﷽
-الكاتبة: سـارة الحـسن
-Part 12
-"لا تنسون التصويت ومتابعة الحساب فيـروزاتـي"🤎
▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫
-بس ما تمت هل فرحة واكثر شخص طفت فرحته هي هزراف بـ لحظه دخــول عمـي أكثـم وابوية وصاح عمـي أكثـم
::-راح نطلع من هل البيت بسرعه
هـود: شصاير عمـي
-باوع لـ هـود بحيرة ويفرك براسه وكال
::-عمـك تركان مغتصب طفلة واهلها روس كبار
-عمتـي هاجر شهكت واحنه من الصدمة محد كدر ينطق شي ومحد مستوعب شدايحجي عمي أكثـم
-اتجهت نضراتنه كلنه ع الميــرزا من دخل يمشى بـهدوء وراهم وصوفر عاگد حاجبه وكال
::-روس كبار شنـي؟! چا انتو روس طليان؟!
أكثـم: مو وكتك ابن الكلب موووو وكتك
الميــرزا: عيب ابو رســول رتبتك ع جتفك بوزن جبل وشارد من ذوله
معاذ: صَــفد تريد تطلع ويانه اطلع ماتريد انطمر هنا وطبك مرض
-صاح بينه عمي أكثـم بعصبية
::-اتحركن المن واكفااااااااااات
-كعـد هـود بـ مكانه وجاوبه بـ هدوء
::-عليمن طالعين؟! اذا روس كبار مثل ماتكول معناها راح يلكونه وين مانروح
اكثـم: ماراح يلكونه
هـود: سلم عمي تركان للعادله وراح تكدر تحمينه
أكثـم: تريد اسلم اخوية وينحبس
-اتنرفز الميــرزا من حجاية عمي أكثـم ونتر بي
::-لو واحد منهم مغتصب سدرة جان هم حجيت هاي حجايتك بس هو الأعوج يبقى طول عمره اعوج
-عافنة وطلع وكعد عمي أكثـم ع طرف الكرويته ولازم راسه ومبين عليهم الحيرة وحقهم المصيبة جبيرة وابد مو هينه
-كعد ابوية بصف عمي أكثـم وكال
::-كلام هـود صح خل نسلم تركان للعادله احسن من ما يوكع بيدهم ويگتلونه
أكثـم: انتَ تعرفهم هذوله شنو لو تريد اعلمك بيهم، شوكت ما يعرفون مكان تركان راح يگتلونه حتى لو دخل السجن هم راح يگتلونه بـ السجن
معاذ: هذا قدرة بعد
أكثـم: لا مستحيل اقبلها راح احاول اسوي كلشي حتى ما يموت تركان
معاذ: لو تركان لو شخص من العائلة توقع اني او انت او ابوك او واحد من ولدنه
أكثـم: مااااااكدر معااااااذ شلووووون اضحي بـ اخوية
معاذ: شلووووون ضحى بينه لعد وهو بعملته هاي كلنه ضربنه بعرض الحايط وبعدك تكول اخوية
أكثـم: انت سامع الي يكول اني واخوية ع ابن عمي واني وابن عمي ع الغريب
معاذ: مو ع اطفال النااااااس أكثـم
-جانــو متعاركين كدامنه ونسـو احنه موجودين ونسـو شنو دايصير بينه من الخـوف، ما وكف بعينهم مرته وبنته وشنو موقفهن من همه يحجون هيج
-تقربت حضنت هزراف وكعدنه ع جهه وهي تبجي بـهدوء، وعمتـي هاجر مو اقل منها انهارت من سمعت بمصيبة زوجها
-دخــل جدي من برة مدخـن من العصبية وويا عمـي جاسر باوع لـ عمـي أكثـم وكال
::-وين اخوك؟!
أكثـم: مادري مامعروفه گاعه وين
جساس: اطلعليا من جوووووة الكااااااع أكثـم
أكثـم: فهمنه هسه شراح نسوي
-شمر عود الخيزران من ايده بـ قوة ع الحايط وصاح
::-لشوكت اطمطم بمصاااااايب اخووووك لشووووكت
معاذ: حجي عوف اللوم والصياح هسه وفهمنه شنسوي رحمه لموتاك
جساس: ادورون اخوكم الكــو** وين وتشمرونه بـ السجن وانعل ابو لبــو اصله
أكثـم: مو حل هذا
جساس: شلووووون تنحل لعد شلوووون فهمنـي يل فهيييييييم ولك زين منهم ومخلينه عايشين لهسه لو اني منهم وواحد مغتصب حفيداتي جان هسه حارك اهلهم ومامخلي واحد منهم يشم الهوى
أكثـم: اذا سلمنا هسه راح يموت مستحيل يخلونه عايش
جساس: موتت الچــلاب السود اذا ما ذبحو اني بيدي راح اذبحه
معاذ: انـي راح انطي خبر لناس يدورون عليه
-اخذ تلفونه وطلع برا، جدي كعد ع طرف الكرويتة يفرك بـصدرة وعمامي كاعدين منزلين روسهم، ندست هـود الي كاعد يمنه وهمست
::-جيب مي لـ جدو
-هز راسه وكام جابله مي وسأله
::-جدي اجيبلك علاجـك؟!
