مساء الخير زهـراتي الحلوات
#ثعلب الحبتر
#بقلمي انا: زهراء
#حساب الانستا: zaii1_8
زهـراتي اتفاعلو وعلقو بين الفقرات رجعولي حماسي ♡
بسـم ﷲ الرحمـن الرحيـم
ـــــــــــــــــــــــــــــــــــــــــــــــــــــــــــــ
ــــــــــــــــــــــــ
يمه هواي بچّوني يمه هواي جرحوني وحك ريحة حنانچ عذبوني ابسكته ابچي بلايه صوت ابكلبي حسرة لو اموت حتة ميحسون اذا شافوني.
ـــــــــــــــــــــــــــــــــــــــــــــــــــــ
ـــــــــــــــــــ
روح
ثاني يوم كعدنة من الصبح ونتحضر عمة أمل ما ارتاحت بس تفتر وانا وياها شفتها صفنت مثل الي اتذكرت شي اخذت تلفونها واتصلت
أمل.. ولكك عليويييي الهتليي الكيكة الهسة ماحاجزينهاااا طيح الله حضك وحض الخلفك على ما تخلص الخطوبة ميتةة انااا طااح حضك
كالتها وسدتت التلفون حتة ما انطتة مجال يفهم دارت علية وصاحت
أمل.. ولجج رويحة ولي خابري لرويغب خلي يجيب كيكة من اي محل ويشخبط اسمائهم عليها الهتلية امداهم اي والله حتة الهتلية كامو يزوجون ويعة امي كون
هزيت راسي ورحت خابرت راغب ووصيتة يجيب كيكة
راغب.. يبوووو ادري شصير انا وللل عمي جاي انتظر ترف باب المدرسة وروحي مستلكة حدر راسي كلو اشتعل نار من الشمس
روح.. شبيك راغب هيا كيكة من اي محل حلويات شنسوي نسيناها بعدين ترف الهسة مامستلمة النتيجة؟
راغب.. لا بعدهي دخلت وما طلعت راحت تكمل نومتها جوة
روح.. هسة شنو تجيب لو انروح للناس بدون كيكة
راغب...الله عاشو خوشش فكرة شيسوون بالكيكة وانتِ عدهم
روح.. اهووو شلون يريدني اطك راسة بالحايطط لكك عيني استحييي انا
راغب.. ديلا يلا ام المستحة والخجل طلعت ترف من المدرسة وجها يبشر بالخير وعود افكر جائز اجيب كيكة او لا بكيفي بعد
سديتة منة ورحت يم عمتي سوينة التوزيعات احنا اشتريناها وردنة اندزها الهم هما يسوونها بس ماقبلو
شوية واندك الباب كمت فتحتة واجت زوجة محمد بستها وخلت ابنها بالصالة ودخلت كعدت تكمل وية عمتي وانا رحت رتبت البيت وشريت الملابس وكعدت انتظر ترف على احر من الجمر دك علية راغب وكال
راغب... وصلنة جوة وهساع راح نصعد
رحت فتحت باب الشقة ووكفت الهم انفتح باب المصعد وطلعت منة هيا وراغب ابتسمت واجت تركض علي حضنتني قوي واطفر وتحجي بفرح
ترف.. ناجحةة ناجحة روحح ناجحة وابو الحسن
بستها بخدها واردفت
روح.. الف مبروك ترتر بنيتي تستاهلين اكثر يارب تفرحيني بيج بيوم تخرجج
ترف.. ان شاء الله..ماتردين تعرفين شكد معدلي؟
روح.. مو مهم شكد المهم ناجحة وفرحانة ما اريد اضغط عليج اهم شي السادس عندج كل تعب تعبتي حابتة منج
رجعت حضنتني وحجت
ترف... معدلي 92
باركتلها ودخلت جوة تهلهل وتسوي اجواء شوية خف التوتر من اجت لأن تسوي واهس مالت جو اعراس
صار الظهر اتغدينة بسرعة وهدى غسلت الماعين وانا رحت بدلت
•••••••••••••••••
ترف
شعور كلش حلو انتقلت الصف السادس صف تحديد مصيري المستقبلي ابتسمت واني
اباوع للمراية النفسي فخورة بكل درجة جبتها
