موت يَا گلبي وخَلصني مِنَك
رِحت مِني ورديتلي جِنطة بِسفر
مَتروسة حِزن
ومُشكلتي صِرت أحبَك
وِحيرة يَا گلبي وياك حيرة !
__________
طشرت الفلوس كلها على الارض
ظل فاتح عيونه ينتظر مني جواب
هاي فلوسك اخذهن مناقص منهن ولا ربع
ولا تحاول تسأل ليش اخذتهن لان هسه رجعن الك بعد ميحتاج تعرف ..
ابتسم تك خد وجتف ايده
درت ظهري دا ادخل للمطبخ
همس
_ هضيمه ويه عاهره خلصت سنيني ..
غمضت عيني بكل قوتي ودخلت للغرفه احاول مابين الصار الي ولا أثر الكلمه عليه ..
لكيت عهد كاعده على السرير وتأكل ب اظافرها من توتر
_زيتونه والله اعتذر دا اشرب مي بالمطبخ وشفت طلحه شلون يباوع عليج من وكعتي الفلوس
والله مو قصدي اخليج بهيج موقف
خطأت وبعد ما ارجع اسوي هالخطأ
فضلج ما انسى طول حياتي
نقذتيني ...
والله حاولت اخلص منه بكل طريقه وعبالي من انطي فلوس يعوفني ...
كااافي عهددد ما اريد اسمع صوتج
كعدت على الارض وكابلتني تبجي
انطيني تلفونج
_شسوين بي
عهدددددد
افتحي وطلعي رقمه
_حاظرته
عهددد
_اي اي هاج اخذي
اخذت التلفون منها دخلت لحسابه واباوع على صورته بعده شاب صغير يطلع عمره عشرينات ...
دزيت اله فويز
اني زيتونه اخت عهد الكبيره عرفت السالفه كلها
عندي صورك وعنوانك واسمك الكامل وين تسكن وكلشي اعرف عنك ...
راح تجي عهد للسوك ترجع الها المليونين كاملات تخليهن بكيس وياهن تلفونك تخلي
وتنسى شي اسمه عهد حتى تفكير متفكر بيها
الك منا لباجر الظهر ساعه 2 تجي عهد للسوك
اذا انطيتهن الها وسويت الكلتك عليه
راح اتغاضى عنك ...
بس اذا عبرت 2 الثنتين ومصار الاريده
ف مجرد اسولف لاخوها طلحه عنك وانطيه معلموماتك الكامله
ميبقى الك أثر بهاي دنيا كلها
اذا متعرف طلحه ف اني اعرفك عليه
طلحه ينفيك من الوجود ...
ولعمك هو قاضي بس وياك راح يتخلى عن القانون ويقتك ب ايده بكل دم باااارد ...
يلا حبيبي روح ابچي يم امك بكلي تنطيك الفلوس ....
اول مدزيتها فتحها
دزلي رساله
شتسوين سوي ما ارجع الفلوس
رجعت دزيت بصمه حتى يخاف ويتأكد انو الداتحجي مو عهداحد كبير ..
لا ظل تمسلتتتتتتت ورا 2 الظهر اذا مصار الاريده
تروح بالرجلين بس طلحه يعرف ....
