قارورة الـ مُخلد

اضافي لـ قارورة 2

الڪاتبة | زينب صلاح
في | قارورة الـ مُخلد

لا تنسون التصويت + متابعة للحساب + التعليق بين الفقرات 🤍

♥♥♥♥♥♥♥♥♥♥♥♥♥♥

ركضت وجسمي يرجف سحبتها من مُخلد لحضني وهو سد الباب ورجع واكف گبالنه مصدوم من حالتها..

جانت تشهك بالبجي وملابسها مبعثرة وجسمها ينتفض ، بعدت شعرها عن عيونها ومسحت دموعها..

- نغمة حبيبتي باوعيلي

نغم- هو هو مو اني والله ما سويت شي

باوعت لـ مُخلد بحيرة هو هم گعد يمسح على راسها وگال..

- بابا اهدي هسه ونحجي

ردت اگومها بس ما تگدر تسند روحها شالها مُخلد ودخلها لغرفتنا سحبني وهمس قريب من اذني..

- سبحيها وبدليلها ولا تسألين على شي بين ما اتصل على عمي واخوانج يجون

هزيتله راسي وسويت مثل ما گال جانت بغير عالم صافنه وبس الدموع تصب والجسم يرجف كُله
نغم بالثاني متوسط وبالرغم من اصرار اخواني على لبس الحجاب هي جانت رافضه وبابا رغم رفضه ما يحب يضغط عليها..

يگللهم:
- خلي تلبسه بقناعتها

لبستها تراك من مالاتي ومشطت شعرها مددتها وظليت العب بشعرها منا لمن غفت عفتها وطلعت شفت مُخلد گاعد بالصالة من انتبهلي گال..

- شلون صارت؟

- غفت ودموعها على خدها

شهگت بالبجي بسرعة گام وحضني..
- لا لا قارورتي ليش البجي

- اختي شبيها راح اتخبلل

- ان شاء الله ماكو شي هسه يجي عمي ونفتهم منها

سحبني گعدني يمه ويمسح على ايدي وباله شارد عصرت ايده وهمست بتردد..

- عرفت شبيها مو؟

تنهد وگال..
- لا

- بلي عرفت

- ولج انه شعرفني مو يمج

- تمام بس شاك بشي

- لا

- مُخلد!!!

- لا اله الا الله كافي امي

- متحرشين بيها؟

- همسه

- مو؟

مسح وجهه وسكت متت من البجي وهو حاضني  وساكت..

- وين الجهال؟

- بالغرفة يلعبون

شوي وسمعنه الجرس طلع مُخلد شوي ورجع هو وبابا واخواني بس شفتهم بجيت حضني بابا وگال..

- شصاير زُجاجتي؟

- بابا نغم

مُخلد- اگعد عمي گعدوا ونسولفلكم

گعدوا واني يم بابا حاضني لصدره حجالهم مُخلد عن حالة نغم بالضبط وحتى شكوكه حول الموضوع اباوع لـ مهيب دمارات گصته نطت وهو جان لابس زيه العسكري طالع هيبه وقُتيبة لابس زي رسمي مبين جاي من المكتب مالته..

مهيب- روحي صحيلها

همسه- نايمه

مهيب- گعديها

هزيت راسي وگمت صحيتها واخذتها للصالة جانت ترجف ودموعها تنزل يبست بمكانها من شافت ابوي واخواني ووجهه صار اصفر..

جابر- تعالي باباتي

راحت تقدم خطوة وتأخر خطوة وگعدت يم بابا ساكته وترجف گام مهيب گعد على الطبله گدامها ولزم فكها رافع راسها..

مهيب- احجيلي

نغم- شـ شنو؟

مهيب- بابا بدون لف ودوران احجي الي بيج

نفت براسها وبجت گعد قُتيبة يمها وسحبها لصدرة باس راسها..

