روح في بحر الظلام

الحلقة التاسعة عشر

روح في بحر الظلام

____ الكاتبة بحر _____

بنات كل اللي تمر من هنا ارجوكم لتنسون التقييم

بالنجمة والتعليق بين الفقرات حتى تسسولي واهس اغرقكم بالبارتات🙈+اضافة الحساب لطفا

⭐🌟⭐

،،،،،،،،،،،،،،،،،،،،،،،،،،،،،،،،،،،،،،،،،،

لا بأس ان تكون لغيري فقط كن بخير

وانا وقلبي

سنداوي جراحنا بمرهم الذكريات

سنواسي بعضنا بأشعار الشوق

ولن يسمعنا سوى عقل عاجز عن

عن قيادتنا للصواب

بعد ان ضعنا في بحر جنون العشق المهلك

كلمات بقلم✍️بحــــــر

_____________________

رانــيا

انصدمنة اثنينة من شفنا عمامهه هجمو عليهه صار صوت صراخ عالي

:كووومي كووومي امج ماااتت ششكو ضالة وححدج هناا بعد امششي يلاا بعد عيب ضلتج ولو تربية منوو انتي ام زواج السر لو غيرهه

اني جنت لازمة سرى بخوف واوخر بأيدة بس المقرف حيل شاد ايدة على زندهة و

مشمش ادك على ضهرة وتصرخ بقهر :لككك عوووفهههه الحقير الحمااار امهه مااتت مااتفهم لييش تضضربهه حقييير

الثاني سحب مشمش من شعرهه ووكعهه بالارض انضربت ايدهه بطرف الباب نزل الدم منهه انا شفت الدم وانا تخبلت

ررانياا:سسسفلةة ادببسسسسزية قنناادر ليييشش ضرربتهه ماعندك رجولة يا تايهه اانعل ابووووك انعل اهلللك احجي واشمر عليهم غراض

انا اصيح وهم يصيحون كمت اي شي كدامي اااشمرة عليهه اجا السمين ايريد يضربني وانسحب من دشداشتة بقوة وكعتة بالارض دخلو مرتضى ووياه ولد ما اعرفهم ملخوهم تملخ وطلعووهم سحل ومشمش تبجي وتتفل

ركضت حضنت سرى اللي كعدت بصف الحايط بجيتهه تقهر بجية يتيم

اجا مرتضى يركض كعد كبالهه بهلاثناء اجت بنية

منو رانيا

:اني
:حبيبتي هاي ولد برى يكول خل تجي تأخرنا

مرتضى يحجي وياهه بهمس ماينسمع اني طلعت بهدوء لكيت مشمش بالمطبخ تغسل بأيدهه من الدم والبنات يمهه يشجعنهه عفية بالسباعية عفية وعفية يبووو عود هي عايزة وانتن تشجعنهه

رانيا:بنات اني لازم اروح ماما قبل شوية طلعت من المستشفى والله وهسة زياد برا، بس عفية ديرو بالكم على سرى واني احاول اجي يمهه

حضنتني مروة:يگلبي الف الحمدلله على سلامتهه روحي لا تخافين عليهه غير اختنة هي

اشرت لمشمش هم سلمت وطلعنة، بيتهم مليان عالم جيرانهم واصدقائهم وبرى مسوين مثل الخيمة چادر مالت فواتح طلعنة نتختل واستقبلنة هتلر ززمانة

يمشي يعرج ويدردم

زياد:مخخابيل طاح حضج اني بالكوة امشي كولي كلب منتضرني هسة زين رجلي گامت تصل عليه

:زياد والله كلبي حيوكف من القهر فدوة اسسكت اصلا حتى طلعتنة عيب

:ددمششي امشي صايرتلي راعية واجب

مشمش:زززيييااااد لوو شاايف... مخليتهه تكمل كرصتهه وخزرتهه.. افتهمت عليه وسكتت

رانيا:ءااا اي خطية سرى ملخت نفسهه

مشمش:اي اي ملختهه ملختهه تملخ

وكف ودار علينة يباوع مستغرب هز ايده وكمل مشي

بالطريق رن موبايلة رفعهه كال... هذا رقم غريب... رد

:الووو... بعد رووحي صووتج.... بس علكيفج فدوة خل افتهم.... لااااا لاااا دخيلج لاااا... لاا فدوة اصبريلي هسة هسة اسويلي جارة... اسم الله عليج منااي فدووة لا تخلينهم سوي شي دخيلج

