﷽
-الكاتبة: سـارة الحـسن
-Part 20
-"لا تنسون التصويت ومتابعة الحساب وتعليقاتكم ع الفقرات فيـروزاتـي"🤎
▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪
-دخل للمكتب سد الباب والصندوك بيده، رجع كعد بمكانه وكال
::-عجييييب منو هذا الي يدك الباب هيج
آفروز: افتح الصندوك جدو
-هز راسه وفتحة واني واكفه يمة جان بي راس دجاجه مكطوع وبعده هو ودمه رطب وورقه ملطخه بـ الدم ومكتوب بيها
-"ســـلام مـن الهِــرماس"
-بسرعة سد الورقة ورجعها بـ الصندوك وغلقة عگدت حاجبي مستغربة وسألتها
::-هاي شنو جدو؟!
جساس: ماكو شي بنيتي روحي للبيت نامي تأخر الوقت
آفروز: جدو
جساس: سوالف جهال روحي ولا تكولين لأحد
-بقيت اباوعله وهو ارتبك بعدها طلعت من يمه بقيت اتلفت بـ البستان هدوء ماكو احد حتـى صوت حركة ماكو
-دخلت للمطبخ خليت الأوراق ع جهه وطلعت تمن ومرگة باقيات بـ الثلاجة حميتهن وكعدت أكل، قاطعنـي اتصال من الميــرزا خليت اخر لگمه بحلكي وجاوبتة
::-هـــااا أصـفاد؟!
الميــرزا: صَـفد، انتِ وين؟!
آفروز: بـ المطبخ
الميــرزا: خوش
-حجاها وغلقة ثواني ودخل باوع ع المواعيـن الكدامي وكال
::-تمن ومرگة بـ الليل؟!
آفروز: مخلصيـن طماطه
-كعد كدامي وكال
::-وين الأوراق؟!
-سحبتهن من ع الكاونتــر واخذت 2 منهن ونطيته وحده عگد حاجبة وكال
::-انطيتج 2 انــه
آفروز: اي ورجعتلك وحده
الميــرزا: لا تلعبين ويايه آفروز
آفروز: الورقة الي يمك هسه اتفاق بينك وبين جدي اذا جدي انسحب وغير رأيه يبيعلك البيت راح تاخذ غرامه منه 10مليون
الميــرزا: انــه الجايبها اعرف شبيها چقـولة
آفروز: شتريد بعد؟!
الميــرزا: الورقة الثانية
-باوعت للورقة ورجعت باوعتله
::-هـــاااا اي بس هاي صارت لـ يـوشع اعذرني
-ابتسم مستهزأ وكال
::-اجه العصر بناله قصر
آفروز: لازم اضمـــن حياة مترفة لأخوية
الميــرزا: حلو بلشتي لعب يعني، وشبسرعه وثقتـي بـ يـوشع يمكن مخليج وسيلة انتقام من جدج؟!
آفروز: بـكل الأحوال ما خسرانة شي انـي، عندي اخ يسوة الدنيا اذا بقـى واذا راح يـوشع ما يشكل فرق واذا مستغلني علمود يحصل املاك جدي بالعافية عليه خل يشبع بطنه بـ اكل الحرام
الميــرزا: الحذر واجــب
آفروز: المهم هاي رديتلك وحده بعد 2 ونتصافى
الميــرزا: لو مرجعتلي الورقتين جان خلصتي من 2 وبقت وحده
آفروز: ماعدنه شي نسويهن كل وحده وحد، وهاي الفلوس الراح تاخذها لا تصرف ع نفسك لأن فلوس حرام
-ضحك بـ خفة وكال
::-تعلمني بـ الحلال والحرام ام نص حجاب
آفروز: من هيج متدين غض بصرك أصـفاد
الميــرزا: نرجع ونكول صَـفد وهم نرجع ونكول لو تكولين الميــرزا افضل
آفروز: تدري ليش اكلك أصـفاد؟!
-هز راسـه بـ لا ابتسمت وجاوبتة
::-معنـى اسمك القيود وصَـفد واحد معناها قيد واحد وانتَ أصـفاد بيت العايش
-رفـعلي حاجبة وكال
::-صَـفد واحد كافي عليهم بيت العايش
آفروز: امممممم باوع صار شي غريب ويه جدك
الميــرزا: خيــر؟!
آفروز: وصله تهديد من واحد اسمه الهرماس
الميــرزا: وين وشوكت هذا الحجي؟!
آفروز: قبـل شوية صندوك بي راس دجاجه ويا رسالة مكتوب سلام من الهرماس
-اخذلة صفنه وكال
::-تهديد جيس حب هذا؟! اكو واحد يهدد براس دجاجه
آفروز: جدك حيل ارتبك وواضح عليه عنده شي وكال لا تكولين لأحد
الميــرزا: جدج باطل اكيد عنده عداوات بكد شعر باطة
آفروز: ايييععع، بس غريبة منو هذا الي وصل لـ باب المكتب؟!
الميــرزا: البستان جبير والسياج حتى الجاهل يعبره اي احد يكدر يفوت بس السؤال ليش جدج مايريد احد يعرف
آفروز: هاي معناها عنده شي او يعرف الهرماس منو
الميــرزا: حاولــي تسحبين لـسانه وتعرفين السالفة شني
آفروز: اذا عرفت راح تبقى بس وحده عليه
-ضحك بخفه وكال
::-خوش متفقين
-هزيت راسي وهو سحب الورقة مالتة وكام واني عزلت مواعيني واخذت بقية الأوراق وصعدت لـ غرفتي، هزراف ونوسـي نايمين
-ضميت الأوراق وحضرت ملابســي ونمت، ثانــي يوم كعدت ع صوت هزراف
::-آفروز اداوميـن اليوم؟!
