روح في بحر الظلام

الحلقة العاشرة

روح في بحر الظلام

____ الكاتبة بحر _____

بنات كل اللي تمر من هنا ارجوكم لتنسون التقييم

بالنجمة والتعليق بين الفقرات

⭐🌟⭐

،،،،،،،،،،،،،،،،،،،،،،،،،،،،،،،،،،،،،،،،،،

أنا وخيالي في أراضي ٱلليالي وٱلسهر

سنعلنُ الحربَ على الشوقِ وننتصر

كلمات بقلم بحر✍️

___________________

ســــــــــــــرى

سكتنة ثنينة واني اضحك بسكوت، خفت يكول تضحك عليه ويزعل، سألني اذا محتاجة شي كتلة ابد بس اريد انام

وصلت لكيت استقبلوني ورحبو بية كعدت بالغرفة يم البنات وهذا كل شوية يجي بعذر شكل

اندگت باب الغرفة، فتحهه وصارت عينه عليه، جنت بلا حجاب، كاعدة على الفراش حاطاتني البنات بالوسط،

مرتضى:: وين مروة، ءاا اريد مروة

مروة:: والعباس ماتريدني مرتضى ترى مو حالة هاي بيع ثكل صخام شبيك متكلي

رقية:: تعال تعال اكعد يمنه سوالفك تونس

سرى:: لا تونس ولا المغرب، اريد انام شنو هاي ترى اروح لبيتنه والله

مرتضى:: دتعاي فد شوية عندي موضوع وياج

مروة:: والله ولا تطلع هسة اروح اكول لبابا،عوف الفرخة مرتضى وبعدين انت مو جاي عليه منين طلع الموضوع

صافن عليهن ويضحك ميكدر يسوي شي باوعلي هز راسه وطلع

ضلن يضحكن علي وعلى سوالفة ويكرصن بيه متت
خجل وجهي صار طماطة

الصبح كعدنة من وكت كلنة نتريك، خالو كعدني يمة، طبعا خالو جميل يشبه ماما عيونهم دعجاء جميلة وبشرة بيضاء واني يكولولي تشبهين امج،

خالو يسويلي لفات صغار وبناته يتضاهرن بالغيرة من جانب المزاح، بس هذا متخبل مگابلني وينافخ،

خالو حس علي متضايق زود العيار، يتغزل بيه بالمزح خالو شهالجمال فدوة لكفشتج اكلي يروحي اكلي، حيل ضوجة والبنات دگ ضحك

خلصنة ما خلوني اساعدهم،

مرتضى::يلا سرى بدلي دا اوصلج ابوج يكول خلي تجي ل امهه

::ماعندي شي جاهزة بس الشال

لبست الشال وسلمت على خالو وزوجته والبنات وياي لكيته واكف يمسح بالجامة الامامية مالت السيارة

::يعني بربج هي هيج البنات تلبس، ترى حتى حرام ميصير هسة انتي شمغطية من شعرج انوب كلساع نازل على كتفج

::مرتضى معليك مني البسة مثل ما اريد شعليك انت بيش مأثر عليك

::هو شنو اللي بيش مأثر لو تلبسي لو تذبي احسن من هالمهزلة

باوعتله لثواني، هو أني اصلا مهضومة واعاني من كبت وكتمان وضغط نفسي وهو زودها عليه، دمعت عيني ورجعت بالگوة امشي اريد ادخل صاح علية مارديت، سبقتني خطواته وكف كدامي مانعني من دخول صالة بيتهم

::مرتضى وخر رح اتصل على بابا ياخذني، ما ازعجك ولا اسويلك مهزلة

::شبيج هسة اني شكتلج، منتضرة مني الزلة، ترة دا احجي علمودج

::وخر مرتضى، لا علمودي ولا علمود احد اعرف هواي دا اثقل عليكم

سحبني من گدام اخواته لورى الحايط غارز اصابعة بزندي، كلش انقهرت وتأذيت، وكفني ودنك لمستوى وجهي

::لج اغاار تفهمين شنو اغار بشر كدامج مقدملج روحي وكلبي واحساسي، حاولي تتنازلين من غرورج وبرودج شوية وحسي بيه

