مساء الخير زهـراتي
#ثعلب الحبتر
#بقلمي انا: زهراء
#حساب الانستا: zaii1_8
لا تنسون التصويت +التعليق بين الفقرات +احبكم زهـراتي
بسـم ﷲ الرحمـن الرحيـم
ـــــــــــــــــــــــــــــــــــــــــــــــــــــــــــــــــــــــــــــــــــ
_اوزعهـة المواجعَ ؏ الجسـد بالليل
_حتة اكـدر اسـدن عيني واتعـدي
_و ابد ما غمضت طيفك ملـح بالـعين
_وبـيش اتلكة جرحك والسهـر ضدي
_انتَ ويـة الوكـت مـدري الوكت وياك
_مثـل صحبة بلم ما يتـرك المردي
_خلص ليلـك فرح وانا الحـزن ناطـور
ـــــــــــــــــــــــــــــــــــــــــــــــــــــــــــــــــــــــــــــــــــ
ترف
من اليوم الي صارت بي سالفة الفيديو ابتعدت عن علي ما اعرف ليش بس حسيت افضل النة ما اريد اعلقة بية لأن اني ما اعرف شنو الي اريدة
صح احس اكو مشاعر تجاهة بس ما اريد اتسرع صح علي خوش واحد بس ما يكفيني هذا اريد انسان ابادلة بالمشاعر
كملت شغلي وطلعت للصالة لكيت عمو كاعد وعلامات التوتر على وجهة رفع نظرة الي
ترف.. شبيك عمو
باسل... خايف على روح طلعت وحدها
ترف... لا عمو لا تخاف عليها كالت هنا تتمشة شوي وتجي
هز راسة بس هوا مامطمأن مشيت من يمة وشفت عمة تنزل من الدرج بصعوبة بسبب فقراتها شافتني وابتسمت
أمل... علي يصيحلج
هزيت راسي وصعدت فوك الغرفة علي دكيت الباب وانتظرتة يكلي فوتي بس ماكو رد منة فتحت الباب على كيف ومديت راسي شفت الغرفة فارغة دخلت للغرفة وسمعت صوت الدوش بالحمام
سديت الباب وكعدت على الچرباية انتظرة سمعت رنة تلفون التفتت المصدرة شفت تلفون يهتز على مخدتة مديت ايدي واخذتة قريت الاسم المتصل... روان احمد
قريت الاسم ودمي فار عقل ماضل براسي اذا يريد وحدة ثانية وبحياتة وحدة غيري شكو خاطبني وضال متمسك بية شمرت تلفونة على المخدة وكمت بسرعة دكيت الباب وصحت بعلو صوتي
ترف... لكك اطلعععع ابو النسوان اليوم شهيرتك على ايدي
علي... شتردينن
ترف.. اطلع هسة واني اشوفك شريد يالشفية ابو النسوان ما انلام من اسميك ام علي
علي... شلون يعني الواحد ما يسبحح
ترف... اطلع لك اليوم راح اسبحك بالشهيرة اطلع ابو روين اطلع
وكف صوت الدوش شوية وطلع لابس بجامة وفانيلة قطرات الماي تنزل من جبينة الرقبتة وشعرة نازل على عيونة يتخلل منة الماي خلة الخاولي على شعرة ونشفة ويباوع الي ومضيق عيونة منتظرني احجي استوعبت اني شكاعد اسوي نفضت الافكار من راسي وصحت
ترف... منوو روان احمد؟؟ واذا تحب وحدة ثاانية ليشش الهسة عاقد علية هاا جااوبب لوو انتَ تموت على النسوان طلكنيي يلا طلكني لا اشهرك هسة واخزيك كدام امة لا اله الا الله
ماكو رقم مالت مرة ما موجود عندك نسوانك اكثر من نسوان الحافوفة كون يدورن عليك ويشبعنك كتل يا ام عليي يا ام السحوورة
سكتت واني كوة اسحب نفس
راح التلفونة باوع للاسم و ابتسم بخبث وبأستفزاز اتقرب مني وحجة
علي... حبيبي شبيك عصبي تئبرني تغار علية؟
حجاها ومد ايدة الراسي وكوش شعري نترت ايدة عني وصحت
ترف.. انجببب
ابتسم واسترسل بكلامة
علي... اذا هذا كلة وماكو غيرة جا الغيرة شلونها؟ اطمئن صديقي ما اخونك ماتجي وحدة بعدك
دفعتة من صدرة وصحت
ترف.. جا اذا ماتخوني منوو هاييي
رجع اتقرب مني وكمل... موكلتني على قضية بس انتِ من الغيرة ما انتبهتي هيا داكة على رقم المكتب مو رقمي الخاص
كمل كلامة وغمز بهتت بوجهة وبوخت حسيت اتفشلت وزودتها ضل يتقرب مني واني ارجع ليورة الحد ما وصلنة للچرباية دفعني بخفة وصار فوكي وجهة كبال وجهي ونفسة يطخ بية همس وهوا ذايب
علي...يواشج علية ما اتحمل نظراتج
رمشت ببطئ وبصعوبة اجر النفس دنك راسة وخلاه قريب من رقبتي غمضت عيوني وضغطت على كتفة
علي...مو طولنة الخطوبة ترفي كافي عاد ترا مااكدر الزم نفسي اذا تردين اطولينها بعد اضمنلج تعرسين وانتِ بطنج واصلة الحلكج
حجاها وخلة وجهة برقبتي كزبر جسمي وضغطتة عليه اكثر بحيث اظافري حسيتها راح تدخل بكتفة بس هوا ما اتحرك همست بصعوبة وبصوت كوة ينسمع
ترف... علي
رفع راسة وباوعلي وضعة اتخربط بسرعة وبلكوة يجر نفس نزع فانيلتة ورجع دنك علية غمصت عيوني وحسيت شفايفة على شفايفي مشيت ايدي الرقبتة ولفيتها عليها قسة علية كلش رفعت ايدية اريد ابعدة طبكهن اثنينهن ورفعهن بأيدة فوك وايدة الثانية تتجول على جسمي بلمسات قاسية منة دمعن عيوني من حسيت طعم دم بحلكي فقد كلش ايريد يكمل واني صحت.. كاافي علي ابتعدد
رفع راسة عيونة ذبلانة اردف... اكمل لو انروح ننزل جوة وانحدد موعد العرس؟
بلعت ريكي وبللت شفتي
ترف... ننزل جوة
ظهرت ابتسامة خفيفة على شفايفة اتقرب من وجهي وسئلني
علي....
Do you agree to continue our lives together?
