احبيني أن تجرأتِ

بارت 1

#احبيني أن تجرأتِ

#البارت الأول

، ، ، ، ، ، ، ، ، ، ، ، ، ، ، ، ، ، ، ،
وكفت گبال مرايتها وهي تعد تفاصيلها ..

اباوع لعيوني بالمرايه كبار عسليات
وشعري الأسود الكصير فريت راسي واتلمس شعري بأيدي ناعم ، تلمست خصري واني اكول ماريد اسمن هيج احلى ، شفايفي الصغار احبهم واحب حواجبي .. خشمي متوسط زين ينطلع بي صحيت من تفكيري ،

ندك الباب كمزت ايي بابا اجه جايب ورقة قبولي ركضت للباب صاحت امي واني اركض ...

- راح توكعيييين مامليتي من الرزالة

فتحت الباب واني ابعد شعري عن وجهي ..
شفته اوععع ابتسم راد يدخل ، صحت وضميت نفسي وره الباب ...

:- هوووب هووب وين چافت واني مامستوره

كال بفرحة وحماس ،

:- عليمن هلمستحة بت الصاك اجيت اشوف هلجمال وتضمي عني

ردت ارد بس وكفتني امي ..

:- روح منا يجي عمك وتعال ماعندك مستحة تجي واحنه لوحدنا وين التربية
:- جا عمة اليمج مو خطيبتي شكو بعد

- انتضرني ادك ع عمك وانته تفاهم وياه ماريد اطول خلك وتالي نطلع غلطانين وانته المضلوم

- لاا عمة اني رايح

راح وامي سدت الباب مشت للمطبخ واني كعدت ع الكرسي الي بالطارمة وكلت بسخرية ..

- خطيبته منين اجيت خطيبته هم مهلس وهم ماكاعد راحة

كالت امي ...

- كومي سبحي مهى من مساع اكول طاحت وصلة من الساني

- اوف يايمه كتلج بس تخلص المسلسل اكووم

- صرتي بطول البغل ومسلسل ومادري شنو يمته تكبرين تعبتيني تره كووومي

- زين مو عندي اسم ماتكوليلي بأسمي

ابتسمت .. اي عندج ويخبل هم

كلت بأبتسامة .. احمم احمم شنو هوه

- سعدية ام الوصخ
ضربت رجلي بلأرض واني ابين الزعل ..

- يممممة يممممة اسمي ليار

- يلا يا يمه كومي والله حيلي راح

كمت واني اكول .. ماما حبيبتي كعدي ارتاحي والله اني اكمل الغده عنج

كالت .. لا حبوبة تالي الكي المطبخ محترك

رحت واني اضحك صحتت...

ليار :- مهاوي حبيبتي وينج

رحتلها لكيتها محضره ملابسها

ليار :- يلاا للحمام كبالي

راحت واني وراها باوعتلها ... احبها احبها اختي الوحيدة والله ابجي عليها ليل ونهار شسوي بعد حضهاا .. ماتحجي .

سبحتها كملنة باوعتلي وضحكت كتلها ..

- تردين حلويات نروح نشتري

هزت راسها بلاا .. لبستها وحضنتها وطلعنة امي كاعدة ع القنفة وبيدها المس كالت ..

منار :- صلاوات ع محمد واخيراً كملتيها
كتلها واني اخلي مهى على القنفة...

ليار :- يمه بعدج ماصرتي عجوز ليش تحجين هواي

نزعت نعالها شمرته عَليه ..

- ام لسان العصعص شطيح حضج غير ابوج

- انتي تكولين ابوج وهو يكول امج واحنه احتارينه

- اكول بغل مشطي اختج لاا اهسه اجيج امشطج بهذا
وباوعت ع نعالها ..

- يا يمه حدخل جامعة وتضربيني

مشت للمطبخ وكالت

- هم البنات هم يشيب الراس

ليار :- وانتي مو بنيه لو ذكر

خزرتني سكتت وضحكت .. متعوده اتشاقه وياهاا مشطت مهى ورحت لغرفتي ..

شفت هلنعال داك عَليه .. طلعت ودمي يغلي ..

