أُخْفيكَ عنهم بعيداً بين أعماقي
ويفضحُ الحبَّ لوعاتي وأشواقي
وأُخبرُ الناس أنْ لا عِشْقَ يسكُنني
ويقرؤونك في صمتي وإطراقي
مُلَبَّسٌ بكَ مسحورٌ طغا شجَني
ولم أجِدْ ليَ في طِبِّ الهوى راقي
أقولُ إنّي بريءٌ منك عن ثِقَةٍ
ويلمحونك في وجهي وأحداقي !!
...أغار عليك وأقسم لا أغار
ويدري الكون أجمع كم أغار
فإن همست شفاهك باسم غيري
شعرت بأن همستها انفجار
وإن قرت على عينيك عين
وددت لو ارتمى فيها شرار
وإن فر الحوار إلى صديق
وددت .. دعوت.. لو مات الحوار
لشاعرها
بقلمي شذره
عذباء :اني شسويت يربي شسويت
شلون ضعفت وعترفت لوادي
شجاني شصخمني انطيته امل تا يجلب بيه
كمشت راسي افتر بالحجره مصدومه من نفسي
گعدت بالگاع وابجي
انطفت الكهرباء فزيت مرعوبه
اني اخاف من الظلمه گمت تلمست الباب
فتحته وطلعت وگفت يم المحجر ادحگ
على ربعنه من فوگ كلها شغلت ضوء التلفونات
ظليت بمكاني ليما شغلو المولد
فتريت تا ارجع بحجرة امي
تصادمت ويه وادي تخطيته ومشيت
وجان يكمش ايدي گمت اتلفتت حواليه
وخايفه
_هدني خن اروح
عساف : عش تبجين
عذباء :ما جاوبته فلتت ايدي منه ومشيت
وهوه يانادي ورايه
عساف :بدلي نفنوفج هاذ ولمي شعرج
عذباء :قفلت الباب افتر واعصر بأديني
حيلي كله يرجف يربي شجاني وضعفت
هاذ صدگ روحه بعد شيخلصني منه
ضربت راسي واحجي على نفسي
غبيه اني وثوله اظل قشمر وما اتعلم
گعدت عالجربايه ابجي والوم بروحي
شلون اطلع نفسي من هاي الورطه يربي
وكفت اسولف لروحي
خوما اظل مسجونه هين
هاي حنة اخويه ما احرم نفسي منها
خن اتصرف جن كلشي، مصاير واتجاهل وادي
جمعت قوتي
گمت عالمراة عدلت نفسي
كحلتي واصله يم اذاني من وره البجي
مسحت وجهي دورت مكياج تا احط
امي ما عدها شي بي خير
واحنه غراضنه كلها بحجرة وادي
نفخت بقهر وطلعت ما اريد هالمكياج
لگيت وادي بعده بره بالصاله
دحگلي وعگد حواجبه رفعت راسي ومشيت متجاهلته جرني من ايدي رصها وگز سنونه
عساف :ما سمعتيني يبنيه
من گتلج بدلي هالنفنوف الأگشر
عذباء :جريت ايدي منه وحجيت بنتر
_عود لا تصدگ روحك زعم احبك وگمت اتأمر عليه
اني جذبت عليك تا بس تهدني
وهسع وخر من دربي
من تزهگني اصرخ والم الوادم عليك
والديجي هسع منطفي كلها تسمعني
گلتها ومشيت جرني من ايدي
سد اثمي وشالني على حجرته
گمت افالت واصيح محد يسمعني كاتم صوتي
الا شتغل الديجي تا هدني
قفل الباب وحط المفتاح بجيبه
تخبلت گمت ادفع بي واحجي بعلو حسي
_انته شجاك تخبلت شجااااك
عيب عليك هالتصرفات استحي على شاربك
تعصب واجه عليه يسولف من بين سنونه
عساف :اني جاهل جدامج يولي
شنهي جذبتي عليه تا بس تطلعين
عذباء : گحزت وره واحجي
اي اني اجذب عليك ما احبك ولا اريدك
انته ضغطت عليه واني بس ردت اخلص نفسي
واروح من يمك
ضحك بستهزاء واجه گبالي
عساف :انتي عايشه نفس الحرب الي عشتها
بين گلبي الي يريدج وينادي بأسمج
وبين عقلي الي يگلي
وينك وين الحب هاي وهـــم
خليك قوي وحافظ على كبريائك
جنت ضايع بين اكبر ملحمه داميه
اعيشها حرت انصر منهو گلبي لو عقلي
عماني تكبري وظليت انجر واجذب على روحي
زعم ما اريدج ليما تمكن مني العشگ غصبن عني
فرگس كبودي وجمر گلبي وذلنييي
عذباء :كافي تعبت من هالحجي
عوفني بحالي اترجاك
گز سنونه وگام يرعد
عساف :يول شنهي اعوفج نهبلتيييي
انتي مزروعه بنص گلبي شفت الظيم واني احبج
بس من طرفي وما فكرت بيوم اعوفج
وهسع عرفت تحبيني انطيتيني امل
لحياتي وياج وبسهوله تگولين عوفنيي
عذباء :ما احبك اني ما احبك افهم عاد
اجه متعصب ضرب الحايط بسدي
يدحگلي وعيونه تلهب
_تحركت يدة الباب واندگ حيل
سد اثمي وادي ما خلاني احجي
فرح : عذباااء انتي هين خاله ليال ادورلج
عساف :ها فروحه هاذ، اني جاي ابدل
احد وياج لو بس انتي
فرح : بس اني
عذباء :هدني وفتحلها الباب
نهزمت تا اطلع كمشني رجعني وهاي فرح ادحگلنه مبهوته سد الباب ويسولف وياهه
عساف : فروحه حدري جوه گوليلهم عذباء جاي تبدل وترتب بروحها هسع تجي امشي بساع
عذباء :فتحلها الباب طلعت وادحگ عليه
ناديت عليها بعبره
_فرح امانه گولي لأمي وادي ساجني بالحجره
خليها تجي
_سد الباب قفله وصد عليه تنهد وحجه بهدوء
عساف :عش تجذبين على
روحج وتكابرين نفس ما جنت اني اسوي
