بعد ما خلصت شغلي و قبل ما أطلع لقيت ناصر مرسل لي في الواتس ، كاتب لي بكرا أنا مسافر عمره ، قريت رسالتو من فوق بس ما فتحتها ، قربت أبكي بس مسكت نفسي ، طبعاً لقيتو شاف الإستوري حق قبيل بس ما علق ...المهم اتصلت على رتاج و قلت ليها تعالي عازماك غدا في أوزون قالت لي طيب بجيك ، المهم ختيت لي صوره تانيه و كتبت عليها : الأباك ريحك والله 😍
طبعاً ناصر شاف الإستوري أول واحد بس سفهني ، تااااني عملت واحد و كتبت : الزباله بتحب الزباله 😍 و تاااني عملت واحد كتبت فيهو : ما كعب مربى البنات كعب النسونجي صديق البنات ، المهم عملت 6 حالات ورا بعض و أنا بطاعني فيهو و هو رغم انو شايف إستوريهاتي بس ما اشتغل بي و دا الغاظني زياده لأنو ما معقوله البرود دا كلو !!!
المهم طلعت و مشيت أوزون فرع أركويت و انتظرت رتاج هناك لحد ما جات ، أول ما قعدت قالت لي ها ناصر مالو ؟؟
قلت ليها هسي الجاب سيرتو منو ؟؟ قالت لي من عزمتيني أكيد عايزا تتكلمي لي عنو ، أصلاً من عرستي بقى ما عندك سيره غيرو ، قلت ليها بالله ؟؟...ناصر شنو عليك الله ، أنا عزمتك عشان طولنا ما طلعنا مع بعض ، عاينت لي و قالت لي قولي عشان ما يطق ليك شريان ، قلت ليها اقول شنو ؟؟
قالت لي ناصر عمل شنو تاني ؟؟
قلت ليها ولاااا شي و ياريت ما تجيبي لي سيرتو ...سكتت خلتني و أنا بقيت أتلفت ساي ، مره أعاين ليها و مره لا ، في الآخر قلت ليها أنا الواجعني إنو أهلي مع ذلك واقفين معاهو ! ما عارفه ليه بس مهما حصل بالنسبه ليهم ناصر هو الصح !! يعني إتخيلي اقول ليهم جاب صحبتو لي في البيت يقولوا الموضوع عادي و خلاص إنتهى ! بحسهم بحبوا ناصر و بحترموهو أكتر مني ، قالت لي متذكره قصة شهاب الفي طيور الجنه الكان كل يوم يطلع في أعلى تل و يصرخ بصوت عالي و يقول إنو الذئب هجم عليهو و أكل الغنم و الناس يقوموا جارين عليهو و في الآخر يكتشفوا إنو كذب عليهم فـ يقوم يعيد الكره تاني و تالت لحد ما فقد مصداقيتو و لمن الذئب هجم عليهو جد جد ماف زول جا لاحقو و ماف زول صدقو و في النهايه هو الخسر ، قلت ليها دا ما معناهو انهم يقيفوا مع الذئب ، أنا متأكده إنو أهل القريه ديل لو كانوا عارفين إنو شهاب المره دي جادي و ما بكذب كانوا جوا لاحقنوا ، و بعدين أنا ما حصل كذبت على أهلي ، مشكلتي معاهم إنو البشوفو أنا حاجه مؤذيه و موضوع كبير يستحق الوقفه عليهو هم بشوفوهو حاجه عاديه ما بتستاهل يتكلموا فيها دقيقتين ، قالت لي هم عارفنك كويس عشان كدا متوقعين منك أي حاجه ، قلت ليها بعيداً عن دا كلو موضوع توته جا ناصر و حكاهو ليهم بنفسو و أنا سيرتها ما جبتها ليهم مع ذلك قالوا موضوع بسيط ما يستاهل !! قالت لي غالباً أهلك خايفين إنك تطلقي و بعدها ما تقبلي تعرسي تاني و أصلاً انتِ بالجلاله وافقتي تعرسي ناصر ، و غير كدا هم ما شايفين عيب في ناصر و جد جد ناصر زول محترم و عندو هيبه و كاريزما و إلا أبوك من البدايه ما كان قبل يديك ليهم ....هنا الإتنين سكتنا ، بعدها قالت لي انتِ مش الموضوع دا خلاص انتهى و المياه رجعت لـ مجاريها ؟؟ قلت ليها لا أنا لسه ما رجعت البيت ، ما ردت علي تاني ، بعد مسافه قلت ليها اتخيلي إنو مسافر عمره مع أمو و أبوهو من دون ما يكلمني !! يعني لو ما ورده أختو كلمتني ما كان عرفت ، اتنهدت و قالت لي لو مهتمه كان عرفتي ، قلت ليها كيف كنت حـ اعرف إنو حـ يسافر عشان أهتم و اسألو !! بعلم بالغيب أنا ؟؟
قالت لي لو كنتوا في نفس البيت كان عرفتي ، قلت ليها رتاج انتِ عندك زهايمر ؟؟ نسيتي إنو.....قاطعتني و قالت لي بزهج ياخ أنا مليت من كلامك المكرر دا !!