آفروز: اممممممم
هزراف: يلا لعد كومــي
-فتحت عيوني اخذتلي صفنة يلا گمت، وبوجهي للحمام غسلت وبدلت ونزلنه اني وهزراف ونوسـي نتريك بعدنه كاعدين ونزل هارون يفرك بـ عيونه وكال
::-يـوشع ينتظرجن برا
آفروز: شـو يـوشع؟!
هارون: هـو اتصل عليه وكال انـي اخذهن ويايه
-سكتت وهو رجع صعد لـ غرفتة وهزراف تباوعلي هزيت راسي بـ معنى شكو باوعتلي بـحيرة وكالت
::-لعـد انـي منـو يوصلنـي؟!
آفروز: يـوشع غير؟!
هزراف: خاف عيب هو جاي عليج واني لاطشه وياكم
آفروز: ترا اخوية هو مو خطيبي
هزراف: ميخالف راح اشوف الميــرزا يوصلني اذا هيج
آفروز: انجبـي عيناي ويلا كومي
-ابتسمت وكامت غسلت وطلعنـه جان واكف بـ الباب ينتظرنه من شافنة ابتسم، فتحت الباب الكدام وصعدت يمه وهزراف وره ونوسـي
آفروز: صباح الخير
-جاوبني بـ ابتسامة عريضة
::-صباح العافيـة
هزراف: السلام عليكم
يـوشع: وعليكم السلام هلا هزراف
-سألته بفهاوه من كال اسمها
::-تعرفنــي
يـوشع: ههههه شلون ماعرفج لعد
-ابتسمت وسكتت وهو اندار ع نوسـي يحجي ويا
::-شلونه البطل؟!
نوسـي: ذين
آفروز: عادي نوصل نوسـي للروضة قبل لا نروح
يـوشع: تدللين انتِ ونوسـي
-ابتسمت بـ امتنان وتحرك بينه وصلنه نوسـي للروضه وهو نزل دخله ورجع صعد باوعلي وكال
::-متريكات؟!
آفروز: اي
-هـز راسة وسكت وصلنه هزراف لـ جامعتها وكملنة طريقنه اني ويـوشع لـ جامعتنة، طلعت الورقة الي وقعها جدي وقدمتها اله عگد حاجبة وكال
::-شنـو هاي
آفروز: اقراها
-وكف السيارة ع جهه واخذها من ايدي قراها ورفع راسه عليه بسرعه وكال
::-شلون وقعها جدج؟!
آفروز: مايعرف
يـوشع: من كالج اني اريد شي من جدج آفروز
آفروز: الكاع صارت بـ اسمك وهاي الكاع عدها شراية اليوم او باجر راح يشترونها من جدي، من راح تطلع الكاع بـ اسمك راح ينجبر جدك يرجع فلوس المشتري وراح يخسر فوكاها 5ملايين
يـوشع: وشمدريج بـهل حجي؟!
آفروز: جدك ما يبيع شي اذا مايسوي عقد ويه الطرف المشتري اي طرف يتراجع عن البيعه لازم يدفع 5 ملايين، يعني هسه من تطلع الكاع بـ اسمك وجدك راح يتعذر من المشتري ويرجعله فلوسه لازم يدفعله 5ملايين فوكاها
-بقـى ساكت ويباوعلي درت وجهي عنه وكملت كلامي
::-صح هيج مبلغ مايشكل فرق ويه جدك بس 5 ع 5 يجمعن ويصيرن خسارة جبيرة وهم خسر قطعه الأرض
يـوشع: ليـش هيج سويتي؟!
آفروز: السبب لأول لان خدعني طول هاي السنين وهسه داعامله بـ المثل لا اكثر ولا أقل والسبب الثاني لأن حرم ام من بنتها وحرم اخ من اخته لـمدة 15سنـه بلا ذنب
-سحب راسي باسني بقوة وكال
::-تعالـي يمي عوفي جدج وعائلتة والمشاكل ماريد شي منه اني واذا ع حقي فـ ربج موجود وما يقصـر
آفروز: ماكدر اطلع من يمهم
يـوشع: ليـش آفروز
آفروز: ما راح يخلون هزراف تطلع ويانه وصعبه عليها تبقى وحدها بين ناس وصخة، أريـج واليهوديات ياكلنها لحـم يشمرنها عظام
يـوشع: نشوفلنه طريقه تخليها تجي يمنه
آفروز: مو هسه خل تخلص هاي السنه والله كريم
-هز راسه وسكت وكملنـه طريقنه للجامعة، من دخلنه البوابة نطاني جهازه وكال
::-سجليلي رقمـج
-اخذته منه سجلتة وكتبت عليه آفروز ونطيتهيا، فتحه باوع ع الأسم ابتسم وغيره كتب "روح اخوها"
ماحجيت شي اكتفيت بـ ابتسامة بعدها نزلت رحت للقاعة مالت المحاضرة واخذنه محاضرتين وبعدها عدنه استراحة
-بقيت كاعده بـ القاعة ما طلعت واقلب بـ الملازم الي نطونياهن مال الفترة الي فاتت كلها، ماخذين مواد هوايه وراح يبلشون امتحانات الفصل الأول واني كلشي ما مفتهمه
-شتت انتباهي اتصال من يـوشع اخذت نفس عميق وجاوبتة
::-هــااا يـوشع
يـوشع: عندج شي هسه؟!
آفروز: لا منا لساعه يلا
يـوشع: تعالـي لـ مكتبي اذا ماعندج شي
آفروز: هو وين مكتبك؟!
يـوشع: اصعدي الدرج واني انتظرج هناك
آفروز: تمام
-غلقتة منه وشلت الملازم بيدي وصعدت جان واكف ع بداية الدرج أبتسـم من شافنـي ومشيت ويا لـ مكتبة، كعدت ع الكرويتة وهو جابلي مي وكال
::-شلونه الدوام؟!
