مساء الخير زهـراتي
#ثعلب الحبتر
#بقلمي انا: زهراء
#حساب الانستا: zaii1_8
لا تنسون التصويت ++ضروري تعلقون بين الفقرات ++احبكم زهـراتي
بسـم ﷲ الرحمـن الرحيـم
ــــــــــــــــــــــــــــــــــــــــــــــــــــــــــــــــــــــــــــــــــــــ
_دويـت وما طفيـت وحرت بدواي
_اعلى جرحي وبية سكتت موت بدواي
_الرجيف بروحي شيكضة
_بدوع الهوة اتوضى
_اثاري كلمن وحضى
_غديت ادبي
_مشيت وتيهت دربي
_طاري هواي من ينجاب
_وجهي رسوم بيه تنعاب
_جلد ويطيح بي تيزاب
_وشرف ذيچ البچت عالتل
_خناجر بية تترتل
_جهال اعلية تتمرجل
_سهم لوعاتكم بجلاي
_بزردومي احط ناعور يلا اكدر اعبر الماي
_شايل كل هضم دنياي
_جتل وجاي يطلب ثار بدوي
_من اخوه الدخل دخيل بدار ابيه
ــــــــــــــــــــــــــــــــــــــــــــــــــــــــــــــــــــــــــــــــــــــــــــ
ترف
بهت وجهنة اثنينة من شفنة
جواهر طلعت من البيت والساعة قربت تصير 12:30 بليل
اجتها سيارة وكفت الها طفة علي ضوة سيارتة وكعدنة نترقب الي يصير صعدت بالسيارة وحركوها شغل علي سيارتة و لحكناهم بس من بعيد ضلينة نتبعهم وعلي الجكارة يسويها سحبة وحدة احترك حرك الحد مادخلو المنطقة مو زينة
ترف.. علي وين جايبنة
علي..خلي نشوف ترف
ترف... علي مو زينة هاي المنطقة مو انتَ قبل شوية كلت
علي... ميخالف ترف الخاطري سكتي وخلينة نشوف لا اتعبيني و انا تعبان
سكتت ماردت ازودها عليه بس ضليت خايفة وحسبة تجيبني وحسبة توديني وين اجينة وين راح ندخل
وكفو السيارة كبال بيت تعبان بشكل حتة ما يتسمة بيت وهوا البيت الوحيد الي بالمنطقة بيه ضوة بس ضوة اصفر يعني الرؤية ابد مو زينة
نزلت جواهر من السيارة ونزل وياها رجال متوسط الاربعينيات ما انتبهت الشكلة بسبب الاضاءة بس واضح ان موزين لزمها من خصرها ودخلو للبيت هنا علي اتخبل اجة ينزل وكضيتة من كتفة
ترف.. اوكف علي خلي ننتظر بس يمر وقت لا يحسوون
علي.. شتردينييي انتظررر ديوووثث خوو موو ديووث شو دوخري
سكتت لأن جان عصبي بشكل نزل من السيارة واني نزلت اركض وراه ونعال البيت كلساع يفلت من رجلي التفت الي وخزرني
علي.. للسيارة كبل يلا كدامي
ترف.. وابو الحسن ولا ارجع اخاف وحدي
هوا اني كذب لا اخاف ولا شي بس اريد اشوف شنو يصير
مسح وجهة بنفاذ صبر وصاح
علي... امشي كدامي
طكيت بعلجي وشمرت شعري بغرور اعرف مو وقت هاي الحركة بس ما اعرف الة اسويها
وصلنة للبيت وعلي دفع الباب ودخلنة
اول مادخلنة اجت بوجهنة ريحة كريهة بشكل مستحيل اكدر اوصف بشاعتهة عقج علي وجهة وخلة ايدة على خشمي وهمس
علي.. شنو هاي الخيسة
خلصنة الممر الي دخلنة بي ودخلنة بصالة مدري موزع بي 3 غرف
و وكف علي ومدلي ايدة مانعني اكمل
علي.. اوكفي هنا انا اروح
ترف... اروح وياك شنو عايفني وحدي بلا اجة احد
همس بحدة
علي.. ابتلي بيج هسة واطلع ضيم المسلتة الصايرة!
