ادمنت حدة عينيه

يوميات 4

مقتطفات من يوميات ابطالنا

ادمنت حدة عينيه

رفيف الحسني

حبايبي لا تنسون تعلقون على كل فقره وتصوتون للبارت

*******************************
توفيق ـ تهون وليدي تهون وربك عوضكم خليهه شفيعه الكم بالاخره

نائل ـ كسروا فرحتي بيهه

توفيق ـ ربك جبار الخواطر

نائل ـ والروح

توفيق ـ ربك كفيل بيهه

نائل ـ عمي خايف على فتون

توفيق ـ ما بيهه بس العافيه هيه تاخذ قوتهه منك وانته سبع

نائل ـ الحمد لله على كل حال
وخرت راسي من حضنه بقيت اباوع من الجام رجعنه للسيارات كلهه زايره ومخلصين اخذناهم غديناهم وطلعنه لكربلاء وصلنه المغرب وتوزعنه على الفنادق القريبه من الامام صرنه اني وايهاب وزيد وعمر بغرفه سبحت وارتاحيت
يله شباب نروح نزور

ايهاب ـ اني نعسان ما اروح هسه

زيد ـ اني اروح وياك

نائل ـ زيد استعجل مو تأخرنه

زيد ـ بس اسبح ما اطول

نائل ـ بسرعه كملت ومشطت طلع زيد لبس وكمل وطلعنه عمر وايهاب ناموا وصلنه جاي يصطفون للصلاه وگفت وياهم وزيد يمي اجواء حلوه بشكل
ومريحه للنفس والروح تمنيت هاي اللحظات تطول اكثر صلينه وياهم وبقيت گاعد صليت زياره نيابه عن فتون وسما لان ما گدروا يجون وهم عن سبأ ونبأ

زيد ـ ها شيخنه نتبرك بذيالك شسالفه اخذت التربه حاصل فاصل گول الهه اهل ناس تصلي عليهه هههه

نائل ـ هههههه اول شي تقبل الله

زيد ـ ههههه منا ومنكم ابو خزره

نائل ـ هههه يا سالفة الخزره ثاني شي صليت نيابه عن البنات هذا ابسط شي نقدمه الهن

زيد ـ ويلوموني من اگلهم شايل حنية واثق خاب شگد احبك وحك الحسين ابن علي

نائل ـ هههههه تعال ولك
حضني ويضحك
يله نزور

زيد ـ يله جيب ايدك

نائل ـ وگف قبلي ومد ايده لزمتهه وگفني صرنه نفس الطول حسيت وياهم بنعمة الاخو فعلا الاخو سند زرنه وخلصنه رجعنه بالطريق خابرني ابوي

واثق ـ وينكم نائل

نائل ـ ها يابه جنه نزور وصلينه بالحضره ليش

واثق ـ تعالوا حتى تتعشون

نائل ـ لا طالعين للمطعم اكلوا انتم الف عافيه

واثق ـ هو ماهر وعامر جابوا الاكل من المطعم

نائل ـ اعرف بس يابه نريد نغير جو

واثق ـ براحتك بويه عينك على اخوك

نائل ـ صار بعيني
جان زيد يمشي عني مسافه انتبهت عليه ايده بجيبه والثانيه لازم بيهه التلفون ضحكت
حتى هاي العاده متوارثينهه من ابوي
خليته براحته لما التفتلي

زيد ـ ها صاير تضحك ضحكنه وياك

نائل ـ ههههه واثق المصغر وتحجون علي جنك ابوي وجنك ابوي بكلشي تشبهه وانته شوف روحك
انتبه ايده بجيبه وحركاته ضحك حيل وركض علي ركضت قبله واضحك وهو يضحك حيل ويصيح لما وگفت والتفتت عليه صرت ارجع واضحك عليه لو اقلده شفته بهت وجهه

صار ضوا قوي التفتت سياره جبيره جايه باتجاهي اباوع لرجلي متتحرك غمضت عيني ولفظت الشهادتين لان گلت هاي النهايه حسيت ايدي انجرت حيل بحيث كتفي احسه انخلع وانحضنت قوي فتحت عيني شفته عمر

عمر ـ لك حيواااننن شلون هيج تسوي هااااا شلوووونننننن غير تنتبه اكو زمال يرجع وما ينتبه شنو بالشارع شوف سيارات يمك هذا مو شارع الخلفك ابن الكلب

نائل ـ دفعته
لا تجيب سيرة ابوي وخليني محترمك لا امدك هنا

عمر ـ انته الظاهر مو مال احترام

نائل ـ ضربني على بطني احس بطني اتشنجت گلت
خرب بيك يا گو*** هو هييججج حيوان

عمر ـ واطيح حظك هم انته زمال وما تفكر بروحك فكر بفتينه شيصير بيهه ها جهالك فكرت بيهم لو لا

نائل ـ عفتهم ومشيت صدك ما فكرت بــ احد فتون شيصير بيهه لو صدك متت بساعتهه وهذا الحادث صار والله ما دزلي عمر علاوي ومريمه لو حسن وبسمه وسدل وفضل شيسوون صح اهلي زينين بس اني ما فكرت شفت زيد يمي وايده على كتفي

زيد ـ يله تهون الحمد لله على سلامتك عدت

نائل ـ بحسره
الله يسلمك صدك زيد اني ما فكرت بيهم حجي عمر صح

زيد ـ يله ما صار شي امشينه للمطعم جوعانين

نائل ـ ما اريد تردون انتم روحوا خلوني امشي شوي اغير جو

زيد ـ لا تجي ويانه ما نمشي بدونك يله تعال

نائل ـ لا زيد روحوا انتم

زيد ـ والعباس تمشي نمشي ماكو انام جوعان خاب عمر يله

نائل ـ خلص جاي وياكم يله امشي
دخلنه للمطعم گعدت يمي زيد وعمر گبالي يباوعلي وينقر بـ اصابعه على الميز رفعت حاجبي وهو هم

عمر ـ شبيك ترفع بحواجبك لازم ازعجنه جنابك

نائل ـ لا جنابك ما زعجتني

عمر ـ استفزيتك مو

نائل ـ هههههه لا بروح ابوك واني تستفزني بهاي حركتك لتنسى اني صگارك حبيبي

عمر ـ جلب نسخة واثق شنو اترجاه منك يله زويد وين الاكل گعدني ابوكم من النوم روح وراهم يدري بيكم زعاطيط

زيد ـ وشلون عرفت احنه هنا

عمر ـ نزل علي الوحي وگال روحلهم غير من الموقع يا ذكي شوف تلفونك مفعل الموقع لو لا لان هذا المخنزر ما مفعله

نائل ـ لان ما اريد اشوف امثالك يمي

عمر ـ ههههه لا بروح ابوك شوفني عفيه شوفني اروحلك فدوه شوفني خاب ما تطير منا ميت عليك
وعلى شوفة جهرتك المخنزره

زيد ـ هههههه وين ابوي يجي قبل ما تندلع الحرب العالميه الثالثه هنا وتصير بالكراسي

نائل ـ التفتنه اني وعمر وصحنه بصوت واحد
انجب زيد

زيد ـ هههههه بالغلط تتفقون بس بغيره لا

عمر ـ صدفه شبيهه يعني

نائل ـ اي صح صدفه

زيد ـ والصدفه تتكرر اكثر من مره خاب طيروا اثنينكم اجه الاكل خاب هلا بيك يا بعد كرشي

نائل ـ صار زيد ثگيل من رتبوا الاكل ويحجي عود شخصيه وكذا واني گوه لازم نفسي ما اضحك احس اختنگت كلش سديت حلگي بايدي لازم ضحكتي بس راحوا ضحكت لما شرگت

زيد ـ وسم الحسن يگطعك بالنص شبيك مجلوب

عمر ـ هههههه مصدوم بيك شافك ثگيل

نائل ـ هههه من الصدمه شبعت

زيد ـ خاب ولطم يلطمكم اثنينكم يا سرسريه اني راح اكل يطبكم سم وفوگه زهر

نائل ـ زيد ياكل واحنه ناكل ونضحك عليه خلصنه وصار الدفع على عمر صاير كريم براسنه عود عمنه وكذا واحنه منطينه على مايه

رجعنه للفندق بعد ما زيد ما بقى شي بالسوك ما جربه الحلويات والكرزات والمعجنات ويشتري ويحمل علينه واحنه هم اشترينه دخلنه وصعدنه للغرفه اول ما دخلنه اندك الباب فتحته صار ابوي بوجهي
تفضل يابه

واثق ـ بيكم شي ليش تأخرتوا

عمر ـ ماكو شي ليش طلعنه للمطعم تعشينه وهذا الثور زويد اكل السوك باللي بي

زيد ـ انجب عمر وخليني محترمك غير اشوف الطعم يله اشتري مو گبل اشتري

واثق ـ ما جاي اقصد مشتراتكم ولا عشاكم نائل ليش بويه هيج تسوي

نائل ـ بلعت ريك التفتت للولد مثلي ساكتين گلت
شكو يابه صاير شي

واثق ـ همام ابن عمك شايفك من واگف بالشارع وجايتك السياره وعمر ساحبك من گدامهه

نائل ـ شفت رجفة ايد ابوي لزمتهه
وداعتك وداعة شيباتك ما بيه شي
بسته بكتفه حضني حيل ويمسح على ظهري

