام انطيها خبـر اذا كدرت خل تتصل واذا ماكدرت سلميلي عليها وع البقية
هـزراف: الله يسلمك انتَ هم سلملنه ع الولد
هارون: يوصل
-غلقتــة منه وبقيت كاعده يمها مـرت ساعه تقريباً واتصـل يـوشع عليها وهم انـي جاوبتة
::-هـلو يـوشع
يـوشع: انـي بـ الباب ويايه أميمتـي ويُـسر
هـزراف: تمام راح ننزل
-اخـذت التلفون منــي آفـروز وحجت ويا
::-تـــعال لـ غرفتــي يـوشع
-حجتها وغلقته، باوعتلـي وكالت
::-صعــدي بس يـوشع هسه اريد اشوفه شـي وتعالي ويا
هـزراف: تمام
-عفتها ونزلت انطيت خبـر لـ عمتـي جـوري حتى تستقبلهم ويايه، طلعنه ع الباب عمـتي جـوري هلت بيهم ودخلتهم للبيت، باوعلي يـوشع وكال
::-وينــها؟!
هـزراف: بـ غرفتها كالت خلي يصعـد يمـي
-هـز راسه وكال
::-ســويلنه طريـــق
-مشيت كدامه وهو ورايه، حاولت اسـرع خطواتي ع الدرج لان هاي الفتـرة ماكدر اصعد بسرعه بسبب جرحــي، بعـدني بـ البداية وكال يـوشع بـهدوء
::-علــى كيفـج هيـج راح تتأذيـــن
-بلعت ريگــي متـوترة وما جاوبتة بقيت امشـي بـهدوء لـما وصلنـه غرفة آفـروز، دخلت كدامه مـن شافتنـي آفـروز كامت مـن مكانها، تقربت مـن يـوشع حضنته بـقوة وهو بادلها الحضن
-بقـــت فتــرة طويلة بـ حضنه، رفع راسها يمسح علـى وجها بحنيه وكال
::-راح يـرجع والله لا تخافيــن
آفـروز: ماعرفتـو شـي بعد؟!
يـوشع: لحــد هسه لا بس عمـج أكثـم طلع دوريات تفتيش ع المناطق القريبة مـن مكان الحادث
-هـزت راسها وكالت
::-تـــعال اشوفك شي يمكن يفيدكم
-كعدو ع الجرباية وسحبت الدفتــر مالت الميــرزا فتحته وخلته كدام يـوشع وسألته
::-هاي الأرقام اللاتينيه شنـو معناها؟!
-اخذله صفنه عليهن وكال
::-هاي رقــم سيـارة، الميــرزا دائماً يكتب الأرقام لاتيني
آفـروز: باوع قـبل كم يوم تأخــر علـى بيت ومـن رجـع جان تعبان حيل، وكاتب هنـا رؤوس أقلام بنـفس التاريخ واليوم وهاي الكلمة "إرتِــقاب مـن الأخَــوب" شنـو معناها؟!
-اخـذه مـن ايدها وبقــى يباوع عليهن عاگد حاجبة، طلع تلفونه ومـدري شبحث ورفـع راسه عليها وكال
::-معناها مــجرم مترصــده
آفـروز: يعنــي جان يدري احـد مترصده؟!
-هـز راسه بـ اي، رجف فگها وسحبت الدفتـر منه وقلبت بـ الأوراق وكالت
::-وهاي قبـل لا يختفي بـيوم هم نفس رقم السيارة وكاتب وياها "أنَــاةِ قـــبل الدينونــة" شنــو يعنـي؟!
-اخــذ نفـس عميـق وكال
::-نفس معنــى هـدوء ماقبل العاصفة
آفـروز: تكــدر تعرف السيارة المـن مـن رقمها مو؟! يمكــن يساعدنه نلزم راس الخيــط
يـوشع: اي نكدر هسه اشوف عمـج
-طلب مـني قلم وماعرف شكتب بـ الدفتــر واتصل ع عمـي أكثـم وبقـى يحجي ويا فتـرة ع السيارات وانطى رقم السيارة الي مكتوب بـ دفتـر الميــرزا حتـى يعرفها المن
-مـن غلق التلفون كالت آفـروز
::-هـو ما عاش ببغداد هواية يعنــي مستحيل يصير عنـده اعـداء بهل ســـرعه، بقت الصار يا فقــار يا واحـد دايصفـي حساباته ويه شخص مـن عائله بيت العايش
يـوشع: كلشـي متوقع واذا علمود مصلحة راح يتواصلون ويانه علمود المقابل
آفـروز: بـس كون ما مأذينه شيردون ميخالف
يـوشع: ان شاء الله مابي شي
آفـروز: لگيتــو سلاحه بـ السيارة؟!
يـوشع: لا
-فرگت خشمها بقـوة وايدها ترجف ابد ما هدأت وكالت
::-شلون لعـد؟! اذا وكع بـ ايد احد راح تصير مصيبة
يـوشع: ماراح يصير شي السلاح مرخص وانـذكر بـ الدعوة حالياً هو مخطوف وسلاحـة مختفـي
-هـزت راسها وسكتت وهو بقـى حاضنها ويحجي وياها يحاول يهديها، وطلب منها تنزل جوة بـس ماقبلت ورادت تبقــى وحدها
-كام مـن يمها طلع وانـي طلعت ويا، نزلـنه نمشـي بخطوات بطيئة وهو يحجي ويايه
::-ماطلعت مـن غرفتها ولا اكلت شي مو؟!
هـزراف: اي
يـوشع: هسه اخلي أميمتـي تصعد تحجي وياها وانتِ هم لا تعوفينها وحدها
هـزراف: طول الوقت انـي وياها بـس هي بهيـج مواقف تسكت وتبقـى تكتم حتـى ما تبجــي
يـوشع: الله يبـرد كلبها الموضوع مو هَـين أبـد
هـزراف: زيـن ماعرفتـو شـي؟!
