روايتي حيادر الراء .
اريد تصويتاتكمَ الحلوه وتعليقات بين الفقرات لان نقراهن كُلهن .
....
قريت المسج ومن دون وعي دزيتلة :- " انساني حيدر انساني أني ما اكدر اكمل وياك أني حياتي خطرة بالمُستقبل ما اضمنلك حياتي ولا اكدر اجيبلك اطفال وأنتَ مسافر ثلاث سنوات يله ترجع لا سنة ولا سنتين حيدر ثلاث سنوات وراها ترجع سنه يله تجي أني ما اتحمل كُل هذه "
دزيتها مسـحت عُيوني شويه ودز ڤويز ما سمعتة انطيـتة بلوك طفيت التلفـون وشمرتة بعـيد عني تربعت ابجي على حـالي واكول :- ليش دايصير بيه هيـج أني يا رب لطفًا بحـالي والله ما اتحمل كُل هذه أني هـواي عليه يا رب امتحانك صعب
بجيت هواي ما أعرف شكد مر الوقت راسي بدأ يأذيني گلبي دايدُك على السريع نفسي صار سريع أريد اكوم اشرب علاج ما اكدر وإذا اكوم شنو اشرب مال صداعي مال گلبي ؟
ضغطـت على راسي بأثنين اديه دعـيت تعدي هاي الليلة على خير رحت تمددت على الچرباية وغمـضت أريد انام ماكو عـقلي دايفكر وإذا ابقى افكر ما انام تسوء حـالتي شنو أسوي يا ربي راسي بـصفحة وگلبي بصفحه ثاني
باوعت على التلفون مشمور بالكاع أريد اروحلة واعتذر أريد اكُله أني أسفة أني اعتذر حيادر بس عقلي ما دايكول هيج عكس كُل هذه اني ما اكدر اتحمل كُل هذه البعد ضعيفة امام هذه الشي ما اكدر ما اكدر مُستحيل ابقى واكمل وياه مُستحييييييل
راح أموت من وجع راسي غمضـت عيني بكُل قوة عندي عقـلي مدا يوكف من التفكير ضليت مغمضـة عيني تقريبًا ربع ساعة فتـحت عيني كمت احس گلبي داينبض بـعقلي من قوة الألم كمت رحت للمجر طلعت الأدويـة مالاتي خذت المهدئات خـذت مال قلب ومال راسي ونزلت جـوه على السريع خذت
كلاص مي شربت أربع حبات سويه وصعدت ركض تمددت ولميت رجلية لصدري وغمضت عيني شويه شويه احس نفسي استعدل بس نبض گلبي بعده سريع تذكرت حيادر من قاس نبضي رجعت كعدت سويت مثل ما كال طلع نبضاتي فوك الثمانين نبضة
رجعـت تمددت وغمضـت عيني ونمت بأعجـوبة
....
ساعتين ونص هبطت الطيارة وبالي يم فُستق من قريت المسج وأني ما اكدر اوصل الها لا صار بيها شي لا سامح الله ما أعرف من وين سامعة هذه الحجي من الدكاترة او من احد
نزلنة من الطيـارة وكالت ريم :- تكدر توصـلني للشقة مالتي ما أريد أرجع وحـدي ؟
- ميخالف
- شُكرًا جزيلًا
- لا ولو
نزلنة جنـط السفر رحنة أجرنة تكسـي مسافة الطريق ووصلنة للشقة مالتها نزلتها وكـالت :- تفضـل جوه ؟
- لا والله مستعجل
- شنو السالفة هاي أول مره تجي يمي وما اضيفك ؟
- على راسي والله تسلميلي
- ولو دكتور
أبتسمـت ودخلت رجعت دخلت للتكـسي حركنة واتصـل آسر عليه فتحت خط وكـال :- ويييينك يابه ؟
- بالطريق يمعود
- يله أستعـجل أريد أنام عدنـة فاينل باجر
- أستعجل شنو نطير هيَ سيارة
- على كيفك شبـيك تصيح مو صوجك والله صـوج اليشاقة وياك أني اعلمك بس ترجـع
- شنو تسوي ؟
- اركصـاك مصري على الطبلـة
كال هيج وسده بوجهي رحت دزيت مسج لحواء :- " بس تكعدين اتصلي على أُم فُستق وسئلي على حال فُستق اكيد تخربطت لإن تحاجينة بدون ليش ومن هاي المقدمات
دزيـت الها هيج سديت التلفـون شويه ووصلنة للشقة نزلت ونزل السايق المصـري وياي الجنط انطيتة فلوس مصريـة وصعـدت للشقة دكيت الباب مرتين بالثالثة طلـع آسر اول ما فتح الباب حضني وكال :- الله صاحبي مشتاقلك
