#قناص_بغداد(مُهمة_وطن)
البارت التاسع
بـقلـم: زيــنب عــلي
حبايبي لا تنسون التصويت + متابعة الحساب zainab_ali1 + تعليق بين الفقرات ♥️
Instagram: zainab__.ali1
TikTok: zeinab_.ali1
كل ماشوف
عالم يمة اتنحس
ويسرع نبُض گلبي
وگوة اتنفَس
يضحك من اغار
وانا اشوف الموت
ولمن ازعل
يگُلي احنا اصدقاء وبَس !
ᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐᚐ
الـجـازي…
عفته ونزلت على السريع شفت خالي وأمي وصياد موگفين گبالي صحت بصوت مهضوم
-الـجـازي: يمه
وركضت ليهم ابچي بصوت عالي حضني خالي وطبطب عليه حضنته حيل وروحي سكنت شكثر ماحجي عنه قليل عاف الدنيا وكلشي علمودنا حب رأسي
-خـزعـل: ونعم من بت النشمي لا تبچين ورفعي رأسچ بويه بتري الايد النجسه الرادت تنمد عليچ الدافعت عن شرفها احطها عگال على رأسي فخور بيچ أنتِ فخر لكل عراقي
جراني صياد من خالي حضني حيل ويحچي
-صـيـاد: ولچ خاف چنت امشي بين الناس رافع الهامة بخوتچ هسه احسن ركبتي راح تطگ من ورا بطولتچ هاي
شبكته حيل انحب حسيت أمي شبكتنا ثنينا
-كـحِيلـة: الفخر أنتِ يمه فخر رفعتي رأسي دافعتي على روحچ وما خليتي نجس محتل يسلب حرمتچ
شبكتها حيل
-الـجـازي: يمه گليتلچ لا يروح عاشور لا يمشي بس يمشي يصير ويانا علم اسود يمه خلافه ردت انعدم شوفي شصار بحالي
هيست بيد نحطت على ظهري وبسرعة نزلها وگال
- لا تخافين اني موجود
عاين بعيوني مباشرة ورجع كمل وهو يعاين الامي
- مدام كحِيلة هاي بنتچ صاغ سليم رجعتها الچ والأمانة مثل ما هي
تسالم ويا خالي وكله
- أستاذ خزعل يشهد الله أن بتكم مثل ما هي والنا حچي بعدين وياك عندي طلب منك
-خـزعـل: مايصير خاطرك الا طيب أن شاء لله ماقصرت أبني كفيت وفيت
- لا تگول هيچ الجازي بت بلدي ومايلزمها نكس
تشكروا منه بعد حجي هواي ردت اصعد بسيارة هو
على اساس يريد يعبر همس باذني
- دم الغزال انتظريني راجعلچ
گالها بساع وعبرني خطف گبل ايَت بالي صورة عاشور وهو يعاينلي بكل حب وحنية
صعدت والدرب كله أمي تسأل عني وأنا بغير عالم بين العسكري الرايح يدافع عن وطنه وگلي انتظريني وبين دم الغزال وكال انتظريني دخلت بمتاهات صعبة ماعَرف أنا وين وشني مشاعري وتفكيري ماعرف، صرت بمتاهة وضاع
تفكيري وگلبي ومشاعري حب، إعجاب، أخوة، أمان
وبين فوضه المشاعر تاهت الجازي
وتيهت هواي ناس بمتاهتي وماچنت أعرف نهايتها راح تكلفي صحة أمي هيست بصوتها تحچي وياي
-كـحِيلـة: ارتاحي يمه عاشور ماراح نگله الصار أدري يتسودن ويسويله سالفة هو من عدنا يخاف عليچ مو نوب امريكان مانگله واصلا محد يعرف بس أول يوم من صارت الجيران عرفت وانوب من ايانه الولد الجتني عده گنالهم لگيناها جاعده بالسطح ومغمى عليها ماطالعة من البيت ونلمت السالفة
من جابت اسمه فزيت وعيوني نملت دموع شعور بداخلي بالذنب فضيع تجاه عاشور حسيت دموعي وگلت
-الـجـازي: شنهي يمه انلمت السالفة چا انه شسويت رديتلچ مثل مارحت
-كـحِيلـة: انه امچ يالجازي اعَرف بيچ طاهرة ومن تحچين شي كلنا نصدگه لچن الناس الها الظاهر ومحد يصدگ بيچ يو حچيتي الصار وبالنهاية أنتِ تتألمين من الكلام الماله معنى السان الناس مايرحم وعاشور يتهور
-الـجـازي: اي لاتگولين اله هاي هي يمه هو ماش حايَه صحلت نسد السالفة
دروت ويهي منها رديت الهوسة افكاري ليما وصلنا البيت نزلتني أمي گايدتني وانه حيلي خاوي شافتنا وحده من الجيران ضلت موجفه بالباب تعاين صاحت على أمي
- لج عيني دادة أم صياد خير شبيها الجازي
ضمتني أمي وراها وردت عليها
-كـحِيلـة: مامش شي شويه تعيبانة عدها هبوط بالضغط
- الله يساعدها ليش هو من قصف البارحة منو مصار عنده هبوط
-كـحِيلـة: شنسوي الله كريم
عافتها أمي ومشتني دششتني للبيت استقبلوني ومحد حسسني بشي وضلوا محاوطنيني
بيومها طلعت سُمانه لابده فوك الفراش محد يدري شلون صاعدة ولابده