طبعاً إتخلعت من النبره الإتكلمت بيها معاي !! هي ذاتا اتخلعت من نفسها ، غيرت نبرتها و قالت لي طيب انا اعمل ليك شنو يا مها ! موضوعك بسيط و انتِ عارفه كدا بس براك بتحبي تكبري المواضيع و تعملي حركات ، مثلاً الإستوري بتاعك دا هل في داعي ليهو !! يعني بالجد انتِ بتحبي ناصر ؟؟ معقوله بتحبيهو و بتطاعنيهو بكلام زي دا قدام الناس دي كلها !!؟ عارفه انو أهلك و أهلو حـ يشوفوا الإستوري ولا لا !!؟
قلت ليها دقيقه دقيقه مالك انتِ ؟؟...ما عارفه ليه بتدافعي عنو و بتقولي كدا و انتِ أكتر وحده عارفه تفاصيل حياتنا ! أنا أي شي بحكيهو ليك بالتفصيل و عشان بحسك بتفهميني و بتحسي بي ،، لو دي انتِ هل حتقبلي راجلك يجيب بت و يقعدها معاك ؟؟
قالت لي ناصر غلطو الوحيد إنو جاب ليك البت ديك في البيت غير كدا خالص ما غلطان و أنا هسي ما قاعده اتكلم ليك عن توته لأنها حالياً ما موجوده و قصتها إنتهت ! أنا رغم إني بعرفك كويس بس هسي بالجد ما عارفاك عايزا تصلي لشنو ؟؟ بتعملي مشاكل براك و بتشربكي حياتك مع ناصر و بتجيني جاريه تحكي لي على أساس انك المظلومه !!...بتحبي الناس تفهمك غلط عشان بعدين تقولي انهم ظالمنك و إنو ماف زول غيرك صح عشان كدا نهاي ما حاولتي تفهمي ناصر و تقولي ليهو إنو غسان ولد جيراكم ، انتِ أساساً نكدتي حياتو و ما أديتيهو نفس و هو صابر عليك ، لا و كمان كنتِ حاظراهو و صغرتيهو قدام أهلك و بتطاعني فيهو بالإستوري و جااايه بكل عين قويه تقولي انو مسافر من دون ما يكلمك !...أنا متأكدة إنو لو كان كلمك و طلب منك تسافري معاهم حتقولي ما ماشه و حتقولي ليهو أعمل ليك شنو يعني أنا ما توته عشان تكلمني ، يعني تاني حـ تدخلي البت دي في أي قصه أو موضوع ، أصلك متسبله ، بتجوطي حياتك برااااك و بتقولي الناس السبب ، فـ ناصر اختصر الدراما الحتحصل دي كلها و ما كلمك ...
طبعاً أنا كنت مستغربه فيها !!...كانت بتشاكلني عديل و نبرتها حاده شديد !!
زعلت بالجد !! شلت نفسي و طلعت من المطعم ، لا رجعت بيتي لا رجعت بيت أهلي ، بقيت لافه ساي لحد ما بعد المغرب ، بعدها ركبت مواصلات و مشيت البيت ، الوقت داك العشا أذن ، لمن وصلت رشا قالت لي قايلين ناصر جاك بـ هناك و مشيتوا بيتكم ، عيوني كانت مليانه دموع ، ما إتكلمت معاها مشيت غرفتي طوالي ، أمي قالت لي يا بت تعالي هنا و ورينا مالك ، ما رديت عليها دخلت غرفتي و قفلت الباب علي و قعدت أبكي ، بكيت كدا لمن صدعت ، بعد شويه جاني صوت أمي و هي بتقول لي مالك يا بتي في شنو ، أطلعي و قولي لينا ، طبعاً أبوي و زيدان ما كانوا موجودين ، رشا قالت ليها حـ اتصل على ناصر و أفهم منو في شنو ....
تاني ما سمعت أصواتهم ، بعدها غسلت وشي و اتوضيت و صليت المغرب و العشا ، أول ما خلصت صلاة تلفوني رن ، لمن شلتو لقيت ناصر هو المتصل ، عرفتو اتصل عشان رشا كلمتو ، كنصلت إتصالو لمن بقى يتصل كتير فتحت الخط بس ما إتكلمت ، قال لي مها كيفك ؟؟
قلت ليهو بصوت متحشرج كويسه ....أخد نفس و قال لي خير في شنو رشا اتصلت علي قبل شويه !!....ما رديت عليهو ، قال لي ما عارف الحصل معاك شنو و ليه كنتِ بتبكي و متأكد إنو لو قلت ليك بتقدري تحكي لي و تقولي لي في شنو ما حـ تقولي ، المهم ماف حاجه بتستحق زعلك و بكاك و ما تنسي إنو عندك اب و أخ بسدو عين الشمس ممكن تلجئ ليهم و تخليهم يحلوا ليك مشكلتك .... طبعاً دموعي نزلت عشره عشره ، حسيت لساني مربوط و أساساً ما كنت عارفه اقول شنو ، بقينا فاتحين الخط و ساكتين و بعد مسافه هو قفلو ، مسحت دموعي و قلت زي ما قال ماف حاجه بتستحق زعلي و بكاي ....رقدت على السرير و بقيت أعاين للسقف ، رشا جات داخله و قالت لي هااا ناصر راضاك !؟ ...إبتسمت ليها بس ، قالت لي هييي صحي ناصر مسافر عُمره مع أمو و أبوهو !؟
قلت ليها ايوه ، قالت لي عرفت من القروب ، اهااا عشان كدا جيتي زعلانه و بكيتي لأنو ناصر مسافر ، طيب ليه ما ماشه معاهم ، قلت ليها عندي شغل بسافر المره الجايه ، قالت لي قطعتي قلوبنا أنا و أمـي ، ماشه اقول ليها انك كنتِ زعلانه عشان ناصر حـ يسافر ، طبعاً طوالي اتشالقت و قامت جاريه تكلمها ، ما منعتها عشان ما يجوا يسألوني تاني ، لمن دخلت الواتس يدي مشت على دردشة ناصر ، رديت على رسالتو القبيل و قلت ليهو كتر خيرك ما قصرت ، كان متصل الآن ، قراها و بدا يسجل لي ريكورد ، قلت يا ربي عايز يقول لي شنو ، طلعت من الدردشه عشان ما يقول منتظراهو ، لمن رسل لي الريكورد و فتحتو المره الأولى سرحت في صوتو و ما ركزت هو بقول في شنو إلا شغلت الريكورد مره تانيه قال لي : اختصاراً للكلام الحتقوليهو انـا ما سألتك ماشه معانا أو لا ، تاني حاجه مع إني عارف انو إذا قلت ليك مسافر أو لا ما حـ يفرق معاك كتير بس من باب الذوق قلت ليك و على فكره اتصلت عليك عديل عشان اقول ليك بس أكيد كنتِ حاظراني ، المهم الحاجه التالته العايزا اقولها هي إني آسف ، ما آسف عشان ما كلمتك أو عشان ما طلبت منك تمشي معانا ، أنا بعتذر لمن أحس اني بالجد غلطت و أنا غلطي الوحيد إني جبت توته ، قد يكون قعادها في البيت لفتره مؤقته عادي جداً بالنسبه لي بس أكيد ما عادي بالنسبه ليك أو لغيرك ، ما كنت متخيل انو جيتها للبيت حـ تخلق المشاكل دي كلها و ما إتخيلت انو الموضوع حيطلع برا بيتنا لأني قبلها بـ يوم قلت ليك إنو حأشوف ليها مكان تقعد فيهو الموضوع كان حـ يتحلى يومها بس شكلك ما بتثقي في كلامي عشان كدا مشيتي لأهلك ، المهم دا غلطي الوحيد و أنا إعتذرت عنو و بس....