دزيت الفويس وانطيته حظر
عهد مكابلتني وتبجي
_ خطأت والله ندمانه كله بسبب صديقتي هو يصير اخوها ظلت تكلي يحبج ويوميه يوكف الج باب المدرسه وظلت تقرا براسي لحد ماخلتني بهالموقف
وعد انطيج بعد ما احجي ويه اي ولد طول حياتي خطأت وتعلمت من خطأ ولوما انتي جان هسه اني رحت بيها
مااعرف شلون اجازيج على هذا موقفج وياي
عهددد دوختيني اطلعي برا راسي يأذيني
_نامي وحدج بالغرفه اليوم راح انام عند امي
عافتني وطلعت
فتحت تلفوني وطلعت رقم لالي اتصل عليها
اريد اضغط على الاتصال بس ما اكدر ايدي ترجف
من اول رنه ردت
_بسم الله صاير شي
الشهكه طلعت مني غصب
_زيتونه بسم الله الرحمن الرحيم
صاير شي يمعوده لا تخوفيني
حبيبتي احجي بيج شي
لالي للمره الثانيه يشك بيه للمره الثانيه يكولي انتي عاهره
_طلحه معقوله
بس اهدي وفهميني شصاير لاتخوفيني عليج ماكدر اجي بنص هالليل
سولفت الها كولشي ودموعي وحدها تنزل
_عيوني انتي كافي بجي اهدي
شتتحملين بعد شتتحملين
خلص السويتي افضل شي
عهد بعدها صغيره ومراهقه خطأت وعرفت خطأها
احسن ما گلتي طلحه
لان بس يعرف يحطمها
طلحه مستحيييل يررحمها ....
ويجوز يرتكب جريمه بالولد يموته بلحظتها مجرد يعرف وتكبر المشكله ...
وبعد شنو صاير
يكولي ليش اجيتي الي اريد السبب الحقيقي واريد اسمع منج احسن ما اعرف بطريقتي الخاصه
_عزززززا
لازم اطلع منا باسرع وقت
_ عيوني انتي عوفي تفكير من كولشي وروحي اشربي علاجج ونامي ديري بالج تنامين بدون علاج
منا سكر ومنا الاكتئاب ومنا انتي ماتقبلين تاخذين علاج بس انتبهي نفسج شويه مو كثر الضغط على نفسج راح يوكعج بالفراش وبعد ما يكومج ....
ماشي
سديته منها وكمت فتحت قفل الباب اخاف عهد تريد تدخل
مددت على السرير مجرد وجهي لامس المخده دموعي وحده نزلت
اريد اغمض عيوني بس ما اكدر بس اغمضهن
تصير كدام عيني الطفله والمركز وكولشي سيى
الجنت خايفه منا صار
مرت ساعات طويله واني اجبر نفسي على النوم وما اكدر انام
صراع بيني وبين نفسي وبين الافكار السوده
ب الاخير انتصرت عليه كل هالسموم البرأسي
استسلمت لكل الافكار السوده
بعد كل الصدمات التعرضت الها صارت تطلع على هيئه امراض تسلب عافيتي مني
نمت ما اعرف شكد
بس كعدت على صوت الحجيه وهي تمسح وجهي بمي وتقرا ايات فوك راسي
_يا يمه صار المغرب وانتي بعدج نايمه كومي مايصلح يومين بس نايمه
رجع الي احساس التعب والخمول ماعندي طاقه احجي اريد انطق ما اكدر رجع الي احساس البشع الجنت خايفه منه......
نمت هم ما اعرف شكد ورجعت فزيت عليها اسوي الي كمادات
_يمه عهد تعاي غيري الي المي هذا صار حار
شجاها مصخنه لا ايد ولا رجل
من اجيتي لليوم وانتي يوم تصحين وعشره تنامين بالفراش
اسمعها ومااكدر ارد
تعبت من وضعي اريد احرك جسمي وميتحرك
استلمت لضعفي ومرضي .....
احس ب لالي تكوم بيه هي وعهد سندني ونقلني على التخم ب صاله
جفوني حجاره اريد افتح عيوني كوه
شفت لالي واكفه شد الي مغذي وتخلي بي علاج
رجعت كعدت يمي تفرك بجسمي وتحاجيني
وعهد واكفه بعيد عنا
اشوف لالي كعدت على الارض واني على التخم
خلت راسها على ايدي وتبجي
_بس فهميني احجي وياي كافي تكتمين بگلبج سنين واني اكولج اذا ضجتي ابجي صار وياج شي مو زين ابجي احجي لا تكتمين
هاي نهايه الكتمان تحولت لامراض
ردي احجي وياي لاتخلين گلبي هيج محترك عليج
عهد انطيني شال وقرأن
صوتها وهي تقرا القران جنت احبه من طفوله من دون الكل ...