لبست فستان طويل لون ماروني بي فتحة بادية من يم الركبة مع اردانات خفيفة ويكون ضيق من يم الخصر مشطت شعري وخليت ومكياج خفيف لبست اكسسواراتي وخليت علجي بحلكي وطلعت كعدت بالصالة يم عمو باسل ما عازمين احنا احد يعني انروح بس احنا
باسل.. عمي شنو هاي بنيتي اطك بالكاع اخاف عليها من الخطابة
ابتسمت وطكيت بالعلج واردفت
ترف... لا تخاف علية من الخطابة خاف على نفسك من النسوان
ضحك وحجة
باسل.. كومي صيحي العلي بس لا تكليلة عمو باسل صاحك
هزيت راسي وكمت دكيت الباب ودخلت شفتة يلبس بساعتة ويبتسم
هلهلت وحجيت بفرح
ترف... عريسنةة يشكك شكك طالعع
التفت الي وهوا يعدل الربطة بغرور
علي.. اليوم ابات بالمستشفى من عينج
اتخصرت واردفت
ترف.. شبيك تئبرني موصوجك صوجي اني امدحك
علي...صديقي امدح بية شعندك غيري
ضحكت واتقدمت يمة
ترف.. اني ناجحة
خلة ايدة على راسي وخربطلي شعري
علي.. الف مبروك صديقي
دفعت ايدة بضوجة وصحت
ترف.. اهوو علي خربت شعري شبيكك
علي.. احب شعرك صديقي
ترف.. عليي حاجيني بصيغة بنت حسسني اني انثى موو ذكر
حركلي بحواحبة وشمر علية المشط وطلع بعد ماكتلة عمو يصيحك
رتبت شعري وطلعت لكيت علي حاضن عمو باسل ويبوسة براسة رفع ايدة وباسها
علي.. ماردت ابدي خطوة من حياتي وانتَ ماراضي عني
ابتسمت واني اتذكر اخر عركة صارت بيناتهم
اجة علي وخبرنة خطوبتهم بعد يومين وتروح عمة وروح يخطبونها الة بس كلشي صار عكس ثاني يوم اجة علي يرعد علينة ويحجي بحدة وبتحذير
علي... الخطوبة تنسونهااا ماكووو ما اريد اخطبب طلعت من عينيي جزعتنيي مليتت هيج خطوبة وهيج حبب بررررة منة ما اريدة
كام عمو باسل وصاح بتفس نبرتة
باسل.. موو بكيفكك شكد نصحتك تبعد عن البنية اذا ما متأكد منها شوف اطباعها شوف معدنها بس وين انتَ عبالك ماشايف بنات اسمع ولك علي تروح تخطب ورجليك فوك راسك بنات الناس مو لعبة عندك
علي... حجيت الي عندي كلتت مااريدها كرهتهااا تلح هواي مطالبها مبالغ بيهن ما اشوفها تكدر ادير بيتي واطفالي بعد يومين يابة شنوو ابتليت من حبيت خو مو ابتليت
باسل...وانا كلت تروح تخطبها هذا هوا العرس جا شتريد بس اتزوج وجرباية وخلفة شعبالك جااا
علي.. واناا كلتت ما اخطبب
اجة يطلع من الشقة صاح عليه عمو بصوت واضح
باسل.. اذا ماتخطبها لا انتَ ابني ولا انا اعرفك
رجع بخطواتة يم عمو وهمس
علي..ما اتوقعتك تسوام ابوتك على زواجي صار يجرالك التريدة بس اتأكد حتة البت طلعت من عيني
كالها وطلع وعمو ارتفع ضغطة
ومن يومها لا عمو باسل يحجي وية علي ولا علي يحجي وية عمو
رجعت للواقع وابتسمت
ترف... لككك عينييي شنو هاي ام علي طلعت عندك حركات لكك تئبرني شوو هيدا الجمال
رفع نظرة الي واردف
علي.. انتِ بس لو تفكين ياخة عني وتوخرين عينج هاي من كون فكسسسس اي والله حاسدتني اربعة وعشرين ساعة
شال محمد الممة مالت ابنة وخلاه شلون المايكرفون
محمد... بمناسبة صلاح الوالد وام علي انقدم الكم هلهلولة من صديق علي
كالها واني هلهلت الهم هلهلولة من اعماق قلبي ضحكنة واخذنة الاغراض ورحنة البيت البنت هاي اول مرة التقي وياها ماعرفت ولاحزرت ولاكان ابالي راح ادمر حياتي