قُتيبة- تثقين بخوانج يا روحهم

هزت راسها ساكته كمل..
- بما انُ تثقين بينه المفروض تحجين الي بيج علمود نساعدج ونوگف وياج

نغم- اخاف

مهيب- افاا تخافين واني اخوج

جابر- احجي بابا سولفيلنه منو وياج منو نزل دموع زُجاجتي الصغيرة

باوعتلي ودموعها لا زالت مستمرة تنزل..

نـغـم*

جنت طول الدرس الاخير اخذ نظرة للساعة الي بأيدي انتظر الجرس علمود نحل لان تعبت ونعست امس نمت قليل لان امتحانات..

ذبيت نفس براحة من رن الجرس وطلعت المُدرسة بسرعة جمعت كتبي وحطيتهم داخل الجنطة وطلعت انتظر السايق..

بعادتي ما احب الصداقات وحيل علاقتي سطحية ويه زميلاتي وهذا الشي سببلي عقدة بسبب بعض البنات الي طلعولي عدة القاب
منها المُعقدة ، والحقنه ، والنفسية.. وغيرها هواي بس اطنش عليهن..

تأفأفت بضوجه واني اشوف الطالبات بدت تختفي وتقل لحد ما فرغت المدرسة تمامًا واني اخاف ارجع وحدي..

فزيت من ايد نحطت على كتفي تراجع وابتسمت بتوتر لـ ابو وسام الحارس
كان رجال بداية الخمسينات من المنطقة ويعرف ابويه واخوتي لذلك شوي تنهدت براحة..

- ليش بعد ما رحتي؟

- عمو دانتظر السايق تأخر

باوع داير مدايره وابتسم بهدوء وگال..
- تعالي للكرفان مالتي نتصل على ابو مهيب لان ما عندي رقمة

ترددت وللحظة حسيت بالخوف بس ما جان عندي غير حل وبعدين نعرفه ويعرفنه مستحيل يأذيني بشي..

- خايفة مني؟

هزيت راسي بـ لا وضفت..
- لا عمو بس ليش ما تجيب تلفونك هنا نتصل؟

- تلفوني ما بي شحن وعلى ما اجيبه يطفه وما نلحك نتصل تعالي وياي لا تخافين

بلعت ريك ومشيت وراه لازمة جنطتي بقوة وعيوني دور حولين المكان بتفحص بقيت واكفه بره طلع مرة ثانيه وگال..

- تعالي اتصلي

دخلت مترددة وخايفة من ردة فعل اهلي لو عرفوا وخصوصًا مهيب كل يوم يگعدني بحضنه ويگلي سولفيلي عن يومج واني اكيد ما راح اخفي شي مثل هذا عليّ..

درت وجهي وگلبي مقبوض من شفته سد الباب وقفله دموعي نزلت لا اراديًا وهمست بصوت ضعيف ورجفة واضحة..

- لـ ليش قفلـته عمو؟

- حتى ناخذ راحتنه يا حلوة

- بس عمو فدوة اريد اطلع

سحبني عليّ ونتر الجنطة مني وشمرها بالزاوية قبض على ايدي بقوة وقربني منه واني جسمي يرجف واحس راسي نسطر وعلى اي لحظة يغمى عليّ..

هو رغم كان كبير بالعمر بس معتني بنفسه لذلك مبين اصغر من عمره..

- عمو عوفني الله يخليك

- هههه اششش نلعب شوي

شمرني على السرير مالته وصار فوكي يسحب بحمالة الصدرية ويهمس..

- شنو هالعطر الطيب والشعر الحلو شنو الترافه الي بيج

انفجرت ابجي وادفع بي ومن عيطت سد حلكي وهمس قريب من اذاني..

- صوتج ما اسمعه اذا اجه احد اگللهم هي اغوتني واجت برضاتها لا تنسين اكو كامرات

متت بدمي جسمي ظل يرجف رغم هذا ما خضعت اله وبقيت ادفع بي واصارعه في سبيل احافظ على نفسي وشرفي وانجي رب العالمين بداخلي..