أنتبه عليه وكال :- شبيك جنك ارملة وجهك ما يبشر بخير ؟
- عوفني بحالي آسر روحي واصلـة لگصتي
- ان شاء الله خير سـولف يگميل اسمعـك ؟
سولفت اله كُل الصار وكال :- بص كده واللهي حقها
- آسسسر
- بطلنة نرجع على العراقي ، تره صدك حقها للبنية والله الحق مو وياك صاحبي خلي نفسك بمُكانها وشوف تكدر تتحمل ثلاث سنوات وهيَ تدرس بالخارج ؟
سكتت وكال :- لا تصفنلها جاوب تگدر لو لا ؟
- لا
- هوَ داه لا لا اقصـد هوَ هذه الجواب الـعدل
دايحجي وياي وبالي يم فُستق أعرف مو زين عليها القلق ولا التفكير ولا الجُهد الزايد واعرف هسه كُل ذن صارن الها أريد طريقك اوصل الها ماكو كُل الطرق انسدت بوچهي من دزتلي المسج الاخير
- راح أروح أنام عندي دوام باجـر وفاينل وأحـمد محترك
- نام نام حبيبي
- وأنتَ ؟
- راح انزل عـلى البحر شويـه واصعد
- ها خوش كايم أنام أني تـصبح على خير
- وأنتَ من اهله
نزلت من الشقة وگبل للبحر الجو بعده توها طلعت الشمس تمشيت للبحر ووصلت كعدت على الكراسي الي گبال البحر فتحت التلفون طلعت واتساب فُستق قريت الرسالة الاخيرة أكثر من مره قريتة
سمعـت الڤويز مالتي :- " ريتاجي بويه شـنو چان اتفاقنـة أنتِ تصبرين وأني اعوضج صح لو لا فُستق هاي السـوالف مال صغار أنتِ مو صغيرة ما شاء الله واعية وتعرفيـن الصح من الغلط شنو ما تتحمليـن شنو ما تصبرين وين كلامـج ؟
ثاني شي منو كلـج حياتج خطرة بالمُستقبل ريتاجي الله كريم للمُستقبل اكو علاج واكو ادوية واكو كُلشي لا تأيـسين من رحمك الله واسعة يا فُستق أريدج بـخير حتى لو سمعتي هذه الڤويز لاتجاوبـين حاليًا اله تحسين بنفسج كد الجواب الصـح في أمان الله استودعتـج الله "
اتصلت عليها فوك الآلف مرة ولعلى شغلت تلفونها ضليت اعيد بمسجها الي ما متوقعها بحياتي أبدًا ضليت كاعد على البحر وصوت البحر شغلت أغُنية مجنوني وضليت اعيد بيها ضليت وقت طويل اخر شي باوعت على
السـاعة مرن ساعتين ونص ما أريـد ارجع للشقة ماكو نوم بعيـني بس رجعـت غصبًا علـيه أول ما رجعت تمـددت آسر ماكو بالشقة طالع للـدوام ضليت صـافن وبالي يم فُستق ومنـتظر خبر من حواء
....
كعدت الصبُح احس خدر بجسمي من كُل النواحي بس ما اكدر اكوم تلفوني مشمور ضل بالي يمه أعرف يقلق عليه وخاصةً هيج مواقف بس شنو أسوي تعبت أني الى متى اضل انتظر سنة سنتين بالهواي مو ثلاثة لو أربعة مُستحيل
السـاعة بالتسعة كمت بيه ما بـيه نزلت غسلت لكيت أمي واكفـة داتسوي بيض شافتني :- صباح الخير بنيتي
- صباح النور
انتبهـت على نبرة صوتي وكـالت :- بيـج شي ؟
- لا ما بيه لا يضل بالج
حسيـت ما اقتنعت كملـت البيض وكالت :- تعالي ـتريكي
- بس اغسل واجي
رحـت غسلت كوه ورجعت ما أريد أمي تـحس بيه شي كعدنة نتريك شويه وسئلتني وكـالت :- كلتي الجمعة يجون ؟
- منو يجي ؟
- شبيج مره الشيخ وبنتها غير
- ها اي صح
- إذا نوافق توافقين ؟
أجه بـبالي عُيون حيادر وكلامة واهتمـامة بيه أريد انساه كُل موقف وشبر يذكرني بي شلـون واح انساه هيج كتلها :- مـوافقتي من موافقتكم
- ابوج ما يقبل ينطي يكول اله تعبر العشرين
- اي أعرفة من زمان على هذه كلامة
- الله كريم
كلت لگمتيـن وردت اكوم :- كملي البيض كُلها يله تكـومين شنو ماكلة لكمة بـس ؟