دخلنة الهم ولكينة عدهم ناس قليلة بس اكثر من عدنة دخلنة وهلهلت عمة أمل باوعت للبنية اسمها جواهر لابسة بدلة خطوبة لونها زيتوني ومكياج وتسريحة راحت روح وهدى سلمن عليها واني اخير وحدة ابتسمت وبستها
ترف.. اني ترف اخت روح
اختفت ابتسامتها وباوعتلي من فوك ليجوة ورجعت ابتسمت بس من ورة خشمها
جواهر.. اهلاً بيج
استغربت من حالتها واختفت ابتسامتي بفشلة
شوية وكالو خلي يعقدون ساعدنها خواتها حتة تكوم جانو ينفرونة بكلشي اني وروح عبالك ماموجودين وينترون بينة نتر انتبهت على روح ملامح الانزعاج باينة على وجهة وتنافخ
شافتني انتبهت الها ابتسمت وكرصتني من خدي
روح.. اروح فدوة الهذا الوجه
ترف..امي انتِ
كضيتها من ايدها ورحنة وكفنة بصف عمة أمل الي هم ما عاحبها الوضع بس الخاطر علي عقد الهم السيد وهلهلنة وهوسنة رجعت كعدت جواهر وكالو راح يجي علي لبسن البنات حجاباتهن دخل علي وراح العمة باس راسها وكعد يم جواهر راحت روح وانطتهم الحلقات اخذوهن ولبسو بعض اشرلي علي اجي اتقدمت يمهم وانطاني تلفونة وكلي اصورهم ابتسمت وصورتهم سوة وهما يوكلون الكيك وصور هوا وعمة وراح
مرت الحفلة على خير الة لمن صارت هوسة وحدة من النسوان على اساس بايكين ذهب منها اجت تصرخ وتحجي وتغلط
ودكت رجل الة تفتش كل الجنط اجت روح وهمست بأذني
روح... هسة شنو هالتمسلت هذا
ترف.. ومصدكة بايكين منها؟ اذا جنطتها بيها ذهب المن تعوفها بأي مكان بعدين اذا عدها ذهب شعدها مالابسته وملبستة للجنطة
ضحكت واجت هاي المرة يمنة
ترف.. تفضلي حجية؟
.. بقت جنطكم مافتشناها
انتفضت من مكاني وحجيت
ترف.. عفواً منج بس لا جنطتي ولا جنطت اختي تتفتش وعيب عليكم كاعدين ابيتكم واتفتشون جنطنة
صاحت بصوت عالي... وهااا وليش ماتقبلين انتفتشهن خاف انتِ ماخذتهم
ترف.... احترمي نفسج وخليني محترمتج كونج اكبر مني شنو الي شفتي مني وكلتي انا ماخذتهم؟
.. اذا ما ماخذتهن خليني افتش جنطج
ترف.. مامجبورة اخليج اتفتشين الجنطة اذا ماعندج دليل علينة
سحبت جنطتي واجيت اطلع جرتني من معصم ايدي بقوة وخلتني كبالها بعدني بصدمتي و اجت روح وحجت بصوت عالي
روح... شلون تتجرأين تمدين ايدجج؟ ومنوووو انتِ؟ شنو هاي قلة الاحترام العندج اذا انتِ الكبيرة وهيج شخليتي للصغار جا؟
جواهر.. بس من حقها تعرف وين ذهبها
ترف.. بس مو من حقها تتهمنة وتدفعني
صارت هوسة وجر وعر ووصلت السالفة للزلم البرة لا اني اقبل الجنط تتفتش ولا هيا قابلة تعتذر ضلت ادوس بالحجي الحد ما دخل علي سئل عن السالفة وسولفتلة عمة صاحلي واجيت يمة
علي.. ترف خليهم يفتشون الجنط
رفعتلة حاجبي واردفت بأستهزاء
ترف..لا بالله؟ اشو عيد ماسمعت
علي.. ترف مو وقت استهزائج الخاطري خليهم يفتشونهم
ترف.. علي تدري بية كلش زين ماعندي بقاموس حياتي كلمة الخاطري والجنط ماتتفتش
اجت روح يمنة واردفت
روح... خليهم يفتشون خلي اشوف بلا شيحصلون
اجيت احجي وقاطعتني
روح.. ترف الي حجيتة يصير