(هل توافق على مواصلة حياتنا معا؟)
هزيت راسي بأي وابتسمت حضني بفرح وذب ثكلة كلة علية ضحكت بصوت وصحت
ترف... يا علي وخرر شبيكك
رفع راسة وعلى وجهة علامات الفرح كض وجهي بأيديه وصاح
علي... لكك تئبرني احبكك انا
ابتسمت وهوا كام وكف جر فانيلتة ولبسها وراح لبس تشيرت واني كمت عدلت ملابسي ورحت للمراية عدلت شعري ومسحت شفايفي التفتت الة شفتة مكمل غمزلي واجة كض ايدي ونزلنة سوة
لكينة عمو يباوع على الاخبار ومَلك وعمة يكصصن باميا
كعدنة اثنينة على التخم وواحد يباوع للثاني ويبتسم انتبهوا النة واردف عمو بأستغراب
باسل... شبيكم ولكم احس وراكم مصبية
علي.. شسالفة شبيك باسل جاي انريد نبشرك بشي
باسل.. شنوا ولك
راد يحجي علي وكمت اني ووكفت بأستعداد وحجيت جرة وحدة
ترف... اني قررت اكمل نص ديني واستر على ابنكم
بهت عمو بوجهي مافهم الحجيتة بس عمة هلهلت هلهولة حتة الجوارين سمعت
صاح عمو باسل... يمعودة كافي خلي نفهم
سكتت عمة وتباوع النة وتبتسم
كعدت بصف علي ومنتظرتة يحجي
علي...يابة الله بالخير
ردو عليه واني همست
ترف... وين كاعد بديوان
تجاهلني واسترسل بكلامة...يابة قررنة انا وترف نكمل زواجنة شفنة هذا انسب خيار النة اثنينة فاهمين بعض وهذا اهم شي
ابتسم عمو بفرح وباوعلي هزيت راسي وابتسمت رجعت عمة هلهلت
مَلك... الف مبروك تستاهلون كل الخير
بادلتها الابتسامة واردفت
ترف.... يصير عدنة زعطوط انطي الروح تجعص راسة واطكة بالحايط
علي... لا ربحنة
باسل.... هسة خلي تجي روح شو اتأخرت حتة انرتب امورنة ونحدد الموعد
عقد علي حواجبة واردف
علي.. ليش وين راحت؟
باسل... تتمشة
كام من مكانة وفتح عيونة بصدمة
علي.....يابة شلون تخليها تطلع صدك جذب هيا هنا بالبيت ووضعها مدري شلونة مو عاد طالعة
حجاها وسحب سويج سيارت عمو باسل وطلع اتوترنة كلش من ردة فعل علي
صعدت اخذت تلفوني واتصلت عليها ماترد اتصلت اكثر من مرة ماتجاوبني اخذت التلفون ونزلت جوة شفت عمو يتصل همست المَلك
ترف..... المن يتصل
مَلك.. العلي
هزيت راسي وانسحبت على كيفي رحت جوة الدرج واتصلت على هلاك اول اتصال مارد ثاني اتصال جاوبني
الحبتر.... نعم ترف
ترف.. وين اختي؟
الحبتر.. بحضني
انخطف لوني وحسيت بوخت من كلامة اردفت
ترف.... جاوب بأحترام رجاءً
الحبتر... ليش بس لا كلامي نازع ملابسة ويفتر بالشارع؟
لميت شفتي للداخل وحاولت احجي بأحترام
ترف....روح وينها جاي اندور عليها
الحبتر... شبيج بابا مو جاي اكلج نايمة بحضني
صحت بضجر
ترف... نيمووك بجهنم كوون كول اختي ويننن جاي اندور عليها ويين وليتووو
الحبتر.. صوتج هيو اعصابج شبيج طرشتي اذني كتلج اختج يمي ونايمة بحضني يلا ولي
ترف.... هلاك رجاءً احترم نفسك انتَ اكبر مني
سداه بدون لايرد غميتة ورحت يمهم شفتهم الاجواء متوترة يمهم وعمو يلوم بنفسة صارلها اكثر من ثلاث ساعات طالعة بلعت ريكي وحجيت اطمنهم
ترف... روح يم هلاك
رفع راسة عمو وصفك ايد بأيد وصاح
باسل.... لوو ضالة ضايعة ولا اعرف هيا يمة
ترف.. جا ليش
صاح بية
باسل.... شنوو ليششش موو امان هذا رجل دجاجة ما أمن يمة مو النوب روح
رن تلفون عمو اخذة ورد
باسل...ها علي
مدري شنو سئلة وجاوبة عمو
باسل.. دتعال ارجع عرفنة روح يم رجلها
سداه وشوية ورجع علي شمر السويج على التخم وكعد يم عمو باسل باوعلي وضيق عيونة
علي.. منو كلكم روح يم هلاك؟
باسل... ترف
خلة الجكارة بحلكة وورثها
علي... وانتِ ترف وين تدرين؟
اتلاحكت الموضوع وما ارتبكت اردفت بثقة
ترف.. هيا اتصلت علية
لانت ملامحة بأرتياح وهز راسة بس ضلينة متوترين وخايفين عليها خاف ماترجع وياخذها
ضلينة هيج ما شايلتنة كاع من التوتر بس انريدها ترجع الف فكرة اجت ببالي خاف ترجعلة لو ياخذها غصب عنها
صارت بالعشرة بالليل وايسنة عمو ارتفع ضغطة واتخربط كلش حار علي بيه وعمة منا خايفة على عمو وعلى روح احتارينة المن نركض
راح علي وجاب علاج عمو شربة وقاس ضغطة بعدة معلك اتنهد وكام من يمة يمشي بعصبية بحيث لو رحت وسويتلة بز يكب بوجهي ويركعني بالكاع
صارت ب 11 بليل واجت سندريلا بس من وقت دخلت روح واتباوع النة بأستغراب كبل كام علي ووكف كبالها وصاح
علي.... ووووينن جنتيييي؟
ردت ببرود
روح.... طالعة
علي.. وبسس طلعتجج من 3 الظهررررر ل 11 بليلل
دمعن عيونها وصاحت
روح.. شبيك تصيح علية
علي... جااوبيي
اتنهدت ولمت شفايفها للداخل تحاول تتماسك بس صعب عليها
روح...جنت وية هلاك واتفقنة باجر ايطلكني
رفعت نظرها النة وعيونها مدمعات بلعت ريكها وعبرتنة وصعدت فوك راحت عمة وصعدت وراها
بدينة ننسحب واحد ورة الثاني اخر شي ضلينة اني ومَلك حسيت اكو حجي بحلكها بس مترددة ابتسمت الها وحجيت
ترف... كولي شنو تريدين
مَلك... بس سؤال عود انتم ليش ماقبلتو على طلعت روح وية رجلها جا شبي؟
ترف... مو خوش ادمي
مَلك.. ها
هزيت راسي وكمت فرشت اسناني وغسلت وصعدت فوك اتعديت على غرفة روح لكيت الباب مفتوح شوية وكفت على صفحة وباوعت لكيت روح ساندة راسها على كتف عمة وادموعها تنزل وتحجي
روح... هوا هوا كلي روحي وياي البيتنة ماردت اروح بس هوا كلي
حتة هذا ما حبيتهم يضحكون علي خلي يولون ليش يضحكون على كلامي
حجتها وشهكت ورجعت استرسلت بكلامها... كلهم يلعبون النفس بس امة دجاجهة حلو
حسيت بأحد وراي التفتت شفتة عمو باسل اتنهد وعبرني ودخل للغرفة مجرد ما شافتة انهارت بالبجي كعد يمها واخذها الحضنة واردف
باسل... يلا بابا شبيج تبجين وين روح القوية ما جاي اشوفها هسه؟
شهكت وصاحت
روح.. كلة منة خلي يولي هسه بس ايطلكني اريدك اتجيبلي واحد اتزوجة واقهرة
باسل...صار
روح... وكون بشرتة بيضة ويسبح هواي
باسل... ان شاء الله
سكتت وشوية ورجعت نزلن ادموعها وصاحت
روح... امدا ليششش يبوسنييي ليشش
استغفر الله عمو باسل واردف
باسل... ميخالف زوجج هوا
روح.... النوب يكلي شفايفج حرب مدري شنو وحتة هذا كلة منة كصيت شعري بس هسه هوا طال
حجتها وتريد تفتح الشال وتشوف شعرها العمو
كض عمو شالها بسرعة وصاح
باسل... لا بابا لا ما يصير
وخرت ايديها عن الشال وهزت راسها
روح... اي صدك ما يصير.... النوب بنتة تضحك على اسمي
باسل... معليج بيها حلو اسمج
ضحكت وحجت
روح... حتة انتَ اسمك حلو
باسل... مشكورة عمو
روح... ادلل
حجتها وشالت راسها عن كتفة
روح... شنو هاي عمو كتفك يابس مابي لحم
ضحكوا وهيا خلت راسها على كتف عمة وحجت
روح... اللحم عد أمل وبس
ضحكت بصوت عالي عليها هوا عمو باسل جسمة حلو يعني مو معضم نفس ما تكول ولا عمة أمل زنودها بيهن لحم هواي
روح...البعير يبوسني كون مطي مربوط بصف مطي يرفسة ويطشر عقلة واتفل عليه
حجتها وغمضت عيونها بتعب
رحت نمت ونمت ثاني يوم كعدت الصلح نزلت من الدرج وسمعت صوت عمو باسل بالمطبخ يغني العمة امل
باسل...