آفروز: زين بس هواي مواد فايتتني وراح يبلشون امتحانات هم
يـوشع: لا تشيلين هم اني ادرسج كل الفاتج
آفروز: ماريد اتعبك
يـوشع: اني اخلق الفرص حتـى اتقرب منج وتتعودين عليه ياتعب هذا؟!
-أبتسمت وهزيت راسي موافقة خلصت الساعه ورجعت للقاعة كملت محاضرات وانتهى الدوام وطلعنا اني ويـوشع بـ طريقنة لـ هزراف كال يـوشع
::-عازمكم ع غدة اليوم
آفروز: لا اريد اروح لأمي
يـوشع: عليا؟!
آفروز: اي
-سكت فترة ورجع كال
::-تجيــن تتعشين يمنه؟!
آفروز: تمام
-اندار عليه بسرعة مبتسم ورجع نضراته ع الطريق وكال
::-صدك؟!
آفروز: اي ليش مستغرب؟!
يـوشع: لا بس فرحت ماتوقعت راح تقبلين
آفروز: اذا تريد تتراجع بـ طلبك عادي
يـوشع: ههههه لا يابة شتراجع
-ضحكت ع فرحتة وسكتت وصلنه لـ هزراف اخذناها انداريت عليها وحجيت
::-تروحين ويايه ع ماما؟!
هزراف: خاف عيب من خوالج
آفروز: شعلينه بيهم نشوف ماما شوية ويجي هارون ياخذنه
هزراف: ونوسـي؟!
آفروز: اكيد هسه هارون اخذه وباقي ويا
هزراف: زين اتصلي عليه شوفي اذا مو ويا اني ارجع للبيت
آفروز: تمام
-اتصلت ع هارون شوية وجاوبني
::-هـــااا السحارة
آفروز: هلا بـ هرهور انتَ وين عيناي؟!
هارون: اني ونوسـي يم امي
آفروز: زين لعد اجت عدله احنه هم جايين عليكم
هارون: يلا امي ما متغدية تنتظرجن
آفروز: بوسلياها وكللها آفروز تكول بس اوصل اشمرها من السطح
هارون: ههههههههه تحمستي يلا انقلعــي
آفروز: هــلا
-غلقتة منه اندار عليه يـوشع وكال
::-تشمرين امج؟!
آفروز: اي
-ضحك وكال
::-وليـش؟!
هزراف: حتـى اني تشمر بيه اي واحد تحبه تعبرله عن حبها هيج
يـوشع: شهل حب العنيف
آفروز: هذا الموجود
-بقـى يضحك والطريق كله يحاول يفتح مواضيع ويايه واني احجي ويا واحاول اندمـج لأن بـ التالي مو ذنبه ولا ذنب امه بـ الصار بس صعبة اتأقلم عليهم بسرعه مهما كان الوضع اني ما معاشرتهم قبل ولا اتذكر اي شي منهم
-وصلنه لـ بيت خوالـي كال يـوشع
::-اذا تكدر امج تطلع اريد اسلم عليها
آفروز: هسه انطيها خبر
-نزلنه انـي وهزراف ودخلنه ع امي جانت كاعده هي وهارون بـ الاستقبال وحدهم سلمنه ع امي وحجيت وياها
::-يـوشع يريد يسلم عليج
عليا: خلي يدخل
آفروز: بـ الباب ينتظرج
-هزت راسها ودخلت لبست بوشية وطلعت عليه هي وهارون، واحنه بقينه كاعدين جوة شويه ودخل خالي سلم علينه بـ العادة اني ابوسة بس هل مره ما كمت عليه ولا بوستة بقى مستغرب
-طول هل فترة وهو حاسبني بنت اخته وعادي عدهم بس يبقى تقاربنه حرام، صح سابقاً ما جان عندي علم بس هسه صرت اعرف وادركت لـهل سبب خليت علاقتي بيهم من بعيد لبـعيد
-كعد يمنه وكال
::-وين امج لعـد؟!
آفروز: طلعت تسلم ع يـوشع
-عگد حاجبه مستغرب وبقى يباوعلي ثواني وكال
::-ابـن ليلى؟!
آفروز: امممم اخوية
-هز راسه وسكت سألته هزراف ع نوسـي كاللها
::-ديلعب جوة
-كام طلع من يمنه وامي وهارون دخلو وتغدينه كلنه سوة، وقبل لا نرجع نطيت خبر لـ امي
::-اليوم اتعشى يم يـوشع
عليا: ببيتهم؟!
آفروز: اي
عليا: ماشي ماما انتبهي لـنفسج
-طبعت بوسة ع راسها وطلعنه راجعين للبيت، كعدنه انـي وهزراف ورة ونوسـي كعد كدام يم هارون مشغله اغاني وهو يصفگ ويركص
-وصلنه البيت وبوجهنه لـ غرفتنة غيرنه ملابسنه ونزلت انـي اشوف الوضع بـ البيت، دخلت للمطبخ جانن البنات يسون كيك وصوت ضحكهن تارس البيت
-وكفت بـ الباب وحجيت وياهن بـ ابتسامة
::-الله يديم ضحكتجن
-اندارن عليه كلهن واختفت ضحكتهن من شافني محد جاوبني منهن باوعت لـ يقين الحزينة
::-شلونها حبيبة اخوية؟!
يقيـن: اخوج منو شبيج؟!
آفروز: يـوشع شنو نسيتي
-بقت تباوعلي ساكتة كالت رؤيا
::-لا حبيبة اخوج ولا ابد لا تشمرين بلاويج علينه
آفروز: ياااا ليـش ماتدرين بحب الطفولة لاختج
يقيـن: ماعندي شي ويا آفروز
آفروز: لعـد والمباوس والأحضان قوقة
يقيـن: شبيج انتِ منين جايبة هذا الحجي؟!
