Chapter 9
ကုဟွိုက်က အယ်လ်ဂျာ၏စကားများကိုကြားပြီး ယခင်အမွေဆက်ခံစဉ်က အချက်အလက်အချို့ကို သတိရမိသွားသည်။ ယူးလာစစ်သင်္ဘောက ဇီဝသင်္ဘောများဖြစ်၏။
ယူးလာက ဇက်မျိုးနွယ်စုတွင် တစ်ခုအပါအဝင်လည်းဖြစ်သည်။ ယူးလာမျိုးနွယ်စုမှလွဲ၍ နောက်ထပ် မျိုးနွယ်စုလေးခုထပ်ရှိသေးသည်။ တက်ခ်၊ အစ်ဆာဒိုရယ်၊ လီနိုနှင့် ကမ်မုစ်တို့ဖြစ်သည်။
ထိုမျိုးနွယ်စုငါးခုတွင် သူတို့၏ သွင်ပြင်လက္ခဏာအသီးသီးရှိကြသည်။ ဥပမာအား တက်ခ်ဇက်ဖြစ်သောကုဟွိုက်က ရန်လိုတတ်သည့် သွင်ပြင်ရှိသည်။ သူတို့သည် မျိုးနွယ်စုများထဲတွင် အရက်စက်ဆုံးဖြစ်ပြီး တိုက်ပွဲတွင်လည်း အကြမ်းဖက်နိုင်သည်။
ယူးလာတွင်ကား ပြောင်းလဲနိုင်စွမ်းရှိပြီး ဇီဝစစ်သင်္ဘောဖြစ်သည်။ သူတို့တွင် ကူးပြောင်းနိုင်မှုနှင့် အာကသာလက်နက်အဖြစ် အသုံးပြုနိုင်သည်။
အစ်ဆာဒိုရယ်မျိုးနွယ်စုမှာဇက်ထဲတွင် ဝိညာဉ်စွမ်းအား အားအကောင်းဆုံးဖြစ်သည်။ ထိုမျိုးနွယ်ထဲမှာရှိသည့် ဇက်များက နည်းဗျူဟာများအတွက် ကောင်းမွန်ပြီး သူတို့၏လုပ်နိုင်စွမ်းတွင် အတော်ဆုံးဖြစ်ကြသည့်တိုင် အခြားမျိုးနွယ်စုအဖွဲ့များလို ကိုယ်ခန္ဓာပိုင်းအားဖြင့် လုပ်နိုင်စွမ်းမရှိကြပေ။
လီနိုမျိုးနွယ်စုများကား ဇက်များထဲတွင် လုပ်ကြံသတ်ဖြတ်သည့်ပုံစံရှိသည်။ လုပ်ကြံသတ်ဖြတ်သူများဖြစ်သည့်အလျောက် တိုက်ပွဲမှာ တက်ခ်များကဲ့သို့ မျက်နှာချင်းမဆိုင်နိုင်စေကာမူ ပုန်းကွယ်ခြင်းများနှင့် ခြေရာခံနိုင်သည့် နည်းအမျိုးမျိုးသော အဆိပ်အတောက်များတွင် တော်ကြသည်။ သူတို့၏သားကောင်ကို သတ်ဖြတ်ရမည့်အချိန်တွင်တော့ သူတို့ အလွန်စိတ်ရှည်ကြ၏။
နောက်ဆုံးအနေဖြင့် ကမ်မုစ်မျိုးနွယ်စုများဖြစ်သည်။ တခြားမျိုးနွယ်စုများနှင့်ယှဉ်လျှင် သူတို့၏လုပ်နိုင်စွမ်းက ပျမ်းမျှအဆင့်သာရှိသည်။ သို့သော်လည်း သူတို့သည် လိုအပ်သည့်အခါတွင် ဘဝ၏ဖိအားများကို ဝါးမျိုကာ အလဲအလှယ်အနေဖြင့် အကြမ်းဖက်နိုင်မှုများကိုပြုလုပ်ကြသော မျိုးနွယ်စုသာဖြစ်သည်။ သူတို့သည် ရန်သူကို သတ်ဖြတ်ရန်အတွက် ကိုယ့်ကိုယ်ကိုဖျက်ဆီးမှုအနေဖြင့် အသုံးပြုတတ်ကြသည်။