واثق ـ ولك بويه دير بالك على روحك انه بالگوه لگيتك لا تكسر فرحتي بيك

نائل ـ ما عاش اليكسر فرحتك يابه

واثق ـ يديمك بويه ويشد عزمك

نائل ـ تسلم
گعد يمنه شوي سوالف وضحك وشقانه گدامه وهو يضحك علينه لو نضرب عمر ومن يضربنه عمر يصيح بي وعمر يگمز وكلنه نضحك غيرنه جو

ثاني يوم رجعنه للجنوب لبيت جدي ارتاحينه يوم وطلعنه ثاني يوم لبيوتنه من الفجر مجاهد گبل من كربلاء رجعوا واصلين بالليل واني ما انقطعت اتصالاتي ويه فتون والجهال طول الطريق وفتون من گد ما وهواسيه وخوافه من عرفت وصلنه بغداد بس تتصل كل ربع ساعه

لما وصلنه العصر هلكانين تعب كل شوي واحد يسوق من عدنه لان الطريق كلش طويل اخذت اغراضي وگبل لبيتي فتحت الباب ودخلت ماكو احد حتى صوت ماكو گلت نايمين لان مدارس وتعب

خليت الجنطه بالصاله والحلويات والمعجنات بالمطبخ ورحت للغرفه فتحتهه ودخلت حتى فتون ماكو
شسالفه وينهم
ذبيت الستره والقميص امشي واشمر بعدين اجمعهم بالسله بس خليني اسبح متت

فاتنه ـ عفيه ناس تمشي وتشمر لشوكت يا ربي لشوكت نعلم الصغار لو الكبار

نائل ـ التفتت وراي تجمع بملابسي وتضحك
زبدايتي ابهرتي تعالي ولج مشتاقلج والعباس

فاتنه ـ يحجي ويتقدم علي شمرت ملابسه على السرير وركضت حضنته حيل شالني ويبوس بوجهي ويعصر بيه

نائل ـ ولكم افييششش هنا عافيتي بويه ولج فتينه يا تعب عمري شلونج حبيبي

فاتنه ـ تمام يروحي وانته

نائل ـ بشوفتج صرت رب التمام

فاتنه ـ ضعفان ليش

نائل ـ لان مفارك العافيه واليفارك عافيته شيصير بي

فاتنه ـ حبيبي المخنزر

نائل ـ ههههههه فيلون ولك سمنان صايره بيك لحيمه مال عض وگرص

فاتنه ـ شوف من هسه تعض تگرص تأذيني اروح لاهلي
بعدني ما مكمله الجمله وهو صافن بوجهي باسني حيل احس شفتي انتهت لما ضربته وخر وحضني حيل

نائل ـ حبيبي المتحملني بخبالي اموت عليج

فاتنه ـ نائل اذيتني والله

نائل ـ اسف حبيبي بس مفارك العافيه شلون بيه

فاتنه ـ لزمني من خصري وجرني اله اكثر ابتسمت
ها شتريد

نائل ـ مريتي

فاتنه ـ وينهه

نائل ـ بين ايدي جنهه فلعة گمر ضاويه روحي وبيتي

فاتنه ـ ما اتقشمر لا تحاول

نائل ـ هههههه مو هيه بكيفج السالفه

فاتنه ـ شمرني على السرير ويكركرني واني اضحك من كل گلبي صارلي ايام ما ضاحكه هيج ضحكه

نائل ـ ريت هالضحكه تدوم حبيبي گلبج زين جاي تاخذين علاجاتج

فاتنه ـ اي الحمد لله بس البارحه شوي وجعني

نائل ـ بجيتي

فاتنه ـ هزيت راسي اي اخذني بحضنه اني هم حضنته من رگبته
نائل لتروح هواي بعد تمام واذا رحت اخذني وياك

نائل ـ صار حبيبي اني خايف عليج وعلى وضعج وما اخذتج وياي المره الجايه اخذج وعد

فاتنه ـ نائل اخذني لبلسمي
شفته حضني حيل ويمسح على راسي واكتافي لما بجيت حيل

نائل ـ افا افا افا تبجين واني خشمي يشم الهوا لا صرت ولا الله خلقني لو نزلت دمعتج كافي بنيتي كافي حبيبي ابهرتي زبداية حياتي ام حساني الورده

فاتنه ـ نائل اخذني لبلسمي وجدو والله مشتاقتلهم

نائل ـ صار انتي صيري زينه واخذج وعد

فاتنه ـ تمام
ايام وصار شهر رمضان بين تحضيرات سحور وفطور وجمعاتنه لو بيت عمو واثق لو بيت جدو يم اهلي عمو واثق اول عشر ايام راح للجنوب يخلصه ويه امه والعشر ايام الوسط رجع بيهم لاربيل

دز علينه حضرت تمن ماش يحبه نائل بالفطور وبيبي دزت باجه وعمه سماهر والبنات محضرين كلشي سويت حلاوه جكليتيه واخذتهه ويانه من طلعنه من البيت اني ما اصوم بسبب علاجي واذا جعت ينزل السكر عندي وتصير عندي حالات اغماء بسبب برنامجي الغذائي لان اكلي مقسم ع الساعات

نبأ ـ لك هلا فاتنهم

فاتنه ـ ههههه هلوووو يا قووومممم

واثق ـ لا هلا ولا مرحبا اجت المغثه

فاتنه ـ ها واثقهم حتى انته غيروك علي اي حقك عمي حقك اذا امك الحجيه تصيح امهات اربيييلللللل ال ما اريد اكملهه عيب اني استحي

واثق ـ هههههه خايبه فتينهم بعد الروح والريه

عمر ـ هههههه هلا فتين شلونج ولج

فاتنه ـ هلا عمرمر هلا براس الباجه خاب صدك تعال شوف بيبي طابختك

عمر ـ هههههه انعم الله عليج وعلى بيبيتج بس كون خوش طابخيني

فاتنه ـ اي والعباس هيج مايعه ملامحك تعال شوف
اخذته من ايده وكشفت الجدر وهو يضحك يگلي اي خوش طابخيني انضربت على رگبتي شفته زيد شمرت علبة البهارات عليه اجت براسه

زيد ـ ولج الجلبههههههه الا اموتج مرت ابو هبطه

واثق ـ زويد والعباس تأذيهه أأذيك

زيد ـ شوف شسوت بيه ترستني بهارات

واثق ـ هيه تسولف ويه عمر انته اجيت وحشرت روحك لا وفوك كل هذا تطگهه ابن الكلب لو صار بيهه شي

نائل ـ لا ميصير بيهه شي فتون اعتذري من زيد وانته زيد هم اعتذر لان ضربتهه وهيج خلص تنتهي المشكله وبدون صياح خلونه الله يديم جمعاتنه وهذا شهر الخير

زيد ـ خلص اسف فتون لان ضربتج

فاتنه ـ اني اسفه لان رشيتك بالبهارات بس والله طالع حلو هههه

عمر ـ ههههه يله استلم هسه انتي تعتذرين تنطين رأيج تتنمرين

نائل ـ عمر انجب ولا تتدخل

واثق ـ ولكم بسسسس شبيكم شي تتعارك ويه شي زعاطيط انتم

فاتنه ـ ما عليك منهم وثوقي تعال شلون مسويه حلاوه جكليتيه تلوك لهذا الحلك اوي فديتك والعباس جنك دنگه اخذته من ايده لجدر الحلاوه وهو يضحك

واثق ـ ههههه هسه انتي تمدحيني تذميني ما عرفناج

فاتنه ـ عمو رجاءا اذا تصير نفسيه وغثيث وشايب مزعج من هسه گول حتى اگطع علاقتي بيك

واثق ـ ههههههه هسه انتي وين لاگيه هيج عم فرفوش مثلي

فاتنه ـ اي والعباس افديك اني اگلك غير تبقى هنا بعد

واثق ـ لا بعد عشر ايام اروح للغربيه

فاتنه ـ سندباد انته سندباد اركد شوي اگعد خلي مكانك يصير دافي نحس بيك هنا ويانه

واثق ـ ههههه ولج غير اروح هناك مسؤولياتي عايفهن على ماهر وعامر وايهاب شنو ذنبهم

فاتنه ـ باوعتله صفح اخذت اماعين وبديت اصب الحلاوه ما باقي شي على الاذان الولد يرتبون السفره
واحنه نصب والجهال بغرفتهم بيت عمو يلعبون كملنه كلشي كلهم گعدوا نائل اشرلي يمه اگعد انتبهت عمه سماهر ماكو رجعت للمطبخ شفتهه تخلي الجاي على النار
هاي شنو عمه شسوين روحي روحي اني اسوي جاي

سماهر ـ لا يوم شسالفه انه اسوي روحي ارتاحي مو زين عليج التعب گلبج تعبان

فاتنه ـ هههههه هو اني گلبي طول عمري تعبان يتعب من اسوي جاي روحي حبيبتي ميصير صار الفطور وانتي بعدج هنا روحي افطري

سماهر ـ هههه هاي خلصت خلصت تعالي وياي يله

فاتنه ـ بس اغسل ايدي واجي وراج
راحت عمه سماهر سحبت نفس وحضرت الشكر وصينيه بيهه اكواب الجاي ورحت وراهم گعدت يم نائل بديت اكل شوي شوي وسالفه من نائل وسالفه من عمر وسالفه من زيد وكلهه تضحك اندك الباب ودخل مجاهد لان يدري عمه سماهر تلبس حجاب من عمر

مجاهد ـ ولكم هلوووووووو صيام مقبول للجميع ما بيه حيل اگلكم واحد واحد

واثق ـ منا ومنكم بويه تفضل ويانه

مجاهد ـ لا عمي الف عافيه واصل بيه كرشي يمشي گدامي يله ولكم سيبنديه تطلعون

عمر ـ استلم بدت رحمة الله

نائل ـ راح تنسحل حبيبي بس يسمعك

مجاهد ـ سمعت سمعت ولك تنلام بيك فتينه من تسميك راس الباجه اااخخخ بويه فتينه گليله راس الباجه