يـوشع: لا للأسف ما أله اي أثــر
-بعــدنه ع نص الـدرج وصارت بـ وجهنه عمتــي هناء تباوعلنـه صفـح وكالت
::-صـدك الي ستحـــو ماتــو
نوبــــة جايبـــتة للبيـــت وكــــدام اهــــلها تدحـــــوس ويــا بـــ الغـــرف
-فتحت عيـوني ع وسعها مصـدومة مـن كلامها وحيــل انحرجت ماعرفت شنـو اجاوبها، دنگت راسـي واحـس اريـد ابجـي مـن الفشلة، ضحك يـوشع بهدوء وجاوبها
::-امممم أنتِ مو أخـذتي لـبيتكم وكدام اهلج ورجعتـي حامل لعــد؟! صـدك الي استحـــو ماتو
-رغـم انحراجــي وفشلتـي اجتنـي الضحكه ع كلامه، رفعت عيني ع عمتـي هناء وجها صار ينطي ألوان ونتــرت بـي
::-شـــكد صلف أنتَ؟! جاسـر زوجـي مو غريييب مثلك
يـوشع: أم هــود وليــرحم والديــج خلينـــي محترمـــج لا تجبرينـي احجـــي حجــي ما يعجب
-نـزل وعافها وانـي هم كملت طريقي اريد انزل لزمتنـي وگرصتنـي مـن ذراعــي حيــــل وهمست كازة ع اسنانها
::-انــي الـج بس خل يرجع جــدج
-دفعتنـي بـخفه ونزلت كدامي، فركت ايدي مـن گرصتها وما اهتميت لـ كلامها لأن ما مسوية شـي وآفـروز وعمتـي جوري موجودات ويعرفن الصار شنـو
-نزلت للصالة هـو جان طالع وانـي كعـدت يم خالتـي ليلى ويُـسر، رادت تصعد يُـسر عليها بس خالتـي ليلى ماقبلت وكالت
::-اخـوج كال نعوفها وحـدها فترة وعـود اصعـدي
-صار الليل وعمتـي جـوري وسدرة حضرن العشة للموجودين وصعـدت يُـسر ع آفـروز تريدها تنزل يمـنه، بعـد فتـرة ونزلن سوة سلمت ع امها وكعدت يمها
-رجـــع جـدي وعمـي بـ الليل ومـن سألتهم آفـروز ع السيارة جاوبها عمـي أكثـم
::-عرفناها المـن بـس صاحبها مختفـي
آفـروز: لـعد شلون عمو؟!
أكثـم: عممت أسمه ورقم السيارة بـ السيطرات وأن شاء الله ينلزم
-سكتت عنـه وهو عافنه ودخل لـ غرفتة مرت نص ساعه تقريباً وسمعنه صوت صياحه مـن الغرفة، طلع يرعـد ويصيح
::-حيـــواااانااااات والله اشرب مـن دمكم
-كلنــا انفـزعنـه مـن نبرة صوته وصياحه وتهديداته، وكـف بـ الصالة ويحجي بـ التلفون
::-ويييييينه يا ***** وييييينه؟!
-تقرب مـنه جدي وصاح بي
::-شدايصيييير أكثـم مـن هذوله
-اشرله يسكت وفتـح مايك، رفـع عينه ع آفـروز الواكفه ترجف واشرلها ع التلفون، هـي بسرعه فتحت تلفونها ووكفت يمه وعرفتها داتسجل
أكثـم: شتردون احجـووو؟!
مجهول: تسحب الدعوة الي علـى فقــار حامد يرجع ابنك سلامات ما تسحبها هم يرجعلك بـس جثه
أكثـم: ومـن يكول هو يمكم صدك؟! شنـو اليثبت؟!
مجهول: هسه تسمع صـوته
-صار هـدوء ثوانـي وسمعنـه عيطه الميــرزا، الي تدل علـى انو انضرب بـشي قوي، صاح بـي عمي أكثـم بعصبية
::-لا هييييج حيـواااان
-سمعنه صوت الميــرزا يگح وحجه بـصوت تعبان
::-علـى جثتــي لا تسحب الدعوة أبو رسـول
أكثـم: صَـفد بابا وييين انت؟! سولك شي؟!
-ما نطو مجال يجاوب وانضرب مرة ثانية، آفـروز نزلت راسها ويه مانزلت دمعتها وبقت لازمه التلفون ورجفتها زادت، كلنــا انهارينه ونزلت دموعنــه مـن هَــول الموقف، جاوب الرجال المتصــل بـي
::-الك مـنا للصبـح سـيادة الضـابط أكثـم يا تنسحب الدعــوة يا يموت ابنك
-حجاها وغلق الخط وبقــى عمي أكثـم يصيـح محروگ دمه، باوع لـ جـدي وكال
::-وضــحت منوووو وره السالفه وضــحت
جساس: راح اتصـل بـ حامـد خلي يشوف حل ويه ابنه
أكثـم: والله احرگ الدنيا ع روسهم اذا صارله شـي
-اتصل جـدي ع حامد اكثـر مـن مره بس ما جاوبة وحتـى عبـدالقادر ما جاوبة، حيـل ضاج وتنـرفز وصار يحجي ، وبقينـة كاعدين بـ الصالة ع نار كلها حايرة ومانعرف شنــسوي، كالت آفـروز لـ عمـي أكثـم
::-اسحب الدعوة عمـو
أكثـم: ع جثتـــــــي يصـــير هــل شـــي اذا مــــا خيســـــته بـ الحبـــوووس لهل كـ***
آفـروز: راح تصيـر علـى حساب جثه ابنـگ، لأن أول وتالـــي راح يطلع فقــار بــــــــس أذا صار شـي للميــرزا ماراح يرجــع بعـد
-كام مـن مكانه ضايج يريد يطلع وكال
::-والله يحـــلم يشــوف الشــمس هل خسيـس
-طلع مـن البيت عصبي وهي طلعت تركض ورا، جـدي كعـد علـى جهه تعبان وصار يـفرگ بـ كلبه، راحت سـدرة جابتلة مـي انطتهيا وحجت ويا بـخوف
::-جـدو بيك شي؟! يوجعك شي؟!
جساس: شيصير اكثر من الصار يبعـد جدج شيصير
سـدرة: راح يرجـــع أن شاء الله بـس اهــــدأ انتَ لا يصير بيك شـي
-شرب المـي، كام مــن مكانه وكال
::-راح ارتاح بـ غرفتـي
-عافنـة ودخل لـ غرفتة، كامت يُـسر تريد تروح ورة آفـروز استوقفتها خالتـي ليلى وكالت
::-عوفيها ويه عمها يمة هـي ترجع
-رجـعت كعـدت يمي تمسح بـ دموعها الي تنزل لا ارادياً وهمست
::-شفتيها شلون ترجــف؟! حيـــل خايفة عليها
هـزراف: حتـى انـي بس ماعرف شسوي والله داموت قهـر
يُـسر: اذا نسحبت الدعوة راح يرجع ليـش مايقبل ابو يسحبها
هـزراف: والله ماعرف بهاي الأمور انـي وحتـى ما فاهمه شدايحجون ولـيش الميــرزا هيج كال، يعنـي خاطر بحياته علمود الدعـوة ما تنسحب
يُـسر: اذا رجع الميــرزا يمكن راح نفهم كلـشي منهم
-هـزيت راسـي وسكتت، مرت فتـرة ورجعت آفـروز، نامت على الكرويتة وخلت راسها على رجلين امها ليلى، صارت تمسد ع شعرها وسألتها
::-شراح يصير؟!