روحي طلعت من باسني برقبتي حيلل وعضني حسيت بالضعف واحتاجيت مهيبي ينقذني من دون الكُل بقيت اعيط بصوت مكتوم بـ اسمه وهذا الحيوان ينهش بجسمي..

عيني راحت على الميز الي يم السرير جان عليه بطل كزاز كولا ظليت اعافر حتى اوصله وبس صار بين ايديه ضربته براسه بكل قوتي..

ودفعته من فوكي اباوعله واكع واكو دم يطلع من راسه بسرعة تقيأت بجيت بضعف فتحت الباب وركضت ومن خوفي من ردة فعل اهلي التجأت لـ همسه..

اباوع لـمهيب وقُتيبة عيونهم صارت بگصتهم خو مهيب شكله صار يخوف ما حسيت غير اخذ سلاحه وطفر بلگوه لحك عليه مُخلد ودفعة وصاح..

مُخلد- لا تتهوووور

مهيب- وخررررر عننن طريقققي

احتار بيهم ساعة يدفع مهيب وساعة قُتيبة لمن صاح بيهم بابا..

جابر- گعدواا

على اثر صوتنه العالي دخلت اية وزوجها متفاجأين وهم شرحنالهم الموضوع واختي بدال ما تهدي الوضع تزيد الطين بله..

اية- وليش لازمينهم خلي يرحون يقتلونه حيوان مثل هذا حرام يعيش

همسه- كافي لاتذبين حطب على النار وتزيدينها

اية- بابا انتَ قابل ليش ساكت

خزرها بابا وگال..
- على شنو قابل ولج؟

اية- مو بالقصد اسفة بابا بس فدوة لا تبقى ساكت

مسح على راس نغم الي خنست بين ايديه وگال..
- قيصر اهتم بالموضوع والباقين لا تدخلون

صاح مهيب يفرفح..
- واني كوااا** هنااااا ليششش تسوووي هيججج يابببه

جابر- صوتك ولكك لا تاخذنه بعياطك

ضرب مهيب على راسه وتقدم گعد گدام ابوي..
- لا تسوي هيج فدوة اروحلك روحي جاي تحترك خليني احاسبه اني

- ما اريد اخسرك بويه انتَ عاطفتك راح تتحكم بيك ابن عمك راح يگدر يحكم الشغلة بعقلة

- وعيونك لا وتجيك الاخبار

هز راسه بابا وگال..
- روح انتَ وابن عمك واخذ قُتيبة وياك هم يفيدك ويابه لا تشتغلون بمشاعركم وعواطفكم راح تخسرون

ماكو بابا بس انطاهم الضوء الاخضر ركضوا مُخلد راد يطلع وراهم صاحله بابا..

جابر- خيرك بويه انتَ وين؟

مُخلد- وياهم عمي

جابر- لا تعال محتاجك بشغلة

مُخلد- ابشر عمي

باوع بابا لـ نغم جانت غافيه بحضنه همس..
- وين انومها

همسه- بغرفتي

شالها بابا على كيفه ودخلها نومها على السرير غطاها عدل وباس راسها وطلع..

- روحي بابا سويلنه چاي وانتَ اية لحكي اختج

عرفته يريد يبقى ويه مُخلد على انفراد بس هذا الشي وين يصرف عند اية ، وگفت تتنصت عليهم تريد تسمع عن شنو يحجون بس ما تسمع جان صوتهم ناصي...

اجت وكفت يم دردم عليهم ومن شافتني اضحك غمتني وگالت..

- حقج تضحكين هسه يجي مُخلد ويسولفلج

- ههههه واني اسولفلج

- گولي والله؟ يممممه فديتتت

اجت تبوس بيه والله مو صاحية خلصت الچاي ورحت اودي الهم وگعدنه يمهم مرت كم ساعة ودخلوا الولد احسهم مثل البركان شوي وينفجرون تنهد بابا وگال..