-شرب المي كله وهز راسه بـ لا وبقى كاعد ويهز رجله بـ توتر، شوية ودخــل ابوية كعد مقابيل جدي وكال
::-كلفت ناس يدورون عليه، بس لازم نتواصل ويه اهل الطفلة
جساس: بيـا عيـن نتواصل وياهم شنكللهم والله اعذرونه ابنه سكير وما واعي ع نفسه ودمر حياة طفلة اصغر من بنته
-صار يضرب ع صدرة بـقبضة ايده بقهر ويحجي
::-ولكم مربيلي حيواااااان تدنه نفسه ع طفلة عمرها 14سنـه ولكم ليييييييش شنوووو ذنبهاااااا، ما خجل من نفسه بـكد البعير ونايمه فوك طفلة، ما اجت صورة بنته بعينه وهي مفرفحة جواااا
-كلامه يكسـر الظهر مجـرد تخيلت المنظر وموقف الطفلة كلبي نمرد والدموع تجمعت بعيني، حسيت ع هزراف لزمت ملابسي بقوة وضمت راسها بحضني تبجي وتشهك
-من سمعها جدي باوعلها وحجه بغصه
::-ولج يجدي ابجي ع الطفلة لا تبجين ع ابوج الحيوان، ابجي ع الي ضاع عمرها من وره ابوج
-كام وكف يفتر بالصاله ويدك ع راسه بخفه وروحه لايبه ع الطفلة ويمكن لو يشوف عمي تركان بـهل لحظه يقتله بدون مايرفله چفــن
أكثـم: اذا ما تواصلنه وياهم راح تصير خساير هوايه واولهم احفادك
جساس: اخوك نزل راسي شلون اكدر اخلي عيني بعين احد من اهلها بس فهمني شكول شحجي
معاذ: راح احجي ويه الحجي عبدالقادر همه اصدقاء وراح يكدر يتفاهم وياهم
-سكت جدي ما جاوبة وابوية اتصل ع عبدالقادر ونطا مختصر وطلب منه يجي حتى يفهمه ع الموضوع كله
-مابيدهم شي غير ينتظرون عبدالقادر يجي ولازم يندلون مكان عمي تركان وين، رجعـو الولد كلهم للبيت ومبينه الحيرة بوجوهم
-جدي مره يفتر مره يكعد واحس روحه لايبه وحقه المصيبة جبيرة ومصيبة اهل الطفلة اكبر من مصيبتنة
-رفع راسه جدي يباوع علينه كلنه كاعدين بـ الصاله والخوف واضح علينه واستقرت عينه ع هزراف الي ما بطلت بجـي صدك جانت تكسر الخاطر
-اندار ع خيبـر وكال
::-روح جيب امك
-هـز راسه وكام طلع حتـى يجيب أريـج للبيت محد مهتم ومحد باله وياها بـهل اللحظه ع كد ما عقلنه وكلبنه وروحنه يم المصيبة الصارت
-مرت ساعتين ورجع خيبـر وأريـج للبيت وأريـج جانت ساكته لأن اكيد سمعت بـ الموضوع وتعرف مو وكتها تحجي شي
-ورة شوية دخـل فقــار سلم وتقرب ع جدي كال
::-جـدي عبدالقادر وابوية بـ المضيف
-كام جدي وعمامي والولد كلهم راحـو لـ عبدالقادر صحت ع هارون تركهم ورجعلي گمت من يم هزراف تقربت من هارون والخوف متملكني طبع بوسة ع راسي يطمني وكال
::-ابقي ويه هزراف لا تعوفيها
آفروز: لا طولون ارجع كللنه شراح يصير
هارون: صار
-جان الخوف واضح بعيونها وشما احجي مراح اكدر اطمنها، رجعت بستها وطلعت للمضيف
-كاعد عبدالقادر وحامد وفقــار وجدي يمهم والبقيه كاعدين ع جهه كال عبدالقادر
::-فهمــوني شصاير؟!
-تنهــد جدي بتعب وكال
::-تركان البارحه بـ الليل راجع سكران وشايف حفيدة ابو قيصر واكفه بـ الباب يكولون جانت تنتظر اخوها اصغر منها رايح للمحل يشتري الهم وجان الوقت شوية متأخر وتركان الحيوان متقرب عليها يطوطح وباقي يسحب بيدها من صارت تعيط ساد حلكها وشايلها ماخذها بـ بيت مهجور بس هيكل بـ الأفرع ومعتدي عليها
-جان يحجي بوجع كلب ومدنك راسه كال حامد
::-شلون عرفو بي تركان؟!
جساس: من راجع اخوها ويسأل عليها كايليله اهلها جانت تنتظرك بالباب ومن حسو عليها ماكو شايفين الكاميرات مالت بيتهم وشايفين تركان من شايلها وداخل بالأفرع وطالعيـن يدورون عليها لاكيها مشمورة بـ هيكل البيت المهجور واثار الأغتصاب واضحه عليها
-غطه عيونه بيده وبجى بصوت عالي ماكدر يتحمل واعرفه هذا البجي ع الطفلة مو ع تركان، رفع ايده عبدالقادر يطبطب ع كتفة وكال
::-الله يعينكم ع ما بلاكم
حامد: شلون عرفتو؟!
أكثـم: عمها ابو يمامه وصللنه الصار وجانت نبرة كلامه بيها تهديد اذا ما سلمناهم تركان راح تصير حرب
حامد: عايشة البنيه مو؟!
رسـول: اي لان لو ميته جان هسه داتصلي علينه صلاة الوحشة
-خزرة هـود وسكتة كال حامد
::-وتركان وينه هسه هم رجع للبيت بعد؟!