-رفعت راسها عليها وجاوبتها بنبرة هادئه بس مخيفة
::-راح يسحب الدعــوة هسه
ليلى: يعنـي راح يطلع فقــار مـن السجن؟!
آفـروز: امممم راح يخلص مـنها قانونياً بـــس ماراح يخـلص مـنها عشائرياً، هيـنه يـ ابــن أريـج هيـنه
جـوري: الله لا يوفقه وانـي جنت اكول عليه زين وما طالع مثل امــهَ بــس طلـــع انگــس
-غمضت عيونها بـ تعب وكالت
::-احـنه هـــم بيـنه جينـــات أريـج وراح يشـــوف الحقــــارة علـى أصــــولها
-ضمت وجها بـحضن امها وسكتت وبقن عمتـي جـوري وليلى وحده ترفع وحده تكبس، اجت عمـتي هناء كعدت يمهن وكالت
::-ويـن عشـاج جـوري؟!
-باوعتلها عمـتي جوري بنظـرات عدم رضى وحجت ويا سـدرة
::-كومـي يمة صبـي العشة
-كامت سـدرة وگمنه انـي ويُـسر ورؤيا وياها، رتبنه الطاولة وآفـروز اجت صبت أكـل لـجدي وكالت
::-راح أكل ويه جـدو انـي
-اخذته وراحت لـ غرفتة، اتنهــدت ليلى وكالت
::-ماردة گلبـي هل بنيه شوكت تشوف الراحة
هناء: مـن شين افعالها وأذيتها على الناس الله ما موفقها
جـوري: عيب هذا الحجي ام هـود
هناء: مو أنتِ التعلمينــي العيب جـوري
ليلى: والله يا ام هـود مادري شـكلج بـس الي بعمرج لازم مگـرس حياته صوم وصلاة وعبادة مو يحجي ع طفلة ويشمت بيها، أنتِ هم عنـدج بنيات خافي الله بيهن
هناء: بناتـي مو مثلها كافيات خيرهن وشرهن
-هـزت راسها ليلى بـ أسف وما جاوبتها، وحتـى ما اكلت بـس كاعده ويانه وساكته لو تحجي ويه عمتـي جوري، رغم هناء كل شوية تذبلها حجاية بـس محـد يرد عليها
-بعـد فتـرة طلعت آفـروز كعدت يمنـه وعينها بـ تلفونها، رجعت هناء تشمر حجي تسمعها بس هي غلست عليها وما جاوبتها، مرت فتـرة وعگـدت حاجبها آفـروز وكالت بـ حزن
::-چؤچؤ لا اله الا الله
ليلى: شكـو يمة شبيج؟!
آفـروز: باعــي هاي مـــرية حامــل وعمرها اكثر مـن 45سنـه وعلى الولاده ميته لان خطــر على الي بعمرها
ليلى: ياااا اســــم الله
-رفعت راسها آفـروز ع عمتـي هناء وكالت
::-نســـبة الوفيـــات للـــي عمـــرهم اكثـــر مـن 45سـنه واصــله بـ الملايين شلون بيج؟!
هناء: الله الحافظ
آفـروز: شوفي عمة انـي ماريد اخوفج بـس انتبهي لـ نفسج، راجعـي دكاترة شـي چيگـــي وضعج، وحتـى الطفل دايجي مشوه لأن أنتِ جبيرة بـ العمر
-خزرتها عمتـي هناء ونترت بيها
::-بيـش مفاولة عليهَ أنتِ؟!
آفـروز: هاي حقيقة انــي شكو؟!
-كامت مـن مكانها آفـروز وحجت بنبـرة مستفزة
::-أذا ودعتـي ع الولاده انــي اربـي عبــوسي
-كملت طريقها وخلت عمتـي هناء تصيح
::-يومج قبل يومييييي وبعدين منو كال اسمه عبااااس شـــو بكيفج تحجييييين أنتِ
-ضحكت عمتـي جـوري وزادت نار هناء، وكامت مـن مكانها ترعد وتصيح وتغلط، محـد جاوبها ولا احـد رد عليها، كالت خالة ليلى بـضحكه
::-والله يـ آفـروز عليها سوالف
جـوري: ههههه طرگاعة هل بنيه مثـل ما كال الميــرزا
-بقــن يضحكن وانــي ابـــد ما خطرت ع بالي ليـش تســمي عبـاس، الأ مـن سألت سـدرة ضحكت وكالت
::-مو السحارة يصيحولها ام عباس وهـي داتبسمر لـعمتي هناء عود رجعت عمـي جاسر بـ السحورة
هـزراف: عـزااااا والله مافكرت بيها
سـدرة: بـس آفـروز تفكر بيها قبل لا تصير
هـزراف: عـود صدك عمتـي هناء تسوي سحورة؟!
