مساء الخير زهـراتي
#ثعلب الحبتر
#بقلمي انا: زهراء
#حساب الانستا: zaii1_8
بسـم ﷲ الرحمـن الرحـيم
ـــــــــــــــــــــــــــــــــــــــــــــــــــــــــــــ
ــــــــــــــــ
لگينا الدِنيا ما تنحَب ،
حِزن ودروب ما تِنطَب
دربَ مَكتوب بي نبچي
ودربَ مَكتوب بي نتعَب .•
ــــــــــــــــــــــــــــــــــــــــــــــــــــ
ـــــــــــــــــ
روح
انتفضت بخوف وضعف وكل الذكريات الموزينة اجتني من سمعت عمي حازم عازمنة على العرس وترف تريد تروح
روح.. ترف كتلج لا يعني لاااا ماكوو روحة
ترف.. واني كتلج انروح اثنينة ماخايفين من احد واريد زلمة وابن امة الي يحاجينة
روح.. ترف سدي الموضوع انا ماصدكت ينسونة ويفكون ياخة عنة مااريد ارجع الهذيج الايام السودة الي عشناها ترففف..
اجت تحجي بس قاطعتها سكتت شوية وبعدين كالت
ترف.. احنا مو استقرينة بحياتنة؟ ليش بعد خايفي
ضحكت بأستهزاء وجاوبتها
ترف.. ضحكتيني والله استقرار ايش الي جاي تتكلمين عنة؟؟ ليش مو احنة من شقة الشقة بسبب سلمان مانريدة يندل مكانة ويجي يطين عيشتنة الوردية؟؟ ليش عمو باسل ماكاعد ابيتة مو بسببنة؟؟ منو الي يومية ناقلينها من مدرسة المدرسة وحتة صديقات ماعدها؟ منووو غيرنةةة كليلييي منووو
كعدت على الجرباية وباوعتلي
ترف... كلهم احنا بس هذا مو سبب حتة مانروح ونكسر خشومتهم انشوفهم احنا شكت قويات سوة ومحد يكدر يمسنة ولو بشعرة وحدة منو يكدر يحجي ويانة؟ ماخايفين من احد بطلي جبن افضل
سكتت عنها ورحت كعدت على الجرباية مستحيل اروح خاف يرجعون ياخذونة عدهم وارجع النفس النقطة الي جنت بيها اخذت تلفوني شفت راغب داز رسالة
... ول يابة مديتلي بوزج ورحتي مصكوعتي ماكلت شي هساع كعدت اراجع كلامي من الصبح للساعة هاي ماكايل شي شبيج زعلتي
شفتها ومارديت رجع دز
... ردي لا اجي الكم اطرج طر
ابتسمت بوهن و كتبتلة
... مازعلانة بس لأن راح اتروح للانبار وكل مرة اتروح ترجع ضايج ومتعكر مزاجك الحلو فوك ما اخاف عليك
قراها واتصل كمت طلعت من الغرفة ورحت المكتب عمو دخلت وغفلت الباب وفتحت الاتصال وانا مبتسمة
راغب.. زعلان الاسمر مايكلي مرحباا
روح.. مراحب عيني مو مرحبا وحدة
راغب.. خاليييييي چريمة چريمة مو بخيلة... من كد ماچريمة منكعتني بزعلاتج
روح... اهووو اذا مو عليك ازعل عليمن متكلييي
سكتت وسمعتة اتنهد وانا هم سكتت كال بعد مدة
راغب.. احبج
ابتسمت سديتة كبل ما اعرف شنو صار بس مشاعر مخربطة مااعرف اذا احبة اولا اعجاب او غيرة
حب او تعويد بس الي اعرفة ماكو غيرة اتقبلني كما انا يمكن الغلط بطفولتي محد سمعني كلام حلو غير راغب محد اهتم بية ولا احد سئلني شلونة يومج ولا شنو سويتي كلشي صار بطفولتي غلط بغلط لكن لااعتراض على ارادة الله
اتذكرت الدفترة وكمت جبتة وجبت قلم وكعدت اسرد باقي التكملة