سكتت ما جاوبتة بس همست... اووي
وكفت بمكاني وهوا راح فتح الباب الاول والواضح ماكو شي وراح للباب الثاني اول مافتحة اتوسعن عيونة بصدمة وصاح
علي... لج جواهرررررر
صاح واني فزيت من مكاني من صوتة ورجعت ليورة دخل للغرفة وبعد ما اسمع بس صياحة وتفلش الغراض جفلت بمكاني وضليت ارجف من يمي اخر شي غمضت عيوني وقويت نفسي
واتقدمت للغرفة جان الباب مفتوح شوي فتحتة
واني اشوف حيوانات ميتة كلش هواي وشعر التفتت لليمين وفزيت
رجعت ليورة من شفت ماعز محنط بس عيونة كأنها علية وتتحرك
انتبهت الهم علي محتار المن يروح الجواهر الي شبه عارية لو للي وياها
اباوع الجواهر املخها تملخ بأيديه اتفاجئت منة اول مرة اشوفة بهيج حالة شمرها بالكاع وضربها راجدي حيل قوي طك راسها بالحايط وطلع شوي دم شهكت وخليت ايدي على حلكي راح الهذا الوياها شكلة لعبان نفس ومبين هوا الي يسوي هاي الشغلات اجة يهجم عليه يكمل الي بداه ورحتلة سحبتة من معصم ايدة وحجيت بتوسل
ترف... علي عوفهم لاتوصخ ايديك بيهم عوفهممم
صاحت جواهر وهيا تتألم
جواهر... طلعتييي كح*** مثل ماكلت وخليتيه يعرف صارت بيج د*** عليه مو
التفتت الها وصحت
ترف... هييي لج فوك شينة كوات عينة خلي السانج بحلكج احسلججج لا اكمل عليج انيي بعدين منوو البي د*** اني لو انتِ اشو ضامتلج اثنين لوو واحد للفلوس وواحد للسحورة؟؟
حجيتها والتفتت على علي طلع سلاح من خصرة اتخبلت واتهسترت كلشي ولايضيع نفسة على مودهم وجه السلاح الهذا الوياها وانيي ركضت الة كضيت بأيديه وصحت
ترف ... لا عليي لا لااتضيع نفسككك
خزرني وضم راسي الصدرة وما احس غير صوت الطلق واردتينة ليورة
رفعت راسي بصدمة واني اتفحص منو منهم مات و شفت
هذا الوياها رجلة مدماية ويتلوى من الالم حجيت بهستيرية
ترف... عليي مات ماتتتت شووفة ماتتتتت
علي.. لا ما مات بس جرة أذن بسيطة راح تحرمة حتة من المشي
دار على جواهر ووجه الها المسدس اتقرب يمها بخطوات وكعد كبالها على تك رجل باوعلها من فوك ليجوة بقرف وحجة
علي... رخيصة! شكد متندم على اللحظات الي كضيتها وياج
سكتت ما ردت رجع حجة بتحذير... الاوراق الماخذتهن باجر اجي اخذهن ولو اعرف معلومة وحدة متسربة ساعتها شهيرتج على ايدي و حسابج عسير وياي وورقة طلاكج باجر توصلج للبيت و لاعبالج خلصت
كام واتوجه الي سحبني من ايدي واجينة نطلع صاحت
جواهر.... ولاعبالكم اني خلصت هاي الوياك اذا ما اموتها مااطلع جواهر
اجة علي يجاوبها سبقتة اني وحجيت
ترف.. الي بيطلع بأيديك طالعوا برجلك
كملنة طريقنة وطلعنة من البيت اول ماطلعنة ماكدر علي يكمل كعد على الرصيف وكض راسة بأيديه وهمس
علي... ترف روحي للسيارة
ترف.. ما اعوفك وحدك
علي... ترف لا تعاندين روحي للسيارة
ترف.. وحياة الخالقك مني مفارقك تريدني اعوفك وحدك وانتَ بهالوضع؟
اتهند ورفع راسة الي وعيونة حمر دم حجة وواضح البحة والقهر بصوتة
علي... صح حبيتها بالبداية واخر فترة اتغيرت علية وانا هم ضجت منها بس ما اتوقعت تتفق وية ***** وتتفق وياهم على شرفها ماكالت باجر وراي زواج؟
ترف.. ما تدري يجوز عدها غاية!
