﷽
-الكاتبة: سـارة الحـسن
-Part 34
-"لا تنسون التصويت +
-" متابعة الحساب its_105
-"وتعليقاتكم ع الفقرات فيـروزاتـي"🤍
▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫
َ
-لحظات مخيفة، لحظات مؤلمة
لحظات وكفت حياتـي بيـــها
عينــي بعـين عمتــي وهـي تضحك
طلعت السجيـنة ورجعت غرستها مره ثانية
غرستها بقساوة وقوة كطعــت احشــائـي
-تبنــج جسمـي ماكدرت احــس بـشي
وكعـت ع عمتـي فاقده حسـي بـكل اطرافـي
دفعتـني عنها ع الكاع، ارتطم راسـي بقوة بس مافقـدت
اريـد اتحـرك، اريد اصـرخ، اريد اطلع من يمها بس ماكدرت
-بقيـت مشمورة بـ الكاع وعينـي عليها
هاي ابـد مو عمتـي، هاي وحـش
فاقـدة عقلـها وتضحك بـصوت عالي وتصيح
::-راح تموتيييييين وارتاااااح
كلكم رااااح تموتوووون محد راح يبقـى بيكم
-كعدت مقابيلـي تباوع لأديها الملطخه بـ الدم وتضحك
::-هههههههه محـد راح يعيـش بيكم
حتـى جساااااس رااااح يمـــوووووت
امـــي راح تجــي تاااخذة اي اي هي كالت راح تاخذكم
-حسيتها تزحف ليمـي واني عيوني صارت تغـوش
احس بيها تحرك وتدفع بيه وتحجـي بهدوء
::-روحـي يم اخوج محد يريدج
حتـى آفـروز تكرهج ترا، روحي ارتاحي
انتِ راح ترتاحين وآفـروز راح ينحرك كلبها
-افتح بـعيوني وتنغلق من وحدها، صارت الرؤيا منعدمه عنـدي بس الاصوات بـراسـي، وصـدى صوتها ما فاركنـي, صارت تبجــي وتكول
::-هـي خربت كلشـي، جنت اريد أوهم حامد
حتـى تخرب علاقة جساس بـ عبدالقادر وابنه
بـس هي شهدت ضـدي وعلاقتـي بـ ابوية خربت من وراها
وما عافتنـي بـ حالي، رجعـت اخذت ولدي منـي
خلتهم يكرهونـي وما يردون يشوفوني
محـد يريدنـي لا فقــار ولا خيبـر لا ظليل
-بـعدها كامت مـن يمي وصارت تصرخ بـصوت عالـي واخـر كلمة سمعتها وبعدها فقـدت الوعـي
::-كلكم رااااح تموتوون…كلكم راح تموتوون…
-سـدرة
-طلبت منـي امي الصبح انظف مكتب جـدي، نظفتـه ورجعـت للبيت، دخلت من باب المطبـخ شفت رؤيا كاعده وحدها ووجها أحمـر، تقـربت مـن السنگ داغسل ايدي وسألتها
::-شبيـج رؤيا؟!
رؤيا: مابيـه شـي
سـدرة: ليـش محتقنه لعـد؟!
رؤيا: بعـد الصار شتردين اسوي اركص؟!
سـدرة: زواجهم ما يدوم وهمه مخربين حياة غيرهم
-رجعـت تبجـي وكالت
::-مـن ما يحبنـي المـن خلانـي اتأمـل هيـج؟!
سـدرة: ما أمَلـج بشـي جان يعاملج معامله طبيعيه، بـس انتِ صرتـي تبنين احلام ويا
-رادت تحجـي وسكتت بسـرعة مـن سمعت صوت عمتـي أريـج تصيـح، استغربت وسألتها
::-شبيها مـن الصبح؟! اخذتيلها اكل؟!
-باوعتلي فاتحة عيونها مصدومة وكالت
::-هزراف صعدت عليها
سـدرة: شكو شبيج واذا هزراف صعدت؟!
-كامت مـن مكانها بسرعه وكالت بـخوف
::-مادري تعالـي نشوف شبيها
-طلعَت مـن المطبـخ وانـي طِلعت وراها، جان الوضع عادي لأن هـي دائماً تصيـح وهارجة البيـت، وصلنـه غرفتها اندور ع المفتاح ماكو وعمتـي تصيـح
::-كلكم رااااح تموتوون
-ركضت رؤيا ع غرفة هزراف واني واكفه بمكاني مستغربة حالة رؤيا، ثواني وطلعت من الغرفة وكالت هي وتبجي
::-هزراااف جوة
سـدرة: شبيج رؤيا؟! شنو هزراف جوة؟! ليش خايفة شراح تسويلها؟!
-اباوع ع رؤيا كل حيلها يرجف وتبجي والخوف ماكلها اكل
::-سـدرة اذا صار شي ع هزراف والقرآن آفـروز تذبحنـي
سـدرة: انتِ شعليج؟! شبييييج تخبلتي؟!
رؤيا: اني طلبت منها تصعد الأكل بس والله مادري عمتـي راح تحبسها وياها
-راحت تركض ع الباب ادكه بخفه وتحجي وياها
::-عمه بيج شي؟! وينها هزراف جابتلج اكل
-اسمع صوت عمتـي أريـج تضحك وكالت
::-مااااتت هزرااااف مااااتت
-شهكت بـصدمة وخوف بنفـس الوقت، لحظات تحبس النفس، انفزعت وانـي اسمع كلامها، عمتـي مو بوعيـها، تصرفاتها ما تنحزر أبـد
-تقربت مـن الباب وانـي ادعي ما مسوية شي بـ هزراف، ما تستاهل تتأذة هزراف،
::-هزراف تسمعينه وينج؟!
أريـج: ماااااتت هزراااااف ههههههههههه
-نزلن دموعـي بخوف اباوع ع رؤيا حالتها تخوف، الرعب دَب بـ كلوبنا بسبب الي دانسمعه، والي زادنه خـوف صوت هزراف ماكو
-ركضـت رؤيا بـ اتجاه الدرج وصارت تصرخ بخوف
::-آفـروووز الحكيلنةةةة ، راح تمووووت هزراف
-كلها ثوانـي وصعدت آفـروز تركض وامي وعمتـي عليا والميــرزا وراها، ماتدري شنـو السالفة ولا تدري هزراف شبيها لو وين هي، ركضت ع غرفتهن ورجعت طلعت تباوعلنه وعاطت بينه
::-وينهاااااا
-اشرتلها رؤيا ع غرفة عمتـي وهـي تخبلت
::-ولج شوداهااااا يم عمتـج
-اتكهرب الجو امي وعمتـي عليا خبصن الوضع ورؤيا كطعت نفسها الميــرزا وآفـروز فلشو الباب ع عمتـي بس ما فتحته وكالت
::-مثـل ما حرمتينــي من ولدي اني راح احرمج من كل اهلج
آفـروز: انعل ابووووج لبـو حتـى ولدج ولـچ افتحييييي الباااااب
-بقت عمتـي أريـج تضحك، وآفـروز تشيل روحها وتركعها بـ الكاع وحاولت تسمع صوت هزراف
::-هزراف احجي ويايه بيج شي؟! ليش ماكو صوتج ولـچ هزراااف
أريـج: ماتت هزراف ماتت
-اندارت عليه آفـروز وكالت
::-اتصلـي بـ هاااارون بسـرعه
-هزيت راسـي بـ ايجابية واتصلت ع هارون وهي عافتنـة ونزلت تركض مادري وين، والميــرزا تقرب يحجي وياها بهـدوء
::-أريـج افتحـي الباب والي تردينه يصير
أريـج: اريدهم يموتووووون
الميــرزا: ليـش تردين يموتون هيج راح يرتاحون، ليـش ما تعذبيهم؟!