فاتنه ـ ههههه راس الباجه

نبأ ـ عمر يصنف على مجاهد وميگدرله على گولة عمو لسان دلاله على مجاهد گعد ويانه ياكل حلاوه ويبوس بسباوي لو بيه وفتون گباله گاعده تاكل وتضحك مد طوله الهه وباسهه بخدهه ونائل يتعارك وياه يغار عليهه حتى من جهالهه حجايه من مجاهد ونائل والولد عمو عاط بيهم واحنه نضحك عليهم لما طلعوا يتونسون واحنه بقينه نرتب فتون تتحرك وتوگف تلزم بالكاونتر لو الميز لزمتهه من ايدهه
ها فتون

فاتنه ـ ها عمري

نبأ ـ روحي ارتاحي احنه نكمل الباقي ما عدنه شي

فاتنه ـ لا اساعدكم ما عندي شي

نبأ ـ روحي حبيبتي انتي
دخل عمو واثق شافهه تعبانه حضنهه

واثق ـ بنيتي باباتي شبيج

فاتنه ـ ها عمو ماكو شي بس شوي دخت

واثق ـ تعالي وياي بابا تعالي

فاتنه ـ اخذني من ايدي گوه امشي احس اختنگت عيوني وحدهه تغمض گوه افتحهن لزمت ايد عمو حيل انتبه علي واني غمضت عيني احس محتاجه انام

واثق ـ فتون بنيتي فتون ولجن نبأ سبأ وينجن بويه نباوييييي وين علاج اختج جيبيه بسرعههههه

نبأ ـ طلعت على صوت عمو فتون واگعه بين ايده ركضت عليهه
فتونه عمري افتحي عينج فتون

واثق ـ علاجهه ويييننن وينه سماهر شوفي علاجهه بغرفتهم

نبأ ـ عمو يمسح على وجهه ويحجي وياهه يكسر باب الگلب شلون يشرب بيهه المي شوي شوي لما عمه وسباوي جابوا العلاج اني افرك ايدهه شربهه الحبه ومخليهه بحضنه ذبيت حجابهه ونزل شعرهه حضنهه عمو ويمسح على راسهه لو يحجي وياهه وهيه نايمه ما اتحملت احس اختنگت حيل طلعت من الصاله للمطبخ غسلت وجهي رن تلفوني شفته عمر رديت
ها عمر

عمر ـ شبيج نبأ باجيه احد وياج

نبأ ـ عمر فتون وگعت بس طلعتوا وهسه عمو يمهه هو وعمه سماهر وسباوي وام نائل اني ما اتحملت طلعت للمطبخ نائل يمك

عمر ـ اي يمي

نبأ ـ شوكت ترجعون

عمر ـ هسه جايين هذا الخبل لگف سويجه وركض قبلنه جان يخابر فتون وما ترد جايين جايين خرب ولك نائلللللل

نائل ـ اخابر فتون وما ترد شگد حاولت وماكو الا بيهه شي هيه بعز انشغالهه ترد علي ليش هسه ماكو الا بيهه شي وصارلهه فتره ارجع من الدوام الگاهه نايمه على الميز بالمطبخ وصلت للبيت ودخلت ركض شفت ابوي مخلي راسهه بحضنه وشعرهه كله طالع گعدت يمهه
فتون فتينتي زبدايتي شبيج حبيبي مو العصر جنتي زينه شبيج

واثق ـ ما بيهه شي اخذت علاجهه ونايمه حتى ضغطهه زين كافي تتراجف عليهه

نبأ ـ عمو يحجي ويه نائل ونائل مثل الفاصل ميسمع يلملم شعرهه بـ ايد والايد الثانيه حاضنهه اله ومخلي راسه على راسهه لو يبوسهه بخدودهه دخلوا الولد وهو ممنتبه لاحد ياخذ بشعرهه ويشمه ويرجع يحضنهه تقدم مجاهد اخذهه منه للغرفه وهو مجلب بـ ايدهه

مجاهد ـ شبيك نائل اصحى جديده عليك هيج تصير حالتهه

نائل ـ مجاهد ما اگدر بدونهه والله تهد حيلي من توگع والله
دخل علاوي گعد بالگاع ولزم ايدهه

علي ـ بابا

نائل ـ ها بابا

علي ـ شبيهه ماما

نائل ـ شوي تعبانه وهسه من ترتاح تصير زينه

علي ـ اي بابا احنه درسنه خالو ظافر درسنه اليوم منريد ماما تتعب

نائل ـ عفيه عليك حبيبي روح شوف اخوانك حتى نروح للبيت

علي ـ اي هسه بس بابا مريم نامت

نائل ـ ميخالف حبيبي
شفته افتر يمي تمدد ولزم ايدي
ها شبيك وليدي

علي ـ نعسان اريد انام يمكم هنا

نائل ـ هسه بابا بس تگعد امك نروح للبيت

علي ـ تمام

نائل ـ شفته ينام شوي شوي ولازم طرف قميص فتون ابتعدت وقربته منهه محتاج لحنان الام وهو محروم منه ضم روحه بيهه وهيه حركت ايدهه حضنته بدون ما تدري تيقنت انو رب العالمين جعل حب الام وحنانهه فطره جميله جدا

شفت ابوي ابتسم گمت وطلعنه كلنه خليناهه ترتاح لما گعدت قريب السحور الجهال كلهم نايمين جبتلهم ملابسهم من البيت وحضرت جنطهم شفتهه طلعت تفرك بعيونهه گاعدين بس اني وابوي لان ما قبل ينام الا يشوفهه

واثق ـ هلا بويه صح النوم

فاتنه ـ هلو عمو ليش بعدك گاعد

واثق ـ ردت اشوف بنيتي شوكت تگعد تعالي يمي تعالي

فاتنه ـ شفت نائل بس يباوع گعدت بالنص ولزمت اديهم اثنينهم باسوني كل واحد من خد بنفس الوقت ضحكت
هههههه انتم متجوزون من هاي السالفه تتحركون بنفس الوقت

نائل ـ الولد سر ابيه هههههه شلونج حبيبي زينه

فاتنه ـ زينه شوفني اجيتكم امشي ما بيه شي

نائل ـ فتون

فاتنه ـ ها

نائل ـ ليش ما تعتنين بنفسج احنه شنو متفقين

فاتنه ـ والله معتنيه بنفسي بس نسيت اليوم العصر آكل هذا كل الموضوع وعوضته بالفطور وياكم

نائل ـ مو شرط تعوضين وجبه بوجبه المفروض تاكلين كل وجبه حسب الوقت المحدد لان بيهه طاقه الج

فاتنه ـ تمام دكتورنا وبعد

نائل ـ ابتسمت وشاورتهه
مشتاقلج بذاته

واثق ـ ها شو بديت تبسبس ولك

نائل ـ الله اكبر مرتي وشاورتهه هسه مشاركني بيهه انته مو هاي گاعده يمك ولازمه ايدك شو ما حجيت ولا فتحت حلگي واني من احضن امي تجيني مزرعد

واثق ـ ههههههه حلوه والله صاير تعرف مزرعد

نائل ـ اي بفضل ولدك السرسريه صرت احجي انباري على جنوبي على بغدادي بس بعدني ما صرت كاكا منا وهيج اصير

واثق ـ تاج راسك ولك متعافي علينه ابو هبطه

نائل ـ لا شلون اتعافى حشا

واثق ـ اي عبالي يله انه رايح اكسرلي نومه شوي لما تسوون سحور

نائل ـ صار شايبنه الكشكول

واثق ـ ابو هبطه

فاتنه ـ بقوا عمو ونائل واحد يذب لقب على الثاني دخل عمو لغرفتهم خليت راسي على كتف نائل
اگول نائل

نائل ـ گولي حبيبي

فاتنه ـ شوكت علوش نام يمي

نائل ـ بالليل من وگعتي حتى مجاهد اجه شافج هم

فاتنه ـ نائل

نائل ـ ها عمري

فاتنه ـ ما اخذتني لبلسمي وجدو

نائل ـ صيري زينه ونروح بهذا وضعج مستحيل اخاطر بيج واخذج

فاتنه ـ بس

نائل ـ لا بس ولا شي گومي يله تعالي خليني انام شوي وراي باجر دوام گعدوني گد السحور والصلاه

فاتنه ـ تمام
اخذني من ايدي ذبيت حجابي واتمددت بقى يمسح على شعري لما نمت وهو هم گعدت الصبح يريد يطلع للدوام والجهال يبدلون ركض بركض رتبتهم ومشطتهم بسرعه شفت اكلهم جاهز اخذوه نطيتهم المطارات مال المي بوستهم واحد واحد وطلعوا يسوون باي وبوسه بالهوا صعدوا بالخط وراحوا للمدرسه سديت الباب حضني نائل
ها حبيبي

نائل ـ زبدايتي صرتي زينه

فاتنه ـ الحمد لله تسحرت انته

نائل ـ اي الحمد لله

فاتنه ـ ليش ما گعدتوني

نائل ـ شفتج تعبانه ما ردت اگعدج وبالحالتين گعدتي او لا انتي ما تصومين مو

فاتنه ـ اي صح
مطوقني بـ ايد وحده صاير ظهري لصدره
اگول نائل

نائل ـ گولي ابهرتي

فاتنه ـ جاي اتعبك مو

نائل ـ فتون بدون تليص بالحجي خلينه ماشين على حب الله لا اجفص بمصارينج هسه الحگيني بسرعه