آه يا حلو ويا مـسليـني
يـلـي بنار الهجـر كاوينـي
امـلا المـدام و اسقيني يا عيـني
مـن كثر شوقـي عليك ما بنام
حبـيت جميـل يـاريـتني ظلهُ يا عيـني
حـاز الجمـال والحسـن كلهُ
ابتسمت ودخلت للمطبخ وكف عمو عن الغناء وهوا مبتسم اتخصرت وكلت
ترف... لك عيني لك تئبريني شو هيدي الاجواء
ضحكت عمة واردفت
أمل... صباح الخير .... يلا تعاي اتريكي
ترف... صباح النور... انتظر الشفية و روح
أمل.... مو راح تزوجون بطلي هاي مالت الشفية
ترف... هاي بعدني ما صايرة جنتج وتردين تتحكمين بية
ضحكت وكعدت يمها دخلت مَلك صبحت علينة وكعدت الحد ما التمينة كُلنة وبقت بس روح الي دخلت للمطبخ وهيا عيونها مغمضتهن من النعاس فتحتهن وباوعت النة وكعدت يم عمو باسل
بدينة ناكل ونضحك وروح شي ويانة وشي لا
الحد ما دك تلفون عمو باسل اخذة وقرة الاسم مدت روح راسها وباوعت للرقم مجرد ما قرتة بلعت ريكها ودنكت راسها وما حجت شي
جاوب عمو على الاتصال واردف
باسل... السلام عليكم عمو شلونك شلون صحتك شنو هاي الكطعة نسيت ايامنة سوة جا بس عفتنة ورحت للانبار نسيتنة
عفت الاكل وابتسمت من عرفتة راغب ضل عمو يحجي وياه ويضحك الحد ما اردف
باسل... تستاهل كل الخير وليدي... ههههه ان شاء الله اذا كدرت ام محمد اجيبها واجي.... عليوي يجي غصباً عليه
ضحك وسلم عليه وسداه
باسل... هذا راغب اتصل بية وبعد يومين عن عرسة
رفعت روح راسها وباوعت العمو عضت على شفتها و رادت تكوم بس اتراجعت من حجة علي
علي... شعجب قبل شهر اتصلت عليه ما فتح الموضوع وحجة
باسل.. يكول كلشي صار بسرعة بسرعة
أمل... منين الماخذها يعرفها لو لا؟
باسل...اي هاي بت خالة ظافر المنفصلة
أمل... هااا الجبيرة
عافتنة روح وكامت صعدت فوك انسحبت من يمهم وكمت صعدت يمها
لكيتها مدنكة راسها على دفتر وتشخبط وما منتبها الي
رحت كعدت كبالها رفعت راسها الي وابتسمت بوهن ورجعت دنكت اتشخبط
ترف... شبيج من سمعتي راغب راح يتزوج ما علقتي على الموضوع
جاوبتني وهيا مدنكة راسها
روح... الله يوفقة اكيد الماخذها يستاهلهة وطيبة نفسة
للعصر وصاحلنة عمو كلنة يمة
نزلت اني لكيت روح كاعدة رحت كعدت يمها وابتسمت الها
كضت ايدي وضلت تلعب بأضافري
روح.. شعدكم مجمعينة
ترف..راح نعرس
عقدت حواجبها وضحكت
روح... منو ومنو؟
ترف... اني و ام علي
فتحت حلكها وباوعت العلي والي
روح.. تحجون صدك؟
ترف.. وابو الحسن
شفتها مستغربة وكلساع تباوع العلي و الي وتضحك ضربتها بكتفها وصحت
ترف.. شبيجج
كضت كتفها بألم
روح.. امداج شبيج ولج بس مستغربة الوضع يعني متأكدة قابلة؟
فرشت شعري بغرور
ترف.. واثقة من قراري
غمتني وحجت بأستهزاء
روح... هوا من يوم الدريت بيج عدتي سنة غسلت ايدي من قراراتج
اجت مَلك وكعدت كبالنة باوعتلها روح بطرف عينها ودارت وجهة ماعاجبها الوضع
حجة عمو باسل عود يريد يفتح الموضوع
باسل..... هذول الثنين يردون يعرسون
حجاها ويأشر علينة
علي... بوية جنك ما عاجبك الوضع
باسل... لا عاجبني وداخل بمعدتي هم
أمل... شو ما احس ترف عروس
ترف.. شبيكمم ويايي شبيكمم شنو موو عروس لازم تردين وحدة ثانية الابنج زين من راضية بي ترا هسة ابطل واخليكم ادكون و تلطمون
كضتني روح وضحكت
روح... هدي هدي نصي الريمونت
خزرت عمة وهيا خزرتني ومن جهة علي صدمنة من حجة
علي... العرس بعد عشر ايام
شهكت وصحت
ترف... بطلت ما اريد جيبولي واحد ثاني
روح.. لا شنو عشرة ايام شتكفي ووين نخليها ما تكلي؟
علي... شسالفة ياروح اربع نسوان بالبيت كل وحدة على شغلة واحنا نساعدجن
أمل... لا صدك بس فرت السوك يحتاجلها شهر
باسل... زودتنها ترا
مَلك... اذا كلنة سوة نلحك
عضيت على شفتي وهزيت راسي العلي واتوعدلة
علي.. شبيج هاي هود بعدنة مامتزوجين ووتتوعديلي بعدين انا قابل بأي شي منج فوكاتها يعني
ترف.. بلا اسكت علي وابو الحسن مايصير يعني اني كلشي ما مكملة ولا مجهزة شي
روح.. خليها بعد شهر
علي.. شبيكم اكلتوني حاصل فاصل ترا بعد شهر ونص تبدي المدرسة وترف تلتهي ليمتة نعرس جا؟ على الاقل بعد عشرة ايام
ترف.. خليها بعد 15 يوم
علي.... هذا هوا متفقين
هلهلت عمة وباركولي واني بس مبتسمة باوعت الروح كاضة تلفونها ووضعها اتخربط
•••••••••••••••
روح
كاعدة يمهم واسمع نقاشهم واحس مدري شنو بداخلي بس فرحانة ترف صارت عروس وكبرت صح امنيتي جانت ان تتخرج اول شي او حتة لو تكمل سادس يلا تتزوج بس اختيارها ومقتنعة بي وما اعتقد اكو افضل من علي الترف
اباوع الها وعيوني ادمع جانت طفلة وامي تركتها عندي سنة وحدة بس
