نسواني المعدلة لا تنسون التصويت والتعليق بين الفقرات يعني من الاخير تعليقاتكم تسويلي حماس للكتابة يعني كثرولي
تعليقات ادللكم بالاحداث😉💋
ــــــــــــــــــــــــــــــــــ
_الفيحاء
_جنات
_كاعدة بالطارمة اباوع للسما چانت مغربية ما بقى غير يومين على اول يوم الي بالسادس
_گمت طفرت من شفت الباب ينفتح دخل ومرسومة ابتسامة خفيفية على وجهه
آسر: ها بنيتي شو كاعدة هنا
جنات: ضجت وگلت اطلع اشوي
_اتقرب مني وحضني وباس راسي واردف
آسر: جايبلچ هدية
_دفعته بخفة ونزلت راسي نحرجت منه وحچيت بهمس
جنات: شنو
آسر: روحي داخل ومن اگلچ طلعي تعاي
_هزيت راسي ودخلت مثل ما گلي دقائق وسمعت صوته
آسر: يلا تعاي
_طلعت وشفت لعبة مچيسة اتقربت منه ولمسته واردفت
جنات: شنو هذا
آسر: سكوتر
جنات: اول مرة اشوفه
آسر: چنت بالسوگ وشفته وگلت اجيبه تلعبين بيه
_ابتسمت واردفت بخجل
جنات: رحمة والديك
_حط ايده على راسي واردف
آسر: خلي نصلي ونتعشة ونطلع نلعب بيه بالساحة شتگولين
جنات: يا ساحة
آسر: اكو ساحة فارغة اشوي بعيدة عن البيت اخذچ الها مكان مفتوح
جنات: ان شاء اللّٰه
_دخل وبيده علاليگ خلاهن على السنگ وطلع سلال وشگ العلاگة وطلع رمان منها وبلش يغسل بيه
جنات: شو صاير نادر
_باوعلي وابتسم
آسر: الماي صاير مالح واخاف تگب عليچ الحساسية
جنات: مساع چان حلو
آسر: اي قبل اشوي صار مالح واخاف صعد ماي مالح للتانكي
جنات: اريد اسبح هسة شلون
آسر: ترسي الطشت ماي حلو وسبحي
جنات: ان شاء اللّٰه
_شگ العلاگة الثانية وطلع فراولة
جنات: يُمة الفراولة نازلة
آسر: اي قبل كم يوم نزلت بالسوگ وگابة نار
جنات: لعد المن جبتها
آسر: البنات يحبن الفراولة بلكت انتِ هم تحبيها
_باوعتله وجريت السلة خليتها بالثلاجة ورجعت خليت الفراولة هم بالثلاجة ورحت للحمام توضيت وطلعت فرشت السجادة انتظره يأذن
آسر: بعد نص ساعة شبيچ متحزمة من هسة
جنات: لا بعد عشر دقائق
_باوع للساعة وبينت عليه علامات الصدمة
آسر: الوكت يركض مراكض
جنات: اركض وراه
آسر: ما اكدر اضحك
جنات: المهم اريد صدرية وقميص مبقى شي على الدوام
آسر: ميخالف اجيبلچ
جنات: يمتى
آسر: باجر تلگيهن يمچ
جنات: ما اثق بذوقك
_باوعلي ورفع تك حاجب
آسر: ملابسچ اغلبهن ذوقي هسة ذوقي صار ما يعجب
جنات: بهذا وشمك الچنه رجل ديچ
آسر: انتِ من ما تعرفين تردين تگلبين على وشمي
جنات: ترى مو حلو شيله
آسر: استغفراللّٰه