سـدرة: ماريد اشيل غيبتها، الله اعلم بعـد
-سكتت مصدومة واحـس ما تدخل عقلي شنو تسوي سحر علمود رجال، بس بعدين اقتنعت عمتـي هناء كلشي تسوي،
ماقبلت سـدرة اساعدهن بـ المواعين وغسلتهن هـي ورؤيا
-آفـروز كاعدة بـ الصالة وما فاركت تلفونها وتكتب بعصبية عرفتها داتحجي ويه احـد، بقينه كاعدين يمها، مرت فتـرة ورفعت راسها علينه اخذت نفس عميق وكالت
::-انسحبت الدعوة وراح يطلع الشفية
ليلى: حوبتكم ما تتعـــدى يمة
جـوري: اي والله
آفـروز: هـذا لان واحــد منـهم طلـعو بـسـرعه ولا عبالك اكــو قانــون وصـخام بــس صــدك لـو كالــو القانــون بـس علـى الفقيـر
ليلى: محــكمة الأخـــرة راح تكــون عــادلة يمــة وأبـد مـــو هينـه وقاضيها رب العالمـــين
-هـزت راسها وسكتت والحــزن ذبل ملامحها الحلوة بهل يومين، اتصلت ع الولد وحاولت تحجي وياهم طبيعي لأن ماتريد تنطيهم خبـر ويقلقون وهمه وراهم عملية
-بعــدنه كاعدين واتصلت عليها امها عليا، اخــذت تلفونها وكامت مـن يمنه، گمت وراها لأن ماريد اعوفها وحـــدها اسمعها تحجي وياها طبيعي وتسأل ع بيبيتها المريضة
-بعـدها طلبت مـن امها ليلى تبقــى يمها وهي مارفضت، ونمنه ذيــج الليله كلها بـ غرفة وحـده، وآفـروز طول الليل ضامة نفسها بـ حضـن امها
-صـــار الفجــر وكَعـدت ع صــــوت الأذان،
حسيــت ع آفـروز كامت طلعت مـن الغـــــرفة
أنتظرتها ترجع بس طولت وگمت طلعت وراهـــا
دورت عليــــها بـ البيــــت ماكــــو،
صعــــــدت لـ غرفتــــها فــــوك هــــم ماكــــو
خفت عليها كلش وطلعت مـن باب المطبخ اباوع لـ مكتب جـدي، الأضوية جانت مشتغلة عرفتها هناك
-رحـت وراها للمكتـب ماكــدرت اعوفها وحـدها بهذا الليل
استوقفنـــي صوت بكائها وشهكاتها، نزلت دموعي بـدون وعـي مـني، فتحت الباب ودخلت عليها جانت كاعده ع السجادة بـ جادرة الصلاة وحاضنه وجها بين كفوف اديها وتبجــي، كعــدت يمها بسرعه وحضنتها وماعنــدي كلام اواسيها بي غيــر دموعـــي
::-عليــج الله كافي آفـروز
-تمسكت بـ ملابســـي وحجت بصـوت مخنوگ
::-گلبـــي يوجعنــي عليه هـزراااف والله هَـــد حيلي
هـزراف: والله راح يرجع مو سحبتو الدعوة أكيـد باجر يعوفو بس لا تبجين
آفـروز: تتــوقعين راح يعــوفو بــدون أذيــة ماسمعتــي صــوته شــــلون تعبـــان
-ماعــرفت شجاوبها وحقها بـ كلشــي تحجي، بقيت حاضنتها لــما سكتت مـن ذاتها وابتعـــدت عنــي تمســح بـ وجها وكالت
::-ادعيـــله هـزراف يمكــن أنتِ أقـرب مـني لـ ربنـا
هـزراف: والله طـول الوكت ادعيله
-هـزت راسها وكالت
::-روحـــي هـزراف أكمل صلاة واجـي
هـزراف: كملــي ونـروح سوة
-أكتفت بـ السكوت وبلشت بـ صلاتها وانـي كاعـدة اباوعلها وروحي مسحوگه سحگ عليها، آفـروز ما تبجـي بـسهوله وهــسه مـنهارة شــكد متأذية ع الميــرزا لعـد
-كملت صلاة ورجعنــه انـي وياها للبيت، هـي راحت للغرفة وانـي صليت ورجعت يمهن، جانت خالتـي ليلى هم كاعده تصلي بـ الغرفة
-آفـــــروز
-اصعـــب شعـــور هـو تأنيب الضمير، علـى كـد ما خايفة علـى الميــرزا علـى ما ضميري دمـرني وانـي احـس الي دايصير للميــرزا بســـببي
-طلع الصبــح وانــي كاعـدة ماكـدرت أنام بـعد،
گمت طلعت مـن الغرفة كعــدت بـ الصالة وسندت راســي
ع طــرف الكرويتة وغمضــت عيــوني
-بـين نايمة وكاعده اسمع هوسـه وهـوايه اصوات بـ راسـي
ماكــدرت افتــح عيــونـي واشوف شكو مـن التــعب
بعـد فتـرة حسيـت ع بوسه انطبعت ع جبينـي
وصــوت يـوشع يحجــي ويايه
::-صغـيرونتـي حبيبتـي
-تقربت مـني وهو لمـني بحضنه وكال
::-ليش نايمة هنا يـروحـــي؟!
آفـروز: مارجـــع؟!
يـوشع: ماكــو خبــر لـهسه
آفـروز: وفقــار طلــــع؟!
يـوشع: اي طلـــع، وداننتظـر خبــر منـه بعـد
-ضحكت بقهــر وجاوبتة
::-والله وگــت ننتظــر رحمـه فقــار
يـوشع: خلــي خلــي والله لـ طلعها مـن عيـــونه
-فتحت عيونــي باوعت للصالة جان جـدي كاعـد وامي ليلى والبنات، گمت مـن يمهم غسلت ورجعت كعـدت يم يـوشع كال جـدي
::-اليـــوم راح يجــي عبـدالقادر وحامد
آفـروز: المـن جايين بعد؟! ابنــهم وطلع شعدهم يمنه
جساس: مايعرفون بـعمايل ابنهم ومـن وصلهم الخبر مارضو الشهادة لله واليـوم يجون حتـى نحلها لهل طـــلابة
آفـروز: چــاا هــلا بيهم
-تمر الساعات وتزيــد نار گلبـي أكثر لأن لهسه مابيـن الميــرزا، العصــر اجو عبـدالقادر وحامد وكعـدو بـ المضيف وجـدي يمة وعمـي أكثـم ويـوشع وياهم
-بقيت كاعد بـ الباب واسمع حديثهم ورغـم غلط ابنهم مداينطون بي ويكولون ما يسوي هيـج، اتنرفزت حيـــل وگمت دخلت عليهم، مـن شافنـي عمـي أكثـم بسرعة كام مـن مكانه اجه اتجاهي وكال
::-آفـروز بابا مو وكتها روحـي هسه
آفـروز: انـي هـــــم اريـد احجـــي عــمو اسمحــلي بـــس هــــاي المـرة
-صاح عليه جـدي وكال
::-تعالــي بنيتي تعالـــي
-سلمت عليهم وكعــدت يم جدي، باوعت لـ يـوشع ابتسم وهز راسـه بـمعنى احجي، اخـذت نفس عميــق وانداريت ع عبـدالقادر وحجيت ويا
::-عمـو الـي اعرفه عنـك أنتَ رجال حقانــي
وتحكم ع الأشيـاء بضميــر وهذا الشي مشهودلك
-هـز راسه وكال
::-الحمـــدلله
آفـروز: ماراح اكلك نريد هيج منكم او تسوين هيـج لـ خاطرنه انــي راح احجيلك المشكله وانتَ احكم بـضميرك
عبـدالقادر: يجرالج بوية يجرالج
آفـروز: انــي تطلكت مـن فقــار بسبب عمتـي وخيبـر اتهمونــي بـ الخيانه وفقــار صدكهم وطلكنـي وهم جبرنـي اطلع السبب مـني كدام جدي وما سمعنـــي ومـع ذلك انـي ماحجيت وتطلكت وانتهــى الموضوع واحـنه مو اول اثنين يطلكون
حامد: الدنيا قسمه ونصيب يا بنتي
آفـروز: بـ الضبط بس مـن ثبتت برائتي لـ فقــار هو رجع وكام يدور فرصة ثانية زين انــي شلون اثق بـي بعـد؟! شلون أمـن على نفسـي ويا وهو باعنـي مـن اول تهمه؟!