ကုဟွိုက်သည် ယူးလာစစ်သင်္ဘော၏ ခံစားချက်များကို လျင်မြန်စွာ နားလည်သွားသည်။ သူ့အရှေ့တွင် အလင်းရောင်များ ဝင်းလက်နေသောသင်္ဘောကိုကြည့်၍ သူ့အားသယ်ဆောင်ထားသည့် တက်ခ်ဇက်က ယူးလာစစ်သင်္ဘော၏တံခါးနားကို ချဉ်းကပ်လိုက်သည်။ ထို့နောက် သူက သင်္ဘော၏ အေးစက်သည့် တံခါးကိုကိုင်ကြည့်ဖို့ လက်မြှောက်လိုက်သည်။
လူငယ်လေးထံမှ ထိတွေ့ခံရပြီးနောက် ယူးလာစစ်သင်္ဘောဟာ ငြိမ်ကျသွားခဲ့သည်။ သင်္ဘောကိုယ်ထည်က မတုန်ခါတော့ဘဲ သင်္ဘောအပြင်က အလင်းရောင်များက လှပသည့် အပြာရောင်ကောင်းကင်အဖြစ်ပြောင်းလဲသွားခဲ့သည်။ ကြယ်တာရာကမ္ဘာရှိ အစိတ်အပိုင်းမြောက်များစွာတွင် အနီရောင်အလင်းက နိုးကြားမှု၊ တားမြစ်မှုနှင့် ရန်လိုမှုဟု အဓိပ္ပာယ်ရပြီး အပြာရောင်ကောင်းကင်ကတော့ ဖော်ရွေမှုဟု အဓိပ္ပာယ်ရသည်။
“ကာဒါ” ဒီအေးစက်ပြီး ကြီးမားသည့် ယူးလာစစ်သင်္ဘော၏အသံက လူငယ်လေးကို ချစ်ခြင်းမေတ္တာများ ပြသနေသကဲ့သို့ ညင်သာသည်။
“ကျေးဇူးပါ” ကုဟွိုက်က လေးလေးနက်နက်ပြောလိုက်သည်။ ချစ်ခင်နှစ်သက်မှုက နည်းသည်ဖြစ်စေ၊ များသည်ဖြစ်စေ၊ ရှည်လျားသည်ဖြစ်စေ၊ တိုတောင်းသည်ဖြစ်စေ အဖိုးတန်သည့်ခံစားချက်ဖြစ်သည်။ ကုဟွိုက်က ထိုကဲ့သို့ ရိုးရှင်းသည့်နှစ်သက်မှုကို အဖိုးတန်သည်ဟု အမြဲတမ်းခံစားရသည်။
ကုဟွိုက်၏စကားက ယူးလာစစ်သင်္ဘော၏ အပြာရောင်ကောင်းကင်အလင်းတန်းများကို ဖြည်းဖြည်းချင်း မှိတ်တုတ်မှိတ်တုတ်ဖြစ်စေသည်။ ကုဟွိုက်၏ သင်္ဘောပေါ်မှ အခန်းငယ်ဆီသို့ တက်ခ်ဇက်ကပို့ဆောင်ပေးပြီးသည်နှင့် သင်္ဘော၏အလင်းက ပုံမှန်ကြိမ်နှုန်းဖြင့် တဖျပ်ဖျပ်လှုပ်ခတ်သွားခဲ့သည်။ ယူးလာ၏ပျော်ရွှင်မှုကို ဤအချိန်တွင် မြင်တွေ့ရနိုင်သည်။
