يقولون بُعدُ الدارِ يُنسيّ الغَوالِيَاَ
فيُبْرِىُ مَجرُوحَاً لِيصبِحَ شَافِياَ
فلا البُعدُ أنسانِي ولا الجُرّحُ قد برا
ولا بِتُ يوماً للأحِبَةِ ناسِيا
وإنِي إِذا حاولتُ نِسيانَ ساعةٍ
تُعاوِدُونيّ الذكرى فأسقُطُ باكِيا
وإنيّ لصبَارٌ لِكُلِ مُصيبةٍ
ولكِنْ نوى الأحبابِ هَدَّ الرّواسِيا
ونسيانُ نفسِي عندَ نفسِي لَهيَّنٌ
ونسيانُ مَنْ أهوى مُحالٌ ثَوانِيا
بقلمي شذرة العدوان
فاطمه :گاعدين انتريگ بالطرمه
اني وامي وسهام اجه عمر علينه وگف عالممشى سلم وخازرني
سعاد : حول تريگ مزال الجاي حار
عمر : تسلمين ما اريد متريگ ومكتفي
جيت ابشرج لگيت اميره و البارحه رجعتها وهسع يمي
فاطمه : فكت اثمها امي وجان تگف گباله تسأل شلون لگيتها وشصار دحگ عليه عمر من وراهه وعاگد حواجبه صدت عليه امي ورجعت ادحگله متت بدمي
سعاد : شكو شنهي السالفه
فاطمه : جنت اتوسله بعيوني ما يحجي لأمي شي
بس عبث ما خله شي ما حجاه جان متعصب ويحجي بنفعال
عمر :يوميه اجي هين گلبي وار وفاحط واتهدد
اريد اكمش اميره واذبحها وهاي تعرف كلشي
و ساكته ما انطقت حرف يبرد گلبي
فاطمه : يحجي ويأشر عليه
عمر : سامحيني خاله سعاد ولا تلوميني اترجاج من افكر شلون جنت اريد اموت اميره وهيه مالها ذني
گلبي يور بنار
روحي شوفيها هسع مسوين بيها الفعايل
رجلها مكسوره ومنتهيه ظاله بس عظام گلبي يتگطع بس ادحگلها
جنت راح اسولف لعمي غازي بس تراجعت لخاطرج انتي
فاطمه :طلع عمي بركات وراح عمر يمه
وأمي متبسمره على وگفتها ظلت ادحگ عليه مصدومه
طبيت جوه گوه امشي وجان تلحگني شايله صونده وتستلمني ضرب كسرتني تكسر ما خلت سهام تحجز دفعتها وسدت الباب
ورجعت عليه تضربني خلت دمايتي تكت شعري هلسته كومته بالگاع وجهي ملخته داست على راسي حيل وجان ينكسر سني
ما عافتني الا نهد حيلها وجان تگعد تلهث وكامشه گلبها ما خلت بالغلط والفشاير عليه
وگفت وجان تدفرني على صفحتي
شاغت روحي مگدر اتحرك بس اعن ما دافعت عن نفسي استاهل الي يصيرلي
عذباء : راح عمر زعم يخبر عمامي بجية اميره
رجع مقهور كمشه عثمان يحجي ويا شفته تعصب وعلت اصواتهم
عثمان : انته كل عقلك رحت سولفت لخاله سعاد كلشي شجاك فهمنييي
عمر : خليها تأدبها وتربيها من جديد
يول اني لحد هساع محموس من افكر بالعار الي جان راح يظل مطبوع بينه من وراه فيانتها
عذباء : سمعنه صيحة اميره طبينه انتراكض
لگيناها مبطوحه بالباب راح عمر شالها عالهول
ويرزل بيها
عمر : مو گنالج لا تمشين على صخمتج بس الخفافه متخليج مو بيدج
اميره : سمعت صياحك هبطت عبالي صار شي
عمر : كلشي ما صار بطلن فضول يالنسوان
عذباء : جره عثمان واخذه بره
يحجي ويا
عثمان : تعال احجيلي شلون تروح تفتن على فاطمه يم امهااا
عمر : اهوو عاد شتريد هسع حجيت وخلصت السالفه لا تظل تلح
عذباء : فات جوه شال اميره عالحجره
طلع وتگاضب ويه عثمان انوب
عثمان :ما يصير كل ساع وشايل اميره
وهيه محرمه عليك لا الشرع يسمح ولا اعرافنه
عمر : ما ادحگلها ما تگدر تمشي لو عوزك اخليها تزحف بالگاع
عثمان : يول لا تظل محفز النتره اسمع شگول
الله يهديك
اني فكرت البارحه وقررت نجيب شيخ ونعقدلكم
ومن اطيب اميره ويهجد الوضع عود زفها
عذباء :صفن عمر يحك براسه ويحجي
عمر : وشلون على امي ما گنالها شي خاف ما ترضه
عثمان : ترضه لا ادير بال اني حجيتلها من زمان علمودك انته واميره وكيفت ما عترضت راح اخابر ابو نشمي هسع بلكت موجود ويجيبها