-سُـمانه: الجازي تعرفين عاشور يجي بعد يومين اشتاقيتله
-الـجـازي: صكد ياهو گال
-سُـمانه: هو حاچي البابا قبل لا يروح
صفنت محتارة افرح مافرح من يجي شكله اخذني أمي وفاتن حتى اسبح وارتاح وانام مرت يومين محد جاب طاري للموضوع مايحچون بي وچنه ماصاير أبد حتى الجهال محد بيهم يحچي بي وصياد يدش ويطلع يحبحب برأسي ويگلي أختي الفخر
جاعده وحدي بالهول عصريات المفروض اليوم ينزل عاشور سُمانه كل شواي تروح تعاين وتگول بعده ما اهيس إلا ونرفس الباب عرفته هو مايدك الباب أبد يرفس الباب رفس حتى باب الشارع
طلع صياد يركض
وما سمعت بس حس ضحچته وصياد يحچي
-صـيـاد: هاذ (هذا) ياهو ولك شنهي ماعرفتك صاير فد شي لايكه عليك العسكرية بعد اخوك
وهو يگله
-عـاشور: اخخخ ولك شگونا شگ بالتدريب الليل مانامنه
بس سمعت حسه عيوني غورگت وبچيت شعوري بالذنب هيست جاي اتَعذب اكثر إنسان حماني ووكف وياي هو جان يسهر على مرضي وما ياكل اذا ما يشوفني أكل وتقبل كلشي من عندي شيخني على أمي وخواني وحتى على أهله صار محد يگلي على عينچ حاجب من ورا
دش وهو يضحك ويحچي
-عـاشور: بعد روحي الكم وحشة بدونكم تايهه وابو الحسنين
رفعت عيوني عاينت عليه وشفته چنه مبدلينه موش عاشور الاعرفنه بنية جسمه كبرانه أكثر ولابس بدي عسكري والبنطرون هم عسكري وجنطته على ظهره وطالع مختلف تمامًا وزايد سمار وهذا الشي زاد من حدة ملامحة اليگول موش 3 شهور الراح بيهن جنهن سنين اول ماطاحت عيونه عليه صاح
-عـاشور: هلا هلا بعزيزة عيوني هلا بالجازي كلشي ماله طعم عگب عيونچ خايبه
خليت ايدي على ويهي وثغبت حيل گرب وحس دموعي
-عـاشور: لاتبچين يانظر عيني هذا انه كلشي مابيه بعد روحي بس ناگصني سم الحسن من اديتچ واگعد وزن
ضحجت علي وغميته احچي
-الـجـازي: امداك بعد لا تغيب هالكثر
-عـاشور: ههههه ايّ هسه صرتي الجازي گبل شواي موش الجازي
طلعت أمي بس شافته نشغت وشبكته حيل وتشم بي وتبچي
-كـحِيلـة: يمه وليدي گلبي خلص على شوفتك يابعد عيني ولَك والله بدونك أضيع وتسولف سالفتي يمه تچايتي والله ما فد يوم رحت وما صار الرجيف بروحي
شبكها وحب أيديها ورأسها
-عـاشور: ما عاش الي يدخل الخوف بگلبچ نياط گلبي عميمتي
طلعت النعاس بعيونها وتحچي
-فـاتـن: فدوه الگلبك لك يوم اشتاقيتلك يعمر امك أخ يابعد گلبي متغير وحليان إبني فدوة الروحك امي
حب ايديها وراسها وشبكها
-عـاشور: يمه حبيبببتي يمه بعد روحي أنتِ گلبي راح على سوالفچ الترفه البغداديه هاي
وگرص حنجها، ضحجت ودزت چتافه
-فـاتـن: ولَك بطل سوالفك الحلوة
وطلعوا خوانه سلموا علي وخالي هم واخيرا ودش سبح وطلع وصبينا غداء رحت جعدت يمه جان حاط ايده على رجله شالها وحطيت عكسي
ضحج وعاين عليه اجت عيونه بعيوني اجت ابالي نظرات DWN وعيوني نملت دموع عگد حاجبه وكال متسأل
-عـاشور: شمَالچ
تداركت سالفة وكليتله ببتسامة
-الـجـازي: بخلافك مامش سند اتوجه عليه
-عـاشور: سند وعون وسيف دركه لحد للوحة نياط گلبي
بديت اجل ويا وايدي زرفت زره بس شسوي متعوده واذا ارخي ايدي يرجعها ويگلي
-عـاشور: ردي ايدينچ ما اهيس بطعم الاجل اذا موش ايدينچ على رجلي
كضينا الغدا ورحت ركض سويت چاي وصبيته وزعتلهم وصلت يمه ضحجت وگلت
-الـجـازي: هاك سم الحسن
-عـاشور: بالحسين مثل سم الحسن مالتچ ما ضگت اطيب منه هو محروك ومعطب بس تعودت عليه وحبيته
جعدت گباله اعاين عليه وهو بي طبع يضرب اي شي يريد يشربه بالگاع على طبله يعني المكان الي يشيل منه الماي الچاي اي شي يضربه ويشيله
انتبهت عليه من ضرب ايَه بالي DWN شكثر يشرب چاي تذكرت أحد المواغف من چنت يمه سألني
- تحبين الچاي ست الجازي
ويا چلمته ايَه بالي عاشور وسم الحسن بتسمت
- هاا ضحكچ غزيل
-الـجـازي: يبوي يا ضيم الولاني وماولى أحد ضحجت على شغلة شلك غرض أنتَ
ضحك ورجع گال
- هسه تردين چاي
-الـجـازي: لا ما حبنه
- ماعندچ ذوق