:امششششوو امششووو سريع للبييت سبقووني اني ماكدر امشي اذا بابا بالبيت لا تخلووو يطلع

:شصار زياد فدووة احجي خوفتني

:ووولججج امشششي بابا لا تخلي يطلع جاي وراج اني

خطية رجلة مبهذلة حالة اعاقة جدا حقيرة جان يادوب يمشي ببطئ ولما احتاج يمشي بسرعة خانتة رجلة

ركضت لكيت بابا هسة يريد يطلع شافني عاط بوجهي

:وووين وووليتن سسويتنهه طووالة فوووتي يم امج خل اشووف ابو الشغل شمالة ماا اتاخى انا

حجيت واني الهث اجيت امشي سريع

:لا لا بابا انتضر زيياد متخبل علينة كال لا يطلع بابا ما اعرف شبي

:شششبي ياا الله بلا انا وين اشرد من زياد عمي بالعباس طلعت ررووحي شلوون ااهههجج واعوفلكم المهجووم

عفتة ودخلت لماما بعدهه نايمة دقائق وفات زيياد اسمعت صوتة وطلعت اركض جان يبجي يبجي مثل الطفل دمرررني المنضر شهااليووم الصعب يااربي والله ماعندي قوة اجرع هذا الكم من المصايب

:يااابه الحكلي فدوة اروحلك ابووس رجلك الحك باجر يعقدولهه يابه امووت والله امووت انت مااتريدني دا اكلك اموووت فدوة سوي شي

بابا من شاف حالتهه تعصب لا كلمة عصبية شوية على حالتة جان واصل حالة من الجنون اعصابة مشدودة بشكل مخيف... تقرب شالة من ياخة قميصة وردم ضهرة بالحاايط

:ولك عييييب ولك ششمخلف انااا حرررمة تتتبجي ورة مرررة ماااتستحي مووو عيييب

زياد بهالحالة ولزم ايد بابا اللي زانكة ياختة ودنك عليهه وباسهه

:ارريدهه ارريدهه دخيلك سساعدني يحجي ويشهك ماتحمل بابا رخة ايدة وحضنة ودموعة نزلت

:والله يابوية توسلت وترجيت ورخصت من قييمتي هانووني والله مو گدامك ششفت شسوو بية يكرهوني يابابا والله مابيدي شي

ماما صصاحت رانيا عفتهم ورحتلهه اركض

ليلى:ششصاير ماما شنو هذا العياط شبي ابوج

:ماكو شي ماما بابا ديحجي وي زياد تعرفي ميتحمل بسرعة يتعصب

:ااختج وين شوو مالهه حس

:هياتهه برة مشمش تعالي ماما كعدت تصيحج... حجيتهه بصوت عالي حتى ينتبهون وميبنون شي كدام ماما لان مراح تتحمل اي صدمة

دخلت مشمش غاسلة وجهه تخفي ملامح البكاء اللي جانت واضحة متتخبا بالماء

ليلى:اسم الله شبييجن ليش هيج وجوهجن مورمة صاير شي رانيا احجي لا تضمين علية

:لا ماما شصاير بس علمود خالة جمميلة الله يرحمهه بجينة ويه سرى

هزت راسهه متحسرة ومدنكة سكتت بقينة يمهه دقايق ودخلو زياد وبابا

عيونة الذهبية اشبه بجرة مليانة ذهب ودم حمراء دامعة مليانة قهر ورغم كل هذا مافقدن جمالهن انرسمت بيهن صورة الحزن الجميل

اقترب كعد يم ماما تمدد وحط راسة بحضنهه

ليلى:صخام الصخمك زويد بسلا باجي على المرحومة

قهقه بصوت ناصي ودنك:لا يوم شنو القضية، الله يرحمهه مو يمهه عيوني متحسسة

:اي مو اعرف ماضيك، من ساعتك حبجي هههههه همزين ماورطتنة وي المرحومة بذيج السنين

عمااد:خااب هووو شجااج المرة توه ميتة عوفوهه وذكروهه بالرحمة

دنكت ماما باست راس زياد وهو لف وجهه بالجرجف اللي كانت متغطية بي

عجزت اتضاهر بالقوة كمت:ما ماما اني حسوي عشة

عماد:اكعدي كلشي لاسوين هسة اروح اجيب لفات.... تمام... عمتهم وكمت طلعت بالطرمة ابجي وادعي