لمن خلصت الريكورد ما عرفت أقول ليهو شنو ، خجلت بالجد من الإستوري الكنت رافعاهو و الكل الناس شافتو ، فكرت أعتذر منو و ننهي الموضوع بس كبريائي ما سمح لي و أصلاً أنا عتبانه على نفسي لأني اعترفت ليهو بحبي أول ، بس حتى لو أنا بادرت و إعترفت ليهو دا ما معناهو إنو لمن يغلط حـ أسكت ليهو و أرضى إنو يجيب لي بناتو....بس هو إعتذر حالياً و أصلا ً حاسه إنو أهلي ما كان يعرفوا بالموضوع دا ، ناصر اتختى في حته ضيقه و مع ذلك أول ما عرف اني متضايقه و ببكي إتصل علي عشان يطمني ....ياخ أنا ما عارفه هل العيب مني ولا منو ، هل أنا ما قادره افهمو ولا ما قادره أفهم نفسي ....واااي دي شنو المتاهه دي !!
بقيت شارده و بفكر ، قطع شرودي صوت تلفوني ، إفتكرت إنو ناصر بس لقيتها رتاج ، لمن رديت عليها اعتذرت مني ، قالت لي كنت مصدعه و زهجانه و قافله معاي عشان كدا إتزهجت فيك ، ما قاصده والله يا مهاوي ، معليش أعفي لي ، قلت ليها ما مشكله .... المهم اتكلمت معاها شويه و قفلنا من بعض بس المره دي ما حكيت ليها حاجه ، المهم بقيت أتقلب في سريري يمين و شمال لحد الساعه 10 ، في الآخر دخلت الواتس و سجلت ريكورد لـ ناصر و قلت ليهو أنا برضو آسفه ما كان نفسي نصل للمرحله دي بس انا والله ما بقبل الحقاره و توته دي أصلاً ما برتاح ليها و بحسها عكس البتظهرو لي و ليك ، بعد تردد رسلت ليهو الريكورد دا ، انتظرت دقيقه لحد ما دخل الدردشه و سمع الريكورد ...قال لي عموماً حصل خير....
طبعاً أنا ناصر دا حيرني !! ما عرفتو بارد ولا بدعي البرود ! معقوله هو في كل مره يسامحني عادي بالسهوله دي و ما ياخد موقف !؟
قلت ليهو أسألك و جاوب بصراحه ، قال لي شنو ؟؟
قلت ليهو انت زعلت مني عشان بسببي اضطريت تطلع توته من البيت ؟؟
قال لي أولاً أنا ما اضطريت و ماف زول جبرني ، أنا شفت ليها مكان تاني غير البيت لمن حسيت إنو الموضوع مضايقك شديد و يمكن يعمل مشكله بيناتنا و أنا بكل وضوح قلت ليك ما نفسي أخسرك و لمن خيرتيني بيناتكم من دون تردد اخترتك 😊
قال لي اسألك أنا ؟؟
قلت ليهو اسأل !...سجل لي ريكورد قال لي فيهو ، انتِ ليه بتفسري على كيفك و بتمشي الأمور زي ما عايزا ؟؟ يعني ليه ما خطر على بالك اني ممكن اكون زعلت من نفسي مثلاً أو من تصرفاتك أو أو أو ... !؟ ليه ما خطر على بالك غير إني زعلان عشان توته مشت من البيت !!...على فكره من أكبر مشاكلنا انك ما قادره تفهميني و أساساً ما بتديني فرصه عشان أفهمك أو أشرح ليك و ما بتنتظري أو تسمعي مني لمن أقول ليك بحل الموضوع!!!