-الـجـازي: خليت الذوق الك گبر
- صار عندي ذوق من شفتچ
گالها ورفع عيونه عليه وبتسم
-الـجـازي: گبر كون
وعيت من افكاري على عاشور وهو يگول
-عـاشور: يتهنه الماخذ بالچ
-الـجـازي: شلون افهمنك جاي افكر اكومن اسويلي ثريد بانيه (بامية) وعليه تمن
-عـاشور: خايبه هستونه شلنا الاجل شني معدة جوراب
ضليت اسولف وداهر بي لچن گلبي نار ليما صعد يرتاح وينام
وهيج مشت الايام مابين الي مانسيته أبد مدري ليش وبين عاشور الي جان بوكت الناس حسره عليها الفلس يجيب شكو عنده فلوس ويشمىهن بحضني ووياهن أشكال والوان ويجيب قماش الامي تخيط الي انا وسُمانه احسن هدوم بوقت الي ناس ماعدها تاكل ماشتهيت شي وما جابه بنفس اليوم حتى صياد مايگدر يحجي وياي وجان يگول دوم
-عـاشور: محد اله علاقه بالجازي طول ماهي تحت جناحي
ما چنت اعرف قيمة حجايته وشنو يصير بيه وبدونها !
𔓕𔓕𔓕
هـاشـم…
رديت من النجف للبيت وشفته هم جاعد غريب اطوار الى درجة جاعد وبيده ستكان جاي وجكارته وضال بس بالفانيلة والبنطرون العسكري الأمريكي
-هـاشـم: شنهي كل ماجيتك مطلع عضلاتك جا بس انت عندك عضلات
ضحك وگال
- هلا هاشم الَك وحشه
-هـاشـم: وين چنت غايب هذيج الفترة المضت وين بيا جوله حسبالي خلصت منك
گال وهو يمسح بالكاميرا
- اكو غزاله جنت حاميها ورجعتها الاهلها فترو وارجع اخذها اخخخ
-هـاشـم: شنهي غزال يعني حيوان لو جاي تَتغزل عود
- هي تصرفاتها العنيفة تصرفات حيوان بس شكلها غزاله تحيرك متعرف ويا منو تنحسب والياصنف جامحة
-هـاشـم: حلو الحب بس لاتفاركها ماتعرف يمتى ياخذونك غدر بيها
گام يصب چاي غير الخلص گال وهو مطيني ظهره
- أنا اليم چلمة أبوي شيوخ تدنه
ياهو يجيس دم الغزال وخشمي يشم الهواء لاتخاف عليها بين الهدب والعين
-هـاشـم: الله يتمم على خير انت وغزالك لچن بروح اهلك الطيبين ماتخبرني شنهي سالفتك
- قريب جدًا راح أفهمك شغلي وليش اني ويا الأمريكان وساعتها اريدك تطش الخبر طش ماتخلي وأحد ماتحچيله
-هـاشـم: اناطر شعدنه شو لا گلب اليخاف ولا عزيز الينشد
أبتسم بجانبية وشرب گلاص الچاي بشربه وحده
- هاشم وين اهلك وليش عايش هنا وكل ما اشوفك تردد اروح يم المزن الله يرحمها شنو الموضوع
-هـاشـم: جا ليش گتلك لا گلب اليخاف انه ماعندي گلب يخاف عليّ ولا عندي أب وأم ينشدون رغم عايشين وشيوخ وأسمهم سابگهم بالسلف وعندي عمام ثنين وثنينهم مايردوني الأول من أخذ بغدادية ومتبري منه والثاني يشوفوني محسوب على أبوي الي هناك وهم واحد متبري من الآخر الخوان اعداء وماعندي أحد غير المزن هي الوحيدة الي حبتني محد يحبني ويريديني غيرها ومن شافوها حبتني چتلوها وجتالينها اهلي وماضلي من الدنيا شي غير كبر وجم يوم اعيشه لجل عينها واحلامها
صفن عليه بعدها گال
- قصتك حزينة بس ما معقوله ماكو احد يحبك لعد اني شنو مو هالگاعد يمك وحاسبك مثل أخوي وأكثر
-هـاشـم: بعد روحي أستاذ فدائي أصلا مونسني صح اجيك يوم واروح يومين بس هم تونسني بهل يوم الاجي بيهن
دار ويهة مني ونام وانه هم نمت شويه ماكدرت اضل نايم من الكوابيس الاشوفنها گمت سبحت وعدلت روحي وجنطتي هيست بصوته يحچي
- وين رايح
-هـاشـم: راد للنجف
- صاير العقلك شي الطرق كلها راح تنسد وضع النجف موزين كلش راح تعلگ بين الاحتلال وانصار الصدر
-هـاشـم: خلها تعلك شلي غرض المهم ماعوفنها وحدها بالهيمة
- دسمع مني وأجل روحتك كم يوم على ماتهدأ الاوضاع جاي تشوف بعينك الناصرية والكوت وسامراء والنجف من غير الفلوجة صايرة بحر هائج راح تصير معارك طاحنة اگعد بمكانك واسكت
-هـاشـم: هي الموته وحده يو ثنين على الأقل اموتن يمها
شگد حچه صاح وراي ماسمعت منه خذيت غراضي وطلعت بيومها چان الدرب مفتوح بس بصعوبة الواحد يدخل بألف ياعلي يلا وصلت ضليت أسبوع كامل هناك اخافن ارد وينسد الدرب وصگد يصير غصف بالنجف شلون اهدها وحدها وهي تخاف ..