မကြာမီတွင် အမှုထမ်းများက စစ်သင်္ဘောထဲသို့ ဝင်လာသည်။ အလ်ဗ်၏ သဘောတူညီချက်အရ ကုဟွိုက်က ယူးလာပေါ်တွင် အာဏာအရှိဆုံးလူအဖြစ် အလိုအလျောက်ဖြစ်သွားခဲ့ပြီး ငွေရောင်ဆံပင်နှင့်ဇက်၏ ဦးဆောင်မှုအဖြစ် ကွပ်ကဲအုပ်ချုပ်သည့်အခန်းကို ရောက်ရှိသွားခဲ့သည်။
“ခေါင်းဆောင် အခု ကျွန်တော်တို့ ဘယ်ဂြိုဟ်ကို သွားနေတာလဲ” အယ်လ်ဂျာက မေးမြန်းလိုက် သော်ငြား သူ့မျက်လုံးများက အနက်ရောင်ဆံပင်နှင့် လူငယ်လေးထံမှ မရွေ့သေး။ “ဘုရင်လည်းပါတယ်ဆိုတော့ ကျွန်တော်တို့ အရင်ဆုံး အခြေချဖို့အတွက် ပိုကောင်းတဲ့ဂြိုဟ်ကို သွားသင့်တယ်လို့ထင်တယ်…”
“တူဆာကို ပြန်သွားမယ်” အလ်ဗ်က တိုတောင်းစွာ ပြောလိုက်သည်။
တူဆာသည် ပထမဆုံးဇက်စစ်တပ်၏ ကြယ်မြို့တော်ဖြစ်ပြီး ဇက်များ၏ အမာခံနယ်မြေထဲတွင် တစ်ခုအပါအဝင်ဖြစ်သည်။ တူဆာတည်ရှိသည့် ကြယ်တာရာနယ်မြေတွင် တခြားမျိုးနွယ်စုများ၏ ရေတပ်သင်္ဘောအစု အနည်းငယ်ရှိသည်။ ကုန်သွယ်ရန် တူဆာကို ဖြတ်သွားဖို့လိုပါက ထိုကြယ်သင်္ဘောများသည် ဇက်များ၏ ယူးလာသင်္ဘောနှင့် မတော်တဆဝင်တိုက်မိမှာကို ကြောက်ရွံသောကြောင့် ကွေ့ပတ်သွားလာရန် ရွေးချယ်ကြပေလိမ့်မည်။
အဖြေက အယ်လ်ဂျာ၏မျက်ဝန်းများကို တောက်ပသွားစေသည်။ အယ်လ်ဂျာက တူဆာကို အမှန်တကယ်ပြန်သွားချင်ခဲ့စေကာမူ တိုက်ရိုက်မပြောဆိုရဲခဲ့ပေ။ စကားအလှသုံးပြီး အရိပ်အမြွက်ပေးရုံသာတတ်နိုင်ခဲ့သော်ငြား သူဖြစ်ချင်သည့်အတိုင်းဖြစ်လာမည်ဟု မမျှော်လင့်ခဲ့ပေ။ သူတို့၏ခေါင်းဆောင်သည် ပထမဆုံးစစ်တပ်၏ အကြီးအကဲဖြစ်ပြီး သူတို့ခေါင်းဆောင် ကြယ်မြို့တော်တွင် နေခဲ့သောရက်များဟာ အလွန်နည်းပါးလေရာ ကြားထဲ၌ ဝေးကွာခဲ့လေသည်။ သူက ပြည်နယ်အရေးကိစ္စများကို တူဆာတွင်နေသော အမှုထမ်းအကြီးအကဲအား လွှဲပြောင်းပေးခဲ့သည်။ တူဆာ၏ ပုံစံကို သူတို့ခေါင်းဆောင်မှတ်မိပါ့မလားဆိုပြီး အယ်လ်ဂျာက သံသယတောင်ဝင်မိ၏။
ကုဟွိုက်က သူ့ကိုခေါ်ဆောင်ခံသွားသည့် နေရာအား လုံးဝ မသိချေ။ မည်သည့်နေရာဖြစ်ပါစေ စွန့်ပစ်ခံဂြိုဟ်ထက် ပိုကောင်းမည်ဖြစ်သည့်အတွက် တူဆာက ဘယ်လိုပုံစံရှိလဲဟူ၍ သူမမေးခဲ့ချေ။ ထိုသို့ရောက်မှ သူ့မျက်လုံးဖြင့်ကိုယ်တိုင်ကြည့်ရန် တွေးနေမိသည်။