قلت ليهو ما حـ اكذب عليك أنا ما بثق شديد في الرجال ، يعني عادي جداً الواحد يكون ميت في بت و يقول ليها ما شايف غيرك و و و و في نفس الوقت يكون بخونها و على فكره التنازل و السكوت بخلى الواحد يتمادى أكتر ، أنا متأكدة إنو لو سكت و خليت توته تقعد في البيت بكرا الله اعلم تجيب لي منو ، يعني انت البت الحبيتها بالسنوات و بجنون حتى و انت واصل الحد في حبها ما قدرت تقطع علاقتك بالبنات عشانها ، عايزني اصدق إنك حـ تخليهم عشاني و نحنا ياداب لينا 4 شهور مع بعض !؟ حتى لو اعترفنا لبعض دي ما حاجه كاااافيه ، قال لي بالمختصر ما بتثقي فيني !؟ بتردد كتبت ليهو أيوه 😊
قال لي أنا برضو بقدر اقول ليك ما بثق فيك و اتهمك بالخيانه ، بس الفرق بيني و بينك إني عادي اتجاوز و اكتفي بالحاجه الحاسي بيها و الحاجه البتقدميها لي بعيداً عن ماضيك ، ما بحاول أفسر و أحلل على كيفي لأني ما بفتش على المشاكل و الخلافات زيك ، بس من خلال تصرفاتك و الشفتو فهمت ليه انتِ بتفتعلي المشاكل و النقاشات دي كلها ، قايلاني غافل و معارف بالإسمو غسان !!
طبعاً لمن قال لي كدا إتخلعت !!....قلت دا بعرف غسان من وين ؟!! معقوله يكون غسان حكى ليهو لمن كان واقف جنب الباب !؟
قلت ليهو عفواً ! قصدك غسان منو انت ؟
قال لي دا معناه إنو توقعي صاح و إلا ما كان إتغبيتي معرفتو رغم انك عارفه كويس إني شفتكم مع بعض ، قلت ليهو شفتنا في غرفة نوم ولا في بيتو ! ما ياهو في الشارع !!
قال لي سبحان الله يعني من دون ما اقول ليك غسان منو عرفتي براك أنا قاصد منو مع انك قبل شويه عملتي نفسك رايحه و ما عارفه أنا بتكلم عن منو !! 😊
قلت ليهو يعني عشان شفتني في الشارع واقفه مع ولد جيرانا الجا من السفر بعد 3 سنوات كدا أكون خاينه في نظرك !! الخيانه دي تتهمني بيها لمن أسوقو و اجيبو معاي البيت و اقول ليك خليهو يقعد معانا فتره مؤقته لأنو ولد جيرانا و صاااحبي من زمان ، قال لي أنا ما سطحي زيك عشان أحكم عليك بحاجه زي دي ، بس انتِ ما تنكري خليك صريحه و قولي ليييه لمن رشا جابت سيرتو و قالت إنو جا من السفر انتِ اتضايقتي و حردتي الأكل !؟ و على فكره أنا قبل كدا سمعتك بتتكلمي عنو مع صحبتك رتاج بس ما حبيت أحقق معاك لأني حسيتو حاجه كانت في ماضيك و غير كدا انتِ ما عندك الشجاعه عشان تجاوبيني لو كنت سألتك عنو ، بس شكلك لمن لاقيتيهو في الشارع و بعد ال3 سنوات دي عاودك الحنين عشان كدا كنت بتبكي !! و دا بفسر ليه كنت بتعملي لي حركاتك و المشاكل دي كلها ، ايوه انا عارف انك ما كنتِ قبلانه بالعرس دا بس هسي عرفت السبب و فهمت السر شنو ورا جملة "ما جاهزين " الكنتِ بتقوليها لأي زول بجيب ليك سيرة الأطفال ، متأكد انك لو كنتِ عارفه إنو حـ يرجع قريب ما كنتِ حـ تخليني أقرب منك أساساً حفاظاً على البيناتكم 😊
طبعاً أنا إنصدمت صدمه كبيره !!! لساني إتربط بالجد !!...عيوني إتملت دموع ، قلت ليهو السيناريو دا ألفتو هسي ولا كان معاك جاهز ؟؟انت مستوعب الكلام البتقول فيهو يا ناصر ؟
قال لي خليك شجاعه لـ مره واحده بس ...
قلت ليهو أنا ما بسمح ليك تتهمني إتهام زي دا و ايييوه غسان دا كان حبيبي من زمان و لمن شفتو إتذكرت الكان بيناتنا ، قال لي عظيم والله ! طلعتي بتعرفي تحبي و تخلصي للبتحبيهو!
طبعاً كلامو زعلني ، ما رديت عليهو تاني ، دموعي صبت زي المطره ، قفلت الشبكه و رقدت على السرير و ختيت راسي في المخده و دموعي سايله ، و كل ما اتذكر القالو لي دموعي بتنزل اكتر ، قلبي كان واجعني شديد ، ما عارفه بس حسيت إنو البيني و بين ناصر حـ ينتهي لأنو برودو دا برود زول قنعان ، بس كلامو وجعني بالجد 💔
تاني ما إتكلمت مع ناصر خالص و ناس البيت عرفوا إنو سافر مع عمو مدثر و عمتو فريده و أنا قلت ليهم براي قلت ما ماشه و تاني خالص ما اتواصلت معاهو و لو في خبر عنو بعرفو من ورده أختو أو من قروب العيله ، المهم بعد أسبوعين من سفرو يوم كنت مع خالتي سارا في مكتبها ، كانت ماسكه التلفون و بتشوف فيهو ، بعد مسافه قالت لا ما بصدق !! قلت ليها في شنو ؟؟!
قالت لي إتخيلي مؤتمن طلع قبل يومين من السجن !...قلت ليها شنووو !؟ كيف بس ؟؟
قالت لي حسب المعلومات الوصلتني أهلو و المحامي حقهم قدروا يثبتوا إنو هو مريض نفسي بالإضافة لإنو ما كان واعي للبعمل فيهو يوم قتل عماد لأنو كان سكران !! قلت ليها مستحيل الكلام دا !! مؤتمن نحنا شفناهو ! كان كويس و ما فيهو شي ! قالت لي أكيد و دا كلو لعبه من أهلو عشان يطلعوهو من السجن ، الناس ديل ما هينين! قالت ليها ما قادره اصدق بالجد !! معقوله حق عماد يضيع و المجرم دا يسرح و يمرح على كيفو !!