عمر : ياخي من زمان تعجبني افكارك وسوالفك
تعال انطيني بوسه
عذباء :كمش عثمان من وجه ويبوسه بخدوده لزگ گوه گشطه
عثمان : كافي وخر عنييي شي طبيعي افكر زين عبن اخلي حساب الله ابالي مو مثلك احل ما عليك النتره والمكاون ابد مو حلوه منك تروح تفتن على فاطمه البنيه خطأت ميخالف كلنه نخطأ واجبنه ننصحها ونعلمها مو مو نخطأ ازيد منها
عذباء : تخصر عمر ويتأفأف
عثمان : روح هسع جيب لأميره عكازات خلها تمشي براحتها مو حاجرها جوه والنفس عليها حسره
عذباء : رجعت يم اميره سألتني شعنده عمر جان يصيح حجيتلها كلشي ختنگت وگامت تبجي
جانت مقهوره حيل وتحجي ويه روحها
اميره : عش راح فتن على فاطمه هاي خاله سعاد مخبله هسع تصگطها من الجتل
عذباء : انتي مو وصيتيها تخبر عمر بمكانج وهيه ما گالتله جان يعبالي انتي نهزمتي
ــ مسحت دموعها ونزعت الربطه
اميره :اي وصيتها جنت متأمله تحجيله ويلحگني
بس من غابت الشمس واني غادي يم خوالي
عرفت عمر ما وصله خبر عني
تصرفت وياهم عاد بگواتي كرهتهم باليوم الي نهبوني بي
بالنهاية اني بنت ماجد وابن عمي عمر مو بسهوله انطي نفسي
عذباء : فات عمر وجان يگعد يمها يفر بالسبحه ويسولف
عمر : راح نجيب الشيخ تا نگطع مهر خوما تبعرينها وتگولين ماريده وجبرني
عذباء : ضحكت ودنگت تعصر بأديها
كنش عمر وكفخها
عمر : غدي شنهاي التصرفات ما احبها متعود على عرامتج گليلي هسع شتريدين اجيبلج
تره دايح غرفة خشاب ما اجيب وذهب وهاي الخرابيط هم ما اجيبها ما عندي
اميره : عجل عش تسألني شريد اذا كلشي ماراح تجيبلي
عمر :مو يگولون للعروس شتريدين وعين عيونج
وتبشري سوالف وبلاش
اميره : على اقل جيبلي جم قطعه ملابس
ابدل بيهن خوما اظل بهاي دشداشتي
عمر : والله ما تلامين هاي الدشداشه حمضت عليج
هسع اروح اجيبلج تبشرين يابه ادللج دلال بحياتج ما شفتي جم اميره عندي هيه وحده
عذباء : كفخها وراح وهيه تضحك مكيفه
صدت عليه شافتني مكنشه
اميره : شبيج يولي
عذباء : غدي لا تزوجين عمر يصدع انتي احلى منه
ضحكت بحس عالي وسدت اثمها
اميره : يمعثوره هو وين اكو بحلو عموري اروح فدوه لطوله وسماره
عذباء : قصدج سواده
اميره : لا تعيبين كافي احلى منج
گومي جيبيلي شي اكله جوعانه
عذباء : رحت جبتلها فواكه گعدنه ناكل ونحجي
اميره :گليلي عذوبه عمر بعده يخابر بناويت امانه
عذباء : لا من رحتي ما شفته خابر بنيه
كيفت وسرحت بأحلامها
اجه عمر جايبلها ملابس وعكازات وگف يمها يعلم بيها شلون تمشي بيهن
ظلو لليل متكاونين زهگ راد يكتلها بالعكازه الا حجزهم عثمان
ليال :ايدي جوه خدي ادحگ على صياد حاط ابن باهي الزغير بحضنه ويخابر
وهاذ الجاهل يجر لحيته وغترته
نتف صياد ما خله شي على راسه
ولا بجيبه خلص مخابره وجان يشيل الجاهل عضه ويلاعبه صد عالولد وگام يسولف
صياد :هاذ شراع خابرني يريد مني فزعه زلم وسلاح منهو بيكم يروح
ليال : كلها وگفت تگول اني انقبض گلبي نفس المشهد من راح باهي دحگت على ديالا وجوانه وجهن صفر
صياد :عاشت اديكم وكفو من شواربكم
شاكر وساجي والنشمي تولمو انتو تروحون
واخذو عشره انوب وياكم
وثجلو اديكم بالسلاح باجر ان شاء الله اطبون الفلوجه والله يثبت خطاكم وينصركم
ليال : كيفو الولد وگامو يخابرون ويتولمون
دگ تلفون صياد جاوب وجان يدحگ عليه ابتسم وسد التلفون نوم ابن باهي بحضنه اجت دله اخذته منه