ليار :- مامااا مليييت ملييييت شوفي شكد متصل عَليه

منار :- يجي ابوج ونشوف حل
ليار :- عود هاي لأن عمي ميكدر يحجي وياه ترا اني بنته

منار :- كافي عياره تعرفين ابوج شكد يحبج

ليار :- يحبني خل يحط حل لهذا ابن اخوه شلع كلبي الكل يكلي هذا خطيبج وهوه حلقه محاط بأصبعي والله ع يوم يطبكن اطباكاتي واكتله واخلص منه ومن ابوه

منار :- عيب اسكتي يجي ابوج ونشوف

ليار :- كعدي يمه خل افرك رجليج مبينات يوجعوج

راحت كعدت ع القنفة كعدت جوه رجليها وضليت افرك بيهن نزلو دموعي حطيت راسي ع حضنها وضليت ابجي .. يمه خلي ابوي يطرده ماريده والله ماريده شهلزكه

منار :- خليج قوية مو من اول ريح وضعفتي اهل ابوج يردولج السمعة المحلوه صيري ذكية وقويه شخصيتج فرضيها عليهم

رفعت راسي مسحت دموعي وكتلها .. قوية اني وراح يجي يوم اصدمهم بتعاملي وياهم وخاصة عمي قاسم

ندك الباب رحت فتحته طلع ابوي كال بأبتسامه وهو يرفع الأوراق ليفوك ..

:- قبلوج بجامعة ** يا محامية
ابتسمت لا ارادياّ وحضنته
دخل للبيت تلكته امي شفت الأوارق هاهيه انقبلت ويوم الأحد اداوم خلااص الف الحمدلله كال ابوي...

:- هاي بابا مكتوبلج جوه الزي الي لازم تمشين عَليه

:- باوعتله انشاءلله بابا
ابوي سجلني بجامعة اهلية لأن معدلي قليل .. حقي والله السادس صعب وبلكوه جبت هلمعدل بالدفرات ..

كال وهو يرجع راسه ع القنفه ..

:- ليار كلاص مي بابا متت عطش

منار :- وشبيك تخاف ع الربع ماتشتري بطل مي

:- ماشفت اسواق هوه ع الفلوس ياا منار

رحت للمطبخ ترستله كلاص مي وانطيته اله ..

كعدت يم ابوي ردت احجي خزرتني امي وراحت للمطبخ صاحتني .. رحت وراها كرصتني من ايدي وكالت...

منار :- تردين تموتين ابوج تشوفينه اجه تعبان تزيدين الهم همين

ليار :- ماما عكبه اول يوم الي بالجامعه وابن حماچ راح يلزك بيه وين طابه وين طالعه خل اكله وارتاح ع الأقل احس هم ونزاح
منار :- وانتي ليش خايفه منه هلمهلس شو كله جاهل عمره توه 24 سنة شتحجين انتي

ليار :- خل اصب الغده وانطمر راسي يوجعني
رحت صبيت الغده وكملنة غسلت المواعين ردت ادخل للغرفه كال ابوي .

:- ليار بابا دتعاي كعدي شوي

رحت كعدت يمه .. هاا بابا

:- شبيج شو ضايجة

خزرتني امي عود توصيني ماحجي .. بس اني شيكضني حجيت وانطلقت بالكلام ..

ليار :- بابا والله ماهر شلع كلبي وين ماروح وراي هسه متت خل يبعد عني والله كارهته ماحبه لزكه هيه لزكه والله اروح اذب روحي بتهلكة ومصايب ولا اقبله

امير :- شلج بيهه من حجينه بموضوكم هزيتي راسج موافقة وماحجيتي

دنكت راسي واني اعصر بأصابعي ..

ليار :- خفت اخجلك خفت تضوج مني

امير :- هلموضوع لاا بي ضوجة ولاا خوف حقج تختارين الشخص الترديه بس انتي غلطتي من ماحجيتي وماكلتي ماريده شكول هسه لأخوي بعد ماحضرو الغرفة والمهر يابويه ليش ماحجيتي راح اتفشل كبالهم
ردت ابجي تقويت باوعتله .. بابا كللهم غيرنه رأينه اني ماجبر روحي ع شخص ماريده حتى لا نتفشل

كال .. روحي نامي بعدين اشوف

ليار :- طمن كلبي حتى اروح انام وارتاح بابا

:- هسه انتي ما فرحانه عكبة جامعتج

تذكرت ابتسمت كمت كلتله .. بابا رايحه انام دخلت لغرفتي كعدت ع الجربايه باوعت لمهى
ترسم .. كتلها ..