_گام من يمي وطلع برى دقائق وسمعت صوت الاذان انتظرته يخلص وگمت صليت خلصت صلاة المغرب ونمت على السجادة
آسر: شكاعد تسوين
جنات: ما ادري بس احس براحة
_اشوي وگمت شلت السجادة وطلعت بتيته وطماطة حتى اسوي اكل
_دقائق واجة يمي يباوعلي بغضب ويحچي
آسر: وين التلفون النطيته الچ
جنات: بالجرار شامرته شلك بيه
آسر: دكيت عليه ليش ما اسمع صوته
جنات: مخليته صامت
آسر: المن صامت
جنات: شكد تسأل ما ادري خليته وبس
آسر: اوكِ بعدين خليه عام
_كعد بصفي واردف بأبتسامة
آسر: تردين اساعدچ
جنات: مشكور ما اريد
آسر: شبيچ بس ضايجة
جنات: بطني تمغصني
آسر: شبيچ خاف جوعانة
_باوعتله بغضب ورجعت اگص بالبتيته خلصت وعفتها على السنگ ورحت للحمام غسلت وطلعت لگيته كدامي واگف
جنات: بسم اللّٰه
آسر: كعدي لا تضلين تتحركين
_باوعتله مستغربة من كلامه ما خلاني حتى احچي عافني وراح
_كعدت اگلب بالتلفزيون مالي خلگ اگوم يمه واسمع طگطگه بالمطبخ بس مغلسة
_مَر اكثر من نص ساعة واجة يمي وبيده صنينة خلاها على صفحة وجاب وصلة فرشها وحط الصينية عليها واردف
آسر: يلا الزرگة تعاي اكلي
جنات: عشتو عودة المطيرچي صاير نادر وتسويلي اكل منك من الشيطان
_رحت كعدت واجيت اخذ صمونة وجرها مني وقدم كوب الچاي الي واردف
آسر: لان بطنچ توجعچ گلت خطية بس انتِ مو وجه واحد يحطچ على راسه
جنات: صحيح لازم يحطني على چتافه ويفتر بيه
_ابتسم مجاملة وسوالي لفة وحطها بيدي
جنات: اكدر اكل ما داعي تسويلي
_باوعلي واردف
آسر: كيكتي وجودي يضايقچ؟
جنات: ها
آسر: وجعا بگلب العدو
جنات: خطية
آسر: خيولون
جنات: منو
آسر: البالي
_نكت ايده وگام
جنات: ما اكلت عدل
آسر: شبعان جناتي انتِ اكلي الف عافية
_خليته يروح وشكلت ردن التراك وصرت اكل
آسر: بسم اللّٰه اروح اشوي ارجع الگاچ متحولة لتمساح
جنات: اوي شتريد هسة
آسر: دهر الدهرچ على كيف اكلي خدودچ راح تنفجر
جنات: صلي على محمد شبيك على لگمتي تباوع
_كعد بصفي وابتسم ولزم خدي وجره قوي دفعت ايده وصرخت
جنات: وووسسسم شببيييك يأذذذييي
_ابتسم وميل رگبته واردف
آسر: اروح فدوة لترافة خديداتچ
جنات: اي واللّٰه تروحلهن فدوة
_رجع گرصهن قوي واردف بغضب
آسر: انا شلون بطولة هل لسان
_لزمت ايده اريد ابعدها وقوة گرصته مباشرتًا عيوني دمعت ، رخه گرصته واردف
آسر: ما اقصد ائذيچ
جنات: وخر ايدك
_ابتسم ووخر وراح كعد على القنفة وانا شلت الصينية وشفت دولگة بيها ماي حلو غسلت منها وعفت الماعين ورجعت يمه واردفت
