روح في بحر الظلام

الحلقة الحادية عشر

روح في بحر الظلام

____ الكاتبة بحر _____

بنات كل اللي تمر من هنا ارجوكم لتنسون التقييم

بالنجمة والتعليق اذا حابين تستمر القصة

⭐🌟⭐

،،،،،،،،،،،،،،،،،،،،،،،،،،،،،،،،،،،،،،،،،،

انما روحي كمن جار الزمان عليه واوجعه

تمزقت تشتت تقطعت

كذبيحة مكتنزة بأياد جزار وقعت

فيا زمان رفقا بقلب فارقه الحبيب وودعه

كلمات بقلم بحر✍️

---------------

رانــيـــــــــــــا

كان وقت العصر قريب ع الغروب، ماما كالعادة تخيط ضهرهه مكسور اديهه توجعهه، وحالتهه النفسية تعبانة بسبب التعب او ل اسباب اخرى،صار صوت مدوي رغم منطقتنا بعيدة عن العشار لاكن الهزة وصلت، عدت دقائق اخرى وتلاها صوت اخر وبعد مايقارب الدقيقتين عاد الصوت بصورة اعلى واضخم

طلعت العالم من بيوتهه بخوف تستفسر عن الحادث، واذا بالخبر انو بالعشار حدثت ثلاث انفجارات متتالية

حالة امي صارت مثل الطير المذبوح تدخل للبيت وتطلع محتارة شتسوي ماكو دموع بس فزع تصرخ

ليلى::أبني.... أبني يمه راح وليدي،يمه منتظر يمه، ولكم وليدي

العالم التمت عليهه يحاولون يطمنونهه ان ماكو شي بس قلب الأم كان حاس، الى أن احد الجيران حجة وياها

::لحضة أم منتظر بس اطلع سيارتي وأنا اخذج

::اي فدوة اروحلك الله يحفظلك وليداتك

كان إنسان صاحب اخلاق ما اخذهه وحدهه اخذ زوجته وياها و وصلهم لموقع الحادث

مواقف انطبعت بعقلي مثل النقش

بقينا بالبيت، رعب خوف ابوي واخوي أيسنا منهم إلانفجار بموقع عملهم ارتسمت ملامح الحيرة على وجوهنا اجت خالتي اجوي الجارات

اخخخخ يالشعور الحسيته كنت مستعدة انطيهم من عمري بس مايموتون كنت ادعي بفزع

رانيا::لا ياربي فدوة والله ما اگدر، انا اسفة ياربي فدوة لا تاخذهم، بعد ما ادعي على احد التوبة فدوة ياربي اخذ من عمري ورجعه

اجت على بالي اللحضات من أمي تأذيني بشدة كنت ادعي ربي يحرك كلبهه مثل ماتسوي بية وادعي على ابوي

تأنيب الضمير اقتص من عافيتي من سعادتي من كلي

عدت الساعات والتمت العالم، هنا ايقنت انو ماتو، وألا ليش العالم التمت، ليش تأخرو وماكو خبر لحد الآن، صار الليل واجا خبر انو عماد لكو متصوب بس منتظر ماكو

أصعب ليلة بلا منازع، ليلة الأنتضار

صار الليل وكانت أمي تدور بين الجثث المحرقة والمقطعة على منو، على روحهه من الدنيا على ابنها البكر

مااااكو منتظر مااااكو بين المحروقين ماااكو بين الممزقين ماكو الة طرف بين اشلاء الشهداء، رجعو للبيت بدون منتظر

الليلة المشؤومة

اتصلو علينة گالو راقبو يمكن شرد ويجي للبيت من يجي منتظر اتصلو علينا گلولنا

الناس جوة تلطم وتصرخ واني وگفت أباب البيت انتضر وادعي

رانيا::يارب فدوة كون يرجع، وارب والله بعد مل اسويله شي يارب بحق الحسين والله اتوبة ما اعيدهه، ياربي اما راح اغمض عيوني وافتحهم اريد اشوفه يجي يمشي،

وغمضت عيوني على امل اللقاء، وما اجا وعدت الكرة وما اجا، جان تفكير طفولي نابع من عجز وقلة حيلة

وبعد ساعات طويلة

رجعت امي وابوي والرجال كانو تارسين بيتنا وشارعنة الكهرباء مقطوعة ليلة مظلمة ليلة انارت الجيران بابنا بأضوية سياراتهم