صعد عالحجره طبيت وراه نزعت الملفع
وگعدت يمه جان يسبح صد عليه وحجه ببتسامه
صياد : خابرني عمر يريدنه نروحلهم
تا يگطع مهر على بنت عمه
ليال : فكيت اثمي وگبل لا اسأل كمش ايدي وكمل كلامه
صياد : لاگي البنيه وهيه زينه طلعت امها ناهبتها هسع هيه ابيتهم باجر ان شاء نروح عليهم الحمد لله على سلامتها
ليال : صفنت بعيونه واحير بشنهي اوصفه
هوه يدري بيه اهبط بساع
مهدلي السالفه بكل سهوله
يمكن لو يگلي عمر لگه اميره جان اني متت
كمش حنجي ويبتسم
صياد : هنيالها مرت ابنج على هاي العمه
اللهم لا حسد
ليال : حطيت اديني على جتفه وادحگ بعيونه
ــ وهنيالها على هاذ العم اللهم لا حسد
ــ ابتسم وهز راسه يتنهد استغفر وراح
توضى واجه يصلي قيام الليل
صليت ويا ركعتين تعبت من طول صلاته
رحت مددت وافكر شجاها نضال تخبلت عد تالي عمرها شلون تنهب بنتها وتنهزم لا فكرت بسمعتها ولا بحياتها
استغفر الله ربي واتوب اليه
ارتاجيت ادحگ على صياد غفيت وهوه بعده يصلي
گعدت الفجر لگيته يبدل تا يروح عالجامع
شگد جدمه خفيف ما شاء الله
عذباء : ولا اگدر انام زين من اميره
خطيه تعن من رجلها گوه اخذتها وتوضت گعدت بالگاع تصلي مثل ما علمها عثمان
خلصنه وجان تمدد فات عمر تا يگعد يمنه اجه عثمان
جره من ياخته وطلعه بره
الصبح گعدنه اني وعثمان سوينه جاي وريوگ
وعمر راح جاب خبز اخذت صينيه ورحت يم اميره
ما تگدر تگعد ويه الولد عبن تمد رجلها
تريگنه وگعدت اجلف المواعين وهاذ عمر يحوص يريد يفوت يم اميره وعثمان گاعدله بالصاله ناس تخزر بناس
اجو عاد ابويه وامي
شگد كيفت بيهم
گعدت بحضن ابويه وامسد بلحيته وهوه محاوطني يبتسم حضنته وبسته بخده شگد مشتاگتله
شمني ويتنهد
صياد : عسا رب العباد ما يحرمني منج بنيتي ضوء عيوني
عذباء : ولا يحرمني منك يابه اني احبك جثير
ضحك وباسني بخشمي
صياد : يبعد ابوج شحلاتها سوالفج
عسا گلبك گلبج ما يشوف الهم
ليال :شبعت قهر على حالة اميره شلون متغيره خطيه
حسبي الله ونعم الوكيل عليج يا نضال
اكو وحده تسوي ابنتها الوحيده هيج
عثمان : الحقد والغل هو اخطر مرض يخلي گلب الأنسان من حجر وهاذ كله بسبب البعد عن الله ما يرتاح الأنسان ابد وامثال نضال يتعاقبون بالدنيا گبل الأخره
ليال : الله ياخذ حق اميره منها ان شاء الله
عثمان :الله فوق كل ظالم وناصر كل مظلوم
ليال : والنعم بالله
ــ منهو راح يجي من الولد
عثمان : عمي غازي وبركات وسعد
ليال : ها خوش اخذت تلفوني دگيت على سعاد تا تجي ويه غازي خمس مكالمات تا جاوبتني جان صوتها تعبان گوه اطلع السالفه
سعاد :تعذريني مگدر اجي تعبانه بيه تيفو
مبارك عليكم مقدماً الله يسعد عمر ويريح باله
ليال :خطيه سعاد بلكت صياد يوديني اروح اشوفها
طبيت عالمطبخ اركب اجه عثمان يعاوني
ركب التمن وسوه زلاطه وما خله شي ما ولمه
وعمر بالگوه تا حط مي الشرب محملنه مانيه زعم هوه عريس رحت دحگتله گاعد يم صياد يحجون
صياد : ما عندك نيه تعلمني منهو هاذ
عمر : لا بتاتاً ما عندي
ليال : من شافوني سكتو وگامو يبتسمون احبهم من اشوفهم جميع حطينه الغده وهمه ياكلون يدحگون على بعض
جلفت المواعين بساع ورحت يم البنيات
ما مصدگه عمر المصگوع راح يتزوج
احس اريد اطير متوتره اكثر من اميره
افتر بالصاله واحوص اريد اطب عالهول
بس ما يخليني صياد عبن بركات وسعد يمه
كل ما اوايج يخزرني وارجع