جنات: يمتى تعلمني
آسر: بعدين رجلي يوجعني هسة
جنات: افف
_كعدت بعيد عنه واردفت
جنات: اشتاقيت لعمة نوال
آسر: ميخالف اشوف يوم واخذچ الها
جنات: تدري آسر چانت تكعد من الصبح تسويلي وتسوي لحسوني ريوگ وتنطينها لفات ومرات وياها تفاح لو مصرف
آسر: هنيَالها شايلـه گلبَ شگِد حَنين
جنات: اللّٰه يحفظها لابنها ولعمو فاضل
آسر: هنيالهم بيها
جنات: گول ما شاء اللّٰه راح اطگهم عين
آسر: ما اطگهم عين بس احنى باقين بحسرة الحَنية
جنات: انت وحدك
آسر: اييي وانتِ شايفه حنية منو بس لا بشار
_گلبِي وجعني من كلامه وحسيت ايدي صارت ترجف ، حچيت بصوت مهضوم
جنات: ابوي حيل حنين ومعوضني عن كلشي
_غطيت وجهي وحچيت مقهورة
جنات: چااان يگلييي اميرررتييي بسس راااحح العررراااق اخذذ سندييي
آسر: يُبا هدئي على كيفچ
_حسيت من حضني ومسح على راسي بعدت ايدي عن وجهي ودفعته بخفة واردفت
جنات: عوفني
آسر: كافي بچي كيكتي گومي خلي نلعب بالسكوتر
جنات: ما اريد
_لزم وجهي بيده وعصره على كيف واردف بأبتسامة
آسر: يلا بنيتي الزرگة خلي نغير جو كله كاعدة بالبيت حقچ تختنگين
جنات: انت املح واچلح
آسر: شحلات البصراوي املح اچلح مگرم كله حلو
جنات: اي ابقى بس امدح بنفسك وانت چنك عودة مطيرچي انت وهذا وشمك
_ضحك وجرني من ايدي واردف
آسر: روحي لبسي جبة وامشي نروح نجربه
_هزيت راسي ورحت للغرفة لبست الجبة ولفيت الشال عدل وطلعت لگيته كاعد يدخن
جنات: يلا
آسر: يلا يالمسعدة تفضلي
_طلعنا من البيت وقفلناه وصعدت وياه اشوي مشى بينا مسافة ووگف يم ارض فارغة ويمها بيوت قليلة بس بعيدة
آسر: يلا نزلي
_نزلت وهو وراي چانت ضلمة گوة اشوف
جنات: لو جاين الصبح احسن
آسر: ما داعي اكو بروجكتر هسة اشغله ويضوي المكان
_راح للسيارة دقائق ورجع ووياه البروجكتر شغله وصدك صار المكان متروس ضوء
_جاب السكوتر وخلاه يمي واردف
آسر: يلا لعبي
جنات: ما اعرف
_ابتسم ووگف عليه واردف
آسر: تعاي صعدي ليكدام
_صعدت وصار يدفع ، چان الهوى يضرب بوجهي شعور حيل حلو
آسر: ها حلو؟
جنات: يجنننن
_وگف وانا باوعتله واردفت
جنات: يجننن هواي شكراً
آسر: اروح فدوة لهل وجه الفرحان
جنات: يلا وخر العلب بيه وحدي
آسر: صار
_وخر وانا وگفت وصرت ادفع بس ما يجي نفس السرعة
_رجعت يمه وحچيت متنرفزة
جنات: خرباان ما يشتغل
آسر: ثبتي رجل والرجل الثانية رجعيها ليورة ودفعي قوي لا دفعين على كيف
