﷽
-الكاتبة: سـارة الحـسن
-Part 11
-"لا تنسون التصويت ومتابعة الحساب فيـروزاتـي"🤎
▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫
-وصلــو اللايكات الــف فَيــروزاتي-
-جنه كاعدين كلنه ع العشة بس هـود ماكو جان عنده دوام وخفارة مكانه بـصفي فارغ
-انفتـح الباب ودخل مخلــي تلفون ع اذنه ويحجي
::-چـــا انـه شكوووو
-تقرب يمشـي بـ اتجاهنه وضحك بـصوت عالي وكال
::-يــلا رايح انــه
-غلق التلفون وكعد يمــي سحب ماعون الأكل من كدامي وسحب خاشوكة أكل ما مهتم واحنه مصدوميـن بي
-رفــع عينه علينــه واخذله نظره سريعة ع الكل وكال
::-ما سلمت عليكم مــو؟!
-محـد جاوبة بـس هارون حاول يكتـم ضحكته وكال
::-هــلا بيــك
-ابتسم لـ هارون ورجع باوع لـ جدي المصدوم بي وحجه بـ استهزاء
الميــرزا صَــفد: شلونـك جَــدي؟!
-بقــى ساكت جدي ما جاوبة وعيونه نملت بـ الدموع، كال عمــي أكثــم بـهدوء
::-شجابــك؟!
الميــرزا صَــفد: مشتــاگلكم
-ورجــع ياكل مطنش كُــل الموجودين، باوعت ع هارون هزيت راسـي بـمعنى منو هذا ابتسم وسكت
-كام صَــفد من مكانه ودخـل للمطبـخ غسل وطلع مطنشنه وصعـد للطابق الثاني كال رســول بـضحكه
::-صار بيه ابـو صفار من الوجوه الصارت صُــفر
-كلها ساكته وصدك ملامح الاستغراب ع وجوهم وواضح عليهم يعرفونه واكو سالفة ورا
-ماطول دقيقة ونزل واكــف ع الدرج وكال
::-ياهو هذا الماخذ غرفتــي؟!
سـدرة: صارت غرفة خيبـر
-باوع ع خيبـر واشرله بيـده وكال
::-ابـن أريـج حبيبي شوفلك مكان ثاني
-كام عمـي أكثـم من مكانه وعاط بي بعصبية
::-لا تحاول تستفزنه ميــرزااااااااا
الميــرزا صَــفد: چؤچؤ منـو يمك انتَ أبــو رسـول؟! لـو اكلك أبــو صَــفد؟!
أكثـم: تريـد تكعد بـ هل بيت تحترم نفسك وتجـر عـدل
الميــرزا صَــفد: كاعد بـ بيتك؟!
-سكت عمـي أكثـم ماعـرف يجاوبة وهو أشر لـ خيبـر يكوم انداريت عليه وحجيت ويا بـهدوء
::-شنو اكلتنه حاصل فاصل منـو انتَ؟!
الميــرزا صَــفد: شنو هاي بيت العايش صدك سركم يموت وياكم حفيدتكم وما تعرف انــه منـو
-كام رسـول من مكانه يحجي ويا طبيعي
::-تعال اخوية حبيبي استقر بـ غرفتي
الميــرزا صَــفد: حبيبي ابن ابوية كول لأبـن أريـج يفرغ غرفتي وخلص النقاش
-عافنة وطلع برا، كام خيبـر ما حجه شي وكال لـ رسـول
::-انـي الراح اجي يمك لعد
رسـول: الك الله يابة ههههههههه
-كلها سكتت وعمي أكثـم دخل لـ غرفتة ضايج وعمـي تركان ضحك بـصوت عالي وبعدها سكت وصار هدوء ناس تباوع لـ ناس
جاسر: شصاير حجي؟!
جساس: هذا هـم بيته حاله حالكم
جاسر: من شوكت صار بيته؟! وفوكاها طاب بزوده ويشمر حجي اذا انت تقبلها احنه ما نقبلها
-كام جدي من مكانه وسحب عود الخيزران وجاوبة بـنتر
::-وعساك لا قبلت
-طلع لـ مكتبة وابوية ضحك بـ استهزاء وكال
::-شنو هاي المهزلة
جاسر: محد مشيخهم علينه غير ابوك
-كلهم ضاجو من جيتــه وتطشرو كامت هناء هم وكالت
::-هـذا مو ميــرزا هذا الظلام الراح يعَـتم عيشتنه
-مشت وره جاسر وجوري كامت ساكته ماحجت شي، كالت امـي
::-عزلن المواعين ورة متخلصن
-هزيت راسي بـ اي وهم عافتنه وراحت وره ابوية، ضـحك هارون وكال
::-شخص ثاني ببيت جساس يطشرهم من الأكل
آفروز: اكل براحتك لـعد
هزراف: منو هذا كلشي ما فهمت اني
سدرة: اخوية
هزراف: اخوج؟! منين جبتي
هارون: من بطن امه، منين يعني
هزراف: والله دخت شو ما نعرفه احنه
هارون: كملن اكل واحجيلجن
-سكتت هزراف وسدرة هم ضاجت حالها حال البقية وكامت صعدت لغرفتها والبنات لحكنها، ليكول رئيس عصابة
-كملنه اكل وعزلنه المواعين اني وهزراف ورحنه ركض ع هارون نريد نفتـهم السالفه شنـو
-ضحك من شافنه كاعدين ونباوعله ونسأله بحماس
::-يلا احجي منـو هذا؟!