معاذ: لا ماكو ومرته تكول البارحه بالليل هم ما رجع
أكثـم: متعودين عليه يسكر ويبقى مطمور برا البيت بس ما جنه نعرف راح توصل نذالته للاغتصاب
عبدالقادر: ابو قيصر راح يطلب تركان مقابل الصار
-مسح وجهه جدي وكال
::-شيريد يجراله بس لا يگرب صوب احفادي
عبدالقادر: لا ان شاء الله مايصير شي ابو قيصر رجال يخاف الله
جساس: شيريد احنه حاضرين وتركان راح ياخذ جزاته لو اخر يوم بـعمري
معاذ: بس نعرف مكانه راح ينسجن ولا يهمك
أكثـم: عمي ابو حامد ياريت لو تحجي وياهم ع هل اساس وكللهم تركان راح ينسجن بس لا يقتلو
-صاح بي جدي من حرگه كلبه
::-هيج حيوان ما يستاهل يعيييييييش عساااااا بجهنم وبئس المصير
أكثـم: الحيوان التحجي عليه اخوية
جساس: لعد مو ابني هووووو؟! ليش تحسسني ابن عدوي هو ليييييش
-انتفض عمي أكثـم من مكانه وصاح بصوت عالي
::-لأن سبب حالته كلها بسببك محد وصله للشرب غيييييرك
عبدالقادر: كااافي أكثـم هي وكتها يبعد عمك
حامد: كولو يا الله محد راح يموت
عبدالقادر: حاولو تعرفون مكان تركان وتسلمو للعدالة لأن سالفه مغتصب بنتهم لهسه محد يعرف مكانه راح تزيد النار حطب
-نهض من مكانه وكال لـ حامد وفقــار
::-امشونه نروح لابو قيصر وان شاء الله محلوله
-طلع عبدالقادر وهمه طلعو ويا وبقى جدي كاعد ولازم راسه ورسـول تقرب منه يحجي ويا بقلق لان وضعه ما يطمن
::-جدي كوم ارتاح بغرفتك شويه
-ما حجه شي وكام ويه رسـول بعده بنص المضيف ووكع جدي فاقد الوعي، ركضنه عليه كلنه وانخبصنه خايفين عليه صاح هـود
::-بسرعه نااااخذه للمستشفى
-تكابلنه عليه شلنا صعدنا للسيارة واخذنا للمستشفى اول ما فحصو كالو
::-تعرض لـ ذبحة صدرية ويحتاج قسطرة
-فوك الضيم الاحنه بي زادها علينه جدي بوكعته، كمل هـود الأجراءات ودخلو للعمليات تقريبا اقل الساعة وطلعو وحولو لغرفة ثانية والمستشفى هوستها واصله للضالين، الصاحي يتمرض بيها
-كعد يمي رسـول يحك براسه وكال بـ قرف
::-شو شوف راسي يمكن بي گمل
هارون: منين يجيك الگمل؟!
رسـول: مادري احسه يمشي براسـي
هارون: روح للبيت اسبح صارلك كم يوم ما سابح
رسـول: شو تحسسني واحد معفن كدامك
هارون: هو الگمل منين يجي لعد غير من الوصخ
رسـول: لا من اختك السحارة
هارون: تروحلها فدوة ابو الگمل
رسـول: احجي صدك اني يمكن بيه گمل
هارون: ان شاء الله يوم لـ لحيتك وتصير ثخينه لدرجه تگَمُــل
رسـول: استغفر الله وحق النبي هـود الا ادكها صفر
هارون: واحنه شكو بيك
رسـول: ما انطيكم مجال تحجون ع لحيتي
هارون: كوم شوف هـود وين وشوكت نطلع جدي عوف الخرط ما أله داعي
-كام مـن يمـي يشوف هـود واني دخلت ع جدي جان كاعد ويمه ابوية وعمامي بس واضح ع ملامحه التعب والحزن تقربت عليه طبعت بوسه ع راسه
::-الحمدلله ع السلامة جدي
-ابتسم بـ تعب وما نطـق شي، دخـل هـود وويا عبدالقادر وحامد، كعد قريب من جدي ويباوعله بـ حزن وكال
::-ماعرفتك هيـچ ضعيف يا رفيـچ دربي
جساس: تعبـونـي يا أبـو حامد حيل تعبـونـي
-تنـهد عبدالقادر وسكت، وكال جدي
::-شصـار وياكم؟!
حامد: أبـو قيصر انطى مهله أسبـوع لازم تركان يكون بـ السجن وخلاف هل شي كال راح ياخذ رهينه من احفادك وشرط بنيه لـ بين ما ينسجن تركان
-حاول يتحرك يريد يكعد ركض عليه هـود وحجه بسرعه
::-لا تتحرك جدي تأذي نفسك
-دفع ايد هـود عنه بـخفه وكال
::-مستحيل اخلي وحده من حفيداتي تروح يمهم يريد ياخذ حق بنته اني وولدي ركبنه سداده بس احفادي خط احمر
عبدالقادر: ان شاء الله ماراح يصير هل شي وراح ينسجن تركان
-اندار ع ابوية وكال
::-وينه لهسه معاذ وينه ليش ما عرفتو مكانه
معاذ: گلبتها للدنيا عليه ماخليت واحد اعرفه ببـغداد وما نطيته خبر يدور عليه بس ماكو فـص ملح وذاب
حامد: احتمال طلع من بغداد
معاذ: خليت خبر بـ السيطرات الصبح
حامد: هو من البارحه بالليل مغتصبها يمكن طلع البارحه
معاذ: لا مايكدر لان سكران ومو بوعيه التام حتى يكدر يطلع مـن بغداد، أقـل شي للصبح يلا كدر يصحى لان يثگل هو
جساس: اطلعونه من جوة الكاع معاااااذ
معاذ: ان شاء الله حجي بس ارتاح انت
-سكت جدي وبقينه يمه، مرت فترة من الوقت واتصلت عليه آفروز الي لسه محد نطاهم خبر طلعت من الغرفه وجاوبتها
::-هــا آفروز
آفروز: وين رحتـو؟! ليش مارجعتـو لهسه؟! هاي عود كتلك طمنـي
هارون: تعلمي تسألين سؤال سؤال لا تخرطيهن كلهن
آفروز: ع جايات هسه احجي شصار
هارون: ماكو شي هسه شويه ونرجع
آفروز: وين انتـو؟! ولا تغلس..