قلت ليها الموضوع ما بالبساطه دي يا خالتي !! قالت لي أهلو جايبين تقارير مزيفه بثبت إنو مريض نفسي و غير متزن و ما كان واعي !! قلت ليها ايوه انا ما بفهم في القانون بس انا لو كنت قاضيه أول حاجه حـ اعملها لمن أهل مؤتمن يجيبوا التقارير دي يقولوا إنو ولدهم مريض نفسي حـ أدى أوامر للجهات المعنيه عشان تعمل ليهو فحوصات بنفسها و تتأكد من صحة الكلام دا ، قالت لي الناس ديل يدهم واااصله و عادي جداً يكون القاضي تابع ليهم و عاااادي يرشوا الدكاتره البتجيبهم المحكمه نفسها ، البلد دي خربانه و فيها قصص و سيناريوهات ما بتخطر على بال أي مواطن عادي ، قلت ليها ما قادره أصدق !!
سكتت و بقت تفكر ، قلت ليها سارا رأيك شنو نمشي و نقابل شلة عماد ممكن يقدروا يساعدونا خاصة لمن يعرفوا إنو مؤتمن كان بحاول يتهمهم بمقتل عماد و كمان ممكن نجيب ناس دفعتوا و دكاترتو يشهدوا إنو ما بعاني من أي مرض نفسي لأنهم اكتر ناس بتعاملوا معاهو بعد أسرتو ، قالت لي أصلاً مؤتمن دا انا من يوم طلب يقابلنا مع ولد عمو شكيت فيهو ، كان هو بحاول يحمي نفسو و يسلط الضوء على شلة عماد و يخلينا نشك فيهم !! قلت ليها واااي أنا من إحساس أهل عماد لمن يعرفوا إنو كاتل ولدهم برا السجن ، دا ظلم والله 💔
طبعاً ماف زول جاب سيرة إنو مؤتمن طلع من السجن ، حسيت إنو كل الناس دي مرشيه و مستعده تتستر على القاتل و تساعدوا مقابل قرش قرشين !
قلت لـ خالتي ها حـ نعمل شنو ؟؟ نسكت زيهم ؟؟
ما ردت علي ، كانت ماسكه القلم و بتهز فيهو و ما بتعمل الحركه دي إلا لمن تكون بتفكر بـ عمق ، المهم لمن طلعت منها كنت مقهوره شديد ! معقوله المجرم دا يقتل روح و أهلو يطلعوهو زي الشعره من العجينه !! فهمت ليه مصطفى كان لاصق فيني و ليه قال إنو بحبني ! كان عارف بالعملو ولد عمو و عشان سارا خالتي صحفيه معروفه كان عايز يصاحبني و يتقرب مني و يوهمني إنو بحبني و يخليني أحبو ، و كان بحاول يشوشنا و يرمي التهمه على شلة عماد و كدا كدا القضيه دي كانت حـ تنكشف و هو خاتي إحتمال زي دا و لو كان أنا حبيتو لا قدر الله طبعاً و بسببو إتطلقت من ناصر و عرستو حيكون في نسب بيناتنا و بحكم الحاجه دي حـ يسكتني أنا و خالتي و يقولوا: " نحنا أهل باركوها ماف داعي الفضايح "بس هو ما عارف إني ما حـ أسكت مهما كانت صلة القرابه البتربطني بأي شخص لمن يغلط ....المهم لمن وصلت البيت كنت زهجانه شديد و روحي محرقاني ، ناس البيت قالوا لي خير في شنو ؟؟ رشا قالت ليهم بتكون مشتاقه لـ ناصر 🙈.... طبعاً صدقوها ، المهم دخلت إتدوشت بعدها صليت العصر و جيت قعدت إتونست مع أهلي شويه ، دخلت حسابي حق الفيس و كتبت : بعد مكوثه شهراً في السجن أنباء عن خروج مؤتمن محمد أحمد المتهم بقتل الطالب عماد فخر الدين من السجن بعدما تم إثبات معاناته من مرض نفسي ....تحت الكلام دا كتبت : *ملحوظه : طبعاً دا كلووو كذب و مؤتمن ما بعاني من أي مرض نفسي بس مهما طال الظلم أكيد الحق حـ يظهر و حسبي الله ونعم الوكيل في كل ظالم و في كل زول بساعد ظالم و بساهم في إنتشار الفساد و بالنسبه للناس المتكتمه على الموضوع دا بتمشوا من الله وين !!
طبعاً خبر زي دا كان قنبله ! خاصة إنو القضيه كانت رأي عام ، هو صح الناس ما كانت عارفه اسم القاتل أو شكلو بس بعد الخبر دا صورتو انتشرت ، لأنو في ناس كتيره بتعرفو من شلتو لـ دفعتو و غيرهم و عدد كبير نزل صوره ليهو في القروبات و عرف الناس بيهو ، طبعاً خالتي سارا ذاتا نشرت الخبر دا في صفحتها و بكدا الناس اتأكدت من صحتو لأنها صحفيه مشهوره و معروفه ، بعدها الخبر انتشر زي النار في القش !!