بعدها صارت تردد دعاء وتبجي من كل كلبها ومن اسمعها ومابيدي اسوي شي اتأذى اكثر ..
اللهمّ أنت أعطيتني خير أصحاب في الدّنيا دون أن أسألك فلا تحرمني من صحبتهم اللهمّ أسعدهم، وفرّج همّهم، وحقّق لهم ما يتمنون اللهمّ لا تردّ دعواتي لهم فإنّي فيك أحبّهم........
مرت ايام واني وضعي يسوء يوم عن يوم اكثر
اكل ما اكل عايشه على العلاج التجي لالي تنطي الي والمي الاشربه غصب
لالي دخلني للحمام وسبحني وتغير ملابسي تبقى للعصر وتروح طول هالفتره ....
بقيت نايمه بصاله على التخم يخافن لا يصير بيه شي ف بقني كدام عينهن ....
منظر الطفله والمركز يأكلن بيه اكل
لو حجايه الحجيه كل ما اغفى افز عليها
"بنيتي حوبه الابيض گلب تحرك خضار ايامج "
احس احد دايغسل وجهي
فتحت عيوني
طلحه يرش مي على وجهي ويمسحه ب ايده
وخر شعري من وجهي
اريد احجي اريد انطق صار اياام قاطعه الكلام
نزلت دموعي على نفسي ماعندي اي قدره حتى ابعده عني
فز من شاف دموعي
رفع راسي ب ايده ومسحهن ..
شالني ومشى بيه ما اعرف وين
كوه جمعت الحروف والقوه العندي
طلحه
من طلعت حروف اسمه ضم راسي لصدره
_روحه لطلحه
اريد ادفعه اريد اوخره
صاح
_يااارب مغفرتك ادري حرام اتقرب الها بس وضعها يجبرني
اتجه لخارج البيت وجانت السياره بوبها مفتوحها
صعدني بالصدر ولبسني حزام الامان حتى ابقى ثابته....
سد الباب وراح صعد من الجهه الثانيه
بقت السياره تمشي بينا مسافه طويله واني افتح عين واغمض عين من الخمول
وكف السياره ورجع شالني
دخلني للمستشفى الممرضات التمن عليه والدكتور فوك راسهن
وكلها ترحب وتحجي ويه طلحه وكل شويه واحد صاح اله سيدي ...
نوموني بغرفه على السديه وبقى الدكتور يفحصني ويحاول يحجي وياي وما اكدر احجي ...
للفجر واحس بطلحه باقي يمي ويحجي وياي بس مجاي اركز وياه واسمع حجيه ..
رفع راسي خله بحضنه وصار يظفر بشعري علمود مايبقى مفتوح على طوله ...
بعدها كام يخابر وماكدر اركز واعرف شنو دايحجي ...
هوسه هوسه المستشفى وعقلي مشوش
اسبوع كامل اني نايمه بالمستشفى ما اعرف اذا جانت اهليه لو حكوميه ...
الدكاتره كولش داروني وانتبهوا الصحتي
كدرت بهالاسبوع احجي وانتبه واني اجبر نفسي علمود التزم بالعلاج حتى اكدر اطلع منا ب اسرع وقت ....
ورا اسبوع اني طلبت من الدكتور اطلع وبعد الفحوصات قبلوا اطلع
اجت الحجيه اخذتني
اخر مره شفت بيها طلحه من اخذني للمستشفى
اول مدخلت للبيت مجرد كعدت وياهم شويه
ورحت للغرفه سديت الباب وحظرت جنطتي جمعت بيها بس الاحتاجهن والاشياء الضروريه
دورت على مفتاح السياره ماكو........
شكيت بنفسي اخاف ناسيته مكان او اني ضيعته فتشت الغرفه كلها والمفتاح ماكوو ...
