روح في بحر الظلام

الحلقة الثالثة عشر

قــــــــــــراء روايتــــــــي أحبكم بگد الـــــــعراق🤎🦋

روح في بحر الظلام

____ الكاتبة بحر _____

بنات كل اللي تمر من هنا ارجوكم لتنسون التقييم

بالنجمة واهم شي اضافة الحساب فدوة لعمركم والتعليق بين الفقرات  اذا حابين تستمر القصة

تفاعلكم يحدد استمرارية الرواية🫂❤🥹

⭐🌟⭐

،،،،،،،،،،،،،،،،،،،،،،،،،،،،،،،،،،،،،،،،،،
أما بعد..

فقد اشتد القهر

ونفذ الصبر

وضاق جسدي بروحي ذرعا

وأمسى كلي يطالبني بك

كلمات بقلم بحــر✍️

___________
رانـــــــــــيا

العصر جنت  بالطرمة اراجع ومشمش يمي تحوس طبعا فايته طالعة للصالة ساعة تجيب مي ساعة تشتري  وهي ع الاساس تدرس بس تسخيت ماكو هيج  اكثر شي تقرا خمس دقائق وتطفر  لو تاكل لو غير سالفة، اخر شي مليت عطت بيهه

رانيا:: يمعوووودة اسستقري  هو اني عقلي شلونة وتجين انتي تحوسين بي كافي لو تكعدين لو تفوتين جوة خل اصخم وجهي اركز

مشمش:: اوووي شبيج  عصبية  والله فززتي كلبي

باوعتلهه صفح ودنكت احاول اقرة
رانيا:: فوتي جوة مشمش مو مالي خلك زعلج. لا مالي خلك اراضيج مو زعلج فوتي فدوة  يلا عفية بالحبابة

مشمش:: لا هاي هي كعدت ابد ولا اتحرك

سكتت عنهه ماكو دقيقتين وطفرت وكفت

رانيا:: مششششمششش حمووووت اسسسستقررري لججج يوووم وووينج

مشمش:: حمااام حمام شلون اسويهه يمممججج اوووي شكد حقنة

واحنا نحجي ووكع علينا نعال بقوة  من فوك
باوعنا ليفوك زياد بالسطح
:: صبببر صبببر اليوم اششعل اهلجن

كمت واسحل بيهه
رانيا:: تف عليج يا حقيرة هسة شيخلصنا من هذا هو منا شلون ومنا ضايج

دا ندخل للصالة وبابا دفر الباب البراني ودخل للصالة شايط وينه هالعار ويييينةةة

عمااد:: زززيييااااااد

زياد:: جايك يابه جايك

نزل من الدرج بصعوبة ما يكدر يسرع خطواته، تقرب من بابا يسلم علي  بس بابا حط دفعة بصدرة على اثره وكع بالكاع

عماد:: باوعلي زين شوووف حالي شوف الضربات، ليش ولك ليش خليتني اذل  روحي لعالم ماتسوة ليش هيج سويت بيه ماكافيني الضيم المر عليه خليتني اتوسل بفويد لييشش رضيتلي المهانة زيييااااااد

زياد:: يابة شصار فهمني، منو متجاوز عليك بالقران خرطة وحدة اخرطهم

بابا صفك ايد بأيد وحط ايديه على راسة

:: ماكو فايدة منك خبل وارعن وراح تورطنة يابة الله انطاك عقل استعملة اروحلك فدوة ولك هديت حيلي

يحجي ويرجف من  العصبية، كعد بالكاع ومدد رجلي ركضت ماما جابتلة  مي واحنا نباوع من بعيد

زياد:: يابة شصار شكالولك، شنو رفضو، خاف عبالهم بعدني عطال بطال

عماد:: عوفهه زياد عوفهه يابة والله شلعت كلبي لا انت طفى واضربك ولا انت جبير وافهمك ششلون وياك رد عليهه