بقيت كل يوم بنشر أخبار و حقايق عن مؤتمن و بحاول أثبت للناس إنو هو و أسرتو كذابين ، و حكيت إنو قبل كدا انا إلتقيت بيهو و فهمت الناس إنو كان بحاول يرمي التهمه على غيرو بمساعدة ولد عمو ، طبعاً بعد الكلام دا بيومين في كميه من الناس كانوا عاملين لي تاق في لايف في واحد من أكبر القروبات ، لمن فتحتو لقيتو عاملو واحد كدا و معاهو مصطفى!! طبعاً أنا من زمان حظرتو ! كانوا بقولوا في اللايف إنو مؤتمن ولد عمهم فعلاً بعاني من مرض نفسي و إنو هو ما كان واعي و ما حاسي بالجريمه العملها و إنو في ناس ورطتوا في قصة الكحول و المخدرات و اتحسبنوا فيني أنا و سارا و في أي صحفي أو إعلامي أو شخصيه معروفه ساندت و وقفت مع الحق و قالوا انو نحنا دافعين لينا عشان نشن هجوم على أسرتهم لأسباب بنعرفها برانا !!...في ختام اللايف مصطفى قال أنا من هنا بناشد كل الناس انها تقيف معانا و طالب منكم انكم ما تتلفتوا للإشاعات و ما تبقوا تبع القطيع الجاري ورا صحفيات مدفوعات الأجر ! و في اللايف الجاي ان شاء الله حأمشي بيت عمي عشان أصور ليكم مؤتمن و اخليكم تشوفوهو و تحكموا براكم مع انو حالتو النفسيه ما بتسمح و كمان حـ أوريكم كل تقاريرو الطبيه عشان نقفل خشم أي زول عايز يشوه سمعتنا و يتكلم عننا و بالنسبه لأسرة عماد ربنا يرحمو و يجعل الجنة مثواه نحنا جاهزين نديهم العايزنوا رغم إنو لو أديناهم الدنيا و ما فيها ما بنقدر نعوضهم عن خسارة ولدهم و على فكره ما براهم الموجوعين ، كلنا مفجوعين و موجوعين والله ، عماد دا كان مننا و فينا ، صاحب مؤتمن ولد عمنا من زمان و على طول معاهو في بيتو فـ وفاتو كانت صدمه لينا كلنا.....
طبعاً اللايف دا مغصني مغصه ! يعني الناس دي مبالغه في الكذب و التمثيل ! نهاي ما بتلفتوا و ما بترددوا بمثلو و بألفوا قصص أنا لو ما كنت عارفه الحقيقه كان صدقتهم والله !!
علقت في اللايف و قلت ليهو : على فكره انتوا أسره موهوبه و التمثيل شكلو متوارث عندكم 🤣🤣+ الأيام بيناتنا و بكرا حقيقتكم حـ تتكشف 🤣😂
طبعاً تعليقي لي تفاعل كبير و الناس عملت ليهو إسكرين شوت و إتداولتو ، سارا برضو جات علقت و قالت ليهو ما إتعرفنا يا مصطفى لكن كدي النسألك ولد عمك دا مفروض يكون متواجد في البيت ولا مصح عقلي ؟؟🤭😂
طبعاً في نفس اللحظات اتصلت عليها و قلت ليها هو شكلو ناس الدردشات العندنا زمن كان بلاقينا مع ولد عمو بالإضافه لتسجيلات الصوت المعانا ، قالت لي دي كلها حاجات ما منها فائده و ما بتثبت حاجه و أساساً نفس الكلام القالو مؤتمن لينا قالوا للشرطه لمن حققت معاهو يعني ماف جديد.. المهم عايزا اقول ليك بتقدري تمشي النيل الأزرق و تعملي لقاء مع أهل عماد ؟؟
قلت ليها أهلو من هناك ؟؟ قالت لي اي في قرى من قرى النيل الأزرق على مسافه معقوله من مدينة الدمازين ، قلت ليها طيب ما عندي مانع ، قالت لي لازم تحمسيهم عشان يصروا انهم ياخدوا حق ولدهم و يقيفوا عليهو ، بـ اللقاء دا هم حـ يحسوا إنو كل الناس حاسه بيهم و واقفه معاهم و كل الناس بعد تشوف اللقاء دا حـ تتعاطف معاهم و تدعمهم و بالطريقه دي حـ نقدر نحرك القضيه مره تانيه و نضغط على كل المحكمه العليا عشان تنظر في القضيه دي مره تااانيه ، قلت ليها أكيد ، حـ أكلم لؤي و حـ أسوقو معاي ، قالت لي إتصلي لي عليهو خليهو يجيني عايزاهو ، قلت ليها طيب ، طلعت تلفوني و إتصلت عليهو و كلمتو ، قال لي تمام حـ أجي عليها ، المهم بعدها أنا طلعت و مشيت لأني كنت تعبانه ، طلبت ترحال لمن جاني ركبت ، طبعاً كنت متابعه الأخبار في الميديا و لاحظت انو معظم الناس واقفه مع عماد و صور مؤتمن لافه الميديا كلها و أي زول عندو صوره ليهو طلعها لأنو أساساً كلام مصطفى و أسرتو بعيد شديد ، يعني ولدهم دا ما عرفوهو مختل أو مريض نفسي إلا لمن كتل و إتسجن !!، طبعاً في صفحه على طول بتردمني و بتردم أي صحفي أو كاتب واقف مع القضيه ! كل يوم بنزلوا بوست عن صحفي نزيه و بردموهو قدرتهم و بقولوا عنو كلام كلو كذب في كذب زي مثلاً اننا في جهه مؤجرانا و دافعه لينا عشان نهاجم أسرة مؤتمن !!... طبعاً لمن دخلت الصفحه لقيتهم منزلين بوست عني ! مكتوب : أما دي إتخرجت أمبارح و جايه تعمل نفسها صحفيه ! شكلها الصحافه بقت لعب ساي و كل من هب و دب جاي يعمل نفسو صحفي و يتكلم فارغ !! البت دي موهبتها الكذب و التأليف ، دافعين ليها بالدولار عشان تتعابط في القضيه دي و تشربكها ، للأسف يعني الصحافه بقت تجاره سوداء...