:- مانعستي مهاوي ننام سوه

هزت راسها اجتي حضنتني ونمنه سوه .. كعدت المغرب ماسمعت صوت الدعاء الي كل يوم متعوده امي تشغله كمت خليت مهى ع المخده وطلعت .. شفت امي متمدده ع القنفة ونايمه .. كعدت يم راسها ..

:- يمه يلا كومي أذن

ۿيَ طفرت - يا يمه شمالج ماكعدتيني

ليار :- ۿوَ اني جنت نايمه

رحت غسلت وتوضيت صليت وامي هم تالي كلتلي وهي لازمه السبحة ..
:- اخذي مهاوي وروحي لبيت عمج ابوج هناك

:- وشعندي اروح هناك واشوف المغثة هذا

:- ابوج كال تكعد وكليلها تلحكني

:- وانتي يمه ماترحين

:- روحي والحككم

ليار :- كلحنه سوه بعد عليمن اروح وتجين ورانه

رحت لبست وكعدت مهاوي لبستها ورحنه بيتهم يبعد عنه خمس بيوت .. كالت امي واحنه نمشي ..

:- لسانج لا يطول ويكولون بت منار لسان

:- نشوف ع حسب كلامهم

ضحكت .. هو انتي ياهو يلزمج

وصلنه دكينة الباب طلعت غيداء بنت عمي ..

:- يا هلا عمه تفضلو

دخلنه بالديوانيه شفت المهلس وعمي وابوي رحت ابوس عمي دفعني ..

قاسم :- تكسرين حجايتي لييييار ردتج لأبني كلت بت اخوي اوله بيها من الغريب
قاسم :- تكسرين حجايتي لييييار ردتج لأبني كلت بت اخوي اوله بيها من الغريب

ليار :- عمو بلا زحمة ليش تدفع ؟

قاسم :- طايحة حظ تربية ماكو

عضيت شفتي رحت كعدت يم امي .

امير :- خويه شهلحجي قصدك شنو ماعرف اربي اني

:- والله ياخويه دشوف حجيها وكلامها ليكلك تحجي ويه الأصغر منها

اباوع لأمي تعصر بأديها ومقهوره ..

:- لو هسه تنطيها وتأكد ع هذا الشي لو قسم بالله بعد وجهي ماتشوفه يابو ليار

كال ابوي :- البنيه ماتريد قابل اجبرها ياخويه ماعندك غيرنه

قاسم :- لاا والله العتب علينه الي جاي اطلب بنتك لأبني شوفه شوفه شلون يعزك ويحترمك بس اثاري ميفيد

امير :- هسه انته ليش تصعب الأمور ؟ ليش خل تتخرج البنيه والله كريم لهسه لازم الساني عنك

كمت وكفت كلتله .. بابا حنروح رايد شي

كال الحقنة وهو يأشر بأصبعه عَليه ..
:- عمممي اذا طلعتو تره انهي عليها والله
عمي هز راسه بفرح وكأنه مفتخر بأبنه القذر ..

باوعتله خزرته يااااابويه لو لوحدنه جان شربت من دمه ..

:- لو انهي ع مهى لو ع ليار والج الخيار يا ليااار

دنگت راسي بنفاذ صبر وكلتله واني احس النار تطلعع من عيوني .. ديلا يلاا انهي عاد نعترف بهاي خرابيطكم

فات ابن عمي الجبير .. باوعلنه كام ابوي سلم عليه واجه سلم ع امي باوعلي ابتسم .. هلا ليار هاي شصايره شكبرج بويه

باوعتله .. هلا

كال وهو يكعد .. اي شبيكم اصواتكم واصله لسابع جار

كلتله .. عفيه كعد ابوك واخوك يردون ينهون ع وحده منه

كال وهو يعدل بشماغه .. افاا لشوف منو يلمس بنات عمي

كلتله :- عمار والله العظيم تعبت من اخوك ياريت تضبطه لأن عمي ماعرف يربيه

يبو كلت ۿِيج لو ابتليت ع عمريي خزرني عمار وكال ..