_ابتعدت عنه وسويت مثل ما گال ورجعت يمه طايرة فرح
جنات: شفتتت شللوون سووويتهااا
آسر: اي شفت عفية عليچ سباعية
_ضحكت ورجعت العب الى ان تعبت ورجعت يمه الهث
جنات: عطشانة
آسر: بالسيارة اكو بطل ماي بس حار
جنات: لعد خلي نرجع للبيت كافي
آسر: صار
_شال السكوتر وانا مشيت وراه ووصلنا للبيت ورحت گبل للترمز ترست گلاص ماي وشربت
آسر: دخلي غسلي وجهچ وايديچ ورجليچ ولا تكعدين كدام البنكة
جنات: هسة اشوي واغسل بس خلي ارتاح
آسر: اللّٰه يساعدچ بس لا چنتي طالعة عمالة
جنات: عود حشاش
_غميته ورحت واسمع صريخه وراي
آسر: استهتتتترررتيييي مووووو
_غلست عنه ورحت غسلت ايدي ورجلي وطلعت كعدت بالغرفة
_دقائق وسمعت دكة الباب وانفتح ومد راسه وابتسم
آسر: راح اسوي شامية تردين؟
جنات: ما اريد ولي لبيتكم حتى لا تبات يمي انا مو جاهلة واخاف
آسر: جناتي لا تصيرين رعنة وگومي كعدي يمي اضوج وحدي
جنات: اطلع ولي ما اريد اشوف خلقتك
آسر: اعوذ باللّٰه اليوم الهرمونات گابة
_طفى الضوء وسد الباب قوي
جنات: تسووودنت
_شمرت المخدة معصبة ولفيت روحي بالبطانية وغمضت عيوني
_حسيت نفسي غفيت وفزيت على صوت شخص ياكل يم راسي ، درت وجهي وشفته كاعد ياكل شامية ويباوعلي
جنات: شنو انت ما عندك احساس
آسر: لا شايلينه بالولادة
جنات: عمت عينك
_كعدت رجعت كذلتي ورى ذاني واخذت شامية من الطاسة واكلت واردفت
جنات: ناقصها ملوحة
آسر: اخاف يرتفع عليچ الضغظ
جنات: لا حبيبي انت ما مقصر
آسر: حبيبي الشالع گليبي
جنات: شنو
آسر: انتِ ليش ثولة
_اجيت احچي وحط ايده على حلگي وضحك واردف
آسر: بس احب هل ثول
_وخر ايده عن حلگي وحچة
آسر: يلا يالمسعدة غردي
جنات: ردت اگول ثولة مثلك
آسر: انتِ شنو عبالچ طولة السان قوة؟
جنات: ما ادري
آسر: لا كيكتي عيب تحچين هيچ على احد بس علي يلا عادي نسويلچ استثناء
جنات: خوووش
_سحبت الطاسة وخليتها بحضني واردفت
جنات: خلصت فليساتك يلا لم چويلاتك وروح نام بالصالة
آسر: انطيني الطاسة واطلع
جنات: بحلات نومتي كعدتني تتوقع انطيك الطاسة
_ابتسم وباوع بعيوني واردف بخفوت
آسر: اشتعلت روحك البالي
جنات: مفهمت
آسر: سواد عيونچ تهد حيلي هد
جنات: انت صدك ما تستحي مو عيب عليك تحچي وية بت عمك هيچ
آسر: لا لان كاعد اتغزل بأبداع الخالق مو بيچ انتِ چهرتچ تطرد النعمة
جنات: تروحلي فدوة
_مد ايده على الطاسة وغرف وگام
باوعت للطاسة وحچيت
جنات: مصيبة ايدك شكبرها خلصت الشامية