هزيت راسي بقبول والتفتت العلي وحجيت بثقة
ترف... خليك متأكد يا علي اذا مالكيتو شي كلشي بينة اني وياك ينتهي
علي.. مو هيج ترف
ترف.. لا هيج
انطيتهم جنطتي وروح هم فتحوهن وفتشوهن وكلشي مالكو اخذت تلفوني من الجنطة وشمرتها عليهم ما اريدها بعد
باوعت العلي بنظرة عتب وطلعت برة اجة عمو باسل يستفسر عن الهوسة الصارت سكتت ما سولفت بس كتلة اسئل عمة أمل
خاف اني احجيلة ويكولون غسلتي مخة وخليتيه يصدكج
طلعت روح ومبينة مقهورة وضايجة اكثر مني
ترف.. لا تضوجين نفسج
روح.. شلون ما اضوج سوينة هوسة شكبرها واخر شي فتشوهن.. بعدين شلون ما اضوج واني اشوفج مدخنة هيج
سكتت مارديت ورجعنة للبيت واتوالت الايام اني ما احجي وية علي وحتة روح تحجي وياه من ورة خشمها
•••••••••••••••••••
الحبتر
خنجر... الحبتر اسرعع اكثر هذول ناويين علينة اليوم
دست 240 وخنجر مد ايدة كلها يرمي عليهم
صحتت عليه بصوت عالي
من سمعت صوت طلقة وكضيت بريك وكفت السيارة ونزلت منها
وهما عبرونة وراحو فتحت الباب وشفت ايد خنجر مجروحة
الحبتر.. لكك خنجررر بيكك شيي
حجة وهوا شوي متألم
خنجر.. لا مابية شي بس طلقة اتعدت من يم زندي مافاتت
ديسم.. الحمد الله عدت على خير
الحبتر.. خنجر شوف وجهك صار اصفر
ديسم.. حقة من الهبطة عبالة راح يموت وينام بحضن ابو ابريج بجهنم
خنجر... لا عبالي راح اموت وما اتشمت بيك من تموت كبلي
نزل ديسم وفتح الباب وصعد يم خنجر وخلة ايدة على تشيرتة باوعلة خنجر وخلة ايدة على ايدة ديسم
خنجر.. شتريد تسوي ولك
ديسم.. انزعك
رفع حواحبة بأندهاش
خنجر.. هاااا هاا سالمين بعد روحي شتنزعني
ديسم.. بلوزتك شبيك نيتك وصخة غير الف زندك
رفعة البلوزة ونزعها وانطاها الديسم شكها بالنص قطعة مسح بيها الدم والثانية لف بيها زندة
اشرلي خنجر واردف
خنجر.. يلا حبتر ارجع اصعد لا يضل بالك
رجعت صعدت بس عيني على خنجر كلساع اباوع الة من المراية بالي يمة
باوعت الديسم جر راس خنجر ونيمة على جتفة
ديسم.. نام يابعد رويحتي يبوو بسلمان العار ولا بيك
خنجر... احبك انه
ديسم.. وانه هم
خنجر.. اذا متت شتسوون
ديسم.. نركص غير
خنجر.. لاصدك شتسوون
كالها وباوع الي من المراية
الحبتر.. نموت وراك مانخيلك وحدك
سكتنة وديسم كلساع يبوس راس خنجر وخنجر حابس ضحتكة لأن ديسم مايظهر هذا الجانب من شخصيتة الة اذا واحد زعل عليه او اتأذة
دخلنة للبصرة الساعة بـ 3 بليل
باوعت الخنجر نايم نلقت نظري الديسم واردفت
الحبتر.. ديسم خنجر يروح ويانة للبيت
ديسم.. اي بس قبلها نروح الأي مستشفى تلف جرحة خاف يحتاج خياط
هزيت راسي واتوجهت للمستشفى ومن وصلنة كعدناه وضل يحجي علينة لأن جبناه
غلسنة عليه ودخلناه للمستشفى غصباً عليه خيطوها ولفوها الة وانطوه مسكن رحنة للبيت صفينة السيارة ونزلنة اتخصر ديسم وباوع للباب
ديسم.. هسة منو يفتح النة الباب؟
خنجر.. خابر الاحد بيهم هسة لو مخليني اروح البيتي
الحبتر.. اكل تبن بعد روحي
ديسم.. راح اتصل على امي
الحبتر.. لا ديسم دير بالك تتصل نكعدها من نومتها لا هيا ولا وحدة من البنات
