صباح الخير زهـراتي
#ثعلب الحبتر
#بقلمي انا: زهراء
#حساب الانستا: zaii1_8
لا تنسون اتصوتون +اتعلقون بين الفقرات +احبكم زهـراتي
بسـم ﷲ الرحمـن للرحيـم
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
شفتك بالحلم فزيت أدور عليك نسيت انه صحيت وبالحلم عفتك اعاين بالوجوه وانت ما موجود ما معقولة يمي وانه ما شفتك شلتك بالكلب يوم الجنت موجود ودمعة بالجفن يوم الرحت شلتك
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الحبتر
راحو اهلي وانه كاعد يم الكبر وصافن بي اعاتبن وترجعيلي شلون راح تناميت وحدج منو يحن علية بعد؟ منو يسئلني عن يومي منو ضل للحبتر؟
ليش تخليني اتعلق بيج وبعدين تعوفيني؟ معقولة هيج كسران الحبتر سهل عندج؟
ماودعتيني ولا كتيلي راح اموت شلون بية من دونج شلوان راح انام ليلي وانتِ ماموجودة؟
كاعد كبال كبوركم ومامصدك انتم عايفيني
باوعت لليمين كبر امي وابوي واحد بصف الثاني وموج بصفهم
مشيت ايدي على كبر امي وحجيت
الحبتر... رحتي وما حسستيني بحنانج ولا استقبلتيني وضميتيني بحضنج عالاقل ضمي اختي ديري بالج عليها ترا تخاف بالليل لا تخلينها وحدها أمانة تبقى عندج الحد ما اجي يمكم
.... موجتي تبقين عدلة بروحي لو ادفنج الف مرة
... كلشي خسرتة اعوضة بس خسارت موجي شلون؟
ليش الحبتر دائماً تكسرونة
لو بيدي ادفن روحي بوسطتكم بس شسوي عار ومااموت مكتوبلي اتعذب بفراكم
مشيت ايدي على كبر موج باوعت للصورة وابتسمت بوهن
ضليت اباوع عالصور واتحسر بصوت...
موج موجي لاتضوجين اطلع حقج من عيون سلمان الحطهن عليج هذن ايديه الي انمدن عليج اكطمهم الج واجي اراويج اياهم اراويج جزء جزء من جسمة
••••••••••••••••••••••
لمعان
لليل والناس بعدهي رحت جبت فراش من غرفة امي و فرشت بالصالة للنسوان الضلن ايباتن عدنة وانطيت افراش الخنجر يفرشة نص بالديوانية ونص بالچادر للزلم
اتأكدت كلها نامت ورحت يم امي شفتها تقرأ قرآن
و امواج نايمة على الچرباية وحاضنة ملابس موج
دمعتها ناشفة على خدها وتشهك
اتقدمت يمها بخطوات ضايعة دنكت عليها وبستها بخدها وابتعدت
رحت دخلت الغرفتنة اول ما فتحت الباب صار عطرها بوجهي
باوعت الجرباية موج دببها ولاعاباتها مسطرتهن بترتيب
صح جبيرة بس اتحب هالشغلات والحبتر دائماً ايجيبلها نزلت دمعة مني
ورحت فتحت كنتورها ملابسها مرتبتهن على حسب الاولوان مشيت ايدي عليهن بلعت ريكي وكعدت على چربايتها واتذكرت ايامنة وسوالفنة وضحكنة لأن جان بيها سُكر ماتاكل حلا واني وياها مااكل علمودها كلشي جنة نسويه سوة
فتحت تلفوني وشفتها دازة رسالة الصبح على الواتساب ومبينة محولتها من احد
دازة اغنية امانينا نضل عالبال وكاتبة جواها
مااعرف ليش بس حبيت ادزلكم هاي الاغنية
شغلتة وخليتة على الچرباية وانهاريت واني اسمعها
موج فقيرة و ماتستاهل الي صار بيها ماتستاهل عمرها مامأذية احد
وجودها نسمة بيناتنة مالية البيت بضحكها وسوالفهة
اندك الباب ودخل ديسم مسحت ادموعي باوعتلة وحجة بصوت مخنوك
ديسم... لمعان طلعي برة نامي بغرفتي انه اريد انام هنا