كنت ابجي ابجي بحرقة وحيرة محملة نفسي ذنب على الرغم كنا متصالحين بس ماشفعلي امام ضميري حتى يوقف عذابي

باوعت من الباب شفت بابا دشداشتة سابحة بالدم وكان ينتحب ويلطم كما النساء يصرخ ويلطم رغم جروحه، وماما وياه

ضليت اصرخ بالباب مستغربة اول مرة اشوف بابا بهالحالة انهاريت ويا

رانيا::ولكم الحكو ابوي راح يموووت ولكم فدوة سكتوو، هسة يجي منتضر يمكن شارد

دخلت امي للبيت والنساء التمت عليهه يحاولون يواسنهه من شافتني صارت عينهه بعيني صفكت ايد بأيد، بصوت مختفي ومبحوح ومليان ألم وحسرة حاولت تصرخ بس صوتهه ماساعدهه

ليلى::ررراح ولج راااح ولج ماكو منتظر

منضرهه وحالهه و وضعهه وهي تشتكلي صابني بحالة هستيرية، مارديت بس قابلهه بصرخات مدوية متتالية ماكنت اسيطر اوقف صراخي اللى ان هي رغم وضعهه سحبتني گعدتني وضلت تردد

ليلى::اسم الله اسم الله يمه علكيفج نلكاه نلكاه بلكي من يطلع الضوة نلكاه يمكن شرد اي شرد وتيه البيت الصبح ندور علي

ماكو نوم ماكو راحة محد يگعد واكفين على رجلينه منتضرين بزوغ الفجر، بابا ابين الزلم صايبته حالة جنون بسبب اللي شافه مفزوع مرعوب

صار الصبح، كلهم رجعو يدورون

مدورين بالموقع ماكو ناقلين كل الشهداء ماباقي غير قطع اللحم المتناثرة

رجعو للمستشفى، يدورون بثلاجة الموتى ماكو، الى ان دخلت امي للثلاجة تدور بنفسهه كانت الناس محترقة مواقف مايتحملهه العقل اشلاء بشرية.

هذا اللي يعرف ذويه من قطعة ذهب هذا اللي يعرف فقيده من وشم او ندبة او جرح اذا ماكو هيج ماراح تعرف فقيدك

حقارة بعض البشر بذاك الوقت صارو يسرقون الذهب والمجوهرات والاشياء اللي تحملهه الشهداء اللي ممكن تكون دلالة ل اهلة، جشعهم وطمعهم سولت لهم انفسهم انو يسرقون الشهداء

دخلت امي ثلاجة الموتى، اللي بيهه امرأة حامل انفجرت بطنها اثر الحرق وضهر طفلها للدنيا ميتا، اللي بيهه تشوف شگد البشر ممكن يكون قاسي بلا حدود

لكت أمي منتظر ميت محروق مقطع احشاءة ضاهرة ل انعدام وجود جلد البطن، لكت الجزء الخللي من الجمجمة ماكو لكت جزء من الضهر مفقود لكت احد كفوف يدية مفقود لكت احد اقدامه مفقود، لكت اعضاءه الذكرية مفقودة

لكته مكرفص ملفوف بكيس، خاطبته بصوتهه المبحوح

ليلى::هااا يمه منتظر اجيتك، وينك يمه ادور عليك من امس لليوم، شبيك يمه ليش هذا حالك، وين هدومك منتظر يمه وين شعرك من فدوة اروحلك يمه يانظر عيني يمه يوليدي الحلو يمه يعزيز كلبي وين رايح ومخليني يوليدي

قاطع حديثه دخول رجل فاقد طفله وكان عمرة من عمر اخوي ونفس حجمة

::حجية هذا ابني شو انطينيا

::شلون انطيكيا وليدي هذا

الرجل ببكاء بحزن::ابني حجية هذا انا ابوه واعرفه شو اطيني بس حل اشوفه

طلعت الهم برا بحالة جنون تستنجد بيهم دخلو وحجو وي الرجال

ضلو يدورون على علامات دالة انو هذا الطفل هو منتظر عرفته أمي لان اكو بوجهه بخشمة ندبة كبيرة ضربة طفل بحجرة شكت خشمة وانوب كاللهم الرجال