- ها بويه شسويتوا؟؟

مهيب- انسحل

جابر- شفتهمت هسه انه؟؟

قُتيبة- يابه بالسجن دبرها قيصر ومهيب لان الكامرات ما تفيد الي بيها واضح انُ نغم رايحه وياه بأرادتها

جابر- هسه امكم ظل بالها يله نرجع

مهيب- وين نغم؟

همسه- نايمة

ردت يبقونها هنا بس مهيب رفض راح شالها وهي نايمة واخذها وطلعوا، اية رجعت لبيتها بعد ما رجع قيصر واني تفقدت الجهال ورحت للغرفة..

شفته مدد ؏ السرير
فتحلي ايده وگال..

- تعالي لحضن مُخلدج

ما گلت باطل رحت دفنت نفسي بصدره ضمني اله بقوة وباس راسي
شوي شوي بده يتجرء بلمساته تنهدت وهمسه..

- حبيبي

- عيناه

- لحظة اوكف

رفع راسه الي بعيونه الذبلانه حاوطت وجهه بين ايدي ورفعت نفسي بايسته بخده..

- شنو راد منك بابا؟

- اخخ من فضولج

- شبيييك

- بيه انتِ

- ههههه حبيبي يله سولفلي

دنك وباس خدي وهمس..
- هي مال دلع حبيبي ما اتحمل

- داتغير الموضوع!!!!!!

- ههههه هو انه اگدر؟!!

- لا ويله گول

تمدد بصفي على جانبه وسند راسه على ايده وگال وهو يلف خصلة من شعري على اصبعه..

- تدرين بـ نجمة ان شاء الله السنة التجي اول سنة الها اول متوسط وگال يا مدرسة بالكم خلي ننقل نغم وياها

- ياا اي هيج احسن

- امم صح بس انه وقيصر متفقين نخليها اهلي اريح الها وگلت لعمي گال مو مشكلة يدخل نغم وياها لان ما يريد يبقيها بهاي المدرسة

- يروحي هي فرفحت شفتها

- قيصر يگول مهيب مكسره تكسر واخر شي كاسر ايده وسنونه كلهن مفلشهن

- عزااا مو گالو لـ بابا بالسجن؟

- يا سجن رادوا يقنعون عمي ، هسه المطي بالمستشفى بس من يطلع للسجن اكيد

- يستاهل اول مرة ما ينكسر خاطري على شخص

- حيوان هذا يستاهل اكثر

هزيت راسي ساكته تقرب باس خدي..
- يا حلو؟

- هاا حبيبي

- مشتاق لحضنك

عدلت نومتي وفتحت ايدي بسرعة حضن خصري وحط راسه على صدري وغفه..

ثاني يوم كُل احنه رحنه لبيت اهلي حتى عائلة قيصر
ونغم جانت رافضه داوم وخايفة وبابا گال السنة تولي لا داوم خلي نفسيتها ترتاح لحد يضغط عليها وفعلًا راحت عليها سنة من عمرها بخوف وتردد وضعف صارت هشه حيل..

رغم مهيب مدللها يحتار شنو يسوي وشنو يحط گدامها بس علمود تنسى وتطلع من جو الكأبة والحزن الي سيطر عليها..

حياتي هادئة حيل ومرتاحة
ملتهيه بدراسة الجهال والبيت
ومُخلد بعد ما قسم الشغل بينه وبين بكر وحيدرا صار اغلب وقته يمي يساعدني ويعاوني بس علمود لا اضوج او اتعب..

اسل مخطوبة لابن خالتي الي بعد ما طلعت روحه للرجال يله قبل بابا وبشرط بيت وحدها وهم هسه يماطل بالخطوبة ما يقبل تتزوج وكل فترة مأجل الموضوع بحجة شكل..