فاتنه ـ راح بسرعه للغرفه مبين عليه ضاج لان ملامحه تغيرت رتبتله القميص والرباط وهو ميباوعلي لبسته الستره واخذ اغراضه وطلع استهضمت حتى ما ودعني طلعت وراه شفته وصل للباب يريد يطلع رجعت للغرفه فتحت الباب حضني حيل وباسني برگبتي

نائل ـ تبقين نذله وياي وتغثيني وابقى اتنفسج مو بس احبج ابقي بخير لخاطري تمام احبج يا احلى روح

فاتنه ـ ابتسمت نائل راح گعدت فضولي تريگنه اني وياه نزلت فتونه بنت عمر هيه وحسين وعبوسي اخوانهه وجودي ابن زيد گعدتهم يمي نطيتهم كل واحد بيضه وحليب اجوني انوس وبلسمي گعدتهم وياهم وكل واحد يجي ابوسه واحضنه واغسله اموت عليهم

نزلوا البنات صبحوا علي وطلعوا ويه عمر للجامعه وزيد راح لشغله كملوا الجهال غسلت اماعينهم وغسلتلهم واخذتهم لغرفة الجهال يلعبون حسيت روحي تعبت رحت اخذت علاجي ونمت بعد ما قفلت البيت كله گعدت على صوت الجهال راجعين من المدرسه گمت لبست حجابي وطلعت شفت عمه سماهر تسألهم على يومهم وشنو صار وهمه محد منتبهلي التفتت بسمه الي

بسمه ـ ماااميييي

فاتنه ـ عيون امهه حبيبتي الشطوره
اجت تركض حضنتهه حيل
روحي بنياتي

بسمه ـ مامي اخذت عشره وصفگولي هههه

فاتنه ـ تحجي وتگمز وتصفك بستهه بخدهه حيل
عفيه عليج وبعد

بسمه ـ سدوله عشره وحسن وعلوش هم ومريومه اليوم منطينهه جائزه ووووو

فاتنه ـ تحجي وايدهه على حلگهه اجه علوش ضربهه خفيف هيه برطمت
ها مامي ليش

علي ـ هههه احبهه والله غير اختي بس هيه متتحمل ماما اني احبج

فاتنه ـ حضني ومخلي راسه على كتفي مسحت على ظهره
حبيبي علوش ماما لتضرب اخوانك حتى لو تشاقيهم تمام

علي ـ تمام ماما ما اعيدهه بعد

فاتنه ـ عفيه عليك حبيبي
گعدت وكلهم يمي ويسولفولي على يومهم شنو صار واضحك على مواقفهم واللي يحجي وياي ياخذ وجهي بين اديه الصغيرونات ويسولف والثاني يجرني اله لما عمو حجه

واثق ـ ها جدو نبقى بهاي ملابسنه لو نغيرهم

الكل ـ نغيرهم

واثق ـ عفيه سباعي عفيه بالحلوين يله بدلوا ملابسكم لما انه وماما سماهر نسويلكم اكل متفقين

الكل ـ متفقين

فاتنه ـ راحوا يغيرون ملابسهم گمت للمطبخ شفت عمو واثق وعمه سماهر يجهزون كنتاكي وفنگر حضرت عصاير وكل واحد اكله گدامه صار صاروا ياكلون واني واگفه گعدني عمو وانطاني ماعون
هاي شنوووو هواي والله من غير السلطه لا عموووو

واثق ـ اكلي لا ادبغلج جلدج اريد هذا كله ماكلته والعصير تشربينه

فاتنه ـ اكلت وعمو گاعد گبالنه ويراسل لو يخابر ومنو يخلص اكله يگوم واللي ممخلص يبقى لما كلهم شبعوا واني بعدني اكل وميخلص اخذته ضميته

واثق ـ وييننننن ارجعي كملي اكلج بسرعه

فاتنه ـ عمو والله ما اگدر تلعب نفسي شبعت كلش والله

واثق ـ ما يمشن علي ارجعي اكلي

فاتنه ـ والله ما اگدر ليش متصدك خلي بعد شوي اكلهم وعد

واثق ـ فتينه

فاتنه ـ والله وداعة نائل بعد واني ما احلف بنائل جذب

واثق ـ ماشي

فاتنه ـ شكرا عمو
بسته بخده وهو يضحك علي غسلت ماعين الجهال ورجعنه لبيتنه وهيج تمر ايامنه الرمضانيه بالليل نلعب محيبس لو لعبة البطل لو نصير مجموعات ونلعب لودو لو نخلي البلي ستيشن بالصاله ونگعد كل اثنين يلعبون سوا ومنو الفريق اللي يفوز ثاني يوم الخسران يطبخ الفطور لما صار العيد

نائل ـ حالات فتون بدت تتكرر لحد قبل العيد بيوم اجيت من الدوام شفتهه نايمه على الميز والجهال يلعبون ويركضون شفتهه هابط ضغطهه والسكر نطيتهه لبن وحلويات لما صارت زينه ثاني يوم صار العيد

فاتنه ـ صباح يوم العيد گعدت نشيطه سبحت وگعدت الجهال سبحتهم وعايدوني وعايدت عمه ام نائل
كل عام وانتي بخير عمه ربي يديمج النه

ام نائل ـ وانتي بالف خير يوم ويخليج ويديم عليج العافيه

فاتنه ـ تسلميلي حبيبتي
طلع نائل عايد امه واجاني مبتسم حضني حيل

نائل ـ كل عام وانتي مريتي كل عام وانتي عافيتي كل عام وانتي ابهرتي

فاتنه ـ ههههه كل عام وانته حبيبي كل عام وانته سندي كل عام وانته احلى واحن زوج بالعالم

نائل ـ بنية روحي انتي فتينه

فاتنه ـ حبيبي يله نتريك ونروح نعايد اهلك واهلي مو

نائل ـ صار من عيني هاي قبل هاي تمونين عالروح وراعيهه

فاتنه ـ حبيبي يديمك الي
حضرت الكاهي والگيمر ونائل يلعب ويه الجهال صحتلهم اكلوا وبدلوا كلهم ورتبتهم طلعنه لبيت عمو اول شي دخل نائل وعمه ام نائل واني وراهم
الجهال قبلنه داخلين ومعايديهم وماخذين حتى عيديات وسدل تتعارك ويه عمر تريد منه عيديه وهو يگلهه انطيتج بنت ابو هبطه وهيه تضرب بي وتصيح ابو فليس

واثق ـ هلا بالعيد كله هلا بويه

نائل ـ هههه كل عام وانته بخير يابه يديمك النه حجي

واثق ـ وانته بالف خير يحفظك ويعلي مقامك وليدي

فاتنه ـ كل عام وانته بخير وثوقي

واثق ـ بويه هلا بالعيد كله هلا بزينة بناتي كل عام وانتي گمرة بناتي يعافية ابوهه

فاتنه ـ فديتك وثوقي
سلمت على الكل وعايدتهم شفت عمه سماهر
سمهورتي الحلوه

سماهر ـ بنيتي فتونه كل عام والعافيه ما تفارگج

فاتنه ـ حبيبتي امي كل عام وانتي بركتنه وعافيتنه شگد احبج اني

سماهر ـ فتونتي يوم

نائل ـ واني الي حصه لو لا

سماهر ـ انته وليدي وقطعه من روحي الفارگتهه حبيبي

نائل ـ امييي عافيتي انتي كل عام والفرحه متفارگج يا احن ام

سماهر ـ كل عام وانته احسن ابن يعلي مراتبك ويحميك من اولاد الحرام

نائل ـ هههه احلى دعوه هاي
عايدنه اهلي كلهم وراهه طلعنه كلنه لبيت عمي ابو سليم نعايدهم

فاتنه ـ دخلنه لبيت اهلي بالبدايه عمو والولد وراهم عماتي واني والبنات اخر شي شافني بابا اشرلي رحت حضنته حيل
باباتي كل عام وانته احلى بابا

توفيق ـ بنيتي البطله كل عام وانتي بخير ويديم عليج العافيه

فاتنه ـ حبيبي فديتك
عايدت بيبي
فيروزتي الحلوه كل عام وانتي بركتنه وعافيتنه

ام سليم ـ فتونه يوم كل عام وانتي حبيبتي وبنيتي

فاتنه ـ ماما كل عام وانتي روحي وگلبي

ام مجاهد ـ حبيبتي كل عام وانتي بصحه وعافيه

جمار ـ خاب فاتنهم

فاتنه ـ جمورتي عمري مشتاقتلج يروحي

جمار ـ هههههه كل عام وانتي بخير حبيبي

فاتنه ـ وانتي بخير گلبي وين البنات

ميس ـ هنا هنا لو بس جمور الهه حصه

فاتنه ـ ميوستييي عمري

ميس ـ هههههه ام گلب المشگك كل عام وانتي الخير لبيتنه

فاتنه ـ ههههه حبيبي انتي كل عام وانتي احلى ميوسه

جمانه ـ نگدر نسلم لو لا

فاتنه ـ جموون واخيرا اجيتي مشتاقتلج

جمانه ـ اجيت عمري اجيت حبيبي انتي

فاتنه ـ جمون گلبي يوجعني وجاي اضم على نائل ما اريد اتعبه

جمانه ـ احجيله حبيبي احجيله خليه يعرف يتصرف

فاتنه ـ تمام وين دودو

بيدق ـ هنا وين عمي انتي ناسيتني يا دودو بيش كيلو بعد

فاتنه ـ احبج والله
حضنتهه حيل وبجيت
مشتاقتلج ليش متجين هواي انتي وسامر

بيدق ـ هاي اجيت حبيبي لخاطرج والله لان گلتي اريد اشوفكم وهاي احنه بين الدوام والمدارس وشغل سامر