زياد:: هاي هي اعوفهه بس فهمني شصار شگلولك

عماد:: من رحت منا گبل لبيت فؤاد، يابة  جايك وطالب بنتك ل ابني

التافه يباوعلي رافع حاجبة عود مسيطر

فؤاد:: والله الحجي يم شهاب بعد انت تدري اخوي الجبير وما اخالف شورة

عماد:: لعد واني فؤاد مو اخوك مو جبير  زياد رايد البنية وعلى سنة الله ورسولة  لا تعارض فدوة اروحلك

:: هااااااه اخووي هسة تذكرتني، شو ماتذكرتني من طردتني من بيتك علمود مرتك، بلا اطيتكم بنتي باجر عكبة هم تنطرد مثل ابوهه

عماد:خايب اكعد عوج واحجي عدل انا ماطردتك غير لانك تجاوزت على حرمة البيت واهلة شني رجل كرسي تطبون تتجاوزون وتطلعون وماتردون احد يردكم

فاطمة:: والله انا بنتي ما اكدر ابعدهه عني  وانا بغداد مارتاحيت  بيهه ابد هسة يلا شفت وجه الله بين اهلنة وناسنة  ، شمالني ارد بنتي بين الغربة شمضيعة هناك

عماد:: ياغربة خوية شو مدري شلون حجيج غير عمهه انا حالهه حال بنياتي

فؤاد::  بربك  انتو هم عايشين مثل الناس، انتو عيشتكم  مامدبرينهه تجيبون بعد نفر  هاي شلك بيهه خوية بناتي معودات ع الدلال ما اشمرهن هالشمرة تعذرني

اقسم بالله بگعدتي بينهم شفت الذل بعينه وبلعتهه لخاطرك ياحيوان وياريت راضين النواقيص اخر شي يكلي

:: تروح لشهاب اذا وافق كبع واخذ

وهم ماكلت لا رحت لكيت امي  بصالة بيت شهاب

ام شهاب:: يااا يمة عماد هذا انت

عماد؛: شلونج يمه شلون صحتج

حاضنتني وتبجي كسرت خاطري
ام شهاب:: يبعد روحي يمة يبعد عيني اروح فدوة لوجهك ليش يمه هيج كاطع بميمتك مو حرام مخلي حسرة عليه اشوف هالعيون

عماد:: درب بعيد يمه وتدرين بشغلي اذا اترك يبطلوني وانا كوة مرهمهه،،، اخخخ والله مشتاقلج

:: فدوة لطولك حبيبي وليدي اكعد اكعد خل اسويلك لكمة تاكلهه

:: لزمت اديهه، كلشي ما اريد بس اكعدي خل اسولف وياج تعبان

:: سولف يبعد عيني وضواها

:: جايج بسالفة واريد توكفين وياي، زياد كلش تعب ومريض وتعلعل كلبة وداعتج يمة، وهو هالوحيد عندي وذولة الانذال متحالفين علي يقهرونة

:: يمة اسم الله خيرة شمالة زويد شصاير عميد

:: زياد رايد بت فؤاد  الجبيرة كاتل روحة عليهه

:: اي جا حكة بنيت عمة، اطوهيا

:: فؤاد ماعاجبة حالي يكول بنتي مدللة واحنة فكر ومدري شيخرط بس والله اعرفه مدفوع هالعربانة

:: يخسى طاح حضة ع هالملافظ، فكر بعينة وعين اهلة

اجانا صوت النحس

شهاب:: ليش يمه ليش يخسى حقة بنيته ويفكر بيهه هذا زواج مو لعبة،
التفت علة  وكمل كلامة:: ايبااااه  هذا ياهوو عميييد  هلاا بخوووي عندك حجاية نسيت تعايرني بيهه واجيت وراي لو شنهي