تعبالين نفسج قويه على هاي الحرب
يولي اني نمر الوادي
ما گدرت اصبر لوما يتلاحگني ابويه جان متت
عذباء : مسحت وجهي واحجي ويا
_لا اكابر ولا شي اني ما احبك
خليني اطلع اخيرلك
هسع تخلص الحفله ويجون كلهم يشوفونك
شعذرك منهم فهمني تريد تسويني علج بحلوگ الوادم انوب
ما كافي هسع كلها تگول عليه العاگر المطلگه
_نفخ بقهر واجه عليه
تراجعت وره صار فستاني جوه الكعب
عثرت بي وگعت ردتها حجه
گمت ابجي بالزايد
اجه يهجد بيه كل ما يحاول يكمشني انشط ادينه
_وخر عني لا تجوسنيييي
گعد بسدي تك ركبه ويسولف بهدوء
عساف :انطيني فرصه وخلينه نلصم
اثم شكو وحده حجت عليج
وعد مني اخليهن يتحسرن على عيشتج
عذباء :دحگتله ودموعي تصب
_ كافي لا تهيج مواجعي وتعذبنيييي اكثر
مد ايده تا يكف شعري نشطتها
وصديت بصفحه
عساف :لا تسوين اجان عذبتي
ادموعج ورن گلبي
ذبحني الندم والله ذبحني
جنت مهبول عاميني الحقد
سامحيني وانسي اترجاج
اني هم تعذبت ازيد منج
ومن يوم حبيتج نسيت كلشي
عذباء :وگفت گباله ونترت
شنهو الي تعذبته ازيد مني
وخلاك تجيني حاقد
و تنتقم مني وتعذبنييي
_جر حسره وگف يدحگلي
عساف : ماراح اسولفلج العذاب
العشته وابررلج فعايلي
جنت مريض بالحقد والأنتقام
ما وگفت بعيني برائتج وطيبتج
اذيتج واذيت ابويه واهلج واذيت نفسي
ما جنت متخيل بيوم اطيب من هاذ المرض
بس طبت والله عالجتيني انتي عذبتي
خليتيني اغدي ادمي
لا تعوفيني اضيع انوب وارجع نمر جريح
مكسور مخذول اترجاج لا ترجعيني عالظلام
حياتي صارلها معنى وياج
انتي الضوه الي بأخير النفق لا تنطفين
وتظلمين حياتي
عذباء :تبسمرت ادحگله وهوه صافن عليه
يبلع بريگه
مسحت دموعي وحجيت بعبره
_ماراح يوافقون اهنه انته تدري عمر شگد مخبل
ابتسم وگرب مني كمش اديني ثنينهم جمعهم وباسهم
عساف :لا تفكرين بعمر علوا كلها نفس گلبه
فكري بنفسج وانطيني جواب اكيد يبرد گلبي
تا اقاتل بهاي الحرب على هدف النصر
بيج مو اجي بالنهايه وتخذليني
عذباء :سحبت اديني منه
كفيت شعري وره اذني ودنگت ابجي
_اني خايفه من رد فعلهم اذا عرفو بيه اريدك
كمش وجهي يمسح بدموعي ويسولف بهدوء
عساف :لا تخافين يروحي محد يجوسج
ولا تگولين لحد انتي رايدتني
خلي هالحرب عليه
انتي يجيج الصافي
عذباء :كمش حنجي ويتنهد
عساف :ارحميني عذبتي وگولي موافقه
واريدك مو گلبي ورم
عذباء :اخذت نفس وهزيت راسي بـ اي
ابتسم وحاوطني بأدينه يدحگلي وينفخ مرتاح
عساف : دخيل الله شحبج
عذباء :دنگ عليه يخط بحاجبي
ويدحگ على شفتي يبلع بريگه
_اندگ الباب حيل فزيت
ليال : عذبااااء وينج افتحي الباب
عذباء : متت بدمي ادحگ على وادي ما داير
بال ظل صافن عليه واني ردت اگع من خوفي
ليال : عذباااء وينج طرش
عذباء :ها يمه شتريدين جاي ابدل
ليال : ادري شنهي من تبديل هاذ يمعوده
صارلج سنه فضينه راح نجيب صينية الحنه
كل البناويت تسأل عليج
عذباء : هاي اني جيت دقايق بس البس
ليال : بساع لا تأخرين
عذباء :سندت ضهري الحايط احس حيلي انهد
وگلبي دگاته الف دحگت على وادي يبتسم
تخصرت واحجي ويا
_اشوفك متعافي ولا همك شي بالله
لو تريد امي تلح الا افتحلها الباب شسوي ها
ضحك وحك لحيته
عساف :عش ما صرختي وگلتي لأمج عليه
عذباء :قابل اني نفسك
انته ما يهمك تكيف عالطلايب
يالله فضني افتح الباب خن اطلع
نفخ ودحگ على نفنوفي
عساف :اني راح اطلع وانتي
بدلي نفنوفج هاذ ولمي شعرج
عذباء :عش ابدله شبي
عساف :گولي شنهو مابي مشلتح وضيج حيل
مفصلج تفصال
عذباء :شعلي هيه حفلة بنات
واكثرها لابسه ازيد من هاذ
عساف : بدون نقاش ومجايده يبنيه
بدلي هالنفنوف اخيرلج ويا ويلج تطلعين
لابسته افوت بنص الوادم ارعطه وصلتين
عذباء :صفنت ادحگله ورافعه حواجبي
_ هاي زعم تحبني تره مو هيج الحب
_ابتسم ودنگ عليه
عساف :عجل شلون بالله علميني
عذباء :وخرت من گدامه
اخذت نفس واحجي
الي يحب يفرح على فرح حبيبته
ما يحرمها من شي ويسجنها ويخنگها
لازم يصيرلها سند ويضحي علمودها
حت لو جانت سعادتها ويه غيره لازم يعوفها
بحال سبيلها
_ضحك بحس عالي ومسح لحيته
عساف :اي كملي وبعد
عذباء : عش تضحك
عساف :تحضرين المسلسلات هنديه مو
عذباء :صديت بصفحه انفخ
وهوه يفتر ويضحك
عساف :يعني هساع اذا اشوفج تحبين
ازلمه غيري لازم اعوفج تاخذينه.