علي... المفروض اكشفها من زمان مو لمن خطبتها وادخلت بشغلي والفاس وكع بالراس
ترف.. يمكن تخطيطها غير شي مو هدف زواج
علي... او يمكن شغل خفايف
ترف.. شلون يعني
علي.. معليج عيب هالشغلات
كعدت يمة وخليت ايدي على خدي وباوعت الة وهوا صافن بالفراغ المشكلة ما اعرف اواسي احد لو اسمعة كلام حلو بس اتذكرت روح من جانت تنهار جنت احضنها عضيت على شفتي بحيرة ومن دون قصد مني جريت راسة الي وحضنتنة وضليت امسح على راسة
ترف... لا تسوي هيج بنفسك
ما جاوبني وضل يتنهد
ترف... شبيك علي هسة الدنيا ماتسوة تزعل باجر عكبة تكعد تلكة روحك ميت وتشوفنه ناكل بفاتحتك
سكتت من حسيت زودتها.. اتذكرت جنت ابوس روح من تتعب دنكت عليه وبستة براسة
همس الي
علي... يواشج على كليبي تراه ما يتحمل حركاتج
ترف... ها؟
ابتعد ويباوع الي مسح وجهة وكام راح للسيارة واني رحت وراه
صعدت ورة ورجعنة للبيت الطريق كله ينافخ وعاقد حواجبة صف السيارة وفتح باب الطارمة على كيف ودخلنة جوة اجيت اصعد وصاحلي بأسمي التفتت الة
علي.. ترف اتمنى الي صار يبقة بيني وبينج لا امي ولا ابوي يعرفون
هزيت راسي بقبول واردفت
ترف.. هذا هوا ما اكول الاحد واعتبرة سر بيناتنة.. بس يعني شنو راح تكللهم سبب الانفصال؟
علي... ما اكللهم السبب انفصلنة وبس.. باوع الي بنظرة اول مرة انتبه عليها وحجة... واتمنى الي سويتي قبل شوية وياي ماتعيدينه
خجلت لأن حسيتة فشلني اردف بكلامة
علي... شكراً
ترف.. مايحتاج شكر واجبي هذا بس واجبكم شنو؟؟ كذبتوني وماصدكتو بية
علي... غلطة وصارت لاتلومينة
ترف... وليش لازم ما الومكم ولا كأنما اي شي صاير موو؟...على العموم تصبح على خير
حجيتها ورحت الغرفتي مرن كم يوم و اجن امتحانات نصف السنة واني مامحضرة نفسي نفس ما جنت متخيلة ادهورت نفسيتي وصارت تحت الصفر بحيث اول امتحان رحت واني نص المادة مامكملتها من غير درجاتي بالشهريات مو زينه فقدت الامل بشكل حسيت خيبت أمال روح بية اخر امتحانين ضلن جنت جاي ادرس وسمعت اصوات صياح عالي جوة بالصالة
•••••••••••••••••••••
لمعان
كملت دراستي وكمت نزلت جوة لكيت الحبتر وديسم موجودين فتحلي حبتر حضنة رحت كعدت يمة وحضنتة باسني براسي وحجة
الحبتر... شلونها اليوم
لمعان.. كلش زينة من شفتك
الحبتر.. ان شاء الله دومج زينة الدراسة شلونها ليش وجهج ذبلان من التعب ؟
ابتسمت ورجعت حضنتة
لمعان... اخر سنة الي بالجامعة تستحق التعب
الحبتر.. انتِ ردتي صيدلة هسة لو معهد ركص نفسي شبيه يخبل
لمعان.. اي وبلا شنو الي استفاديتة هسة من معهد الركص؟
الحبتر... يخبل كضيتة تسخت
ديسم... ترا اسمة معهد فنون بعدين انتِ لمعان شدعوة عاد ترا اخوج الجبير انه مو ابن البطة السودة
طنشتة وامواج اللوكية راحت يمة وكعدت بحضنة مدري شنو همستلة ضحك وهم همسلها صاح هلاك
الحبتر... ولكك ديسمم عووف بنيتييي لاتخربها بسوالفك... وانتِ بابا وخري عنة كخة هذا
امواج... بابا عيبب تدخل سالفة بيني وبين دودو مو هيج ديسومي؟
جاوبها ديسم وهوا يعد بأصابعة