عبـدالقادر: حقـج والله
آفـروز: بقيت مبتعدة عنـه ومارجعت، ومريت بظروف صعبة وحادث اخوتي وموتت يـونس وهو لا اجاني ولا شفتة، بزحـمة حــزني ماوكف ويايه يستاهل ارجعله؟!
-دنك راسه عبـدالقادر بـ اسف وكال
::-لا والله
آفـروز: ومـن هـو تصاوب اني رحت وقمت بـ الواجب على حسب الأصول لأن احنـه اهل، وهـو شسوة اجة بـيوم عرسـي سوالي مشكله ويرمي فوك بيتنه وكدام الناس كلها لـو انت ترضاها ع بناتكم؟!
عبـدالقادر: لا والله ما نرضاها
آفـروز: بس رضيتوها ع آفـروز عمو، وسديتو الموضوع واحـنه هم لخاطركم سكتنه لأن انت رجال طيب وما تستاهل إلا الخيـر، بـس فقــار ما اكتفـى وثاني يوم عرسـي لفق تهمه مخدرات للميــرزا وشمرة بـ السجن، لـو الميــرزا مسوي هيج بـ فقــار شنو حكمكم؟!
حامد: احجي حق الله لو انــي ما اقبل الا بـهدر دمه
آفـروز: رحم الله والديك هاي انتَ حجيتها بـ لسانك
بس ياعمـو احنـه شسوينه؟! مجرد حاسبنا قانونياً وجانت اكو كعـدة عشائرية والفصل جان طايح الكم وماراح ناخذ ولا فلس، والكعدة بـس حتـى نرد اعتبارنه بيها
عبـدالقادر: شتردون انـي خادم
آفـروز: شنريد عمـو شنريد؟! نريد الي خاطفة ابنكم ولهسه اثرة ما مبين، هـو بـ السجن وجماعته يخططون ويخطفون ويعذبون حتــى نسحب الدعوة وسحبناها ولهسه الميــرزا ماكوو، كلامكم وفلوسكم شلون راح ترد اعتبااارة؟!
عبـدالقادر: حقج بنيتي بس والله حتـى احنه مانعرف فقــار وين لا اجانه ولا شفنا لحـد هاي اللحظه
حامـد: انـي اعتذر مـنج ومـن الميــرزا وحقج تاخذينه مـن هذا الشارب
آفـروز: هـــل مرة تعــذرنه عمـو ماراح نتساهل بـ اي شـي وياكم والحق راح يصير حقين، حقي وحق الميــرزا
-اثنينهم فشلو مـن تصرفات فقــار واعـرف ما يستاهلون بس يبقى ابنهم ومجبورين يتحملون الي يسوي، كـمل عنـي جدي وصار يحجي ع فقــار، كام يـوشع واشرلي اطلع ويا
-طلعنا برا المضيف لف ايده ع اكتافي وكال
::-عاشت ايدج ما تنلامين بيهم
آفـروز: ســوي شي يـوشع ترا طول هوايه
يـوشع: أذا ما رجـع الميــرزا اليـوم راح اضرب ضربتـي واطيح حظهم وحظ سلالتهم
-هـزيت راسـي وابتعـدت عنـه راجعه للبيت وهو رجـع للمضيف وبقن امي وعمتـي جوري يسألن ويستفسرن واني حجيتلهن مختصر وبقيت كاعدة يمهن ساكته
-وخلصت العصرية واجه الليل وماكو خبـر عـن الميــرزا، ويـوشع هددهم أذا مارجع اليوم راح يسوي اشياء محد متوقعها بـ الرغم نعرف مابيدهم شي بس اكيد الكلام راح يوصل لـ فقــار مـن خيبـر
-امـي ويُـسر رجعن لبيتهم بـ الليل، وبقيت انـي بـ غرفتـي وهزراف مكابلتنـي وكاعده، ابتسمت ع شكلها وحجيت وياها
::-روحــي نامي ارتاحي غزالة
هـزراف: لا لا ما نعسانه
آفـروز: تأخـر الوقت روحـي نامي ياعيني وانـي مابيه شي لا تخافـــين
هـزراف: زين خلي انام يمـج
آفـروز: راح تبقين كاعدة اعرفج روحي نامي بـ غرفتج واذا احتاجيت شـي اني اجيج
-واضح عليها نعسانه وتعبانه ولحيت عليها هوايه تروح تنام يلا قبلت، طلعت مـن يمي وانـي بقيت كاعده وعقلــي احسه يريد ينفجــر مـن التفكيـــر
-غفيت وانـي بـهوسه أفكاري، ماحسيت إلا بـ لمسات حنينه على وجهــي، ميلت راســي وانـي احسب نفسي داتوهـم،
مــن استوعبت هاي لمسات حقيقة مو وهـم فزيت بـسرعه مـن مكاني، رجــف فگي مـن شفت الميــرزا كدام عينــي
-ابتسم بـ تعب وكام مـن الكاع كعـد مقابيلي ع طرف الجرباية وفتحلي ادية وهو يهمــس
::-تعالــــي يبــعد أمــــي وابــــوية
-ضحــكت بـفرحـــة وشمــرت نفســـي بحضــنه وگلبـــي يرجـــف خـــوف عليه
::-چمـرة أفادك احتــرگت عليك أصـفاد
-حضنــي بـكُل حيلة وحسيت بـرجفة ايدة الي محاوطتنــي دافن راســه بـشعري ويهمس بتعب
::-هاي انــه يمــج يا تالــي هلـي يمــج
-بقـى فتـرة طويلة حاضنـي، مره يبوس بوجهي ومره يشـم بـشعري، جنت مشتاقتله وخايفة عليه بنفس الوقت، رفـع راسـي يمسد ع وجهـي بحنيه وكال
::-يمــج انــه لا تخافــين
-باوعت عليه وجهه مليان جروح وكدمات وايده مضمديها ماعرف شبيها، رفعت ايـدي امسد ع وجهه بخوف وسألته وانــي فگــي يرجف
::-تأذيت مــو؟! ليـش هيج وجهك؟!