_باوعلي وغلس ما جاوبني وطلع من الغرفة
_رجعت اكل بالشامية الى ان خلصتها وطلعت من الغرفة شفته متمدد ومخلي ايده على راسه
_تجاهلته ورحت خليت الطاسة بالمطبخ لكيت المطبخ نضيف وماكو اماعين انكسر خاطري
جنات: سودة علي اكيد هو غسل الماعين ورجعهم
_لزمت الطاسة وفتحت الماي اريد اغسلها ووصلني صوته
آسر: عووفييي لا تگبب الحسااسية هسسة اجيي اغسللها
جنات: شبيك تصرخ ترى اسمع
آسر: خاف ما تسمعين گلت اعلي صوتي
_سديت الماي وعفت الطاسة وطلعت من المطبخ وشفته كاعد ولازم باكيت الجكاير
جنات: الصالة ريحتها مُقرفة من ورى جكايرك
آسر: ميخالف بعد ما ادخن هنا اطلع برى ادخن
جنات: بعد بكيفك انا رايحة اسبح
آسر: صبري خلي نحميلچ ماي الجو بيه برودة
جنات: اي واللّٰه والبيت كاشي وبارد
آسر: ميخالف باجر اجيب زولية
جنات: واريد شامبو
آسر: بعيني
جنات: وحلويات
آسر: صار
جنات: انتتت ليششش حبببااااب
آسر: اللّٰه واكببرررر شنووو ترررديين اسوووي حتتتتى ترررضييين
جنات: زعلت
آسر: ليش كيكتي الزرگة ليش تتمزعلين
جنات: انت بس تصيح وتگول الزرگة
آسر: تعاي كعدي يمي خلي نسولف
_تنهدت ورحت كعدت يمه وهو ترك الباكيت وحط ايده على چتفي وباوعلي واردف
آسر: ترى انا من اگول الزرگة اشاقة وياچ
جنات: ترى يزعل هيچ شقة
آسر: چا منا وجاي راح اتمزعل من تگليلي عودة المطيرچي
جنات: مو بكيفك تزعل
آسر: چا بكيفمن بس لا بكيفچ
جنات: ما اتفقنا احنى هيچ
آسر: ما متفقين اساساً
_درت وجهي عنه متنرفزة لزم وجهي بيده وداره ناحيته واردف
آسر: سماركِ جَعلني مفتُون بكِ
_فهيت بوجه ما عرفت شنو ارد لا ارادي ضربته راجدي على وجهه وگمت وگفت احس حيلي يرجف
جنات: مااا تخجلللل موو عيييب عليييك
_باوعلي بغضب وما نطق ولا كلمة ، عفته ورحت للغرفة نمت بفراشي واحس گلبِي يدك قوي ومتنرفزة
_نمت وما كعدت الا الصبح گمت فتحت الباب ومديت راسي ماله حس
جنات: آسر وينك
_ماكو صوت عرفت بيه طالع تمشيت رحت للمطبخ وجذبتني ورقة على الكاونتر اخذتها وقريت الكلام البيها
:- لا تغسلين بالماي تارس برميل محطوط بالحمام غسلي منه وسويت مخلمة خليتها بالثلاجة بس حميها واكلي الف عافية
_خلصت قرائتها وشگيتها وذبيتها بالزبالة وطلعت المخلمة واكلتها هي وباردة مالي خلك احمي خلصت وكعدت اباوع للتلفزيون ..
ــــــــــــــــــــــــــــــــــ
_مُهيب
_الساعة بـ 10 وربع خلصت شغل وفتحت تلفوني لگيت عمي متصل علي رجعت خابرته وفتح خط ..