:ياربي دخيلك اررحمنا والله خطية زياد فدوة يارب لو تصير من نصيبة لو ينساهه

ابجي وادعي بكائي بصوت مكتوم، بس بداخل روحي صرخات تهد الحيل، بهذه اللحضات انا حتى كلمات الدعاء ما اعرف اصفهم دعاء مبعثر كلمات غير مترابكة بس واثقة ان رب العالمين يعلم شنو اريد

فززتني ايد لامست كتفي، التفتت وكمت جان بابا يباوعلي، من اللحضات النادرة الحدوث حدثت بهالدقيقة، بابا اقترب مني وحضني وحط راسي على صدرهه

:كافي يابابا فدوة اروحلكم كافي والله تعبتوني ششبيدي وما اسوي بس فهميني

كمشت بقميصة من ضهرة وزدت بالبكاء

لحكتنة مشمش صاحت هلوو هلااو باع شلوون حاضنن بننته لعدد واني لكيتوني بالزبل موو

واكفة متخصرة وتهز بأيدهه مدلهه بابا ايدة حضنهه وياي، وواني مشاعري اشبه بوردة نبتت بوادي ذي صخر قليل الماء واجاها الغيث فرحة على غرابة

كان رعاية الله واستجابة الدعاء هي هذا الحضن البسيط شكد غير نفسيتي حضن من والدي من ابوية احجي بداخلي واني اشم ريحتة الطيبة، ليش بابا ليش حارمني من حنانك ششكد حلو لو يومية تحضني حتى هموم متبقة عدنة

مشمش:بابا وخرهه دمرت قميصك سعابيل

اني كبل كمزت فشلانة وامسح بالقميص لا بابا والله هاي دموع دموع والله

هم يضكون واني فشلانة كال بالمزح. هو اني هم صووجي هيج احسسلك ديلا بلا
رانيا:دموع دموع والله

مشمش:يادموع غير شفتج، هاي سعابيل بابا لا تصدكهه

رانيا:لج دموع والله العضيم دموع

احجي من كل عقلي وهم سكرو من الضحك
لحضات لطف من الله، رب العالمين انو وصلنة مرحلة مؤلمة من القهر ونشر علينة الطمئنينة بهالضحكات

عماد:يلا اني اروح اشوف هذا شيريد، واجيبلكم عشة وياي ما اتأخر... طلع واني رجعت لكيت زياد غافي بحضن ماما وهي تمسح على راسة

__________________

منــــــى

فتحت عيوني بالكوة وكأن براسي سيخ حديد الم مو طبيعي رفعت راسي من المخدة لزمت راسي بأثنين ادية بعدني مامستوعبة شي

رفعت راسي فازة من لحضة الادراك، اني بغرفتي شنو صار زياد مات اي مات سمعت صوت الطلقة صحت بصوت عالي زززياااااد وركضت متوجهه لباب الغرفة

اعت بالباب مااينفتح قافلي عليه من الصياح صار الالم مضاعف براسي ادك على الباب بثنين ادية

:ووووينننكمم فتحووووولي البببباااب ماااامااااا فتتتحييهه لللبااااااب الله ليينطييكم فتتتحووووهه

اباوع يدة الباب تحركت ابتعدت فتحتهه ماما وعلى وجهه مليان حقد وكره ناحييتي تقربت مني مسرعة ضربتني كف وكعت بلارض دنكت عليه وشالتني من شعري.... واني ابجي واصيح ببسسس افهمج ماما فدوة

فاطمة:ولج ااناااا هييج صلااافة مااامرت علية هي ك..... س........ هالكدوتج ولاعبة لعب لووو كبرررتي شششسسسوووين

تحجي وتضرب على وجهي نزفت خشمي وحلكي ودددم .. اريد احجي ما اكدر، لحد ما دخل بابا يصيح سسحلة مني بررا

كرفصت بصف الحايط ولميت رجليه لصدري كفشتي شكبرهه صارت امسح بالدم من وجهي دخل بابا

:كح..... تسسمعيني زززين ولج انااا من اليوم بري منج مااعندي غير بنية وحدة والله وبالله اسسمعلج نفس هناا كبرج يصير بغرفتج.. يومين ويعقد عليج محمد اررريد اااسمع نفسسس منج انهيييج والقران