عمار :- احنه اقرب من الغريب بويه ، ايي يمته الخطوبه

فتحت عيوني ع كبرهن ردته عون صارلي فرعون كلتت وانيي اصيييح واحس شوي واوكع ..
ليار :- حسبي الله عليكم حسبي الله ونعم الوكيل

عمار :- عمي نريد ليار لواحد من عدنه بت عمي ماتنطي للغريب

ماهر :- الي عمار الي

اباوع لهذا الملطلط راح يموت الي والي .. شفت أبوي مدنك راسه وامي دايره وجهه ادري بيها لعبت روحها منهم ..

سحبت مهى من ايدهاا وكلت لأمي ..

ليار :- خل يحجون منا لصبح وزلمه وابن زلمه يجي يلزمني وشوف شسوي بي يلا يمه

كال عمي .. وتريد تدخلها كليه هاي ثاني يوم تلكة عشره يم الباب

باوعتله وكلت :- اذا ۿِيج المن كاتلين روحكم علينه هاا موو انتو شيوخ اخذو الي من مستواكم الي من صنفكم

طلعت وامي وراي اسمع صياحهم وابوي ميحجي لأن اخوه تالي مدري شكللهم ولحكنه يشمون وهو وامي كدامنه واني ومهى وراهم ..

وصلنه للبيت دخلت لاا ردت عشه ولا شي دخلت لغرفتي ونمت ههه عبالهم اكعد ابجي واندب حضي ع شنو وهو كلشي بأيدي وارفضه مرة ومرتين والف مرة وطز بي وبعمامي ..
عدة يوم وصار يوم روحتي للكليه كعدت بدلت لبست بينصل حلو اسود ولبست قميص ابيض وشديته من الأطراف وسويته نفس الفيونكة لبست شال نيلي وحذاء ترانشوز ابيض خليت مسكارة وحمرة باوعت لروحي ڪُلش طبيعي مكياجي طلعت...

منار :- تعاي اكلي يمه

رحت للبراد ترست كلاص مي وشربته ..

ليار :- لاا ماما ماريد

ابوي دك هورن رحت ركض سديت الباب وصعدت ويه بابا .. باوعلي ابتسم

امير :- واجه هليوم الي اشوفج بي طالبة جامعة

ابتسمت .. انشاءالله ارفع راسكَ بتخرجي

:- أي بويه اريد تكسرين عيون الشمات

وصلنه للجامعة اباوعلها تخبل اول مدخلت حديقة ابوي انطاني مصرف وراح .. دخلت شفت بنات كاعدات رحت يمهن ..

:- هلاو بنات مُمكِن تدلوني شسوي

:- هلا عمري مدام عندج ورقة قبولج روحي راويها لأستاذ ايهاب وتكدرين هاهيه ترحين لقاعتج

هزيت راسي تمام .. بس وين غرفة الأستاذ
:- راح تذوبين اني اكلجياها

:- شتقصدين ؟

:- استتذ ايهاب ۿوَ نفسه الراح يدرسكم ، شلون استاذ وربي يموت

اييع شون تحجي عبالهة مثلهة رحت مشيت وضليت اسئل بالبنات دلوني وندليت ..

دكيت باب الغرفة مجاوب مرة الثانية دكيته ماكو مرة الثالثة صاح ..

:- ادخلل

فتحت الباب شفته رجال چبير مبين بس صدك هيبة قاطه الي لابسه يخبل لونه اسود والقميص مفتوح منه دكمتين شعره عالي بي شگار ومن الجوانب بي شيب كاعد ع الكرسي ولابس نضاراته الطبية .. وعيونه ع الأبتوب الي محطوط على الطاولة .. ميباوعلي ..

:- ااا عمو هاي ورقة قبولي .

مجاوبني رجعت كررت كلامي وبضوجة ..

:- عمو هاي ورقة قبولي اخذها اريد اروح للمحاضرة

حطيت الورقة يمه على الطاولة ودرت وجهي اريد اطلع كال بصوت خشن
كمزني ..
:- اوكفيي "

باوعتله .. نعم ؟

اخذ الورقة شافها جعصها بأيده وذبها بالزباله .. نزع نضاراته متت بمكاني شكد كرهته الحقير ..