هارون: راح اكلج بس لا تنفعلين ولا تكولين لاحد
آفروز: الله يستر بس
هارون: جدي اتخربط واتعرض لـ ذبحة صدرية واحتاج قسطرة بس هسه زين وراح نطلعه
آفروز: يا جد منهم؟! شتحجي هارون؟!
هارون: اخخخخ الله لو ما المصيبة الاحنه بيها جان شحجيت حجاية
آفروز: عزاااا هارون ولك شو ماندري
هارون: صيحي بعد صيحي خلي البيت كله يعرف
آفروز: واذا عرفو؟! منو الراح يخاف ويقلق أريـج؟! ترا بس احفاده كلبهم عليه واولهم اني
هارون: مابي شي والله هسه زين بس مقهور من الصار ولأن عمـج تركان ماكو هم لحد هسه
آفروز: وين راح عمك؟!
هارون: اول شي هو عمج لا تكولين عمك، وثاني شي ماعرف ابوية من الصبح يدور عليه وماكو تبخــر
آفروز: اممممم تمام
-ودعته بعد ما اطمنت مره ثانيه ع صحه جدي وغلقته منـه، ودخلـت للبيت الكُـل كاعد بـ الصالة والحزن مخيم ع بيتنه الا أريـج الي ما مهتمه لـشي
-رجعـت كعدت يم هزراف الي دموعها ما وكفت طبعت بوسه ع راسها بـهدوء وحاولت اهديها بـ كلامي
::-صيـري قوية هزراف اوكفـي ويه امج عينيها لا تضعفين هيـج وتزيديها فوك همها ومصيبتها
-سندت راسها ع كتفـي تبجي وتهمس
::-ماكدر ماكدر مصدومه بـ ابوية طلع وحش مو بشر آفروز لأن ما ممكن البشر يكدر يسوي هيج
آفروز: حقــج ما الومج كلنه مصدومين مو بس انتِ بس دموعج ماراح تغير شي هسه بس اتعبين كلبـچ
هزراف: ما سمعتي شلون يحجون اعرف ما يستاهل التعاطف بس مو يموت والله صعبه
آفروز: ما يموت راح ينسجن وبس
-رفعت راسها تمسح بدموعها وكالت
::-وينه جدو وين راح؟!
آفروز: هسه راجعين بـ الطريق
-بقيت كاعده يمها وراحت عيني ع عمتـي أريـج تباوعلي بنضرات عادية درت وجهـي عنها لأن ابد مو وكتها
-افترت عيـوني ع كُــل الموجودين ماكو نوسـي اخو هزراف الصغير، گمـت من مكانـي ادور عليه اول شي رحت لغرفتهم ماكو بعدين رجعت للمطبخ جان كاعد وياكل خُــبز
-ابتسمت وتقربت سحب وجهه بوست خدوده وسألته
::-ليـش كاعد هنا حبيبي؟!
نوسـي: دوعان
آفروز: شجاي ع بالك تاكل
-ابتسم وكال بـفرحه
::-اليد معكلونية (اريد معكرونية)
-اشرتله ع عيوني وجاوبتة
::-من هاي عيني قبل هاي
-شمر الخبزة من ايده وكال
::-ما لاح اتل حتى ما اثبع (ما راح اكل حتى ما اشبع)
-ضحكت ع سوالفه وگمت خليت معكرونية ع النار وطلعت فواكهه من الثلاجة جان موسم التفاح الصغار واكو موز هم لان الولد يشربون عصير موز وشوفان وبيض لان يلعبون حديد يدورون عضلات العطلات
-غسلتهن وكعدت يمه خليتهن كدامه بـ ماعون
::-اكل هاي الفواكهه لان المعكرونية تتأخر شوية
نوسـي: مو اثبع
آفروز: لا ما تشبع هنه قليلات
-هـز راسه وكعد ياكل، نوسـي اصغر شخص بـ العائله عمرة خمس سنوات اسمه يونس واحنه ندلعه نوسـي
-طلعت ع اليوتيوب شلون اسوي شوربة شوفان ردتها لـ جدي اكيد مايكدر ياكل اشياء ثكيلة هسه
-طبقت الخطوات وخليتها ع نار هادية لـما تنطبخ زين، وكملت المعكرونية لـ نوسـي وخليتها كدامه بس حارة تقربت منه وحجيت بـ همس
::-نوسـي حبيبي راح اصيح هزراف تاكل عميات ويانه وكللها الا تاكلين يلا اكل تمام
-هز راسه وهو عينه ع الأكل، تركته وطلعت للصاله ع هزراف اشرتلها تجي ويايه كامت من مكانه تقربت مني وحجت بـصوت مبحوح من البجي
::-هــا آفروز
آفروز: سويت اكل لـ نوسـي بس ميقبل ياكل يكول اريد هزراف ويايه
-هزت راسها ودخلت للمطبخ كدامي كعدت يم نوسـي وحجت ويا بهدوء
-يلا نوسـي اكل هسه بطنك جوعانه مو
-هز راسه وجاوبها ببرائه
::-اتلي ايايه (اكلي ويايه)
هزراف: اني شبعانه حبيبي اكل انتَ
نوسـي: ماليد لعد (ماريد لعد)
-كعدت يمهم اسويلهم واهس
::-يلا بلشو اني هم راح اكل وياكم
-رفعت عيني ع هزراف خزرتها واشرتلها تاكل عود علمود نوسـي
::-يلا هزراف اكلي حتى نوسـي هم ياكل جوعان خطيه
-هزت راسها وكعدت تاكل ويانه تخلي لگمه بحلكها وتاخذلها صفنه ساعه واني احجي حتى انبهه وترجع تاكل ويانه
-كملنه اكل وهي اخذت نوسـي غسلتله وطلعت للصالة واني كملت شوربة جدي هم وطلعت وراهم
-مرت فترة نص ساعه تقريباً واجو عمامي وجدي وياهم مستند ع هـود ورسـول كامت امي وزوجات عمامي عليهم وتفاجئو من شافو وضع جدي هيج
عليا: شصاير شبي عمي؟!