انا سمعتة وانا انهارت اعصابي زحفت بسرعة جلبت برجلة ابوسهه.. لاااا لااا بابا فدددوةةة والله ماتسسمع صووتي اسسجني هنا بالغرفة الله عليييك انطاني رفسة صارت طرف حذائة بكتفي

الالم ماااينجرع ضليت بس اصرخ وحدي طلع وقفل الباب عليه من برى

بقيت بمكاني اون بصوت عالي وجعا وقهرا ردت بس شي يسكن الالم اللي براسي وجع لا يطاق

مابين صوت بكائي و صوت ضرب ايدي بلارض سمعت صوت نقرات على شباك غرفتي، كمزت بسرعة لازمة راسي بأثنين ادي فتحت الشباك، جانت سهى اختي

بعيون دامعه گالت:شبيج ليش تبجين

:سهى زياد قتتتلوو؟ اني سمعت صوت الطلقة

:لا لا مقتلو بس ضربو اصلا راح رجعوو وي عمو عماد لا تبجين فدوة

:ليش رجع لعد واني شلون بيه، حجيتها وشهكت

:هو مقبل يروح بس عمة ليلى خطية بيهه جلطة، هسة انتي تبجين على زياد لو من الضرب، باعي عيونج شلون حمر

:دبريلي مسكن راح اموت فدوة

:ما اعرفهن كلهن يتشابهن

وصفتلها شكل البندول جابته واجت رغم الموقف استغربت لطافة سهى المفاجأة،

:سهاوي فدوة جيبيلي المفتاح اني لازم اطلع منا ماريد محمد اخاف منه وتلعب روحي منه فدووة طلعيني احجي وابجي بتوسل

:لا لا يمووتج عمو شهاب فدوة لا تنهزمين بعد يمووتوج هالمرة صدك روحي روحي نامي

كالت كلماتهه وراحت صحت عليهه وماردت، اخذت العلاج على معدة فارغة وتمددت، معدتي ما استقبلت العلاج من الجوع والقهر مباشرة ركضت استفرغ،

بالحمام دا اتقيء وجان يندفر الباب ماما خازرتني بطريقة مرعبة
:شششكوو شششصاااير ولج منى ششمخبصة وي ابن ليلى ليش تتقيئين

اقتربت مني شدت شعري بقوة بأيدهه وضربت راسي بالباب... جاااوبي بدون جذذب شمسسويلج ابن ليلى.... بعدها دنكت همست بأذني كلمات مقرفة صعبت عليه نفسي من قوة الاتهام الباطل دفعتهه وضليت اصررخ

منى:عيييبب عيييب حرررام اللي تحججي مووو بنتج انييي شلون هيج تححجييين زياد اششرف منكم كلكم .. كلمات خرجت من فاه مراهقة بلحضة طيش

ضربتني ضرب خلتني اترحم على لحضات قسوة بابا، جانت حيل قاسية، خلصتني منهه سهى تسحب بيهه وتصررخ كااافي كااافي عوووفيههه عوووفيييهه لعد شكد جانت حالتي مزرية خلتهه هيج تنهار كامت على حيلهه ضرت سهى كف وطلعتهه برى ورجعت قفلت الباب

فترة ساعة او اقل، ورجعت فتحت الباب وفاتت هي وبيبي مرأة ثالثة

خفت عبالي راح يضربوني

فاطمة:عيارة وجذب واخاف واوي ما اسمعهه هاي القابلة تفحصج گداك جدتج

هجمت علية جرتني مدتتني، جسمي جان منهك من شدة الجوع والام الضرب ومن شدة الصدمة عجزت اعارض متمددة واني موسعة عيوني بخوف مستغربة ل أي مرحلة واصلة امي من القسوة ما اشفقت علية ولا لان قلبها لضعفي

فحصتني المرة كانت اللحظات اشبه وكأن روحي بجسد نعجة تتعرض للسلخ وهي على قيد الحياة بلا حول ولا قوة ولا تگدر تدافع عن نفسهه بيبي مقيدة ادية بس عيوني تتوسل الانقاذ من امي المتفرجة على وضعي بغضب

خلصت المرة كالتلهه مابيهه شي

فاطمة:الله عليج ام عبد الله تاكدتي زين خاف صاير شي

استمر حديثهم بألفاظ سوقية جدا ، تاركين الجريحة اللي كان تعنيف كرامتهه وانوثتهه اخر حلقة من العقاب على الهروب