𔓕𔓕𔓕
الـجـازي…
اليوم راح يرد عاشور يلتحق من بعد أيام قليلة ما لحگنا نعيشها با أمان چنت يوميه أنام مرتاحة ومن اصحي اشوفنه جاعد يم رأسي اتذكر أحد المواقف
فزيت من نومي اريدن اشرب ماي حاطة ربطتي على رأسي اعرف بي يدش للغرفة يجعد دائما عد رأسي
وكالعادة شفته جاعد عد رأسي ومتجي ايده على ساعده
-الـجـازي: اسم الله الرحمن شمَالك ردت تموتني هو هيچ خايب اخترعت
-عـاشور: آسف لچن أخافن عليچ اضل حذاج احسن
-الـجـازي: چا أنتَ من تلتحق موش تعوفني
-عـاشور: اسلمچ بامانة موسىٰ إبن جعفر وداحي الباب ما اخافن عليچ وانه هناك
-الـجـازي: شمَالك عاشور لا اتعلگ بيه هاكثر موش الصالحك وابو الحسنين
-عـاشور: موش بيدي أعز من روحي علي وراضي بيچ حتى لو جرح ينزف واطلبها من ابو الحسنين ما تصيرين أنتِ جرحي
-الـجـازي: أنتَ أخوي وعضيدي لاتفكر غير شي
اعاين عليه ملامحة احتدت وگام بساع وگال
-عـاشور: بيوم التصيرين الغيري مالچ احد اسمه عاشور وعمتي ما تسويها اصلًا
-الـجـازي: انه لا الَك ولا الغيرك انه للثأر لچن ماتلوي ذراعي بـ أمي
گال يتوعدلي
-عـاشور: نشوف
راح شواي و رد جابلي ماي صب الي
ردت اخذه منه واشرب مارضه
-عـاشور: لاتعبين روحچ عزيزة عيوني انه اشربنچ بيدي
شربت منه وعيني عليه اشوفنه شلون يعاين عليّ بكل حب نظراته خنجر يزرف گلبي
عدل مخدتي وطبطب عليها
-عـاشور: نامي
تمددت وعيني علي عدل غطاي ومسح على راسي يحچي بحنية
-عـاشور: نامي عساها عافية يابعد روحي وعافني وگام
وبدت دوامه التفكير والذنب يفترون عليه ثاني يوم راح ورديت ودعته وگلبي مثل الجمر عليه عاشور اخوي وابوي وكلشي بالنسبة الي غير الي بباله واليريده
من لعدها ردنا انروح للنجف أمي تلوب صارلها اربع شهور مارايحة لچن خالي مارضه
𔓕𔓕𔓕
يوم ٤/نسيان/ ٢٠٠٤
هـاشـم…
من مدة واوضاع النجف ما مستغره كل يوم اشتباكات وغصف يشتد بعد غلق صحيفة الحوزة الأسبوعية اندلعت تظاهرات حاشدة ببغداد والنجف من انصار الصدر يطالبون قوات الاحتلال باعادة فتح الصحيفة واخراج المعتقلين الا ان واجهت هذا التظاهرات السلمية باطلاق الرصاص الحي
من بعدها طلعت انصار الصدر الي بالنجف وصارت بينهم وبين قوات الإحتلال اشتباكات بالأسلحة
اكثر من 3 شهور وانه على هالحال احتاريت وين اروحن شفتلي رجال دفان بيته بنص المقبرة انطي فلوس وهو يأمن الاجل والشرب والحمام يمه بس بعدها ارد يمها وخاصة بالليل مستحيل اعوفنها ادري بيها تخاف من صوت القصف
وبيوم صارت اشباكات عنيفة بين جيش المهدي وقوات الاحتلال المشتركة بيومها غصفوا غصف مو طبيعي
وكلها بدت حواليني العالم تتراكض واصلا المقبرة بهذيچ الفترة كلش مابيها ناس ذاك من ذاك ونوبات بعض القبور ينزلن عليها ويتفلشن تقريت يم گبرها وحضنته
-هـاشـم: اتمنى أموت هنا وانه بحضن گبرچ طير السعد
بدأ يشتد القصف والرمي والكل طلع شارد ضليت حاضن گبرها واسمع صريخ العالم وحتى الأمريكان صاروا يسوون ببعض المرات انزال واحتشدوا كلهم ببحر النجف هيست الغصف صار يمي كلش حضنت گبرها ورددت الشهادة
-هـاشـم: اشهد الا اله الا الله واشهد أن محمد رسول الله واشهد أن علي ولي الله
وبعده الغصف بده يصير قريب مني بس ما كمت ولا خفت ولا تراجعت كل الي اريده اضلن يمها أحس روحي مشتاقتلها كلش