::شبيك انت يا غرور، وربي اذا بعد سويتهه وعورتني هيج اكول لبابا، ولا تخطب راح ارفضك، هاي هسة يومية تعيط لعد بعدين شلون

باوعلي خازرني ضايج وحجة::ام لسان سويهه وشوفي

طلعت موبايلي اتصل على بابا سحبة مني بخمشة، ديلا عذر والله جابة لعيوني

بدون سابق انذار دنكت وبجيت، كعدت بالكاع غطيت عيوني، انقطع صوته ما اسمع غير انفاسة المتعالية بعنف، ثواني وگعد كدامي، بنضراته شفت اعتذار وندم، درت وجهي منه

مرتضى::هاي هيه ما ادخل بيج، اسحب كلامي، لبسي الليعجبج قابل منو اني وادخل بصفتي شنو،

سرى::انطيني موبايلي.

::انطيجيا بس گومي اوصلج، لا تطلعيني بسواد الوجه كدامهم

كمت وكفت نكثت ملابسي وعدلت شالي البنات داخلات جوة صاح رقية تعالي سدي الباب وراي

طلعو اثنينهم على نبرة صوتة الغاضبة، وامه طلعت كالت يااا بعدكم هناا

::مرتضى اي يوم هسة رايحين جانت السيارة متشتغل

تقربن مني مستغربات يستفسرن لان ملامحي جانت حزينه و واضح جدا جنت ابجي، فتحلي باب السيارة

::يلا صعدي تأخرنة، صعدت بدون كلام

مسافة اوكف السيارة

مرتضى::اني اسف،

مارديت درت وجهي ساكتة

::لا تزعلين مني سرى والله توگف حياتي بكبرهه وعندي امتحانات لا تشغلين بالي والله تعبان، هاي هية سوي التردي، يطبني مرض اغار اموت الى جهنم

سرى::انسى ماصار شي

::شأنسى والله بجيتج وانتي مهضومه اخذت من حيلي، والله لو تدرين شكد أحبج وشأحس من تزعلين مني

باوعتلة وحجيت بهمس::ش شتحس يعني

بلع ريكه وهو يباوع بعيني::بعد لا تكولين ما اوافق، لا تكولين معليك، تكسريني تكسرين كل قوتي

سرى::اني اسفة زودتهه وياك، بس والله نفسيتي تعبانة كل حياتي انهارت بيوم وليلة ما اعرف شلون اعبر واشكي

مرتضى::كافي لاتنزل دموعج، نضعف ونقوى ابعضنا، اصير قوتج، اصير كلشي تريدي بس صيري اللي

احتاريت وين اودي وجهي من التوتر والخجل، وهو حس صار يضحك على حالتي انطاني مي

مرتضى::اشربي اشربي باع شصار بيهه النجرة هههههه هاي عود بس حجي وهيج حالج

سرى::ءااااا اي يلا ترى تأخرنة، اووو شسمه هسة بابا يعيط بيك، متتحرك شبيك تباوع مشايف

::ههههههه ماشايف ولا اشبع شوف

حرك السيارة يمشي مبتسم مرتااح

وصلنه للمستشفى نفس شعور الوجع اعيشة كلمرا اوصل، نزلني سندني لان رجلي ما اكدر امشي من الخياط

وصلنة شفنة بابا كاعد خارج الردهه وايديه على راسة ويهز برجلة

من شافنة طفر، جان وجهه اصفر ويرجف اول شي بوسني، بعدين اخذ مرتضى على صفحة ما اعرف شطلب منه، وطلع يمشي بكل سرعته

سرى::شكو مرتضى شبي بابا

::مابي شي عندة شغلة مستعجلة هسة يجي تعاي يم عمه

دخلنه لكينه ماما غافية، دنكت بست ايدهه، وفصلت عن الكون وانا اباوعلهه احس اريد اشبع من ملامحهه اريد اترس روحي وعيوني شوف