ديسم.. جا شلون نبات بالشارع وبحضن خنجر
الحبتر.. لا انتَ اطفر وافتح الباب
ديسم. منو هوا؟
الحبتر.. انتَ شبيك
ديسم.. ليش تحسسني قرد انه؟
خنجر.. جا شبي القرد مو بشر
ديسم.. لا مو بشر
هز ايدة وغمانة وصعد الباب وطفر سمعنة صوت طيحتة ويسب بينة
خنجر.. هسة يدك الناقصة ومايفتح الباب
الحبتر.. يسويها الشمنوج
فتح الباب وهوا خازرنة
ديسم... تفف عليكم يا سرسرية يا شمانيج هذا ضنكم بية؟
خليت ايدي على جتفة واردفت
الحبتر.. لا تزعل دودو
التفتت على خنجر وابتسمت ابتسامتي الخاصة
خنجر.. خيررررر
بدون سابق انذار بحركة سريعة مني شلتة ضل يرفس بية وهوا ثكيل فتحنة باب الديوانية لأن وصيت لمعان اتخليه النة مفتوح ودخلناه شمرتة على التخم وصاح
خنجر... الله اكبر على راسك كسرتني ابن المكسور
ديسم.. شبيك هسة فوك ماشالك حتة انه ماشايلني
الحبتر.. سهلة اتمرض وانه اشيلك
خنجر.. شباب انه مامتعود على دلالكم كولو شتردون مني
ضحكت ديسم
ديسم.. حبيبي الغالي مانريد منك شي
اتمدد خنجر وانه بصفة وديسم بوسطتنة دار وجهة على خنجر وحضنة
خنجر.. الحبتر صيح على اخوك لا يسوي شغلات عيب ترا امي تخاف علية
ديسم.. انجب خوفتني بالحبتر يمة يمة رجفت
رفعت راسي الة
الحبتر.. يعني ماتخاف مني؟
ديسم.. كول زيزي
الحبتر.. زيزي
ديسم.. من ط*** اذا اخاف منك
ضحكنة وغيرت الموضوع
الحبتر.. جماعة سلمان رجعو يلعبون بذيلهم ولازم نسويلهم جرة اذن
ديسم.. النوب خاف هما يسوونة النة جرة؟
الحبتر.. وليش مستهان بينة؟
خنجر.. مو هيج قصد ديسم بس قصدة ان احنة عدنة نقاط ضعف يكدرون بأبسط شي يأذونة بيهم
ديسم.. بس الحد الان محد يعرف نقاط ضعفنة.
الحبتر.. يكدرون يعرفون اذا راقبونة
خنجر... بالنسبة الي ما عندي شي اخسرة وما اعتقد يهددوني بأمي او ابوي بس انتم
الحبتر... قصدك البنات؟
هز راسة
ديسم... حبتر اذا صدك ومسو شعراية من البنات ساعتها محد راح يفيدنة لا فلوس ولا شي
الحبتر.. جؤ سلمان مو بهاي القوة والشجاعة حتة يواجهنة بالبنات
خنجر.. الة اذا عندة ظهر قوي
الحبتر... خنجر عندك عرف واحد يتواصل وية سلمان؟
خنجر.. اي
طلع تلفونة ودخل على محادثة وية واحد اخذتة منة وشغلت بصمة وحجيت بيها
الحبتر ... تهديادتك هاي لفها وخليها بالغالي ماتخوفونة لا انتَ ولا جلابك سلمان لا تلعب بذيلك و لا تعم على روحك خلينة مخليك تمسلت براحتك سوايتك هاي واذية خنجر اطلعها من عيونك الخايسة مو اشتغلنة وياك مرة وحدة ولزكت النة هذا شغلنة
اليوم نشتغل وياك باجر وية غيرك شغلنة ومعروف و وارثينة عن ابوي الله يرحمة وانتَ تدري بيه كلش زين تمسلت لا تضل تمسلت وحجي زايد ناقص اسمعك حاجي اطلعك من جوة سابع كاع
سكتت ورسلتها للولد ووصاه خنجر يرسلها السلمان
بعدها نامو ديسم وخنجر وانه ماكدرت انام ضليت اتكلب ما اجاني نوم كمت طلعت من الديوانية ووكفت بوسط الحديقة
سمعت صوت اذان الفجر غمضت عيوني وخليت ايدي بجيوبي واتأمل الصوت
حسيت صوت خطوات على كيف عرفتها موج كعدت تصلي حسيت بيها اجت كبالي وكفت سوتلي بوو