ومن يزفج جدامي اودعج واروح بعيد
ابجي وادعيلج بالسعاده
عذباء :ضحك وصفگ ادينه
اجه يمي سكت ويدحگ بعيوني
عساف : تعذريني عذبتي اني مو اجان
الي يحط عينه عليج افگسها
والي يحاول ياخذج مني املص راسه عن لشته
انتي مسجله بأسم وادي من يوم انخلقتي
وراح تظلين ملكي اني وبس
عذباء :گالها وطلع قفلت الباب وراه
اخذت نفس ونزعت النفنوف مكافاة شر
ادري بوادي مخبل وينفذ تهديده
سواهه مره وشگ النفنوف واني لابسته
عاد هاذ هديه من ابويه ماريد اخاطر بي
لبست واحد لون بنفسجي فاتح
جان راهي عليه
ومو ضيگ نفس ذاك
رتبت نفسي فتحت الباب
ادحگ ماكو وادي همزين يربي
حدرت ركض
لگيت ربعنه جايبين صينية الحنه گدام دموع
والبناويت تحط بأديها
اخذتني امي بصفحه گشتني برزاله على تأخيري
ما جاوبتها حقها بكلشي
رحت گعدت يم دموع
اجت ابنيه نقشتلها الحنه على كبر ايدها
اني بس سويت وردايه زغيره
خلصت الحفله وكلمن راح لهله
غسلنه ادينه وصعدنه بحجرة وادي بدلنه
عزلت ملابسي جانو منثورين
ولمت كلشي احتاجه هين
مابيه احط غراضي
بكنتور امي تا ما انثول واگوم ادور
حت البنوات جابن ملابسهن علگنها
بالزاويه كملت وحدرت جوه مددت
ظلن دموع وفرح فوگ
دموع :واگفه گبال المراة انظف بعيوني
شگد غسلت والكحل بعده ماراح
فات ابويه شايل الفراش دحگ عليه وابتسم
تخصرت فرح گباله وتحجي
فرح : بس لا تريد تنام هين
ماتروح بالهول لو الربعه
عساف :ليش وحجرتي هاي شبيها
فرح : مجاي ادحگ بيها غراضنه ومكياجنه
عساف :وانتن ما لگيتن بس حجرتي
تسونها صالون
فرح : اي ماكو بس حجرتك فارغه
يالله روح نام غادي
تره احنه نهيط من الغبشه ونجي هين
_عافني اسولف وجان يحط الفراش ويمدد
جريت الدوشگ تا اسحله ما گدرت
شثگلك لخاطر الله
ابويه اگدر اسحله بالدوشگ
عساف :هوه ابوج بس العضام
فرح : لا والله جسمه زين
وانته بس زايده بعضلاتك وكتوفك
وماكو بثگلك بالله شگد وزنك
طگگ رگبته ونبطح يسولف
عساف :شمدريني يولي
ما عندي شغل وعمل تا اوزن نفسي
طفن الضوه من تطلعن
دموع :طفيت الضوه وحدرت جوه
اندحست بفراشي واتثاوب اغفي
عبن من الغبشه گعدت وحيل تعبانه
عذباء :ظليت گاعده ما يفعل يجيني نوم
اتگلب وافكر بوادي والي صار
عشت احاسيس مختلطه خوف وسعاده بنفس الوقت
عفت الخوف مثل ما وصاني
وصفنت افكر بالشي الأيجابي
اني ماريد افارگ اهلي واتزوج بعيد
وجنت اتمنى اتزوج واحد نفس صفات ابويه
ووادي نسخه منه بالشكل والحب والأهتمام
يمكن اذا انطي فرصه
راح يدللني نفس دلال ابويه
قاطعت تفكيري رساله من رقم غريب
فتحتها كاتب
_اني وادي اريد اخابرج اعرفج ما نمتي
_نفخت بقهر ودزيتله
(شسطاك على رقمي
ماكو ثواني وجان يدگ فزيت وانطيته رفض
دزلي رساله انوب
عساف : اذا ما جاوبتيني اجي يمج
عذباء : تأفأفت ودحگت حواليه
كل البنوات نايمات
خليت التلفون صامت
اتصل وجاوبته بصوت ناصي
_ها شتريد سكت فتره وحجه
عساف :اريدج
عذباء :عوف هالحجي هسع
سده يالله وبعد لا تخابر
عساف :ليش يولي
عذباء :اخويه عمر وتسأل ليش
اذا كشفني هالنوبه يذبحني
عساف :دخيل الله شجاج يابه
من زمان عندي رقمج وما خابرتج
ادري بيج خوافه
هسع محد يمج ردت اسمع صوتج
ونحجي شوي ومن تروحين غادي ما اخابرج
عذباء :تنهدت ونمت عالمخده
شمدريك بعدني ما نمت
جر حسره طويله وحجه
عساف :انتي ربيتي على ايدي عذبتي
اعرفج اكثر من نفسج
عذباء :اممم وشتعرف عني انوب
عساف : كلشي اعرف
عذباء : غير تحجيهن شنهي
_بلش يعددلي كلشي احبه من حلويات واكلات
وملابس والوان ما خله
عساف :وانتي شتعرفين عني
عذباء :احم اعرفك ما تحب الباميا والشجر
ضحك ضحكه طويله وتنهد
عساف : بالله زين تعرفين عني ذني
عذباء :احجيلي انته شتحب
عساف : احبج
عذباء :سكتت ما جاوبته
عساف : اگلج حبيبتي
شراح تلبسين باجر