مد ايدة سلم عليه صافحتة وحجيت

عماد:: شهاب  من الأخر بت فؤاد لغير زياد ماتصير لا تشلع كلوبنة اذا عندك حقد وغل طلعة بيه عوف زياد ترى حتا مايدي السالفة شنو

:ومنين يدري غير اخذتهم وشردت بيهم بحجة ابنك مات، دارت الدنيا يعمييد

:: صلو على محمد يمة اذكرو الله  فدوة رحتلكم

دنك باس راس امي وگعد

شهااب:: اييه توهه نورت البصرة شلوونك شخبارك لا تكول اخووي لا تسأل الچلب العضك كتلناه

:: اخوي اليسبني ويهددني بنص بيتي لو اللي يعاير ابني بمرضة،شهاب  بس اريد افهم معادييني انت وخوانك علييشش شنو ذنبي وياك

:: ذنبك ماخذ حاجة مو الك ذنبك شلعت كلبي وحطيتة بيدي يخووي

:: اااللللللفففف مرة كتلك هااااللسسسسااااالفة لااااااا تتتسسسسووولف بيه

:: هههههه ياسالفة جاي اسولف على طلعتك من البصرة شبيك اخذتنة لغير مرسى

كعدت ارجف من القهر والعصبية وامي خطية تهدي بينة، بس هو النذل يباوع متشمت ومتونس بعذابي

عماد:: شهاب شلعتو كلبي رحت لهذاك الم....  يكلي يم شهاب انت شتكول زياد رايد البنية متخبل عليهه

شهاب:: ههههههههااااايي سلم علي وكلة
لو تلگ (تلعق) اذانك منى ماراح تصير الك

صفنت بوجهه الحقد عامي ماجنة اخو جنة عدو ومكابلني

:: انوب شني مادريتو البت انخطبت لبن محمد خوش ولد وعندة خير يعيشهه ملكة درينه يحبهه بعد يومين من تجوع عدة شيوكلهه حب وحنان مثل ابو

استفزني الى ان خلصت طاقتي كمت تلازمت وياه واحد طك الثاني لحد ما على الصوت العالي فاتو فؤاد ومحمد  گو......  تولوني وياه  لحد ما مرتة ضلت تصرخ

:: ييييييبببببووووووي ماااات الوووولد ككككتلتتتت اخوك عافوني مدمة وطردني ناقص الغيرة، اجت امي وراي بستهه وطلعت غسلت بالگراج وهاي جيتي

عماد:: والله يابوية سويت كل الگدرت علي هنت نفسي وذليت روحي وكرامتي علمودك، يوولون بوية والله اشر واختار وين اتريد انا وياك بس البصرة واهلهه ابعدني منهم

كام زياد باس راس بابا

:: هاي هية يابة يرحولك فدوة بس بسيطا اردهه اضعاف لو ما كسرت عيونهم ما اطلع ابن عماد

:: يمه لا تكسر ولا تجبر بس ابعد وكفينه الشر فدوة الطولك

:: هاي هية سالفة وانسدت يلا عيني بابا خلي يغسل، نام وارتاح يابة حقك يجي ليمك وحق الخلقك

عماد:: بالله هذا شتحجي وياا اكلة تيي يكلي بييي 
كومتة ماما يغسل استند عليهه مر من يمنه كال

شمالجن صافنات كومن عاونن امجن

رحنا نطفر عبالك ثولان
بالليل حطينة العشة وشلنا مثل ماهو كلمن همة شكل

الكل نايم ومتدفي ببطانيتة الكهرباء مقطوعة بأواخر الليل وسمعت صوت أنين ونحيب مكتوم

رحت امشي ببطئ خايفة اتتبع مصدر الصوت جاي من البيتونة مالت السطح
فتحن باب غرفة الدرج وسمعت صوته مخنوك وسحب نفس مثل المنشوول
:: منو