آفروز: من اخوية الكلبة مفطور منج خطية يحبج حب صافي ونقي بس انتِ كسرتي
يقيـن: لا تسويلي مصيبة آفروز وين اعرف اخوج اني
-توسعت ابتسامتـي وجاوبتها
::-تخيلي وهاب يوصله هذا الكلام وهمه ناس عشاير وعدهم اهم شي البنية محد طاخها حتـى لو بالغلط ويعرف بـ يـوشع جان شابع بيـج شيصيـر؟!
يقيـن: آفروز والله ماكو هيج حجي
آفروز: انتِ حجيتي كدام العائلة كلها لو اني متوهمة
يقيـن: والله جنت صغيرة وخايفة وحجيت هيج والله لا واصلني ولا متقربلي
آفروز: ليـش تجذبين يقيـن والطگع الحمر الي شافوها اهلج لو هم تجذبينهم
-كامت تبجي ودنگت راسها تقربت منها وحجيت
::-كدامج اختيارين الأول تتحملين الحجي الراح يوصل لـ وهاب والي راح يسوي وهاب والثاني تروحين تكولين الحقيقة لـ جدي وانو الصار كله جذب
يقيـن: ماكدر آفروز
آفروز: وليـش؟! شنو اليمنع؟!
يقيـن: السالفة صارلها سنين والله جنت صغيرة وماعرف الصح من الخطأ مشيت وره كلام امي وحجيت هيج
آفروز: برائة اخوية لـحد هسه محد ثبتها ولهسه اهلج حاقدين عليه ومتوقعين هو صدك منحط ونزل لمستواج القذر، وهسه ماعندج اختيار ثالث
-درت وجهي اريد اطلع ورجعت عليها رفعت تلفوني بوجها وحجيت بـ استفزاز
::-او الخيار الثالث اهلج يسمعون تسجيل كلامج هذا
-خليتها تلطم ع وجها وطلعت من يمها صار بـوجهي هارون عاگد حاجبه يباوعلي من وصلت يمه كال بهدوء
::-اريد اعرف الصار وياج آفروز
آفروز: تعال نطلع برا
-طلعنه كعدنه بـ الحديقة وهو يباوعلي وكال
::-شنو سبب انفصالج عن فقــار؟! ولا تكولين ما توالمنه لان اني وصلني حجي واريد اسمعه وتأكد منه
آفروز: وكعوني بـ فخ وفقــار صدكهم وتطلكنه
هارون: شصار وليش وكعوج؟!
آفروز: اول مره طلعنه اني وفقــار افترينه هواي بـ السيارة بعدها تعشينه ورحنه لـ جسر الجادرية صارت مشكله ويه هزراف وحجيت وياها شوية وحاولت احل الموضوع ودزيت مسج لـ أصـفاد يروحلها حتـى يساعدها، سألنـي فقــار بوكتها
::-شصاير؟!
آفروز: هزراف سامعة صوت وخايفة
فقــار: صوت شنو؟!
آفروز: هي توهس ما اعتقد اكو شي وماكو احد بـ البيت ودزيت مسج للميــرزا يروحلها يشوف شبيها
-سكت وما علق اكثر وخلال ما احنه كاعدين صارت توصل رسائل هوايه ع تلفونـي استغربت وفتحتهن لأن توقعت هزراف بس الرسائل جانت من رقم غريب
"وينـج لـهسه آفروز"
"مو كافي دياحه مشتاقلج حبيبتي"
"اهوووو هاي بعدج ويه فقــار العار"
"شوكت تفضينها عاد وتطلكون مو تعبت نفسيتي"
"راح انتظرج ترجعين مشتاق لعطرج"
"جاي اشم عطرج بـملابسي لحد هسه"
"امسحي الرسايل عود حتـى لا تصيرلج مشكله يعمري"
"احبج آفروزتي"
-انـي واقرا بيهن انسحب مني التلفون ونتر بيه بعصبية
::-منـووووو هذااااا؟!
آفروز: علمي علمك رقم غريب ودايدز
-ماحجه شي وحفظ الرقم بـ الجهاز ودور اسمه بـ البرامج بس ما جان بي اي برنامج، كام من مكانه واشرلي اكوم ويا بدون ماحجي حرف مشيت ويا
-صعدنه بـ السيارة وهـو ساكت نقل الرقم لـ تلفونه واني اراقب حركاته بـ صمت اريد اشوف وين يريد يوصل، اتصـل ع الرقم مرة ومرتين و3 مارد عليه
-رجع طلع تلفون الشغل واتصل عليه منه بسرعه جاوبة جان صوت رجال خشن
::-الــو
فقــار: السلام عليكم
مجهـول: وعليكم السلام تفضل منـو؟!
فقــار: هذا مو رقـم ايهم؟!
مجهول: لا حبيبي متوهم
فقــار: بس اني متأكد هذا رقمه
مجهول: لا حبيبي انــه طارق مو ايهم
فقــار: ماتعـرف ايهم؟!
مجهول: شخبصتنه ياحبيبي مو كلت انــه طارق
-غلقة منه بدون ما يجاوبة ورجع اتصل عليه من رقمه الأساسي هم مارد عليه، اتصل مره ثانية من رقم الشغل جاوبة بسرعه كال فقــار
::-عـود ليش ما تجاوب ع رقمي ذاك
-بس حجه هيج فقــار كبل انغلق الخط، اتصل عليه يطلع مغلق اندار عليه وكال
::-هاي اول مره توصل هيج رسائل؟!
آفروز: اي
فقــار: يعرفج ويعرفنـي شمعنـى؟!
آفروز: شغل عقلك وتعرف شمعنـى لو يحتاج اعلمك شغلك بعد
فقــار: والله ياست آفروز اذا اشغل عقلي راح استنتج انتِ داتضمين عليه
آفروز: داتشگ بيه؟!