من بعد موت امي فقدنة شي اسمة راحة او استقرار ننام بس مامطمأنين على اي ساعة ننضرب من عمامي وزوجاتهم على ابسط زلة جان اكبر همي ان احميج وما اخلي احد يضربج
سلمان اختفة بعد ما خلانة عند بيت اهلة الي عايشين بي اخوانة جابر وحازم وزوجاتهم البيت كلش صغير كنة ننام بالمطبخ لا
بالصيف نبرد ولا بالشتاء ندفة مطبخ قديم جدرانة مطررة
وباب المطبخ بي جامة مكسورة الدرجة الحشرات مالية المكان التفتت على الحايط بي دهن مالت اكل ما اعرف شنو
وعلى الطباخ اكو طاوة مغطاية بلعت ريكي ودعيت بقلبي ان الكة بيها اي شي ناكلة
كمت من مكاني ورحت للطباخ رفعت نفسي لأن ما اوصل الة وفتحت القبق الي يزلك من ايدي بسبب الدهن
شفت الطاوة فارغة رجعت غطيتها بيأس جنت حيل جوعانة بوقتها وانتِ تبجين علمود حليب احتاريت شنو اسوي كضيت بطني بألم ورجعت الفراشي الي انطو النة اثنينة بي عبارة عن مندر وصخ والبطانية جرجف
وماتدفي لأن شتا وماكو مخدة نمت انا بدون مخدة ومديتلج ايدي نمتي عليها كضيتي اصبع السبابة مالتي وخليتيه بحلكج ماعندج بس اسنان اثنين فوك واثنين جوة ضحكت بحزن ونزلت دمعتي
اخذتج الحضني اكثر واكثر ونمنة واحنا بردانين وجوعانين وماحاسين بأمان وهاي ليلة من الليالي السودة الي عشناها
عقجت وجهي بأنزعاج من ضوة الشمس الداخل من الجامة المكسورة
فتحت عيوني و الشمس صارت بيهن اكثر غمضتهن بأنزعاج و بعدت ترف من ايدي على كيف وكمت وخرت الغطة عني وغطيتها
مشيت على اطرف اصابعي ورحت للهول سمعت صوت همسات
عقدت حواجبي بفضول واتبعت مصدر الصوت شفتة جاي من غرفة عمو جابر بس الباب مسدود صار عندي فضول اعرف شنو هالصوت يمكن انا فضولية زيادة او ماعرفت بوقتها شنو الاضرار والتلوث الي راح يصير بعقلي وانا بهذا العمر
عقل طفلة وكلشي يصير احتفظ بيه بعقلي وما انساه
غرفة عمو جابر الها شباك يطل على الحديقة الورة
رجعت للمطبخ وفتحت الباب على كيفي وسديتة مشيت ورحت ورة البيت اكو مكيف جان عطلان وشامريه برة صعدت عليه واخليت اطراف ايدي على الحايط ورفعت نفسي ماجانت اكو بردة بالغرفة مالتهم
فتحت عيوني على وسعهن من شفت زوجة عمو جابر فاطمة نايمة بدون ملابس نفس من شفت ماما بالهول وعمو جابر يسوي شغلات عيب ضليت صافنة عليهم فترة غمضت عيوني بقوة و نزلت بسرعة
فركت عيوني و اريد امحي الي شفتة لكن ماكو جدوة رجعت بسرعة يم ترف واتمددت لكن مانمت بعد الشي الي شفتة ضليت افكر واسترجع بعقلي شنو يسوون
غطيت عيوني بأيدي وبجيت عرفت نفسي فهمت شي ملازم اعرفة بهذا العمر شي اكبر مني ومن عقلي مرت فترة قصيرة وكمت من مكاني خليت ترف نايمة ورحت غسلت وبدلت ملابسي مالت المدرسة
جنت اداوم وبقلبي خوف خاف يجي يوم ومايخلوني اروح للمدرسة
اخذت جنطتي الي السير الثاني مالت الكتف مكطوع البسها من جهة وحدة فقط ومشيت الغرفة عمو حازم شفتة الصبح من طلع وزوجتة عد اهلها كضيت