ديسم... خابب ديسومي وابو ديسومي وحبتر وخنجر وابو خنجر وام خنجر وجيران خنجر تروحلج فدوة وللديسومي منج
ضحكت والحبتر بس يهز ايدة عليهم اعرفة يغار على بنتة اجت امي وهيا لابسة المحرم وسبحتها بأيدها كعدت يمنة
الحبتر.. راح يجي جوجي يتعشة عدنة اهلة كلهم مسافرين ويكول كاضيها بس خيار وطماطة حتة بطنة صارت المزرعة السعيدة
نجاة... ديلا بلا وين السرسري و المو راحة يدخلوه البيتي
ديسم... يمة ترا توة مخلصة صلاة عيب تحجين عليه حرام
شمرت عليه السبحة
نجاة.. اتعلمني الحرام ولك؟ ابن المسلوك انعلك هسة وانعل خنجر
الحبتر.... عوفي يمة شمنوج ما الة چارة جنة هذولاك الناس
هز ديسم ايدة واني ضجت لأن راح يجي ما اعرف بس احساس مو حلو الجيتة هاي مرت نص ساعة
وانزرع خنجر بيتنة كمت من يمهم ورحت سويت عشة وخنجر كلساع صايح
خنجر... ما اريد اشوف الخيار والطماطة على السفرة صار بية رهاب خضروي منهن
ضحكت وصبيت العشة وصحتلهم كعدت يم امي وخنجر كبالي
ونظراتة حيل حرجتني اني ماعندي اي مشاعر تجاها ولامسؤولة عن نظراتة الي اساساً ولا يوم سويت وياه تصرف او لمحتلة ان اني عندي مشاعر تجاها شلون المحلة واني ماعندي؟
حيل اتنرفزت واتضايقت منة بس حاولت ما انطيه اي اهمية سمعت هلاك يسئل امواج الي كاعدة بينة وبين خنجر
الحبتر... امواجي شكد مشتاقتلي
امواج.. كلسس هوايي بكد وجه خنجغ
خنجر.. على راسي
امواج... تغا وجهك حلو بس اني احلة منك وجهك كلس كبيغ تسبه هاي الي بالتنوغ
تقصد المخبازة ضحكو عليها وخنجر جلب وياها
الحبتر.. وبعد بابا بكد منو مشتاقتلي؟
امواج...بكدد ايدين ديسومي وبكد
الحبتر... بابا شنو هالشوق الي كلة اعضاء
ديسم... قصدك شنو هالشوق الي فرم مشاعرنة فرم
امواج.. اووي ما تخلون الواحد يعبغ عن سوقة سكد ماعدكم ذوق اضل اعلم بيكم اني كل واحد سكبغة وما تتعلمون سواغبكم جنها سواغب الحسغات
فتح حلكة خنجر وصاحت عليه امي
نجاة... سد حلكك ولك لا تحسد البت
خنجر... حبيتر بس سؤال متأكد بتك عمرها سبع سنين؟
الحبتر... مو عيون عبالك خرزات ابو ابريج
كملو اكل والحبتر ساعدني انقل الماعين للمطبخ صبيت الهم چاي واخذتة بس وصلت كام خنجر واخذ الصينية مني و غمزلي وراح
اتنهدت واني مو مرتاحة نزل ديسم من غرفتة جايب لعابات اثنين راح انطاهن الامواج شكرتة و راحت كعدت يم هلاك باوعت الوحدة منهن وحجت
امواج... اني هاي عندي منها
عاف الحبتر استكانة الچاي وباوع الها
الحبتر... ماتردينها عادي تنطيني اياها؟
امواج.. ستسوي بيها بابي؟
الحبتر.. اكو طفلة اعرفها حاب اخذها الها عادي تنطيني اياها؟
امواج.. حبابة لو لا؟
الحبتر... حبابة بس اتعض
هزت راسها وقدمتها الة
امواج... كللها هاي من امواج خلي تجي اخليلها مكياج على العيون وعلى الخدود وعلى السفايف
انسحبت من يمهم وضلو الولد يستفسرون يردون يعرفون منو بس حبتر ما انطاهم جواب نفس الاوادم
رحت غسلت الماعين ولميت الزبل طلعتهن للطارمة وطلع خنجر يلعب بالتلفون مامنتبه الي حس بية
و رفع راسة وابتسم