:: اني زياد تعال اخذني يمك اخاف
:: المن كعدتي روحي نامي وعوفيني بحالي

سكتت وصعدت الدرج وصلت يمة مدلي ايدة كلبت الموبايل صار الضوة ترس المكان، باوعتلة الشعور
وكان احد طعني وفر السكين بنص كلبي، عيون عسلية محمرة رموش مبتلة يدان مرتجفة. أنين ونحيب مكتوم بقهر
هيج كانت حال اغلى انسان على گلبي هيج كانت حالتة المنظر اخذ حيلي كعدت اباوعلية وبجيت وياه، لزمت ايده واحجي وياه

:: زياد فدوة والله صحتك اهم، بعد هي قسمة وماصارت والله تنسى بس انطي نفسك مجال ساعد نفسك

بجة وضحك بذات الوقت:: هسة تگول مو گد كلمتة، هسة دتفكر اني مو گد الوعد

:: لاااا شلون تكول ليش هي متعرف شديصير

::تفكيرهه طفولي اني لج اذا اتأخر  بالرد تگلي حبيت غيري مو عاد راح تتزوج

عينيني رانيا شسوي والله اريدهه، انشلع كلبي احس روحي دا تطلع عالبطيء

:: اسم الله عليك حبيبي لا تكول هيج سلم امرك بيدك وهي تنحل

تنهد  ومسح وجهه بقوة :: ونعم بالله
بقينة ساكتين الى ان اجت الكهرباء كال روحي نامي كافي وراج دوام

:: والله ولا اتحرك بدونك، يلا شعندك باقو باردة رجلك متصل عليك

سحب راسي باسني  وضحك:: بعد روحي روحج رناوي غالية گلبي انتي والله

هسة اريد ارد ورن تلفونة شافة رقم غريب رد واجالة صوتهه

منى:: الوو زياد هاي اني منى
زياد:: يروحلج فدوة زياد، وينج يابة والله شلعتي كلبي مناي

:: موو هذاا موبايلي اخذو والله وشسمة اني ادري بيك تخاف علية ف شسمة هذا اخذت موبايل خالة ودكيت حباب اتصل عليه خاف تعرف صارفة رصيدهه

مباشرة غلقة واتصل عليهه

:: هااا زياد، عفية وينك هاي رجعو خطبوني الليلة

سد السماعة بأيدة واشرلي اروح انزل
رانيا:: ماريد انزل خليييني افهم
:: بسرعة انزلي لاتعلين كلبي خليني افهمهةة، شفتة يحجي بجدية نزلت، بقيت انتضر بنهاية الدرج گاعدة 
من نزل تفاجأ لج هاي شسوين شسمعتي
... والله مسمعت شي جنت منتضرتك هز رأسة متضايق، بعدين كلمن توجه لفراشة 

الصبح كلتلهه ماما ما اگدر اداوم بالي يم سرى فدوة حتى بخطبتهه مارحت بس اشوفهه

كالت بدلي مري عليهه انا هم صار هواي مشايفة المرة عيب منهه، بدلت وجهزت نفسي وشمرت الشال وطلعنة مشي لان مو كلش بعيد بيتهم، وصلنة وسمعنة صوت عالي وعياط

ليلى:: بس لا اجينا بوقت مو مناسب

رانيا: ماما شعلينة منهم قابل ميتة عليهم جاية على خالة وسرى

دگينة الباب فتحة رجال جبير بس حيل وقح نضراته غريبة

حميد: اهلا وسهلا، امرو عيوني

ليلى: هلا بيك خوية اجينا على ام سراوي اني ام صديقتهه وجارتهم
: اي شكو بيهه تفضلو، بس هي مموجودة بس سراوي هنا