راما مرة شافها صديق مهيب بالشغل وانعجب بيها عن لسانها بالضبط..

رامــا*

بعد ما ساعدت ماما ولميت المطبخ دخلت لغرفتي سويت الماسك لوجهي وتمددت على السرير لازمه التلفون اباوع بي فجأة اجتني رسالة على الانستا كان مضمونها..

"السلام عليكم"

عفت الرسالة ودخلت على الصفة جان حاط صورة الرتبة مالته يعني نص كتفه وكان بدون اسم فقط حاط اقتباس..
الجميع سِراب إلا انتِ

وما ناشر اي شي عام وحتى ستوري ما حاط بس ما شاء الله المتابعين نمل عفت الانستا ورجعت على التيك توك اتابع مقاطع شوي واجه اشعار ثاني منه كاتب بي..

"ممكن دقيقة من وكتج ست رامـا؟"

تعجبت يعرف اسمي لان اني ما جنت حاطه اسمي مجرد لقب كتلني الفضول اعرف منو فـ رديت..

"تفضل منو؟"

''وياج **** لؤي''

رديت..
"يعني؟ شنو رايد"

دز ضحكه وطلعلي يكتب انتظرت مدة لا بأس بيها يله اجاني جوابه..

"شوفي يا بنت الناس انه لا زعطوط ولا مراهق وجاي اراسل واريد اتعرف وادور سوالف الحب وغيرها يكفي انج اخت صديقي وعضيدي وانه هم شايفج واعرف اخلاقج ونعم منكم بس اريد اخذ منج جواب واحد اذا اتقدملج توافقين لو لا؟ اخذي وقتج بالتفكير ما مجبورة هسه تجاوبين"

راويت الرسائل لـ همسه الي ابتسمت وگالت..
- هاي شوكت راسلج؟

- قبل يومين وجنت منتظرة يجون يسهرون يمكم الولد واجي وياهم اسولفلج واخذ رأيج

- مو مهم رأيي اني ، انتِ شنو رأيج؟

تنهدت وجاوبتها..
- شوفت عينج الولد صديق مهيب ورغم هو يگول شايفج واعرفج الا اني ما اعرفه همسه وحيل محتارة

- يهمج الشكل حبيبتي يعني اذا شفتي تقررين

- لا همسه مو الشكل بس اوفف ما اعرف

- زين وافقي وطولي مدة الخطوبة وهم لو اجه يخطب سئلي مهيب عليه وشوفي شنو رأيه بما انُ صديقة اكيد يعرفه

هزيت راسي ودزيتله الموافقة رد عليه بعد فترة كاتب..

"انه ملتحق بس انزل حسبي للخميس يمج انه واهلي"

ما جاوبته جنت اخجل وبنفس الوقت ما اريد اخذل اخوي واسوي شي من وراه وبيومها قررت احجي لـ مهيب وما اسوي شي من وراه ، جان گاعد بالغرفة مالته توه جاي من الشغل..

طرقت الباب من أذنلي بالدخول ، دخلت ابتسم وعدل گعدته وگال..

- تعالي حبيبتي

رحت گعدت يمه متوترة وافرك بأيدي ومنزله راسي لزم فكي ورفع راسي وگال مبتسم..

- شبيها روح اخوها

فتحت التلفون وطلعت المراسلة وانطيته التلفون والدمعة بطرف عيني رجعلي التلفون وهز راسه مبتسم..

- اعرف

- شـ شلون؟!!

- لؤي راواني المحادثه وگالي يعني فاتحني بالموضوع بس ما اعرف وافقتي

خجلت منه وهمست..
- اذا تريد ارفض

- مادام انتِ موافقة وهذا قرارج اني ما ادخل بس اريد اطمنج بشغلة تره لؤي خوش لؤي رجال ونعم منه ما عنده سوالف مكسره ورزن وعينه ما يرفعها بعين مرة يعني انسان جدًا خلوق ومحترم وانتِ تستاهلينه وهو يستاهلج

ابتسمت وگتله..
- هو يگول شايفج بس اني ما اعرفه

- ههههه اي الكووا* من عزمته هنا شافج وانتِ جايه من الشغل واعتذر مني وطلبج وبقى القرار يمج بعد

صدك يوم الخميس اجه هو واهله وبابا گعد يحقق ويه مهيب عليه يريد يعرف اصله وفصله وبعد يومين رجعنالهم الموافقة وصارت الخطوبة..