خنجر.. شلونج عالوجة؟
مارديت اجيت ادخل وقطع طريقي صحت
لمعان.. وخرر مناا خنجرر وخررر عن طريقي
خنجر.. ليششش ترفضينيي ليششش موو خبلتينييي شتردين اسويلج شتردين اصير؟؟ وين تلكين مثلي يحبج؟ اكثر من مرة اجي اعترف الج وترفضينن ليشش ناقصنيي شييي؟؟؟
موو بعينجج لوو عندج واحد تحبين احد لمعان؟
اذا تحبين احد انطيني علمم حتة ابتعد
دمعن عيوني واني اشوف الحبتر و واكف وراه والشرار تطاير من عيونة
كض خنجر من ركبتة وشمرة بالكاع وهجم عليه يضرب بيه بكُل حركة قلب وخنجر حتة مارفع ايده لأن يعرف نفسة غلطان تعب حبتر بس بعدة يضرب بيه الحد ما ايديه انترسن دم رفعة من ياختة وحجة بلوم
الحبتر.... لك ليش امنت بيكك ومدخلك البيتيييي عينك على اختي
ليشش ولكك هيجج اتجازيني لكك خنجرر حاسببككك اخوي اشاركك بشغلااات اخوي ابن ابويي مايعرفها عني ولك هيجج تكسرر ظهريي بأختييييي هيجججج تسويييي ولكك شمسويي الككك انه شمسوي
جانن ابدال هايي السوالف تانيت سنة على ما ادورر سنة موج وتعال اخطبها مو بالسرر تحاجيها موو بالسررر ومن ورة ظهررري
دفعة وكام وهوا وكوة يجر نفسة نزلت نظري الخنجر وجهة كلة دم كام من مكانة ونكث ايديه وحجة
خنحر.... ماعندي نية مو حلوة وية لمعان مثل ما انتَ تخاف عليها انه هم اخاف عليها من نفسي واعتبرها من عرضي نيتي جانت نية حلال
اتقدم ديسم وضربة راجدي اتفاجئت شوكت اجة وسمع
ديسم .... من اليوم تنسانه خنجر اعتبر كلشي بينة انتهة
دار وجهة ومسحة بأيدة رجع بخطواتة وطلع برة البيت
التفت الي ديسم وحجة بنبرة امر
ديسم.. عالسريع ورانه فوك وما اريد امي تحس
هزيت راسي وهما راحو صعدت وراهم واني مو خايفة من شي لأن ماغلطانة ولا مسوية علاقة وراضية عن نفسي وواثقة بيها دخلت الغرفة هلاك كعدت على الچرباية وهما جابو كراسي وكعدو كبالي حجة هلاك وهوا يورث جكارتة
الحبتر.. من ليمتة؟
لمعان.. شنو هوا ؟
ديسم... خنجر من ليمتة يحجي وياج
بلعت ريكي ونظراتي تتجول عليهم اثنينهم عبالك تحقيق وحتة لو ما عندي شي خفت
لمعان... مو هواي اني ما منطيتة مجال
الحبتر.. وليش ما كتيلي انه مو موصيج ماتضمين شي عني؟
لمعان... هلاك بس افهمني ما اكدر اكلك شلون اخرب صداقتكم انتم؟
صاح ديسم
ديسم... طززز بيها خربت صداقتنة من يوم العرفت عينه عليج
الحبتر... جرب يأذيج بالكلام او تصرف؟
ديسم.. لا عاد خنجر مو بهذا السوء
الحبتر... جؤ ما تعرفة نفسي ماعندة علاقة جدية اهم شي عندة يتونس
باوع الي بلوم واردف
الحبتر.. طلعي اخذي راحتج
حسيتة زعل لأضميت عنة وصلت الدمعة بطرف عيني كمت من مكاني ورحت الغرفتي وهيج مرن اسبوعين واني ما اعرف شي عن خنجر ولاسامعة خبر عنة وحتة من اروح للجامعة مو نفس قبل يلحكني وبليلة من الليالي بعد الاسبوعين اجاني اشعار على الواتساب دخلت عليه شفت رقم داز رابط اغنية عرفتة هوا دخلت عليها وضليت استمع
حبكم كلمة ماتفارق لساني
بعدكم ماعشت عمري عساني
احبكم ما اعيش بلا هواكم
يضل محروم قلبي مانساكم
ابدكم قسمتي لأنسان ثاني