هارون: تعبان شويه
-اشر جدي ع غرفتة وحجه ويه هـود
::-اخذني لـ غرفتي
-ما حجو شي دخلو لغرفتة وطلب ينفرد بنفسه مايريد احد يمه، كعدو عمامي بـ الصاله سألت عمتـي أريـج
::-شصار وياكم؟!
أكثـم: ما صار شي
أريـج: شبي ابوية
أكثـم: تعرض لـ ذبحة صدرية واحتاج قسطرة وجنه بـ المستشفى
أريـج: وليش احنه ماندري ليش محد حجه بيكم
أكثـم: هسه انتِ هذا همج لازم تعرفين شيصير بدل هل حجي روحي شوفي ابوج اطمني عليه هوني عليه مصيبتة حسسي بحنية البنيه بس انتِ وين محسوبه ع البنات تارس كلبج الحقد والغل
-نهض من مكانه وصاح بـ عصبية ع جوري
::-جووووري
-كامت من مكانها وركضت ورا دخلو غرفتهم ومبين جان متنرفز وعصبي وفرغ عصبيته بـ عمتـي أريـج
-هزت ايدها ما عاجبها الوضع وكالت
::-وهو ع اساس ابوك يقدر الاهتمام
-محد جاوبها ماكو هيج بنيه كلبها قاسي ع ابوها رغم حبه واهتمامه بيها، بس هي جان الحقد عامي كلبها
عليا: ماما هارون وين ابوك
هارون: بـ المضيف يم عبدالقادر وحامد راح يبقون يمنه اليوم
أريـج: وشعدهم هذوله يمنه خيييييير؟!
-جاوبها الميــرزا الي جان داخل من برة، بـنبرة مستفزة
::-خطابة عليج بنت جدي خلي حُمــرة واخذيلهم چاي الخطوبة
-طفرت من مكانها بسرعه وعيونها متشخصة ع الميــرزا الي غمزلها وكمل طريقة صاعد الدرج وهي كالت
::-شجاااابة هذاااااا
الميــرزا: بـ السيارة اجيت
-بقت مصدومة وهو صعد لـ غرفته يمشي سريع، بقت ساكته وعيونها ع الدرج كال هارون لـ امي
::-جبت اكل جاهز بس حضري النه
-ما حجت شي امي وهو طلع جاب الأكل من السيارة ونطا الأمي وصعد لـ غرفتة، وعمتـي أريـج بعد صدمتها دخلت لـ غرفتها، فترة قصيرة وطلعت شايلة ملابسها ودخلت للحمام
-مرت فترة 10 دقايق او اكثر وسمعنه صوت الميــرزا بـ الطابق الثاني يصيح، كالت هناء بـ حقد
::-الله ياخذك ويعدم صوتك
-نزل من الدرج يمشي سريع وبيـده ملابسه وصل للحمام الجوة شافها مقفولة وصاح
::-منـو هنــاااااااا يمعووووود
-سمع صوت عمتـي أريـج ورجع صاح
::-شلون يعني بنت جدي ما نسبح من وراكم اليوم
هناء: شبيك بس تصيح ما تكول اكو مريض بـ هل بيت
-باوعلها صفـح وجاوبها لـ اشمئزاز
::-ومن شوكت انتِ تخافين ع المريض؟! لو صرتـي أدمية تالي وگـت؟!
-دارت وجها وسكتت ما جاوبتة وهو دك باب الحمام وصاح
::-يلاااااا حفيدة العايش شطلعت هاي
أريـج: شبيييييك اطير يعني غير أكمل سبح
الميــرزا: هو الوصخة روحه شيفيد بي السبـح
-صارت أريـج ادردم ابتسمت لان كدر يغثها گمت من مكاني وكفت يم الميــرزا وهمست
::-طلعت متغطرس
-رفـع حاجبه يباوعلي هز راسه وكال
::-خيـرج؟!
-توسعت ابتسامتي ومجاوبتة درت وجهي ورحت للمطبخ شفت امي تحضر بـ الأكل
::-تحتاجين مساعدة
عليا: لا ماما ماعندي شي
آفروز: اني سويت شوربة لـ جدو راح اخذله منها اكيد عنده علاج
عليا: عاشت ايدج ماما
-ابتسمتلها وصبيت شوربة لـ جدي واخذتها ورحت لـ غرفته فتحت الباب ودخلت بدون ما ادكها جان نايم ومخلي ايده ع عيــونه وحجه بدون ما يعرف منو
::-اطلع برا
آفروز: جدو حبيبي
-رفع ايده من عيونه وباوعلي بـنضرات مليانه حـزن وكال
::-تعالي يبعد جدج
-خليت الاكل ع جهه وكعدت يمه ع جرباية سحبت ايده بستها بقوة
::-لا تضيعنه جدو، صير زين بسرعه
جساس: تعب جدج وانهد حيله
آفروز: كلنه نتعب لـ تعبك
جساس: الخذلان من ولدي صعب والموت عندي اهون
-ماعرف شحجي وشلون اواسي بقت ساكته واباوعله وهو مدنك راسه وكمل كلامه
::-شيحمل كلب جدج المصيبة الصارت وضحيتها طفله تمرد الروح لو سمعة بيت العايش الصارت بـ الطين واني فنيت عمري حتـى اوصل للوصلتله
-فرك وجهه بـ تعب وهمس
::-وهم اني السبب
آفروز: انتَ شعليك جدو لا تلوم نفسك
جساس: اني السبب بـ حالة تركان
آفروز: ارتاح جدو لا تحجي شي تتعب
جساس: خليني احجي يـ آفروز خليني اطلع ضيم كلبي المكبوت كل هـاي السنين
آفروز: يا ضيـم جدو؟!