هارون: صَــفد ابن عمي أكثـم
آفروز: نفسه الي شفته وياك بـ المطار وين تعرفه وليش احنه ما نعرفه وشبي ويه جدو وعمامي؟!
هارون: اتنفسي حبيبتي واسألي سؤال سؤال
آفروز: احجي راح اكوم اجفص بمصارينك
هارون: اي مثـل ما حجينه هذا ابن عمي أكثـم بس من ام ثانية
آفروز: وينها امه؟!
هارون: صارت مشاكل وتطلكت واخذت الميــرزا وياها
-قاطعنه دخول الميــرزا وكال لـ هارون
::-احجيلهن نوع المشاكل
هارون: مالها داعي
الميــرزا صَــفد: مالها داعي لو بعدكم ما مصدكين؟!
هارون: اذا تريد تحجي انت احجي براحتـك
-ابتـسم وما جاوبة وصعـد لـ غرفتة شايل جنطة بيده كالت هزراف لـ هارون
::-امه وينها هسه؟!
هارون: ماتت
آفروز: ليش رجع بعد هل سنين؟!
هارون: ماعرف
-ضيكت عيوني عليه وسألته بشك
::-متعـرف لو متريد تحجي؟!
هارون: ماعرف
آفروز: جان وياك يدرس صيدله؟!
هارون: كمل بكالوريوس صيدله وجان يدرس ماجستير صيدلة
هزراف: يا يعني اكبر منك!!
هارون: اي كمل دراسه 5 سنوات صيدله وبعدها مباشرتاً بلش بالماجستير
آفروز: وين اكو هيج؟!
هارون: هاي بـ العراق ماكو، بس بالخارج عادي
-بقيت ساكته ما سألته ع شي بعد بس هزراف بقت تسأل وتستفسر زهكرته تالي صفن عليها وهي ضحكت عرفت نفسها لحت كام من مكانه هارون وكال
::-صار اسمي هارون المستحلب كد ما حلبتوني بالاسئلة
هزراف: هههههه اسفه والله بس مصدومة
هارون: تدلل غزالتنــه بس اعذريني مابيه حيل اجاوبج ع اي سؤال بعد
-عافنه وصعـد لـ صَــفد واحنه بقينه كاعدين تقربت من هزراف وسألتها
::-ليــش سدرة ضاجت؟!
هزراف: من شنو؟!
آفروز: من جيت صَــفد
هزراف: مادري ماحسيت
آفروز: ورا سالفه ابن عمج كلبي لاعب منه
هزراف: هو انتِ كلبج المن ارتاح حتى يرتاح للميــرزا
-ابتسمت وجاوبتها بهدوء
::-بس الج يرتاح
هزراف: هههههه عفية انتِ مو صار عندج فقــار روحي تغزلي بي وعوفيني
آفروز: خطيه خطيبي اتغزل بـ الدنيا كلها الا هو عايش بصحراء سيناء
هزراف: خطية فقــار مظلوم
آفروز: شنو هاي شو حسستيني بتأنيب ضمير اتجاهه
هزراف: تحمسـتي مو؟!
آفروز: لا لا اليوم امطره بـ انواع الغزل
هزراف: الله اليستر منج
-ضحكت ع سوالفها وسكتت، وكـ العادة فقــار يجي بـ الليل وجياته المعتاده المتأخرة، اتصل عليه وكال
::-انزليلي حبيبي اني بـ الحديقة
آفروز: طلعت انت خفاش الليل مو اني
فقــار: مافهمت؟!
آفروز: ماكو شي نازلة
-غلقتـة منـه ووكفت كدام المرايا اعدل بنفسي وامسح ع شعري انوم بي كالت هزراف
::-اكو وحده تنزل لخطيبها بتشيرتات اخوها
آفروز: اذا ما عاجبه خل يطلكني عادي
هزراف: صيري مثـل يقين تصير عبالك عارضه ازياء من يجي وهاب
آفروز: وبقت جعفر شصارت يعني
هزراف: ههههههه والله محد جعفر غير انتِ
آفروز: قصدج هيفاء وهبي اني
-عفتها تضحك وطلعت من يمها ونزلت لـ فقــار جان كاعد بـ الحديقة والجگارة بحلكه وكفت بعيد عنه وحجيت ويا
::-شلون تاليها ويه الجگاير
-طفاها مبتسم وجاوبني
::-يلا تصبرني واني انتظرج
آفروز: من تجيني لا دخن فقــار
-كام من مكانه تقرب عليه سحب ايدي باسها وكال
::-صار، بس ليش شبيج ويه الجگاير؟!