- ما اشتهي وداعتج
- والله سالفتج مو خالية تعالي يمي
- شنو ؟
- تعالي تعالي
رحـت كعدت يمها خلت ايـدها على گصتي نوب على گلـبي وكالت :- ليش دكات گلبـج سريعة هيج ؟
- ها مادري
- أنتِ شنو يفيييد ويـاج ليش هامـلة نفسج علاجج ليش مو عـلى الوقت نومح ليش مو منتظم تردين تخـسرين صحتج تخسرييين نفسـج وتالي وياااج ريتاااجه بنتي وتـالي ؟
- لاتصيحين عليه يُمه فدوة والله گلبي دايأذيني
- شبيييج وگلبـج يأذيج إذا لا دواج داتشـربينة على الوقت لا صخام الصخمني شنو اسـويلج انومج مُستشفـيات يله يفـيد أنتِ الف مره نصحتج من راسج يأذيج گلـبج نزليلي حتى لو بـسابع نومة اكعـدلج كايلتلج أني هيج لووو لا اححجيييي ؟؟
بدموع :- اي
- أنتِ تردين تقضيـن عليه ولچ ماعندي غـيرج ما عنننندي چعل يـومي قبل يومج يا ريتاجه
كالت هيج وراحت لغُرفتها وسدت الباب تربعت بالمطبخ ابچي على حالي منين اتلكاها من حيادر من أمي نظفت البيت وأني تعبانة وصلت للمطبخ خليت سطل المسح بقوة على الكاع توقعت انكسر بس مابي شي طلعت أمي على الصوت
شـافتني أريد امسح :- صعـدي فوووك
- يُمه
- صعديييييييي
كالـت هيج عفت الغراض وصـعدت فوك فتحت الغُرفة دخـلت وسديتها تلفوني بعده بمُكانة رحـت خذيتة وشغلتة أشتغل أجن هواي اشـعارات من حواء من ريم من شفتـهن من الاشعارات ما دخـلت للواتساب رجعت طفيتة ورحت تمـددت على الچرباية
تذكرت الساعة والسنسال والمحبس وكتاباتة رحت طلعتهن كُلهن بديت اعيد الذكريات ذكرة ذكرة طلعت الساعة والقصاصة الصغيرة الي مكتوب بيها :- " شايفة هذهَ صندوق الساعة شگد صغير اتمنى أنتِ بصغرة علمود اضمج بي "
مُستحيـل راح انحب مثل حُب حيادر وهُيامـة بيه ومُستحيل راح احصل اهتمام يـتقارن بأهتمام حيارد بيه أصلًا مُستحيـل الگه انسان مثل حيـادر لو افتر هاي الدنيـا كُلها ابداً ما راح الگه
گُلش مشتاقتلة كُلش لميت الهدايا ورجعت ضميتهن طلعـت الورقة الصغيرة الي چان كاتب بيها :- " حركتي كلبي بنار صارتلچ دفوُ بيوم "
ما أعرف ليش داطلع ذكرياتك بس أريد اي ذكرة اله ان كانت حلوة او مو حلوة المهم شي منه گُلش محتاجتة رجعت الورقة وضميتها رحت تمددت ونمت
....
كعـدت الساعة بالوحدة وربع على صـوت أغاني كمت وطلعت من الغُرفة دخلت للمطبخ لكيـته آسر دايطبخ ويغنـي باوعت عليه :- ما تـكول ناس نايمة ناس تعبانة راجعـة من سفر ؟
- ناس عايفة عشكها بالعراق وجايه لمصر
- آسسسسسر
- عُيونة لا اعذرني حياتي ما اكول هيج
- خرب يومـك اي والله
- زي العسل
- صـب الأكُل راح اروح اغـسل واجي
- حاضر زوجي
ضحكـت ورحت غسلت ورجعت للغُرفة خـذت التلفون ورحت للمطبخ لكيتة صاب الأكُل شـافني وكال :- بـعده مُغلق ؟
- اي
- يُمكن حـاضرتك ؟
ذبيت تنهيدة خلصنة الأكُل غسلنة الاماعين ورجعنة للصالة طلع كُتبه وكال :- باجر تداوم ؟
- اي ان شـاء الله ، الابتوب بالجُنطة روح جيبهن جـبت أثنين واثنينهن نفس الـنوع
- عاشت أييييدك جنت محتاجة
- وأيدك حبيبي
راح لجنط السفر رجعت رفت التلفون اتصلت يطلع مُغلق شوكت ينفتح البلوك ما أدري أعرف فُستق ما تعاند اله إذا شي ضاجت منه فد مرة هيج ضايجة مني ؟؟
جاب الابـتوب وجـه عليه وكال :- خـذت هذه
- بالعافية
عفتة ورحت للغُرفة تمددت ونمت
....