يدت الباب ودعيت كون مفتوح حركتهت وانفتحت ابتسمت ودخلت للغرفة ورجعت سديتة
اتوجهت للكنتور وفتحتة باوعت بي ودورت ماكو فلوس رجعت سديتة بملل
عضيت شفتي وباوعت للارجاء مالت الغرفة وابتسمت من شفت ملابس عمو حازم مشمورة بالكاع اخذت البنطرون ودورت بجيوبة وهم ماكو رجعتة واخذت بنطرون ثاني مديت ايدي بالجيب وابتسمت من حسيت اكو بي فلوس سحبتهن طلعن الاف وارباع حسبتهن بـ 5 الاف
ضميتهن بسرعة بالجنطة ورجعت كلشي بمكانة اعرف الي اسويه غلط بس مستمرة
طلعت من الغرفة وسديت الباب ونزلت جوة شفت فاطمة بالمطبخ غمضت عيوني وعصرتهن وانا اتخيلها من نايمة استغفرت الله وفتحت عيوني
باوعتلي من فوك ليجوة بشك
فاطمة.. وين جنتي؟
جاوبتها بملل
روح.. فوك ليش؟
فاطمة.. ليش وشنو جنتي تسوين فوك؟
اتلعثمت بس سرعان ماحجيت بثقة
روح... شفت خاف اكو شغل كلت اكملة قبل لا اروح للمدرسة
هزت راسها وسكتت كملت طريقي للباب وقبل لا اطلع درت عليها وكتلها
روح... ديري بالج على ترف احسبيها غريبة مو بنت سماهر ولا بنت سلمان ولا اختي اذا عندج رحمة يعني
عفتها وطلعت فرحانة بالفلوس الي اخذتها وافكر شنو اشتري بيها وشلون اقسمها حتة تكفيني انا واختي اطول فترة ممكنة
مشيت ومشيت المدرسة بعيدة حيل عن بيتهم هلكت يلا وصلت دخلت للصف وشمرت الجنطة على الرحلة الاخيرة واخذت الف من الفلوس ورحت رحت للحانوت واخذت كيكة وعصير ورجعتلي خمسمية اكلت نص من الكيكة
والنص الثاني ضميتة الترف هوا والعصير رجعت للصف وضميت الخمسمية
ماجنت اشبع ولا احس بشبع بس مابيدي شي
خلص الدوام بين الدروس وعركاتي وية البنات جنت منبوذة بيناتهن بسبب لبسي وجنطتي وكلشي بية جان الكل ينفرني ماعندي ولا صديقة ولا وحدة تقبل تحاجيني حتة المعلمات جنت احس اكو نظرة احتقار بعيونهن الي شنو السبب ليش يحكمن علية من ملابسي؟؟ صح قديمات بس نظيفات واغسلهن بأيدي صح دفاتري مشككة بس ماجنت اخذ 9 درجاتي كلها 10
نزلت دمعة من عيني ومسحتهن انتظرت كلها تروح البيوتها يلا انا اروح ما اريد احد يندل بيتنة مشيت بالشارع وحاضنة نفسي بأيدي البرد يطك بأعضامي واطك سن بسن باوعت الاظافري صاير لونهن ازرك من البرد سرعت خطواتي للبيت
ووصلت جان الباب مفتوح دفعتة ودخلت سمعت صوت بجي ترف بسرعة شمرت الحذاء برة ودخلت شفتها مفرفحة روحة بأيد فاطمة وتضربها بكل قوتها شمرت الجنطة ورحت دفعتها من ايدها بس ماكو ماتتحرك اقوة مني عضيتها بأيدها بكل قوتي طلعت ضيم كلشي بيها
ضلت تضربني على راسي حتة اوخر عنها بس ضليت مقاومة ومجلبة بأسناني بأيدها الحد ما اجة عمي جابر وشالني من شعري رفعني الة عقجت وجهي بألم وحسيت شعري يتكطع من مكانة
ضربني راجديات واحد ورة الثاني وانواع الغلط يغلط علي نزلت عيني الترف شفتها روحة مفرفحة علية
غلط وغلط واستمر يضرب الحد ماوصل يغلط على امي