فاتنه ـ حبيبي انتي
ابتعدت نائل سلم عليهم كلهم وگعدنه وسما اجت گعدت بصف عمو حضنهه گدام الكل وباسهه براسهه ومگعدهه يمه ويسولف ويه ابوي واني متونسه ويه البنات وضحك وسوالف لما دخل مجاهد

مجاهد ـ ما بيه حيل اعايدكم واحد واحد كل عام وانتم بخير جميعا والشايب يحج والممعرس يعرس والمعرس يخلف والمخلف متورط والمريض يتعافى والمفلس تصير عنده فلوس والصغير يكبر بعد لو كافي

نائل ـ هههههه كافي كافي يكثر خيرك تعال اگعد يمي جوجايه مشتاقلج وداعة شواربج السابيتني

مجاهد ـ اوي نئوله نزول عليج وعلى شواربج عيب مو هنا ابوي واهلي تتغزلين بيه ليش متستحين ما عندج اخوان

نائل ـ لا ما عندي تعال شلون بقلاوه تفوتك وهاي كليجه ام التمر مبينه من ايد عمتي لان سما ما بيهه خير

سما ـ ياااااا والله اني سويتهه مو هيج بيبي

ام سليم ـ ههههه اي يمه صدك ينطيهه العافيه تشتغل وممخليتنه وحدنه

مجاهد ـ منو يمدح العروس

زيد وعمر ـ امهه والخطابهههههه

فاتنه ـ يحجون وصفگوا ايد بايد وكلهه ضحكت وعمو يرزل بيهم لما صار وقت الغدا عمو دز زيد وعمر وابوي دز مجاهد وظافر جابوا غدا وكلشي من برا تغدينه وشقاهم على الاكل ومجاهد مثل مره لازم يسوون بي شي وكلهه تضحك وهو مياخذ بخاطره

حسيت روحي تعبت حيل گوه اكلت مختنگه حيل بدت وياي الرجفه البنات نقلوا كلشي واني على نفس گعدتي ما اگدر اگوم بقيت اهدي بنفسي كلهم ملتهين بسوالفهم والولد شقاهم وضحكهم خليت راسي على طرف التخم وشربت مي لما شوي ارتاحيت التفت نائل

نائل ـ فتون شبيج وياي تسمعيني فتونه

فاتنه ـ ها اي بس شوي اختنگت

نائل ـ رخي حجابج شوي

فاتنه ـ اي هسه
رخيت الحجاب شوي احسن ارتاحيت رجعنه لبيتنه بدلت وشفت الجهال مبدلين رجعت اريد انام وگعت بنص الصاله ومحد يمي صرت اشوف الاشياء تتقرب وتبتعد لما غمضت عيني ونمت احس گلبي شوي شوي جاي يوگف لما بعد ما حسيت بشي

نائل ـ استغربت تأخيرهه وين راحت وهيه گالت تعبانه وضعهه بيت اهلهه ما عجبني كلش گمت اول ما فتحت الباب شفتهه بالصاله واگعه على وجهه وجواهه دم ركضت عليهه

فتونه ولج فتوووننن احجي وياي حبيبي فتون ولج فتون حاجيني شبيج
مسحت خشمهه
يوووومممم ولج يمااااا الحگيلي صيحي ابوي صيحيلي احد فتون راح تروح من بين ايدي

ام نائل ـ يمه فتوووننن شبيهه

نائل ـ ما ادري گالت تشوف الجهال فدوه شوفيلي ابوي والولد لو مجاهد وظافر
طلعت امي تركض بدشداشتهه وحجابهه ما اعرف وين راحت شلت فتون وگعت مني
يا حيل علي دخيلك يا ابو الحسن شوي عيني بس اشيلهه ربييييييي دخيلك وين انطي وجهي وين ارووووححح فتون ولج فتينتي

شلتهه گوه رادت توگع مني گعدت بالگراج وعيني للسما
ربي دخيلك لا تفجعني بيهه
دخل ابوي يركض وامي وياه والولد ومجاهد وياهم اخذهه مجاهد وركض بيهه لزمني زيد من ايدي واخذني وراهم شفت مجاهد وابوي طلعوا بالسياره واحنه وراهم

اباوع ايدي كلهه دم وترجف شنو يحجون شنو يگولون بالي مو يمهم ابد لما وصلنه للمستشفى شفتهه على السديه دخلوهه وابوي ومجاهد وياهه صرت امشي واوگع رجلي متمشي ضربت على رجلي حيل
ولجن امشن لخاطر الله شبيجن تموووتنننننن امشننن

عمر ـ شبيك نائل مو هيج تدك على رجليك

نائل ـ ما يمشن ما يمشن شوفهن ما يمشنننننن شسوي بيهن وفتينه خذوهه بعيد عني شوفهه ماكو ما جاي اشوفهه اروحلك فدوه عمر اخذني وراهم

عمر ـ اخذك والله اخذك تعال جيب ايدك زيد عيني وخلينه نشيله يله

نائل ـ شالوني منا ومنا ايدي على اكتافهم وصلنه فتون ماخذيهه للعنايه ومجاهد واگف بالباب وابوي يهدي بي شافني هيج اجاني يركض

مجاهد ـ شبيك نائل ليش ما تمشي ها شبيهن رجليك

نائل ـ ما ادري مجاهد ما ادري شبيهن نزلت من السياره ما اگدر امشي وين فتون شبيهه احجيلي عايشه مو عايشه

مجاهد ـ هسه يطلع الدكتور يطمنا عليهه

نائل ـ يعني متدري بيهه ميته لو عايشه بس هيه عايشه والله احس بيهه عايشه

مجاهد ـ اي هيه عايشه بس اهدأ والله عايشه هم اني احس بيهه عايشه

نائل ـ اي هيه عايشه والله شوف هسه يجون يگولون عايشه
شوي وطلع الممرض طلب واحد من اهلهه گتله اني دخلنه اني ومجاهد وابوي گوه امشي اسحل برجلي سحل گال تعدت مرحلة الخطر بس تبقى بالمستشفى لما تصير زينه

وافقت ووقعت على بقائهه بالمستشفى انتبهت فتون جايبيهه بتراكهه لا حجاب لا ابد هيج التفتت على ابوي هزلي راسه اهدأ تقربت منهه
فتونه فتينتي زبدايتي ابهرتي
احجي وياهه وهيه متدري بيه بالليل رجعوني للبيت غسلت واخذتلهه ملابس ورجعت للمستشفى شافني ابوي عاط بيه

واثق ـ شسوييي المن جاي مو گتلك ارجع ارتاح احنه هنا

نائل ـ ما ارجع ولا ارجع رجلي على رجلهه نرجع سويه

واثق ـ نائل خليني مسيطر على اعصابي وجيب ملابسهه وارجع

نائل ـ گتلك ما ارجع يعني ما ارجع ولا تحاول وياي

واثق ـ نائلللللل

نائل ـ لو مو تصيح لو تگطعني وصل ما ارجع
خليت الجنطه يمي وگعدت طلعت طوبه صغيره تقوي الاعصاب بقيت اعصر بيهه حتى تتقوى اعصابي ومترجع ترتخي وابوي يلوب يومين وفتون ماكو ما گعدت ادخل ابدل ملابسهه وارتب حجابهه واطلع باليوم الثالث يله گعدت دخلونه يمهه جنه متواجدين اني ومجاهد دخلت اني بالبدايه الممرضه تسولف وياهه وگفت يمهه
ها حبيبي الحمد لله على سلامتج
شفت الممرضه طلعت حضنتهه بسرعه
فتينتي يتعبي وراحتي زينه انتي زينه

فاتنه ـ گلبي احسه يريد يطلع من مكانه من شفت نائل ما اگدر احجي گلبي يوجعني يحجي وياي بس اهز راسي گوه رفعت ايدي لزمت وجهه رفعت الاوكسجين وبسته بخده شفته رجع الاوكسجين وعيونه ممليه دموع مررت ايدي على عيونه نزلت دمعته رجع حضني حيل واحس بدموعه تنزل بقى وين گلت
حبيبي

نائل ـ روحه لحبيبج يا بعد شهگات روحي فتينه ليش ولج ماتت رجلي وايدي وما گدرت اشيلج والله وداعة عيونج ليش هنت عليج ها هنت عليج استرخصتيني البنات جانن جايات يشوفنج ما شافن منج شي ورجعن وهنه منتظرات منج خبر تگعدين جهالج يبجون عليج يردوج منين اجيبج الهم ها منين دمج بـ ايدي من الظهر لليل

فاتنه ـ اسفه
حجيتهه ولزمت گلبي بقيت اتنفس حيل بالاوكسجين ولازمه ايد نائل حيل لما هديت شوي عرفت لازم ما احجي هواي لو اتعب روحي جهالي منو الهم نائل شلون گدر يعيش هاي الايام واني مثل الميته شفته مخلي راسه گبالي صارت عيوني بعيونه وعيونه متروسه عتب غمضت عيني ردت اشيل ايده ما گدرت حس بيه وساعدني خليتهه على وجهي صار يمشي اصابعه على حواجبي وعيوني غمضيت عيني حسيت براحه دلكلي اكتافي وظهري نمت لان العلاج اللي اخذه بس ينوم