هزين راسي واخذت تلفوني ورحت الجربايتي اخذت مخدتي وقبل لا اطلع شفتة مطلع صورتها بالتلفون ومشغل الاغنية نفسها وكاعد على الچرباية مالتها عفتة وطلعت سديت الباب
رحت فرشت فراشي جوة بغرفة امي ذبيت شالي
و اجيت اتمدد وسمعت الباب مالت المطبخ يندك اتنهدت وسحبت شالي
وطلعت من الغرفة رحت للمطبخ ووكفت كبال الباب
لمعان.. منو
جاوبني وعرفتة من صوتة
خنجر.. انه خنجر
خليت الشال على راسي وفتحت الباب
لمعان... شرايد خنجر
خنجر.. بس اجيت اشوفج خاف محتاجة شي؟
هزيت راسي بلا واردفت
لمعان... ما محتاجة اي شي
ركز بعيوني وحجة
خنجر.... لا تعبين عيونج ترا كلبي يتعب وياهن
لمعان.. خنجر محتاج شي؟
من غير كلام اتنهد وعافني وراح سديت الباب ورحت نمت
فزيت من نومي من حسيت صوت بالغرفة كعدت وشفت امي ساجدة على الارض وتهتز تبجي وي صوت الاذان موقف كزبر جلدي
كمت من مكاني خليت الشال على راسي وعدلت ملابسي وطلعت ولكيت اغلب الناس كاعدة
صعدت فوك حتة اكعد ديسم دكيت الباب وبسرعة فتحة مبين مانام فركت ايد بأيد وحجيت بتوتر
لمعان... اجيت اكعدك تروح يم الناس
هز راسة وعبر من يمي وقبل لاينزل الدرج صحتلة الفتلي ومنتظرني احجي
لمعان.... ديسم ماسمعت خبر عن هلاك؟
ديسم.. خابرت عليه مايقبل يجي يكول اتخاف وحدها زغيرة على الكبور
حجاها وطلع مرت ايام الفاتحة وصار اسبوع والحبتر مامبين ولا يرد على اتصال احد وبس خنجر يروح للمقابر من بعيد يشوفة كاعد يم القبر ويرجع يطمنة عليه
باليوم الثامن كعدت الفجر حتة اراجع لأمتحاني لكيت ضوة الصالة مشتغل دخلتلها على كيف
لكيت امي كاعدة والحبتر متمدد وراسة على رجلها ويوسلفلها عن موج وهيا بس تتنهد وتمسح على شعرة
الحبتر... جانت تحبني
جانت تحلم تكمل دراستها راحت بدون ما تودع حلمهة
يمة جانت حنينة علية
جانت من تشوفني تعبان بسوالفهة تنسيني كل تعبي
جانت اتكلي انه امك و احبك
حيل حنينة علية
راحت الحنية غطاها التراب
وجناتها ناعمة والتراب خشن شلون بيها هسة
رفع راسة الامي
الحبتر.... يصير انام ابدالها
نجاة... اسم الله يمة
كافي عليي موج النوب انتَ كول يا الله انتَ اقوة من هيج
سكت وما كال ورة شوية حجة
الحبتر.... الحبتر صح قوي بس مو يم اعزاز روحة
رفع راسة وشافني
الحبتر... شلون الغرفة بلاية صوتها وضحكتها؟
ماكدرت اجاوبة خليت ايدي على وجهي وكعدت على التخم ابچي واشهك كام من مكانة ووكف كبالي مدلي ايدة كضيتها وكمت سحبني الحضنة وباس راسي ويمسح بدموعي
الحبتر... مااريد اشوف دمعت وحدة من عدجن حقها اخذة من اكبر واحد... ضليتي بس انتِ وامواج مااريد الحبتر يضل بدون قوارير
هزيت راسي واخذ كتابي خلاه بأيدي سأل عن امواج وكتلة بغرفت امي من غير كلام راحلها
••••••••••••••••••••••
الحبتر
رحت اتمدتت بغرفة امي وشلت امواج خليتها على ايدي و اعاين الها الحد ماطلع الصبح وكمت سبحت وبدلت ملابسي اتصلت على ديسم وخنجر وكتلهم يتجمعون بالعلوة
صعدت بالسيارة ورحت قبلهم للعلوة
انتظرتهم الحد مايوصلون ماطولو واجو خليت ايدي ورة ظهري وحجيت
الحبتر... سلمان اتجاوز حدودة ويانة واتعدة على نفرين منة مرتين مرة على خنجر ومرة على...