مر يومين بعد ما راح حيادر كعدت مُصباح يوم الجمعة حواء خابرت أمي أمس تسئل عليه كالتلها مابيه شي بس ماريد افتح تلفوني لفترة فهمت السالفة ما لحت على أمي وسدته
نزلت جوه صبحت عليهم ورحت غسلت رجعت لكيت أمي داتحجي بالتلفون وكالت :- هلاً بيگم شوكت ما تـجون على راسنة ، لا موجـودين كُلنة هلأ بيكم مع السلامة
عرفت راح يجون اليوم كملنة ريوك مر الوقت وتغدينة خلصت نظفت وكملت باوعت عليه أمي :- كومي رتبي نفسج راح يجن النسون والزلم العصر
- بعد وكـت شويه واكوم
كلت هيج بس بداخلي غصة ما أريده يجي ما أريد أشوف وجه أشهم أصلًا لا أشهم ولا غيرة مر الوقت وكمت للغُرفة غسلت وبدلت على السريع كُلشي ما خليت لوجهي عفت شعري مفتوح صعدت أمي
دخلت الغُرفة باوعـت عليه وكالت :- شسوري شـعرج يطلع احلى
- لا مابي شي هيج حلو
- براحتج
كالت هيـج ونزلت رحت لصندوق السـاعة والمحبس والسنسال طلعت السنسال ردت البـسة هوَ والمحبس باوعت عليهن ورجعتهن دمعت عيني من كد اشتيـاقي اله الله يساعد گلبة إذا أني هيج مـشتاقة واني أعرفة ما يصبر على شوقه إذا اشـتاق اتذكرت ايامنة مو چان يـجيني باليل ويكُلي مشتاقلج
ذبيت تنهيدة وضميتهن ونزلت جوه يم أمي تحضر أكل التقديم باوعت عليها وكلت :- هذه التقديم للنسوان لو للزلم ؟
- للاثنـين
- أني أقدم بس للنـسوان وحُسين يقدم لـلزلم مو ؟
- اي حبيبتي
كالت هيج ورحت صعدت فوك نص ساعة واندك الباب باوعت من شباك غُرفتي طلع حُسين يفتح الباب فتحةودخلو ثلاث نسوان وداليا ورسُل واثنين شيوخ واشهم
ذبيت تنهـيدة واتذكرت حيادر لو هيـج موقف وبدالـة جان حيادر وحواء وأُمهم وأُبوهم رغـم أعرف ما راح تصـير هاي الخطوبة دـمعت عيني مسحتها ونزلت بالمـطبخ
ربع ساعة خذت كلاصات الببسي ودخلت للنسوان سلمت وقدمتهن الهن كعدت يم داليا وكالت :- شلونج يا روحي شخبارج مشتاقيلكم كُلش
ريتاج :- حيـاتي بخير الحمدُلله احنه الأشـوق
سلمت والتفتت رسُل عليه وكالت :- حليانة گُلش ريتاج
ريتاج :- حبيبتي أنتِ الاحـلى
شويه وكمت منهن مرت نصف ساعة قدمت بقلاوة وحلويات رجعت دخلت للمطبخ مر الوقت الى ان راحو صار الغروب وطلعو ما ضلو هواي غير ساعتين صعدت فوك بدلت ورحت لتلفوني شغلتك وشغلت الإنترنت اجن اشعارات دخلت للواتساب خفيت اخر ظهور ودخلت على مسجات ريم
جانـت دازه تطمئن عليه دازه صـورها بالابكـوت الابيـض وكاتبـة جواها :- شلوني بربـج مو حـلوة ؟
ودازه جواها :- وينج صارلج فتره ما فاتحة ادك عليج ماكو مُغلق صاير شي ، مشتاقتلج ويينج ولچ ريتاج
دزيت ڤويز :- " حياتي أنتِ أني الاشـوق بس جنت مطـفية التلفون فترة علمـود راحـتي
دزيتها ونزلت جوه بالمطبخ وهُمَ بالصالة وتسمعت عليهم دايحجون شلون أبوي رفضهم :- بنتي وأعرف مصلحتها گُلش زين حُسين
حُسين :- خوش نـاس بـويه
أبوي :- على راسي بس ريتاجه بعدها صغيرة ما تعرف لامور الزواج وغيرها ثاني شي هيَ بس ريتاجه عدنه بهاي السرعة نريد نزوجها ما ترهم يا أبني
سمعت كلامهم وبداخـلي كُلت :- " الحمدُلله نرفـضت "
صعدت ليفوك رحت للتلفون لكيت مُكالمة فائتة من ريم رجعت اتصلت عليها رفعتة سلمت وكملت وكالت :- شو احسج مو على بعضج صاير شي ؟
سولفت الها عن حيـادر وزعلتنج وعن الخطـوبة وعن كُلشي وكالت :- سودة عليه حياتي الي يريـدج الله يصيـر عوفيها وره رب العالـمين
- الله كريم ريم الله كريم ، المُهم شتاقيتلج شوكت ترجعين ؟
- فدوة الچ تقريبًا شهـرين اقل هيج وأرجـع بس اكمل أوراق النقـل
- مشتاقتلج بس ترجعين نطلع
- أكيييد ، يله مع السـلامة أروح اكمـل قراءة
- حياتي مع السلامة
سلمـت وضليت كاعدة شويه وسمعت اتـصال باوعت للتلفون شفـتة حيادر گلبي كام دايدك على السريـع احس نبضاتي زادت ابـاوع على الأسـم أريد افتح خط بس ما اكدر إذا فتحـت خط راح اتراجع عن گلامي مُستحيييل