نائل ـ بعد ما نامت فتون طلعت شافني مجاهد گعدت حجيتله كلشي
متگدر تتحرك ومتگدر تحجي اذا بقت بهذا وضعهه ارجعهه للندن لو اخذهه للهند قررت ابيع الصيدليه وكلشي بيهه والبيت وياهه وعندي قطعة ارض بالجنوب ابوي مسجلهه باسمي هم اذا استوجب الامر ابيعهه واسكن ويه اهلي لما ارجع انهض من جديد

مجاهد ـ شبيك يا خوي

نائل ـ شبيه مجاهد هذا حالهه شوف كلهه تسأل عليهه شاگول ها شاگول اگول متگدر تتحرك لو شنو ها هيه منا وهذيج سما مناك اليوم جابت الجهال باقين من بيت لبيت فهمني شسوي ها شسوي ما الومهه لا والله وحقهه هيه اصلا تعبانه رغم نحاول نريحهه بس المسؤوليه جبيره وهيه صغيره مو حمل هيج مسؤوليه بس هذا المكتوب اغيره ما اگدر اغيره

مجاهد ـ ارتاح وربك يحلهه

نائل ـ ونعم بالله
بقينه هيج اسبوع كامل لما شفتهه نفسيتهه تعبانه بشكل ادخل يمهه اشوفهه تمسح بدموعهه ردت اغير من نفسيتهه ما اجت ابالي غير هذن الكلمات گلت

هلا يا غصن روحي ويا تعب دنياي
هلا بكل اللي مر الراح والجاي

فتينه خاب شني گومي يله خلينه نرجع مثل قبل نتعارك بالمخاد اني وياج لو تركضين وراي بالماسحه لو تلملمين الملابس اللي اشمرهن وتحجين علي لو ارجع وابوسج حيل لما اطلع روحج

فاتنه ـ يحجي واني اضحك صدك كل هذن نسويهن گلت
نائل باجر حفلة مريم

نائل ـ ومريم متقبل تحضر الحفله الا انتي وياهه

فاتنه ـ بس

نائل ـ شنو بس هيه متعلقه بيج تدرين لگيتهه گاعده بنهاية الغرفه بعد ما دورت البيت كله عليهه يله لگيتهه لازمه ملابسج وتبجي

فاتنه ـ نائل اني حاجزتلهه ملابس والله اخذهه وروح

نائل ـ متقبل تگول اريد ماما فتون تلبسني اياهن وتسوي شعري

فاتنه ـ بس نائل

نائل ـ شنو يا حبيبي محد يريد يسوي شي اذا مو وياج صيري زينه وخلينه نرجع للبيت بالمناسبه حبيبة گلبج سحلتني

فاتنه ـ هههه والله

نائل ـ والعباس هيج سحلتني بالمحادثه ذهابا وايابا وكل شوي وگالت الفاهي ابو هبطه ما بيك خير واني مفعل السمايل المصدوم

فاتنه ـ ههههههه
ضحكت حيل ولزمت گلبي
اااخخخخ يمه گلبي

نائل ـ شبيج فتون

فاتنه ـ ماكو شي بس نغزه هاي

نائل ـ هسه تصيرين زينه
بقيت اسولف وياهه ارجع للبيت گد اسبح واشوف الجهال وارجع يمهه للمستشفى خلص الاسبوع الثاني وهيه ملت تريد تطلع الدكتور شاف وضعهه مستقر وافق نطلعهه اخذناهه لبيت اهلهه لان عمتي ام سليم تريدهه يمهه

نبأ ـ طلعت فتون والكل منتظرهه يشوفهه جهالهه فرحانين واحنه كلنه منتظريهه لما وصلت سيارة نائل شفناهه بالكامرات طلعوا الجهال يركضون كلهم بيبي اخذت بيدهه جكليت هيه وعمه سماهر وعمه ام نائل وامي

ابوي فتح الباب شفنه نائل شايلهه على ايده ضعفانه حيل ومتغيره عيونهه داير ميدورهم اسود خدودهه منتهيه نزلت دمعتي بسرعه سمعت شهگه شفتهن ود وسباوي يبجون بيدق وجمانه وجمار وساره اللي ما اجت بالعيد واجت هسه حتى تشوف فتون

عبر بيهه نائل اخذهه للصاله گعدهه وسندهه من الجوانب بمخاد لهالدرجه حالة فتون واصله بيهه رحت للمستشفى الهه بس كل مره اشوفهه نايمه لو متمدده ما ادري بيهه متگدر تگعد كلهم سلموا عليهه بقيت اخير شي مسحت دموعي ورحت يمهه

فتونتي حبيبي الجميل دكتورتنا الحلوه
مدت ايدهه ترجف مسحت دمعتي اللي نزلت غصب عني حضنتهه حيل
فتون صيري قويه لخاطرنه احنه بحاجتج يروحي اني ما اكبر والله ابقى هذيج الصغيره اللي محتاجتج والله محتاجتج فتون

فاتنه ـ بنيتي نباوي ادعيلي

نبأ ـ جاي ادعيلج والله بس انتي صيري زينه تمام

فاتنه ـ ان شاء الله
شفت الكل مجتمعين ايدي توجعني من الكانوله تزرفت تزرف نائل گاعد يمي هو من جهه ومجاهد من الجهه الثانيه ملت راسي على مجاهد مسح على خدي وباسني بگصتي

مجاهد ـ يا بعد كل اليميلون علي ريتني دوم عكازتج

فاتنه ـ احبك جوجايتي

مجاهد ـ روحه وعمره لجوجايه فتينه نامي وارتاحي نامي

فاتنه ـ فتح ايده الي ومخلي راسي على صدره نمت لان اگعد دقايق معدوده وارجع انام

نائل ـ التفتت شوي شفت جسمهه مايل درت وجهي بسرعه شفت مجاهد مخليهه على صدره ويباوعلي بخبث
ها شبيك

مجاهد ـ شكو شتريد

نائل ـ مجاهد بلا مصاخيتك شكو

مجاهد ـ شوف مرتك وين نايمه على صدري

نائل ـ خرب شرفك اذا تحجي الصدك مرتي غيررر اختككككك

مجاهد ـ ههههههه حماوه شبيك هسه اني حجيت شي غلط

نائل ـ طريقتك غلط اسلوبك الجايف عوفه الدكثور

مجاهد ـ دكثور ولا صيدلاني فاشل

نائل ـ باوعتله صفح ودرت وجهي النذله فتينه ما نامت الا على صدره عود اني بيت اهلي بسيطه الفيله

نبأ ـ نائل گوه گاعد على اعصابه يعصر بـ اصابع ايده ويهز برجله سريع باوعت لمجاهد وضحكت هو هم التفت علي نائل

نائل ـ يا الله ضحكة خير تباوعين لاخوج وتتمضحكين شكو

عمر ـ هههههه مو جنك غيران على مرتي اكثر مني لو لان مرتك بحضن اخوهه

نائل ـ انجب عمر واسكت قبل لا اسكتك

نبأ ـ عمر گوه لازم نفسه ما يضحك حيل وزيد مثله بس يضيعوهه بالسوالف بينهم ونائل محترك لما گام شالهه واخذهه للغرفه هنا كلهه ضحكت حتى ابوي وعمو

نائل ـ اخذتهه لمكانهه خليتهه وذبيت قميصي تمددت يمهه
فتينة روحي
عوضت نوم اسبوعين سهر بحيث محتاجيني بالصيدليه ومخابريني ما ادري بيهم گعدت الباب يندك گمت فتحته شفتهه عمتي ام سليم
ها عمه

ام سليم ـ نوم العافيه يوم گوموا اكلوا شي

نائل ـ ان شاء الله بس فتون تاكل شوربه

ام سليم ـ سوينالهه شوربه وانته غير تجي تاكل هذا عمك والولد هنا

نائل ـ صار هسه اجي
اجه مجاهد شمر علي تراك اخذته منه وهو يضحك لو يغم بدلت وعلگت ملابسي وطلعت اجوا الجهال يمشون واحد ورا الثاني عبروا من يمي راحوا لفتون رجعت وگفت بالباب
ها خير

حسن ـ نريد ماما
نائل ـ تتعشون يله
سدل ـ تعشينه نريد ماما
نائل ـ نظفتوا اسنانكم
بسمه ـ اي نريد ماما هسه
نائل ـ حضرتوا دروسكم
علي ـ اي بابا نريد ماما نشوفهه
مريم ـ بليز بابا بليز
نائل ـ شوي مو هواي
فضل ـ بث ثوي ونلوح

نائل ـ هههههه هو بث ثوي يله ادخلوا
دخلوا يمشون شوي شوي توزعوا داير ميدور فتون وهيه نايمه فتحت عينهه وشافتهم باوعتلي فتحت ايدهه الهم وحضنتهم من الجهتين وهيه تبوس بيهم وهمه يبجون بحضنهه شفتهه سحبت نفسهه گعدت شبه گعده بس مو ثابته گعدت يمهه سندتهه
يله احضنيهم

فاتنه ـ حسيت نفسي ثابته وهمه كلهم يمسحون بدموعهم فتحت ايدي واشرتلهم اجوني حضنتهم شي ورا شي كل اثنين سويه اخر شي بقوا مريم وعلوش اجوني ومريم انفجرت تبجي حيل مستهضمه حضنتهم حيل گد ما بيه قوه
كافي ماماتي هاي اني رجعت