-حضن كـف ايدي الي ع خدة وميــل راسه باس باطن ايدي وهمس
::-وجهـــي شاحِــب لـ هَجــرج
-ضحكت بـحزن ع حالته وجاوبته
::-يا لـ هجــري غير صاير خريطة
-ابتسم وكال
::-يهــــونلج يابعـد حيلي وحيلي
آفـروز: وين مضمد جروحك وين جنت؟! وشلون رجعت وليش تأخرت؟!
-عـدل كعــدته وهو يسحبني عليه وكال
::-بـ الهـــداوة طرگاعتــي
آفـروز: تريـد تنام تعبان مو؟! جوعان اسويلك اكل؟! لو تسـبح؟!
-حــضن راسـي ع صدرة وصار يمسد ع شعري ويحجي
::-مـــا أريـدن شي بــــس اريدنــج
-سِكنت بـحضنه وغمضت عيــوني بقوة، وبقيت اردد بـ داخلي
::-الحمـــدلله مــن رجعلــي بـخير
-مـرت فتـرة دقايق ابتعـد عنـي وكال
::-عافونـــي بـ المكان الي جانـو حابسيني بـي لـما اجة عمـج أكثـم ويـوشع طلعونــي، ورحنـه للمستشفى ضمدت جروحي ويـوشع سوة تقرير للتعذيب الي حصلته بس خلصنه اجيـتج
آفـروز: لعـد ليـش محد كال؟! ليـش اني ما ادري بشـي؟!
الميــرزا: انــه طلبت منهم ما يكلولج، ردت اشوفــن اللهفه بـعيونج وشفت الأعظـم
آفـروز: وشنـو شفت؟!
-ابتسم وهو يمسد ع خـدي وهمس
::-شـفت لــهفه روحـــج الردتلي روحــــي
-ضميت وجهـــي بـكف ايدة وجاوبتة
::-ماكو هيـج شي
الميــرزا: چــاا خليني عايـش بـ الوهــم
-دفعت ايـده عنــي خجلانه منه ونترت بي اضيع خجلي
::-كوم ارجـــع منيــن ما أجيــت
-ضحك بخفه وكام مـن مكانه وكال
::-چــاا كومــي ساعدينــي اسبـح
آفـروز: تعودت يومية
-ابتسم وما جاوبنــي راح للكنتـور يريد يطلع ملابسه، گمت بسرعه مـن مكاني وحجيت ويا
::-انــي اطلعهن الك
-وكف ع جهه وعينـه عليه بـدون ما يحجي شـي، طلعت ملابس ومنشفه وانطيتهيا، سحب ايدي باسها وكال
::-عاشت ايـدج
-اكتفيت بـ السكوت وهـو طلع للحمام، يمـشي بخطوات بطيئة بسبب الضـرب الي محصلة، ما انطاني كلبـي اعوفه وحـده طلعت ورا دگيت الباب عليه، فتحها يباوعلي بـ ابتسامة عريضه وكال
::-هــااا آفـروز
آفـروز: محتاج شـي بعـد؟!
الميــرزا: لا لــيش؟!
آفـروز: بيـك حيـل تسبح؟!
الميــرزا: اممم لــيش؟!
-دفعته مـن صدرة دخلته للحمام ودخلت ويا ونترت بي
::-بـــطل كـذب أصـفاد
-شـو هـذا دنك راسه وبس اكتافه تهتز مـن الضحك، ضربته بخفه ورجعت نترت بي
::-شبيـك أنتَ؟! هاي فوكاهااا يعنــي؟!
-رفـع عيـنه عليه وكال
::-ياهو الي يجــذب؟! انــه لو أنتِ؟!
آفـروز: بـشنو مكذبة عليك؟!
الميــرزا: ليـش تحاولين تخفين خوفج ع أصـفاد؟!
آفـروز: عمل انساني هـذا واذا ساعدتك؟! ليـش فهمتها غلط؟!
الميــرزا: فاهم صح وشايف عدل الخوف ماكل عيونج أكل
آفـروز: اذا هيـج تعتبرها راح اطلع لعـد
-درت وجهــي واريد اطلع، لزمنــي مـن ايدي بـسرعه وكال
::-مثـل اول مرة بـس الدم الجامد
آفـروز: ماريد اساعدك بعـد
-بقـى يباوعلي بنــظرات توسـل، اخـذت نفس عميــق اصبـر نفسي وهزيت راسـي بـ اي، ابتسم وعاف ايدي، نزع التشيرت واحـس صاعقة وكعت ع گلــبي مـن شفت كمية الجروح الي بـ جسمة
-رفعت ايـدي الترجف اريـد الزمهن وتراجعت، تعذيب بـشع مجرحين كـل صدرة جروح منها خفيفه ومنها عميقة، حسيت عليه حضـن وجهــي بين كفوف ادية وهمـس بغصـة
::-معـزتج تشبه جروحـــي
-غمضت عيوني وجاوبتة
::-جــروحك راح يجيها يوم وتختفــي
الميــرزا: وياهــو اليخفي جــرح روحـــي
-ميلت راسـي وسألته
::-شلون راح تسبـح؟! راح يلتهبن
الميــرزا: ماعليها شي بس اكمل نعقمهن
-هـزيت راسـي ونضفتله الدم الجامد بـ هـدوء متجنبة اذيته، طول ما انـي انضفله هو صافن عليه وكال
::-ليــش هيـج سويتـي؟!
آفـروز: شسويت؟!
الميــرزا: ليـش خضعتيله وسحبتــي الدعوة
آفـروز: كمل ونحجــي
-هـز راسه وسكت لـما كملتله وطلعت وهو سبـح وطلع ورايه وماقبل ياكل شـي وكال
::-ما اشتهـي هسه
آفـروز: زين اعقملك جروحك؟!
الميــرزا: راح اتعـــبج
آفـروز: تردلياهن بعـدين
-ابتسم وسكت، وانـي نزلت للمطبـخ جبت علبة الأسعافات الي مخلين بيها گطن وتعقيم وبقية الأشياء الطبية الي نحتاجها وصعدت عليه، تربعت كدامه وبلشت اعقمهن اله جرح جرح
-حسيت عليه يلعب بـ اطراف شعـري وكال
::-احجيــلي؟! ليـش سحبتــي الدعـوة؟!
