"ចង់ទៅណាទៀតអត់?" Gem សួរឡើងបន្ទាប់ពីពួកយើងមើលកុនចប់។ ខ្ញុំក្រវីក្បាលជំនួសឱ្យការឆ្លើយតប។ ហើយពួកយើងក៏ដើរមកចំណតឡានវិញ។ ពួកយើងក៏បាននិយាយគ្នាអំពីសាច់រឿងដែលពួកយើងមើលមុននេះទាំងសប្បាយរីករាយ។ ត្រូវហើយខ្ញុំតែងតែមានស្នាមញញឹមជាប់ជានិច្ចឱ្យតែពេលនៅក្បែរគេ។
"Gemini!ខានជួបគ្នាយូរហើយ" សម្លេងរបស់មនុស្សវ័យស្របាលៗគ្នាជាមួយពួកយើងបន្លឺឡើងនៅម្ខាង។ ខ្ញុំ និងGem ក៏ងាកទៅដំណាលគ្នា។ វ៉ាវ! ស្រីស្អាតដែលមានសម្បុរសម៉ត់ខៃ ទម្រង់មុខពងក្រពើ ចិញ្ចើមកោងក្រាស់ ភ្នែកធំមូលក្រឡង់ ច្រមុះតូចហើយស្រួច បបូរមាត់ពណ៌ផ្កាឈូកសាកសមឥតទាស់ជាមួយទម្រង់មុខ សក់វែងខ្មៅក្រាស់ទម្លាក់ត្រឹមចង្កេះ កម្ពស់សមល្មម ស្លៀកពាក់សាមញ្ញតែស្អាត និងថ្លៃថ្នូរ។ នាងញញឹមស្ញាញមកកាន់ Gem ហើយក៏រត់មកយ៉ាងលឿនឱប Gem មើលទៅពួកគេស្និតស្នាលនឹងគ្នាខ្លាំងណាស់។ ប៉ុន្តែតាំងពីខ្ញុំស្គាល់គេមក ខ្ញុំមិធ្លាប់ដឹងសោះថាគេស្គាល់គ្នាជាមួយស្រីស្អាតម្នាក់នេះ។
"អា! ឱបយើងកណ្ដាលវាលបែបនេះមិនខ្លាចគេយល់ច្រលំទេអ្ហី?" Gem និយាយទាំងញញឹមហើយក៏ទាញខ្លួននាងចេញបន្តិច។
"អូហ៍ភ្លេចនេះ Fourth មិត្តភក្តិយើង។ ហើយនេះ Yuma មិត្តភក្តិយើងតាំងពីកុមារភាពម្ល៉េះ" Gem ណែនាំឱ្យពួកយើងស្គាល់គ្នា។ Yuma ងាកមកកាន់ខ្ញុំហើយក៏ញញឹម រីឯខ្ញុំក៏ញញឹមតបក្នុងន័យគួរសមទៅវិញ។
"ទៅញុាំអីជាមួយយើងអត់? នឹកឯងណាស់ហើយក៏មានរឿងចង់និយាយជាមួយឯងដូចគ្នា" Yuma លើកសំណើរឡើង។ Gem មិនឆ្លើយបែរជាងាកមកមើលខ្ញុំ។ ខ្ញុំហាក់ពាល់ដឹងថាគេកំពុងតែស្ទាក់ស្ទើរព្រោះតែវត្តមានរបស់ខ្ញុំ។
"មិនអីទេបើឯងរវល់យើងទៅវិញដោយខ្លួនឯងក៏បាន" ខ្ញុំនិយាយឡើងព្រោះមិនចង់ឱ្យគេពិបាក។ ណាមួយខ្ញុំមិនចង់ធ្វើជាឆ្អឹងទទឹងក អង្គុយមើលគេគៀកកើយនឹងអ្នកផ្សេងឡើយ។ ត្រឹមប៉ុណ្ណេះបេះដូងខ្ញុំក៏រំញោចដោយការឈឺចាប់ខ្ទោកៗបាត់ទៅហើយ។
"ប៉ុន្តែ..."