-باوعلي وكال بـ حزن
::-تركان صار يشرب بسببي
-بقيت ساكته واباوعله جان تعبان وحالته تقهر بس حسيته صدك محتاج يحجي ويفرغ الي بداخله
-اتنهد بـقوة وياها حسره طويلة وكال
::-أجاني بيوم من الايام تركان وكال
تركان: يابة اريد اتزوج
جساس: ههههه يا الله اقتنعت واخيراً
تركان: اي بس مو هاجر التريد تزوجنياها
جساس: لعــد منو؟!
تركان: اني احب وحده واعرفها من فتره طويلة واريد اتزوجها
-ضربت بـ عود الخيزران بخفه ع كتفه وجاوبتة اني وكاز ع اسناني
::-زواج ومن بنيه غير هاجر ماكوووو
تركان: يابة شنو ذنبي وذنب هاجر هيج ادمر حياتنه
جساس: الحُـب يجي بعد الزواج مو شرط قبله وراح تنسيك كل البنات المرن بحياتك
تركان: ماريد انسى وماريد اتزوج اني احب بنيه واريدها هي شلون يعني
جساس: وسمعت جوابي مو؟!
تركان: يعنـي تريد تزوجنـي هاجر علمود مصلحتك، شنو من اب انت ادمر حياة ابنك علمود الفلوس
جساس: وهاي الفلوس المن؟! مو حتى تعيشون عيشة كريمه مو حتى يصيرلكم صيت واسم ينرفع بي الراس بين الناس
تركان: الراسه مرفوع بين الناس بـ اخلاقة بـ سمعته الطيبة مو بفلوسه حجي
جساس: احنه بـ زمن الفلوس، اذا ماعندك فلس كلشي ماتسوة
تركان: مستحيل اتزوج هيج زواج اني
جساس: راح تتزوج غصباً عليك
تركان: اني مو أريـج وتكدر تغصبني
جساس: الك هل اسبوعين تفكر عدل وتقرر اذا ما تتزوج هاجر ما الك وجود بحياتنه كلها مو بس بهل بيت
-تركته بحيرته طول هاي الاسبوعين، وجان متأكد مايكدر يعيش بعيد عني والسبب لان شغله ويايه واذا قرر يتزوج الي يحبها ويطلع من هل بيت يعرف راح احاربه وما راح اخلي اي شخص يشغله يمه
-ضغطت عليه بـ هل موضوع وبعد اسبوعين دخل غرفتي مدنك راسه وكال بدون ما يباوعلي
::-راح اتزوج هاجر
جساس: عرفتك ذكي وراح تفكر بـ مصلحتك قبل كلشي
-ماحجه شي بوقتها وطلع وبعد ايام رحنه وخطبناله هاجر وتزوجو خلال اسبوعين بس هو هادئ وما يحجي ويه احد ع كد سؤال وجواب
-ما اهتميتله كلت فترة ويتعدل ويرجع عقله لراسه وراح يعرف الي سويته لـ مصلحته، دخلت شراكه ويه ابو هاجر وكدرت اطور شغلي اكثر من قبل وصار خير من الله
-بس هذا الخير جان ع حساب فرحه وسعاده ابنـي، بعد فترة كم شهر ولأول مره اشوف ابني بحاله يُـثرى عليها
-دخــل للبيت يطوطح سكران بصعوبة يمشي ويوكع وريحه العرگ بي يشمها سابع جار، وصلت بيه العصبية بذيج اللحظه حتى ضربتة
-وهيج استمــر كُـل ليلة يرجع سكران وزهگت منه هاجر وزعلت وراحت لاهلها ورادت تطلك بس ماكدرو لان هاجر جانت حامل بـ هزراف بذاك الوقت
-رجعت يمه بعد هوايه شروط منها ومن ابوها، واستعدل تركان فتره من سمع بـ حمل هاجر وحمدنه الله وشكرنا لان رجع لوعيه وترك السم الهاري
-قبل لا تنور الدنيا هزراف بـ اسبوع رجع تركان لـ حالتة دخل من هل باب وكعد بـ الكاع كدامي سكران ويبجي وجان يردد نفس الجُـملة
::-ماتت انتحرت ماتحملت من عرفت بيه متزوج ماتت
-فقـد عقلة وصار يفتر بـ هل غرفة يصيح ويبجي
::-ذنبهااااا بركبتك جساااااااس ماتت من ورااااااك ماااتت
-والـي فهمته حبيبته انتحرت ورة ماعرفت بي متزوج وراح تجي بنيه، اجت هزراف وصار اسمها هزراف ع اسم حبيبته الي انتحرت
-معنى اسمها نوع من انواع الغزال اسمه هزراف، استمر 5 سنوات وهو يجيب غزالة يربيها بـ البستان وكُـل ليله يكعد يشرب يمها ويحجي وياها لـما يفقد الوعي ويرحون اخوته يجيبونه للبيت
-وما جانت أطول هوايه عنده الغزالة وتموت يمكن من الضيم الي تسمعه من تركان من علته الي مالها علاج
-وهاجر جانت اضعف من انو تنسي هزراف وتملي عليه حياته، ماكدرت تغير منه اي شي بس باقية ويا لـ خاطر بنتها
-جـر نفس بقوة ونزلت دمعته وكال
::-ماعرفت شلون احافظ عليهم كُـل الناس الي احبهم اخسرهم بـ لحظه كبرياء
-قربت ايدي من وجهه ومسحت دموعه وطبعت بوسه ع راسه وماعرفت شلون اواسي اشرلي ع الباب وكال
::-روحـي يبعد جدج خليني انام
آفروز: اكل شوية ونام جدو
جساس: ما اريد شي بنيتي روحي
آفروز: لـ خاطرنه جدو
-هز راسه وساعدته سند ظهره ع طرف الجرباية وجبت الصينيه خليتها ع رجليه وحجيت ويا بـ ابتسامه
::-جدو اوكلك اني؟!