ما عدنه غير عذباء ندزها تجيبلنه اخبار
عذباء :وگفت بالباب ادحگ عليهم
عمر يسولف وعمامي يتصنتون
محد بيهم يعترض على شي
راح عثمان جاب الشيخ
واميره خلت عمي بركات كفيلها وعقدو عاد
ابويه وعثمان صارو شهود
صياد : مبارك يابه الله يتمملكم بخير وعسا ما تفارگكم السعاده
عمر : يبارك بيك ابو نشمي
عذباء : راحو عمامي وفاتت امي عالهول
حضنت عمر وتبجي
رحت يم اميره
جانت تمشط ومكيفه حضنتي وتضحك
ليال :من جيت اسأل بعمر تا يگلي شلون لگه اميره وهاذ يتهزم ما يفعل يسولف تربعت يمه ولحيت علي جثير سكت فتره يجر حسرات وحجالي كلشي عاد
فكيت اثمي مصدومه
بحياتي ما توقعت فطومه تسوي هيج
اويلي يابه سيست على خوالها بعشگهم الي يذبح مستعدين يسون اي شي لخاطر ياخذون الي يريدونه
ــ زين اذا تحب عمر عش من خطبتها العثمان ما حجت وساررتني تدري بيه احبها واريدها جنه عندي
ــ لا تگلي سعاد تدري بيها ولهاذ السبب ما اجت
ــ سكت عمر وگام يتأفأف
عرفته حاجيلها صفگت بأديه انحمست حمس
ليش وليدي عش گلتلها
عمر :ودعني بيها دحگي حالة اميره شگد تقهر
الليل ما تنامه تصيح من رجلها لو تريد تموت بين اديهم شحصل
گولي لو اكمشها اني ودمي يتفاور شسوي بيها
اااخ كل ما اتخيل گلبي ينمرد
ليال : مسدت على ضهره اهجده
كل ما يتذكر ينفعل مگدر الومه ولا اصف ويا
گلبي يم فطومه هسع شحالها يربي شسوت بيها سعاد المخبله
فاطمه :ملگوحه بحجرتي لا احرك ايد ولا رجل
سهام تجيبلي اكل تحاول توكلني ما تگدر مابيه حيل الوك
جسمي كله يصل عليه سني يشض بگلبي من الوجع
وجلد راسي احسه يطلع نار
شلون بيه اذا شافوني ابويه وياسين
سهام : لا ديرين بال عمتي گالتلهم انتي مريضه
وبطنج توجعج يعبالون مرض نسوان واستحو يجون يشوفونج
فاطمه : غمضت عيوني بقهر گلبي ينزف دم
شحصلت من فيانتي هاذ عمر راح يتزوج اميره واني انذليت وانكسرت كون اظل على نومتي وما اگعد ابد
عذباء :امي راح تظل هين وبلكت ابويه هم يبات
تا ادحس نفسي بحضنه مشتاگتله
رحت يم اميره انگز مكيفه
طبيت اعاونها تسبح لفيت رجلها بنايلون
وگعدت عالكرسي اجلف بيها
ما حلالها تسبح الا بهالليل
ليال :مكيفه بعمر ومقهوره على فاطمه اصفن ويه نفسي ما اعرف شسوي اريد اروح اشوف سعاد بس اخاف تنحرج بزياده احسن شي اسوي نفسي ما ادري بلكت هالشي يخفف عليها
گعدت يم صياد افرج بكتوفه
ادحگ على عمر خازرني ويدحگ على اديه شلون افرج صديت بصفحه هاذ مخبل
كمش ايدي صياد ودحگلي نص التفاته ويبتسم
صياد :كافي يابه عسا لا شافت اديج الهم
ليال : يمكن حس على عمر ضايج وشلون ما يحس اذا هاذ يدحگ علينه عبالك تلفزيون گباله
يفر بسبحته وخازرنه عيونه يخوفن
شمحلاته عثمان گاعد بكل ثگل وحت من يسولف ما يجابس البشر بس ذاك ابو عيون صلفه حسسني عبالك مسويتلي فاينه حت على بطني يدحگ
الله يصگعك
دگ تلفون صياد جاوب وجان يعگد حواجبه
طلع بره يخابر وعثمان راح وراه وعمر وگف بالباب
گلبي لسبني اكو شي رحت يم الشباك اتصنت
عثمان : خير ابو نشمي عسما شر
صياد : شاكر وساجي والنشمي كامشينهم الأمريكان
بالفلوجه ان شاء الله ما عليهم شي اني رايح الحگهم عينك من امك ولا تگللها شي
ليال : تبمسرت شنهي كامشينهم الأمريكان وما عليهم شي صحت ولطمت خدي فاتو عليه بساع
كمشني عمر يهجد بيه وصياد گام يصفگ بأدينه ويستغفر كمشني من كتوفي ويسولف بهدوء
صياد :شجاج يابه استهدي بالله تورعي عالسالفه