-بقــى يباوعلي ساكت رفعتـله حاجبي اريده يحجي دار وجهه وكال
::-زحمه توصل هيج رسايل لـ خطيبتي وفوكاها يحجي عليه اي واحد يقرة هيج رسائل راح يشگ
آفروز: رجعنــي للبيت فقــار
فقــار: آفروز افهميني ترا واكفه والحسن واكفه شتردين اسوي يعني فوكاها يعرفني ويعرف رقمي ومايرد عليه شتردين افسرها يعني
آفروز: فسرها مثل ما تريد ما يهمني دامني اعرف نفسي
-بقـى يباوعلي وساكت ومرت فترة طويله ع هل وضعية سحب ايدي باسها وكال
::-اعتذر مو قصدي
آفروز: ماصار شي
فقــار: لا تعامليني بهذا البرود
آفروز: لعـد شتريد اصفكلك
فقــار: آفروزي يرويحتـي
-سحبت ايدي منه وجاوبتة
::-رجعنـي للبيت
-حسيت ايده نمدت ع جهه ثانيه من الكشن مالتي ورجعه بيه لورة وصار نص جسمه فوكي وباس شفايفي بـقوة، حسيت شياطين فزن براسي
-صرت ادفع بي واتحرك بـقوة وهو كل ما اقاومه يزيد أكثـر وايده تفتر ع جسمي بـطريقة قذرة، لزمته من شعره وصرت اجر براسه بقوة وايدي الثانية احاول الزم ايده الي انتهك جسدي بيها
-ما ابتعد عنـي الا من انكطع نفسه لزم اديه مقيدهن بـ ايد وحده وايده الثانية صار يمسح الدم من حلكي واني عطت بي
::-وخــر عنــي يامتوووووحش
فقــار: كافي برود آفروز
آفروز: وخـر عنـي فقــار
فقــار: لـشوكت ابقى متحمل وانتظر الكلمه والفعل الحلو منج مو متت من برودج والله متت
آفروز: يابرود فقــار يابرود ليش هو الحب بهاااااي السواااالف، الخطوبة خلوها حتى نتعرف حتى اشوفك تناسبني لو لا ما خلوهاااااا حتــى.....
-سكتت ما كملت كلامي، وهو دنك راسه ورجع باس شفايفي اقوى، ثواني وابتعد عني وكال
::-بـس انـي محتاجج آفروز
آفروز: اذا ماوخرت عنـي راح تندم ندم عمرك والخلقك
-صفن بعيوني فترة واني احس نار شبت بداخلي من ورة تصرفاته، ابتعد عني بحركه سريعة ومد ايده رجع الكشن مالتي ودار وجهه يتلافه نضراتي
-سحبت بطل المي فتحت وكمت اغسل بحلكي التفتلي وكال
::-لا تسوين هيج آفروز
-ما جاوبتة وغسلت من طعم الدم الي بحلكـي، سحبت كلينكس نشفت حلكي وحجيت ويا بـهدوء
::-اكثر شي اكرهه هو قله الأحترام وهذا السبب الي خلاني لـ هسه محترمتك بس داتجبرني اغير اسلوبي واوصل لأسلوب منحط وياك
فقــار: انتِ خطيبتي آفروز شهل حجي
آفروز: اذا خطيبتك او زوجتك مجبور تحترم رغبتـي، كلشي بدون ارادتـي ورغبتي راح يندرج تحت مسمى الأغتصاب وكتها ماراح نفرقك عن تركان
فقــار: مو هيـج بس انـي....
-قاطعتة وحجيت
::-ماريد اسمع شي رجعنـي للبيت رجاءاً
-سكت ورجعني للبيت ونزل ويايه جانت سيارة واكفه بالباب من نزلنه احنه نزل منها هـود وتقرب مني يحجي بخوف
::-وينج لـهسه آفروز؟!
فقــار: جانت وياية
-باوع هـود ع فقــار ورجع باوعلي وكال
::-ليـش تلفونج مغلق قلقتينه
-رفعته بيدي جان طافي رجعت باوعت لـ هود وجاوبتة
::-مادري بي طافي
هـود: تمام انتظريني جوة اريد احجي وياج
-هزيت راسـي وباوعت ع السيارة الواكفة جان يـوشع بيها وعينه علينه، ماحجيت شي ودخلنه اني وفقــار وقبل لا ندخل البيت سحبني ع جهه وكال
::-اسف وداعتج ما تنعاد بس لا تروحين وانتِ زعلانه منـي
آفروز: حاقده عليك حالياً عوفنـي هسه
-حضن وجهي بين كفوف اديه رفعت ايدي اريد ادفعه عني شدد لزمته وكال
::-احبج والحسن
-بقيت ساكتة ومبعده نضراته عنـه حرك راسي بخفه وكال
::-خلي عينج بعيني
آفروز: عوفنـي فقــار
فقــار: آفروزي
-رفعت عيني عليه ميل راسه بخفه وكال
::-لا تجافيني هيـج
-سكتت وهو طبع بوسه ع راسي وكال
::-باجر نحجي تمام
-هزيت راسي بـ اي وهو عافني وراح ينام بـ مكتب جدي، واني دخلت كعدت بـ المطبخ دقايق ودخل هـود گمت واشرتله نصعد
-مشى ويايه وكال
::-مو حلوه تتأخرون هلكد حتلو خطيبج حاولي بـ الجايات ترجعين بوقت
آفروز: تمام وبعد؟!
هـود: شبيج ضايجة؟!