-هـاشـم: المزن ندعيلي يم ربچ الحگنچ بـ أسرع وكت وين الله وابو الحسنين وطلقة طيح بيه وندفن يم گبرچ بعد رويحتي
حضنت گبرها واحبحب بالقطعه مالتها
ايَه رجال من وراي صاح
- گوم راح تموت دگوم يا ابني جاي يتقربون أكثر
-هـاشـم: حجي هي موته وحدة أموت يم گبرها ولا بعيد عنها روح حجي الله يحفظك
هز ايده وگال
- لا إله إلا الله الحمد لله والشكر على نعمة العقل
راح يركض وضل القصف ورمي فتره وانه حاضن گبرها واسولف وياها وحاط رأسي على المرمر مالتها
-هـاشـم: شكل عذابي مطول ومراح أموت واخلص من عذابي
ضليت يمها وصار اليل والنجف موحوشه صارت وخالية من الناس
استمر هالحال تقريب الشهر بعدها هدأت الأوضاع الحدما قررت قوات الإحتلال يوم ٢٧/ أيار من السنه نفسها ايقاف عملياتها بالنجف بعد عقد هدنة بواسطة مرجع النجف الاعلى وجيش المهدي على انسحاب القوات الأمريكية وتسليم الملف الامني للشرطة المحلية فقط لا غير
ضل الوضع متذبذب وقصف بين مدة ومدة والامريكان صارت تقصف الفنادق وحتى الصحن الشريف وحاوطوا صحن الإمام علي علية السلام ومحاصرة مقاتلي جيش المهدي داخل الصحن
بفترة تواجد الأمريكان بمدينة النجف القديمة وكثرت النفايات في محيط الحصن الشريف اعتبر المرجع الاعلى بالنجف هذا الفعل لا يجوز وأصدر بيان على المسلمين صباح يوم الجمعة التوجه لزيارة أمير المؤمنين في عموم العراق
وفعلًا يوم الجمعة احتشدت الناس في صحن الإمام علي إبن أبي طالب عليه السلام للزيارة من بعدها خرج مقاتلي المقاومة مختلطة مع الناس
وهيچ انتهت الحرب وانسحبت قوات الإحتلال من النجف ومن حول الصحن الشريف ....
𔓕𔓕𔓕
الـجـازي…
اليوم نزل عاشور من التدريب واعصابه تعبانه بسبب التدريبات الصعبة لأن الوضع صار أصعب والتدريب صار أشد بس جان يعرف يفرق بين شغله والبيت
بليلة ظلمة ندك الباب راح عاشور يفتحة وسمعت صوت هاشم وعاشور يرحب بي
-عـاشور: هلا بيك الف دش دش البيت بيتك أبوي وعمتي حيل راح يفرحون بجيتك
طب هاشم مجرد ما شفته اجت عيوون المزن بوجهي نزلت دموعي ورحت ليه
-الـجـازي: هلا بيك هلا بريحة أختي
أمي من سمعت اسمه اجت تركض وشبكته حيل وتحبحب بوجهه
-كـحِيلـة: هلا هلا بالبگه من بنيتي وريحتها هلا يابعد عمتك ليش هيچ گطعت بيه وما تجي يمي يمه والله گلبي ميت عليك لاتگطع بيه أنتَ الوصية الوحيدة الظلت البتي ظل يم صياد وعاشور يمه
باس أيدها واحسه متقيد
-هـاشـم: حبيبتي عمه شلونج خليني عمه هيچ مرتاح
خالي هم شبكه وسلم عليه ومن بعد سلام گعدوا وصبيت له اچل وجبته يمه جانت عصاري
-خـزعـل: يا وليدي ليش ما تجي هين تجعد حذانه وأنتَ وليدنا موش غريب وتجعد يم صياد وعاشور بدال ما نعرف اراضيك وين بهالوضعيه يا بويه
-هـاشـم: تطمن عمي انه زوين والحمدلله مستوره ومشكور بيتك العامر
-فـاتـن: يوم قابل أنتَ غريب وداتحجي هيچ لك داده انت مثلك مثل صياد وعاشور
-هـاشـم: رحم الله والديچ عمه انه هيچ مرتاح
تركوا ما ضغطوا عليه شواي وصوت سياره وگف بالباب وصوت امريكان وندك الباب حيل
طلعوا صياد وعاشور وهاشم وخالي يركضون
مدري شنهي يحجون بس عاشور جان يفهم ويرد عليهم اعاين ملامحة حدت وضرب الجندي بنص وجهه گبل هاشم طلع يركض وهما رادوا ياخذونه بس ماگدروا خالي وصياد گبالهم ونخبصنا أمي وفاتن يبچون طلعنا بشارع