سوا النة مجال صغير ما وخر كليا عن الباب حيل مستفز وتصرفاتة غريبة

دخلنة لغرفة خالة مجانت موجودة بس سرى گاعدة مكرفصة وتبجي

رانيا؛ يعمري شصاير وياج
ليلى: شبيج خالاتي عيوني ليش هيج حالج

تشهك وتحجي: ما ماكو شي ما ماما دتموت خالة كلش حالته صعبة

حضنتهه وهي شدت عليه حيل كأنما غريق وتمسك بطوق نجاة

: اسم الله يروحي شبيج والله ميصير هيج تسوين ادعيلهه ياعيني

: ادعيلهه خالة وهاي اني جبتلهه تربة ما مصلى عليهه من الامام وعلك وشربيهه وانشاء الله ربي يشافيهه

: خالة زعلت مني وطردتني تكولي متحبيني متسمعين كلامي تريد اتزوج وهي بهالحال والله ما اكدر والله

ليلى: امج تعرف مصلحتج ومريضة لا تشلعين گلبهه وتقهرينهه شتكلج تكولين حاضر

:: وافقت خالة والله رضيت بس هسة مرتضى بعد ميريدني شبيدي اني

ماطولنة عشر دقائق وفات الشخص اللي فتح الباب

حميد: يلا عيني توكلو بالله البنية تعبانة تريد ترتاح

احنة فهينه هذا شبي مخبل

سرى: لا عمو عفية خليهم، والله مشتاقتلهم هاي صديقتي الوحيدة

: يلا بوية يلا انتي تعبانة وهم تأخرو  يلا عيني توكلو شكو صافنين

ماما باوعتلة بأشمئزاز واني ماحطيت عيني بعينة بوست سرى دنريد نطلع وفاتو اخوات مرتضى اعرفهم حبابات

مروة: هااا سرى خبلنة رضاوي يكول وحدج

:يلا عيني انتو هم توكلو البت تعبانة تريد ترتاح

: واحنا شنو نريدهه تغسللنة لو تطبخ النة شو وخر يريد اعوفهه وحدهه بهلحال

ماما اشرتلي نمشي لان عائلة بينهم ودعتهه وعينه عليه

رجعنة للبيت شغل ودراسة  ومشمش وسوالفهه المتخلص وبابا وأوامرة وزياد وضعة معاجبني احس عندة نشاط وحركة مو طبيعية ويتصفن هواي  مشت الأمور

بالليل نايمة وفزيت على انقطاع الكهرباء كلبت الموبايل الساعة 2:43 بالليل سمعت صوت بالطرمة اباوع ضلمه حيل

اشوف خيال واحد يفتح الباب ببطئ شديد تخبلت ياربي شديصير منوو هذا

_________________________

ســـــــــــــــــرى

اختفى بابا  ايام ماكو خبر عنة، ولا اتصال وماما يوم عن يوم تتعب اكثر وتّعب روحي وياها وصارت اعصاب حيل لان ممتحملة نفسهه ولا منضرهه واليوم على غير عادتهه هواي عاطت بيهه أني عاذرتهه ومقدرة وضعهه بس لان متعودة على معاملة ملكيه منهه انهم وابجي وحدي

جميلة: سرى لج سررررى وينج يوووم راح امووت

رحتلهه اركض ها ماما شبيج
:: يااا ماما هاي ليش هيج هاملتني اصيح لحد ما امل وانتي ماكوو شدسووين وعايفة امج

: ماما والله بس طفيت الغاز امريني يروحي

:راح اتخبل دبريلي مسكن جسمي كلة يصيح عليه فدوة سوي شي ادعيلي بالموت والله تعذبت

: يلا هسة راح اتصل على ام مرتضى بلكي تدبر شي

: بسسرعة حسي بيه شوية لا تتماهلين لج روحي طلعت

ما اكدر اوصف احساسي ولا وجع كلبي، بس اتمنى من ربي هلأيام مايذوقهه احد من البشر

طلعت اتصلت وابد متقصر مباشرتا اجت، وياها مرتضى والتلفون بأذنهه عدهه اتصال وواضح جدا تحجي وي خالو