جوري: ولك عمةةة تخبلت انت هم
-اندار عليها بسرعه خزرها وخلة اصبعه السبابة ع شفايفة بـ معنـى اسكتـي، وكمل
::-عذبيهم مثـل ما عذبوج لا تسمحيـن يموتون بـسهولة
أريـج: ابوية راح يحبسنـي مثل هسه
الميــرزا: اذا بقيتـي بهاي تصرفاتج اكيد راح يحبسـج، بس انتِ حاولي تهدأين حتـى ما يسويلج شي، عذبيهم بدون ما يعرفون هذا العذاب منـج
أريـج: خلي تموت هزراف خليها ترتاح هي ما تستاهل تعيش بيناتهم همه حقرااااء، وآفـروز مستغلتها وتضحك عليها
-اخـذ نفس عميق مرة يحگ بشعره مره يفرگ بـخشمه، يحاول يهدأ نفسـه، صعـدت آفـروز تركـض وبيدها مفاتيـح البيت الاحتياط كلها
-صارت تجرب واحد واحـد وايدها ترجف والميــرزا يحجي ويه أريـج يلهيها، تقربت مـن آفـروز وخايفة احجي وياها بس لازم اكللها
::-آفـروز المفتاح الاحتياط وية جدو
-ما هتمتلـي وبقت تجرب لـما عجزت، اندارت عليه وعاطت
::-ويـن هاااااارون
سـدرة: بـ الطريق والله
-رفعت راسها ع الميــرزا وحجت ويا بـ توسل والغصه بنبرة صوتــها، نبرة عجز وخوف بنفس الوقت
::-سوي شي أصـفاد
-هو حيرته مو اقل من حيرتنه، مـن جهه صحته تعبانة حتـى مايكدر يكسـر الباب لأن صاج وقوية ومبين عليه التعب من صعدت الدرج، لأن يتنفس بصعوبة ووجه عركان، هـز راسـه وكال لـ أريـج
::-أريـج اطلعـي اخذج لـ ولدج لأن اذا اجه ابوج ماراح يغفرلج الي سويتـي
أريـج: ولدي مااااا يردونييييي
الميــرزا: لا يردونـج وحتـى فقــار جاي عليج بـ الطريق
-سكتت شوية وكالت بفرحة
::-صدك فقــار جاي عليه؟!
الميــرزا: اي صدك اطلعي روحي ويا قبل لا يجي جدي
أريـج: ماصدكك لاااا ماصدكك
-باوع الميــرزا ع آفـروز وكمل كلامه ويه أريـج
::-وأذا سمعتـي صوته؟! راح تصدكين؟!
أريـج: اي اي اتصل عليه خل اتأكد
-آفـروز فهمت نظرات الميــرزا، اندارت عليه وهمست
::-اتصلـي ع فقــار
-هزيت راسـي بـ لا وسكتت، تقربت منـي ونترت بيه
::-مو وكت استشراااااف هسه اتصلي
-حجايتها جانت سجين ونبتت بـ گلبـي، هزيت راسـي ودموعي ماوكفت، اتصلت عليه وانطيتها التلفونه، اخذته منـي وابتعدت شوية عـن الغرفة حجت ويا ثوانـي ورجعت يـم الباب والميــرزا كال
::-اتقربـي اسمعي هذا فقــار ع الخط
فقــار: وينج يمة؟!
أريـج: فقــار حبيبي انتِ تريد امك مو؟! جاي تاخذني؟!
فقــار: اي جاي بـ الطريق بس هسه اطلعي وخل الميــرزا يجيبج عليه قبل لا يجي جدي جساس لأن ماراح يخليج بـعد
-قاطعنـه صوت هارون من صعد ع الدرج مثـل العاصفة ويصيح، اندارت عليه آفـروز بسـرعة واشرتله يسكت ورفعت عينها ع الميــرزا تريده يحجـي
الميــرزا: افتحـي الباب يلا خل نروح
فقــار: يلا يمة مابقــى وكت، خيبـر وظليل هم مشتاقيلج
-بس صوت ضحكتها، تضحك بـ فرحة، بس سمعو صوت المفتاح يتحرك آفروز غلقت الخط وشمرت تلفونــي عليه
-انفتحت الباب وطلعت أريـج مبتسمة بدون تفاهم دفعتها آفـروز بقـوة وكعتها بنص الغرفة، ع هاي الوكعه توقعت ظهر عمتـي انكسر
-دخلنه كلنـه للغرفة جانت هزراف مشموره يم الباب غركانة بدمها وكل ملامح وجها متغيره، ركضت عليها آفـروز تمسح بوجها وتضرب عليه بخفه وتحجي ويا
::-هزراف اكعدي لا يصير بيج شي هزرااااف
-تقـدم هارون عليها يتحسس نبضها وكال
::-خلي ناخذها للمستشفى بسرعة كوميييي
-شالها هارون وطلع وآفـروز هنا نست نفسها هي انسان، صارت مثـل اللبوة وهجمت ع أريـج ملختها تملخ، شكد عمتـي ضخمه وقوية بس ما كدرت تصد ضربة وحده من آفـروز
-نامت فوكاها وحارت شتسوي بيها من راشديات من بوكسات ومـن شعرها، ركضت عليها عمتـي عليا تسحب بيها بس هي ياجبـل مايهزك ريـح، والميــرزا جان مكتفـي يباوع عليهن
-مـن الضرب صار وجهه عمتـي أريـج عبارة عـن قطعه دم ومنين ماندري، وحتـى صوتها اختفـى وآفـروز تضرب وتصيح عليها من حرگة كلبها
::-والنبـي ما تعيشييييين وراهاااااا ياااا حيوااااانه
ولـچ انتِ منـووووو وتمديـن ايدج عليهااااا منـووو
-فقـدت وعيها عمتـي أريـج وعمتـي عليا كطعت نفسها بس تريد تشلع آفـروز من فوكاها وماكدرت
::-ولـج آفـروز راااااح تموت جوة ايدج
-ما اهتمت وبقت تضرب بيها، كالت امي للميــرزا
::-بـروح امك وخرها من فوكاها لا تموت وتبلانه
-تقرب عليها الميـرزا شالها من بطنها گوة شلعها مـن فوكاها وهي تدفع بي تريد ترجع عليها بعد وتصيـح
::-خلينييييي اموتهااااا خل نخلص من شرهااااااا
-شالها شيـل وطلعها مـن الغرفة ونتر بيها
::-امشـي روحـي ويا هااارون عوفيهاااااا هسه
-ابتعدت عنه تتنفس بقـوة وترجف من التعب من الخوف ع هزراف، من النار الي شتعلت بگلبها، اديها كلهن دم وراحت بسرعه للحمام غسلت ولبست صاية فوك ملابسها ونزلت تركـض
-الميــرزا طلع امـي وعمتـي عليا مـن الغرفة ويريد يقفـل عليها وعمتـي عليا تتوسل بي
::-خليني اشوف شبيهااا، نوبة تمووووت وتبلانه
الميــرزا: هسه واذا ماتت؟! اطلعي عمه رحمه لموتاج
جوري: تموت وتوكع براس آفـروز وتعيش بـ السجوووون
الميــرزا: انــه اشيل التهمه عنها بس اطلعـــي
-طلعها مـن الغرفة وقفـل الباب ع أريـج وحط المفتاح بـ جيبـة، اندار علينه انـي ورؤيا ويقيـن وكال
::-شجابها هزراف ع أريـج؟!