احبكم والله احبكم
شفايفكم طبعتوها على خدي
وعشت عمري بهواكم حلم وردي
رجعت حالتي مني غريبة
قلوبنا محتار ماحصل نصيبة
قبل كنت اني المدلل زماني
بعدكم ماعشت عمري عساني
احبكم والله احبكم
بدون عيونكم شلي بحياتي؟
بقت بس الصور من ذكرياتي
انتهيت ونزلن عيوني الحزينة
نفس ذاك الطريق البي مشينة
تتركتوني غريب
تتركتوني غريب ووحدي اعاني
بعدكم ماعشت عمري عساني
احبكم والله احبكم
خلصت الاغنية واني على فرد دمعة مااعرف ليش بجيت بس كلش اتأثرت حسيت ردت فعل الحبتر وديسم من قاطعوه كلش هواي عليه لأن هوا مايكدر بدونهم هما هذول الثلاثة سوة مايتفارقون رجعت دخلت على رقمة اريد اشوفة متصل او لا لكيتة دازلي صورة الي
بيها كاعدة بالجامعة ومبتسمة واحجي وية صديقتي اجيت اكتبلة وشفتة حاظرني
•••••••••••••••••••••••
روح
كاعدة بالغرفة وسمعت صوت فتحت الباب ضليت كاعدة بمكاني ما اتحركت دخل وشايل بأيدة علاكة سودة خلاها على صفحة واجة كاعدة يمي وسند راسة على الحايط مبين تعبان او صاير شي ويا بلع ريكة وطلع باكيت جكاير من جيبة خلاه على شفايفة سحب منة جكارة وضم الباكيت وورثها سحب منها نفس وغمض عيونة بتعب شوية ورحع فتحهن
التفت الي وحجة
الحبتر... عادي انام على رجلج لوزاية؟
روح.. لا
اتنهد وسكت صحت
روح... اهووو تعال
اتربعت وخلة راسة على رجلي شال ايدي وخلاها على شعرة وغمض عيونة
روح... خو ما بيك كمل؟
فتحلي عين وحدة واجة يحجي ضحكت وحجيت قبلة
روح... طالع تشبه الاعور الدجال
غمضت عيونة وسكت
روح.. شبيك اليوم؟
الحبتر... تعبان
روح... منين؟
الحبتر... من الكل
سكتت وحركت ايدي على شعرة
روح... شمسويلك؟
ما جاوبني رجعت حجيت.. احجي شبيك
الحبتر... اخوي خاني وية اختي
عقدت حواجبي وجاوبتة بأستغراب
روح.... شبيك فالت انتَ لو سكران؟
ماكو اي رد منة اجت عيني على العلاكة
روح... شنو بيها هاي العلاكة
رفع راسة وحجة
الحبتر.. ذكرتيني جايبلج شي
عدل كعدتة وفتح العلاكة وطلع لعابة كلش حلوة
روح.. هاي الي انا؟
هز راسة مبتسم وقدمها الي اخذتها منة وابتسمت
روح... تدري ولا مرة مشترية لعابة لا انا صغيرة ولا انا كبيرة
الحبتر.. بس هسة انه جبتلج
حجاها ورجع خلة راسة على رجلي وسحب ايدي خلاها على راسة ضليت ايد احركها على راسة وايد كاضة بيها اللعبة مر وقت وحسيت استقر نفسة وهدئ باوعت الة نايم بلعت ريكي وسحبت راسة على كيف خليتة على المخدة مديت ايدي وانا مترددة الجيوب البجامة مالتة
ابتسمت وغمضت عيوني من كضيت المفاتيح سحبتهن وكمت باوعت الهن وقويت قبضة ايدي عليهن
دورت على شالي مالكيتة فتحت البوفية على كيف طشرت الملابس كلهن ولكيتة بالاخير خليتة على راسي واخذت اللعابة بأيدي
وطلعت من الغرفة على اطراف اصابعي صعدت الدرج الي صار عبالك الف باية باوعت للمفاتيح وقريت دعاء تسهيل الامر