::انا وليدي اسنانه اعرفهن فكو حلكة بلكي يطلع هو

فتحو شفايفة المحترقة وشافة الاسنان

ليلى::ولكم ابني هذا وليدي اعرفه شو انطونيا حضنت الشهيد الجريح المظلوم

حجا وياهة خالي

::خوية صدر الأم يدر للمحروق والغريق ديري وجهج وكربي على صدرج

سوت امي مثل ماكال ودر صدرهه لولدهه

راح الوالد المثكول محتار وين يدور مثل هواي ناس مالكو اثر ل اهاليهم

الأنفجار حدث أواخر شهر شعبان المبارك،العالم سعيدة وتتجهز لرمضان والعيد،

الحقيقة مجهولة اذا بابا ومنتظر تصالحو، بس بابا مر بمرحلة جنون لدرجة اكثر من مرة حاول ينتحر

واكفة برا واسمعه يسولف لعمو اللي صار

عماد::منتظر انتا اكعد بيع هنا وانا راح ابيع هنا صيح بصوت عالي حتى العالم تجي تشتري منك

منتظر::بابا شصيح والله استحي

عماد::لك بابا علي صوتك، لا تخلي صوت اهل المحلات اعلى منك زلمة انت شني استحي

كاعدين ونبيع وصار الانفجار اللي استشهد واللي تكطع واللي يوكض والنار شابة بي انا انبطحت وغطيت راسي بأيدي فزعت العالم وركضت بقوة الفتحة الشارع صار الانفجار الاثاني واحتركت المحلات والاطفال اللي يبيعون علاليك وكيك وخواشيك كمت اشوفهم يركضون والنار شابة بيهم

كمت ركضت ادور على منتظر ماكو بمكانة تسودنت عقلي طار من مكانة، ثواني وصار الانفجار الثاني بجهةفتحة مهرب الناس اكو حايط مدرسة انا طفرت الحايط ثواني وطلعت اركض ادور على منتظر وصار الانفجار الثالث للفتحة الثانية مال الشارع صارت مقابيلي صيديلة انفجر جام الصيديلة بوجهي فقدت الوعي لعدة دقائق وكعدت

شكعدت لكيت صاير يوم القيامة

اشوف النسوان تركض محتركة اشوف الاطفال كىمن يصرخ صوبة ولهيب النار كل ماجال. يتقدم وياكل شكو كدامة بشر اركض وادور على ابني بين النيران

الظالمين جانو راشين مادة السيفور المساعد على الاشتعال، والشارع جان مليان عطور وملابش كلشي يساعد ع الاشتعال ف الشارع كلة تحول الى شعلة نار

انا بجبهتي نابته كزازة ماطلعت والدم مغطي وجهي امسحة ويرجع ينزل

وانا اركض ادور بين النيران واشوف جلود البشر ملتصقة بأسفلت الشارع وصراخهم متعالي

لاگاني رجل رجليه متكطعة، كال بصراخ

::فدددوة ابوو الغيرة الحكني لا تعوفني

جانت اكو عربانة مشمورة حطيت بالعربانة وركضت بي وانا اركض ولاكتني النار بكل قوتهه فلتت مني العربانه والرجال بنص النار حاولت اساعدة بكل طريقة ماكدرت حاوطتني النار وشردت اركض وانا اسمع صريخة وراي

شفت يوم القيامة هذا كان يشبه يوم القيامة هذا الحريق المرعب

امي شبه انجنت نكعد بالليل نلكاها كاعدة عيونهه على السقف وحاطة ملابس منتظر على صدرهه جوة ملابسهه وتهز بنفسهه، وبابا مو احسن من حالهه

بقينه فترة كليوم نسمع صراخ رجولي بأخر الليل تكررت الحالة شنو هذا الصراخ

بعدين عرفنه انو رجل ساكن ب بناية قريبة من بيتنه فقد زوجته واطفالة الخمسة اللي رايحين يتجهزون للعيد

بقينه نسمع صراخة الى ان انقطع الصراخ عرفنه انو انتقل من المنطقة

واحنا هم قرر بابا بعد مايكدر يعيش بالبصرة

شهاب::صير زلمة واكعد واستجن وين عايف اهلك ورايح

وبعد حوارت ومشاكل وغصب عنهم انتقلنا لمحافظة بغداد
______

فزيت من صفنتي على دغة مشمش بخاصرتي والدموع بعيني

مشمش::شبيج صارلج ساعة تبجين ماتملين حتى عيونج صارو حمر

ليلى::ياماما كلشي مقدر ومكتوب وقدرج راح تعيشينه والمقسوملج راح تاخذينة، ليش هيج تسوين بنفسج، والله محد يسوى