-بقينه ساكتين ورؤيا تضم بنفسها بـظهري وتشهگ وتبجـي ويقين واكفه وراها وخايفة عليها، تقرب من عدنه بخطوات بطيـئه وكال لـ رؤيا
::-انتِ دزيتيها؟!
رؤيا: والقرآن ما متقصدة ولا ادري راح يصير هيج
-هـز راسه بخفه وكال
::-احفري گبر بـ البستان اذا طلعتـي ما الـج ذنب وما گبرناج بي هم راح نگبر عمتـج
-حسيت عليها تعصـر بـملابـسي بقوة وتبجي وهو عافنـة ونزل، وامـي نزلت تحجي ويا
::-اتچـى عليه يمةةة
-هـو هم ما كال لا لأن مبين عليه تعب سنـد ايده ع كتفها وايده الثانية ع المحجر مالت الدرج ونزلو، سحبتها يقيـن من ظهري وسألتها
::-شصار؟! ليش دزيتي هزراف؟!
رؤيا: والله والله مادري راح يصير هيج، جنت ضايجة ومالي خلك اشوف عمتـي واسمع كلامها الي يسم وطلبت من هزراف تصعد الأكل
سـدرة: زين هـي منين جابت السجينة؟!
رؤيا: مـن زمان طلبتها منـي لان مرة صعدتلها فواكهه وكالت تريد سجين، والله مادري راح تسوي هيج
سـدرة: ادعو هزراف مابيها شي
يقيـن: اذا صار بيها شي لا سامح الله آفـروز راح تحرك البيت بينه والله
سـدرة: ماعنـدي شك ابد
يقيـن: فوك الولد الي واكفين وياها اجه الميــرزا اضرب منهم
سـدرة: عبالنـه يجي خيالها ويلزمها بس اجه وصار يطربگ وياها
-اكذب اذا اكول ما خفنه، لا خفنه وهوايه هـم مـن جهه خايفين ع هزراف ومـن جهه خايفين مـن آفـروز، كلشي ممكن تتهاون بي الا هزراف عدها خط أحمـر
-هارون
-الطريـق كله آفـروز مخلية هزراف بحضنها تبجـي وتتوسل بيها بصوت محتقن مايصيرلها شي، تخـاف ع هزراف اكثـر من الكل
-اتصلت ع هـود فتـرة وجاوبنـي
::-هـلا هارون
هارون: انتَ بـ المستشفى مو؟!
هـود: اي ليش؟!
هارون: هاي عمتـك العــايقة ضاربة هزراف بـ سجين
هـود: شتحجييي يمعود وين ضربتهااا ووينها هسه
-انداريت ع هزراف ورجعت اباوع لـ طريقـي
::-ضاربتها بـِ بطنها ونزفـت هواية هم لأن بقت فترة محبوسه يم أريـج
هـود: يعنـي هزراف فاقدة وعيها هسه؟!
هارون: اي
-صار يستغفر متنرفز وكال
::-والله لنعل ابو عمتـي لابو حتـى عشيرة عمتـي، حاول تستعجل هارون اني راح انتظركم بـ الباب
هارون: تمام
-غلقتة منـه ومشيت بـ اقصـى سرعة، وصلنه بعد فتـرة للمستشفى، وجان هـود وهوايه ويا واكفين ينتظرونه، بسرعة اخذوها من عدنه ودخلو بـ احدى غرف الطوارئ
-دخلنـه وراهم وبقينـه ننتظرهم، حولوها للعمليات، وهـود دخـل وياهم، اباوع ع آفـروز بس شفايفها يتحركن وترجف، تقربت حضنتها
::-لا تخافيـن راح تصيـر زينه والله
-بقت ساكتة وتـدعي واني بهل لحظه عقل مابقـى براسـي حتى الادعية الي حافظها نسيتها، بـعد فترة اجو الميــرزا ورسـول ومابيدهم شي غير يكعدون وينتظرون مثلنه
-باوعت عليه آفـروز وكالت
::-اتصل ع يـوشع
هارون: شتسوين بـي؟!
آفـروز: نقدم شكوى ع عمتـك
-اندارت ع الميــرزا وسالتـه
::-راح تشهد ويانه مو؟!
الميــرزا: اكيــد
-انـي هم اتصلت ع يـوشع وانطيت الجهاز الها، اخذته وكامت من يمنة، راحـت تحجي ويا، باوعت ع الميــرزا وسألتـه
::-شصار؟! شوداها هزراف يمها؟!
الميــرزا: ماخذتلها أكـل وعمتـك الظاهر فقـدت عقلها
هارون: وينها هسه؟!
الميــرزا: جثه مشمورة بـ الغرفة
هارون: ليـش؟!
الميــرزا: سحارتك اخذت حيفها بيها
رسـول: اذا ماتت ندفنها بـ البستان ونكول انهزمت
الميــرزا: وهــو هيج
-هـزيت ايدي ع الوضع وسكتت، دقايق واجت آفـروز كعدت يمنه ساكته، طلع هـود من يم هزراف وكال
::-وضعها زين بس فاقدة دم هوايه، وتحتاج دم
آفـروز: انـي نفس زمرة دمها اني انطيها
هارون: انـي هم اكدر انطيها
رسـول: احنه كلنه ننطيها
-اندارت علينه آفـروز ونترت بينه
::-شوكت صحيتو انتو وتردون تتبرعون
-رجعت باوعت لـ هـود وكالت
::-انـي انطيها هـود ماعليك بيهم
-اخذها هـود ويا حتـى تتبرعلها واحنـه بقينه مكابلين صالة العمليات وكاعدين، قبـل لا ترجـع آفـروز اجة يـوشع، وواضـح عليه مزعوج مـن الصار سلم علينه وسأل
::-شلون وضعها هسـه؟!
هارون: يكولون زينه بس بعدها بـ العمليات
يـوشع: وآفـروز وينها؟!
هارون: راحت تتبرع بـ دم لـ هزراف
-توسعت عيونه ونتر بينه بعصبية
::-فوك ماهي رايحةةة تتبرع عايفينهاااا وكاعدييييين هناااا
هارون: ع كيفك يابة ترا هـود وياها
-أندار ع الميــرزا وبسرعه تقرب منـه يحجي ويا بخـوف
::-شبيييك صَـفد؟!
-اندارينه عليه وجهه صاير دم وعركان كلـش، غمض عيونه وكال
::-مابيه شي
-كومة ويا ويدردم علينه
::-الـــمن مسميكم زلم؟! لا رايحــين ويــه ذيـــج ولا عيـــنكم ع هــذااااا
-بقـى يحجي ومتنرفز اخذ الميــرزا لوحده من الغرف يريده ينام ع سدية وصاح بـ رسـول
::-ماتمشـي تجيبلةةةة مي لو الا نحجييييي
-انخبـص رسـول وطلع بسـرعة وانـي بقيت واكف ع جهه اباوعلهم، اشرلي اطلع وكال
::-شوفلنه احد يجيييي يقيييس ضغطة
-طلعت صحـت لوحده مـن الممرضات، وعرفتـه للميــرزا لأن هو يداوم بـ نفس المستشفى، اهتمـو بـي ويـوشع وصانـي ابقى يمه وهو راح لـ آفـروز
-مرت فترة ورجعـو هو وآفـروز يمنـه، والميــرزا وضعه استقـر مـن ارتاح، لان هذا كله نتيجة الأرهاق وهو بعده حالتـة الصحية مو تمام بسبب الغيبوبة
-سألهم الميــرزا
::-قدمتـو شكوى؟!