آفروز: عنـدي حساسية قصبات واتحسس من ريحتها والدخان
-عكد حاجبه وكال
::-مـن شوكت بيج وليش ما حجيتي؟!
آفروز: من اني وصغيرة بس كُــل ما اكبر تقل
فقــار: خلـص جگاير وماكو بعد واي شي تتأذين منه احجي حتى ما اسوي
-سحبنـي ويا كعدنه ع جهه وجاوبته
::-ان شاء الله
فقــار: مشتاقلـج آفروزي
آفروز: اصبر شويه خل اتعود عليك فد ربع ساعه واتغزل بيه مو من اول دقيقه
فقــار: هههههههههههه وتاليها شلون وياج
-أبتسمت وجاوبته بـهدوء
::-هـذا الموجود حياتي
-رجع ضحك بقوة وكال
::-اللهم صلي على محمد واله محمد
آفروز: راح تفوت الجنة من ورايه كد ما تصلي وتستغفر
فقــار: يابة منين طالعه الشمس اليوم!!
آفروز: شبيك فوك مدا اتغـزل بيك
فقــار: بـكُلشي راضـي يبعد أهل فقــار
-ابتسمت وبقينه كاعدين أكثـر من ساعه مره نضحك مره يتغزل بيه ويحرك مشاعري الانثوية ومره نتعارك ع موعد العرس، بـ اختصار خلصناها مد وجزر
-نفخت بـ ملل وحجيت بهدوء
::-هسه عوفنه من هاي السوالف اريد احجي وياك بـ موضوع
فقــار: احجي حبيبي
آفروز: شوكت تخلص عقوبة امك؟!
فقــار: يم جدج هاي
آفروز: احجي ويا لعد، كافي معاقبها
-هز راسه بشك وكال
::-ليــش؟!
آفروز: الأيام الي فاتت جانت كافية لـ عقوبتها وفكرو بنفسية ظليل هم حيل متأذيه من الصار ومن البعد بينها وبين امها اذا انت تتحمل، ظليل متتحمل ومنهارة بسبب هل شي
فقــار: ماراح يسمع مني جدي
آفروز: راح يسمع، بس احجي انتَ
فقــار: الله كريم
آفروز: تأخر الوقت ونعست اني
-ابتســم وكال
::-خوش طردة
آفروز: مو طردة بس نعست
فقــار: واذا اريد ابقى هاي الليل هنا ماراح تبقين يمي؟!
آفروز: شدكول انت؟!
فقــار: راح تبقين
آفروز: احــلام العصــر هاي
فقــار: متأكدة
آفروز: ومية بـ المية هم
-ضحك وكام من مكانه وسحبني من ايدي مكومني ويا وكال
::-ما ينكدرلج انتِ
-ابتسمت وما جاوبتة وهو طبع بوسة ع خدي بقوة وتمشيت ويا للباب انتچى ع طرف الباب وكال
::-انتبهـي لنفسج وشتحتاجين اتصلي بيه وهذا الميــرزا ما الج علاقه بي
آفروز: شبسرعة وصلك الخبر
فقــار: كُـل اخباركم توصلني اول بـ اول
-قوست حلكي وهزيت راسي وسألتة
::-من خيبـر لو هم من سدرة؟!
-رفــع حاجبه مستنكر وكال
::-وشمعنـى سدرة؟!
آفروز: مو هي جانت توصلك اخبار قبل توقعت بعدها
فقــار: واذا بعدها؟!
آفروز: يعنـي بعـدها توصلك؟!
فقــار: ما كلت بعدها آفروز
آفروز: لو صدك جان من الأول كلت لا من خيبـر
فقــار: لـ وين تردين توصلين؟!
آفروز: تذكر حجايتك شحجيت قبل وتعرف لـ وين اريد اوصل سيادة الـ..... فقــار
-درت وجهـي ومشيت صاح ورايه ما رديتله، اعرف تصرف مو حلو وبي قله ادب بس اني ماعندي دور المضحية وتبقى القاعده الاساس بحياتي لـ كُـل فعـل ردة فعـل
سدرة: مـن طفولتـي وانـي احـب فقــار بس مابينت هل شي لأحد ولا حجيت بس عمتـي أريـج هي عرفت ومن سألتني ماكدرت انكر
-فرحَـت بوقتها ولهسه اتذكر كلماتها من كالت
::-تستاهلين شخص مثل فقــار وفقــار يستاهل شخص مثلج
سدرة: بس فقــار باله مو يمي
أريـج: نخلي يمـج لعد
سدرة: وشلون عمه؟!