بس هاي أم اكو احد يشبع من أمه

كعدت من نومهه استقبلتنه وسلمت علينه

كعدت يمهه وهي حاضنه ايدي بثنين اديهه

جميلة::خو ماكو وجع يروحي

::لا ماكو ابد غير اخذ مسكنات

::كافي بعدممنوع تاخذين اي مسكن، حتى لو تأذيج استحملي، ترى جميع ادوية المسكنات مضرة بالكلى، والف اسم الله عليج وجع الكلى مر وحقير مينجرع،

سرى::لا هاي هية بعد ما اخذ

بقت تسولف وين مرتضى هواي تحبة، تسأله عن خالو واهلة ويضحك وياها وكلساع عينه تجي بعيني يغمزلي

جميلة::مرتضى عينك راح افكسهه، احترم لك كدامي تغمز،

مرتضى::خطيبتي يابة اتطلبوني

جميلة::لا يماما حرام هالتصرفات، هيج رب العالمين ميبارك بحبكم بسبب هالغمزات والهمسات المحرمة وتنحرمون من بعض، خلي حبك نضيف حتى تتوفقون
اعقدو وتزوجو واغمز براحتك

::ماما شبيج ترا استحي،

::اروح فدوة للتستحي

جميلة::لك مرتضى دا احجي هندي مو راح اطردك والله

دخل بابا للردهه بعد ساعتين او ثلاث ساعات مغسل ومبدل ملابسة بس مبين متعارك ومتأذي هواي

جميلة::علي شبيك ليش هيج صاير وياك

تقرب گعد يمهه ::مابيه حادث بسيط وعدت سلامات

اني اباوع من بعيد، بس كسر خاطري

مرتضى::عمي احد متجاوز وياك صاير شي حالتك مو مالت حادث

باوع لماما نضرات غريبة، نضرات عجز وخوف، من بجت گام باس راسهه

جميلة::علي شصاير غير تحجي

::ماصار شي شحجي حادث كطفني بنص الشارع وعده، اليوم العصر تطلع تحاليلج

علاجج جاهز، الدكتور يكول اهم شي الحالة النفسية وماتخاف، والا العلاج ماراح ياخذ بيهه تصيرين سباعية جميلة، ما اريد تنهزين، اذا ضعفتي اطيح وياج والله، انا المريض اعتبريني وجاي تداويني انا مريض بمرضج

عرفت يحجون عن العلاج الكيمياوي حددولهه جرعات وبدت المعاناة

مستحيل اكو شعور يضاهي شعور انو تشوف اغلى شخص على قلبك واصل اخر مراحل الالم

انا برى وصوت ٱنينهه يلاحقني ما اكدر ابعد ما اكدر اقترب ما اكدر اسوي شي جنت ادعي من كلبي بس انو تهدء وتتحمل

ابوي اللي جنت متوقعة ميحبهه يعض على ايدة لحد ما يطلع الدم على طول صرختهه

مرتضى يحاول يواسينه ومرت خالو تروح وترجع للمستشفى بس ماكو شي يصبر علينه بهاللحضات

وبعد ان تنتهي الجلسة نتقابل بأبتسامة خائفة متألمة بعيون دامعة ينتهي الكلام وتتكلم عيونه اني وهيه وبابا كلنة نكون مرهقين

وكأنما هالمرض صاب جسد واحد وثلاث ارواح، بابا صار شهر كامل ماواصل لعائلتة يطلع يتصل ويرجع متنرفز، مرات يجي اتصال يطلع يركض

الدكتور كال تطلع للبيت وبس وبت الجلسات ترجع، فرحنه نخلص من اجواء المستشفى

بعد الجلسة الثانية دخلت وياها اساعدهه تسبح، هي رفضت بس بعد الحاح شديد مني وافقت

ياريت مادخلت ياريت ماشفت المنظر انحفر بسجل ذاكرتي الاسود غير قابل للحذف ولا النسيان

____________() ___________

ررانـــــــــــــــــــيا

استأجرنا سيارة قاصدين قبر الشهيد منتظر اللي استشهد بعمر الثالثة عشر

أخذت أمواج ٱلحنين ٱلعاتية قارب ذكرياتي ٱلمتهالك إلى مرسى ٱلماضي الحقير

كنا كاعدين حوالين ماما على ضوء الفانوس النفطي كان الجو بارد گاعدين بالغرفة، والأجواء اشبه بالعيد النادر الحدوث، كنت اباوع عليهه بأنبهار وهي تحكي قصتهه ماهمني القصة ولا همني الكلام كل اللي يهمني اني استمتع بلحظات الهدوء،