آفروز: عوفك من ضوجتـي شعنده يـوشع يمنه؟! مو ع اساس جدك مايقبل
هـود: اي احتاجيته بشغله واجه شمدري جدج بهل الليل
آفروز: النه كعده طويله هـود
هـود: ماكو شي ينحجي وانتبهي لنفسج
-عافني وراح لـ غرفتة واني ابتسمت من شفت هزراف واكفه تنتظرني، دخلت وياها للغرفة واني عقلي كله يم الصار حتى ماكدرت اسألها شصار وياج
-ثانـي يوم النهار كله وانـي عقلي مشوش والتفكير اكل راسي، من جهه تصرف فقــار ومن جهه كلام يـوشع وهو يحذرني مـن فقــار
-لليل كاعده بـ غرفتـي ووصلتني رسالة من جدي يريد ملف من مكتبة وهاي مو اول مره يطلبها مني وهم الرسالة من رقمه الخاص
-ماشكيت ولو للحظه ممكن اكو شي، گمت نزلت وتوجهت للمكتب حتـى اجيب الملف الجدي، جنت واكفه ادور عليه بالرفوف وحسيت احد حضني من وره ورة بـقوة
-كل ضنـي فقــار لأن هو يمنـه وينام بمكتب جدي دنك راسه شم رگبتي بقوة واني ابتسمت ثواني وهمس بـ اذني
::-لا تحرميني من عطـرچ بعد
-جمد الدم بيه من سمعت نبرة صوته الغريبة بعدني ما دفعته هو ابتعد عنـي وطلع يركض بـ البستان، ما ترددت ولو لحظه اطلع ورا
-ركضت ورا وصيحت عليه يوكف بس كمل طريقة ع ركضه الوحده ماوكفت الا من شفته عبر السياج، رجعت بسرعه للبيت ارجف وحاولت اوهم نفسي هذا فقــار مو غيره
-صعدت لـ غرفتي ركض سحبت تلفوني واتصلت ع فقــار جاوبني بسرعه
::-هــا حبيبتي
آفروز: انتَ ويـن؟!
فقــار: بـ الحله
آفروز: هــا شوكت رجعت؟!
فقــار: المغرب، ليـش محتاجه شي؟!
آفروز: لا لا بس عبالي بعدك هنا
-رجفة روحي زادت ماكدرت اسيطر ع نفسي وع رجفه ايدي، عرفتها لعبه منهن بس ماتوقعت توصل بيهن لهاي القذارة، ليش هيج نجسات وعدهن اللمس المحرم عادي، اذا هنه عادي ليش يردن ينجسني وياهن
-غلقتة من فقــار وطلعت بسرعه لـ غرفة جدي فتحت الباب بهدوء ودخلت جان نايم سحبت تلفونه ودخلت ع الرسايل، الرسالة الوصلتني ممسوحه ماكو بجهاز جدي
-هنـا ايقنت هاي لعبه منهن، رجعت تلفونه لـ مكانه وطلعت ارجف صار بوجهي هارون عگد حاجبه وسألنـي مستغرب
::-شبيج؟!
آفروز: كسرو ضلعــي هارون
-بقـى ساكت ويباوعلي مستغرب حالتي تركته وصعدت وبقيت أفتـر بـ الغرفة مثل المخبلة واحس عقلي يريد ينفجر واشمئز من اتذكر الرجال شلون حضني، بقيت افتر واحجي ويه نفسي
::-مو هيـج مو هيـج مو هيـج
-حسيت ع هزراف تحجي ويايه حتى ما ركزت شكالت واني عطت من حرگه كلبي ومن النار الشبت بين اضلوعي
::-مووو هيييييج ولج مووووو هييييييج
-حسيت ع هارون دخل وحضني ويحجي ويايه بس ما بقى بعقلي شحجى وشجاوبتة واحس راسي صار ثكيل مداتدخل بعقلي قذارتهن
-ابتعدت عن هارون ونمت بفراشي، ومر شهر وانـي عايشة بدوامه افكاري وجنت مخليه ع بالي راح يسون مصيبة وحجاية جبيرة ومع ذلك جنت منتظرتها
-طول هذا الشهر علاقتـي بـ فقــار صارت ابرد من الثلج، وبيـوم اتصل بيه اول ما جاوبتة كال
::-انــي بـ مكتب جدي تعالي
-حجاها وغلقة اني هم رحتله جان كاعد ويهز برجله ومبين ع شكله عصبي، سديت الباب وبقيت واكفه اباوعله لـما رفع راسه عليه وكال
::-بعدج حاقدة عليه
-هزيت راسي بـ لا كام من مكانه وكف كدامي وكال
::-شنو الغيرج عليه لعد؟!
آفروز: ماكو شي بس تعبانه هاي الفترة
فقــار: كلتي تعبانه؟!
آفروز: اي
فقــار: يعنـي مو احد مغيرج عليه؟!
-هزيت راسي بـ لا وبقيت اباوعلي، فتح تلفونه وشغل فديو ورفعه بوجهي احس صاعقه ضربت راسـي من شفتة، الوقت الي صار بذاك اليوم وشلون الرجال حضني من ورة واني مبتسمة لحد ما همس كلماته وكف الفديو
-بقت عيني متشخصة ع التلفون واحس صار عندي خفقان شلون وصلت حقارتهن لهل متسوى كله في سبيل فقــار ما يتزوجني
-حسيت عليه لزم فگي بقوة ويحجي كاز ع اسنانه
::-لا تحرميني من عطـرچ مو؟!
-بعدني ما حجيت شي وعاط بيه بقوة
::-بشنوووووو احسن منييييييييي وبعتيله نفسجججججج آفرووووووووز
-حاولت ادفعه عنـي لان صار يأذيني بس ما ابتعد، حجيت بصعوبة
::-اذا حجيتلك راح تسمع مني وتصدكني؟!
-دفعني وركع تلفونه بـ الحايط وصاح بيه
::-شسمع ولججججججج، هم تردينيييييي اجذب عيونييييييي
آفروز: اسمعني وبعدها اتصرف الي يعجبك
-سحبني من ايدي ودفعني ع الحايط بقوة وكال
::-من هاي اللحظه كلشي بيناتنه راح ينتهي لان ما يشرفني وحده رخيصه مثلج
آفروز: لا تتجاوز حدودك فقــار
فقــار: مجذب بشي؟!