مريم ـ ماما لتعوفينه مثل ماما بلقيس فدوه

فاتنه ـ التفتت لنائل اللي مصدوم مثلي شذكرهه بـ امهه بلقيس وهيه متعرفهه زين ابتعد علي وبقت مريم اجه فضل نام على رجلي مررت ايدي بشعره ضحك
مريمي

مريم ـ ها مامي

فاتنه ـ تردين ماما بلقيس
هزت راسهه لا
ليش حبيبي مو هيه هم ماما

مريم ـ هيه ماكو بعد ماتت

فاتنه ـ شلون عرفتي

مريم ـ سمعت بيبي تحجي ويه عمه سناء وعمه منار

فاتنه ـ مو گلنه ما نتسمع على بيبي من تخابرهه عمه

مريم ـ اي بس ماما جنت اريد انام يمهه وسمعت عمه سناء تگلهه خلي يولون منريدهم خليهم يبقون ويه النغل لو بيهم خير امهم بلقيس ما عافتهم

فاتنه ـ تحجي ومستهضمه نائل من سمعهه سندني وطلع بسرعه من الغرفه عمتي ام نائل بغرفة بيبي اكيد شلون بيك يا نائل سمعت صوته من عاط يما گلت هاي هيه اشرت للجهال يسدون اذانهم تلفون ماكو يمي حتى تلفونه يا ربي شسوي والجهال مو مال يرحون يصيحون احد

نائل ـ مريم مستهضمه بشكل وتحجي گوه ينفهم حجيهه وتشهك ودموعهه تنزل اثنين اثنين شكبرهه يم الله من يتيم يستهضم طلعت بسرعه لغرفة عمتي ام سليم صحت
يمااااااااا

ام نائل ـ ها يوم خير

نائل ـ كل مره بيناتنه الحجي هالمره لا شوفي يوم والكفل زينب ها والكفل زينب هذن الحيايه اثنينهن اذا ما جازن مني ومن مريمه وعلوش والكفل زينب اندمهم بيمن طالباتي شيردووووننن هااا شيردون ما كافي حقد ما كافي غل سامعتج مريم وهنه يحجن علي وعليهم ولكم خلوني نغللللل انيييي نغللللل اي عوفونييي عوفوني بحالي شيردون فلوس انطيهن بس خلي يعتقونه ولكم هضيمة اليتيم الله ميقبل بيهه والله خلي بناتج يخافن الله بيهم لا اسويهه مجازر والله

ام سليم ـ سمي بالرحمن يوم ميجوز هيج تحجي ويه امك

نائل ـ عمه لخاطر الله بنات اخوج ما ناويات يعتقونه شسوي ها گليلي شسوي وهسه ها هسه اسوي اللي تگولين عليه عمه اني نغل انيييييي لو هذول الاطفال ما كافي عليهم اليتم ما كافي خلوهم يعيشون حقهم اذا هنه مستثقلاتهم ما عايشين وياهن واذا امي مستثقلتهم اخذهم لامي سماهر اكو شي بعد

أم سليم ـ لا يوم شلون تستثقلهم غير من ريحة ابنهه ولد الولد اعز من الولد

نائل ـ عمه اذا ولد الولد اعز من الولد ليش بيبيتهم ما تدافعلهم ليش بناتهه شايخات علينه ليييششش هاي ود شوفيهه متفتح حلگهه بحرف وشوفي الله شلون منعم عليهه لو سهى هم شوفيهه ربج لطف بحالهه وصارلهه بيت ورجال يحبهه ويصونهه وموظف الا هذننننن الا هنه شوفي من حقدهن وغلهن هاي سناء ابنهه مو جابلهم مصيبه وهاي منار ابنهه انضرب ضرب الله يعلم كم عظم مكسور منه وهنه طاغيات عمه طاغيات لشوكت هذا الطغيان

ام سليم ـ ارتاح يوم وروح لفتون هسه بالهه يمك روح لاطفالك بهذا صياحك شنو خليت بيهم روح شوفهم

نائل ـ تمام
رجعت شفتهم كلهم ايدهم على اذانهم مثل ما علمتهم فتون وهيه تبجي على بواجي مريم
ها فتون ليش تبجين ماكو شي

فاتنه ـ نائل شوفهه متسكت شوف دموعهه

نائل ـ ما بيهه شي تعالي باباتي تعالي حبيبي انتي بنيتي الحلوه تعالي
اخذتهه بحضني واغنيلهه والعب بشعرهه لما نامت خليتهه بيني وبين فتون اجه فضل هم نام بحضني وكلهم توزعوا يم فتون بالغرفه وناموا علوش وحسن بمخده وسدل وبسمه بمخده وفضل ومريم هم
حبيبي فتوني

فاتنه ـ ها نائل

نائل ـ نروح لبيت اهلي نبقى يمهم

فاتنه ـ نائل مو كل شوي وناقلني من مكان لمكان اتعب ترا خليني شوي اگدر اگعد ونروح

نائل ـ تمام

فاتنه ـ سحبت نفسي شوي شوي تمددت زين ونمت تمر الايام واني شوي شوي اتحسن بس تحسن بطيء
گاعدين اهلي كلهم وعمو واثق وعمه سماهر ونائل وزيد دخلت سدل تغني وتأشر على مجاهد

سدل ـ على شانك ممكن اخبط او ازعق او اكسر
على شانك اهد الدنيا حبيبي بس انته تأشر
على شانك آآآه آآآه

مجاهد ـ من الاخير ما عندي فلوس

سدل ـ يا جلف يا ابو فليس روح مزاعلتك رايحه لجدوتي

فاتنه ـ كلنه ضحكنه عليهه راحت لعمو گعدت بحضنه ولزمت خده باسته

سدل ـ يمووووويييي فديتك جدوتي المتفح

واثق ـ هههههه وانه فديتج يروح جدهه شبيهه بنيتي

سدل ـ شوف وثوقايتي هذا جوجايه بعد مزاعلته يعني فروخه ياكلون مشترياتي وهو مينطيني فلوسهن تقبلهه

واثق ـ اكيد لا احلى مشتريات لبنيتي بعد

سدل ـ اريد

فاتنه ـ صارت تباوعلي وتباوع لابوهه شاورت عمو وهو ضحك

واثق ـ ههههه صار من عيني هاي گبل هاي بعد

سدل ـ انته احلى جدو احبك اني

واثق ـ هههه وانه اموت عليج يا فرحة جدهه

فاتنه ـ راحت لابوي هم گعدت بحضنه وباسته

سدل ـ جدو

توفيق ـ عيوني جدو

سدل ـ جوجايه مو حلو

توفيق ـ هههههه اي صح مو حلو نطرده احسن

سدل ـ اي يله اطرده هو وفروخه المجلوبين

توفيق ـ هههه صار وبعد

سدل ـ اريد اروح للالعاب ضايجه

توفيق ـ ياخذكم خالو ظافر هو وعمو زيد اليوم العصر قبل شوي گالوا

سدل ـ يااااييي جدووو احبك احبك خلي اروح اگللهم

فاتنه ـ كلهه تضحك عليهه جانت لابسه برموده وكيمونه وشعرهه مرفوع منه شوي والباقي متناثر تجنن تركض لو توگف وترگص وكلهه تضحك على سوالفهه
للمغرب ظافر مجهز نفسه دخل يمي بغرفتي

ظافر ـ فتوناتي محتاجه شي حبيبي

فاتنه ـ لا عمري اريدك سالم كافي عليكم الجهال جاي يتعبوكم

ظافر ـ وسفه عليج وين متعبينه اصلا ماكو كل تعب تجين شوي يم سما جاي تغير لنورسين

فاتنه ـ اي شوي واگوم

ظافر ـ شبيج فتون گلبج بعده يوجعج

فاتنه ـ شوي نغزات بسيطه ليظل بالك
تقدم علي وگعد يمي حضني لصدره

ظافر ـ تهون حبيبي تهون اهم شي راحتج فتون احنه ممستعدين نخسرج حبيبي انتي خلي بالج من نفسج وكلشي يهون تمام يروحي اريد اشوف اخيتي احلى ام واحسن ام وزوجه
نائل يحبج ويبيع الدنيا لخاطرج لتكسرين بيهم اتحملي كلشي يگولون هذا لخاطرج ولمصلحتج احنه نريدج ترجعين فتون القويه فتون البطله الشجاعه انتي محاربه قويه عيشي لخاطرهم تمام

فاتنه ـ تمام
مسح دمعتي وباسني بخدي وطلع تمددت عدل لا تلفوني يمي ولا اگدر اعتمد على نفسي بشي احس نفسي اذيه عليهم بجيت وعيوني متوگف ابد ظهري للباب حسيت الباب انفتح مسحت عيوني وسويت نفسي نايمه

نائل ـ دخلت شوي شوي ادري منايمه لان صوت شهگاتهه مبين ومسموع علگت الستره واتمددت يمهه حضنتهه حيل
فاتنتي جميلتي روحي شبيج يا عيوني انتي من شنو تبجين شنو اللي مضوج حبيبي شنو مزعلهه

فاتنه ـ نائل تعبت وتعبتكم وياي

نائل ـ ههههههه ليش شمسوين هسه

فاتنه ـ كلش جاي أأذيكم صدگني

نائل ـ تتذكرين من صارت حالتي اسوأ من حالتج ومرتين مو مره وحده شنو سويتي وياي

فاتنه ـ واجبي هذا

نائل ـ وهم اني هسه جاي أأدي واجبي اذا ما اتعبلج ولا اسهرلج لمنو گليلي لمنو

فاتنه ـ بس

نائل ـ بس هسه نحضر ملابسج ونسبحج وتصيرين احلى فتونه

فاتنه ـ لا اني اسبح

نائل ـ هههههه انجبي حبيبي يله هسه اجيج

فاتنه ـ باسني بخدي ويباوع بعيوني گام راح طلع ملابسي واخذ الروب والمنشفه للحمام اني الصراحه اي حركه اتحركهه اتأذى ملابسي ما اگدر اغيرهن وحدي اجه شالني واخذني يبوس ويشم ويضحك