: يا رجال هياتني وصلت، مبيهه شي فدوة لعينك، يبوووو يا جميل الا ترفع ضغطك يلا ترتاح، لا ماكو شي فاتلهه مرتضى خلي البنات ينطوك حباية اسبرين، مع السلامة

مرتضى راح الماما وهي بقت تسألني، هاا حبيبتي شبيهه ماما شو تعالي يا امي عليمن تبجين

دخلنة لكينة مرتضى يم راسهه

مرتضى: مو هاي هي جنهه العافية بعد شبيج گالبة الدنية

: علمود مسكن  وداعة ماما مو ما اعرف يامسكن انطيهة

: تعاي ادني علية

تقربت كعدت بالارض وهو عالقنفة يشرحلي اوقات المسكنات سكت، رفعت راسي لكيته مدنك مثبت اديه على ركباتة ومرخي قبضة ايدة يم حلكة ويباوع علية

: هااا؟

: هممم

: يلا كمل
: شأكمل
: العلاج مرتضى شبيك
اخذ نفس ورجع ضهره وحجة بهدوء: خلصنة كومي سويلي جاي

سويته وقدمتة ماما ميصير تشرب ولا انا بس خالة ومرتضى اللي جان يباوعلي ويخفي ابتسامتة

: اليوم بابا راح يجي يخطبج من خالة

: لاا ءااا يعني مو لاا بس اجلهه

: سرى يوم شيأجل
: ماما ما اتفقنا بهالسرعة، واصلا حتى بابا مموجود وانتي

: اااالف مرة كلت معليج مني اني مدااا اتحسن حاالتي دتسوووء ليش هالكد عنيدة

ام مرتضى: المصلحتج بنيتي علمودج ولا انا ما اتمنى افرح بوحيدي بس كلشي لخاطر امج يهون توكلي على الله ووافقي، اصلا وين تلكين مثل هالقمر

هزيت راسي موافقة والتفتت الماما

: تمام ماما على امرج بس علاقل يجي بابا
: معليج اني متفقة ويا على هالموضوع

اختنكت ونزلو دموعي ياربي شديصير بالدنيا معقولة خطوبتي وهي حالهه مثل جثة وتتنفس وباجر موعد الجرعة، وتعاي ياسرى سوي خطبة

: حبابة ماما خل نأجلهه مرتضى احجي شي

: لججججج كافي تعبتيني ولا عبالك امج، المهم عناااد شبيج متكليلي

: عمة صلي على النبي مو هيج، سراوي والله علمودج مراح يصير شي انتي ممقتنعة بي والله

: لا راح يصير مقتنعة او لا راح يصير يجي خالج وتوافقين مثل الحبابة

: صار ماما عفتهه ورحت للمطبخ كعدت بالكاع وادية على راسي روحي تعبانه وكلبي يرجف واكلي تقريبا معدوم وجهي اصفر ايدي ترجف لان ما اكل ومتوترة حيل متوترة ماعرف راسي من رجلي

: خطيبتي،،، يروحييي،،، سررر

: مرتضى تعبانة تعبانة اتركني بحالي فدوة
: بية ولا بيج
: اسم الله عليك، بس عوفني فدوة
: شبيج ابوية من شنو خايفة
: كلشي، كلششي معاجبني، اريد امي، امي ماتت بالحياة، وانتو ماعرف شنو عبالك متحسون، شكو هلاستعجال على شنو

: امس اجو عمامج ثنين
باوعتلة متفاجأة:منو؟
:واحد اسمه حميد والثاني سليم يهددون هذا بيت اخونة،عبالهم ملك  ما اعرف شنو من عرفو اجار لفو وجهم وراحو

:اذا طالبو بيج اني شسووي

:هاي هية سوو اللي تريدونة.
:سرى ماردت اضغط عليج هذا طلب عمة

:هه لعد تعلميني بيك اعرفك كلش زين
:شقصدج لج، كافي بطليهه نضرات الرفض والاستفزاز كرهتيييني بروحي