جنت حيل متوترة من دخل يلبسني الذهب بعد ما عقدنه وهو هم جان خجلان ومدنك ما رفع راسه حتى ما شافني ولا اني شفته وما گال كلمة حلوة حتى من صاحت اخته..

- بوسها بوسها

اباوعله خزرها بحيث اني من يمي متت خوف بس ما كسر واهسها تقرب وباس راسي واستأذن وطلع خلصت الخطوبة وردت انزع البدلة بس ماما گالت..

- خليج ماما خطيبج يريد يشوفج

توترت حيل وره شوي اجه مهيب باس راسي وباركلي واني لافه شال على جسمي واخذني من ايدي للدوانيه ، كُل هذا واني ما رفعت راسي..

مهيب- يول اختي لو زعلتها اموتك

لؤي- هههه بعيوني لا تخاف عليها

مهيب- عشر دقائق واجي اخذها احترم نفسك ولا تطلع زايد

لؤي- هههههه بس فارك

باس راسي وطلع ساد الباب بقيت ساده عيوني وقابضه على البدله حسيت بي واگف گدامي وايده سحبت الشال مني..

لؤي- اللهم صلِّ على محمد وآل محمد ملاك طالعة

سكتت ما اعرف شنو احجي حاوط خدودي بين ايدي وگال..
- فتحي عيون الغزال داشوفهم

فتحت عيوني على كيف ووكعت بعيونه صفنت بوجهه شلون حلو يربي الشوارب محدده والبشره حنطيه وحواجبه ضخان ومتصلات والرموش اويلي يابه من كثافتهم..

ابتسم وتقرب بايس خدي..
- حاجيني اريد اسم صوت غزالتي

- شنو؟

- ليش ترجفين؟

هزيت راسي بـ لا ما اعرف شنو اگول اخذني من ايدي وگعدني على القنفه وگعد يمي لازم ايدي..

- سولفلج عني مهيب؟

- اي

- يعني تعرفين انه وحيد اهلي وبس اخت وحدة عندي ومتزوجة وامي وابوي ربي يحفظم موجودين

- اي اعرف

- تردين بيت وحدج؟

باوعتله وهمست..
- انتَ تريد تطلع؟

- انه اريد رأيج والا ما يهون عليه اعوف امي وابوي بس انتِ هم مرتي وراحتج تهمني واريد اعرف رأيج علمود اتصرف

- لا نبقى وياهم حبيت امك

- الطيب يحب الطيب يعني ما عندج مشكلة

- لا ويه اهلك نعيش

- تدللين ، راما؟

- ها

- اعرف ما تعرفيني وما متعودة عليه ان شاء الله بفترة الخطوبة نتعرف اكثر وثقي بالله ما بيوم ازعلج واحطج بين عيوني ما دام راضيتني وحاطه امي وابوي بين عيونج

- ان شاء الله ما اقصر بحقكم

- متأكد متأكد

دخل مهيب بدون ما يدك الباب وگال..
مهيب- شو اخذت راحتك يله يله فارك

لؤي- هههههه گايم

تقرب وباس خدي ما احس غير مهيب صاح..
- ولككك گوواا* گدامي؟

- مرتيييي وبكيفيي يله سوي طريق اطلع

لؤي جان انسان رائع والي گاله بحقه مهيب قليل دللني دلال ما صاير وگدرنه نتعرف على بعض خلال فترة قصيرة وبذلك تم زواجنه خلال شهرين فترة خطوبة..