هسة كبرت وراح تتزوج بس بعدني احسها طفلة ما اعرف ليش احسها بعدهي كتكوتة بعدني اشوفها عمرها سنة ابتسمت وانا اباوع الها والعلي نظرات علي تجاها ولمعت عيونة من يشوف ابتسامتها يخلني اطمأن على اختي
سمعت صوت اشعار من تلفوني فتحتة
وشفت رسائل من حبتر دخلت عليهن وقريت
... لوزايتي مثل ما وعدتج جاي وياي الشيخ حظري نفسج خيط جرحي راح يصير التردي
رجفت ايدي وسديت التلفون تقوسن شفايفي بزعل متفاجئة من حالتي مو هذا الي ردتة!؟
انا ردت ننفصل بعد شنو الي اريدة غوشن عيوني بس سرعان ما منعت ادموعي تنزل
رفعت راسي الهم وحجيت بصوت بي رجفة
روح.. هلاك راح يجي يطلكني
رفع عمو باسل راسة واردف
باسل... عمو انتم كبار اذا شفتو انفصالكم مناسب الوضعكم انتم بعد ادرة
هزيت راسي وما انتظرت احد يحجي كمت بسرعة وصعدت فوك سديت الباب وادموعي نزلن قطرات منهمرة على خدي بلعت ريكي وضليت اروح وارجع ما اعرف شسوي فتحت شالي وشمرتة حكيت شعري بقوة وبهستيرية وصحت
روح.. ليشش اطلكنيي ليشش
مااعرف شصارلي بس احس اختنكت انتهيت اريدة وما اريدة رحت للحايط وضليت اضرب راسي بقوة واصيح
روح.. ما اريدة دمرنيي خليي يوليي ماااريددد
شهكت وكعدت بالكاع ولميت رجلية الصدري
روح.. بس هوا كال انا احبج هوا يحبني ليش يطلكني
بجيت بصوت عالي واحس تربطت ووصلت للنهاية انا وياه خلاص طريقنة انتهى
منين ما اجيب باب ننجمع بيه ماينفتح
من جهة ما اكدر انسة شنو سوة بية ولا هوا يكدر يقتنع انا مالي علاقة بأختة
اندك الباب وحجت ترف
ترف... اجة هلاك
مسحت ادموعي وبللت شفتي لميت شتاتي وكمت بصعوبة شمرت الشال على راسي وجسمي كلة يرجف فتحت الباب ونزلت رجل تتقدم خطوة ورجل ترجع الف خطوة راح يحرم علية!!... ماراح يلمسني بعد راح يبتعد عني! ماراح يحضني راح يتزوج وحدة ثانية ويسويلها نفس مايسويلي يسولف وياها
نزلت جوة واتلكتني عمة باوعتلي بتفحص واردفت
أمل.... اذا تحبينة ليش تطلكون؟
احسها داست على جرحي بهذا كلامها شهكت ونزلن ادموعي فركت ايد بأيد بتوتر وحجيت
روح... لا ما احبة ولا يحبني
هزت راسها واتنهدت واشرت على الديوانية
أمل... روحي الهم ينتظروج هناك
هزيت راسي ومشيت بأتجاه الديوانية بجسم هزيل تعبان ما اتحمل كسرة ثانية ليش يكسرني
دكيت الباب ودخلت رفع راسة وباوعلي بغصة بكسرة بندم عيونة حمر وايدة ترجف عروق رقبتة واضحة بلع ريكة واتحركت تفاحة ادم يباوعلي بنظرات حسيت يريد يشبع نظرة بية انتبهت الايدة بيها جكارتين وكوة كاضهن مسح على وجهة ووجه كلامة العمو
الحبتر... من رخصتك اريد روح احجي وياها شوية
هز راسة عمو واردف
باسل... حلالك بعدهي
التفتلي عمو واشرلي براسة
باسل.. روحي عمو للصالة
فتحت الباب وطلعت رحت للصالة شوية ودخل هلاك وسد الباب
اتقدم يمي وفتح ايديه الترجف الي ركضت الة وحضنتة بقوة لف ايديه علية ويرجف وانا بس اشهك حجة بصوت مبحوح
الحبتر... كاسرتني روح مو كلتي عساك بخسارة ما تتعوض هاي اليوم خسرتج وبيش اعوضج!
ضميت راسي برقبتة وابجي ما اعرف شنو اسوي بعدني عنة واخذ شفايفي بقوة الرجفة اعتلت جسمي وسكنت بحضنة حضنتة اكثر وهوا يريد يدخلني بداخلة حسيت بقلبي رجف من قوة بوستة
وكف عن الحركة وضل بس مخلي شفايفة على شفايفي ومغمض عيونة جفونة يرجفن بتعب ابتعد عني وهوا فتح عيونة رفع ايدة وخلاها على خدي مرر اصبع الابهام على خدي بحنية نزلت دمعتي وهوا بلل شفتة واردف بصوت يرجف
الحبتر .... روحي لوزايتي شكد اتمنيت مو هيج نهايتنة تمنيتج تضلين وياي وبسدي اتعب بدونج انه
شهكت وبجيت بصوت وحجيت
روح... دمرتني هلاك
الحبتر.. ارجع اصلح الدمرتة
روح..فات الاوان حبتر مايتصلح بعد
بلل شفتة وسحبني الحضنة مرة ثاني
روح... ليش سويت هيج هلاك ليش
ماجاوبني بس جسمة يرجف قيدني بحضنة وسحب شالي وخلة وجهة برقبتي وغنة برجفة
الحبتر... كل يوم احبها اكثر بلياها ما اكدر
وياها روحي تروح ابالي كل ما اتمر
راسمها انه بالعين مغطيها بالرمشين
مسميها "روح الروح"
شهكت ونزلن ادموعي حسيت بلل برقبتي عرفتة عيونة دمعن رفع راسة وهوا عيونة حمر كض وجهي بأيديه واردف
الحبتر.. "تارسني الندم "
حجاها وباسني بعيوني
ومشة بية للقنفة وكعد وفتح رجليه وكعدني بيناتهن صار ظهري على صدرة بحيث احس بالنفس من ياخذة
الحبتر...غلطان وياج انه لوزايتي شلون اصلح الغلط
ماجاوبتة بس ضليت اسمع دكات قلبة
الحبتر.... بشنو اعوضج وانتِ ثاني خسارة الي؟
شهكت ونزلن ادموعي
روح...ما يتعوض حبتر الاخذتة مني ما يتعوض
باسني بكفتي وحجة
الحبتر...ارجع ابني كلشي هدمتة
هزيت راسي بلا واردفت
روح... لا تحاول ما راح انسة ربع السويتة بية
الحبتر... لا تنسين ولا تسامحيني بس رجعيلي!