طلعو برة واني ابجي بأنين ماعندي القدرة حتى اعيط، لليل جابتلي امي اكل، اكلت شوية معدتي صارت بيهه تقلصات ماكدرت اكمل

تركوني يوم كامل محد حجة وياي ولا ضربني بس ماما تحط الاكل وتروح، خفت من هالهدوء

بالليل انفتحت الباب فاتو ماما وبابا جان لابس دشداشة وبأيدة المسبحة مبين هسة راجع من برة

كمزت وكفت بصف الحايط عبالي راح يضربني، بس اشرلي بسبحتة اكعد كعدت بلارض بمكاني تقدم هو گعد على السرير وماما واكفة يم الباب عاقدة حواجبهه

فؤاد:اسمعيني ولج وحطي كلامي ترجية بأذنج باجر يجي محمد يعقد عليج هسة تفاهمنا والموضوع انحسم وروح ابووي اذاا صار والولد حسس بشي لو عرف بيج رايدة وانفضحت بين عشيرتي وحق علي ابو الحسن بذني ادية اخنگج

الاعرج ابو عين العايبة الفگري تنسينه دوووم جنج ماتعرفينة

منى:انسسسى بابا والله ولا اعرفة بس لا تزوجوني والله ما اكدر الله علييك لا تسسويهه والله خدامة جوة رجليكم اصصير باابا دخييلك جنت احجي بلهفة وقهر

:اشششش اشش اش ولااا كلمة تكدرين كلشي تكدرين امتي الشردتي من نص بيت ابوج ساالفتج مال.....
حتى على اختج ما أمن يمج اخرر فرصة الج تنقذج من شهاب باجر ترضين وانتي مثل النعال

التفت على ماما :وهاي منا لباجر سويلهه جارة خففي الاثار والورم،، ماعليك بالصالون يعدلونهه كلة يتغطى هو ، عقد دقيقتين يلبسون الحلقات ويروح ماينتبه

باوعلي نضرات عتب وحزن ودار وجهه وطلع، اقتربت مني ماما تهديد ووعيد في حال رفضت هيج اسوي وهيج اسوي هوواي كلام جارح تعب روحي وذبل ورد احلامي

ختمت كلامهه بحبايتين جبرتني ابلعهم عرفت فيما بعد انو هم كانو منوم، طلعت من الغرفة، ضليت الوب محتارة شأسوي وشلون احلهه مراهقة بعمر صغير قرر القدر ان قلبها يذوب عشقا في محبوبها البعيد

گاعدة وعقلي يقارن بين زياد ومحمد اويلي فرق السماء عن الارض، حبيبي جميل ورشيق جسمه متناسق طولة يناسبني عيونة الاعشق لونهم اللي يهدأ روحي عشقة اللي بكائه على فراقي همساتة اشتياقه

ما اكدر حتى افكر اكون لغيرة شعوري مثل شخص عايش ودفنو بتابوت اختنكت من الدنيا بكبرهه

ليش هيج هو مو ابن اخوهم ليش هيج يكرهونه اسألة ونعاس قاطعهم صوت نقرات على الشباك عرفتهه سهى ركضت فتحته

:فدووة دبريلي مووبايل ابوس ايدج جيبي الموبايل

:يااااا لعد اني ابيش العب

:لج عيني والله هو الج بس اتصل منه وارجه وداعة بابا اركضي فدوة.. الله هداها وراحت جابته اتصلت بزياد حجيتلة كلشي بالتفصيل وكان. صوته علاجي. احجي وابجي واحس برجفة كلبة ختام المكالمة كان بكلماتة

زياد:لا تخافين فدوة.. منى الله عليج لا تبجين والله راح اسوي كلشي شهاب اذا يريد ابوس ايدة اسويهه لخاطر عيونج والله

غلقت الخط بوجهه من سمعت صوت ماما

:لج سسسهى مو گلتلج لتوصلين يم هاي ال........ امشي امشي اني قبل متوصل للشباك ركضت لفيت نفسي باللحاف وكان نايمة من زمان باوعت وسدت الباب وهي تهددهه بعد متوصلني دقايق عدت ورجعت سرى ركضت سلمته الموبايل وكرصت خدهه وبست ايدي، لان ما اكدر ابوسهه فتحات الشباك ضيقة...