စစ်သင်္ဘော၏ ကွပ်ကဲအုပ်ချုပ်သည့်အခန်းတွင် အပြင်က ကြယ်တာရာနယ်ပယ်များကို ဖောက်ထွင်းမြင်နိုင်သည့် ပြတင်းပေါက်ရှိသည်။ ကုဟွိုက်က သိချင်စိတ်ဖြင့် စူးစမ်းလေ့လာရန် လျှောက်သွားကြည့်လိုက်သည်။ အနက်ရောင် စကြဝဠာကြီးဟာ အဆုံးမသတ်နိုင်သည့် အမှောင်ထုနှင့်တူသည်။ ထိတ်လန့်စရာကောင်းသော်ငြားကြယ်များ၏ တန်ဆာဆင်မွမ်းမံမှုကြောင့် အမှောင်ထုက လင်းလက်ပြီး ခမ်းနားလှပသည်။
လူငယ်လေး၏ ပုံစံကို တွေ့မြင်နိုင်သည်။ အလ်ဗ်က ဩဇာအာဏာရှိသည့်ပုံစံနှင့်ထိုင်နေပြီး ဘာမှမပြောသည့်တိုင် သူ့လက်ချောင်းများက စက်၏ကိုယ်ထည်ကို ပွတ်သပ်နေခဲ့သည်။ ခဏကြာသောအခါ အခန်းတစ်ခန်းလုံးရှိ နံရံများက ဖောက်ထွင်းမြင်နိုင်သောပုံစံအဖြစ်သို့ ပြောင်းသွားသည်။
၎င်းက အပြင်ကိုမြင်တွေ့နိုင်ရန် ပိုပြီးလွယ်ကူအဆင်ပြေသွားကာ ကုဟွိုက်၏ ပထမဆုံးတုံ့ပြန်မှုကလည်း ကျေနပ်ပျော်ရွှင်သွားခြင်းပင်။ ထို့နောက် သူက ခံယူထိုက်သောပုံစံများဖြင့် ထိုင်နေသည့် မျက်လုံးတစ်ဖက်အား ဖုံးကာထားသော ငွေရောင်ဆံပင်နှင့်ဇက်ကို လှည့်ကြည့်လိုက်သည်။ သူက မျက်လုံးအကာဟုသာ ခေါ်နေသော်ငြား ထိုအရာက ဖောက်ထွင်းမမြင်နိုင်သည့် အလင်းပိတ်အနက်ရောင်အဝတ်စနှင့် ပိုတူလေသည်။ ထိုအရာက သူ့မျက်လုံးကို ဖုံးကာထားပြီး အနောက်မှာ ချည်နှောင်ထားသည်။
“အလ်ဗ်… မင်းတို့ခေါင်းဆောင်က ဘာလို့ မျက်စိကို အဝတ်နဲ့စည်းထားတာလဲ” ယခင်က ထိုသို့မေးရန် အခွင့်အရေးမရှိခဲ့ပေ။ ဤတကြိမ်၌မူ ကုဟွိုက်က သူ့ဘေးနား ရပ်နေသည့် အယ်လ်ဂျာကို တိတ်တဆိတ်မေးလိုက်သည်။
အမှန်တကယ်တွင် ဤအသံနှုန်းက သူတို့ခေါင်းဆောင်ကြားနိုင်စွမ်းရှိသည့်အသံနှုန်းဖြစ်သည်။
အယ်လ်ဂျာက စိတ်ထဲသာတွေးနေပြီး ထုတ်မပြောခဲ့။ သူက ရိုးရိုးသားသားဖြေလာသည်။ “ဘာလို့လဲဆိုတော့ အမှန်တကယ် လက်ဆုပ်လက်ကိုင်ပြနိုင်တဲ့အရာတွေကို ခေါင်းဆောင်က ဖျက်ဆီးချင်လို့ပဲ”