غمضت عيوني بدموع وسكتت مد ايدة الشعري وفتحة اخذ نفس بعمق واردف
الحبتر...شحلاة ريحة شعرج عبالك ريحة امي الماشامها
سكتت ما جاوبتة لف ايديه على خصري واردف
الحبتر... يا ثاني وردة تنكطع من بستاني..... سكت ورجع غنه.... يا حبيبي ويا حياتي ما الي غيرك حبيب لو تغيب شوية عني انه احس روحي تغيب
انه احبك انه اريدك يا حبيبي روحي بيدك
سكت وجر نفس بصعوبة التفتت الة واردفت
روح.. اكرهك حبتر
بلع ريكة وما جاوبني
شوية وحجيت
روح... شنو معنى الرمز الي دكيتة الي؟
اتنهد واردف
الحبتر... جميع كسرات حبتر موشومة على صدر روحة اول 8 هيا موت امي
1986/8/8
والثاني هوا اول حرف من اسمج روحي لوزايتي عين عيني
وثاني 8 هيا موت موج
2018/8/8
واخر شي حرفها
كمل كلامة و بعد ياخة التراك وباس الوشم رجف جسمي بين ايديه
دار وجهي الة كضني من حنكي ودنك باسني باوع بعيوني واردف
الحبتر... احبج عين عيني
رفعت نفسي الة وبستة بشفتة وابتعدت واردفت
روح... اكرهك بكد حبك الي
سكت وابتسم استفزني ودفعتة وكمت من حضنة
روح... اطلع يلا امشي طلكني
اتنهد وكام واردف
الحبتر... متأكدة روحايتي؟
هزيت راسي وهوا اردف
الحبتر....يجرالج التردي مالكة روحي... انتظرج بالديوانيه
فتح الباب وطلع وانا انهاريت ما ادري شسوي شلت الغراض كلهن وشمرتهن جسمي كلة رجف ضغطت على اسناني بألم وجريت شالي شمرتة على راسي وطلعت دخلت يمهم وكعدت يم عمو ضليت اهز برجلي بتوتر وحتة ما باوعت الة بعد مدري شنو همسلة خنجر وهز راسة ضل الشيخ يحجي بس بالي مو وياه وبس افرك بأصابعي حجة وكلي ارد وراه رديت وراه الي كاله ثلاث مرات وحبتر همين اخر شي كلي ارفع راسي واباوعلة رفعت راسي وباوعت بعيونة وانا قلبي مكسور بس ظاهري قوي باوع بعيوني واردف
الحبتر... انتِ طالق
بلعت ريكي وكمت طلعت برة ركضت صعدت فوك وسديت الباب مو مصدكة الي صار
طلكني؟ هلاك طلكني وبسهولة عندة
هيج انا ما اعنيلة وطلكني شمرت شال واتهسترت ما اعرف شريد اسوي اريد اروح بس ما اعرف وين اريد اخلص ما اريد اشوف احد
مابية حتة ابجي ادموعي مانزلن حتة النفس متعاجزة اخذة حسيت هاي نهايتي بداخلي تناقض ما اكدر اوصفة انطفة شعور بداخلي تجاه الحياة وتجاه كلشي
ماعندي شغف اعيش بالحياة والمن عايشة؟ خسرت هواي ومااريد اخسر بعد او بعد شخسر؟ هوا انا شضلي بعد؟
خسرت هواي حتة روحي خسرتها
زاد التعب علية بس حاولت اتماسك الخاطر ترف لأن تحتاجني بهيج ايام ضلينة نطلع كل يوم نتسوك الها وهيا ذوقها صعب بحيث كلساع اريد اكب بوجهة ومن جهة علي مايخلينة ندخل للبيت اذا مايعقمنة من راسنة الرجلينة
رجعنة للبيت بوقت متأخر غسلت وفرشت وسديت الباب ورحت اتمددت فتحت التلفون ودخلت على الواتساب على رقمة انتظر رسالة منة بس مايدز شوية وطلع متصل ضل هيج انا انتظر منة وهوا اعتقد هم ينتظر مني شوي وطلع من الواتساب دقايق ودزلي اغنية
الحب مالي
غطيت نفسي بالبطانية وشغلتها وانا ادموعي تنزل وحدة ورة الثانية كأنهن ينتظرن اشارة مني بس كل كلمة من الاغنية جانت تعنيلي هواي اتخيلة هوا يغنيها الي وبصوتة وبحنيتة وبحتة
لا متغيب لحظة وحدة عن بالي
راح اتضل كل عمرك الحب مالي
وية الروح حبك ساكن بروحي
شنو جروح انسة بحضنك جروحي
انسة الكون من اشوفك كبالي
راح تضل كل عمرك الحب مالي
لا ماتغيب لحظة وحدة عن بالي
راح اتضل كل عمرك الحب مالي
عشت بيك شلتك عمر بثيابي
اذا اموت احبك واني بترابي
صعب حيل عنك افترك اني
لك للموت احبك مااحب ثاني
الاول حبيبي انتَ والتالي
ولا شي عنك راح يبعدني
ولا اخاف من شي دامك تحبني
احس بيك اماني وراحتي وحبي
وحبك نور للابد كلبي
اشمكتوب تبقى على الكلب غالي
راح تضل كل عمرك الحب مالي
شهكت وكمت من مكاني بسرعة شغلت الضوة واتصلت بيه من اول رنة رد صحت بيه بهسترية
روح... ليشش ادزليي ليشش هلاك متعمدد تذكرنيي بيكك لوو شنووو؟ كاافي طلكتني اطلع من حياتي مااريدككك كافي لاا ادزليي شييي اكرهكك لاتحاول مااحبكككك مااريدددك
سمعتة جر حسرة راد يحجي وسديتة بوجهة ذبيت التلفون على الچرباية وطلعت للسطح باوعت للسما وصفنت بيها لمعة النجوم صارت بعيوني نزلت دمعة منهن
ضليت شوي صافنة على السما الحد ماحسيت الوقت اتأخر دخلت جوة سديت بابا السطح ورحت الغرفتي شفت تلفوني يهتز مشيت ببطئ الة واتنهدت واخذتة جاوبتة بتردد وخليتة على اذني اتنهد وسمعت طكت الجداحة اردف بصوت تعبان وبي رجفة
الحبتر.... لوزايتي اتزيدين تعبي بحجيج هذا ماناقصني تعب انه بداعت روح اختي تعبان اضحك واسولف بس مانسيجن صاير بين نارين شسوي بروحي انا؟ كل مايجي شعور الشوك الج اكره روحي شلون احب بت سلمان
عضيت على شفتي من نبرة صوتة وحزنة الواضح يحجي بنبرة اول مرة اسمعها منة اجيت احجي بس استرسل هلاك بكلامة
الحبتر... تدرين لوزايتي متأكد مية بالمية لو انتِ مكاني ماجان حبيتيني وجان سويتي اكثر من الي انه سويتة
ابتسمت بوهن واردفت
روح.. غلطان حبتري كلش غلطان ياما ناس اذوني من عمامي وسلمان وشيل ايدك بس ماأذيتهم وتعال شوف حالهم وحالي منو المتعذب بحياتة غيري؟
الحبتر... تبقى يمج انتِ اذا تردين تعقابينهم او لا
روح... قصدك تبقى يم ضميري
سكتنة اثنينة وضلينة نسمع بس انفاسنة كعدت على الچرباية واتذكرت سؤال كان ابالي
روح... هلاك
الحبتر.. عين عينة
روح... عادي اسئلك سؤال
الحبتر... الحبتر واجوبتة كلها تحت امر لوزايتي
ابتسمت وضغطت على تشيرتي وحاولت اقوي نفسي حتة اسئلة هذا السؤال حجيت بتردد
روح.. من اتقربت الي وانا ماقبلت انتَ كلت اعرف بكلشي هلاك بشنو تعرف؟
سكت ماجاوبني ورة دقايق يلا حجة
الحبتر... لوزايتي كلشي اعرف عنكم
روح.. منو كلك؟
الحبتر.. سلمان قبل لا يموت
روح.. كلشي كلشي كلك؟
الحبتر.. اي لوزاية كلشي
حجيت بحماس
روح.. حتة قبر امي كلك وين؟
الحبتر.. لا ما سئلتة
اتنهدت وخابت امالي واحلامي ان ازورها عم الهدوء بيناتنة حسيت بيه بالكوه يجر نفس انتفضت بسرعة وسئلتة
روح.. شبيك هلاك
اردفت بصوت زرف قلبي زرف وهد حيلي
الحبتر.... تعبان لوزاية حيل تعبان
بلعت ريكي ومن غير تفكير حجيت
روح.. تعال يمي حبتر
الحبتر... هسة؟
باوعت للساعة
روح.. اي هسة راح افتح باب السطح
سديتة بسرعة ورحت فتحت الباب مالت السطح ما اعرف شبية بس اجاني شعور فرح راح اشوفة ركضت للمراية وانا مااعرف شنو جاي اسوي واعرف غلط بس متغاضية عنة وتصرفاتي بهذاك الوقت ما جانت ناتجة عن تفكير بسبب الظغوطات الصارت علي اي احد يحجي وياي يحسني مخبلة او عقلي مو وياي وبالظبط هذا الي صار بهاي الفترة اي تصرف اتصرفتة ناتج عن سرعة...عدم تفكير بالحلال والحرام...عدم تفكير بنفسي...