دمعت عينهه وحجت

:اني اسفة منى
:على شنو يروحي اصلا اني لو بيدي اكلج لو مو انتي وين اكدر اتصل اني
:مو ءااا ءاا اني دعيت عليج متصيرين لزياد هواي دعيت
:عزا بعينج لج لييش لييشش
عقت حواجبهه بضجر وجاوبت:مو اني همات احبة لزياد واريد اتزوجة وبس اريد اسولف وياه بس هو يكرهني لان جنت افتن بس انتي يحبج

:عزززاااا، هااي شدتحجين لج انتي طفلة عييب وحرراام هيج تحجين روحي روحي نامي

:سامحيني فدوة بعد ما اعيدهه والله
:سامحتج بس بعد لاتدعين فدوة ادعيلي كون ما اتزوج محمد والله اموت اذا صارت صدك ويلا روحي بسرعة لتشوفج ماما وشيخلصني

تنهدت وراحت... ياحقيرة اكول تكرهني وتفتن علية يمه اسم الله زيادي غير اذبحك اذا صدك تحب غيري

ماحسيت على روحي حتى شوكت غفيت

فزيت على هزة قوية بجسمي

________________

ســـرى

فزيت بالليل على اثر حلم ماما جانت كاعدة يمي وتمسح على راسي، گعدت اتلفت يمين وشمال ادور عليهه جانت الغرفة ضلمة بس ضوء خفيف جاي من الصالة، بكل يأس استوعت انه كان مجرد حلم كعدت على سريري وحضنت نفسي ابجي بصوت مكتوب خانگة شهكاتي بأدية لان شفت مرتضى نايم بغرفتي بلارض كسر خاطري ماردت يصحى واضح علي التعب من طريقة نومه

بقيت استعيد الاحداث الحزينة بذاكرتي بعد ما اجت الممرضة لمرتضى تركني وراح وراها يركض بغضب وخالة تركض وراهم اشرلهه ترجع ابتعدو عني اشوفهه تأشر وتتوسل ان يسكت ويرجع راح مرتضى واني كاعدة مقابيل الممر المؤدي لثلاجة الموتى

بين الحزن والقهر والخوف شنو ديصير دموع

:شصاير شنو گالتلة وراح يركض هسة دنطينة خبر والله خبلني هاللولد

بس ابجي ما اكدر ارد بكلمة، تقربت مني حضنتني

فترة من الزمن ورجع مرتضى ووياه شرطة اثنين لكن ملامحة غضب مو حزن خفت منه كعد كبالي ولزم وجهي بأدي

مرتضى:اسسمعيي اسسمعي ورركزي وياي كلام حارس غرفة الانعاش تتذكري

يحجي وفاتح عيونه بقوة ولازمني من وجهي هزيت راسي اي كال والتهديد تتذكري.......اي اتذكر مرتضى شبيك شصاير

يوم تتذكرين كلشي موو

:ليش هو كلامة ينسي بس ليش بس لا رافع عليك دعوة.. حجتهه وضربت على خدودهه

:لا يوم لاا بس تعالي اريد كلشي صار  تحجو للمدير حالا

:سراوي فدوة اروحلج الموضوع خطر والكلام راح يتسجل ويتقارن  ويه اقوالي كلشي صار تكولي بالحرف

واحد من الشرطة كال ماتخاف انشالله احنا اخوتهه بس شدي حيلج وتفضلو ويانة

كام مرتضى من يمي واني عيوني تراقب اباوعلة يأشر ويتوسل بس ما اسمع بعيد عني بعدين الولد طلع موبايلة اتصل واشر لمرتضى علامة اوكي بأيدة

حسيته ارتاح مدلي ايدة من بعيد كمت رحت لزمتهه وخالة ويانة والشرطة اثنينهم گدامنة يمشون

لزمت ردن قميصة وهو عصر ايدي يطمني مشينة مسافة بممرات المشفى الى ان وصلنة غرفة شفت الحارس كاعد والمرة الهمست المرتضى وهواي شرطة كال جاهزة اشرت كلت اي واني ارجف ولازمتة حيل

كعدت على الكرسي وخلف ابمكتب جان اكو رجال بمتوسط العمر يرتدي ملابس رسمية وواكف يمة عسكري بس واضح رتبته مهمة ضابط او هيج شي لان فارض شخصيتة