مدري شني حجه ويا الجندي ودار عليّ ورجع ضربه من قوة الضربه طاح وبعد ماتحرك تفل علي يحچي ويأشر على حلكه با اشره اسكت
ما نشوف غير رفع الجندي سلاحة بويهه عاشور وهو تگرب منه وصارت فوهه لسلاح على مكان كلبه صاح بي
-عـاشور: تخسي اركع النجس مثلك لا أنتَ ولا عشرة منك
دفع الجندي حيل هما جانوا جنود ٢ وظل يضرب بالاول والثاني يحاول يجي بس صياد لازمه
صرنا انتصارخ والشارع صار هوسة ايَه هاشم يركض كض عاشور ورا شفته لمحت شخص رفعت ريولي اعاين من ورا أمي !!
اي هو نفسه هو DWN جان لابس تشيرت صحراوي التشيرت العسكري الامريكي والبنطرون الأمريكي ايَه وبيده كامرته وسلاحك أول ما سمعت صوته هيست گلبي صار يدگ حيل
وخر عاشور من الجندي وگاله بثقة
- هدي ما صار شي ممكن أفهم السبب
نتر عاشور ايده ودفعه حيل وصاح
-عـاشور: النجس لا تمسني وسفه على العاف گاعه وباع روحةة للغريب
- حقك بس ياريت تفهمني حتى اگدر احلها غير هيچ راح تروح أنتَ واهلك بالرجلين
-عـاشور: هذا الخايس يگول أن عدكم بنية قاتله جندي أمريكي !
عگد حواجبه بينت شراين گصته وعاين على عاشور بـ استغراب گله
- دم الغزال ؟
عاشور صارت ملامحة عباره عن استفهام
-عـاشور: دم الغزال شني !
دار DWN على الجندي وطلع اله مثل الباج وگال جملة
-It's my wife and I've spoken to the commander(انها زوجتي ولقد تحدث مع القائد )
ما هيست غير جره عاشور وضربه بكل قوته بنص وجهه وصاح وصار فوگه
-عـاشور: الخايس مرت منو
حاولوا يكومونه منه بالكوه
-عـاشور: مرت منو الخايس من يمتي بت عمتي مرتك انحرك على القبله ومايعرف مني جفن ومحمد
نكت نفسه وباوع العاشور وگال ببرود
- ههه الخاطر هاشم راح اسكت بس راجعلك وياك حسابي ثكيل
رد عاشور كضه من هدومه وصيح صاير نار كبره وهذا DWN بارد وبس يگول
- اهدأ ونزل ايدك ماريدك تتأذه
طاح عليه عاشور وضربه لكمة قوية ماهيسنا لا داون رجع الطكه العاشور ضغفها شمره للگاع گبل اتدخل خالي وحلها بالف ياعلي صياحهم يمكن جعد المنطغة كلها وأمي تصرخ وفاتن صارت كض اخوك لا يتيه آخر شي داون اخذ الأمريكان ومشى راحوا ورا هاشم وصياد
خالي دشش عاشور للبيت گوه
دش وهو يرعد بحس عالي
-عـاشور: هسه افتهم شني هذا الخريط السمعته الجازي اكو جندي أمريكي يعتدي عليها وكاتلته وانه ما اعَرف !
-خـزعـل: لچن يا بويه موش هيچ تروح تضرب الزلمة وهو ساعدنه
-عـاشور: يا محمد اگله هيج يرد يگلي الزلمة يازلمة بويه اليگول على الجازي حرمتي تفهم شني يعني يگولون على الجازي حرمتي گبالي بويه گبال عاشور يگولون الجازي حرمته تفهم يو لاله
ايَه تگرب يمي على گد ما حنين بس اظل اخافن منه من يصير عصبي لچن تمالكت روحي وظليت موجفه عدل اعاين عليه
-عـاشور: تحچي گولي شصار بينچ وبين هذا على ايَّ أساس يگول مرتي على ايَّ أساس
گلت بصوت يرجف
-الـجـازي: وأبو الحسنين ما صاير شي ولا حچيت ولا صار شي بس ظليت يمه ثلاث أيام والعباس ما صار شي عاشور بس على كيفك
-عـاشور: شلون تضمين عليه
عتني من ايدي حيل وصاح صرت اهيس ريولي ما تحملني
-عـاشور: خنست ام السان يمي تخنس من اسالها بس من كعدتي ويا ثلاث أيام عادي !