اجيت اكمل واختنكت مااكدر اكول اسمها كسرة بكلبي شابة ويصير بيها هيج هما افتهمو وهزو راسهم استرسلت بكلامي... شغلتين اريد منكم
خنجر انتَ اريد منك شكو معلومة عن سلمان حتة لو جانت بكد حبة القش هم اريدها وين ياكل ووين يشرب واهم شي يوم الحادث عند منو جان وانه سامع بي متزوج اريد اسم زوجتة واسم مكاميعة خلفتة حتة ليمتة يروح للحمام هم اريدها كلشي يخصة وانتَ ديسم اريد منك ورة ما خنجر يعرف عائلتة تراقبهم واحد واحد وتراقب خطواتهم
خنجر.. عد عيناك حبتر بليل كلشي تريدة يمك
هزيت راسي ورجعت للبيت اخطط شسوي السلمان بس اندل مكانة صار وقت الغدة انفتح الباب ودخلت امواج
امواج... بابا تعال وكلني ما اكدغ اكل الة انتَ
هزيت راسي واخذت بأيدها ونزلنة جوة لكيتهم مادين السفرة كعدت وخليت بصفي امواج التفت للصفحة اليمي الجانت تكعد بيها موج فارغة مكانها محد ياخذة اتنهدت وشلت الخاشوكة خليت بيها تمن جانت اول لكمة الها مو الاحد ثاني رجفت ايدي وماكدرت اسيطر عليها اطشر نص التمن من الخاشوكة وامواج فاتحة حلكها تنتظر ماكدرت اوكلها ذبيت الخاشوكة على السفرة واتنهدت مسحت وجهي وكمت مااكدر بدونها مااكدر
لليل واتصل بية خنجر رديت عليه
خنجر.. الحبتر المعلومات الردتهن كلهن يمي بس ضل شي واحد
الحبتر.. شنو هوا
خنجر... مكان سلمان ماعرفتة اذا هوا نفس الفارة بس يتلبد
الحبتر... جنة ط** هايشة مو مشكلة هسة جيب المعلومات وتعال
سلم وسد التلفون ربع ساعة واجة كعدنة بالديوانية تلاثتنة وسدينة الباب فتح جنطة وطلع الصور واوراق وفرشهن بالكاع
خنجر... هذا سلمان زوجتة سماهر متوفية قبل ستالاف سنة والسبب مجهول
اخذت الصورة وشفتها قليلة بحقها كلمة جميلة خليتها على صفحة
اخذ صورتين ثانيات
خنجر.. هذول اخوانة عندة تواصل وياهم نوعاً ما واشك بيهم يشتغلون وياه لأن اكثر من مرة التقو بأماكن مشبوهة
هزيت راسي وشفتهم والكتاب مبين من عنوانة شاف الصور ديسم واردف بأشمئزاز
ديسم... جبح نفس الجهرة تلاثتهم
اشر على مجموعة صور
خنجر.. هاي اخت سلمان اسمها أمل وهذا زوجها دكتور بالكلية رايح بدربة وجاي بدربة رجال مسالم وسمعتة انظف من ديسم وهذا ابنها الجبير محمد عايش خارج العراق وهذا ابنها علي الصغير محامي وخاطب
ديسم... هذا المحامي يفيدنة
باوعتلة بتك عين ورجعت على خنجر اتنهد وحجة
خنجر.. هذن بناتنة واعتقد الهن ايد بالسالفة
عقدت حواجبي
الحبتر.. وشلون عرفت؟
انطاني صورة بنية ماركزت بشكلها
خنجر.... هاي بتة الجبيرة اسمها روح ممرضة بيوم الحادث جان عد بيت اختة الي عايشة بي بتة
باوعتلها وخليتها على صفحة
الحبتر ...شهل الاسم وين اكو وحدة اسمها روح
خنجر.. اي وموسى انه هم من عرفت الاسم استغربت
بعدين انطاني صورة بت شكرة
خنجر... وهاي بتة الزغيرة ترف وعندها علاقة بموج ويوم الحادث اخر شي موج التقت وياها
رفعت راسي الة بسرعة وانه وعاقد حواجبي وبديت اربط الاحداث
ديسم... متأكد هذن بناتة؟
الحبتر... شدراني شو وحدة ملحة ووحدة شكرة
خنجر.. بكيفكم شكو بقدراتي
الحبتر... هسة انتَ جبت هذني المعلومات كلهم بس مكانة ماجبتة؟
خنجر.... مالكيتة يمعود قبل شكد دورنة عليه مالكيناه
سكتت وصفنت على صور بناتة باوعلي ديسم وكأنة عرف نيتي