جان يحجي بعصبيه بس صوت ناصي لتسمع ماما بعدين خلة وطلع من البيت

رحت الماما لكيتهه نايمة ماخذة علاج منوم قوي تركت كلشي ودحست روحي بصفه، حست بيهه بس ماعندهه قوة تحضني بس باوعتلي بعيون دامعة بست اديهه وراسهه خل انام يروحي ورانة خطوبة وخبصة موو نكعد العصر ونجهز

هي انتحبت بضعف واني خنكتني ثقل العبرات ونمت بقهري يمهه بحضنهه بريحة العلاج بريحة امي بريحة حزني

كعدنة على صوت دگات الباب بقوة ركضت افتحهه جانو خالة والبنات :وينج خالة صدك تحجون خبلتونة والله شوفي خالج شحالة

:خالة والله ما اسمع جنة نايمين

مروة :هبطتينة يمعودة صدك جذب
هم دخلو ومرتضى حتى ماباوع بوجهي دار ورجع

دخلن جوة سلمن على ماما، ماما ذكية عرفتهم لشنو جايات

جميلة:مراوي عمري اريدج تطلعينهه قمر فدوة

ام مرتضى:والله جنتي مو بحاجة خرابيطكم هي من گاعهه قمر

رقية:لا عيني لااا خاف يشوفهه العريس وينهزم يلا كومي يلا

:لج يا يشرد خو لو هسة بمريول مطبخ  تزفيهه موافق مستوي ابنة

غيرن جو علينه بسوالفهن حتى ماما رغم تعبهه بس فرحانة احسهة ماردت اكسر فرحت الموجودين شيردون اوافق

رحت سبحت وسشورن شعري القصير ومكياج خفيف وبدلت فستان طويل لونه بيج شيفون مرتب ومستور وتعطرت وهن ع الواهس تبديل ومكياج حسيت اجواء خطوبة  فعلا دخلت لغرفة ماما لكيتهه تعبانة بس عيونهه ترمش

كعدت يمهه:شوفيني ماما شكد طالعة حلوة راح اخذ صور حتى نشوفهم لبابا، واريد اخذ صور وياج هماتين

حجت بصعوبة:لااا لا لا
:ليش حبيبتي
:راح تتأذين من تشوفينهم، لا تعبيني فدوة

:ههههه لا يكلبي كلمة ملكة متصير اثنين منريد صور اصلا

:سرى باجر يتم العقد، حتى لو اني بالقبر
:اسم الله عليج ماما  لتحجين هيج، غمضت عيونهه سرقهه النوم بسبب المسكنات

وكفت رتبت شعري بدون نفس حتى رانيا اهلهه مقبلو تجي اندگت الباب دخلو خالو ومرتضى ووالدتة بأيدهه صينيه حلويات وجهزو العصير والبنات اصلا يمنه

يباوعولي مقهورين عليه، هالگد صايرة مثيرة للشفقة

عيوني بلارض وعقلي يودي ويجيب شهالمهزلة من منو يخطبوني اهلي وين شنو هاي كعدتي كاشخة بنصهم وامي فاقدة جوة ابوي وين شوصلني لهالحال

رفعت  راسي على صوت خالو

:سراوي خالو خير الكلام ماقل دل  ندري وضعج وضروفج والتوقيت غلط بس ياخالو احنا شارينج لنفسج لذاتج بدون شروط بدون كلام رايدج لوليدي شتكولين خالو

:بكيفكم خالو انتو اصلا متفقين ماعرف هاي كعدتي شنو معناها، حجيتهه وبجيت

حرك الكرسي المتحرك وتقرب رفع راسي :ابد مايصير شي انتي ما مقتنعة بي لو مو أبني لو اكبر واحد اذا ما موافقة كولي ال ابوج يابه ما اريدهه رغم حالي صرتلج اكثر من اب واحبج مثل بنياتي واكثر وعمري مافرقت بينكم صح لو لا