يـوشع: بعـدنه
الميــرزا: شتنتظرون؟!
يـوشع: خل تطلع هزراف ويصير خيـر
-ما طولت وراها هزراف وطلعت ووضعها زين، بـس ننتظرها تكعـد، حتـى نكدر نشوفها، اجو عمامي وجدي كلهم بـ المستشفـى واجت هاجر ام هزراف وابو هاجر وياها
-كل مجموعة كاعدين ع جهه، ماحسينه غير هوسه آفـروز وجدي ويـوشع يحاول يسكت آفـروز بس هي اتخبلت وصارت تحجي مشكل يا لوز ع جدي
-محـد قبـل مـن عمامي ع اسلوبها وية جدي بس هي ما سكتت، اول مره اشوفها بـ هل حالة وعرفتها طلعت روحهـا،
والسبب جان جدي من رفض يرفعون دعوة ضد أريـج
-مو لأن خايف ع أريـج، لأن خايف ع سمعته
::-آفـروز تردين تفضحينه انتِ
آفـروز: لـو ميته هزراف ماراح تنفضح لعد؟! ماراح تطلع السالفةةةةةة؟! بيش يفيدنه خوفك من الفضيحة ومريض عايش ويانه بـ البيت
جساس: كلت اني احلهااااا ليـش تكبرين الموضووووع
-صار صياح بيناتهم والتمو علينه الناس والشرطة، حاول عمـي أكثـم يحل الموضوع ويه الشرطة ويكللهم الصار حادث بـ الغلط، بـس آفـروز طفرت من مكانها وكالت
::-الصار ابد مو حادث الصار جريمة قـتل متعمد ومـن شخص مريض نفسياً هم
-دفعها عمـي جاسر ع يـوشع ونتر بي
::-خليهاااا تسد حلكهااااااا لا اطيح حظهاااا
-خزرة يـوشع ما قبـل ع تصرف عمـي جاسر وكال
::-هاي الحقيقة وعدنه شهود احنه
الميــرزا: انــه اشهد، واكو ادله ع الصار هم
الشرطي: شنـو الادلة الي عنـدك؟!
الميــرزا: رادت ابنها يجي ياخذها واكو مكالمة ويه ابنها هو الي قنعها تطلع، تكدر تسحب تسجيل المكالمة
هارون: وانـي هم أشهد ع الصار
آفـروز: كل الي بـ البيت يشهدون ع الصار
-بعـد هوسه شكبرها، سجلو شكوى ع أريـج، جـدي زعل وطلع من المستشفى هو وعمـي جاسر، عمـي أكثـم هم ماقبل ع الوضع بس سكت
-بعـد مدة معينه انطانه خبـر هـود انـو هزراف كعدت ونكدر نشوفها، دخلت عليها آفـروز وهاجـر، واحنـه بقينـة ننتظرهم برا
-آفـروز
-نقطـــة ضعفــي الوحيدة هي هزراف
مــن هـي وصغيــرة جنت اشيل كلشي عنها
حتـى مـن جنه صغار جنـت اتعاقب وانضرب بـ مكانها
حسيتها نهاية الدنيا مـن شفتها غركانة بـ دمها كدامـي
مستحيـل اكدر اوصف احساســي بـذيج اللحظه
-لـو ميته أريـج جوة ايدي هم مستحيل تبرد نار گلبـي
طلعت قهري مالت سنين بيها وما ارتاحيـت أبـد
-تمـر عليه الدقايق مثـل السم، ثكيلة عليه
وانـي انتظر هزراف تطلع مـن العمليات
لسانـي ما بطل يلهــج بـ الدعاء لـ خاطرها
-مـن نطانه خبـر هـود هـي كعدت دخلنه عليها
انـي وهاجر، تقربت هاجر باستها مـن راسها وتحجي وياها
::-هـزراف ماما
-جانت هزراف بعدها تحت تأثير البنج وتحجي بدون وعـي، وجانت سالفتها نوسـي، ومـن سمعت امها تحجي وياها صارت تبجي وتحجي ع امها وتعاتبها
-بعـد فتـرة يـلا صحت، عيونها ذبلانه مـن التعب، أبتسمت وطبعت بوسة ع راسـها
::-الحمدلله ع السلامة غزالة
-اكتفت بـ ابتسامة خفيفه، امها هم باستها وحجت وياها وهزراف قابلت هل شي بجمود ما انطت اي ردة فعـل، بعـد فترة دخلو الولد عليها تحمدولها ع السلامة ، وجدها ابو هاجر هم وعمـي أكثـم
-يـوشع واكف بـ الباب وعينه عليها، رفع راسها باوعت عليه وبسرعة نزلت دمعتها، دنكت راسها،مسحت دموعها وهمستلي
::-اريـد انام
-أشرت لـ هـود بعيونـي حتـى يطلعهم، هو هم كاللهم تعبانه وتحتاج راحه وهدوء وطلعهم حتـى هزراف تنام، مـن طلعو رفعت راسها هزراف ع هاجر وتحجـي بـتعب
::-الـف مبروك، وتكدرين تروحيـن انتِ هـم
-استغربت ع شنـو تباركلها، باوعت لـ عمتـي هاجر وفهمت هي انخطبت من الحلقة الي لابستها، ضمت ايدها وكالت
::-شلون اعوفج واروح؟!
هزراف: مثــل ما عفتينـه قبـل
هاجر: جنت اريد اكلج والله بس...
-قاطعتها هزراف وكملت كلامها
::-الف مبروك تتهنين، هاي حياتج وانتِ حرة، وشكراً
لـ جيتج، اخذي راحتـج هسه
-باوعتلـي هزراف وكالت بـتوسل
::-خـل تروح فدوة
-بقيـت منحرجة مـن عمتـي هاجر بس هزراف هـم حقها، بقت اباوع ع عمتـي هاجر وهي فهمت قبل لا احجي، رجعت باست هزراف وطلعت
-كامت تبجـي هزراف وكالت
::-حتـى ما كلفت نفسها تنطيني خبـر
آفـروز: لا تضوجيـن نفسـج هزراف، شجنتـي متوقعه لعـد من تطلكت تبقى كاعده يم اهلها العمر كله وهي بعدها صغيرة
هزراف: ماضجت لأن انخطبت ضجت لأن ما حاسبتني بنتها ولا مخلية اهمية لوجودي بـ حياتها
-مسحت دموعها وحاولت اهديها
::-كافي بجـي لا تقهرين نفسـج هسه، يـلا نامـي
-سكتت وغفت بعد فتـرة وانـي بقيت كاعدة يمها، وكل شوية جاي واحد يسأل عليها، قبـل لا تكعد صاحنـي يـوشع اطلع ويا برة الغرفة
-وكفنـه يم الباب وكال
::-شلونها؟!