ليال : شتورع هاا مو. سمعتك تگول كمشوهم الأمريكان
ــ ثنيت بالگاع واصفگ على رجليني گعد يمي ويحجي بهدوء
صياد : همه كامشينهم ابيت شراع
ما لاگين عدهم لا سلاح ولا شي
شغلة نكيشه هسع الحگهم و باجر ان شاء الله
يطلعون بالسلامه لا يظل بالج
ليال :صفگت رجليه شلون ما يظل بالي يخايب يگلبي اخذني وياك على بيتنا امانه هسع خواتي يتخبلن اريد يمهن
صياد : وين اخذج هسع الدنيا ليل يابه والطريق مو امان ظلي وباجر ان شاء الله اجي عليج وذا ما لحگت اخابر عمر يجيبج وخواتج سبعات لا تشيلين همهن
ليال : عافني اتگلوط وراح حتارو بيه الولد يهجدوني
طلع عمر يخابر بره بلكت يحصل خبر يريح بالي
…
دموع :اليوم ملتمين زعم احنه عائله مثل كل البشر
وادي جاي يلاعب بعمار ويضحك بي
دگ تلفونه گمت فصخته من الشحن
دحگت اسم عمر ناوشته اله جاوب بساع
رفع حواجبه مصدوم وگف على طوله ويرعد
عساف : شجاي تهذي يول نهبلت
ــ شنهي كمشوهم خاف متوهم
دموع : تبسمر بمكانه سد التلفون
ادينه ترجف مدري على منهو دگ وطلع يخابر انفعل بالزايد يصيح ويغلط ما خله شي ما كسره ونجمه تفتر وراه وتبلع بريگها
عساف : اعرفلي وين اخذوهم ورجعلي خبر بساااع
دموع : سده وگام يفتر ويتفلحط
عساف : ما يهجد الصياد الا يحط اخوتي كلهم جوه التراب
نجمه : اگعد وفهمني شجاك عاد فحطت شصاير
عساف : عمي شاكر وساجي ونشمي كامشينهم الأمريكان
نجمه : يهالعثره وين لگوهم شنهي داهمو بيت ابوك
عساف : لا دازهم فزعه عالفلوجه
دموع :فات بدل هدومه بساع
طلع بالطرمه يلبس بحذيانه ويوصي بينه
زعم احنه راح نخلصها فرات وراه
نسه احنه بهاذ الوادي المهجوم لا نشوف ولا ننشاف
ومحد يدري بينه اذا احنه موجودين بالدنيا
اخذت عمار ورحت عالحجره مددت بصفه ونمت
..
ليال : ما غمضت الليل من التفكير والقهر
بس طلعت الشمس حرجت على عمر الا يوديني
عثمان : يمه اهجدي خن نفتهم الزلمه گالج
اذا ما گدرت اجي اخبر عمر يجيبج اصبري اترجاج ان شاء الله ماكو شي تفائلو بالخير
ليال : صارت الضهر واني الوب
دگ تلفون عمر جاوب وصد عليه
عمر : يالله گومي تولمي هاذ ابو نشمي خابرني
عثمان :ها يول ما گالك شي
عمر :كلشي مفتهمت يمه لجه مبين بعده بالفلوجه
ليال : راح عمر جاب سيارة صديقه
ركبنه والطريق كله اصفگ بأديه هسع ديالا وجوانه يتخبلن
احس عمر ولا جاي يسوق يمعود استعجل شبيك
عمر :مگدر اسوق سريع مو زيلج تصبري ما ظل شي
ليال : ما طبينه البيت الا هلكت
لگيت البنوات مسويات محربه ديالا مخليه وجها احمر من اللطم وجوانه تفتر وتبجي
لليل واحنه انلوب
وهاذ صياد يدگون علي مغلق شلون يخايب يگلبي
ما نمنه ولا شفنه راحه خلصناها صلاة ودعاء لحد ما طلعت الشمس كل الحيل راح
اجه صياد الضهر وجه مشفوط
خلينا يرتاح وهوه حجه من كيفه
عرفنه شغلة الولد مليوصه مدري منهو مخبر عليهم ما لاگين عدهم سلاح ولا سوابق يم الأمريكان الي اثر عليهم عبن همه ابيت شراع الي مطلوب عدهم من زمان وما كمشو
اخذو الولد على سجن بوكا
وشتغلت المحارب وراهم ليل ونهار الوادم اتلاطم
غيابهم اثر بجيش صياد اكثر من البيت
عبن شاكر هوه ابو الهاونات ونشمي وساجي قناصين
دله : يابه شبلاجن راح تگضن ايامجن لطم
گولن الحمد لله علوا باهي مسجون ولا ميت
ليال : لوما دله تمشي وترزل بينه مجان احد هجد
هيه صبرتنه وخلت البنوات يگفن على رجليهن ويتقبلن امر الله
دموع : ليل ونهار وادي يحمس بروحه