သူမြင်ရသလောက် အတောမသတ်နိုင်သည့် ဖျက်ဆီးလိုစိတ်များရှိနေသည်။ မျက်လုံးအကာအနေဖြင့် တိကျသည့်ပုံစံကိုမမြင်ရ၍ ပိုကောင်း၏။ သူကြားရသည့် ဆူညံသံများသည်ပင်ခေါင်းဆောင်အတွက် ဆူညံနေစေသည်။
အသံက လက်ရှိရှိနေသည့်အရာကို သွယ်ဝိုက်ညွှန်းဆိုနေခြင်းဖြစ်ပြီး ကသိကအောက်ဖြစ်မှုများက စုဆောင်းမိလာသည်။ သူ၏တိုက်ခိုက်နိုင်စွမ်းကို မသက်ရောက်စေရန် အကြားနဲ့ အမြင်ကို လက်လျှော့လိုက်မှရမည်။ အသံကြားနေရသည်က မြင်နေရခြင်းထက် ပိုပြီးကြံ့ကြံ့ခံနိုင်စေသည့်အတွက် သူ့မျက်လုံးများကို ပိတ်ဆို့ထားရသည်။
“အဲဒီလိုလား…” ကုဟွိုက်က ထိုအချက်ကိုမတွေးထားမိသည့်အတွက် ခဏလောက် ဆွံအသွားသည်။
“အချိန်တိုင်းနီးပါး ခေါင်းဆောင်က နားညီးတယ်လို့ထင်ပြီး စိတ်ဆိုးနေလိမ့်မယ် ဒါပေမယ့်လည်း သူအဲဒီအရာတွေကို မြင်နေရတာထက်တော့ ပိုကောင်းပါတယ် တစ်ခါတုန်းက တိုက်ပွဲမှာဆိုရင် ရန်သူက ခေါင်းဆောင်ရဲ့ မျက်လုံးအကာကို တမင်သက်သက်ဖယ်လိုက်တာ စစ်တပ်တစ်ခုလုံးကို ခေါင်းဆောင်က သူတစ်ယောက်တည်းရှင်းပစ်လိုက်ရော” အယ်လ်ဂျာက စစ်ပွဲအကြောင်းကို ပြန်ပြောသည့်အချိန်မှာပင် ကြောက်ရွံ့နေဆဲဖြစ်သည်။ ခေါင်းဆောင်က သွေးရူးသွေးတမ်းဖြစ်ပြီဆိုသည်နှင့်ရန်သူ မိတ်ဆွေ မခွဲခြားနိုင်တော့ပေ။
မျက်လုံးအကာက ခေါင်းဆောင်အတွက်ရှောင်ကြဉ်ရမယ့်အရာဖြစ်ပြီး ဇက်များအားလုံးအကြားတွင် မှတ်မိနေမည့်အရာလည်းဖြစ်ပေသည်။ ၎င်းက ခံစားရအလွန်ခက်၏။ ကုဟွိုက်ကား မခံမရပ်နိုင်သည့်အရာများကို တွေးမိပြီး တိတ်ဆိတ်သွားရသည်။
ထို့နောက် အယ်လ်ဂျာက လျင်မြန်စွာပင် စကားလွှဲလိုက်၏။ သူက ခေါင်းငဲ့ ပြီးမေးသည်။ “အရှင် အချိန်အကြာကြီး အိပ်ထားတာဆိုတော့ အခု တစ်ခုခုစားချင်လား.. အရှင့်ရဲ့ ဥခွံက တူဆာကို ပြန်သွားတာနဲ့ လက်အောက်ငယ်သားတွေက အမှုန့်အဖြစ်ကြိတ်ပေးပါလိမ့်မယ်.. ပူဘာနိုသစ်ပင်ရဲ့ သစ်ရည်နဲ့ ရောလိုက်တာနဲ့ ပိုကောင်းတဲ့ အာဟာရဓာတ်တွေကို ရရှိမှာပါ”