كانت تتكلم عن قصة فتاة تفقد سعادتهه وحب حياته، وكت متأخر وبعد ماكبرت يلا فهمت انو ماما كانت تقص علينا قصتها، ما اذكر الكلام بذاك الوقت بس اتذكر حزن ماما اتذكر حسراتها بعد ما تنتهي انتهت القصة وكلراحد توجه الى فراشه كلنا نايمين بغرفة وحدة وهي الغرفة الوحيدة بالبيت، نستعد لليوم الثاني اللي ماراح يخلو من العذاب

واكثر أثنين بالعائلة شافو عذاب بحياتهم منتضر، ورانيا

ماما جانت تحجيلي عن قسوة بابا وياي بطفولتي الغير مبررة، واللي ابتدت من عمر مبكر جدا

اكو فد موقف ماما عادتة اللي تقريبا عشر مرات او اكثر،

ليلى::كان عمرج سنه ونص تقريبا، كنتي طفلة جميلة
جدا خدود حمر لدرجة مرت عمج فؤاد كانت دائما تكول تحط حرة لخدودهة، طلبج ابوج حتى يلاعبج، انطيتج الله، بللتي نفسج وماكنتي لابسة حفاضة، بهاللحضة هو تعصب وصار يضربج راشدايات على وجهج بدون رحمة، الكل كان موجود ومحد تدخل وحماج منو حتى انا كنت واكفة اخاف اتقرب احميج لان كان مستهتر ومايحسب حساب ل احد

كلما تسولف هالموقف انقهر على نفسي ابجي عليه، اخفي غصاتي بصفنات وابتسامات كاذبة، من هنا استمرت رحلة التعنيف

كنت طفلة وتعاركنة انا وبنت الجيران ضربتني الطفلة وضربتها بس مو بقوة ضرباتهه، انا هنا كنت نحيلة جدا، الآن عرفت انو سبب ضعف بدني كان بسبب التخويف والترهيب على الاسباب التافهه اضافة الى سوء التغذية

اما الفرد الثاني فهو فأر التجارب الثاني للتربية بهالعائلة

كان بابا دائما يكول انو التربية اعز من الولد، محد تجرأ ورد علي انو الضرب مو تربية الاهانة الغير مبررة مو تربية انك تحرم طفلك من حنانك مو تربية ولا تعليم ع الصلابة والشجاعة انك تنهر طفلك وتقلل قيمته كدام الناس مو تربية انك تبخل علي رغم امكانيتك مو تربية

اعتذر على صريح العبارة، لكن هذا المربي كان بحاجة الى تربية

منتظر..... طفل بعمر السادسة حملو مسؤلية رجال، ابتدت انو يطلع من المدرسة بصف الاول ابتدائي ياخذ غدة ل بابا اللي كان عندة بسطة بسوق البصرة واحنا كنا ساكنين بمنطقة تبعد تقريبا ربع ساعة بالسيارة كان ياخذ الاكل وترمز ماء صغير يروح ل بابا

وياخذ نصبيه من الضرب بسبب او بدون سبب، بس لانه لازم يواجه غضب بابا، اللي سببه صعوبة المعيشة او مشاكل البيت وي ماما

جان طفل يضحك ويشاكس رغم الألم

اني ومنتضر مو دائما على وفاق وهذا الشي خلف حسرة ندم بصدري وسببلي اختناق وخجل لما اكون قريبة من قبرة

رغم كنا اطفال واثنينه اطفال وأذيته كانت اكبر من أذيتي وضرباته اقوى مني واثارهم موجودة لهذا اليوم بس بعدني اكره اني أذيت اخوي بيوم، كان لازم اقدسة واهتم بي مو اعادي،

سبب العداوة كان التفرقة

، تفرقة دامت واستمرت من اهل مستهترين بتربية اطفالهم، عبارات صغيرة سببت شروخ بشخصيتي اجرام بروحي كلمات اسمعهه واحاول اكتم غيرتي المفضوحة بالصبر والصمت