آفـروز: ماكو شــي نسحب جانت لعبة
-رفعت عيني عليه مبتسمه وهو مضيگ عيونه وكال
::-بـس فقــار طلع؟!
آفـروز: اي خدعنا بـ سحب الدعوة حتـى يطلع وانتَ ترجع النـه ويرجع فقــار للسجن، وهل مره بدل التهمتين صارن ثلاثه تهــم، تهديد والشروع بـ القتل، ومخدرات، واختطاف
-ضحك وكال
::-شجاي تحجين يطرگاعة؟!
آفـروز: عمـي أكثـم رتبها واتفق ويه ضباط وويه القاضي الي يعرفة وعرفـو فقــار الي خطفك وعدنه دليل ع هـذا الكلام ورتبوها بـسرية تامة على اساس نسحبت الدعوة بس مايـدري المصيبة الي وكعت على راسـه شكبرها
الميــرزا: تحجين صدك؟!
آفـروز: وغلاتـــك ما حجيت إلا الصــدك
-لزم ايـدي باسها بقوة يضحك ممصدك وكال
::-وروح امـــي لـبوة ومو اي لـبوة أنتِ طرگااااااعة
-ابتسمت وكملت تعقيم جروحه بعـدها ابتعدت عنـه طلعتله تشيرت مـن مالاته بس عريض
::-البـس هذا راح ترتاح بـي أكثـر
-اخـذه مـن ايدي لبسه، وانـي جبت مشط مثـل كل مره وكفت كدامه ومشطتله شعـرة بـهدوء، وحجيت ويا
::-نام ارتاح خلصنــه
-رفـع راسـه عليه وكال
::-تجـــين؟!
-ابتسمت وهزيت راسـي بـ اي، طفيت الأضوية وغيرت ملابـسي بـ الضلمة ورحت نمت بـ مكاني بقينه فتـرة ساكتين وكسر الصمت بيناتنه مـن سألنـي
::-شــو مــــا جيتــي؟!
آفـروز: يمـك
الميــرزا: لـحضنـي!!!
-بقيت ساكتة وهـو انـدار عليه مـد ايده وهمس
::-تعالـــي يچـمرة أفادي
آفـروز: شو استحي اجيك
-ضحك وتقرب منـي اكثر سحبني عليه وكال
::-چــاا انــه اخـذج
آفـروز: راح تتأذة هيـج
الميــرزا: احب كلشـي منج حتـى الأذية
-ابتسمت وسكتت وبقـى هو يمســـد على راسـي، تذكرت الدفتر مالته ورفعت راسـي سألته متنرفزة
::-ترا تكدر تكتب بـ كلام واضح شنو دينونه شنو الأخوب؟!
الميــرزا: هههههه شبيج ولِـــج
آفـروز: تنرفزت والله وفوكاها ارقام لاتينيه شسالفه؟!
الميــرزا: وعرفتــي معناهن؟!
آفـروز: اي
الميــرزا: ولهـيج انــه كاتبهن بـ كلام وارقام محـد يفهمه إلا لبوتــي الشرسة
آفـروز: ساعـدني يـوشع
الميــرزا: بـس جذبن انتباهج الـج، لـو غيرج جان ما اهتم
آفـروز: ليـش ما كلت احـد مراقبك؟!
الميــرزا: ماردت اخوفج
آفـروز: وهسه شسويت لعـد؟! اخذتني لحمام ساونا وعيشتنـي استرخاء ماكو منه حتـى بـ الأحلام مو؟!
الميــرزا: هههههه هــو لسان لــو بيكــيسي؟!
آفـروز: لا تعيدها بـعد ورب الحــق ازعل منـك
-شـدني لـحضنه اكثر، حسيته راح يدخلنـي بـين ضلوعه وهمس يم أذنـي
::-ورب الحــق أحبنـــــچ
-احـس گلبـي صار دمام، غمضت عيونـي بقوة وعصرت تشيرته بـ ايدي ساكته، ماريـد أضعف يمه هيج بـس خجلي مـنه ورجفتـي بــقربة فاضحتنـي، مرت دقايق ورجـع همـس
::-ذابـــت قشــطتنا
آفـروز: طلگنــي گلاس گلاس
الميــرزا: ماطلك
آفـروز: ما التزمت بـ شروطـي طلگنــي
-رفعنــي معدل نومتـي بـحضنه وكال
::-حجــي يفيـدج، ونامي يلا كافي لغوة
آفـروز: راح اخلعك انــه
الميــرزا: اروحـــن فـدوة للـ انــه
ولِــج تلوعيـن گلبــي مـن تحجين جنوبـي
-ابتسمت وسكتت ونمت مرتاحه وهو بـقربي، ماحسيت إلا ثاني يوم الظهر هو يكعـد بيه، وماكعـدت احس نفسـي جوعانه نوم، حسيته يضحك وكال
::-طلعتــي أنتِ المغتالينـج مو انــه
آفـروز: عوفنـي بروح امــك
الميــرزا: مو هـود يريد يحجي وياج عمليته بعد ساعتين
-رفعت راسـي بـسرعه وسألته
::-اتصــل علينه؟!
الميــرزا: اي وكتله نايمة
-گمت مـن مكاني اريـد اطلع للحمام وصاح ورايه
::-ويـن يطرگاعة؟!
آفـروز: اغطــس بـمسبح جساس وين يعنـي ياعيناي غيــــــر اغــسل وجهــي
الميــرزا: البسي شـي يبـعد عيني وعيني
آفـروز: ماكو احـد أصـفاد
الميــرزا: آفـروز
آفـروز: والنبـي ماكو احـد ترا هو جدي وعمي أكثـم ومايصعدون فوك وانتَ زوجـي
-ضحك بـ راحة وكال
::-چــاا روحــي يروح زوجج
-ابتسمت وطلعت غسلت ورجعت غيرت ملابـسي ونزلت اريـد اسوي ريوك لگيت عمتـي جوري مسويه والميــرزا كاعـد يمها يتريك وهي مستانسه بـي
آفـروز: صبـاح الخيـر
جـوري: صباح العافية عمة تعالي تريكـي ويه صَـفد
-هـزيت راسـي وردت اسوي عصير شوفان للميــرزا بـس ماقبل وكال
::-عوفـي اليوم ماريد
آفـروز: ليـش؟!