آفـروز: الحمدللة عدت ع خيـر
-اخذ نفس عميق وكال
::-أريـج ماكو
آفـروز: شنـو ماكو؟!
يـوشع: طلعو الشرطة لبيت جدج حتـى ياخذوها بس ماكـو، وجدج كال ما لكيناها منهزمة
-فرگت جبيني متنرفزة من وراهم
::-جدو ضمها اكيد
يـوشع: اكيد هو، بس الى متـى؟!
آفـروز: جد اختك ما ينعدل ابد، بس هينه
يـوشع: هسه شنو؟! شنسوي؟!
آفـروز: باجــر تطلع هزراف مـن المستشفى وراح نروح يمكم مانرجع للبيت
يـوشع: بـعيوني انتِ وياها
آفـروز: راح نضغط عليه يسلمها بيـدة
يـوشع: سهلة هاي
آفـروز: الولد وينهم؟! أصـفاد شلون صار؟!
يـوشع: موجودين يـم هـود، والميــرزا زين بس تعب وأثرت بي صعدت الدرج البسرعة وهيـج تدهور وضعه
آفـروز: خلي رسـول يروح يجيب علاجة من البيت، وهم خلي يسـوي تمارين ادية
-ابتسـم وكال
::-صــار وهسه راح اجيبلج أكل هم، هزراف تكدر تاكل؟!
آفـروز: لا مايصير منا لباجر بس سوائل
يـوشع: ماشـي شوية وارجعلج
-طلع تلفونه الثانـي نطانيا وكال
::-خلـي يمج اذا احتاجيتي شي اتصلي بيه
-علمنـي الرمز وراح، وانـي رجعت للغرفة يم هزراف، بعـد فترة اجه هـود غير السيروم لـ هزراف وخلالها ثاني بي علاج، اباوع ع هـود حيل متغيـر وشكله تعبان كلش، سألتـة بـ قلق
::-شبيـك هـود؟!
-اندار عليه وكال
::-شبيـه؟!
آفـروز: ليـش هيج تعبان؟! وضعفان؟! مريض؟! يوجعك شي؟!
-ابتسم واجه كعد يمـي
::-لا تشغلين بالج مابيه شي، بـس الدوام متعبنـي شوية
آفـروز: اخذ اجازة انتَ صحتك لهسه مو تمام
هـود: ان شاء الله خل اشوف هاي الأيام شلون ترهـم
آفـروز: ويـن الميــرزا؟!
هـود: كاعـد يـم هارون برا ورسـول راح يجيبله علاجة
-هـزيت راسـي وسكتت، صـار الليل واجة جدي وعمـي جاسر ع هزراف وامي عليا وياهم ، سلمو عليها وكعدو يمها وجدي يخزر بـيه اني طنشتة وگمـت طلعت مـن الغرفة
-كعـدت يـم هارون والميــرزا، حضنـي هارون مـن اكتافي وكال
::-شبيـج مغيمة؟!
آفـروز: من ورة جدك المجوس
الميــرزا: ليـش ما تشتكين ع جدج؟!
آفـروز: ع شنـو؟!
الميــرزا: هو الي ضامها لـ عمتـج، لأن سدرة كالت المفتاح الأحتياطـي عنـد جدج والمفتاح الثانـي جان وياية، معناها شنـو؟! هو الي طلعها
آفـروز: والله فشلة تالي عمره هو وشيباته وداخل للمراكز..
هارون: اذا ماقبــل يسلم أريـج انـي اول الناس اشتكي عليه، وسدرة تشهد ع كلامها الي حجتة
آفـروز: باجـر راح نطلع ونروح لبيت يـوشع، تعالـو يمنـه خل يحس جدكم بخلوة البيت من دونه وخل تفيدة ام حُـبين
هارون: هاهي اعتبرينه يمج
الميــرزا: لا تصير خفيف
هارون: يابة شنو غير بيت اخونه الهرفـي
الميــرزا: بس مو بيت الخلفوك
آفـروز: انتَ هم راح تجي ويانه أصـفاد
-قبـل لا يجاوبنـي كام هارون اللوتـي وكال
::-اخابر مريتـي تحضر ملابسـي
-عيبت عليه وهو ضحك وابتعد عنه، انداريت ع الميــرزا وسألتـه
::-راح تجـي مـو؟!
الميــرزا: لا
آفـروز: ليـش؟!
الميــرزا: أنتِ تردين تحسسين جدج بقيمتـكم وشلون راح يفرغ البيت بدونكم، انــه الطلعت والبقيت عنده نفس الشي
آفـروز: بـس انـي تفرق عنـدي
-رفع راسـه عليه بسرعة وهز راسـه بخفة، تحركت كعدت قريب منـه وكملت كلامي
::-گلبـي ماراح يطمن وانتَ وحدك بـذاك البيت، اريدك تبقـى قريب منـي
الميــرزا: لا تستغلين حُــبي الـج هيـج
آفـروز: مو استغلال هاي حقيقة، أنتَ بغيبـوبة وبعيد عـن البيت وبـ مكان امان وماكدرت اعوفك وحدك، شلون تريد هسه اعوفك يمهم؟!
الميــرزا: چــااا اضلن بـشقتـي
آفـروز: هم راح يبقـى بالي يمك، ابقـى يمنـة بس هاي الفترة احتاجك ويايه
-بقـى ساكت ويباوعلي، حرگت اكتافي بخفه
::-اذا ماتريد براحتـك ما أجبـرك ع شـي
-ضحك بهدوء وكال
::-تدرين بروحج طركاعة مو؟!
-ميلت نفسـي عليه بدون لا اطخه وهمست بـ ابتسامة
::-أذا مو احلى طركاعة تشوفها بـ حياتك
الميــرزا: واحلـى مصلحجية هم
-ابتعدت عنه اباوعلة صفح وهو يضحك
::-هنــااا راح نتخارب، شمستفادة منـك انـي اجيبك يمي لو ما خايفة عليك و..
الميــرزا: و... شنـي؟!
آفـروز: حتـى تحجيلي المضموم الي ما كملنا
-توسعت ابتسامتة وكال
::-تآمرينــي أنتِ
آفـروز: لا تدخل بـ العميــق
الميــرزا: ههههه مو اكول طركاعة
آفـروز: انـي راح ابقـى يم هزراف وانتَ روح نام ارتاح تعبت اليوم
الميــرزا: تآمرين
آفـروز: اكلت واخذت علاجـك مو؟!
-هـز راسـه بـ اي مبتسم، صفنت ع نفسـي وحچيت
::-طلعت انـي الدأكسب كلبك مو انتَ
الميــرزا: ههههههههه مو اكلج سوالفج سختچية
آفـروز: اجاني هيج احساس والنبـي
-بقـى مبتسـم وعيونه تتنقل ع ملامـح وجهـي وكال بهـدوء
::-خلينــي احـس بـ حنيتــج هاي الفتـرة
-اكتفيت بـ ابتسامة وبقيت فتـرة كاعدة يمـة لـما طلعو جدي وعمامي، وامي عليا بقت يمنـه، هزراف وضعها زين، مشـى الليل طبيعـي وثانـي يوم الصبـح هارون وصـل امي عليا ليم اهلها واحنـه يـوشع اخذنه ويا لبيتهم
-هـود بـقى بـ المستشفـى ورسـول والميــرزا اجو ويانـه، استقبلتنـه امي ليلى ويُـسر وجانو فرحانين لان راح نبقـى يمهم
-يُـسر
-كلش ضجت وانقهرت مـن الصار بـ هزراف، وفرحت بـنفس الوقت لان اجو راح يبقـون يمـنه، دخلت سانده نفسها ع آفـروز تمشـي بـهدوء والولد وياهن
-دخلتها للصالة نامت ع الكرويتة وامي غطتها بغطوة خفيفه، الميــرزا دخل للاستقبال وية يـوشع ورسـول بقـى مدري شيحجي ويه آفـروز
-شوية واشرتله بـ ايدها ع الأستقبال ونترت بي
::-والنبـي اذا طلعت اتبرة منك
رسـول: غير اديح بـ الشوارع
آفـروز: احترم نفسك وابقـى يم اخوك لعـد
-بقـيت صافنة عليهم هو يحجي عليها وهي تحجي عليه، باوع عليه وضحك، تقرب من آفـروز مدري شهمسلها، ضحكت وكالت
::-يلا يلا تصير
-باوعـلي وكال
::-شلونهاااا مصـيول؟!