فلانة احسن منج،
صيري مثل فلانة،
تروحين فدوة ل فلانة
والله هذا اعز منج

اقسى الكلمات سمعتهه من امي،مايتحملهه انسان بالغ مو عاد طفلة كانت تكولي والعباس فد اكرهج
الخبيثة، ام خنيس، كانت تكولي ام المصايب

المصيبة كانت تنطقهم بحقد، بملامح قاسية، بس لان تأخر شغل بالبيت او تصرفت تصرف غلط،

المضحك المبكي هههههه، كنت اتعرض للضرب المبرح على اخطائي، وبلأخر جانو يكولون هالمرة هيج المرة الجاية موتج على ايدي

اهلي استهترو بنفسيتنة، واتخذو الطريق الأسرع واللي ضنو صح بالتربية وهو الضرب والأهانة والتفرقة
اكو فد موقف منقوش بذاكرتي ك آثار الأولين حدث
في واحدة من ليالي العاشر من شهر محرم الحرام لما كنت طفلة كانت تصير قرايات وبليلة العاشر كانت النساء تسهر حتى فجر اليوم العاشر، كانت الاطفال البنات يحلون شعرهم ويلطمون

توسلت بأمي حتى تحل شعري وبعد ما حجو النساء وياها فتحي خطية خليهه وي البنات وافقت وكانت خايفة من بابا

فتحت شعري، ولطمت وي البنات فرحانه بلاجواء عكس النساء اللي كانو يبكون بحزن على المصاب، وكانت ترافقنة عمتي الصغيرة تختلف عن الباقيات كانت لطيفة وحنونة

رجعنة للبيت ولگينا واكف بغضب بطرمة البيت بأنتضارنة

عماد::وووووين جنتن

عمتي كانت شابة سمعت كم كلمة وفاتت، بقينة اني وامي لازم نواجه هذا الكم الهائل من الغضب وحدنة، بالبداية جان السبب تأخيرنة بعدين انتبه فاتحة شعري

شكد صعب اوصف شعوري، شكد صعب الكة كلمات توصل احساسي بهاللحضات كنت طفلة هزيلة قصيرة يشمرني بلارض ويرجع يوكفني من شعري وجهي صار احمر من الراشديات شعري تكطع من التملخ، كانت احد الليالي المرعبة رغم كنت صغيرة، بس اتذكر تفاصيل الخوف اتذكر الشعور اتذكر وجع فروة راسي اللي استمر لثاني يوم

اذا اريد اوصف حالي فكنت اشبه طائر صغير وقع بأيد قط شرس جائع

حركات عشوائية كلشي بية تخدر من الضرب، محد تدخل محد حماني،وحدي واجهته بدون دموع بدون صوت

تركني واستلم أمي وضرب وصراخ مكتوم صارت وألم

من عافني رحت لفراشي، اجت امي طبعا ماكانت تحجي من كلبهه بس الوقت ابد ماكان مناسب، كنت احتاج حضن احتاج حنان، احتاج ام، ما احتاج ملامة وتذكير بلأخطاء

ليلى::مو كتلج مايقبل كتلج مايقبل هسة زين هيج

خلصت الليلة المشؤمة ثاني يوم امي اخذتني وراحت ل اهلهه زعلانة كالت من يرجع هم يضربهه بقينا فترة واجة اعتذر ورجعنة

وك طفلة منبوذة عانت الاغتراب بين اهلهه تطلب فقط القليل من الشفقة، سامحت ونسيت كلشي وكلي امل تتغير معاملتهم

ازدادت معاملتهم سوءً مع ازدياد سني، اني ومنتظر اللي كبر وصار تقريبا بالعاشرة عدت سنين أليمة مواقف صعب اذكرهه

منتظر::ماما يلا جهزي الاكل بسرعة والله تأخرت راح يكتلني يموتني مابية حيل كتلة

ليلى::سودة علية يمه جاي تعبان شياخذك

اخذ الاكل وراح، بالطريق صعد سيارة كية ف ابو السيارة ماخذة مسافة بعيدة عن المنطقة المنشودة