-حيل حزت بخاطري حجايتة وماكدرت اسكت وما اردها اله
::-اذا انـي رخيصه فـ طالعه ع امك
-عيونه صارت بكصته وصار يصيح ويعيط ويخربط بـ الحجي لـما تعب واني واكفه واباوعله، تقرب منـي وكال
::-ماراح اشوف الفديو لاحد وماراح اسوي مثل ما سوة ابوية بـ امي بس راح تروحين لـجدج وتكولين اريد اتطلك وتكليله هذا قرارج انتِ وتقنعي بطريقتج وباجر ينتهي كلشي
-اكتفيت بـ السكوت وطلعت من يمه صارت بـ وجهي سدرة جانت تتسمع علينه تقربت منها وحجيت بهدوء عكس البركان البداخلي
::-ماراح اسوي شي هل مره وراح ابتعد عن طريقكم ومن كل كلبي اتمنى الله يوفقكم لأن خطية انتِ مو بيدج مريضة
-تركتها ومشيت ما انتظرتها تحجي ومن صدك قررت ابتعد عنهن وعـن مشاكلهن وايقنت هذا نصيب واني ما الي نصيب بـ فقــار والحمدلله بدايتها احسن من نهايتها، وسلمتهن بيد رب العالمين هنه وربهن يتجازن
-ثاني يوم حجيت ويه جدي بـ الموضوع وقنعته اريد اتطلك وتطلكت رغم زعل جدي وابوية والاغلبية ما راضين ع تصرفي
-بـس سدرة تحسست من كلمة المريضة ورادت تثبت اني المريضة بـ لعبتهن الي سونها، استغلن نوسـي ياخذ تلفوني وصارن يدزن رسايل لـ نفسهن وتهديدات وصور بشعة
-لا جان عقلي ولا واهسي بـ التلفون ذيج الفترة وجنت مكضيتها لو نوم لو كاعده بـ البستان، وهنه طبخنها ع نار هادية
-سكتت واني اشوف الكل مصدكهن ومكذبيني، سكتت وردت اعرف منو الي ويايه ومنو العليه، سكتت لأن ردت اعرف سندي الحقيقي بس محد بيهم جان سند
-استغلو غيابكم لأن يعرفون انتو السند الأول والاقوى لـ آفروز، ولأن يعرفون انتو الوحيدين الي ماراح تقبلون ع ذلتـي وأهانتـي حتلو جنت غلطانه
-ماعرف شلون لعبن بعقل عاتـكة الي كسرت ثقه جدي بيه لـخاطرها وشهدت ضدي وسوتني اني الي جابرتها تنزل ابنها، بدل ما تحمد ربها لگت احد يساعدها تنزل ابن الحرام الي ابطنها حتـى تكدر تكمل حياتها
-كسرني جدي من ذلنـي وباعنـي كدامهم لان ساعدت عاتكة ما همه السونه بيه حفيداته الباقيات، وكسرني كسرتي الأكبر ابوك من صدكهم واخذني بيده للمصح حتى يعالجني
هارون: يعني كل الصار بسبب سدرة؟!
آفروز: سدرة وعمتـك أريـج
-بقـى يباوع لـ عيوني بحزن وحجه بـهدوء
::-راح أتزوجـها حتى اخـذ حقج
آفروز: ماريد حقي بـ هل طريقة
-هز راسه وكال
::-الطريقة الوحيده الي راح توجع كلبها وكلبه بـنفس الوقت يستاهلون كُـل أذية تـجيهم
آفروز: طلع سدرة من راسك ماراح أسمح بـهل شي
-ابتسم بخفه وتقرب مني وهمس يم أذني
::-مو اني اليسكت ع أذية نور حـياته
آفروز: هارون لا
-ما جاوبني وسحبني لـحضنه حاضنـي بقوة وكال
::-وحگ شهكاتج الوكفت غصه بگلبي قبل گلبج ماراح اخلي البالهن يصير
آفروز: لا دمر حياتك بسببهن طز بيهن مايهمنـي
هارون: يصيـر خيـر
-بقـى يشاقيني وراها ويحاول يغير من مزاجي واني انطلقت ويا وبقينه كاعدين للمغرب الا من اجاني اتصال من يـوشع عوج حلكه هارون وكال
::-والله اموتج اذا تحبي اكثر مني
-ضحكت وجاوبت يـوشع
::-هــا يـوشع
يـوشع: شلونج؟!
آفروز: الحمدلله زينة
يـوشع: اني جاي بـ الطريق حتـى اخذج يمنه
آفروز: تمام انتظرك
يـوشع: جيبي ملازمج وياج اذا صارلنه مجال ادرسج شوية
آفروز: تمام
-غلقتة منه وكمنه اني وهارون دخلنه للبيت وصلت غرفتي اريد ادخل وكال هارون
::-ابقي يمهم اليوم
آفروز: وين ابقى؟!
هارون: باتـي يمهم وباجر وره الدوام ارجعـي
آفروز: مادري ماعتقد ابقى
هارون: اخذي احتياطاتج خاف تغيرين رأيج
-هزيت راسي ودخلت لغرفتي غيرت ملابسي وحضرت اغراضي الي احتاجهن وهزراف كاعده وتباوعلي هزيت راسي بـ معنى شبيج ابتسمت وكالت
::-ماكو شي
آفروز: احجيها
هزراف: خايفة يجي يوم وتروحين يمهم وابقى وحدي
آفروز: ماروح لتخافين واذا رحت راح اخذج ويايه
هزراف: ومنو يخليني اروح وياج؟!