امه وابو من اهل الله واخته بعد حبابه وتجي بين فترة وفترة تبقى يومين يمنه هي واطفالها وما شفت منهم شي مو حلو ولا بيوم جرحوني او أذوني بكلمة..

بس ماكو حياة مثالية ابد..
لان وبعد سنة من زواجنه اكتشفنه خلال الفحوصات انُ لؤي عقيم وهيج وكفت محتارة بين حبي اله او اكون ام..

بس بالاخير هو فاز لان حبي اله اكبر من اي شي وبقينه مستمرين بالعلاجات على آمل انُ ننرزق بيوم من الايام بطفل..

ايـة*

جنت حاطه اللابتوب مال قيصر بحضني ويم حبشكلات واتابع المسلسل وعيوني تصب بوقتها الجهال جانوا يم همسه..

دخل قيصر واني بهاي حالتي وبطني كبرانه هز ايده ودخل متخصر..

- منو مات هاي المرة؟؟

شهگت وجاوبته..
- باوع شلون حابسها بالمخزن الحقير

خزرني واخذ ملابسه وگال..
- المسلسلات هاي تأثر عليج بابا وانتِ حامل

- وين اروح ضوجه؟

- روحي يم اختج اتصلي على اهلج باوعي اشياء مفيدة او حتى مسلسلات فكاهيه مو دك ولطم وانتِ وياهم على الواهس

- ما احب الكوميدي

- مو شرنفص تحبين اللطم

- قيصرررر

ضحك وگعد يمي سد اللابتوب وباس قريب شفتي وگال..

- روحـه

- حبيبي ضايجه اني

- تردين نطلع لو مثل ذيج المرة ترجعينه قبل لا نوصل!

- فررني بالسيارة ما بيه امشي رجلي موتاتني

مد ايده ويفرك برجلي دفعت ايده ضاحكه..
- شجاي تسوي!!

- اشش تعالي تمددي

سحبني ومددني گام نزع القميص مال الشغل وبقى بس بالبنطرون والفانيله السوده رجع گعد ويدلك برجليه وايديه اخر شي مسح على بطني وگال..

- نامي شوي بالليل اخذج انتِ والجهال ونطلع نفتر بالسيارة

- اي

باس راسي وطلع واني جنت نعسانه بسرعة غفيت..

فترة وحسيت بوسات تنطبع على رقبتي وخدودي عرفته قيصر من ريحته
مرر ايده على بطني وعض شحمة اذني على كيف وهمس..

- الحلو گاعد ومستمتع بلمساتي؟

- حبيبي

- گلبه ودگاته

- احبك

- اموت على ربج عوضي ، يله شنو ما تگعدين؟

- نطلع؟

- اي انه سبحت جود وسجاد وبدلتلهم بقيتي بس انتِ

فتحت عيوني على كيف جان قريب حيل مني مررت ايدي على خده ورفعت نفسي بايسته بادلني مبتسم وحتى من ابتعدت بقى مبتسم..

دمعت عيوني وهمست..
- اعرف بيك ضايج بس شنسوي مو بيدنه هذا الشي

- الحمد لله اهم شي تمام الخلقة

- بعدين اخ ثالث لاطفالنا حلو

- نجيبلهم اخت

ردت اعترض بسرعة حط اصبعه السبابه على شفايفي وگال..

- اية حيل بنفسي بنية تشبهج لا تحرميني ما اكلج هسه لا خلي يكبرون وبعدين نفكر هاا؟

صفنت بوجهه وبلحظة ضعف هزيت راسي موافقة فرح حيل وساعدني اسبح وابدل لان صايره ثگيلة ومرات اوكع فـ لذلك يخاف عليه ما يخليني وحدي ولو التحق اروح يم همسه انام بغرفة الضيوف وبيتنا ينقفل منا لمن يرجع..