حصل هالموقف بأحد اشهر فصل الصيف الساعة الثانية عشر والنصف بعد رجوعه من المدرسة الشمس بذروة حرارتهه وبعيون دامعة وقلب مرتجف هالطفل ماسك طعام الغداء ل بابا ويمشي بكل سرعته، وصل متأخر

ابن عمي كان يساعدهم يكول دم منتظر طفر على بلعومي ما اعرف منين سببه تورم وجهه واخذ ضربات متتالية جر الشعر واهانة وغلط

بابا كان اذا شاف ناس يزيد بلاستهتار ويانه، ف رادهم يفكونه ويگلولة عوفه، بس محد تدخل ابد كل اصدقاء بابا بذاك الوقت تجاهلو

اكل الغدا، وبقى منتضر ينتضر البقايا ياكلهم

عماد:: اكعد انت بالبسطة بيع وانا اتغدة واخليلك وراي

كان يعطيهم هو وزياد اللي كان طفل صغير سلع يبيعوهم بالسوك ياااويلهم مايبيعوهم، بس هالسلعة متمشي يضطرون يبيعوهه بنص السعر وينطو مصرفهم احيانا يسكت ويعديهه

من كبر زياد طلعت هاي السوالف،

زياد::ماما والله المصروف التنطينيا نجمعة وننطي لبابا لان مايقبل مانبيع والسلع متمشي

عدت الايام مريرة،ايام الطفولة الحقيرة، سعيد الحظ هو اليعدي يومة بدون ماينكتل

بقى يساعد بابا يشيل وياه كراتين السلع وتكون ثقيلة على جسمه الناعم وكان يستحمل، بابا ماكان يستأجر عامل يساعده بتعبئته البسطة، لا كان منتظر الصغير بمثابة عامل

اشترى بابا ستوته هي مركبة صغيرة منتشرة تستعمل لنقل الاشياء اكثر شي يستعملوهه اصحاب المحلات، من يشترون سلع كثيرة

منتظر::اي همزين اشترينة ستوته بعد ما انگل كراتين راح ارتاح

عماد::اي احسن النه عاد نشتري الاغراض نخليهم بالبيت ونبيع منهم شوية شوية اصرفلنة

كلنا فرحانين بيهه ماعدا ماما، لان ترس البيت غراض والستوتة مايخليهه بالشارع يدخلهه للطرمة ف كانت حيل مضايقتنه بس منو يحجي غير يموت

ما ارتاح منتظر الستوته كانت عالية وتعبئتة وانزال صناديق الأشياء حيل صعب علي كان وبابا يساعدة بس الحمل الاكبر براس منتظر

وجان من يرحون يتسوقون منتظر يبقى بالشمس بضهر الستوتة برد حر مطر كلشي يستحمل بدون شكوى

واقل زلة تصدر منة، بابا جان يخلي يجيب الصوندة بأيدة ويقدمهه الة

عماد::منتظر جيب الصوندة

منتظر::بابا فدوة بعد ما اعيدهه

عماد::جيب الصوندة ابن الكلب

يمشي خايف مرتجف بوجه احمر بدون دموع فقط نبضات قلب متسارعة، ينضرب الحد مايكتفي بابا واحنا نتفرج من بعيد ممنوع التدخل

احيانا يتجاوزنا واحيانا لا كان يدور اعذار حتى يضربنه من قهره على منتظر لان يأذيه

منتظر راد يتخلص من بسطة بابا ف جان يشوف العربنچية اللي يوصلون مسواك المتسوقين لخارج السوق وصديقه من ضمنهم. عجبته الفكرة وعيونه صارت تلمعلهه

منتظر::بابا انا اريد عربانة ادفع بيهه بسوك البصرة فدوة مثل عربانة صديقي كلش حلوة ويسولفلي شكد يحصل فدوة اشترولي

بعد الحاح وتوسل ساعدتة امي بجمع فلوس صناعة عربة من الحداد والعجلات جانو موجودين عدنة