-اشرت ع نفسـي وسألتـه
::-تحجـي وياية؟!
رسـول: اكو غيرج هنا؟!
يُـسر: اي هاي آفـروز هم
رسـول: بس انـي مو احول، داباوع عليج واحجي
يُـسر: عزاااا لعد شنـو مصـيول
-اجت بـ اتجاهي آفـروز تريد تدخل للصالة وكالت
::-اشبعي القاب منا وهيج احنه ناس همـج
-عافتنـه ودخلت وانـي جاوبتة
::-هلوو سميگل
رسـول: اخخحخخ صوبتـي گلبي، كل هذا الجمال وسميگل
-تقربت منه وسألته
::-ما لكيتو عمتـك أريـج؟!
-التفت يمين ويـسار، ادنـى عليه وهمس
::-الحجي بيناتنه ذبحناها ودفناها بـ البستان
-شهكت بـقوة وخليت ايدي ع حلكي فاتحة عيوني ع وسعها، هـز راسه وكال
::-خلصنـه منها يمعودة ع شنو مصدومة
يُـسر: عزاااا يعني انتو قاتل؟!
رسـول: اي بس اني "قاتل الشر" مو غير شي
يُـسر: وشلون تسوي هيج عزاااا ما تخاف اذا عرفو راح يحبسونك
رسـول: شبيك مصـيول غير محترف بشغلتـي، مو بسهولة يعرفون
يُـسر: يعنـي قاتل قبل؟!
رسـول: بكد شعر راسج
يُـسر: عزا عزا عزا انتَ مجررررررم
رسـول: لا اني "قاتل الشر"
يُـسر: ما يحقلك تقتل نفس خلقها ربك
رسـول: ماعليـج بهل سوالف، هو ربج كاتبله يموت ع ايدي، ولا تحجين ابد هذا سر بيناتنه خوش؟!
-صفنت عليه يحجي بـجدية وابد ما مبين يشاقة
::-عليك الله تحجي صدك؟!
رسـول: اي وداعت عمتـي أريـج
-بقيت مصدومة وبلعت ريگي متوترة وخفت منـه، دار وجهه يريد يروح للاستقبال ورجع عليه وهمس
::-لا تحاولين تحجين لأحد، قبلج سوها وماتــو
-هزيت راسـي بسرعة وجاوبتة
::-ماراح احجي ابد وراح انسى انتَ حجيتلي شي
-ضيگ عيونه عليه وكال
::-خليـج حذرة خاصة بـنومتج
-خلانـي ارجف منـه والدمعة صارت بـ طارف عيني وهو عافني ودخـل لـلأستقبال، درت وجهي وطكيتها ركضه للصالة، باوعتلـي امي وكالت
::-شبيـج يُـسر ليـش وجهج اصفـر؟!
-هزيت راسـي بـ معنى مابيه شي ودخلت لـ غرفتي، جانت آفـروز داتطلع ملابس تريد تسبح، رفعت عليه راسها باوعتلي ورجعت ابعدت نظراتها وكالت
::-خوفــج سوسو؟!
-بقيت ساكتة اندارت عليه تضحك وكالت
::-شگلج هل مرة؟!
يُـسر: شنـو؟!
آفـروز: بـشنو خوفج؟! قتـل؟! جن؟! حرامية؟! ارهاب؟! لو شنو؟!
-تقربت منها وهمست بخوف
::-رسـول مجرم وهو الي ذابح عمتـج ودافنها بـ البستان، وهددني اذا احجي راح يذبحنـي
آفـروز: لعـد ليـش حجيتي؟!
يُـسر: خطية بعده صغير مو مال يصير مجرم، ساعدي حتـى لا يدخل السجن
آفـروز: ماكدر اساعده بشي
يُـسر: ليـش؟!
-ابتسمت بـخبث وكالت
::-لأن شريكة ويا بـجرائمة، اذا حاولت اساعده راح ادخل السجن ويا
-خليت ايدي ع حلكي مصدومه بيهم شهل عائلة هاي حتـى اختـي طلعت مجرمه وتحجي طبيعـي ولا كأنو مسوين شي،
::-بروح اخوج تحجين صدك
آفـروز: لا
-لعبت بـ عقلي لعب، مدافهم صدكها من شقاها، اخذت ملابسها وطلعت للحمام، مدري شصار بيه عقلي ما استوعب كلامهم طلعت من الغرفة للاستقبال فتحت الباب بدون ما ادكها ودخلت ع يـوشع الدمعه بطرف عيني
-بسـرعة گام من مكانة وكال
::-شبيج حبيبتي شصاير؟!
-ضميت وجهـي بحضنه وحجيت ويا بهمس
::-رسـول وآفـروز مجرمين وقاتلين أريـج سوة ودافنينها بـ البستان مالتهم
-قبـل لا يحجي يـوشع اسمع صوت ضحك رسـول انفجر، طلعت بس عيني اباوع عليه وصرت اتخيل ضحكتـه شريرة، الميــرزا ويـوشع هم ضحكو وكال
::-يشاقة وياج يُـسر هو هذا شكله شكل مجرم
يُـسر: والله هو كال وآفـروز هم كالت صدك
الميــرزا: شبيج يبعد اخوج هو هـذا مايرهم غيـر مهرج
يُـسر: والله هـو كال وهددني يريد يذبحنـي هم
يـوشع: ولـج هو دجاجة بقينه نتوسل بي اسبوع يلا ذبحها، تردينه يذبح انسان
-بقيت مطلعه بس عيني واباوع ع رسـول رفع حاجبة بـخبث وكال
::-حذرتـج انـي
الميــرزا: لا تهمــبل مو زين عليك
يـوشع: اذا عدكم علاج مانع حماوة انطي
الميــرزا: منا صيف ومنا حماوة رسـول ارحمونه
-لزمو تصنيف ومو ميت ضحك ولا عبالك دا يحجون عليه، مرت فتـرة طويلة ع هل حالة، اجت آفـروز وكفت بـ الباب وكالت
::-جعلها ضحكت خيـر يارب
رسـول: هاي اختج فتنت علينه
-انداريت ع الميــرزا وسالتـه
::-آفـروز هم مهرج؟!
الميــرزا: اي بس من هذوله الي يطلعون بـ الافلام الرعب
يُـسر: يعنـي شنـو؟!