فتحت عيوني وابتسمت الها حجت بخيبة
موج... يوو هلاك ليش مافزيتتت
الحبتر.. ترديني افزز يعني؟
هزت راسها
الحبتر.. ميخالف راح ارجع اغمض عيوني وانتِ فززيني
رجعت غمضت عيوني وهيا رجعت صاحت سويت روحي اتفاجئت
الحبتر... يمة راح اموت من الخوف
ضحكت وحضنتني
موج.. شوكت اجيت
الحبتر... قبل شوية وويانة خنجر
موج.. اهو شعدكم جايبينة
الحبتر.. شعليج بي ولج
موج.. يضوج يولي
الحبتر.. لا خطية خلي امواج تتونس بي
موج.. ها سالمين شنو تتونس بي لعبة هوا
الحبتر.. خلي يولي
رفعت راسها الي واردفت
موج.. منو فتح الباب الكم؟ ماما كالت خلي يولون السرسرية يباتون بالشارع
بستها براسها وحجيت
الحبتر... ديسم طفر وفتح الباب ولمعان مخليتلنة باب الديوانية مفتوح
انتبهت الها وجهة تعبان وجوة عيونها سواد
مررت اصبعي على خدها
الحبتر..شبيج تعبانة يابعد عافيتي
سكتت ماحجت
الحبتر.. موج بيج شي
موج... لا بس السكر ارتفع بس هسة زينة
الحبتر.. من عافيتي على عافيتج بديسم وبخنجر ولا بيج
ضحكت وكالت..اسم الله عليك...
بستها براسها وراحت تتوضة دخلت جوة لكيت امي تصلي كعدت اكبالها على ماتكمل
كملت صلاتها وكمت بستها براسها وكعدت يمها وهيا تسبح بالسبحة
الحبتر.. شلونك يمة
نجاة..بخير من اشوفكم انتَ واخوك صايرين اوادم
الحبتر..جا شنو هسة احنا مو اوادم؟
نجاة... تريد الصدك
الحبتر.. شي اكيد
هزت راسها بنفيي
نجاة.. لا مو اوادم
الحبتر.. تدرين اتخذنة قرار انا وديسم ان انتِ بعد مااطلعين من البيت لأن صايرة اطكين بالكاع شنو هالجمال هذا عمي احنا نخاف على عرضنة يعني بعد يومين يجون يخطبوج شنكللهم وين شفتو امنة؟
غطت وجها بالشيلة ودفعتني بأيدها
نجاة.. دكوم كوم يالسرسي يا المسربت مو سربتت كلبي
اخذت ايدها وبستها
الحبتر... اعز من النفس انتِ
نجاة... وانتَ اعز من ولدي
رجعت بست راسها وكمت الغرفتي سبحت وبدلت ونمت
••••••••••••••••••••••••••••
روح
مرت الايام واجة شهر رمضان بهاي الفترة التهيت ادور على معهد زين الترف وبطلعان الروح يلا لكيت صح بعيد عن الشقة بس تدبر....
كمت من الجرباية ورحت فتحت الكنتور طلعت صندوك ضامة بي الفلوس الي يدزها خالي هاشم ماينطيني قلبي اصرف منها اريد ارجعهن الة بس محتاجتهن الترف طلعت الصندوك ورحت كعدت على جربايتي طلعتهن وحسبتهن اخذت الي يكفيني ورجعت سديتة انفتح الباب ودخلت ترف
باوعتلي وعقدت حواجبها سدت الباب واجت يمي اردفت وهيا علامات السؤال على وجهة
ترف..هذن مو فلوس خالي هاشم؟
روح.. اي
ترف.. وليش ماخذة منهن؟
روح... للمعهد
ترف.. مو كلنة مانصرف منهن؟
شلت الصندو وكفت كبالها
روح.. وشتردين ترف منين نصرف؟ هاا ترا هذا ربع ربعع من حق امي مو عبالج هسة هوا متفضل علينة ويدزلنة كل راس شهر ترا حق امي اضعاف واضعاف وهسة هوا متونس بي هوا وعائلتة فلوس امي وحلالها ليش مانصرف منهم؟ وبعدين لنكول ما اخذت شترديني اخذ من عمو باسل؟ مو عيب علينة الرجال خو ما يضل يصرف علينة طول عمرة ابتلة بينة لو شنو زين منة ومكعدنة ابيتة يبقى رجال غريب علينة لو شتردين اخذ من علي لو من منو؟ راتبي شيكفي نصة انطيه للبيت تدرين بية ما اكعد عند احد اذا ما احلل لكمتنة