الشي اللي محد ينكره ان منتظر اخذ دلال وحنان من امي فقط، جانت شنو يريد تجيبلة، رغم اشياء عادية بس بكل قدرتهه تحاول تعوضة عن المأساة اللي يعيشهه الوحيدة الحاسة بي، بفترة اجت لعبة السيگا اشترتلة وبعدهه جابتلة بلي ستيشن الوردي كان غالي بوقتهه بس ماقصرت وياه و اغلبهه من فلوس الخياط جانت تدللة مو فلوس بابا

كملت صناعة العربة واخذهه وتوجه لسوق البصرة،لكن الاولاد العربنچية بسوق البصرة رفضو وجود منتظر بيناتهم عادو كبار وزغار، تأذى هواي وينهضم هواي وهو يكافح بالفترة القليلة العاشهه

ف كان يتعارك وياهم، منتظر رغم صغر سنه كان شجاع رغم ضعف جسدة كان قوي، ف كان يتعارك وياهم مرا يضرب مرا ينضرب، مرات ياخذ زياد وياه يجون محصلين فلوس فرحانين الارض ماواسعتهم من الفرحة

رغم التعب رغم الوجع مرات يبكي من ألم رجليه

منتظر::يمه رجلية يوجعني بعد ما اتحمل، فدوة

ليلى::سودة علية يا يمة انه ادري شمالهن رجليك كون بيه ولا بيك، اوكف هسة اشدهم الك بعلك سيد يوشع، وراح يطيبن بس انتا هم ادعي طفل والله يستجاب منة

زياد::يمه انا حبيبج، عوفي هذا جذاب،

ويضل زياد يتشاقة وياهه ويلعب وينام يمهه من الغيرة كلة يكلله انا حبيبج انا

منتظر::اي اي لح بعد لح حبيبچچچ

وهذا يتضايق لان يعيب علي ويتضايق تكب العركة ومرات بابا يضربهم اثنينهم

دائما زياد ومنتظر متمالخين او اني وياه طفل مشاكس

كامت ماما جابت العلگ ولفت رجليه بحنان، روحهه من الدنيا منتظر

رانيا::والله جذاب باعي وجهه مبين جذاب لاف رجليه ويتبجبج، امداك اي والله

منتظر::شبيج ام خشم منو يمج، الجبيرة الغبيرة

هو يرد وانا ارد الى مالا نهاية جنت اغار منه كلنة نغار منه منتظر المفضل عندهه

بابا قرر انو يشترون رقية للغداء من فلوسهم الخاصة كليوم، ما مانعو بالعكس يجيبوهه فرحانين

وبيوم اجا منتظر مرعوب وخايف والعربانة ماكو

ليلى::ها يمة مالك ليش هيج حالك

فحطان يلهث حال الضيم حالة وبي خدوش ومتألم

منتظر بدموع محبوسة ::دارو علية وكتلوني

ليلى::ميخالف يمه هم الولد هيج مرا تطك ومرا تنطك

بجة منتظر ورد عليهه::يمه العربانة عفتهه هناك. انوب طلعت ارض من السوك ووووين ركضت لمن مليت وبعدين شافني واحد عندة تكسي صاحلي وماصعدت ويا خفت،، يحجي ويشهك
واجيت مشي بهالشمس

صبرت علي امي وكومته يسبح جاي بدون نعال من الخوف من اصعب الايام اللي مرت علي، سودة علية

واخذت ريمونت التلفزيون مني وانطته الة، وكبت المشكلة،
اكثر مشاكلنة كان سببهه ريمونت التلفزيون هو يريدة واني اريدة وتكب العيطة

وتجي ماما تستلمني بكلام التحقير والاهانة دفاعا عن منتظر وكلة يهون

اكثر شي جان يقهرني ويمزق فؤادي من تكول منتظر اعز واحد هو وزياد وبعدهه انتو

رغم صغر سني كنت اكوللهه

رانيا::بس ماما ميصير الام ماتفرق بين أبنائهه، يمكن لان يتعب هواي تميزي

جانت ترد بدون رحمة ::لا والله هو اعز منكم، هي گوة بعد هي مشاعر مو بيدي

رانيا::عادي ماما جذبي علينه

ليلى::لا والله ما اجذب هذا الصدك ويطبكم مرض

كلمات صدرت من ثغرها،ك سهام النار تخترق قلبي
رفضتني نبذتني بكلمها وفعلها

بلحضتها اخذت من امي درس مستحيل افرق بين اولادي اذا الله رزقني اطفال،

طفلة وحفظت الدرس عن غيب

من هاليوم منتظر مارجع لسوك البصرة، وكأن هالمنطقة صارت تطرده حتى يتجه للمنية والموت