عاينت عليه ودموعي هلن
-الـجـازي: چا شني تشك بيه عاشور انه الجازي عزيزة عيونك موش أنتَ تعرف ماتطلع مني العيبة
نتر أيدي وصاح
-عـاشور: چيف انه اعَرفنچ اعرف الجازي بت النشمي وكحِيلة ماتطلع منها الشينه لان اعرفچ اشرف من الشرف احطچ بنص الزلم وانه متطمن محد ياخذ منچ شعره وحده أعرف عزيزة عيوني ماتطلع منها العيبة لچن ليش گال مرتي ولج الجازي أنتِ الييي منو هو ويگول مرتي !
-الـجـازي: انه موش الأحد
صاح
-عـاشور: لا تطلعين من السالفة وگليلي هذا ليششش گال عليچ مرتيييي
-الـجـازي: ماعَرف عاشور ماعَرف ليش هيچ گال شعرفني انه
كلهم موجفين امي وخالي وفاتن محد يگدر يتدخل لان عاشور من عصبيته يرجف وصار ويهه أحمر نزل يمي لان جعدت بالگاع وصوته مثل الفاقد
-عـاشور: تمام خوش خوش هو نغذچ من الأمريكان ليش گال مرتي يگدر يگول أختي گرابتي صخام بشيبي وشيب الخلفوني مرته الجازي مرته !
حچيت احاول افهمنه راد يفغد من العصبية
-الـجـازي: لا لا والله مالي شغل بي والله هو هيچ حجى انه ياهو مالتي
رد يحچي وياي بعصبيه وصوت أول مره اشوفن عاشور يحچي هيچ
-عـاشور: الجازي ثلاث أيام يمه ولچ خطف ماخلي ولد يلمحچ ولچ أبوي أبوي ماحب يباوعلچ ثلاث أيام تالي تضلين يم واحد أمريكي بايع گاعه ولكم شلون هيچ صارررر
صاح بنهاية الجملة بصوت عالي ومحد يحچي لان يرعد
ويا صيحته دشوا هاشم وصياد تگرب صياد وصاح بي
-صـيـاد: اهدأ اهدأ شمَالك عاين الروحك گمت تريف هو گال هيچ يدافع عنها حتى يروحون
-عـاشور: ليش گال مرتي ليش مو أختي ليششش شمعني
-صـيـاد: شني أخته هناك عدهم الاخت سن ١٨ تعفط الاهلها من غير يمكن يسوون تحاليل تثبت هي موش اخته گال هيچ لأن مرته بالقانون لازم هي ويا رجلها شبيك الزلمة اصلًا ما شفناه بعد وأول ما خذاها ايَه الخالي وأمي وحچه وياهم اهدأ شبيك رعدت علينا بدون ماتفهم السالفة
تگرب هاشم صاح بعاشور
-هـاشـم: شمَالك طجيته الزلمة هو حجه هيج حتى ينغذها شمَالك تسودنت
-عـاشور: ها هساع كلها تلوم بيه كلها تدافع الهذاك النجس محد بيكم حاس بنار گلبي
الجازي ثلاث أيام مو بالبيت ويم رجال غريب وعادي هاااا
تگرب يم هاشم وصاح
-عـاشور: المزن ويم غريب ساعتها شسوي ها !
سكت هاشم بعدها گال بصوت خافت
-هـاشـم: حگك لچن مو هيچ الولد سوه خير
-عـاشور: هين هين چذبتكم الجاي طمطمونها أعرفها وادفعكم ثمنها غالي
دار عليً وعاط
-عـاشور: وأنتِ كعدي وراجعي نفسچ عدل ومن ارد تنگين كلشي صار بهاي الثلاث أيام بالحرف الواحد لا وروح الما رتاح بكبره اذبح هذا الخايس واحنيچ بدمه ومايرف الي جفن
هدنا وطلع طلعوا الولد ورا واسمعنه يصيح
-عـاشور: لحدد يلحگنييي
حطيت ايدي على ويهي وصرت ابچي حيل رديت عاينت عليهم كلهم ساكتين صحت
-الـجـازي: يو عاشور صار بي شي أنتم السبب أنتم موش واحد ثاني
تنهدت أمي وگالت
-كـحِيلـة: على كيفچ ويا ولا تأذينه بالكلام يمه
هزيت ايدي وعفتهم وطلعت من الهول شواي ودشوا كلهم ناموا طلعت اناطره بالحديقة محد يعرف بضيم گلبي
فكره توديني والف تردني انتبهت سحبة خيط الباب دش بيده علاجه وايَه حطها بحظني شفتها بيها من السما وجايبلي كلاده وتراچي وطباقيات مال شعر يعرف شكثر احبن هيچ اشياء نزلت دموعي هالفترة هواي ابچي من گد الضغط العايشه بي والتفكير ولا انه دموعي عزيزة مايطلعن بسهولة لچن موش بيده جعد بصفي وشعل جگارته