شويه ودخلت عهد
فتحت خزانتها وطلعت منها كيس اسود
_زيتونه ادري مو وقتها بس ما اعرف شلون اشكرج جنت منتظرتج تصحين علمود انطيها الج
اني سويت الكلتي عليه وبيومها رحنا اني وامي للسوك ولكيته ينتظرني بمحل احنا دائماً نتفق بي
وانطاني الفلوس وتلفونه
بقيت ساكته بس اسمع الها
_هاج هاي فلوسج مكان النطيتهن لطلحه
ولو أصلاً ماسوت العمليه امي لان التهوا بيج
اخذت منها الفلوس
والتفلون بس فتحتها عايفه بدون رمز وبي صور
حذفت كولشي منه ب ايدي
_مسويت اي شي بالتليفون جنت منتظرتج
بعد ما اسوي اي شي بدون ما اكلج
عهد هالتلفون تروحين هسه تكسري ب طابوكه ولا تبقين منه شي صاحي
_اي
رادت تطلع جان ترجع عليه
_نسيت اكلج طلحه راد مفتاح سيارتج علمود ياخذ منها جنسيتج او اوراق والله ما اعرف شنو
وكلي انطينياه واني انطيته اله
راحت فتحت الخزانه مره ثانيه وانطتني مفتاح السياره وطلعت ...
بسرعه اخذت المفتاح ورحت للسياره ..
اول ما فتحتها دورت على الفلوس بعدهن مكانهن وضفت وياهن المليونين ..
بقيت ادور على اوراق السياره وهويتي كلهن ماكووو...
خفت منه ليش شنو يسوي ب اوراقي ..
نزلت منها واني اعصابي تلفانه شلون اروح لسليمانيه وهو ما اخذ اوراق السياره وكلشي يخصني من هويات ....
ظليت متهسرته حتى لو اريد أجر سياره واروح لسليمانيه هم ما اكدر كل هوياتي ماخذهن ....
لالي عدها امتحانات مختفيه بس مجرد اتصلت عليه تحمدت لسلامتي وبلغتني دخلت وزاري .....
ب 11 ونص تلفوني يتصل رقم غريب
اكثر من مره ..
رديت اجاني صوت طلحه
_وين انتي
بالبيت يعني وين
_تعالي بغرفتي بسرعه
ما اجي لو تموووت
غلقه بوجهي ..
شويه وباب الغرفه ندك
كعدت عهد من نومها
كامت فتحت الباب
طلحه باسها من راسها وتعذر منها لان فززها ...
طلب منها تعوفنا وحدنا ...
عافتنا وطلعت ما حجت اي شي ...
دخل وقفل الباب ورا
الكوت الاسود على طوله محابسه ساعته المستحيل يطلع بدونهن
يحرك شعره الاشيب ب ايده
خله ايده ورا ظهره وبقى يفتر بالغرفه رايح جاي نفس المكان
مد ايده لجيبه وطلع السلاح
ايد بيها السلاح والايد الثانيه مخليها ورا ظهره
بقيت جامده بمكاني
_عندج شقه ملكج عايشه بيها وحدج بمجمع ***
اي
_يعني ماجنتي عايشه ويه عمتج ولالي
لا
منطيني ظهره ويحجي
شدد قبضه ايده البيها سلاح
_انتي قاتله طفله بنت ....
حرف مطلع مني
ظليت مكاني ماتحركت
ندار عليه وتقرب ب اتهجاهي
لزمني من كتفي حيل لدرجه اصابعه احسها طبعت ب كتفي
نزلت دموعي وماطلع مني غير صوت شهكاتي
خله اصبعه على حنجي ورفع رأسي
عيني صارت بعيونه الحمر وجهه الكله غضب ..
_فهميني شلون احميج من القانون واني القانون ......
يتبع .....
القصه غامضه وبكل بارت راح تكرهون زيتونه مره وتحبونها مره
و تكتشفون شي جديد بيها ...
a5_1999