على عمه واخوانه ادحگ علي واتحسر لو يحبنه ربع حبهم مجان شفنه ضيم وقهر
طلع صورة باهي
حضنها لصدره ودموعه تصب
عساف : عمت عيني يخوي انذر نص عمري لخاطر اعرف جتالك واخذ بثارك
دموع : تناوش صورة عمه واخوانه الي نسجنو
ويسولف وياهم
عساف : اويلي عالمساجين يابه
سامحوني لحگتكم وما گدرت على شي ردت اربد المركز واجيبكم بس لگيت الصياد بانگ جدامي
دموع : ظل گاعد وينوح عليهم
يحبهم اكثر من روحه وتكفل بكل عوائلهم
وهمه ما شفت واحد بيهم دگ بابنه ولو عش يجون ما الومهم هوه منهو ميت على شوفة وادي ونجمه
عذباء : طابت اميره وگامت تمشي مثل گبل
اخذها عمر على بيتهم وراح يزفها من غادي
بدون لا عرس ولا هوسه راحت وياهه خاله جوانه تا تزوقها
عمر ما فعل ياخذ فلس من احد
باع سيارته وجاب غرفه على گد الحال وجهاز خفيف وذهب بس حلقه وتراجي
خطيه اميره كيفت بيهن عبالك مالكه الدنيا
تولمن خالاتي واجو ابويه وادي
ورحنه تا نزف اميره المغرب
فات عمر گادها وطلع
اجت خاله سعاد ترخصت من ابويه وخالاتي
وهلهلت فوگاهم وطشت جگليت
ادحگ على شباك حجرة فاطمه
جانت البرده مكفوفه عالنص يمكن واگفه ادحگ
عش ما اجت مو اميره صديقتها
رجعنه البيتنا وكلها راحت محد ظل
غير امي وخالاتي وخاله امل وخاله سعاد
صبن العشه الجابنه وياهن
حت اميره تربعت ويانه تاكل
عثمان كحش الزلم وراحو عالجامع صلو العشى واجو ياسين وعلي وثائر زافين عمر سوو بي مثل ما سوه بيهم لگحو بالحجره وهوسو بالباب شويه وراحو
ظلينه گاعدين بالهول طلع عمر وناده امي راحت هيه وخالاتي گمت وراهن فتحت الباب ادحگ اميره تبجي وتلم بروحها شبيها هاي يمكن ضاربها فتت تا اسألها شافتني خاله جوانه جرتني من ياختي
لگحتني بره وسدت الباب
ابد ولا تبطل نحاسه زعم هيه المراه
رحت گعدت عالدرج مقهوره
طلعت امي سألتها شبيها اميره
ليال : بطنها توجعها كافي تسألين روحي نامي
عذباء :اخذت لعابتي ورحت يم مهره وفرح نمنه
ليال :هاذ عمر المصگوع مخلي البنيه بتالي روح
هاي عاد گال ماكو شي اليوم وتعبان ويريد ينام لميتها وگدتها عالحمام سبحت
والبنوات رتبن الحجره
عذباء : گعدت الصبح
لگيت امي وخالاتي يتريگون وگفت بالباب ادحگ عليهن
جوانه : هاي بعدج ما مبطله طبعج تگعدين من النوم زعلانه وجنج السعلوه
عذباء : ما جاوبتها صديت بصفحه
فات عثمان ادينه تگطر مي من الوضوء مسح وجهي وحضني
جوانه :وخر عنها هسع تعضك السعلوه
عثمان : وشحلاتها هالسعلوه
يالله روحي غسلي ولمي شعرج وتعاي تريگي
عذباء : غسلت واجيت الم بشعري گعدت اكل وادحگ على خاله جوانه
كنشت ورفعت حواجبها
جوانه : عش ادحگين ما شايفتني
عذباء :طلع عمر من الحمام
تربع يم خالاتي وياكل
عمر : شنهي مرتي بعدها نايمه مو خوش جنه هاي يراد اخذلي مره عليها تا تجر عدل
جوانه : وانته شمخلي بالبنيه يمصگوع هم اذا وگفت على حيلها منا لسبوع زين
ديالا : صدگ شجاك احد گالك راح اطير
عمر :شمسوي اني يمعوده هاي حياله تا متگعد تشتغل الليل كله حاضنتني تگلي ريتك بعد خوالي
جوانه :ينراد نربطك بسنسله عن البنيه
عذباء : شاورها وجان تضربه على جتفه
جوانه : بناويت گاعده يالفگه
عمر :واني شگلت يالخاله مجرد سعلتج سعاال
جوانه : حيل فايتك موسم تربية
عمر : اگوم من يمجن اخيرلي خن اشوف اميرتي
عذباء : راح عالحجره وينادي
عمر : اميرتيي
ليال : الضهر وجان يدگ تلفون عمر طلع بره يخابر