-عـاشور: ما اشكن بيچ بگد بشعره أنتِ بت النشمي وتربية عاشور وكحِيلة ماتطلع منچ الشينه
وماتكسرين ركبه خزعل و كحِيلة لچن حچايه مرتي هضمتني هيست نار و وجت بين ضلعوعي سنين الحچايه هاي مخليها سر يسكن افادي تالي يجي واحد مدري شنهي ما شنهي يگول على الجازي حگ عاشور مرتي هضمتني الحجايه هضمتني حيل
حسيت دموعه النازله وحسيت دموعي وگلت
-الـجـازي: ليش تحركني وتحرك روحك بهالفكرة شيلها وطلعها من بالك انه موش حگ احد انه حگ ثار أهلي وبس لا الك ولا الغيرك فدوه اغديلك عاشور أموت على حزنك الف موته أعز من روحي اعزك لا تالمني بيك
-عـاشور: صعبه الروح تطلع من الجسد الجازي صعب حيل تقبليني وحبيني حبيتچ بكل حيلي استاهل تحبيني
تموعي تهمل وانه اعاين عليه حسهن وگال
-عـاشور: شنهي الصار حجيلي
صرت احجيله كلشي صار بدون ما اذكر من شفته بس بالفانيله ودم الغزال وهاي الأمور لان بعدمني بمچاني
-الـجـازي: وبس هيج السالفه
-عـاشور: عندي ثقه بحجيج وما ادور وراچ لاتخيبين ضني بيوم عزيزة عيوني
-الـجـازي: أنتَ عزيز عيوني وأعز من اخوي
عض شفته وهز رأسه بـ آسف
-عـاشور: ما يوم يَيتج وطفيتي ناري
دشي بعد عيني دشي نامي ورتاحي هبطتچ اليوم بس گبل لا تنامين اريدن كلاص سم الحسن يردلي العافية تبسمت وگمت سويتله جاي وجبته اله
-الـجـازي: هاك سم الحسن
-عـاشور: عافية منچ عزيزتي
ضحكت اله ودشيت رحت نمت وهو للصبح مادش للبيت كل شواي اعاين اشوفنه جاعد ويدخن
𔓕𔓕𔓕
هـاشـم…
جاعد گباله وهو صاير نار كبره يمشي گبالي يروح ويرد وكل شويه يحمس الحايط بوكس يهزه بينا البيت هز
-هـاشـم: فدائي راح تفلش الطابوگات علينا شمَالك اربز بگاع الله
عاين عليه يحچي
- الله عليك كون يأذونها أهلها
-هـاشـم: أن چان اكو شي ببالك اتجاه البنت انصحك نصيحة الوجه الله تعوف هاي السالفة
عگد حواجبه وگال مستغرب
- ليش ؟!
-هـاشـم: مامش لچن أهلها مستحيل ينطونها الَك هد السالفة
- هسه هذا مو موضوعنه بس خاف يأذونها يضربونها بداعة المزن عليك ريح گلبي
-هـاشـم: شمَالك هي هاي شايخة عليهم ياهو يطجها غير تطلعة من الدين الإسلامي
- گلبي مثل النار عليها
هزيت رأسي
-هـاشـم: اهووو شكل الاخ طايح كلشش
- يمعود يا طايح بس خاف تتأذى خطيه
-هـاشـم: لا تخاف محد يمها أمها تكسر ظهر أكبر وأحد
- يعني هسه شنو
-هـاشـم: شني شنو كلشي مابيهم بسك سطرت رأسي
گلتها وانه اتغطى درت ويهي منه ونمت
جعدت الفجر ويا الصلاة شفته يصلي گمت انه هم توضيت وصليت كمل گبلي انه منتبه عليه دائمًا يصلي الصلاة بوكتها وعده قرآن صغير دوم يقرأ بي
-هـاشـم: تقبل الله
- منا ومنكم يلا كوم روح الهم شوف البنية خاف يكتلوها
-هـاشـم: خب عاين هذا شيكتلون منها تراها موش مثل الي بالك حيدة ماتنگدر
-يعني محد مأذيها
-هـاشـم: يا بوية عمي محد يمها محد يمها نام رتاح شمَالك من البارحة لليوم ساعة ماهدت وهودت
جعد يمي ينافخ صفت عليه حالته غريبة طلع جگارة يدخن سألته
-هـاشـم: ياهو أنتَ ومهمتك شنهي تراك تحير المايتحير
عين الي صفح وتجه رأسه على الحايط نفخ دخان الجگارة وگال
- تريد تعرف منو قناص بغداد الثاني وشنو المهمة مالته ؟!
للحكاية بقية…
𔓕𔓕𔓕
بـقلـم: زيـنـب علـي
قلبوشات لا تنسون التصويت ومتابعة الحساب zainab_ali1 ♥️
شنو رأيكم بالبارت ؟
صراع العمالقة شلون راح ينفض حسب توقعكم 🌚💔
متابعة ممتعة 🦋