رانيا::ماما والله. بجيت على منتظر اتذكرت الصار وبجيت مو على نفسي

مشمش::شحال لو ماجنتي انتي وياه مثل العود وضهر الشخاط

باوعتلهه صافنه بوجهه،:: لج هذا اخوي لو نتمالخ نتزاعل نتصالح هو اخوي قطعة من روحي، انوب انتي منين تجيبين هلامثال والسوالف

ليلى مسحت دموعهه::كافي بعد ما اسمع صوتجن السايق غريب عيب

وصلنه قريب من القبر اسمع ماما تمشي وتحجي

ليلى::هااا يمه نظر عيني اجيتك، اجيتك يبعد روحي اروح فدوة لهالنومة

وصلت للقبر حضنتة وتشم بترابة وتبوسة

انا كعدت يم القبر احجي بصوت خافت هامس نفس العبارات اللي ارددهه كلما اجي للقبر

رانيا::هاا منتظر يروحي يا مضلوم سودة عليه هسة لو ترجع والله ولا اخذ الريمونت منك، والله حجيت ويه رب العالمين انطيك من عمري بس ماصارت، ترى احنا متصالحين منتظر وابجي

عماد::شلونك بوية نظوري، السبع البطل جبت اخواتك واجيتك، صاحبك كبر وعرس، هذا صاحبك الثاني اهلة اشترولة سيارة، ليش بوية حرمتني منك ليش شمتت العالم بيه

وكلام وكلام، بعدين قرينالة قرآن ورجعنا للبيت

لكينة زياد متخبل واعصابة محتركة ويلبس ويجهز بنفسه

عماد::شبيك ولك وين مولي

زياد::للبصررررة للبصرة رايح ولو هسة مو تمنعني اروح
واخوك الگ..... لو انا لو هو

____________________

ســــــــــــرى

دخلت وياها للحمام أساعدهه على ألاستحمام، وكنت لابسة كمامة وكفوف ومعقمة كلشي، لان مناعتهه صارت جدا ضعيفة

دفيت المي وعقمتة وجهزت الادوات ورحتلهه بأبتسامة

سرى::يلا يا جلالة الملكة كلشي جاهز

جميلة بضحك::ذكرتيني بمسلسل يسرا من صارت ملكة ءطايحة بالعالم جلالتنا وحضرتنا ههههه

::يرحولج فدوة، يلا عيني كومي دا اطلعلج جلد جديد اليوم

:: شتسوين سوي اريد اطلع جديدة

::اي بعد الحب ورجعلج، ومنطي ذولاك ألناس وضع ال منو شنو ياهو

::يلا لج انتي ماتنعطين وجه ابد، تعالي

كمت ساعدتهه كعدتهه ع الكرسي المجهزتة الهه بالحمام شمرت ملابسهه الخارجية

جميلة::كافي روحي انتي اني اكمل

::ابد ماما ماراح اطلغ اني أساعدج لتخافين ما اوجعج والله

::ماماتي سراوي اسمي مني اني بعد اخجل منج ما اكدر كدامج روحي مابيه شي شويه شويه اخلص

:: ماما شلون تخجلين مني غير اني روحج ومرايتج، وبعدين هياتني مغطيتج ما مكشوفة

وبعد الحاح شديد مني وافقت، وبديت اساعدهه حطيت الشامبو وافرك فروة راسهه واحط مي

فزعت من صار الشعر يجي بأيدي، اعتلتني الرجفة، وتصلبت اديه على راسهه برجفهه واضحه

ماما حست بلأمر مدت اديهه المرتجفة على ادية وسحبتهم ادية مملوئين بخصلات شعرهه الطويلة، كنت موسعه عيوني بصدمة، بس هي هادئة بس عيونهه مليانه دموع، وكأن متوقعه وعندهه خبر باللي ديصير

جميلة::احنا اتفقنا انو شي طبيعي وراح يصير هيج، لا تخافين راح اتعالج ويطلع من جديد،