ဥခွံကို မြေပြင်ပေါ်မှာ အမှုန့်ကြိတ်ခံရပြီးရင် နို့မှုန့်ဖြစ်သွားမှာလား။ ထိုပေါင်းစပ်မှုက ကုဟွိုက် မျက်နှာထားကို မသိမသာပြောင်းလဲသွားစေပြီး နားလည်သည့်အနေဖြင့် ခေါင်းညိတ်ပြလိုက်သည်။
စားရန်အတွက် ကုဟွိုက်က သူ့အိတ်ထဲသို့ ဥခွံကိုထိတွေ့ကာ နှစ်ဖဲ့သုံးဖဲ့ယူစားလိုက်သည်။ သူ၏စိတ်စွမ်းအားက ကလေးအဆင့်မှာပဲရှိသေးသည်ဖြစ်ရာ ကုဟွိုက်သည် အိပ်ရန်၊စားရန်ကိုသာစွဲလမ်းနေသလို ခံစားရ၏။ မည်မျှဝန်လေးနေပါစေ ကုဟွိုက် အိပ်ရာနိုးတိုင်း မုန့်စားချင်ကြောင်းကို ဝန်ခံရပေလိမ့်မည်။
သူ့ကို အိပ်ချင်မူးတူးဖြစ်လာစေရန် အချိန်ဘယ်လောက်မှမကြာလိုက်ပါချေ။ ကုဟွိုက်သည် ကွပ်ကဲအုပ်ချုပ်သည့်အခန်းထဲမှ ထိုင်ခုံပေါ်သို့ မှီလိုက်ပြီးမျက်လုံးမှိတ်လိုက်သည်။ ကုဟွိုက်အိပ်ပျော်သွားသည်နှင့် အခန်းထဲမှ အချို့သောအဆင့်မြင့်ဇက်များက သူတို့၏လက်ထဲမှအလုပ်များကို ပေါ့ပါးစွာလုပ်ကိုင်နိုင်ကြသည်။
အလ်ဗ်က ထိုင်နေရာမှထလာပြီး အိပ်နေသည့်လူငယ်လေး၏ထိုင်ခုံဆီသို့ လျှောက်သွားလိုက်သည်။ အလ်ဗ်က အနားမှာရပ်နေကာ ခေါင်းငုံ၍ ကြည့်နေ၏။
အယ်လ်ဂျာကဘေးမှရပ်ကြည့်နေပြီး ငွေရောင်ဆံပင်နှင့်ဇက်က လူငယ်လေး၏နှုတ်ခမ်းဆီသို့ရောက်သွားတာကို ရုတ်တရက်မြင်တွေ့လိုက်ရသည်။ သူက လူငယ်လေး၏ ပါးစပ်ဘေးတွင် ပေကျံနေသော ဥခွံများကို မဖယ်ပေးခင် ခဏရပ်လိုက်သည်။
အေးစက်သည့်လက်က သူ့နှုတ်ခမ်းကိုထိမိသွား၍ အိပ်နေသည့်လူငယ်လေး၏ခေါင်းက ဘေးသို့ရွေ့သွားခဲ့သည်။ အလ်ဗ်က နှုတ်ခမ်းနဲ့ညင်သာစွာထိတွေ့နေသောလက်ချောင်းကို မဖယ်ပေးချေ။ တဒင်္ဂဖြစ်သော နွေးထွေးပြီး နူးညံ့သည့်အထိအတွေ့သည် အလ်ဗ်ကို ချက်ချင်း လက်ပြန်ရုတ်လိုက်စေပြီး သူ့မျက်နှာက အသက်မဲ့နေသည့်တိုင် ငွေမှင်ရောင်အမြီးက အမှတ်မထင်စွာပင် အပေါ်အောက် တဖျပ်ဖျပ်လှုပ်ခတ်သွားခဲ့သည်။
စက္ကန့်အနည်းငယ်ကြာသောအခါ အလ်ဗ်က မော့ကြည့်ပြီး သူ့ဘေးရပ်နေသော အယ်လ်ဂျာကို အေးစက်ပြီး တိုးလျသည့်အသံဖြင့် မေးလိုက်သည်။ “သူက ဘယ်လိုမျိုးလဲ”