-سحب الملعقة منـي وجاوبني مبتسم
::-لا يبعد جدج اني اكل
-بقيت كاعده يمه وهو اكل شوية وكال مايكدر بعد، طلعت الصينينة للمطبخ وجبتله مي، نطيته علاجة ورجعت عدلت المخاد اله حتى ينام واني احجي
::-اليوم راح انام يمك جدو
جساس: لا بنيتي روحي لـ فراشج
آفروز: ليش جدو شو ما تريدني
جساس: مو ما اريدج بس اريد هـود اليوم يمي
آفروز: ماشي هسه انطي خبر
-غطيته زين وطلعت من يمه وماكو احد بـ الصالة، صعدت لـ غرفة هـود ماكو احد عرفتهم كاعدين يم عبدالقادر
-اتصلت عليه جاوبني بـسرعه
::-هـــا آفروز
آفروز: وين انت؟! بـ المضيف؟!
هـود: اي محتاجة شي اجيج؟!
آفروز: جدو كال خل يجي ينام يمي اليوم
هـود: سهله شوية واجي
-غلقتة منه وصعدت لـ غرفتي جانت هزراف نايمه بـفراشها وبحضنها نوسـي، باوعت عليها غافية والدمعه ع خدها تقربت مسحت الدمعه وبستها من خدها واخذت ملابس وطفيت الأضوية وطلعت بوجهي للحمام
-استوقفني صوت رسـول يحجي وياية
::-هسه يتلبسج الجن
آفروز: الجن عايف هيفاء وهبي وجاي يتلبس آفروز
رسـول: نسيت ما يتلبس سحارات
آفروز: اقرا المعوذات ع نفسك ونام
رسـول: هو من يجيني الچاثوم توكف بعينه معوذات اني اقرا وهو يزيد يخنك بيه ابن المشعول
آفروز: تسمع اغاني من تنام طبعاً يجيك
رسـول: شسوي ادور صوت عَــذب انام عليه
آفروز: نهايتك جهنم وبئس المصير
رسـول: مايصير اعوفج وحدج بجهنم اني ابن عمج شيال همـچ حامي عرضـچ
آفروز: شهل خرط هذا سوسو
رسـول: اشتعلت صفحته كلمن طلع هل دلع الخايس
-عافني اضحك ودخل لـ غرفته واني دخلت سبحت وطلعت لكيت هوايه رسايل ومكالمات من فقــار، اتجاهلتهن واتصلت عليه جاوبني بسرعه
::-وينـج يروحي صار ساعه اتصل
آفروز: جنت يم صاحبتي
فقــار: هزراف؟!
آفروز: لا الليفة
فقــار: هههههههههه وماتردين تشوفين صاحبج شوية
آفروز: ماعندي صاحب
-قبـل لا يجاوبني كملت كلامي بـ اغنية
::-ماعندي صاحب زين واشكيلة
لا حُـب صدك يسوة اوافيله
يا جرح روحــي المحد يشيله
مسكينه ياروحي مسكينه ياروحي
فقــار: مبين مصيبة عمج مأثرة عليج
آفروز: اجت ببالي ماكدر اذا ما اغنيها
فقــار: انزلي انزلي اني بـ الحديقة
آفروز: تمام 10 دقايق وانزل
-غلقتة منه وجففت شعري يلا نزلت عليه، جان كاعد وعمتـي أريـج يمه، فرصه واجتني حتى اغيضها تقربت ع فقــار جان منطيني ظهره مديت ايدي ع كتفه ونزلت نفسي طبعت بوسه ع خده بـهدوء وهمست بصوت مسموع
::-اشتــاقيتلك
أريـج: مابقى بـهل بنيه لا مستحى ولا خجل
-ابتسم فقــار ممصدك خطيه حصل بوسه وجاوب أمه
::-رجلها وتبوسني شوكت ما يعجبها
-عوجت حلكها وسكتت رجع كال فقــار
::-هـــا شحجيته؟!
-ابتسمت مجاملة وكامت من مكانها تريد ترجع للبيت وكالت
::-اخذو راحتكم حبيبي
-اكتفى بـهزه راسه واني ع وكفتي وايدي ع كتفه من ابتعدت أريـج سحبني من ايدي ودارني كعدني ع رجله وكال بـ ابتسامه
::-مشتاقتلي صدك لو..؟؟!