أريـج: هاي سهله بس شكلج سوي
-طرت من الفرحة بـ كلامها وجان حبي اله عامي ع عيوني وكُـل تفكيري فقــار هم يحبني
-من صار واجت عمتـي يمنه بعد طلاقها مرت فتـرة طويله وفقــار ما اجه ع امه، حتـى من اجو خيبـر وظليل هو ما اجه
-بعد فتـرة 6 او 7 أشهر يلا صار يجي وما يختلط بـ احد مجرد يسلم ويكعد يم امه شويه ويروح
-لـما تعود وصار يجي هواية ومرات يبقى ايام يمنه، جان هو وآفروز 24 ساعه متعاركين لأن آفروز لسانها طويل وخاطفة الأنظار عليها من الكل بسبب لسانها
-هـي الوحيده الي تكعد ويه الولد بسهراتهم وتجمعاتهم والوحيده الي تاخذ راحتها من نطلع ويه احد منهم ودوم يكلولها
::-انتِ اخونة
-وهـي عدها عادي تكول مسترجلة ولا بنيه مايعة وماشيه حياتها ع هل اساس
-ما جان عندي شي وياها رغـم حقد عمتـي أريـج عليها لان شهدت ضدها وكرهه عمتـي هناء الها لأن لسانها طويل بس اني جنت احبها وجنت احذرها مرات من تصرفاتهن
-الـى ان اجة اليوم الي عرفت بـ فقــار يحب آفروز، حسيت الدنيا وكعت ع راسي وانـي اسمعه شلون يحجي بـ لهفه لـ خيبـر
::-تعديت مرحله الحُـب اني صرت مدمن عليها اذا ما اشوفها تسود الدنيا بـ عيني
خيبـر: آفروز مو مال حُـب
فقــار: ماريد شي منها بس تكون الي، انـي احبها هاهي
خيبـر: هي وامك حـرب لا هي راح تقبل ولا امك
فقــار: هي وامي حرب اني شكو؟! وبعدين شداعي هاي الحرب؟!
خيبـر: علمي علمـك
-رفع اديه يتمغط مبتسم واشر براسه ع جهه المكتب مال جدي وكال لـ خيبـر
::-شوفها شلون ترد الروح شلون ما احبها
-جانت طالعه من مكتب جدي هي وهـود واكيد من تمشي ويه هـود صوت ضحكتها يهرجنة، ضحك خيبـر وجاوبة
::-ترد بس روحك
-ماكدرت اسمع كلامهم اكثر واني احس كل حجاية من فقــار سجين وتدخل لـ كلبي، تركتهم ورحت لـ غرفة عمتـي وحجيتلها السمعته بس ما كلتلها الي يحبها هي آفروز
-ابتسمت وكالت
::-فقــار مايصير غير الج ماعليج بـ السوالف
سدرة: عمه اكلج يحب وحده
أريـج: انتِ فاهية
سدرة: شسوي يعنـي؟!
أريـج: اتصلي عليه هسه وكليله امك تكول خل يجيني
سدرة: منين اتصل عليه من تلفوني؟!
أريـج: اي يلا
-ما ترددت واتصلت عليه واعرف رقمي ما مسجل عنده ثواني وجاوبني
::-الــو
سدرة: هــاا فقــار
فقــار: منـو؟!
سدرة: انـي سدرة
-جنت مرتبكة وعمتي كدامي تأشرلي براسها بـ معنى احجي ومبتسمه، جاوبنـي فقــار بنبرة صوته الهادئة
::-كولـي سدرة محتاجة شي؟!