الميــرزا: افهميها انتِ
يـوشع: كاااافي شبيكم وياهااا صدك ما تستحون
-ضحكو وسكتو وهو بقـى يقنعني جذب وهمه هيج شقاهم ثكيل، بحيث يشاقون بدون ما يضحكون وغصباً ع عقلي اصدكهم
-گمت طلعت وية آفـروز، امي جانت كاعدة يـم هزراف مسويتلها شوربة، اكلت واخذت علاجها ونامت، الظهر اجة هـود وهارون وصبينه الغدة الهم واحنا تغدينة وحدنه
-بعـدنه نتغدا وصارت الباب الخارجية تندك بقوة عبالك هجوم علينه، كلنه كمنه دانشوف منـو، فتح الباب يـوشع ودخل جساس معصب وكال بنتـر
::-يلا خل تجيب اختها وتجي
يـوشع: وين تجـي؟!
جساس: تجيييي لبيتهااااا ويييين يعنـي
-طلعو الولد كلهم وكال هـود
::-محـد راح يرجـع لـ ذاك البيت لا هزراف ولا غير هزراف
أكثـم: هاي عـود انتَ الجبير هيج تحجي
هـود: ولأن انـي الجبير من واجبـي احميهم
جساس: لوين تردون توصلون؟!
هـود: شوكت ما تسلم عمتـي أريـج للعدالة احنـه نرجع لبيتك جدي
آفـروز: يا أريـج يا احنـه وانتَ براحتـك بعـد
جساس: وحلوة ضلتكم هنااااا؟! الي يسمع شيكوووول ما عدكم بيت؟!
هـود: اذا اضطر الأمر اخذلهم بيت وابقـى يمهم بس مستحيل واحد يرجع وعمتـي أريـج محد يندلها
-صار عصبـي وصار يصير ويحجي، بعدها كال
::-راح اندمكم ع هاي جسارتكم
-عافهم وطلع، باوع أكثـم عليهم ابتسم وكال
::-ما اخذتو البنيات يمكم هم
هـود: وصلتهن ليـم امـي وسدرة ماقبلت تجي
-جان راضـي ع وضعهم ماعرف شعجب هز راسـه وسأل الميــرزا
::-شلـون صرت؟!
الميــرزا: الحمدلله
-ماحجة شي وطلع ورة جساس، ضحك رسـول وكال
::-كُـل مسرحياتنه سببها هاي النذلة
-حجاها واشر ع آفـروز، مدت ايدها وكالت
::-طلع الـف ماكو مشاهده مجانية
-طلع ربـع مـن جيبة حطه بيدها وكال
::-هذا الموجود
آفـروز: فگور ع اخوك
-الميــرزا جان واكف ومستند ع الحايط رفع حاجبة وكال لـ رسـول
::-هو انــه ماخذ صيت الفگر يا ماخذة شو جيب 3 اطلب امك
رسـول: روح اخذهن من امي والله ما انطي ربع
-عافهم ورجـع للاستقبال وهمه دخلو ورا، احنه دخلنه للصالة جانت هزراف كاعده مشت لـ يمها آفـروز وكالت
::-صـح النوم غزالـي
-ابتسمت وكالت
::-زعـل جدو مو؟!
آفـروز: اي، واليزعل هو يراضـي نفسه
هزراف: ماريد تصيرلكم بسببي
آفـروز: هو شنو بسببج غير يـوشع يحرك بغداد اذا رجعنـه
-ارتبكت هزراف وهي اخذتها بـ شقة ولاصت الموضوع، بقينـة هدوء للعصر كومتها آفـروز تمشيها شوية بـ الصالة، رسـول اخذ الميــرزا لان عنده جلسة علاج طبيعي، والبقية هم طلعو مادري ويـن
-آفـروز
-سانـدة هزراف عليـه ودامشـيها بـ الصالة شوبة
وگفـت وكالت
::-كافـي تعبت
آفـروز: تمام تعالي نكعد
هزراف: احس بيه ريحة مو طيبة اريد اسبـح
آفـروز: مايصير تسبحين بس اذا تردين اغسلج من فوك ومـن جوة حتى ما نوصل للعملية
-بقت ساكتة اعرفها خجلانه وتستحي ابتسمت وكملت
::-اغمض عيونـي ما اباوع، وبعدين اني اختج عوفي المستحـى شوية
-هـز راسها بـ قبول واخذتها للحمام، ساعدتها تغسل وتغير ملابسها وهي وجها صار طماطة من المستحـى، ضحكت وعضيتها مـن خدها
::-احب الطماطة اعذريني
-ضحكت وسكتت، من طلعنه كعدتها بـ الصالة وامي ليلى مشطت شعرها وفرحانه بيها عبالك بنتها جانت ضايعة
-لـ لليل رجعو الولـد بس رسـول والميــرزا ماكو، كال هارون
::-ماراح يجـون ع العشة
-استغربت همه ما يتأخرون بـ التمرين هلكد، مشى الوقت وخلصنـة عشة وكعدنه كعدة طويلة يم هزراف وسوالف وشقة وضحك وهمه ماكـو
-اخذت تلفوني ودخلت للغرفة اتصلت ع رسـول، ثواني وجاوبنـي مبين دتاكل وحلكه مقبط بـ الاكل
::-هـااا النذلة
آفـروز: انتو وين سوسو؟!
رسـول: بـشقة الميــرزا
آفـروز: ليـش ما اجيتـو؟! صاير شي؟!
رسـول: لا بس الميــرزا تعب وشقته قريبة ع المستشفى واجينه بيها لـما يرتاح
آفـروز: شلونه هسه؟! بعده تعبان؟!
رسـول: لا احسن وكاعد ياكل هم
آفـروز: تمام لا تنسى انطي علاجة ورة الأكل
رسـول: خادم
آفـروز: حاولو ترجعون تبقون يمنـه
رسـول: هم خادم
آفـروز: يلا دعبل ولا تكله اتصلت بيك
الميــرزا: ليـش؟!
-سكتت مـن سمعت صوته، ضحك رسـول وكال
::-اعذرينـي جنت فاتح مايك وسمعج
آفـروز: المفروض ما يسمونه بيت العايش، لازم يسمونه بيت الفاضح لان احنه مفضوحييييين
رسـول: امسحيها بشاربي
آفـروز: هـو انتَ منيلك شارب
-ضحك بصوت عالي هو والميــرزا وكال
::-مو اكلج نذلةةةةةةة
آفـروز: ديلا كمل اكل وتعالو راح انتظركم
رسـول: ليـش؟!
آفـروز: اشتاقيتلج سوسو لازم اشوفج يلا اكدر انام
رسـول: انـي لو اخوية
آفـروز: كرونك مال بلاستك انتَ
رسـول: هههههههههههه روحي روحي راح تجفصيهااااا
الميــرزا: هي غير سوتك تبليط يخوية
رسـول: لا ما بيناتنه احنه طيح حظي واطيح حظها
دخلت يُـسر واني كملت كلامي وية رسـول
::-ع راسـي انت سوسو
رسـول: هـلا بجعفوري
-غلقتة منـه وسألتنـي يُـسر
::-هـذا سميـگل
آفـروز: ههههه شبسرعه طلعتيلة لقب
يُـسر: خمو بس هو يكلي مصـيول لعد
آفـروز: قاتل الشر
يُـسر: هاي كلكم هيـج تتشاقون؟!