عذباء : نفنوف احمر اخذوليا بالنيشان
ليش
عساف :هذني ثنين حمر واحد نص ردن
والأخر ضيج حيل اهيو راح تلبسين
عذباء :عگدت حواجبي وگعدت
انته وين بالله
عساف : بحجرتي جاي اگلب بهدومج
عذباء : شهگت وسديت اثمي
شسطاك على ملابسي كل عقلك
عساف :يولي لا تنذعرين اني بتت بالحجره
گلت خن اشوف شراح تلبس حبيبتي
عساف : عوف الملابس امانه لا تفتش
والله عيب عليك
عساف :لا تخافين بس شفت النفانيف
ما شفت غير شي
عذباء : عضيت شفتي بقهر
ولطمت وجهي شلون ما شافهن وهنه كلهن بالجنطه
عساف : وين رحتي
عذباء : وياك كافي تفتش يالله سد الجنطه
ضحك وحجه
عساف :سديتها يابه سديتها
عذباء : والله عيب عليك هالتصرفات
نوب تصعد عالطابق الفوگ
وادحگ عالنسوان وهسع تفتش بملابسي
عساف :تاتشوفين بعينج
لأي مرحله من الهبال وصلتيني
اشكال المناسبات صارت عدنه ما واحد بينه فات
جوه كل النسوان نعتبرهن عرضنه وشرفنه
واليوم فتت عالمطبخ اشرب جاي لمحتج بالصدفه
لابسه نفنوف كل فتن الدنيا بي خاف انتي عايزه فتن
نهبلت ظليت متبسمر بمكاني دمي يتفاور
مدري شلون گضبت روحي
ما جيتت عليج بنص الوادم ومردعت النفنوف
دزيت على فرح گلتلها تخرب مكياجج
ادري بيج راح تصعدين فوگ ترتبينه
لفت من الباب الوراني صعدت گبلج
ادحج عليج بس انتي والله ما حطيت عيني على مره غيرج
وگفت وره الدنگه ليما طبيتي عالحجره
عذباء :فكيت اثمي واسمعه
_شهل خطط هاي تره والله تصرفاتك تخوفني
ضحك ضحكه خفيفه
عساف :عوفج من هاي هسع وگليلي.
تحبيني
عذباء : سكتت ما جاوبته
وهوه هم سكت سمعت طگة الجداحه
_بالله مو ورثت جگاره
عساف : اي ليش
عذباء، : طفيها امانه هسع ملابسي
تصير، بيهن ريحة جگاير
عساف : تبشرين يابه طفيتها
عذباء :ليش ما تبطل الجگاير
شنهي فايدتها
عساف : مابيها كل فايده دمار للجسم
علوا الگه شي يخليني اعوفها
عذباء : ابويه مو جان يدخن وعافها
عساف : ابويه عنده صبر واراده
اني ما عندي اذا يطبگن عندي انعمي
عذباء :سكتنه فتره سمعته يجر حسرات
عساف :ايابه شحلاتها ريحتج
خربطت احوالي
عذباء :وين شميتها ريحتي
عساف :بهدومج نومتهن بحضني
عذباء : اهوو امانه عوف ملابسي
جاي تحرجني تره
سكت فتره يتنهد
عساف :جاي اموت عذبتي
مليت واني اجاهد روحي اريدج
يمي
عذباء :سكتت ما جاوبته
عساف : ول يابه سولفي شي
مو ورمتي گلبي
عذباء : شسولف ما عندي شي
عساف : عسما تسولفيلي
على مسلسلاتج الهنديه گولي اي شي
احب اسمع صوتج وسوالفج
عذباء : صفنت افكر شسولف ويا
عساف : يول من ايمت گمتي تصفنين وتفكرين
جان السانج رشاش تذكرين اومن كبرتي وبشرتيني
ومن گعدت يمج جنتي حاطه نفط على راسج
بيج گمل وگمتي تسولفين الشارده والوارده
والتسيان على گولتج سالفته سالفه
عذباء :فكيت اثمي وامتمت
_شهل حجي هاذ
والله مو صوجك صوجي اني الي رضيت احجي وياك خن اسد التلفون اخيرلي
عساف :اواش وين رايحه
خن افطنج بسوالفج تذكرين من اجلتي الدبس
وربج ستر جان حبلتي
عذباء : وجهي صار احمر من الخجل
وهوه يضحك بحس عالي
سديت التلفون منه ودثرت راسي ردت ابجي
من الفشله مو زعم گمت انسه سوالفي،
واجه هالمصگوع ذكرني
دموع :گعدتني خاله ليال عالريوگ
تارستلي الصينيه اشكال
تسويلي لفات وتنطيني
ليال : اكلي زين عثمان يجيب ويوصي
خايف عليج لا ادوخين
دموع :اجت عذباء تمشي وتغفي
غسلت وگعدت يمي
تاكل وصافنه
هاي بعدها فاقده الذاكره
راحت خالو ليال وخاله جوانه ويه جدي
عالسوگ تا يجيبولي بدلة العرس
زعم من البارحه يجيبولي
بس گالو اليوم تجي موديلات جديده
عذباء :رحت فرجت اسناني
وغسلت وجهي احس جسمي متكسر من التعب
ودايخه اخذت حبة راس
وصعدنه فوگ اني والبنوات
فتحت جنطتي ادور نفانيفي
ماكو بس ظال واحد لون تركوازي
شنهي السالفه انذعرت كمت ادور واسأل بالبنوات
كلمن تگول ما شفت