سدرة: لا بس عمتـي كالت اذا بعده موجود خل يجيني للغرفة
فقــار: ماشي جاي
-حجاها وغلقه باوعت لـ عمتـي وحجيتلها شنو كال، ابتسمت واشرتلي اكعد كدام المرايا وكالت
::-تعالي اكعدي
-مافهمت عليها ليش بس رحت كعدت وهي تقدمت عليه سحبت الشال والقراصه من شعري فزيت وانداريت عليها بسرعه
::-لا عمه مو راح يجي فقــار
أريـج: وهـو المطلوب هذا مثل ابو اذا ما ينغري ما يجي
سدرة: لا عمه لا ماريد حرام
أريـج: اول وتالي هو الج وراح يصير رجلـج
-بعدني ممجاوبتها ونفتحت الباب جان فقــار من اجت عينه عليه رجع بسرعه وطبك الباب ورا لان احنه كلنه نتحجب بـ البيت اذا كدامه واذا كدام ولـد عمـي الا آفروز بـ البيت ما تتحجب ابد
-سحبت قراصتي من عمتـي وشديت شعري واخذت الشال لبسته وضايجة من تصرف عمتـي أريـج، كرصتني من ايدي بـخفه وكالت
::-لا تضيعي من ايدج من وره هاي السوالف
-هزيت راسي وطلعت من يمها جان فقــار واكف ع جهه حتى من سمع صوت الباب من طلعت ما رفع راسه، تعديته خجلانه وصاح ورايه بهدوء
-اندرايت عليه بدون ما احجي شي وهو باوعلي ورجع دنك راسه وكال
::-اعتذر ع الصار
-ارتبكت اكثر وردت ابجي من الموقف وجاوبته بمتمته
::-لا اني الاعتذر
-هز راسه ودخل لـ غرفة عمتـي بدون ما يحجي شي، وهـيج مرت الأيام مرات عمتـي تخليني بهيج موقف بدون ما اعرف، وترزلني من اضوج وتكلي نفس الحجاية
::-راح تضيعينه من ايدج
-بعد فترة صرت اتواصل ويا واكيد خطه من عمتـي، بالاول جنت احجي ويا بحجه عمتي تريد منه شي وبعدها جنت اطلع حجج واحجي ويا وهو جان لطيف ويايه السبب الي خلاني اتعلق بي اكثر
-جنت نايمه بـ غرفتـي ووصلني مسج من عمتـي أريـج
📥: فقــار بـ الحديقة استغلـي الفرصة
-ترددت انزل بس بعدين كمت رتبت نفسي ونزلت للمطبخ سويت گهوة الي واله وطلعت عليه بس الي صدمنـي جانت آفروز يمه وجان يعترفلها بـحبه الها
-بقيت واكفه واسمع كلامه الها وشلون هي رافضتـه ورفضها زيد الأمل بـ كلبي، اذا تقربت منه بـ هل فتره اكيد راح يحاول ينسى آفروز ويرضي غروره الي كسرته آفروز واذا كدرت اتقرب منه بعد مايكدر يتراجع
-قطعت عليهم لحظتهم وكعدت يمهم وجان واضح التوتر عليهم اثنينهم، مرت دقايق يلا كدرو يرجعون طبيعي وجنت احجي واضحك وياهم طبيعي وما حسستهم اني سمعتهم
-صدمتنـه عمتـي هناء بـ الاتهام الي صار ضد آفروز وتهمتها هي عدها علاقه ويه فقــار ومتواعده ويا وحدهم بـ الليل وخاصه فقــار جان جاي بـ هل وقت المتأخر علمود آفروز بس عمتـي ما جانت تعرف علمود آفروز
-فكرت وقتها اذا حجيت الي سمعته فقــار وآفروز راح يبتعدون عن بعض وآفروز مستحيل تتقرب لـ فقــار بعد وهي تخلت بموقف صعب بسببه
-بس آفروز جانت ذكيه وتصرفت بـ ذكاء اكثر منـي من كالت كلامي صح وما نكرت وبهيج وضع زادت ثقه جدي بيها اكثر من قبل ولو يشوفها الف مره كاعده ويه فقــار ماراح يشك بيها بعد
-زعلـت منـي عمتـي بـذيج الفترة لان الحجاية مست فقــار هم وخلته بموقف صعب وفقــار هم صار يتجنبني هوايه
-بعد فتـرة رجعت اعتذرت منه ع الصار بس هم جان بارد ويايه، بعدها شوية شوية صارت ترجع علاقتنه طبيعيه بدون توتر
-وصار يطلب منـي احجيله كُلشـي يصير وهم صار يطلب مني ابقى قريبة من امه علمود ما تأذي احد بـ البيت بمشاكلها وجان يشرحلي شلون يعاني من المشاكل الي تصير وشلون يتأذة هو وكدر يقنعني احجيله الصغيرة والجبيرة بالبيت
-وكدر يصلح بيني وبين عمتـي وخلاني اصير مقربة منها واساعدها بكلشي تريده حتى اكسب ثقتها وتحجيلي التريد تسوي واني احجي لـ فقــار
-صرنه نحجي هوايه اخر فترة بـ كل وقت يحجي ويايه وعلاقتنه صارت قوية، زاد الأمل بكلبي اضعاف واضعاف وتوقعت كدر ينسى آفروز
-ومـن سمعت بـ آفروز راح تنخطب ضحكت واني كاعده يم عمتـي وحجيت وياها بفرحه
::-دام راح تنخطب آفروز معناها خلص فقــار راح يكون اليه وحدي
أريـج: كتلج من البداية فقــار الج
سدرة: شراح نسوي هسه؟!