:- هذا اسلوبج مايمشي وياي فاهمه ؟
اول شي تعدلين هلأسلوب يلا تدخلين محاضرتي

صفنت عَليه .. شحجيت اني وليش ۿِيج ذبيت ورقتي ؟

:- اخذيها وبوجهج ليبره

تذكرت ابوي ومن يسمع شيصير بي كلت عيب رجال چبير ومتعود يحجون وياه بتوسل او ۿِيج شي تنازلت دنكت راسي وكلت بصوت ناصي .. اعتذر عمو

اخذت ورقتي وطلعت سديت الباب قوي رحت اشتريت كتب ، شفت هذا واحد بنكلادشي واكف يم الباب .
كليتله يدليني ع قاعتي ودلاني دخلت كعدت ع الستيچ ودخل الأستاذ بده يشرح واني طول الشرح افكر بالعميد الخايس .. شكد كلب فشلني نوب يدرسنه خرب...

خلصت المحاضرة شلت كتبي اريد اطلع اجتي بنات ثلاثه ومنهم الي دلتني ع الأستاذ ..

:- هاا شلون شفتيه صااك ؟!
كلتلها :- رجال مشيب تكليلي صاكك شتحسين انتي ؟

:- لج كل البنات حيموتن عَليه وشحلاته الشيب لايكله وربي

:- تلكيه متزوج وعنده عشيرة اطفال

:- لاا وين ممتزوج بس يكولون يتزوج ع طريقته كل يوميه ههههههه

باوعتلها .. احنه جاييين ندرس لو نحجي بهيج سوالف قذره روحي من يمي

:- اوي شكد نفسية دنشاقه شبيج گبيتي

ليار :- ناوية تختمين يومج بعركة ڪُلش عادي امدج ۿنا والله واطلع الضيييم بيج

:- هههههههه هاي معصبه لأن ماعبرهاا ولاا حتى ابتسم بوجهة

دفعتها من جتفهاا :- ولي من يمي ترة اكرهج بيه

:- اووويي وهسه ڪُلش ميته عليج

دفعتها وكعت بالأرض كبال الطلاب كلهم ضلو يضحكون ۿيَ ضلت تبجي وراحت تركض وراها صديقاتها .. كعدت ع الستيج اجت يمي بنيه ..

:- ترة هاي حتسويلج مشكلة واني اشهد بأنو ۿيَ العالت وهي الغثتج
ابتسمت الها :- ماخايفه منهه ولا من ايي واحد

:- الأستاذ ايهاب ميرحم دربالج منه

ليار :- شسمج حبي

:- اسمي رهف

ليار :- تشرفنه واني ليار

رهف :- اسمج يجنن ، امشي نطلع للكفتريا

مشينه وماحس غير وراي ولد مبين عامل ..

:- اسمج ليار امير ؟

باوعتله :- اي اني

:- استاذ ايهاب ينتضرج بمكتبه

ليار :- اوك
مشينه اني ورهف ۿيَ وكفت بالباب وطب البنكلادش كاله اجت كلاله خل تدخل .. بعدني مطابه كالت رهف ..

رهف :- انتي لتراددين يكره البنات اليراددن والوكحات انتبهي لا يفصلچ

هزيت راسي بأي ودخلت .. اول مدخلت جان داير ضهرهُ ويباوع للحديقة من الشباك واديه بجيوب بنطرونه .. سديت الباب حيييل مادري كمزت ..
دنكت كلتله .. تفضل عمو شرايد

دار ضهره عَليه باوعلي رفع تك حاچب ..

ايهاب :- شمسويه لزميلتج ؟ انتي طفلة حتى تدفعيها كبال الطلاب وين اخلاقج ؟

ليار :- ۿيَ زادت بالحجي واني

ردت اكمل صاح وهو يحط القلم بقوة على الطاولة ..

:- شوفي تطولين بمشاكلج اطول خلك ويااج واندمج فاااااهمه !!

:- عمو والله هيه غثتني وتحجي حجي محلو شتريدني اسويلها

تقرب عَليه واني ابتعد نضربت بالباب تقرب ڪُلش مني كال بصوت ناصي وهو يباوع بعيوني ..

ايهاب :- اول يوم الج وهيج تمردتي علية وع وحدة من طالباتي !! اتسائل باجر شتسوين ؟

نزلت راسي :- ۿيَ كالتلي عليك... ردت اكمل كال ..

دار وجهة ومشه :- انتي مفصولة

نزلو دموعي واني اباوعله شكد كرهتهه مدري هذيج شكلتله عَليه...
يتبع.......