مدت ايدهه ترستهه مي من البوري وصارت تغسل وجهي وتخفف الصدمة،

::لا تخوفيني عليج انتي حيلي اذا طحتي يروح حيلي

صحت بصوت عالي، وشمرت نفسي على رجليهه

::ماااااماااااا، مااااكااا حبيبتي

::ابجي ياروحي اذا ترتاحين ابجي، عساني فدوة لعيونج ودموعج

رفعت راسي ورديت عليهه بثبات

::اني بعد راح احلق شعري ما ابقي ولا شعراية اصير مثلج، حجيتهه وصرت اجهش بالبكاء

::ازززعل والله يا سوى ازعل، كلشي يصير بيه اني قابلة بس انتي لااا، لاتتمرضين ولا تتألمين ولا يوكع شعرج لعابتي انتي سلوتي انتي لااا اذا تردين تأذيني اذي نفسج

::ماما لعد شسوي والله ما اكدر ابقى هيج ما اسوي شي

::تبقين تهتمين بيه وتساعديني، وديرين بالج على روحج، وهسة روحي برا خل اخلص واصيحج

::لاا ماما بعد ماا....

ماخلتني اكمل ورفضت رفض قاطع ابقى وياهه طلعت من يمهه منهارة بروح منهكة كعدت بزاوية الغرفة على ركبي وصرت الطم بعجز شسوي ياربي دليني على الطريق

خلصت ونادتني بصوت ضعيف

رحت فتحت الباب جانت مخلصة ولابسة وشايلة الشعر حاطتة بعلاكة وتلهث، شعر ماكو بس مغطية راسها بالمنشفة

::سراوي امي عوفي الصفنات وسنديني للغرفة تعبت

هزيت راسي وهمست ::نعيما حبيبتي

::الله ينعم عليج، يلا تعالي سويني حلوة ليجي علي يشوفني مو حلوة، ترا ما اقبل

::يااا انتي مو حلوة لعد اني شنو قرد هههه
::هههههه عيارتج غير قمر انتي تخبلين والله

اخذتهه كعدتهه على السرير ساعدتهه تلبس لبس من اختيارهه، وجبتلهه توربان حلو من عندي ومسحة حمرة، مع اني كنت رافضة لان اخاف عليهه، وتجهزت تنتضر بخوف

اندكت الباب، ركضت افتحهه جان بابا، شفته ابتسمت، بعد جفاء استمر لسنين اول مرا ألّين اسلوبي وياه من شفت موقفه

سرى بأبتسامة::هلو بابا

تفاجأ من تصرفي وراسا حضني::يا روح بابا يعيون بابا انتي

::ههههه باع صلعتك عبالك ركيه خربانه

::خليولي مضوجني من زمان، هاي حتى يدچ النه شعر انا وامج سوة

::منتضرتك اليوم العب بيكم دعابل

ضحكنا ضحكات كاذبة نواسي نفسنه، راح هو دخل لغرفة ماما

اسمع همسات اسمع بكاء اسمع مواساة الى ان صار هدوء، مشيت بهدوء دكيت الباب

::دخلي يابه

دخلت لكيته يحطلهه العلاج بالكانولة وهي متمددة، من خلص باس راسهه

::اجر وعافية يروحي

سرى::بابا شنو هاي لعد اني همات اريد احلق وماما مترضة احجي وياها

::لااا والله چا وهذا الصارلة ساعة حاصرني بالباب يقنعني بشهامتة شلون اقشمره بيج

::ياااا بابا شنو تقشمرة بيه وين يلكة مثلي

ليلى:واللن يا ماما اني وهذا لسانج ما اشوف يلكة مثلج

علي::والله الولد ادمي وصاحب نخوة، ومادام امج تحتاج فرحة نفرحهه بخطبتج

::مستحيل اذا ماتعالجز ماما مستحيل اخطب ولا اتزوج ولا اي شي

ليلى::ليش يا ماما تحرميني اعيش الفرحة، خليهه بس خطبة تسجلي بأسمة وهاي هية، انا ما اريد اجبرج بس هالشي لمصلحتج والله

::ميخالف ماطايرين، هياتنه جيران، واذا مينتضر الله ويا

تركوني بكيفي، بس ادري ماما اذا براسهه خطة بطريقة او بأخرى لازم تنفذهة

جهزنة العشة تعشينة ورحت لغرفتي

اتصلت على رقم خالة ليلى احجي ويه رانيا، تعذرت وكالت نايمة ، سألتني وحلفتني اذا محتاجة شي او لازم اگعدهه، كسرت خاطري سديت من عدهه التلفون ونمت.

الصبح فزينة على صوت تكسير الباب.افتتتحييي
ام الزلم ام..... بت..... ال......