"មិនអីទេ យើងមិនមែនក្មេងដែលមិនស្គាល់ផ្លូវទៅផ្ទះឯណា" Gem និយាយបានតែពីរម៉ាត់ខ្ញុំក៏និយាយកាត់។
"មែនហើយ Gem កុំធ្វើមើលតែខ្លួនឯងជាមេដោះរបស់ Fourth ទៅមើល" Yuma និយាយឡើងបែបលេងសើច ប៉ុន្តែវាធ្វើឱ្យខ្ញុំហាក់មិនស្រណុកចិត្តសោះ។
"អ៊ីចឹងខ្ញុំលាសិនហើយ បាយ បាយ!" ថាចប់ភ្លាមខ្ញុំក៏ដើរចេញទៅភ្លែតដោយមិនចាំស្ដាប់ការឆ្លើយតបអ្វីទាំងអស់។ គ្រាន់តែដើរចេញផុតបន្តិច ជើងខ្ញុំក៏ស្រាប់តែទន់មួយរំពេច។ ខ្ញុំមិនអាចបដិសេធបានឡើយថាបេះដូងខ្ញុំឈឺ។ ខ្ញុំដាក់ខ្លួនអង្គុយនៅម្ខាងដែលពួកគេមិនអាចមើលខ្ញុំឃើញ។
______________
អង្គុយសំកុកអស់ជាច្រើននាទីរួចមកខ្ញុំក៏ដាច់ចិត្តមកផ្ទះវិញ។ គ្រាន់តែមកដល់ផ្ទះខ្ញុំក៏រហ័សរត់ទៅបន្ទប់គេងភ្លាមៗ។ គ្មានកន្លែងណាអាចធ្វើឱ្យចិត្តធូរស្រាលដូចផ្ទះឡើយ។
ទីង!
សម្លេងសារនៅក្នុងទូរស័ព្ទរបស់ខ្ញុំបន្លឺឡើង។ ខ្ញុំទាញមកមើលក៏ឃើញថាជាសារដែលផ្ញើរចេញដោយ Gem។ ខ្ញុំមិនបានចុចមើលភ្លាមៗឡើយ ព្រោះចិត្តមួយចង់ចូលមើល ប៉ុន្តែចិត្តមួយទៀតបែរជាមិនចង់ចូលមើលទៅវិញ។
ចុងក្រោយខ្ញុំក៏នៅតែចុចមើលដដែល។
(ដល់ផ្ទះឬនៅ?)
(ញុាំអីអត់យើងទិញយកទៅឱ្យ?"
ខ្ញុំមើលសារទាំងនោះទាំងរំភើបលាយលំ និងអារម្មណ៍មួយដែលមិនអាចបរិយាយបាន។ ខ្ញុំញញឹមទាំងសោះកក្រោះបន្តិចមុននឹងសរសេរសារតបទៅគេវិញ។
(មកដល់មួយសន្ទុះហើយ)
(មិនបាច់ទិញមកទេ មុននេះយើងឈៀងទិញមករួចហើយ។ អរគុណ!) សរសេរចប់ខ្ញុំក៏បោះទូរស័ព្ទទៅលើពូកហើយក៏នាំខ្លួនទៅងូតទឹកសម្អាតខ្លួនចេញ។ ស្មុគស្មាញប៉ុណ្ណាក៏ដោយ ឱ្យតែបានងូតទឹកគឺដឹងតែធូរស្រាលក្នុងអារម្មណ៍ហើយ។
_________
ខ្ញុំចំណាយពេល10នាទីដើម្បីងូតទឹក។ ហើយក៏ចុះមកក្រោមបំណងរកអីញុាំ ព្រោះមុននេះកុហក Gem ទេ។ មនុស្សដូចខ្ញុំឯណាចេះទិញម្ហូបទុកនោះ?ហាហាហា។
ទីង ទីង!!!