روح.. اللهمّ يا مسهّل الشّديد، ويا مليّن الحديد، ويا منجز الوعيد، ويا من هو كلّ يومٍ في أمرٍ جديد، أخرجني من حلق الضّيق إلى أوسع الطّريق، بك أدفع ما لا أطيق، ولا حول ولا قوّة إلّا بالله العليّ العظيم، ربّ لا تحجب دعوتي، ولا تردّ مسألتي، ولا تدعني بحسرتي، ولا تكِلني إلى حولي وقوّتي، وارحم عجزي فقد ضاق صدري، وتاه فكري وتحيّرت
خليتهن بالباب وانفتح الفرحة ماوسعتني ماصدكت حسيت نفسي بحلم وردي فتحت الباب واجت بوجهي نسمة هواء بارد غمضت عيوني وانا قلبي دكاتة الف
اتخيلت ارجع البيت عمتي وارجع اعيش حياتي نفس قبل واحسن وقررت بس ارجع اخذ اختي و اسافر يم محمد وعائلتة من الفرحة ضليت اخطط
طلعت برة السرداب وانا حافية واباوع داير مدايري ضلمة هندس وماكو ولا حس
بس ضليت مُصرة على ان انا لازم اطلع حضنت اللعابة الصدري وعدلت شالي الجو برد حيل وانا بس بالتراك
مشيت خطوات قليلة وانا مبتسمة الحد ماسمعت صوت خطوات وراي وكفت بمكاني واختفت ابتسامتي غمضت عيوني ونزلت دمعتي
درت عليه وشفتة جاي يمشي على كيف وبأتجاهي كأنة يعرف راح يمسكني وماعندي مكان غيرة!
درت وجهي وركضت بسرعة بس الظاهر حتة الجو عكس وياي سرعان مامطرت وصوت الرعد وترني بشكل صعبت حركة رجلي وخاصة المكان كلة حشيش مايقل طولة عن نصف متر صاح بصوت جفلني بمكاني
الحبتر.... لج روححح
شهكت وكملت ركضي بأقصى سرعة اكدر الها الحد ما عثرت بشي صلب طحت على وجهي وادمرت طين التفتت الة وزحفت على مقعدي ليورة وهوا مابين منة شي بس احس علو انفاسة واصل اليمي اتقدم الي وصوت خطواتة ترعب قلبي اكثر واكثر نزل المستواي وجر شعري وحجة
الحبتر.... ولججججج روحح تشردددينن منييييي ولجج تغافلينييي روح
اجيت احجي ودفعني للكاع رفعت راسي وضربني راجدي
جرني من ياخة التراك وهمس بفحيح
الحبتر... اموتج اليوم لوزايتي شسوي بيج اليوم اتفنن
رجفن شفايفي وشهكت بصوت مااكدر حتة احجي من الخوف كام من مكانة وجرني من كتفي ومشة بشكل سريع وانا بس اتعثر وارجع اكوم على رجلي
رجعت عثرت وجرني بقوة من ايدي حتة حسيتها انخلعت طاحت اللعابة من ايدي التفتت الها ودمعن عيوني
روح.. حبتر
مارد علية بس مستمر يمشي سريع وانا وراه وصلنة للسرداب وانا صلبت روحي بالكاع وصحت
روح.. ما ادخل والله ما ادخل ما اريدكك
ضربني راجدي اجة على اذني كضيتها بألم ورفعت راسي وحجيت مُصرة
روح... ماادخلل ما اريددد ما ااريد
جرني من زندي ونزلني للسرداب سح اخذني للحمام وشمرني جوة وشغل الضوة انتبهت الوجهة العرق يتصبب منة نزع تشيرتة وضل بس بالبجامة السودة والفانيلة الداخلية وشعرة نازل على عيونة الي عبالك دم وشرايين رقبتة مبينة سد الباب وقفلة واتقدم يمي كل علامات الشر على وجهة
ياريت اكو كلام يوصف الحال الي انا بيه احس نار وبين ضلوعي جسمي كلة يأذيني ومجرح مختنكة ومتاعجزة حتة النفس اجرة
بيا حال وبيا ايدين انا؟
اتقدم يمي وجر شال من راسي وربط بيه ايدية
همس قريب من وجهي
الحبتر.. لوزاية ليش تشردين مني شمسويلج؟
روح.. ما اريدك
جر شعري قوي وصاح
الحبتر.. لااتكوولينن مااريدك لاتكولينننن اكتلججج وروح اختي اموتج
عاندتة ورجعت حجيت
روح.. ما اريدك وقرفانه منك!