أريـج: بعد خطوبة آفروز راح اكلج شنسوي
-ضحكت فرحانه ونمت ذيج الليله واني الضحكه شاكه حلكي، كعدت ثاني يوم مليانه نشاط وكشخت لخطوبة آفروز
-كاعدين كلنه بـ الصاله ننتظر العريس، بس صار شي صدمنة من دخلو اهل فقــار، فكرت معقولة الي خطبها اقاربه بس الي هدم كلبي وحياتي كلامهم وعرفت جاي يخطب آفروز
-صارت هوسه وعمتـي تصيح واجه فقــار وجدي يحجون وياها بس هي ما هدأت وبعدها انتحرت حتى تخرب الخطوبة
-بـس حُـب فقــار كان عظيم، فضل حبه حتى ع امه وعقـد ع آفروز وبنفس اليوم هم حتى ما صبر لما تصير امه زينه
-حسيت نفسي شكد غبية يوم علقت نفسي بي وبقيت ملاحكه سوالف عمتـي الي ما حصلت منها شي
-فزيت من صفنتي واني اتذكر كُـل هذا ع صوت ضحكة آفروز ويه فقــار، جنت واكفه اباوعلهم من الشباك وهمه كاعدين بـ الحديقة واشوف نضراته الها وضحكته وياها مليانه حُـب ولهفه
-جنت احلم بـ هاي النضرات تكون الي، جنت كُـل ليلة انام واني اتخيـل نفسي زوجة فقــار واتخيل مشاهد من خيالي وفرحانة
-كُـل هذا انهدم وانـي اشوف آفروز تعيش حلمي، نزلت دموعي بـ قهـر وكلبي وجعنـي من منضرهم سوة
-مسحت دموعي بسرعه من سمعت صوت الميــرزا ورايه وحجه بهدوء
::-مو عيـب تعاينين عليهم؟!
-درت وجهي واريد ارجع لـ غرفتـي حتى ما باوعتله ضحك بخفه وصاح ورايه
::-جايبلج كيلو ضمير هدية الـچ بنت ابوية
-ما جاوبتة ودخلت لغرفتي وركعت لـ باب بقوة فزت يقين وكالت
::-شبيج هيج تركعين الباب
سدرة: مابيه شي
يقين: هم رجعتـي تبجين ع فقــار
-عطت بيها بـ قهر وكلبي مشتعل
::-جان المفروض اني الكاعده يمه هسه موووو هييي
يقين: خطـب بعد وآفروز مستحيل تعوفـه لاي سبب مبين عليها تحبه هوايه
سدرة: مداتحمل يقين والله داموت
يقين: والحل شنو
سدرة: اول شي لازم عمتـي أريـج ترجع لـ هل بيت
يقين: واذا رجعت
سدرة: راح ارجع حقـي
يقين: تخبلتي مو؟! آفروز ادمرج وادمر فقــار وعمتـج وياج
سدرة: ماراح تكدر تسوي شي
يقين: ع شنو ناوية سدرة؟!
سدرة: ماخليلها ظهر تستند عليه
آفروز: من تركت فقــار ورجعـت للبيت دخلت من باب المطبخ جان اظلم مطفين الأضوية بس حسيت اكو حركه بـ المطبخ، مشيت ويه الحايط وشغلت الأضوية
-قلص عيونه صَــفد وكال بـ انزعاج
::-منـو عتب عليج تشغلينه طفي وكملي دربـچ
-ما جاوبتة وطلعت خبز وطماطه وسويت لفة واخذت كلاص بيبسي وهو هم جان ياكل بس ما انتبهت عليه شداياكل، ردت اطلع صاح ورايه
::-ويـن جنتـي بـ هل الليل؟!
آفروز: انت ابن اكثـم لو جاسر؟!
-عكد حاجبه وكال
::-مسودنه انتِ؟!
آفروز: هاي الحشرية بس عد جاسر وهنـاء وهسه طلعت بيك هم
الميــرزا صَــفد: ماراح ارد عليج لـ خاطر هارون
آفروز: تكدر ترد وراح تلكى الجواب الي يناسبك
-طفيت الأضوية وطلعت من المطبخ مطنشته، وصعدت لـ غرفتي هزراف جانت نايمه، واني كعدت بفراشي اكل وسحبت تلفوني جانت رساله من فقــار دازلي صورة
-جانت سكرين لـ محادثته هو وسدرة وجان التاريخ قبل خطوبتنه وبعد ماكو وراها اي رسالة
-ما جاوبته وفتحت يوتيوب مرت نص ساعه تقريباً واتصـل، رديت عليه بهدوء
::-هــا فقــار
فقــار: بعدج كاعده؟!
آفروز: لا نمت والشبح مالتي دايحجي وياك حالياً
فقــار: ليش مغلسه ع رسائلي لعد؟!
آفروز: مشغولة ماكدرت اجاوبك
فقــار: وشنو هذا الشغل الاهم منـي؟!