-رفعت ايدي امسد ع خده بهدوء وجاوبته
::-اي مشتاقتلك
-بقـى يحرك خشمه ع خدي بـهدوء بدون ما يحجي شي، حاولت اكوم من حضنه شدد قبضته عليه وهمس
::-ابقي خليني اشبع من عطرج
آفروز: كاعدين بـ الحديقه احنه فقــار
فقــار: خطيبتي انتِ واذا
آفروز: عيب وفشلة من اخوتـي
-رفع راسه باوعلي مبتسم وخلاني أكوم وكعدني بصفه وكال
::-جنت ملتهي عنج اليوم اعذريني
آفروز: عاذرتك عيناي
-رفع ايده يلعب بشعري بهدوء وكعد يحجيلي شصار وياهم اليوم وكلام بيت ابو قيصر هم وبقينه سهرانين لوقت متأخر وبعدها هو راح نام بـ المضيف واني رجعت للبيت وبوجهي للمطبخ سويت لفة طماطه العشق وكعدت اكل
-فترة دقايق ودخــل الميــرزا جان راجع متأخر، ماحجه شي من شافني وطلع من المطبخ اقل الدقيقة ورجــع كعد كدامي وكال
::-تساعديني بـ مصيبة؟!
-شربت من العصير شوية وابتسمت وجاوبته بـ هدوء
::-حسب نوع المصيبة اذا تسوة او لا
-ضحك وكال
::-هو يلام هارون من كال ام مصايب
آفروز: استغفر الله اني بنيه ملتهيه بصلاتي وعبادتي ويني او وين المصايب
الميــرزا: صلاة وعبادة بدون حجاب مو؟!
آفروز: هو ما يخصك بس ترا اني اتحجب برا بس بالبيت ماكو
الميــرزا: الاسلام بدون حجاب مثل الصلاة بدون وضوء خليها ببالج
آفروز: شكرا ع المعلومة وهسه كول شني المصيبة!!
-كعد يحجيلي شغله بباله ويريدني اساعده بيها، واني قبلت بدون تفكير، ابتسم وكال
::-الخطه عليج
آفروز: اسهل من السهلة
-كعدت اشرحله شراح يسوي واني شلون راح اساعده وهو يهز براسها بعدها صار يطكطك ع طاوله بطرف اصابعه وكال
::-طلعتــي انتِ هم متغطرسه
آفروز: مساعدتي الك مابيها اي تغطرس، بس انت تصرفاتك ويه غيرك متغطرسة
الميــرزا: عوفج مني هسه والي حجيته لازم يصير الليله
آفروز: احتاج لفة طماطه ثانية
الميــرزا: هسه نلكى مصنع رمل بكلياتج من وره الطماطة
-ما علقت ع كلامه وگمت سويت لفة طماطة ثانية اكلتها وغسلت وحجيت ويا
::-يلا نبلش قبل لا انعس
الميــرزا: تنطين اهميه لنفسج هوايه
آفروز: اذا لـنفسي ما انطي اهميه، انطي الك مثلا؟!
-عيـب عليه بـ حلكه وسكت وبلشنه بـ الخطة الي اتفقنه عليها وخلال اقل النص ساعه بس نفذناها، ابتسم وهو يباوعلي فرگ خشمه بهدوء وكال
::-شكرا بنت معاذ
آفروز: تدلل أصـفاد
الميــرزا: صَــفد
آفروز: أصـفاد احلى
-رفع حاجبه يباوعلي ما عاجبه طنشته وصعدت لـ غرفتي نمت، وثاني يوم من الصبـح كاعدين ناس طلعت وناس بقت وجدي حالته تعبانه والنهار كله اني وهزراف مهتمين بي
-سدرة سوتله شوربة ع العشة واجت كعدت يمه خلتها كدامه واحنه ملتمين عليه وهو ياكل
-دخلـو عمامي وابوية كعدو بـ الصاله يم جدي سألهم بـتعب
::-ما عرفتو مكان اخوكم؟!
أكثـم: لحد هسه لا
جساس: وين راح هذا الحيوان وييييين
معاذ: ع كيفك حجي اول وتالي راح نلكا ولا يهمـك
جاسر: الله اعلم وين راح هاي اذا طلع عايش من يكول ما عرفو مكانه قبلنه وگتلو
جساس: ابو قيصر ما يسويها
جاسر: بس ولده واحفاده يسوها
-سكت جدي ماحجه شي وبقو عمامي يتناقشون وتلفوناتهم ما سكتت، اشرلي جدي ع الصينيه بـ معنى شيليها، شلتها رجعتها للمطبخ وبقيت واكفه بـ الباب اباوع عليهم واسمع كلام عمامي
-دخـل الميــرزا يمشـي بـهدوء كعد كدام عمـي أكثـم سحب نفس من الجگارة وزفرة نتر بي عمي جاسر
::-ما تشوف جدك مريض شكو ادخن هنا
-طنشه ما جاوبة وكال لـ عمـي أكثـم
::-ما عرفتـو مكان تركان؟!
-جاوبة عمـي أكثـم من ورة خشمه
::-لااااا
الميــرزا: اممممم بس انــه عرفت مكانه
-طفر عمي أكثـم من مكانه بسرعه وكف كدام الميــرزا ونتر بيه
::-وما تحجــي وينه؟!!!
-رفع راسه الميــرزا ع عمـي يباوعله بنضرات بارده، سحب نفس قوي من الجگارة وزفرة بوجهه عمي أكثـم وكال
::-سلمته لـبيت أبـو قيصر
◄يتبـــــع.......
▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫
◄الميــرزا علكها🥲
◄البارت لـ جاي حسب تفاعلكم 💚
◄تابعــو حسـابـي ع الأنستــا [ itsara.kh ]