هزيت راسي بأي

:لعد ليش هلانكسار ليش عبالج روحج وحيدة مامعترفة بينه اهلج

:لا خالو والله تاج راسي انتو شلون تحجي هيج بس والله ماما كاسرتني

:كلشي جاي يصير لخاطر منو وبطلب منو انتي ردي عليه

:بطلب ماما
:وراح يتنفذ طلبهه لو لا
:يتنفذ
:يعني موافقة خالو، دشوفي شلون زوع عافيته كليلة اي بردي كلبة وافقي عبالك وحدة معسرة
:هههههههه موافقة خالو
:وباجر العقد هم موافقة لو وراي اكعد اقنع ترة حيل مابية حالج مهمومة يزيد مرضي ياخالو

:لا خالو هاي هية موافقة

ام مرتضى:كككللللووووششش حجتهه وطشت عليه جكليت، والبنات يصورون، جاريتهم بأبتسامة ماحبيت اكسر فرحتهه بأبنهه الوحيد

مرتضى:يابة اني جايب الحلقات مجهزهم

:انطم لا تصير طايح حظ يا حلقات شلون تلمسهه بدون عقد سرسري لا تصصير خووش

:يااا علكيفك ويه الولد خلي بفرحته

كل هذا واني مدنكة رفعت راسي من صاح
:يااابه صدك جذب موو گداامهه
عيني بعينه نضراته مليانه حب ولهفة قابلتهه نضراتي بأبتسامه وعيون دامعه

حجة بدون صوت بس حرك شفايفة بس فهمتهه (أحـبج)

:صوورتك صووورتك لگطتك هههههههههه

هاي رقية جانت برا وتصور بلما يدري. انحفظ هالفيديو كأحد لحضات السعادة النادرة بحياتي اللي بدت المأساة تتخللهه تدريجيا

راحو وبقيت بس اني وماما ورقية بنت خالو بقوهه يمي اخذت الموبايل اتصلت على بابا مغلق، وين صفة بيك الزمن ليش انقطعت اخبارك

باجر موعد الجرعة، جهزت كلشي للمستشفى الساعة ما اخذت عيني نوم بس هلاوس كلساع تاخذني لغير عالم من التعب

بالمطبخ اجهز عصير حتى انطي لماما قبل العلاج جان اسمع صوت عالي مثل الشخير صوت عالي مثل واحد يختنك ركضت لغرفة ماما جان اشوف حلكهه مليان دم ومختنكة بي

صرخت بكل صوتي، ماسويت اي شي بس اصرخ والطم مااااااتتت مااااتت

دخلت  رقية على صوت صراخي مرعوبة شافت المنظر حتى ما اتصلت طلعت لبيتهم تركض

اجو شالوهه منهتهية

اجت خالة تسحل بية سحل ماضلت عافية عندي وحتى دموع ماكو بس رجيف

وصلنة كعدنة بالمستشفى بلأنتضار ونسمع الأنين مالتهه مثل سكين وتطعن قلبي اسمع وكازة على اسناني بقوة

طلعوهه للعناية فاقدة، اجا مرتضى بأيدة التلفون ونضراتة غريبة مثل خايف مترردد

:سرى هاي بابا ع الخط ديحجي وياج

________________يتبع
والباقيات الصالحات
سبحان الله وبحمده، سبحان الله العظيم

§§§§§§§§§§§§§§§§§§
بسم الله الرحمن الرحيم

لا حول ولا قوة الا بالله
لا حول ولا قوة الا بالله العلي العظيم
********************

بنات لا تنسون التقييم بالنجمة🌟 ومتابعة الحساب والتعليق اذا حابين تستمر القصة 💕🤎

ضيفوني انستغرام pahr.asoad