حدرت تا اسأل ربعنه تلاگيت ويه وادي
اباب المطبخ ابتسم وهمسلي
عساف : نفانيفج يمي
عذباء : گالها وطلع بره عگدت حواجبي
ومشيت وراه راح يم المخزن يفحص بالمولد
هوه وصگر ظليت افتر وانتظر بي
اجه عالمغسله يغسل ادينه
دحگت حواليه ورحت يمه
_عش اخذت النفانيف اريدهن
جاوبني وهوه يغسل
عساف : ما انطيهن
عذباء : ليش ما تنطيهن بالله
اخذ خاولي ينشف ويسولف
عساف :ماريدج تلبسينهن ضيجات حيل
عذباء :اجت خاله ديالا وجان يروح
غسلت وجهي وصعدت فوگ عالبيتونه خابرته
ودمي يتفاور
عساف :هلا حبيبتي
عذباء :لا حبيبتك ولا صخام
اريد ملابسي دليني وينهن
عساف :حياتي لا تعبين نفسج
ما انطيهن عفتلج واحد حلو البسي
عذباء :فهمني عش تسوي هيج
انطيني سبب لا تگلي ضيگات
اني ما طالعه گدام الزلم
عساف :النسوان ازيد من الزلم
شايفه المره من تگوم توصف البنيه للزلم
تصورها بخيالهم عبالك شايفنها
عذباء :يالله شهل تفكير هاذ
تره محد سوه سوايتك
عساف :اي صحيح حت اخوج عثمان
ما گبع بنتي من ساسها لراسها
تره اني اهون ما يكون جاي اخليج تاخذين راحتج
بكيفج
عذباء : كل عقلك امت اني ماخذه راحتي
عساف : مو راح اخليج تلبسين نفنوف
وتكحلي هم ما اسولف وياج
عذباء : عضيت اصبعي من القهر والحمس
خلفله عليك ما قصرت لا تحمسني اكثر اريد ملابسي
جاوبني بكل برود
عساف :ما انطيهن عذبه
لحالج تسولفين من تزهگيني اورهن
عذباء :وانته من تزهگني اروح اسولف لأبويه
عساف :اي والله على طاري ابويه
خن نصبر ونشوف شراح يلبس امج بالعرس
اذا شفنا زوقها ولبسها نفنوف ضيج
عود ارجعلج نفانيفج والبسي الي يعجبج
عذباء : هاذ الحجي ما يصرفلي اريد ملابسي
اذا ما جبتهن اخذ من البنوات البس
واطلع بالزفه گدام الزلم
عساف : الضاهر تريديني احرمج العرس
عذباء : شنهي هيه بكيفك تحرمني العرس
عساف : اي بكيفييي
وازيد على هاذ، الحجي من تجي الزفه تلبسين
جبه وما تصعدين غير ويه اخوانج
وهشام بالذات ما اريده يلمح خيااالج
لا هين ولا غادي ابيتكم
عذباء :الضاهر لگيتني على گد ايدك
وصدگت روحك هسع البس من البنوات
حت اذا النفنوف مستر اضيگه واشگه
ومن تجي الزفه اصعد ويه هشام
عناد وياك مبين طاگ غيره منه
ولو تفرع براسك نخله بعد ما اسمع كلامك
_گام يرعد سديت التلفون بوجهه
وگفت اخذ نفس الله يعثرك
طلعتلي هالعرس سم
حدرت من البيتونه
شفت وادي صعد الدرج عيونه تلهب
شافني واجه گاز سنونه
ركضت على حجرته هيه اگرب شي
گبل لا اسد الباب اجه بساع فات
ورجده وراه ختلت وره دموع وفرح
جرني من وراهن ويرعد بوجهي
عساف : عيدي الحجي الگلتي
عذباء :دحگت عالبنوات وعيوني مغورگه
اجت دموع تحاول تجر ايدي منه
دموع : يابه عوفها شسوت
صد عليه گاز سنونه اعصابه نار
شمسويه هاي يربي
عساف : اطلعن بره ولا تخلن احد يفوت
دموع : ما فعلت اطلع عاط بينه
طلعنه ثلاثتنه اني ومهره وفرح وگفنه بره مبهوتات
عذباء :رص ايدي حيل ويسولف من بين سنونه
عساف :لا اطلعيني عن طوري عذبه
ولا تحاولين تستفزينيييي
اذا شفتج تصعدين ويه هشام
وحگ الي خلقج اترس بطنه فشگ
الا اخلي يغص وعليه ما بلغت
عذباء : دحگتله ودموعي تصب
هاي زعم تحبني وهيج
عجل لو تكرهني شلون
هد ايدي وراح ضرب الميز ويحجي
عساف :انتي كل همج اتونسين بالعرس
واني تاكل بيه النار
على اعصابي جارع ابن عمج هين
اهجسه شوكه بزردمي وانتي تريد تجايدين
بيه لا تعبالين اذا فقدت اعصابي تگف بنتي
لو اخوج لو ابويه لو حبي لج
عذباء :نفخ بقهر وضرب الحايط
يفتر وشايط الحجره مجاي تحوي
مسحت دموعي گعدت بالگاع اعبي بملابسي
اجه يمي گعد تك ركبه كمش ايدي ما درتله بال
ظليت مدنگه باس ايدي وحطها على گلبه
عساف :نار واجه بگلبي عذبتي
عساهه ما تصيبج اعذري اعصابي
وتفهميني اني متلوع بيج
جنت اموت اذا اشوف واحد يدحج عليج
من تروحين عالمدرسة وترجعين