بدة منتظر يكبر وصار بالثالثة عشر بهالفترة صار جميل بوجه الشباب صار يشبه ابطال بولييود الوسيمين

اباوعلة من يجي من المدرسة، فدوة ماما باع منتظر شلون يخبل صاير جان لابس قمصلة جينز وبنطلون جينز وفانيلة بيضة وتسريحته حلوة لان شعره ناعم بس بي تموج

صار بابا ياخذه وياه للعشار يبيع شغلات بالات (اشياء مستوردة) تنطي امي فلوس يشتري كيكة وعصير، بس مايشتري يبيع السلع باقل من السعر الموصي عليه ويزود من فلوسة، حتى يخلص من تلقي الاهانات

بالليل تعاركو زياد ومنتظر تمالخو كلش ومنتظر ضرب زياد بقسوة زياد صار يبجي وراح اشتكى لبابا

اول شي لزمة راشديات

عماد::انا مو وصيتك، مو كتلك تدير بالك على اخوك ليش. هيج مسوي، ماتكول ابوي تعبان مالة خلك جاي من الضيم، الكاكم تتعاركون

بعدهه كال جيبولي الصوندة امي طلعت من الغرفة ماتحملت، سحل منتظر حتى يضربة كدامهه ويحرك كلبهه، ملخة تمليخ بالصوندة، كان طفل متعوب ويصرخ، ماتحملت

بهلاثناء خلص صبري طفرت رحت احمي بابا شاطت روحه شلون وكفت كدامة كأنما كسرت تجبره وطغيانه

انطاني ضربة بالصوندة بكل قوته ملخت لحم ضهري من الطول للطول على اثرهه على صوتي بالصراخ

عافنة وطلع يفشر ويغلط انواع الغلط اللي يصعب عليه سرده

بقينه ثلاثة ايام بابا مايحاجينة اثار الضرب شوهت جسم منتظر وضهري

الضهر منتظر صار سبب بكسرة جامة البوفية، وماما سلعتهه حيل عزيزة لان تجي بصعوبة، ف حيل انقهرت

ضربته ضربة كلش قوية بالنعال، تأذى حيل وكام يبجي وراح نام

العصر بابا راد يروح للشغل كاللهة كعدي ابنج خلي يجي يشيل الاغراض وياي ضهري يوجعني

كعدته من النوم، وكان منتظر على غير عادتة ضايج مختنك وكان كلبة حاس باللي راح يصير بس مايعرف يفسرة

حاولت ماما تراضي وتطلعه من حالة الكأبة بس مانجحت

هو مايحب العنب، بس بيومهه حطتلة صحن عنب مليان وياه مي بارد يبردة

اكل كل العنب اللي بالصحن

راح منتظى ضايج مختنك لابس تراك لون بيجي راح بكفشتة الحلوة اللي كانت زاعجتة ويلح عليهم على فلوس الحلاق راح منتظر واشكر ربي كنا متصالحين لو ماكنا متصالحين كان راح تبقة غصة فوك غصة الفقدان غصة تأنيب الضمير

راح منتظر، راح حبيب امة،

وقت المغرب صار صوت عالي رج محافضة البصرة
اجا الخبر انو صار انفجار

____________يـــــــــــــــتبع

والباقيات الصالحات❤

سبحان الله وبحمده، سبحان الله العضيم
♡♡♡♡♡♡

بسم الله الرحمن الرحيم

لا حول ولاقوة الابالله العلي العظيم

♕♕♕♕♕♕♕♕♕♕♕♕

ولا تنسون التعليق والتقييم بالنجمة 🌟
وكتبولي اذا حابين تستمر القصة 🤎

قـــــــــــــــــراء روايتي احبكم بگد العــــــــــراق🤎🥹