آفروز: داباوع فلـم
فقــار: تحجين صدك؟!
آفروز: اي حبيبي
فقــار: علمود فلـم ماتردين عليه
آفروز: الأفلام مابيها لف ودوران مثل كلامك
فقــار: يا كلام آفروزي شبيج؟!
آفروز: من اسألك جاوبنـي بصراحه لا تبقى شنو قصدج وماعرف شنو تعرفني اضوج من هل اسلوب
فقــار: لا تشمرين بـ الحجي آفروز
آفروز: اريد انام فقــار
فقــار: شبيج يبعد أهل فقــار شسويتلج وهيج كلبتي عليه
آفروز: ما سويت بس يمكن طكونه عين
فقــار: والله صريح وياج وكلشي دايصير ويايه داتعرفينه انتِ اول بـ اول
آفروز: تمام
فقــار: مره ثانيه لا تعوفيني هيج وتمشين
آفروز: ان شاء الله
-سكت شويه وبعدها حجه بـهدوء
::-اليوم الله هاديج عليه
آفروز: ليـش؟!
فقــار: من جنت يمج حياتي وهسه حبيبي
-ضحكت من كل كلبي ع حجايتة فززت هزراف، خطية قهرني عايش بجفاف يتحسر ع الكلمه، بقـى يتغزل بضـحكتي والطريق كله يحجي ويايه لـما وصل البيت وبعدها نمت
-مرت يومين بـ هدوء ماكو شي والميــرزا يطلع من الصبح مايرجع لليل، وما يحجي ويه جدي وعمامي بس الولد يحجي وياهم
-مره بـ الليل كاعدين بـ الصاله وصار صوت عياط مـن غرفه عمتـي هناء كلها ركضت للممر البي غرفتها وصار عمـي جاسر يدك بـ الباب لان مقفولة وهي تعيط خبصت الدنيا
-من عجزو يفتهمون شبيها والباب مقفولة كال عمي تركان
::-اكسرو الباب خاف بيها شي
-كلها كالت اي وصارو يكسرون بـ الباب واحنه واكفين ع جهه، لـما كسرو الباب ودخل عمي جاسر يركض عليها بس اتراجع بسرعه وطلع وصاح
::-منيـن اجن هذذذذذن
أكثـم: شكو شصااااير
جاسر: الغرفة مليانه حياية وعگارب
-كلها طفرت من الممر بقو بس عمامي وعمي جاسر يريد يطلع هناء بس خايف يفوت وهي خبصت الامه العربية بـ العياط
-مرت نص ساعه يلا كدرو يقتلون الحياية والعگارب وطلعو عمتـي هناء من الغرفة، طلعت تسحل بنفسها من الهبطة وبناتها كاعدات يمها يغسللها ويفركن بـ وجهه وهي روحها رايحه
-طلع الميــرزا من المطبخ شايل لفة بيده ياكل وعكد حاجبة وكال
::-شني هااااااي
-كلها انداريت عليه تريد تعرف شبي هز ايده وكال لـ هناء
::-شني ام هـود تخافين من حيايه وعگارب اول مره اشوف واحد يخاف من اهله
أكثـم: لو تسكت يكون افضل
الميــرزا صَــفد: ما راح اجاوبك لـ خاطر ابوك
-انتفض عمـي أكثـم وصاح بي بعصبية
::-وصلت حدهاااا وياك كـو**
-اندار الميــرزا ع جدي وسأله بـتعجب
::-هاي شنـي جدي وين راحت تربيتك؟!
جاسر: انجب حيوان محد حيه وعگرب غيــر امـ...
-ما نطا مجال يكملها وكال
::-والخلقك اطلع جنازتك اذا تكملها
-بلع ريگة عمـي جاسر ونتر بـ عمـي أكثـم
::-شـوف حـل لابنك لا والله احرك الدنيا ع راسه
جساس: كااااافـي وكلمن لغرفتة يلا
-عمامي ما عاجبهم الوضع وتطشرو كلمن لـ مكانه كام جدي وكال للميــرزا
::-تعال ويايه عندي حجي وياك
-اتمشى الميــرزا يريد يصعد لـ غرفته وجاوبه بدون ما يباوعله
::-ماكو حجاية تجمعنة
-خلى جدي بـصدمته وصعد لـ غرفتة وجدي طلع من البيت بعدها، اخذتلي صفنه ع الوضع هم أريـج وهم صَــفد شنو فلمهم محد يكدر يردهم وخاصه جدي
-بـ العادة من اريد افكر بـ شي اكعد ع الدرج مادري ليش اركز، نزل الميــرزا يدندن وتعداني ماحجه ويايه صحت ورا بـهدوء
::-طاكك عرج عمتـك
-اندار يباوعلي مضيگ عيونه وهز راسه بمعنى شكو ابتسمت وكملت كلامي
::-احس سوالفك قديمه حاول تحدثهن
الميــرزا صَــفد: يا سوالف؟!