شغلو الة مسجل كلت كلشي صار وبعدها خالة رادت تحجي بس الحارس انجن كذذب كذذابين مااصاار هيج.. اني من خوفي جنت مركزة ويه الكل فجأة
لمحت الضابط رفع حاجبة و اشر براسة لواحد من الشرطة، ذاك مباشرة ضربة كف على وجهه

الضابط:اني مو كلت ما اسمع نفس

:صار سيدي

سكت وكملت خالة كلامهه

الضابط :اخذهم وروح الباقي علينة

اشرلنة مرتضى يلا لزمني من ايدي مشينة متوجهين لمكان ماما، على العياط التفت شفت الحارس مكلبج بأدين الشرطة وماخذي برى والضابط ورا ويضرب بي بعصا سودة بأيدة

سرى:مرتضى ششصاير

:يعيون مرتضى ماكو شي گاله وبجة وحضني كدام العالم

ام مرتضى اشتد بكائهه هم جانو يبجون بس مو بهالطريقة.... استغربت بس شهكاتي ماتنطيني مجال استفسر ابجي مثلهم واكثر

كال امي للبيت نجيب اوراق محتاجيهه ونجي حتى نطلعهه.. رحت وياه وصلني وراح بسيارتة كال شوية وارجع بس اشوف ابو الاستنساخ

راح واني رحت جوة لغرفة ماما اصيح ماااامااااا انتي تسسسمعييينيي ررروووحج وياااااي ماما

صوتي بلش يختفي البحة صارت قوية..دخلت علية رانيا لو احس هووى وفات بريتي ووجهه مليان حزن وموااساة اختي وحبيبتي شكاية همي

انا ورانيا تؤم الدنيا مو بطن الام كل تفاصيل حياتي يمهه وكل تفاصيل حياتهه يمي حتى شنو تاكل شنو تحب شنو تحس وهي كذالك تعرف كل تفاصيلي

طلعني من ذكرياتي الصوت اللي صدر من السرير بسبب جلوس مرتضى على سريري

مد ايدة يمسح على راسي عرفتة هو بس بقيت راسي مسنود على ركبي مارفعتة

:ليش كعدت ماسويت صوت اني

:صوت حزنج بس ضوضاء تفزز الميت مو بس النايم

:مرتضى لا تضم علية سولفلي كلشي شثار بالمستشفى

تنهد وغمض عيونة:اسولفلج وعد، بس هسة ما اريدج تفكرين تخلص الفاتحة واسولفلج كلشي

قلقلة واريد اعرف، لكن التعب اخذ مني وضعف قوتي

هزيت راسي وبقيت على وضعيتي لامة رجلية لصدري

باوعلي وعض اسفل شفتة بحيرة وتردد، وگال:تردين تناميم بحضني

:لا مرتضى شأنام بحضنك ناقصني حجاية بعد

:تمام راح اكعد وحطي راسج على رجلي اللعب بشعرج حتى ترجعين تغفين، اني تعبان حيل وعيني متاخذ نوم وانتي گاعدة

كعد بصفي واتكأ على تاج السرير ومد رجلي اشرلي نامي باوعت بعينة وحطيت راسي على رجلة  ونمت بوضعية الجنين ايدة صارت تتخل شعري لو يسحب الشعر بخفة بين اصابعة صار تركيزي وي حركات ايدة الى ان غفيت

ثاني يوم كعدت هو ماكو وراسي على مخدة العزا او الفاتحة شي مؤلم يوجع القلب تجي نساء يحجون بصورة النعي كلمات تخليني انهار، تدمرت كل مجموعة تجي يكابلوني يبجون على حالي وينعون رثاء الام صار وكت الغدة تعبو وهم وتوسلون بيه اكل لو اشرب دوة ماكدرت رغم صار هدوء بس العبرة بقت خانكتني

صار العصر ونفس الحالة بكاء ولطم واذية نفسية وجسدية، الى ان بعد اذان المغرب قرر جسدي انه يرتاح غصب عني، فقدت الوعي واني بنص مجموعة جديدة من النساء جاية تواسيني

----

____________يتبع

✨انتظر تقييمكم وتعليقكم وتشجيعكم بفارغ الصبر🥺🫂 ✨

والباقيات الصالحات
بسم الله الرحمن الرحيم
لا حول ولا قوة الا بالله
سبحان الله وبحمده سبحان الله العظيم

تفاعلكم سبب استمرارية الرواية🌹

حسابي الانستغرام

احبكم بگد العراق🙈💞