ديسم... لاتسوي شي الحبتر كلشي لاتسوي اندمك ترا اسبوع وسلمان اجيبة جوة رجلك بس كلشي ماتسوي
الحبتر... خوش
ديسم... حبترررررر انددمك وروح اختييي ما تسوي شي بدون علمي
الحبتر.. وسمم شبيكككك تجعور كلت هذا هوا
هز راسة بتوعد وكام
خنجر.. شبي هذا؟
الحبتر... انتَ سامع باليخوط بصف الاستكانة؟
خنجر... اي
الحبتر.. ديسم يخوط جواها
•••••••••••••••••••••••
روح
بعد ماراح سلمان رجعنة كلمن الحياتة والشغلة بس ضلت خوفة بقلبنة اول ايام من راح لأن مامعقولة يجي ويروح ومايسوي شي
اخذت جنطتي وطلعت انتظرت راغب بكراج المستشفى وابتسمت من شفتة جاي من بعيد وصل يمي وحجة بحماس
راغب.. الاسبوع اليجي عدكم انا وامي ويتم كلشي ماكو بعد تأجيل
اتنهدت وهزيت راسي اختفت ابتسامتة من شافني نا انطيت اي ردة فعل
راغب... روح بيج شي؟
روح.. لا راغب مابية شي هلا بيكم
راغب..مو علية روح يولي اعرفج كلش زين
روح..مابية شي بس شويه تعبانة
هز راسة بأستغراب وصعدنة بالسيارة ماحجينة شي ابد بس هوا كلساع يلتفتلي ومشغل اغنيتة المفضلة شمسين وصلنة للشقة دخل هوا وانا دخلت مالكيت احد كلهت بغرفها دكيت الباب ودخلت لكيت ترف نايمة اليوم يلا داومت للمعهد زميلتها متوفية وهيا بس تبجي عليها
اتنهدت واخذت ملابسي سبحت وبدلت واتمددت اخذت تلفوني وشفت رقم غريب دازلي رسالة على الواتساب دخلت عليها وقريت
.. انتِ روح سلمان؟
استغربت منين يعرف اسمي كتبتلة
... اي
بسرعة صارن خطين زرك شافها وطلع يكتب انتظرت حتة اشوف شيدز بس فجأة حضرني غميتة وحذفت المحادثة وحجيت بصوت عالي
روح... عوزني انا هيج نماذج
•••••••••••••••••••
ترف
فزيت من نومي على صوت روح ادردم كفيت عني البطانية و كمت
لفيت شعري واخذت كتبي وطلعت خليتهن بالصالة ورحت غسلت رجعت لكيت علي كاعد وكاض الكتاب مالتي ويكلب بيه ررفع راسة وابتسم
ترف.. شبيك علي
علي... لكك تئبرني هاي شصاير بيك تعبان هيج السادس متعبك
هزيت ايدي
ترق... هوا شنو هذا السادس وين صاير بيتهم اساساً مالت زعاطيط مو مستواي
علي.. اي اي مبين من الكفشة الواصلة الجهنم السابعة.... سكت وبعدين مثل الي اتذكر شي باوعلي وركز بعيوني كأنمة يأكد ان حتة لو كذبت راح يعرفني
علي.... جواهر هم راسلتج؟
رفعت حاجبي واردفت بثقة
ترف... شلك علاقة؟
علي... هيج صارت صديقي
ضحكت وحجيت بسرعة حتة اضيع السالفة وانسيه
ترف.. عوف عنك الحجي صارلي اسبوع ما مداومة وما فاهمة شي تعال اشرحلي
سوالي مجال يمة ورحت كعدت اخذ كتاب الرياضيات وكعد يشرح ويشرح واني صافنة عليه وبالي مو يم الشرح انتبه علية شال الكتاب وطكاني براسي وصاح
علي .. صديقي ادري بنفسي حلو بس لا تحسدني
ابتسمت وحجيت
ترف... خشمك كبران
كلتها وانفجرت من الضحك وعيوني دمعن وهوا هز بأيدة
علي.. تافهة
ترف... بس مو اتفه منك ومن خطيبتك
علي... هسة شجاب جواهر بالنص؟
ترف.. يلا عيني ام علي عيدي الشرح
علي.. لو يطلع شجرة مالت ورد براسج مو هم نخلة ما ارجع اعيد
اجة يكوم وكضيت ايدة وحجيت بتوسل
ترف.. حبابببب عفية شبيك ام عليي صايرة خبيثة وثكيلة ماتتشاقين هيج الخطوبة غيرتك على صديقك الي باجر عندة امتحان ومحروكة صفحتة؟