ظل فتره شفته متخوصر وعاگد الحواجب
طلعت يمه تشوف شكو
دحگ عالبيت وجرني بصفحه
عمر :خابرني عمي بركات هسع يگول نضال ماتت
ليال : صحت وجان يسد اثمي ويدحگ عالبيت
عمر : كل عقلج صحتي هاي نضال يمعوده
ليال : شلون ماتت
عمر : لاگينها بالحمام ميته
يمكن زلگانه بالصابونه وواگعه
هسع المهم فطست حتمال توگالها ملك الموت بوصله
ليال : لا تحجي هيج وليدي المراه ماتت
عمر : وموتتهم لوما خايف على اميره الا اهلهل
هاي سويت بيج الفعايل ولوما اكمش عقلي بيدي جان سحرتني وخبلتني من زمان
ورادت تحط روسنه بالطين انتي دحگيلها عافت الأيام كلها ما فطست الا بمصباح عرسي
هسع ماريد اميره تسمع بالهشي وانتي لا يرف گلبج والگاج تگهدين
ليال : ما ادري ليش انقهرت عليها
يمكن علمود اميره خطيه گلبها نظيف وما تستاهل المغثه طبعها مثل ماجد الله يرحمه تبين القوه بس داخلها هش
عذباء : رحت يم اميره بالحجره گاعده يم الميز تمشط وتغفي شفت رگبتها وفكيت اثمي
ــ هاي شبيها رگبتج مزرگه
انتبهت وجان تجر الملفع غطت نفسها
اميره : هاي عندي حساسيه واحك
عذباء :غدي هاي يجوز عبن ما جنتي تسبحين يوميه من جنتي يم خوالج
اميره : اي صحيح
عذباء : صديت عالميز وجان احط حمره وسويت شامه وحطيت ريحه اجه عمر كفخني واخذ كلنس مسح اثمي ورزل اميره
عمر :ما گدرتي تگليلها مو هاذ العمل
عذباء : ما جاوبته وجان يكفخها
نادتني امي اخذتني عالحمام سبحتني
ــ تره اني كبرت واعرف اسبح نفسي
ما ردت عليه استلمتني جلف
ظلت يمنه سبوع هيه وخالاتي وراحن عاد
ليال :خلصت شهري وطبيت بالعاشر وما تفعل الطبيبه تسويلي عمليه اخذني صياد عليها لأخر مره اذا ما وراهه نتيجه تا نشوف غير وحده
اخذتلي سونار وحددتلي موعد وره سبوع شهگت من فرحتي طلعت خبرت صياد كيف حط ايد على بطني ويسأل
صياد : زينين جهالي التوم
ليال : اي الحمد لله زينين بس هم ما بينو يمكن يستحون
ــ ابتسم صياد ومسح لحيته الي صارت بيضه من الشيب عمت عيني عليك منا موت ابنك ما تخطيته ومنا اخوك وولدك بالسجن ورغم هاذ يكابر ويبتسملي
صياد : كلشي من الله يمحلا المهم تگومين بالسلامه والجهال صحتهم زينه
ليال :گادني ورجعنه محد يندل بيه توم
صياد ما فعل يخليني اخبر احد يخاف من الحسد بس ظلت بنفسي لو اعرف جنسهم شنهي
…
دموع :الناس تصبح تگول يا الله
واحنه نصبح على صياح وادي و نجمه نهضت من فراشي غسلت ورحت بالباب ادحگ عليهم گاعدين بالطرمه ومتلاطشين
عساف : يعني بربج مجاي ادحجين الوضع مليوص وعگل ما ظل براسي
نجمه : لو تفكر بيه وتهتم ربع تفكيرك بأخوتك جان اني اسعد ام بالدنياااا
خلصت عمري تجذب عليه وتلهي بيه
عساف :مقبوله منج يمه كل هاذ الي سويته علمودج وهسع طلعت اجذب والهي بيج
جاي ادحجين بنفسج شصار بيه من صگعات خلتني ما اندل دربي منا مات باهي الي اخذ نص الحيل ويا ومنا انسجنو عمي واخواني
اني بيا حال وافكر بهالسوالف
نجمه : انته مو بحالهااا بس اني بحالها العمر جاي يركض وما شفتك وفيت بوعدك
يول نسيت شصار بيه هجمو بيتي وذلوني
وانطردت من البيت انهانت كرامتي وكل هاذ ما كفه ابوك انوب اجانه هين يتهدد عليه مو سمعته بأذنك
عساف : ما نسيت ولا انسه وگتلج اسوي الي تريدينه بس انطيني مجال اوجد دربي
دموع : راح يفتر يم الذيابه ويدخن
ونجمه تفتر وراه وتحش براسه سوالف عالصياد واهله كون ينهد الذيب وياكلج بس خاف يتسمم خطيه
...