طفيت التلفون طلعت السيمكارت رحعت شغلتة رحت ضميت السيمكارت بالمجر ونزلت
لكيت أمي تخـابر بحـواء باوعت عليه وكـالت :- تعـالي هاي حـواء تريدج
هزيت راسي بحركة يعني لا وكالت :- تريدج لبنية ريتاجه هاج هاج
شمرت التلفـون عليه وكامت للمطـبخ خليتة على اذانـي وكلت :- الوو
حواء :- وزقنبوت مر اي والله
ريتاج :- شبيج دسـلمي
حواء :- ما أريد اسلم تلفونج ليش مُغلق ومدا تجاوبين ؟
ريتاج :- يعجـبني
حواء :- أريد اصير طباب خير مو شر
ريتاج :- اي تفضـلي
حواء :- ليش داتسوين هيج وياه أني صح انطيج كامل الحق بس هوَ خطية منتظر بس خبر منج يطمنة خابرني الصبُح عبالك أنتِ بالمستشفى مثل ما أنتِ تحبي هوَ هم يحبج ريتاجه ارجعي لعقلج وتصالحوا فدوة عوفي السوالف هذن مال صغار حشاج
ريتاج :- أني أعرف الي يرحـني صدكيني حواء عقـلي براسي وأعرف شنو داتصـرف يا روحي أنتِ ما أريد اكُلج لاتدخـلين بس هذه شي خـاص بيني وبينه
حواء :- هيج تكولين ؟
ريتاج :- اي
حواء :- ماشي براحتج ، يله رايحة أني أمي داتصيحني
عرفتها محد صـاح الها وزعلت فَ كتلـها :- الله وياج
سدت التلفون وراحت وديت التلفون لأمي توضيت ورحت صعدت اقره قرآن أريد هاي الغصة الي بداخلي تروح
....
كعـدت من النوم الساعة بالعشرة باليل على اتـصال من حواء رفعت التلفون وجاوبتها وكلـت :- ها خيتي ها عينـي كولي ؟
- شلونك خويه ؟
- تعرفيـن لوني المُهم خابرتيهـا وشنو كالت ؟
- حيدرنا انساها
- صددددُك تحجيييين انسـاها شنو ؟؟
- والله ما أعرف شبيها متغيرة گُلش حتى كلامها وياي ومن كالتلي لا تدخلين أول تالي تحجي وياي هيج جيدرنا گُلش متغيرة كُلش فوك ما تتصور
- متأكد تتغيـر على كُل انسان بس ما تـتغير عليه ثقي بكلامي وثقي بحُبي الها وحبهـا الي الي حبيتة منها ما تتغير عليه صـح زعلانة بس متأكد داتشتاقلي وبالها أني صـدكيني ما تنساني بسهوله وثقي
- الله يصلح بينگم ويجمعكم بحلالة يا رب
- الله يسـمع منج يله رايح أني
- الله وياك
سديته منهـا وكمت غسـلت ورحت طلعت الابتوب وبـديت اكتب البحث اجه آسر :- خلي اخـذه منك واكتب غيرة ؟
- اكتب أنتَ آسر شلون راح تصير دكتور بالمُستقبل ؟
- اصـير اصير بس بربك انطـيني بحثك وروح اكتب غيـرة عليك الله والله تعبان من الطب الاكشـر هذه
- ميخالف اكملة وانطي الك
- اوييييلي زوجـي ما يرفـضلي طلب
- نچب عزيزي
- تأمـر أمر
كال هيج وراح تمدد بلشت اكتب بالبحث وبالي يم فُستق التلفون جان بصفي باوعت عليه وخذته طلعت صورتها خليتها خلفيه للشاشة ورجعتة
كمـلت البحث وكلت لآسر :- راح انزل للـبحر واجيب عـشه من بره
- بعد احسن ما نطبخ اليوم
- صار حبيبي صدك جذب
رحـت بدلت وكملت خدت المفتاح وطلعت نـزلت رحت للبحر كعدت على الكرسي طلعت التلفـون باوعت شويه وسديته وكـلت :- " معقولة فُستق هيج انسي بسـرعة أني وين حُبچ اليه وين فُستـق الي تحبني هيج تاليها ؟
گُلشي جنت متوقع منج بس هاي الخطوة لا انداريت ليوره چان اكو محل قريب على البحر رحت اله ودخلت سئلت على نوع چگاير وكال المصري :- ايوا يعم اهوا موجود
- باگيتيـن
- حاضـر
انطاه الي انطيتة فلوس ورجعت للبحر دخنت چگارتين وكمت خذت اكل ورجعت للشقة دخلت خليت الأكُل على الميز ورحت الآسر اصيحة جان دايخابر سمعتة يكول :- مشتاقلج خيتي صدكيني ، خلي بالجامعة يفتر بس أبدًا لاتنطي مجال الحيوان ، لو بعد الف سنة أرجع هم اضمها اله يله مع السلامة الله وياج
خلص وكتله :- شبيهـا ؟
- ما بيهـا شي جاي تكول مؤمـل الحيوان يضـوجني
جبت العشه وخليته كدامنة ضلينه ناكُل ونسولف :- مو جنت بالعراق ما كتلي عليه ؟
- نسيـت بالله
خلصنه عشة وكلمن اخذ لابتوبة وضل يدرس
....