فتحت شعري ومشطتة وباوعتلة بالمراية طايل صاير يتعدة وركي ابتسمت ولفيتة وشمرت الشال بأهمال رشيت عطر واجت عيني على اقلام الحمر مديت ايدي بتردد الهن بس بعدين ماخليت حسيت مايحتاج باوعت للساعة بحماس وضليت انتظرة بباب السطح وكلساع اتلفت خاف واحد يطلع انتبهت اليدت الباب مالت غرفة علي تتحرك بسرعة طلعت للسطح وسديت الباب بس ماغفلتة ما احس الة واحد وراي غمضت عيوني واستنشقت عطرة ابتسمت والتفتت الة بهتت وجهي من شفتة متغير حيل ووجهة ضعفان وبشعرة كم شيبة بلعت ريكي واردفت
روح... شلونك
مال راسة وباوعلي بحنية ولمعة واضحة بعيونة
الحبتر...شتشوفين شلون حالي بدونج
ملت راسي نفس حركتة وباوعت بعيونة شال ايدة وخلاها على خدي بس بتردد قربت خدي الايدة مشة اصبع الابهام واردف وهوا يتفحصني
الحبتر... حليانة لوزايتي هيج فراكي سهل عندج
روح.. و اسهل مما تتصور
هز راسة واردف
الحبتر.. المهم مرتاحة حتة لو بدوني
كضيت ايدة ونزلتها عن خدي
روح... اروح اشوف الطريق حتة ندخل جوة
هز راسة وانا رحت فتحت الباب على كيف ومديت راسي باوعت للممر فارغ التفتت الحبتر واشرتلة يدخل
مشة بأتجاهي ودخلنة سوة رحنة الغرفتي دخلنة وسديت الباب وغفلتها
كعدت على جربايتي واتربعت رفعت نظري الة واشرتلة على فخذي واردفت
روح... تعال نام
بلع ريكة وباوعلي مامصدك الي حجيتة اشرتلة بعيوني طمنتة اتنهد وكعد على الچرباية وخلة راسة على فخذي شال ايدي وخلاها على شعرة ضليت احرك بيها والعب بشعرة دنكت عليه وبستة بجبينة ورفعت راسي
الحبتر.. روحايتي اتعب انه هيج
روح.. اتعب اكثر
ماجاوبني ضليت احرك ايدي على شعرة وهوا سنح بحضني دنكت يم اذنة وهمست بفحيح
روح... تدري انتَ نايم بحضن بنت سلمان
غمض عيونة وانا ابتعدت لم شفتة للداخل واردف
الحبتر... مالكة الروح والكلب لا تحاولين مااكرهج
سكتت وباوعت الرجليه وابتسمت اتذكرت من حجالي القصص
روح... حبتوري راح احجيلك قصة الطنطل
ابتسم واردف
الحبتر... كُلي آذان صاغية
روح.. اكو واحد اسمة طنطل يشبه الطرطيع عندة رجلين طوال كلش تقريباً بطول رجليك
ضل يهتز ويضحك بس بدون صوت باوعت الخشمة واردفت
روح.. وعندة نفس خشمك هيج حلو ونفس اصابعك بس شنو هوا كلش وصخ وحتة ريحتة مو حلوة
كض ياخة قميصة وشماها رفع راسة الي واردف
الحبتر.. انجبي رويحة حلوة ريحتي
روح.. اششش خلي اكمل.. اي وعندة رموش حلوات واسنان انظاف بس هوا وصخ مايسبح اي وايديه طوال ويشبه الطرطيع وشفايفة حلوات واجلح املح واسمرر اي وهذا الطنطل يطلع بس بالليل وينام بحضن البنات الحبابات
وهوا صوتة خايس يلعب النفس وبطنة بيها طسات وخطة يلعب النفس ويشبه البعير ورجليه هالطول الوحدة بطول النعال ومن يمشي يصير زلزال بالكاع وبس يمسلت
الحبتر... عين عيني جاي توصفيني لو توصفين الطنطل؟
دنكت عليه وضحكت
روح... جاي اوصف هلاك
ضحك واردف
الحبتر... جا هذا يا ك*** يمج
ضربتة على راسة وصحت
روح.. ليشش تغلطط؟
الحبتر... اسف بعد ما اعيدها
روح.. عفية صير خوش بشر
الحبتر... صار لوزايتي بعد اكو شي
طكيتة على راسة وصحت بحماس
روح... نسيتتت ماكتلتتت
كض راسة وعبس وجهة
الحبتر... شنو ولج
روح.. اختي راح تتزوج
رفع حواجبة واردف
الحبتر... منو هيا ترف؟
روح.. اي ولك شبيك انثولت ليش عندي وحدة ثانية غيرها؟
رجع راسة الحضني واردف
الحبتر.. ومنو تتزوجة
روح.. علي
جر زيج وحجة
الحبتر.. مالكيتو غيرة عاد شلون اثنين عفطية
روح.. لا تحجي عليهم ترا راسك بحضني اكسرة هسة
الحبتر... عين عيني شبيج وية راسي شمسويلج خلي نتفاهم ليش تكسرينة؟
روح.. ثكيل بكد راس البعير
الحبتر... ميخالف عاجبني
روح.. وانا ما عاجبني غيرة جيبلك راس ثاني وخليه ابدال راسك
الحبتر.. غصباً عليج يعجبج وترضين بيه مثل ما انه راضي برجليج الملح الجلح انتِ ترضين براسي
شلت رجلي ودفرتة بكتفة ابتعد كاض كتفة بألم وعابس وجهة حجة من بين اسنانة
الحبتر....مو رجل عبالك چاكوج
ضحكت ومسحت على رجلي بفخر
باوعت الة يضحك ويباوع الي اتقدمت يمة وكضيت
خدودة وجعصتهن
روح.. كول اغووووو كول بابا كول روح تاج راسي
ضحك واردف
الحبتر.. كول شمنوجة كول روح تاج ط***
ضربتة راجدي على كيف
روح... اتأدب
ضحك بصوت عالي وهز راسة
روح.. فضحتنة الله يفضحك
شفتة عينة على شالي بلع ريكة ومد ايدة للشال بتردد فتحة وشمرة بعيد وفتح شعري وفرشة على كتفي واردف
الحبتر.... شعرج حلو
باوعت الة وانتبهت الراسة ابتسمت وحجيت
روح... حتة انتَ راسك حلو مالك سحك وتفليش... اكلك حبتوري نام وخلي اكوم ادوس على راسك حباب حتة من اصلي ادعي كون امك تخصر اذاناتك
الحبتر... ادري شنو امج مرضعتج حليب مالت رفس مشاعر ساعة راسي ساعة اذاناتي
روح... يلا حباب عفية الله يخليك ويسلمك ويسعدك ويوفقك يارب العالمين اللهم صلِّ على محمد وآل محمد كلللوووش
هز ايدة وباسها وخلاها على كصتة واردف
الحبتر... مو صاحية
روح.. ميخالف
ضحك واتمدد وانا كمت مسحت ايدي بحماس وصحت
روح... سوف يتم السحق على رأسك من قبل لوزايتك
ضحك ومبين ايسايرني رفعت ارداناتي ودنكت على البجامة رفعتها وصلتها لركبي طكطت اصابعي ورقبتي وصوفرت
رفعت رجلي اريد اسحك عليه ما احس غير جرني من رجلي وكلبني عليه صار وجهي يم رجليه ورجلية يم وجهة اجيت اتحرك وما احس غير صاح
الحبتر... ولجج وجهي رفستينيييي برجلج
كمت كعدت بصفة وانا اضحك وامسح ادموعي ضل متمدد وايديه جوة راسة
روح.. غشاش ليش جريتني
الحبتر... انجبي مو غشاش اكبر منج انه
روح... جا واذا
الحبتر... هسه شستفاديتي من خليتيني اطلكج؟
ضحكت وسويت نفسي خجلانة واردفت
روح... راح اتزوج
ضحك وحجة
الحبتر...ياهو الراح يتزوجج؟
دنكت راسي وفركت اصابعي ببعض
روح... عمو باسل خطبني الابن صاحبة
الحبتر... صدك!؟
روح... اي وهذا اسمة حلو مو نفسك
الحبتر... شسمة؟
روح... اسمه عباس و ادلعة عبووسي
الحبتر... ها
روح.. اي... وشسمة النوب هوا يبوسني مو انتَ
سكت من شاف الموضوع صار جدي مد ايدة الجيبة وطلع جكارة ورثها وخلاها بين شفايفة سحب نفس ونفخة واردف
الحبتر... وبعد؟
روح... اي وباجر يجي يشوفوني وانا البسلة بنفسجي
الحبتر.. وينطيج كلبج يجيسج واحد غيري!