عذباء : رجعت من المدرسة
ويه البنات مرينه عالمحل نشتري طبگت يمنه السياره البطه فتح الجامه وناداني صار زمان ما شفته بديت انسا رحت يمه سندت اديني عالباب
عساف : شلونج عذبه
عذباء :زينه الحمد لله وانته شلونك
عساف : نشكر الله ازهي بالنصر
عذباء : هاي سالفة ابويه عش تبوگها
عساف : اذا ما ابوگ من ابوج منين ابوگ
اركبي اوصلج
عذباء : لا شكراً اريد امشي ويه صديقاتي
ضاج وحك لحيته گام يطگطگ عالستيرن ويحجي
عساف : صار عندج صديقات وتروحين وتجين وياهن
عذباء : اي بس گوه تا قتنعو اخواني
جانو يجون ويايه بالبداية
صفن بعيوني وحجه
عساف : ما شتگتيلي يا بنت
عذباء :اي بس شويه انته معد تجي وعثمان جابلي بزونه تلهيت بيها
عگد حواجبه وصد بصفحه يحد بسنونه
عفته ومشيت ناداني انوب
عساف : اواش يا بنت
عذباء : رجعت يمه كمش ايدي ويسولف
عساف : اني غبت عنج بسبب الظروف
مو تدرين انتي شصار ويانه
بس اني بعدني احبج يا عذبه واريد نرجع مثل گبل تخابريني ونسولف احب سوالفج
عذباء : رفعت جنطتي على جتفي وادحگ علي
ـ لا مگدر اخابرك اخواني بعد ما يخلوني اروح يم الجيران وبالليل عثمان ينومني عد راسه
ــ عض طارف شفته وصفن
عساف : خابريني من تجين عالمدرسة وضمي التلفون گبل لا ترجعين عالبيت
عذباء : حكيت راسي وادحگ عالبنات صافنات عليه
ــ بس تلفوني ظل يم ورده
عساف : خلي يولي اني اجيبلج بداله
هسع شگلتي تخابريني مثل گبل
عذباء : رص ايدي ورافع تك حاجب
جرني ودنگت يمه همس يم اذني
عساف : مو احنه حبيبين يا عذبه شنهي نسيتي
عذباء : تذكرت سوالف ورده وابتسمت
لا ما نسيت ميخالف اخابرك
ابتسم وحك شاربه
عساف : خوش عجل باجر اجيبلج تلفون
لا تگولين لحد بتاتاً هاذ سرنه اني وياج
عذباء : راح ظليت الوحله
رجعت يم صديقاتي حجيتلهن كلشي
ثاني يوم اجه بنفس المكان وانطاني التلفون
وجايبلي اشكال حلويات اخذتهن ورحت يم صديقاتي گعدنه وره المدرسة ناكل ونرصرص
..
دموع :واگفه بساحة المدرسة گلبي ممرود
ما اريد ارجع على هذاك المهجوم
كل الطلاب طلعت ظلينه اني وسبع جرني من ايدي
وطلعنه
ومثل المعتاد حارسنه واگفلنه بالباب
ركبنه السياره ومشينه
طبينه على بيتنا من الباب الوراني مثل الحراميه
بحياتنه ما طبينه من الباب الرئيسي اصلاً منهو يستجري يصله اذا وادي هاد جلابه گدامه
يوم عن يوم احقد واكره كلشي هين لوما عمار تعلقت بي الا انهزم اعيش بالديان ولا اظل مگابله وادي ونجمه حت بالمدرسة ما اگدر اخذ راحتي مخلي علينه مراقبين عيونه بكل مكان
طبينه جوه لگينه الحجيه وبنواتها جن ينظفن قصر الشيخه نجمه وهيه مزحمه نفسها مسويه غده
نادات سبع بكل حنيه عبنه وليد واني تحجي وياي من گفه خشمها
نجمه : تعاي تزغنبي
دموع : ما اريد تزغنبي انتي
نجمه : سمعتها يا سبع شگالت خاف يجي ابوكم واسولفله عود خلها تنجر
دموع : عوجت اثمي ورحت عالحجره
لگحت الجنطه فات سبع يرزل بيه زعم هوه زلمه
وگفت يمه رغم احنه توم بس اني اضخم منه هوه مسلوع الي يشوفني ما يگول عمرها 11 سنه
سبع : عش تظلين حابسه مياتج على لوح
ابويه جم نوبه بلغج ما تغلطين على جدتي
دموع : ايبا غادي تسولف مثلها تشربت من ساسك لراسك
اسمع اگلك اذا هيه جدتك مو شرط تصير جدتي اكرها ما احبها وهسع فارجني روح تغده يم جدتك عيني يالمدلل
سبع : بس يجي ابويه اگله عليج يربيج من جديد
دموع : اي روح گله زعم ارجف من خوفي
ما عليك عتب المدلل مال نجمه
نسيت يول شلون امنه ماتت من وراهم وطموها جوه الترااااب
وما خلو احد يدري بينه ضامينه هين عين الوادم عبالك نهابينه من الشارع
سبع : ما جتلو امنه لا تظل تهذين تدرين بيها طگت عليها الرشاش
دموع : ما طگت عليها الرشاش جذب هيه جتلت نفسها بس طمطمو السالفه
يتبع…… .