تجاهلني وشك ملابسي وجردني منهن ضليت فقط بالداخليات نزلن دموعي ورة بعض ما اريدة يشوفني ولايشوف جسمي اريد اغطي جسمي بأيدية بس ما اكدر مربطهن
شهكت وحجيت بدموع
روح... حبتر لاتسوي هيج غطيني حبتر غطيني!
مسكني من فكي واصابعة ضاغطهن بقوة قرب وجهي الة وباسني بقوة وبشراهة اتأذيت وهوا ابتعد يجر نفس بصعوبة
الحبتر.... ليشش تسوين بية هيج لوزاية؟ شمسوي الج انه؟
رفستة وصحت
روح.. وخررررر عني تلعب نفسي منك
حجيتها وتفلت بوجهة دارة ومسحة ورجع باسني بقوة اكثر من الي قبلها حسيت شفايفي تتقطع نزل على رقبتي ويوزع قسوتة وقذارتة على باقي جسمي شهكت واتصلبت بمكاني وضليت اصيح وهوا مستمر يريد يكمل حسيت بيه بنفس قذارة سلمان ولمساتة الي
قسة علية وراد يكمل صحت بصوت عالي وهوا صحة على نفسة وابتعد
فتح الدوش ونزل الماي على راسي فزيت من برودة الماي حيل بارد خلاني جواه وطلع دقايق ورجع روحي بادت ومابية حيل شي عاجزة عن كلشي شنو بيدي واسويه النفسي
تعبانة والدنيا كلها واكفة بعيني
اتقدم يمي وقوة الماي واتبلل هوا همين بس ولا يهمة!!
الماي بارد بشكل وهوا ولا يمة ولا اكو ذرة رحمة بقلبة
روح... حبتر باردة طلعني منا مااعيدها والله مااعيدها ماسويها بعد
خلة اصبع السبابة على شفايفي
الحبتر... اشش لوزايتي لاتعبين نفسج وراج تعب هواي مو الحبتر الي ينغلط وياه ويسامح ويغفر
سكت و عيونة تتجول على جسمي ابتعد وكام كعد كبالي بس بعيد عن الماي وانا راسي صدع من برودتة
صافن علية وانا ادموعي اختلطت وية الماي شوية وكام عبالي جاي يفتح ايدي بس عبرني وراح للدوش خفف الماي وخلاه يتقطر قطرة قطرة على راسي كُل قطرة تنزل بردوتها والمها ياخذ حيل من روحي
عافني وطلع برة رفعت راسي واردفت
روح..... كل مرة اكول اتعب بس هالمرة التعب غير شوكت ياربي تفرجها علية مو حيلي انهد وانا اقاوم خلقك يالهي
غمضت عيوني ونزلن دموعي طاحت قطرة من الدوش على وجهي من بعدها فقدت وماحسيت بشي
ولا زالت الحكاية مستمرة
زهـراتي كلش شكراً على الخمسين الف مشاهدة ♡
تصبحون على خير