سكتت وشوية رجعت حجيت
روح... كلشي يجيبلي حتة لعابات انيمهن على الچرباية بوسطتنة
الحبتر.. خوش من يجي عزميني حتة اتعرف على عبوسي
روح... كلش حلو عمو شوفني صورتة حتة انتَ من تشوفة تتمنى تزوجة
ضحك وسكت بس امبين ضاج مديتلة اصبعي الصغير واردفت
روح... خلي نتصاحب
مدلي اصبعة واحتضن اصبعي
الحبتر... احنا حبايب ما نتعارك
سكتت وضليت اباوع الة وهوا يبتسم
روح.. اكلك عود ليش سموك حبتر
حك ارنبة خشمة وضيق عيونة واردف
الحبتر... ليش هذا السؤال
روح.. جاوب وجه الطرطيع
الحبتر... ثعلب الحبتر ماكر ماكر ما الة آمان
روح... جا انا سامعة معناه اسم الامام علي عند الزنج
الحبتر... الة معاني هواي
هزيت ايدي واردفت بأستهزاء
روح... هوا انتَ عركة بعقلك ماعندك ومسمينك حبتر؟
غمز وعض على شفتة واردف
الحبتر.. منو الضحك عليج ببوسة وخلاج تذوبين بحضنة؟
روح.. عساها بوست السودة
الحبتر... تعاي نعيدها هسة ونسويها بيضة
روح... لا ونام يلا دللول نام وليدي حتة من تكعد انطيك جبس
ضحك واهتز صدرة
الحبتر... نام لايجيك العوو
روح.. اي العووو ياكلك ولو هوا بس يشوف رجليك يشرد
الحبتر... رفستي مشاعري
روح.. ارفس راسك اذا تريد عادي ما عندي مشكلة
الحبتر.. ليش تردين ترفسيني؟
روح.. لأن حلو
رفع حواجبة بتفاجئ وصاح
الحبتر... ااااا انه حلو؟
روح.... صح حلو بس وصخ ماتسبح وشعرك بي كمل ولحيتك همين
الحبتر.. شسالفة لوزاية ترا مو الهاي الدرجة انه وصخ ادري شنو حمام انتِ وتعرفين شكد ادخل باليوم
روح...لا تحجي وية خنجر بعد
الحبتر.... ميخالف
روح.. من تشوفة اتفل عليه
اشر على عيونة واردفت
روح... وحتة ديسم خلي يولي
الحبتر.... يروحلج فدوة
روح... وامك
قاطعني وخلى ايدة على شفتي وصاح
الحبتر.. لا عيب امي هاي
بعدت ايدة وكلت
روح... هم صدك حلوة هيا حبيتها ودجاجهة حلو و حتة لمعان وامواج حلوات بس انتَ مو حلو
الحبتر... انه من كد ماحلو من صرت يلتم علية الذبان
روح.. جا شنو زبالة
خزرني وماضحك عضيت على شفتي من حسيت جفصت ابتسمت وردت اضيع السالفة
روح.. وين اكو واحد اسمة هلاك
الحبتر.. وين اكو وحدة اسمها روح
ضربتة بصدرة وكمت نزلت من الچرباية وعيوني دمعن شافني وكام بسرعة اجة يمي ويحجي بلهفة
الحبتر.. مو قصدي والله حلو اسمج لوزاية والله مو قصدي
روح.. ولي منا لاتجي بعد شنو لزكت عدنة هم كاعد على چربايتي وهم اتعيب على اسمي
جرني الحضنة وباس راسي واردف بحنية
الحبتر.. جا لوزايتي صارلج ساعة رافسة مشاعري وما خليتي شي ما اتنمرتي عليه بس الماطور وانه بالعهة وساكت
رفعت راسي ومسحت لدموعي
روح... انتَ ماعندك مشاعر حتة ماتضوج
بلع ريكة ومسح ادموعي
الحبتر... ميخالف مسعورتي الاحبهة احبج انه شعندي غيرج
روح.. لا عندك
الحبتر.. منو منيلي ولج
روح.. عندك خنجر
ضحك وكرص خدي
الحبتر.. شجلبتي بيه خلي يولي
سكتت وضليت بس خازرتة جر خشمي وحجة
الحبتر....لوزاية اريد الاوراق الاخذتيهن ترا شغل اخواني نصة بالاوراق اذا انتِ حتة الورقة مالت جامعة لمعان ماخذتها
روح..انساهن بعد راح ابيعهن لأبو الحب يخلي بيهن حب لو ابو الفلافل احسن
رفع حواجبة وصاح
الحبتر..انجبي روح انطيني بس اوراقهم عوفي اوراقي عندج
روح..جؤ انساهن حبتري
رفع نظرة للساعة باوعت الها وياه شفتها ب 3 ضبط التفتت الة وحجيت بضوجة
روح... راح تروح؟
الحبتر.. اي لوزاية اتأخر الوكت
كضيت ايدة قوي واردفت
روح... ضل هنا
هز راسة بلا وبلع ريكة هوا يباوع الي ونظراتة تتجول بوجهي
روح.. الخاطري حبتر ابقة
الحبتر.. لا لوزتي بندقتي ما اكدر اصلاً جيتي لهنا غلط
عفت ايدة وابتعدت عنة لم شفايفة للداخل واتقدم يمي رفع ايدة يريد يحضني وانا رجعت ليورة مانعتة يجي اتنهد ودار وجهة وطلع برة الغرفة
••••••••••••••••••••
لمعان
نزلت جوة افتر بالبيت واتأكد من الطباخ مطفي او لا اتأكدت من المطبخ وطلعت منة سمعت صوت خطوات من الدرج التفتت شفتة حبتر مبدل ومبين يريد يطلع انتبه الي وابتسم اجة يمي وحجة
الحبتر.... بعدج كاعدة لمعة ليش مانايمة
لمعان... هسة انام بس وين طالع بنص الليل
الحبتر... عندي شغل... اجة يروح ورجع يمي يوصيني.... امواج ضلت نايمة بغرفتي قبل لا تنامين روحي شوفيها ماشي بناتي؟
هزيت راسي وهوا راح التفتت وراه وافكر وين رايح بنص الليل والوقت متأخر
صعدت فوك ودخلت الغرفة هلاك باوعت الامواج نايمة طلعت وسديت الباب رحت الغرفتي وغفلت الباب كعدت على الچرباية واخذت التلفون اتصلت على خنجر سداه ودك كاميرة كمت بسرعة لبست بشت فوك ملابسي لأن اتراكي نص ولبست شال
ورجعت كعدت فتحت التلفون وثبتة على المخدة غرفتة ضواها احمر وما اشوف واضح بس هوا كاض جكارتة بأيدة وتلفونة بأيد الثانية ومتمدد على ظهرة
لمعان... ماتشغل ضوة بي حظ شنو هالفكريات هاي
خنجر.... خاف تشوفيني عدل وتحسدين جمالي
لمعان.. غديي من لوك جمالك عاد
خنجر.. غير اطك بالكاع واشك سلمان
لمعان.. شنو هاي الثقة
خنجر...**** ثقة انه