مرت شهر ونـص على زعلي وي حيادر ما أعرف شـنو الي أريدة بالضبط حـواء من اخر مُكالمة بعد كامـت تحجي وياي رسمي وأبدًا ما رحـت الهم ولا اجت هيَ حتى امي أستـغربت من تصرفاتي وبـرودي
كاعدة الساعة بثلاثة الفجر عيني ما يجيها نوم جنت مشغلة أغُنية مجنوني بصوت ناصي ومخلية التلفون بصفي رحت للكنتور ولصندوق طلعت سنسال الفُستق ولبستة
أعرف مشتاقتلة بس داكـابر أريد انساه ما يـمر يوم مدا افكر بي شلون راح انساه هيج أريد أعرف شنـو شعورك خلال هاي الشهر ونـص وأني مو يمه أكيد هم متعذب حـالة من حالي زين شنو أسـوي لا اكدر أرجع ولا اكـدر ابقى وياه تعبـت يا ربي تعبـت
بجيت للمرة الي ما أعرف شكد ما أعرف من اشتياقي اله لو من شنو گُلشي ما أعرف رحت للمجر طلعت العلاج خذت حبايتين شربتهن بدون مي ونمت
كعدت الصبُح على مسـج من ريم كاتبة :- صـباح الخير ريتااااج ، ما بقى شي واجـي ولچ
- صباح النور يا عمُري ، هلأ بيج بكُل وقت
دزيت الهـا هيج ونزلت اتريـك
....
كعدت الصبح على صياح آسر يكعد بيه :- لك كووووووم اغاتي ، يمعود دكوم مو شلعتة لگليبي
شلـت التلفون باوعت على السـاعة شفته بثمانية ونص :- هيَ كُلها السـاعة بثمانية ونـص
- اي كوم تريك الأكُل راح يبرد بعد جبدي
- كايم كايم
كمت تريكنـة بدلنة وكملنة طـلعنة قفلنة الشقة ورحنة للجامعـة تلكانة صديقنة صادق :- الجـدعان الابطال كيفكو ؟
آسر :- حبيبي بخير
صادق :- وأنتَ يا حـيدر في ايه ؟
حيدر :- الحمدُلله
صادق :- دومكو
راحو للقاعة الجماعة شفت ريم جايه بأتجاهي وكفت يمي :- سلام دكتور
- وعليكم السـلام
- شلونك
- بخير عايشيـن والحمدُلله
تمشينة شوي وكالت :- حجيت وي ريتاج أمس
- اي ويـعني ؟
- بخير هيَ لا يضـل بالك
أستغربت من كالت هيج فُستق تسويها وتسولف لشخص غريب عن علاقتنة وشنو صار لا مُستحيل ؟
- راح تبـدأ المحاضرة اترخص أني
- لا عادي دكتور مـرخوص
كالت هيج ورحت دخلت للقاعة وبداخلي اكول :- گُلش متغيرة فُستق گُلش مو مثل قبل حتى تصرفتها أخر رسالج الي قبل شهر و١٧ يوم معقولة ناسيتني ونستني بهاي السهولة ؟
سحـبت تنهيـدة وبدت المحـاضرة
....
مرن يومين خابرتني ريم الساعة بالوحدة باليل جاوبت :- ريتاج أني بالمطااار
- صدُك
- وداعتج ولچ مشـتاقتلج
- أني الأكـثر حياتتتتي
سمعت منادة الطيارة :- داتسمعين ريتاج ؟
- اييييي
- هههههههه يله بـاي اروح اصعـد
- بيباي حييبتي
سدتة وراحت گُلش مشتاقة الها أريد بس تجي علمود نطلع سوه عفت التلفون على الشحن ونمت فزيت على منبه الآذان مال الفجر شلت التلفون لكيت ريم دازتلي صور فتحتهن جان صور للمطار وللطائرة والها
- طالعـة گُلش حـلو ولچ
دزيتها ورحت نزلت اتوضى توضيت وردت اصعد شفت حُسين نايم بالصالة رحت كعدت وكلت :- كوم كوم نام بالغُرفة مالتك ، كوووم يمعود
بنعاس :- هـااا
- كوم نام بالغُرفة لمن نايم هُنا ومتكسر تكسر
- أنتِ لمن راجعتلي المممن ؟
شفتة دايحجي هيـج عرفتة دايحلم جيت اضـربة راشدي اصحي بس خطية نايم عفتة وصعدت دخلت لغُرفتي خـذت السجادة فرشتها صليت وكملت رفعت ايده ادعي لرب العـالمين انسى حيدر وهوَ هم ينـساني ويشوف طريقة لإن تعبت گُلش
كملت لفيت السجادة ورحت نمت شويه وفزيت على حلم يخوف واحد دايصيح عليه ويكُلي :- اخذي أيدي لزميها
رسًا اجه ببالي حـيادر معقولة محتاجني معقولة يريـدني شي أكيد يعني أساسًا أني الي نهيت العلاقـة واشوف هذه الافضل الي كلـت هذه الكلام وبعدها نمت
....