انواع الفشار والكلام السوقي المقزز، بابا فز يفرك بعيونة وركض فتحة جانت، نساء ثلاثة كبار بالعمر من نسوان قبل وياهن بنية شابة

صااح بابا بيهم بصوت غاضب

علي::ولجننن ك...... ب..... ماتحستحن شهلاصووووات العايقة

سحب وحدة من شالهه

::وانتي يجبيرتهن لامتهن وطابات مدرعمات شششتردن ولجججن مالجن رداد وشلون كطعتن الدرب وحدجن

سحب البنية الشابة تجي من عمري سحبهه من شالهه

طططبببييي فضحتنه الله يكصف عمارجن اليوم اخلي الشياطين تبجي على حالجن

انا واكفة اباب المطبخ خاتلة واباوع وارجع اضم روحي

رباب::ولك يالماتستحي اطكني انا بت الشيخ تعوفني وتروح لهاي ام الزلم
بابا يضرب بيهه ويحجي بصياح وعروقه منتفخة ووجهة احمر من الغضب
علي:شششيخ ط..... بت الباطل سييرتهه ممنوع تجيبيننه،، هي بر.... انا ناقصج ما كافيني ضيم كلبي

النسوان الاثنين يحاولن يطلعنهه من ادي وماكو والبنية الشابة بس تصرخ بعالي صووتهه

::ييييبووووويي يااااناااس ذبح اميييي لحكونه

عاف الأسمهه رباب وخي زوجته الأولى واتوجه للبنية ودك راشدايات، رجليه ماشالني من الخوف كعدت

شوية وفتحت ماما باب غرفتهه مستندة علي والدموع تصب وعلى راسهه شال

رباب::هاااا ام السرطاان طلعتي جنج بريعصي اشايف بيج وانوب مزين راسه وياها، هذا سرطانج من دعاويي عليج، وانشالله يصيب بتج وياج، من شفتهه تحتاج سند ركضت سندتهه

حجت ماما بصوت ضعيف خافت

::لاا فدوة لا تدعين عليهه، والله مالهه ذنب انا يمج ادعي عليه ملخيني استاهل

سرى ::ختولي ماما اصلا رب العالمين ميسمعمن هيج شكولات بلا اخلاق

بابا احتار يسكت منو ويخلي منو كلها تغلط وتعاير ماما بمرضهه، خطية انهارت وكعت بالگاع و وگع شالهه

رباب ::هييييع غدي خايب اشايف بيهه جنهه بريعصي تلعب الروح، بس حظ ال........

ماما ضلت تبجي بأنهيار وبابا احتار شيسوي يركض يريد يشلهه يدخلهه ويرجع يصيح بيهن

الى ان دخلو مرتضى ومرت خالو وبناتة على الصوت العالي، صارت معركة نسوان ناي ملخت ناس انا ركضت على الاسمهه رباب حركت كلب امي جلبت براسههه من ورى لحدما طخيته بالكاع بس وهي تفلت نفسهه مني ضغطت على جرح ايدي صح صار زمن، بس بعدة ماتشافه كليا، حسيتهه سجينه فاتت بأيدي صرخت بصوت هز كل اوتاري الصوتية

ف بابا ركض سحلهن ومرتضى جرني من زنودي صار ضهري على صدرة

مرتضى بصوت هامس::يولي طلعتي عرمة بطلت ماريدج

اريد افلت روحي حتى اركض اطلع قهر امي منهن ميعوفني

طلعن بابا دفرات وسحل وركض يريد يوصيني على ماما الكاعدة تبجي انتبه لمرتضى لازمني

علي::توكل عمي خل اسد الباب حتى يرتاحون

هو عافني وطلع وبابا رجع شال ماما ووصاني بيه ورجع طلت يركض بنات خالو همات شوية وراحو

ماما تريد تسكت ماكو تبجي بحرقة، وانا ابجي وياها بعدين سألتني سؤال صدمني، صفنت بوجهه

معقولة ماما هيج تفكر،

___________يتبع

والباقيات الصالحات

سبحان الله وبحمده سبحان الله العظيم

بسم الله الرحمن الرحيم

لا حول ولا قوة الا بالله العلي العظيم

بنات لتنسون التقييم بالنجمة🌟⭐وكتبولي اذا عجبتكم القصة وحابين تسستمر

___________________

قـــــــــــــــــراء روايتي احبكم بگد العــــــــــراق🤎🥹

انستغرام