عبست بوجهي لعبانة نفسي غميتة واردفت
لمعان.. عابت شنو هاي الالفاظ
خنجر... هسة شكايل شنو قابل بس انه ****
حجاها مرة ثانية اخذت التلفون وسديتة بوجهة رجع اتصل مارديت عليه ضل يتصل هواي يلا جاوبتة ثبتت التلفون وصحت
لمعان.. اذا حجيت حجي مالت مو خوش ناس اسد التلفون
خنجر... صار مااحجي بعد.. ماكلتي حبتر ودودو وينهم
لمعان... دودو نايم وحبتر هسة طلع ما ادري وين راح
خنجر.. اكيد يم لوزتة
عقدت حواجبي بأستغراب واردفت
لمعان... منو هاي؟
خنجر... روح
لمعان.. هااا زين هما هسة علاقتهم صارت طبيعية مثل اي زوج وزوجة؟
اتنهد وشغل الضوة كعد اتربع وثبت تلفونة
خنجر.... لا عالجوتي بيناتهم فجوة جبيرة مااعتقد تصلح وحتة لو اتصلحت محد منهم ينسة الصار لا روح تنسة الي سواه بيها ولا حبتر ينسة الي سواه سلمان
لمعان... شنو سوالها هلاك؟
خنجر... كولي شنو الما سوالها زين ومنها اجت تضحك وياكم وتسولف لو غير وحدة تشرد بروحهة العزيزة بس البنية فطيرة والواضح هلاك ماخذها بكلامة الحلو انه بنفسي ضجت من هلاك من سولفلي شنو مسوي بيهة
صفنت محتارة من كلامة رجع كمل
خنجر.. المهم هما هسة اطلكو
رفعت حواجبي واردفت بتفاجئ
لمعان... يااا
خنجر... اي
بلعت ريكي وسكتت ما اعرف شنو احجي بس من جد من اجتنة البنية مبينة تعبانة وحتة من تضحك انحس بضحكتهة اكو كسرة حاولت اغير الجو الضوجة الي صار ضحكت وحجيت
لمعان.....وجهك جنة مخبازة
خنجر... اهو انتِ مخبازة وحبتر ط** هايشة شبيكم وياي
لمعان... هاي لأن انحبك
فتح عيونة ورفع حواجبنة وصاح
خنجر... منوو يحبني؟
لمعان.. حبتر يحبك شبيك
خنجر... لا كلتي انحبك
لمعان.. فوك ما وجهك جنة مخبازة واطرش النوب
خنجر... كافي تعبت نفسيتي من التنمر
لمعان.. اوديك الشيخ نفسي؟
مسح على وجهة بنفاذ صبر اني من احجي هيج وياه اتشاقة اصلاً وجهة مناسب الجسمة وخاصتاً كصة شعرة وطبرت حاجبة كلش مناسبة وحلوة عليه
لمعان.. يلا يلا لاتضوج ما اعيدها بعد... سحبت اكنسس وانطيتة الة... هاك امسح ادموعك لا تبجي عيب صرت رجال كبير
عض على شفتة واردف
خنجر.. و أذي هم
مديت ايدي اريد اسدة صاح
خنجر... سكتتتت عووفيه لا تسدين التلفون
هزيت ايدي واردفت
لمعان.. الفاظك صايرة تلعب التفس اذا ضليت هيج تنسه بعد احجي وياك
ضحك وسكت واني هم سكتت بلعت ريكي واردفت
لمعان... خنجر تدري الجاي نسويه غلط
اتنهد وحجة
خنجر... ادري
لمعان... خنجر اني كل ما اراسلك ما ارتاح شعور مو حلو يجيني اخواني من جاي احجي وياهم جاي اتوتر بالكلام ما اريد اخون ثقتهم
خنجر.... عالوجتي لا تتوقعين انه هم مرتاح تدرين ديسم صارلي فترة ما ملتقي بيه عيني ما اخليهة بعينة لو الحبتر الي شاك بس جاي يختبرني
رفعت حواجبي بصدمة وصحت
لمعان.... حبتررر شاك بيك؟
خنجر... اي جا قابل مخليني ادخل البيتكم خالي بلاش؟
ضليت صافنة وافكر اذا هلاك صدك شاك لو عرف شيصير بللت شفتي ورفعت عيني الة شفتة تركيزة علية
لمعان... خنجر
خنجر...عيونة
بلعت ريكي ولميت شفتي للداخل اتنهد وحجيت
لمعان...خنجر ما اريد احجي وياك بعد ما اكدر اخون اخواني
خنجر... وشلون افارك صوتج وعيونج عالوجتي
لمعان... ما اكدر خنجر لا تضغط علية
خنجر... لمعتي اذا تشوفين قرارج مناسب هذا هوا
بلعت ريكي وضليت اباوع الة دمعن عيوني واردفت
لمعان.. بس هاي الفترة على ما ادور سنة موج
هز راسة وابتسم
خنجر.... اندعي لمعتي يمكن انتِ اقرب مني لله بلكي يستجاب دعائج وننجمع سوة
بادلتة الابتسامة وضل يسولف الي عن يومة واني اسولفلة عن اخبار البيت هوا كلشي ماعدنة بس اسولفلة شنو طبحنة وشنو اكلنة وهوا يستمع الي
الحد ما اندك الباب ارتبكت حيل كبل سديت التلفون وضميتة نزعت البشت والشال وشمرتهن جوة الچرباية جريت نفس وفتحت الباب شفتة هلاك راجع وشكلة تعبان حيل اخذ نفس من الجكارة وضيق عيونة واردف
الحبتر.. شعندج كاعدة؟
حاولت ما ارتبك بس هلاك يلكف الشغلة بسرعة جاوبتة
لمعان.... مانعسانة
هز راسة يتوعد
الحبتر... سهلة
دخل الغرفتي وكعد على چرباية موج باوع الارجاء الغرفة ورجع ثبت نظرة علية اردف بتعب
الحبتر... لمعة اريد انام هنا روحي نامي يم امي لو يم امواج
هزيت راسي واخذت مخدتي وتلفوني اجيت اطلع بس صاحلي التفتت الة وباوعت لعيونة باهتة وتعبانة
الحبتر... لمعة اكو شي بينج وبين خنجر؟
هزيت راسي بلا وطلعت من الغرفة نزلن ادموعي ومسحتهن بسرعة شسويت اني شلون اجذب على اخوي شلون
صارت غصة بداخلي شكبرها فتحت التلفون وحظرت خنجر من كل المواقع ورحت نمت يم امواج
ولا زالت الحكاية مستمرة
ملاحظة //
زهـراتي باجر احتمال انزل بارتين او اليوم اذا كملت بارت هم انزلة لأن اريد اكمل الرواية قبل محرم
بنات بنات حيل اعتذر ما اعرف شلون غلطت هيج غلط بس حبتر ما طلك روح بثلاث وهسه انطوني خبر بالتعديل واكرر اعتذاري بس لأن البارت فوك الـ 6000 كلمة خربطت بالمراجعة
اتمتى اتعذروني وما تنعاد مرة ثانيه ♡
تصبحون على خير زهـراتي ♡