جابر... لججج بتت الكح** حيوانة وبت حيوانة اناا اعلمج اليوم بتت الم****
باوعت بوجهة وتفلت
روح.. ماكوو غيركك امة كح** وم*****
ماجنت اعرف شنو معنى الغلط بس الي يكلي كلمة ارد مثلها وازيد
شفت شيطاين بعيونة من كلت هيج ضل يطفر واحتار شيسوي وياي
اخر شي تعب من الضرب شالني انا واختي وشمرنة برة بالطارمة وشمر الجنطة مالتي علي طاحت على بوجهي بعدتها وكمت نكثت ملابسي
ما اهتميت لأن اتعودت شلت جنطي واخذت ترف من ايدها
ورحنة ورة البيت كعدت وخليتها بحضني طلعت من الجنطة نص الكيكة وباكيت العصير وكلتها وية كل عضة ابوسها كلتهن بسرعة لأن جوعانة اخذت الجيس مالت الكيكة والباكيت وكمت صعدت على الدرام مالت النفط وشمرتهن برة البيت خاف يشوفونهن ويعرفون انا جايبتهن
رجعت حضنت ترف واحاول ادفيها بس شلفايدة واثنينة نختض مثل السعفة من البرد ضليت اسولفلها عن يومي وشنو سويت بس مااذكر الها شنو شفت عمو جابر يسوي ولا منين اخذت الفلوس لأن اخجل انا خجلانة من نفسي واعرف غلط جنت احس ترف كبيرة ومايصير اعلمها على الاغلاط مالاتي
أنا مصنوعة من غُرَف صغيرة مليئة بالأفكار والتشاؤم والذكريات , لا يمكنك أن تعرفني بالإستماع إليّ مرة واحدة , أنا مُعَقد جِداً.
سديت الدفتر وفركت راسي بألم رجعتة المكانة وكمت طفيت الضوة وطلعت رحت للمطبخ شفت عمو باسل يكصص برتقال ويدندن بأغنية
باسل... كامل الاوصاف فتني
والعُيون السود خُذوني
غنيت وياه بصوتي
روح.. من هواهم رُحت اغني
آه ياليلي آه يا ليل
باسل.. عاشش عاش لكك شنو هذا الصوت
ضحكت وجاوبتة وانا اخذ قطعة برتقال
روح... انا شنو هالصوت لو انتَ عمي الصوت عندك ويكطع
اشرلي بالسجينة وكال
باسل .. هذا الصوت ما اسمعة بس الأمل مرتي ماتقبل تغار علي
اثنينة درنة من سمعنة صوت عمة أمل
أمل.. هلا هلاا تتغزل بصوت رجليي
رفعت ايدي بأستسلام
روح.. عميي لا اتغزل ولا شي انا رايحة يم اختي
اجيت اروح وسمعت صوت عمو يصيحلي
باسل.. تعاي ابوية اخذي هذا الصحن مالت البرتقال كصصتة الجن
اخذنة منة واتشكرتة ورحت للغرفة لكيت ترف كاعدة على الچرباية وفاتحة الكتاب وصافنة ومبين بالها مو يمها
كعدت كبالها وخليت صحن البرتقال بيناتنة اخذت شلف من غير ماتحجي واكلتة
روح.. شبيج ترتر؟
هزت راسها بنفي
ترف.. مابية شي
روح.. لا بيج شي وانتِ جاي تضمين علية
باوعت بعيني وابتسمت ومالت راسها وجاوبتني
ترف... لا بس ضغط دراسة علي وهم ضايجة
روح.. زين تردين نطلع؟
هزت راسها واردفت
ترف.. اي اريد اروح للعرس
غمضت عيوني بنفاذ صبر
سكتت عنها وما اعرف شلون طلعت مني جملة
روح.. تمام نروح
طفرت من مكانها وفتحت عيونها بأندهاش
ترف.. كولي وابو الحسن؟
روح.. والله والعباس
ترف.. كولي بداعتي؟
روح.. بداعتج يااا شبيج مامصدكة
خلت خصلة من شعرها ورة اذنها وراحت فتحت الكنتور وضلت تطلع بملابسها