آفروز: مال الحياية والعگارب
الميــرزا صَــفد: ذكائج لا تستخدمينه ويايه استثمري بـشي يفيدج
آفروز: شوف هو انت ذكي بس بغباء
-ضحك وسوة نفس حركتي من يحك خشمه بخفه وهاي حركه جساس بـ الاصل وكال
::-ذكي وبغباء شلون هاي؟!
آفروز: جان المفروض تسويها من ماكو احد بـ البيت حتى تنجلط وتموت مو من كلنه متجمعين او ع الاقل تخلي عمك وياها بـ الغرفة
الميــرزا صَــفد: لـو جنت انــه جان سويتها بس مو انــه
آفروز: اممممم
-هزيــت راســي وگمت من مكاني ميلت راسي قريب منه وهمست
::-عمتـك أريـج راح ترجع هل يومين وتخاف من القنافذ
-ابتعدت عنه ودرت وجهي وصعدت سمعته يضحك وصاح
::-اشتعلت عشيرتك جدي
-وكمل طريقة يصوفر وبعدها طلع من البيت، ثاني يوم كعدت ع حس هزراف تحجي بـ توتر
::-آفروز اكعدي ولج مصيبة
آفروز: عمتـج رجعت للبيت؟!
هزراف: ولج لاااااااا
آفروز: لعد شكو؟!
هزراف: النتائج طلعت ولج كومي هـود جوة دايطلعهن النه
آفروز: صدك تحجين مكعدتني من النــوم حتى تعكرين مزاجي
هزراف: عليج الله اكعدي مو وكت سوالفج
آفروز: هزراف يعني شسوي كاعده هي نتيجه طلعوها وكلولي نتيجتي شكد
هزراف: ولج بطني تكطعت اني شهل برود العندج
-كمت من مكاني كفختها ع راسها بـ خفه وطلعت من الغرفه بوجهي للحمام غسلت ونزلت عليهم
-هـود كاعد والبنات ملتمات عليه ينتظرون النتيجه شوية وصاح
::-طلعن طلعن
آفروز: لا تهبط البنات كول نجحن لو لا
-ركز بـ التلفون وكال
::-ظليل و رؤيا ناجحات ومعدلاتهن نهايه الـ60
-بقن يطافرن فرحانات وعمتـي هناء تهلهل لان بنتها ناجحة، هزراف كاعده ولازمه بـطنها من الخوف وكالت
::-هـود وانـي؟!
-ابتسم يطمنها وصار يدور ع اسمها شوية وعكد حاجبه اندار عليها وكال
::-دراستج وين راحت؟!
-عيونها دمعت من الخوف وبقت تباوعله ضحك وعاط
::-اول دكتـورة بـ بيت جساس غزالتنــه
-بجت وضحكت بنفس الوقت وانـي طكيتها بـ هلهوله ع عناد هناء خمو تهلهل بس لبنتها ورحت حضنت هزراف ابوس بوجها
::-الف مبرووووووووك يروحي
-عمتـي هاجر هم جانت طايرة من الفرح بـ هزراف وامي فرحتلها لان صدك هزراف تعبت وتستاهل نتيجه تفرح كلبها وجان معدلها عالي يدخلها طب عام مثل ما تريد
-ورة هوسه وخبصة بـ هزراف كال هـود
::-شو انتِ ولا مهتمه لنتيجتج
آفروز: اني جنت انتظر نتيجه هزراف اكثر من نتيجتي والنبي
هـود: يعني ماتردين تشوفين معدلج
آفروز: شيطلع نعمة
-ابتسم وكال
::-راح تصيرين اول محامية لـ بيت العايش لعد
-ضحكت بفرحة وجاوبتة
::-الله راح يتحقق حلمي
هـود: الف مبروك يـعيون هـود
-الفرحة جانت غامرة بيت جساس بـ هل يوم لان طلعنه كلنه بمعدلات زينه، وفرحتنه اكبر بـ هزراف
-بس ما تمت هل فرحة واكثر شخص طفت فرحته هي هزراف بـ لحظه دخــول عمـي أكثـم وابوية وصاح عمـي أكثـم
::-راح نطلع من هل البيت بسرعه
هـود: شصاير عمـي
-باوع لـ هـود بحيرة ويفرك براسه وكال
::-عمـك تركان مغتصب طفلة واهلها روس كبار
◄يتبـــــع.......
▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫ ▪ ▫
◄يا تُـرى شراح تكون لـ خساير؟!
◄البارت لـ جاي حسب تفاعلكم 💚
◄تابعــو حسـابـي ع الأنستــا [ itsara.ll0 ]