آفـروز: بـس احنه ما نتشاقة، بس محد يصدكنه
-بقت صافنة بوجهـي ضحكت وطلعت مـن يمها، بعـد فترة ساعه تقريباً اجو الميــرزا ورسـول، اباوع ع يُـسر عين عليه وعين ع رسـول ورسـول يباوعلها بـ نظرات شريرة
-ماحسينه غير هارون كفخه بـ الكوشة وكال
::-يمعوووووود دطييييير عود يخوفها ترا صار عندي
جالي من نظراتك من كد ما تلعب النفس
هـود: جان يسوي هاي النظرات ويه نوسـي هو يسويها يجي راشدي من نوسـي يفر وجهه
رسـول: مطيحين هيبتـي انتو
الميــرزا: هيبة زعاطيط
رسـول: هاي عـود انتَ اخوية حزام ظهري وهيج تحجي
هارون: هي مال خوة بهل زلك
آفـروز: ماعليك منهم انـي اخوك
رسـول: والنعـم منك جعفوري
-بقـو متلاغين بـ الكلام ناس ترفع وناس تكبس طفرت يُـسر مـن مكانها وكالت
::-يلااا السبع يطلع دم اخووو
-ضحكو وسكتو، كام مـن مكانه كعد يمـي وصار قريب كلش دنه راسـه يريد يهمس بـ أذنـي، قاطعة الميــرزا مـن نتر بي
::-رسـووووول
-رفع راسـه عليه وجاوبة
::-هــاااا
-مبيـن غار بس راد يلوتها علينـه وكال
::-جيبلي مـي
-كامت يُـسر بسرعه وكالت
::-اني راح اجيبلك
الميــرزا: لاااا هو رسـول يجيب
-هز راسه رسـول وكام راح جابلة مـي، بقت عيني ع الميــرزا بس هو ما باوعلي بـعد، نطا المي شرب منه شوية وخلا ع جهه ورسـول رجع كـعد يمـي بس مسافة بيناتنه وكال بهمس
::-تذكرت خيبـر
آفـروز: دلوع الماما الغيور
رسـول: اي بس الفرق هذاك حجاها بدافع الخباثة وهذا بدافع الغيرة
آفـروز: لا بدافع الحرام
رسـول: هي مال دروب دشوفي عيونه راح تطلع مـن مكانها، لو بيده هسه يلزكنـي بـ الحايط يسويني صورة
آفـروز: تدري بـ الحقيقة ومضحي بنفسك
رسـول: فدوة الك جعفوري انتِ الضلع وهو اخوية تمونون
آفـروز: ع راسـي والله
-ضحك واتحرك شوية مبتعد عنـي، رفـعت راسـي ع الميــرزا جانت عينه عليـنه، بقـى يباوع لـ عيوني ثوانـي ودنك راسه مستمع لـ حديثهم
-تأخـر الوقت وتطشرو الولد ينامون بـ الاستقبال وناس بـ غرفة يـوشع، يُـسر تمام يم امـي وهزراف بـ مكانها بـ الغرفة يمـي
-ساعدتها تكعد عدل وتستند ع طرف الجرباية وطلعت مـن يمها سويت عصير برتقال طبيعي الها وللميــرزا، رجعت للغرفة نطيته الها واخذت تلفوني دزيت مسج للميــرزا يطلعلي بـ الحديقة
-اخذت العصيـر وطلعت، ماطول واجة هـو، بـدون ما احجي شي قدمتلة العصير ابتسم واخذه مـن ايدي، بقـى واكف يمـي واثنينه ساكتيـن لـما كمل العصير وكال
::-عاشت ايدج
آفـروز: بـ العافية
الميــرزا: هيـج راح اتعلم ع دلالج
آفـروز: هل دلال لـما تصير زين بس
الميــرزا: وراها يبدا دوري بـ دلالج
-ابتسمت وسكتت، اخذت الگلاص مـن ايدة وحجيت
::-يـلا روح نام اكيد تعبان
الميــرزا: راحــتي بـ قربج يـچمرة أفادي
-درت وجهي ع جهه وهمست
::-مو اتفقنـة ما تخجلني صفصف
الميــرزا: ههههه تمام راح اسكت وانتِ احجي
آفـروز: شحجي يعني؟!
الميــرزا: الي يعجبج اروينــي وروحـي
-استندت ع الحايط وبلشت احجي ويا وهو متفاعل ويايه وبقيت احجي واحجي واحجي وهو صافن عليه، بعدها سكتت وسألته
::-بالك ويايه
-جاوبنـي بهدوء كلش
::-اي كملي
آفـروز: شكمل؟!
الميــرزا: احجي بعد جاي اسمعج
-بقيت ساكتـة واباوع لـ عيونه وهو افترسـني بـنضراته، تقرب منـي سند ايده ع الحايط يـم راسـي ونزل نفسـة لـ مستواية، عيونه تتنقل لـ تفاصيل وجهـي وهمس بـهدوء
::-أريـدج اول ذنوبـــي
-هزراف
-گملت العصير الي جابتة آفـروز خليت الگلاص ع جهه وسحبت الايباد مالت يُـسر مخليته يمنـه فتحته اباوع بـي لأن ما نعسانه
-اندكت الباب بـخفة سحبت شالي خليته ع راسي لان توقعت واحد من الولد، صحت بـصوت مسموع
::-تفضل
-انفتحت الباب ودخل يـوشع، باوع ع مكان آفـروز وكال
::-ويـن آفـروز؟!
هزراف: اخذت عصير للميــرزا هسه تجي
-بقـى ثواني واكف، رفع ايده رجع شعرة كال
::-تسمحيلي احجي وياج شوية
-ارتبكت مجرد حجة هيج، هزيت راسـي بـ اي وهو دخل وبقـى الباب مفتوح شوية، كعد ع طرف الجرباية مالت آفـروز مدنك راسه وكال
::-راح احجي بس لا تقاطعيني
هزراف: تمام
يـوشع: يـمكن فهمتـي مشاعري اتجاهج من تصرفاتـي او مـن كلامـي، واذا تكوليـن لا ما فهمتـك فـ اني اكولها الج هسه بـكل صراحة "الـج شي جبير بـگلبي"
-رفع عيونه يباوعلي وكمل
::-صعبة عليه اشوفج هيـج تتأذين وتتعرضين لأذية وفوكاها ماكدر اسوي شي انـي ولا اكدر ادافع واحجي ومن حجيت اول شي سمعته من جدج وعمامج
"انتَ غريب عنها لا تدخل بيها"
هزراف: بس..
-قاطعنـي وكال
::-ماريد اطولها وياج هزراف، انـي رايد اطلبج ع سنه الله ورسـولة، رايدج تكونين بحمايتـي ومـن هسه شعندج شروط قابـل بيها وانـي الممنون ولـو تردين روحـي هم ترخصلج
-نزلت راسـي ويه ما نزلت دموعـي وهمست
::-ماراح تعوفنـي مثلهم
يـوشع: اضـمج بـ روحـي اني هزراف
-رفعت عيني عليه جان يباوعلـي بنظرات حنينة كلـش، ميل راسـه بخفه وهمـس
::-يابعد كلشي يـ المچودرة على رمشي
"احبـــج غزالـــــة"
َ◄يتبـــــع.......
▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫
َ
َ
◄التصويت يا عباد الله 💔
وتعليق حلو مثل عيونكم
◄التنزيل بين يوم ويوم وهم حسب التفاعل 💚
◄تابعــو حسـابـي ع الأنستــا [ itsara.kh ]