ترف.. لا بس قبل كم ساعة جنتي ماقابلة منو قنعج؟
روح.. شفت كلامج صح ليش خايفين منهم؟
ترف.. جيد جيد
طلعت فستان اسود قصير ويصير ضيك كلش على الجسم افتريت على روح وشوفتها الها
ترف.. حلووو؟
روح.. لا وديري بالج تلبسين هيج
جاوبتني بأستهزاء
ترف.. لا لا خاف ماتقبلين.. شبيج امي جاي اسئلج حلو لو لا ماجاي اسئلج تقبلين البسة لو لا
هزت روح ايدها وكامت فرشت ورجعت اتمدتت على الچرباية
ترف... لككككك تئبرنييي وحياة الخالقك ماني مفارقك
ماجاوبتني غميتها طفيت الضوة وطلعت سديت الباب عليها
البيت كلة هدوء كلها عزلت وشالت جوالتها الوادم وخمدت واني مانعسانة ومخلصة دراسة
رحت الغرفة علي ودكيت الباب
علي.. منووو
ترف.. اني يا تئبرنييي
ضحك وكال
علي.. فوتي
فتحت الباب وكفت واني متخوصرة
ترف.. اكلك عندك شي هسة؟
علي.. خير ترتر شتردين
ترف.. اريد اطلع امشي نتمشة حسوو بيةة محبوسة بالبيت بس ادرس واروح للمدرسة وانتم دايحينن انتَ وروح يوميه اطلعوننن ماتحسون عابتلكم اويي
علي.. هوب هوب اخذتيني حاصل فاصل وين تردين ترحين؟
ترف..نتمشة
هز راسة وكام وراح جاب السويج من الميز
ترف.. لا لا عوفة اريد نتمشة وشسمة اكلك ماعندك علج؟
شمرة على الجرباية وطلع من ميز التوليت علج اخذتة منة وعلجتة وطلعنة قبل لا نطلع من الشقة باوعلي من فوك ليجوة واشرلي بأصبع السبابة
علي... هيج ترحين؟
باوعت النفسي لابسة بجامة سمائية وبلوزة رصاصية
واساساً لابلوزة لابسة بجامتها ولا البجامة لابسة بلوزتها
وشعري كيرلي كوشة رفعت كتافاتي وكتلة
ترف.. اطكك بالكاع بكل حالاتي
مدي ايدة الراسي وكفشش شعريي
علي .. كفوشش الصاكك لكك صديقي راح اتفشلني انتَ
ترف.. ووحياة الخالقك ماني مفارقك
ابتسم وطلعنة من الشقة والعمارة ضلينة نتمشة بالشارع وانسولف مدلي ايدة رفعت راسي الة ابتمست وكضيتها
ماجنت متعمدة بحركاتي او عن نية سوء ولا اريدة يحبني ولا شي مجرد جنت احس بالامان يمة واحجي وياه كلشي براحتي ضغط على ايدي وكال
علي.. تردين موطة؟
ترف.. ايي اييي
هز راسة وكفنة كبال محل موطة رحت على صفحة وهوا راح جاب بس وحدة الي وانطاني ياها مشينة ورجع سحب ايدي وكضها
ترف.. شنو اخبار حبيبتك شوكت تخطبون؟
علي.. عن قريب ماضل بس ارتب اموري
ترف.. بالتوفيق ان شاء الله احلا عريس يا تئبرني
علي..شكراً صديقي... ترتر تعاي اشوفج اياها
هزيت راسي بقبول وكعدنة على رصيف كعدت بصفة فتح تلفونة على صورة بنت مبينة بالعشرينات يعني 25 او 26 هيج
شي حلوة نوعاً ما بس مخربة وجهة بحواجبها داكتهن تاتو ومكياجها القوي بس مايهمني اهم شي علي يحبها ومقتنع بيها الحب ابد مو بالشكل ولابالطبقة الحب حب الروح ابتسمت ورفعت راسي الة
ترف.. تحبها؟
سكت علي مارد سحب التلفون وكام مدلي ايدة كضيتها وكمت
ترف.. علي ليش ماجاوبت سؤالي؟
علي.. احبها بس هيا هواي تلح و تتعارك على ابسط الامور على العموم ماضل شي ونخطب