الميــرزا: مو اكلت بعـد
-هزيت راسـي وكعدت اتريك ويا، وبعدها التمن البنات وجـدي هم اجه كعـد يمنه وفرحان بـ الميــرزا، اجت هنـاء يمنة وحجت مـن وره خشمها
::-الحمدلله على سلامتك
الميــرزا: الله يسلمج
-گلبت خلقتها وكالت
::-أن شاء الله تتعظ
الميــرزا: تدلليــن ام عباس
-انـي وسـدرة ضحكنه بصوت عالي والبقية بقو مبتسمين، رادت تحجي ونتـر بيها جدي
::-كاااافـــي ام هـووود
-سكتت وطلعت ضايجة مـن المطبـخ، كملنه ريـوك واتصلنه ع الولـد وبقينـه نحجي وياهم فتــرة طويلة قبل لا يدخلون للعمليات
-هــارون
-بقينـه يوميـن بين تحاليل واجراءات المستشــفى وصار موعـد العملية بعـد يوميـن، اتصلنه الصبح ع البيت راد هـود يحجي وياهم قبـل لا يدخل العمليات
-جانــو كلهم متجمعـــين يحجون ويانه وطفـر رسـول فوكانه اني وهـود وكاللهم
::-هــااااا يا انـذاااااال
جساس: لسانك حـيوووان
رسـول: اعـذرنـي جـدي مادري بيك كاعد
آفـروز: هـاا سوسـو
رسـول: الف الف الف رحمه ع والديج ع المخده الجايبتها ولـج بـ الطيارة خلصتها نوم عبالك نايم بجربايتي
آفـروز: مـووو تدلل ضلع
-بس خلصت كلامها اندارت ع الميــرزا خزرته وهو يخزر بيها رسـول انفجر مـن الضحك وهـود ضحك وكال
::-استهدو بـ الرحمن يمعودين
آفـروز: هدهد بس تجي تطلكنــي مـن ابن عمك
هـود: هههههه تدلليــن
-بقـو يضحكون ويشاقون ورسـول كل شوية يطفر علينه يحجيله حجاية، وراها غلقنه منهم وطلعنا مـن الفنـدق رايحيـن للمستشفى ورسـول عيـنه بـ تلفــونه
-وصلنـه المستشفى وطلبو مـنه ننتظـر شوية، انداريت ع رسـول وسألته
::-ويامن تحجــي؟!
رسـول: ويه اختك
هارون: لا تصيــر ****
رسـول: والرسول الأعظم ويه اختك
-ردت اضرب وبسرعه رفع جهازه بـوجهي وكال
::-شبيـك أنتَ؟! غير ويه النذلة؟!
-هـزيت ايدي وسكتت، اباوع ع هـود كاعد ويهز بـ رجلة بـ توتر ومن تجي عينه بعيونه يبتسم ويدير وجهه، مـن صاحو اسمائهم حتـى يتجهزون للعملية كام رسـول مـن مكانه حضنـي وكال
::-شـو انـي خايف ع نفســي
هارون: لا تحجي هيج ان شاء الله سهله
-حسيته حضني اقوة وكال
::-اشبع مني اشبع خاف ماطلع ولك
هارون: تاكل خـ** وغصباً عليك تطلع
رسـول: بروح ابوك اذا ما طلعت بوسلي امي
هارون: استحي ولك شبــوس منها بس اذا تريد ابوسلك اختك عادي
-ابتعــد عنـي يضحك وكال
::-اكثــر شي مكروهه بـ هاي الدنيا مـن تنطي اختك لـ صاحبك
هارون: راح انطيك اختـي حتـى نتعادل
رسـول: اخذلي زعطوط شسالفه
هارون: تروحلها فدوة نعال
-ضربني بوكس بخفه وكال
::-اي والله
-رجع حضنــي وكال
::-ولك يمكن ماطلع اني
هارون: يابة هسه واذا ما طلعت جلب وفطس
رسـول: كون اموت وارجع اعيش واشوف حالك على هـذا الجلب
-دفعته عني اضحك وماخذين الحجي بشقه، رجع على عمي جاسر يحضن بي وعلى هـود هم حضنه وكال
::-هارون بـ مكاني يجفص بـ مصارينك اذا ما طلعت انــي
هـود: كلشـي ماعليك مثل الصل
رسـول: دير بالك ع چبـدي
هـود: هههه بـ الحفظ والصون
-ابتعد عنه ومشى ويه الممرض واني حضنت هـود
::-تكوملنه بـ السلامه
هـود: عينك ع اخواتك هارون
هارون: انـي عيني ع نفسي وبس اعذرني اطلع انت وخلي عينك عليهن
-ضحك وابتعد عنـي طبطب ع كتفي وراح ورة رسـول، وبقينه كاعدين انـي وعمي جاسر مقابل غرفة العمليات
ومــرت 5 ساعات عـدل يلا طلع دكتـور مـن غرفة العمليات وطمنه ع وضـع هـود وكال
::-حالتة حالياً مستقرة اذا استمر هيج كلش زين
هارون: ورسـول؟!
الدكتور: يطلع الدكتور الثاني يطمنكم على وضعه
-عافنة وراح وبقينه كاعدين ننتظر خبـر على رسـول الي المفروض نعرف اخبارة قـبل هـود
-مرت نـص ساعه وصارت ضجة كدام غرفة العمليات وطلع واحـد مـن الممرضين يركض، احس خرطت العافية وطلعت اركض ورا اريد اعرف شصاير
-عمـي جاسر ويانه ويصيح يساله شصاير بـ العربي بس الممرض ما يفتهمه وانـي احس كُل اللغه الانكليزيه طارت مـن عقلي، اخـذت نفس احاول اهدأ مـن نفسي وسألته وصدمنا بـ حالة رسـول، هزني عمـي جاسر مـن ايدي وكال
::-شبي شصايييير؟!
-فركت وجهي متوتر وخايف عليه وجاوبتة
::-صاير عنـده تخـثر بـ الــــدم
ومسببله انسداد بـ الاوعيه الدمويه الرئوية
بينــه وبيــن المـــوت شعــرة عمــي
َ◄يتبـــــع.......
▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫
َ
َ
◄التصويت يا عباد الله 💔
وتعليق حلو مثل عيونكم
◄التنزيل بين يوم ويوم 💚
◄تابعــو حسـابـي ع الأنستــا [ itsara.kh ]
قناة التلي itsara105