طبعاً الكلام حرقني ، كتبت ليهم ايييوه دافعين لي بالدولار ، رايكم شنو انتوا كمان تدفعوا لي أكتر عشان أطبل و أدافع عن مريضكم النفسي 🤭🙂
طبعاً أنا الغاظني و الحرقني شديد إنو في صحفيين كبااار و معروفين واقفين مع الناس ديل و 24 ساعه بطبلوا ليهم ! في واحد بالنسبه لي كانت قدوه و كنت بحترمو شديد حتى قبل ما أدخل عالم الصحافه و الإعلام ، هو معروف من زمان و دائماً كنت بقرا كتاباتو و أعمدة الرأي حقتو سواء في الصحف الورقيه أو الإلكترونية بس هسي سقطت من نظري والله !!
كتبت في حسابي حق الفيس :
أولاً حابه أشكر كل النزهاء من قبيلة الصحفيين و الإعلاميين رجالاً و نساء و غيرهم من الناس الوقفوا مع الحق و ما نسوا العهد ، الصحافه صنفت بأنها السلطة الرابعة لتأثيرها و لأهمية الأخبار البتنشرها و الحقائق البتنقلها ، الصحافه سلاح منيع هدفها إعلاء كلمة الحق و عون المظلوم و إيصال صوته و فضح الظالم و عكس الحقيقة من دون زيف بقلم طااااهر لا يعرف الخوف أو المجاملة ، أما بياعين القضيه من صحفيين و مراسلين حسبي الله ونعم الوكيل فيكم ، انتوا عاااااار على الصحافه و ما بتستاهلوا ينقال عنكم صحفيين ، أما الكتّاب و المعدين و الإعلاميين و أصحاب المحتوى و أي زول ليهو تأثير على المجتمع حابه اقول ليكم ما تخوضوا في حاجه ما عندكم خلفيه عنها و ما عارفين تفاصيلها على الأقل لو ما قدرتوا تقيفوا مع الحق ما تصفقوا للباطل 😊
أما الدكاتره و القضاة و المحامين حرفياً ما عارفه اقول عنكم شنو غير حسبي الله ونعم الوكيل فيكم يا خانين العهد ، بتمشوا من الله وين بس قولوا لي !!!
طبعاً بسبب البوست دا اتشنت علي حمله ما عادي من صفحات أكترها وهميه ، يعني فجأه كدا كل الصفحات بقت تنبذ فيني تحت #عميله_مدفوعة_الأجر و كمان كانوا بهددوني في العلن !!...
طبعاً الأهل اتصلوا و ناس البيت إتوتروا و الدنيا قامت و قعدت ، حتى أسامه أخو ناصر إتصل علي و سألني عن الحاصل و إطمن علي و تاني يوم طوالي جاني مع ورده أختو ، لقوا حبوبه و خالي إيهاب و سارا و كميه من الأهل في بيتنا ، قلت ليهم يا جماعه الموضوع ما خطير خليهم يهددوا قدرتهم بحسابات مزيفه أصلاً دي القدره حقتهم ، أمي قالت لي انتِ ذاتك بتكوسي المشاكل من ماف ، مالك و مالو يطلع ولا يقعد في السجن محققه انتِ ؟؟ قلت ليها بتقلبي حاجه زي دي لـ واحد من أولادك يا أمي !؟ بتقبلي الظلم دا !؟؟ ختي نفسك مكان أهل عماد إحساسك حيكون شنو ؟؟ قالت لي دا بالنسبه لأهلو بس انتِ ما من أهلو عشان تدافعي عنو و أصلاً هو مات و شبع موت بعدها حقو لو رجع أو لا ماف فايده و هو ما حيرجع لأهلو ، عشان كدا بطلي البتعملي فيهو دا ، سارا قالت ليهم من حقكم تخافوا و تتوتروا بس أي صحفي و قبل ما يدخل العالم دا بكون عارف الراجيهو شنو و اسوأ حاجه ممكن تحصل ليهو من نهب ، أو تهديد أو قتل .... طبعاً لمن قالت كدا كلهم إتهجموا ، قلت ليها بصوت واااطي انتِ ليه بتزيدي النار حطب !! حبوبه قالت لي ما تباري سارا دي و أنا أصلاً من البدايه ما عايزاك تدخلي المصيبه دي ، سارا دي بسببها ياما عشت أيام و ليالي سوداء كلها خوف و قلق ، ياما هددوها و هددونا معاها و عيشونا في رعب بس مع ذلك لسه مقويه راسها و بتعاند ! و جيتي انتِ و تميتي لينا المقصر ، شكلكم ما حـ ترتاحوا إلا يموت زول من الأسره دي بسببكم .....المهم كلهم بدوا يتكلموا و يجوطوا فينا أنا و سارا ، ماف زول ما فتح خشمو ، يومها صدعت بجد ، خالتي قالت ليهم خلااااص مش الموضوع دا خليناهو ، لمن عاينت ليها غمزت لي من دون ما زول يشوفها.....