اظل الليل كله الوب
مو انوب ابن عمج وياج بالبيت
والله گوه گاضب روحي ما اجرم بي
عذباء : مسحت دموعي ودحگتله
شسوالك هشام تا تجرم بي
نفخ وكمش راسه
عساف :اااخ لا تورمين گلبي
عذبتي خليج بعيده عنه ظلي ابيت عثمان
ليما ينگشر اترجاج
دموع :متت بدمي يربي
هاذ ابويه بالحجره يم عذباء واني والبنوات نلوب مهره تراقب بأمها وفرح حدرت جوه تا من يجون جدي وخاله ليال وامها تخابرني
ونسوان جدي هذولاك محد صعدت فوگ كلها جوه تشتغل وتعزل دگت فرح جاوبتها بساع
فرح : يولي اجه جدي
دموع :گمت ركض دگيت الباب
وطبيت لگيت ابويه گاعد يم عذباء وهاي صاده بصفحه تبجي
_يابه هاذ جدي اجه
مسح وجهه وطلع بساع
وگفت يم عذباء اسأل شكو
شالت النفنوف لگحته عليه
وتبجي
عذباء : ابوج باگ نفانيفي كلهن ودحگي
شخلالي تا البس انوب يهدد بيه يكتل هشام ويفلش العرس اذا ما فعلت البسه
دموع :مغصتني بطني من القهر
گعدت يمها اقنع بيها واتوسل
ميخالف البسي امانه لخاطر لعثمان
مو لخاطري اخاف ابويه يزهگ ويسوي شي يخرب العرس خن بس نصل غادي بالبيت
والبسي بكيفج عناد ويه ابويه
الا يبس ريجي تا قنعتها
مسحت دموعها وگامت ادردم على ابويه
عذباء :تخبل البدله الجابتها امي لدموع
بعدها بالجيس اجت ام الصالون تنصب دموع اطلعت تجنن جنها لعابه
هيه دموعه من غير شي حلوه
عيونها بني مسحوبات وخشمها زغير
وشفايفها ناعمه
جسمها طويل و رشيق
وبشرتها حنطيه صافيه
شعرها اسود سرح يوصل لنص ضهرها
توالم ويه عثمان الله يحفظها ويسعدها
بدلن البنوات كلهن الا اني
كل ما اشوف النفنوف تلعب روحي
حدرت جوه حايره اسولف لأمي لو اسكت
رحت لگيتها عاگده الحواجب
سألتها شكو
ليال : ابوج ما يفعل يخليني اروح بالزفه الا البس عباة واتبوش وبلغني من اظل غادي
لازم ما اگعد ويه هشام ولا اخلي يلمح خيالي
عذباء : فكيت اثمي وادحگلها
حت ابويه غاير من هشام
هاذ عود ردت اشكيله من وادي
الحمد لله والشكر
تأفافت وصعدت فوگ لبست نفنوفي التركوازي ختيار وادي اعدل بي وكاشه روحي اكره هاذ اللون
كحلت بداخل عيني خفيف وحطيت
مسكاره لبست الربطه السوده
طلعت عبالك رايحه مسيره على عمه كريمه
مو على عرس اخويه
حدرت جوه عالمطبخ اشرب مي
فات وادي وعگد حواجبه يدحگلي
تجاهلته وصديت بصفحه
اجه يم الثلاجه كمش الباب ويسولف
عساف :هاذ النفنوف الگتلج البسي
عذباء :اي هوه
حجيتها من گفه خشمي
وطلعت صعدت يم دموع
گعدت عالكرسي اگلب بتلفوني
وجان يخابرني وادي
انطيته رفض واتصل انوب كل ما يخابر
انطي رفض اخر شي دزلي رساله
عساف :لخاطر ابويه اذا تحبينه جاوبي
عذباء : فتحت خط ورحت يم الشباك
اسولف بحس ناصي
_ها شتريد
عساف : عج الله هاذ النفنوف الگتلج البسي
عذباء : اي والله هوه شبيك
عساف : اشو طلع حلو
عذباء :يعني انته جنت مختارليا
عبن شفته مو حلو ويخزي جنت تريدني اطلع العب النفس مو
عساف : لع يولي مو هاذ قصدي
عذباء : لا تحاول تقشمرني
ومن هسع اگلك ما ابدله لو شما يصير،
سديت التلفون بوجهه قفلت التلفون حدرت يم امي
ما فارگتها شگد حاول يسولف وياي ما گدر
راح جاب نجمه واجه انوب يحود بيه
يريدني اسولف ويا وما انطيته مجال
اجت فرح المرسال ماله بلغتها اذا تجيبلي حجايه
منه اسولف لخاله جوانه عليها عاد كفت نفسها عني مثل الخوش حدرت دموع گعدت جوه
التمت الوادم عاد
جبت الكامره اخذتلها صور
فاتو ابويه و عمامها صورو وياهه
وجانت احلى جيه
النقيب راجح توه نازل من دوامه خطيه واجه بساع
اخذ صور ويه دموع وباركلها
ما ظل بشر ما صور حت الجهال
ونجمه يمكن اخذت الف صوره كافه اردانها مبتهره بذهبها وكشختها
اخر شي اجه وادي مورم العيون
ويمسح بوجهه وگف يم دموع ويبلع بريگه
من عبرته اخذتلهم صور
وطلع بساع لحگه ابويه والولد كلهم
يهجدون بي
حضن ابويه وگام يبجي