اخذنه بالسيارة يفتر بينه اشترالنه موطه ونزل جاب العاب للجهال واني بقيت بالسيارة من رجع جان جايبلي وياه دب احمر يخبل باس ايدي وگال..

- هذا الج حبيبي

- يخبل شكرًا

- يدلل الحلو

وهيج وبعد اشهر قليلة نور عائلتنه الاستاذ ايهاب وزادت عائلتنه نفر بولادتي جان ملتحق وما جنه مقررين شنو نسمي واشارة ماكو ما حصلناه لذلك سماه بابا وعمو ابو قيصر..

همسـه*

سوينه حفلة بسيطة لـ جود ونور بمناسبة نجاحهم وجانت كُل العائلة موجودة اهلي واهل مُخلد حتى وداد جانت موجودة وابنها بحضنها عمره سنتين
تزوجت بعد موت ايهم بـ 4 سنوات بس ما زال حبه بداخلها..

للاسف ما گدرت تتخطى حبها اله
وما اظن راح تتخطى..

واسل لا زالت مخطوبة بس بعد تعب اقتنع بابا وبداية الشهر زواجهم..

راما ولؤي مستمرين بالعلاج على امل بيوم ينرزقون بطفل..
واخر شي زوجها سوه عملية ولحد الان ماكو نتيجة..

مهيب وقُتيبة لا زالو عزابيه
حسب كلام قُتيبة..

- انا عايز اشوف الدُنيا من غير مرة تحكمني

مهيب معند ما يريد يزوج بدون سبب بس هيج راس يابس وما يسوي الا الي براسه..

امي وابوي وعمو ربي يحفظهم موجودين خيمة فوك راسنه..

اما مُنير وامير تزوجوا خوات بالجامعة وياهم واخذوا غرفنه القديمة..

...

جنت اوزع الكيكة على الاطباق من حسيت بوجوده ورايه ما نطقت لحد ما گال..
- حلوتي

ضحكت ودرت رافعة حاجبي..
- شرايد؟

- يابه والله فزت بالرهان وطالبج بوسه مو ذليتيني

- ماكو مُخلد جاي اشتغل

- اخذها غصب؟

- شحدك

- اسويها لو ابوج يوكف يباوعلي هم ابوسج

- صح صح

- تستهزءين؟

ما رديت عليه ما حسيت غير حاوط خصرين وسحبني عليه بايسني اريد ادفعه ماكو عيني على الباب خجلانه خاف احد يدخل ويشوفنه بهذا الوضع ابتعد وگال..

- احححح يالترافه

- اخجل اخجل خطار بيتك

- مرتي وبكيفي

- يله حبيبي روح بعدين نحجي

هز راسه واخذ الشغلات الجاهزة شوي واجن البنات يمي گالت وداد..

وداد- هههه مُخلد طردنه يگول مرتي وحدها بالمطبخ گومن ساعدنها ما اريدها تتعب

ضحكت على سوالفه وخلص الوقت بين سالفة وضحكة ونتذكر ايام قبل وبعدها كُل شخص اخذ زوجته وراح لبيته..

بالليل ...
مدده على صدره وايده تلعب بخصلات شعري جنت نعسانه حيل وتعبانة همس..

مُخلد- قارورتي؟

جنت اسمعه واحس بلمساته بس ما اگدر افتح عيوني او اجاوب من النعاس باس طرف شفتي وگال بنفس الصوت الهامس..

- يا محله الليل بحضنج قارورتي

...

نهاية البداية 🤍.

صار لازم نسد الباب ونخليهم بحياتهم وندعي الهم بالتوفيق عن نفسي جدًا استمتعت بكتابتي للقصـة حزنت لحزنهم وفرحت لفرحهم وبالنهاية هذا قدرهم والحمد لله على كُلشي صار هاي ارادة رب العالمين ونحن مؤمنين بيه 🥺🤍.

كلمة منكم بالختامية
تبقى ذكرى 🤍