هزيت راسي و ضلينة نمشي ابتعدنة كلش هواي عن العمارة
علي.. ترة السيارة فاهية بدونج ماعندي احد اتعارك وياه الصبح لأن يتأخر
ترف.. اساساً احسن شي سوتة روح خلتلي خط ارتاحيت منك.. حبيت اغير الموضوع سئلتة عن العرس.. باجر عرس ابن خالك تروح بعد ئلبي؟
علي.. لا
ترف.. ليش
علي.. بكيفي
فلتت ايدي منة وحجيت بضوجة
ترف.. اوي شبيك عساس الحجي بفلوس تحجي كلمة وتنجب عابت
مشيت كبالة ورجعنة للشقة فتحت الباب ولكيت
عمو باسل وعمة امل كاعدين بالصالة وروح تجي وتروح بالبيت وموبايلها بأيدها وترجف وتعض بشفتها بتوتر
رفعت راسها شافتنة وفتحت عيونها على وسعهن اجت بسرعة يمي وكضتني من كتافاتي وتهز بية حچت بصوت مليان خوف وتعب
روح.. لججج وين رحتي بس نمت فزيت مالكيتججج هايي سواية تسوينها
بلعت ريكي وعيوني تفتر عليهم رفعت عيني العلي شفتة يطمني بعيونة
رجعت باوعت الها
ترف.. بس رحت وية علي اتمشة
دفعتني بقوة واخذت تلفونها وراحت للغرفة
علي.. شنو السالفة شبيكم ترا ويايي ماخذها
باسل.. حتة لو وياك جنتو تكدرون تنطونة خبر او تاخذون تلفوناتكم وياكم تصرفكم غلط العتب مو على ترف صغيرة العتب عليك لا ساعة ولا ساعة ونص ننتظركم وبالنة عليكم لانعرف وينكم وبيا كاع حقنة والله تعرف روح شكد حريصة على اختها مو تنام وهيا مطمئنة اختها يمها وتفز تلكاها ماموجودة
عافنة عمو وعمة وراحو الغرفتهم
وعلي هم راح اتنهدت ورحت غفلت البيبان وطفيت الاضوية ورحت الغرفتنة لكيت روح مغطية نفسها بالبطانية وحتة وجهة كعدت على طرف الحرباية ودقيتها بكتفها
ترف.. روح
جاوبتني بصوت مبحوح
روح.. روحي نامي ترف
ترف..ما اروح الة تحجين وياي
صاخت بصوت عالي
روح.. ترفف كلتت روحيي نامي ما اريد اضوجج بالكلام
ترف.. بس اني اريدج تضوجيني روحح لاتزعلين مني ما اتحمل والله زعلج يعني بس طلعت اني وعلي ومو اول مرة نطلع سوة
كامت وخرت البطانية من على وجهة عيونها حمر ساعتها ضجت من نفسي لأن ضوجتها وضجت تصرفي جان لازم استأذن منها
جريت راسها وحضنتهاا
ترف.. انجبييي يلاا مابينة زعل ترا والله اكعد ابجي هسة وادموعي تغركم وتسويكم شط ابو سامر
ضحكت وبعدت عني وهيا تمسح دموعها
روح.. هذا هوا مازعلانة يمكن تحسين تصرفي بمالغ بي بس اخاف عليج من كلشي ماعندي بهاي الدنيا غيرج انتِ الذكرة الوحيدة من امي
اتنهدت وحجيت
ترف.. ما اعيدها وعد نامي يلا قطعت نومتج كون يقطعون طريقي من الجنة
هزت ايدها وكمت من جربايتها خليتها تنام وطلعت من الغرفة اتأكد من الطباخ عادة هاي عندي لازم اتأكدت اوسوس من هاي الناحية بشكل موطبيعي
دخلت وشفت عيون الطباخ مطفية اجيت اطلع بس استوقفني شي غريب جوة الطبلة بلعت ريكي بخوف دنكت راسي حتة اشوف شنو اكو وشفت....
ولا زالت الحڪاية مستمرة
الى هنا وخلص البارت زهـراتي
تصبحون على الف خير