“ဘုရင့်အကြောင်းပြောနေတာလား” အယ်လ်ဂျာက အလိုအလျောက်မေးလိုက်သည်။ ထို့နောက် သူ့မှာမေးခွန်းတွေထပ်ရှိဦးမည်ဟု ခံစားမိလိုက်သည်။
“ဘုရင်က ကြည့်ကောင်းပါတယ်” အယ်လ်ဂျာက လူငယ်လေးသည် ချောမောကြည့်ကောင်းသည်ကိုသာ ပြောနိုင်သည့်အတွက် လူငယ်လေး၏သွင်ပြင်ကို ဖော်ပြဖို့ရန်ကား အလွန်ခဲယဉ်းသည်ဟုထင်မိသည်။ စကြဝဠာတစ်ခုလုံး၏ အကောင်းဆုံးလူက သူတို့၏ဘုရင်သာဖြစ်နိုင်ပေသည်။
အယ်လ်ဂျာက သူနောက်ထပ်ပြောမည့်စကားများကို စီစဉ်လိုက်သည်။ “အမ်… ဘုရင့်ရဲ့ဆံပင်က အနက်ရောင်ရှိပြီးတော့ အထူးသဖြင့် နူးညံ့တယ် သူ့မျက်လုံးက ကျွန်တော်တို့လိုမဟုတ်ဘူး လူတွေလိုမျိုး မျက်စံအိမ်က ဝိုင်းပြီးနက်တယ်.. အထူးသဖြင့် သူပြုံးလိုက်ရင် ညင်သာတဲ့ပုံပေါ်တယ်”
လူတစ်ယောက်ကို စကားလုံးများနှင့် အကြမ်းဖျင်းဖော်ပြရန်က အလွန်ခဲယဉ်းလင့်ကစား အလ်ဗ်က အာရုံစိုက်ပြီး နားထောင်ခဲ့သည်။ ထိုင်ခုံမှာပြန်ထိုင်လိုက်ပြီး အလ်ဗ်က သူ့မျက်လုံးနားက အနက်ရောင်အဝတ်စကို ထိတွေ့လိုက်သည်။ သူ့လက်ချောင်းများက ထိုအရာကို ဆွဲမချခင် နှစ်စက္ကန့်နီးပါးလောက်ထိ တုံ့ဆိုင်းနေခဲ့ပေသည်။
ခြုံပြောရလျှင် ဇာခ့်များသည် ဘဝ၏ပျော်ရွှင်မှုကို သိပ်အာရုံမစိုက်ကြသောမျိုးနွယ်များဖြစ်ပေသည်။
ဇာခ့်များအားလုံးက စစ်သည်ကောင်းတစ်ယောက်အဖြစ် မွေးဖွားလာကြသည့်အတွက် သူတို့သည် သဘာဝအားဖြင့် တိုက်ပွဲများတွင် သင့်တော်သည်။ ဇက်အများစုဟာ မည်သည့်ဘဝနေထိုင်မှုမျိုးမှာမဆို ရှင်သန်နိုင်ကြပြီး သက်သောင့်သက်သာဖြင့်နေထိုင်ခြင်းကို ထည့်မတွက်ကြပေ။ ယခု သူတို့မှာ တွေးတောစရာလူတစ်ယောက်ရှိလာပြီဖြစ်၏။
ကုဟွိုက်က ထိုင်ခုံမှာထိုင်ပြီး ခေတ္တမျှအိပ်လိုက်သည်။ သူအိပ်နေသည့်ပုံစံက သက်သောင့်သက်သာမရှိသည့်အတွက် မသိစိတ်ကနေ အသံပြုမိသွားသည်။
အသံက ကုဟွိုက်ဘေးနားရပ်နေသည့်တက်ခ်ဇက်ကို တိုးလျသည့်အသံအက်အက်ကိုပြုလုပ်စေခဲ့သည်။ ယခင်က စွန့်ပစ်ခံဂြိုဟ်ပေါ်တွင် သူတို့သည် ကလေးငယ်ကို ဥခွံထဲမှာထည့်ထားကြပြီး ချော့သိပ်ကြသည်။ အခုတော့ ဥခွံက သူတို့ဆွေမျိုးသားချင်းများ၏ ယူဆောင်ခြင်းကိုခံလိုက်ရသည်။