آفروز: اكيد نشوفلنه طريقه نكدر ناخذج بيها
هزراف: ماكو هيج طريقة
-غمزتلها وجاوبتها بضحكه
::-مثلاً ازوجج اخوية
هزراف: ماتزوج انـي
آفروز: ليـش حبيبتي حزنانه ع المرحوم
هزراف: تعرفين وضعي انتِ
آفروز: وشنو وضعج ست هزراف؟!
-دنكت راسها وكالت بصوت خافت
::-منو الي يتزوج وحده ابوها مغتصب اطفال
آفروز: وشنو ذنبج؟! انتِ دافعته عليهم مثلاً؟!
هزراف: هذا تفكير مجتمعنه
آفروز: من يجي الشخص المناسب واليحبج ماراح يهتم لكل هل خرط لأن راح يحب هزراف الملاك ماراح يتأثر بـ اي شي حواليها بعد
-ابتسمت وسكتت واني طلعت بعد ما اتصل يـوشع وكال هو بـ الباب، طلعت شفت جدي واكف بـ الباب ويباوع ع يـوشع نضرات جدي مليانه غضب ونضرات يـوشع بارده مستفزة
-قطعت النضرات المتبادله من حجيت ويه جدي
::-جدو رايحه ويه يـوشع اني
-هز راسه ما عاجبه الوضع وكال
::-مره الثانيه انطيني خبر بوقت
آفروز: ان شاء الله
-عفتة وصعدت ويه يـوشع دك هورن الجدي واتحرك اندار عليه وكال بـ ابتسامه
::-شلونج؟!
آفروز: عال العال
يـوشع: يُـسر من الظهر تنگ ع راسي كوم جيبها موتتني لـما صار المغرب
-اكتفيت بـ ابتسامة ماعرفت شنو اجاوبة، بعد فترة وكف كدام سوبرماركت وكال
::-شتشربين؟!
آفروز: اي شي عادي
-هز راسه ونزل طول يلا رجع مسوك هواي مسواك خلاهن ورة واجه صعد قدملي بطل عصير وكال
::-بردي كلبج
آفروز: هو الجو صاير انجماد
يـوشع: ههههه هم صدك
-رجعه شمرة وره لأن صدك بـ الجو البارد ماكدر اشرب شي بارد، وصلنه للبيت ونزلت ويا فتح الباب وصاح
::-يُـسر
-طلعت يُـسر تركض من غرفتها والضحكه شاكه حلكها وكالت
::-واخيراً اجيتو
-بقت واكفه متردده تتقرب مني ابتسمت وجاوبتها
::-اي بس شو الملكى بارد وين الحضن
-هي ماصدكت حجيت هيج كبل ركضت حاضنتني بقوة وتحجي بلهفه
::-والله اشتاقيتلج كلش
آفروز: واني هم
-ابتعدت عني تضحك فرحانه فترت عيوني بـ الصالة ماشفت ليلى باوعت لـ يُـسر وسألتها
::-امـج وين؟!
يُـسر: بـ الحمام هسه تطلع
-هزيت راسي وسكتت سحبتني من ايدي وياها وكالت
::-تعالي شوفي غرفتـي الجديده
-دخلت وياها للغرفة جانت مغيرتها مسويتها مال شخصين جربايتين وكنتورين ومكتبين دراسه ابتسمت وحجيت وياها
::-داتسويلي اغراءات ابقى يمج
يُـسر: حلوة عجبتج؟!
آفروز: كلش حلوة ودام تعبتي انتِ اخوج وفكرتو بيه راح ابقى يمكم اليوم
يُـسر: تتشاااااقييييييين
آفروز: هههههه لا ما اتشاقة
-عاطت وطلعت تركض ع يـوشع واني طلعت وراها وهي تنطي خبر راح ابقى يمهم وهو يضحك ع ضحكتها، كعدنه بـ الصالة وسوالف يُـسر حلوة تونس وتخليني اندمج وياها
-بعد فترة طلعت ليلى من الحمام وكفت قريب مني وكالت بـ ابتسامة مرتبكه
::-هلا يمة شلونج
-مادري ليش گمت وكفت واني مستحيه منها وطلعت مني الكلمات عفوية
::-هــلا خالة
-مادري شلون طلعت مني بس ماكدرت اعتبرها امي مستحيه منها مدري ليش، بقت مبتسمه وتقربت باستني وكالت
::-اكعدي يمة ليش واكفه
-رجعت كعدت بدون ما احجي شي وعيني تفتر بـ كل الاتجاهات الا اتجاه ليلى، رجعت يُـسر انطلقت وتحجي ويايه ورجعت اندمجت وياها
-بعد فترة گمت اني ويُـسر صبينة العشا لان جانو محضرينه، وكعدنه ناكل بـهدوء ساكتين اني هنا بعت المستحى وكت الأكل ما اهتم اهم شي بطني
-طول الوقت همه الضحكه ما فاركتهم وحسيت بفرحتهم بجيتي وشلون يدورون طريقه بس حتى احجي وياهم واضحك واني هم ماحبيت افشلهم بس ليلى ماكدرت اندمج وياها ماعرف ليش بقيت مستحيه منها
-بعدها كعدنه ندرس اني ويـوشع وهوايه تعب وياية وشـرح في سبيل يفهمني قاطعنه اتصال ع تلفوني من هزراف رفعت راسـي ع يـوشع وحجيت ويا
::-من رخصتك
يـوشع: براحتج
-بقيت كاعده يمه وجاوبتها
::-هــا غزالة
هزراف: سمعتي بـ الصار؟!
آفروز: لا خيـر؟!
هزراف: الميــرزا راح يتزوج رؤيا....
◄يتبـــــع.......
▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫
◄ياريت تصوتون فيروزات هو تصويت ماراح يتعبكم ولا راح يضركم🤍
◄البارت لـ جاي حسب تفاعلكم 💚
◄تابعــو حسـابـي ع الأنستــا [ itsara.kh ]