مُهيب: السلام عليكم
حافظ: وعليكم السلام هلا وليدي هلا حبيبي شلونك
مُهيب: الحمد لله زين
حافظ: مساع خابرتك ما جاوبتني
مُهيب: اي واللّٰه چنت اشتغل وما نتبهت
حافظ: اللّٰه يساعدك وليدي يلا بعد اليوم غداك يمنا
مُهيب: مشكور عمي جزاك اللّٰه الف خير بس راح اتغدة وية الولد
حافظ: ازعل عليك انت وليدي وما اكل اذا مو انتَ بصفي تاكل
مُهيب: ان شاء اللّٰه خير
_ترخصت منه وسديت الخط وهزيت ايدي واردفت بستهزاء
مُهيب: چا وين چنت ضام حنيتك توم يلا تذكرت اطلعها
_استغفرت وغسلت وجهي وحچيت وية نفسي
مُهيب: لا حول ولا قوة الا باللّٰه فوگ ما الرجال احترمني وعزمني هيچ احچي عليه
_غيرت ملابسي وصعدت كية وذبتني على الشارع العام وتمشيت لبيتهم من بعيد شفت «تيم» يلعب طوبة وبنية مطلعة راسها من الباب وتلعلع
_تقربت وشفتها تحچي بعصبية
نور الزهراء: ولللللك صخااام تيييم تعااال راااح يييجيي راائد
مُهيب: احمممم
_دارت وجها باوعتلي ومباشرة انخطف لونها ودخلت بسرعة
مُهيب: شبيها هاي شنو بس لا چني مجدي
تيم: هاا ولك
مُهيب: ولك بعينك اشصاير بحالك امشي ادخل كدامي
تيم: حباب اريد العب تقبل هذا ابن ام تحسين الچلب يگول علي ما تعرف تلعب
رائد: جيد صاير تغلط
_توجهت اعيوني عليه وضحكت وحچيت
مُهيب: ميخالف اول مرة
رائد: لا مو ميخالف موو تيم
تيم: ها
رائد: امشي حسابك بعدين
تيم: اگل الامي عليك
_لزمه من اذنه واردف بعصبية
رائد: تيييم انااا شگتلللك
مُهيب: على كيفك وياه بعده طفل مو هيچ تعلمه
_تركه ودفعه من چتفه واردف
رائد: يلا بوجهك للحمام تسبح وتبدل
_راح ركض للبيت وباوعلي وسلم علي
رائد: شلونك خوية شخبارك
مُهيب: يمعود البارحة شايفك ميلي اخبار
رائد: چا اشتاقيتلك يلا امشي خلي ندخل الجو بارد
مُهيب: اي بعد على ابواب شتا
رائد: يلا تفضل
_مشيت وياه ودخلنا للبيت وصارت بوجهي عمة «بيداء»
بيداء: هلا يُمة حبيبي شلونك
مُهيب: هلا عمة انتوا شلونكم
بيداء: نشكر اللّٰه
رائد: وانا مالي اللّٰه يساعدك
بيداء: هلا يُمة اللّٰه يساعدك ما جبت وياك رگية
رائد: لا واللّٰه نسيت
بيداء: المهم يلا فوتوا لا تتمرضون سودة علي ولك مُهيب ليش لابس صيفي
مُهيب: بعد وكت من افرغ انزل اشتري ملابس شتوية
بيداء: يا يُمة حبيبي اخذ من رائد تتلابسون
مُهيب: لا عمة شنتلابس بعد وكت ما هلكد باردة
بيداء: بعد براحتك يُمة شبيدي عليك اذا انت عناد
_ضحكت وكعدت على القنفة ، رفعت راسي من سمعت صوتها
نور الزهراء: تفضل
_باوعتلها شايلة صينينة وبيها چاي وماي
مُهيب: رحمة والديچ
نور الزهراء: اللّٰه يرحمك
بيداء: لا ولچ مو هيچ خزيتينا
نور الزهراء: لعد ماما شنو اگول
بيداء: ووالديك الرحمة
نور الزهراء: ووالديك الرحمة
_ضحكت واخذت الچاي واردفت
مُهيب: مشكورة
_ابتسمت وراحت ركض يم امها تضحك
رائد: ها خوية اشغلك التلفزيون
مُهيب: لا رحمة والديك
_كعد يمي وصار يسولف بأشياء عادية
رائد: شخبار عمو ضياء
مُهيب: الحمد لله
رائد: لازم نسويلنا سفرة للخطوة
مُهيب: اللّٰه كريم
رائد: قبل البرد ناخذ الچاي ويجي ويانة آسر وزوجته
مُهيب: اي ان شاء اللّٰه
رائد: بعد ما شفناها جنات
مُهيب: المهم بيش الساعة
رائد: بـ 12 الا ربع
مُهيب: اي زين ما بقى شي على الصلاة
رائد: اي شخبارك بعد
مُهيب: خوية كافي
_ضحك واردف
رائد: اشرب الچاي برد
تيم: رائد
رائد: شتررريد
مُهيب: شبيك وياه ترى بعده طفل على كيفك
رائد: يمعود اذا تنطيه مجال زايد يستهتر الزم الحبل من النص
تيم: ترى ما احبك
رائد: انا هم ما احبك
تيم: تحبني جذاب
_اشرله يجي يمه واجة ركض
تيم: هااا
رائد: ترى املص اذاناتك اذا بعد عدتها
تيم: خوش
رائد: گول اسف
تيم: اسف بعد ما اعيدها
رائد: عفية بوليدي ورويحتي
_لزم راسه وباسه ، صفنت عليهم چانت علاقتهم حلوة دعيت ربي يحفظهم ..