باوعلي بتك عين ومد ايدة الراسي كوش شعري ورجع يشرح هالمرة صدك انتبهت وياه
•••••••••••••••••••••••••••
روح
ثاني يوم رحت للشغل وحدي لأن راغب خفارتة مو وياي دكت الساعة ب 1:8
الممر خف من المرضة ضليت افتر على المرضة الي علية كملت شغلي ومشيت بممر حسيت اكو واحد وراي او ايراقبني بلعت ريكي والتفتت و انا مو مرتاحة
بس الناس كلها طبيبعة وكلمن ملتهي بضيمة وبمريضة
مسحت وجهي بنفاذ صبر وكملت طريقي للحديقة طلعت وكعدت على مصطبة وبأيدي باكيت عصير وكيكة فتحتهن سميت بأسم الله
واجيت اكلهن وانتبهت الصوت بجي ضليت افر براسي على مصدر الصوت بس ماكو كمت من مكاني وضليت ادور الحد ماطاحت عيني على بنت كاعدة بزاوية الحديقة بالكاع وتبجي اتخبلت عليها لأن بجيها مو طبيعي عفت الكيكة والعصير و ركضت يمها ونزلت المستواها دقيتها بكتفها
روح... يا بنية بيج شي ؟
جاوبتني وهيا تسحب بأنفها
... مابية شي
روح... لا حبيبتي بيج شي كليلي شنو حتة اساعدج
جاوبتني وهيا تمسح بدموعها
.. امي مغمة عليها وماتقبل تدخل للمستشفى لأن ماعدنة امكانية و اني اجيت هناية حتة اطلب مساعدة من الناس بس محد يقبل يساعدني
هزيت راسي بأسف وكمت ومديتلها ايدي
روح... كومي وديني الامج
كضت ايدي وكامت باوعتلي بفرح
... صدكك
روح.. والله.. ماكتيلي شنو اسمج
جاوبتني... سما
مشينة سوة وطلعنة من المستشفى من شدت غبائي حتة تلفوني عايفتة بغرفة الممرضات
مشينة بالشارع وفتنة بفرع البيوت البيها كلها مابيها كلوبات والظلام مالي المكان
التفت الها واردفت
روح... شنو هنا عايشين انتو
سما... اي بس الكهرباء ماكو من الصبح
هزيت راسي وعضيت على شفتي بتوتر ووكفت وكفت وياها واشرتلي على بيت
سما... هذا بيتنة ماعدنة احد فوتي
باوعت للبيت حالة حال البيوت الي بالشارع مابي اي ضوة
روح... متأكدة ماكو احد عدكم؟
هزت راسها
سما.. اي بس اني وامي
فتحت الباب الي وانا مترددة ادخل صارت وراي وبحركة سريعة
دفعتني داخل البيت شهكت واجيت اطلع اتلاويت وياها بس هيا دفعتني الجوة وركضت طلعت وغفلت الباب ركضت وراها ودكيت الباب قوي وصحت
روح... فتحووووولللييي البابببب ويننن انااا فتحوووللليي الباببببببب يا ناس يااعالمم منوو هنااا
سكتت وانا كوة اجر نفس من الصياح والرهبة والخوف حسيت اكو احد وراي بلعت ريكي بخوف ورجف جسمي فجأة وبدون سابق انذار اتخلة مثل المنديل على وجهي من ورة وهمس بأذني بفحيح
.. دخلتي العالم ثعلب الحبتر
رفستة ببطنة وحاولت افلت نفسي منة بس بعد ماحسيت بشي
كعدت وانا على كرسي وراسي يأذيني بشكل فتحت عيوني بس ضلمة ما اشوف شي
وين يلا استوعبت عيوني ملفوفات بشي وايدي مربطات
الفتت على مصدر الصوت من سمعت خطوات بالمكان الي انا بي حجيت ببرود
روح.. انا وين؟ ومنو انتو؟ شجابكم علية شمسووية الكمم
ماكو رد منهم بس صوت الخطوات الي بالغرفة بعدة مستمر رجعت حجيت بنفاذ صبر
روح...انتوووو منووو ووينن اناااااا شترددون منييي مامسويةة شييي شتردووون
حسيت اكو واحد اجة كبالي انمدت ايد على اللفاف الي ملفوف حول عيوني حسيت بأحد جاي يفتحة
فتحة وغمضت عيوني بألم من انضرب بيهن الضوة
وضحت عندي الرؤية رفعت راسي وشفت
ولا زالت الحكاية مستمرة
الى اللقاء زهراتي