نائل ـ اكبر بناتي فتينتي

فاتنه ـ حبيبي
گعدني على كرسي وصار يذب ملابسي گلت
غمض عينك

نائل ـ هههههههه ترا شايفين والله يله ارفعي ايدج يله حبيبي

فاتنه ـ رفعت ايدي تعبت نزلتهه

نائل ـ ها

فاتنه ـ نغزه اجت

نائل ـ ولا يهمج انتي بس استرخي واني اسوي كلشي تمام

فاتنه ـ تمام
حسيت نفسي عاجزه كلش ذب ملابسي وغسل شعري ينزل المي واني ابجي
ليش هيج حالتي شنو تاليهه وياي

نائل ـ شفتهه مبرطمه يعني تبجي
ليش تستحين مني

فاتنه ـ انته اهون من غيرك نائل ما جاي اتحمل وضعي هيج شنو نهايتي بهيج حياة عايشتهه

نائل ـ نهايتج نهايتي وبدايتج بدايتي احنه ايد وحده وگلب واحد احنه شخص واحد فتون انتي اغلى من روحي صدگيني انتي سندي قوتي انتي اول واخر حبيب لروحي وگلبي انتي كلشي بالنسبه الي لتفكرين باليأس صيري قويه عمري ما شفتج ضعيفه عمري ما شفتج مهزوزه

فاتنه ـ احبك اني

نائل ـ واني ابيع الدنيا لخاطر رمشه من عينج الي يكفيني اتنفسج يا اوفى حبيب لروحي

فاتنه ـ مديت ايدي اله لزمهه وباسهه

نائل ـ يله هسه انتي صرتي احلى فتونه نطلع

فاتنه ـ هزيت راسي اي لبسني الروب والمنشفه طلعني ولبسني ملابسي حرفيا مثل المشلول صرت نشف شعري ويغني بينه وبين نفسه ويضحك بوجهي
شنو جاي تغني

نائل ـ هههههه ما الي غيرك حبيب انته كلشي بدنيتي

فاتنه ـ هههه شگد صاير تحبهه هاي الاغنيه

نائل ـ لان احبج

فاتنه ـ نشف شعري بالسشوار وكل شوي يدنگ يبوسني بخدي ويضحك مشط شعري وظفره

نائل ـ هسه صرتي احلى فتونه تطلعين

فاتنه ـ وين

نائل ـ هيج نمشي للحديقه

فاتنه ـ ما اگدر امشي

نائل ـ هههه اشيلج واركض بيج

فاتنه ـ لا نائل خليني هنا
ضغطت على دگمة الكرسي مشيت شوي وصلت للسرير مديت ايدي حتى اوگف شوي واتمدد بمكاني شفته صار گدامي حضني وگفني

نائل ـ ليش تعاندين مو اني يمج

فاتنه ـ جريت حسره
وانته شنو ذنبك

نائل ـ ذنبي حبج ناگع بگلبي وروحي ذنبي انتي اول عشگ الي فتون ليش تحسسيني اني مستثقلج ها

فاتنه ـ اني مستثقله روحي
بجيت
نائل تعبت والله

نائل ـ لتبجين واني يمج تمام اني بظهرج طول العمر

فاتنه ـ ميرتاح الا يبوس يله مسح دمعتي ورجعني على الكرسي لبسني حجابي واخذني يدفع بيه طلعنه شفت الكل گاعدين اخذني لابوي لزم ايدي اثنينهم وباسني بگصتي

توفيق ـ يا زينة بناتي شلون صرتي بابا

فاتنه ـ الحمد لله

توفيق ـ ليش عيونج ممليه دموع شوكت تتقبلين احنه نحبج بكل حالاتج

فاتنه ـ بابا يعني هذا وضع بنيه شابه

توفيق ـ اي وضع ام تحاول تعيش لاجل اطفالهه وضع زوجه جاي تعيش لاجل زوجهه اللي يحبهه مو احنه كلنه نحبج يا بابا بمرضج وبدونه تمام

فاتنه ـ تمام
جان گاعد يمه عمو واثق عضيت شفتي ونزلت راسي

واثق ـ فتينه يا اعز من بناتي شبيج بويه

فاتنه ـ عمو

واثق ـ روح عمهه شبيج بابا شنو مزعل بناتي

فاتنه ـ حالتي متعبتني

واثق ـ بابتسامه
تصيرين زينه وترجعين اقوى من قبل واثق منج فتون تاج الراس بويه شمعة بيتنه وضواهه

فاتنه ـ صار يوگفني يمهم واحد واحد وكلهه تشجعني ماما واخواتي وبيبي وعماتي اللي اجوا حتى يشوفوني اخر شي مجاهد مدنك راسه وصلت يمه لعبت بشعره
جوجايه
حضني حيل احس تكسرت ضلوعي بين ايده

مجاهد ـ فتون كلنه نحبج نريدج قويه انتي زينه والله بس هاي ترددات تصير اعتيادي كم يوم وترجعين تمشين لا تيأسين بنيتي انتي

فاتنه ـ جوجايتي

مجاهد ـ روح جوجايتج وعافيته گولي روحي تفداج

فاتنه ـ اريدك سالم
باسني براسي وطلعنه اني ونائل يمشي بيه شوي شوي والجو حلو الدنيا ليل

نائل ـ فتونتي

فاتنه ـ حبيبي

نائل ـ هسه تغيرين جو ونحاول نگوم تمام

فاتنه ـ تمام
وصلنه للحديقه نزلني من الكرسي گعدني على المقعد خليت راسي على كتفه وهو كل شوي ويبوسني براسي الهدوء سيد الموقف جان بدون كلام مجرد استرخاء صرت اتنفس گد ما اگدر اريد اشبع من هذا الهوا ريحته حلوه لان اكو ورود گاعدين يمهه شفت نائل گام وگف

نائل ـ ايدج حبيبي

فاتنه ـ نحاول

نائل ـ اي نحاول ونحاول لما فتون القويه توگف

فاتنه ـ تمام
لزم ايدي اثنينهم ووگفني احس تعبت كلش وروحي تنسحب مني رجعت گعدت
ما اگدر ما اگدر والله ما اگدر

نائل ـ لا تگدرين فتون تگدرين توگفين هذا بسبب الضعف صار وياج هيج عندج نقص بالحديد والمغنيسيوم جاي نعوضه وعندج فقر دم بسبب المغذيات لان ماكو اكل هاملته يله گومي

فاتنه ـ لا اتعب والله اتعب مسح دموعي

نائل ـ تثقين بيه

فاتنه ـ اي

نائل ـ ثقي بيه وگومي وياي وربج مينساج فتون انتي قويه قاومتي وعشتي رغم كلشي شصار هسه بسبب تعب بسيط تستسلمين گومي يله انتي مو فتون اللي اعرفهه اريد اشوف فتون اللي حبيتهه من صدك

فاتنه ـ ان شاء الله
حاولت بيه ما بيه گمت صح عندي وجع بس حاولت اسيطر على نفسي ردت اوگع لزمني

نائل ـ عفيه عليج بطله والله بطله يله اثبتي تمام

فاتنه ـ حاولت اوگف زين گتله
عوفني

نائل ـ وين اعوفج

فاتنه ـ نائل خليني احاول امشي الله يخليك
ابتعد خطوتين صرت امشي لما حسيت گلبي يدك حيل ويرجع صارت مثل التسارع عندي گعدت بالگاع

نائل ـ ها

فاتنه ـ هسه شوي واگوم انطيني مجال
اخذت ربع ساعه گاعده وراهه راد يگومني گلت
لا اني اگوم
ذكرت ربي وگمت وگفت
يا رب عليك اعتمادي
صرت امشي واگعد لما حسيت تعبت نائل جاب الكرسي گعدت عليه ارتاح نطاني مي شربت

نائل ـ عفيه عليج بطله يله نرجع للبيت

فاتنه ـ اي يله نائل لازم استمر هيج لو شلون

نائل ـ اي تستمرين لما ترجعين تمشين بدون تعب

فاتنه ـ ان شاء الله
رجعنه لبيت عمو گاعدين كلنه اني ونائل وعمو واثق وعماتي وعمر ونبأ وسباوي وزيد كلهه تسولف وتضحك وراهه كلهه طشت ورجعت لبيوتهه

نبأ ـ فتون 3 ايام بيت اهلي و3 ايام ويانه بيت عمو حتى ميصير عدهه ملل گاعدين اني وسباوي وامي وبيبي وعمه ام نائل ردت اروح للبيت امي وبيبي وعمه راحن يرتاحن طلع نائل من الغرفه شعره مبلل وياه طلع مجاهد يريد يروح للعياده غمزت
احم جوجايه

مجاهد ـ من الغمزه اكو شي گولي نواصه

نبأ ـ هههه اگلك ضلعي اكو ناس يوميه يوميه تطلع من الغرفه شعرهه مبلل تعرفهم منو
غمزت لمجاهد وگمت

نائل ـ ولج النواصههههه اليوم اوزعج عالمحافظات بسيطه

*************************

علقوا على الفقرات حبايبي

صوتوا للبارت

تابعوا حسابي على الانستا

نورسين بنت ظافر