سكتت وراحت وكعدت على الچرباية وصفنت ماكدرت تحجي شي لأن كل كلمة من كلامي صح
ضميت الصندوك ورحت يمها بست خدها
روح.. بعد شوي بليل نروح نشتري ملابس للعيد
ابتسمت وحضنتني
ترغ.. احبج روح
روح.. رحم الله والديج
ترف.. اهوو اكلج احبج دكليلي رحم الله والديج يوللل مو هيج هيا
روح.. ميخالف انا هم احبج
كلبت عيونها بملل ورجعت حجيت
روح.. وانا من كد ما احبج اريد اجعص راسج واطكة بالحايط واجعص وجهج امردة مرد
ترف.. ادري اذا هاي التحبينة هيج تسوين البي الماتحبينة شتسويلة
روح.. اصبلة غدة
ضحكت وكمت ساعدت عمة بالفطور اجة على بالي اسوي دولمة انا مو كل هاي بالطبخ بس بعد طكت ابالي
طلعت المواد وكلت العمة
روح.. عمة راح اسوي دولمة
أمل.. بكيفج يمة بس مو تخربينها
روح.. لا ما اخربها شسالفة
طلعت عمة من المطبخ من كملت شغلها وانا سويتها وخليتها على النار ورحت صحت الترف جبتها من ايدها وكعدتها على الطاولة
ترف.. ها روح شتردين والله اذا طلع شي بايخ النوب اني اركع راسج بالحايط
رحت جبت خاشوكة وخليت بيها دولماية اريد اتضوكها لأن هيا عليها الشهرية ماصايمة قدمتها الها حجيت بأمر
روح... ضوكي
ترف.. منو مسويها
روح.. انا
كامت من مكانها وصاحت
ترف.. وابو الحسن ما اضوك شنو تردين اتجربين بية ابتليت من فطرت شنو فأر تجارب اني كلساع جايبيلي شي اذوكة لا والنوب انتِ طابختة خلاص اليوم بالستشفى اني
روح.. انجبي ترف مو الهل درجة
اتخصرت وكالت
ترف.. لكك تئبرني بدك الصح ولا ابن عموو؟
روح.. لا ابن خالو
ترف.. الهل درجة ونصص ما اريد ما اضوك
كالتها وخلت ايديها على حلكها ركضت للصالة وانا ركضت وراها لكيناهم كلهم كاعدين وحتة راغب لأن عازمينة حجة عمو باسل من شاف حالتنة
باسل... شبيجن بنياتي تتراكضن
حجت ترف وهيا تأشر علية وياريتها
ما حاجية لأن اجت تجفص
ترف.... هاي روح الفاهية جايبتلي دولمة حتة
سكتت من انتبهت شنو حجت ورجعت كالت
ترف.. شعليكم انتم؟
حجتها وطفرت للغرفة ضحكت بغباء وهما صافنين علينة
روح.. شبيكم؟
علي.. لا مابينة شي توكلي روحي شوفي اختج
اتجاهلتة ورحت ورة ترف للغرفة شفتها تخرمش بخدوتها شافتني وكالت
ترف... كون هسة انتفج اتنتف على هاي الفشلة كدام عمو وراغب
روح.. ياااا شكو انا انتِ جفصتي بعدين وعلي ما حاسبتة
ترف.. يا علي شو مااعرفة؟
سكتت لأن ترف من تتعارك وية احد تعاملة وكأنة ماموجود اتفطرنة وبدلنة وعلي وصلنة
قبل لا ننزلل كال
علي.... روح قبل الـ 11 انا يمكم
روح.. ان شاء الله
علي.. محتاجة شي؟
روح.. لا
كلتها ونزلنة انا وترف كضيت بأيدها ودخلنة للمول
اول مادخلنة رادت ترف تشتري قطعة كيك
روح.. روحي بسرعة وتعاي انتظرج هنا
هزت راسها وراحت مشيت شوية وانا اباوع للناس بدون لا انتبه اندعمت بشخص رفعت نظري الة وشفت....
ولا زالت الحكاية مستمرة
++ زهراتي ساعدني بنشر الرواية ♡♡
تصبحون على خير