សម្លេងកណ្តឹងផ្ទះខ្ញុំក៏បន្លឺឡើងសារជាថ្មី។ ខ្ញុំងាកទៅកាន់របងផ្ទះទាំងឆ្ងល់ ព្រោះខ្ញុំគ្មានញាតិមិត្តឯណាឡើយក្រៅពី Gem។
អា! តាមពិតជាគេពិតមែន! គេឈរទៅមុខផ្ទះទាំងញញឹមស្រស់ចេញធ្មេញដាក់ខ្ញុំដោយក្នុងដៃមានកាន់របស់របរជាច្រើននៅក្នុងដៃ។ គេសុីញ៉មុខដាក់ខ្ញុំ ហាក់ព្យាយាមប្រាប់ខ្ញុំឱ្យឆាប់ទៅបើកទ្វាឱ្យគេ។ ខ្ញុំឯនេះរវល់តែសម្លឹងមើលគេក៏សឹងតែភ្លេចបើកទ្វាឱ្យគេទៅហើយ។
"មកធ្វើអី?" ខ្ញុំធ្វើជាសួរ ឯដៃក៏បើកទ្វាឱ្យគេដើរចូលយ៉ាងសេរី។
"មកធ្វើឯងទេដឹង" គេឆ្លើយហើយក៏ដើរទៅត្រុយ ប្រៀបដូចជាគ្មានអ្វីកើតឡើងអ៊ីចឹង។
"អាឈ្លើយ!" ខ្ញុំលួចជេរគេតិចៗ តែល្មមគេឮហាហា។ បិទទ្វារបងរួចខ្ញុំក៏ដើរតាមពីក្រោយគេសម្ដៅទៅក្នុងផ្ទះ។ Gem បង្ហួសទៅផ្ទះបាយហើយចាក់ម្ហូបចូលចាន ព្រមទាំងដួសបាយរៀបចំដាក់លើតុជាស្រេច។ ដូចប្ដីរៀបចំធ្វើម្ហូបលួងប្រពន្ធអ៊ីចឹងហាហាហ><
"នែ! នរណាប្រើឯងទិញមក?" ខ្ញុំធ្វើជានិយាយទាំងខ្មឺត។ ទាំងដែលតាមពិតបេះដូងលួចរីកមាឌទៅហើយ។
"បេះដូងយើងប្រើឱ្យទិញ ព្រោះមានចំហាយអ្នកខ្លះលួចប្រច័ណ្ឌ!" Gem និយាយដោយមិនងាកមកមើលខ្ញុំ។ ព្រោះគេកំពុងតែញាប់ដៃញាប់ជើងជាមួយការងារចង្រ្កានបាយរបស់គេ។
"ប្រច័ណ្ឌក្បាលឯង" ខ្ញុំជេរគេហើយក៏ញញឹមបន្តិច ប៉ុន្តែមិនឱ្យគេឃើញឡើយកុំឱ្យវាបានចិត្ត។
គេមិនមាត់ប៉ុន្តែគេបែរជាបញ្ចេញស្នាមញញឹមយ៉ាងស្រស់។ គេតែងតែបែបនេះ! ខ្វល់ខ្វាយហើយពូកែយល់ចិត្ត។ គេមិននិយាយតែគេបង្ហាញទង្វើ។ នេះជាចំណុចទាក់ទាញរបស់គេ ដែលធ្វើឱ្យខ្ញុំលង់ខ្លួន លង់ប្រាណស្រឡាញ់គេ។
"មកញុាំបានហើយ" គេនិយាយហើយងាកមកកាន់ខ្ញុំជាមួយខ្សែភ្នែកដ៏កក់ក្ដៅ។ ខ្ញុំមិនមាត់ ហើយក៏ទៅអង្គុយទល់មុខគេ។ ម្ហូប5មុខ នៅលើតុសុទ្ធតែជាមួយម្ហូបដែលខ្ញុំធ្លាប់ប្រាប់គេថាខ្ញុំចូលចិត្តបានរៀបនៅលើតុជាស្រេច។
"អរគុណ" ក្រោយឮពាក្យនេះចេញពីមាត់របស់ខ្ញុំ គេក៏ងាកសម្លឹងមុខខ្ញុំហើយក៏ញាក់ចិញ្ចើមដាក់ខ្ញុំ។ ពួកយើងក៏ឱនមុខហើយញុាំបាយនោះជាមួយគ្នាដោយមិននិយាយអ្វីបន្ត។