كعدت الصبح على صياح أمي : آيريم يُممممه كومي تريكي سويت ريوك
أمي داتصيـحلي آيريم يُمه أول تالي لا لا يُمكـن داحلم رحت نزلـت على السريع شافتني :- شبـيج شبيج لا توكعـين
- تحجين صدُك لو تشاقين بربج ؟
- شنو شبيج ؟
تقربت يمـها رفت أيدي لچبينها تبـعدت :- بس اشوف حرارتـج خاف مصخنة مو مـعقول الي دايصير گُلش متفاجـئة منج گُلش
- أنتِ مو صاحية والله
باوعت على الطـباخ الچاي عليه والبيض الـسلك رجعت باوعت عليها :- بربج كـولي مو حلم ؟
عاطت بيه وكالت :- شبييييييج انطيني مجال ادردم كلتيني حاصل فاصل
- مو من طبعـج هيج تسوين وياي وتأدين دور الأمـومة الي محسستيني بيها بيوم مـن الأيام
- أريد أبدي بداية جديدة وياگم
بصدمة :- ويانـة ليش مـنو ومنو ؟
- أنتِ وآسر
- هههههههههه أني وآسر ؟
- اي
- مُستحـيل آسر تبدين ويـاه بداية جديدة مُستـحيل أني مُمكن اي مُمكن يعني اما آسر أبدًا لا مااااا ينـسى السويتي اله مـا ينسى
دمعت عينها وكلت :- مايفيد هذه كُله ما يفيد وحتى لو تفكرين تعتذرين منه هم مايفيد صدكيني ضلمتي هواي وعذبتي بحياته هواي وهوَ يتيم شنو كُلتي لربج خليتي أبوه يكرهة وهوَ جان ما يبات بالبيت إذا مو ابنه وياه حوبه اليتيم جبيرة گُلش جبيرة عند ربها ولازم تطلع بالظالم حتى لو نسى هذه الشي وحتى لو يعتذر تطلع
سكـتت وراحت لغُرفتها دموعها بعيـنها وسدت الباب رحت صـبيت الچاي وتريكت أني ما ندمانـة على هذه الشي أبدًا هذه الحجـي بگلبي من سنين طويلة گُلش طويلـة اتمنى من الله صدُك تبدي بـداية جديدة وخالية من شكو شي قذر وتصـرفات مو حلوة
كملت ورحت خليت الاماعين على السنك ردت اصعد بس عقلي دايكُلي غسلي الاماعينن نسفت رداني وغسلتهم ونظفت البيت وصعدت لغرفتي سمعت آذان الظهر صليت ونزلت جوه جانت أمي بالصالة تباوع للتلفزيون
باوعـت عليه وكالت :- باجر نـروح أني وخالتج لبيـت جدج تجين ؟
- لا
- أبوج بالشغل راح تبقين وحدج بالبيت
- اي ويعني شنو راح يصيرلي ؟
- براحتج
كالت هيـج ورحت صعـدت لفوك تمـددت ونمت
....
كاعد بالصالة طلعت باگيت الچكاير خذت ثلاثة دخنتهم كملت اثنين وباوع عليه آسر :- مُضر بالصحة هذه التصرف كُل جگارتين سوه ، هاي عود أنتَ دكتور ؟
- دكتور صح بس مو على نفسي .
أستغرب مني - المعنى دكتورنة المُتكلم ؟
- وغصبًا علـيك حبيبي
- تاج راسي بس كُلي المعنى أني فهمتها بس لو صح لو غلط
- دكتـور بس ما اشفي وادواي جروحـي بس جروح الناس جـروحي تبقى مفتوحة دواها مو عندي
سوه حركه بوجه :- اويلي هااااي قوية هاي عاااش يعيييش الشعب المصري ، اقصد العراااااااقي
ضحكت على تصـرفة الي يريد دايلطف الجو خلصـت الچكاير كمت للمطبخ وبطريقي وكلـت :- وين المـعسل والفحم ؟
- شوف يالكائنات دايريد يدخن ناركيلة خاف ما كفنة الچكاير لك مو زييين دكتور مو زين
صحت بنبـرة هادئـة :- آسسسسسر
- بالكاونتر بالباب الأول على أيدك اليمنة الفحم بصف المعسل
ضـحكت ورحت سويت النـاركيلة وكملت خذتها ورحت لبـلكونة الشقة رجعـت جبت الاوراق والابتـوب بديت ادرس
....