ــــــــــــــــــــــــــــــــــ
_آسر
_خلصت شغل ورحت للسوگ صارت عيوني ادور صدرية مرتبة
_شفت صدرية بيها نقشة صغيرة ومعلگ فوگاها قميص ، اشرت عليهن واردفت
آسر: بيش هذن
:- الصدرية بـ 15 والقميص بـ 12
آسر: نزلهن الي
_نزلهن ودفعت فلوسهن واخذتهم ورجعت جبت زولية وحملتها بسيارة ورجعت للبيت دخلت ولگيتها بعدها نايمة بس مبين ماكلة
_عفت الزولية بالصالة ويمها العلاگة وطلعت من البيت وقفلته ..
_صعدت بالسيارة وقبل لا احرك وصلني اتصال من «الخِنْزَبْ» فتحت خط وحچيت
آسر: شتررريد
الخِنْزَبْ: وينك
آسر: مالك غرض
الخِنْزَبْ: راح اعبرها الك بمزاجي المهم اكو بضاعة اريدك توصلها
آسر: ما فارغلك
الخِنْزَبْ: الغووول لا تخلييينيي اتعااملل ويااك بطررريقة ماااا تعجببك
آسر: گتلك المرة الفاتت ما راح ارجع اودي اي بضاعة تخصك وشتريد تسوي سوي
_سديت الخط وشمرت التلفون
آسر: من اللّٰه يحرگ روحك دنيا واخرة
_عفته وتوجهت للشقة احس حيلي مهدود ومتنرفز ، دخلت واستقبلني «المنذر»
المنذر: اباااا
آسر: ابن طيرتي
_شلته وبوسته وشميته واردفت
آسر: افيشش
فدك: بعد وكت استاذ
آسر: جاي حتى اشوف المنذر اشتاقيتله
فدك: افف اللّٰه يساعدك حبيبي
آسر: ويساعدچ
_اخذته وكعدت على القنفة واردفت
آسر: فيفي غداچ كاامل
فدك: ايي
_اجت كعدت يمي وحچت
فدك: آسر لازم نروح للدكتورة
آسر: ليش شبيچ
فدك: صارلي هواي ما رايحة غير نطمن
آسر: ميخالف اشوفلي يوم واخذچ
فدك: وشسمة
آسر: شنو
فدك: مشتهية ليمون
آسر: چان خابرتي علي قبل لا اجي هسة شينزلني
فدك: هسة شنو انا مشتهيته
آسر: اگلچ هسة انتِ بيا شهر
فدك: دخلت الثالث
آسر: ويمتى تجيبين
فدك: بعد وكت حبيبي شبيك مستعجل
آسر: جؤ
_حضنت المنذر وخليت راسه على صدري واردفت
آسر: شو احسك ضعفان باباتي
فدك: كد ما يلعب طبعاً يضعف
آسر: ميخالف هو طفل شنو تردين نربطه
فدك: ما ادري بس احسه هواي يتحرك ما يكعد خاف عنده فرط حركة
آسر: ما بيه غير العافية شو يمي خانس
فدك: اي هو بس يسأل وين بابا
_ما رديت عليها وبسته ومسحت على راسه واردفت
آسر: اذن لو بعده
فدك: اذن حبيبي غسل وصلي وتلگة الغدة جاهز
آسر: عاشت ايدچ
_كعدت المنذر على القنفة وگمت توضيت وصليت ..