دموع :انحمست على ابويه
عرفته راح يبجي عليه دمعو عيوني
تخبلن البنوات كلهن يحجن عليه
ويسكتن بيه
خاله جوانه شاورتني وتسولف سوالف عيب
خلتني اخجل وانسه البجي
عذباء : سمعنه حس الهورنات
اخذت مسكه دموع وطلعنه اباب الصاله
اندحگ انبهرت بالزفه وكثر السيارات
هاذ عمر مفزع الأنبار كلها
الساحه معد تاخذ
حدر عثمان من السياره الموهافي
لابس دشداشه بيضه وعگال
وعباة سوده على كتوفه طالع يخبل عبالك
شيخ قبيله
اجه يمشي عالبيت بثگل ورزانه
وبسده عمر وهشام لابسين دشاديش
سود تلاگهم ابويه وادي حيولهم
ظلو شويه واجه عثمان محاوطه ابويه
وصله الطرمه تلگينا كلنه بالورد والجگليت
والهوسات
انطيته وردايه دموع فات شايلها
انطاهه للها وگعد يمها
اخذتلهم صور بالكامره ما خلينه ولا تلفون يصور
عثمان گبل فتره بلغنه على تصوير التلفونات
وگفو تا يروحون واجه ابويه
محاوط وادي
دموع :حضني ابويه
ويسولف بعبره
عساف :متأكد عثمان راح يحطج بعيونه
عاد اوصيج انتي بي صيري سبعه
بنيتي خليني اظل مفتخر بيج
دموع : كمش وجهي باس گصتي وخشمي
وخدودي ختنگت غصيت بعبرتي
عساف :لا تبجين لخاطري
هسع اتخرب كحلتج ماريد البناويت
تعيب عليج لا تاكلين همي ولا تضوجين
ماراح اخليج تشتاگيلي مودعه بالسلامه بنيتي
دموع :گبعني بغترة جدي وصه عثمان بيه
وطلع يمسح بدموعه گادني عثمان رص ايدي يطمني
جنت ما اشوف شي كلها محاوطتني شايله البدله
عذباء :لبست الجبه فوگ النفنوف
وطلعت ادحگ على وادي انهد حيله گعد عالممشى
والولد محاوطينه
كلهم بجو على دموع
هيه اول بنيه تطلع من هاذ البيت تخبلو عليها
ابويه الوحيد ظل محافظ على قوته وصامد
سحب السلاح وگام يرمي فوگ الزفه
وصگر وراه يرمي
صعدت دموع بالسياره
عمر هوه السايق وامي صعدت بسده
لابسه جبه وبويشه
گادتني عمه كريمه تا اصعد وياهه
بسيارة هشام اجه ابويه جرني
منها وحجه بهدوء
صياد : العذر منج خيتي
اريد بنيتي تصعد هين تا عينها من العروس
عذباء :فتحلي الباب وصعدني بسد دموع
دحگت على وادي عيونه دم من البجي
غمضهن وصد بصفحه
مشت الزفه بأحلى ما يكون
ابويه والولد كلهم يمشون وراه السيارات
ويباركون لعثمان بشايف خير ومستاهلها
وخرت الغتره من راس دموع
لگيتها طاگه من البجي مسح دموعها عثمان بالكلنس
ويسكت بيها
عثمان : شجاج يابه عبالك مهاجره وغايبه البلد
هاذ بيتج مسافه زغيره
وامت ما رادو اهلج يجون
وانتي امت ما حبيتي اوديج اذكري الله
عذباء :التفتت امي تحجي عليها
وعمر على الاغاني يصفگ ويهوس
عمر :وعرس الشيخ هيل وطش بالولايه
عذباء :كل شوي يهوس شكل
خله دموع تضحك مسحت دموعها على كيفي
همزين مكياجها ما ساح
صارت الزفه نضاميه تخبل وصلنه البيت
حدرت واجه عثمان وياي گبع دموع وتلگاهه
فوتها عالبيت واحنه شايلين البدله
طبينه جوه گعدو بالصاله اجت نجمه گعدت بسد دموع زعم جدتها الحنونه
عثمان گعد شويه وطلع عبن مستحي من النسوان
رحت نزعت الجبه والربطه
شغلت الديجي نصيته شوي وگمنه نرگص
تگابلن فاطمه واميره علگنها علگ
مگدرت اروح على بيت عمر بي الزلم
دزيت ارتان جابلي النفنوف الأسود
طبيت بحجرة دموع لبسته ومكيجت
وطلعت ارگص وياهن حت شعري حليته
جرتني امي زهور رزلتني ولفت شعري
غوربت الدنيا اخذنه دموع على حجرتها ترتاح
ونجمه گابلتها اطگ بعلجها
امي دزت خاله جوانه وامي زهور
تا عينهن من دموع
وهيه گامت تعزب بالنسوان
كفينه العشه والجاي نظفنه البيت وصعدنه اني والبنوات عالصطح اندحگ عالزلم
الساحه مال المنطقه مليانه
الزلم نصها تجوب وعمر بنصهم
يروسن بالسيف
ويسوي حركات ويه دگة الطبل
حت المطرب سكت ظلو عمر وابو الطبل
خبلهم بحركاته
طفو السماعات عاد وراح عثمان عالجامع
تا يأذن گاللهم اذا ما تلحگوني كلكم تصلون ما اجي من الجامع عاد الحگو كلهم ما ظل ولا ازلمه