باليل الساعة بالعشرة رن تلفوني شفنة اتصال من ريم فتحت خط وجاوبت سلمنة وخلصنة :- داشوف دكتور حيدر يومية بالجامعة هوَ واصدقاءة يضحكون ويسولفون
تفاجـئت من كالت هيـج رسًا كتلها :- ريم فدوة اروحـلج لاتجيـبيلي سيرتة الله يسعـدة
- عوفينة منه المُهم باجر معزومة يمنه تتعرفين على أمي وخواتي
- گُلش متـشوقة ولچ
- أني أجي اخـذج
- إذا هيج هاهـية لعد
سلمت وراحت سديتة ورحت على محادثة حواء لكيتها دازه الي :- " هلو رتوج شلونج ؟ "
- هلأ حبيبتي بخير وانتوا شلونكم ؟
- أجيت اسئل على حالج أمج كالت تعبانة ومريضة
شوكت كـالت أمي هيج ما اعتقد مخابرتها وكـالت الها فَ دزيت :- لا الحمدُلله زينة تحـسنت
- الحمدُلله المُهم تكدرين تجينة هاي الفترة ؟
أستغربـت من طلبها :- ان شاء الله إذا افـرغ اجي أني وأمي
- من تفرغين ؟
- اي
- اوكي ماشـي يله مع السلامة سلمينـة على أبوج وأمـج
- يوصـل
شافت الرسالة وراحت رحت نزلت جوه شويه ورحت كعدت الصبُح كالعادة نفس الروتين الى ان سمعت رنه تلفوني رحت شفتهة من ريم جاوبت :- ها حياتي
- حضـري نفسج العـصر
- ماشـي حُب
سديته ورحت كُلت لامي ما مانعت صح أستغربت بس عرفت ما رفضت ولا حجت علمودي علمود اغير جو مر الوقت بسرعة صارت بالأربعة العصر صعدت فوك طلعت ملابس لاهيَ شتوية ولا هيَ صيفية لإن بده الوقت يحر
رحت سبحـت وكملت طلعت بدلت لبـست ملابس الطلعـة شسورت شعري نشفتة كملتة خليت مسكـارة وكُحلة ما خليت حمرة رحت نزلت لغُرفة أمي شافتني :- حـلوة طالعة
- مثلج
كملـت وأجاني اتصال من ريـم :- كملتي ؟
- اي يا روحي
- قريبة عليكم أني راح اوصل
- هلا بيج حُبي
لبسـت حذائي وضليت انتظـرها
....
كاعدة يم أني داتبدل علمود تروح يم بيت حدي باوعت الها :- شوكت ترجعون ؟
- باجر
- أحمد شـوكت يجي ؟
- باليل
- ها اوكي يعني بس الظهر والعصر أني وحدي ؟
- تخـافين ؟
- تخـسين
اندارت خذت الجنطة وراحت للصالة تسولف وي خالتي عشر دقائق وطلعن رحت سديت الباب ورجعت صعدت فوك سديت باب غرفتي وتمددت ونمت ما أعرف شكد من من الوقت باوعت على الساعة يعني نايمة ساعتين
كعـدت على صوت حركه جوه أستغربت هوَ مـحد اكو بالبيت رحت نزلت من الغُرفة بـعدني على نص الدرج وشفت مؤمـل بالمطبخ فار دمي هذه شعنده مصـخم هُنا وأني وحدي ؟
باوع عليه :- هلو تدرين صارلي كد منتظر هيج فرصة ؟
رجت نزلت للمطبخ وبحركة سريعة أجه سريع بأتجاهي قيدني بأيده :- وين قوتچ راح اشوفها اليوم لو لا ؟
ردت ادفعـة صدني ولوه أيديه وره ظـهري صحت متألمة :- هدني مؤمل وبطل سـوالفك الخايـسة لا تصير مو خـوش
- لا حبيبتي مو بهاي السهولة
نجريت من أيديه للـصالة دفعته بحركة سريعـة ردت أشرد أجه لزمني من شعـري :- لا لا ما اتفقنـة هيج اريدج عااااااقلة
كال هيج جريت أيده الثانية عضيتها بكُل قوتي الى ان طبكت سن على سن صااح باعلى صوتة وكال :-
....
يتبع ⬅️ - البارت السابع والثلاثين -
روايتي
قناتي مال التليكرام بالبايو مال الواتباد
نسولف بيها دائما بخصوص الروايه .
الانستا ⬇️.