_خلصت ورحت كعدت بالمطبخ لگيتها مسوية تشريب دجاج
فدك: تعال حبيبي اكعد ادري بيك تحب التشريب
آسر: عاشت ايدچ
_كعدت وجريت المنذر كعدته يمي وصرت احط بحلگه لگم واكل
آسر: اكلي شبيچ صافنة بوجهي
فدك: ما اشتهي نفسي مسدودة
آسر: اكلتي الصبح؟
فدك: شربت چاي
آسر: اكلي بوية اكلي تردين تموتين الجاهل البطنچ
فدك: لا يُمة اسم اللّٰه على وليدي
آسر: شعرفچ ولد يمكن بنية
فدك: كلشي من رب العالمين خير وبركة
آسر: اهم شي كامل الصحة
فدك: اي ان شاء اللّٰه خير
_رجعت اكل واوكله ما حسيت غير طفرت راحت للحمام
آسر: شبيچ
_ما جاوبتني گمت غسلت ايدي ورحت وراها
آسر: فيفي شبيچ
فدك: ما ادري روحي لعبانة
_بعدت نظري عنها واردفت
آسر: تردين ماي؟
فدك: لا حبيبي بس عوفني اشوي واجي
_عفتها ورجعت يم المنذر اوكله واحچي وياه
آسر: هسة يجي الطفل تلعب وياه ويصير اخوك
_شبگته وبست راسه واردفت
آسر: بس محد ياخذ معزتك بگلبي
المنذر: ادا
آسر: اي دادة صغيروني
_گرصت خده بخفه وبسته وحچيت
آسر: ولك انت ليش ما تحچي البكدك السانهم يكنس ويرش وانت راح يصير عمرك سنتين وكلشي ماكو
فدك: آسر
_درت وجهي عليها وشفتها گوة واگفة ولازمة بالكاونتر ، طفرت لزمت ايدها وحطيت ايدي على ضهرها واردفت
آسر: شبيچ فيفي شنو يوجعچ
فدك: معدتي كاعد تگلب ودايخة
آسر: نروح للمستشفى؟
فدك: لا بس تعبانة
آسر: امشي تمددي وجهچ اصفر
_اخذتها للغرفة وخليتها تتمدد وانا رحت شلت الماعين وغسلتهن وسويتلها عصير برتقال واخذته الها
آسر: هاچ شربي
فدك: ما اشتهي اي شي
آسر: ما نمشي بكيفچ شربي الطفل يحتاج تغذية
فدك: آسر تعبانة
_تنهدت وخليت الگلاص على الميز واردفت
آسر: شبيچ فيفي
_لزمت ايدي وبچت وحچت بصوت مهضوم
فدك: انت ليش عايفني تدري اتعب بدونك
_بعدت ايدها وبست راسها واردفت
آسر: فيفي تخدعين رويحتچ بهل حچي
فدك: واللّٰه احبك ليش هيچ تسوي بية
آسر: الحچي سهل فيفي
_شلت العصير وخليته بيدها واردفت
آسر: عود شربيه صارلي ساعة اعصر بيه
_عفتها وطلعت من الغرفة وكعدت يم المنذر
_سحبت تلفوني وشفت هواي اشعارات من الخِنْزَبْ ، فتحتهم وانصدمت ..
الخِنْزَبْ: جنات صارت بيدي يالغول ..
ــــــــــــــــــــــــــــــــــ
نسواني المعدلة لا تزعلون مني بس اليگلولي لا تكتبين تفاصيل لعد شلون ادخلون بالاجواء من دون التفاصيل؟
زهور عدلت الاخطاء: Or_2000z
عدد الكلمات: 3084
حساب الانستا: edi_th7.0
زينب ..