အခန်းထဲရှိ များစွာသောအဆင့်မြင့်ဇက်များက အိပ်နေသောလူငယ်လေးအား တောက်ပသောမျက်ဝန်းများဖြင့် ကြည့်နေကြသည်။ ဆူညံသံကိုကြားသည်နှင့် သူတို့ ခေတ္တခဏရပ်လိုက်ကြ၏။ ဘုရင်က ဒီလိုထိုင်ခုံမျိုးမှာ အိပ်စက်ရတာ သက်သောင့်သက်သာမဖြစ်လို့များလား။
အိပ်စက်ခြင်းဟာ ခန္ဓာကိုယ်အတွက်အရေးပါပြီး သူတို့၏အိပ်စက်မှုနှုန်းက နည်းပါးကြသည်။ နည်းနည်းပိုပြီး အိပ်စက်သင့်သည့်ကလေးများကလွဲကာ အရွယ်ရောက်နေသည့်ဇက်က ဆယ်ရက်လောက်မအိပ်ရလျှင်ပင် ပင်ပန်းနွမ်းနယ်ခြင်းမရှိပေ။ သူတို့အတွက် အနားယူရန်လိုအပ်သည့်အခါ ခေတ္တခဏမှေးစက်လိုက်လျှင်ရသည်။
ထို့ကြောင့် ယခုလိုအခြေအနေမျိုးကို ရင်ဆိုင်ရသည့်အခါ အဆင့်မြင့်ဇက်များက သူတို့မှာ လူငယ်လေးအတွက် လဲလျောင်းအိပ်စက်နိုင်ရန် ပျဉ်ချပ်လိုအရာမျိုး တစ်ခုမှမရှိကြောင်းသိရှိသွားရသည်။ ဒီထိုင်ခုံတွေကို အတူတကွပေါင်းစပ်ပြီး အိပ်စက်နိုင်ဖို့ဖျာအဖြစ်လုပ်လိုက်သင့်လား။
ရူးကြောင်ကြောင်အကြံညဏ်ပေါ်လာသည်နှင့် ဇက်စစ်သားအများစုဟာ အပြင်ထွက်ပြီး သူတို့၏ထိုင်ခုံများကို ဖြိုချဖို့ အဆင်သင့်ဖြစ်နေကြလေသည်။ ထို့နောက် ဆံပင်ငွေရောင်နှင့်ဇက်က သူတို့ကိုတားလိုက်ရသည်။
အလ်ဗ်က ကုဟွိုက်အနားထပ်ရောက်လာပြီး သူ့အနောက်မှ ငွေမှင်ရောင်အမြီးက လူငယ်လေးခန္ဓာကိုယ်ကို သူ့လက်များထက် လျင်မြန်စွာထိတွေ့လိုက်သည်။ အမြီးက ကုဟွိုက်ကို စက္ကန့်ပိုင်းအနည်းငယ်အတွင်း ရစ်ပတ်လိုက်သည်။ အမြီးက ကာကွယ်ရမည့်အရာများကို ကာကွယ်သည်ထက် တိုက်ပွဲ၌ ရန်သူများနှင့် ရင်ဆိုင်ခြင်းက ပိုကောင်းသည်။ အမြီး၏အညင်သာဆုံးလုပ်ရပ်ကား လူငယ်လေး ခန္ဓာကိုယ်ကို ယခုလိုမျိုးရစ်ပတ်ပေးခြင်းပင်ဖြစ်သည်။ အမြီးက မည်သည့်အရာကိုမှ ထိုးဖောက်ပြီး ရိုက်နှက်ခြင်းမျိုးမရှိပဲအားကိုသူပြန်လည်ထိန်းချုပ်ထားရုံသာရှိသည်။