صلو العشى واجو زافينه ويهوسون
حدرنه ركض طبيت على دموع جانت خاله جوانه تسولف وياهه وتضحك بيها
طلعن عاد كلهن وفاتو الولد عمر وعلي وهشام
وياسين وادلم وثائر وليث علگوها بالهوسات
فات عثمان عالحجره يبتسم
وگام عمر يغني والولد يردون
واحنه نهلهل ونطش عليهم جگليت
دموع :مدنگه واعصر بأديني
گلبي دگاته مليون اجه عثمان گعد يمي
حط ايده على راسي ويقرا
عثمان :اللهم إني أسألك خيرها
وخير ما جبلتها عليه،
وأعوذ بك من شرها
وشر ما جبلتها عليه،
دموع :رفع حنجي ويبتسم
عثمان : تگدرين تصلين
دموع : هزيت راسي بـ الحمد لله اني على وضوء گادني ورحنه عالمراة نزعني البرگع والتاج
فتحلي سحاب البدله كمشتها ومدنگه
جابلي ازائر الصلاة
عثمان :راح اصد غادي اخذي راحتج وبدلي
دموع :نزعت البدله بساع
ولبست الأزار رحت وراه التفت ويبتسم
فرشنه المصلايه صلينه ركعتين
خلص وصد عليه كمش كتوفي وباس گصتي
عثمان :لا تخافين دموعه ما يصير، شي اجباري
عنج ومو من خاطرج اذا تعبانه ارتاحي
ولا يهمج
دموع :دنگت واعصر بأديني
ناديلي خاله ليال
فتح الباب شوي ناداهه
اجت تبتسم حاوطتني
شاورته _اريد عالحمام
گبعتني وطلعنه جانو الولد رايحين والبنوات يرگصن بالصاله طلعت من الحمام رجعت عالحجره
طلعتلي ثوب نوم ابيض لبستنيا وحضنتني
ليال : لا تخافين من عثمان
ولا تستحين هاذ صار رجلج
تريدين شي گبل لا اروح
دموع :لا تسلمين بوستني
وطلعت جان عثمان
يفتر يم الباب قفله واجه يمي
كمش اديني ويدحگلي
ابتسمت ودنگت
حضني ويتنهد
بادلته الحضن شمني من رگبتي
باس خدي وشفتي انثولت معد اندل دربي
عذباء :راحت الوادم الغربه
ظلينه بس الگرايب سوينه حفله تخبل
مرو وكت وعثمان لاطش جوه بلكت يبات
تا نظل نرگص
دموع :سحبت الجرجف اغطي نفسي
وعثمان لبس هدومه واجه يتفگدني
وخايف
عثمان :دموعه لا تستحين مني گليلي
صابج شي انادي امي سولفي
دموع : بلعت ريگي ونزلت عيوني
_لا مابيه شي تطمن
نفخ برتياح وباس راسي باركلي
جابلي دشداشه لبسني
ولم النيشان عدل الجربايه وحضني
گلبه يطرد ازيد مني
رفعت اديني حضنته
ظلينه فتره كمش وجهي ويسولف
عثمان :راح اناديلج امي وخالتي جوانه
دموع : هزيت راسي بـ اي
باسني وراح فتح الباب نادهن
اجن باركلي ومكيفات
علگنها بالهلال والجگليت
عذباء :طلع عثمان بره تلگا عمر حضنه ورفعه
عن الگاع ويهوس حضنه عثمان وباسه من راسه
تشكر الولد كلهم على وگفتهم ويا
گعدو بالحديقه ودتلهم خاله سعاد جاي
اجو ابويه وعمي شاكر وگفو بره
اخذو البنوات كلهن حت نجمه
امي ظلت هين حطينه عشه للعرسان
ورحنه كلنه على بيت عمر
جانو الولد كلهم بره بالحديقه معمرين نرگيله
رحت على حجرتي
بدلت ولگحت نفسي بالفراش ادحگ على اصابع رجليه حمر من الرگص بالكعب
اجت امي انبطحت بسدي ونامت
دموع :ما گدرت اكل شي من توتري
وانوب افخاذي يوجعني واستحي اسولف
اجه عثمان من الحمام ينشف بشعره
لگاني على حطتي
هاي زعم خلاني وحدي تا اخذ راحتي واكل
عثمان : ليش ما اكلتي يروحي
دموع :ماريد مو جوعانه تعال اكل انته
اجه شال الصينيه ويبتسم
عثمان : اني هم مو جوعان بشمني عمر من
گبل الزفه
دموع :وده الصينيه واجه يبتسم
گعد يمي حاوطني وباس خدي
عثمان :گومي اسبحي حياتي
دموع :گمت اخذت ملابسي
وداني عثمان عالحمام ما حاول يحرجني
سبح وحده وخلاني اسبح وحدي
طلعت من الحمام لگيته بالصاله ينتظرني
ابتسم وفتحلي ادينه
حضنته ومكيفه يربي شعلو هالشعور
رحنه عالحجره نشفلي شعري
ومشطه حاوطني يشمني ويبوسني
قلصت جسمي خفت يرجع انوب
حس عليه وهمسلي
عثمان : لا تخافين يروحي
تعاي نامي ورتاحي
دموع :گادني عالجربايه نومني
بحضنه ظل يلعب بشعري ويدحگلي
غمضت عيوني وغفيت على صدره
اسمعه يهمس
عثمان :الحمد الذي بنعمته تتم الصالحات
يتبع......