المهم في اليوم البعدو مفروض أنا و لؤي نسافر الدمازين ، قلت لـ سارا اقول لأهلي شنو لكن ؟؟
قالت لي قولي ليهم انك ماشه تصوري برنامجك السياحي داك مش قبل كدا حكيتي ليهم عنو أكتر من مره ؟؟
قلت ليها ايوه فكره ، المهم كلمتهم و كلامي كان مقنع شديد و قلت ليهم طاقم القناة مسافر معاي و أصلاً هم مستحيل يتوقعوا إني مسافره لأهل عماد ، المهم بعد الساعه 10 ص ، ودعت ناس البيت و مشيت لاقيت لؤي في مكان بعيد عن بيتنا ، كان جاي بعربيتو و شايل فيها كل المستلزمات و أنا جايبه معاي شنطه متوسطه ، طبعاً لمن ركبت لقيت معاهو بت كدا واضح إنها ما سودانيه ، لمن عاينت ليهو ضحك و قال لي دي لارا بت جيرانا ميكس بين تركي و سوداني جديده في البلد دي ، قلت ليها هاي كيفك !؟ قالت لي أهلين ، كويسه الحمدلله انتِ كيفك ؟؟
طبعاً اتخلعت ، قلت ليها لهجه سودانيه بحته كأنك كبرتي هنا !!
قالت لي مع انو لهجتي مكسره بس بحاول اتكلم كويس ، قلت ليها هسي كلامك كويس ما شاء الله ، لؤي ضحك و قال لي والله مرات بتقول كلام خارم بارم لا معروف تركي لا معروف سوداني ، بس بمشيها و بعمل نفسي فهمتها ، ضربتو في كتفو و قالت ليهو أصبر لي ، قال ليها كدي قولي الكلاكله ، حمرت ليهو و هو قعد يضحك ، قلت ليهو يا لؤي خليها ياخ مالك ثقيل كدا !! قالت لي لمن نرجع حـ أكلم ليهو بابا ، قلت ليهو كتمة شيل شيلتك مع بابا ، قعد يضحك ، قالت ليهو لو كنت عارفاك "سخيل" كدا ما كنت حـ أجي معاك ، طبعاً أنا ضحكتني كلمة سخيل دي ، قلت ليهو بالجد انت سخيل يا لؤي ، ضحك و قال ليها مش قلت ليك بتقولي كلام خارم بارم و ما ليهو معنى !؟ قلت ليهو هييي كيف ما ليهو معنى !! قالت ليك سخيل و السخل أو السخيل دا ولد الغنمايه 🤣🤣
طبعاً البت قعدت تضحك ، قالت لي شكراً ، لؤي قال لي شايفك وقفتي معاها !!! قلت ليهو ايييوه ، قال يومي حيكون أسود طول ما انتوا الإتنين معاي ، طبعاً دا كلو و هو سايق العربيه
، خليتهم بتناقروا و دخلت الواتس و يدي مشت على دردشة ناصر ، من دون ما أحس كتبت ليهو إشتقت ليك و فاقداك شديد + أنا اليوم مسافره النيل الأزرق و عملت ليها إرسال بس لمن إنتبهت على نفسي قلت دا شنووو دا بس كويس انو الشبكه ما كانت فاتحه ، فجأه سارا إتصلت علي ، لمن رديت عليها قالت لي ها اتحركتوا ولا لسه ؟؟ قلت ليها إتحركنا ياداب ، قالت لي شايلين معاكم كل المعدات من كاميرا و غيرها و شايلين معاكم مونه ؟؟ قلت ليها ايوه معانا كل حاجه حـ تلزمنا ، قالت لي عشان الطريق طويل و القريه بعيده في الأطراف حـ ارسل ليك رقم واحد بعرفو حـ يستقبلكم في الدمازين و يخليكم تبيتوا معاهو و الصباح لمن يجي حـ تمشوا على أهل عماد في قريتهم ، قلت ليها طيب ، قالت لي مع إنو التفاصيل دي و غيرها رسلتها لـ لؤي بس برضو حأرسلها ليك تحسباً لأي عطل أو ضياع ممكن يحصل لتلفون واحد منكم ، قلت ليها تمام ....المهم بعد قفلت منها اتونست مع البت شويه مره أضحك على كلامها و مره لا ، عرفت انها طالعه ترفه مع لؤي و أصرت شديد على أبوها إنو يخليها تجي مع لؤي عشان تشوف السودان و تتعرف عليهو أكتر ، المهم بعدها فتحت الشبكه و دخلت الواتس قلت أكيد خالتي بتكون رسلت لي التفاصيل و فعلاً لقيتها رسلتهم لي طوالي ، فجأه لارا قالت ابتسمي ، لمن رفعت راسي لقيتها بتاخد لينا سلفي ، طلعت من الواتس و ختيت التلفون على جنب و بقيت أتصور معاها ، طبعاً هي قاعده معاهو قدام و أنا ورا و العربيه كانت دبل قبين و المعدات خاتنا ورا في صندوق العربيه ، وقفنا شويه و فطرنا و لؤي نزل جاب لينا حاجات زياده ، لمن الساعه 2 ظ جات نحنا ياداب وصلنا الجبل ، قلت ليهو شكلنا حـ نصل نص الليل أو تاني يوم ، قال لي أصلاً ، المهم استمر في السواقه و لارا نامت و أنا ذاتي نعست فـ رجعت لـ ورا و غمضت عيوني و نمت ...
المهم لحد اليوم التاني نحنا وصلنا الدمازين و الرحله كانت متعبه شديد و مرهقه ، نزلنا في بيت الراجل القالتو لينا سارا و ما شاء الله هو و ناس بيتو ما قصروا مننا والله استقبلونا بـ حفاوه و ضبحوا لينا عديل و حسسونا اننا منهم و فيهم ، بتنا معاهم هناك و تاني يوم طوالي مشينا لقرية أهل عماد ، طبعاً الشبكه هناك كانت كعبه شديد عشان كدا ما قدرت اتواصل لا مع سارا لا مع ناس البيت....
كُنتُ أَعتذر لك ، ولا أَدري ما هو خطَأي ،
فقط كان همَّي أَن لا أَفقدك
يتبع.....
قدرت اشحن تلفوني فـ كتبتو و نزلتو 🦋